ابي والغزلان
للكاتبه Reem
البارت الواحد والاربعون
مر بأثنينهن گربك والفراك
وعجيبة انت بمرارك ولعتني
لاني العايفك لاباقي وياك
ولا عندك ضمير وساعدتني
أجيلك يمنى يسره ادور وياي
وعلى الحبلين خايب لاعبتني
المصيبة تحبني أحسك قسوتك ليش
وتثور وتنفعل لوما شفتني
ختيله بمحبتك تلعب وياي
اول مااصيدك زاعلتني
واذا حاجاني غيرك تنگلب نار
يخايب شنهي فلمك دوختني
حايط مو بشر تتصوره الناس
من كد ماحظرتك فطرتني
هسه شلون تبعد تبقى وياي
بروحي وبلعشك مو كرهتني
سليل : الايام الي بعد مدخل عليه للغرفه جانت هادئه لدرجه كلت جنت احلم مستحيل سجاد يسويها هذا خيالي اني مو باله اصلاً لان تصرفاته ابرد من الثلج وهم تعلمت على طبعه وكمت ماادقق على تصرفاته هاي اذا شفته لان اكعد الصبح ماكو طالع للمحل الظهر كام ميجي يتغدا اكل وحدي وبليل لو يتعشى وينام لو ميتعشى اصلاً ومباشره يتمدد وينام يعني زين اذا شفته ١٠ دقايق
واليوم اول ايام المدرسه بدلت ولبست صدريتي وقميصي وحطيت الربطه على راسي رغم غزل ماكو بس تعلمت من اروح للمدرسه البسها وطلعت لكيته يدخن بلهول يروح ويجي
صباح الخير
سجاد : صباح النور يله نتريك
سليل : لا اسويلك بس الك مجوعانه
سجاد : الدوام طويل لازم تتريكين او على الاقل اخذي لفه وياج
سليل : راح اسويلي لفه وهم احضرلك الريوك
سجاد : اتريك ويه عمران هاج
سليل : مد ايده وانطاني فلوس كتله هاي شنو
سجاد : مصرف اخاف تحتاجين تشترين شى من الحانوت
سليل : لا شكراً لفه كافيه
سجاد : اخذي ولتعاندين ويوميه مصرفج تاخذي
سليل : بس مااحتاجه واذا احتاج اخذ من رشا او عمه
سجاد : انتي مسؤوليتي ومصرفج مني ولتعيدين هذا الحجي لتسمعين حجي يزعلج مني هاج
سليل : اخذت الفلوس وحطيتهم بلجنطه وسويت لفه وطلعنا نتمشى بلشارع احس تكول موديني سفره من كد ماجنت مخنوكه ومااطلع وصلنا لبيتنا ناخذ رشا طبيت ركض من فرحتي طبيت للمطبخ اعرف عمه هيج وكت بلمطبخ طبيت على كيفي وبستها جان تكمز عاطت من شافتني وحضنتني حيل وبقت تبوس بيه
نهر : يمه اروح فدوه للصباح الي انتي بيه والله هسه بالي كلت سوده عليه كل سنه هيج وكت اسويلها لفتها وانتي دخلتي
سليل : اوي فدوه للحنينه سويت ماما ليضل بالج
سجاد : واني ماكو لفه اليه
نهر : هههه صباح الخير من عيوني تعالو تريكو
سليل : لا عفيه تأخرنا وين رشا وريم
ريم .. اني اجيت
سليل : هلا هلا بريم الفله
ثلل اشتاقيتلج شوفيني وتفتر بلصدريه صرت اول متوسط واروح وياكم
سليل : فدوه للكبرت اهم شى خلص منج سحليه جان تندك الباب ويطب
حسين : صباح الخير
ريم : شفتي اجه
سليل : شجابك نسيت هي بعد ويانه
حسين : لا اني اوديها
سجاد : خلصت مهمتك يابطل اذا تكدر اخذ غزل وياك
حسين : ميخالف اخذها وريم وياها
ريم : اروح ويه خواتي
حسين : هاا هيج بسرعه نكرتيني
ريم : سحولي لتزعل غير صرت بلمتوسطه
حسين : يله غزل امشي
غزل : هلو ماما
سليل : اموت على كلمة ماما منج تعالي ابوسج طاك گلبي عليج حيل حضنتها وابوس بيها
غزل : باي راح اروح ويه حسين وانتي ريم متجين ويانه عيني عيني
ريم : عمو خلي اروح وياهم
سجاد : وين رايحه طريقهم غير طريقج امشو يله
رشا .. صباح الخير ياقوم يله تأخرنا
سليل : طلعنا كلنا اباوع على عمه من توكف وتودعني كمت انسى هي عمتي حنيتها وخوفها علينا خلانا كلنا نحسها امنا
وهنا وانضمت للمجموعه بيان شكد جنت فرحانه بخواتي ولان رايحين للمدرسه طفت فرحتي من شفتها تسلم عل سجاد وعيونها تاكله اكل بس هو رد السلام ومهتم الها بس اني طول مانمشي عيني عليها لو بيدي اكطعها
دخلنا للمدرسه وبلفرصه نلتقي تلاثتنا ونكعد ناكل كمت انتظر الفرصه دقيقه دقيقه حتى اكعد وياهن ونسولف ريم متقربت من احد ولا حتى حاولت تسوي صداقه مثلي بقت ويانه ومر اليوم الدراسي بأحسن مايكون واجبات وتحضيرات وبلرجعه وصلنا البنات للبيت واني كملت الطريق ويه سجاد
ورجعنا للشقه دخلت ركض للحمام اسبح حاره اني من يوم مااجيت هنا بلشقه لا ادخل حمام ولا اسبح طول ماسجاد بلشقه ولان اكثر الاوقات هو مموجود ماخذه راحتي بس هلمره فلتت مني ونسيت من التعب والنعاس توقعت طلعت لان سمعت صوت مفاتيح سبحت وطلعت جنت بس ماخذه المنشفه لفيتها على جسمي وطلعت وصار بوجهي ياالله شصار بيه قطره دم مابيه لا بيه ارجع للحمام واسد الباب ولا بيه ابقى ياكاع انشكي وبلعيني هو انصدم من شافني وجان يدنج اني ركض للغرفه حتى ردت اتزحلك من الارتباك طبيت وسديت الباب احس وجهي نار واكول صخام بوجهج سليل شون شافج هيج رحت للمرايه اشوف شطالع مني لكيت جتوفي كلها طالعه ونص رجلي لان المنشفه جبيره ولافه نفسي زين متت خجل بدلت وكعدت وكل مااتذكر الموقف اريد ابجي من المستحه هسه شيكول عليه شويه واندكت الباب ودخل
سجاد : متتغدين
سليل : هااا اي اجيت
وصبيت الغدا الي انطتنياه عمه جان برياني واتفقت ويانه كل منرجع للمدرسه اخذ الغدا ويايه تعزل من غداهم النا مقبل سجاد بس هي دكت رجل حتى مااتعب وهم تعرف بيه مو قويه بلطبخ
سكتته عمه من كالت اله هو نص المصرف منك لو نسيت يعني مماخذ شى مني ولا من البنات عاد هو سكت وقبل
كاعدين ناكل بهدوء انذب الابره نسمع صوتها لحد مكال بنبره هادئه وهو ياكل
سجاد : انتبهي مره ثانيه من اطلعين من الحمام
سليل : كوه بلعت اللكمه وجاوبته والله عبالي مموجود
سجاد : وطلعي ملابسج وياج لتعوفيهم
سليل : اني هيج گلي لو اريد ادفن روحي من الخجل شكد ثوله ياالله شون نسيت
كولشي مكلت بس صار
شكد جان البرياني طيب بذيج اللحظه مكدرت اكمل وكمت
سجاد : وين
سليل : شبعت
سجاد : مأكلتي شى
سليل :مجوعانه حيل رحت سويت جاي اله وشلت المواعين ونظفت ورايه ورحت للغرفه حتى بوجهه مباوعت من الخجل نمت الظهر عشقي نومه الظهر لازم ساعه او ساعتين على الاقل انام كعدت لكيت روحي وحدي بلشقه طلعت البرياني وحميته ميته جوع مكدرت اكل وياه شأكل بعد الي كاله
سويت ماعون وكعتله دك من الجوع وراها طلعت كتبي وكعدت اقرا بلبالكون صارت مكاني المفضل لحد مااجه بليل اني اصلاً شبعانه من اكل العصر وهو متعشي متعبت مباشره حظرت كولشي ونمت
ثاني يوم داومنا والصبح هم اجت العوبه بيان وبلرجعه ماكو استغربت وينها ومن وصلنا للبيت اخذت الاكل من عمه وجريت رشا على صفحه اكولج بيان وين
رشا .. مااعتقد بعد تجي ويانه
سليل : ليش
رشا .. سألتني اليوم كالت شفت سليل راحت ويه سجاد بملابس الدوام مدخلت لبيتكم بس من الباب
سليل : عزه بس لا كلتي الها
رشا .. لا بس كتلها لتزعلين وتضوجين عمو سجاد تزوج وزوجته حامل وسليل تبات يمهم لان زوجه عمو حملها بدايته ولازم متتحرك الدكتوره كالت اخاف يوكع وسليل تبرعت تبقى يمهم لحد متجيب لهذا كام عمو ياخذها وياه
سليل : وشكالت
رشا .. ولج اني كلت راح تموت من البجي والخنكه الصارت الها كوه سكتتها والصراحه متت قهر عليها بس هيج احسن حتى تأيس منه عايش بحب ماله نتيجه
سليل : وشجابها الفكره بالج ولج الشيطان يتعلم منج
رشا .. شسوي اكيد يوميه راح ترحين وتجين ويه عمو وكل شويه عذر مترهم هو عذر واحد وانتهى ومكدرت اكول الها تزوجها راح ادخلني بسين وجيم ومردت هم احد يعرف بلمدرسه انتي تزوجتي وهم حتى تغسل ايدها منه
حضنتها اووف احلى خبر والله
رشا .. هاااا هيج غيرانه على عمو
سليل : وخرتهامن حضني شنوو غيرانه شو انتي مرات متعرفين تحجين
رشا .. ههههههه باعي وجهج تفح من عرفتي بيان بعد متجي ويانه
سليل : اروح احسن بديتي تخربطين بلحجي
رشا .. افلتي يجي يوم وتحجيلي
سليل : ولي يله خبله وطلعت اضحك من الغرفه ولكيت سجاد ينتظرني وطلعت وياه حسيت براحه غريبه لدرجه ابتسم مثل الهبله وحدي لحد مكال تره احنا بلشارع شنو هذا التمضحك
خفيت ضحكتي وسكتت وصلنا للشقه كمت احب ارجع الها احسها مالتي بيتي عشي الصغير
ايامي خلصتها بلدراسه وهو اكثر الوكت بره تعلمت على وقته بس الجنت مااحبه ميخليني اغسل ملابسه جنت اتمنى اساعده بس هو ميقبل ومردت اضغط عليه عفته براحته
اجه الشتا جانت الشقه بارده وهو اشترى زوليه وفرشناها سوه جنت احب نتساعد بلشقه صح هو ميباوع بوجهي وجهه كل الوكت كالبه بس مجرد ميجمعنا مكان او شغل ارتاح اني بعد مظهرت اله اي شى من مشاعري كمت اتعامل بهدوء وعلى كد السؤال والاكل وبس
جنت حذره لدرجه مااريد اي تصادم وياه
اهم شى جان مفرحني خلصت من بيان وكامت متجي ويانه مرات انقهر واكول هي هم مثلي حبت من طرف واحد بس حبي اله وانانيتي وغيرتي عليه خلتني مااحب احد يتقرب منه
اجه رمضان ورحت اكثر من مره افطر يم عمه والبنات وهمه هم يجون يمي من نكعد كلنا على الفطور احس الدنيا مواسعتني من الفرحه جان بس بابا ناقصني وتكمل فرحتي
حتى حسوني يجي يمنا يفطر واكيد انعام متفوتها هيج فوته وتفتر وراه بس متدري هو اذكه منها ومتفق ويه صديقه من يسألون عنه يكول الهم يمه كل الوقت وهو اصلاً يمنا كمت احسه جزء من عائلتنا سبحان الله ولا عبالك ابوه علي وامه نوريه وبيبيته انعام ام راس البله مرات من اشوفه اكول المفروض حسام بمكانه كاعد بين خواته مو دار وجهه ونسانه ولو تعلمنا على عدم وجوده بس كل وحده من عدنا بداخلها تتمنى اخوها يمها يشاركها كولشي ويصير حزام ظهرها وسندها وامانها بس مع الاسف عدنا اخ بس بالاسم
كاعده يم الصوبه لافه نفسي بلبطانيه شهر ١٢ سنه ٢٠٠٠. بارده كولش ومطر وقبل شويه فطرنا بس هو يطلع وره الفطور ساعتين او اكثر ويرجع ولازمه الكتاب واقرا ودخل باوع عليه
سجاد : والله فززتيني بعد لفي نفسج بلزوليه
سليل : الله يساعدك شسوي غير من البرد
سجاد : اجيبلج بعد صوبه
سليل : لا هاي كافيه اسويلك شى شعجب رجعت من وكت
سجاد : مطر والشوارع فارغه كلت ارجع ليش تردين ارجع اطلع
سليل : لالا بس هيج سألت
سجاد : هااج
سليل : شنو هاي
سجاد : لبلبي وصمون ابو عربانه فات واشتهيته خلي بكاسه وحامض عليه وتعالي ناكل
سليل : هسه فطرت مجوعانه
سجاد : تعالي ويايه على الواهس
سليل : ماشي كمت واخذته من ايده ورحت للمطبخ وحطيته بكاسه واني اعصر الحامض عليه تذكرت بابا هيج وكت قبل سنين يطلع يشتغل كمت ابجي واتذكر شلون بلبروده يطلع من ٥ الفجر وشون الليل كله ينظف بلحمص وينكعه ويسلكه على الجوله وسولتي يم رجله اتحرك وكل ميشوفني يبوسني واكوله بارده بابا لتطلع يضحك ويكول اهم شى انتي دفيانه وشبعانه نومتج انتي واخوتج مرتاحين تروح التعب والبرد كله متحملت كمت اشهرك وعفت الحامض من ايدي وكعدت بلكاع ابجي
جان يطب سجاد تفاجأ وكعد كبالي
شبيج سليل شصار احجي
سليل : وخرت ايدي من عيوني وكتله اتذكرت بابا
سجاد : وكعتي گلبي عبالي صار بيج شى
سليل : شيصير اكثر من حرماني منه
سجاد : ادعيله ينطي العافيه ويجوز يجي يوم وتشوفي ربج كريم
سليل : اريد اشوفه سجاد
سجاد : لو ما قبل كم شهر شفتي
سليل : مشتاقه حيل اله شكله وصورته متروح من بالي
سجاد : كومي غسلي وكافي بجي يجي يوم وتشوفي
سليل : لزمني من ايدي وكومني اخذت الصينيه ورحنا للصاله وكعدنا يم الصوبه
سجاد : تعالي اكلي ويايه
سليل : مااريد
سجاد : مااكل اذا متاكلين
سليل : كعدت كباله وبديت اكل جان تطفى الكهرباء موعدها ساعتين بقى بس ضوا الصوبا اكوم اجيب اللاله
سجاد : عوفيها
سليل : ليش
سجاد : هيج الجو احلى وضوا الصوبه كافي
سليل : رجعت كعدت جان جو بارد وصوت المطر رفعت عيوني لكيته يباوع ودنج من شافني رافعه عيني كملنا الاكل وشغلت اللاله واخذت الصينيه للمطبخ وحطيت اللاله قريب مني وبديت اقرا بسبب الظلمه والدفو وصوت المطر غفيت بلكاع قريب الصوبه حطيت ايدي جوه راسي وغفيت بس مو بعمق نعسه اجتني
حسيت بتقربه مني مفتحت عيني متأكده هلمره مكعد احلم ولا اتخيل حسيت بأنفاسه قريب مني بس مو حيل بس احس تلامس وجهي هلمره طولت الانفاس بعد متحملت وفتحت عيني على كيفي وجان اشوفه نايم بصفي بينا شبر تقريباً حاط ايده جوه راسه مثلي وجهه بوجهي مكدرت بذيج اللحظه لا اكوم ولا اتحرك ردت بس احس بلي صار سجاد نايم بصفي واشم ريحته وانفاسه زين ليش تقرب مني لهاي الدرجه
وليش منام بمكانه بقيت صافنه عليه شون نايم تقربت بهدوء ردت بعد احسه وتقربت بهدوء حتى ميفز وصرت اقرب بعد اصبع وجهي يلامس وجهه ااااااه ياانفاسك اول مره اصير بهيج قرب منه وغمضت ردت احس روحي نايمه بحضنه وصلت مرحله بلحب اله لدرجه اعشق الهوا الي يتنفسه
غفيت اول مره انام من وكت كعدت على صوته فتحت عيني جان يكول ليش نايمه هيج
باوعت عليه واكف ومبدل
ساعه بيش
سجاد : بلسبعه يله وراج دوام
سليل : نمت محسيت ليش مكعدتني على السحور انت مو جنت كاعد ردت اشوف شيكول
سجاد : اني نمت على القنفه ماادري بروحي كعدت قبل شويه حتى السحور و الصلاه مال الفجر فايتتني
سليل : باوعت هيج عليه
سجاد : شبيج
سليل : هااا لا مابيه اكوم اغسل وابدل
كمت والابتسامه بوجهي هلمره مجنت احلم والله اذا من وراه حتى مكملت قرايه وكل مااتذكر الصار گلبي ينبض وابتسم فرحانه
وصلني للمدرسه جنت شاطره واشارك ودرجات زينه والمدرسات حبابات ويايه بس ماعندي صديقات بنات الصف كلهم على كد السلام وبس وبلفرصه اخلصها ويه رشا وريم
جانت رشا دوم تحجيلي على ماما شون ادك ناعم وياها حتى تقنعها ودوم رشا تصدها لان مبين ماما افتهمت طبع رشا متجي بلتهديد واول متزورهم تاخذ فره بلبيت اخاف اني بيه وراجعه الهم يعني حاربتنا بكل الطرق بس بدون صياح وعياط
مر رمضان واليوم اول ايام العيد كعدت صبحت عليه وعايدته وبدلنا وطلعنا لبيتنا عايدتهم وابوس بيهم من گلبي اشتاق هوايه الهم اول عيد مو وياهم كاعدين نسولف وبعدها صبحيه جان تكول عمه
نهر : ماطول مسويه جدر دولمه ناخذه ونروح لمدينه العاب يله سجاد ضايجين اخذنا
اني مدخلت خفت يضوج مني و ريم ورشا كعدو يتوسلون بيه وباوع عليه
سجاد : ترحين لمدينة الالعاب
سليل : بكيفك
ريم : حبابه ثلل كولي اي لا بكيفك
سجاد : زيبك انطي صبر خلي نشوف
ريم : عفيه عمو والله ضايجة وعمه متقبل اطلع للمراجيح موتتني كبرتي وعيب
نهر : تريد ويه الجهال تلعب هاي شوكت تكبر ماادري
ريم : مااريد اكبر اريد اروح العب وحتى ويه سحليه متقبل اطلع
سجاد : يمعوده انطي صبر
ريم : عفيه عمو حباب
سجاد : هااا سليل
سليل : بكيفك بس ياريت تقبل خطيه شوف حالهم
سجاد : يله بدلو وامشوو
سليل : اني جاهزه جنت جاي اصلاً مبدله جان يباوع عليه
هيج ترحين
سليل : اي شبيهه ملابسي
سجاد : مابيها بس القميص بيه كصر والربطه حاطتها هيج شمر
سليل : بس اني مو محجبه
سجاد : نرجع هسه للشقه تلبسين شى اطول والربطه تشديها عدل يله نطلع
سليل : والله مابيهم شى ملابسي ومرتبات وجدد حباب شلبس اذا ابدلهم
سجاد : كلمة ثانيه احلف يمين ما اروح
امشي بسرعه
سليل : روحو انتم مااروح ابقى هنا
سجاد : ابقي المهم مترحين هيج
سليل : عافني وطلع للطرمه يدخن واني متت قهر كوه اريد اطلع وهلمره طلعت سالفه الملابس
رشا .. اني كملت
غزل: واني هم كملت ماما حلو نفنوفي
سليل : يخبل حبيبتي وبستها
رشا .. شبيج سليل
سليل .. ما اروح وياكم روحو تونسو
رشا .. ليش
سليل : وحجيت الها
رشا .. تعالي عندي قميص جديد عمه خيطته اليه لبسي طويل ومستور
سليل : البس شى انتي ملابسته ولا متهنيه بيه شون يصير
رشا .. يمعوده فدوه الج المهم نطلع كلنا سوه والربطه هاي دنابيس كومه سويها مثل ميريد لتخربين طلعتنا عفيه
دخلت وياها للغرفه لبسته طويل وعريض والوانه حلوه ويه بشرتي حسيته حتى احلى من اللي لابسته
رشا .. خلي اجيب ربطه من عمه ربطتج لونها ميرهم وركض جابت الربطه وتعدل بيه
رشا .. ثلل ليش متحفين شواربج جنج زلمه خشنه
سليل : هااا لا عيب
رشا .. هو شنو العيب انتي مره متزوجه وشواربج والله ينحلف بيهم
سليل : اخاف متقبل ماما نهر
رشا .. انتي مره متزوجه ليش متقبل
سليل : كل شويه وكالت متزوجه يمعوده كلاوات زواجنا لو ما تعرفين كولشي
رشا .. اوكفي اصيح عمه
جابتها واجت تركض
يله عمه والله بس شواربها شوفيها حتى عيب وجهه مابيه ولا شعرايه يخبل وحواجبها عوفيها عادي بس شواربها تخزي
نهر : تعالي ماما احفهم الج
سليل : اني هم كعدت كبالها مكيفه
وبدت تحف واني اكمز لان اول مره وحفتهم وجابت مكص بس كصكصت حواجبي ترتيب بس متاخذ شى منهم عبالك وجهي كله تغير
رشا .. ايي هسه طلع وجهج والله طلعتي تخبلين
سليل : يابه طيري وين اخبل شحالني
رشا .. عمه بربج شونها
نهر : بنتي من الاول حلوه بحف وبدونه
رشا .. حجي يفيدكم غير جنها مكلف بلشرطه هي وشواربها
سليل : كفختها على راسها ليش ولج زين وهسه
رشا .. ههههه لا تخبلين
سليل : طلعت اله جان يروح ويجي ويدخن عفيه جكاره ولا تنزل من ايده
كتله هاا هسه
باوع عليه من فوك ليجوه وكتله عريض وطويل حيل وحجابي سويته
سجاد : لو باقيه على گبل احسن
سليل : شنو يعني
سجاد : لا ماكو شى
حسيته ضاج اكثر مااعرف ليش وكل شويه يباوعلي لحد مكملنا كلنا وطلعنا بلباب شفنه حسين اجه من بعيد شافنه نطلع اجه يركض سلم وعايدنه ومن عرف نروح لمدينه الالعاب جلب ويانه
نهر : عمه غير تكول الهم اخاف يضل بالهم يدورون عليك
حسين : عمه هو كتلهم اتأخر يم اصدقائي حاسب حسابي اخلص اليوم يمكم
راح سجاد يجيب تكسي من راس الشارع واحنا ننتظره بلطرمه
ريم : سحليه وين عيديتي
حسين : هاج شون انساها شيخلصني
سليل : شجابلج
ريم : الله حلوه هاي شوفي ثلل محبس على شكل شبجه سوده وكلاده نفسه شبجه سوده مثل الخناكي بلرگبه يصير
سليل : بلعافيه حبيبتي تعالي البسها الج
لبستها الها حلوه كولش
رشا .. واني ولك سحليه مو بت عمك لو بس ريم تجيب الها
حسين : هااا نسيت
نهر : ههههه ولج عوفي لتخجلي
رشا .. لا يراد اسوي مثل زيبك حتى يذكرني
ريم : لتحجين عليه هذا صديقي وحدي بس اليه يجيب دير بالك تجيب لأحد
حسين : لا مااجيب شفتي رشا تعليمات ساسوكي مااكدر اكسرها
رشا .. ضل وراها لهاي الخبله اله بيوم تخبلك مثلها وانتي شعنونه بلبيت اذا مااخذ العيديه منج واخليج تكمزين
ريم : اضمها بمكان لو تموتين متلكيها واذا اخذتيها اخذ صوره محمد فؤاد الي معلكتها بلكنتور واشكها
رشا .. شحدج غير اموتج
نهر : ولجن كافي مثل الضراير بس تتعاركن
سليل : ههههه عوفيهن ماما
نهر : هاي مو اختهن حسها مااسمعه
سليل : غزوله اوي غير نسمه من هي وصغيره مينسمع صوت الها تخبل تضحك غزل خجلانه
شويه واجه سجاد جايب اثنين تكسيات لان متكفي
جان يكولي انتي تعالي ويايه ورشا وغزل
والتكسي الثاني حسين وريم ونهر
كتله اروح ويه ماما نهر
سجاد : كتلج ويايه يله اصعدي
صعدت ليوره اني ورشا وغزل وهو ليكدام وذاك التكسي حسين ليكدام وماما نهر وريم ليوره وانطلقنا لمدينه الالعاب
وصلنا وفرشنا فراش ورتبنا كلشي كالت ريم اريد اروح العب
سجاد : حسين ريم ورشا وغزل امانتك متعوفهن لحظه تعرف شنو لحظه
حسين : صار يله بنات
سجاد : هاك فلوس
حسين : عندي عمو
سجاد : ميخالف هاك وشيحبون يركبون صعدهم اريد ترجعهن ميكدرن يمشن من التعب بس لتركبهم الخطرات حيل
حسين : هههههه تأمر امر
سجاد : مااوصيك بعد عينك متغفل عليهن لحظه تره هوسه وشباب واذا صار شى ارجع واني اوديهن
حسين : لا لتخاف يله بنات
سليل : راحو واني بقيت صافنه عليه وكتله زين واني
سجاد : انتي هنا تبقين قابل طفله وتردين تلعبين
نهر : اي شكو بيها خليها تلعب واكثر الالعاب مال كبار اصلاً
سجاد : ماكو تكعد هنا وتتفرج
سليل : باوعت عليه وحصرتني الدمعه حتى هنا حبس كتله اني بعد مااريد وراح ابقى كاعده
هو هم سحب جكاره ورث وراح بعيد يدخن
نهر : على كيفج امي هسه بس يرجعن البنات اخذج ونفتر اني وياج
سليل : لا مااريد ماما خليني كاعده
وبقيت حاطه ايدي جوه خدي واباوع على الناس وصار وكت الغدا صبينا الاكل واجوي البنات وحسين تغدو وراحو مره ثانيه جنت ممرتاحه لان متحركت من مكاني حتى من اكلت شويه ورجعت نفس كعدتي وهو كل شويه يباوع عليه واني مااباوع بس جهرتي انگلبت من الضوجه
زاد عدد الناس لان راح يصير العصر جان يكولي
سجاد : كومي
سليل : وين
سجاد : كومي بدون حجي زايد
سليل : كمت نفضت ملابسي وكفت يمه
سجاد : عادي اذا تبقين وحدج نهر
نهر : ههههه شكو عليه قابل راح يبوكوني روح ونسها بروح ابوك مو حتى الدمعه بعينها من الضوجه
سجاد : والله شفتها وشافتني الدمعه بعينها مو عين تكول مجرى الدمع مالتها مربوط بدجله
سليل : باوعت صفح اله
سجاد : باعي عدل لا افكسهن
سليل : مشيت خطوه عنه ودت وجهي
كمنا نتمشى ودخلنا بين الالعاب جان يكولي تعالي
وكفنا يم سفينه نوح قطع مال نفرين وصعدنا اني وياه جنت اول مره اصعد ومتحمسه بنفس الوقت
بدت تتحرك اللعبه وتروح وتجي واني عطت من الخوف مكدرت جان الزم سجاد وهو يضحك عليه
سجاد : لعد بس تعرفين تضوجين وتگلبين خلقتج
سليل : اعيط واكول اله نزلني فدوه
سجاد : شويه وننزل
سليل : وبدت تصعد اكثر ليفوك واني انتهيت جان احط راسي بحضنه من الخوف واصيح ماما لحكيني قصدي على ماما نهر وميته خوف واعيط وهو طكها ضحكه اول مره اسمع ضحكه سجاد حتى من يضحك ابتسامه بسيطه بس ولا مره سامعته ضاحك
بحيث وخرت وجهي من حضنه كلت اخاف متوهمه مو ضحكته بحيث من شفته يضحك عليه لان خايفه والله نسيت الخوف وضحكت على ضحكته
تالي وكفت لو ما واكفه بعد دقيقه جان خربت من الخوف نزلت دايخه جان يلزمني
سجاد : اذا مو كد اللعبه المن بعد ضجتي لان مااخذتج للعب
سليل : شمدريني هيج
سجاد : تعالي اشربي مي وجهج اصفر صار
شربت مي وراها تمشينا صارت هوسه وهو كل شويه ياخذني يمنه يسره موتني حتى لحد يطخني تكول حارس ويايه
سجاد : تعالي جان يلزمني ويمشي اوف الله من لزم ايدي والله گلبي دكاته اعلى من صوت الالعاب
اشترالي شعر بنات جنت طايره وياه كل الضوجه الصارت راحت بلحظه كال تلعبين بعد
كتله لا دخت واخاف كال براحتج جان يسحبني من ايدي واخذني على البحيره وكعدنا هناك جان الجو يخبل لان اصلاً العيد جان شهر ١٢ نهايته والجو بارد ثلج بس محسيت لان هو ويايه
بقينا ساعه كاعدين بدون حتى منسولف بس متونسه واباوع على البطات وهو يكرز حب واني هم وياه لحد مااجوي شله ولد يدكون ويركصون كال كومي كافي
سليل : خلي نبقى بعد عفيه
سجاد : كومي سليل صارت هوسه
سليل : محبيت اخرب الوقت عليه ورجعنا نتمشى لكيت الكل ينتظرنا والبنات فحطانات من التعب والمشي واللعب
بس مكيفات رجعنا للبيت والحمدلله مصارت اي مشكله بس ريم وحسين متزاعلين لان نزلها من لعبه كعد ولد بصفها والولد ميقبل ينزل حتى حسين يكعد يمها هو كوم ونزل ريم وهاي طنكرت لحد محجيت وياها وكتلها حقه اخاف يطخج هي جفلت وكالت شحده اموته كتل
كتلها هي مال كتل عليمن هاي المشاكل انزل وخلص
وصلنا تعبانين ودخلنا وبقت ريم وحسين بلباب
حسين : رايده هي
ريم : اي
حسين : شنو
ريم : لتزعل مني
حسين : اني ما ازعل منج بس انتي بس تتزعلين اني اخاف عليج وانتي بسرعه تكلبين وجهج
ريم : يله بعد مااكلب
حسين : روحي طبي ارتاحي
ريم : سحليه
حيبن : هااا
ريم : شكراً على العيديه كولش حلوه
حسين : المهم عجبتج
ريم : كولش
حسين : روحي ارتاحي وديري بالج على نفسج
ريم : باي سحولي
حسين : هههههه باي ساسوكي
سليل : رجعنا للشقه ميته تعب ومباشره غسلت ونمت خلصت باقي ايام العيد بلشقه عادي مهتميت المهم تونست اول يوم بعد مخلص العيد بيومين اجت راس السنه
اليوم راس السنه راح ندخل سنه جديده سنه ٢٠٠١
مداومنا طبكناها ويه العيد تمنيت اقضي راس السنه ويه البنات
سجاد : اوديج للبنات
سليل : اخاف ماما تجي وتسوي مشكله
سجاد : خلي تولي جايه زياره لخواتج
سليل : هي اكيد تتوقع بهيج يوم اجي مشفتها اول يوم العيد جايه بس احنا جنا طالعين ومن اجت ثاني يوم مباشره سألت عني بس عمه كالت لا مشفناها بس تكول مصدكتني يعني تعرف بلمناسبات احنا سوه
سجاد : والله انتم مكبرين راسها بابا خلي تولي واطب واكسر عينها ليش هيج تخافون
سليل : احنا نخاف تاخذ البنات
سجاد : والله انتي وعمتج اكبر جبانات ولو سامعات كلامي مجان وصلنا لهنا
سليل : صارت بعد اني باقيه هنا
سجاد : بس اني اتأخر معزوم ويه اصدقائي
سليل : لوين تتأخر
سجاد : مااعرف يجوز للفجر شون ابقيج وحدج
سليل : ماعليه شى
سجاد : شون ما عليج امشي اوديج للبنات
سليل : ليش مترجع من وكت
سجاد : كتلج راس السنه وسهره ويه اصدقائي
سليل : خلي البنات همه يجون يمي ماريد اروح هناك اخاف يصير شى
سجاد : هسه اجيب البنات واجي
راح ورجع كال نهر راح تجي هي والبنات يمج وصيتها اذا تكدر تبات يمج مااريد تبقين وحدج
سليل : ماشي
سجاد : اريد ابدل بلغرفه
سليل : اخذ راحتك ودخل اكثر من نص ساعه واني كاعده اكل بأضافيري من القلق والضوجه وهم من الغيره اكول اكيد اكو بنات قابل بس ولد طلع كاشخ تكول عرسه والعطر يفحفحً وراه وهو مزين قبلها بساعه طلع عريس اختنكت حيل
سجاد : بيج شى
سليل : هااا لا
سجاد : رايح اني
سليل : روح الله وياك
سجاد : لتفتحين لباب لبشر
سليل : ادري بس لعمه والبنات
سجاد : وقفلي زين بليل
سليل : صار عافني وطلع ردت اكطع روحي
بحيث ركضت للمغسله اذب على وجهي مي مااريد ابجي احس گلبي راح يطك من الغيره
شويه واندكت الباب كلت اكيد عمه والبنات مسحت وجهي وصحت منو
حسين : اني سليل
سليل : فتحت الباب هاا حسين خيرك
حسين : عمه تكول منكدر نجي امج هسه اجت وكابلتنا وكعدت اذا راحت من وكت نجي
سليل : كول الها لتجون اصلاً منريد مشكله واني راح انام من وكت ليضل بالها
حسين : تردين اجي يمج اخاف تخافين
سليل : لا تسلم بس سلملي عليهم
حسين : محتاجه شى عشه صمون اي شى
سليل : لا فدوه لعينك كولشي عندي
حسين : قفلي زين
سليل : ماشي جنك سجاد صار استاذ حسين
راح وسديت الباب وقفلت
اخاف اني ممخنوكه اختنكت بلزايد
هنا بعد لا مي يفيد ولا تغسيل طكيت بجي يعني فوك ما مأذيتني وطيحت حظي تحاربني اشوف عمتي وخواتي يعني بس لو افهم شنو هذا گلبها ميحن مينقهر لو مربيتلها جلب هم ينكسر خاطرها عليه
بقيت ابجي لحد متعبت اخر شى غسلت وكعدت كابلت تيفي الشباب جان بوكتها برنامج سهرايه حلقه خاصة عن راس السنه كابلتها وكعدت تعشيت سويت لفه جبن وجاي وراها سبحت ومشطت شعري وكعدت على القنفه دفو الشقه وسابحه وتعبت من البجي نمت على كعدتي فزيت على دكة الباب رفعت راسي اشوفها ساعه ٤ الا ربع الصبح ركضت طفيت التلفزيون ومرعوبه كلت منو
عمران : اني عمران افتحي الباب
سليل : شتريد عمران كمت ارجف من الخوف
عمران : جايب سجاد ويايه
سليل : بسرعه ركضت جبت روب جان عندي قديفه عمه اشترته اليه لبسته فوك بجامتي وحطيت الربطه وفتحت الباب على كيفي والكه سجاد مطوطح ولازمه عمران
جفلت وفتحت الباب كله شبيه عفيه شبيه
عمران : ثكل بلشرب وجبته
سليل : لطمت على صدري شارب بس هو ميشرب ويصلي
عمران : اي اول مره جماعه اصدقائنا عزمونا اني مثكلت بس هو داس بلشرب لحد متشوفين حاله خلي ادخله مو جتفي راح
سليل : خفت ادخل عمران لان هم شارب بس احسه صاحي اله سجاد رايح منتهي يخوط بصف الاستكان
انطيني اني ادخله
عمران : وين بيج حيل
سليل : بيه وسحبت ايده وخليتها على جتفي وامشي بيه دفرت برجلي الباب بوجهه عمران وانسد واكو سقاطه قفلت الباب وكوه واكفه عثرت وهو ويايه وكومته وهو يغني
سجاد : بسكوته اون بسكوت انه ماورج احد فاضحني دمع العين بويه يسجب على الخد
سليل : صوتك فدوه باوعت مو مال اخلي على القنفه هسه يوكع كبل امشي للغرفه وهو كوه يمشي ويايه ويغني بصوت عالي هرج الدنيا
دخلته كوه للغرفه اريد بس اوصله للجربايه وهو الله يسلمه ثكيل ويطوطح بلحركه حيلي راح وصلته وكعت وياه على الجربايه اريد بس اجر نفس اتنفس بقوه نزعت الروب صرت نار والربطه وكعدت على الجربايه باوعت عليه وحالته عجيبه مدري اخاف منه مدري انقهر لان شارب جان يرفع راسه ويضحك ويكول شجابج هنا حتى هنا ورايه من احتركت سندس بكاز وصخ روحي مني خفت منه شبيه ردت اكوم جان يتقرب ويسحبني حيل من ايدي جفلت كلت بس لا يسوي شى جان يجرني بقوه ذبيت النعال وصعدت على الجربايه جان يحط راسه على رجلي اريد اخذ نفس كوه اجره خوف على قلق على ارتباك
ويباوع عليه ويسولف انتي هنا لو اتخيلج
سليل : سكتت كام يون وتالي كتله شنو اليوجعك سكت شويه وكال
سجاد : انتي
سليل : اني ليش
سجاد : اريدج ترحين كافي تعبت وجودج يمي تعبني هلكني اني كعد اجاهد مااريد اشوفجً روحي مني مابقى حيل اتحمل
سليل : كتله بصوت هادئ سجاد شبيك
سجاد : بيه انتي واريد اطلعج مني
سليل :مديت ايدي بهدوء على شعره وامسد بيه اعرف بيه مو بوعيه بس ردت اسمعه وكتله ليش اطلعني هيج اني مأذيتك يحجي ويجر بلحجي لان سكران
سجاد :اييي كولش داموت كل لحظه واني ادري بيج حلالي ومااكدر المسج وحتى ممنوع عليه اباوع عليج اخاف عيوني تفضحني
سليل : سحبت نفس وگلبي يدك بقوه بقوه وكتله انت تحبني
سجاد : هههههه احبج ههههه لا ما احبج اكرهج اموت منج اريدج ترحين رووووحي لخاطر ربج روووحي
سليل : غمضت عيني بقهره جان يحضني حيييل وصعد حط وجهه بصدري تفاجأت من حركتة بس كولشي مسويت حتى موخرته من عندي ويحجي
اني يوم مشفتج شفت اختي هبه نفس البرائه نفس الخوف نفس الطفوله جنت اريدج تصيرين قويه مردت اتصيرين مثلها جبانه هي هم جانت تبجي من كولشي لو شويه عدها قوه مجان قبلت تاخذها امي وتروح وبديت اعاملج بحديه حتى متخافين جنت اعرف بيوم امج راح ادك الناقصه جنت اقرا وجهه وطمعها ومن انسجن طه كمت اخاف عليج اضعاف شفت بيج وبخواتج الاهل الي ادور عليهم ويوم الحرك راد گلبي يوكف خفت حيل عليكم جنت اعتبر نفسي اخوكم وابوكم ردت اعوض نقص الاهل بيكم بس يوم مجاج الولد وخطبج تخبلت واختنكت ومااعرف ليش كلت اكيد لان اريدها تنجح مفسرت تصرفي واعصابي غير خوف عليج مجنت انظرلج غير اختي وروح ابويه ماجنت اشوفج بس اختي والقران مثل اختي وخاصه فرق العمر البينا بس من كالت نهر انت تحبها تخبلت وضجت وكلت اكيد هاي نهر ثوله فسرت خوفي عليج حب بس الصار كلامها فتح عيني عليج
وهنا بديت اركز على حركاتج مشيتج ضحكتج وكمت شون اشوفج تكبرين شويه شويه كدامي
سليل : سكت واني تنفسي سريع اريد اسمع بعد كتله بهدوء كمل سجاد
سجاد : حاولت اكثر من مره اقنع روحي واكول هي امانه لتخون الامانه سجاد هاي صغيره عليك وعيب عليك تباوع عليها غير بأخوه وابوه هي وخواتها امانه طه عندك ومو اني الاخون لتصير حقير وتحط عينك على عرض طه لتخووون سجاد وابقى اب واخ الهن
بس اني خنتها سليل خنتها الامانه
سليل : جان يحضني حيل وجهه بصدري ونزلت دموعه متت بدمي هو يحجي ودموعي تنزل بهدوء ويه كل كلمة يكولها
رجعت مديت ايدي على شعره وكتله ليش خنتها للامانه
سجاد : لان حبيتج لا مو حبيتج عشقتج لدرجه اخاف عليج من نفسي وعدت نفسي تبقين اختي وعدت طه وتالي خلفت بكلمتي وحبيتج والله حاولت شكد اسيطر مكدرت كلت ابتعد عنج انتي بلذات هلمره اجت امج الساقطه تريد تزوجج رحت لأبوج وكتله مستحيل تصيرين مره اليه كلت اعقد عليج بس احافظ عليج وروح ابويه وتراب الامام الحسين مجان نيتي شى ثاني مردت تضيعين وتتأذين تالي اجيتي هنا يمي ههههههه انهزم منج هلمره تقربتي اكثر بشقتي ومسدوده باب وحده علينا شفتي اني شون فكر ههههههه
سليل : وهذا الشى الي مأذيك
سجاد : مأذيني لا مكعد اتأذه اني داتكطع
تعرفين شون كعد اعاني من الانسانه الوحيده الي احبها حلالي وبيتي ومااكدر حتى اباوع عليها تدرين مرات اهج بلشارع افتر في سبيل ماارجع من وكت واكعد يمج كل حركة كل نفس تسوي بلشقه يزرف روحي مرات الليل اكرهه لان يجمعني بيج ومااكدر المسج واضعف مرات ماعندي شغل ابقى افتر ويه اصدقائي واني ميت تعب اكول اتعب اكثر حتى بس اطب وانام واول ماادخل للشقه واشوفج كدامي لو بيدي احضنج واحطج بروحي بكد ممشتاق الج حتى شغل كوه اشتغل كل مااتذكر انتي فوك بلشقه وحدج افور ومن اجه جيراني وكال شافج ردت اطب افلش وجهج شون اطلعين مااريد احد يشوفج لوبيدي حتى من المدرسه ابطلج وكوه لازم نفسي ماركعت راسج بلحايط
بس الي خبلني من كلتي تحبيني من صدمتي ضربتج والله ضربت نفسي مو ضربتج وبقيت بنار شون اخليج تبطلين تحبيني وكمت حتى مااباوع بوجهج بس گلبي ابن گلب كل شويه يخليني اباوع واتفحص كل جزء منج وانتي واكفه وانتي كاعده ومن شفتج غركانه بدمج فقدت كمت احضن بيج بلا وعي اريدج بس تصحين بكد ما احبج ما اريدج تتأذين وهم مااريدج تحبيني لتحبيني عفيه اكرهيني ابتعدي عني بس لتحبيني حبج زاد عذابي الضعف
سليل : حضنته حيل ليش مااحبك
سجاد : أذيج سليل اعرف بروحي راح ادمرج واني اموت ولا أذيج
سليل : شون تأذيني
سجاد : اني شكاك اشك بأصابيعي مرات حتى بيج اشك واكرهه روحي لان هيج حلفت مااصدك بمره ولا أمن بوحده شون أمن بيج
سليل : بس اني ممسويه شى
سجاد : تسوين تكبرين وتسوين مثل مسوت امج وامي هم جانن بدايه الزواج بس هنه وبس وتالي شفتي شصار مااريد اعيش مثل ماعاش ابويه
سليل : بس اني مو سندس ولا امك حتى اسوي مثلهن وشتريد انفذ المهم ابقى زوجتك
سجاد : العرك دساس وانتي امج سندس لازم بيوم تسوين الي سوته لازم اطلعين عليها مراح اكدر بيني وبينج جبال بيني وبينج الشك والغيره وسلام الي لمس كولشي بيج لو نسيتي
سليل : هنا شهكت وكتله لا مانسيت شون انسى
رفع راسه ومد ايده ومسح عيوني ويباوع بعيوني وعيونه تفتح وتسد بتعب وكال لو تعرفين من تبجين شيصير بيه كل قطره من عيونج تيزاب على لحمي عيونج هاي حرامات تبجي اصير نار من تبجين دموعج افديها بعمري كل دمعه احسها حرامات تنزل على خدودج سليل كولشي بيج اعشقه
ورجع حط وجهه برگبتي ويشم بيها بنفس قوي ويكول ااااااااه ياريحتج شكد تمنيت اشمج والمسج تمنيت وتمنيت لحد ماكرهت روحي من كثر مااريدج احارب نفسي حتى مااتقرب منج واخذج وتصيرين مرتي والله لو محارب بمعركه بدر هم اسهل
سليل : لهاي الدرجه مأذيتك
سجاد : ههههه مأذيتني لايابوي ابد اصلاً مرتاح ولا داير بال انتي ااااااخ ياانتي
سليل : شبيه
سجاد : انتي عذاب الله الي كتبه اليه بلدنيا يشويني بيج شويه شويه اخاف اني مرتاح حتى يطيح حظي زين جبتها واني جاي معلعل وهسه كملت السبحه بيج
سليل : ليش شربت اليوم انت مو تصلي
سجاد : ذوله ولد المطي قشمروني وكالو بس بيك واني كلت يله بيك عيب افشلهم وراس سنه وسهرانين ميضر من وراج سكرت
سليل : من ورايه اني ليش
سجاد : اشرب واشوف صورتج بيه وارد اشرب وهم اشوف صورتج بلبيك ههههههه احس داشرب من حلكج حسيت الشرب عسل من كد مااحسه من حلكج
تالي هههههه كمت اشوفج اربعه
سليل : فدوه سجاد اصحى
سجاد : سجاد سجاد جنتي تصيحيلي عمو شصخمج وصحتي سجاد اخاف جان بيه حيل واتحمل واصير قوي هلمره من تكولين سجاد تشعلين ابو ابويه من اشتعل من سماني سجاد يامنعول الوالدين سموني مااريد اصحى اريد ابقى طايييير كافي اتخيل نفسي بحضنج
رجع سكت ويتنفس بهدوء واني اسمع انفاسه وكال
سجاد : تدرين
سليل : شنو
سجاد :
مرات بليل اشتاقلج واريدج مثل المخبل اريد المس كل مسامه بيج وابقى الوب بلشقه واتذكر انتي جوه بلغرفه وبيني وبينج بس باب ومرتي هههههه مرتي اتصوري واروح واجي لحد ميطيح حظي من اللهفه عليج وادخل اشم انفاسج واطلع تعرفين شون من اتنفسهم ومااكدر المسج اني لو ذابح امه محمد هم الله ميعاقبني هيج عقاب اشم انفاسج حتى اكدر انام ويمشي يومي طبيعي ولج حتى كمت مااصادق لان اي وحده اصادقها اشوفها بيج اطلعي مني كافي كافي تعبت داموت واتكطع كرهت حتى الساعه الشفتج بيها
سليل : عاط بقوه وكال عوفيني روحي مااريدج هنا ويضرب على ظهري وجتفي حركتي ابويه بكبره جدي سمطتي حطيت ايدي على حلكه لان صوته عالي حيل اششش الناس نايمه فدوه صوتك جان يكوم يبوس بيها وخرتها بهدوء جان يسحبها وبدايبوس بيها ورجع حط وجهه برگبتي ويبوس بيها بوسات ناعمه ويكول بقهره وتنهيده قويه ااااخ الله شكد احبج وشكد كعد اتأذه منج اغار عليج من ثوبج اللابسته لوبيدي احبسج بقفص بس اليه حتى الهوا اني اتحكم بيه اذا دخل صدرج ونزل بهدوء يبوس اني بين المتأثره بحركاته وبين ابجي لان متأذي
: سكت وبقى بحضني وشويه وكال
لتعوفيني سليل نوميني تعبت حيل تعباااان والله وروح ابويه تعباااااااااان بعيطه كالها مسحت عيونه الي نزلت دمعه منها وبست راسه وكتله مااعوفك غمض وكال
سجاد :اريد ارتاح جهنم ربج تمشي بدمي ااااااه
اخذت نفس وتنهدت مددت جسمي على الجربايه وبقى راسه على رگبتي ونص جسمه على جسمي والعب بشعره وابجي بهدوء مدري افرح لان عرفت يحبني ويمكن اكثر مما احبه لو اموت قهر على كلامه
بدا نفسه يثكل ويغفى واني مستمره العب بشعره بكل راحه ايدي وافكر بكل كلمة يكولها ويون نايم ممصدكة هو بحضني شسوي هو يحبني وبنفس الوقت ميريدني وجودي كعديأذي ويدمره
جريت نفس وبقيت اباوع عليه وحضنته ودنجت بسته بهدوء وهو نايم ااااه لو تعرف شكد احبك بقيت اباوع عليه لحد مغفيت وهو بحضني
فزيت على عياطه
يتبع ...
صـباح الـ🥀ـورد والهنا اول مره اطلب منكم تساعدوني بلتفاعل لان كثره اللايك والتعليق راح يساعد الي يتابعون القصه معاكم توصل الهم الاشعارات لان كثير يشكون ميوصل اشعار القصه الهم ساعدوهم اذا امكن
تحياتي لًلًـّــ💎ــجٌٓمٍَُٓيِّعَْٓ