[لامارا]

ابي والغزلان
للكاتبه Reem
البارت الثالث والاربعون
(بارت طويل جداً لعيونكم )


وإشتاگ بـ رضاتك لو ردت تشتاگ
حلاة الشوگ إذا مابيه منيه
وضملي من الهوى المرسوم عطرك بيه
الهوى المابيه عطرك يخنگ الريه


جان احس ايده تحضني وتحاوطني وقرب شفايفه من اذني والكل ملتهي يهوس وهمس
اول مره احب دموعج
سليل : باوعت بوجه وجنت مشتاقه اله بشكل عجيب وكلامه خلاني انسى حتى الداير مدايري شفت بعيونه الجنت ادوره من سنين لحظه وحده حسيته سجاد الي يحبني مو الي يحاول يبعدني منه جان يجروني من حضنه ويبوسون بيه والكل طاير من الفرح
تمنيت ابقى بعد بحضنه رغم لحظه صارت بعفويه ومو قصدي بيه بس لاول مره احس بقربه مني هيج وحاضني بحب وحتى همسه جان من الگلب
اباوع على خواتي طايرات من الفرح تكول هنه الي نجحن وغزل تركص وحسين ايدك الها ورشا وريم يصفكون وعمه تهلهل وهو واكف مجتف ايده ومبتسم
حسين .. تدرين سليل لو عندج مال اصدقاء الرئيس خمس درجات جان صار معدلج ٩٠ واحسن كليه اطبين
رشا .. ليش مو عدنا المناضله سندس المن تخدم الحزب اذا ماكو لو حتى بهاي مابيها فايده
سليل : ميصير اله من جهه الاب
رشا .. والله حتى لو من جهه الام تكول الهم انطوها لحسام مو سليل مدلل امه على ذكر اخوجن شطلع هسه معدل
ريم : شو اخوجن ليش هو مو اخوج
رشا .. اني بلنسبه اليه ماعندي اخ اسمه حسام بح طار مثل مطارت امكم
سليل : رشاوي شبيج
رشا .. مابيه بلعكس فرحانه وطايره بيج
واجت تحضن وتبوس بيه
ريم : منعرف شطلع حسام واكيد ماما مراح تجي
رشا .. اكيد معدل قليل تلكي ملتهي بسوالف مكسره وناسي دراسته
نهر : الله يوفقه ونفرح بيه مثل مفرحنا بسليل
رشا .. ان شاء الله راسب ولو اني متأكده لو راسب لو معدل قليل
سليل : لج ليش خطيه
رشا .. بله متسكتين ثلل اصلاً انتظر الساعه التجي بيها سندس واسألها مدلل امه شطلع
نهر : صايره تصيحيها بأسمها عيب امي ميصير
رشا .. الام الي كل همها الفلوس ونفسها وتنام وتاكل وعايشه حياتها بلخير وعايفه اربع بنات كل كم شهر تمر تسويلها عركه وهوسه حتى متفكر شيحسن شمحتاجات شنو الي متعبهن تمرضن ماتن ميشرفني تكون امي وحتى اخوجن مكال وين خواتي اشتاقيت الهن اروح اشوفهن ابد ذاك يوم وهذا يوم مشفنى خياله حتى مستحه من يقارن بين بابا وبين زوج امه والله اعلم هسه يجوز نسه هو ابن طه عباله ابن خليل شاف الفلوس والخير وداسنه برجله حتى يستنكف يشوفنه ابن سندس تردون اعتبره اخويه مستحيل اذا عندي اخ فهو عمو سجاد اخويه الجبير وحسوني اخويه الصغير اما هذا حسام اخوجن الجن مو الي وسندس امجن مو امي
نهر : لتحقدين امي خلي گلبج ابيض تبقى امج الخلفتج والتعبت
رشا .. الخلفت مو الربت واذا بلبدايه اول كم سنه ربتني فعافتني بأهم سنين حياتي مو كل ام تتسمى ام
نهر : هي رادت تتزوج شافت ابوج بعد ماوراه طلعه قابل تدفن شبابها يابنتي
رشا .. ميصير تدفن شبابها بس يصير تدفني اني وخواتي وتاخذ ابنها وادير وجهه وتروح اني قبل كم يوم شفت بنيه بلرابع اعدادي اتعرفت عليها عن طريق بيان تدرين ابوها ميت بحرب ايران شهيد وباقيه امها ممتزوجه كاسره ظهرها عليها وعلى اخوها والحلو لهسه لابسه اسود على رجلها لو تعرفين ياعمه بذيج اللحظه شكد تأذيت وقارنت بين هاي الام وبين الي تتسمى ام
نهر : كلمن وظروفه لتقارنين اتعبين وتبقى امج يابنتي وهي تحبكم بس ظرفها هيج صار
رشا .. لا اقارن ولا اتعب نفسي مثل ماهي شمرتنا لخاطر نفسها اني شمرتها من حياتي لخاطر نفسي وانتي وسليل وخواتي عندي تسوون الدنيا اما سندس وابنها ميهموني ابد
ريم : گلبتيها مناحه خلي نرجع نفرح بثلل دك سحليه يله غزوله اركصي هاي هواي تباوع افلام مال عبد الحليم ومتأثره بيهم
جان تكفخها رشا
رشا .. اما انتي كارثه بلي يعجبج
سليل : اباوع على رشا الي الحقد ترس گلبها على ماما وحسام ماالومها لان اني مثلها بس الفرق ضامته بگلبي
رجع الدك والركص وهلمره كلهم يركصون مو بس غزوله
جان يوم مميز بحياتي وبقو لليل طايرين العصر اجه وجاب كيك وببسي واحتفلنا بنجاحي تمنيت اخذ الشهاده بيدي واوديها لبابا بس سجاد وعدني يوديها
سجاد : اني رايح تردون شى
نهر : ابقى على العشا هسه البنات يكملون
سجاد : مجوعان وهم عندي طلعه من الصبح اروح للبصره
نهر : خيرك شصاير
سجاد : والله اجتي شغله خوش فلوس بيها سيارات تفصيخ ويه ولد اخذ منها مواد احتياط وابيعهن
نهر : الله يرزقك شوكت ترجع
سجاد : اسبوعين
نهر : تروح وترجع بلسلامه
سجاد : هاج
نهر : شنو هاي
سجاد : خليهن جوه ايدج اخاف سليل تحتاج ملابس شى وهم وراها تقديم لتخليها تحتاج شى
نهر : عندي والله ضامه الها مكافي فلوس الدروس كلها منك
سجاد : مااحب تسوين تفرقه وانتي سويتي واني سويت
نهر : الله يحفظك والله ياسجاد الي سويته ميتثمن خلف الله عليك
سجاد : ممسوي شى اني هذا واجبي
نهر : هااا هم صّـْْ(☑)ـْْحّ نسيت هي مرتك
سجاد : شنو قصدج
نهر : لا مااقصد شى سليل ماما تعالي رجلج يريد يروح
سجاد : نهر شجاج
نهر : والله ياابن خالي كول لنفسك شجاك
سليل : طلعت اركض من المطبخ مستغربه من كلام عمه وباوعت عليه بس مبين ضاج من عمه وهي ولا دارت بال عافته وطبت للغرفه
وكفت كباله وكتله راح تروح
سجاد: اي تردين شى
سليل : سلامتك
سجاد : اني رايح اسبوعين للبصره ديري بالج على نفسج
سليل : نبض گلبي بقهر لان راح يروح رغم تعودت مااشوفه مده طويله بس الصار اليوم رجع احساسي بالاشتياق
سجاد : لطلعين لمكان اله حسين وياكم
سليل : شنو الحارس الشخصي الجديد حسين
سجاد : اسمعي كلام ولتناقشين
سليل : تروح وترجع بلسلامه
سجاد : شتريدين هديه نجاحج
سليل : كولشي مااريد كافي السويته اليه مقصرت
سجاد : ليش شسويت
سليل : هواي سويت بقى يباوع بوجهي بحيره خفت اكله اعرف الفلوس منك ويرزل عمه سكتت ودنجت
سجاد : اني اجيبلج على ذوقي يله روحي لخواتج وافرحي بنجاحج
سليل : اقلها ابقى تعشى ويانه
سجاد : غير مره ان شاء الله
سليل : طلع واخذ روحي وياه حتى فرحتي طفت ليش هيج اله تأثير عليه بشكل غريب
مرت ٣ اسابيع يله اجه اتذكر جنت كاعده امشط لغزل سبحتها واندكت الباب واجت ريم تكول اجه عمو سجاد طفرت حتى غزل وخرتها من حضني وكفت منتظره اشوفه الكل يسلم عليه اله اني لوبيدي ابوسه من كثر ممشتاقه اله
باوع عليه ومد ايده وانطاني علاكه وكال هاي هديتج اخذتها بلهفه منها فتحتها جانت تنوره طويله رصاصي وقميص ابيض وحذاء وسط كعب وجنطه سيت كامل للكليه حيل فرحت
سجاد : شوفي القياس مضبوط
نهر : وحتى لو بيه كبر شويه اني اصغره الها عاش ذوقك كولش حلوات
سجاد : اكو علاكه بعد
سليل : مديت ايدي والكاها ربطه
باوعت عليه وكتله بس اني ناويه بلكليه اذبها ماالبسها انت نسيت اني مو محجبه يحجي ويايه وميباوع بوجهي وينطي غراض البنات وكال
سجاد : ماكو متنذب بلكليه تبقين لابستها
سليل : بس اني مو محجبه
سجاد : اعرف بس من اليوم اعتبري روحج تحجبتي
سليل : سجاد مو اني
سجاد : انتهى الحجي من اليوم محجبه ومينذب ابد بكل مكان حتى بلبيت اذا اجه احد غريب يبقى على راسج
نهر : وانت تلبس كدامك لو تنزعه
سجاد : والله ياعلويه نهر شتكولين يصير تلبس كدامي بحكم الشرع
نهر : هااا بدينا
سجاد : انتي احجي سألتج حلال تنزعه كدامي لو لا وهم اكول براحته تلبسه تنزعه كدامي ميهمني المهم بلشارع مينزع بعد
سليل : عفيه سجاد ردت بس اقنعه جنت انتظر الكليه يوم يوم حتى اكص شعري وارتبه وابقى فاتحته وهو حطم كولشي حاولت اقنعه جان يرفع عينه ويباوع وعاكد حاجبه ومعاجبه الحجي وكال بهدوء
سجاد : من الاخير الحجاب مينذب ولبسج كله مستور وطويل
سليل : اني من زمان مستور لبسي و طويل
سجاد : هذا هو معناها مراح يتغير شى مجرد ربطه على الراس وانتهى
سليل : عفيه سجاد
سجاد : لتناقشين هذا الموضوع انتهى
سليل : كعدت ضايجه لان انغصبت على الحجاب وهو ولا دار بال اصلاً احسه منتصر عليه
وراها راح اجيت على عمه اشكيلها
نهر : والله اني معليه انتي وياه وشفتي شون قافل
سليل : بس اني ردت اداوم وشعري مفتوح ومرتب واكصه شويه اغير بنفسي احس روحي طالبه كليه
نهر : شنسوي ياامي اخاف يسوي شى يضوجج تره والله الحجاب عليج يخبل
رشا .. هااا ورطوج بلحجاب هههه
سليل : والله اريد ابجي من القهر
رشا .. والله حقج بس انتي هم الحجاب حلو عليج بس يرادلج تعديل
سليل : شون يعني
رشا .. يعني تحفين الغابه الي فوك عيونج ويترتب وجهج كله
نهر : هلوو ماكو اله تنخطب يله
رشا .. اول مره اسمع وحده متزوجه تنخطب
نهر : ولج رشيوه جوزي من اختج
رشا .. ياعمه سليل صارت بلكليه وهناك اشكال البنات وهي قابل راح تروح مصلخه هي تحف حاجبها نظافه
نهر : عدنا البنيه متحف اله تتزوج
رشا .. اي عاشت ايدج تتزوج وسليل متزوجه يعني تستحق الحفافه والله شوفيها حتى عيونها ضايعه من الشعر مال حاجبها
سليل : اي ماما اريد احف
نهر : والله محد يطلع عينج غير هاي الرعنه ام الحفافه والمكياج والسوالف مال خفيفات
رشا .. هسه الي يسمعج ياعمه يكول ٢٤ ساعه الخيط بركبتي واحف والحمره متنزل من حلكي شو الخيط مطاخ وجهي
نهر : هم عايزه حتى العب بيج طوبه
رشا .. هسه عوفج مني شوفي ماوكلي خطيه
سليل : ايا حقيره اني ماوكلي
رشا .. هههههه نفس حاجبه يله عمتو حبابه خطيه مكافي عمو قهرها وخلاها تلبس الحجاب هلمره انتي مترحميها وتحف قابل شمسويه شوفيها شكد مقهوره ومسكينه جنها بزونه ماكلين عشاها
نهر : اووف منجن يابنات طه كبرتن وكبرت بلاويجن وياجن
سليل : يله ماما حبابه
نهر : من ترحين للتقديم احفلج ادللي
رشا .. هيييي يحيا العدل
نهر : اااخ منجن ضعيفه كدامجن
سليل : اروح فدووه للضعيف وابوس بيها
سليل :شهر ٨ سنه ٢٠٠٢ جنت كاعده اتفرج تلفزيون ويه البنات اندكت الباب قوي ركضت عمه فتحتها واجت تركض ادور عبايتها
خير عمه
نهر : سجاد متأذي سياره جان يشتغل بيها وكابه
سليل : كمت اعيط كله ولا النار اتذكرت الصار بينا ركضت مثل المخبله للشارع جرتني عمه
نهر : يمعوده وين رايحه
سليل : اروح اشوفه
نهر : اكعدي ماما عيب كلها رياجيل
سليل : اشهك من الخوف اريد اروح
حسين : سليل اذا شافج سجاد والله يطيح حظج مو تدرين بيه ميقبل اطلعين اكعدي واسكتي شويه واجي اطمنج
سليل : كعدت بلطرمه لميت رجلي وحطيت راسي بينهم وابجي واتذكر الصار بينا وشون احتركت احس جسمي كب نار واشهك اجت رشا تركض وحضنتني
رشا .. كافي مابيه شى لو بيه شى خطير جان كال حسين
سليل : بس لا يصير بيه شى
رشا .. لتخافين ميصير
سليل : اموت اذا صار بيه شى والله اموت واشهك
رشا .. لهاي الدرجه تحبي
سليل : اشرت براسي وابجي يعني اي
رشا .. والله جنت اعرف تحبي من عيونج ولهفتج عليه كافي ادعي مابيه شى
سليل : رشا احس نار بيه والله احس بشى ياكل لحمي
رشا .. فدوه كافي ليصير بيج شى والله مابيه شى لو بي جان كالو
سليل : ياريت وبقيت ابجي بحضن رشا وتوسلت ادخل ومقبلت وره ساعه ونص انفتحت الباب ودخل كمزت من مكاني وركضت عليه واشهك باوعت ايده ملفوفه والثانيه شويه محتركه بس اليمنى حيل متأذايه كعدت بلكاع وحطيت ايدي على وجهي واناشغ بعد مابيه حيل لان كولشي اتحمل اله الحرك دنج عليه وكال بلهفه
سجاد : لتخافين مابيه شى
سليل : لا بيك محروك
نهر : كومي ماما والله مابيه شى شو وخري ايدج وشوفي زين
سليل : سحبت ايدي عمه وكومتني وصرت بوجهه وكتله بله اشوف
سجاد : هااج شوفي مابيه
سليل : وهاي ايدك المصلوخه صلخ من الحرك
سجاد : بلريش لتخافين
نهر : خلي ندخل حبيبتي نبقى هيج بلطرمه
سليل : دخلنا وعيوني مفاركته
اجت ريم ورشا تحمدوله بلسلامه وجان تجي غزوله تكوله بأبتسامه
غزل : لتزعل عمو اني هم مثلك شوف وتأشر على رگبتها تكبر وتروح
جان يدنج عليها ويبوسها ويكول الها
سجاد : انتي احلى مني شفايتلي بجمالج وهاي بركبتج احلى مني شو تعالي انطيني بوسه وباسها من خدها وهي تكمز مكيفه
اباوع عليه وامسح بدموعي وترجع تنزل
سجاد : خلي اروح ارتاح
نهر : ومنو يبقى يمك بات هنا شوف حالك كلاص مي متكدر تجيب لروحك
سجاد : هاي شبيج نهر هي شويه حرك شكبرتيها
نهر : ياشويه اليمنى مصلوخه واليسره اصابيعك مبطبطات
سجاد : كوليلها ٣ مرات بسرعه مبطبطات
نهر : ناصب عليه حضرتك
حسين : ههههه كوليها عمه
نهر : اسكت انت الثاني لا بروح خالي ابقى هنااقلها بس اليوم وباجر يمك احنا يصير شى
سجاد : تعبان نهر واريد انام وصاير ماارتاح اله بفراشي اذا احتاج شى اجي
سليل : اجي وياك
الكل باوع عليه وخاصه هو استغرب من كمزتي
نهر : وين ترحين ماما هو اصلاً باقي هنا
سجاد : لا ابقى ومااريد احد ويايه مو صغير اني وكتلكم مااحتاج احد وضعي زين وهسه اخذ علاجي وانام
سليل : عندك حل من اثنين لو تبقى هنا لو اجي وياك للشقه اختار
سجاد : لا هاي ولا هاي ويله رايح
سليل : فدوه سجاد
سجاد : كلت لا هاي ولا هاي وبلا عناد
نهر : والله انت كارثه بلعناد يعني كل هذا الصار ومتقبل احد يداريك ميصير تره وضعك تعبان الله عليك ابقى اقلها بس اليوم
سجاد : مابيه شى
سليل : خله وطلع واني كعدت اشهك
نهر : شبيج يابنتي شجاج
سليل : مشفتي شون متأذي
نهر : وشبيدي عليه مو كدامج شكد لحيت عليه وحلفته وهو قافل
سليل : دخلت للغرفه وبقيت لليل الوب حتى عشى متعشيت اخر شى متحملت باوعت ساعه ١٠ رحت على عمه لكيتها تخيط
سليل : ماما
نهر : هاا عيني ً
سليل : وديني لسجاد
نهر : شنو ياسجاد تخبلتي بهذا الليل
سليل : مااكدر گلبي نار واعرف بيه ميقبل احد يساعده واذا مااروح هسه اني راح اكب نار
نهر : ياامي اكعدي راحه ابتعدي عن الشر وغنيله
سليل : سجاد صار شر نسيتي من احتركت شسوه لو من انكسرت رجلي مو حتى بات هنا وايام يشيل ويحط ويداري بيه
نهر : والله ياسليل لو ادري بيج رايحه تأدين واجب هسه اخذج بس ادري گلبج ماخذج اله
سليل : گلبي بطني رجلي المهم اروح
نهر : ولج عمرج صار ١٩ سنه كبرتي شوكت تتحكمين بعاطفتج
سليل : نزلت يم ايدها فدوه ماما وديني والله يومين وارجع بس يطيب محد يحس بلحرك غير الضايكه متعرفين شون الروح تشوخ واقل حركه تصير بلگلب اني احتركت ولهسه من اتذكر روحي تروح لهذا حاسه بوجعه
نهر : اوف يابت طه گلبج رهيف على عمتج وابوج
سليل : بداعه بابا وديني اذا تحبيني خلي اروح
نهر : كومي لبسي واخذ وياج دشداشه امري لله
سليل : بستها وركضت اخذت ملابس ولبست تنوره وقميص وحطيت الربطه على راسي وركضت
نهر : اسرع مره اشوفج مبدله بيها يمه البنيه اذا رادت شى
سليل : فدوه عمه استعجلي
نهر : شعندي قابل اتحمر واتكحل هي العبايه ونروح
طلعنا جان شهر الثامن والناس اكثرها طالعه يعني مو هدوء وخاصه من تطفى الكهرباء كلها تهج للشارع
وصلنا للعماره وصعدنا دكيت الباب واسمع صوته مبين تعبان
فتح الباب فتح عيونه لان شافنه
سجاد : شجابكم
نهر : اكلت گلبي خليها يمك اداريك يومين وارجعها
سجاد : اني مو كلت مااريد احد وشلون اطلعون هيج وكت وحدكم
نهر : شكو علينا شو الشارع يروش مليان ناس
سجاد : بربج هذا حجي وانتي مو كلت مطلعين بره البيت وفوكاها ساعه ١٠ بليل
سليل : غير علمودك
سجاد : طبني مرض شنو علمودك خوش والله تكسرين كلامي وعلمودكً
نهر : والله هاي يمك وانت تعارك وياها اني رايحه عفت البنات وحدهن
سجاد : العتب عليج ياجبيره شون اطلعيها هيج وكت
نهر : قابل راح ياكلونا هاي شبيك سجاد من كل عقلك شو ماشاء الله الناس كلها بره واني بس اجيبها الك وارجع
سجاد : اخذيها وياج لا وروح موتاي ارجعها الج لا ايد ولا رجل سالمه
سليل : روحي عمه واني راضيه شسوي عود سوي بس طيب
سجاد : لتكفريني كتلج ارجعي
سليل : ماارجع
نهر : ابقو تعاركو رايحه اني
سجاد : نهر نهر
سليل : دفعتني عمه لداخل الشقه وسدت الباب وراحت لو بيدي ابوسها على سوايتها وبقى يعيط ويضرب برجله تهستر اني هم كعدت على القنفه وحاطه ايدي جوه خدي واباوع عليه شون يروح ويجي وصاير اعصاب
سجاد : يعني كتلكم مااريد احد لزكه ميصير هيج امشي ارجعج
سليل : مااا دنج عليه وعيونه شرار
سجاد : اذا مترحين هسه اذب حرگت گلبي بيج تعرفين شون روحي شايغه هسه وبخشمي صايره والله اطلعها بيج
سليل : التريده سوي باقيه ومااتحرك منا
رفعت رجلي وتربعت على القنفه وكتله مااتحرك منا بقى يتأفأف بقله صبر ويروح ويجي تالي اندار عليه ويحجي بعصبيه
سجاد : ابقي واياج توصلين ليمي وباجر من الصبح اوديج واريد اشوف يابنيه تبقى
سليل : طب وركع باب الغرفه مهتميت شويه و كمت افتر بلشقه والله اشتاقيت الها صار ٦ اشهر من عفتها نفسها ممغير شى بيها
فتحت الثلاجه بيها مسواك افتريت بيها واتذكر شون عشت بيها ايام وليالي لكيت مواعين غسلتهم لملمت الصاله وسويت
محلبي اعرف بيه يحبه وعفته يبرد باوعت بال ١١ ونص ولا طلع من الغرفه اخذت بجامه جايبتها ويايه عمه مخيطتها اليه لبستها بلحمام وطلعت كعدت على القنفه
بقيت حاطه ايدي على خدي كلت بلكت الله يهدي ويطلع وره شويه جان تنفتح الباب
باوع عليه وكال شجنتي تهوسين بس اسمع طكطكه
سليل : ماادري متعشي او لا بس سويت محلبي
سجاد : بارد
سليل : اي بردته
سجاد : جيبيلي جوعان واكو صمونه يمج حميها خلي اكل
سليل : ابتسمت وكمت مكيفه وحطيت المحلبي والصمونه بصينيه صغيره واجيت اركض كعد على القنفه سحبت الطبله وحطيتهم كدامه
اباوع عليه كوه ياكل ميكدر والصمونه ميكدر يقسمها
اخذت الخاشوكه وكتله عفيه خلي اوكلك
سجاد : تره مو شلل اني هي شويه حرك
سليل : سجاد الله عليك بمعزه بابا عندك تحملني بس هليومين تتذكر من ساعدتني من انكسرت شو مسويت مثلك وجنت اني اصيحك حتى تشيلني
سجاد : يعني ترديها وحده بوحده
سليل : باوعت عليه وكتله اي ردت بس يقبل
سجاد : يله جعت توكليني لو انام
سليل : ابتسمت وبديت اوكله وهو ولا يباوع بوجهي اعرف بأحساسه اتذكرت من كال اتعب بقربج جنت من اوكله احس الدنيا ملكي وبديت اسولف اله عن سوالف رشا وريم وغزل اضيع وكت وحتى هم ليتعب مني وخاصه اني قريبه حيل منه بس والله مو بيدي من حبي اله ردت بس اخفف المه
سجاد : شبعت كافي
سليل : بس هاي اللكمه
سجاد : كتلج شبعت
سليل : براحتك بس لتعيط
سجاد : روحي جيبيلي المخده من جوه انام هنا على القنفه
سليل : لا عفيه نام بمكانك انت تعبان ومريض ويرادلك راحه وهنه يومين باقيه ليش تغير نومتك
سجاد : يومين شنو بكيفج باجر من الصبح اوديج
سليل : شوف سجاد لو تسحلني مااروح يومين ومن وحدي اروح لتعاند باوع عليه وبنفاذ صبر كال
سجاد : اكو عصاره على الميز جوه جيبيها خلي ادهن ايدي وانام اذا ابقى هسه اگلب الليل عليج
سليل : ركضت جبتها وفتحتها
سجاد : شراح تسوين
سليل : ادهن ايدك
سجاد : اني ادهنها
سليل : شون والايد اليمنى متكدر تحركها اصلاً
سجاد : الله مطولج ياروح يله تعالي
كعدت بصفه وبديت احط الدهن على كيفي واشوف شون اصابيعه متأذيه دمعت عيني لا ارادياً رفعت وجهي صرنا وجهه بوجهه
همس بصوت ناصي
سجاد : لتخافين كتلج مابيه شى
سليل : همست بصوت بيه الم وخوف عليه وكتله متت خوف عليك شون مابيك شى شوف ايدك شون متأذيه سكتنا دقيقه ورجع كال كملي خلي انام
رجعت مديت ايدي واحط العلاج لايده كملت مباشره كام مني وقبل ميطب كال تعالي اخذي المخده وجرجف اخاف تبردين بليل لان الكهرباء صايره متطفى بليل والتبريد يبقى يشتغل للصبح
سليل : ماشي ودخلت وراه للغرفه واشرلي على المخده اخذتها وكتله محتاج شى
سجاد : لا سلامتج
سليل : طلعت وسديت الباب ورايه
وشمرتها على القنفه باوعت ساعه ١٢ وربع مستحيل انام هيج وكت بقيت افتر بلشقه فتحت التلفزيون ونصيته واتفرج عليه تالي باوعت ساعه ٢ بليل طفيت التلفزيون وكلت خلي اكوم اشوفه
فتحت الباب على كيفي لكيته نايم بلفانيلا
تقربت منه على كيفي شفته مغمض وحاط ايده اليسره بلعكس على عيونه ونايم
تقربت اكثر وبقيت صافنه عليه جان يكول بدون ميوخر ايده ولا حتى يفتح عيونه
سجاد : ليش منايمه لهسه
سليل : فزيت فزه لزمت گلبي هاي انت كاعد جان يوخر ايده ويباوع عليه
سجاد : سألتج ليش منايمه
سليل : منعسانه
سجاد : وليش دخلتي للغرفه
سليل : گلت اخاف محتاج شى او كاعد ومتصيحني
باوع عليه بدون ميحجي جان يكول بصوت تعب
سجاد : راسي يوجعني الم ايدي يدك براسي جيبيلي براسيتول من الثلاجه
ركضت جبت وانطيته وشرب باوعت عليه وكتله
عفيه خلي افرك راسك والله مااضوجك
سجاد : هسه الحبوب تشتغل وارتاح
سليل : ميخالف ويه الحبوب حتى تنام غمض عينه وكال
سجاد : فركي بس على كيفج
سليل : دنجت عليه وبديت افرك شويه وفتح عينه كال لدنجين تعاي من ذيج الصفحه
صعدت على الجربايه وهو نايم على ظهره وتقربت ومديت ايدي افرك براسه بهدوءواقرا ايات بداخلي لان اعرف الحرك مو هين لو مهما كان حتى لو رجال وجبير هم يتأذه بداخله ويهبط وبديت ادلك بكل راسه وهو هادئ بشكل بس النفس يصعد وينزل
وره ثلث ساعه او اكثر بدا النفس يثكل وشويه يشخر عرفت بي نام بس رغم هاي موخرت ايدي وحتى لا اتعب مددت جسمي على طول الجربايه وحطيت ايد جوه راسي وايد الثانيه ادلك راسه بيها رغم ايدي تعبت بس جان على گلبي عسل واني اشوفه شون نايم بعمق لحد متعبت حيل وبدت عيوني تغفي باوعت ساعه ٤ الفجر وخرت ايدي
وعلى نومتي نمت مكمت اكو احلى من هيج نومه وبصفه مخبله عاقله اعوفه واكوم غفيت لحد مفتحت عيني ولكيته صافن عليه ابتسمت وكتله صباح الخير
سجاد : صـباح النور شنومج هنا ليش مرحتي لمكانج
سليل : هااا مو نعست فجأه ماادري هو اني جذب اصلاً تقصدت انام بصفه
سجاد : تعبتج البارحه
سليل : ماكو اي تعب اكوم اسويلك ريوك
سجاد : سليل
سليل : هاعيني
سجاد : تكدرين تغسلين وجهي لان مااكدر اقرب المي والصابون على ايدي
سليل : ابتسمت وكتله اكيد اكدر يله اغسلك هو ميدري لو ما العيبه اله اكمز من الفرحه
دخلنا للحمام دنج وبديت احط المي على وجهه
سجاد : شبيج ليش ايدج ترجف
سليل : لا بس اخاف أذيك اضافيري طوال
سجاد : عادي بس غسلي وجهي
سليل : حطيت الصابونه بيدي وصارت رغوه بيدي وبديت اغسل وجهه وامشي ايدي بهدوء على كل مسامه بوجهه ولحيته الي اعشقها وشواربه همزين محتركو جان تخبلت ردت احس بكولشي بوجهه وهو هم هادئ مبدر شى منه اعرف گلبه يدك مثل گلبي اذا مو اقوى
وبديت اذب مي واغسل اوف تمنيت ابقي الصابون بوجهه العمر كله حتى بس المس وجهه جان يكول سليل شويه استعجلي الصابون دخل عيني باوعت اصلاً ماكو صابون غير شى قليل لان ذبيت مي ابتسمت عرفت سجودي مديتحمل غسلت وجهه وسحبت الخاولي ومسحته وجان يفتح عينه
سجاد : همزين مااكول تعالي غسلي وجهي يوميه جان يوميه افتح المحل الظهر ليش بطيئه هلكد
سليل : غير حتى ما أذيك
سجاد : شعجب مطوله اضافيرج مماكلتهم
سليل : يعني منتبه اكل اضافيري كتله لان كلت عيب راح اداوم كليه لازم ايدي بيها اظافر وتترتب جان يكول بله مديها مديت ايدي اثنينهم جنت معتنيه حيل بيدي اضافري نظاف وطولهم يخبل وناعمات لان احط دهن علمود يبقن ناعمات مباشره وجهه انگلب
سجاد : انتي رايحه ادرسين لو تستعرضين ايدج روحي جوه وافتحي المجر مال الميز وجيبي مقراضه
سليل : مباشره سحبت ايدي وكتله لا عفيه كوه طولتهم
سجاد : اتجيبين المقراضه لو اقرضهم الج بلكتر
سليل : سجاد شبيك همه اظافر شمسويه هاي هم شعر وحجاب
سجاد : ماله داعي هاي الاظافر الطوال مينكسرن مو تشتغلين شون هيج طولن لو لان تردين يطولن حرتي شسويتي وثانياً يطل بيهن وصاخه خلي يولن
سليل : انت علمود الكلية مو لان يدخل بيهن وصخ لان تدري بيه نظيفه
سجاد : انتي رايحه ادرسين لو تستعرضين مره شعري وهسه اظافيري وبعد ست سليل شراح تسوين
سليل : هسه شمسويه ودنجت مقهوره
سجاد : روحي جيبي المقراضه لتخليني اعيط وكصيهم من العرك مااريد اضفر يله
سليل : رحت دخلت للغرفه وجبتها هاك
سجاد : قرضيهم كدامي
سليل : اخذت المقراضه وكعدت على القنفه وهو بصفي والله الدمعه رادت تطلع داكصهم جان يكول
سجاد : كصريهم بس طوال حيل
سليل : بديت اكص شوي واعدل بيهم وهو صافن على ايدي تقصدت مااكص هوايه هسه اني شحجاني ثول
مديت ايدي وكتله هيج
سجاد : لو كايلج كصيهم للاخير وباقي على رأي تكصيهم
سليل : اكيد
سجاد : ليش تكدرين تكولين مااكصهم
سليل : مااريدك تزعل او تضوج مني صفن بوجهي وكال
سجاد : بت طه زعليني ضوجيني لتسمعين كلامي
سليل : حركت راسي بمعنى ماا
سجاد : راح تتغيرين من ادخلين كليه وبعد من اكول شى ادخلين بعيني وتكولين انت معليك بكيفي ولتدخل
سليل : همست واباوع بعيونه وكتله تتوقع سليل هيج تسوي الي ربيتها على ايدك وهي عمرها ٨ سنوات تتوقع منها تدخل بعينك وتعاندك
سجاد : تعلمت من الدنيا اتوقع المستحيل يصير ولتنسين البارحه مو عاندتي ودخلتي بعيني وبقيتي
سليل : البارحه شى ثاني لان خايفه عليك وانت تعاند ومتقبل ابقى واساعدك لهذا دخلت بعينك بس غير شى لا عمو الوحش سليل بعمرها متأذيك انت امانها
ابتسم وكال
سجاد : والله وكبرتي وكمتي تعرفين تتحكمين بلحجي وتجادلين وتحاولين تقنعين المقابيلج بدون بجي ورجف
سليل : تربيتك
سجاد : تربيه سزز
سليل : ههههههههه ضحكت بصوت عالي من گلبي ابتسم وكال
سجاد : صوتج ولج ويله كومي سوي ريوك جعت
سليل : صار شتحب تاكل
سجاد : اي شى عمي بس مو مثل سالفه من غسلتي وجهي ساعه
سليل : لا بسرعه اسوي ريوك بس خلي اشوف اكو صمون
سجاد : اذا ماكو اجيب
سليل : رحت وفتحت الثلاجه ماكو
رجعت كتله وكال بس طلعيلي اي قميص البسه فوك البجامه حتى اجيب صمون
سليل : اروح اني اخاف متكدر
سجاد : لا بالله هاا شخطت عقلج
سليل : هو جوه العماره الي بصفنا
سجاد : روحي بابا سوي الريوك بين مااجيب الصمون
طلع فتحت الثلاجه لكيت بيض سلكته اعرفه يحبه وخدرت جاي وانتظرته واندفرت الباب ركضت صحت منو
سجاد : اني افتحي الباب
سليل : فتحت وين مفاتيحك
سجاد : نسيتهم من طلعت هاج الصمون
صبيت وكعدنا ناكل واني اقسمله الصمون وهو هادئ معلق على اي شى كملنا وهو كام اخذ مسكن اعرف بيها تحركه وتاذي بس هو يحاول يكتم المه
غسلت كولشي وكعدت
سجاد : راح اتمدد
سليل : تريد شى
سجاد : لا بس لتلوبين اكعدي واسكتي
سليل : ماشي
طب للغرفه كلت
شسوي احسن شى انظف ولزمت الشقه سويتها تلمع بس اشتغل على كيفي حتى ليطلع من الغرفه وره اكثر من ساعه طلع لكاني اغسل بلحمام كملت جان اخر شى
سجاد : مو كلت اكعدي
سليل : اضوج التهيت انظف احسن والله مسويت صوت
سجاد : كملتي
سليل : شلت شعري وعركانه صايره مي وكتله اي دقايق
كملت وهو دخل ورايه للحمام وطلع وطب للغرفه اني هم لكيتها فرصه وسبحت وطلعت لبست دشداشه وكعدت امشط شعري جان تندك الباب
شون بله اكوم اصيح منو لو اترزل جان تنفتح باب الغرفه باوع عليه وراح يفتحه
نهر : ها ولكم ياسبع طلع دم منو فاز البارحه بلعركه
سليل : ضحكت وركضت بستها واكولها اني فزت
نهر : يمه فدوه للسباعيه
سجاد : والله خوش حسابي وياج بعدين
نهر : بله متسكت دحير بيدك هسه وبعدين تحلف وتعارك هاج امي اخذي جبتلكم الغدا
سليل : اي فدوه لأيدج توقعت اتجيبين لهذا مسويت
سجاد : شسويتي غدا
نهر : مو الك لبنتي سويت
سجاد : خوش لعد اخذي بتج واطلعو بره
نهر : هاا ماما تجين
سليل : لا
نهر : واني امشي وره بنتي شتريد وياها
سجاد : اااخ ولجن بس ايدي احتركت هيج سويتن وتعاندن لو گلي محترك شسوون
سليل : اسم الله عفيه لتكول هيج باوعت عمه عليه ومباشره غيرت الموضوع
نهر : هسه شون صرت
سجاد : يعني ماشي اموري بلكت هليومين اطيب
نهر : ان شاء الله اروح ماما محتاجه شى خواتج عفتهن وحدهن ورايه اتسوك وارجع
سليل : سلامتج يوم وبستها
نهر : عينج على الذيب
سجاد : هااا صرت ذيب
نهر : ههههههه اي لان داخلك شى وظاهرك شى ثاني
سجاد : صايره متحجيه بت عمتي راح انطيج جائزه المتحجي والي يلغي هوايه للابداع
نهر : هههههه كولشي ميطلع منك بس الرزايل والعياط يله اروح
سليل : الله وياج سلميلي على البنات وسديت وراها الباب
سجاد : شجابت غدا
سليل : فتحت الجدوره تبسي وتمن
سجاد : وهذا الجدر الصغير شنو
سليل : فتحته طلعت باميه هاي الباميه مال البارحه لان تعرف بيه ماما احب الباميه البايته تصير اطيب
سجاد : عقوبه عليج الباميه اني اكلها
سليل : عافيات اصب
سجاد : بعد وكت بال ٢ صبي والباميه اريدها تشريب اكو خبز مو
سليل : شتعرف بماما اكيد تحط خبز تخبز جديد وتجيبه
سجاد : خوش سويلي تشريب
صبيت وحطيت الاكل بدا ياكل بس بصعوبه وهذا التشريب يرادله ايد مو مال خاشوكه بقى صافن حسيته اختنك جان امد ايدي واجر خبزه من التشريب وبيها باميه وقربتها من حلكه باوع عليه كتله عفيه اكل بعيون تتوسل ياكل جان يفتح حلكه وحطيتها واكل بس عيونه منزلت مني وبديت اوكله واني طايره من الفرح
سجاد : اكلي انتي
سليل : اكل والله بس اكل
سجاد : اذا متاكلين مااكل اضوج هيج احس بعجز تره مااكل
سليل : لا عفيه راح اكل وكمت لكمه الي ولكمه اله
والاحلى من كمل غسلت اله حلكه اوف الله دنجت لا تفضحني عيني
وره ساعتين اندكت الباب فتحه طلعو اصدقائه يتحمدون بلسلامه اله اشرلي ادخل للمطبخ دخلت وسديت الباب سويت جاي شويه واجه لكاه حاظر بقى صافن شون يشيل الصينيه
سجاد : غير تلبسين ربطه اقلها اصيح عمران ياخذ الصينيه
سليل : شمدريني مو كدامك جنت بلهول واشرت بيدك اروح للمطبخ
سجاد : تعالي حطي هنا على الكاونتر الصينيه واوكفي ورايه مااريد يلمحج راح افتحلي ويمد ياخذ الصينيه
سليل : صاح عمران
سجاد : بس مد ايدك اخذ الصينيه ايدك مو كولك تدخل
وعمران شفت بس ايده اخذ الصينيه وراح اندار سجاد وكال نفس مااسمع
سليل : صار
وسد الباب كعدت بلمطبخ انتظر يكملون اسمع صوتهم مبقو نص ساعه وراحو طلعت الملم الهول جان يكول
اخاف يجي احدبعد حطي ربطه احتياط بلمطبخ
سليل : هسه اخلي وصدك تكررت الحاله مرتين هواي ولد اجوي يتحمدون على سلامته وبليل ارجع اوكله واحظر اي شى يحتاجه
من يومها اعلن استسلامه وصرت ايده لان صدك ايده متأذايه واي حركه جانت حيل تأذي استسلم وكمت اني اوكل واغسل واي شى يريده اركضه اجيبه اله ويوم جر يوم وصار ٥ ايام يمه لحد ما اليسره بلعلاجات والدهون صارت احسن بس اليمنى بعدها
وبيوم ليل فوك ساعه ١١ حبيت ادخل للبالكونه الي الزرع مالتها يخبل صاير ومعتني بيه من شفته حيل فرحت معتني بكولشي وكأني موجوده دكيت الباب سمعت صوته دخلت
لكيت كاعد ويدخن ورافع رجله
سليل : اكدر اكعد
سجاد : اكعدي احد لازمج
سليل : بقيت كاعده وساكتين لحد مكال مشتهي كاستر
سليل : بهذا الحر
سجاد : اي اني احبه
سليل : خلي اشوف عدنا
سجاد : اي اكو وزن قبل شهر جبته شوفي اخاف خربان
سليل : اذا مشدود ميخرب كمت سويت ولكيت بسكت جابته عمه اليه كسرته فوك الكاستر وجبت ماعون دخلت
لكيته مشغل ام كلثوم ورافع راسه ليفوك ويدخن
ويدندن وياها ومغمض
باخاف عليك و باخاف تنساني ... والشوق اليك على طول صحاني
غلبني الشوق وغلبني ... وليل البعد دوبني
ومهما السهد حيرني ...ومهما الشوق سهرني
لا طول بعدك يغيرني ... ولا الأيام بتبعدني
بعيد عنك
حطيت الماعون وبقيت صافنه عليه نزل عيونه وكال شبيج
سليل : المفروض اني هاي الاغنيه اغنيها مو انت
سجاد : شمعنه
سليل : تنهدت بقوه وكتله لا هيج هاي الكاستر عافيات اروح انام كمت وكفت
سجاد : هاي منو تنام الخفاش ينام بليل وانتي متنامين
سليل : ميخالف حتى تاخذ راحتك
سجاد : سليل
سليل : نعم
سجاد : تعبتج ويايه
سليل : ابتسمت وكتله تعبك عسل على گلبي تصبح على خير وطلعت
بيومها صدك منمت وطلع شافني كاعده ورجع دخل للغرفه
مرت ١٠ ايام وضعه وحاله افضل بهوايه بس اني وضعي موزين كمت حيل احب قربه وحيل تعلمت عليه وصلت بيه حتى مااريد ارجع رغم مشفت خواتي بهاي الايام غير مره وحده اجوي زاروه وراحو
سجاد : اليوم ارجعج للبيت كافي كلتي يومين وهاي اليوم العاشر باوعت عليه وكتله براحتك
سجاد : توقعت تهوسين وتعاندين الظاهر تعبتي
سليل : كعدت على الكرسي وكتله وبقيت وبعدين هم راح ترجعني
سجاد : شبيج سليل اليوم وضعج مو تمام
سليل : اوف يامابيه رجعني
لميت غراضي وهو مستغرب وضعي وطلعنا ورجعت للبيت بس رجعت والكآبه فول عندي حتى البنات انتبهو حسيت هاي عشره الايام حيل قربتني منه
قبل ميطلع تقربت منه وكتله دير بالك على نفسك شتحتاج تعال عفيه
سجاد : اليوم انام براحه ماكو بزونه تفتر بلشقه
سليل : متأكد تنام براحه
سجاد : نامي من وكت تعبتي هاي الايام كلها
سليل : منو كال تعبت لو تحس بلي احسه مجان كلت تعبت
دار وجهه يطلع ويسد الباب مال الشارع على كيفه وكال حاس سليل
وراح بدون حتى ميندار
اول ليله خلصتها بلضيم اتذكر بليل يمه واسولف وياه لو اوكله جنت اشوف بعيونه الي تتهرب مني ومن ابعد نظري احسه ياكلني بعيونه زين مني منفجرت وكتله انت مو تحبني المن تعذبني وتعذب نفسك بس كوه لزمت لساني
مرت الايام وضعه تحسن طلعت القبولات وطلعت هندسه مدني جامعه التكنلوجيه جنت طايره من الفرح ولازم اروح اسجل
نهر : ممصدكه راح تصير عدنا مهندسه وينك طه تعال شوف غزالتك
سليل : الْحٍمَدٍ للـّ? الفضل لله والج ولسجاد
نهر : لازم الحب ينط بلنص مو
سليل : ههههه ياحب عمه والله ماادري كمت حتى اشك يحبني
نهر : بعد الخرط الي خرطه وتشكين بس ارجع واكول ميفيدج وتتأذين وياه بس اني عايفتج على راحتج اكول بلكت الله يهديج ومن ادخلين كليه تتغير مشاعرج
سليل : ويجوز احبه اكثر
نهر : والله يابنتي اتمنالج واحد تعيشين وياه بسعاده مو شلعان گلب
رشا .. هااا بشرن
سليل : شكو كمزت والله
رشا .. حفيتي لا
سليل : لا والله نسيت
رشا .. انيالي باجر التقديم مالتج
خلي اجيب الخيط
كعدت كبال عمه باوعت وجهج كولشي مابيه حرامات
سليل : لا وجهي مابيه شى
رشا .. لتنسين شوارب الرفاق الحزبين
سليل : انجبي لج
رشا .. والله شوفيهن يوكف عليهن نسر الجمهوريه
نهر : ههههه لج مو لهاي الدرجه
رشا .. المهم شيليهم انتي مو مره وحده سويتيهن وعفتيهم اشهر لازم كل فتره
سليل : طبعاً غير كليه بعد
وبدت عمه ترتب بحواجبي وشواربي واكمز لحد مكملت
رشا .. ولج طلعتي شكد حلوه لو تشوفين وجهج مو انتي
غزل : ماما سويلي
نهر : اخذتها بحضني وابوس بيها من تكبرين اسويلج
ريم : هلا هلا اختي طلعت احلانا هسه ماكو واحد بلكليه ميصجمج
سليل : شصار الي يسمعكم يكول اخبل شحالني اكو احلى مني بنات بالف مره قابل بيضه وعيوني خضر حتى يكتلون نفسهم
نهر : يا فدوه سمارج يخبل طولج وجسمج تسوه الف بنيه
سليل : القرد بعين امه غزال
ريم : اني القرد نفسه ميصيرلي جاره لا حفافه ولا شى منقطه من الله هههههه
سليل : حضنتها ولج انتي ريمو الي تخبل
ريم : اي قشمريني مثل مجنت صغيره تكولين نجوم ذني لحد مطلع بهاك وميروح
سليل : عفيه لتضوجين
ريم : هاي شبيج ثلل تعلمت مااضوج وكولشي اتقبل
يله كومي اسبحي قبل مااطب واخلص المي واخليج تكمزين
سليل : لا كايمه تسلم ايدج ماما
رحت اسبح نسيت المنشفه رجعت لكيت عمه مسويه اجتماع للبنات
نهر : ماطول كلجن هنا شوفن بنياتي اني فتحت قوطيه الي الم بيها مصرف مدارسكم وحسبت الفلوس البيهن
يمه هلسنه مااكدر گلشي اشتري الجن
ريم : لا عمه فدوه ردت تخيطيلي صدريه حيل عجبتني
رشا .. واني ردت الجنطه مال مدرسه الصغيره السودا وبيضه الكتلج عليها
نهر : سمعني امي
اختجن اول سنه كليه الها ومصرفها ثكيل وعمجن جاب الها سيت ملابس بس خوما بسيت واحد اداوم لازم واحد ثاني وكعدت حسبت الفلوس لو انتم اشتريلكم لو هي مااكدر كلكم لو عندي من عيوني وهاي اول سنه الها ما اريد اقل من غيرها وتروح وتجي مكسوره خاطر وبعد غراض هم للكليه هواي مصرف والفلوس متكفي للكل واني شفت ملابسكم مال العام زينات شايلات نفسهن المفتوك اخيطه والملابس تتراهمن بيناتجن وره نص السنه اذا الله مكني ولميت جم فلس كل وحده اخيطلها صدريه وقميص ها يمه شكلتن
ريم : اذا علمود ثلل اني قابله المهم تطلع حلوة
غزل : اني ما اريد ماما عندي قميص ريم صغري والبسه
ريم : خوش والله واني اروح بطرك الصدريه بدون قميص
غزل : لا ابو الكركوشه
ريم : هااا اخذي مااريده
نهر : وانتي رشا
رشا .. عمه هاي سليل امنا واختنا الجبيره فدوة الها المهم تفرح وشنلبس عادي
نهر : اروح فدوة للبنات العاقلات اوف ربي شكد احب الحنيه الي بينجن
سليل : بقيت اشهك واني اشوف خواتي شون يتنازلن عن اقل حق الهن لخاطري وجان تنفتح الباب وشمرت روحي بحضن ماما
نهر : اسم الله يمه والله فزيت انتي مو جنتي تسبحين
سليل : كولشي مااريد ماما فدوة هنه اهم
رشا .. صايره سندس تتصنطين على الحجي
نهر : ولج ام لسان اسكتي
سليل : مسحت دموعي وضحكت والله موقصدي اجيت اخذ الخاولي وسمعتكم
ريم : اني متنازله بس بشرط اول تعيين واول راتب اليه
رشا .. واني يمه وحد
سليل : هو خلي اداوم من هسه تفكرون بلراتب اني لو بيدي من هسه اشتغل واجيب الكم احسن الغراض
غزل : اني اريد قرصات ام البطه
سليل : ولج انتي بطه وكمت اعضعض بخدودها وهي تضحك
حضنت خواتي وبستهن الله لا يحرمني منكم
واليوم التسجيل نص شهر العاشر اكيد مااروح وحدي وسجاد بنفسه اخذني جان شعور غريب نبضات گلبي ادك خوف ورهبه وفرح واخيراً بعد التعب راح ادخل كليه
طلعت اله ماخذ سياره صديقه
لابسه تنوره طويله وقميص جان موديله مكبوس (قميص كبس) وربطه وحطيت كحل لعيوني بس شكلي حسب كلام عمتي طالعه اخبل وطايره من الفرح بيه كعدت بصفه وتحركت السياره بلبدايه ممركز ويسوق على كيفه ايده تحسنت بس مو ميه بلميه وكفنا بلترفك اندار عليه رفع حاجبه
سجاد : هاي شمسويه بنفسج
سليل : شمسويه سحب كلينكس وكال بنبره عصبيه
سجاد : امسحي الكحل
سليل : محاطه شى بسيط
سجاد : امسحي تره وروح ابويه افر السياره وارجعج
سليل : لا راح امسح وبديت امسح خفت اسوي مشكله رجع باوع كال اكو تغيير بوجهج مو بس الكحل
دنجت مستحيه جان يجر جكاره يريد يدخن كتله عفيه لتصير بيه ريحه جكاير عيب باوع عليه يريد يخنكني وكال
سجاد : صار ست سليل وبعد امريني هاي كلها علمود الكليه
سليل : لا والله بس
سجاد : اسكتي وخلي اليوم يفوت سلامات
سليل : درت وجهي اخاف احجي ونزلنا وسجلنا وهو عيونه هنا وهنا اني شفت الكليه شون تجنن والبنات مو طبيعيات بلجمال والنزاكه واللبس كلت اني هم بنيه رجعت مخنوكه بلطريق جان يكول
سجاد : شبيج
سليل : انت تحاسبني على الكحل شفت البنات ومكياجهن وجمالهن اصلاً رجال اني بلنسبه الهن
سجاد : مالنا دخل بلناس كلمن حربتصرفاته ولبسه وثاني شى انتي احلاهن
سليل : فتحت عيني ردت استوعب الي كاله سويت نفسي ضجت حيل اريده يعيدها وكتلها يااحلاهن العب النفس اصلاً ولا عبالك بنيه
سجاد : بلعكس انتي نازكه وملامحج طفوليه وجذابه حيل واني الي شفته اليوم انتي احلاهن
سليل : ابتسمت بفرح اندار وهو يسوق باوع بنظره مكر كال هاااا هستوج جنتي تلطمين وتصيحين رجال بلنسبه الهن
سليل : ماطول انت گلت احلاهن هاي هي اني احلاهن
سجاد : سليل
سليل : ها عيني
سجاد : اريدج من تتخرجين اطلعين مثل اليوم
سليل : شون يعني
سجاد : يعني مثل ماهسه اخذتج من ايدج بنيه نقيه بريئه وقمه بلهدوء والثكل اريدج تتخرجين وانتي على نفس المواصفات متتغيرين ولا تغرج حياه الجامعه انتي هنا حتى تحققين حلمج وحلم ابوج لتضيعين تعب ابوج وتعب عمتج وتعبج على شى ميسوه
سليل : بيوم التخرج راح توكف يمي وانت بنفسك تكول مثل مااخذتج من ايدج ودخلتج الجامعه طلعتج منها بنفس المواصفات لتخاف مراح اخيب ضنك بيوم
سجاد : ياريت
سليل : اعرف تفكيره واعرف خوفه سجاد مو خايف مرعوب لا اسوي شى موزين وينصدم بيه بس راح اثبتله مو كل اصابيعه سوه اني مو امه ولا سندس اني بت طه وتربيه نهر الي مطلعت العيبه منها بيوم
ورجعنا للبيت ومشت الايام طبيعيه هدوء وماكو شى جديد
مكيفه بعد ايام انداوم وبيوم كاعدين انظف وفاتحين التلفزيون سمعنا بيان وكفنا على حيلنا لهسه هذا التاريخ ماانساه ٢٠٠٢/١٠/٢٠ عفو عااام بقت عمه ترجف وتبجي وتعيط راح يطلع راح اشوفه وجان تندك الباب ركضت ريم فتحت الباب اجه سجاد
سجاد : سمعتو
نهر : عفيه هو مشمول
سجاد : ولج كلها حتى المحكوم بالاعدام
نهر : خلي نروحله
سجاد : وين ترحين اني رايح حظرو نفسكم جايب طه وجاي
سليل : جان الكل مصدوم بابا راح يطلع يعني راح يرجع بنصنا البنات كاعدات وحده تباوع بوجهه الثانيه
دموعي تنزل واكفه وممصدكه عمه ركضت جابت جكليت واكفه بلطرمه وكفت يمها وممصدكين يطب علينا وانشوفه اجت غزل
غزل : منو راح يجي
سليل : بابا
غزل : بابا منو
سليل : بابا طه حبيبتي
غزل : يحبني
سليل : يموت عليج حبيبتي باوعت على رشا وريم صافنات عطت بيهن ولكم بابا راجع
رشا .. شراح نكول اله
سليل : شنو شنكول اله
رشا .. بيتنا احنا مو بيتنا
جان تندار عمه صخام اي نسينا
سليل : هسه يتخبل
ريم : احسن مايتخبل على البيت الي احترك خلي يتخبل على حالنا وحده مبهكه والثانيه محركه اني داخله انام لحد يكعدني
سليل : استغربت من ريم شبيهه اول مره اشوفها هيج وبابا متسلمين عليه
ريم : بعدين عود
نهر : ولج ريم شون ادخلين وتعوفي وهو طالع من السجن المفروض بلشارع نوكف ننتظره
ريم : انتظرو انتم
سليل : طبت للغرفه وركعت الباب بقينا صافنين هاي شبيهه ريم دخلت بال ١٤ سنه عمر المراهقه بس هي بعدها تكمز وتلعب ويه الجهال رغم كبرت وطولت وظهرت عليها علامات الانوثه والبلوغ بس باقيه بس تضحك وتلعب حتى ملينا من كلمة كبرتي عيب لان هي كل منكول الها هيج وكالت اني مااكبر عوفوني ابقى صغيره شعندي كبرانه
جان يطب يركض حسين ويصيح راح يطلعون المسجونين
رشا .. اكيد ابوك هم
حسين : اي وهسه بيبي وامي وخوالي راحو يجيبوه واني رحت اشتريت الذبيحه واجيت ابلغكم اكيد عمو طه هم يطلعوه
نهر : اي يمه واخيراًبيضت عيوني واريد اشوفه وهم علي يطلع مهما كان اخويه رحمتك ربي طلعهم سالمين
حسين : ريم وين
رشا .. دخلت للغرفه وضعها مو طبيعي ابد
حسين : من رخصتج عمه ادخل الها
نهر : روح يمه وفدوه اقنعها تجي تستقبل ابوها ويانه مدري شجاها
دك الباب حسين وسمع عيطتها
ريم : كتلكم مااطلع عوفوني
حسين : شبيهه ريمتي
ريم : وخرت راسي من المخده والدمعه كوه حاصرتها
كعد بصفي حسين
حسين : شبيج ريم
ريم : مابيه شو هنا اخاف جاي تستقبل عمك
حسين : اجيت ابلغكم لان ابويه هم طالع
ريم : بلخير عليك عوفني اريد انام تمددت جان يجرني
حسين : شبيج وليش هيج مخنوكه وضايجه
ريم : مابيه روح عفيه
حسين : مااروح اله اعرف
ريم : شتريد تعرف
حسين : ليش ضايجه
ريم : مضايجه هسه راح اكوم اركص بنص الشارع حتى ترتاحون
حسين : احجي عدل وفهميني شبيهه ريمتي
ريم : باوعت عليه ونزلت دموعي
حسين : ريم شبيج اول تالي تبجين
ريم : مااريده يطلع
حسين : منو
ريم : بابا
حسين : ليش توقعت تفرحين
ريم : يطلع شنو الي راح يسوي النا معودت الناس نست هو مسجون جنت واني صغيره الناس تعيرني بلبهاك وبأبويه لان مسجون كرهته من كثر ميعيروني بيه اسمعهم يكولون بت طه الكتل اخوه هاي البنيه ابوها مسجون يجوز حرامي لتتقربون منها هاي البنيه لحد يلعب وياها بيها جرب وابوها بلسجن يخوفون واشكال الحجي المن هسه طالع حتى يرجعون يأشرون بيدهم ويكولون هاي الابوها جان مسجون وطلع
حسين : اول مره اشوفج تحجين هيج عن ابوج
ريم : اني ابويه مشفت منه بس الاذيه من وراه الناس تعيرني بيه وصرت منبوذه ومن وراه وره بيبيتك صار بيه هيج وهذا حالي مطكعه
حسين : بعدج مقتنعه هي الحركت البيت
ريم : ماكو غيرها وحتى رشا من سألتها سكتت يعني حتى هي حاسه انعام حركتنا وليش حركتنا لان تكره بابا زين واحنا شنو ذنبنا من وراه تضيع حياتي وحياه غزل الي لهسه طفله شوف من تكبر شراح يصير بيها يجوز اتعس مني لان ذيج حساسه وتستحي من خيالها اني اضحك واكمز بس داخلي ميت والله داخلي صحراء المفروض اكبر وافرح لان راح اتغير واصير بنيه مثل باقي البنات هلمره كل مااكبر واشوف نفسي شون محد يريدني والكل يخاف مني اكرهه بلزايد مااريده يطلع مااريده
حسين : حضنها ويحاول يهديها اششش والله انتي احلى البنات
ريم : شنو تقشمر عليه وهذا البهاك اخوف اني
حسين : الكمر بلحقيقه تره كله حفر وصخور ومرتفعات مجعمر وشكله محلو بس الكل يتغزل بيه ويعتبروه رمز الجمال انتي مثله واحلى منه البهاك زايدج جمال مقلل منج اهم شى انتي ضحكتج طيبتج وكاحتج لسانج كولشي بيج مميز لتضوجين ريمتي
ريم : مااريد اشوفه سحليه ولا اسلم حتى اخاف منه
حسين : شوفي يجوز ترجعين تحبي
ريم : لا مااحبه لان راح يجي يخرب حياتنا
حسين : شو باوعي عليه وخرها من حضنه ومسح عيونها
هاي العيون الحلوه سنين مشايفها تبجي شايفها تسوي مصايب مشاكل تتعارك تضحك بس مشايفها تبجي ولا اريدها تبجي ريمتي ساسوكي لج انتي البطله الي جنتي مخوفه كل جهال المنطقه تبجي
ريم : ليش متفهمني
حسين : فاهمج وداعتج فاهمج بس مابيدي شى اغيره واخليج متبجين
ريم : شسوي
حسين : اطلعي سلمي وادخلي اذا مو لخاطره لخاطر عمه وسليل لتقهريهم متشوفين شون يبجون من الفرح لان جاي لتكسرين فرحتهم كومي غسلي وجهج وارتاحي بين ميجي سلمي وادخلي وعوفي لتتقربين منه لحد متتعودين على وجوده
ريم : لا اريده ولا اريد اتعود
حسين : ميخالف هسه انتي تعبانه ومصدومه من سالفه طلعته كومي ياعيني لتطفين فرحتهم يله لخاطري ولخاطرهم سلمي وادخلي
ريم : ابقى ويايه
حسين : لو بيدي مااروح ولا اعوفج بس لازم ارجع اني هم ابويه طالع
ريم : كملت
حسين : هههههه مااضوج منج لان ادري مقهوره يله ريومتي كومي ولج ساسوكي كومي لتبجين تره اصيحلج ام دميعه مثل سليل
ريم : شحدك
حسين : اي عفيه هيج اريدج كومي تعاركي كمزي عيطي بس لتبجين
ريم : روح لأهلك وحاول تجي
حسين : ان شاء الله يله انطيني ايدج وكومي
حجي طه : مصدكت من كالو عفو عاام كمنا نطلع مثل المخابيل ممصدكين راح نطلع وبدون اي ضمانات او تنازلات او اي شى بذمتنا
جنت مأيس بيوم اطلع ومن انفتحت البيبان گلت اكيد هذا حلم وهسه افز والكه روحي نفس مكاني عاطو اطلعو وركضنا فرحانين ناس اطخ بناس مثل السباق نريد بس نوصل للباب من كثر ما عقلنا ميشيل الصار خفنا لا نوصل للباب ويسدوه على لحظه بس حطيت رجلي بره السجن جريت نفس وباوعت على السما ودموعي تصب وبيدي السبحه واكول الْحٍمَدٍ للـّ? والشكر لله
بديت ادور على احد من اهلي اكيد سجاد ميتركني بهيج يوم زين اخاف ميدري مستحيل ميدري العراق كله هنا بقيت ادور عليه لحد متعبت لان الدنيا مگلوبه وكلها مزايق وجگليت والناس كلها جايه
ولمحته من بعيد ركضت مثل الجاهل ممصدك طلعت حضني وابجي وهو هم يبجي ممصدك گلت اني من السجن للمكبره مستحيل بيوم اكون حر بس الصار العقل ميشيله
سجاد : الْحٍمَدٍ للـّ? على سلامتك والله لهسه ممصدكين
حجي طه : نزلت سجدت بلكاع وابجي وكومني سجاد
ولك طلعت سجاد اني حر راح ارجع لبناتي ولبيتي
وينهم ليش مجبتهم
سجاد : كلت هوسه ورياجيل وشفت كدامك بس الكل ينتظرك بلبيت
حجي طه : زين تسوي اشوفهم بلبيت احسن
سجاد : يله جبت سياره صاحبي امشي
حجي طه : صعدت ركض اريد اروح املي عيني منهم اكيد كبرن وتغيرن وصارن عرايس كون بطياره تشيلني وتشمرني يمهم اريد بس الطريق يخلص اباوع على بغداد الي تغيرت وصارت احلى اباوع من الجامه على كل عماره وكل بنايه نفوت منها ممصدك طلعت وراح ارجع بين بناتي خفت اموت ومااشوفهن والحنينه نهر شلون صارت بعد معفت على ظهرها هيج حمل ثكيل
وصلنا للمنطقه طول الطريق دمعتي منشفت امسح وتنزل
لحد منتبهت وصلنا لفرع غير فرعناباوعت على سجاد شعدنا جايين لبيت ام سندس
سجاد : مو البنات هناك
حجي طه : شعدهن هناك مو كلت الحجيه ماتت بس لا سندس وياهن مااريد اشوفها والله اخنكها مااتحمل اشوفها
سجاد : بعدين تفهم كولشي بس والله ماكو سندس شلون اخليك تشوفها اصلاً هي صار اشهر ماكو البنات ونهر منتظريك هنا لتباوع هيج هسه كولشي تفهم
سليل : طبكت سياره وجان تنفتح الباب وينزل منها ابويه اي الحجي طه رجع


يتبع .....