[لامارا]

ابي والغزلان
للكاتبة Reem
(بارت 44 طويل لعيونكم )
البارت الاخير


وشباقي عندك غير سلّه ازغيره لاوراق الحزن...بعدك تحن
مو بس شواطي الذكريات امحركه بيهه السفن
ساكن ابّيت النار...مو ما ينسكن
اتوزع غنّاك ابوحشة الحيطان...والعود انكسر وابراسك اكثر من لحن
بعدك تحن ..بعدك توّن
ليش الحزن ربّاك صايرلك أبو وانت ..ابرضاتك صاير الحزنك أبن
بعدك تحن
بعده الخلاف اويه الزمن...هو صعب ....وانت مرن
كافي السلاسل بالكلب...مو كلبي شبّعته سجن
أفتح الباب ...اشتمّ هوه...يلدافن اسنينك دفن
شنهي اليجبرك عالصبر....وشنهي اليجبرك تنتظر
وجا شنهي ...خلّوك ومشوا
او وزنوك من باعوا وزن...إلمن تحن
سليل : طبكت سياره وجان تنفتح الباب وينزل منها ابويه اي الحجي طه رجع
فتحنا الباب وركضنا عليه مثل المخابيل ممصدكين ونعيط بلشارع ونحضن ونبوس بيه ونبجي نتسابق اني وعمه ورشا عليه ممصدكين هو كدامنا ونكدر نشوفه وانلمسه وانحضنه وعمه نهر هلاهل بنص الشارع واطش جگليت وتبجي من الفرحه
سجاد : ادخلو جوه لميتو الناس علينا
نهر : ولك يابه شفتك كدام عيني سالم كللووووش ربي رحمتك جبيره الف الْحٍمَدٍ للـّ? والشكر وابوس بيده وهو يبوس براسي
كوه دخلنا للهول
حجي طه : ممصدك الله انطاني عمر وخلاني ارجع بنصكم
سليل : ابجي بحضن بابا واكوله واخيراً رجعت
حجي طه : رجعت ومااعوفكم ابد ولج رشاوي شنو هذا الحسن بابا كبرتي وصرتي عروس
رشا .. حبيبي بابا كولش اشتاقيتلك وابوس بيده
حجي طه : مااعرف شسوي احطهن بروحي بگلبي شكد ماابوس بيهن واحضنهن احسهن بعاد من كثر ممشتاق الهن
نهر : اباوع غزل واكفه على صفحه وخايفه تعالي ماما هذا بابا تأشر بجتفها ماااا تخاف تجي
حجي طه : هاي غزل وبجيت كبرت وماشفتها تعالي بابا اني ابوج
نهر : تعالي گلبي تخاف رحت اجرها رادت تبجي
حجي طه : عوفيها نهر اني اجيها كمت عليها تقربت منها مديت ايدي خافت لتخافين اني بابا طه اشرت على نهر تنطيني جكليته
هااج هاي مني وشويه ونروح نشتري من الدكان اني وياج اني احبج ما أذيج
غزل : انت بابا طه
حجي طه : اي عفيه مو بلصف يصيحوج غزل طه ياسين
غزل : اي
حجي طه : اني طه ياسين تعالي خلي بس ابوسج قربت خدها بستها مردت احضنها حتى لا اخوفها ورجعت لمكاني وحضنت رشا وسليل وهي تقربت
تجين بحضني مثل البنات
غزل : شيلني حمال باشي
نهر : ولج تعبان هسه اجه
حجي طه : اشيلج على راسي مو بس حمال باشى تعالي وصعدتها وافتر بيها واسمع ضحكتها الي خلتني اصب دموع لان خلصت عمري واني بعيد عنهن وجان اسحبها من ظهري وحضنتها وهي هم حضنتني
نهر : تعال اكعد حبيبي تعبان انت
سجاد : اروح اجيب غدا
نهر : طابخه فاصوليا وتمن
حجي طه : اااخ شكد مشتاق لأكلج
سجاد : ميخالف وراح اجيب كباب هم
رشا .. اي عمو ولتنسى السماك زيده حباب
سجاد : تدللين
حجي طه : ريم وين
نهر : هااا نايمه
حجي طه : كل هاي الهوسه ونايمه
سليل : هسه اصيحها كمت وفتحت الباب لكيتها كاعده وتصب دموع ركضت عليها شبيج ريمو
ريم : المن جاي هنا شعنده جاي حتى يخرب حياتنا
سليل : اششش فدوه شجاج
ريم : مااريده ومااطلع اله
سليل : بداعتي ريم بس مره وحده
ريم : كتلج ما يعني ما
حجي طه : ليش متقبلين اطلعين لأبوج
سليل : تفاجأت بابا ورانا وعمه نهر ترجف اخاف ريم تكب وخوف عمه طلع صحيح
جان تعيط ريم
ريم : شعندك جاي حتى تكمل علينا حتى اذا باقي بينه شويه روح اطيح حظنا بلزايد
نهر : ريم انجبي مو عيب هذا ابوج
حجي طه : عوفيها نهر خلي افتهم ليش تكرهني
سليل : لا بابا متكرهك
ريم : لا اكرهه ومااطيق اشوفه
جان اضربها راشدي وهاي اول مره احد يمد ايده عليها بس من حركت گلبي متحملت اشوفها تحجي ويه بابا هيج وهو عيونه دموع منتظره لحظه حنان منها وهي تستقبله هيج
ريم : لو مو تضربيني لو تكطعيني هم مااحبه وهم مااريد اشوفه
سجاد : ريم كافي شنو هذا اللسان متستحين جم واحد واكف ومحترمتي
حجي طه : عطت بيهم كلهم كافي خلي افهم عوفج منهم بابا تعالي شبيج ليش كارهتني
ريم : ليش كارهتك وليش اصلاً احبك من الاذيه الشفتها
حجي طه : يااذيه ومني اني اباوع عليها ترجف واطك سن بسن وتحجي
ريم : ركز زين بشكلي هاك شوف ومديت ايدي البيها بهاك ورفعت شعري بين اذني وبركبتي جم وحده وعطت هااك شوف شصار بيه من وراك اراويك جسمي هم تدري جم سنه الجهال محد يلعب ويايه لان يخافون مني وكل مااتقرب من وحده لو يكولون بت الحرامي لو ابوج مسجون نخاف منج لو ام الجرب لو المطكعه وصلت مرحله اضربهم بس حتى العب وياهم محد يقبل يتقرب مني لا ولد ولا بنات من وراك
حجي طه : شون بيها بهاك منين اجاها احجو تخبلت من شفتها
ريم : من وره مرت ابوك ومشاكلك وياها حركتنا بليله ظلمه تعااال وركضت طلعت من الغرفه وجبت غزل ونزعتها الربطه هاك شوف بناتك الي اجيت تركض عليهن وتريدن يستقبلنك بلحضن شصار بيهن وحده بهكت من الخوفه والنار والثانيه احتركت وصفينا بلشارع لو ما بيبي الله يرحمها تبقينا هنا وتريدني بعد هذا كله مااكرهك
حجي طه : كعدت على القنفه اريد استوعب كلامها اريد عقلي يشيل الصار باوعت على سجاد الي دنج ومكدر يرفع عينه
ركضت عليه ولزمته من قميصه ليش مكتلي بناتي هيج صار بيهن ليش
نهر : عوفه طه شجاك
سجاد : عوفي حقه بس لو انت بمكاني جان سويت مثل مااني سويت واكثر وتعال كولي حتى لو اجيت وحجيت الك شسوي الهن قابل ترجعلهن البيت لو صحتهن بس راح ازيدك تعب فوك تعبك
حجي طه : قصرت سجاد ليش هيج وعفته وحطيت ايدي على راسي وعطت احجولي شصار
نهر : اكعد ارتاح هسه وصلت فدوه ليصير بيك شى
حجي طه : احجي لا اطلع منا ورب الكعبه متشوفون وجهي
سليل : اني احجيلك وبديت احجي بس كل مااتعمق بلي صار دموعي تصب لحد ما وصلت من لكيت غزل وشون اشوفها محروكه لزم جتفي سجاد وكال كافي تعبتي
سليل : خلي اكمل
سجاد : كتلج كافي
حجي طه : والبيت شون احترك
سجاد : منعرف بس على الاكثر الي بالك
ريم : كولها عمو ليش تكول الي بالك كول انعااام هي الي حركتنا وكله من وراه لان كتل ابنها
حجي طه : طفرت مثل المخبل مااشوف كدامي وركضت بلشارع اليوم اله اذبحها اني هيج يصير بناتي
سليل : ركض بابا للشارع وركضنا وراه وعاط سجاد بينا رجعنا بس هو وعمه نهر ركضوو وراه
دخلنا للبيت جان تطفر ريم وراهم
عطت بيها وين موليه
ريم : هسه اجي
حجي طه : طبيت مثل المخبل على بيت ابويه حتى منتبهت على بيتي المحروك وجانو هوسه مااعرف شعدهم ودفرت الباب وطبيت جفلو كلهم وجان اشوفها وركضت عليها وجان الزمها اخنكها حيل
انعام : ولك عوفي الله يشيلك حقير
نهر : ركضنا وركض علي وجانو خالي ورياجيل ازواج خالاتي كلهن هناك جايين علمود طلعه علي الكل ركض عل طه يردون يوخروه منها وهو لازم ركبتها ويخنك بيها ازركت بيده وهو فاقد ويعيط
حجي طه : لج ليش شون انطاج گلبج تحركين بناتي لج الساقطه متسوي سوايتج سنين اعتبرج امي واحطج على راسي وهيج تسوين
نهر : كوه وخرناه وهي تكح ويعيطون انخبص البيت خبص ويدفع بيها ويريد بعد يكتلها وهي تكح وتحجي
انعام : لك فوك ماكاتل ابني الك عين وتجي وتدخل بيتي
حجي طه : بيتج منين من التزوير لا عبالج معرفت
نهر : بقيت جافله عرفت سجاد كايل لطه على سالفه التزوير
لازمي وهو يهد عليها ويحاولون يهدوه وهو ولا يمه ويعيط بكل علو حسه
حراميه فوك ما بصمتي ابويه على فراش الموت لج انتي شنو شيطان انتي من يا مله وجايه على بناتي
علي : امشي اطلع بره عار فوكاها جاي هداد
حجي طه : والله ماكو غيرك عار وانت شريكها لهاي الحيه مخفتو الله مكلتو من نموت شنكول اله جهال شنو ذنبهم تحركوهم
انعام : طبهم مرض وحرامات ما فحمن وحركن گلبك
نهر : لطمت على صدري يعني هاي انتي الحركتيهن
انعام : لو اني اكول مخايفه بس هم حيل بيهن عساهم يحتركون الف مره حتى تطفى النار الي بگلبي لج هذا الگلب الي تعلفين بناته وكاسره ظهرج عليهن كتل اخوج كتله بعز شبابه
حجي طه : والله لو ينعاد الوكت مو اكتله اكطع من لحمه ولج هذا واحد ماعنده حرمه والي سواه عرش الله يهتز بيه وانتي لهسه ادافعين اله
انعام : جذاب ابني اشرف منك ومن بتك ومرتك الكح.. ولك لو بيك حض روح شوف ذيج الدايحه شون طلكتك مثل الجلب واتزوجت وشمرت بناتك
نهر : كافي ارحمينا يعني انتي شنو لا موت يهزج لا مرض يهزج حرام عليج
حجي طه : عوفوني علينا اليوم اذبحها وخلي انعدم طبني مرض المهم ارجع حق بناتي وشمر شكو غراض بلميز وهي تعيط ختلت بلغرفه
سجاد لزمه حيل وجتفه لطه وطلعه
حجي طه : عوفني سجاد اليوم ابيس بيها اليوم احرك اهل اهلها
سجاد : هستوك طلعت يمعود اذكر الله لتلوث ايدك بيها
حجي طه : لك عوفني وادفع بيه وهم مجلب حيل ونهر تتوسل
نهر : اروحلك فدوه امشي نرجع مو حتى فرحتنا طفت ابوس ايدك امشي منريد نخسرك بعد الدنيا لطمتنا معودت ترجع النا بروح ابوك بمعزت بناتك عوفها الها يوم ربك ياخذلك حقك يله فدوه لطولك
كوه سحلناه ورجعناه وذاك علي ولا طلع الجبان والكل صافن شصار محد يعرف وهي سكتت
بلطريق لمحت ريم طبت للبيت
سجاد : جيبي مي لأبوج خلي يرتاح
حجي طه : شرتاح وهذا حالهن شرتاح متكولي
سجاد : الْحٍمَدٍ للـّ? طلعن بخير
وبهاي اللحظه طبت سندس تعرف بسالفه السجناء توقعت طلع طه وجان تكول خوش والله كالبين البيت فندق لأهل السجون
سليل : هو بابا منا عصبي وهي طبت تعلج وضاربه طن مكياج وتارسه روحها ذهب جيت عليها سحلها من شعرها ودك على ظهرها على راسها كطعها تكطع
سليل : كمت ارجف واعيط سجاد وخر بابا راح يكتلها خلاص اباوع على سجاد متجتف ويباوع ولا داير بال وبس عمه تحاول تفاكك طه واحنا نخاف ندخل
جان يكول
سجاد : خلي يطلع حيف گلبه لعبن لعب الكح..
سليل : الله عليك بروح ابوك كافي لتروح تشتكي عليه وترجعه للسجن
حجي طه : انعل ابوج لأبو البيت لابو ساعه السوده الي تزوجت وحده وصخه وحقيره مثلج شامره بناتج معلولات وادورين زواج
سندس : عوفني اليوم اله ارجع للسجن واشتكي عليك انت تضربني
حجي طه : جان الزم النعال من الكاع ودك على راسها على ظهرها كطعته تكطع
وهي تعيط
سليل : لزمت بابا اتوسل بيه يعوفها اعرف بيها تأذي وكمت ابجي من شافني عافها
وهي كوه تحجي والشعر مكوش والقميص تكطع الردن مالته
سندس : اذا مااخليك تبوس رجلي لك اني تضربني
حجي طه : انتي والقندره ماتسوين شى عندي لج تجيبين حسام لا وروح ابويه اسويج وصل لا عبالج بلحزب ورجلج التتحامين بيه تخوفوني والله وبيت الله الزرته ازوعج العافيه اذبحج انتي وذيج الساقطه انعام
سندس : بيك خير روح اخذ ابنك اصلاً نساك وابنك هسه رجال عبر ١٨ سنه مالك حكم عليه ذاك حايط واركع راسك بيه واياك اشوفك هنا والله وروح موتاي تقرير واحد مو بس اكسر رگبتك بسه اخليك حالك حال الجلب محد يندلك طريق
حجي طه : انتي مره وسويها يله بت الفگر تالي وكت جايتني ااااااخ شو تعاي
سليل : ورجع بابا ضربها بلمزهريه بس هي ركضت للشارع وهنا لزمه سجاد
سجاد : شجاك ثور وهايج صاير سنين تحضر لهيج يوم هناك تضرب وتعيط وهسه نفس الشى تخبلت مسجون لو داخل دوره تايكواندو كل شويه وساحل وحده ومشبعها كتل
حجي طه : ذني مو مال گتل سجاد ذني مال ذبح
سجاد : ميسون توصخ ايدك انت وراك حمل جبير لتضيع هاي الفرصه الاجت بالاحلام تطلع وتالي طلعت وتريد تضيع هاي الفرحه والحريه من وراهن
حجي طه : وبناتي والي صار بيهن
سجاد : صار بعد تذبح تصلخ تهدد ميفيد قدر وصار المفروض تحمدالله سالمات
حجي طه : وابني حسام
نهر : اغسل ايدك منه من يوم مااخذته امه وهو ولا اجه ولا شاف خواته ولا اله نيه صار سنين نسانه مع الاسف ياخويه خلفتك كلها على گلبك اله ابنك وحامل اسمك على گلب امه
حجي طه : اگلب الدنيا عليها واخذه
سجاد : ابنك شاب هسه ومتكدر تجبره على اي شى عوفها للوكت يجي يوم ويرجع بحضنك
حجي طه : اريد اروح اشوف بيتي مشفته زين
نهر : فدوه اروحلك بروح الغوالي بس غسل وحلل وارتاح واكلك لكمه مو گلبك راح يوكف من اجيت لهسه تتعارك
حجي طه : متشوفين المصايب اااخ ياخيتي احس راح انجلط من القهر
نهر : اسم الله الرحمن كون يومي قبل يومك يله فدوه اروحلك كوم للحمام
حجي طه : وانتم شون عايشين هنا
نهر : كولشي اسولفلك بس كوم
سليل : غسلت وجهي وكعدت اباوع على حالنا قبل شويه جنا نهوس وفرحانين مطولنا دقايق انكلب البيت عزه علينا
اباوع سجاد يدخن وياكل جكليت ولا يمه
سجاد : شبيج صافنه
سليل : ولا داير بال
سجاد : قابل شكو ابوج وطلع بلسلامه وهاي اهم شى
سليل : وهاي العركات
سجاد : عادي بلريش
سليل : انت كله عندك بلريش تكول عدنا قفص مال دجاج
سجاد : اي وامج وعمتي فسيفس
سليل : هههه وين الكباب
سجاد : نسيت والله عمي اذا هنه ينسن المسلم دينه ويصير بوذي من وراهن وره مصايبهن
سليل : لتتأخر حتى نتغدا سوه
وراح وجاب الاكل وبابا سبح وبدل وطلع بس ياعيني عليه فرحته راحت ورجعت عيونه حزينه تكول مكتوب على هاي العيون بس الحزن وكعدنا ناكل كلنا وريم ماكو
حجي طه : وين ريم
نهر : عوفها طه دخيلك كله من وراها هيجت الدنيا متريد تاكل
حجي طه : اروح اشوفها
سليل : اكعد بابا اني اصيحها
حجي طه : اني اروح اكعدن
ريم : كاعده صافنه وطب عليه مدري اخاف منه شون عصبي ويضرب رحت شفته من راح لبيت انعاال راد يموتها لو موتها حرامات كعد بصفي وكال
حجي طه : ادري بيج تكرهيني وضايجه مني وحقج وما الومج بس اني احبج انتي بنتي قطعه مني يوم ماولدتج امج بجت مرادتج لان بنيه بس اني من حطيتج بحضني تكول ملكت الدنيا ومابيها وسميتج ريم لان ادري بيج غزاله وصدك طلعتي غزاله بريه شرسه تاخذ حقها ومتخاف حتى من ابوها
اني بس اكولك شى واحد حطي ترجيه بأذنج ابوج ماسوه شى موزين ومن كتل اخوه لان يستاهل الكتل انتي بعدج صغيره ومراح تفهمين جان حجيتلج بس يجي يوم واسولف كولشي الج واكيد راح اشوف الحب والفخر بعيونج ريم باوعيلي
ريم : باوعت وحاصرتني الدمعه
حجي طه : وروح ابويه والشده الي جنت بيها ماكتلك اخويه باطل ولا خاطر فلوس على حق وداعت كل وحده بيجن الي تسوه عمري مغلطان
ريم : لزم ايدي وقربها وباس البهاك
حجي طه : احسبيها عليه ولو اعرف اجدي والله اله اعالجج
ريم : طلعت شهكه مني وكتله ميتعالج
حجي طه : نروح لأي مكان لو اعرف ابوس ايد الاطباء المهم يعالجوج انتي بنتي روحي انطيج روحي ترخص لدمعه من دموعج
ريم : بابا محد يحبني وكلها تعيب عليه
حجي طه : اني احبج وروحي بيج وانتي احلى البنات
ريم : شفته دمعت عينه ونزلت دمعته متحملت وشمرت نفسي بحضنه وابجي
ماادري شصار وليش دخل بس منتظره اليوم الي اعرف كولشي
حجي طه : يله ياغزالتي البريه الاكل ميحله اله بيج
ريم : اي جعت
حجي طه : يله حبيبتي
كعدت بين بناتي جنت فرحان بكعدتي بينهن بس سبحان الله حتى الشى البسيط والفرحه البسيطه لازم يصير بيها غصه بس هلمره مو غصبه كسره من اشوف بناتي وحده محركه والثانيه بهاك بداخلي اكول صبرني وقويني ياالله
وره مكملنا الاكل اخذت سجاد ورحنا للبيت اباوع بيت امي شون صاير كوم رماد ذكرياتي وشبابي ولاده بناتي كولشي عشته صاير اسود ومحروك
سجاد : البيت من اليوم محترك وهذا حاله
حجي طه : هذا ميتصلح منتهي لازم بناء من جديد واني ولا عانه وحالتنا للاسوأ
سجاد : والله لو عندي جان بنيته
حجي طه : ليش ماادري بيك
ماكو غير ابيعه كااع لان هو منتهي
سجاد : وشتشتري
حجي طه : اشوف بوكتها
سليل : رجع بابا رايح منتهي بس مبين النا ومقبل يبات يمنا لان البيت يعتبر بيت ماما وبقى يم سجاد
صار اكثر من اسبوعين وبابا بحياتنا اكلنا سوه جان كل ميجي يكعدنا كلنا ويسمع من عدنا وخاصه عمه نهر جان يكعد وياه وحدهم بلساعات حتى يسمع شصار
وبيوم اندكت الباب عصريه فتحتها صار حسوني بوجهي
حسين : هلوو سليل وين عمو طه
سليل : تعال ادخل
دخل وسلم وبقى صافن بابا عليه ميعرفه
حجي طه : هذا منو
نهر : ابن علي الجبير حسين
حجي طه : تعال اسلم عليك ولك صاير زلمه
حسين : بست ايده شونك عمي
سليل : حسيت حسين مو طبيعي شويه وترخص اخذ بابا وطلعو وره ساعه رجع بابا بدون حسين بس حاله مو طبيعي
ثاني يوم اجه يمنا وكاعده اني وعمه جان يكول راح ابيع البيت وبفلوسه نروح نعيش بلكوت
سليل : بقيت صافنه كتله وكليتي بابا
حجي طه : اعرف بيج تعبتي وهذا مستقبلج بس يابنتي مجبور لازم نهايه الشهر طالعين من بغداد
سليل : مااكدر شلون هم اترك سنه
نهر : شصار طه ليش وضعك مو طبيعي وشعدنا بلكوت اول تالي
حجي طه : اروح لخوالي لازم يعرفون اني ابن رازقيه مو ابن انعام
نهر : وشون نثبت واحنا ولا مستمسك عدنا يثبت
حجي طه : احجي وياهم وانتي هم شاهده بلكت يقتنعون مقتنعو ادخل عدهم دخيل لتنسين همه هو اولاد عم ابونا يعني دم واحد
نهر : وليش نعوف بغداد اصلاً خو بلفوس البيت نشتري مشتمل صغير هنا ونكعد ونسكت
حجي طه : اني قررت وانتي بابا فكري لمصلحه خواتج ومصلحتج هذا اخر طلب اطلبه منج
سليل : عفتهم مخنوكه اني انتظر ساعه ساعخ دوامي وهمه يردون مااداوم مكافي صار كم يوم مداومين واني مداومت
نهر : شصار طه احجي الصدك
حجي طه : بس اسألج ابن علي امان لو على ابوه لو شنو فلمه
نهر : حسوني نسخه منك ومن طيبتك وردة ويموت على البنات اخوهن والله وياهن وياهن خاصه ريم روح بيها كبر وربه وياهن حتى يحبنه اكثر من حسام كله وكته يمنا
حجي طه : من اجه البارحه كال عمي اخذ البنات وروح تره بيبي وابويه ناويه نيه موزينه
نهر : يمه الرحمن اي وتالي
حجي طه : كتله شنو مقبل بلبدايه مهتميت كلت طبهم مرض شيسوون يسون بس من كال اخاف تأذي البنات رجفت مكافي الاذيه الحصلنها هلمره بسبب طلعتي يتأذن
نهر : وتالي
حجي طه : من البارحه لليوم افكر ملكيت غير اخذهن واروح للكوت هم حتى الفلوس هناك اتجيب بيت زين وهم ابتعد بيهن عن انعام وشرها لحد مااشوف الحال شيصفه
نهر : وياك بس سليل شلون
حجي طه : اوو نسيت سالفه زواجها من سجاد
مبين باقي على عهده مااتقرب منها وصارت مرته
نهر : لا على حطت ايدك
حجي طه : ادز عليه باجر ونتفاهم
نهر : يطلكها يعني
حجي طه : من الاول شرطت عليه يطلك بس اطلع في حال اذا ماله نفس بيها
نهر : لزمني گلبي هاي اذا تدري شيصير بيها
حجي طه : رجعت للشقه صحت سجاد
سجاد : خير محتاج شى
حجي طه : اي محتاج تنفذ وعدك
سجاد : ياوعد شبيك طه
حجي طه : بما ان طلعت وصار كم اسبوع واني كتلك بنفس اليوم بس التهينا
سجاد : عن شنو
حجي طه : عن سليل اني طلعت والي شفته انت مالك نفس بيها ولا تريدها مره الك طلكها
سجاد : هااا وليش خليها بشنو مأثر
حجي طه : شبيك سجاد على شنو بعد باقيه على ذمتك تريدها مره الك احجي
سجاد : هاا لا
حجي طه : خلص باجر اطلك
سجاد : عندي شغل خليها غير يوم
حجي طه : يمعود هي دقايق خلي نخلص
سجاد : مااشي
سليل : كاعده اعدل بلغرفه واجت عمه واحسها مو طبيعيه تمرد بيدها من القلق
هااا ماما شبيج
نهر : شوفي يمه ابوج متفق ويه سجاد من اتزوجج اذا ميريدج مره اله بس يطلع من السجن يطلكج
سليل : احس طابوك وكع على راسي كمت ارجف يعني شنو
نهر : اليوم راح يطلك سجاد
سليل : جفلت وجان يصيح بابا على عمه اسمعه يكول كولي الها شويه ويجون جماعه حتى يشهدون على الطلاك خلي تحظر نفسها رايح اجيبهم واجي
بسرعه فتحت الباب وكلت لعمه احجي بس كوه واكفه اريد اخرب اريد سجاد صيحي فدووه
نهر : ماما على كيفج راح تموتين
سليل : فدووه ماما صيحي وجان يطب بس وجهه هم مگلوب سحبته من ايده وطبيت لغرفه عمه وسديت الباب
كتله صدك السمعته
سجاد : شنو
سليل : راح نطلك
سجاد : لازم هيج يصير ابوج وطلع مااكدر ابقيج بذمتي
لزمت ايده وكتله
سليل : لتعوفني شون ينطيك گلبك تنطقها جنت احجي واشهك وجسمي كله يرجف وممصدكه الي يريد يسوي
سجاد : لتبجين وخلي افهمج
سليل : شتفهني وانت تريد اطلكني
سجاد : اني من اتزوجتج حتى احميج من الدنيا من امج الي تريد تزوجج لواحد الله اعلم شنو لخاطر فلوسه يعني حمايه وبس وانطيت وعد لأبوج بس يطلع اطلكج وكلمن يرجع لمكانه
سليل : ليش هي هيج سهله عندك ويامكان يرجع زين وهذا أشر على گلبي راح يرجع مثل قبل راح ينسى حبك وارجع اكولك عمو
سجاد : انتي حيل مصعبتها تره اني ما وعدتج بشى ليش تأذين نفسج وتأذيني
سليل : اي ماوعدتني بس خليتني احبك اكثر خليتني مااشوف احد غيرك بلدنيا
سجاد : اني ماسويت شى حالج حال خواتج واذا اعتنيت بيج شويه زايد لان اعتبرج اختي وذنيج لان اصغر بناتي
سليل : عطت عليه متحملت البرود الي يحجي بيه وكتله انت جذاب فتح عينه وضل مستغرب
سجاد : شنو جذاب مو عيب
سليل : اي جذاب وتحبني واكثر مني وسمعتها من حلكك يوم مجيت سكران سنه ونص وكاتمه بگلبي واني اعرف بكولشي تحسه اتجاهي وشون تتهزم مني حتى ميجمعك مكان بيه وشلون تعشقني انت بنفسك كلت اني خنت الامانه لان مو حبيتج عشقتج
سجاد : انتي شكعد تحجين تخبلتي
سليل : اني مو مخبله ولا كعد اكذب انت الي تكذب من تخفي مشاعرك وتسوي نفسك بارد ولا داير بال وعود ممهتم واني مثل اختك
جان يلزمني حيل ويعت بيه وصارت عيونه براسه
سجاد : احجي شحجيت
سليل : وخرت ايدي منه حيل وكتله كولشي حجيت شتريد اكولك شلون تتهزم مني وتفتر ويه اصدقائك بلشارع حتى مترجع للبيت من وكت لو شلون تجاهد الليل كله حتى متضعف وتدخل للغرفه و
سجاد : كملي
سليل : انت تعرف شسوي
سجاد : لج كملي راح اركع راسج بلحايط
سليل : متسويها لان تدري كلامي كله صح تدخل حتى تتنفس انفاسي لو خوفك عليه من تأذيت براسي خلصت ساعه تسولف بحضني عن مشاعرك اليه حتى تجرأت وتلمستني انت متعرف شسويت بيه وشنو الي متحملته واني كل اعتقادي حبي من طرف واحد تالي تجي تحجيلي على كل لحظه حب وغيره والم تحسها ويايه من الصدمه خنس وصار هادئ وراح كعد على جربايه عمه نهر ودنج وحط ايده على راسه ورجله تهتز من التوتر
تقربت منه ونزلت بمستوى كعدته وحجيت بهدوء وگلبي يدك بسرعه لدرجه احسه راح يطلع من ضلوعي وكتله
انتي تحبني سجاد وكلتها بوجهي ومشاعرك كلها هسه اعرفها من اول يوم حبيتني لحد ليله راس السنه شون تشوف صورتي بلشرب وتشرب
سجاد : ليش مكتيلي هيج حجيت
سليل : شگول حتى مباشره تلغيني من حياتك وتبتعد
سجاد : وليش هسه گلتي
سليل : لان تريد تعوفني تريد اطلكني اني بقيت هذا الحمل مثل الجبل على گلبي كله في سبيل ابقى قريبه منك وانت هسه تريد ادير وجهك وتروح
جان يمد ايده وكومني وكعدني بصفه وصرنا وجهه بوجهه
بدا يفرك وجهه من التوتر احسه انتهى متوقع اعرف كولشي وبعد ميكدر ينكر جر نفس قوي وبدا يحجي
سجاد : سمعيني زين سليل وركزي بكلامي كل الكلته والله اعلم شكلت بعد ماانكره صحيح اني احبج
سليل : طفرت من مكاني وكتله لعد ليش تضم رجع سحبني من ايدي وكعدني
سجاد : بس خلي اكمل وبعدها احجي الي تردي
سليل : احجي
سجاد : اني احبج صحيح بس مااكدر اخليج مره اليه زوجه
سليل : ليش شبيهه
سجاد : مابيج ست البنات انتي واحسنهن بس الخلل بيه اني مو بيج اني مااريد لا اتزوج ولا اكون عائله اريد اعيش وحدي
سليل : وتكدر
سجاد : ليش لا مو هسه عايش وحدي وراسي بارد
سليل : زين واني شنو ذنبي
سجاد : ذنبج اختاريتي غلط
سليل : ليش غلط
سجاد : بس كافي دموع وخلي نحجي بهدوء
سليل : ياهدوءوانت تريد تعوفني
سجاد : وين اعوفج مو كدامج بس مجرد احلج من ذمتي
سليل : انت كعد تتنازل عني بسهوله
سجاد : احسن الج ولمصلحتج انتي بعدج صغيره ومشفتي شى من الدنيا حدج هذاك البيت الي احترك وهذا البيت مطالعه للعالم الجبير من تكبرين راح تتغير نظرتج للحياه واحتمال بذيج اللحظه تكرهين اللحظه الحبيتيني بيها ويجوز تعوفيني
سليل : كمت على حيلي وصايره بركان انهاريت لحظه ضعف عجيبه بحياتي مماره بيها وكمت اشهك واحجي اني مو امك وانهزم جان بسرعه يضربني راشدي والله من قوته حسيت طبله اذني انشكت
كعدت بلكاع بصف الجربايه وحطيت ايدي وابجي واشهك وهو يعيط
سجاد : لج تعيرني بأمي
سليل : رفعت راسي وكتله اني معيرتك بس كتلك اني مو هي انت تخاف لا اصير نسخه منها او من امي زين اني شعليه بيهن ليش ماكو بنات صانو بيتهم وازواجهم هاي ماما نهر لأخر لحظه جانت وفيه لعمو سامي ومخانته ولا عافته لحد متزوج عليها وتحملت الفكر والضيم لان تحبه ليش تشوف كل النسوان امي وامك وبعيط سمع البيت كله كاال
سجاد : لج مو بيدي يابنت الناس مو بيدي اشك حتى بيدي اخاف اطلع واتخيل شغلات اذا اكولها الج بوجهي متباوعين لج مره وحده حسي حسسسسسي بيه لخاطر ربج تره اني داموت عبالج هينه عليه اعوفج هينه عليه اتنازل عنج اني لو ماخذين روحي اهون عليه وفدوه لتراب رجلج ولا اتنازل عنج بس اعرف مراح تتحملين اني صعب وعقلي متحجر يعني شفتيلج واحد يكول على نفسه هيج اني اكول اني عقلي مو براسي من اغار اكوم حتى اهذري ومااعرف شحجي لج اجت ايام اذا صوتج عالي اخاف احد يسمعه ويتخيلج اني من اخذتج من ايدج للكليه تكول جايب جمر واطفي بجسمي لان احس هاي هي خسرتج وراح ترحين لغير ناس وغير عالم وتتغيرين ويشوفوج وتضحكين ويه هذا وتجاملين هذا ووو الف فكره بالي
سليل : والله مااتغير وشتريد اسوي واتحمل كولشي لعيونك يحجي بأعصاب وعياط ويروح ويجي بلغرفه واني كاعده بلكاع ابجي واباوع عليه
سجاد : بس بلبدايه وره سنين اذا مطلبتي الطلاك يجوز تنهزمين ويجوز عدنا جهال وتعوفيهم يتلطمون بلدنيا مثلي
سليل : رجعت حطيت ايدي على وجهي واشهك واكول اله والله مااسويها والله اني مو مثلها ولا مثل سندس ارحم حالك وارحمني
دنج عليه وكومني من الكاع وحضني حيييل وكمت اشهك بحضنه
سجاد : كافي سليل كلت لو ما كلت دموعج تحركني
سليل : حاطه وجهي بحضنه واكوله اي كلت
سجاد : لتبجين عفيه ارحمي حالي تره والله احس گلبي راح يوكف كافي
سليل : وخرت راسي من حضنه وكتله سجاد انت شكد تحبني
سجاد :ااااااه ياسليل بس الله يعلم شكد خليني ساكت تره والله احس راح اموت
سليل : بداعتي انطيني فرصه متخسر شى وخليني اعيش وياك والي تريده يجرالك يعني والله مو سهله عليه اتوسل بس لان روحي بيك مكعد اتخيل نفسي اعيش بدونك
وخرني من حضنه ومسح دموعي وكال
سجاد : اني شكد احبج اتحمل كولشي حتى بعدج ومااتحمل لحظه اشوف الندم بعيونج
سليل : ياندم لخاطر الله ليش مو عشت وياك اشهر
سجاد : تختلف من تصيرين زوجتي ام جهالي راح اخنكج الطبه والطلعه ممنوعه كولشي ممنوع يعني توصل بيه مرحله لو بيدي اتحكم بلنفس مالتج وانتي مراح تتحملين هيج لج اني شكاك افهميها شون اقنعج اني راح ادمرج ادري بروحي ماانجرع متشوفين بحياتي مفكرت اتزوج بس حظي مدري حظج الاسود زرع الله حبج بگلبي واله اني اكره فكرة الزواج كره العمى راح حتى من اطلع افكر واشك وهواي مشاكل راح ادمر نفسي وادمرج
سليل : دفعته وكتله يعني هيج قافل متريدني
سجاد : اي ولا اريد اتزوج مااريد ادخل بخطيتج
سليل : تدري كولشي سويت كولشي حتى توسل توسلت وانت ولا يمك حتى نسيت نفسي اني بنيه وعيب ولازم اثكل واحترم نفسي واجيت وكتلك احبك وتحملت منك الصد والرفض وحتى ضربتني بوكتها وهسه دست على كرامتي ورجعت اتوسل في سبيل مطلكني وانت ولا هامك وتقارني بفلان وفلان ويمكن من اكبر اصير مثلهن وشون راح تشك بيه وتأذيني بشكك واعصابك ونسيت شى اسمه ان هاي البنيه احبها وتحبني وربيتها على ايدي وكبرت كدام عيني اكيد مراح تطلع مثلهن كله دسته برجلك وكاعد تنطيني اعذار تافهه كولش
بس تذكر شى سجاد مو كل اصابيعك سوه واني تربيه طه ونهر الي عاشو بلفكر والضيم وقله الحال ومنزلو راسهم لأحد ولا غلطو ولا سوو شى يغضب الله عمتي تحملت الي متحملته مره بت الخير والعز تشتغل للصبح ومكسور ظهرها في سبيل تربينا وتكدر تعيش معززه مكرمه بيت امها وتعوفنا بس بقت علينا واول شى علمتنياه مخافه الله وافدي بروحي للي احبهم مو اعوفهم وانهزم
سجاد : شنو تعلميني بنهر بت عمتي لو تعلميني بيج اني كتلج الخلل بيه مو بيج افهميني الخلل بيه ومن خوفي عليج باعد نفسي يعني سنين انسمط ابو ابويه ويوميه اتكطع حتى ماابين شى الج واوهمج بحياه مااكدر اوفرها مكعد اشكك بأخلاقج بس كلت من الظروف ومن تصرفاتي الي متنجرع راح تتغيرين واني كعد اوفر عليج وعلى نفسي شى اني شايفه حياه سوده ليش ادخلج بهاي الدائره الظلمه
سليل : خصم الكلام هذا كله انت تريدني لو لا دار وجهه وكال
سجاد : الاحسن كلمن بدربه وشوفي حياتج بعيد عني اني مافيدج
سليل : ماشي بس اتذكر انت خذلتني وكسرتني وطلعت جبان ومدافعت عن حبك ولا عن حقك بيه واني بقيت متمسكه بيك لأخر لحظه جنت مراهنه نفسي واكول يوم ميعرف اني اعرف بمشاعره ومستعده اسوي كولشي راح يكسر هذا الحاجز ويحارب الدنيا لخاطري حتى يحارب نفسه اني سويت الي المفروض انت تسوي انت لازم تتمسك بيه مو العكس
جان تنفتح الباب ومدت عمه نهر راسها وكالت اجه ابوج
مسحت عيوني وفتت من يمه وكتله يله عمو تفضل طلك
طلعت وهو ورايه باوع عليه بابا شاف عيوني دم
حجي طه : شبيج بنتي صار شى
سليل : لا مابيه بس عفيه خلي نخلص كولشي لان شويه تعبانه
حجي طه : اي راح يجي السيد كاظم وياه رجال حتى يشهدون وباجر سجاد يروح يطلك حتى انتي متوصلين للمحكمه
نهر : وليش هيج تصعبها يطلك بلمحكمه وخلص هو حتى زواج شكلي
حجي طه : من باب الشرع نهر حتى ميبقى شى بذمتها
سليل : كعدت على القنفه بس احس عظامي ساعه تبرد وساعه تحتر اريد اخرب من الالم الي يحسه گلبي
اندكت باب الشرع احس كل دكه كعد تندك بروحي اباوع عليه لازم الجكاره ويدخن بحركة گلب كمت اعرف كل حركه يسويها وشوكت يتعب وشيحس
جان يباوع عليه وكال حطي شى على راسج
كمت وحطيت الربطه ولبست روب فوك ملابسي وسمعت بابا يكول يله بنتي
وكفت اريد رجلي تعيني
رشا .. بيج شى فدوه احجي
سليل : اي اختج كعد تنذبج
رشا .. حضنت سليل عفيه لتكولين هيج والله هو الخسرج
سليل : خلي اروح اباوع ريم وغزل ساكتات بس الدمعه بعينهن غزل بس تشوفني ابجي ادمع حتى لو متعرف شنو السبب بس حسيت بريم حاسه بأذيتي فتحت الباب وطلعت سلمت السلام عليكم
السيد كاظم : بنتي اوكفي كبال رجلج
سليل : اااخ رجلي الي بأسم وبس
جان نصير وجهه بوجهه وكال ارمي اليمين باوع عليها وطلكها
ثواني صرنا عين بعين تمنيت بلحظتها يكول لا اريدها مااطلكها ردت ياخذني بحضنه ويكول مااتنازل عنج باوعت بعينه الترجف من الالم وكال انتي طالق
السيد كاظم : كررها
سجاد : انتي طالق
سليل : باوعت عليه وكتله بهمس شكراً
دخلت وعفتهم كولشي مسويت اول مفتحت الباب اجت عمه نهر عيونها تصب دموع لان تعرف بأذيتي ورشا وياها اشرت اريد انام تمددت وغطيت راسي
غمضت مااريد اشوف احد ولا اسمع احد
وره كم ساعه طلعت شفت بس بابا وعمه كاعدين اجيت تقربت وعيوني مورمه وكتله لبابا
خلينا نروح راضيه أجل هاي السنه المهم منبقى هنا
نهر : صخام وكليتج
سليل : مطايره ارجع السنه التجي خلي بابا يرتب اموره ويترتب وضعنا وعود ارجع اداوم اقسام داخليه
حجي طه : بابا لتضغطين على نفسج اني مااريد أذيج وارتب وضعي وضع خواتج على حساب مستقبلج
سليل : مو مهم بابا سنه وحده متظر مراح يضيع مستقبلي اذا أجلت بس راح اضيع اني اذا بقيت
حجي طه : فهموني شصاير ليش هيج وضعج احجي بنتي لتخوفيني عليج
تقربت وبست راسه وكتله ليضل بالك حبيبي اني زينه واصير احسن اذا استعجلت بروحتنا وضعنا المخربط هذا لازم يخلص ولازم نعوف هذا لبيت لماما سندس متسوه انزل نفسنا الها ونحسسها مسويه فضل براسنا وهم مااريدك تبقى هناك يم سجاد كافي تعبناه هاي السنين خلف الله عليه مقصر لازم يرتاح ويعيش وحده صار سنين مدوخي بمشاكلنه ومصايبنا وهم يصرف علينا فضله مننساه لازم يشوف نفسه وحياته انت وموجود فوك راسنا الله يحفظك النا بعد ماله داعي نثقل عليه
نهر : اباوع على سليل احسها جسد بلا روح تراب الهوا يلعب بيه ويطيره بنتي طفت ورده وذبلت ومااعرف شسوي حتى ارجعها مثل قبل جوايه يبجي دم عليها
حجي طه : ها نهر شو ساكته
نهر : براحتك يابه الي تشوفه اني وياك بس ومدارس البنات
حجي طه : بلكت انقلهن ماطول بعدنا بدايه السنه
سليل : اروح انام
نهر : ابقي كاعده يمنا
سليل : تعبانه
نهر : طبت وسدت الباب
حجي طه : متوقعتها هيج تحبه
نهر : منو وفتحت عيوني
حجي طه : صح اني جنت بلسجن وكولشي مااعرف عنكم بس احس بيكم وجنت حاس من زمان بسليل وسجاد جنت متوقع هو يحبها وهي لا
بس اليوم ثبت كولشي
نهر : شون عرفت طه والله صفنتني هسه
حجي طه : جان من يجي يحجي على كل وحده بيجن اباوع عليه واشوف تصرفاته وحركاته لتنسين مهما كان يبقى شاب ولو شكد ميكون حريص يخفي داخله لازم يصدر شى منه يجذب الانتباه واني جنت اتقصد اخلي يحجيلي كولشي عن كل وحده بيجن مو قصدي اشك بيه بس المريت بيه مو قليل خلاني اخاف حتى من نفسي على بناتي لهذا اكعده كبالي واشوف شنو نظرته لبناتي واخلي طول الزياره يسولفلي عن كولشي حتى كام من يسألني عن صحتي او يريد يعرف اخباري اكوله زين سولفلي على البنات ويستلمكم بلسره جان يبدي منج وينتهي بغزل بس بمرور السنوات اول ميبدي بسليل ويحجي عن كل وحده بيكم وهم رجع عليها حسيت اكو شى ومن اجاني وكال اتزوجها تمنيت تصير مرته من صدك والله يانهر سجاد ذهب صافي من كلشي اخلاق وثكيل والعيبه متطلع منه والله هاي السنين كله وكفلي وكفه الاخ ما سواها ولامره ما اجاني بلزياره دوم يمي ويحير شيجيب حتى فلوس وجكاير يعوفلي اكله تركت الجكاير مااشرب يكول وزعه للمساجين حتى ميأذوك ولو ما هو جان هسه اني ميت معدوم ركض ركضه حتى يتخفف الحكم بس الله يدري بيها عدا الفلوس الي انطاها رشاوي حتى تخلص وانحكم مؤبد يعني من اشوف هيج رجال اخو خيته وشهم ويخاف الله وصانً عرضي مااكيف يتزوج بنتي
نهر : والله اني امنيتي والله شاهد احبه مثل اخويه وكفته ويايه متنسي بس هو عيبه بسبب المر بيه عصبي نار وشكاك يعني يأذيها لسليل
حجي طه : تمنيت اطلع ويكولي تبقى زوجتي وام بيتي بس مع الاسف يله كولشي قسمه الْحٍمَدٍ للـّ? على كل حال بس هسه اني همي ومهمومي هاي المسكينه الي ضربه وره ضربه شون بيها
نهر : محد مات من الحب يجي يوم وتكبر وتنسى وتعيش
حجي طه : بس ماينسي ينهر من يدك الگلب اول مره ماينسي حبه وبنتي هسه والي داشوفه كدامي مكسور خاطرها وگلبها واني مابيدي شى اسوي حتى اريحها وخايف تضل هيج مكسوره خاطر
نهر : لا اسم الله بلكت من نروح للكوت وهناك الحياه تختلف والناس وبعدها تروح للكليه تتغير وضعها احسن
حجي طه :كون متصير مثل ابوها تضل عايشه بگلب مكسور
نهر : الله يباوع لحالها الْحٍمَدٍ للـّ? انت هنا اقلها تخفف عنها متعرف شون هي متعلقه بيك
حجي طه : هاي غزالتي اول فرحتي الله يعلم معزتها بگلبي
نهر : اكوم اشوف البنات
حجي طه : واني هم اروح حتى من باجر احظر كولشي
نهر : ابقى بات هنا
حجي طه : يحرم عليه البيت الي بيه ريحه سندس بس الله يعلم شديصير بيه من ادخل بيه بس لان انتم هنا مجبور وهانت كلها ايام واخذكم ونعيش بيت واحد واخلص منها ومن كولشي يخصها
نهر : شتخلص وبناتك منها
حجي طه : كلتيها بناتي ويبقن بناتي ومالي علاقه بأمهن نار جهنم تاكلها وتبعدها عني وعن بناتي
نهر : وحسام شراح تسوي علموده
حجي طه : هذا ضيمه ضيم هذا السند الجنت اكول للعوز عكازتي من اكبر وحامي بناتي طلع هو والماكو سوه والله لو ما مخلف ولد ولا القهره البگلبي هسه منه خلي لأمه يجي يوم ويحس بأبوه ادعي الله يحنن گلبه على خواته هسه اني مااريد شى منه بس اقلها هو عينه عليهن يعني الله يقبلها عندي ولد شاب بطولي واعتمد على الغريب ولو الغريب صار اخويه بس مهما كان هذا من دمي ولحمي
الك بيها اراده ياربي شدعيلج ياسندس من يوم الشفتج مشفت يوم عدل
الي الله روحي للبنات واروح اني
نهر : الله وياك يابه طلع وسديت الباب وراه الله يعينك ياخويه على ضيمك وعلى الجايك
حجي طه : رجعت للشقه دكيت الباب طلع سجاد باوعت عليه صرت اقراه واعرف شبيهه
كتله همزين كاعد منايم
سجاد : لا بعد وكت يانوم اسويلك عشا
حجي طه : لت مجوعان اكلت شويه يم نهر
ان شاءالله نهايه الاسبوع ماخذ البنات ورايح للكوت طفر من مكانه
سجاد : ياكوت طه وين موديهن
حجي طه : لبيت خوالي لازم ارجع نسبي لاهل امي
سجاد : انت تتوقع راح ياخذوك بالاحضان من كل عقلك امك جان عدها ورث وزعوه بينهم اذا اجيت انت راح تگلب الامه واصلاً مراح يصدكوك لتنسى انت مكتوب على اسم انعام من يوم ولادتك والكل يعرف رازقيه مخلفت
حجي طه : مرايد فلوس ولا ورث اني من ابويه ما داعيت وهو حقي اجي اداعي من اهل امي واعرف ماعندي مستمسك يثبت كلامي بس اني رايد اهل رايد عزوه ظهر مرايد فلوس وهنا اذا ابقى انعام مراح تجوز مني الله اعلم شراح تسوي
سجاد : لتخاف منها اني موجود
حجي طه : انت تتوقع خايف من انعام هاي شبيك سجاد ماخاف بس من الي خلقني اني خايف على بناتي وانت شفت شسوت بيهن وانت هم جنت موجود ومكدرت توكفها المشكله هي لو تضرب وتأذي بيه وجهه بوجهه راضي بس هي مثل الحيه تلدغ وتضم راسها وتعرف شون تأذيني وتموتني بدون متلمس شعره مني تحاربني بناتي والي صار بيهن خلاني لو بيدي اشرب من دمها واكتلها شون من كتلت سلام بس مااريد ارجع للسجن واضيع بناتي كافي الهنه بيه
سجاد : اني مو وياك بسالفه روحتن للكوت لتخاذهن اكعد واسكت
حجي طه : قررت نهايه الاسبوع
سجاد : متاخذهن وتروح طه البنات يبقن هنا وعود نشوف صرفه نجمعكم بيت واحد
حجي طه : باوعت عليه شفته محروك گلبه ويلوب والجكاره ترجف بيده
حجي طه : شوف سجاد ماانكر انت جنت الهن اخ واب من اني بلسجن بس هسه اني طلعت وخلف الله عليك كل الي سويته وراح يبقى دين برگبتي ليوم الدين بس من طلعتي والجاي اني مسؤول عنه انت كفيت وفيت وكتلك لو شما اسويلك مااجازيك بس بناتي بعد مسؤوليتي واني ادرى بمصلحتهن
سجاد : يامصلحه طه وانت تريد تاخذهن من بغداد للكوت شون راح يعيشن
حجي طه : الي يسمعك يكول البنات ٢٤ ساعه يفترن بلسواكه والمحلات والمتنزهات ومتعلمات على بغداد شو هنه من البيت للمدرسه وزين اذا بلسنه مره طلعن يعني مراح يفرق شى عدهن واني هم راح اكعدهن بيت وحدهن واني وعمتهن وياهن ونفس الشى هم من البيت للمدرسه
سجاد : وسليل كليتها
حجي طه : راح تأجل هاي السنه طفه الجكاره وعاط
سجاد : بربك يعني هم سنه تروح من عمرها
حجي طه : مراح يفرق عدها اخذت رأيها وهي اليوم بنفسها اجت كالت
سجاد : لتضيع تعبها طه قرارك غلط
حجي طه : اني كعد احافظ على حياتهن واذا كدرت ارتب وضعي بسرعه ومشت الامور مثل مااريد يجوز مااخليها تترك واخليها اداوم
سجاد : وين تبات
حجي طه : اقسام داخليه
سجاد : لك لتكفرني شون تأمن عليها اقسام يعني انت كعد تبهذلها علمود تنهزم من انعام متروح طه وتبقى سليل هنا
حجي طه : سليل وليش سليل وخواتها
حجي طه : قصدي الكل كلكم انتم
حجي طه : اعيد واكرر عليك لهنا ودورك خلص ولتعلي صوتك عليه نسيت نفسك تره ونسيت اني اكبر منك لو شنو
سجاد : كام يروح ويجي ومتعصب حيل افهمني طه بناتك راح يتأذن
حجي طه : اذا قصدك على سليل تره هنا هم تأذت
سجاد : ليش شبيهه شو مثل الورده
حجي طه : روح شوفها هسه الورده ذبلت سجاد وانت تعرف السبب خليني ساكت
سجاد : شنو قصدك
حجي طه : لا قصدي ولا شى المهم اني اجيت انطيك خبر مو اخذ رأيك نهايه الاسبوع متوجهين للكوت ورحمه الله والديك مقصرت
جان ياخذ المفتاح مال الشقه وباكيت الجكاير وطلع
سليل : ساعه ١١ بليل حسيت على ايد عمه توخر الغطا من راسي تكولي نايمه ماما لو كاعده
سليل : رفعت راسي كتلها كاعده
نهر : سجاد بره يريدج
سليل : شيريد بعد
نهر : ماادري بس صاير بارود ويلوب وحتى مقبل يدخل بلطرمه ينتظر
سليل : كمت غسلت وجهي لان صاير فلم ومشطت شعري ورفعته وحطيت الحجاب على راسي ولبست الروب وطلعت
اول مشافني جرني من ايدي سحبتها منه وكتله خير نسيت شى لو جاي اطلكني بلتلاثه
سجاد : انتي قابله على سالفه ترحين للكوت وتعوفين دراستج
سليل : معايفه دراستي مأجلتها
سجاد : يعني قابله
سليل : المكان الي بيه ابويه وخواتي اكيد اني بيه
سجاد :مترحين
سليل : باوعت عليه بخيبه امل وكتله ليش
سجاد : مترحين وتكولين لأبوج مااروح
سليل : شتريد مني سجاد
سجاد : مرايد شى بس ليش تضيعين مستقبلج وفوكاها عايفه بغداد
سليل : عفتلك بغداد كلها الك اشبع بيها حتى تعيش وحدك براحتك
سجاد : ليش تربطين وحده بوحده
سليل : مرابطه شى ومن الاخير المكان البيه اهلي اني وياهم
سجاد : لترحين
سليل : تقربت منه وكتله بصوت هادئ وتعبان حيل كتلك لتعوفني قبل ساعات
وعفتني لتجي هيه تطلب شى مني سقط حقك بعد
سجاد : ادري اني بعد مالي حق بيج لان طلكت بس الي حق بيج كأخ او عم
سليل :لاحظت شى بيه
سجاد : شنو
سليل : لابسه الحجاب لبسته حتى كدامك اعتقد هذا جوابي الك ردتني اخت عادي اصيرلك اخت بس انت من اليوم مو اخويه مااكدر اعتبرك اخويه ولا اكدر ارجعك عمي الي ينكسر ميتصلح بس اكدر اعتبرك سبب اذيتي وانكساري لهذا روح سجاد كافي الصار وروحتي للكوت حتى الك مناسبه خليني اعيش حياتي ويه ابويه الرجال الطيب الي شايل هموم الدنيا على راسه ويه خواتي الي كل وحده بيها عله شكل ويه عمتي الي لهسه اسمعها بليل تبجي على واحد ميسوه تراب رجلها روح عيش حياتك الي اختاريتها
وعوفني بحالي وشكراً وهاا لتكول اكرهه كلمة شكراً هلمره لازم تسمعها شكراً سجاد لان واخيراً ربيتلي گلب سنين تكول اربيلج گلب وربيته عاشت ايدك وهااا شفت مكعد ابجي واخيراً نجحت تخلي ام دميعه متبجي شكراً على كلشي
عفت وطبيت لأول مره احجي وگلبي دم بس ماابجي ولا قطره دمع نزلت لان الي احسه يفوق حتى الدموع لكيت عمه بلهول وخايفه عليه بستها من خدها وصعدت للسطح ردت هوا ردت اتنفس كعدت على الجربايه الحديد القديمه والجو بارد رافعه راسي للسما واكول هونها عليه ماعندي غيرك الهي گلبي راح يوكف من الوجع هونها بجاه نبيك مااريد اوكع وأذي ابويه كافي الهو بيه
بقيت الفجر كله افتر بلسطح وروحي تلوب ساعه اهدأ وساعه اريد اعيط تالي سمعت القران يقرا نزلت حتى اخذ السجاده والقران لكيت عمه حاطه ايدها على خدها وكاعده على الدرج بستها من وره من راسها فزت
نهر : ها يمه بيج شى
كعدت بصفها على الدرج وكتلها
ليش منايمه
نهر : شلون انام وانتي متأذيه وكلت اخاف اصعد واضوجج ردتج تهدأين يله بس والله گلبي نار عليج كل شويه اصعد اوصل البيتونه وارد انزل اكول اخاف اضوجها وهي تريد تبقى وحدها
باوعت عليها
نهر : شبيج يمه ليش هيج تباوعين
سليل : انتي من ياطينه مخلوقه شنو هذا الگلب الشايلته والحنيه الي عندج ليش هلكد انتي طيبه ليش امي مو مثلج هيج حنينه
نهر : ليش اني مو امج
سليل : والله انتي امي وتاج راسي ودنيتي كلها انتي النعمه الي الله رحمنا بيها اني وخواتي انطانه ام متخاف الله وماكو حنيه بگلبها بس بلمقابل انطانه انتي نهر وكلج نهر حنيه وطيب
نهر : ولج كافي دمعت عيني شنو هذا الحجي الحلوو
سليل : حضنتها انت تستاهلين روحنا مو بس حجينا
نهر : هذا كله لان انتظرتج هنا ومنمت لو ادري هيج يوميه تتغزلين بيه ابقى سهرانه
سليل :هههه لا مو لان بقيتي بس اشوف حنيتج وطيبتج وهاي الايد الحلوه وسحبت ايدها وبستها شون تعبانه من الخبز والخياط كله حتى توكلنا
نهر : واكو ايد ثانيه هم تعبت واحتركت وياما وياما ساعدتني لتنسيها
سليل : اوووف قصدج سجاد
نهر : جنتي قاسيه عليه يمه اني من الاول كتلج مايفيدج بس هو هم حقه لو ما يحبج ويخاف عليج يكدر يتزوجج فتره ويعوفج بس مراد يدمرج ويعوفج
سليل : اذاني حيل ماما
نهر : ادري يمه وأذه نفسه هم هو سوه هيج لمصلحتج
سليل : خذلني ااااااه شكد يأذي الخذلان تأمن بأنسان وتكول مستحيل يعوفني مستحيل يعيش بدوني هو اماني وتالي يعوف بنص الطريق
نهر : بعدج صغيره تكبرين وتشوفين الاحسن وراج كليه وحياه بطولها وعرضها واشكال تشوفين
سليل : تتوقعين اشوف احن منه لو اشوف واحد يخاف عليه بكده لو اشوف رجوله وقوه صبر مثله
نهر : تشوفين يمه ان شاء الله تشوفين كومي حبيبتي صارت الصلاه
سليل : هو نزلت اخذ السجاده والقران اصلي بلسطح عاجبني
نهر : لا يمه فدوه الجو بارد ويمرض مابينه حيل توكعين فلاونزا شفتي اختج كوه كامت منها
سليل : ماشي رايحه اصلي بلغرفه
نهر : روحي يمه الله يبرد نار گلبج وتصبح رماد
سليل : امين
بستها وكمت توضيت وصليت ونمت من التعب
بعدها عرفو خواتي بسالفه روحتنا للكوت مكالو شى بس شفت بعيونهم الخوف لان حياه جديده ودنيا جديده بس متفرق ذاك الفرق الجبير لان احنا هنا ماعدنا شى نخسره لا بيت ولا صديقات بس ريم دمعت علمود سحليه وبس عرفت كالت وسحليه مااشوفه بعد وبقت كاعده ساكته ومقهوره
وخلال ٣ ايام كملنا كلشي ولمينا غراضنا ولو ماعدنا غراض بس ملابس وجاب بابا سياره وبدينا ننقل الغراض باوعت ريم واكفه على صفحه ويه حسين
ريم : يعني بعد مااشوفك
حسين : وليش متشوفيني محد ياخذ ريمتي مني
ريم : بس راح اروح لغير محافظه يعني بعد مااشوفك يوميه
حسين : احسن ترحون اقلها بين مايهدا الوضع
ريم : ليش مبين ابوك وبيبيتك ناوين على نيه سوده مثلهم
ريم : جان يكرصني من خدي وكال لسانج شوكت تلزمي
ريم : مااعرف اكذب واضم اهلك مااحبهم
حسين : مو مهم المهم اليه تحبيني
ريم : انت سحولي صديقي الصدوق شون مااحبك هسه كولي مااشوفك بعد
حسين : ولج نسيتي اهل ابويه كلهم بلكوت
ريم : لتحجي كدام اهلك احنا وين رايحين بابا ميقبل احد يعرف
حسين : هاي شبيج شون احجي بس يصير هدوء والوضع يستقر بيتنا بحجه اشوف عمام ابويه اجي للكوت واشوف ريمتي
ريم : راح اضوج بدونك هاك
حسين : شنو هاي
ريم : اشتريتها من مصرفي
حسين : اول مره تشتريلي شى دوم اني الي اشتري حتى لو اني الزعلان
ريم : هههههههههه اي والله بس هلمره كلت اشتري افتحها
حسين : فتحه لكاه كاسيت هذا شنو
ريم : اعرف بيك تحب عمر ذياب هذا كاسيته الجديد خليت رشا وعمه يشتروه اليه والله من مصرفي مقبلت يجملوني
حسين : ليش اشتريتي وبقيتي بلا مصرف
ريم : ميخالف اقلها اشتريلك شى مره وحده
حسين : غراضج حطيتهم يم غزوله علاكتج مال حلويات ترستها الج وهذا علج كولا خلي بجيبج حتى لتتخربط معدتج من الطريق اعلجي
ريم : مو متجي وتخليني اشتاقلك
حسين : اجي وعيونج يله اصعدي توصلين بلسلامه ريمتي لتسوين مشاكل فدوه
ريم : ههههه ريم اينما تضع قدمها تأتي معها المشاكل والمصايب والبلاوي
ريمو وبس والباقي خس
حسين : الله يستر ولج ساسوكي من هسه اشتاقيتلج من ترحين شلون
ريم : هم اشتاقلي ههههه باي سحولي
حسين : باي ريمتي
سليل : ولكم يله تأخرنا
وجاي اشيل جنطه جبيره اسحل بيها جان تنجر من ايدي وصار بوجهي اااه ياعذابي تمنيت مااشوفه مااتحمل اودعه وبقى يباوع بعيوني عفته ورحت اجيب باقي الغراض
وصعدناها بدون اي كلام والكل سلم عليه اشوف البنات يودعوه وبابا يبوسه وعمه نهر توصي على نفسه وسد الباب بابا وانطى المفتاح للجيران اخاف تجي ماما لان مبلغناها راح نعوف البيت طلعنا بدون منكول لأحد والمفتاح عفناه الها خلي يفيدها البيت
تقربت منه والكل صعد بلسياره وبيدي قفص البلبل مديت ايدي
سجاد : شبيه
سليل : اخذه
سجاد : بس اني انطيته الج
سليل : مااعرف الجو هناك شلون وضعنه شلون راح يصير خلي يمك يم الزرع احسن وأمن اله
سجاد : توقعت تعلقتي بيه ومتعوفي
سليل : باوعت بعيونه وكتله علمتني اكو شغلات نعوفها احسن النا لان بقائها يدمرها ويدمرنا
سجاد : هذا بسمار الي مو
سليل : الك ومو الك ميفيد بعد دير بالك على نفسك وصحتك وازكي الزرع مو تنسى ومشيت ردت اصعد وتقرب حيل مني وهمس بصوت ناصي قريب اذني حسيته بألمه وكال
سجاد : انتبهي لنفسج يانفسي
سليل : دمعت بسرعه عيوني وصعدت وسديت الباب مااريد ابجي مااريد
تحركت السياره وبدون مااندار ودعت كولشي عشته تمشي السياره بينا لطريق مجهول طه نهر سليل رشا ريم غزل كل واحد من عدنا صافن ويفكر شراح يصير بحياتنا
المرينا بيه مو قليل والعشناه كله بحلوه ومره تركناه هناك بين حياطين بيت محروك كله قهر والم وبجي وطفوله معذبه وناس مترحم طماعه وناس حرام تنحسب على البشر وذكريات ثانيه بين حياطين بيت ام سندس المره الطيبه الي حوتنا بأصعب وقت وساندتنا بوكت العوز والفگر وقله الحيله
سنه ٢٠٠٢ شهر ١٢ ودعنا بغداد بكولشي عشناه بيها ياترى راح نرجع الها والمكان الرايحين اله شون راح نعيش بيه والناس البيه شلون راح يستقبلونا
وسجاااد منقذي ومعذبي اعتبره الحكم والجلاد معقوله انتهى من حياتي وانطوت صفحته وراح اتقبل احد غيره يسكن گلبي
لو للقدر رأيُ اخر......


للقصه فصول اخرى تحكى .....
انتهى الجزء الاول من قصه ابي والغزلان اتمنى استمتعو فيها كان الجزء الاول يحكي عن حياه شاب عراقي في مرحله الثمانينات ودخلنا معه حياته الشخصيه واسرته الصغيره المتمثله بغزلانه القصه كثيره الاحداث والمواقف والعبر
بسبب طول القصه وعدم الاختصار وهذا الشئ نوهت عنه سابقاً بدايه القصه بأن مااختصر صارت القصه جزأين واليوم ننهي الجزء الاول بواقع ٤٤ بارت اتمنى احببتم الجزء الاول رغم كميه الالم والقهر والاحداث المؤلمه الي فيه اي شخصيه بقت معلقه الها دور في الجزء الثاني وكذلك
الجزء الثاني راح يفاجئكم بدخول شخصيات جديده وحياه كل غزاله من سنه ٢٠٠٣ الى يومنا هذا اضافه لحياه عمو طه وعمه نهر منبع الاصاله والحنان
ان شاء الله النشر يكون بنهايه شهر الواحد او الثاني من السنه الجديده بدون تحديد اذا الله كتبلي عمر وسلامه
اترككم بعد ايام مع الكاتبه المبدعه زينب ماجد وقصه جديده ان شاء الله تستمعون فيها
اتمنى كنت خفيفه الظل عليكم واعتذر عن اي تأخير صدر مني سواء بقصد او بدون قصد وشكراً من قلبي على تفاعلكم الجميل للقصه وتعليقاتكم الاجمل
استودعكم الله وربي يحفظ الجميع
اختكم ريام هادي