[قال الزهر آآآه]

ضغطت ارسال ... الين تاكدت انها وصلت تمت لحظات ...تنتظر ...ماجا رد ... تركت الجهاز ....متوجهه تجيب لها مويه ..
.................................................. ................................
وصله حس المسج ....رفع الجوال بتقطيب ...يقرا ..
(الله يحفظك من كل شر...)
ضغط ..قافله ....وحاذفه ...على جنب ...من متى صار مكشوف لللهدرجه ....؟؟؟؟؟!!!
امه ؟؟تأخذ اخباره ...الي عجز يخبرها إياها ..!!! من نجلا ؟؟؟؟ لا وتطلب منها تصبر وتتحمل !!!...اي محبه ...واي تضحيه .. يمه !!!..
انتي بعتيني ...برخيص للقذر الي معك ...!!!..
قبض بيدينه الدركسون ...الين ابيضت عروق كفف يده ....بقهر ..والكلام ؟؟؟ والعيون الي نطقت لي يانجلا ؟؟؟ كله كذب ؟؟ كله تمثيل عشان امي طلبت !!!...تنهد ..متذكر انه لمح لها ..عن مخطط لو ماقال !!! بس هي حست ...لايكون امه تبي تعرف !! وش نيته ؟؟؟ ...
وتستخدم نجلا ...!!!؟؟
عجزت عينه تشوف الطريق ...اشر بيجنب واقف ....يبي يهدى ...ويفكر .....
كان يدري ويعرف صغر سنها !!! ..وكبر الحمل ..عليها ..ومر الموقف الي عيشها إياه!! ..تراجع متساند ..بفكر هايم ...همس بضيق ..وكنه يخاطبها وهي له تسمع ..
- على طول نصيتي امي ؟؟ نجلا ؟؟؟ماقدرتي تتحملين الي عرفتيه ؟؟..!!! ولا الي شفتيه ؟؟
رفع يده ..ضاغط جبينه يبي يبعد الذكرى ....ومايقدر لها يلوم ...!!! ..هو الغلطان !!! كشف تفسه ...بلحظة ضعف ..منه !!! ..ابعد راسه ...ملتفت لجواله ساحبه ..وضاغط رقم..معين ...
- ارحب ياخوي !!!...
- السلام عليكم ؟!!
- وعليكم السلام ورحمة الله وبركاته ...
- اخباركم طلال ..؟
- بخير الله يسلمك ...كل شي تمام ..تو مناديب الشركه الفرنسيه طالعين ..والامور ميه ميه ...
- ابوك جا ؟؟؟
- لأ تطمن خواتي بالبيت ...وانا معهم ....وكل شي زين ...!!
تردد ثم كمل ...
- وامي ؟؟
- عند خالتي تروح وتجي علينا ...
ابتسم الوليد بطرف شفته بمراره ...ماتبي حتى تجلس ببيته ..تخاف يجي سعود وهي عنده بوسط داره ...!!
- زين ..
- فيه شي ؟؟ يالوليد ؟؟؟ تدري انت انا مب مخلي ابوي يسوي للبنات شي !!!
هز الوليد راسه ...
- اعرف ياطلال ....انت اخوهم ..من لحمهم ودمهم ..وتحبهم اكثر مني !! خابر..
- وش هالكلام ؟؟ انت بعد اخوهم ...!! وتحبهم مثلي واكثر !!
اكيد باثرينك ...ماعلى لسانهم الا انت ومرتك وذكرياتهم معكم ...!!
ابتسم الوليد بحس خاوي ...
- انا بسكر الان ...طمني اول بأول ..
- ابشر ...يله مع السلامه ..
- مع السلامه ..
قفل ..جواله ...وحرك سيارته ..متوجه لشركته اول ...قدامه موعد ..بن عايض ...كثر حس التحدي والترقب ....الا ان صدره انزخم ..بشعور ضايج ... وشي ..موجع يشابه الخيبه ...حسها يتكرر ...بسمعه ...آلمه انها راحت تشكي ...ولا يلومها ..حمله ثقيل ..هو بروحه شاب شعره من شيله ..بس هذا الوجع بالذات يخصه هو ...!!! ..شلون بيعاتبها ..وهو يعيش الخجل ..المرير ..اضعاف ..واضعاف ...يستحيل يرتجي منها اكثر من الي عطت ...وخذا ..ولا يقدر يجبرها ...تنهد ساحب انفاس ...ضغط يفتح الشباك ...يبي روحه تشاقي صدمات الهوى الداخل ...
.................................................. .................................
بسجون الرياض ...
سمع رنة جواله ...رفعه ..كان بيطنش بش شاف اسمها ..ابتسم ...ورفع ..
- هلا ...!!.حي هالصوت !!! ياصغيره !!
ضحكت ...
- أي صغيره ...؟؟ ياخوي .. شوب بصير بقره ..
- افا ؟؟؟ لالا لاتقولينه ...انتي اميرة اخوك الصغيره ....بشري عنك ياخوك ؟؟ والله انك ببالي ...
- بخير الحمد الله ...طيبه ...
- شلونك ..وشلون النسيب ؟؟ ...
- طيبين ..ماعلينا ...انا دقيت عليك ابي اعزمك اليوم عالغدى ؟؟؟
- والله وكبرنا وصرنا نلزم ونعزم ...!!!!..
ابتسمت ...لصوته الي يبرا كل مافيها من هم ...
- ايه شفت ؟؟ لا وبعزمك المحل الي تختاره !!! طب وتخير بس !!! والله اشتقت لك ياخوي ..
- انا بعد ...خلاص تم ..قبلت ..!! الله يقويك ..ويكرمك ياخيتي !!
- سعد ...ابي بعد محل توديني !!
- الي تامرين ..به ..
- الله لايحرمني منك قول امين ...جعلي افرح بك قريب ..
سمعت ضحكته الوجلى ..
- انا الظاهر اني غاثك بشي ....يوم انك تبين تزوجيني !!!؟؟ ..
- لا والله ...ابي تستقر ...
- الله كريم ..يانجول ...خلاص انا بسكر ..متى امرك ؟؟ 2 زين بكون توني طالع حول 1 ونص ..اطلع
- ايه زين ..انتظرك ...ودي بعد اذا تغدينا امر اخواني اشتقت لنصوري ...وشيهانه ....كان ودي اطلعهم بس خالتي بتجلس لحالها ..!!..
- معليه الجايات اكثر ...نودي لهم معنا تسالي ....يله مضطر اقفل منك ...وراي خطابات لازم اكتبها ..
- طيب ..طيب ...انتظرك لاتنساني ...
- ابد !!! توكلي ...
- مع السلامه ..
- فمان الله ..ياحبيبه ..
قفل تارك جواله ...راجع للشغله ..مركز فيه ....
.................................................. .................................
المستشفى ....
جناح ام سلطان ....
طلعت رنا من دورة المياه متوضيه لصلاة الظهر ...
حاسه بكتمه مهما تنفست الا انه مكتومه .....توجهت للسجاده ...بكل طاقتها المهدوره ضيق ورجى ...وانغلاق ..احساس وشعور ...
صلت ...وتمت على سجادتها ...وصلها صوت المسجات المتتابعه ...
قطبت هدب عينها ..قايمه من مكانها ...يم جوالها ...ارتعبت احاسيسها ...وهي تفتح الرسايل ..وتشوف ..محادثاتها وصورها ....لحظات رعب جمد كل مافيها ...ارتجفت أطرافها ... ..ضاغطه تقفل الجهاز ..
شهقت بخوف ...مبتدي يشل كل مداركها .....
- وش ناويه ؟؟ عليه يالجوهره ؟؟؟
جلست راميه نفسها ...بصدمه وسواد مكتسي كل نواظرها ....وصلها حس المسج من جديد ..
فتحت برجفه وعينها غاشيها الدمع ...
رفعت تبعد تبي تقرا ...
(تبين اغراضك ؟؟؟ تعالي خذيهم !!!..ياتاخذينهم انتي او بيعطيهم لخويك )
قطبت هدب عينها ..برهبه ....واستنكار ...هي وسط مين من الناس ...كلهم وسط مستنقع يخبرون بعضهم ..ويتحاذفونها ...!!!..
عضت شفتها ...هي قد قررت ..تقطعها ..تذكرت تهديد زناد ...همس بضيق حاقد ..
- يعني مامعك شي وتهددني ؟؟؟ والله ماخليك تاخذها ...!! انصاع للجوهره ولا لك !!!
أرسلت بعجل ...غافل بالها ...وادراكها ..معد ركزت بشي ..لا العواقب ولا انتبهت لاي شي ..غير انها تبي توصل لاغراضها قبل بن مجفل ..
كتبت برجفه ...
( باخذهم انا !!!! يالجوهره لكن حطي ببالك هذا اخر عهدي بك !!!!...)
انتظرت ثواني ....سمعت المسج ..
( برسل لك المكان والوقت انتبهي لجوالك )
شدت بضغطها عالجوال ...تقرا ..مقطبه ..ضايعه وسط افكارها ..الهوجا ..قدام عينها ..انها توصلها قبل ياخذها زناد ...شدت شفتها ..بتفكير ...حاذر وشك ..بالجوهره ونواياها ..!! بس هي مجبوره !!..وقفت ..فاتحه شرشفها ..ومتوجهه لنور الشمس ..بتحتد لها من جديد ...كرهت ضعفها وحاجتها لها ..هي بين نارين ..نار الجوهره ارحم من فضيحة زناد ...حرقت عينها دمعه ...رفعت يدها ماسحتها بلا رحمه ...هامسه بضيق ..كاره ..لوضعها ..ال تعيش ..
-اخر مره يالجوهره ..!!! وبطردك من حياتنا للابد !!!..لو ترجيتيني سنين وبكيتي دم !!!
.................................................. .................................
شركات الجاسر
الفرع الرئيسي ...
الساعه ..2..الظهر ...
جاه اتصال من نجلا ...ومارد ...ارسلت رساله ..تعطيه علم بروحتها مع سعد ...عينه على مكتوبها ...دق الباب ..ترك الجوال ..
- تفضل !!!!
- السلام عليكم طال عمرك ...وصل عايض العايض ...
- يتفضل ...وجيبوا الضيافه ..الان ...!!
- ابشر طال عمرك ....
قالها سكرتير مكتبه متراجع ...
استجلس الوليد ...وعينه تترقب الداخل كما الصقر ...المتأمل ...ابعد كل مايشغله ..ووجَه ..جل اهنمامه للشخص الي ان فتح له الباب ...مع سكرتيره ...
وقف ..بتوقير ..
- السلام عليكم .....
- وعليكم السلام ....حي أبو حمدان ...ارحب ..تفضل ...
استقام الوليد بجلسته ...مرحب ...بحزم ...ظاهر ...وواضح ...
تقدم أبو حمدان ...بوقار ...يتمثل بكل حركه منه ...
ثواني ودق الباب ...الا بدخول المقهوي ...صب لبن عايض ...وللوليد ...
وجهه الوليد كلامه ...له ..
- اتركنا الان ..وبلغ الي برا ..لااحد يقاطعنا ...مهما كانت الأسباب ...حتى لو اتصال !!!
- سم طال عمرك ...
طلع ...قافل الباب ...
التفت الوليد بعين متأمله ..تلاقت عينه بنواظر أبو حمدان ...مخفي كل دواخله ...قادر يحفر ويدفن احساسه ...المجتلي فيه ...
تكلم بصوت هادي ..
- تقهو يابو حمدان !!..
تم أبو حمدان يناظره ..ثم لف براسه ..ماد يده ..يرفعها ..
-تحرم علي قهوتك وضيافتك ..يابن جلمود ...الين تعطيني حقي وتنصفني منك !!!
احتدت نظرة الوليد ...متقدم ...
- لك القدر و الحشيمه ..يابو حمدان ....
قاطعه أبو حمدان ...
- أي حشيمه وقدر ؟؟؟ وفعولك الي تجنيت بها !!! بدون وجه حق !!!انت جريتني لحد عنك ؟؟ متعني !!! ومتقصد !!! ..مااحترمت كبري ..ولا شيب راسي !!! ..
ركز الوليد بملامحه ...بدون يرمش ...
-انا مقابلك بنفسي ..يابو حمدان !! وانا بطبعي ..من يعاديني ..انهييه ..وماقابله الا قبل ينتهي ..!!احب اشوف نظرته الاخيره !!.. قبل اسمه ..الكبير يطيح بين الناس!!
احتدت نظرة أبو حمدان ...
- وش بيني وبينك يابن جلمود !!!!! انت ماقصرت ...كل الي سويته ..مب في صالحي لشركاتي ولا اسمي !!!
خاطبه الوليد ...بحتداد النبره الهاديه ...
-ولا ندمت ...!!على فعولي ...!!.. ...لمس نظرة التحدي بعين أبو حمدان ...
هز راسه ..
- ابيك تسمعني ...للأخر....وابي تنصفني انت !!!!..
قطب أبو حمدان ..نواظره ...
- هات ماعندك ...!!
تراجع الوليد ...ساحب عصاته ...وواقف ...بدت خطواته تتهادى ..الين جلس مقابل أبو حمدان ...وعينه مركزه بشخصه ...
تساند ..تارك عصاته ..بجنبه ..تارك نواظره تتلاقى ...مع أبو حمدان ..
- اول شي ...جاوبني على سؤالي ...وش سلمك من عدو الشرف يابن عايض !!!!
قطب ابن عايض هدب عينه ....
- وش مقصدك ؟؟!! وش تقول انت !!
كرر الوليد ملاحظ صدمته ...
- قلت وش سلمك من عدو الشرف !!!
هز أبو حمدان راسه باستنكار ..مجحف راد ..بقوة وإصرار ..
-ماله مكان ...بينا !!! سلمي معه معروف بين العربان ...!! يخسي ..يكون له منفس نوطاه قبل تعتلي أنفاسه حتى !!!
هز الوليد راسه ...ومبادي ..ضغطه على عروق يده ..وضحت ..
- هذا العشم فيك ....!!..
- وش عندك يابن جلمود !!!؟؟ هات ..التهايم !!!
- الي عندي مب تهايم ..انا متأكد ...!!! ..يابن عايض ...!!! انا مستعد ..ارجع لك ...كل ماخذيت !!! تنازل مني لك !!! ...بشرط !!
- ومن يقول اني اقبلها على نفسي ؟؟؟ انا مابي منك صدقه !!! الي عرفته عنك ..يعاكس فعايلك الي سويت !!!
رد الوليد بصوت حاد نافر ...
- انا ابي ولد اخوك !!!! اوو ولدك !!!! واحد من الاثنين هو عدو شرفي !!!
بانت الصدمه ...بملامح أبو حمدان ...
- ايش؟؟؟
- الي سمعت .... انا مستعد انهيكم ..او ارفعكم ...بكلمه منك !! ووعد !!! انا عدو شرفي وشرف بيتي ..عندك !!! ..ولا راح ارضى باي حل الا تسلمني إياه بطوعك !!!!! ويجيني لحد عندي !!!!ويعترف !!
رفع أبو حمدان يدينه ..باستنكار ..
- ولدي مايسويها !!! ولدي رباة يديني ومسندي ...سكت أبو حمدان ...تايهه عينه بتفكير ...
تم الوليد يترقبه ..بصمت ....وبتركيز ..يدرس كل تعابير صدمته ...
الين لف أبو حمدان براسه للوليد ..متلاقيه نواظرهم ...تكلم ..بصرامة حس ..
- عطني ولد اخوك يابن عايض!!!
- وش يضمنك ؟؟؟ وش يخليك متأكد !!! انت تماديت يابن جلمود !!!..
تحرك الوليد من مكانه ...منحني ..ساحب مغلف ...من مكتبه ...مده لابن عايض ..
مد أبو حمدان يده ساحبه باصابع ترجف رغم الثبات ...
بدت أصابعه ...تفتح وتسحب الي داخل ...موجود ...جت عينه على صور ولده ...وولد اخوه ...
رفع راسه ..
- جايب لي صور عيالنا !!!! وش تبي تثبت ؟؟
انحنى الوليد من جديد ...يسحب مغلف ثاني ...مده ...
سحبه بن عايض ...
فيه أوراق كشف سجل اتصالات ...برقم ...شاف أوقات المكالمات ...
- ماتخبر شي من هالارقام ؟؟؟؟ خاصه الي انا محددها !!!
شاف الوليد رجفة أصابعه ...
- هذا رقم ولدي ؟؟!! حمدان !!
- كل الأرقام لولدك حمدان !! بس رقم معه ورقم مب معه !!! لكن قد صار تواصل بينهم الاثنين !!!!...
تقدم الوليد شابك يدينه وعينه ماترمش ...متابع ...
- هذا يدل ان عدوي المخزي بينكم ومعكم !!!! ...ياولدك !!؟؟ ياولد اخوك!!!وحسب شهادتك بولدك ..والمعلومات الي عندي عن الاثنين ارجح ان قليل المروه والشرف هو ولد اخوك !!!!!!
ترك أبو حمدان الورقه ..عالمكتب مع المغلفين ...ورفع عينه للوليد ..
- وش لك عليه ؟؟؟؟
تقدم الوليد ساحب كشف الاتصالات ....ماد يده لجيب صدره يسحب قلمه ويحدد الرقم ...ويمده لابو حمدان ..
- خذ الورقه هذي وركز بالهرقم ...!!! مد يده تارك قلمه ساحب جواله ...قابض بشده مفرفر ...مدور مكتوب معين ...
وصل ..له رفع راسه ..ومد جواله لابو حمدان ...
- اقرا ... !!!؟؟ اقرا هاالمكتوب ...!! ترضى يجيك عن عرضك !! رغم انك عارفن بيتك وعارف ..طيب اصله!!
- لاحول ولاقوة الا بالله .... لاحول ولاقوة الا بالله ....حسبي الله ونعم الوكيل ....
ناظر أبو حمدان الوليد ...
- انت متأكد !!!
هز الوليد راسه ...
- هذا قطره من غيث !!! اشر براسه ...له ..
- دق من رقمك عالرقم الي عطيتك ...متأكد مسجل رقمك وعارف انك عمه بما انه يستقبل من ولدك الي واثق فيه زي ماتقول !!!
ترك أبو حمدان جوال الواليد ...المترقب له بصمت وترقب ...حذر ...من داخل اعماقه ..ماتمنى ..يواجهه ..بسواد فعوله ..لكن يكفيه ..انه
ارتقى ..عن شين الفعول ...واحتزم ..بقوة صبره وتحمله ..للصعب ..لجل يوصل للي يبي ...
طلع بن عايض جواله وضغط الأرقام واحد ورا الثاني ....ثم رفع لمدارك سمعه ...وعينه متواجهه مع الوليد ...
تم يرن ويرن ماجا الرد ...ابعد جواله ..
- محد يرد ...
شد الوليد شفته ...بترقب الا وصله حس مسج ...سحب جواله ...شغل المقطع المرسل له بنفس الوقت الي ابعد بن عايض الجوال ...ووراه إياه ..
- هذا مب ولد اخوك ؟؟؟ انت دقيت ..ناظر مايبي يرد عليك !!!! ...ابو حمدان انا ماجبتك الا وانا متأكد ..من المعلومات الي عندي ولا تتوقع رجل بكفائتي يسوي الي سواه من مجرد توقع !!!! ..ولد اخوك عدو شرف بيتي !!!!!! .

- دق من جديد ..الا مايرد !!! ..
ضغط ابن عايض ...اتصال ..مترقب...ومتمني ..كذب الي سمع ...
وصله ..حس ..حمدان ..
- هلا عمي !!!...
تلاقت ... عين عايض بالوليد ...الي تم مركز بعينه ...يمه بدون يرمش ...
قفل أبو حمدان ...جواله ...

...تراجع الوليد ..متساند رافع يده ...واصبعه ..
- انا قبلت اشوفك ...عشان تعرف السبب ..صحيح انا ماعرفت انه متعاند معكم الا من تالي !!!..وهذا الغلط الي سويته !!..لكن انت كبيرهم !!! .اختار اجيبه يطريقتي ..انا !!! او تجيبه انت لحد عندي !!! وهذا انصافي الي لك يابو حمدان !!!!
ارخى أبو حمدان نواظر عينه ...بانحناء كتوفه ...شد الوليد شفته كاره اللحظات الي تمر ...لكن مهمها انوجد كرهها ماتجي مثل الي عاشته نجلا منه !!!!...
- شلون اجيبه لك ؟؟!!!
- يجيني منكس راسه معترف ...بالخزي الي سواه ...ابي اعرف من الي وراه ومين الي دازه بطريقي ...!!! صدقني ..ولد اخوك اللحظه الي فكر انه يلعب هاللعبه القذره ..تغافل انه باع نفسه واستغنى عن روحه !! ..انا مانيب مخليه ابد !!!!..بيتمنى انه مانولد !!!..
قدم متساند ...شابك يدينه ...
-وبخصوص اسهمكم انا شريتها بنظافه ...بدون أي غش وتدليس !!! الشرع معي والحق معي !!! ثق تماما اني نزيه وتعاملكم معي بيرفعكم مب منزلكم !!!!
انتبه لرجفة يدين ..ابو حمدان ...وتوهان عينه ...عاجز يلتقي بعين الوليد ...من الخزي الي تشربه بسبب حمدان ..
-هذا غير انه يمشي بطريق غير أخلاقي بضغطة اصبع مني ادفنه بالسجون !!..صدقني ..!!! انا ابيه يعترف ويقول من وراه !! لغايه ابي اوصلها !! الي مثله ..ذمته رخيصه ..ومايلعب مع الكبار من راسه !!!

- يعني ان اعترف ...بتتركه !!
تم يرقب أبو حمدان ...رد بصوت قاطع ...
-لأ بنهيه ...بالسجون !!..لو القتل في شرع ربي لحالته محلل مانتظرت !!!
رفع أبو حمدان يده يمسد جبينه بانتكاسة راس ...وضيق ...
وقف الوليد ..لاف لمكتبه ...ضغط سنترال ..
- سم طال عمرك ..
-كاس مويه حالاً....
- ابشر ..
جلس الوليد ...بكرسيه ...
- أبو حمدان انا مجبور ...
هز أبو حمدان راسه ..بتفهم ...وكتمه ...مبعد عينه عن الوليد ...
دق الباب ..تعالى صوت الوليد الجهور ..
- ادخل ..
انفتح الباب.. تقدم المباشر...
اشر الوليد له يوصل المويه ...لابو حمدان ..
- اطلع ..و سكر الباب..
راقب الوليد أبو حمدان ...
- اقدر اخذ كشف المكالمات !!
هز الوليد راسه ..
- لك الي تبي !!..انت مب عدوي يابو حمدان !!
سمع الوليد حسه وكنه يخاطب نفسه ...
- هذا امانة اخوي لي !!!..يعلم الله اني ماقصرت ولافرقت بين الاثنين !!
تابع الوليد حسه بدون يرمش ..مستطرد ..بحس حاذر هادي ..
-احيان النار تخلف رماد!!
تابع أبو حمدان ...
- امه مره كبيره ومريضه ...اشقاها هالولد ...
سكت الوليد بدون تعليق ...حاس ..بكسرة الي قدامه ...بصمت ..وماراح يتنازل ..ابد ..
كل شي الا نجلا !!
وقف أبو حمدان معه المغلف ...وقف الوليد معه ...
- استرح ..بان جلمود .....
مشى ...بخطوات مهزوزه ....مكرر بحس هادي وخاوي ..
-.لاحول ولاقوة الا بالله ...
هز راسه مودع ...ولف بيطلع ...
وقف ملتفت ...
- بينا تواصل ..
- اثق بحكمك يابوحمدان !!! واعرف انك ان فكرت بتعذرني !!
لا خير في قومنٍ...تسبى مداهلهم !!!
هز أبو حمدان راسه ..متقدم بخطواته وطالع ..
جلس الوليد ..عينه على الباب الي طلع منه ...غمض عينه ..بعمق ..اشقى روحه هاللقاء ...يكره نظرة الكسر ..بس مجبور ..!! .
.................................................. .................................
بسيارة سعد ...
يدها ماسكه العلبه المفتوحه تتامل ..الخاتم ..
- حلو ؟؟ صح !!؟؟
التفت لها سعد ..
-ممتاز ..اختيار موفق ...ليه اخترتي الحجر الأسود ..!!
التفت له بتقطيب تحت نقابها ...
- هذا مو بس حجر اسود اسمه العقيق الأسود ..!! ..يمثل الشجاعه ..والقوه ..والشهامه ...وحس الشموخ ..
ضحك سعد ...باستهجان مفرح ...
- الله الله ...كنك توصفين الوليد مب العقيق !!..
ابتسمت راجعه بنظراتها لخاتم الفضه المرصع بالعقيق الأسود ..
- صحيح ..اخترته لانه يشبهه ويمثل شخصه ..بالنسبه لي !!ان شاء الله يعجبه ..
- عاد بعد مالففتنيا كل هالاماكن ..ولا يعجبه ..مستحيل !! بيجوز له ان شاء الله !!
تلمست باطراف اصابعها الخاتم ...بزهو ..متخيلته بيده ..وحوالين اصبعه ...
-وش تبين نجيب بعد ؟؟ ...
قفلت العلبه ..حاظنتها بكفها ...داستها بشنطتها ...
- مدري ...لحظه خل ادق على شيهانه ....انا نصوري ابي امر محل العاب ...ابي بيت كور ..وسياره بريموت كبيره يسوقها بالحوش !!..شيهانه جبت لها عطور وشنطة مكياج ..!! نايف .عاد اختيارك انت ..
لف لها ...مبتسم ..
- ماقصرتي ياحبيبه ...حتى مرت ابوي مانسيتيها ..!!..
التفتت بعينها مطرفه للشارع والسيارات ..
- معد ابي مشاكل ..ياسعد ابي اكسبها باي طريقه !! عشان اخواني !!...لفت متابعه ..
- الا مايغلب الطيب صحيح ياسعد !! ..ومرت ابوي كرهت امي عشانها ضره افهم انا كبرت وتزوجت ..لو مكانها حسيت !!
هز راسه ..سعد ..
- والله انك دانه يابت ابوي ...مامثلك ابد !!..
ابتسمت ..
- انت بعد ..اطيب مني !!..خذت الطيب منك انت الي ربيتني !!
مد يده لامس كفها ..وشاد عليه ..
- الله يسخر لك دنيا واخره ياخوك !!.
- امين ...يارب ..ولا يحرمني وجودك ..ياتاج راسي ...!!
- بشري اخبارك والوليد ...اموركم تمام ..واهله وحمولتك .. ؟؟
- اوووه الحمد الله ...وخالتي ...في تحسن الحمد الله ...الوليد شغال بالبيت ..والتجهيزات .... وبنسوي حفل استقبال كبير لها ان شاء الله .. .سكتت فجاه ..ثم تابعت لافه ..بحماس ...
-سعد ؟؟؟ ابوي الله يرحمه له اربع شهور مرت ابوي بتخلص عدتها ..بعد عشر أيام !! شرايك نسوي لها عشا ..بهالمناسبه ؟؟؟
قطب هدب عينه ...مفكر ...
- الله يرحمه ..ياعجل الأيام ...الله يجعل مثواكم الجنه ياوالديني ...!! فكره والله بس يمكن نايف مفكر فيها ..
- ممكن عادي مافيها شي نشاركهم ..!! ..انا علمتك اني بتنازل عن حصتي لها ؟؟
- وانا بعد ...
- بالله من جد ؟؟ صحيح ؟؟؟
هز راسه ..
- ايه نعم ...يجلس لها ولنصوري ولشيهانه ..اساسا حتى لو ماتنازلت بيتم بس عشان هي ترتاح وتريح اخواني !!!
تساندت ..عالكرسي ...تفكر ...مطرفه بعينها يم سعد ..تتامل جانب ملامحه ..بصمت محب ..حاني ...ياكثر مايعطي ...ويعطي...
- انت ياخوي اخبارك ؟؟ من تجلس معي وانت تسال عني وبس ...!!
- انا بخير دام انتم بخير ...اهم شي تصدقين معي ولا تغبين !!!
-اغبي ايش ؟؟؟
- أي شي يخص الي قد صار لك قبل مع رجلك ؟؟
احتبست أنفاسها ...ثم ردت ..بصوت هادي ..
- لا مافينا الا العافيه والله ..ماتشوف رحت اشتري له خاتم ؟؟ ..
هز راسه ..موافق ..ومبتسم ..
- الحمد الله ....
شافت محلات الألعاب الي اقدموا عليها ...
- ليت اقدر اجيبه يختار ...
رفع يده محذر ..
- لالا فكينا !! بيدوخ راسي انا ......ضحك ملبق السياره ...
- يلا انزلي ...
نزلت معه ...وخذت الي تبيه لنصوري ...طلعو بعد ربع ساعه متوجهين لبيت ابوهم ....
.................................................. .................................
المستشفى ....
جناح ام سلطان ...
انفتح الباب ..
- يلا كانو ...دفي ماما بسرعه ...!! ...
وقفت رنا مستقبلتهم ...
- جيتوا أخيرا ...!! وش فيكم تاخرتو اليوم ..!! ..
قربت من جدتها ..
- يالله حيها اخبارك يابنتي ..
- اهلين امي نوره ..انا طيبه بخير ...بشري انتي ..!! ..
- امك علومها ..
- ابتسمت رنا .
- تسال عنكم ..وعنك مخصوص ...دخلي ماما كانو ..
-اوقفي ..خلاص انا بمشي ..وش تحسَبَني بدون رجول !!!..؟؟ اعقبي !!! ..
ضحكت حنان وسمر ..لحسها ..
- يمه هدي !! احنا العيله الوحيده المزعجه !!!
- هلا عمه ..هلا سمور ..
- الله يارنا وش هالضمضمه ؟؟؟ وش ذا الحب الي نزل عليك فجاه !!
ابتسمت رنا بنظرة عشق لهم جميع ...مخفيه انكسار ضيقها تاركته يتوارا قد ماتقدر ..رطبت شقتها مبتسمه ..الا سمعت سمر ..
- كل هذا شوق لنا ؟؟؟؟ الله الله ... يوم انا اجلس عند امي ماتسوين كيذا ان شفتينا !!
- ادخلي بلا كثر هروج ..وين عميمه ساره ؟؟؟
رفعت سمر حواجبها ...
مقربه وهامسه ...
- عميمه ساره مولعه !!! اليوم أبو اديب داق عليها !! ومختلفه ماردت ارسل لها رساله !! يبي يجي !!
قطبت رنا ..
طيب عاي أبو زوجها بيتطمن عليها !!
جت سمر تكمل الا بدخول ساره ..
- السلام عليكم ..اخبارك سمر شلون امك ؟؟
- هلا عميمه ...طيبين ...امي يارب لك الحمد احسن ...من بقى بيجي اليوم ...!!..
- مدري والله ...نجلا والوليد ماجو؟؟
هزت رنا رسها وهي تمشي معهم ..
- لا لسه ...ماجو!! وسلطان ماجا معكم ؟؟؟
قطبت ساره ...
- الا اكيد اخبر الدكتور يبي يتكلم معهم هو والوليد معلمني هو !!
وقفت رنا بصدمه ..ووجمود ..
- متى ؟؟؟ متى قال ؟؟ مب تكلم معهم قبل ..وش يبي ..مره ثانيه ؟؟
- اليوم يبيهم ..عشان امك يعني ووضعها !!
رجفت شفة رنا ...مختلفه اساريرها ...رجف كل جيدها ..رهبه وخوف ..تحركت مبتعده اشوى مانتبهو لها ...تعادت بخطواتها لدورة المياه ...
قفلت الباب وتساندت عليه ...
سحبت جوالها ...بعجل ..تضغط ترسل ..
- الجوهره ...متى نتقابل ؟؟؟
انتظرت رد ...ماجا ضغطت اتصال ..بضيق كاره ... وش يبي يقابلهم ؟؟؟ شولون يقدر يعيش بوجهين ...!!!؟؟
ماردت ..ابعدت الجوال ..بقلب مقبوض ...همست .
- يارب ...انا دخيلتك ...يارب !!!..
اه احتديت لك من جديد يالجوهره !!!..
رفعت اصابعها تضغط عينها ...بقوه ... حست بهزاز وصوا لرساله ..
فتحت الرساله ..تقرا ..
( بعلمك انتظريني )..
غمضت عينها ...هامسه ..بقهر ..
- الله حسيبكم جميع ...ليه ماقول للوليد ؟؟؟ ليه مااعترف بغلطي ؟؟ ..تذكرت وجه زناد وصوت تهديده ...هي ان قالت بتفتح باب مسكر ..وبتترك له مجال ..يعثى بحياة اخوها الحبيب ...رجفت شفتها ..متنهده ..
- اقوي رنا ...روحي خذي اغراضك ..دام تنازلت وبتعطيك ...!!..
جا صوت مسج ..
رفعت فاتحه ..
( رنا لاتعلمين احد ..انتبهي ؟؟ أي احد يدري ..!! والله ماعطيك شي يكفيني فضايح مع امي ..انا ابي انهي الموضوع واسافر لعمتي )..
شدت رنا شفتها ..ماسحه دمعتها ...تقدمت ..للمغسله غاسله عيونها ...بصمت ...
دق الباب ..
- انا بطلع ...
- رنااااا !!!! اعجلي ابي الحمام ..حشرانه والله !!
اهتز متنها ضاحكه لحس سمر ..مايحق لها ..تخفي هزيج حس الفرح ..بصوتها من اغلاطها ...
فتحت الباب ..
اندفعت سمر داخله ..مو منتبهه ..لرنا ..
- اعجلي برا برا ...انا اخبر الي جاي من برا يزبن بالحمام مب الي جالس ...
طلعت رنا مبتسمه ..مخفيه اثر ضيقها ..
- خلاص طلعنا ...طلعنا ...
تسكر الباب ...
- رنا تعالي ...امك تسال عنك ...
- طيب برتب شعري واجي ...وش فيها ؟؟ تبي شي ؟؟
هزت حنان راسها ..
- لالا بس تقول وينها تدق على العيال ..!!..
- اه ..الحين بجيكم ....
قررت تدق تشوف وين الوليد ...
ضغطت اتصال ..ترقبت بصمت ...الين سمعت حس الوليد ....
-لبيه !!..
عضت شفتها ..
- هلا اخوي اخبارك ...
- مرحبا بهالصوت ...الحين زانت اخباري !!!.
ابتسمت ..بحنيه ..وجلى ..ممزوجه بعمق إحساس مهلك ..
-عساه دوم يارب ...
- اخبارك انتي امي شلونها ؟؟ توني مسكر من دكتورها !!..
جمدت ثواني ثم تابعت ..
- ليه ؟؟؟ فيها شي ؟؟ وش يبي !!؟
- لا مافيها الا العافيه ...!! امس كان يبي يقابلنا انا وسلطان مره ثانيه ....عشان وضعها ..واحتيجاتها القادمه ..تطمني مابه الا كل خير ان شاء الله ..
تنهدت براحه ...
- ايييه ...عشان كيذا ..بس .
-أي نعم ...من جاكم ؟؟
-جو عماتي ..وامي نوره ..باقي انت وسلطان ...
- انا بتاخر شوي .. بس بلحق عالجميع ان شاء الله ...بغيتي شي ياخوك ؟؟
رمشت بعينها لحس صوته ..الحاني ..القادر ...انه يسكن كل خوافيها ...بس الثمن غالي ..
-ابي سلامتك ...
- - الله يسلمك ويحفظك ....انتظرونا ...
- طيب فمان الله ..
- فمان الكريم ..
هتفت ..بحس لاهف ...
- الوليد ؟؟؟
-لبيه ؟؟
شدت شفتها ..تاركه صوت قلبها ينطق له ..
- انا احبك ياخوي ...الله يجعل راسك دوم مرفوع ..وماينحني ابد الا لباريه ..!!
مرت ثواني صمت ..مهلكه لها ...ومدويه للوليد ...ضاربه لاعمق الأعماق ...بضي قلبه ..لهم ..ابتسم ..باحساس عامر ..بنشوة سرور ..
غشى حسه ..هزيج اشجان زاخمه ..وعامره بكل حب ساكن بروحه .. لهم ..
-وانا احبك بعد ...
- مع السلامه ..
- مع السلامه ..
قفلت ..متنهده ..هامسه ..برجفه ..مكسوره ..
-عشانك بس كل شي بيهون ...!!

.دست الجوال بجيبها ...ورفعت شعرها بعجل ...متهاديه خطواتها ..لمَ الجميع ....
.................................................. .................................
فيلا غازي ال مجفل ...
مابين ضحكات نصوري ..المستبشره ...وصيحات الفرح ...منه ..
- بسبس ..نصوري خلاص ...العب برا ...بسرعه ...
التفتت لنجلا ..مبتسمه ..
- زين جبيتها اليوم بيجون الجيران ..خل ينشغل عنا ...
سالت نجلا ...فرحانه لشوفة نصوري وفرحته ..
- نايف وينه اجل ..معد ينشاف !!
- اوووه نايف انشغل مره ...نشوفه اخر الليل اذا سهرت او الصبح قبل يروح ..لانه يطلع من شغله عالمزرعه ..حقتكم !!
- اها ...
انحنت شيخانه ..تشيل اغراضها ..
- يسعد قلبك نجول ..كلفتي على نفسك ...اختي ..
- هذا مب شي ..شيهانه ..ودي اجيب بعد ...بس سعد طلعني ..
- لو ماسحبتها قشت لك كل المحل ...
- الله يضلحك ياسعد كان خليتها تقشه انت بعد !!!..
ضجكوا ..وهي تمشي
-بروح ارقيها ..فوق ...
قبل تطلع ... لفت نجلا لها ..
- شيهانه ..خالتي نايمه ؟؟ ..
وقفت ..تناظرها ..
- لا صاحيه ..جالسه ...تتجهز اكيد ...عادي روحي لها داخل ..
انبسطت اسارير ملامح نجلا ..
- يمكن تضيق ..!! كان ودي اشوفها ..
- لالا مب ضايقه روحي ..لها ...امي يانجلا مب على خبرك ...
سكتت نجلا هازه راسها ..
-بشوف ..روحي رقي اغراضك انتي ..وتعالي نتقهوى ..
طلعت شيهانه تدنتن ..بالحان ..خافته ..
التفت نجلا لسعد ..
- وش رايك اروح اناديها تتقهوى معنا ..
ترك فنجاله ..
-جربي بس هذاني اقولك لاتتوقعين أي شي ..ايجابي وانا اخوك !! حطي ببالك الصد الي دايم متعودين عليه ...!! عشان ماتنصدمين !!
هزت نجلا كتوفها .. بتكشيرة هزل ..
-انا ضد الصدمات ياسعد ...لايغرك صغر عمري !!..ابتسمت بضحكه ..متابعه ...
- ان شاء الله انها بتطيعني وتجي ...
ناظرها مبتسم ..هي ضي عينه ...كل وقت وكل لحظه وثانيه يكتشف انها فعلا كبرت ...روح جيدها الحلوه ..تنتشي بكل مكان تتواجد فيه ...غصب ..تخلق لها ..بسمه بمبسم كل ضيم ..تنهد ..ساحب الدله يصب له ..فنجال ..
تهادت خطوات نجلا ...يم الغرفه الي ساكنتها مرت ابوها ...وقت ماهي تمشي ..نواظرها بكل ركن ..اطرفت ...تباعثت الأصوات ..والصراخات ..من جميع النواحي ..بعقلها ..صور تبعثرت امام ذاكرة عقلها ..تتمثل بمواقف مرت ابوها لها ...وحقدها وكرهها ...وقفت قدام الباب ..جامده ...حتى لو حاولت تخفي ..هالشي عن الكل الا انها بداخلها تدري ان مواجهة مرت ابوها وكرهها مأثر فيها ..جدا ...تارك بسنواتها العشلاين ندوب ..جزله ..قررت بيدها تمحيها ..لو انها منحوته كما فوق الصخر ...مدت يدها لمقبض الباب ...مرتعشه اساريرها ...تذكرت شيخه ..وكلامها يوم علمتها انها تبيتكسبها ..
(معليش نجول مرت ابوك يقوم ابليس تجلس مكانه ...سامحيني بس هذا الصدق والله !!!تنفخين تنفخين وبتنفقع البالون فوق راسك )
غمضت عينها ...داقه الباب ...
ماسمعت حس ...
.................................................. .................................
قبل نص ساعه ..
مسدت ام نايف ...شعرها ..لافه طرحتها ..حوالين مبسمها ..
توها مخلصه محاظره ..مرسوله لها ..من ام خالد .....فتحت الدرج جت عينها عالظرف .. ..سمعت أصواتهم برا ...وضحكاتهم ..بس ماجرات تطلع ..ابد ...شي يمنعها ...عجزت ..تشرحه ...بداخلها ....احساسها المتصاغر امامهم ..كل ماله يكبر ..ويتعالى ...تذكرت لوم أمها ..لها ...واستنكارها ...لشعورها الي تعيشه ...محد فاهم ..داخله ..شلون انكسر ..عقب ..روحة عيالها كلهم ..وجلوسها بين الجدران ..وحيده ...بدونهم ...رغم انكارها بالبدايه ...رغم عليائها ..المتصابي ..المجرم ...الا ان ثقل المحبه الي شافتها من نجلا لعيالها ..كسر فيها الغرور ..الظالم ...
سكرت درجها ...متوجهه لدورة المياه ...توضت ...طالعه ..واصل لسمعها دق الباب ..
- ادخلي شيهانه علامك تدقين الباب!!..
سمعت حس نجلا ..
- انا نجلا خالتي ...ادخل !!!
وقفت مقطبه ..هدب عينها ...
- ادخلي نجلا !!..
انفتح الباب ..طلت نجلا ...بنظرات ..هاديه ..تلاقت نواظرهم ..
- ادخل خالتي ؟؟
- تعالي تعالي ...تحركت ام نايف ...جالسه ..
دخلت نجلا ...مسكره الباب...متسانده ..عليه ضافه يدينها وهي محتظنه العلبه المخمليه ..ورى ظهرها ..
- خالتي انا وسعد برا ...يبي يسلم عليك ... تجين تتقهوين معنا ؟؟؟
أبعدت ام نايف ..عينها ..راده بهددوؤ..
- انا بتجهز بيجوني الجيران ..
شدت نجلا شفتها برمشة عين ..عرفه انها بترفض ...يتحسل تطلب منها حب بس تبي مجرد قبول بس قبول ...
- طيب ....سكتت ثانيه ثم تابعت ..
-..خالتي ..؟؟ ..
رفعت ام نايف راسها لها ..
ارتجف لسان نجلا ...تاركه ..حس مكنون شعورها ينطق ويتكلم...
- جبت لك شي ..بسيط ..يارب تقبلين فيه ...تابعت بعجل ..
- بالله لاتردينه ...حتى لو كرهتي انه مني ..عدي ان ابوي هو الي جابه لك ..!!..سكتت مب عارفه الخذرفه الي نطقت بها ...تكلمت مرتجله ..بلا شعور ...
- البيت ؟؟قلتي لي عنه !!
هزت نجلا راسها ..
- لا مو البيت ...
استاقفت ...ساحبه يدينها من وراها ...
انتبهت ام نايف للعلبه ..الي بيد ..نجلا ..
- هذي ..يارب ..تجوز لك ..هي شي بسيط ...
عجزت نجلا تتقدم ..حتى ...قربت من التسريحه ...حطتها ..وتراجعت ...
- بروح انا ..مع السلامه ...
فتحت الباب بدون تنتظر أي شي ..منها ...سكرته ..بصمت ..واقفه ..تاركه دمعتها ..تنحدر ..رفعت يدينها تضغط عيونها ...الي تحسه ..شي غريب ..صعب شعور الاستجداء...للمشاعر . ..موجع بحق!!! ...نايف ..تقدم لها خطوه ...وهي عشانه ..بتمشي خطوات ...مسحت عينها ...بعجل ...متحركه رايحه يم اخوانها ....
دخلت على صوت نصوري ..ونقاشه مع سعد ...
التفتو لها ..ابتسمت ...جالسه ..مواريه عينها ..
- شيهانه عطيني قهوه ..
- امي قالت لك شي نجلا ؟؟
هزت راسها ...نافيه ..
- لا ..تتجهز ..
سكتت شيهانه ..تترقبها بصمت وهي تمد فنجالها ...
- هاه نصوري عجبتك سيارتك ؟؟
التفت لها راكض ..
-أي أي سياره كبيرا من داباه اتي ادلا !!؟؟
هزت راسها مبتسمه ..
- ايه انا وسعد ...
- دق جوالك ..نجول ..
لفت لسعد ..الي عينه على مدامعها ..الرطبه ..
- بالله ..؟؟ اكيد الوليد ..ناوليني شنطتي شيهانه ..
- خذي..هاك ..
خذتها تدور ..جوالها ..المدسوس ..
- ايه هو ...اكيد بيجي بنروح لخالتي المستشفى ..
ضغطت داقه ..
- هلا وغلا ..
- هلابك ..دقيت وينك عن جوالك ؟؟
-..كنت داخل ماسمعت الجوال وهو بالشنطه ..
-انا قريب ...منكم خلك والمه ..!!..
شدت شفتها مقطبه لحسه ..الهادي ..
- طيب ابشر ..فيه سعد بعد كان تدخل ؟؟ شوي ..
- ممب مادي بروح اقابل دكتور خالتي ضروري ..
- اه طيب ..اذا جيت دق دقه وبطلع ...
سكر قبل توادعه ..
حست ببعده عنها ..بس استبعدت الفكره ...
- بيدخل ؟؟
ناظرت سعد ..
- لا ..مستعجل عشان دكتور خالتي ..يبيه ..!!..
حرك سعد راسه ..
- خلاص شيهانه خرمتي راسي قهوه ...ابي ارقد الليل ...
ضحكت ..شيهانه ..
- نام هينا اليوم ...عشان تشوف نايف ...
- لا ماعندي غيارات ..وبيجونكم حريم ...ابروح اريح بشقتي ...تبون شي اجيب لكم قبل يجون ؟؟
- لا الله يحفظك ماتقصر انا مجهزه كل شي ...
وقف سعد ..
- اجل بروح انا ..الحين ...دام بعلم مب داخل ..
- انتظر نطلع سوى وتشوفه ..
- مابي اعطلكم ...وخلاص بعد طفشت من لبسي بروح اغير واسدح ظهري ..واتمغط ..
ابتسمت نجلا ...
- بقوم معك اجل ...بجلس بالحوش لين يجي ...
ناظرها سعد ..
- نجول خذو نصوري برا بودي القهوه ...وارتب شوي اذا جا رجلك علميني بجيه ..
وقفت نجلا لابسه عبايتها ..مبعده خصلها ...
- طيب ...يلا نصوري روح ..اركب سيارتك ...
سبقها يتراكض قبل سعد حتى ...
مشت تابعتهم ...التفت لها سعد ..
- ضيقت صدرك بشي مرت ابوب ؟؟
- لا لا ياسعد ...ولا شي قالت ...لايهمك !!..
مشى متقدم ...طلعو الحوش ..وقف لاف لها ..
- يلا سلام ..
قربت ..ماده يدها ...
- انتبه لنفسك ...عاد انزل شويه احب راسك ..
تبسم حاظن راسه بين كفوفه منحني يلثم جبينها ..
- هالمره تنازلت وسلمت عليك انا ....تستاهلين عالهديه الحلوه الي شريتيها لي !!
- تستاهل اكثر ...لو اعطيك عيني ماوفيتك ياخوي !!
- الله يحفظ لك عينك .. ...يالصغيره ...
ضحكت ..للمسمى الي مايفارق لسانه ...
نزل الدرجات ...وقفت تتابعه ..بعينها ...
سمعوا حس من وراهم ..ينادي ..
- نجلا ؟؟ سعد !!!
التفتوا بوقت واحد ...شافو غاده ...واقفه ...
اطرفت نجلا لسعد بعينها ..
- هلا ...امري ...
تكلم سعد ..بعجل صادم ...
- تعال ياسعد ...
قرب راجع ...واقف جنب نجلا ...
ناظرتهم ام نايف ...بتتابع ..متهاديه مابين الاثنين ...
رفعت الظرف الي بيدها ..
- هذا لكم ...لقيته باغراض ابوكم الله يرحمه ...
قطبت نجلا ...
- ايش هذا ؟؟ ..
مدت ام نايف يدها ..
- خذيه شوفيه ...
رفعت نجلا يده ماخذه الظرف ...وعينها على ام نايف ...
- ان شاء الله ..الي فيه ..!!!... سكتت متردده ...ثم تابعت ...
- يعجبكم ....!!!

..قالتها برجفه متراجعه ..عنهم بعجل ...
لفت نجلا مرطبه شفتها لسعد ..
- تتوقع ايش ياسعد ؟؟؟
- هاتي اشوف ...خذا الظرف ...وابتدى يسحب الي فيه ..مدخل يده...جمدت نظرته ..بثبات ...عينه على الي طلعَه ...بصمت ..راجف لرسم ملامحه ...
رجفت يده ..وهو يتأمل ..بعين مختلف فيها الشعور ..
همست نجلا ..بخوف لشوفته ..بهالحال ..
- ايش ياسعد ؟؟؟اش فيه ؟؟ .. ..رن جوالها ...مانتبهت له ...قربت بخوف من سعد تاركه طرحتها تنحني ...حوالين مبسمها ...
وقفت جنبه مرخيه انظارها ..للي بيده ...جت عينها على ...صوره ...زلزلت كل خوافيها ومباديها ...صوره ادركت وتيقنت روحها ...هي لها وش تكون ..رفعت حواجبها بعدم تصديق ...
همست ..ببحة صوت ..
-من هذي ؟؟ ...هذي امنا !!..لمعت عينها ...برجفه ..مكرره ..السوال ..
- هذي امنا سعد ؟؟؟؟ رد هذي امي صح ؟؟ ..
هز راسه ..سحبت الصوره منه ...متأملتها ...باحساس مهيب ..شوفتها مثل الحلم ...قد قالت لها غاده انها حرقت صورها كلها ...ولا بقت لهم منها أي ذكرى ...تأملت الملامح ...المرسومه ...احسن الخالق ..وابدع ..تصويرها ...تضاربت مشاعرها ...متجمعه ..دموعها ...بوجل ...مدركه ان مرت ابوها ...اخيرا تقبلت ..وجودهم ...
- هذي امي ...شوف مااجمل لها ياسعد ..!!! امي جميله ؟؟؟
مد لها الصوره الي بعدها ..هامس ..بثبات ..
-تشبهك امي ..!!
ضحكت ..تاركه سيل دمعها ينحدر ..بلا توقف ..وبصوت باكي ...
-ايييي ...امي تشبهني .......اه ...تشبهني !!..
اشوف ..وريني ...
خذت الصوره الي جامعتها بابوها ...جامعتهم الاثنين ...
اهتزت متونها ..لشوفتهم سوا ...اول مره بحياتها كلها تشوفهم قد ماتخليت وجود أمها بقرب ابوها ماتوقعت الصوره تكون بهالجمال ..ابد ..
- شوفي هذي حامل فيك !! شوفي نجلا !! .
أبعدت عينها ...للصوره الثالثه ...
كشرت بحس باكي ...
- حامل فيني ؟؟؟ انا كنت هينا ببطنها ...شوف محلاها ياسعد ؟؟؟....
- شفت ياوخيتي شفت ..!!..
شدت شفتها ...منفجر فيها كل شعور ...وهي تتاملها والدمع مانع ...صفاء صورتها تبان ..
شعور الحرمان والحاجه ...واليتم المنزوي ..والظلم ..والخوف الي تحسه ..بسبب وجع الفقد الي ماتبي تعيشه مع الوليد ..لو امي فيه ..شكيت !! وقلت وعلمت ..وطلبت النصيحه ...ولقيت لي ملفى ..يعطي بليا حدود ..رفعت الصور لصدرها ناشجه ببكا ..يقطع الانفاس ...
سحبها سعد ..
-الله يرحمهم ويجمعنا فيهم بجنات النعيم ياحبيبتي ....
تمسكت فيه دافنه راسها ..بصدره ..باكيه ..بضيق ...محتوي جيدها ...صورة أهلها وامها باالذات ...ومعرفتها ان ام نايف تنازلت وجابت الصور..واحاسيسها المخفيه بخصوص الوليد ...اتعبتها ...
- ليتها عاشت ...معن..نا ...لي..ت ...!!..ليتني ..اتذكر صوتها بس ياسعد !!!!
تهادت يدينه حوالين كتوفها ..
- راحت عند الكريم ...يومها يانجلا !! الله رافع لها الأفضل ..والاحسن !!!...
- اهدي ياوخيتي ..
سمعو صوت نصوري ..
- ادلا سيح !!! ليه سيح ادلا !!!؟؟؟ ليه سيح ؟؟؟ .....
-ماتصيح نجلا ..تضحك ...تراجع سعد مبتسم ...مبعد الشعور الي صابه مثلها ...وقدر يخفيه ...كثر ماتمنت هو بعد تمنى ...
ابعدها قابض كتوفها ...
- تضحكين انتي صح ؟؟؟ رفعت يدينها تمسح عيونها ... ثم اطرفت تناظره ...شافت نظرته ...ولمعة عينه ..
همست ..برجفه ..عجزانه توقف ..دمعتها ..
دق الجرس ..بدون ينتبهون ..
تابعت تتامل عين سعد ..
- يارب نجتمع فيها بالجنه !!..
غمض عينه .وفتحهم .مبعثر خصلها حوالين ملامحها ..بحنان ..
- الله كريم ...امين ...انحنت نظرتها للصور الي بين ايديها .. تتاملها ..من جديد ..
- امي ... هذي امي انا ...!!.. انا ضيها الي يقولون !!
كانوا واقفين ..غفلانين ان الباب انفتح ..وان نصوري سحب الوليد يدخل ...مبلغه بصياح نجلا ...
- انتي ضينا كلنا !! ..انا بعطيك هالصور ..خليها معك ..
رفعت راسها له ..
- وانت ..ماتبي تتذكرها وتشوفها دايم ؟؟
- هي بعقلي نجلا ...ادعي لها دايم ...واتصدق عنها وعن ابوي ..
ارخت نظراتها ..تحرك الصور تدور الي فيها أمها لحالها ...
مد يده ..مقطب ..
- شوفي مكتوب شي ورا هالصوره ..!!..
سحبها ..من يدها ..موجهها لعيونهم جميع ..
( ليت ..جيتي ..اول العمر !!..يابدايات الهنا واخر مراسيه ... غازي )
رجفت شفتها ..بربكه ..للكلام الي قرت ...همست ..ببحة صوت ..
-سعد ..ابوي كان يحب امي ؟؟؟!! ليش كرهنا ؟؟ !!!ليه حرمنا ذكراها وشوفتها !! ليه ماحافظ علينا !!! .. اهتز متنها ..ضايج ..لم كتوفها ..
- خلاص نجول .....رفع راسها ..الا شاف الوليد ...يترقب مكانهم ...عينه على المنحني راسها ...والمهتز جيدها ...من البكا ..والانهيار ...
- جا رجلك ...شوفيه ..شكل نصوري دخله مانتبهنا ...!!
اعتلى .. صوته ..بهزل ..مخفي احساسه ..
- حي النسيب ارحب يابو صخر ...!!...تعال شوف مرتك عيت توقف ...تقل سما وانشقت ..!! ..
لفت راسها ..يم الباب ..تلاقت نواظرهم ...عينه عليها ..بعمق عمق عينها ..يناظر ...بصمت ..
ابعد سعد وتراجعت مبعده ..تخفي ملامحها ..حاظنه الصور لصدرها خافيتهم تحت عبايتها ...
- بروح اغسل واجي ...
قالتها ماتدري سمعها او لا ..مشت بدون تشوف شي لاعينه ولا أي شي ..توجهت للمجلس ..وللمغاسل بالتحديد ..وقفت قدامها تاركه الصور على جنب ....فتحت المويه غاسله ملامحها ...ونحرها ...بضربات متتابعه من رشق ..رذاذ المويه ...
سحبت المناديل ...تمسح وتجفف ..مطرفه عينها لعنقها ..الاحساس الحلو الي معه تقضيه ...لفت براسها للظرف ....جت بتروح لام نايف ..بس تراجعت ..يكفيها انها قدمت لها اجمل شي ..ملامح أمها ..المبهمه ..الجاهله فيها ..صارت لها واضحه ..الحين ..رفعت الصوره تشوف ..جمال رسم الخلاق ..تشابهها أمها كثير ..كانها الي بالصوره .. عشان كيذى كرهتها ..غاده ..بلعت ريقها ...شاهقه ..بعجل ..خذت الصور دخلتهم داخل الضرف بسرعه ..ودستهم بشنطتها ... ..لفت طرحتها ..باتقان .. وتوجهت للداخل ..
- شيهانه ..؟؟ ..احنا بنطلع ...ونصوري برا ...تعالي ..
سمعت شيهانه بحسها العالي ..من المطبخ ..
- يلااا جايه الحين .... جايه ...
نجلا لحظه بجيك ...!!.
وقفت نجلا ..
- بسرعه الوليد مستعجل ..
جت شيهانه مقبله تمسح يدينها ...نظراتها على ملامح نجلا وجفونها المتكحله حمار ..
تنهدت ..
- نجول بالله علميني وش قالت لك امي ..؟؟
ابتسمت نجلا بلمعة عين ..
- امك عطتني اليوم اغلى شي ..!! عطتني ملامح امي !!
رفعت الظرف .. الي سحبته ..من شنطتها بحماس ..
ابتسمت شيهانه ..راده بحاني الصوت المختلج ..
- حبيبتي نجول !!..امي ترا متغيره والله ...احسها نادمه ..ان جا يوم وطلبت منك السماح بتسامحين نجلا ؟؟؟
رقت نظرة نجلا لها ...هامسه بتأكيد ..جازم ..
- اكيييييد ...!! ..
تحشرجت انفاس شيهانه ببسمه ...
رطبت نجلا شفتها ... وهي تلبس نقابها ...
- يله بطلع انا ... مع السلامه ...
تكلمت شيهانه بحماس ...
- مع السلامه ... انا بجي وراك أساسا عشان هالمفعوص ...بيشغلنا بالحوش الحين !!
طلعت نجلا ...مالقت احد ...لا الوليد ولا سعد ..
- تعالي شيهانه مافيه احد نصوري يمكن برا مع سعد ..بشوف ..الحين ..
- يووه جيبوه مب داخل الحين !! ..عاد ان عرف الشارع مصيبه !!!
طلعت نجلا ..جت عينها على الوليد واقف عند سيارته وسعد مقابله ..يتكلمون .... قربت ..التفت لها الوليد ..بنظرات ثاقبه ..هاديه ثم لف لسعد ..
- سلام نشوفك على خير يابو غازي ..
- امو امو ..
- سم ياعين عمك !!
-اسور وينه؟؟
رد الوليد مبتسم ..
- منصور بجده ..اذا صرت رجال ..ماتزعج احد خليتكك تكلمه !!رد نصوري معترض
- انا ادال انا !!
- طيب طيب يارجال ادخل وسكر الباب يلا ...ولاتصيح ...!! ..
- فمان الله ياسعد ..
- مع السلامه ..
ناظر سعد نجلا ..
- مع السلامه نجول ..
- مع السلامه ..خلني اشوفك لاتقطعني ..
- ان شاء الله ..
ركبت وسكرت بابها بصمت ..
ابعد سعد لداخل ...قبض الوليد الدركسون لاف ..ومحرك السياره ..بيطلع من الموقف ...بدون يلتفت لها ...
انتبهت ..للفة شماغه .. تكلمت ..بصوتها الهادي ..
- مارديت على رسايلي ؟؟ شلون يومك ؟؟؟
- ماعليه ...
- ليه مارديت على رسايلي..؟؟
- انشغلت !! انا قلت لك ارسلي ماقلت برد عليك !!
رفعت حواجبها تحت نقابها ..
- اوووه المود مولع ...!!
التفت لها ...مقطب ..
- ايش؟؟
- أقول مودك نار ...!! فيه شي مضايقك ؟؟ ..
كان مركز بالطريق قدامه ...
- لأ... سكت دقيقه ...ثم تابع ..سائلها ..
- ليه يوم جيت كنتي تصحين ؟؟؟ وش حاصل ؟؟
حركت يدها تهرب من الاجابه ...
-ولا شي ..تخبرني ..ادنى مايبكيني ...مب تقول انا ام دميعه ؟؟؟!!
التفت لها مطرف ...بتركيز على عينها ...ثم تابع ...يسوق ..
شد شفته بصمت ... ضاغط عمق احساسه ...وخيبة شعوره ...من كل شي ..بهاللحظه ...الندم فيه يتآكل ...ليته قدر يكتم ماضيه ...ظهوره بهالشكل ..سبب اضطراب ..احساسها ..وخوفها ..
- ماتبي تعرف وش سويت ؟؟؟
- براحتك ..تبين تقولين قولي ..!!
التفتت له بكامل متنها ..
- فيك شي ؟؟؟ خالتي طيبه ؟؟؟ اهلك بجده طيبين ؟؟
لف براسه بحدة نظرته ..
- العلوم عندك !!!! ..
ارتبكت بصمت ...
- ماعندي علوم ...عن احد !! انا اسال لانك مب على بعضك ..!! ..بتطمن !!
هز راسه ..بصمت ثم تكلم بهادي الصوت
- ارتاحي ...مافيه شي ...
تأملت رسمه ..وثبات ..انفاسه ..بشعور هيبه ..يثير فيها كل احاسيس عشقها له لازم تتعود على طبعه ..ايا كان ..وكيف ماتمثل !!!....تراجعت بخفه ...ملتفته للطريق ..حاظنه شنطتها ...متمسكه فيها ..وكنها تحظن الأرواح الي بالصور فيها ...تخاطرت افكارها بعيد عنه ...يم صورة أمها ودها تفتح ..تشوف وتتامل أمها من جديد ماشبعت ...من شوفتها ..تبي تتكلم معها ..حتى ..غمضت عينها ..هامسه ..لروحها ..
حلوك يمه ..ليتك فيه ...
حس بابتعادها عنه ...تم ساكت متابع الطريق بصمت ...هو بعد يبي يبعد ..بهواجيس ..روحه ..ضايقه شوفتها ...بالحال ..الي شاف .....وقبل ضايق من سمعها ...وزاد شوفة بن عايض ... اطرف بعينه لها ...وهو يلف ..لمح عينها ..تتأمل بصمت ...بعيد عن نواظر عينه ..قطب هدب عينه ..منتبه ..لحظنها والشنطه المغموره فيه ..واطراف اصابعها ... ..شلون شاده ..عليها ...
.................................................. .................................
قبل ساعه ...
مزرعة آل جلمود ..
بالتحديد ..مربط ال جلمود للتدريب ..
المكتب الإداري ...
نايف ...خلف المكتب ..يراجع مع احد الموظفين ..الواردات ...والصادرات ...
دقق باصبعه على سطر ..
- هينا !!!! تأكد لي من استلم هالشحنات ...بهالتاريخ !! ياضاري !!
-سالم يابو غازي ... ليه ؟؟
-وينه ؟؟ سالم هذا من جيت متشفته ..انا ..!! دقق وتعرف ...احنا شارين هينا معدات ...ب 40000..الف ..تمت شهر ...وبعدها طالبتم بالصيانه !!! واحنا ماخذينها من شركات فرنسيه ..وعالشرط كما في العقود !!! شلون هالمعدات الي صارفين عليها ..... سكت بسبب دق الباب ...
ارتكز بجلسته ...نادا ..
- تفضل ..!!!
انفتح الباب بدخلة الوليد ...
- السلام عليكم ..
وقف نايف ..
- وعليكم السلام ..يالله ان تحييه ارحب يابو صخر ..حياك مكانك وملفاك !!..
اشر الوليد بيده متقدم ..
- حشاك ..مكانك هذا ..وانت راعيه ...
وقف ضاري ..
- ارحب طال عمرك ..
وصله الوليد ماد يده لنايف ثم سالم ..
- بشروا عنكم ..؟؟ وش الاخبار وش العلوم ؟؟؟ ..
-كل شي تمام .....كشر نايف بحواجبه ضاحك ..ومتابع ..
- كل شي تحت السيطره يالنسيب ..
ابتسم الوليد ...وهو يجلس ..مقابله ..
لف نايف لضاري ..
- سالم نكمل بوقت ثاني ...وااكدو لي شوفة سالم هذا !! ..
- على خير يابو غازي ...تامرون شي ..
- ايه خل يجيبون قهوه ..
- تم ..
ترقب الوليد ..بصمت ..الين طلع ضاري ..
- وش قصة سالم ؟؟؟
جلس نايف موجه كلامه للوليد يعلمه ..بشكوكه ...تم الوليد يسمع له ...بتأمل ..صامت ...
- انت شاك بشي ؟؟ اجل !!
هز نايف راسه ..
- مااقول شاك مابي اظلم احد الظليمه شينه ..وقطع الرزق مايجوز!! بس الحرص واجب ...!!
هز الوليد راسه ..بموافقه ..
- الله يقويك ....تلفت براسه ...بالمكان ...سائل ..
- هاه ..وش رايك ..ارتحت بالاداره ..الماليه !!
حرك نايف راسه باستهجان ..
- تبي الصدق يالنسيب مسؤليه َ!!! أي غلطه لو بسيطه تنحسب !!! لو افلت أي شارده او وارده ...يدخل الغش والسرقه بسهوله !!!
شد الوليد مسكة عصاه وهو يجنبها ..
- صحيح ...انا جيت اشوف الفرس الي كنت ادربها وش وضعها مع التدريب ...!!
ابتسم ..نايف ..
- وكيف ؟؟
-ماعليها ماشيه ...قابلت المدير الفني والمدربين .....كل شي زين ..
- الحمد الله ..
اندق الباب ..ودخل ضاري بالقهوه ...
- اقلط ضاري ..تعال تقهو ..معنا ..
- بشر ياضاري كيف مديركم الجديد ..؟؟؟
قالها الوليد مبتسم ..بحدة النظرات ..لضاري
رد ضاري بحازم الصوت ..
- والله ونعم ...من وليت يابو صخر ...!!
رد الوليد مخاطبه ..بجهور الصوت ..
- انا ماوليته أبو غازي ولي حلالهم !!!
رفع نايف راسه للوليد ...
- عز الله شانك ..يالنسيب ...
- وشانك ..ابو غازي ..
بعد ربع ساعه طلع ضاري من عندهم ...
التفت الوليد له ...سائل ...
- وش قلت ؟؟ فكر انت ..!!
تراجع نايف ..بتفكير ...وهواجيس ..
- وليه ..يابو صخر ؟؟؟ يعني انت ..عندك الي اكفأ مني ليه انا !!!؟؟يكفيني المزرعه !!
رفع الوليد كاسة الشاهي ...الساخنه ...بيديه ..متكلم بهدووء حاذر ..
- ادري ان عندي ..لكن انا ابيك تمسك الي يخص نجلا !! مب لاقي اكفأ منك على حلالها !!!
رد نايف ..باستغراب ..
- حلال نجلا ؟؟
- ايه نعم انا كاتب لها ...بعض الأملاك ...وابيك انت تديرها ...!! ولا تشيل هم ..معك عالم كفوؤه ..بس ابيك على اطلاع ..!!
- وش معنى انا ؟؟ ليه مب سعد ؟؟ يعني اشكرك على هالثقه ..ماقصرت ..بس ابي افهم ...!!
تقدم الوليد ..تارك كاسته ..
- أولا سعد ..عنده وظيفته ..وانت اخبر ..ومب قادر انا ابي تفرغ كامل ..هذا أولا !!! ثانيا .....شبك أصابع يدينه ..لاف راسه يلتقي بنواظر نايف المتسائله ...
- ثانيا ..انت فيك مني !! ..دمك الحامي وطبعك الحار وكرهك للظليمه ..فيه مني !!! انت افضل شخص ..تدير أملاك اختك ...!!
تامله نايف ..يحاول يستفهم ..من كلامه ..ويعرف ..مقصود منطوقه ..
- اديرها ليه وانت موجود ؟؟ يابو صخر !!
هز الوليد راسه ..
- اخبر اني موجود ..بس عندي بعد شركات ابوي ..والعيله ..كلها ورى ظهري ..!! غير ..الاشغال الباقيه ...!! انا بخفف بك يانايف ..الحمل ..لاتردني !! ضحك الوليد ..ببسمه ..حذره ..
ابتسم نايف ...باستغراب ..
- الله يرفع قدرك ..ثقتك فيني ..تعني لي واجد يالنسيب ..بس شلون يعني ..اترك شغلي ؟؟ بعرف
- ايه اكيد لانك بتقابل الشركات الصبح وتالي النهار هينا !!.. اسمع يانايف ... انا كرجل اعمال ..لي منافسين ...ولي أعداء ...فيهم الي يخاف الله وفيهم الي بايع ذمته ...ومين اقدر اامن ..؟؟ حلال نجلا عنده ..بعد الله ..؟؟ ياانا يانتم ياخوانها ...وانا لي نظره بكل رجل يمر علي واتعامل معه ..ومن اول مره ناقشتك فيها كانك تذكر ...بدت تتكون ثقتي ..!!
تراجع نايف متذكر الموقف واساس النقاش ...الي جمعهم كان يحذره ..بنعامله مع نجلا ..بعد موقف وفاة ابوهم ...
رد نايف ..بصوته الهادي ..
-عشان كيذا انت أرسلت لي تسجيل بصوتها ..وهي تتكلم عني !!؟؟
ناظره الوليد بتركيز ...مدرك انه وصل له الفكره الي يبيها ..
مر الصمت بينهم ..ابعد نايف عينه ..عن الوليد ..مترقب يدينه ..
- تدري ان اليد هذي ياما تجبرت وسطت عليها ؟؟؟
احتد صوت الوليد ..يبي يعدم فقط التخيل ..ان احد قدر يمد يده عليها ..
-وجا وقتك ترد لها .. وترفع عنها شي من الضرر الي قد سويته !!
تنهد نايف بتصميم ..
- تم !! انا معك ..بس لازم امشي خطوه خطوه ..
ابتسم الوليد ..وكن الحمل..بعضه ..انزاح ...
- قدها ..انت ان شاء الله ...وقف الوليد ...
- يله انا بستأذن ..بروح امر نجلا هي عندكم ...
- بدري ؟؟
- بدري من عمرك ...يالحبيب ... بعد بزور الوالده ...وقت الزياره الان ..
- الله يقومها سالمه ومتعافيه ...بشر عنها ؟؟
- لا الحمد الله ...!! نشكره ونحمده جزل العطايا !!!..
.................................................. .................................
جده ...
فيلا ..ندى ...
تكلمت ندى باندهاش ...
- وش بتسوين ياميثا ؟؟؟ انتي انهبلتي ؟؟؟ !!
شدت ام طلال شفتها ...باصرارا ..
-انا تاخرت ..!!..لكن خلاص !!
- وكيف ان شاء الله ..بتفتكين ..؟؟ بتسوين زي ماقلت لك ؟؟
التفتت لها ام طلال ..تناظرها ..ماتقدر تشرح لها ..مكنون صدرها ...ولا تعلم ..عن الخزي ..الي سواه سعود ..يمكن حتى تكرههاا اختها ...!!
- ييسرها الله ...ان شاء الله ..انا تعبت .. خلاص ..معد لي طاقه ..
- أخيرا ؟؟؟ اعترفتي ...مابغيني !!!..بتعلمين الوليد ..انتي كل شي ؟؟
رطبت شفتها ..متسانده ..
- اكيد ... املي بالله كبير انه يفهمني ويسامحني ...!! ....
هزت ..راسها ..
- الوليد انسان فاهم وعارف ...وتفكيره وعقليته ..مب سطحيه ..!! وانتي الي ارضعتيه تضلين امه !!
تنهدت ام طلال ..منحنيه ساحبه ..شنطه دبلوماسيه ...
- اش هذي ؟؟
ناظرتها ميثا ...بتركيز ....
- اسمعي ياندى ....هذي امانه عندك ...ياوخيتي !! كل شي ضد سعود جمعته فيها ...!! ..قاطعتها ...بعجل ..
- خلاص طيب عطيها الوليد ..يشوف شغله يختي !!! افتكي ميثا افتكي !!
- لا !!!! ...باقي شي واحد !!..انتظر سعود يجي ..ان خذته منه وقتها بطلع ..واقول للوليد كل شي !!!
كل مخاوفي وكل ماضي جمعني بابوه ...!!
-وش ياقي ميثا !!! سعود ذا داهيه لايشك بنواياك ثم يذبحك !!
تنهدت ام طلال بقل صبر ..
- انك انتي اسمعيني للأخير ...انا عشان كيذى جيتك !! ابي تحفظينها عندك ان لاسمح الله صار لي شي عطيها الوليد !!!! مب طلال !!!! لا الوليد !!
شهقت .... بخوف .
- خوفتيني بسم الله عليك الله يحفظك ...وش تبين من هالمريض المجرم !!
- عاد انتي مصدقه انه يتجرا يموتني ؟؟ كان سواها من زمان !!!..انا بخليها عندك لان بيتك أأمن مكان !!!..
تأملتها ...بترقب ..مهزوز ..
- هو متى بيجي ؟؟؟
- مدري عنه !!! خبرك مابينا تواصل ..البنات مبسوطات الله لايغير عليهم مع اخوهم طلال ...ابتسمت ام طلال ...متذكره ..تواجدهم مع بعض ..
تابعت ...بتفكير ..
- كثير تقربوا ...من طلال ....هالفتره ...الله لايفرقهم ابد ...!!..
- ابد مب مفرقهم الا ابوهم !! ..
هزت راسها ..ام طلال ...بضيق ..
- لاتذكريني ..كل يوم انتظر يجي ويجيب معه المشاكل ...متاكده بيجي قريب ان عرف انهم ببيت عمي واخوهم معهم ..والوليد رافض يرجعون ...بيشب فينا حريقه ..!!
- الله لايجيبه !!
- لالا لاتدعين انا ابيه يجي ...باقي عنده شي لي ..ابيه ..باخذه منه لو على جثتي !!..
قطبت ..ندى هدب عينها ..
- علميني لاتخوفيني ...يختي !!
-شي يخصني ...يخص روحي من داخل ..شي غالي سرقه هو مني ...!! تأكدي اني عشانه صبرت !!!..وانتظرت !!!.. قالتها برجفة صوت ..
هزت راسها ..تطرد كل فكر اسود ..
- ماعليك مني ..وين البنات ؟؟ البندري لين الحين حابسه نفسها ماتبي تشوفني !!؟؟
- لا مالك دخل ..اتعبتني هالبنت ..تعلقها بالوليد يخوفني ياميثا ...!!..
- مصير الأيام تنسيها ...
- انتي نسيتي ياميثا ؟؟
- انا غير !!! عنها ...انا مب من طرف واحد !! هي عمر الوليد مارغبها ولا نظر لها الا كأخت !!!
.................................................. .................................
الرياض ..
المستشفى ...
مكتب الاستشاري ..
زناد بن عبد الرحمن ...
- مثل ماقلت لكم ...الوالده تحتاج منكم وقفه ...ودعم نفسي ومعنوي ..عشان تستقبل العلاج وتتحسن ...!! رفع يده ..منبههم ..
- مثل مالاحظتو ا التحسن الي هي فيه حاليا ...كل هذا بفضل الله أولا ثم لتواجدكم حواليها ...امكم كبيره بالسن ..والكبير بالسن قلبه معد يتحمل !!!!
تحسنها ...من الان ورايح يعتمد على التوكل ثم عليكم والعلاجات ...!!
سكت متهاديه عينه بين الاثنين الي قدامه ...مستشعر ...حس العداء ...بينهم ..مستنكر وجوده ..ولا يبي يصدق فيه ...
تكلم الوليد ...بهادي الصوت ..
- الله يقدرنا ..على فعل اللازم !! لها ..
التفت زناد ..لسلطان ...بنظراته ..
هز سلطان راسه ..
- تبشر امي ..بالي تتمنى وتبي ..!!!..اساسا انا ماراح أكون متواجد ..