[فيتامين سي]

الحلقة السابعة

مساء الحب

#تناهيد_امرأة

#بقلمـي_نشوى_السلطان ❤️

والذي يصبرني علـّى. ما يحصل هو أن
هناك في كل ندبــة الـــــم امـــــل❤

بقيت اشر مانداريت شويه وجان اسمع واحد كال
واخيرا تحررتي من العدة وكدرنا انشوفج ... مشتاقلج والله

انه جمدت بمكاني ... اريد احجي ماكدر خفت

انداريت على باب المطبخ صار مقابلي ضاري باوعلي وجان يكووول .... خير حسن شو هين واكف لازم تريد تطلع ..!

حسن .. لا طلعت ادخن جكاره بره لان الصغير جوه كلت موزين عليه

بنين ... انه اشر ومااباوع عليهم بس جسمي يرجف ..
انداريت على ضاري عيونه بعيوني .. خازرني
ببسرعة كملت الباقي وطبيت امشي ... هو بالطارمة واكف
عبرت من يمه .. مجتف اديه ويباوع عليه ...

حسن .. طلع يتمشى للباب .. عافنا وراح ...

ضاري.. اكفي بنين ...

*وكفت .. وانه ميته خوف كتله انه اريد احجي قاطعني

ضاري.. اسمعيني انتي هينه امانه بركابنه ... والدنيا هاي بيها الزين وبيها الشين

بنين .. اي صحيح

ضاري .. اني ماريد بيوم تجيج حجايه وانتي امانه عدنا
والي يمسج يمسنا ..

بنين .. بس والله انه طلعت اشر الهدوم قاطعني وكال

* ضاري ... اني اعرف منو الغلطان ماحاجة تبررين بس خلي في بالج الي يجيبج بحجايه ارشة بدم ...

رفعت راسي عليه مااعرف بعد شنو اجاوبه حسيت شاك بحسن وبتصرفاته..

ضاري ..انتي بعدج شابه وهالدنيا غابة

بنين .. انه اشكرك على خوفك وحرصك عليه بس والله

ضاري... انتي عرضي وشرفي غيرتي عليج ماتخليني اسكت .. كتلج انتي امانه عندي ..

بنين ... طلع باكيت الجكاير وباوع عالباب البره وجر حسره وكال ديربالج على نفسج .. كال هيج ومشة

انه اخذت السلة وطبيت اركض للحمام .. طبكت الباب عليه ماعرف شبيه خفت من كلامه رغم انه اعرف كلامه حرص وخوف عليه
بس خفت ياخذ عني فكره مو حلوه ... يااربي منين طلعلي هالحسن
فوك القهر الي انه بي .. بعد وين انطي وجهي قاطعتني زهوه وانه صافنه صاحت بنين لمار تريدج ... كتله اي جايه جايه
خليت السله بالحمام وطلعت ... حاولت ابين نفسي طبيعيه رغم حيل متوتره .. طبيت للهول .. خالين فواكه ودياكلون ...

باوعت عالطارمه من الشباك ... الحجيه طبت تمشي
كتلهم اجت الحجيه ...

زهره ... هلااااا جتي جده ... كامت زهره تركض عليها ... گادتها وطبوا يمشون

كعدت انه بصف لمار ... محمد كاعد هو وسرور مثل كل مره تحاول تسحب التلفون حتى تفتشة وهوا يضحك عليها

اجت الحجيه .. سلمت ... شلونكم يمه ...

سلمنا عليها وكعدت بصف عمتي ..
باوعتلي وهي خازرتني ... انه خفت بس ابتسمت كدامها

كالت .. اكول خما تنطي ممة ...

كتله لامم صدري وقليل انطي ممه

_* كطي هالممة ماتفيد ..تمرضة

اي ان شاءالله

شو مو لابسه جواريب ليش ..

* باوعت المار كتله جواريب ليش ..!

لمار قصدها نفسه ..

كتله مو الجو مو مال جواريب

* ميخالف اللبسي جواريبج وجيبي سجين خليها جوه راسج وراسه .. شو جيبي عليه خل احبه ..( ابوسه)

كمت شلته خليته بيدها ... والكل يضحك على سوالف الحجيه

كالت هذا يشبهه المرحوم .. رفعتة باسته ..

باوعتلي كالت رروحي اكعدي بمكانج خلي عندي...

جرتني لمار من دشداشتي ورجعت كعدت يمها ..

لمار.. اليوم شيخلصج من الحجية .. تذكرين الحمام بالعرس ههههههههه

بنين .. اي عفية اووف ذكرتيني والله

لمار .. هذا وين طلع حسن شو اختفه ..

بنين .. ها مادري ...

لمار ... تدرين بنين لكيت عد حسن تلفون بالسياره ثاني وبي خط

بنين .. انه من كالت هيج ماعرف ليش خفت رغم انه مامسويه شي

لمار ... كتله شنو هذا التلفون كال هذا مو مالتي مال صديقي

بنين .. كتله اي الله اعلم جوز صحيح

لمار ... الله يسمع منج رغم كلبي لعب منه

بنين .. لا ان شاءالله كلشي ماكو .. تجين نكعد بغرفتي حتى ارضع عبدالله هم

لمار ... لا دعوفي نايم خطيه

بنين ... الشباك مقابيلي .. باوعت طب حسن وبيده علاكة
كتله انه اكوم ارضعه ... كمت وجان تجرني كالت اكعدي حسن جة خل نضحك ... كتله بس ارضع عبدالله

لمار ... اشششش كافي عازله نفسج تقهرين بروحج عليج الله اكعدي
داتحجي وطب كال اليوم الحجيه هينه ...

الحجيه ... هذا منهو الجة ... رفعت راسها تريد تشوف بس النظر عدها ضعيف ...

كلتلهه عمتي هذا حسن تعال ابني

حسن ... وين ضاري ... شو ماكو

زهره .. مادري يمكن طلع ...

حسن .. عجل جبت كرزات وموطه .. عبالي هينه

* الحجيه .. ضاري مايحب كعدة الحريم اعرفه

محمد... هوووب جدة تره كاعد صار ساعه اريد اطلع وهاي جنتكم مجلبه بزياكي ...

الحجيه ... كوموا اطلعو يلا المره تريد اتفرع تريد ترضع ابنها مايرهم كلكم هينه ..

حسن ... شسالفة حجيه هالله هالله بينه

الحجيه ...امشي انت الثاني لا اكوم اكرمعكم بعصاتي ..

بنين ... انه بس مصدومة من حجيها وبنفس الوقت فرحانه من هيج كالت الحسن حتى يطلع صرت اكره شوفته

كام محمد وكال يابه اليوم جدتي سوتلي فرج .. يحجي ويضحك
اخذ تلفونه وطلع هو وحسن

وسرور تصيح ترجع ترجع مصيرررك ترجع بسيطة

طلعوا الولد راحوا بالاستقبال وبقينا احنا والحجية وعمتي والبنات حيل حلوه كعدتهم ...

مرت الايام وعبدالله كبر وصار يناغي ويضحك من نضحكة
كل يوم حبي اله والـ أهله يكبر اكثر ..
ماشفت مثل طيبيتهم ولا مثل نخوتهم ..
محمد وضاري شالوني بالصلاوات زهره احسها اختي الصغيره جانت الطف كل البيت تحب عبدالله بجنون
وعمتي امي الثانيه الي شفت عدها الحنان وعوضتني عن الحرمان سرور طيبة بس ماعرف مرات احسها تضوج ادا شافتني كاعده بمكان ومحمد كاعد ماعرف ليش تحاول تبعد محمد عن المكان الي اني بي ...

طبيت للحمام غسلت العبدالله .. لبستة قاط يخبل ابيض وسمائي جابه اله عمه ضاري طلع يخبل بي
شايلته وهو يناغي ويباوع بوجهي يحاول يركز
طلعت للهول لكيتهم صابين الجاي ..

ضاري كاعد بيده دفتر ويكتب حسابات

الحجيه تصلي وعينها عليه شافت عبدالله كاعد

زهره وسرور كاعدات يكلبن بالتلفون ... كعدت يمهم
كملت عمتي صلاة وكالت جيبي خلي عندي ...

كمت انطيته الها ورحت كعدت يم زهره ...

عمتي كعدت تغنيله .. عبود غالي غالي يحفظة ربنا العالي

ضاري كال الها هذا كاعد شو جيبو عليه

الحجيه اي كاعد ويناغي ... اسم الله عليه

سرور .. هاي ديركز اتذكر شهاب من جان صغير هيج يركز ويحول عيونه اكعد اموت ضحك عليه

كامت زهره اخذته ودته الضاري ..

ذب القلم .. واخذه منها .. كاا هلا بالشيخ هلا
ولك ها ... بوسه من خده ...

كال هاي ليش هيج خدوده صايره

الحجية ... من البوسات اكللهن لا تبوسنا يولن بعده صغير مايتحمل مايفيد

بنين .. ماكدر عمه انه اكزكز عليه والله اشبعه بووسات كلت هيج وفشلت من نفسي ضاري وهو بيده عبدالله رفع عينه باوعلي ابتسم ورجع باسه من خدة الثاني

ضاري .. شكد عمر صار ... شهرين يمكن مو

بنين ... اي عمره شهرين ...

الحجية العمر جدامه يبعد عمري ...

ضاري .. الله يحفظه

الحجيه ... صاير يشبه المرحوم

ضاري ... اي الله يرحمة ..

دايحجي ودگ تلفون ضاري... كتله انطينيياه ... كمت اخذته من عنده .. باوعلي كلي هذا خالج حسين ..

كتله ها صدك

ضاري ... خل اجاوبه ...

بنين احذته من عنده ورحت كعدت .. صفنت خالي بالدوام هبه كلتلي بس شيريد بس لا اهلي دزو .. اي اكيد
يسلم ضاري عليه وانه گلبي يدك ... تحاجيني زهره بس بالي مويمها ..

اسمعه ايكله انت بس تصل للقلعه خابرني اني اجيك بسيارتي ...

الحجية ... جن خالج هين اليوم ..

بنين .. اي هوا ببلد يدوام عسكري بس ماعرف جوز نزوله ومر علينا ..

الحجية .. شو گلبي لعب يايمه بس لا اهلج دزوا

بنين .. انه هم خفت لان موت ابوي يوميه تكلي تعالي ...
سد التلفون وكال خالج هين قريب ... جهزولة غده راهم بين ماطلع اجيبه ..

كام ضاري اخذ السويج وطلع .. انه بعد ماعرف شصار بيه اختنكت .. انطيت عبدالله العمتي ومشيت وراه ..،

فتح باب السياره ديصعد جان ينتبهلي صرت كدامه

كاال ها محتاجة شي اجيبله وياية ..

كتله لا بس عليك الله خالي شكلك راح ياخذني

ضاري .. والله ماحجة شي بس كال جايكم بشغله ..

بنين .. ان شاءالله خير ..

ضاري ..تريدين ابقين عدنا لو تحبين ترجعين للبصره

بنين .. انه هين مرتاحة ..رغم احن للبصره .. بس الشفته بيها مايخليني بعد افكر ارجع

* محد يكدر ياخذج من هينه ..

بس مرت ابويه ماراح تخليني انه اعرفها اذا خططت الشي داحجي جان تطبك سيارة حسن .. اندار ضاري شافه كالي فوتي جوه .. ولا تطلعين

كتله ماشي .. طبيت ركض لباب المطبخ وفتت جوه وسديت الباب ورايه .. لكيت البنات ديجهزون بالغده كتلها انطيني خلي اساعدكم .. سرور واكفه عالطباخ وزهره تثرم يالزلاطة
باوعتلي سرور وكالت اكول بنين ضاري شيريد منج

كتله لا خطيه هو مايريد مني شي انه رحت سألته عن خالي خفت مرت ابويه دازته

سرور .. اي بس لو ترجعين للحقيقة والواقع تره بقيتج هين حيل صعبه وراح تجيبلج حجي

زهرة ... اوووو يمعوده شبيج ياحجي هي بنص اهلها مو غريبة .. سكتي سرور

سرور .. لا ليش تتهربوون من الحقيقه اي احد هسه تكلليله يكلج شنو بقيتها بسامره ورجلها متوفي

كتله انه .اكدر ارجع عادي بس الحجية متعلقه بعبدالله شلون احرمها منه...

سرور .. اي وياج بلي تكولي بس تره عمتج ماراح تفيدج بعدين من يصير عليج حجي

بنين. بقيت ساكته مارديت عليها سحبت السكين من زهره وكمت اثرم .. عرفتها تغار مني وكارهه وجودي بالبيت تريد تخلص مني .. بعد هو حظي هذا لازم تطلعلي شغله

كملنا الغده وجهزنا انه رحت اخذت عبدالله من عمتي رضعته ونومته بمكانه طلعت من غرفتي داطبگ الباب على كيفي
جان تتلكاني سرور كالت خمو زعلتي من كلامي تره المصلحتج داحجي

بنين .. لا كلامج صحيح ليش ازعل منه

سرور... اي والله علمودج اني داحجي بس عفيه هالحجي لا تحجي كدام خالتي عاد شراح يخلصني

بنين .. لا انه ماحجي شي

زهره ... عوفجن من الحجي اني اريد ارتب غرفة ضاري منو تجي تسويلي واهس تكعد يمي حتى اكمل

سرور والله عندي شغل اريد اغسل هدوم

بنين .. لا انه اروح وياهه مدام عبدالله نايم ...

زهره ... ديلا عجل خفي ايدج وتعالي ساعديني

طبيت وياهه للغرفة .. كعدت عالسرير كتلها زهره اخاف نسوي شي بغراضة وهو مايقبل..

زهره .. اي انتي ماعليج اني راح ارتب ..

بنين .. باوعت للغرفة مالته رغم قليل ندخل للغرفة نرتبها بس كلش مرتبة ملابسه معلگة بمكانهم ..شفت عالميز اللبوم للصور
كمت سحبته وانه واكفه صرت اكلب بي .. ً صور هوايه قديمه
كتله زهره هاي منو بالصور تعاي

زهره ... ها هاي وين لكيتي

بنين .. هنا عالكومدي اكلج منو الي بالصور

زهره هذا الي ع اليمن عمي حازم .. والي بصفة ابويه الله يرجمه
وهاي جدتي وهذا جدي عبدالله ..

ها زين وهاي منو المجموعة...

هاي احنا من جنا صغار هذا المرحوم الي لابس قميص وبنطرون

بنين .. الله يرحمة شكله يختلف من كبر

زهره .. وهاي اني الي مسويه عناطيط ههههه والي شايلني ضاري

بنين اي تخبلين جنتي هههه وضاري نفس شكله

زهره .. اي شكد حلوه ايام طفولتنا من جنت صغيره جنت اكثر شي اتعارك ويا وسام لان جان بكبري ( بعمري) بس ضاري جنت من اشوفه اكعد عاقله هههههه ولحد الان حيل احترمه واخاف منه

بنين .. اكلج هو شبي ويا سرور دوم اشوفه واكفه وياه احس اكو خلاف بينهم ..

زهرة ... اووو اسكتي وخليها .. تدرين شنو السالفه

بنين .. داتحجيلي وجان ينفتح الباب وطب ضاري من شافنه وكف
انه بسرعه ذبيت من ايدي الصور ... باوع الايدي وكال العفو مادري بيكم هنا ...

زهره اي جيت اعزل الغرفه ... كامت زهره لمت الملابس وطلعت قبلنا

كتله خالي وصل مو ...

ضاري اي باالهول كاعد ... ينتظرج

بنين .. لفيت حجابي زين دنكت وانه مستحيه وطلعت عالسريع

طبيت للهول ... لكيت خالي بملابسة العسكريه ماد السجاده ديصلي

الحجية ....يمه جهزن البنوات الغدة

بنين اي عمه كلشي جاهز ... داحجي كمل خالي صلاة شال
السجاده خلاهه بصفه ... باوعلي ... ابتسم رحت اركض انه
سلمت عليه ..
شلونك خالو شلون اهلي خالاتي .. احاجي احس اختنكت خنكتني االعبره من شفت خالي مادري ليش جان بودي اكعد كباله وانفجر باللبجي ... باس راسي وكال

* الحمدلله بخير انت شلونج ... شلون ابنج

عبدالله الحمدلله بخير الله يسلمك مشتاقلتلك والله

* وين الصغير جيبي خل اشوفه

* ضاري هيانه عبدالله .. انداريت ضاري شايله شفته كاعد مفتح عيونه ويباوع بوجهه .. كال سمتعته يبجي ودزيت زهره جابته

الحجية .. يااا خمو صارله جثير يبجي

بنين .. لا انه قبل شوي عبرت من كدام الغرفه ماسمعت صوته بس جوز هسه كعد

جابه ضاري خلاه بيد خالي ... شاله بوسه كتلهم انه اروح اصب الغده ..

طبيت للمطبخ بسرعة جهزت الغده اني وزهره ..
رحت وديته للهول احنا كلنا جنا متغدين بس خالي مامتغدي

الحجية جيبن خبز جو هذا قليل ...

كال خالي لا الحمدلله انه مااكل هوايه اكلي قليل تعاي اكعدي بنين ..

* رجعت كعدت بمكاني .. عبدالله بيدي يلعب ويضحك
كال ضاري جيبي عندي واذا تكدرين استكان جاي الي والخالج لان راسي يوجعني ..

كتله اي هسه ... كمت كالت زهره لا اني سويت جاي هسه اصب ..

ضاري عجل انطيني عبدالله ...

وديته خليته عنده .. كاعد علجودليه لابس دشداشة ومخلي عبدالله على صدره .. وعبدالله ساكت وهو يفرگله بظهره

كام خالي كال الحمدلله سفره دايمه ..

الحجيه ... الف عافية ...

كمت انه وصلت خالي ليم المغسله حتى يغسل ورجعت شلت الصينيه وديتها للمطبخ غسلت ايدي ورجعت
ضاري منطيني ظهره وراس عبدالله كدامي وهو مخلي على كتفه ... مدي اشيله اشبعه بوسات مشيت كعدت يم الحجية

اجة خالي دينشف بأيديه بالخاولي

وكعد بف ضاري صارو مقابيلي انه والحجية .. خالي باوع للساعة وكال .. والله يابه انه أداوم ببلد وابو بنين خابرني گلي تروح تجيب بنت اختك من عيالها الناس اكلت وجوهنه شنو باقيه هناك وانه اذا اجي لسامرا الطريق شطوله ما بيه حيله گلي من تنزل جيبها وياك وهسه اجيت حتى اخذها انه ما بيدي شي ولا الي كلمة بهذا الموضوع بس من طلب مني ابوها استحيت ارده

من كال هيج احس گلبي وجعني ... اانصدمت ... بعد مااعرف شنو احجي رفعت راسي ضاري عينه بعيوني

كاله ضاري يعني هسه انت تريدها..؟

كال خالي اي والله اهلها يردوها وانه مابيدي شي

الحجية .. لا يايابه وين ماخذها انه عبدالله وبنين ماعوفهم همه البقولي من ريحة المرحوم اذا تريدوني اموت اخذوهم مني

جاوبها خالي عمرج طويل حجيه والله انه حجيت ويا ابوها بس كال لازم تجيبها

بنين .. سكتت لا بيه بعد احجي ولا بيه اكوم .. انفتح الباب وطبت العجوز جدتهم .. كام ضاري انطاني عبدالله وراح كادها من ايدها وفوتها ... اجت كعدت يم الحجية ..

كال خالي والله تردون تخابرون ابوها خابرو لان انه حجيت وماكو اي فايده ...

العجوز .. كالت خير شبيكم يمه ..
اجت زهره حجتلها السالفه .. كلتلها يريدون بنين

العجوز مااسمع يولي شتكولين ...

بنين .. انه شلون نار واشتعلت بيه بعد تعودت عليهم ماكدر اعرف الحجية الي صارلتي ام واكثر ولا بيه اقهرها واخذ ابنهم الي بقالهم من ريحة المرحوم .. عيوني غورگت بالدموع .. ضاري باوع عليه وكال

ضاري ... دقيقه .. اني عندي حل يرضي الجميع ...ان شاءالله

توقعاتكم شنو الحل 😑
🍅🍅🍅
وتستمر الحكاية .. ❤️