[فيتامين سي]

الحلقة التاسعة

يا روحي هسوني صرت والضيم شيب راسي
ما عايش احساس الطفل شايب احس احساسي
لو بيدي اموتن انا بس خايف اتعب ناسي
مليت من هذا العمر
مهموم قلبي من الصغر
مليت وانا انتظر والفرج يمكن ناسي
من صغري زعلت العب والشغل صار العابي
*******************************

مساء الحب

#تناهيد_امرأة

#بقلمـي_نشوى_السلطان ❤️

مشيت للهول الحجيه نايمه تشووخر ... الباب بعد ماكو صوت
تقربت خطوتين.. جان يندك الباب مره اخرى
انه فزيت رجعت اركض للباب بركضتي

خلف كعد الحيله كام يصرخ بشكل غرررريب
وايدية على راسه ...

اني اديه على حلكي ماعرف شبيه اريد اسكته ماعرف والحجية
نايمه ... الباب بعد ماكو صوت ..

باوعت عالطبلة اكو ماي .. ركضت صبيتله ماي

انطيته وايدي ترجف .. باوعلي دفعه من ايدي
رجعت خطوه وانه ارجف .. كتله هاك اشرب ماي ..

باوعلي بنظره غريبة .. انه خفت رجعت .. مد ايده كال
اي عرفته يريدة .. بين بالي يم الباب والي دكة منو
وبين خوفي منه ومن اصراخة ومن حركاته .. تقربت

ومديت ايدي وهي ترجف ... اخذ الماي مني

بده يشرب .. ويباوعلي .. كمل خلاه يمه ...
رجع تمدد .. انه شلت الكلاص اخذته منه خليت بمكانه

طلعت من الهول للممر .. باوعت العبدالله بعده نايم
اريد اسد الباب مالت غرفتي .. سمعت صوت من المطبخ

لا يااربي شنو هاي معقول البيت مسكون ..

انداريت تلفوني بالگاع .. اخابر ضاري

اي خل اخابره يجي يشوف .. مشيت رجعت ترددت

لا انه شلون اخلي يجي علينا وكلها نايمه لا غلط

طبيت مشي للمطبخ وانه ميته خوووف ..

وكفت يم حايط المطبخ .. همست منو هنا ..

محد رد .. منوووو

باوعت لليده انفتحت ... بس للباب مقفول
ماكدر يفتحها..

حجة بصوت خشن كال اني حسن افتحي الباب بنين

انه هنا لطمت على وجهي

مد راسه عالجامه شفته بس مو واضح

كمت اكمز الطم كتله شترررررريد جاي

* بس افتحي واني افهمج شبيج

* والله الم الناس هسه عليك انت مجنوووون موصاحي روح بسرعه لا تسويلي فضيحة الله يخليك

* حسن والله مااسويلج شي يمسج بقيد شعره
بس احجي وياج انطيني فرصة

* عززه ولك يافرصة انت اتسودنت شتحجي روح عليك الحسين
انه ماناقصني مشاكل روح لا تكعد الحجية وتشوفك بداعة اعزاز كلبك روح
احاجي

خل تكعد خل كلها تجي وتسمع بنين اني اريدج احبج
والله احبج افهميني

* انت شتحجيييييي روووووح والله الم الدنيا هسه
روح الله يستر على عرضك ...

يولي اسمعيني بس احاجيج ولج لا تحركين كلبي عليج

بنين انه شفته مصر انه مايروح وانه الخوف مسيطر عليه
وهو رجع يدك بالباب .. كتله لو تموت ماافتحة رايحة اخابر ضاري يجي عليك وعود اتفاهم وياه ...

يووولي لا تخابرين تعالي اذا حجيتي شي تره اعرف شنو احجي تعاي لا تشلعين گلبي عوفج من ضاري محد راح يفيدج ولججج احبببببببببببج والله احبج ..

انه هو يحجي ماهتميت طبيت الغرفتي وقفلت عليه الباب
اباوع الايديه ورجليه ترجف ... عفته انه بس اسكت عنه
اكيد راح يروح .. تربعت وكعدت بزاويه الغرفه
شلت عبودي .. اخذته الصدري حضنته قووي وانه ابجي
ليش هيج الدنيا .. ياربي ليش لمن يشوفون مره ارمله مطلكة
الكل يحاول يفترسها ... شبيها هالدنيا ..
وينك وسام وين عفتني تعال وشوف صديقك وخويك شسوه بيه
بقيت بالغرفه ابجي وارجف والباب مقفول .. لحد ما الصوت اختفه
حسيته راح ... باوعت للوقت اتأخر ضاري مارديت على رسالته
ولا بيه بعد ارد ... بقيت بمكاني ماتحركت لحد ما غفيت بدون غطى
كعدت من نومي .. على صوت عبودي وهو يبجي
فزيت مخروعة خايفه .. كمت كعدت نفسي باوعت ورايه
ماعرف شبيه حتى من الحايطين خايفه ..
شلته رضعته ... باوعت للساعه اربعه ونص الفجر ..

رجعت تمددت وانه الدمعه بعيني .. صفنت انه اذا احجي
اخاف يكلب عليه الحجي شلون حتى الرسائل الي دازها الي
من غير خط .. شلون راح اخلص من هالسالفه
زين ولمار اختي وصديقتي شلون هيج احجي بس تمسع
راح تنقهر راح تكرهني اي تكرهني ...

هوا هم بعد حظ حتى اليحبني تطلعلي عاثوره ويروح واخسره
هاي هيه يمكن ابقى حياتي هيج مامكتوبلي افرح

نمت وانه افكرر فكره تجيبني وفكره توديني لحد ماغفيت

كعدت على صوت الحجيه وهي تحاجي خليف...

عبدالله يمي كاعد يلعب ودافر الغطى ..

كعدت شلته بوسته .. .. اووف صدك لو كالو اناهم مهموم واصبح مستعد للهم اظحك مع الناس كاتم لوعتي بصدري..

كمت شلت عبدالله فتحت الباب.. باوعت عمتي هنا جايه ...
من شفتها كبالي عبالك شفت امي مدي اروح لحظنها
اكعد ابجي واشكيلها...

صاحت هلا هلا بوليدي هلا جيبي هينه تكلطي

طبيت للهول كلت صباح الخير شلونج عمه

صباح النور هلا بعد عمتج شلونها ليتلتج نمتي مرتاحة
لو لان مو مكانج مارتاحيتي

صفنت شريد اجاوبها .. كتله لا كلش مرتاحة ..
انه رايحة ابدل العبودي ملابسه واجيبه ..

العجوز يمه عود تعاي هين ويانه تريكي..

وانه امشي كتلها اي جايه .. ماتدري حتى حلكي احس طعمه مر
من القهر... منو الي اله نفس ياكل

طلعت للمغسله بدلت الحفاظة وغسلتلة ...

اخذته للغرفة بدلت اله .. طلعت للهول انطيته العمتي
باوعت لخليف يباوعلي .. كلت معقوله ديتذكر الي صار بالليل

وانه صافنه الحجيه كالت حدري اكلي خل يصير بيج حليب

كتله مااريد انه شبعانه احس نفسي اريد اطلع للحديقه انضفها

* ماتروحين تعاي اكلي

* والله مااكدر اكل لو اريد انه مامستحيه منكم هذا هم بيتي وانتم اهلي بس والله ماكدر اكل انه اروح اكمل شغلي عمه عبدالله يمج
وانه طالعه ..

عفتهم ورحت غسلت وجهي ... باوعت النفسي بالمرايه
وجهي ذبلان شاحب
اوف من صغري حملت اهموم .. ماششفت بيوم راحة
اتمنى اعيش بسلام اني وابني كلشي ماريد من هالدنيا ...

نشفت وجهي وطلعت للحديقه ... شلت بيدي المكناسه
بديت بالطارمة ... كمت ارتب بالغراض ..

لكيت هواي غراض قديمه وتعبانه ..
شلتهم وديتهم وره البيت .. اشيل وارجع اودي
لحد ماصفيت الطرمة ...

باوعت حديده مركونه بصف الحايط ...
رفعتها ماكدرت ثكيله .. حاولت ماكدرت عفتها

فتحت الماي ... شكلت الصونده وبديت اغسل باطرمة ..
بعدني بالبدايه ... جان اسمع صوت سياره يم الباب ..
واغنيه مشتغله .. والصوت عالي...

انه فزيت ... يمكن حسن .. اي هوا يمكن ..
شمرت الصونده طبيت للمطب اركض قفلت الباب عليه
وانه كوه اجر النفس...

بالي يم عمتي لا تجي وتشوفني خايفه ..
باوعت من الجامه ماكو سياره ولا احد نزل..
ياربي تعوذت الشيطان هذا مو هوا اعتقد غير شخص
بس انه صارت بيه خوفه ..
رجعت رفعت ارداني وطلعت للطرمة ...
بديت اغسل وانشف النفسي باالماسحة اشتغل وعيني عالباب
خايفه ...

شلت الصونده داكمل ... سحبتها وطلعت للجهه الثانيه قريبة من وره البيت ... بديا ارش ياربي طين وتراب قوي كوه ديطلع ..

وانه ارش الماي انقطع .. حاجيت نفسي بضوجة كلت هسه وكتك تنكطع ... شمرت الصونده انداريت ..
صار ضاري بوجوهي ... لابس بنطرون كابوي وتيشيرت
اسود مقلم .. من الوسط .. ماتذكر شايفته قبل هيج يلبس
جان كاشخ متعطر .. اننبهت بيده الصونده وهو سادها بأيديه بقوووة ..

هنا انه عرفت ان الماي مانقطع هوا قطعه بيده لمن سد الصونده بيده .. نزلت ارداني بسرعه لفيت شالي زين
اريد احجي اسلم جان يكول...

بنين ...

انه بلعت ريكي من شفته عاقج حواجبه حست اكوشي كتله نعم

شسالفة حسن...؟

انه هنا صدك جمدت ... كتله ها شبي ..

اني الي داسأل حسسسسن شبي،،؟

ها مابي شكو ليش شصاير..!

ضاري... بنين ... اني اكثر من مره نبهتج واراح ارجع اعيدها
هذا النذل لا تكفين جدامه ... لا تره والقران اذا اكضبة بيدي ...

كتله دقيقه بس كلي شبي شكو انه والله ماسويت شي

* شكو... اني حسن ما مرتاحله واذا انت عاجبج تصرفاته كليلي ..!

لا والله بس انه ..

ليش بالليل طلعتي عليه من تدرين بي شارب سم
ليش تواجهي اصلا تره انت ماعرف شنو اكول عنج

* شتريد تكول يعني .. انه شنو البدر مني

* لا بدر منج جثيررر حسن اتجاهلي عوووفي سلام بينكم مااريد تعرفين شنو سلام يعني اذا شفتي اطبين جوه

* اي بس انه الي موكفني لمار شراح اطلع الها عذر

* لمار شنووو لو ابو لمار يجي كتلج ماتطلعين جدامه
والي يسالج ليش كولي ضاري منعني

* وبصفتك شنو تمنعني شيكولون الناس انه هم تعبت والله

* رفع راسه عليه وكال بصفتي شنو .. عصر ايده بقووة وتنهد وكال
من شنو تعبتي حسن سمعج حجايه ظايقج .. شبيج فهنيني حتى اروح اسحله بكل الديره

* لا عززه تسحله شنو لا عفيه الله يخليك سد الحجي..

* من شنو خايفه وليش هالارتباك

* لا انه ماخايفه بس ماريد مشاكل

* عجل يرضيج تصيرلج مشاكل بس ماتريدين تصيرله مشاكل

لا انه ماكلت هيج بس مادري انه وين انطي وجهي شو وين ماروح مسدوده يمكن ارجع الاهلي احسن والله

* ماتطلعين الباب مكانج هين وتبقين هينه شوفي اني لحيت عليج
وسالتج اكثز من مره بس ماحصلت منج شي
بنين اذا صار بعدين شي لا تاهمين العتب...

كال هيج وشمر الصونده من ايده .. الماي طفش عليه كله
طلع يمشي للنص الحديقه وكال .. طبي شوفي ابنج وعوفي الحديقه
طلع وسد الباب وراه

اول مره يحاجيني بهالطريقة .. ماعرف ليش خفت حتى الطارمة عفته سديت الماي وطبيت للبيت لكيت الحجيه وعمتي يغنون للعبدالله باوعت الهم كتله عمه انا ابدل هدومي وارجع ...

طبيت للغرفه وانه ببالي بس ضاري شلون حس وليش هيج ضايج معقول شاف شي وراد يسمع مني ...
يمكن لو حاجيتله احسن

لاااااا زين ولمار شنو ذنبها يروح يتعارك وياه ضاري وهي
تنقهر وتعوفه انه شلون اهجم بيتها...

لا اسكت احسن والله كريم الله يبعده عني ..

مر فترة حسن مااله حس .. ماعرف ضاري
سمعه حجي لو هوا حس على نفسة وعقل

لمار جانت تخابرني والوضع طبيعي ضاري يدز المسواك ويا عمتي بس مايجي قلل جياته ماعرف ليش هيج بده يتصرف

جنت كاعده واجت عمتي وزهره .. ديشوفونا

عمتي خلت عبدالله بحظنها وكالت شلون اهلج يمه ديخابروج

كتله اي خوالي يخابرون ويسلمون عليكم

الحجية الله يسلمهم امانه الله تسلميلي على خالتج الله شحبيتها .. هي اداميه

الله يسلمج والله هي هم تحجي بيكم وبطيبتكم

العجوز كالت يمه كومي سويلنه جاي

كتله انه سويت كيكة اليوم وتخبل صارت هسه اجيبها واجيب الجاي .. كتلها زهره عوفي الكتاب وتعاي يمي

زهره .. هو القرايه شسوت بيه اريد بس انجح ..

تنجحين ان شاءالله بس تعالي ..

كمت انه وزهره .. غسلت القوري خليته عالنار

كتله زهره من سلة المواعين انطيني اثلاثه دصب الكيك

.. فتحت الثلاجة وطلعت الكيكة .. كتله شووفي تخبل مو

زهره .. الله هاي شنو شلون هيج انفشت ..

والله انه شاطره بالكيك من انه عد اهلي ..

عاشت ايدج .. والله ينراد النا كيكة اليوم بالتعلوله

كتلها اي صدك اليوم لمار خابرت كالت راح ننجمع احنا ومروه وسرور كالت تعالي ويانه نتعلل

* اي راح يجيبون مروه واخيرا راح تلتقي بضاري..

* وليش يعني بضاري..؟

زهره ليش ماحجيتلج اني ..

لا ماحجيتي شبيهم .. يحبها؟

زهره .. اي يحبها ... ماتشوفي للساع ماتزوج

هاا يعني وليش مااخذها ..

زهره .. كالتله اتقدم الي هوا كال الها انه ماكدر اذا ماكون نفسي وتعرفين ضاري هو الجبير جان هو شايل هم البيت كله
كال الها اني اتقدم بس مو هسه .. شو بيوم وليلة سمعنا كاطعه مهر اتعجبنا...

هااا صدك زين وضاري شكال...

ضاري مايحجي تعرفين طبعه بس مبين ضاج وانقهر لان بفترتها تمرض .ماتشوفين للحد هسه ماتزوج اكيد بعده يحبها
هسه عاد اليوم يشوفه اني اعرف سرور هاي خططها هي ومروه حتى ياخذها

كتله زين الحجيه ذيج المره سمعتها تكللها تريد تموته

اي صحيح امي ماتردها ...

دانحجي والحجية صاحت ولجن جاي لو باجة ..
كتلها ولج زهيرررر ة الجاي .. ركضت طفيت الطباخ
كتلها ركض ودي الكيك بين مااصب انه ...

راحت زهره اني كملت واخذت الصينية وطبيت للهول ..
كاعدين شويه وجان عمتي تكول اني راح ازوج ضاري

العجوز .. هم زين تفطتني الگرانه ( الي بعمره ) مخلفين

والله شكد احجي مايفيد كتله تزوج يايمه العمر يركض
يقلد يكلي خل انتسابق اني وياه نشوف هيهو اليلحك شسويله
عنادي ..

زهره .. ماحاجة اليوم يشوفها ويحن

بنين باوعت للحجية مادري شلون نظرت الها وكالت الها هيهي ( ياهي) الي شيوفها ويحن

زهره ... مريوه شبيكم نسيتوها

الحجيه كالت عابت وبلت وجه الحيزبون .. وتاخذ ضاري
هظيمه هيج ازلمه هالعرض صدره ياخذ هاي ..

انه صفنت عليهن اني اتذكر مروه شفتها حلوه ... كتلها بس البنيه حلوه

* الحجية .. اشششش هاي ملغمطه روحها وجايبه روحة بالدلس منيلها الحلاة شو مكافهه عبالج رجال
والرجين رفاع زور الزاغة ... ماتفيد سدو سالفتها

ديحجون اندك باب الهول .. انه عدلت شالي وخفت
يمكن حسن ... دنكت راسي ماريد اشوفه ...

الحجية كالت منهوو فوت الباب مفتوح ...

انه كلبي يدك وكرهت نفسي يمكن هوا ...
وانه مدنكة سمعت صوت ضاري كال ..
خوش لمه شلونكم يابه

رفعت راسي شفته لابس دشداشه بيضه رافع الردان
والساعه بيدت سوده .... باوعلي ابتسم كال اريد عبدالله

اني مادري ليش ارتاحيت جنت خايفه زعلان مني
لو ماخذ عني فكره مو حلوه

كتله هيانه كاعد .. جنت مخليته بيتي ربين عمتي بالكاع
منومته وهو يحاول يركز على ايده ضحكت عليه كتله
ديحاول يركز ..

* جيبي عليه جيبي ..

كمت انه شلته .. انطيتهياه ..

اخذه مني ورفعة عالي باسه من وجهه من ركبته
وعبدالله ساكت...

باوعلي كال محتاج شي اجيبله ..

كتله لا والله الحمدلله ماناقصة شي ..

الحجية مالتهيات يسولفن وزهره تقره ..
طلع من جيبه ظرف ابيض كال هاج هذا مصروفج الشهري

كتله كل مره تجيب والله عندي خير من الله انه اكل واشرب وانتم مامقصرين مامحتاجتهن اخذهن ...

ضاري.. يولي اخذيهن وسدي الحجي .. لا ترجعين شي

بس انه والله عندي داحجي حجة بصوت ناصي كال

* هذا .. منعول الوالدين هذا حسن خما ديجي ..؟

كتله لا ماديجي

* متاكده ..

لا والله مرات يوصل لمار وهي قليل تجي
اكثر شي تخابر ..

اي عجل خوش .. اني اروح.. يمه تكومين لو باقين انتو

* اكف يايمه خل احاجيك .. جدتك هساع اتكول ليش مايتزوج

ضاري .. ها رجعنا هالسطوانه والگرانك خلفو والعمر يركض يمه شيكم اني اتزوج ..

يايمه خل نفرح بيك ماكو وحده حاط عينك عليها

* ضاري .. اي موجوده باوعلي وكال هاج الغالي
اخذته منه وكعدت ع الكرسي ...

الحجية ... هاااا منهي...دفرحنا واحجي

ضاري .. يمه بعدين اني راح اطلع الجماعه ينتظروني مو مال حجي هسه ...

* ها الله وياك بس فكر يايمه بيها حتى نخطبها

ضاري.. هي غير لو تروح مني بالي يلا رايح اني

كال هيج وطلع ..

زهره صاحت ... هلا هلا كو كتلكم رجع يحن للحبوبه ماتصدكوني ..

الحجية فان حظج ان جان صدك يالغمة فال الله ولا فالج

هسه تشوفون اني اعرف رجع الها ضاري متغير
ورجع الايام الحب والصفناته وهسه يطلع بينهم تواصل

* انه اباوع على الحجيه شلون تباوع الزهوه كالت الها
تسكتين لو اركع هاي الصينية براسج ..

انه بس اضحك على سوالفهم .. شويه وراحوا
انه كمت لملمت الهول
جبت الدوه لخليف
ودوه الحجية .. كتلها جده انه افوت اسبح
عينج على عبدالله ..

اكفي يايمه شو وكت المغارب موزين السبح

* لا جده حتى الاذان اذن مابقت مغرب راح افرت اسبح عالسريع واطلع اصلي حتى اسوي العشى

كالت يمه اني اريد سن جبن وياه استكين جاي
ماريد اكل شي يغثتي

كتلها انه عندي كبه بالمجمده دزت عمتي النل راح اكلي منها وياهه جبن الج .. بس لما اطلع عادي لو تريدين هسه

لا لا ماريد بس كتلج خاطر تحسبين حسابج

ماشي لعد هسه ماتاخر...
طبيت للغرفه طلعت ملابس و دشداشتي السوده وشال اخر
ومنشفى. طبيت بسرعه سبحت وكملت .. وانه اسبح كل شويه يجي بأذاني صوت عبدالله يبجي ..
يمه ماكدر بدونه هوا الوحيد الي بقالي بهالدنيا
طلعت والمنشفى براسي .. باوعت العبدالله بكاروكة نايم
يمه تروحلك فدوه امك ..
ذبيت المنشفى مشطت شعري ..
واكفه عالمرايه وادردم ويا نفسي .. وجان اسمع التلفون مالتي صوت رساله ...

ركضت دورت التلفون بفراشي عالميز
ادرر مثل المسودنه .. لكيته جوه المخده .. اي هيانه
فتحته وانه ارجف .. يمكن هوا ... مدي افتحة واشوف وبنفس الوقت خايفه لا تطلع الرساله منه

طبيت للرسائل..

مكتوب .. والله العظيم عيني ماتشوف غيرج احبج ..

من قريتها احس اسودت الدنيا بعيني .. لطمت على رجليه وعلى حظي اجت كبال عيني لمار
اووووويلي لو تدري ياربي وشكد تحبه هيه
شلون بية انه شلوون ماعرف شصار بحالي
رجعت الرجفه الجسمي طلعت كبل من الرساله وشمرت التلفون ع المخده..

ياربي شلون انه وياه هذا شلوووون احجي الضاري
اخلي يروح صدك يسحله ..

لا لمااااااار خطيه شنو ذنبها ..
والله لو اروح الاهلي احسن
قهر مرت ابويه والخدامه والمذله اهون ولا هذا حرك الاعصاب
استغفر الله ..
لميت شعري ولبست شالي ..
مديت السجاده ...
صليت .. رفعت ايدي ودعيت وانه الدمعه بعيني
ياالله يارب السموات والارض
ابعد هالانسان عني
يارب اهدي ..
يارب مالي غيرك .. ..

شلت السجاده وطبيت للهول خليف .. ياكل كيك والحجية
مدده بصفه ونايمه ..
باوعت الساعه 8 ونص..
طبيت ركض للمطبخ اليوم ورانه تعلوله اي خل اروح بلكي ارتاح تتغير نفسيتي طلعت الكبه وخليت الطاوه عالنار ..

وانه مدنكة ماده راسي بالثلاجة .. حسيت الباب اندفع.
كمت الحيلي .. باوعت
حس واكف بالباب .. جمدت كتله خير فات ورد الباب رراه
كتله افتح الباب ... ولا عبالك داحجي صافن بعيوني وكال

شلونج ... بين

زينه شتريد..

سكت ماردلي بس شكله متغيرر مثل واحد مكسور.. ً

طب يمشي للمطبخ ماعرف شنو بأيده مغلف

انه رجعت ليوره كتله شتريد اوكف لا تفوت ..

* لا تخافين يبعد عيوني لا تخافين والله احبج اكثر من روحي
انت تدرين الايام الفاتت عليه مثل الموت البطيء

كتله حسن انت شبيك والله الم الدنيا عليك انت مسودن لو شنووو الله يستر على اهلك روح لا تخليني حجايه بحلك الناس

حسن منو الي يجيج بحجايه اكص السانه ولج .. اني اريدج احبج اريد اتقدم وافقي بيه والله تعيشين ملكة اني اربي عبدالله اني اصيرله اب .. شتريدين اني ماراح اقصر

رجعت ليوره كتله تحلم اكوم بيوم الك اطلع بره

حسن .. ليش ماتفهميني داكلج اني اريدج تكونين زوجتي
ولمار وانت تعيشون اميرات عندي انت الج بيت وهي الها بيت
اني ماعندي اطفال اريدج تصيرين ام وحبيبه وكلشي بالدنيا
والله ماراح تخسرين فكري يالغالية اني شاريج وابقى انتظرج العمر كله ..

كتله انه راح اصير للحجيه هي تحاجيك ...

داحجي وجان الباب يندفر بقووووة بصوت عالي ...
اريد اشوف منو .. باوعت صار كبالي ضارري

انه بعد ماعرف شنو احجي .. بس رجليه شبه ماتن
ركضت باوعت الطباخ الطاوه احتركت ركضت طفيتها
وضاري مجتف ادية ليوره ويباوع ..

اجة يمشي وكف كبال حسن ..

باوعلي كال طبي جوه ...

انه هزيت راسي اي وطبيت اركض...

وكفت بالممر حتى اسمع... اكمز وانه بمكاني خفت الحجية تطلع سمعت ضاري يكله

ضاري... حسن ليش انت خسيس يول..؟

حسن .. شبيك ضاري شكووو

ضاري .. شلون طبيت لهينه..؟
انت شنو ماعندك شرف.. شجابك على ارملة ...

حسن ... ضاري اني جبت البيتزا من لمار دزتها ويايه.. وكالت اليوم كللها خل تجي لبيتكم هناك يريدن يتعللن مدري شنو سوالفهن ماتخلص ههههع

ضاري... ايباااااخ صايرلي خير

حسن .. ههههههه يمعود اني اروح اليوم التعلوله يمكم ..

باوعت حسن مشه جان ضاري يسحبه من ايده ..
بقوة ..
كله .. حسن عتبه الباب هاي بعد ماتعبرها افتهمت
واذا شفتك هين اقسم بالله .. انهي حياتك خلاص

حسن مارد عليه دنك راسه ومشه

انه بمكاني .. واكفه صاح ضاري تعاااااي

مشيت وصلت بال المطبخ وانه اريد احجي ماكدر
كتله انه تريدني *رفعت راسي باوعتله

وهو ضايج .. كال بيت اهلي اليوم ماتروحيله

ليش مو البنات هناك وخابروني

* سمعتيني شكلت لو اعيدها

* بس دقيقه انه افهمك اذا مارحت راح يجون همه ولمار راح اتحس

* اريد اشوف ياخير اليوم يعبر الباب اني اهينه بالبيت اليوم
خلي يطبون ولا انعل شيب الخلفوهم

* يحجي بعصبيه وبگلب محروك انه مدنگة وخايفه وافرك بأيديه
طلع وسد الباب وراه بقوووة ...

انه بقيت وحدي الوب والقهر كاتلني ..
مادري شلون سويت العشى .. كمت بسرعه صبيت الهم العشى
واحس نفسي تمرضت من القهر
جسمي كله يون
اخذت الصينيه خليتها يم الحجية ..
شلت عبدالله وطبيت للغرفة..
خليت صدري بحلكة رضعته وانه ابجي انفجرت بالبجي
هاي هيه انه اروح الاهلي كافي اذا ابقى هنا
القهر يموتني لو تصير بلوه بسببي ضاري
وحسن راح يتذابحووم والله انهزم الاهلي احسن
وانه احجي ويا روحي ..

طبت زهره عليه للغرفة هي ولمار

كالت هاااااا شو وحدج كومي صار ساعه ننتظرج

مسحت دموعي ابتسمت كتلها مالي خلك والله على غير يوم

لمار لا وانوب وحدها كاعده تبجي وتقهر بنفسها
دكوووومي عيني كومي

كتله والله ماكدر عرفيني لمار الله يخليج والله ماكدر

زهره جرت من ايدي عبدالله كالت اني ماخذه عبودي وطالعه
اخذته انهزمت طلعت تركض

بنين كومتني بقوه من ايدي لبستني الشال عدلته
كالت يلا اليوم السهره تفووووتج هناك مروه واني وسرور
وجبنه التعلوله اركضي
انه تحجي وبالي حجاية ضاري منعني مااعبر
واذا رحت راح يعتبر انه رايحة علمود حسن
جريت ايدي وكتله لا ماكدر روحي انتي

لمار والله ماطلع اليوم الا وانت ويايه

بقت تلح وتلح وانه مابيه اشرح الها حالي

طلعت عباتي ولبستها الي
انه احس نفسي مسجنه
اخذتي تمشي وتضحم وانه هموم الدنيا احسها
فوك راسي ...

طبينا لبيت عيالي
باوعت من الجام مامبين زين
جنت خايفه لا اشوف حسن
هسه صرت اخاف من الاثنين
اووووف ياكلبي بعد شتتحمل..
فتحتا الباب وطبينا ...
كلت السلام عليكم

باوعت حسن كاعد عالجودليه مرتجي من شافني كعد نفسه
انه طبيت سلمت على مروه وسرور ..

مشيت كتلهم خل نكعد بغرفة عمتي

سرور لاااااا وين تعالي احنا محتصرين دكعدي اكعدي

جرتني كعدتني يمها
محمد طب يمشي سلم عليه
وكعد مقابيل حست طلعوا الدومنه

باوعت البنات ديضحكون ماعرف على شنو
مروه جانت كاشخة لابسه فستان اسود وفضي
والشال اسود

وراسمه عيونها بالكحل حيل حلوه

وانه صافنه عليها ...

زهره كالت شوفي عبدالله شلون يناغي ..

انداريت جان اشوف ضاري واكف كبالي
وعيونه تجدح نارررر...

يتبع ...
وتستمر الحكايه 3000 كلمه😭

شكرا للمتابعة الجميلة شموخ حاتم جاسم
على الڤديو