[فيتامين سي]

الحلقة العاشرة

مساء الغلا

#تناهيد_امرأة

#بقلمـي_نشوى_السلطان ❤️

وانه صافنه عليها ...

زهره كالت شوفي عبدالله شلون يناغي ..

انداريت جان اشوف ضاري واكف كبالي
وعيونه تجدح نارررر...

صاح زهره كومي صبلي جاي..

اجت زهرة خلت بيدي عبدالله وراحت ..

سحب الكرسي وكعد كبالي .. باوعت عينه بعيني
مد ايديه عالميز وصار يدك على المزيز بأطراف اصابيعها
بطريقة تبين عليه التوتر .. انه ليش ارجف مادري

حسن باوع على ضاري ودنك بعد مارفع عينه ..

مروه .. من شافته صارت تعدل بنفسها وتتبسم ..

هوا بيده التلفون مدنك ماباوعلها ..

سرور تحجي وتسمع بي كل شويه وكال مروه منين ماخذه فستانج .. تحاول تسمعه وهوا مااهتم ابد

انه اهز بعبدالله وادية ترجف حسيته يريد ياكلني بنظراته
حيل جان بيبن ضايج ..

اجت زهره خلت الجاي مقابيله ..

لمار ... اكووول ليش مانلعب وياهم دومنه

سرور يارررريت يلة خل نلعب ..
كامت راحت كعدت يم محمد وحسن

انه كتلهم ماريد العب اعذروني

لمار .. لو بس اعرف شبيج هموم الدنيا كلها فوك راسج

انه اباوعله هو يباوعلي صفح ..

سرور كووووموا يلا ...

ضاري رفع راسه عليها وحجة بصوت خشن
اخذي البنات وطبن جوه ...

محمد.. انزل ضاري العب شبيك

ضاري ... مشكور ماريد العب اللعب الي داشوفة هالايام يكفي ويوفي يحجي ويباوعلي ..

انه ارتبكت حسيت يقصدني
صرت البوب ماعرف شنو الي اسوي نخبصت بحجايته صفنت كمت كتلهم خلي نفوت جوه بنات ...

سرور ... ليش نفوت جوه ..!

ضاري ... سرور طبن جوه ...

سرور... ها اي عادي هسه ..

شفتها خافت من حجاية ضاري شافته يبين عليه العصبية

انه مشيت وبيدي اخذت عبدالله .. طبيت من يمه بدون ماارفع راسي
مشيت فتحت باب غرفتي وطبيت ...

وانه متوتره .. شلون هيج سويت انه شجابني اكيد عباله انه علموده جيت اريد اكعد بمكاني ماكدر احس واحد خانكني اريد ابجي
اريد انفجر .. بالبجي ... كمت مسيت فتحت الباب

صارت مقابيلي بالممر سرور ومروه ...
يحجون بصوت ناصي .. انه رجعت سديت الباب..
ماعرف شنو جانوا يحجون .. ابني شايلته نام ..
مشيت كلت خلي اطلع مابيه بعد ابقى ..

سرور ومروه ماكو مدري وين راحن... تلكتني عمتي شايلة السبحة بيدها طالعه من غرفتها

كالت هلا اليوم عبودي منور بيت اهله ...

اجت تمشي عليه كالت انطينياه

اخذته كتله توه نام

اخذته ومشت وهي تبوس بي وصلت لباب الهول وكفت اندارت عليه كالت شو اهين واكفه تعاي فووتي

كتله لا انه بعدين اجي خل اشوف البنات

راحت هي .. انه طبيت للمطبخ

لكيت لمار وزهرة صاحت زهره تعاي وين اختفيتي

كتله رحت للغرفة وطلعت شدسوون ؟

لمار داسويلهم شامية .. الهم والنا ..

زهره .. اليوم ضاري بس ينافخ مدري شبي وديتله الجاي
يكلي هذا بارد شلون يصيح شبي مادري

انه سكتت مارديت .. لمار كالت اي شافها وانقهر يمكن
انه اريد شي التهي بي ماكدر

باوعت الصحون علسنك .. خليت زاهي رفعت ردني بديت اغسل بيهم ...

زهره .. اي شفتيها شلون عينها عليه

لمار .. اششششش ماعلينا هسه تجي سرور شيخلصنا من السانها

دانحجي طب ضاري بيده الاستكان ... انه انداريت عليه هو

باوع الزهره كال الها حسج هذا اليلگع بطلي
خله الاستكان عالميز وطلع

لمار... صخااااااام يمكن سمعنه

كتلهم اي اكيد سمع هم زين انه ماحجيت شي

زهره ... بربجن اني شوكت حجيت بصوت عالي
والله هو يتحجج

لمار ... وهاي كملت الشاميه ...

اجت لمار .. سحبت الصينيه وخلت بيها كل الشاميه
كالت هاج بنين ودي بين مااكمل صينية الثانية

كتله انه .. لالا انه استحي خلي زهره تودي

لمار .. ولج منين تستحين ماكو احد

طب ضاري وبيده السويج باوعلي وهوا يمشي كال لا ليش تستحين فووووتي تره ماكو احد غير حسن ...

باوعلي بنظره حسيتها يريد ياكلني بسنونه ... فتح باب المطبخ
وطلع...

كالتله لمار ... اني ادري خل اودي اني ... ولج زهره
كملي الباقي لما ارجع ...

راحت لمار وزهره بقت بالمطبخ تسوي وجبه اخرى للشاميه
انه حسيت نار بيه بعد مابيه اسكت خل اطلع ابررله موقفي
ليش الحجي يصير عليه .. سديت الماي نشفت ايد وطلعت وراه
باوعت ماكو بالطارمة مشيت شفت كلوب السياره الداخلي
مشتغل .. الدنيا ليل مشيت ...

باوعت كاعد بالسياره وحده ومدنك ماعرف شيسوي ..

رفع راسه باوع صرت انه كدامه بس المكان ضلام ..
كال خير !

حجاهه بطريقة تبين مستغرب من جيتي

كتله انه جيت .. اريد افهمك ..

ابتسم بطريقة حسيته ديستهزء ..

* شتفهميني .. الي فهمته اني يكفي .. يولي

كتله لا والله انت مافهمت شي انه مالي ذنب

* صحيح مالج ذنب بس گلبج الجابج ... يولي تره اني ضاري
هاي الافلام ماتعبر عليه ...
انتي تدرين حسن شنو واني حذرتج جثير منه
واخر شي منعتج من جيتج لهينه بس الضاهر
ماتكدرين على گلبج .. اجيتي وبكل عين برعة

*كتله ددددقيقة يعني شتقصد..!

والله عاد كلامي واضح مثل تصرفج هذا .. الطايش

لا والله انت غلطان وحرام عليك هيج تكول انه مالي شغل بحسن

* خير ان شاءالله سهلة ...

انت ليش ماتسمع مني انه داكلك مالي ذنب .. وانه منفعلة اريد احجي تنهدت ماكدرت اكمل سكتت!!

باوعلي وكال يريدج حسن جوه .. روحيله شوفي شيريد
بلكي عنده بيتزا وجبة اخرى ...

من كال هيج انه شبعت قهر اريد ااحجي سحب باب السياره
سدة بقوه شغل السياره وطلع .. عبر باب الحوش

وجان ينزل الجامه وكال عوفي الهوووول وطبي الغرفتج
ماريد ارجع والكاج يمه وكافي طيش اتصرفي بعقل
.... حجة هيج

وشخط السياره وطلع من كال هيج والله لو حاركتي بنار ولا حاجي الي حجاه ... انه مخنوكة اريد افوت جوه بعد ماكدر ساعه فوتي ينتظرج ساعة طبي الغرفتج شيريد مني
ليش هيج ديسووووي بيه

عيوني دمعت ... ماكدررت اتحمل بعد ..

طبيت للمطبخ ... مالكيت احد ..
امشي وروحي مفرفحة .. بودي الحكة اتعارك وياه
انه شبيه سكتت شبيه ماحجيت مادافعت النفسي

طبيت للمطبخ فارغ
رحت امشي لباب الهول كبالي زهره اشترت الها تعالي
اجت زهره وبيدها الكرزات كالت هاج تريدين
كتله ماريد انطيني عبدالله جيبي من عمتي

* ها ليش عبدالله نايم...

ميخالف انطينياه...

اي هسه .. مشت خطوه وكالت دفوتي شبيج

كتلها جيبي عبدالله زهره شبيج

اي اي دقيقة .. طبت شويه ورجعت ...
انه بالمطبخ عيوني دم اريد اتحمل ماكدر ماكدرت اخفي دموعي بجييييت بحركة ..

اجت زهره وبيدها عبدالله .. شافتني ابجي وكفت

كالت شبيج بنين..

مشيت عليها سحبت منها ابني كتلها هيج ضايجة لتذكرت المرحوم .. طلعت امشي لباب المطبخ وكفت انداريت عليها
وانة ابجي اريد احجي ماكدر صوتي راح ..

سحبت نفسي ومسحت دموعي كتلها زهره اذا سألو
عليه كوليلم تعبانه راحت تنام ...

زهره ... اي ماشي الله وياج ... اكلج اجي اوصلج

اشرت الها بيدي لا ...
طلعت امشي .. وابجي وشابكه ابني .. الشارع ضلام
عبرت امشي .. للبيت .. طبيت الحجية نايمه وخلف مدد يباوع للتلفزيون...

فتحت باب الغرفة وطبيت .. سديتها وراية ..

اجيت كعدت وانه ابجي .. القهر كاتلني ..

باوعت التلفوني ... مسحت دموعي .. خل اخابره
اي اخابره افهمه ليش هيج ماديسمع مني ..

خليت ابني بصفي وسحبت الجهاز ..
تربعت ... زين اذا اخابره شنو اكله ..!

اي خلي اكله همه لحوا عليه

طبيت للسجل طلعت رقمه .. ضغطت اتصال

انتظرت .. شوووية ماكو رد ..
اي متقصد مايريد يرد عليه .. شمرت الجهاز
اليوم ماراح اكدر انام .. هيج طلعت بنظره ..
بس انه شنو ذنبييي زين يمكن احجيله ويروح يسويله شي
ونبتلي .. انه ليش مااروح للبصره والله لو اروح احسن
كافي حل ارجع الاهلي وبين فتره وفتره اجي للحجيه حتى تشوف
عبدالله.. لا هاي هي الصبح اكللهم انة من ينزل خالي من دوامه ارجع وياه ... وخل عاد يبقى ضاري يصدك احساسة ويعرف انه شنو .. وانه صافنه افكر واحاجي روحي .. فزيت على صراخ عبدالله ... شلته .. ها وليدي
ها حبيب امك .. تعال ...

مسحت دموعي بوسته ..

صفنت عليه كتله اتمنى تكون حياتك تختلف عن امك
اوووف يهالدنيا ...

كمت طلعت الحفاضة منتهية بدلتها وغسلت اله ورجعت
سحبت السلة لبسته هدومه

باوعت الساعه اي وضاري بالجذب مااتصل
ولا رد عليه برساله بس الله كريم مصيرة يعرف اني مالي ذنب

سحبت المخده .. تمددت وخليت وليدي على ايدي..
طلعت صدري رضعته ً

حياتي يعوف صدري يضحكلي ويرجع يرضع
صاير يلعب .. اوف اضحك عمري اضحك رفعته بوسته
وانه وياه مدده وهوا يرضع غفيت ...

بدون مااحس من وجع راسي .

فزيت على صوت التلفون يدك ...

كمت مثل المجنونة باوعت عبدالله نايم ..

الساعه 12 وخمسة .. يمه حسن هذا اكيد..

وخرت عبدالله من ايدي .. سحبت الجهاز مالحكت انكطع ..
فتحت المكالمه وانه ارجف واباوع للشبابيك يمكن هوا جوز
اجة سكران ... انتبهت للسجل هذا ضاري ..

ها هسه اتذكر يتصل ..

رجعت اتصلت انه ... دك دكتين وانقطع

يااا شو يسدة ... هيج يعني...

توني اريد اذب الجهاز من ايدي
وجان يرجع يتصل هوا ... خليت ايدي على گلبي خفت

سحبت نفس .. وجان افتح خط...

كلت الو

* شلونج..!

الحمدلله كاعد،!

اي عجل شلون خابرتج.. ليش اتصلتي عليه جنت طالع
وماكدرت ارد..!

انه اتصلت عليك حتى افهمك السالفه

اسمعي .. انتي لو تحجيلي كلشي لو لا تحجين

* هاا ليش هوا شنو حتى احجي ماكو شي

لا اكو شي اني اعرف انتي ماتريدين تحجين خلي في بالج حسن بس اثبت عليه وتكضبه ايدي والله الا نعل شيب الخلفة
هالنذل ..

* لا لا ماكو شي عوفه عليك الله سد الحجي

ها .. وانتي شعليج بي ليش هالدفاع عنه؟

لا مو دفاع بس انه ماريد مشاكل

* يولي هاي سمعتج والي يمسج يمسني احجيلي وخليني افهم الي ديصير

ماكو شي بس ضاري ولله انه ماعندي شي وياه
ولا اني هيج رخيصة ..انت ليش هيج متصورني انه اشرف من الشرف والله .. داحجي وكمت ابجي ماكدرت اكمل

يوووولي .. ليش دتبجين اني اعرفج بس من احجي وياج بقسوة حتى اعلمج على اوادمج حسن كلبي ما ارتاحله
واذا انتي تبقين تخفين سوالفه باجر عكبة راح راح يصير الحجي كله عليج ...

مسحت دموعي اريد اسكت ماكدر كتله ليش انه شنو ذنبي

ذنبج لان طمطمتي سوالفه والي يسمع راح يكول هي مصرفلها لو ماتريد جان رزلته جان حجت لعيالها
ولج اخ تدرين البارحة من طبيت ولكيته يمج
والله ودت اعجنه بيدي .. بس ماحجيت
خوفا على سمعتج ..
اهلج امنوج عدنه واني صرت مسئول عنج
ماريد تجيج حجايه افهميني يبنت الناس
انت بعدج شابه والله يستر عليج حلوه
لا تخبليني يولي احجي وماعليج من لمار اني راح اكف بوجه كل انسان يحاول يأذيج ..

* يحجي وانه ابجي الهم الي فوكايه شكبره
انه اعرف ضاري ماراح يسكت ورراح يروح يكتله وبالتالي بس الفضايح ..

كتله انه اشكرك واعرف انت من حرصك عليه
بس لا تخاف عليه انه محد يكدر يجيبني بحجايه
واتمنى ماتجرحني مره اخرى بكلامك لان انه مورخيصة

حشاج يولي اني شرحتلج ليش هيج حجيت وياج
لان اني منعتج وانتي كسرتي كلامي

* بس ماالك حق تمنعني انه موطفله ولا طايشه انه اعرف اتصرف بس

ها مالي حق..!

ديحجي كتلة دقيقه
نزلت التلفون الحجيه صاحت
ها بنين الوليد خما ديبجي ..؟

كتله لا عبدالله نايم

هاا عجل اني اروح انام

شلت التلفون رفعته كتله اي انه
اقصد انه هسه اليسمع انت تدخل بطبتي وبطلعتي شيكولون

انعل ابو اليحجي لابو شيب ابهاتهم اني احزام ظهرج يولي
اني انطيت حجابة الابوج تبقين عدنا مرفوعة الراس

بنين .. شفته صار عصبي كتله والله اعتذر انه مرات ماعرف احجي واجفص بكلامي بس القصد من كلامي اني البارحة لو مارايحة وكايله الهم ضاري ماخلاني شراح يكولون !

* اسسسسمعي يولي اني الي حق غصبا عنج وعن كل
واحد يحجي افتهمتي .. والسالفة الي احجيها ماتصير
اثنين .. كافي عاد لا اطلعيني من طوريي واطلع بهالليل
اكرض حسن كرضة اخلي يحلم يعتب عتبه الباب
انعل شرفة لابو غيرته ..

* لا العفو والله موقصدي عادي والله انه شتريد راح انفذ
بس الحجي سده

* ايييي مسدود من تجي السالفه يم منعول الولادين
تخافين تكومين تتوسلين هييييييين تكضبه ايدي

يعني شنو دقيقه انت ليش تتسرع عفيه عليك الله با تسويلي سالفه

يعني روحي نامي وتغطي زين والدنيا طويلة تصبحين على خير ام عبدالله ...

كال هيج وسد التلفون ..
انه فور دمي بكلامه .. هسه انه شسووووي
ليش ماحجيتله ...
ياربي ارشدني للطريق الصحيح ..
شمرت التلفون اريد انام ماكدر ..
كمت البوووب .. افتر بالغرفة ..
اريذ اطلع اختنكت ماكدر
احس حسن موجود بكل اركان البيت ..

بقيت بالغرفة افكر .. واقهر بنفسي لحد ما نمت...

كعدت الصبح .. على صوت الحجيه وهي ادك بالباب
باوعت الساعة 10 عززة انه شكد نمت ..

كعدت احس جسمي متوجع مكسر ..
كمت فتحت الباب .. وانه شعري مفتوح مخربط

كالت اكعدي يابمه شفتج ماكو خما بيج شي

كتله لا مابيه شي بس اخذتني النومة

ها نوم العافية تعاي جيبي هالوليد عمتج اهينه تريدج

كتلها اي هسه ... الحجيه مشت انطتني ظهرها وراحت للهول
انه شلت عبدالله .. ..
عبدالله يسولف ويناغي وانه ابوس بي ..
خليته عالجودليه لبست الشال وخليته على راسي
وطلعت ..
لكيت الحجيك وعمتي كاعدات ..

شلونج عمه ...

هلا عسى بعد عمتج .. تعاي وينه الصغير شو انطينياه

انطيتهياه كتلها انه اغسل وارجع شو مادري بنفسي اخذتني النومة
باوعت خليف ماكو كتلها هاي وين خلف

كالت يمه طلعته عالشمس شويه خطيه ..

اي احسن والله زين سويتي .. يله هسه ارجع

طلعت غسلت وجهي عالمغسلة .. طبيت للمطبخ لملمته
طلعت الحلم خليته عالكاونتر ديموع...

رجعت للهول.. لكيتهم مخلين عبدالله ويحاجوا ..
تربعت وكعدت يمهم .. كتلها عمه البارحة لمار شوكت راحوا

كالت والله ماتأخروا وراح طلعوا ابين حسن كال تعبان اخذها وراحوا ..

هاا زين اكوم اجيب ملابس العبدالله ابدله

كمت الحيلي وسمعت الباب اندك ..
طلعت امشي صحت منو ...

كال اني ضاري افتحي الباب...

يمه عبالك گلبي عصرني ليش اخاف منه مادري
كتله اي لحظة نزلت شالي ولفيتة زين ..

فتحت الباب.. وكفت على صفحة .. بدون مااباوع عليه

كال وين الحجية ..

كتله موجوده جوه .. تفضل

كال كليلها ضاري يريد مفتاح الغرفة ..

رفعت راسي عليه .. شفته لابس دشداشة ويشمغ ..
كتله اي لحظة هسه ..

طبيت كتلها عمه ضاري برة يريد مفتاح الكنتور

هااا .. جة من المكتب شعجب .. والله وين المفتاح اكفي خل ادوره ..

مدت ايدها بجيبها كالت هيانه لكيته .. ليش مايطب خل يجي

كتله ماعرف بس كال اري المفتاح ..

ها عجل لازم مستعجل دهاج ودي..

اخذت المفتاح ورجعت عليه مالكيته
طلعت للطارمة .. .. لكيته واكف يم خليف بالحديقة..
مدنك عليه وماعرف شيحاجي..
تمشيت عليه كتله المفتاح هذا ..

اندار عليه وكاف وكف..

باوعلي والشمس ضاربه بوجهه ..
كال اعتذر عن كلام البارحة ..

كتله ياكلام ..

الكلام الي صار .. اني اسف وهذي حياتج وانت حره بيها

لا انت ماحجيت شي غلط ..

رفع حاجبه وكال بس انةةةةة من من حقي ادخل مو

ابتسمت من كال انةةةة عرفت ديقلدني وانه احجي
كتله وانه هم اسفه البارحة جنت مقهوره ..

مقهوره مني؟

لا من الدنيا هاي من حياتي .. اووف سحبت نفس وكتله
الله يعلم بالحال

صفن عليه وكال .. الدنيا ماترحم .. ديربالج على نفسج

كتله دقيقه .. راح نسد الحجي مو

ضحك وكال هوا ليش شكوووو كلشي ماكو

استغرب ... كتله شلون ..

اي اسالي نفسج كلما اكلج تكولين ليش هوا شكو
عبالج اني مااعرف البير وغطاه
فوتي جوه فوتي سهلة ..

دايحجي وجان تفوت زهره كالتله ضاري
سرور تكول ليش مايرد ديتصلون عليك

* باوعلها كللها وانت شطلعج ...

مو هي ومروه كلولي روحي .. ديخابروك ماكو

* وشتريد سرور..

تكول خلي يجي يوصلنا اني ومروه الاهلي...

اندار باوعلي بعدني واكفه كال الها خل يتهيرن جاي
وبعد لا تطلعين..

طلعت زهره .. وهوا مشه خطوتين ووكف اندار عليه .. وكال محتاجة شي ..!

هزيت راسي لا .. بدون ماحجي

كال شبيج ..!

مابيه شي .. صفن عليه وتنهد .. كال فوتي عاد

انه كتله اي ..
هو مشه وانه مشيت ...

طبيت للبيت ... ومرت الايام عادي بين
جيات حسن الي اتهرب منها ..
وبين قهري على لمار وهي ادور حتى تعرف شبي حسن
وشنو الي خلاه يتغير...

جنت بذاك اليوم معزومة عد عيالي انه والحجية ..
عالغده .. تغدينه وكلنا

بس ضاري جان ماموجود .. جان رايح للبغداد
حتى يتسوق للاسواق..

للعصر وبقينا بالهول .. كاعدين ونسولف ونضحك
هيج احس نفسيتي تغيرت شويه ..

جان تفوت سرور كالت اهلي راح يجون ..

عمتي كالت هلا بيهم

كتلها هلا بيهم انه اكوم اكمل المطبخ ..

كمت بسرعة لملمت البيت ورتبته وطبيت للمطبخ
دامسح بالكاونتر وجان عمتي تكلي يمه انتي موعندج ثوب غير هذا الابسته دنزعي هذا واللبسي الجديد العفتي هينه

باوعت النفسي كتلها قصدج دشداشه

اي يمه دبليها هاي هريانه تعبانه شوفي نفسج
الاسود مكبرج وانتي شابه اني ماقبل هيج تدفنبن
نفسج وتبقين بهذا الاسود وانت بعز شبابج

بس عمه انه السنه بعد ماطلعت شلون اذب الاسود

السنه مابقالها شي وتطلع اني ماكلج انزعي
بس البسي الوان قابلة .. اني من دور الحجي كرهت الاسود
وفاله ابد موزين

بس لا عمه ماكدر انزعه بعد حتى استححي انزعه وانه تعودت عليه شيكولون عليه الناس

صفنت عليه وكالت يمه الحياة ماراح تنتهي .. هسه بدلي هاي دشداشتي هريانه وتعبانه .. ام سرور راح تجي

كتلها الله كريم عندي غيرها سوده عود ابدل...

ماشي يمه ..

طبت هيه للهول وانه كملت شغلي ...

شويه وندك الجرس.. انه نشفت ايدي وطبيت للكنتوري القديم
طلعت دشداشه سوده جديده ..
بدلت مشيت باوعت النفسي بالمرايه ..

حواجبي مليانه شعر .. عيوني ذبلانه ..
صفنت النفسي ..
كلت عمتي تريدني اهتم بنفسي وانزع الاسود
ماتدري انه السواد مالي حياتي من صغري ..

لفيت شالي وطلعت .. داسد الباب ورايه ..

باوعت غالمغسله واكف ضاري لابس قميص نيلي
وبنطرون كابوي رافع اردانه وديغسل بوجهه ...
رفع راسه وهو ديغسل شافني بالمرايه ..
انه دنكت راسي وطلعت للهول ...

وكفت بالباب كلت السلام عليكم ..

عمتي كالت تعالي فوتي .. اندارت على ام سرور كالت الها هاي حرمة ضاري

جان سرور ومروه يحجون سويه كالن عمه شبيج
قصدج حرمة وسام .. اسم الله على ضاري

انه فشلت دنكت راسي ..

جانت عمتي تباوع الهم .. كالت غلطت

فتت بوست امهم وجان تكول اي بالفاتحة شفتها

كعدت بصف عمتي .. باوعت السرور ومروه وحده تشاور باللخ
اريد اخذ عبدالله من عمتي وجان ...
سرور كالت بنين تعالي ويانه

باوعت عليها كتله ها وين نروح

شبيج للمطبخ قابل وين ..

كتله اي يلا انه هم اريد اسوي جاي..

طلعوا همه يمشون وانه وراهم .. وصلنا للمطبخ

سرور كالت عوفي الجاي بنين ..
اريد اكولج على شغله ..

انه وهي تحجي خفت اتذكرت حسن كتلها اي كولي
مروه واكفه وتباوع النا ماحجت

كالت سرور والله يابنين احنا نعرف مو وكت هالحجي
بس الراح الله يرحمة ..

اريد اكلج علمود حسن ...

رفعت راسي كتلهت اي شبي

كالت حسن اخويه ماعنده خلفة ويتمنى يصير عنده
بس مدانعرف ليش مايصير عدهم
تراجع للدكتوره ويكلولهم مابيكم شي بس مايصير عدهم

كتلها انه اعرف بكل الي كلتي بس مدافهم ليش دتحجيلي

مروه شوفي عيني احنا نريدج الحسن
وحسن يكول لما تطلع السنه يلا نكطع مهر ..

وهي تحجي وجان اباوع ضاري واكف بالباب مبدل لابس دشداشه وديكف بالردان ..

سلم وكال بنين انطيني ماي..

جان تكله مروه لا بنين عوفها اني اجيبلك ...

هو باوعلها صفح ..

كامت صبتله بالكلاص.. وراحت ودتله..

سرور دتحجي وانه باوعت الها ماعرف شكالت الها
هو ابتسم وكال وماعرف شنو رد الها ..

هي ضحكت وارتجت عالكاونتر.. خله الكلاص بصفها وطب جوه

كتلها السالفه الي حجيتيها اتمنى ماتعيديها مره اخرى
ولا اقبل بعد تكلولي اولا انه ماتزوووج
وثانيا عيب عليه وخزي اتزوج زوج صديقتي واختي
شلون عقلتوها..!

سرور احنا نقنع لمار ماعليج اني اعرفها هي تحبها
ما راح ترفض..

مشيت كتلها ابدددددد لتعيديها ماشي
وانه مااتزوج .. من رحصتكم ..

عفتهم وطلعت للهول .. شلت ابني وطلبيت للغرفه
حتى جاي ماكدرت اسوي..

فتت وانه رجليه يرجفن هذا حسن سواهه صدك وراح
حجة الهم .. عزه بعيني لمار اذا سمعت شراح تكول
اريد ابقى بالغرفه ماكدر..

طلعت من الغرفة .. طبيت للهول كتلها عمه انه اروح الحجيه وحدها

سرور كاعده تباوع عليه ماحجت ..

طلعت للطرمة اريد اروح للييت ..
جان تطبك سياره حسن .. الباب مفتوح شويه

من شفتها رجعت اركض للمطبخ .. اركض وابني يصرخ
اريده يسكت ماكدر اهز بي واباووع للباب
بس لا راح ينزل ضاري بغرفته
اليوم تصير مشكله .. شجابه هذا ..

باوعت طبت لمار وحدها ..
وسدت الباب البره وراهه ..

هنا شويه انه ارتاحيت..
طلعت امشي كتلها هلا لمار شعجب جيتي هسه

كالت تعالي فوتي للمطبخ

كتلها عبالي اطلع

باوعتلي وهي تبين مهمومه كالت اني اريد احجي وياج
باوعتلها وانه ميته خوف ..

كتلها خيرج ...

جرتني من ايدي اخذتني للمطبخ ..
سحبت الكرسي وكعدت ..
كالت اكعدي ..

كتلها اي.. كعدت مقابيلها ...

كتلها احجي شبيج ...

طلعت تلفونها وطبت للاستديو ..
كالت اقري الرسائل..
انه اهز بعبدالله ومخبوصه بتصرفها
من كالت شوفي الرسائل انه حيلي مات
اريد انطق ماكدر
باوعت الرسائل الي وصلت التلفوني كلها عدها
مصورتها بجهازها ... ارتبكت وخفت باوعتلها
وهي تبجي كالت ليششششش بنين

وتستمر الحكااااية ..