[لامارا]

القسم السادس
-
في الطريق
جراج يناظر الطريق ويشرب من الكوب
وفارس ساهي ويناظر الطريق لين لف على صوت ساري
ساري:تتوقعون بيصير شي لو هربت سما معاي؟
جراح:اتوقع انه اسوأ شي ممكن يصير
ساري:اجل عطني حل فك عقدة مشكلتي
فارس:مافي حل اذا انت شجاع وذيب خذها ياساري
ساري ناظر فارس وفارس لف له:والله لافخر براسي لاجابوا اسمك
جراح تنهد؛تبي اجرب اكلم عمي انا!
فارس:لا تجرب عمي ما بيوافق ابد
ساري:بس خايف ماعرف شي بالمدينه ولا احد وين اسكنها واعيشها
جراح؛وانا وين رحت؟ لابغيت شي كلمني وانا اضبط لك كل شي ماعليك المدينه مهي غريبه ولاهي شي جديد
ساري:والله مدري طول عمري بالحوش ولا افهم شي
جراح ابتسم؛انا اعلمك كل شي
فارس لف للطريق وساكت وساري ابتسم
وسند ظهره على ورا وهو يناظر الطريق ويفكر
-
ريحان
جالسه على الدرج بالبرد ولابسه شرشفها
طلت من البيت سما ونادتها:بنت مابردت؟
ريحان:لا
سما:امشي عاونينا
ريحان؛شوي واجي
سما؛ابطوا؟
ريحان؛مدري بس بنتظرهم
سما:الحين انا اللي لي حبيب غايب انت شدخلك؟
ريحان ماردت ووقفت من شافت نور السياره يدخل الحوش
ابتسمت وهي تعدل حجابها مشت للمجلس ووقفت بطرفه
نزلوا من السياره وهي تنتظرهم ووقفت سما جنبها
ناظرت ساري نازل وهو يتكلم مع فارس بجديه
عبدالعزيز:ابطيتوا
جراح تقدم لهم:درب المدينه
ناظر ريحان واشرت له وعقد حواجبه
ناظر حوالينه وريحان تأشر له همست؛الكوب
هز راسه؛اها في السياره دقايق
ابتسمت ريحان ولفت لسما ومشت ورا جراح
فتح السياره واخذ الكوب من جنبه ولف لها؛الله يعطيك العافيه
ابتسمت ريحان واخذت الكوب:الله يعافيك تبي عشاء؟
جراح ناظرها:هاه؟
ريحان:عشاء عشاء بقيت لكم
جراح؛لا تعيشنا هناك
ريحان ابتسمت:على هواك
مشت رايحه وتكلم بصوت عالي جراح؛كباية شاي اذا تقدرين؟
لفت وضحكت؛كييف شاهي شكلك!
جراح:لا والله ابد بس مدري ليش طعمه حلو
ابتسمت ريحان وهزت راسها؛ابشر
مشت تاركته ودخلت المطبخ وهي تسوي الشاهي
فجر وهي تفرك ايدها بالسلك:بنات ما تروح ياويلي لو يشوفها ابوي
ريحان:روحي لها خل تفركك هي والا فالحه تسوي نفسها عليك!
فجر:اسكتي بالله مسكينه البنت
لجين؛لمن تسوين شاهي؟
ريحان:مالك شغل
سما ضحكت؛اشك انها متعرفه على عامل بالبيوت اللي جنبنا تسوي له شاهي بقروش
ضحكت ريحان باستفزاز؛عامل؟ خليت العامل لكم والله
اخذت الكوب ومشت طالعه من البيت
ناظرته واقف بعيد ويناظر السما ويدينه بجيوبه
وقفت جنبه:وش تناظر؟
جراح لف لها من انتبه:ما جانا مطر من يوم جيت شكلي نحس عليكم
مدت له الكوب:لا ابد بس مو موسمه
جراح اخذ نفس ولف يناظرها ورجع ناظر السما
همست ريحان من انتبهت لك: ماودك تشوفني؟
انصدم وناظرها بصدمه وريحان تناظره ببرود
ضحك بصدمه وعقد حواجبه:كيف يعني ما ودك تشوفني؟
ريحان هزت كتوفها :واضح السؤال
جراح لف لقدام ثواني ورجع ناظرها؛مو عيب؟
ريحان ابتسمت بضحكه:اختبار قصير
جراح هز راسه وضحك؛يعني اجتزنا الاختبار!
ريحان؛ناجح
جراح ابتسم وناظر السماء وريحان تناظره
اخذت نفس:طيب بدخل انا
مشت وتركته وجراح رجع يناظر السما وهو هادي
-
ساري
دخل المجلس وحصل جراح جالس
ومن شافه جراح اشر له جنبه
جلس جنبه ساري وبلع ريقه
ولف جراح لعبدالعزيز:عمي بغيت اتكلم معاك
عبدالعزيز نزل فنجانه:وش عندك؟
جراح؛هذا ساري جنبي ويبيني انا اتكلم معك
عبدالعزيز ناظر ساري ورجع ناطر جراح؛وش عنده ساري!
جراح؛ساري وده يكمل دراسته بالمدينه وهو متزوج
عبدالعزيز:ماشاء الله
جراح؛ويبي بنتك سما
عبدالعزيز؛ماهو احسن من فارس عشان ازوجه
ساري غمض عيونه بقوه
وجراح لف له:عمي وشفيها لو تزوج في النهايه ولد اختك ومهي رايحه للغريب يدرس ويرجع
عبدالعزيز:يروح يدرس ويجي واعطيه اياها
ساري:ما بتعطيني ولاشي فارس درس ورجع ولا عطيته فجر
عبدالعزيز:فارس رجع متزوج وانا ما ارضى ياخذ بنتي وهو لاقي على ذمة كافره
سكت ساري وجراح تكلم؛عشان كذا ياعمي سما وساري يبون بعض ليه من البدايه ما تزوجهم
عبدالعزيز صد بعيونه؛حراح اخرج من الموضوع انت مابي علاقتك تخرب معي
جراح سكت ولف لساري اللي معصب وخرج من المجلس معصب
جراح لف لعبدالعزيز:عمي علمني ليه ماتبي تزوج بناتك؟ بناتك يجي نصيبهم وترده!
عبدالعزيز لف لجراح وهمس:مابي احد يروح عن عيني
جراح:ما تقطع بنصيبهم حرام والله وبعدين بناتك حوالين عيونك دايم بس حرام اللي تسويه
عبدالعزيز هز راسه:لا تفتح الموضوع جراح
جراح تنهد وهمس:براحتك
وقف وتركه بالمجلس ومشى للبيت جراح
دخل وقفل الباب ومشى لين الصاله وناظر كوثر والهنوف جالسين
الهنوف:شفيك؟
جراح جلس قدامهم:ولاشي شايل هم ساري
الهنوف:ليه!
جراح؛يعني دراسته وروحته
الهنوف:شفتي ياكوثر جراح اللي ماله اصحاب بالمدينه الحين مايترك ساري وفارس
جراح؛يعني بالنهايه ذولا عيال عمتي امي ولازم اوقف جنبهم
الهنوف:مساكين وعيال ناس اصلاً
وقف جراح ومشى لغرفته قفل الباب وانسدح
-
فارس
جالس لحاله بالحوش ويناظر السما وهادي
اخذ نفس بضيق وغمض عيونه
وهو يفكر ويتذكر وقلبه يوجعه
ما تمنى الا تكون جنبه وحلاله
حبها بصدق وحافظ عليها وكان جنبها
ناشد القمره وكلم الطير من حبها
سهر ليالي طويله على ابتسامتها
وضحكاتها وصوتها وحياها
حس بقرصه بذراعه وفتح عيونه وفز
ناظر العقرب على ذراعه بخوف
ووقف وهو يرميها عن يده وناظر ايده متورمه
بلع ريقه وهو يحس بدوران الدنيا حوالينه
ناظر البيت قدامه وماحس بنفسه الا وهو طايح
-
راشد
خرجت فجر من المطبخ:راشد طلع الخبز للغنم
راشد:مو الحين بكره الصبح
فجر؛بيعفن هنا وده ابوي بيهاوش
تنهد راشد ووقف واخذه من يدها وخرج
فتحت له الباب ووقفت تناظره
لبس حذيانه ومشى راشد وعقد حواجبه ورفع صوته
:فارس
طلت براسها فجر تناظره منسدح وبلعت ريقها
راشد؛ورع فارس
انتظره يرد ولاحصل جواب
حط كيس الخبز بالارض ومشى لناحية فارس
ناظره طايح وهمس:فارس
عقدت حواجبها فجر وطلعت وهي تناظره مايتحرك
مسكت قلبها وهي تبلع ريقها وتمشي ناحيته
راشد هزه بقوه؛فارس وللد فااارس
لف لفجر وصرخ؛نادي ابوووي وجراح بسرعهه
رفعه وهو يهزه وفجر ركضت بخوف له وهي تناظره:فارس فارس
راشد:روووحي ناددديهم
خرجوا البنات على الصوت وهم يناظرون بخوف
وطلع عبدالعزيز:شفيكم؟
راشد؛فارس فارس ما يتحرك
خرجت زهور بخوف ومشت لناحيتهم؛واحري على ولدي شصاير؟
عبدالعزيز:جررراح جررراح
فز من سريره على الصوت وطل من الشباك ناظرهم متجمعين
ركض بسرعه وخرج حافي والهنوف طلت من الدرج بخوف
ركض لهم وناظر فارس طايح:فارس فارس شفيه؟
راشد:لقيته طايح شغل سيارتك نوديه
عبدالعزيز:شوف ايده يمكن قرصاه حيه والا عقرب شوف رجلينه
راشد؛ساعدني ساري
ساري رفع فارس مع راشد وجراح سبقهم للسياره حافي
وفجر جالسه على الارض وتناظرهم ودموعها بعيونها
عبدالعزيز:امشوا ادخلوا
زهور؛بروح معاهم
عبدالعزيز:وين تروحين خليك شوي ويرجعون ادخلي
بلعت ريقها لجين وجلست جنب فجر؛امشي ندخل
فجر ناظرت خواتها:اخاف يموت
ريحان:بسم الله عليه منتي صاحيه مافيه الا العافيه امشي ندخل
فجر هزت راسها بالنفي:ادخلوا انتم بنتظره هنا بمحله
سما:بنت ابوي بيهاوش امشي ندخل
فجر صرخت؛خليييه خلاص روحوا عني
لجين:خلاص خلوها امشوا
مشوا وتنهدوا بضيق ولفت ريحان ناظرت كوثر
تنزل من بيتهم وتمشي لناحية فجر
وقفت تناظرها تتكلم مع فجر وجالسه جنبها
ودخلت وقفلت الباب وناظرت ابوها:ياما قرصتني xxxxب مافينا شي حمدلله
زهور؛واحري على ولدي ياعبدالعزيز ولدي ذا ولدي
البتول:ماعليه الا العافيه صلي على النبي انتي
-
فتح عيونه وناظر جراح وساري حوالينه وراشد جالس
جراح؛حمدلله على السلامه
هز راسه؛الله يسلمك
ساري؛زين اننا لحقناك بغيت تموت
راشد:حمدلله على السلامه
فارس عقد حواجبه؛ماحسيت فيها كنت منسدح بالحوش
جراح؛يالله عذت على خير حمدلله
فارس جلس وهو ماسك ذراعه
انحنى ساري ولبسه نعاله وجراح ناظرهم وابتسم
مشى ساري ويده بيد فارس ويمشي معه
ركب السياره جراح وحرك وهو يناظر الطريق
جراح:يالله زين طمن اهلك الحين وماعليك الا العافيه
ساري:لعد تقعد لحالك نادني لاقرصك شي يقرصني
ضحك فارس وابتسم جراح:اعوذ بالله ياشيخ
راشد؛عدت على خير لحقناك بدري
دخل جراح بالسياره وانسطع ضوء السياره على الاثنين
اللي جالسين بالحوش ومن عرفها فارس تقدم وهو يناظرها
وقف جراح ووقفت فجر بخوف وكوثر جنبها
نزل فارس من السياره وهو ماسك ذراعه
فجر لفت لكوثر وناظرتها وهي تمسح دموعها؛بدخل البيت
كوثر؛تطمني عليه
فجر:مافيه شي خلاص بدخل
مشت فجر لداخل وناظرها فارس ومشى وراها
دخلوا العيال ووقفت زهور:حمدلله
حظنته وسلم على راسها فارس
عبدالعزيز؛حمدلله على السلامه
فارس:الله يسلمك ياخالي
جراح ابتسم:خوفتنا والله رحت بدون حذياني من الخوف
ابتسم فارس وجلس جنب امه وهو هادي
جراح؛يالله عن اذنكم
عبدالعزيز؛الله يعافيك جراح
اشر له جراح وخرج من البيت
عبدالعزيز:راشد قل لخواتك يسوون له لقمه ياكلها
راشد هز راسه دخل المطبخ وناظر البنات؛ابوي يبي لقمه ياكلها فارس
ريحان؛الحين نسوي له
لفت لفجر من طلع راشد؛قومي انقلعي انتي ودي له تتغلين على راسي
فجر؛مابي اروح خلاص
ريحان؛اقعد تبكبكي عندنا خل يشوف دموعك ياحماره روحي
لجين؛ريحان خلاص ماتبي اذلفي عنها
ريحان؛غبيه
فجر جالسه وتمسح دموعها وسما جنبها
همست لسما؛عطيني الصحن اوديه
سما هزت راسها واخذت الصحن من ريحان ومدته لفجر
اخذته فجر وهي تاخذ نفس ومشت للصاله
عبدالعزيز:خذ دواك الحين وريح
جلست وهي تحطه عند رجوله رفعت نظرها له
ومن ناظرها همس:دواي ياخالي فجر
سكتت زهور ولفت ناظرت عبدالعزيز
وبلعت ريقها فجر وهي تناظر ابوها يناظرها
مشت ودخلت بسرعه وفارس ناظر خاله؛شفيك ياخالي؟ تحسبني بسكت! قلت لك بطلبها منك لين توافق ومامني مفر
عبدالعزيز؛ما بتكلم عشانك تعبان ويبي لك ترتاح
وقف وناظر البتول:بدخل انام
مشى ودخل وفارس ظل يناظره
لفت له زهور؛شتبي انت تغث خالك! خلاص فارس اعقل وقفل على السالفه
فارس؛ماني مقفل السالفه وماني طفشان وانا اطلبها، ومابي اكل شي
مشى وخرج من البيت ماشي لبيتهم
-
صباح يوم جديد
ساري
واقف عند الباب وهو ينتظر
خرجت سما وراشد جنبها ومدت لساري الفطور
راشد؛هلا ساري
ساري ابتسم له بارتباك:هلا
مر من جنبه راشد وسما تناظره
لف ساري وناظرها؛شلونك؟
سما هزت راسها؛زينه وانت؟
ساري؛حالي مايسرك لا انام ولا ارتاح افكر وتعبني التفكير
سنا تنهدت وخرجت وهي تقفل الباب وراها؛ساري بغيت اكلمك وزين جيت
ساري ناظرها:فكرتي؟
سما بلعت ريقها:اي
ساري:تجين؟ تجين وتتركين اهلك عشاني!
سما اخذت نفس:اذا بيساعدنا جراح ويدلنا هناك لكل شي بروح وما بلتفت وراي
ساري اخذ نفس وهز راسه؛اجل جهزي نفسك ولا تعلمين احد ابد بيصير مشاكل اكيد بعدنا بس لا تلتفتين وراك ابد
سما بلعت ريقها وهزت راسها وساري تقدم لها
مسك يدينها وهمس؛والله مابتشوفين خلاف معاي بس خلي كفوفك بكفوفي
سما ناظرته بحب وهزت راسها:كلمني لاحصلت فرصه
ساري هز راسه ومشى واخذ الفطور من الارض ومشى للمجلس
دخلت سما وهي تناظره وتنهدت ومن لفت بلعت ريقها
فجر همست؛بتروحين؟
سما سحبتها بقوه؛اسكتتي وطي صوتك
فجر ناظرتها بصدمه؛بتهربين من بيت ابوي صاحيه انتي؟
سما:اي بهرب وبياخذني ساري مابي اظل على حالك فجر هو يبيني وانا داريه انه لاراح هناك بينساني
فجر بلعت ريقها؛فكرتك انك تهربين؟
سما:لا
فجر؛وادري انها مي فكرة ساري من قال لساري ياخذك وتهربون؟
سما هزت كتوفها؛مدري بس تكفين فجر خواتي لا يدرون
فجر هزت راسها وهمست؛خذيني معاك
تنهدت سما ومسكت يدينها؛لا تزيدينها علي كفايه ما ادري كيف بروح عنكم واخليكم
فجر:لو تبين نصيحتي روحي ولا تفكرين فينا ابد اهم شي انتي تخرجين من هالحياه اللي احنا فيها
سما هزت راسها؛زين تكفين لو يصير لكم شي بسببي سامحوني
فجر؛ماعليك ياشيخه منا روحي ولا تفكرين
ابتسمت سما لها وفجر ضمتها وبعدت عنها بسرعه؛يالله روحي لا تجي ريحان الحين وتشوفنا
سما هزت راسها ومشت فجر عنها
تنهدت سما وهي تناظرها رايحه حست بالخنقه
وهي تتذكر انها بتنحرم من خواتها بس ماباليد حيله
-
ريحان
اخذت شرشفها وخرجت وهي تلبس نعالها
مشت للزرع واخذت الدلو وهي تسقي وهاديه
:سبقت موعدك اليوم
لفت وناظرته وابتسمت؛مبكر اليوم
جراح ابتسم وتقدم لها؛بشوف كيف تحطين الريحان بالسياره
ريحان رجعت تسقي وهي مبتسمه:لا بما انك بكّرت اليوم مافي ريحان
جراح:افا ولا كباية شاي!
ريحان حطت الدلو ولفت له وناظرت وراها ورجعت ناظرته
وهمست:ماتبي بيينا مواعيد ولقى؟
جراح ابتسم ورفع حواجبه بتفكير:انا ما اعرف تقاليد وعادات لقاكم هنا اللي اعرفه اتصالات ومكالمات
ريحان:لا تقاليدي غير
جراح رفع كتوفه:ليش احسني اعرفك من زمان؟
ريحان ابتسمت:ودي اسولف معاك
جراح لف وراه ورجع ناظرها:اختاري موعد ولقى وبجي واسبقه
ريحان هزت راسها:طيب بس بضيط كباية الشاي واجيك
جراح هز راسه؛انتظرك
مشت من جنبه راجعه للبيت تمشي من بين الزرع
وحط يدينه بجيوبه وابتسم بارتباك
نزل عيونه وناظر الدلو على الارض
ورفع راسه من سمع خطوات وناظر راشد
وقف راشد جنبه وهو يناظر حوالينه:مبّكر اليوم
هز راسه جراح؛حلو الصباح هنا
راشد ناظره وتكلم بهدوء:تدري ياجراح؟ ان خواتي وردات وريحتهم حلوه بس قربك لهم يوجعك تغطي ورداتهم شوك ابوي مغلفهم فيه
جراح ناظره بهدوء وراشد لف له
اخذ نفس وهمس:اذا تبي نصيحتي لا تغرق زي فارس وساري خواتي للغرق
جراح مارد وراشد ابتسم وربت على كتفه ومشى وتركه
عقد حواجبه جراح من كلامه وناظره يفتح للغنم الشبك
لف على صوتها وراه:هاك
ناظرها وناظر الكوب والنعناع يغطيه من فوق
ابتسمت وعقدت حواجبها:ماتبي تاخذه؟
اخذ نفس جراح وهز راسه واخذه:غرفتي تطل على سطحكم لا بغيتي مني شي اشري لي من هناك
ريحان ناظرت حوالينها:نلتقي عند الغنم بنص الليل
جراح هز راسه بالنفي:لا تعالي لبيتنا انتظريني بالدرج وانا بنزل لك
ريحان هزت راسها ومشت بتروح وهمس جراح:لا تتأخرين
ابتسمت ريحان وهزت راسها ومشت راجعه
-
كوثر
طلت من الشباك من سمعت صوت الغنم
وابتسمت من شافته واخذت الصحن من جنبها وخرجت
لبست بوتها ونزلت من الدرج تمشي لطريقه
وقفت من سمعته بهمس بغنا ويحرك العصى قدامه
:تفنن في طروق الحب شرقني وغربني..معك يازين دوخات الهوى وياحل..
وسكت من لف وشافها وراه وبلع ريقه بربكه
ضحكت كوثر؛كمل
ابتسم راشد:وياحلو مشواره
كوثر هزت راسها:لو اعرف هالاغاني كان كملتها
راشد مارد عليها وكوثر نزلت الصحن عند الكلب
وناظرها راشد:لا تجين وتعبين نفسك حطي الصحن عند بيتكم انا اخذه لدواس
كوثر وقفت وناظرته:لا بخاطري انا اعطيه
راشد لف وناظر الغنم ولفت كوثر له:منت زي اللي اعرفهم وحواليني
لف راشد وناظرها وحك جبينه
كوثر:حتى اغانيك اللي تغناها معي زي اللي اسمعها ابد
راشد؛خرابيط تنقال مالها لزوم اصلاً
كوثر:سمعت طيب اللي يقول،جمالك ناهب قلبي وتفكيري ناهيني !
ابتسم بصدمه راشد ولف بجسمه باهتمام لها
وكوثر ابتسمت له وكملت:دلالك يارقيق العود عود تزف اوتاره
راشد؛اثاري اغانيي تنسمع من احد غيري!
كوثر:اطباعك تشبه اطباعي اذا ماتدري
ابتسم راشد وبلع ريقه وصد بعيونه
كوثر اخذت نفس:عالعموم طولت على البيت برجع
راشد مارد ومشت كوثر راجعه
ابتسم راشد وهو يناظرها رايحه وتلف تناظره وترجع تناظر طريقها
همس يكمل ابيات الاغنيه:تولعت بتصانيفك وتعذيبك يولعني..وعلى اي حال راضي بك شمس العمر وانواره
-
سما
فتحت دولابها وهي تناظر ملابسها وتنهدت بضيق
اخذت الشنطه الصغيره من فوق الدولاب
وعبتها اغراضها وحطت الشنطه بالدولاب
صكت عليه بتوتر وسندت ظهرها على الدولاب
ناظرت فراش خواتها واغراضهم
واخذت اوراق على عددهم وماحست الا وهي تكتب لهم
وحده وحده خبتها تحت الشنطه وطلعت من الغرفه
ريحان؛ادور لك تعالي بقولك شي
سما مشت معاها وريحان ابتسمت وهمست لها:لو تدرين من بقابل اليوم؟
سما؛من؟
ريحان ابتسمت؛جراح بقابله الليل
سما انصدمت؛جراح جراح؟
ريحان؛اي جراح جراح
سما؛احلفي شلون؟ بتقابلينه متى؟ليه ماعلمتيني؟
ريحان؛والله ضحكتوا علي يوم اسوي شاهي كل يوم عبالكم لعامل
سما؛وهي لجراح ؟
ضحكت ريحان وهزت راسها
سما:ياحيوانه ليه ماعلمتيني وانا اعلمك كل شي
ريحان اخذت نفس براحه؛علمتك الحين
سما؛خلاص بغطي عليك اليوم
ريحان؛لا ياروحي ما يحتاج انا ذيبه انتي نامي وخليني انا اروح لحالي
سما:صاحيه انتي؟
ريحان؛اي صاحيه خليك مني ساري كلم ابوي؟
سما؛جراح وساري كلموه
ريحان:شقال؟
سما تنهدت:شيقول يعني
ريحان تاففت:شبتسوون طيب بيروح ساري لحاله؟
بلعت ريقها سما؛مدري ما تكلمنا
ريحان؛الله يعين بس
-
الليل
حطت العشاء ريحان والبنات معاها
وهي تعد الساعات وتناظر جراح بين دقيقه ودقيقه
تاففت وهي جالسه عند درج بيتهم تنتظرهم يدخلون
سما ضحكت؛بنت ادخلي مطول ابوي لين ينام
ريحان:اذلفي عني تضحكين!
سما ابتسمت؛امشي ادخلي ارقصي لي
ريحان:مالي خلق
سحبتها سما وريحان دخلت وجلست جنبها بالصاله
سما ناظرتها وابتسمت؛تدرين اني احبك من بين خواتي كلهم؟
ريحان ناظرتها ورفعت حاجبها؛شدعوه نزل عليك غزل فجأه
سما ضحكت:لا جد بخاطري اقولك اني اشتاق لك دايم
ريحان:ايه زين
وقفت ريحان وهي تناظر مع الشباك وضحكت:بنت ابوي جاي
قامت سما ودخلت المطبخ بسرعه وريحان معاها
مر ابوهم من المطبخ ودخل الغرفه ينام
ابتسمت ريحان وناظرت سما؛بنت باخذ شرشفك الابيض تكفين
سما ضحكت؛خذيه
ريحان اخذت الشرشف وناظرتها لجين:على وين؟
ريحان لبست نعالها:مو شغلك خليك بمواعينك
تغطت بالشرشف وطلعت وهي تناظر حوالينها
وقفت عند البيت وهي تناظره بارتباك
جلست على عتبة الدرج وهي تنتظره وكل شي تلتفت
عند جراح
واقف بالصاله ويناظر الشباك ويناظرها جالسه
من ربع ساعه واكثر واقف ويتذكر كلام راشد
وحال فارس وساري وعناد عبدالعزيز
فكر لو صدق تعلق فيها وصار بينهم مشاعر قويه
وهو مرده يرجع للمدينه لشغله وحياته ويتركها
تنهد وقفل الستاره بضيق ولا طلع ولا كلمها
ريحان
وقفت وهي تناظر الباب وعقدت حواجبها
باستغراب طول ولا طلع لها
بلعت ريقها ورفعت يدها بتدق الباب
وترددت وسحبت يدها ونزلت بسرعه من الدرج
ركضت للبيت وهي ماسكه نفسها لا تبكي
كانت تنتظره وتحسب الدقايق عشان تشوفه
وفي النهايه ماجا ولا اعتذر وهي تدري انه
مانام ولا ينام بهالوقت بس ليش ما جا
دخلت البيت ومرت من المطبخ
وطلعت بسرعه لفوق لفت سما بسرعه:شفيها؟
لجين؛شدراني روحي لها
سما طلعت وفتحت الغرفه وناظرتها ترمي الشرشف
وتنسدح:بنام اطلعي
سما:شفيك؟
ريحان ناظرتها:مافيني شي اطلعي وخليني
سما؛صار شي؟ احد شافك؟
ريحان صرخت بوجهها:اطلعي
سما خافت وطلعت وقفلت الباب
ريحان تلحفت وهي تفكر لثواني
حست انها احسن من خواتها وانها لقت
احد يلمها ويهتم فيها وياخذها من ابوها
وللحظه اختفى كل شي عرفت انه مختلف
وغير عن عيال عمتها فكرت انه بيكون زيهم
بس طلع يتسلى وما يشوفها زي ماقالت كوثر
-
جراح
صحى من بدري وناظر الحوش
مافيه الا راشد والغنم حوالينه
تنهد ونزل من الدرج ومشى لسيارته
ناظر الزرع يابس وما انروى
بلع ريقه ولف يناظر حوالينه
ومشى للمجلس ناظر عبدالعزيز
جالس والشاهي عنده يشرب منه
عبدالعزيز:ارحب
ابتسم جراح وجلس جنبه وناظر الشاهي
عبدالعزيز:ماتبي شاهي؟
جراح:لا تسلم ياعمي
دخل ساري وناظر جراح:جراح ابيك شوي
ناظرهم عبدالعزيز ومشى جراح وطلع له
ساري:اسمع اذا ارسلوا لك قبولي علمني ولا تعلم احد غيري
جراح؛ابشر بس وش بتسوي
ساري؛بسوي اللي قاله راشد واللي المفروض ما يصير
جراح تنهد وناظر البيت وناظر ساري:تقدر تقدم لي خدمه؟
ساري:على خشمي
جراح؛تسلم بغيت تطلب من البنات يسوون لي شاهي داخل
ساري هز راسه:ابشر
مشى ساري وجراح رجع وجلس
سما دخلت المطبخ وناظرت ريحان وابتسمت:جراح يبي شاهي
ناظرتها ريحان ورجعت تغسل القدر على الارض
لجين؛اوه الشاهي كل يوم لجراح؟
فجر ضحكت؛قومي سوي له
ريحان؛ماني فاضيه وماني مسويه
سما؛شدعوه؟ خلاص انا اسويه خليك بشغلك
لقمت شاهي سما واخذته وطلعت لبرا
دخلت المجلس وحطته عند جراح؛سَم
جراح ناظرها وناظر الشاهي ومشت سما طالعه
عبدالعزيز؛وليه ماتشرب من شاهيي؟
جراح:حلاه زايد
صب من الابريق وناظر الشاهي
وتافف ودف الصينيه وطلع ومشى للبيت
وقف عند الباب ودقه وانتظر
فتحت سما وناظرته؛هلا جراح
جراح؛نادي لي ريحان
سما؛ماتبي
جراح؛سألتيها؟
سما؛شافتك من ورا الباب وخلتني افتح لك
جراح ناظر الباب ورجع ناظر سما؛ريحان بكلمك
ريحان بلعت ريقها وهي ورا الباب وسما تناظرها
جراح؛تعالي اليوم واوعدك بجيك وبكلمك بس تعالي اليوم
ريحان طلت بعيونها وناظرته؛اذلف عن الباب لا انادي راشد
جراح ناظر سما ورجع ناظرها؛انتي اطلعي اكلمك بالاول
ريحان؛مابيننا كلام اذلف احسن لك
جراح سكت وبعد عن الباب وريحان قفلت الباب ودخلت
سما ناظرتها بصدمه:ليش؟
ريحان؛مالك دخل خليك بحالك
سما مسكتها وناظرتها؛شصار حكيني
ريحان ناظرتها وبلعت ريقها بضيق:ما جا تركني بالحوش نص ساعه ولا جاني وعدني ما يتأخر بس ما جاني
سما تنهدت؛طيب اسمعي منه يمكن نام بدون لا يحس
ريحان؛لا والله انه مالقى اللي يونسه لين يرجع ديرته انا غلطانه
سما ناظرتها بضيق ومشت ريحان عنها
-
تنهد جراح ورجع للبيت وقفل باب غرفته عليه
ناظر السطح من غرفته فاضي ووقف
ومشى للشباك وناظر السطح
عقد حواجبه وهو يشوف قطرات مويه على الشباك
رفع راسه وناطر الدنيا مغيمه وابتسم
طلع من غرفته ولبس حذيانه:امي
خرجت وناظرته؛على وين؟
جراح؛شكله بيجي مطر بطلع مع العيال
الهنوف:لا تتبلل بالمطر تمرض
جراح:طيب طيب
خرج وهو نازل من الدرج والدنيا ترشش
ناظر راشد وفارس واقفين عند المجلس ويناظرون السما
ابتسم ومشى لهم:اخيراً
فارس ابتسم؛مع انه مو وقت المطر الحين بس حمدلله
وقف جنبهم جراح ولابس جاكيته ويناظر الرشاش
على سيارته وعلى الشجر ابتسم وهو يشم ريحته
سمع صوت البنات وراه ولف يناظرهم
ثنتين ورا عبدالعزيز جايين للمجلس ومعاهم اغراض
مروا من جنبه وناظرها من عرفها ولا حطت عينها بعينه ابد
بلع ريقه وصد بظهره ودخلت وجلست عند رجلين عبدالعزيز
سما حطت الراديو جنبه:تبي شي يبَه؟
عبدالعزيز اشرلها وطلعت من جنبهم
لف جراح ناظرها تمسح رجلين عبدالعزيز
مرت سما وناظرت ساري خارج من بيتهم
ناظرها جايته وابتسم:امطرت السما
سما ضحكت ولفت وراها؛ابوي هناك
ساري هز راسه ومشى للعيال وناظر ريحان تمسح عبدالعزيز
جراح دخل وجلس بالمجلي وهو يسترق النظر ويلف للجو
مسحت رجلينه وعبدالعزيز ناظرها؛خلاص
اخذت الشراريب وهي تشربها واخذت الفازلين
وطلعت من المجلس تنهدت بضيق وهي تناظر الجو
ودخلت داخل وارعدت السما وعقدت حواجبها
البتول:صككوا التلفزيون والرادو
سما؛الراديو عند ابوي
البتول:صكي التليفزيون اجل
وقفت ريحان بالشباك وناظرتها سما؛ماكلمك؟
ريحان ناظرتها:قفلي على الموضوع بالله
زاد المطر بصوت عالي وريحان ناظرتها؛راشد الحين يجي عطيه بطانيته
هزت راسها سما واخذتها ووقفت عند الباب تنتظره
عند راشد
ضحك وهو يركض وشماغه على راسه والغنم تركض قبله
دخل البيت وثيابه مبلوله وابتسم من شاف سما تنتظره عند الباب
التم بالبطانيه ودخل الغنم الشبك وقفل الشبك عليها
رجع وجلس عند العتبه وهو متغطي ويناظر المطر
نزل راسه وهو يدفي يدينه ببعض
رفع راسه وناظر البيت جنبه ولمحها من شباكها
فاتحته ومطلعه كفها منه ومبتسمه
ابتسم ووقف ودخل البيت وهو يرتعش من البرد
-
جراح
طلع جواله بيقفله وناظر الرساله وابتسم
وقف وقفل جواله وناظر ساري:وش ودك تتخصص؟
ساري استغرب سؤاله؛لو حطوني رغبتي الاولى طب يسوون خير
جراح ضحك ومد كفه؛مبروك دكتور ساري
ناظر كفه ورجع ناظره وضحك؛احلف انقبلت؟
هز راسه جراح وابتسم فارس وضمه ساري بفرحه
ساري لف لفارس:انا دكتور انا دكتور
فارس:مبروك يادكتور
ساري ضحك وركض لبيتهم وجراح لف لفارس:يبي من اول طب؟
فارس ناظره وهز راسه؛اي وده
جراح؛يالله زين حمدلله
-
راشد
فتح الدولاب وهو يدور بالاشرطه ودخلت ريحان وناظرته
:وش تدور؟
راشد ناظرها:شريط اغنيه اخذتي شي منها
ريحان؛شالطاري الحين
راشد؛خلاص لقيته
ريحان ناظرت الشرطي وضحكت؛لمن؟
راشد ابتسم؛مو شغلك
مر من جنبها وضحكت ريحان
ظلت ثواني بالغرفه بين هدأ المطر وطلت من الشباك
ناظرته ماشي وراجع بيتهم وجاكيته على كتوفه
اخذت شرشفها ولبسته وطلعت من البيت
وهي تلبس نعالها وتمشي لناحية البيت
ناظرته طالع اخر درجه للبيت ويطلع المفتاح
وتكلمت بصوت عالي:لا تلمس المفتاح وسط المطر
لف وناظرها اخر الدرج وابتسم تلقائياً:وليه؟
طلعت درجه درجه:وحده ماتت بالبرق من مفتاح
هز راسه وحظ المفتاح بجيبه ووقف ينتظرها توصل
وقفت تحته بدرجه وناظرته:ماني جايه ادور ملام ابد
جراح؛اجل ليش جايه؟
ريحان:فقدت الريحان وماسقيته اليوم ابد
جراح تكى بيده وناظر الريحان :الريحان هناك ماهو هنا
ريحان ناظرته ثواني وهمست؛هات عذرك
جراح ناظرها ورجع ناظر الغيم:يقول راشد انكم شوك حوالين ورد وابوك اللي مغلفكم
ريحان عقدت حواجبها:راشد؟
هز راسه جراح؛راشد وقال لساري بعد انه ياخذ سما ويهرب
انصدمت ريحان وصدت وهي مصدومه وتفكر
جراح:ولو تدرين اني انتظرتك لين تروحين بيتكم بشباكي
ريحان ناظرته وهزت راسها:طلعت جبان؟ تخاف من وخز شوكه؟
جراح ابتسم؛ما خفت من وخز شوكه خفت من جمال الورد
ريحان رفعت حواجبها وتكت بيدها تناظره
جراح:يقولك راعي الورد يموت من لونه والا الشوك ينزاح
ريحان نزلت راسها ثواني ورجعت ناظرته
جراح نزل درجه ووقف جنبها واخذ نفس:مابي اخليك بعد ما ينباع البيت وادري انك بتتعلقين فيني ويمكن انا اتعلق فيك
ريحان تجمعت الدموع بعيونها وهزت راسها
:صادق،مردك لبنات ديرتك وانا مردي اسقي الريحان لا يموت
جراح والجو غيم وبارد ورشاش المطر على جبينها
رفع يده وسحب طرف شرشفها وناظر وجهها وابتسم
ناظرته ريحان وابتسامته على وجهه وبلعت ريقها
همست:تقول عكس اللي سويته
جراح رفع كتوفه وهو يناظرها:تصرفاتي غصب عني
ريحان نزلت راسها وهي تلف وجهها بطرف الشرشف
وجراح تقدم لها؛تعالي اليوم وبطلع اتكلم معاك
ريحان:تعالي اليوم؟ وبتجلس تنتظرني في شباكك!
جراح تنهد:لا هالمره عند كلمتي بتكلم معاك
ريحان ناظرته وهزت راسها بالنفي:اسفه
نزلت من الدرج وناظرها جراح رايحه؛انا بجيك
لفت وناظرته ورجعت مشت للبيت ودخلت
وهو يناظرها لين راحت وتنهد ودخل البيت
-
المغرب
راشد
خبى بجيبه الشريط وهو يناظر البيت وجالس عند المجلس
انتطر وهو يناظر الارض ويرجع يناظر البيت
انفتح الباب ووقف بربكه وهو يناظرها تخرج
وتمشي لنايحة بيتهم جا بيمشي لها ورجع خطوه
وصد وتافف ومسك راسه وتلفت حوالينه
مشى للبيت ودخل وسمع اصواتهم بالمطبخ
نادى بصوته:فجر
قامت ومشت له وهي تاكل :هاه
راشد طلع الشريط من جيبه:عطيه اممء
فجر هزت راسها:اعطيه من؟
راشد:عطيه اخت راشد قصدي جراح شفيني
فجر ضحكت بصدمه؛شفيك تهذي؟
راشد:جراح طلبني الشريط واعطيه اخته توصله له
فجر هزت راسها واخذته منه ومشت للمطبخ
دخلت وناظرتها كوثر
رمت الشريط بحظنها وناظرته كوثر:شذا؟
فجر؛راشد يقول عطيه اخوك طلبه
ناظرت الشرطي كوثر وعقدت حواجبها
سما ناظرت الشريط:وليه ماي يعطيه جراح!
فجر:مدري عن راشد
كوثر ابتسمت:لا عادي خلاص انا اوصله لجراح
وقفت وناظرتها فجر:اجلسي انتطري خبزة لجين
كوثر؛ثواني وارجع
مشت بالشريط وطلعت وهي تناظر حولها
ناظرته جالس عند دواس ويحط الاكل قدامه
وقفت عنده وابتسمت وهي تناظره يمسح على راسه
تكلمت من وراه:ماهي نجاسه؟
لف وناظرها واقفه ووقف ورجع ناظر دواس:دواس قريب مني ما ارضى يتسمى بهالاسم
كوثر ناظرته وناظرت دواس ياكل:بس لا تنكر انها انجس الحيوانات
راشد:يمكن انتم تشوفونه كذا بس ابد ما اشوفه نجس
كوثر طلعت الشريط من جيبها وناظرته؛جراح ما يسمع هالاغاني
ناظر الشريط وبلع ريقه راشد:اوه يمكن لخبطت بغيت اعطيه سارس فارس قصدي
ابتسمت كوثر وعقدت حواجبه:فارس؟ والا سارس؟
ضحك بربكه راشد واخذ الشريط من يدها بسرعه:نسيت من هاتيه
ناظرت الشريط ورجعت ناظرته:اذا ناسي من تعطي عطني اياه بسمع الاغنيه
ناظرها وهز راسه بالنفي:لا
كوثر ابتسمت؛لا! شدعوه بسمعها وارجع لك الشريط
راشد تنهد ومد لها الشريط وناظرته كوثر وخبته بجيبها
:اذا تبي تعطيني شي خله عند باب بيتنا
راشد ناظرها ومشت راجعه للبيت وهو حك جبينه
جلس على الصخره عند دواس واخذ نفس
دخلت كوثر البيت وابتسمت وهي تناظر الشرييط
تدري انه لها بس ليه ارتبك وغلط باسماء كثيره!
-
الساعه 1:00 ص
ريحان
واقفه بالشباك وتناظره جالس على درج بيتهم
ويناظر ساعته بيده ويهز رجله بتوتر
ابتسمت واخذت شرشفها وطلعت بصوت منخفض
فتحت البيبان ونزلت بالحوش وهي مبتسمه
وقف من شافها جايه ورفع حاجبه:قاصده تتأخرين
ريحان:لا ابد انتظرت خواتي ينامون
جراح واقف ويناظرها جلست جنبه
ورفعت راسها له؛شفيك؟
جراح؛بنقعد هنا؟
ريحان:اجل وين؟
جراح؛نتمشى بسيارتي
ريحان ضربت خدها؛بيشغل السياره ما تدري ان اذون ابوي قويه!
جراح جلس جنبها وناظر قدامه ثواني
ناظرته ورجعت ناظرت قدام:عاجبتك الحياه هنا؟
جراح ناظرها وهز راسه؛اي مرتاح بعيد عن الشغل والزحمه
ريحان ناظرت اللي قدامها ولف جراح لها؛وانتي عاجبتك؟
ريحان:تعودت
جراح ظل يناظرها بفضول:طيب كيف تقضين ايامك هنا؟
ريحان ابتسمت:يعني بين خواتي والشغل ارقص
ابتسم وهز راسه:اثاريك الجنيه اللي ترقص دايم!
ريحان ناظرته ورجعت ناظرت اللي قدامها:هذيك انا
جراح ناظر اللي قدامه وتكلم:ما احب الليل ابد لو تكون مواعيدك ولقياك بالصبح
ريحان:الصبح اهلي موجودين ما اقدر
نزل راسه جراح وناظرها؛من سمَاك؟
ريحان ابتسمت؛ابوي واذا بتسأل عن اسماء خواتي فهو بعد سماهم
جراح عقد حواجبه:سما وفجر اساميهم قريبه منك بس لجين!
ريحان:اي لجين اللي ولدت امي وقتها كانت معتمره ساكنه تحت وحلف ابوي يسمي عليها
جراح:اكبركم؟
هزت راسها ريحان؛اي
جراح مل من السوالف والرسميه بالكلام
ولف لها وابتسم؛اكذب عليك او قلت ما طفشت من عاداتك باللقى
ريحان هزت كتوفها؛هذي هي واذا طفشت اروح انام افضل
جراح وقف وناظرها؛تعالي معاي
ريحان ناظرته:وين؟
جراح؛ما بناخذ السياره بس بنطلع تعالي
ابتسمت بضحكه ومشت وراه وجراح مشى
فتح باب البوابه وريحان تناظر وراها؛لا تصقع
جراح فتح الباب وخرج واشر لها وطلعت
واول مره تطلع من بيتهم بهالوقت
مشى جراح وهو يلف يناظرها:يالله
رفعت شرشفها وهي تمشي بنفس طريقه
وقف نهاية الطريق فوق الجبل ووقفت جنبه
وضحكت من شدة الهواء وصوت الرياح
جراح لف لها:عندكم هالمكان ومحبوسين بالبيت؟
ريحان:الليل يخوف الحين اكيد مليان الجبل xxxxب وذياب
جراح اخذ نفس وهو يناظر الجبل والسماء سوداء صافيه
ريحان ماسكه شرشفها وتناظر المكان وتلف تناظر حولها
جراح:تدرين احس هالمكان ربي ارسلني عليه لحكمه
ريحان ناظرته؛ليه؟
جراح؛احس كل شي مختلف عن هناك الاكل والنوم
لف ناظرها وكمل:والبنات
ريحان ابتسمت وهزت كتوفها:اكيد هنا اسوأ
جراح؛هنا انقى واصفى واحلى
ريحان ابتسمت ولفت تناظر السما
جراح؛مدري ليش منتي مقتنعه انك جميله ونادره؟
ريحان؛محد قال لي عشان اقتنع
جراح ابتسم وهو يناظر عيونها؛الحناني ماغير اللي بكفوفك قادره تجمّلك
ريحان ناظرت اصابعها ورجعت ناظرته
جراح ناظرها من فوق لتحت:ويوم كشفت الوجه كان مثل ما تخيلته حُكم
ريحان نزلت راسها وهي مبتسمه
وجراح ناظر حياها وابتسم:مابي ابطي عليك خلينا نرجع
ريحان هزت راسها ولفت تناظر البيت من بعيد:اي ابوي وقته يصلي الوتر
جراح تقدم قبلها وهو ماشي للبيت ووقفت عند الباب
لف لها وابتسم:ما اوصيك على الريحان
ريحان هزت راسها ومشت من جنبه راجعه للبيت
دخلت وابتسمت ومسكت صدرها وهي تتنهد
غمضت عيونها وعضت شفتها ودخلت للغرفه
اما جراح
رجع البيت ودخل غرفته وقفل الباب
ابتسم وهو يناظر البيت من شباكه
قفل انوار الغرفه وتلحف ونام