[فيتامين سي]

_ ﻋﻨﻔﻮﺍﻥ ﺃﻣﺮﺃﺓ _
‏( ﺑﻘﻠﻢ ﺑﺴﻤﺔ ﺍﻟﺒﻴﺎﺗﻲ ‏)
_ ﺍﻟﺒﺎﺭﺕ ﺍﻟﺜﺎﻟﺚ _


ﺑﺎﺟﺮ ﺍﺭﺑﻌﻴﻨﻴﺔ ﺑﺎﺑﺎ ﻋﻤﺎﺗﻲ ﻭﺑﻌﺾ ﻣﻦ ﺍﻗﺎﺭﺑﻨﺔ ﻣﻦ ﺍﻟﻴﻮﻡ ﺍﺟﻮﻱ ﻳﻤﻨﺎ ﻷﻥ ﻣﻦ ﺍﻟﻔﺠﺮ ﻧﻄﻠﻊ ﻟﻠﻨﺠﻒ ﺣﺘﻰ ﻧﺮﺟﻊ ﻗﺒﻞ ﺍﻟﻐﺪﺍ ﻻﻥ ﻣﺴﻮﻳﻦ ﺛﻮﺍﺏ ﻋﻠﻰ ﺭﻭﺣﺔ
ﻣﺮﺓ ﻋﻤﻮ ﺣﺎﺗﻢ ﻭﺧﺎﻟﺘﻲ ﺍﻡ ﺍﺣﻤﺪ ﺭﺍﺡ ﻳﺒﻘﻮﻥ ﺑﺎﻟﺒﻴﺖ ﻋﻠﻤﻮﺩ ﺍﻟﻄﺒﺦ
ﺻﺎﺭﺕ ﺳﺎﻋﺔ 11 ﺑﺎﻟﻴﻞ ﻃﻠﻌﺖ ﻟﻠﺤﺪﻳﻘﺔ ﻋﻨﺪﻧﺎ ﻣﺮﺟﻮﺣﺔ ﺻﻐﻴﺮﺓ ﺟﻮﺓ ﺷﺠﺮﺓ ﺍﻟﻨﺎﺭﻧﺞ ﻫﺬﺍ ﻣﻜﺎﻧﻲ ﻣﻦ ﺍﺧﺘﻨﻚ ﺍﻃﻠﻊ ﺍﻛﻌﺪ ﺍﻫﻨﺎﻙ
ﻛﻌﺪﺕ ﻣﻜﺮﻓﺼﺔ ﻭﻣﺨﻠﻴﺔ ﺭﺍﺳﻲ ﺑﻴﻦ ﺭﺟﻠﻲ
ﺻﺎﺭﺕ ﺣﺮﻛﺔ ﻳﻤﻲ ﺭﻓﻌﺖ ﺭﺍﺳﻲ ﻣﻬﻨﺪ ﻭﺍﻛﻒ ﻛﺪﺍﻣﻲ
ﺍﺟﺔ ﻛﻌﺪ ﺑﺼﻔﻲ
.. ﻭﻟﺞ ﻭﺍﻟﻠﻪ ﺑﺎﺭﺩﺓ ﻭﺍﻧﺘﻲ ﻣﻌﻨﺪﺝ ﻣﻨﺎﻋﺔ ﺑﺴﺮﻋﺔ ﺗﺘﻤﺮﺿﻴﻦ ﻳﻮﻣﻴﺔ ﺑﺎﻟﻴﻞ ﺍﻟﻜﻴﺞ ﺍﻫﻨﺎ
... ﻭﺍﻧﺖ ﺷﻜﻮ ﺗﺮﺍﻗﺒﻨﻲ ﺍﺫﺍ ﺑﺮﺩﺍﻥ ﻃﺐ ﺟﻮﺓ ﻣﻌﻠﻴﻚ ﺑﻴﻪ
... ﻋﻮﺑﺔ ﺩﺍﺣﺠﻲ ﻋﻠﻤﻮﺩﺝ ﺑﺎﺟﺮ ﻭﺭﺍﺝ ﻃﺮﻳﻖ ﻣﻮ ﻭﻗﺘﻬﺎ ﺍﺫﺍ ﺗﺘﻤﺮﺿﻴﻦ
... ﻣﺨﻨﻮﻛﺔ ﻛﻮﻟﺸﻲ ﺑﺎﻟﺒﻴﺖ ﻳﺨﻨﻜﻨﻲ ﻛﻞ ﺭﻛﻦ ﺑﻲ ﻳﺬﻛﺮﻧﻲ ﺍﺑﺎﺑﺎ
... ﺍﻭﻭﻭﻭﻑ ﺍﻟﻠﻪ ﻳﺮﺣﻤﻪ ﺩﺍﻧﻴﺔ ﻫﺎﻱ ﺣﺎﻝ ﺍﻟﺪﻧﻴﺎ ﻛﻠﻨﺎ ﻋﻠﻰ ﻫﺬﺍ ﺍﻟﻄﺮﻳﻖ ﺣﺎﻭﻟﻲ ﺗﺘﻌﻮﺩﻳﻦ ﺍﻟﻠﻪ ﺍﻧﻄﺎﻧﺔ ﻧﻌﻤﺔ ﺍﻟﻨﺴﻴﺎﻥ ﺻﺢ ﺑﺎﻟﺒﺪﺍﻳﺔ ﻧﺘﻌﺬﺏ ﺑﺲ ﺑﻌﺪﻳﻦ ﺷﻮﻳﺔ ﺷﻮﻳﺔ ﻧﻨﺴﻰ ﻭﻧﺘﻌﻮﺩ
... ﻻ ﺍﺑﺪ ﻣﺴﺘﺤﻴﻞ ﺍﻛﺪﺭ ﺍﻧﺴﻰ ﻟﻚ ﺑﻌﺪﻧﻲ ﻟﻬﺴﻪ ﺍﺳﻤﻊ ﺻﻮﺗﺔ ﻳﺼﻴﺤﻨﻲ ﻭﺍﻓﺰ ﻣﺜﻞ ﺍﻟﻤﺨﺒﻠﺔ ﺍﺩﻭﺭ ﻋﻠﻴﻪ
ﻣﻬﻨﺪ ﻗﻠﺒﻲ ﻣﻔﺮﻛﺲ ﻣﺎ ﺍﻋﺮﻑ ﺷﻠﻮﻥ ﺑﻌﺪﻧﻲ ﻋﺎﻳﺸﺔ ﻟﻬﺴﻪ
... ﺑﺎﻟﻌﺒﺎﺱ ﮔﻠﺒﻲ ﻳﻮﺟﻌﻨﻲ ﻋﻠﻴﺞ ﻭﺃﺷﺒﻊ ﻗﻬﺮ ﻣﻦ ﺃﺷﻮﻓﺞ ﻫﻴﺠﻲ ﺍﺭﻳﺪ ﺩﺍﻧﻴﺔ ﺍﻟﻘﺪﻳﻤﺔ ﺗﺮﺟﻊ ﺑﺸﻘﺎﻫﺎ ﻭﺿﺤﻜﻬﺎ ﻭ ﻭﻛﺎﺣﺘﻬﺎ
... ﻣﺴﺘﺤﻴﻞ ﺍﺭﺟﻊ ﻣﺜﻞ ﻗﺒﻞ ﻛﻮﻟﺸﻲ ﺣﻠﻮﺓ ﺑﻬﺎﻱ ﺍﻟﺪﻧﻴﺎ ﻣﺎﺕ ﻭﻳﺎ ﺑﺎﺑﺎ
.. ﺍﺟﺘﻲ ﻋﻤﺘﻲ ﺍﻟﻮﺳﻄﺎﻧﻴﺔ ﺯﻫﺮﺍﺀ ﻛﻌﺪﺕ ﻳﻤﻨﺎ ﺷﺎﻓﺘﻨﻲ ﺍﺑﺠﻲ ﺍﺧﺬﺗﻨﻲ ﺍﻟﺤﻀﻨﻬﺎ ﻭﺑﺠﺖ ﻭﻳﺎﻱ
... ﻳﻼ ﺣﺒﻴﺒﺘﻲ ﺗﻌﺎﻟﻲ ﺍﻧﻄﺐ ﺟﻮﺓ ﺣﺘﻰ ﺗﻨﺎﻣﻴﻦ ﻭﺭﺍﻧﺎ ﻛﻌﺪﺓ ﻣﻦ ﺍﻟﻔﺠﺮ
.. ﻫﺰﻳﺖ ﺭﺍﺳﻲ ﺑﺎﻟﻤﻮﺍﻓﻘﺔ ﻛﻤﺖ ﻭﻳﺎﻫﺎ
ﺩﺧﻠﺖ ﻟﻔﺮﺍﺷﻲ ﺍﻛﺬﺏ ﺍﺫﺍ ﻛﺘﻠﻜﻢ ﻛﺪﺭﺕ ﺍﻧﺎﻡ ﺷﺎﻳﻠﺔ ﻫﻢ ﺷﻠﻮﻥ ﺭﺍﺡ ﺍﻛﺪﺭ ﺍﺷﻮﻓﺔ ﻭﻫﻮ ﺟﻮﺓ ﺍﻟﺘﺮﺍﺏ
ﺍﻟﻔﺠﺮ ﺍﻟﻜﻞ ﻛﻌﺪﻭﺍ ﻳﺘﺤﻈﺮﻭﻥ ﻛﻤﺖ ﻏﺴﻠﺖ ﺍﻧﻲ ﻻﺑﺴﺔ ﺩﺷﺪﺍﺷﺔ ﺳﻮﺩﺓ ﻟﺒﺴﺖ ﻓﻮﻛﺎﻫﺎ ﺻﺎﻳﺔ ﻫﻢ ﺳﻮﺩﺓ ﻭﺣﺠﺎﺏ
ﺍﻧﻲ ﻣﻮﻣﺤﺠﺒﺔ ﺑﺲ ﻣﻦ ﺃﺭﻭﺡ ﺯﻳﺎﺭﺓ ﺍﻟﺒﺴﺔ ﺍﺧﺬﺕ ﺍﻟﻌﺒﺎﻳﺔ ﻭﻟﻮ ﻣﺎ ﺍﻋﺮﻑ ﺍﻟﺒﺴﻬﺎ ﺑﺲ ﺧﻠﻴﺘﻬﺎ ﻳﻤﻲ
ﺻﻌﺪﻧﺎ ﺑﺎﻟﺴﻴﺎﺭﺍﺕ ﻭﻃﻠﻌﻨﺎ ﻛﻠﻤﺎ ﻧﻘﺘﺮﺏ ﻣﻦ ﺍﻟﻨﺠﻒ ﺩﻛﺎﺕ ﻗﻠﺒﻲ ﺍﺗﺰﻳﺪ ﺳﺎﻋﺔ ﺳﺘﺔ ﺍﻟﺼﺒﺢ ﻭﺻﻠﻨﺎ
ﺩﺧﻠﻨﺎ ﺍﻟﻮﺍﺩﻱ ﺍﻟﺴﻼﻡ ﻣﻜﺎﻥ ﺍﻟﻐﻮﺍﻟﻲ ﻭﺍﻷﺣﺒﺎﺏ
ﻭﻛﻔﺖ ﺍﻟﺴﻴﺎﺭﺓ ﻭﻧﺰﻟﻮﺍ ﺍﺟﺘﻲ ﻋﻤﺘﻲ ﻟﺰﻣﺖ ﺍﻳﺪﻱ ﻧﺰﻟﺘﻨﻲ
ﻣﻦ ﺑﻌﻴﺪ ﺷﻔﺖ ﻗﺒﺮ ﺣﺒﻴﺒﻲ ﻭﻧﻮﺭ ﻋﻴﻮﻧﻲ ﺑﻴﺒﻲ ﻭﻣﺎﻣﺎ ﻭﻋﻤﺎﺗﻲ ﺷﻤﺮﻭﺍ ﺭﻭﺣﻬﻢ ﻋﻠﻰ ﻗﺒﺮﻩ ﺣﻀﻨﻮﺍ ﻭﻳﺒﺠﻮﻥ ﺍﻧﻲ ﻭﺍﻛﻔﺔ ﺑﻌﻴﺪ ﻣﻌﻨﺪﻱ ﺟﺮﺍﺀﺓ ﺍﻗﺘﺮﺏ
ﻋﻤﻮ ﺣﺎﺗﻢ ﻋﻴﻮﻧﺔ ﺣﻤﺮ ﺍﺟﺔ ﻃﺒﻄﺐ ﻋﻠﻰ ﻛﺘﻔﻲ ﻛﺎﻟﻲ ﺷﻨﻮ ﻣﺘﺮﻳﺪﻳﻦ ﺗﻜﻌﺪﻳﻦ ﻳﻤﻪ ﻭﺗﺤﺠﻴﻦ ﻭﻳﺎ
ﻣﻦ ﻛﺎﻝ ﻫﻴﺞ ﺷﻬﻜﺖ ﺑﻘﻬﺮ ﺭﻛﻀﺖ ﺷﻤﺮﺕ ﺭﻭﺣﻲ ﻋﻠﻰ ﻗﺒﺮﻩ ﺍﺑﻮﺱ ﺑﺘﺮﺍﺑﺔبيج قصص عراقيه حقيقيه من واقعنا.روعه الطائي
ﺑﺎﺑﺎ ﻛﻮﻭﻭﻭﻭﻭﻡ ﺍﻟﻤﻨﻮ ﻋﻔﺘﻨﻲ ﺍﻧﻲ ﺑﻌﺪﻙ ﺍﺿﻴﻊ ﻭﺍﻟﻠﻪ ﺍﺿﻴﻊ
ﻟﻮ ﺗﺎﺧﺬﻧﻴﻴﻲ ﻳﻤﻚ ﻟﻮ ﺗﻜﻮﻡ ﻭﻳﺎﻱ ﻟﻮﻳﺸﺸﺸﺸﺶ ﺧﻠﻴﺘﻨﻲ ﻫﻠﻜﺪ ﺍﺗﻌﻠﻖ ﺑﻴﻚ ﺍﺫﺍ ﻧﺎﻭﻱ ﺗﻌﻮﻓﻨﻲ ﻣﺠﺎﻱ ﺍﻛﺪﺭ ﺍﺗﺤﻤﻞ ﻓﺮﺍﻛﻚ ﻛﻮﻭﻭﻭﻭﻭﻭﻡ ﺣﺒﻴﺒﻲ ﻛﻮﻡ
ﺍﻟﻜﻞ ﻳﺒﺠﻮﻥ ﻋﻠﻰ ﺑﺠﻴﻲ ﺑﺎﻟﻜﻮﺓ ﺷﺎﻟﻮﻧﻲ ﻣﻦ ﻓﻮﻙ ﺍﻟﻘﺒﺮ
ﺟﺪﻭ ﻛﺎﻝ ﺍﺧﺬﻭﻫﺎ ﺧﻠﻲ ﺗﺰﻭﺭ ﺍﺑﻮ ﺍﻟﻴﺘﺎﻣﻰ ﺑﺎﻟﻜﻲ ﮔﻠﺒﻬﺎ ﺷﻮﻳﺔ ﻳﺒﺮﺩ
ﺍﺧﺬﻭﻧﻲ ﺍﻟﻤﻮﻻﻱ ﺍﻣﻴﺮ ﺍﻟﻤﺆﻣﻨﻴﻴﻦ ﺟﺎﻧﻮﺍ ﻻﺯﻣﻴﻨﻲ ﻣﻦ ﺍﻳﺪﻱ ﺍﻣﺸﻲ ﺑﺪﻭﻥ ﻭﻋﻲ
ﻣﻦ ﺩﺧﻠﺖ ﺍﻟﺤﻀﺮﺗﺔ ﺯﺭﺕ ﻭﺍﻧﻲ ﺣﺘﻰ ﺩﻋﺎﺀ ﻣﺎ ﺍﻛﺪﺭ ﺍﺩﻋﻲ ﺷﺒﻪ ﻓﺎﻗﺪﺓ
ﻛﻤﻠﻨﺎ ﺯﻳﺎﺭﺓ ﻭﺭﺟﻌﻨﺔ ﻟﻠﺴﺎﻋﺔ ﺛﻨﺘﻴﻦ ﺍﻟﻈﻬﺮ ﻳﻼ ﻭﺻﻠﻨﺎ ﺑﻐﺪﺍﺩ
ﺧﺎﻟﺘﻲ ﻭﺍﻟﻨﺴﻮﺍﻥ ﻣﺴﻮﻳﻦ ﺍﻟﻐﺪﺍ ﻭﻣﻮﺯﻋﻲ ﺍﻧﻲ ﺣﻴﻞ ﻣﺎﺑﻴﺔ
ﺭﻏﻢ ﻣﻼﺑﺴﻲ ﻛﻠﻬﺎ ﺗﺮﺍﺏ ﺣﺘﻰ ﻣﻐﻴﺮﺗﻬﻢ ﻭﻻ ﻏﺴﻠﺖ ﺩﺧﻠﺖ ﻟﻠﻔﺮﺍﺵ ﻭﺟﺮﻳﺘﻬﺎ ﻧﻮﻣﺔ ﻣﺎ ﺍﻋﺮﻑ ﻧﻤﺖ ﻟﻮ ﻓﻘﺪﺕ ﺍﻟﻮﻋﻲ ﻟﻠﻤﻐﺮﺏ ﻳﻼ ﻛﻌﺪﻭﻧﻲ
ﺧﺎﻟﺔ ﻭﻓﺎﺀ ﺍﺧﺬﺗﻨﻲ ﻟﻠﺤﻤﺎﻡ ﻫﻲ ﺑﻴﺪﻫﺎ ﺳﺒﺤﺘﻨﻲ ﻭﻟﺒﺴﺘﻨﻲ ﻣﻼﺑﺴﻲ ﻭﺟﺎﺑﺘﻠﻲ ﺍﻷﻛﻞ ﺗﺘﻮﺳﻞ ﺑﻴﻪ ﺣﺘﻰ ﺍﻛﻞ ﻣﺤﺒﻴﺖ ﺃﻛﺴﺮ ﺧﺎﻃﺮﻫﺎ ﺍﻛﻠﺖ ﺷﻮﻳﺔ ﻭﺭﺟﻌﺖ ﻧﻤﺖ
ﻣﺮﺕ ﺍﻷﻳﺎﻡ ﻛﻠﻬﺎ ﺷﺒﻪ ﺑﻌﺾ ﻣﺎﺑﻴﻬﺎ ﺍﻱ ﻓﺮﺡ
ﻋﻠﻲ ﻣﺘﺮﻙ ﺩﺭﺍﺳﺘﺔ ﺟﺎﻥ ﺳﺎﺩﺱ ﺭﺟﻊ ﻳﺪﺍﻭﻡ ﺑﺘﻮﻝ ﻭﺩﻳﻤﺎ ﻫﻢ ﻳﺪﺍﻭﻣﻦ
ﺑﺲ ﺍﻧﻲ ﺣﺎﺑﺴﺔ ﺭﻭﺣﻲ
ﻣﺎﻣﺎ ﺭﺟﻌﺖ ﺗﺼﺮﻑ ﻋﺎﺩﻱ ﻭﺗﻌﻮﺩﺕ ﻋﻠﻰ ﻓﺮﺍﻙ ﺑﺎﺑﺎ
ﻣﻬﻨﺪ ﺍﺑﺪ ﻣﻌﺎﻓﻨﻲ ﻳﻮﻣﻴﺔ ﻳﺠﻲ ﻳﻤﻲ ﻳﻈﻞ ﻳﺴﻮﺍﻟﻒ ﻭﻳﺎﻱ ﻳﺤﺎﻭﻝ ﻳﻄﻠﻌﻨﻲ ﻣﻦ ﻛﺎﺑﺘﻲ
ﻫﻮ ﻭﺣﻴﺪﺭ ﻳﻮﻣﻴﺔ ﻳﺠﻴﺒﻮﻥ ﺟﻴﺲ ﻣﺘﺮﻭﺱ ﺣﻠﻮﻳﺎﺕ ﺍﻟﻲ ﻭﻟﻠﺒﻨﺎﺕ
ﺣﺎﻧﻮﺍ ﻫﻮﺍﻳﻪ ﺣﻨﻴﻨﻴﻦ ﻋﻠﻴﻪ
ﺍﻧﻲ ﻭﺑﻴﺒﻲ ﺍﺧﺬﻧﺎ ﻫﺪﻧﺔ ﻣﻦ ﺍﻟﻌﺮﻛﺎﺕ ﺑﻴﻨﺎ ﺛﻨﻴﻨﺎ ﺟﺎﻥ ﻗﻠﺒﻨﺎ ﻣﻜﺴﻮﺭ
ﺧﻠﺼﺖ ﺍﻟﺴﻨﺔ ﺍﻟﺪﺭﺍﺳﻴﺔ ﻋﻠﻲ ﻭﻣﻬﻨﺪ ﺟﺎﻧﻮﺍ ﺳﺎﺩﺱ ﺍﺛﻨﻴﻨﻬﻢ ﻃﻠﻌﻮﺍ ﻧﺎﺟﺤﻴﻦ
ﻋﻠﻲ ﺍﺟﺔ ﻋﻠﻰ ﺟﺪﻭ ﻛﺎﻟﻪ
ﻳﺎﺑﺔ ﺍﺭﻳﺪ ﺍﻗﺪﻡ ﻋﻠﻰ ﻛﻠﻴﺔ ﺍﻟﺸﺮﻃﺔ ﺍﻭ ﺍﻟﻌﺴﻜﺮﻳﺔ
ﻣﺎﻣﺎ ﻣﻘﺒﻠﺖ ﻻﻥ ﺍﻟﻮﺿﻊ ﻣﻮﺯﻳﻦ ﻭﺗﺨﺎﻑ ﻋﻠﻴﻪ ﻟﻜﻦ ﻫﻮ ﻇﻞ ﻣﺼﻤﻢ
ﺟﺪﻭ ﻛﺎﻟﺔ ﺍﺫﺍ ﻫﺬﺍ ﺣﻠﻤﻚ ﻋﺎﺩﻱ ﻗﺪﻡ ﻳﻠﻮﻛﻠﻚ ﺗﺼﻴﺮ ﺿﺎﺑﻂ
ﺍﺣﻤﺪ ﻋﺠﺒﺘﺔ ﺍﻟﻔﻜﺮﺓ ﻭﻫﻮ ﺍﺻﻼ ﻣﻴﺤﺐ ﻛﻠﻴﺘﺔ
ﻛﺎﻝ ﺍﻧﻲ ﻫﻢ ﺍﺗﺮﻙ ﻛﻠﻴﺘﻲ ﻭﺍﻗﺪﻡ ﻭﻳﺎﻙ
ﺑﺲ ﻧﺤﺘﺎﺝ ﻭﺍﺳﻄﺔ ﻻﻥ ﻣﻮﻛﻞ ﺍﺳﻢ ﻳﻄﻠﻊ
ﺟﺪﻭ ﻛﺎﻝ ﺍﻧﻲ ﺍﺭﻭﺡ ﺍﻟﺸﻴﺦ ﺍﻟﻌﺸﻴﺮﺓ ﻋﻨﺪﻩ ﻣﻌﺎﺭﻑ ﻫﻮﺍﻱ ﺑﻠﻜﻲ ﻳﻜﺪﺭ ﻳﺘﻮﺳﻄﻠﻜﻢ
ﺛﺎﻧﻲ ﻳﻮﻡ ﺟﺪﻭ ﺍﺧﺬ ﺍﺣﻤﺪ ﻭﻋﻠﻲ ﻭﺭﺍﺣﻮﺍ ﻟﻠﺸﻴﺦ
ﺍﻟﺸﻴﺦ ﻳﺤﺐ ﺟﺪﻱ ﻭﻳﺮﻳﺪ ﺧﺎﻃﺮﺓ ﻛﺎﻟﺔ ﺧﻠﻲ ﻳﻘﺪﻣﻮﻥ ﻭﺗﺪﻟﻞ
ﻗﺪﻣﻮﺍ ﻋﻠﻰ ﻛﻠﻴﺔ ﺍﻟﺸﺮﻃﺔ ﺟﺪﻭ ﺟﺎﻥ ﻳﻮﻣﻴﺔ ﻣﺴﻮﻱ ﻋﺰﻳﻤﺔ ﺍﻟﻤﻌﺎﺭﻑ ﺍﻟﺸﻴﺦ ﻣﻦ ﻏﻴﺮ ﺍﻟﻬﺪﺍﻳﺔ
ﻛﻮﻣﺔ ﺻﺮﻑ ﻋﻠﻴﻬﻢ
ﻭﻣﻦ ﻃﻠﻌﺖ ﺍﻟﻘﺒﻮﻻﺕ ﺍﺣﻤﺪ ﻭﻋﻠﻲ ﺍﺛﻨﻴﻨﻬﻢ ﺍﻧﻘﺒﻠﻮﺍ
ﻭﺭﺟﻊ ﺟﺪﻭ ﺍﺧﺬ ﻫﺪﺍﻳﺔ ﺿﺨﻤﺔ ﻟﻠﺸﻴﺦ ﻭﻣﻌﺎﺭﻓﺔ
ﻣﻬﻨﺪ ﺭﺍﺩ ﻳﻘﺪﻡ ﻭﻳﺎﻫﻢ ﺑﺲ ﺍﺑﻮ ﻭﺍﻣﻪ ﻣﻘﺒﻠﻮﺍ
ﻃﻠﻊ ﻗﺒﻮﻟﺔ ﻫﻨﺪﺳﺔ ﻣﺪﻧﻴﺔ
ﺑﺘﻮﻝ ﺭﺍﺣﺖ ﺭﺍﺑﻊ ﺍﻋﺪﺍﺩﻱ ﻭﺍﻧﻲ ﻋﺪﺕ ﺍﻟﺴﻨﺔ ﺑﺎﻟﺜﺎﻧﻲ ﻣﺘﻮﺳﻂ
ﺩﻳﻤﺎ ﻫﻢ ﺻﺎﺭﺕ ﺑﺎﻟﻤﺘﻮﺳﻄﺔ
ﺣﻴﺪﺭ ﺍﻟﻮﺣﻴﺪ ﻣﻦ ﺍﻭﻻﺩ ﻋﻤﻲ ﻟﻠﺴﺎﺩﺱ ﺍﻋﺪﺍﺩﻱ ﻭﺗﺮﻙ ﺍﻟﺪﺭﺍﺳﺔ ﻫﻮ ﻣﻴﺤﺐ ﺍﻟﺪﻭﺍﻡ ﺻﺎﺭ ﻳﺸﺘﻐﻞ ﻭﻳﺎ ﺍﺑﻮﻩ ﻭﻋﻤﺎﻣﻲ
ﺍﺧﺘﻨﻜﺖ ﻣﻦ ﻛﻌﺪﺕ ﺍﻟﺒﻴﺖ ﻗﺮﺭﺕ ﺁﻛﻤﻞ ﻭﻣﺎ ﺍﺗﺮﻙ ﺩﺭﺍﺳﺘﻲ
ﺑﺪﻳﺖ ﺍﺩﺍﻭﻡ ﺑﺲ ﺑﺪﻭﻥ ﺭﻭﺡ ﻛﻮﻟﺸﻲ ﺑﻴﻪ ﻣﻜﺴﻮﺭ
ﻃﻠﻌﺖ ﺳﻨﻮﻳﺔ ﺑﺎﺑﺎ ﺍﻟﻐﺮﻳﺐ ﻣﺎﻣﺎ ﺑﻌﺪ ﺍﻟﺴﻨﻮﻳﺔ ﺑﻴﻮﻡ ﺫﺑﺖ ﺍﻻﺳﻮﺩ ﺟﻨﺖ ﻣﺘﺼﻮﺭﺗﻬﺎ ﺑﺤﻴﺎﺗﻬﺎ ﻣﺘﻘﺒﻞ ﺗﻨﺰﻋﺔ ﻋﻠﻰ ﻛﻤﻴﺔ ﺍﻟﺤﺐ ﺍﻟﺠﺎﻥ ﺑﻴﻨﻬﺎ ﻭﺑﻴﻦ ﺑﺎﺑﺎ
ﺍﻧﻲ ﺭﻓﻀﺖ ﺍﻧﺰﻋﺔ ﺑﺲ ﺟﺪﻭ ﻭﺑﻴﺒﻲ ﺍﻛﻠﻮﺍ ﻗﻠﺒﻲ ﺑﺰﻋﻮﻧﻲ ﺍﺧﻴﺮ ﺷﻲ ﺫﺑﻴﺘﺔ ﻻﻥ ﺍﻟﺤﺰﻥ ﻣﻮ ﺑﺎﻟﻮﻥ ﺍﻟﺤﺰﻥ ﺑﺎﻟﻘﻠﺐ
ﺧﻠﺼﺖ ﺍﻟﺴﻨﺔ ﺻﺮﺕ ﺛﺎﻟﺚ ﻣﺘﻮﺳﻂ
ﻭﻋﻠﻲ ﺻﺎﺭ ﻣﺮﺣﻠﺔ ﺛﺎﻧﻴﺔ ﺑﺎﻗﻴﻠﺔ ﺳﻨﺔ ﻭﻳﺘﺨﺮﺝ ﻻﻥ ﻛﻠﻴﺘﺔ ﺛﻼﺙ ﺳﻨﻮﺍﺕ
ﻭﺿﻊ ﻣﺎﻣﺎ ﺑﻬﺎﻱ ﺍﻟﻔﺘﺮﺓ ﺍﺑﺪ ﻣﻴﻌﺠﺒﻨﻲ ﺭﺟﻌﺖ ﺗﻬﺘﻢ ﺑﻨﻔﺴﻬﺎ ﻭﺍﺷﻮﻓﻬﺎ ﻫﻮﺍﻱ ﺗﺘﺒﺴﺒﺲ ﻫﻲ ﻭﺑﻴﺒﻲ ﻭﺧﺎﻟﺔ
... ﺍﻛﻮﻟﺞ ﺑﺘﻮﻝ ﺩﺗﻼﺣﻈﻴﻦ ﻭﺿﻊ ﻣﺎﻣﺎ ﻣﺘﻐﻴﺮ ﺍﺣﺲ ﺍﻛﻮ ﺷﻲ
... ﺧﺮﺏ ﺑﺎﻟﻌﺒﺎﺱ ﺭﺩﺕ ﺍﻛﻮﻟﺞ ﻭﺍﻧﺘﻲ ﺳﺒﻘﺘﻴﻨﻲ
... ﺻﻔﻨﺖ ﻳﻼ ﻳﺎ ﺧﺒﺮ ﻫﺴﻪ ﺑﻔﻠﻮﺱ ﺑﺎﺟﺮ، ﻳﺼﻴﺮ ﺑﻼﺵ
.. ﺩﻧﻮﺷﺔ ﺑﺸﻨﻮ ﺗﻔﻜﺮﻳﻦ؟
.. ﻭﻻ ﺷﻲ ﺑﺲ ﻣﻤﺮﺗﺎﺣﺔ
ﺛﺎﻧﻲ ﻳﻮﻡ ﻛﺎﻋﺪﺓ ﺑﺎﻟﻐﺮﻓﺔ ﺍﺟﺖ ﺩﻳﻤﺎ ﻛﺎﻟﺖ ﺩﻧﻮﺵ ﺗﻌﺎﻟﻲ ﺑﻴﺒﻲ ﺗﺮﻳﺪﺝ
... ﻧﺰﻟﺖ ﺩﺧﻠﺖ ﻟﻠﻬﻮﻝ ﺑﻴﺒﻲ ﻭﻣﺎﻣﺎ ﻭﺧﺎﻟﺔ ﻛﺎﻋﺪﺍﺕ
ﻣﺎﻣﺎ ﺟﺎﻧﺖ ﻣﺘﻮﺗﺮﺓ ﻭﺗﻔﺮﻙ ﺑﻴﺪﻫﺎ
... ﺑﻴﺒﻲ ﺗﻌﺎﻟﻲ ﻳﺎﻟﻮﻛﺤﺔ ﻛﻌﺪﻱ ﻛﺒﺎﻟﻲ ﻋﻨﺪﻱ ﻣﻮﺿﻮﻉ ﻭﻳﺎﺝ
... ﺟﻴﺖ ﻛﻌﺪﺕ ﺍﻧﺘﻈﺮﻫﺎ ﺗﺤﺠﻲ
... ﺷﻮﻓﻲ ﻭﻟﺞ ﺍﺑﻮﺝ ﺍﻟﻠﻪ ﻳﺮﺣﻤﻪ ﺭﺍﺡ ﺍﻟﺪﺍﺭ ﺣﻘﺔ ﻭﻧﺎﺭﻩ ﻟﻬﺴﻪ ﺑﮕﻠﻮﺑﻨﺎ ﺑﺲ ﺷﻨﺴﻮﻱ ﻻ ﺍﻋﺘﺮﺍﺽ ﻋﻠﻰ ﺣﻜﻢ ﺭﺑﺞ
ﺍﻣﺞ ﺑﻌﺪﻫﺎ ﺷﺎﺑﺔ ﻻﻥ ﻫﻲ ﻣﻦ ﺍﺯﻭﺟﺖ ﺍﺑﻮﺝ ﺑﻌﺪﻫﺎ ﺻﻐﻴﺮﺓ ﻛﻌﺪﺗﻬﺎ ﺍﻫﻨﺎ ﻣﺘﺠﻮﺯ
... ﺍﺳﻤﻊ ﺑﻴﺒﻲ ﻗﻠﺒﻲ ﻋﺎﺻﺮﻧﻲ ﻭﺧﺎﻳﻔﺔ ﻣﻦ ﻧﻬﺎﻳﺔ ﻛﻼﻣﻬﺎ
ﺟﺎﻭﺑﺖ ﺑﻴﺒﻲ ﻭﻟﻮﻳﺶ ﻣﻴﺠﻮﺯ ﻛﻌﺪﺗﻬﺎ ﺍﻫﻨﺎ
ﻫﻲ ﻣﻮ ﻏﺮﻳﺒﺔ ﺑﻨﺖ ﺍﺧﻮﺝ ﻭﻫﻨﺎ ﺍﺧﺘﻬﺎ ﻭﺯﻭﺝ ﺍﺧﺘﻬﺎ ﻭﺍﻧﻲ ﻭﻋﻠﻲ
... ﺑﺲ ﺍﺣﻨﺎ ﻋﺪﻧﺎ ﺭﺟﺎﻝ ﺍﻋﺰﺏ ﻭﻫﻲ ﺷﺎﺑﺔ ﺍﻟﻨﺎﺱ ﺭﺍﺡ ﺗﺤﺠﻲ
... ﺑﻨﻔﺎﺫ ﺻﺒﺮ ﺑﻴﺒﻲ ﻟﻮﻳﻦ ﺗﺮﻳﺪﻳﻦ ﺗﻮﺻﻠﻴﻦ
... ﺍﻧﻲ ﻭﺟﺪﺝ ﻗﺮﺭﻧﺎ ﻧﺰﻭﺝ ﻋﻤﺞ ﻣﺜﻨﻰ ﺍﻟﺰﻳﻨﺐ ﻫﻮ ﺑﻤﻘﺎﻡ ﺍﺑﻮﻛﻢ ﻭﺍﺣﺮﺹ ﻣﻦ ﺍﻟﻐﺮﻳﺐ ﻋﻠﻴﻜﻢ ﻭﻋﻠﻴﻬﺎ
... ﻓﺘﺤﺖ ﻋﻴﻨﻲ ﻭﺣﻠﻜﻲ ﻋﻠﻰ ﻛﻼﻣﻬﺎ ﻣﺠﺎﻱ ﺍﻛﺪﺭ ﺍﺳﺘﻮﻋﺐ ﻋﺒﺎﻟﻚ ﺍﻧﻀﺮﺑﺖ ﺑﻄﺎﺑﻮﻛﺔ ﻋﻠﻰ ﺭﺍﺳﻲ
... ﺳﺪﻱ ﺣﻠﻜﺞ ﻳﺎﻟﻮﻛﺤﺔ ﻻﻃﺐ ﺑﻲ ﺫﺑﺎﻧﺔ
... ﺍﻧﺘﻲ ﺍﻛﻴﺪ ﺟﺎﻱ ﺗﺸﺎﻗﻴﻦ ﺻﺢ
... ﻭﺷﻮﻛﺖ ﺍﻧﻲ ﻣﺸﺎﻗﻴﺔ ﻭﻳﺎﺝ ﺣﺘﻰ ﻫﺴﻪ ﺍﺷﺎﻗﺔ
... ﺑﺎﻭﻋﺖ ﻋﻠﻰ ﻣﺎﻣﺎ ﺻﺤﺖ ﺍﺣﺠﻴﻴﻴﻲ ﻟﻮﻳﺶ ﺳﺎﻛﺘﺔ ﺻﺪﻭﻙ ﺗﺮﺩﻳﻦ ﺗﺰﻭﺟﻴﻦ ﻭﻣﻨﻮ ﻋﻤﻴﻴﻴﻴﻴﻲ
ﻣﺎﻣﺎ ﺳﺎﻛﺘﺔ ﻣﺠﺎﻭﺑﺘﻨﻲ
... ﻣﻌﻠﻴﺞ ﺑﺎﻣﺞ ﺍﻟﺤﺠﻲ ﻭﻳﺎﻱ ﺧﺼﻢ ﺍﻟﻜﻼﻡ ﺯﻳﻨﺐ ﺣﺘﺄﺧﺬ ﻣﺜﻨﻰ ﻭﺍﻧﺘﻬﻰ ﺍﻟﻤﻮﺿﻮﻉ
... ﺍﻧﺘﻮﻭﻭﻭﻭﺍ ﺑﻜﻴﻔﻜﻢ ﺗﻘﺮﺭﻭﻭﻭﻭﻥ ﻭﺍﺣﻨﺎ ﻣﻔﻜﺮﺗﻮﺍ ﺑﻴﻨﺎ ﻭﻣﻠﻜﺖ ﻏﻴﺮ ﻣﺜﻨﻰ ﺗﺄﺧﺬﺓ
... ﻧﺼﻲ، ﺻﻮﺗﺞ ﻻ ﺍﻛﻮﻡ ﺍﻛﺴﺮ ﻋﻈﺎﻣﺞ ﻣﺜﻨﻰ ﻋﻤﺞ ﻣﻦ ﺍﺟﻴﺒﻴﻦ ﺍﺳﻤﺔ ﺍﺣﺠﻲ ﺑﺎﺩﺏ ﻻﺗﺼﻴﺮﻳﻦ ﺍﺩﺑﺴﺰ
... ﺷﻨﻮ ﻣﺘﺪﺭﻳﻦ ﺍﻧﻲ ﻭﺣﺪﺓ ﻋﺎﻳﻘﺔ ﻭﺍﺩﺑﺴﺰ ﻣﻦ ﺯﻣﺎﻥ ﻭﺍﻟﻠﻪ ﺍﮔﻠﺐ ﺍﻟﺪﻧﻴﺎ ﻋﻠﻰ ﺭﺍﺳﻜﻢ ﺍﺫﺍ ﺗﻢ ﻫﺬﺍ ﺍﻟﺰﻭﺍﺝ
... ﺍﻣﺸﻲ ﻣﻦ ﻛﺪﺍﻣﻲ ﻋﺒﺎﻟﻲ ﺍﺩﻣﻴﺔ ﻭﻛﺎﻋﺪﺓ ﺍﺣﺠﻲ ﻭﻳﺎﺝ ﻫﺬﺍ ﺍﻟﺰﻭﺍﺝ ﺣﻲ ﺗﻢ ﻭﺍﻟﻤﻴﻌﺠﺒﻪ ﻳﻀﺮﺏ ﺭﺍﺳﺔ ﺑﺎﻟﺤﺎﻳﻂ
... ﺻﻌﺪﺕ ﺍﺭﻛﺾ ﺩﺧﻠﺖ ﻟﻠﻐﺮﻓﺔ ﻭﻃﺒﻜﺖ ﺍﻟﺒﺎﺏ ﻗﻮﻱ ﺍﻓﺘﺮ ﻣﺜﻞ ﺍﻟﻤﺨﺒﻠﺔ
ﺑﺘﻮﻝ ﺣﺠﺖ ﻭﻳﺎﻱ ﻋﻄﺖ ﺑﻴﻬﺎ ﻣﺎ ﺍﺭﻳﺪ ﺍﺳﻤﻊ ﺻﻮﺕ ﺍﻱ ﺑﺸﺮ
ﺍﻛﺜﺮ ﻣﻦ ﺭﺑﻊ ﺳﺎﻋﺔ ﺍﻧﻲ ﺍﻓﺘﺮ ﺑﺎﻟﻐﺮﻓﺔ ﺑﺘﻮﻝ ﻭﺩﻳﻤﺎ ﺻﺎﻓﻨﺎﺕ ﻋﻠﻴﻪ ﻣﻴﻜﺪﺭﻥ ﻳﺤﺠﻦ ﺷﻲ
ﺳﻤﻌﺖ ﺻﻮﺕ ﻣﺎﻣﺎ ﻓﻮﻙ ﻃﻠﻌﺖ ﻣﻦ ﺍﻟﻐﺮﻓﺔ ﺷﻔﺘﻬﺎ ﺩﺧﻠﺖ ﻏﺮﻓﺘﻬﺎ ﺩﺧﻠﺖ ﻭﺭﺍﻫﺎ ﻭﺳﺪﻳﺖ ﺍﻟﺒﺎﺏ
.... ﺷﻌﻨﺪﺝ ﺟﺎﻳﺔ ﺍﺧﺎﻑ ﻣﻜﻔﺎﺝ ﺍﻻﺳﺘﻬﺘﺎﺭ ﻣﺎﻝ ﻗﺒﻞ ﺷﻮﻳﺔ ﺟﺎﻳﺔ ﺗﻜﻤﻠﻴﻦ ﺍﻫﻨﺎ
... ﻛﻌﺪﺕ ﺑﺼﻔﻬﺎ ﻋﻠﻰ ﺍﻟﺠﺮﺑﺎﻳﺔ ﻭﻟﺰﻣﺖ ﺍﻳﺪﻫﺎ
ﻣﺎﻣﺎ ﺍﻧﻲ ﺍﺳﻔﺔ ﺷﺘﺮﻳﺪﻳﻦ ﺗﺴﻮﻳﻦ ﺑﻴﻪ ﺳﻮﻱ ﻭﺍﻟﻠﻪ ﺑﻌﺪ ﺍﺻﻴﺮ ﻣﺜﻞ ﻣﺘﺮﺩﻳﻦ ﻭﻣﺎ ﺍﺗﻌﺎﺭﻙ ﻭﻻ ﺍﻃﻮﻝ ﻟﺴﺎﻧﻲ، ﻭﻳﺎ ﺍﻱ ﺑﺸﺮ ﺑﺲ ﺍﻫﻢ ﺷﻲ ﻻﺗﺰﻭﺟﻴﻦ ﻓﺪﻭﺓ ﺍﺭﻭﺣﻠﺞ
.. ﺍﻧﺘﻲ ﻟﻮﻳﺶ ﻣﺘﻔﻬﻤﻴﻦ ﺍﻧﻲ ﺩ ﺍﺯﻭﺝ ﻋﻠﻤﻮﺩﻛﻢ ﺍﺫﺍ ﻣﺎ ﺍﻭﺍﻓﻖ ﻭﻳﻦ ﺍﺭﻭﺡ
... ﻣﺎﻣﺎ ﺷﺸﺸﺸﻨﻮ ﻋﻠﻤﻮﺩﻧﺔ ﺷﻨﻮ ﺍﺣﻨﺎ ﺍﻃﻔﺎﻝ ﻭﺗﺨﺎﻓﻴﻦ ﻳﺎﺧﺬﻭﻧﺔ ﻣﻨﺞ ﻭﺍﻧﻲ ﻭﺍﻧﺘﻲ ﻧﻌﺮﻑ ﻛﻮﻟﺶ ﺯﻳﻦ ﻻﺟﺪﻭ ﻭﻻ ﺑﻴﺒﻲ ﻳﻄﻠﻌﻮﻧﺞ ﻣﻨﺎ ﺣﺘﻰ ﻟﻮ ﻣﺘﻮﺍﻓﻘﻴﻦ
... ﺍﻧﺘﻲ ﻭﺍﺧﻮﺝ ﺑﺎﺟﺮ ﻋﻜﺒﺔ ﺗﺰﻭﺟﻮﻥ ﻭﻛﻞ ﻭﺍﺣﺪ ﻳﻠﺘﻬﻲ ﺑﺤﻴﺎﺗﺔ ﻭﺍﻇﻞ ﺍﻧﻲ ﻋﻠﻰ ﺍﻳﺪ ﻫﺬﺍ ﻭﺫﺍﻙ ﻣﻌﻨﺪﻱ ﻻ ﺍﻡ ﻭﻻ ﺍﺏ ﻭﺍﺧﻮﺍﻧﻲ ﻭﺧﻮﺍﺗﻲ ﻛﻞ ﻭﺍﺣﺪ ﺑﻴﻬﻢ ﻣﻠﺘﻬﻲ ﺑﻌﻴﺸﺘﺔ
... ﺷﻠﻮﻥ ﺗﺘﻮﻗﻌﻴﻦ ﻧﺘﺮﻛﺞ ﺍﺣﻨﺎ ﺗﺮﺑﺎﺕ ﻣﺎﻫﺮ ﻣﺎﻣﺎ ﺷﻨﻮ ﻧﺴﻴﺘﻲ ﻣﺎﻫﺮ ﺷﺰﺭﻉ ﺑﻴﻨﺎ ﻭﺍﻟﻠﻪ ﻣﺎ ﺍﻋﻮﻓﺞ ﺍﺑﻮﺱ ﺍﻳﺪﺝ ﻻﺗﺰﻭﺟﻴﻦ
ﻣﺎﻣﺎ ﻋﻠﻲ ﺷﺎﺏ ﺷﺮﺍﺡ ﺗﻜﻮﻟﻴﻠﺔ ﺍﻟﻠﻪ ﻋﻠﻴﺞ ﻓﻜﺮﻱ ﺑﻴﻨﺎ
... ﺩﺍﻧﻴﻴﻴﻴﻴﺔ ﻛﺎﻓﻲ ﺍﻟﻤﻮﺿﻮﻉ ﺍﻧﺘﻬﻰ ﻫﺬﺍ ﺣﻘﻲ ﺍﻧﺘﻮﺍ ﺷﻠﻜﻢ ﺩﺧﻞ
... ﺷﺸﺸﺸﺸﻠﻮﻥ ﺷﻠﻨﺔ ﺩﺧﻞ ﺍﻧﺘﻲ ﺍﻣﻨﺎ
ﺑﺲ ﻓﻬﻤﻴﻨﻲ ﺷﺒﺴﺮﻋﺔ ﻧﺴﻴﺘﻲ ﺑﺎﺑﺎ ﻭﺗﺮﺩﻳﻦ ﺗﺎﺧﺬﻳﻦ ﺍﺧﻮﻭﻭ ﻭﻳﻦ ﺭﺍﺡ ﺣﺒﺞ ﺍﻟﻪ
ﺣﺎﻥ ﻣﺪﻟﻠﺞ ﻋﻤﺮﻩ ﻣﺮﻓﻊ ﺍﻳﺪﻩ ﻋﻠﻴﺞ
ﻫﺴﻪ ﺗﺮﺩﻳﻦ ﺗﺒﺪﻟﻲ ﺑﻤﺜﻨﻰ
ﺍﺷﻮ ﻫﻮ ﻳﺎﺧﺬ ﻣﺼﺮﻭﻓﺔ ﻣﻦ ﺟﺪﻭ ﺷﻠﻮﻥ ﺣﻴﻌﻴﺸﺞ
ﻣﺎﻣﺎ ﺍﺫﺍ ﻣﺼﺮﺓ ﻋﻠﻰ ﺍﻟﺰﻭﺍﺝ ﺍﻭﻙ ﻫﺬﺍ ﺣﻘﺞ ﻭﺍﺣﻨﺎ ﻣﻨﻤﻨﻌﺞ ﺍﺧﺬﻱ ﺍﻱ ﻭﺍﺣﺪ ﺑﺲ ﻣﻮ ﻋﻤﻲ ﻣﻮ ﻛﺪﺍﻣﻨﺎ ﻳﺎﺧﺬ ﻣﻜﺎﻥ ﺑﺎﺑﺎ
ﻓﺪﻭﺓ ﺍﻟﻌﻴﻨﺞ ﺍﺭﺣﻤﻴﻨﺎ ﻭﺣﺴﻲ ﺑﻴﻨﺎ
... ﺩﺍﻧﻴﺔ ﺍﻣﺸﺸﺸﺸﻲ ﻃﻠﻌﻲ ﺑﺮﺍ ﻭﻣﺎ ﺍﺭﻳﺪ ﺍﺳﻤﻌﻠﺞ ﺍﻱ ﺻﻮﺕ ﺍﻣﺸﺸﺸﺸﺸﻲ ﻃﻠﻌﻲ
ﻃﻠﻌﺖ ﻣﻦ ﻳﻤﻬﺎ ﺑﺨﻴﺒﺔ ﺍﻣﻞ ﺍﻣﻲ ﻣﺼﺮﺓ ﻋﻠﻰ ﺍﻟﺰﻭﺍﺝ
ﻟﻠﻴﻞ ﺍﻧﻲ ﺑﻔﺮﺍﺷﻲ ﺍﺑﺠﻲ
ﺍﺟﺖ ﺧﺎﻟﺔ ﻭﻓﺎﺀ، ﻋﻠﻴﻪ
. ﺷﺒﻴﻬﺎ ﺑﻨﺘﻲ ﺍﻟﺤﻠﻮﺓ ﻟﻮﻳﺶ ﻣﻨﺰﻟﺘﻲ ﺗﺘﻌﺸﻴﻦ ﻭﻳﺎﻧﺔ
... ﺧﺎﻟﺔ ﻣﺎ ﺍﺭﻳﺪ ﻣﻮ ﺟﻮﻋﺎﻧﺔ
.... ﻛﻮﻣﻲ ﻣﺎﻣﺎ ﻻﻇﻠﻴﻦ ﺣﺎﺑﺴﺔ ﺭﻭﺣﺞ ﻛﻠﺸﻲ ﻗﺴﻤﺔ ﻳﺎﺑﻨﺘﻲ ﻭﺍﻟﻈﺎﻫﺮ، ﻋﻤﺞ ﻣﻦ ﻗﺴﻤﺘﻬﺎ
... ﻗﺴﻤﺔ ﺳﻮﺩﺓ ﺗﺮﻳﺪ ﺗﺰﻭﺝ ﺧﻠﻲ ﺗﺰﻭﺝ ﺑﺲ ﻣﻮ ﻫﻮ ﻋﻠﻴﺞ ﺑﺪﺍﻋﺔ ﺍﺣﻤﺪ ﺍﺣﺠﻲ ﺍﻟﺤﻖ ﻣﺜﻨﻰ ﻳﺴﺘﺎﻫﻞ ﻳﺎﺧﺬ ﻣﻜﺎﻥ ﺑﺎﺑﺎ ﺧﺎﻟﺔ ﺑﺎﺑﺎ ﺑﻌﺪﻩ ﻣﺼﺎﺭﻟﺔ ﺳﻨﺘﻴﻦ ﻣﻦ ﻣﺎﺕ ﻭﻫﻲ ﺍﺩﻭﺭ ﺯﻭﺍﺝ
... ﺍﻭﻭﻭﻑ ﻭﺍﻟﻠﻪ ﻣﺎﻛﻮ ﻣﺜﻞ ﻣﺎﻫﺮ ﺍﻟﻠﻪ ﻳﺮﺣﻤﻪ ﺍﻟﻨﺴﻮﺍﻥ ﺟﺎﻧﻦ ﻳﺤﺴﺪﻧﻬﺎ ﻋﻠﻰ ﺣﺒﻪ ﺍﻟﻬﺎ
ﻫﺴﻪ ﻋﻮﻓﺞ ﻣﻦ ﺍﻣﺞ ﻭﻻﺗﻐﺜﻴﻦ ﻧﻔﺴﺞ ﺍﻧﺘﻲ ﺑﻨﺘﻲ ﺍﻧﻲ ﻭﻏﻼﺗﺞ ﻣﻦ ﻏﻼﺕ ﺑﺘﻮﻝ ﺩﻳﻤﺎ
... ﻓﺪﻭﺓ ﺍﻟﻌﻴﻨﺞ ﻭﺍﻟﻠﻪ ﺍﻧﺘﻲ ﺍﺣﻦ ﻣﻨﻬﺎ ﻋﻠﻴﻪ
ﺍﻧﻲ ﻫﺴﻪ ﺷﺎﻳﻠﺔ ﻫﻢ ﻋﻠﻲ ﺍﺫﺍ ﻋﺮﻑ ﺷﺤﻴﺴﻮﻱ
... ﺍﻧﻲ ﻫﻢ ﺧﺎﻳﻔﺔ ﻣﻦ ﺭﺩﺕ ﻓﻌﻠﺔ ﺍﻟﻠﻪ ﻳﺴﺘﺮ
ﺑﺪﻭﺍ ﻣﺎﻣﺎ ﻭﻋﻤﻲ ﻳﺠﻬﺰﻭﻥ ﺍﻟﺰﻭﺍﺟﻬﻢ ﻭﺍﺷﻮﻓﻬﻢ ﺷﻠﻮﻥ ﻓﺮﺣﺎﻧﻴﻦ
ﻣﺎﻣﺎ ﻋﺒﺎﻟﻚ ﺑﻨﺖ ﺑﻴﺖ ﻳﻮﻣﻴﺔ ﺑﺎﻟﺴﻮﻙ ﺍﺟﻴﺐ ﻭﺗﻨﻜﻞ ﺑﻬﺎﻟﻐﺮﺍﺽ
ﻋﻤﻲ ﺟﺎﺏ ﻏﺮﻓﺔ ﺟﺪﻳﺪﺓ ﻧﺼﺒﻬﺎ
ﺭﺍﺩﻭﺍ ﻳﺨﻠﻮﻫﺎ ﺑﻐﺮﻓﺔ ﺑﺎﺑﺎ ﺗﻌﺎﺭﻛﺖ ﻭﻳﺎ ﺑﻴﺒﻲ ﻛﻠﺖ ﺍﺭﺗﻜﺐ ﺟﺮﻳﻤﺔ ﺍﺫﺍ ﻋﻤﻲ ﺩﺧﻞ ﻏﺮﻓﺔ ﺑﺎﺑﺎ
ﺑﻴﺒﻲ ﻛﺎﻟﺘﻠﺔ ﺍﻧﺼﺒﻬﺎ ﺑﻐﺮﻓﺘﻚ ﻏﺮﻓﺔ ﻋﻤﻲ ﺟﺎﻧﺖ ﺑﺎﻟﻄﺎﺑﻖ ﺍﻟﺠﻮ ﻣﻮ ﻓﻮﻙ
ﻣﺎﻣﺎ ﺭﺍﺣﺖ ﻟﻠﺼﺎﻟﻮﻥ ﺻﺒﻐﺖ ﻭﺣﻔﺖ
ﻛﻞ ﻫﺬﺍ ﻛﺪﺍﻡ ﻋﻴﻨﻲ ﻭﺍﻧﻲ ﺑﺎﻟﻴﻮﻡ ﺍﻣﻮﺕ ﺍﻟﻒ ﻣﻮﺗﺔ
ﺭﺍﺩﻭﺍ ﻳﻌﻘﺪﻭﻥ ﻋﻤﻮ ﻋﺎﻣﺮ ﻣﻘﺒﻞ ﻛﺎﻝ ﻋﻠﻰ ﺍﻻﻗﻞ ﺍﻧﺘﻈﺮﻭﺍ ﺍﺑﻨﻬﺎ ﺧﻠﻲ، ﻳﻜﻮﻥ ﻋﻨﺪﻩ ﻋﻠﻢ ﺑﺎﻟﻤﻮﺿﻮﻉ
ﻭﻓﻌﻼً ﺍﻧﺘﻈﺮﻭﺍ ﻧﺰﻭﻝ ﻋﻠﻲ ﻭﺍﺣﻤﺪ ﻣﻦ ﺍﻟﻜﻠﻴﺔ
ﺍﻟﻴﻮﻡ ﻣﻮﻋﺪ ﻧﺰﻭﻟﻬﻢ ﺍﻟﻜﻞ ﻣﺘﻮﺗﺮﻳﻦ ﺣﺘﻰ ﻣﺎﻣﺎ ﺷﻔﺖ ﺍﻷﺭﺗﺒﺎﻙ ﻭﺍﻟﺨﻮﻑ ﺑﻌﻴﻮﻧﻬﺎ
ﺟﺪﻭ ﻛﺎﻝ ﻟﺤﺪ ﻳﻜﻮﻟﺔ ﺍﻟﺤﺪ ﻣﺎ ﺍﻧﻲ ﺍﺑﻠﻐﺔ
ﺍﻟﻈﻬﺮ ﺍﺟﻮﻱ ﺳﻠﻤﻮﺍ ﻋﻠﻴﻨﺎ
ﻋﻠﻲ ﺷﻠﻮﻥ ﺣﺎﺿﻦ ﻣﺎﻣﺎ ﻭﻳﺒﻮﺱ ﺑﻴﻬﺎ ﻣﺘﺖ ﻗﻬﺮ ﻋﻠﻴﻪ
ﺻﺒﻴﻨﺎ ﻏﺪﺍ ﺗﻐﺪﻳﻨﺎ
ﻋﻠﻲ ﻭﺍﺣﻤﺪ ﻣﻨﻄﻠﻘﻴﻦ ﺑﺎﻟﺴﻮﺍﻟﻒ ﻳﺴﻮﻟﻔﻮﻥ ﻋﻠﻰ ﺗﺪﺭﻳﺒﺎﺗﻬﻢ ﻭﻋﻠﻰ ﺍﻟﻤﻮﺍﻗﻒ ﺍﻟﺘﺼﻴﺮ ﻭﻳﺎﻫﻢ
ﺍﺧﻴﺮ ﺷﻲ ﺍﺗﺮﺧﺼﻮﺍ ﺭﺍﺣﻮﺍ ﻧﺎﻣﻮﺍ ﻻﻥ ﺗﻌﺒﺎﻧﻴﻦ
ﺟﻴﺖ ﻋﻠﻰ ﻣﺎﻣﺎ ﻛﺘﻠﻬﺎ ﻣﺎﺑﻴﻬﺎ ﻣﺠﺎﻝ ﺗﻐﻴﺮﻳﻦ ﺭﺍﻳﺞ ﻣﻮ ﺍﻟﺨﺎﻃﺮﻱ ﺍﻟﺨﺎﻃﺮ ﻋﻠﻲ
ﻋﺎﻓﺘﻨﻲ ﻭﺭﺍﺣﺖ
ﺑﻌﺪ ﺍﻟﻌﺸﺎ ﺣﺎﻥ ﻣﻮﻋﺪ ﺗﻔﺠﻴﺮ ﺍﻟﻘﻨﺒﻠﺔ
ﻣﺎﻣﺎ ﻓﻠﺘﺖ ﺍﻟﻐﺮﻓﺘﻬﺎ ﺑﺲ ﺑﻘﻮﺍ ﺟﺪﻭ ﻭﺑﻴﺒﻲ ﻭﻋﻤﺎﻣﻲ ﻭﺍﻟﻮﻟﺪ
ﺍﻧﻲ ﻃﻠﻌﺖ ﻛﻌﺪﺕ ﻋﻠﻰ ﺍﻟﺪﺭﺝ ﻗﺮﻳﺐ ﻣﻦ ﺍﻟﻬﻮﻝ ﺍﺭﻳﺪ ﺍﺳﻤﻌﻬﻢ ﺷﻴﺤﺠﻮﻥ
ﺑﺘﻮﻝ ﺍﺟﺖ ﻛﻌﺪﺕ ﻳﻤﻲ
... ﺑﺪﺍ ﺟﺪﻭ ﻳﺤﺠﻲ ﻭﻧﻔﺲ ﺍﻻﺳﻄﻮﺍﻧﺔ ﺍﻟﻜﺎﻟﺘﻬﺎ ﺍﻟﻲ ﺑﻴﺒﻲ ﺟﺪﻭ ﺣﺠﺎﻫﺎ ﺍﻟﻌﻠﻲ
ﻭﻫﻨﺎﻙ ﻭﻛﺒﺖ ﺍﻟﻌﻴﻄﺔ
... ﻻ ﺍﻧﺘﻮﺍ ﺍﻛﻴﺪ ﺗﺨﺒﻠﺘﻮﺍ ﻣﻨﻮﻭﻭﻭﻭﻭ ﺗﺰﻭﺝ
... ﺍﻧﺠﺐ ﻟﻚ ﻣﻨﻮ ﺗﺨﺒﻞ ﺍﺷﻮ ﺻﺎﻳﺮ ﻣﺘﺤﺘﺮﻡ
... ﻟﻌﺪ ﺍﻟﺪﺗﺤﺠﻮﺍ ﻫﺬﺍ ﺣﺠﻲ ﻋﻘﺎﻝ ﺗﺮﻳﺪﻭﻥ ﺍﻣﻲ ﺗﺰﻭﺝ ﻭﻣﻨﻮ ﻋﻤﻴﻴﻴﻴﻴﻲ ﻭﺍﻟﻠﻪ ﺍﺣﺮﻙ ﺍﻟﺒﻴﺖ ﻋﻠﻰ ﺭﺅﻭﺳﻜﻢ
.. ﻣﺜﻨﻰ ﻛﺎﻓﻲ ﻻﺗﻠﻮﺹ ﺷﻨﻮ ﺷﻔﺖ ﻧﻔﺴﻚ ﺭﺍﺡ ﺗﺼﻴﺮ ﺿﺎﺑﻂ ﺗﺮﻳﺪ ﺗﻤﺸﻲ ﻛﻼﻣﻚ ﻋﻠﻴﻨﺎ
... ﺍﻧﺖ ﺑﺎﻟﺬﺍﺕ ﻻﺗﻔﺘﺢ ﺣﻠﻜﻚ ﻳﺎ ﻋﺎﺭﺭﺭﺭﺭﺭﺭﺭﺭ
... ﺍﻧﻲ ﻭﺑﺘﻮﻝ ﻛﻤﺰﻧﺎ ﺩﺧﻠﻨﺎ ﻟﻠﻬﻮﻝ ﻟﻜﻴﻨﺎ ﻋﻠﻲ ﻧﺎﻳﻢ ﻓﻮﻙ ﻋﻤﻲ ﺩﻳﻀﺮﺑﺔ
ﺑﺎﻟﻜﻮﺓ ﺟﺮﻭﺍ ﻣﻨﻪ
... ﺍﺫﺍ ﺍﻣﻲ ﺻﺎﺭﺕ ﺛﻜﻴﻠﺔ ﻋﻠﻴﻜﻢ ﺍﻧﻲ ﺍﺧﺬﻫﺎ ﻭﺍﻃﻠﻊ ﺍﻧﻲ ﺍﻋﻴﺸﺸﺸﻬﺎ ﻣﺎ ﻣﺤﺘﺎﺝ ﻣﻨﻴﺘﻜﻢ ﺧﺘﻰ ﻛﻠﻴﺔ ﺑﻌﺪ ﻣﺎ ﺍﺩﺍﻭﻡ
ﻟﻮ ﺍﻋﺮﻑ ﺍﺷﺘﻐﻞ ﻋﺎﻣﻞ ﻭﻻ ﺍﺑﻘﻴﻬﺎ ﺗﺤﺖ ﺭﺣﻤﺘﻜﻢ
... ﺟﺪﻭ ﻟﻚ ﻛﺎﻓﻲ ﻫﻮﺍﻱ ﺍﻧﻄﻴﺘﻚ ﻣﺠﺎﻝ ﺯﻳﻨﺐ ﺭﺍﺡ ﺗﺰﻭﺝ ﻣﺜﻨﻰ ﻭﺍﺭﻳﺪ ﺭﺟﺎﻝ ﻳﻜﺴﺮ ﻛﻼﻣﻲ
... ﺍﻧﻲ ﺭﺟﺎﻝ ﻏﺼﺒﺎ ﻋﻠﻰ ﺍﻟﻜﻞ
... ﻋﻠﻲ ﻗﺒﻞ ﻻﻳﻜﻤﻞ ﻛﻼﻣﺔ ﻛﺎﻡ ﺟﺪﻭ ﺿﺮﺏ ﻋﻠﻲ ﺭﺍﺷﺪﻱ
... ﺑﻴﺒﻲ ﺻﺮﺧﺖ ﻻ ﺻﺎﺩﻕ ﻻ ﺷﺸﺸﺸﻠﻮﻥ ﺗﻤﺪ ﺍﻳﺪﻙ ﻋﻠﻴﻪ
... ﻋﻠﻲ ﻋﻴﻮﻧﺔ ﺩﻡ ﻋﺎﻑ ﺍﻟﻬﻮﻝ ﻭﻃﻠﻊ ﺍﻟﻮﻟﺪ ﻃﻠﻌﻮﺍ ﻭﺭﺍ
ﻃﻠﻌﺖ ﺍﺩﻭﺭﻟﻬﻢ ﻣﺎﻛﻮ ﺑﺎﻟﺤﻮﺵ ﺩﺧﻠﺖ ﻟﻠﻤﻄﺒﺦ ﺷﻔﺖ ﻣﺎﻣﺎ
ﻋﻄﺖ ﺑﻴﻬﺎ ﻫﺴﺴﺴﺴﺴﺴﻪ ﺍﺭﺗﺎﺣﻴﺘﻲ ﺍﺑﻨﺞ ﺍﻧﻀﺮﺏ ﺑﺴﺒﺒﺞ
... ﺍﺟﺎﻧﻲ ﺻﻮﺕ ﺟﺪﻭ ﻳﺮﻋﺪ ﺩﺍﻧﻴﻴﻴﻴﻴﻴﻴﺔ ﺗﺴﺪﻳﻦ ﺣﻠﻜﺞ ﻻ ﺍﺟﻲ ﺍﻛﻤﻞ ﻋﻠﻴﺞ ﺍﻧﺘﻲ ﺍﻟﺜﺎﻧﻴﺔ
ﺍﻟﻜﻞ ﺭﺍﺣﻮﺍ ﺍﻟﻐﺮﻓﻬﻢ ﺍﻧﻲ ﻭﺑﺘﻮﻝ ﻧﻔﺘﺮ ﺑﺎﻟﺒﻴﺖ ﻣﺮﻩ ﻧﻄﻠﻊ ﻟﻠﺤﺪﻳﻘﺔ ﻣﺮﻩ ﻧﻜﻌﺪ ﺑﺎﻟﻤﻄﺒﺦ
ﻧﻨﺘﻈﺮﻫﻢ ﺷﻮﻛﺖ ﻳﺠﻮﻥ ﺑﺎﻟﻲ ﻳﻢ ﻋﻠﻲ
ﻋﺒﺮﺕ ﺍﻟﺴﺎﻋﺔ 12 ﻭﻫﻤﺎ ﻣﺎﻛﻮ
ﻭﺍﻛﻔﺔ ﺑﺎﻟﻤﻄﺒﺦ ﺍﻧﻔﺘﺤﺖ ﺑﺎﺑﺎ ﺍﻟﺒﺮﺍ ﺩﺧﻠﻮﺍ ﺍﺣﻤﺪ ﻭﺣﻴﺪﺭ
ﺍﺣﻮﻱ ﻟﻠﻤﻄﺒﺦ ﺍﺣﻤﺪ ﻭﻛﻒ ﻳﻢ ﺍﻟﺒﺮﺍﺩ ﻳﺸﺮﺏ ﻣﻲ
ﺭﺣﺖ ﻳﻢ ﺣﻴﺪﺭ
... ﻋﻔﻴﻪ ﺣﻴﺪﺭ ﻋﻠﻲ ﻭﻳﻨﺔ ﻟﻮﻳﺶ ﻣﺎ ﺍﺟﻪ ﻭﻳﺎﻛﻢ
... ﺡ ﻳﺒﺎﺕ ﺑﻴﺖ ﻋﻤﻮ ﺣﺎﺗﻢ ﻳﻢ ﻣﻬﻨﺪ
... ﺯﻳﻦ ﻫﻮ ﺷﻠﻮﻧﻪ ﺧﻮﻣﺎ ﺑﻲ ﺷﻲ
.... ﻧﺘﺮ، ﺍﺣﻤﺪ ﻳﻌﻨﻲ ﺷﺒﻲ ﺍﻣﻪ ﺗﺮﻳﺪ ﺗﺰﻭﺝ ﻋﻤﻪ ﺑﻌﺪ ﺷﻴﺼﻴﺮ ﺑﻲ ﺍﻛﺜﺮ ﻫﺎﻱ ﺍﻣﺞ ﺍﻟﻠﻪ ﻣﺨﺒﻠﻬﺎ
ﺣﻴﺪﺭ ... ﺷﺒﻴﻚ ﺍﺣﻤﺪ ﻫﺎﻱ ﺧﺎﻟﺘﻚ ﻋﻴﺐ ﻫﻴﺠﻲ ﺗﺤﺠﻲ ﻋﻠﻴﻬﺎ
... ﺑﻼ ﺧﺎﻟﺘﻲ ﺑﻼ ﺯﻓﺖ ﺍﺑﻨﻬﺎ ﺑﻄﻮﻟﻬﺎ ﺍﺩﻭﺭ ﺯﻭﺍﺝ
... ﺍﺣﻤﺬ ﻋﺎﻓﻨﺔ ﻭﺻﻌﺪ ﺟﺎﻥ ﺷﺎﻳﻂ ﻣﻦ ﺍﻟﻌﺼﺒﻴﻪ
... ﺍﻭﻝ ﻣﺮﺓ ﻣﺎ ﺍﺭﺩ ﻋﻠﻴﻪ ﻻﻥ ﻛﻼﻣﺔ ﻛﻠﻪ ﺻﺢ
.... ﺻﻌﺪﺕ ﺗﻤﺪﺩﺕ ﺑﻔﺮﺍﺷﻲ ﻟﻠﺼﺒﺢ ﺍﺗﮕﻠﺐ ﻣﻴﺠﻴﻨﻲ ﻧﻮﻡ
ﺍﺧﻴﺮ ﺷﻲ ﻏﻔﻴﺖ
... ﺍﺟﺖ ﺩﻳﻤﺎ ﻛﻌﺪﺗﻨﻲ
... ﺩﺍﻧﻴﺔ ﺍﻟﻴﻮﻡ ﺍﻟﻌﺼﺮ ﺧﺎﻟﺔ ﺯﻳﻨﺐ ﻭﻋﻤﻮ ﻣﺜﻨﻰ ﺣﻴﻌﻘﺪﻭﻥ ﻭﻳﺮﻭﺣﻮﻥ ﺍﻟﻜﺮﺑﻼﺀ
... ﻓﺰﻳﺖ ﻣﻦ ﻣﻜﺎﻧﻲ ﻳﻌﻨﻲ ﻣﺎﻣﺎ ﺑﻌﺪ ﻛﻞ ﺍﻟﺼﺎﺭ ﻣﻐﻴﺮﺕ ﺭﺍﻳﻬﺎ ﻭﺍﻟﻴﻮﻡ ﺣﺘﺰﻭﺝ .......
ﻳﺘﺒﻊ