البارت الرابع
بروق نزلت الفنجان من يدها وشدت ظهرها
تستقيم في جلستها بثقه : ماراح اروح معك لاي مكان !!
يوسف التفت عليها بعصبيه : خير وش قلتي
بروق بجديه : اجلس خلنا نتفاهم بهدؤ اما نتوصل لاتفاق والاننهي كل شي
الجالسين تبادلو النظرات المتوجسه وانشدو
لكلامها والتوقع العام انها ناويه تفتح موضوع الاغتصاب
يوسف رجع يجلس والضنون بدت توديه وتجيبه
ويحس من ناحيتها بحيره معقوله بتفتح سالفة الي
صار البارح طيب ليه ماتكلمت معي قبل ليه رجعت
ولقيتها في سابع نومه وكأنها مافهمت انا ليش
طلعت وتركتها وحتى لو فرظنا انها هبله ومافهمت
انا راجع لها بدليل قاطع يخلي اتنح وحده تفهم من
وين جاي ! ....اها معناته طنشت متعمده علشان
تجي تسويلي فلم هندي هنا : وعلى وش نتفاهم
بروق التفتت على ابونادر ووجهت كلامها له :
ياعمي انا هنا في بيتك وتحت حمايتك وانا اخيرك
بين امرين اما اجلس في بيتك وبشروطي والا تردني
لبيت ابوي بورقة طلاقي والوجه من الوجه ابيض
اختلطت الاصوات من حولها مابين استنكار وتسائل
وعلت الوجوه علامات الاستغراب والدهشه وبروق
كل تركيزها مع سيد الجلسه .......
ابونادر مستغرب من كلامها المفروض انها
المستفيده من هالزواج والمتوقع انها تتمسك فيه
بكل قوتها حتى ماتنفضح : وش لازمت هالكلام
هالحين وانتم ماتزوجتو الا البارح
بروق : لازمته اني اكتشفت ان يوسف مايصلي والي ماله صلاه ماله ولايه
يوسف حس الكلمه اضربت في مخه مثل الرصاصه
جن جنونه وفز قاطع المسافه الي بينه وبينها
في خطوه وحده وخمها بحلق عبايتها ساحبها يمه
لحد ماعتدلت واقفه قرب وجهه من وجهها وهو
يصرخ بقهر :وولايتي عليك وين راحت ياحيوانه
بروق ردت عليه وعينها في عينه بتحدي : ولايتك
راحت مع صلاتك قال الرسول صلى الله عليه
وسلم: "العهد الذي بيننا وبينهم الصلاة فمن تركها فقد كفر".
يوسف حس كل عرق في جسمه يتفجر غضب رفع
يده ونزل فيها كف حط فيه كل قوته وقهره لكنه
تفاجأ بيده تعلق في الهواء قبل توصلها وابوه يدخل
بينه وبين بروق ماسكه بمعصمه ونادر فز من مكانه
وسحب ايدينه وكتفها من ورا.....
ابو نادر بغضب : بروق في وجهي طول ماهي في
هالبيت وان مديت يدك عليها بعد مامديتها كسرتها
يوسف صرخ :هذي زوجتي تعرف وش معنى زوجتي
ردت عليه بروق بعصبيه :
ومن هالساعه كل حقوقك علي معلقه وملغيه
بالكليه لحد ماتلتزم بصلاتك ولاتضن اني بانتظرك
كثير معك شهر واحد بس ومااضمن اني اقدر اصبر
اسبوعين والاحتى اسبوع واحد ....
صرخ فيها يوسف بقهر : ومن انتي بس علشان اغير
حياتي علشانك تراك ماكله مقلب في نفسك
بروق ببرود ماهو متناسق مع كل اللهب المشتعل
في اعصاب الكل بما فيهم هي نفسها تكلمت واهي
تاشر باصبعها على نفسها : النقيض اعرف الناس
بنقيضه وانا بروق مكاني سماء وانت ادرى بمكانك
نادر وثائر حاجزين يوسف بالقوه واهو يتفلت منهم
يبي يهجم على بروق : فكوني عليها الكلبه خلوني
اوريها حجمها فكوني
ابو نادر ترك يوسف يوم مسكوه اخوانه والتفت على
بروق واهو يغلي قهر من الاثنين : وش شروطك علشان تقعدين
بروق تكلم وعينها تنقل بين يوسف وابو نادر بخليط
مشاعر مختلفه : اول شرط تحطلي غرفه بعيده عن
غرفة يوسف وتعطيني مفاتيحها كلها
ابو نادر بجمود : تم ولك جناح كامل جاهز من كل شي وجديد الي بعده
بروق : شرطي الثاني كل حقوق يوسف علي معلقه
لحد مايغير مسار حياته بالكامل واكيد انكم تعرفون
انه مايجوز استمر معه واهو مايصلي وانت الوحيد
المسؤل عني هنا
يوسف عيونه حمر وعروق ارقبته انتفخت من
الغضب صرخ على بروق واهو مازال ينفض نفسه
من يدين اخوانه بعنف يبي يوصل لها بالي هوبه :
قايلك من البدايه اني ماصلي يومنك ماتبين الي
مايصلي ليه تزوجتيني
بروق لفت عليه وحطت عينها في عينه واهي
تناظره بقرف : تزوجتك لاني ماقدرت اصدق انك
فعلا ماتصلي قلت يمكن مقصر !متهاون اما
ماتصلي ابد !! ..اذا انت فيك من الفسقه مايخليك
تجاهر بمعصية الله بقلب ميت انا خوفي من الله
يمنعني من اني اصدق ان فيه مسلم يعرف منزلة
تارك الصلاه ويتركها ولولا انك اثبتلي هذا الشي
لمى مرت عليك فروض يوم كامل من غير ماتصلي
والافرض والاكان ماصدقت وهالحين ماقدامك الا
انك تلتزم بصلاتك والا اصغر قاضي في اقرب
محكمه يخلعك في اقل من عشر دقايق
كانت تتكلم بغل وقهر
ويوسف توهق يعرف احكام الشرع كلها ويدري انها
تقدر تخلعه بكل بساطه
وبعد ماكان يتفلت من اخوانه هجد واهو يحس
بقهر وحقد اسود يحرق روحه ويترس قلبه غل
على بروق نزل نظره في الارض وقام يتصدد بوجهه
عنها نادر وثائر الي كانو مشغولين بحجز يوسف عن
بروق كان ودهم يفكونه عليها ويخلونه يبرد قلوبهم
فيها لكن ابوهم قيدهم يوم حطها
بوجهه .......غزل متعلقه عيونها في بروق وتتابع
بخوف وشي من الانبهار هذي كيف تتكلم بالقوه
ذي واهي معتدى عليها كيف مانهارت كيف
مانعدمت نفسيتها؟!...... ام نادر ايقنت ان بروق
برئيه من تهمة الاغتصاب بس وش سالفتها مع
يوسف ؟!
ابو جابر قام وقف بين بروق ويوسف واهو يوزع
نظراته بينهم : خليتس على رايك الاول يابروق
عطيه فرصه شهر وان شاء الله انها كافيه علشان
يغير من نفسه ويمسك صلاته
بروق نقلت نظرها بين ابو جابر وابو نادر : ماهو قبل
لاتوعودني انكم تمنعونه عني طول ماهو على
هالحال وان طلبتكم لشهاده في محكمه والاعند
ابوي تشهدون معي بالحق
ابونادر يحس بقهر غير طبيعي من الموقف الي
حطهم فيه اولده والاراشد العامر تاقف في وجهه
بنت في عمر بناته وتشرط عليه بلع غصته ورد
بجمود : لك كل ماتبين وانتي في حمايتي ومحد
يقدر يمس اشعره من راسك لايوسف والاغيره
ثائر انقهر واهو يشوف اخوه كيف انهان قدامهم
ومنظر يوسف واهو يتصدد عنهم جرح قلبه بقوه
ماقدر الانه يفزع له نطق بقهر : انتي على وشو
شايفه نفسك بدل ماتشكرينا لانا سترنا عليك جايه
تهايطين علينا
يوسف انتفض من الغضب كيف نسى يعلمهم بعد
ماتمت الملكه استدار على ثائر وقيدهم ارخو
ايدينهم عنه بعد ماترك التفلت على بروق وامسكه
بحلق بلوزته : وقص يقص السانك ان عاد جبت
طاري زوجتي بالشينه لاافصل راسك عن جسدك
نادر صرخ في وجه يوسف واهو يدفه عن ثائر : انت
الي قلت انك مغتصبها
رد عليه يوسف بصراخ اعلى : قلته لأنكم عييتو
تروحون معي علشان املك عليها والا بالعقل اخذ
وحده قيدني خلصت منها وش ابي فيها
بروق حست بزلزال ينفظ روحها كيف ينقال عنها
هالكلام والمصيبه الاعظم ان الي قاله زوجها اكثر
واحد يفترض انه يصون شرفها وسمعتها
صرخت :الايالخسيس
يوسف التفت على صرختها بهلع وحاله انقلب في
ثواني من الهجوم الشرس على بروق لدفاع عن
نفسه قدامها خمها ماسكها بعضودها : اسف والله
اني اسف غصب عني عيو يجون معي
بروق تقاطعه بقهر وكره اسود بدا يغرق قلبها :
بعمرك لاتزوجت تقذفني وتتبلا علي وانا طول
عمري صاينه نفسي انت وش الفجور الي فيك .....
تحس جسمها كله ينتفض من القهر ويوسف
يترجاها تسامحه فجأه حست بيدين تسحبها
من يوسف الي كان يتعذر لها بشكل هستيري ويبيها
ترضى باي شكل ارفعت راسها بتشوف من وتعلقت
عيونها بالوجه السمح الي ارتخى على جبينها يقبله
وبنبرة رجاء : امسحيها في وجهي يابوتس ومالتس
الا الي يرضيك
بروق غمضت عيونها تحاول تسيطر على مشاعرها
المتفجره بحرقه تحسها تكوي جوفها ازفرت نفس
حار وبدت تذكر الله : استغفر الله استغفر الله اسغفر
الله العظيم واتوب اليه
اخيرا حست ان نفسها بدت تهدا ابعدت نظرها
بالكامل عن يوسف واهي تحس باحتقار له يكفي
العالم بكبره التفتت على ابو جابر وبصوت بان فيه
القهر والغبنه : يكرم وجهك عن الردا ياجدي
الي تجرأ انه يبارز الله بالمعصيه وش بارجي منه انا ؟!
يوسف ماقدر يستحمل اكثر تجرع من الإهانه
والغصات اكثر مما يطيق انسحب طالع من البيت .....
ابونادر انهار جالس على الكنب واهو يضغط على
راسه بين ايديه يحس انه بينفجر من قو الصداع
الي ضرب فيه يا الله وش هالمصيبه الي حلت
عليهم لو فلت منهم كلمه عند اهل بروق كان قلبت
حرب بينهم تدمر العايلتين وشلون تجرأ يوسف انه
يلعب بعرض الناس ويقذفهم كذا !!تدارك افكاره
بهزه من راسه وكانه يعارض بهالحركه مايدور فيه
اصلا يوسف طول عمره يلعب باعراض الناس الله
يكفينا شره وشر افعوله ....انتبه على نادر يهز كتفه
بيده : يبه تحس بشي يعورك شي
رفع راسه لنادر بأسى : عطني بندول راسي بينفقع من الصداع
ثائر سبق نادر وصرخ ينادي العاملات : بسرعه هاتو بندول وماء
غزل منكمشه على نفسها في الكنب وتبكي كثير
عليها الي قاعده تشوفه حرام الي سواه يوسف في
بروق بس في النهايه حكاية انه كذب عليهم علشان
يتزوجها اهون بكثير من انه يعتدي عليها فعلا عند
هالنقطه حست بفرح يجتاح قلبها حبت بروق من
اول ماشافتها الحمد لله انه يوسف ماتعرض لها
ام نادر تحس بتشتت في موقفها سعيده ان بروق
ماتعرضت للاغتصاب وفي نفس الوقت حزينه على
يوسف وماعجبتها الفوقيه الي تتكلم فيها بروق معه
ثائر متفشل من بروق ومقهور من سوات يوسف
خاصه يوم يتذكر البارح كيف كان يقابل ترحيب ابو
بروق واخوانها بنظرات تكبر واحتقار وكم مره بغى
يزل السانه ويشتمهم واهو يشوف كيف انهم
طايرين في يوسف ويقدمونه لجماعتهم على انه
الفارس الي رجع لهم بنتهم مصيونه كان يضن كل
ذا تمثيل طلع صدق واهم الي اكلو الفضيحه قدام
الناس وطلعو قدامهم بمظهر العائله المتعجرفه الوقحه .........
نادر ماهو قادر يتخيل حجم الأذى الي تسببو فيه
لهالبنت واهلها ناس محترمين قابلوهم بكل حفاوه
وكرم اخلاق بينما هم قابلو حفاوتهم بتعالي
وعنجهيه على بالهم مسوين معروف وساترين بنتهم
زفر بضيق وين المعروف الي سووه حتى لوفرضنا ان
يوسف اعتدى عليها المفروض نخجل من انفسنا
بدل مانفترض انهم هم الي لازم يخجلون من بنتهم
مين الي المفروض يكون مخجل الي اعتدى بكامل
ارادته والاالي تم الاعتدا عليه بالقوه ؟!
ابونادر اوصله البنادول والماء اخذ حبة المسكن
وشرب كاس الماء كله نزل الكوب من يده على
الطاوله والتفت على بروق شافها جالسه في مكانها
الاول نظرها يتنقل بينهم بنظره عجز يفهمها
ماحاول يتعب نفسه بالتفكير فيها وفي افكارها كل
الي يبيه الحين انها تختفي عن وجهه وانه يمسك
الكلب يوسف ويعرف منه وش الي صار بالضبط
التفت على ام نادر وكأنها افهمت وش يبي نادت
بصوت عالي :امنه
لحظه ووصلت رئيسة العاملات : نعم
ام نادر اشرت على بروق : وصلي مدام بروق للجناح الي نضفتوه اليوم الصباح
بروق وقفت واهي حدها مرهقه ونفسيتها عدم ......
غزل مسحت دموعها بسرعه وفزت واقفه واهي
تسحب يد بروق : روحي ياامنه انا بوديها
امنه استدارت راجعه من وين ماجت وبروق
اصعدت مع غزل لجناحها
اول مادخلت الجناح بدت تنزل عباتها ونقابها
واهي تنزل التفتت على غزل : القى عندك بجامه ؟
غزل توسعت عيونها
باعجاب بالجمال الي كشفت عنه النقاب والطرحه
بروق استغربت تتنيحة غزل نطقت ببرود :
ماعندك ؟
غزل انتبهت : هاه ايه عندي عندي واركضت لغرفتها تجيب الملابس ........
بروق دورت الحمام وادخلت غسلت وجههاواطلعت
شافت غزل داخله عليها تقدمت لها واخذت
الملابس منها وارجعت للحمام تلبس بعد عشر
دقايق اطلعت لابسه البجامه وتشيل فستانها الي
كانت لابسته في يدها
دخلت عليها امنه واسئلتها بأهتمام : مدام ام نادر
قالتلي اشوف تبغين شي
بروق تحس عروق راسها تنبض من قو القهر الي
يغلي داخلها بعد كل الي صار ومحتاجه شي يهديها
تكلمت بجمود : اذا ممكن كوب هوت شوكلت
وشوكلاته غامقه اذا متوفر
ردت امنه بسرع : ايوا موجود
بروق بشي من الحنين : اذا ممكن ابي المشروب في كوب اسود
امنه استغربت بس ماعقبت على طلبها : ممكن اي اوامر ثانيه
بروق اشرة لها بلا
و تقدمت للكنب نزلت فستانها عليه واجلست جنبه
بعد فتره
ارجعت امنه تشيل بين ايدينها صينية فيها كوب
الهوت شوكلت وعلبة تشوكلت غامق قربت من
الطاوله بتنزل الصينيه عليها لكن بروق اشرت لها
على قطعة الزوليه الصغيره : حطيه هنا
امنه حطت الطوفريه وين ماقالت لها بروق و جابت
مخده من الي تستخدم للجلوس وحطتها مقابله للصينيه
بروق : سكري الباب وانتي طالعه
قامت راحت للجلسه الي ضبطتها امنه واجلست على المخده
افتحت جوالها الي كانت شايلته في يدها وشغلت
شيله حربيه !! ..... في الواقع هذي طقوس بروق
لمى تحس بنفسها تضيق وروحها تختنق بين
اضلوعها .....و عموما نادرا جدا ماتدخل في
هالحاله الكئيبه ....وش معنا القصايد الي تتغنى
بالجيش والحرب بالذات ؟! لان كلماتها فيها قوه
وتحدي وحشد للهمم ومدح وتهديد للعدو وكلها
معاني تنتمي لها تحسها تنعش روحها وتنفض عنها
مشاعر الحزن والانكسار الي تحس انها معاني
دخيله عليها واجب التخلص منها قبل تستوطن
ذاتها وتهشم اعتزازها بنفسها
كانت جالسه متربعه على المخده تاكل من حبات
التشوكلت ببطء وعيونها متسعه بسرحان في ماضي بعيد .......
غزل شافت امنه واهي تطلع من عند بروق نادتها
بحماس : امنه امنه
جتها امنه تتحرك بخطوات سريعه :نعم
غزل بلقافه : وش جبتي لبروق
امنه علمتها
غزل : حلو جيبيلي نفس الي جبتيه لبروق ابي تجيبيلي زيها بضبط
هزت امنه راسها : حاضر
وراحت تنفذ الامر
غزل حبت تتباسط مع بروق وفكرة تلبس بجامه
زيها تحسسها بالالفه ركضت لغرفتها لبست بجامه
قريبه من مظهر البجامه الي عطتها بروق خلصت
لبس ووقفت تتأمل نفسها في المرايه شافت شعرها
القصير المبعثر حول وجهها وتذكرة ان بروق لابسه
طوق على شعرها ابتسمت لنفسها وافتحت درج
التسريحه اخذت منه طوق البسته واطلعت رايحه لبروق ...........
بروق مازالت تمارس طقوس الألم الخاصه فيها
تسحب حبة التشوكلت من العلبه بهدوء وبطء
واهي مازالت تدير تفكيرها بين احداث قديمه
وثانيه جديده تتنقل بين حاضر وماضي فجأه
اسمعت صوت الباب ينفتح التفتت تشوف
من ......شافت غزل تدخل واهي ترفع يدها بكوب
اسود وبحركه كوميديه
تأشر على الكوب ثم على ملابسها وتنطق بمرح :
مستوفيه كل الشروط ماظنتي بتكونين شريره وتطرديني
بروق ابتسمت لها وغزل ماكذبت خبر على طول
لفت على الباب اقفلته بالمفتاح وراحت اخذت لها
مخده نزلتها قدام بروق وجلست عليها نزلت
الكوب من يدها واهي تناظر بروق بتكشيره : وش ذا
بروق باستغراب : ايش
غزل توضح : وراك قالبتهاحرب والأهم مين ذا الي
شانه عليه حربك قالته بأشاره للشيلات الي تتغنى بالجيش
بروق بجمود : جايز اخوك
غزل كشرت : بلاش هالسيره الحين
بروق ارتاحت لها وابتسمت خاصه ان التشوكلت
من محفزات السعاده الطبيعيه ويبدو ان مفعولها
بدا يظهر عليها : احسن بعد وش لنا في الهم
غزل بحماس : واو مره عجبتني هذا الصح وش لنا في الهم
انتهت الشيله واخذت بروق الجوال تحط شيله
ثانيه وكانت شيلة انا سعودي واحب السعوديه
غزل اتسعت ابتسامتها بسعاده : ياسلام على المخ
السعيد الي في راسك انا ودي اعرف كيف جا في
بالك الفكره ذي احس اني مبسوطه من قلب وانا
اكل شوكلت والوطنيه واصله عندي مليون متى اول
مره سويتي الحركه ذي
بروق مازالت تاكل شوكلت وتشرب من كوبها
بتلذذ : اول مره كانت اعتذار من شخص ماهو متعود يعتذر
جابلي علبة تشوكلت سودا وعلشان انكد عليه
فتحت العلبه وصرت اخذ حبات الشوكلت بيديني
الثنتين واغفصهم في كفوفي ابي اقهره بس لاني
وقتها كنت بزر ماكنت اقدر اقاوم وارجع اكلها واهي
مغفصه ولاصقه في يديني وحده ورى الثانيه فجأه
حسيت اني بديت اروق وانبسطت ومن يومها كل
ماحسيت اني مخنوقه اكل شوكلاته وارجع اروق
عاد مع الوقت اضفت عليها الطقوس الثانيه
غزل تحرك فضولها بقوه واهو اساسا في حركه
مستمره عندها : والكوب الاسود امنه كانت
مستغربه انك طلبتي كوب اسود بالتحديد عاد انا
مايحتاج احد يحرث الفضول عندي
بروق عقدت حواجبها وكأنها اكتشفت لاول مره ان
طقوسها ذي طلعت من تحت يد نفس الشخص
غزل لاحظت سرحانها تكلمت تستحثها : لا دامك
سرحتي لازم اعرف السبب باين انه اقوى من الأولاني
بروق اخذت الكوب وبدت ترشف منه ثم نزلته من
يدها واخذت حبة شوكلت اكلتها وبعد صمت
قصير ابتسمت :هذا جاني هديه كوب اسود ساده
وكنت حدي فرحانه فيه وكالعاده جاء هادم الذات
واخذه مني واكسره قدامي على اقرب اجدار وقبل
لاشرب فيه حتى وبكذا انطبع في ذهني الكوب
الاسود كرمز للغضب ...ويمكن التمرد
غزل بخبث : اها والي ورى هذا كله نفس الشخص
وبدت تهجي الكلمه م ن ه و
بروق اختفت ابتسامتها فجأه وبجمود : مالك دخل !!
هنا دق جوال غزل على اخر كلمه لبروق وكأنه
بهالاتصال يحط نقطه اخر السطر بروق سكرت
الشيلات وغزل فتحت جوالها ترد تبادلت مع
المتصل كلمات قليله وسكرت واهي تلتفت على
بروق : امي تقول انزلي انتي وبروق للعشاء
بروق : الشباب تحت
غزل : ايه
بروق بدت تجمع الاغراض
وامسكت غزل يدها تمنعها اتركيه بنادي امنه
تشيله بسرعه ننزل قبل امي تعصب علينا ...
نادت غزل امنه تنظف الحوسه وبروق قامت تلبس
عباتها ونقابها وانزلن مع بعض
ادخلت بروق لجلسة العائله وسلمت ويال الغرابه
السلام انرد عليها بحفاوه وترحاب وابتسامات
صادقه .....ياالله ياكبر الفرق بين استقبالهم لها
واهي داخله مع يوسف قبل ساعتين بس من
هالحظه واستقبالهم الحين كانو محتقرينها
لاعتقادهم ان ولدهم مغتصبها ياسبحان الله هو
الي يجرم ويغتصب واهي الي تلقى الاحتقار !!
انتبهت ان يوسف جالس معهم واول ماشافها صد
عنها وقام واقف بيطلع بروق كلمته ببرود وقلبها يغلي منه : يوسف
وقف مكانه واهو يشتت انظره عنها : نعم
بروق : جب اغراضي
يوسف حب يستغل الموقف يمكن تضبط معه
ويقدر يستفرد فيها : تبين اغراضك امشي معي اوديك تاخذينها ...
بروق قربت منه خطوه وبتحدي : قلت ماراح اروح معك لاي مكان
يوسف قرب منها خطوتين وصار شبه لاصق فيها
وعينه في عينها وبتحدي اكبر : وانا ماني بجايب لك شي
بروق لفت عنه متجهه للكنب اجلست بظهر
مستقيم وارفعت راسها ليوسف : معناته خلها
مكانها حلال على الي ياخذها السوق قريب وانا
مستعده ابعزق فلوس ابوك لاخر ريال اصلا مافيه
امتع من التسوق وبعزقة الفلوس
ابوجابر وابو نادر ابتسمو على كلامها وام نادر
انقهرت منها ماهو عاجبها اسلوبها في التعامل مع يوسف ابد
يوسف تاكد انها ماراح تطلع معه شملها بنظرة كره
واستدار طالع من غير مايرد عليها
ام نادر التفتت على بروق بعصبيه : لاتنسين انه
زوجك وانتي تتكلمين معاه ويكون في علمك
اسلوب المعاند والتحدي ذا ماينفع مع يوسف
بروق فزت واقفه ماهي قادره تنسى كيف كانو
يعاملونها باحتقار كعقاب على افعال ولدهم
: متى ماصار كفو انه يكون زوجي انا بروق ساعتها
تكلمي عن معاملت الازواج ثم انا اذكر زين انه قالي
ان عمره سبعه وعشرين سنه وطول هالسنين كلها
كان عايش معكم ...وقدامكم كل الفرص وكل
الاساليب علشان تتعاملون ابها معه والنموذج الي
انا شايفته الحين يثبت انه والاواحد منكم يعرف
الاسلوب الي ينفع معه وبكذا ماهو من حق اي
واحد فيكم ينقد اساليبي اويعدل عليها
ام نادر زادت عصبيه : الا بن...
قطع كلامها صرخة ابو نادر : خلاص يام نادر
والتفت على بروق : من عندي انا سوي فيه الي
تبين جزاه واقل من جزاه بعد
ابو جابر : ابد حلالتس لوتذكينه مارديناك عنه
ام نادر مقهوره من اتفاقهم على ولدها : انتم كيف
تحرضونها على زوجها
نادر : يمه يوسف تعدا كل حدود الدين والعرف
والاخلاق وش منتظره منه اكثر من الي هو فيه
خليها تجرب يمكن تسوي الي ماقدرنا عليه
اسكتت بعدم اقتناع وكان سكوتها مجرد خضوع
لكلام نادر الي كان ولدها المميز والأكثر تأثير عليها
جت امنه : العشا جاهز
قامو للعشا وابو جابر سحب بروق بيدها بمحبه
وابتسامه عريضه ماينكر انه ارتاح لها من اول
ماشافها وبعد ماقالهم يوسف قصتها معه وشاف
بعينه كيف تصرفت في موضوع ترك يوسف لصلاه
حبها من قلب وتمنى لونها تزوجت نادر لانه الي
يستحق وحده مثل ذي : تعالي اجلسي جنبي
غزل اشهقت بغيره : لااجرام جدي بعمرك
ماناديتني اجلس جنبك
ابوجابر ضحك : هذي حفيدتي الجديده لازم
احتفل فيها
بروق تلتفت على غزل وبمزح : انتي لاتحطين
نفسك في مقارنات معي لانك بتخسرين وبجداره
غزل تزم شفايفها بدلع : مغروره
تعشت معهم ومالقت اي صعوبه في انها تندمج في
جوهم وسوالفهم تعرف ان عندهم بنت ثانيه غير
غزل ومستغربه انها ماشافتها والالقت في نفسها
الفضول علشان تسئل عنها ولدهم الثاني ماشافته
من بعد الهوشه ويوسف توه طلع قدامها والاتدري
متى بيرجع ....اليوم مر عليها ثقيل ومحمل باحداث
قاتمه انهكت روحها ....انهت عشاها
وصعدت لجناحها وكأنها دوبها تشوفه ! جناح واسع
حيل مكون من غرفة نوم وغرفة جلوس وصالة
جلوس ثانيه ومطبخ صغير مجهز بكل شي الغريب
ان الجناح مجهز بفخامه وكل شي فيه جديد
التفتت على غزل الي ادخلت معها : الي عرفته
منكم ان يوسف امس قبل العرس مباشره قالكم عن
زواجنا متى لحقتو تجهزون الجناح
غزل ارتبكت : هاه ... الجناح من زمان مأثثينه بس
محد سكن فيه واليوم امي خلت الخدم ينضفونه
قالت لو حبيتو تجون فيه يكون جاهز
بروق انتبهت لارتباكها : لمن اثثتوه وليه محد سكن فيه
غزل تورطت وبانفعال : بروق انا مالي دخل في
بلاوي يوسف انسي اني اخته والاتدخليني في مشاكله
بروق زاد استغرابها : وانا ماقلت اني راح اخلط
بينك وبين يوسف ثم انا سئلتك عن الجناح وش دخل يوسف
غزل ايقنت انها لو انتظرت دقيقه زياده بتهل
الشريط كله : انا بروح انام مع السلامه
واركضت طالعه من عندها من غير ماتنتظر ردها
بروق تابعت هروب غزل واهي متأكده ان ورى
هالهروب حقائق سودا ماتبي تكون اول من يوصلها
لها سكرت الباب من بعدها وبدت تجول في
الجناح .......والافكار تجول في راسها..
هل يجوزلي اخليه محطة عبور اخترقها عابره
لمستقبل حياتي..... ايه وليه مايجوز هو الي سلمنى
كل دروعه وتركلي صدره مكشوف اغرس فيه رمحي
وشلفاي..... هو الي خانني من اول ليله وفقد حقه
في اني امنحه فرصة الحياة معي .... بس انا سهلته
المهمه وتركتله الطريق مفتوح للخيانه علشان انا
القى بابي لرحيل ! لا مالي دخل في خيانته انا بس
اخذت وضع المتفرج واهو رسم خطته ونفذها
مالي ذنب في الي سواه ثم انا ليه اشيل همه يامى
اخذ من بنات جنسي محطات عبور وكل محطه
يعبرها يورثها الدمار ويرميها للهلاك .......بس
الجميل !! وين اروح من الجميل ؟!
في الطابق السفلي مازال الحدث محتل كل اهتمام
العائله نادر : هالحين كيف بنرقع موقفنا قدام اهل بروق
ابو نادر : مالها ترقيعه الله يسترنا بستره
ابو جابر : ياليت منهو عرفهم في غير هالسالفه
ناسٍ وافين واهل كرم وجود
ابو نادر : المشكله صدق لو البنت علمت اهلها بالي
قاله عنها يوسف
نادر باستبعاد للفكره : ماشفت السانها وش طوله
الي من هالنوع تسوي فيها هياط ويععنني انا الي
اخذ حقي بيدي ماضن تعلم اهلها
ابونادر ابتسم : انا بالقوه رديت نفسي عنها سليطه
وعندها حجه وتعرف كيف تضرب في المكان الي يوجع
نادر : لونك ماحطيتها في وجهك والاكان فكيت
يوسف عليها وخليته يبرد قلبه فيها انا ..انا ..كم مره بغيت المخها
ام نادر : هي سليطه وتقهر بس اشوف عقلها كبير
ابو نادر بانتقاد : هالحين تقولين عقلها كبير ومن اشوي قايمه عليها
ام نادر بتبرير : اقول الصدق بدليل انها مارضت تقعد الا بضمانك انت البنت عارفه وش لها ووش عليها لوني في مكانها وفي وسط ناسن اول مره اشوفهم ماقدرت اسوي الي سوته بس عاد مقدر اشوف يوسف يتبهذل كذا واسكت
ابوجابر : هو الي جاب البهاذيل لنفسه
نادر : هي عاقله مافيها كلام بس اسلوبها مع يوسف ينرفز
ام نادر : شفت وهذا الي خلاني انطلق عليها
ابوجابر : ماتدرون يمكن تقدر تغيره
نادر : لوتغير بيتغير بمزاجه واكيد انه ماسوا كل ذا علشان يتزوجها الاوهي عاجبته
ابوجابر : عساه بس يتمسك فيها ان ضيعها من يده
غبينه وبتسائل الا نويتو تسوون لهم حفله
ام نادر : ايه حفلتهم يوم الخميس لازم نجهز لها على اعلى مستوى ونعزم اقاربنا كلهم
ابو نادر يلتفت على نادر : شف لنا شركة تنظيم حفلات يكون شغلهم راقي ومميز
نادر : ابشر يبه
_______________
اتجهت لغرفة اختها بخطوات سريعه ماعاد فيها
صبر من الصبح لحد الحين واهم على مشارف
صبح جديد واهي تجاهد نفسها وتحاول تمنعها
من السؤال عن يوسف وزوجته ! ايش زوجته انا بعد
لو اعرف اسمها الزفته ذي بدل لاانسبها له ...نامت
البارح في حضنه؟! ....اكيد نامت في حضنه موب
هو الي اختارها ويبيها ! حرقه شبت في روحها على
هالطاري فتحت باب غرفة اختها بدفاشه وشافت
الغرفه تسبح في الظلام دليل ان اختها قيدها نامت
....ياحظها ماعندها شي يشغل بالها ويحرمها النوم
مدة يدها لمفاتيح النور واضوت الإناره الخفيفه
وتقدمت لسرير اختها جلست عليه وبدت تهزها
بكتفها : هموسه هموس سوسه قومي تكفين
همس انزعجت وبدت تقلب شدتها اكثر : هيه هموس قومي
فزة همس بخرعه : هاه وش فيه خير وش تبين انتي
وسن بقهر من اختها الي نايمه والاهامها احد :
همس قومي صحصحي معي
جلست همس باستغراب : صاير شي ؟
وسن بقهر : البارح راقده في حضنه الكلبه واكيد اليوم راحو شهر العسل
همس توسعت عيونها باستغراب وبفهاوه : منهي ؟ ومنهو ؟
وسن والدموع بدت تتجمع في عيونها : من غيره
يوسف والحماره الي اخذها
همس تحس مخها وقف الي قاعده تسويه اختها
لامعقول اخذت المخده الي جنبها واضربت فيها
اختها بقهر واهي تنفخ في وجهها بانفعال: ماحمار
غيرك مقومتني من عز نومي علشان الداشر يوسف
صدق ماعندك كرامه وش الذل الي انتي فيه
ياشيخه حسي على دمك وبصرخه اعلى حسسسسي
وسن انهارت تبكي : انتي الي حسي فيني انا من
اليوم اتصبر لاطريه من اليوم اجاهد نفسي ابي
اتجاهل اخباره وانساه
قاطعتها همس بغضب : ومن اليوم تاكلين بهوس
لدرجة انك تستفرغين كل نص ساعه من كثر الاكل
حرام عليك اعدمتي صحتك لك شهرين ماتاكلين
الابالقمه والقمتين لين صرتي جلد على عظم ومن
عرفتي خبر التافه ذا وانتي حاطه كل حيلك وحرتك
في الاكل ولا النكته انها من شهرين صادعه روسنا
بانها اكرهته وتبي تنتقم منه
قاطعتها واهي تدفن وجهها في حضن همس
بذل :غصب عني غصب وش اسوي
ارفعت نفسها تطالع همس ووجهها غرقان دموع
بدت تظرب على قلبها بقهر : علميني انتي وش
اسوي بذا وش اسويبه
همس انحرقت اعصابها من القهر على حال اختها
: اخرتي بشق صدرك واطلع الزفت ذا وارميه في
اقرب زباله انا مدري كيف تحبين شخص مارس
عليك كل انواع الاذلال
وسن بقهرواهي تشاهق وتبكي وادموعها مغرقه
وجهها : اكرهه ياهمس اكرهه اكثر شي في حياتي
وودي اشوفه ينحرق قلبه ويتعذب مثل ماحرق
قلبي وعذبني وبعد احبه اكثر شي في حياتي واموت
لو اشوفه مع وحده غيري اموت
همس بدت تهزها مع اعضودها : اصحي يمجنونه
اصحي يوسف كل يوم مع عشر وعشرين افرقت
ازيادة وحده متزوجها
وسن بقهر وغبنه : ايه تفرق اكيد تفرق ذوليك كلهم
ارخاص ازباله ماتسوى واهو يعرف انهم رخيصات
بس هذي زوجته يعني اكيد وحده محترمه وبنت ناس
همس غضبها تصاعد لذروه : هالرخاص الي
تكلمين عنهن يوسف الوصخ ارخصك اكثر منهن
وسن بقهروانهيار : بس بببببس خلاص ذبحتيني
اسكتي اسكتي ماعاد ابي منك شي بس اسكتي
همس اشفقت عليها وبحزن : بس انتي خلاص بكره
ادق على غزل واجيبلك الاخبار
وسن انتعشت فجأه ومن بين ادموعها : هالحين
دقي تكفين بس اسئليها وسكري على طول
همس انقهرت منها للمره المليون : صاحيه انتي
ادق على الخلق الساعه ثنتين الفجر وانشد عن
يوسف وحرمته وسن اصحي حرام عليك الي
تسوينه في نفسك وفينا ترا جبتي كرامتنا كلنا في
الارض بسبب هاليوسف الزفت يكفي اخوك فراس
ماعاد يطل في وجهك بسبة هاليوسف لاتذبحينه زياده
___________________
جالس على سريره لابس ثوب كحلي وغتره بيضاء
وواضح من مظهره انه متجهز للطلعه لكن حالة
الغوص في المشاعر الي يمر فيها في هالحظه تغريه
براي ثاني واهو يجمع الجديله السودا في كفوفه
ويستنشق عبيرها بسكر يعبث في برمجة قلبه
ويخليه ينبض بتسارع يشبه قرع طبول الحرب
يتخيل شكلها ويصورها في ذهنه يتمسك في
تفاصيلها الي يجهلها ويحاول يسرقها من ملامح
اهلها عيون مشاري ضحكة رعد
دفء وجه ابوها الي ماعرف اسمه شموخ صقر
عنجهية سياف انتفض من عمق احلامه بشر
الاسياف يخسي يكون له في تفاصيلها بصمه وشلون
تسلل لمساحه تخصها وشلون اقتحم تفاصيل
مايحقله لمس الريشه الي تبدع في رسمها بدى
عقله يجره لمساحه مظلمه يختلط فيها الوجع
بالتوجس بحرقة الجهل وعدم المعرفه بمدى قرب
سياف من بروق النضره الي شافها يعرفها زين نظرة
عشق وهيام ماتخطيها العين اه يالقهر عرفها قبله
وعشقها قبله والخوف كل الخوف من انه يوصل لها
قبله اعتصر جديلة الشعر بين كفوفه بقهر من
هالهاجس صارله اسبوع يفر شوارع الرياض
واسواقه ومحطاته يتصفح وجوه البشر يدور ملامح
اهلها بينهم ولاتوصل لشي ........قطع حبل افكاره
رنة الجوال الي ارتفعت تدق مد يده لمخباه طلع
جواله منه ورد من غير مايطالع في الرقم : هلا
: سم
: ابشر ربع ساعه واكون عندكم
سكر الخط ورجع جواله في مخباه
رجع يرفع الجديله لوجهه يستنشق منها نفس اخير
قبل لايردها لكيسها الازرق المنقوش بتطريز هندي
من عدة الوان خامة الكيس وفخامتة اوحت له ان
صاحبة الكيس ذويقه ربط الكيس محكم اغلاقه ثم
حطه برفق داخل الدرج المجاور لراس سريره سكر
الدرج وقام طالع من الغرفه مسكر بابها وقافلها
بالمفتاح ثم استدار بيطلع واصتدم بالي مكتفه
ايدينها على صدرها تشمله بنظرة استنكار
واضحه !!
______________________
*
*
*
|