[فيتامين سي]

#حفيدالشيطان
#الكاتبةورودالخالدي
البارت4
هاجر::
بقيت صافنه ع تصرفات ماما وحجيها لافوكاها تجرجر بيه وتكولي
روحي اوكفي يم خطيبج..
يا الله مدا افتهم شنو السر..ليش هيج كولهم موافقين ومكيفين وشنو هذا شهاب الشيطان شنو سحر عليهم لو شنو بالضبط..وصرت افكر يعني معقوله اهلي كلهم يفكرون صح واني غلط وليش ماما..هالكد مكيفة عبالك خطبني واحد من الملائكة حتى من حجيتلها على ابنها سعودي المدلل وكتلها كصكص شعره وضربه مهتمت..كل همها..شلون خطبني..من بابا..شديصير بالدنيا ياربي..بقيت من بعيد اباوع..على شهاب والمصيبة ماما راحت يمه مدري شنو حجت وياه بعدين باسته بخده..شنو هاي الي دا اشوفه شنو صدوك..لو جذب..لو دا احلم..بقيت صافنه عليهم هو..باوعلي من بعيد وشفت بعيونه ابتسامة انتصار ..حسيته..يستهزأ بيه لان الظاهر ماما حجت وياه وعرف هيه موافقة..اني دنكت بودي اختفي من المكان هسه شأسوي اذا اهلي كولهم موافقين لا وبابا مصر الا اعقد باجر شلون اتصرف اروح..اصرخ بوجوهم واكولهم ما اريدة زين اذا سويت هالشكل شنو راح يسمعوني ويلغون الموضوع لو هذا الشيطان راح يسويله مشكلة اكبر..

واني اشوف اخواني وبابا شخصيتهم كدامة حيل ضعيفة عبالك هو الآمر الناهي بحياتنا...وهمه ما الهم دور..حسيت ..انه همه فعلا..ضعفاء كدامه والا 3شباب..وبابا ليش يدزون عليه من النجف ويجي مناك لهنا حتى يحل مشاكلهم..اوووف راسي احسه حينفجر. شأسوي معقوله هاي قسمتي اتزوج بهالطريقة السخيفة..جنت احلم احب فد انسان ويحبني واعيش قصة حب حلوة تنتهي بزواجنا مجنت مخليه ابالي يطلعلي ابن عم مثل شهاب ويجي يؤمر وينهى ويتحكم بحياتي وياخذني مثل الاسيرة عنده..بينما جنت افكر شفتهم كامو كولهم حتى بزفون مهند وعروسته..لغرفتهم لان هو حاجز 3غرف بالفندق وحدة اله..ولعروسته ووحدة لام العروسه وحبايبها..وحدة لماما..ومن صعدوا..وزفو الناس راحو بابا كلي:
يله بنيتي خلي نرجع للبيت!
لا..لا بابا..ابقه ويه ماما الله يخليك..
بنيتي شكو باقيه؟
الله يخليك خليني يم ماما!.
وسمعت شهاب يكول لبابا:
عوفها عمي خليها يم امها الصبح اجي اني ومخلد نجيبها. هي وعمتي حتى نروح نعقد لتضغط عليها..
.وفعلا عافوني يم ماما وراحو..
جنت منتظرة ابقه وي ماما حتى احجي وياها..وبس دخلنه للغرفة كتلها:.
ماما هاي شسويتي!

شسويت ولج!
شلون توافقين على شهاب..لا فوكاها..تجذبين على خالاتي وتكولين هو داز امه حتى تخطبني ورايدني من زمان...والاسوء..ترحين تحجين وياه..وانتي طايرة من الفرح!
وليش ما افرح اصلا بودي اركص من الفرحة!
ليش..يوم هالكد انتي رايده تخلصين مني وتنطيني لهذا المعقد الي جنه شيطان!
يااااااا...عمت عينج ولج..شهاب جنه شيطان؟!ولج شهاب يكول للگمر غيب واني بمكانك..البنات فلفلن عليه وعيونهن مشالنها عنه..
هااا..يعني لان حلو انتي فرحانه بي!؟

شنو لان حلو..ولج انتي منتبها على نفسج شدتحجين..لج هذا شهاب..مو اي واحد..انتي متعرفيه زين هذا شمعه بيت حجي موسى..بعد ابو المفروض هسه انتي..مرفرفة من السعادة لان راح تتزوجين عين الكلادة!
يوم ياشمعة ياكلادة..شنو هالمنطق..البارحة جنتي تكولين لبابا لتكبر راس ابن اخوك..وهسه انتي الي دتكبرين راسه
لا يا ثوله..متوقعتج هالكد ثوله..ولج..انتي تدرين مرت عمج...تقي...شسوت من فنون حتى يخطب وحدة من بناتها ولج حتى للسحارات راحت وسوتله عمل وماخطبهن!
لهلدرجة!؟
اي لهلدرجة واكثروبنات خالاته كولهن رايداته وهو لابسهن..

ليش..يوم شنو هالمبالغة قابل منو هو..وشنو مميزاته حتى هالكد..مخبوصين بيه!
ديله بلله..تكول شنو مميزاته..هسه خلي نخلي حلاته وجماله ووجهة الي جنه گمر ضاوي على صفحة..وخلي نحجي..بشخصيته واخلاقة..وتربيته..وحجايته المسموعة وعقله الي يفرله ولايه ..هذا ابن عمج..ماكو مثله بكل عشيرة ابوج ولج حتى شيخ العشيرة يدز عليه اذا صارت طلابه..يعني الي..تاخذه..راح تاخذ سند الها وال اهلها..طول العمر..بعدين هو فوك الجمال وكل الحجيته ..زنكليل عنده..معرض مال اثاث بالنجف يطم عين الشمس..يعني راح يدللج دلال..والاكثر امه..هاشميه درة من الله فقيرة..لا تحكم الجنه ولا تتأمر عليها..وماعدها بس هو وطارق وزينب..بعد شتريدين احسن من هالقسمه..
شنو يدللني اني اصلا مدلله..ما احتاج دلاله!
يماما..دلال الاهل يفرق ودلال الرجل يفرق هسه تتزوجين وتفهمين كلامي!
ماما بس هو يخوف..عيونه تجدح..وصوته حيل..ثخين!
اي غير زلمة خشن شنو تردين تاخذين واحد مايع!
يوم..هو معقد..مبين وراح يتحكم بحياتي ويمكن اعيش طول عمري بتعاسه..
لا..لا متوهمه..ولج راح تعيشين ملكة ويا..وكولي امي كالت..
بس اني ممقتنعة..
ولج اكوم اخنكج..هسه..لتعيدين هاي الحجاية بعد

بس..بس هو يريد يعقد باجر!؟
وشكو بيها قابل انتو زغار شو هو عمره بالتلاثين وانتي فوك الخمسه وعشرين!
هيج بسرعة..نعقد يوم اني محبيته كلبي ممرتاحله!
دنجبي وسدي حلكج..وبوسي ايدج وجه وكفه واذكرج باجر عكبه بهذا حجيج..اذا ماكتلتي نفسج عليه وره العرس اني معتبه!
يعني شتشوفين اوافق يعني اروح وياهم باجر اعقد..
اي..نروح نعقد فرحي بعد امج..الله..ضاملج هالقسمه الحلوة ..الاهي محمود مشكور..
وتعشينا ماما نامت..واني الليل كوله منمت بس افكر..بيه لان خايفة منه اتذكره من جان يصيح عليه ويكولي أأدبج..شسوي ياربي امي مكيفه بي..وبابا بسرعة وافق..وحتى مخلد ما اله اي دور..لا هو ولا مهند..ومصدكت من صار الصبح واجه هو ومخلد وبابا اخذونه من الفندق كبل..ع بيت..سيد..ما اعرف شلون تلفلف العقد وصار بسرعة..حتى لساني مدري شلون كل للسيد نعم وانت وكيلي..عبالك..ماخذه حبوب مخدرة وشيكولولي اكولهم اي..
ورجعنا للبيت طبعا هو ابد محجه وياي يسولف بس ويه بابا وماما ومخلد..وكل لسعودي يحظر جنطته لان راح ياخذه ويا..وسمعته يكول لبابا:.
عمي شوكت يناسبكم اخذ..زوجتي!
فماما كالت:

وليدي شهاب انتو هسه بس عقدتو يعني لحجينه بمهر ولا شي..ولو احنا اهل والمهر..مو فد شي مهم وفلوسنا هي فلوسكم وفلوسكم فلوسنا..بس..
قبل متكمل قاطعها:
هاي شنو عمه شنو المهر مو مهم..طبعا مهم هذا حقها وسده ركبتها..بشرع الله وشتطلبون اني حاظر..
فبابا كال..واني شلون اتشرط عليك وانت ابني..
عمي هذا حق..مبيه مجال
ماما كالت:.انتو كتبتو بالعقد عشرين حاظر..و30غايب مو!
اي..عمه..
هاي هيه خوش مهر..
ماشي اتفقنا..اني راح احوللكم دفتر..عن طريق المكتب تجهز نفسها بيه..والذهب..وباقي الترتيبات عليه..
ماما فرحت:.
ها ادز دفتر..يعني بس تجهيزات..وانت تشتري..ذهب واثاث !
اي..عمه..
بس راح يصير عليك اكثر من 20
ولا يهمج عمه..بت عمي تستاهل..
الله يخليك وليدي والنعم منك
فهو كال:
مكتولي اي وقت يناسبكم شهر..يكفي!
اني رجف كلبي لا اراديا كلت:.
لا..لا شنو شهر..شنو هالسرعة..

لعد شكد تردين وقت بت عمي..شهرين اكثر!
ما اعرف بس شهر قليل!
ماشي خليهن3شهور..شتكولين!
سكتت..فماما..كالت:
اي 3شهور هاي هيه عمه..
اني هسه اروح هم يله اوصل للنجف..يله سعودي..روح كدامي للسيارة..
ماما شاورتني..
لج ثوله روحي وره رجلج شوفيه بلكي عنده حجاية وياج
فكتلها.:
ما اروح يعني شعنده من حجايه وياي..
طبج مرض..
وطلع هووسعودي راحو للنجف..وره اسبوعين وصلت الفلوس عن طريق المكتب..وبدت ماما تاخذني وياها نشتري تجهيزات طبعا الفلوس هوايه وماما مقصرت تجيب وتكوم بهالملابس والمكياج عبالك السوك..حيخلص..وحجزتلي عد صالون راقي..اطشر بهالفلوس وترجع لورة..بدون متهتم..

شهاب::
رجعت للنجف..وكبل وعدل ع..المعرض مالتي..لكيت طارق..مخبوص بالغرف التركية الى وصلت..وجبت وياي

اسعد وسولفت الطارق علية كتله اريدك تهلكة هلك بالشغل وتسوي زلمة خشن..وتخلي يبطل الميوعة والحركات..وبنفس الوقت اريدك تخلي يثق بنفسه وتعلمة ع السوك وحجي الزلم..واني هم فوك منه هم راح اسوي كل الي اكدر علية حتى نعدل اسلوبه..صح اني اذيته بس الي دا اسوي لمصلحته احس نفسي مسؤول عنه وبنفس الوقت يكسر خاطري..مو بس لان ابن عمي ومن دمي ولحمي بس لان اشوفه شاب مثل الوردة حرامات يروح من ادينه ويمشي بطريق الكيكية والمخنثين..ويوم بعد يوم حسيت تعبي وياه جاي يجيب نتيجة كام يشتغل وصار يحب شغله علمته يشد معارض..واريد اعلمة ينصب غرف مجنت انطي فلوس جنت اجمع يوميته وبين فترة وفترة اكوله صار عندك هالكد وفلوسك زادت..هو يفرح ويحس نفسه شاغول حيل تعلق بيه..الى درجه صار يكولي اريد اصير مثلك شهاب اريد الناس تحترمني وتحبني وتهابني..مثلك واني اشجعه واكله انت سبع وبطل..وفعلا كام ياخذ حجايتي. حتى حلاقته عدلها وبطل بعد ميطول شعره وحتى شواربه رباهن صار شكله مقبول..وطارق هم مهتم بيه وينصح بيه وخلاه يثق بنفسه..ويحس نفسه زلمة عليه الاعتماد حتى موبايلة شامرة...ميهتم بيه هالكد مملتهي بالشغل..وفرحان لان فلوس شغله جاي تزود يوم بعد يوم ويكولي شهاب اريد من ارجع لبغداد افتح مشروع واشتغل وحدي..واني اشجعه اكوله واني هم راح اساعدك واصير فوك منك شتحتاج اني حاظر..

وطبعا اني من جيت من بغداد اول شي كعدت ويه امي وحجيتلها كول الي صار بالبداية ضاجت لان عقدت..بدون علمها وبدين تقبلت الموضوع وكامت تسألني..شوكت تعرس وشوكت تجيب مرتك..خطية تريد تفرح بيه ..مثل كل ام بهالدنيا..

هاجر::
من يوم الي راح سعودي واني وماما بالنه يمه جان بالبداية يوميه يتصل بينا ويفتح كاميرا ونسولف ويوم بعد يوم صار ميتصل بس يدز رسالة..ويكول ملتهي وتعبان من الشغل حيل اشتاقينه اله صار شهرين ونص من راح..بعدين خابرته:
سعودي ليش متفتح كامره وكل مندوك عليك متجاوب:.
والله ملتهي بالشغل وموبايلي شامره..لان ارجع تعبان وانام..من وكت
سعودي افتح كاميرة خلي ماما تشوفك!.
لج شنو سعودي اني شنو زعطوط..اني اسمي اسعد
ماشي..بس افتح كاميره فدوة..
فتح كاميرة..شفنا استغربنا مربي شواربه وشعرة مرتب..ماما شهكت:
ولك سعودي شلون صاير بعد..عمري
يوم لتكولين سعودي اسمي اسعد
يمه فديتك..يا اسعد صاير تخبل..هو..
ضحك..
شكو ماكو ماما..
ماكو شي والله ملتهي بالشغل تعلمت اشد معارض..وهسه جاي اتعلم للغرف انشالله من اجي..لبغداد بعد كم يوم افتح مشروع زغير الي..
يااااا...مدا اصدك هذا وليدي الي ديحجي..صلوات..صلوات..
لا صدكي يوم شهاب راح يساعدني واني هم عندي فلوس..

خير من الله!
يمه..فديت الرجال المعدل الي..يفرح امه..
يله يوم تره حيل مشغول الله وياج سلمليلي ع الحجي وع الولد..
الله يسلمك بعد امك..
وسدينه التليفون..اني بقيت صافنه معقوله هذا سعودي اشو حتى صوته متغير صاير خشن..شنو هاي شسواله شهاب شنو..غسل دماغة لو سحر عليه..سعودي تغير وصار..غير شكل عبالك مو اخويه واحد ثاني..زين شوكت تغير يعني بشهرين ونص شهاب كدر يغير شخصيته والله امره عجيب غريب..

ومرت الايام وبقة اسبوع واحد على ال3شهور الي..اتفقنا عليها طبعا شهاب طول الفترة الي مضت ابد لا اتصل بيه ولا سأل..عني ولا عبالك اكو بنيه عقد عليها وصارت مرته شرعا صح اني ما احبه..ولا..انتظر يسأل عني بس ضل بخاطري..احجي ويه نفسي اكول ليش هيج حظي مصخم شنو ناقصني حتى اتزوج واحد معنده لا احساس ولا ضمير وعنده وجودي مثل عدمه..الى ان بقة ع العرس 3ايام اتصل على موبايل بابا..والي فهمته من بابا انه هو راح يجب ياخذني يوم الخميس..يعني يجي بيوم العرس ياخذني بصراحة ضجت اكثر وكلت البابا:
بابا شنو يجي ياخذني بيوم العرس كبل ليش اني هالكد ماالي قيمة واهلي ما الهم اعتبار يمه..اشو صار 3شهور من عقدنا مفد يوم سأل عني بالجذب مدز امه..واخته ع الاقل احس اهله رايديني..ليش مو من حقي افرح واسوي حنه ويجن..اقارب زوجي..كدام خالاتي وصديقاتي:
بنيتي حقج..بس هو يكول خليها تسوي حنه بيناتكم..واني هم سألته على..امه..كال..فد مرة تجي بيوم العرس.
خو يدزها ويه طارق شكو بيها
بنيتي هسه هالتفاصيل ما الها اهميه انتي سوي حنه ويه خالاتج وبناتهن وصديقاتج وافرحي..
اي بابا عندك ما الها اهميه بس عندي مهمه لان البنات حيسألني ليش ..مجني كرايب العريس ابقه صافنه بس اباوع بالوجوه ..بس موغريبه عليك بابا تحجي هالحجي..لان الي يقنع بنص ساعة ويزوج بنته بالهين كولشي عنده سهل!!!!!

شنو عنده سهل بنتي..اني منطيج لزين الشباب ممتيهج..لواحد ما اعرفه..يعني انتي متقصدة تضوجيني بهالحجي
لا بابا لا اضوجك ولا شي..صار الي تردو حيصير ومراح افتح حلكي..
عفت بابا وفتت الغرفتي بجيت..ثاني يوم الي هو يوم الاربعاء الحنه مالتي ماما عزمت كل اقاربها..وجوارينه بس اني معزمت صديقاتي..واخذتني للصالون طبعا اني مجنت حاجزة بدلات لان ماما اصلا اشترتلي بدله للحنه وبدله للعرس تصميم اوربي..حتى التسريحة كتلها راح تكون نفس تسريحة البنيه..الاجنبيه الي بالصور مال البدلات اني شعري اسود طويل وسرح..فعجبتني التسريحة البسيطة مال الاجانب..الي بيها ينشال الشعر كوله وتتخلى نجمه كريستال جبيره صفح وداير مداريرها البركع الشفاف وطبعا البدله مال الحنه تخبل لونها..بنفسجي حيل طوخ مايل للسواد وبدون ردن ولا علاكات..والبدله مال العرس هم مفتوحة حيل من المقدمة وظهرها مكشوف لان بدون ردن..المهم لبست بدله الحنه ومكياج يجنن وياها..طلعت غير شكل وسوينا حنه حلوة المفروض اني فرحانه بس بصراحة مجنت فرحانه هيج ابتسم بالجذب..ثاني يوم اتصل شهاب ع ماما وكلها ساعة ب2الظهر لازم اكون جاهزة لان الطريق طويل واخذتني ماما للصالون..وسويت التسريحة البسيطة ولبست البدله وكملت تقريبا ساعة 2الاثلث دك موبايل ماما..

الوو هاعمه احنا بالصالون..
وسكتت..بعدين كالت
اي..اي شكو بيها تعال..طلعنا من الصالون..
وهم سكتت..
اي..مخلد يدليك..
كلبي كام يدوك هذا شهاب جاي ياخذني من الصالون..ماما كالت:
شهاب جاي تحضري راح نطلع...اني وكفت انتظره شويه وسمعت صوت هوسه وهورنات كلبي كام يدوك اسرع جوي ماما فتحت الباب مال الصالون حتى يفوت يطلعني هو بس دخل شافني كبل صيح ع ماما:
هاي شنو عمه هيج راح تطلع وياي للنجف ظهرها كوله طالع وصدرها وزنودها..
عمه غير بدله عرس..
ياعرس..ياخره..لبسنها عبايه لا ابتلي بيها..
كمت ارجف هو طلع وسد الباب شكد عيب ام الصالون سمعته يصيح ع ماما كمت ارجف..البنيه شافتني جتي تركض..
اسم الله هذا شبي يصيح فزز البنيه..عموماعندي برنص مال محجبات هسه البسها فوك البدله ولا يهمجن..
لبستني البرنص..اني كلبي يرجف لازمتني العبره حتى ام الصالون كالت:
خطية شلون هبطها كامن ترجف المسكينه..
انتظروا بارت5