[لامارا]

#البارت_الاول

#زواج_منقطع

#بقلمي روسكان الجبوري

تنويه .. القصه حقيقيه
أنا وانت خطان مستقيمان
لكن القدر وضعك في طريقي
والنصيب جمعني بك ..

كم قاومت .. كم ابتعدت .. كم هربت .. منك .. في النهايه كنت َ المكتوب على جبيني منذ يوم ولادتي ..

أسمي ياسمين .. يسموني ياسه .. عمري 2‪4‪سنه
منفصله .. عندي طفل اسمه كرم .. مصاب بمتلازمة داون بأقل درجه من المرض .. ممكمله دراسه .. لحد السادس اعدادي .. اخذت شهادته وبطلت ..
يتيمه الاب من عمري ٦ سنين .. مالحكت اشبع من حنان ابويه وحضنه ..

عندي اخ واحد حيدر اكبر مني ب ١٣ سنه واخت وحده صابرين اكبر مني ب١١ سنه يعني اني اجيت ع كبر واخر العنگود المفروض المدلله اني بس تيتمت ومالحكت اتدلل بجال ابويه عافني صغيرة ..

امي رفضت تتزوج حماهه الي هو عمي واخذتنه ورجعت لاهلهه وبدت رحله الكفاح ..
مثل كل ام عراقيه حتلو مو ارمله امتهنت الخياطه كمصدر للرزق .. تخيط وتصرف علينه .. الحياة صعبه والي يطلع من الخياطه مجان يسد مصاريف اكل ومدارس وملابس وطبيب وباقي الاحتياجات يعني يادوب يسد الرمق بوجبات الاكل ويوم نتعشى ويوم لا ..
رغم رفض امي للزواج من واحد من عمامي حته يلمون لحمهم ماعرف شنو معنى هالعبارة بس جنت اكرهه ع كد ماسمعتهه منهم المهم .. رغم رفض امي عمامي معافونه احتووا اخويه حيدر ودبروله شغله ..
حيدر جان عمره 1‪9‪
سنه من توفى ابويه .. مرحله اولى كليه ادارة واقتصاد وبعد وفاة ابويه وعمامي الي دبروله شغل ترك الدراسه ومن ذاك اليوم وهو متحمل مسؤوليتنه ..

اختي صابرين جانت 1‪7‪
سنه مرحله ثانيه معهد معلمات .. بس بطلوهه وزوجوهه لابن عمي وسكنت غير محافظه .. نشوفهه مرة كل 6‪ اشهر وتتصل كل شهر مرة ظروف زوجهه صعبه بس حباب ويحبهه ويريد خاطرهه ..

أحجيلكم شويه عني .. ياسمين .. من تزوجت جان عمري 1‪8‪
سنه .. بوقتهه حظي ينضرب بي المثل .. اللي تندعي بالستر لبتهه تگول كون مثل حظ ياسه .. أحجيلكم شويه عن حظ ياسه ونصيبهه ..
تقدملي شاب جيران بيت جدي ويعرفون اهل امي من زمان .. مهندس ، جمال ،سمعه ،عائله ونسب ، ظاهريا اخلاق ووظيفه و
بيت عيالي طنان رنان والطابق الثاني شقه كامله كولهه اليه ..

حبيت زياد من اول ماشفته .. وكيفت بي ..
1‪8‪
سنه .. عرس وبدله ومكياج وأقصى همومي جان كون خطيبي حلو واللي تقدملي جماله كان فوق مستوى طموحي وتوقعاتي .. يعني اني حنطاويه ودمي معجون بحَمار بس من اصير يمه اطلع سمرا كثر ماهو يلهث بياض .. مرات من يجينه بيني وبين نفسي اقارن بين ايدي وايده .. وهم يطلعني كسر بالبياض .. تفكير مراهقه بعد ..
جمال الوجه والبياض والخ .. من الامتيازات الي تحددت ظاهريا ع اساس الشكل والمظهر والابتسامه الكذابه كان هو اي يخفي اسرار اكتشفتهه بعد زواجي اولهه بخله وياي فقط ..
يعني حسرة عليه الاكله الزينه .. صح شقتي وحدي بس ميتسوگلي أبدد ..

أضطر انزل لبيت عيالي بحجه اطبخلهم وبنفس الوقت آكل وجباتي وياهم وهيج گضيتهه ..

زياد شهرين وهجرني .. تماما هجرني .. وراهه طلع يشرب وبدت معاناة جديده .. يجيني سكران وفاقد ويشتغل الضرب بسبب وبدون سبب ..

بخل ، هجر ، شرب ، ضرب .. بعد الشهرين حللت وطلعت حامل .. حملي كان الضربه القاضيه الي وگعت ع راسي ..
خالتي ام زياد مچانت تتدخل أبد .. چنت اشكيلهه من ابنهه تجاوبني بأنو عادي شاب ومن حقه وانو كولنه أنضربنه وأنهانينه وصبرنه الى ان استعدل الرجال ومشى عدل ..

بين قوسين مچانت تنطي بأبنهه عاذرتهه حقهه ابنهه بس الي مينعذر نظرتهه السطحيه الفوقيه أليه وكأنه آني مو من مستواهم ولا كأنه هي الاجت خطبت محد ضربهه ع ايدهه ..

وضعية زياد أستمرت وساءت أكثر .. ذله وتجاهل وأهمال وخيانات وآني لسه عروس ما صار لي 4‪ اشهر ع زواجي ..

يمكن جنت مستعدة أتحمل ألاهاين والضرب وحتى الخيانه بس كون يشوفني ..
تعرفون هذا الشعور .. داخلك يصرخ .. شوفني .. حس بيه .. بگلب طفله چنت تحبه .. رغم كولشي يسويه بيه .. من شان يضربني وأنام بفراشي من المرض والالم .. جنت اتمنى يگولي شلون صرتي .. ابجي لان ميكولي شلونج من يجي من دوامه ويشوفني مكومه بفراشي كاتلتني الصخونه ومحد بحالي ..
مثل جمبذايه ( ورده توهه دتفتح ) اخذني وفتحت بيده وذبلت وبأهماله قتلني بأوج شبابي ..

جنت اشوف وجهي بالمرايه عبالك صورة رماديه بدون الوان شاحب بدون حياة بدون روح ....

عانيت اهمال فضيع منه .. اشوف خياناته ومحادثاته ويه البنات بعيني .. يحجيلهن عني .. بارده ، طفله ، متعرف شلون تغريني ، فاهيه مقصرة .. انطحن طحن .. احاول أرضيه بس يرفضني ..
أحاول أصالحه ويصدني ويفشلني ..
عمري مراح أنسى نظرات الاشمئزاز ع وجهه من اتقرب منه .. حطمني .. هز ثقتي بنفسي .. كسرني .. طعن انوثتي .. شككني بكل مؤهلات جمال املكهه كأنثى ..

اني شويه طويله وشويه متروسه برشاقه وترتيب بمنحنيات جسمي .. وجهي هم طويل ، شفايفي محددة ، حواجبي غليظه واني محددتهن ومبقيتهن ع ثخنهن و بيهن شمرة حلوة وشامه فوگ شقتي ..
هو اي يشبهوني بالممثله اللبنانيه نادين نسيب نجيم ..

أهلي صح جنت احجيلهم عن الي يصير وياي ومرات اجيهم مضروبه ويشوفون بعينهم بس جانوا خارج قوس ابد ميتدخلون عبالك ماصدگوا زوجوني وخلصوا مني .. معقوله هيج اني جنت ثگيله عليهم ..
أمي دومهه توصيني بالصبر .. الج بالصبر يمه ع ساعه ربج يفرجهه ..
بس احنه مو انبياء ولكل انسان حد وطاقه تحمل لهذا الحد وتخلص ..

واني طاقتي خلصت من شفت له فيديو مصورة بجهازة ويه وحده .....

للحكايه بقيه ..