[لامارا]

.

#أزمة_أحساس

قصه اجتماعيه ..
يقال ان الاهتمام نصف الحب .. ماذا لو عانينا الهجر والنبذ والاهمال .. هل سنتحمل اعباء اكمال مشروع زواج فاشل ؟؟

Roskan_aljibory

#البارت 2‪

#زواج_منقطع

#بقلم روسكان الجبوري

رضينا بالهم والهم مارضى بينا .. عبارة تگولهه بيبياتنه دائما .. هالعبارة اختصرت هذا الچابتر من حياتي ..

زياد چان نايم واني اعرف الباسورد مالته بدون ماهو يدري ..
فتحت الموبايل افتش بي .. هاي صارت سولتي كلما تصير لي فرصه والمبايل يصير گدامي ..

تخبلت من شفته .. كل الكلام ، كل الغزل ، كل التفاصيل الحميمه الي تصير بين مرة ورجال مزوجين مسويهه وياهه .. بدون وعي وهو نايم جريته من زيگ تيشرته وآني اصيح ..
لك هاي شنووو ؟
ولك سافل ناقص بشنو قصرت وياك ..

فز مخروع من نومته ..
هاي شكوو شبيج ..
صارت عيونه ع ايدي .. ايدي ترجف ولازمه الموبايل والفديو بعده يشتغل وصوته وصوتهه وصوت الاهات لععععبت نفسي ردت اذب من راسي ..

جر الموبايل نتر من ايدي ..
انتي منو سمحلج تمدين ايدج ع جهازي ..
هذا الهامك ؟؟!!

احاجيه واجر بتيشرته عت ..
انتي منو وتحاسبيني ..
آآآآنييي زوجتك .. فاهم لو لا .. بشنو قصرت وياك گولي شنو الماسويته الك .. شبيه شناقصني ؟ جاوبني ..
ضحك بأستهزاء ..
هاي منو التحجي ؟ الحايط البارده الحجارة .. لا وفوگاهه تسأل امشي ولي بابا امشي ولي من وجهي لاانعل والديج هسه ..

كلماته لطمتني ع حلگي .. دموعي تشرح حالي .. تصب بدون تعب بس بوجع يعصر گلبي عصر .
گلبي يوجعني من حچاياته لان لحد ذيج اللحظه واني احبه ماريد اصدگ عيوني .. ماريد اكذبه .. بس هو من صلافته مانكر .. من سألته مانكر ..

منو هاي الادبسز الي انت وياهه ؟
انجبي واحترمي نفسج تسواج وتسوه اهلج .. هاي حبيبتي الي ناوي اتزوجهه ..
جمدت الدموع بعيوني .. اكو كلام من ينگال تتمنى ميت ولا سامعه .. تتمنى مضروب الف مرة مسبوب الف مرة ولا سامعه ..

وآني ؟؟
انتي منو وشنو .. جابتج أمي وفرضتج عليه حتى لا أتزوج حبيبتي بس هسه خلص .. ماكو داعي ينضم شي بعد مادام عرفتي فمن اسبوع الجاي اروح اخطبهه ..

الكلام الكلام .. سچاچين تندچ بگلبي بدون رحمه وحده ورة الثانيه ..
من قهري غلطت عليه غلط ماصاير ..
انت ناقص .. انت ذرة الرجوله ما عندك .. انت ..... انت ..
ما حسيت الأ وضربني ع وجهي ..

رغم جنت اغلط بلاوعي ومتوقعه يضربني لان هاي عادته وتعودت عليهه بس مدري ليش مابتعدت عنه ولاحميت نفسي .. يمكن جزء من داخلي جان يريد يموت ع ايدة ويخلص من هالعذاب والنار الي جاي احسهه تحرگ بصدري ..
وگعت بالگاع حسيت بطعم الدم بحلگي مديت ايدي ع وجهي خشمي طاگ دم ..

گاملي من الجربايه سحلني من الگاع وطگ راسي بالحايط مرة وثنين وتلاثه وأذاني تسمع اشكال الوان غلط وفشار يمس شرفي وشرف اهلي .. تقسيم بعمري مسامعته .. فعلآ الثقافه والوعي مو بالشهادة والمظاهر ..

بعد المرة الثالثه ماعادت عندي قدرة احسب اذاني انصمت صار بيهه صوت وشششش والدنيا اظلمت غوشت عيوني وراهه فقدت الوعي ..

صحيت بالمستشفى .. راسي ملفوف حلگي مورم .. نازفه هو اي .. بس مفاقدة الطفل .. شوف رب العالمين ماعرف شنو كاتبلي .. كل الضرب الي اكلته وماوگع الطفل .. ماعرف هالطفل راح يصير لي سند لو يكسر ظهري ..
فتحت عيوني شفته هو وامه واگفين والممرضه تحجي وياهم .. رجعت غمضت ماريد اشوف شكولهم ..
اسمعهم يحجون ..
الممرضه ..خابر ع اهلهه خطيه تون تريد امهه ..
جاوبهه بنتر ..
ماعدهه اهل ..
لسان حالي يكوله بعد جوابه .. شالك الله ..
ام زياد .. هي شلون صارت هسه ؟
الممرضه .. طفلهه بخير بس مهددة بالاسقاط .. لازم تظل نايمه ع ظهرهه لحد ولادتهه وتراجع طبيبه اختصاص تسويلهه ربط .. هسه الطبيبه تجي تشوفهه ..
زياد .. ياطبيبه .. مابيهه شي نريد نطلعهه ..
الممرضه .. اخي شتطلعهه .. البنيه معناه ولازم محضر وشكوى وتجي الشرطه تحقق بالموضوع ..
زياد .. غير أكلب الدنيا ع روسكم ..

گام يصيح أجتي الطبيبه تريد تجيك وضعيتي وهو انهد بيهه والطبيبه رزلته رزاله تسوى عمرة تالي طردته وصاحت الامن عليه يجون ياخذوه ويطلعوه بالقوة ..

جروه طلعوه وامه لحگته ..
فتحت عيوني من امنت راح انشحت من يمي هو وامه ..
الطبيبه .. ها ماما سلامتك بشنو تحسين ؟
بكل مكان موجوعه دكتورة ..
انهضمت من سؤالهه وبسرعه دموعي جرت . . عفيه دموع شگد رخيصه وتنزلين بسرعه ..
جاوبتني ..
الله يساعدج حبيبتي .. هسه تجي الشرطه واحجيلهم كولشي صار ..

ماريد احجي شي لاحد .. اريدج تساعديني اطلع منا قبل لايرجع هذا العار ..
ماما ميصير .. بعدج تعبانه .. هسه الشرطه ع جيه لازم ياخذون اقوالج .. هذا عنف منزلي ماما .. تكسرين رگبته لو اشتكيتي عليه ويخيسوه بالسجن .. لاتسكتين اخذي حقج منه ..

كتلج ماريد شي بس ساعديني اطلع منا .. هو وينه القانون بالعراق حته المرة تاخذ حقهه من رجال ..
حتلو ماما ع الاقل ينسجن ..
لتخافين عليه واصل واهله فلوسهم سابقتهم محد يسجنه واهلي هم يخافون من الفضيحه فلا راح يشتكون ولا شي ..
لا اله الا الله شلون عقليات هايه ..
ماجاوبت بعد .. الوجعه متوجع غير راعيهه حتلو هي متعاطفه وياي ..

نترت كانوله المحلول المغذي من ايدي طفر دمي ساعدتني الطبيبه .. ردت اگوم دخت .. لزمتني سندتني رجعتني للسرير گعدتني ..
زين خلي اصيح الموظفه تاخذلج صور .. اسويلج تقرير طبي ..
عگدت حاجبي شسوي بي ..

شسوي بالتقرير ؟
ع الاقل تطلگي منه .. ناويه تتطلگين مو ؟
صفنت بوجهه ممفكرة بالطلاگ ابد .. هي كملت ..
القاضي من يشوف تعنيف وتقرير طبي عن الاضرار الصحيه وانتي حامل وكولشي مثبت بصور يطلگ بسرعه وكامل حقوقج محفوظه الج ..

قنعتني .. شويه واجتي موظفه تابعه للشرطه اخذت لي صور وسألتني شكم سؤال وراحت ..

اسمي دكتورة يقين محمد أم رهف مري عليه بعد يومين واستلمي تقريرج ..

ع مضض وبألحاح مني ساعدتني اطلع من المستشفى وأجرتلي سيارة تكسي ورحم الله والديهه انطت للسايق حته الاجرة مالته لان اني كولشي مشايله وياي ..

ودتني السيارة لبيت اهلي ..
من الباب شافتني امي ضربت ع صدرهه ..
اني دموعي تشرح حالتي ..
بطني شعلاتهه وملابسي بيهه دم وجايه بطرگ الشحاطه والعبايه الاسلاميه ع دشداشه البيت ..
ردود الفعل من اخويه وامي وباقي التفاصيل ماريد اذكرهه لأن شي مخذل ..
حالة نموذجيه لأهل عراقيين بس يريدون الستر لبنتهم بأي ثمن و اكيد ع حساب قليله الحظ الي تتسمى بنتهم ..

يحسسوني آني جنت عريانه وزياد العار جان ساترني ..
باقي الاحداث الي صارت .. سكوت اهلي عن الي صار اليه اقصد ماشتكوا تماما مثل ما توقعت وگلت للدكتورة .. صح اخويه راح هد ع بيت عيالي بس هيج ردة فعله جانت فورة دم وغيرة اخو ع اخته من شافني مضروبه ومدمايه وفوگاهه حامل ..

بعدهه مثل ما شويه شويه بدت تطيب جروحي وتندمل وتختفي والكدمات يتغير لونهه من بنفسجي وازرگ الى لون جسمي الطبيعي همه هم نسوا الي سواه زياد بيه وبدوا يلحون عليه ارجعله خاصة اجوي اهله مرتين يريدون يرجعوني ..

جنت رافضه الرجعه اله تماما .. تعهد بعد ميضربني بس المسأله مو مسأله ضرب وبس ..

سولفت لاهلي عن الفيديو .. مو ماصدگوني بس اختاروا ميسمعوني .. يصمون أذاناتهم عن الي سمعوه مني .. من اجه ويه اهله واهلي واجهوه بالموضوع نكرة ولفقلي قصه عن صديقه واني ظليت صافنه ع قدرته الفضيعه بالكذب والمسكنه .. كان يحجي كلام اكبر من راسه .. وينه زياد المهندس الي جان يقسملي تقسيم مال فشار العفطي ابن الشوارع ميلحگه بي ..

اخ لو عندي جهاز حديث .. لو عندي ذرة عقل بذيج اللحظه جان يمكن نقلت الفيديو لجهازي وماواجهته بلحظتهه لان عذرة جان بتكم ممتربايه هيج وهيج غلطت عليه تقبلوهه انتو واني لهذا السبب ضربتهه ..

ظليت مصفصفه لاأخذ ولا انطي ..
تعجبت ع كميه الحقارة والصلافه والمراوغه الي عندة .. تحسه ذيب يراوغ مينگدرله ..

للحكايه بقيه ..