[هاجر جوده]

يتبع بارت 9



استغربت الطفله إلي الجالسه ...اقتربت تسلم مدت يدها : كيفك مريم
قطعت جملتها لما رفعت رونق عيونها وناظرت الجازي ببرود !
الجازي رجعت خطوه للخلف وبلعثمه : اسفه ظنيتك مريم تشبهينها
ام فياض باستغراب: وش فيك مب عارفه مريم !
اكشفي يا مريم ما في احدغريب !
رونق تحس سكاكين بحلقها نطقت بصعوبة وهي تمد يدها للجازي : انا رونق وهذه ابنتي رح اجلس عندكم
لفتره اتمنى تواجدي ما يضايقكم!
الجازي ناظرت يد رونق الممدوده بالهواء نفس عيون مريم لكن في اختلاف لون البشره حول العيون مختلفه..معقول انها تقرب لمريم ...بس ليه جايه لعندهم ومن اي باب جايه تسكن عندهم !
ومين هالطفله إلي معها !
ناظرت عمتها بتوجس نطقت : مين هذه ؟!
ام فياض رفعت حاجب بتذكر لما تكلمت ام راكان انه طليقة نايف اسمها رونق بس ليه جايه لهنا :!
وش صدفة الشبه بينها وبين مريم !
ناظرت رونق وللحين متغطيه: المعذرة يا ابنتي بصفتك وش جايه لبيتنا ما في بيننا قرابه !
وليه مغطيه وجهك ترى ما في احد هنا !
رونق مطت شفتها بروح ميته ..يا الله صعبه تنطق تقول انا ابنتك ..تحس ما هي ضابطه ابدا......نطقت بسخرية من هالحياه ...ما تدري اذا عندها عيال غير فياض او لا : اعتبريني زوجة ولدك الثاني وهذه ابنتي !
الجازي رفعت حاحب وتحس اصابها صمم بأذانها ما اهتمت لكلامها .إلي هزها صوتها وتشابه العيون اذا ما كانت مريم مين رح تكون ؟!
ام فياض بغضب : الزمي حدك وتكلمي مثل الخلق !
ليه خلصت البنات حتى يتزوجك فياض !
رفعت حاجب رونق ما قالت انها زوجة فياض كيف فهمت الحرمه السالفه كذا !
دخل فياض لما سمع صوت امه الغاضب ..تقدم منهم بضيق وهو متأكد رونق جابت العيد بكلامها وبحده نطق : وش فيه ؟!
ام فياض بغضب: مين هذه إلي محضرها هنا !
اي احد تدخله البيت المفروض تعطينا خبر ويا ليت محترمه نفسها !
فياض كتم غيضه : وش صاير ؟!
ام فياض بقهر: تقول انها زوجتك !
عض غلى شفته بقهر وناظرها :وش هالكلام إلي قلتيه !
وقفت رونق بهدوء وبنبره مخنوقه ما عادت تتحمل شيء من حولها : وش تبغاني اقول !
اقولها ترى انا ابنتك الميته فجأة صحيت لقيت نفسي عايشه وعندي بنت !،
عادي لا تنصدمين ترى الوضع ريلاكس !
رونق ناظرت الجازي بسخرية : يقولون انا ابنتك المخطوفه ...بصراحه نسيت اسمي إلي سميتوني فيه ... الاهم انا اسمي رونق ..تشرفت بمعرفتك
هذه ابنتي قدر !
ناظريها تشبهك سبحان الله !
والحين ابغى مكان انام فيه
قاطعها فياض بغضب : رونق !
ناظرته بملل : نعم !
رد بغضب استفزته بقوة : نعامه ترفسك !
كذا تكلمين امك !
ناظرته بعيون لامعه خلاص تبغى تبكي ما عادت تتحمل شيء !
ما تدري لاي حد وصلت من البلاده امها امامها ومع ذلك ما تحس بمشاعر تجاهها !
لانها بكل بساطة تكره كل إلي حولها ..تكره نفسها !
قرفت حياتها ..هذه الحياه الاجمل إلي كانت تطمح لها !
ام فياض بغضب : انت واياها وش تتكلمون!
تكلموا عدل والا قسم بالله
قاطعتها الجازي وهي تناظر رونق وقلبها يدق بقوة:
مستحيل
وبقوة ناظرت فياض: انت متأكد ؟!- وليه ما احد خبرني؟!
كيف
وبصوت مرتجف كيف قالوا ماتت !
وبصراخ : تبغون تجننوني!
حسبي الله عليكم حسبي الله
تركتهم وغادرت المكان وصوتها الغاضب بالمكان !
رونق بملل من الوقوف :متى تخلص هالدراما ابغى مكان اجلس فيه
طالعها فياض بغضب ....لكنه ماسك نفسه :تعالي معي!
ام فياض بمقاطعة : لحظه وين
قاطعها : بعدين افهمك يمه
بعد لحظات كانت واقفه عند باب غرفه تكلم بحزم : ادخلي هنا بعد ما ترتاحين لي كلام معك !
ما ردت وهي تدخل الغرفه بخطوات ضياع لحياتها ..ما ناظرت الباب لما تقفل خلفها !
ناظرت المكان بضياع ..تحس خلاص ضاعت !
هذه اخرتها تعيش عند زوج ام يتحكم فيها او ترجع لاب زوجته تتحكم فيها!
بكلا الحالتين تعيش وكأنها غريبه بالمكانين ! عبء ثقيل على امها وعلى ابوها !
مطت شفتها وهي تستلقي على السرير بتعب من موقف امها !
المشهد إلي لازم يكون هو الأمثل انها تستقبلها بالاحضان لما تعرف ما هو تجلس تدعي وتتحسب !
تحس في حلقه ناقصه بالسالفه !
ناظرت وهي مستلقيه قدر واقفه تناظرها ...مدت يدها بتعب : تعالي يا ماماحنا كذا ما لنا حظ جميل مع الناس ...ما ادري العيب فينا والا فيهم !
استلقت قدر بحضنها ورونق تمسح على شعرهاوهي مغمضه عيونها !
**
•••
**
ام جواد جالسه عند راس جواد وتمسح على شعره وهي تبكي: ليتها مارجعت ! يا ليتها فعلا ماتت!-
بسببها كان فقدتك يمه!
وفوق هذا الناس اكلت وجهي ما اعرف كيف انتشر الخبر يقولون كيف متزوجه عمها !
صرنا على سيرة كل لسان من معارفنا !
ابوجواد بقهر من هالسالفه: خلاص يا ام جواد تراك تقهريني بكلامك وتقهرين جواد!-
الجازي تمسح دموعها بصمت بدون اي تعليق،!
مريم متمسكة بذراع الجازي وتحس بكره لشق التوام بسببها كادت تفقد ابوها !
ابوها بنظرها كل شيء بالدنيا !
ما تتخيل انها تفقده !
جواد بصوت متعب بعد ما نجى من جلطه لو تأخروا كان راح فيها : انا بخير يمه ما له داعي تقلقلين!
ام جواد تمسح دموعها : الحمد لله !
غمض عيونه بتعب ...للحين نار بقلبه ابنته من لحمه ودمه تفضل فياض عليه !
اخذ نفس وهو يحاول يطنش السالفه الدكتور حذره من اي شيء يضايقه للحين ما تعدى مرحلة الخطر!
طرق الباب ودخل بدر بتردد : في رجال يبغى يزور جواد!
ابو جواد بهدوء: جلوسكم هنا ما له داعي الحمد لله وضعه تمام !
خرجت الحريم بعد ماوصت ام جواد ولدها ما يتضايق وكل شيء يهون !
لحظات بعد خروجهم دخل بخطوات هاديه والضيق باين على ملامحه وبصوت مخنوق اقترب من جواد : ما تشوف شر يا ابو عبدالله !
حس بنفور من جواد ...قبل رأسه باحترام: ربي يعافيك من كل أذى
وبعدها اقترب من ابو جواد وسلم عليه وهو ملاحظ ما تحركت شفايف جواد ملتزم الصمت وما رد عليه !،
ابو جواد بهجوء،: حياك الله يا ابو وسيم !
اجلس !
جلس فياض بهدوء : الله يحييك يا عم !،
التفت على جواد بحنين : كيفك الحين يا صديقي!،
جواد بضيق وقهر : لعبت بعقل البنت وسحبتها عندك
قاطعه فياض بصدق: اقسم بالذي رفع سبع سموات ما ادري عن شيء وتفاجأت انها رح تسكن عندنا !
وبعدين انا ما ارضى تسكن عندي وتترك بيت ابوها دام ابوها يعاملها بالطيب وبنفس الوقت ابوها ما يحرمهامن امها !
ابو جواد بعتب: ليه تستقبلها يا فياض ؟! حنا اهلها واولى فيها !
رد بهدوء: ادري يا عم بس لو ما استقبلتها كانت تبغى
تروح لبيت جدها وليد
انا قررت اخذها لفتره تهدأ النفوس والبنت تستقبل الفكره ويكون بينكم زيارات وبعدها ترجع لكم !
يمكن البنت الحين مصدومه ما ادري لكن تحسها ما ادري
سكت ما يدري وش يوصفها
لكن للحين مصدومه من الاحداث
جواد بقهر :والحين جاي تتشمت فيني يا فياض !
فتح فياض عيونه باستنكار: خاف ربك يا رجل !،
وقسم بالله لما سمعت بالخبر طلعت مباشره للمستشفى ...صحيح انقطعت علاقتنا لكن تبقى الصديق إلي ما أنساه طول الحياه!-
انا حاولت من قبل معك نرجع مثل اول لكنك رفضت وتعاملني كأني عدو ...نسيت ايام الصداقه بذي السهوله !
ابو جواد بهدوء : صادق يا فياض الصحيق وقت الضيق
جواد ناظره بتعب : متى ما رجعت لي ابنتي وقتها انسى الماضي
قاطعه فياض :،انا موافق لكن بشرط ما تحرمها من امها ولا تكون قاسي و اناني مثل الايام الماضيه!
كانت حجتك تبغى تقهرها مثل ما ضيعت البنت والحين بناتك التوام موجودات ما لك حجة بعد اليوم والا كلامي غلط ياعمي
ابو جواد هز راسه : مضبوط كلامك يا ولدي وحنا ما رح نقف عثره امام البنات وامهن !
بس الاهم الحين ترجع لنا !
الناس اكلت وجههنا !
بيت ابوها موجود وتسكن عند امها. !
فياض بهدوء : رح ترجع لكم بس اعطوني مهله كافيه حتى ترجع بدون مشاكل !

**
••
**
؟*
**
ام لؤي مطت شفتها بقهر :والله لو اشوفها الا من شعرها هالقرويه ..للحين ما نسيت جنونها مع لبنى!
انا اتوقع انها مريضه نفسيه !
ام ناصر بضعف : تبغى ابنتها اكيد رح تتصرف كذا !
ام راكان : يا خالتي انت دوم ترقعين عن الناس !
بس هذه البنت اغلاطها واجد وما لها حسنة تشفع لها !
تخيلي اتصلت بام فياض اشوف الاوضاع بما انها عندهم ..تخيلي قليله الحياء تقول لهم انها زوجة فياض!
استغفر الله !
الظاهر انها تعودت على زواج المحارم !
تقول ما قربت على امها بس مدت يدها وكأنها عابره سبيل !-
يا الله معقول في بنات بذي الأخلاق الساقطه !-
ام ناصر هزت راسها : ما نبغى ذنوب يا ام راكان يكفي !
نزل من الدرج بعد ما سمع كلامهم عنها ..صحيح ما تهمه لكنه يحس من ناحيتهاشفقه على حالها ووضعها !
وما يلوم اي تصرف منها لانه بنظره شيء طبيعي هذه التصرفات تظهر بعد الضغط إلي شافته !
تنهد وهو ناوي يتوجه للمستشفى !-
**
**
**
**
الجازي جالسه تسمع لفياض وتمسح دموعها بصمت ..رفعت نظرها له وبحرقه : حسبي الله عليه نايف ما لقى غيرها !
ام فياض تأثرت : لا حول ولا قوة الا بالله !
الجازي : والحين وش رح يكون
قاطعها فياض : رح تجلس هنا فتره حتى تتأقلم على الوضع وبعدها ترجع لاهلها بشرط ما يمنعوها عنك!
مطت شفتها الجازي كذابين يمكن خدعه منهم حتى تتعلق فيها ويحرمونها منها !
خلاص اكتفت منهم !
مارح تقع بالفخ رح تكون حذره وتضع على قلبها حجر !
فياض : الجازي!
ناظرته وهي تمسح دموعها : ما فيني شيء-!
هز راسه بضيق وهو متأكد رجوع رونق رح يقلب حياتهم للاسوأ ...الجازي حساسه ورح تحسس من اي موقف يصدر من رونق ..بنفس الوقت رونق قويه وما يضمن انها ترمي كلام !
ام فياض وقفت: اروح اتفقدها من لما دخلت الغرفه ما طلعت !
الجازي تنهدت بألم ما تبغى تتعلق وتنفجع كافي صدمات !
ناظرت فياض ودموعها رجعت تنزل بعد خروج عمتها : وقسم بالله احساسي انها عايشه ما ماتت !
يا الله كيف الدنيا !
تجمعنا يوم وتفرقنا سنوات !
فياض بهدوء: انت لا تندفعين مره وحده بمشاعرك لها البنت للحين ما شفنا خيرها من شرها !
~~
~~
~~
دخلت ام فياض بعد ما طرقت الباب ...رفعت حاجب وهي تشوفها جالسه تصلي !
ناظرت جهة السرير شافت الطفله نايمه باستغراق !-
بعد ما كملت الصلاه ....ناظرت ام فياض واقفه عندالباب ! نزلت نظرها وهي تحس بالضيق من احساس الغربه إلي يحاوطها !
ام فياض تنحنحت لما شافتها نزلت رأسها والشبه بينها وبين مريم واضح : تقبل الله
هزت راسها رونق بصمت!
تابعت ام فياض كلامها وهي مستغربه الهدوء إلي نزل مره وحده عليها : تبغين عشاء
هزت رأسها بالرفض وبهمس حزين : مشكوره
ام فياض رفعت حاجب: تعالي اجلسي معنا
قاطعتها بنفس الهدوء الحزين : قدر نايمه الحين خليها مره ثانيه !
مطت شفتها ام فياض : براحتك !
غمضت عيونها للحظات بعد ما قفلت باب البيت ....يا الله هنا في صدرها وجع للحين ما خمد !
حضنت نفسها وهي تحس بداخلها حزن عميق يفتت اضلاعها !-لازم تكون اقوى وتلبس قناع البرود وتكمل دراستها وتبعد عن كل هالعالم وتعيش حياه جديده واجمل!
مازال عندها امل ضعيف ينبض «القادم اجمل» **
**
**
**
رجعت ام فياض وجلست بهدوء !
فياض باستفسار: نايمه؟!
هزت راسها بالرفض: كانت تصلي قلت لها اذا تبغى عشاء بس ما قبلت ..قلت لها اذا بغت تنزل تجلس معنا تقول ابنتها نايمه خليها مره ثانيه!
وقفت الجازي سرعان ما مسك فياض يدها : اتركيها الحين تلقينها تبغى تجلس لوحدها حتى تستوعب المكان والاحداث !
ناظرته ورجعت جلست بعد م زفرت بضيق!
ام فياض:-سبحان الله وهي كاشفه نفس ملامح مريم بس مريم أبيض واجمل!
تحس الجازي قلبها طار حتى تطلع لها ..وقفت مره ثانيه لكن فياض بعصبيه: قلت لك اتركيها !
صدقيني الحين تضايقينها
قاطعته بقهر : انا امها
رد وهو يجبرها تجلس : هنا المشكله انك امها تراها ما هي معترفه بام ولا بأب !
ام فياض: وانا مع فياض ما انصحك تروحين حسيتها ما تبغى تشوف احد !
باكر ان شاء الله نشوفها ونجلس معها ونعرف اطباعها !
**
**
**
**
من بعد الفجر ما نامت وهي جالسه على كرسي قريب من النافذة وبيدها كتاب تقرأ فيه ...تبغى تخرج عن احزانها وضيقها !
حضنت الكتاب بعد مرور الوقت ...غمضت عيونها وهي تستذكر لشكل الجازي «امها»
قصيره بشكل ملفت وخاصه مقارنه مع فياض !
ما تحس فيها شبه بينها وبين امها
لكن الشبه واضح بقدر ..سبحان الله نفس العيون !
بداخلها صراعات لحياتها الجديده !
هل المفروض تنبسط وتحس بالسعادة بعد ما التقت بأمها وابوها !
وش هالبرود إلي يغلفها ...مشاعرها ميته ما تحس بالفرح والسعادة .الا التعاسه والكآبه يغلفها !
ابوها يبغاها تعيش عنده لكن بداخلها رفض اكيد يبغى يضربها مثل ما ضربها اول مره !
رح تفكر تنتقل لبيت جدها ابو امها افضل لها !
هنا ما رح تأخذ راحتها بوجود فياض !
ما هو مجبور يستقبلها في بيته !
قاطعها طرقات على الباب ...وقفت بهدوء بعد ما وضعت الكتاب على جنب
توجهت للباب فتحته بهدوء..ناظرت الشغاله إلي تتكلم بسرعه: وقت الفطور!
تحس بالاحراج كيف تجلس معهم على الفطور ...وكأنها فعلا متطفله !
اخذت نفس وبصعوبه نطقت: مشكورين ما نبغى ابنتي نايمه!،
هزت راسها الشغاله بلا اكتراث وغادرت !
قفلت الباب واستندت عليه بألم من شعور الغربه ...
اقتربت من السرير وهي تشوف قدر استيقظت وتفرك عيونها بانزعاج !
تحس نفسها تسرعت قدر لازم تفطر !
وش تعمل الحين !
وكأنهم من باب العتب ينادونها !
مب يقولون هذه امها !
ليه ما هي مهتمه لوجودها !
مطت شفتها بسخريه متزوجه وعندها عيال وزوج وش تبغى فيهم !
نزلت رأسها لمستوى قدر وبصوت طفولي: تبغين فطور
هزت راسها قدر وهي تناظرها بملامح حزينه!
ما تدري هي نقلت عدوى الحزن لقدر والا البنت هي كذا ملامحها حزينه!
وكأنها تعرف وضعها المحزن إلي تعيشه!
نطقت باسف لقدر وكأنها تفهم عليها : انا اسفه للوضع إلي انت فيه ...ما كنت اعرف ...انا وانت ضحايا هالمجتمع انكتب علينا كذا !
ولازم نرضى !
ونقول الحمد لله !
نطقتها وهي تمسح دمعه متمرده على خدها !
*
**
**
وقفت الجازي : انا رح اشوفها
قاطعها فياض بغضب ما يبغاها تتعلق برونق وبعدها تنكسر : اقولك اتركيها متى ما حست بالجوع تنزل !
خليها تتعود على نظام البيت كل وجبه لازم نرسل لها احد
قاطعته بقهر : انت ليه تتكلم عليها كذا !
ترى للحين ما شفت خيرها من شرها !
وكلام ام راكان عنها ما اصدقه تبغى تشوه سمعتها !
وكله من تحت راس راكان !
رفع حاجب : والله !
طيب و ش رايك انا إلي تكفلتها بالمركز
ام فياض تلطف الجو ؛ فياض مب قصده شيء يبغى مصلحتك ..صحيح انها ابنتك لكن انت ما تعرفينها عاشت بيئه مختلفه عننا لازم تتعاملين معها بشويش حنا ما نعرف اطباعها هل هي سيئه والا جيده!
قاطعتها بقهر : الحين وش فيها لو طلعت اشوف ليه ما تبغى الفطور !
فياض بهدوء: البنت مب متعوده علينا اتركيها براحتها وكل شيء يمر بسلام !
ثقي بي وما رح تندمي !
ناظرته وسكتت وهي اصلا مب عارفه ليه مشاعرها متجمده تجاه هالبنت !
الخوف يمنعها !
ايه خايفه تنكسر مثل ما كسرتها مريم !
لانها غسلت يدها من عيال جواد !
وسيم بنعاس : ماما ما ابغى اروح للمدرسة !
فياض بهدوء: تروح وانت مثل الاسد !
ام فياض : لازم تروح حتى تصير دكتور لما تكبر با بطل !
فياض ابتسم : تد
قطع كلامه لما شافها داخله بهدوء ...تكلمت بنبره هاديه : السلام عليكم....اسفه على الإزعاج بس قدر
قاطعها فياض : والله كأنك داخله على دائرة حكوميه !
تعالي افطري
تحس نفسها تبغى تبكي وهي تناظرهم بغربه وبتردد نطقت وهي تحس نفسها كأنها متسوله: انا ابغى حليب لقدر اذا فيه !
وقفت الجازي واقتربت منها بهدوء ..انحنت لقدر : تشربين حليب يا بطه !
التصقت قدر برجل امها ...وهي تخبي وجهها !
سحبتها الجازي بلطافه وقبلتها وهي تجتاحها مشاعر الامومه لقدر وكأنها ابنتها : الحين اشربك الحليب يا عسل !
قدر تناظر امها تبغى تبكي ...تكلمت رونق بصوت مخنوق : روحي معها يا قدر !
ام فياض وهي تناظرها لابسه العبايه والنقاب : عندك مشوار !
هزت رونق راسها بالرفض وهي عيونها على قدر والجازي تحط لها الحليب!
ام فياض بهدوء: تعالي اجلسي هنا !
تقدمت بهدوء سحبت كرسي جنب ام فياض ...وضعت يدينها بحضنها وعيونها بحضنها!
الجازي بهدوء ناظرتها : ليه متغطيه ما في احد هنا !
رفعت عيونها على كلامها ...التقت عيونها بفياض إلي ينتظر اجابتها !
مستحيل تكشف قدام هالرجل الغريب ...كل هالحياه صعبه صعبه حيييييل ...ليه ما احد يقدر او يحس !
ام فياض : تراها زوج امك عادي !
فياض بهدوء : اتركيها على راحتها !
المهم الفطور قدامك قولي بسم الله
هزت راسها بالرفض وهي تناظر قدر : مشكور
الجازي تبتسم من قلبها وهي تناظر قدر :،شوف فياض كيف تشبهني!
صدت رونق للجهة الثانيه حتى ما يشوف احد دموعها المحبوسة ...كلامها يذكرها بنايف ومأساتها !
فياض ابتسم : تشبهك صحيح بس انت احلى !
الجازي خزته وبداخلها الفرح يتغلغل باعماقها وهي بالقرب من قدر وكأنها فعلا استعادت طفلتها المخطوفه : تراك تبالغ معقول في احد احلى من القمر
وسيم بغيره: انا احلى منها !
مب حلوه !
وهذه مريم لمتى رح تعيش عندنا !
بابا ترى انا ما اتحملها تسرق كل شيء لي
رد فياض بضحكه : هذه اسمها رونق يعني اختك بس تشبه مريم !
وسيم رفع حاجب : ليه متغطيه تخاف نصيبها بالعين !،
زفرت رونق بملل من ثقل دم هالصغير ...ما تدري هو فعلا دمه ثقيل والا هي ما عادت تطيق احد!
مطت شفتها أي احد ؟!،
اصلا هي بحياتها الطبيعيه ما لها علاقات مع احد حتى بالجامعة ما كونت صداقات حتى وعد هي الملتصقه فيها !
حست بإحباط من نفسها ...وش فيها صايره سلبيه مثل مروان
اجتاحها شعور الحنين لمروان ....
رفعت نظرها لفياض وهو يكلمها لما نغزتها ام فياض!
فياض باستغراب من سرحانها : اقول ما عندك دوام بالجامعة؟!
ردت بهدوء: لا
سرعان ما فتحت عيونها بصدمه لما تذكرت الامتحان عندها امتحان اليوم ....كيف نسيت !
فياض رفع حاجب باستغراب : في شيء ::!
هزت رأسها بالرفض : ما في شيء!
وقف فياض وهو يناظر امه وزوجته: تبغون شيء؟!
ام فياض: سلامتك يمه
ناظر رونق: تبغين شيء تراك مثل ابنتي لا تستحين
هزت راسها بالرفض وعقلها بالامتحان :-مشكور يا عمي
فياض بابتسامة : يلا يا وسيم تأخرنا !
غادر فياض مع وسيم إلي يتحلطم بضجر !
الجازي ناظرت رونق بابتسامة : خذي راحتك ما في احد هنا !
رونق تنهدت بهدوء وكشفت عن وجهها وهي مطنشه نظرات التحديق فيها !
الجازي تتأملها بهدوء فرق كثير بينها وبين مريم ..بالرغم انهم يحملون نفس الملامح ...رونق ملامح كئيبه شاحبه بشره حنطيه ....عكس مريم البيضاء ملامح مشرقه فيها حياه ...قلبها اوجعها لحالها لكن ما زالت تحس بالحاجز ما رح تندفع مره وحده ...بهدوء نطقت : كيف وضعك الحين ؟ مرتاحه معنا ؟!
رونق ببرود : الحمد لله
الجازي ابتسمت لها : كيف دوام الجامعه والمواد سهله!
ردت رونق وبداخلها ضيق من هالاسئلة الروتينيه ..ردت بهدوء: عندي مشوار ضروري اقدر اترك قدر لوقت رجوعي
الجازي عقدت حواجبها وهي تتذكر كلام فياض ما رح يسمح لها تطلع بدون ما يكون عندهم علم بمكانها: وين رايحه؟!
ليه ما طلعت مع فياض!
ردت رونق بهدوء ما تعودت تستأذن من احد قبل خروجها : سؤالي واضح اقدر اتركها لوقت رجوعي؟!
ام فياض ما عجبها كلامها : ما رح نقبل حتى نعرف وين طالعه !
تنهدت رونق بهدوء وبنبره هاديه: تعالي يا قدر !،
الجازي ما عجبتها تصرفاتها : رونق وش فيك !
زعلتي؟!
رونق ابتسمت بحزن: ابدا ما زعلت كل انسان حر وما اجبركم تتحملونها!
مسكت يد قدر : شكرا على الحليب !
حملت نفسها وعادت ادراجها للغرفه !
قفلت الباب وهي تزفر بضيق ...ما رح تقدر تروح للامتحان بوجود قدر ..واصلا ما درست !
لحظات وطرقت الباب الجازي وهي تدخل : رونق
التفتت لها رونق بهدوء بدون اي كلمه
الجازي بتردد: خلاص روحي اذا مشوار ضروري واترك
قاطعتها رونق بهدوء: خلاص انسي ما هو ضروري
الجازي تقدمت : بس انت قلت شيء ضروري
مطت شفتها وبداخلها ضجر من هالحياه وهي تمسك الكتاب ....جلست على الارض واسندت ظهرها للسرير ..فتحت الكتاب بأصابعها النحيله : ما في شيء ضروري ...تذكرت عندي امتحان اليوم وخلاص ما له داع اروح مب ضروري !
الجازي رفعت حاجب وهي تشوفها تتصفح الكتاب ببرود ولا كأنه عندها امتحان !
وفوق هذا تتكلم معها بكل برود !
تحس كميه البرود والامبالاه عندها مب طبيعيه او خلينا نقول مستفزه بشكل مب طبيعي ...يا برودها عندها امتحان وجالسه ...وبحزم تكلمت : قومي جهزي نفسك الحين تطلعين للامتحان يا برود اعصابك !
رفعت حاحب ببرود استفز الجازي: قلت لك مب ضروري...اصلا ما بقى وقت ما رح ألحق الامتحان
الجازي بانفعال: يا برودك عندك امتحان تعرفين وش يعني امتحان ...قالك فياض اذا عندك دوام وقلت لا
قومي الحين رح تلحقين قومي!
ناظرتها رونق وضحكت من داخلها..تراها مب حلوة فجأه تتقمص دور الام ...الظاهر انها فاهمة السالفه غلط !
رسمت شبح ابتسامه على خدها : رح اعمل تأجيل للامتحان الفصل القادم
لا تشغلي بالك انا ادبر امري!
واعتذر على ازعاجك بوجودي هنا ..صدقيني بس مساله وقت حتى ادبر أموري !
الجازي بانفعال اقتربت منها. ..سجبت الكتاب وسرعان ما استقر على راس رونق : عيدي هالكلام علشان اكسر راسك !
بدل ما تقولين اجلس مع هالمخلوقه إلي يقولون انها امك ...نتعرف على بعض نشكي همومنا ...نكون علاقه جميله بين الام وابنتها !
والا ناويه تلحقين طريق اختك مريم وتحرقين قلبي !
لمتى اتحمل هالتصرفات منكم !
رونق تنهدت ..وبنبره هاديه : انا اسفه !
اذا سمحت ابغى ادرس عندي باكر امتحان!
الجازي بسخرية :مقطعه حالك دراسه يا بعدي!
عندكم امتحان وجالسه بالبيت !
اقول قومي للجامعه


،

يتبع