[لامارا]

#أزمة_أحساس
قصه اجتماعيه ..

يقال ان الاهتمام نصف الحب .. ماذا لو عانينا الهجر والنبذ والاهمال .. هل سنتحمل اعباء اكمال مشروع زواج فاشل ؟؟...

Roskan_aljibory


#البارت 3‪
#زواج_منقطع
بقلمي روسكان الجبوري

مثل ماأهلي سووا آني هم صميت أذاناتي عن كلامهم وقررت ما ارجع .. أبدد ماارجعله .. وبديت افكر بالطلاك حل بشكل جدي ..

من فتحت الموضوع ويه اهلي أمي رفضته تماما وأخويه سكت ما راضي عن قراري ..

وراهه جبت .. ابني كرم .. أجه الطفل بي متلازمه داون مريض ويحتاج علاجات كوومه وفحوصات دوريه كل شهر ..
يمكن بسبب مصاريف العلاج الي اهلي ميگدرون يوفروهه لأبني وأصراري ع الطلاگ أضطروا بالاخير يرضخون للي اريده ..
رفعت دعوى نفقه أليه ولابني رفقته بتقرير طبي عن حاله الطفل الصحيه علمود تصير نفقه الطفل مكفيه وموفيه لعلاجه واحتياجاته خاصة زياد موظف ومتمكن ..

كسبت القضيه وبعدهه خضت غمار معركه جديده ثانيه بوسط عالم المحاكم والمحامين .. رفعت قضيه طلاگ .. هنا زياد تخبل .. جن جنونه .. گام يجي للبيت يهدد واهلي منا يضغطون عليه حته اتراجع عن قرار الطلاگ بس اني قاومت كل هالضغوطات ومهتميت ..

الطفل والامومه انطوني قوة اواجهه بيهه وأواجه ظلمه أليه وما اقبل بأقل من كامل حقوقي ..
زياد رفض يطلگ .. تواصلت ويه الدكتورة يقين وأخذت تقريري منهم بيوم الي ضربني زياد ورفقته بالقضيه ..
من بعدهه كولشي مشى تمام وتم تفريقي عنه بسهوله وبكامل حقوقي بس بقى شي واحد ..

ماقبل يطلگني سيد .. ظليت الح ع هل موضوع لان أحساس داخلي كارهه .. اي كرهته بگد ماحبيته واكثر .. كرهت قدرته ع التحكم بيه وبحياتي حته بعد طلاگي منه ..

كرهت اقتحامه لحياتي بأي ساعه يحب .. مجرد التفكير بأني مازلت تحت سيطرته وبأستطاعته اي لحظه يتدخل بحياتي بحتلو تفصيل تافه يفقدني صوابي خاصة بعد ما عرفت خاطب البنيه الي يحبهه ..
شگد الحنظل مر .. جنت احسن روحي وگلبي وكل عضو من اعضاء جسمي جانت تتجرع هذا المر شويه شويه وماجن هذا المر راح يخلص .. ومن شدة انكساري ايست اخلص منه ..

الصبر صار عادتي .. ظليت صامدة وهو استسلم لطلبي بشروط .. يطلگني سيد مقابل اتنازل عن المؤخر مالتي والشرط الثاني يوم اللي افكر اتزوج انسى عندي ابن .. ياخذة مني .. بوقتهه جان عمر كرم 4‪ اشهر .. تولعت بي وتعلكت روحي بي وحسيته هو السند اليه باجر عگبه وبي العوض ....

رغم عمري 2‪2‪
سنه من تطلگت بس ماترددت أقبل بشروطه بس علمود أخلص منه .. كانت سيرته تخنگني .. ردت بأي طريقه وبأسرع طريقه أخلص من اسمه تحت اسمي بحقل اسم الزوج بجنسيه الاحوال المدنية ..
وصار الي ردته وخلصت منه وبدت حياة بعيده عن زياد ..
أرتاحت نفسيتي نوعا ما واستقرت .. هدأت روحي .. هذا الهدوء الي يجيك غصب وانت مجبر تتلگاه .. ليش ؟
لأن روحك احترگت بنار انت صنعتهه بيدك .. بغباءك .. بسوء اختيارك .. ومن احترگت هالروح ما بقى منها غير بس الرماد لذلك هدأت مجبورة ..

مشكلتي الاولى و الاخيرة جانت الماده .. أهلي ناس ع گد حالهم .. اخويه صح يصرف علينه بس شغله ع باب الله يعني لاوظيفه ثابته ولاراتب مضمون كل نهاية شهر وآني ممكمله دراسه وحتلو مكمله هو وينه التعيين ..

گمت اسوي اكل .. كبب وبورك ولحم بعجين واكل بيت حسب الطلب وابيع .. بالاضافه لنفقه ابني راتب ابويه التقاعدي صح اني اخذة لان مطلقه بس اقسمه بالنص نص اليه ولامي وابني ونص ثاني لأخويه لان متزوج ويصرف ع البيت ..
بين فترة وفترة أطلع ادور شغل .. حتى منظفه بمدارس أهليه أشتغلت بس ماجنت أكدر اكمل وياهم لان ساعات الدوام طويله وابني صغير ورضاعته جانت طبيعيه وعانيت هو اي من فطامة ..

يمكن ورة ما صار عمرة سنتين يا له كدرت التزم بشغل خاصه أمي اهتمت بي وهو هم تعلق بيهه ..

كرم بالنسبه لأقرانه زين .. يعني استجابته واستيعابه للكلام صح مو مثل الاطفال الطبيعيين بس احسن بهواي من اقرانه من الاطفال المصابين بمتلازمة داون ..

الطبيب گال انو كرم مصاب بأقل درجه من المرض .. من اباوعله ولبراءة وجهه وضحكته وحنيته .. يكسر گلبي .. ماريدة ينذل ولا اريد اقصر عنه بشي وكلما يكبر ديكبر همه وياه ..
روتين يومي جان فد شي متعب للاعصاب .. أكعود الصبح ع
صوت كرم .. عم ممه عم .. سودة عليه جوعان يريد ريوگ .. أمي عادتهه تگعود من الفجر وهو متعود عليه وع وقت گعدتهه لبس يگعود افتح له الباب ويطلع يمهه بالمطبخ ..

اني للتسعه يا له أكوم لكل شويه واشوف شيحتاج البيت شغل ومرات اذا عندي طلبيات گومتي تصير اوكت حته اكملهن وادزهن لأصحابهن ..

الغدة يوم عليه ويوم ع أيه مرة اخويه ..
بعد الغدة انوم كرم واني هم اخذلي غفوة .. بعدهم يگعود كرم وانشغل وياه لو العبه لو اشيله لو يظل يبجي يريد يطلع ويه خاله ..
من يجي الليل تتهيج جروح الگلب .. يتعبني التفكير .. التفكير بكل الي صار وياي .. خاصة من اسمع أخبار عن زياد وتفاصيل خطوبته وزواجه من اي وحدة من النسوان الي مرات تمر تشوف امي لو تجي توصيني ع أكل بحكم احنه جيران ..

شعور متعب من افكر بيهه انو هو مستمر بحياته عايش ومستمتع بزواج ثاني واني حياتي احسهه واگفه .. كل الناس حياتهم مستمرة وماشيه للامام الأ اني واكفه بمكاني اراوح وحايرة بأبني وشلون ادبر مصرف يومي ..

احس هذا مو عدل الي ديصير .. رغم لو اقارن وضعي قبل و وضعي هسه اگول لاااا هسه الف مرة الحمدلله والشكر .. راسي مرتاح من المشاكل وجسمي مرتاح من الضرب بس يمكن من اگول الحمدلله والشكر ماعرف ماريد اكبر بس عبالك ممقتنعه رغم والله لساني يلهج بالحمد والشكر بس الظاهر بس ترديد ..
الكاتبه .. دا أجرد دواخل شخصيه ياسمين للقارئ لأن تفكيراتهه وقناعاتهه هو اي راح تأثر ع قرارات راح تاخذهه هالشخصيه بأثناء مجريات الاحداث مرات تشوفوهه تكفر بتفكيرهه مرات جهل وقله وعي بالنهايه هي انسانه وخطاءة ..

للحكايه بقيه ..
شاركوني توقعاتكم ..