[لامارا]

#أزمة_أحساس
قصه اجتماعيه ..
يقال ان الاهتمام نصف الحب .. ماذا لو عانينا الهجر والنبذ والاهمال .. هل سنتحمل اعباء اكمال مشروع زواج فاشل ؟؟
Roskan_aljibory

#البارت 4‪
#زواج_منقطع
بقلمي روسكان الجبوري


هالفترة گدرت أشتري جهاز من هذا اللمس الحديث بس اكيد مو احدث موديل .. سويت فيس وضفت صديقاتي بالمنطقه وسوينه گروب نسولف بي ..
كل وحده تسولف همومهه .. ماكو احد مرتاح .. فترة وگمت امل واتكئب من أدخل الگروب لان المنشورات كولهه مشاكل تشيب الراس وتعالوا نصحوني شسوي وأكثرهه مشاكل عيال وعمه ظالمه لو خيانات الزوج لو لحگوني هكروا حسابي وراح ينشرون صوري كولش طشت هالسالفه ..
صار اللعب بالأعراض ماكو اسهل منه .. راحت مخافة رب العالمين ..
صرت قليل افتح نت وهنا زادت الكآبه لان رجعت افكر بوضعي .. الفيس والدردشه ويه صديقاتي جان شويه ملهيني ومنسيني يعني عبالك صرت بين خيارين اما الكآبه والتفكير بوضعي او الكآبه من مشاكل البنات ..
فد يوم وحدة من صديقاتي سوتلي دعوة لگروب مختلط ..
طبعا اني ماجنت افوت گروبات مختلطة .. كارهه جنس آدم كولهم ..
گلت ليش لا .. دخلت .. عجبني الكروب صرت انشر واعلق .. وسعت دائرة الصديقات ومرات أجامل واشاقه بس ع گد التعليقات خاص ماخاص ماجاوب ولا اقبل صداقات ناس ماعرفهم ..
مثل الي يسبح بالبحر ويأخذة الموج العالي هيج جنت أحس من ادخل عالم النت .. ماكو رقيب ماكو حسيب .. أكو بس ضميرك وأخلاقك وتربيتك هي الي تلزمك عن انو تسوي الغلط او تنحرف لطريق موزين خاصة البنيه ..
بسبب الكبت وطريقه التربيه المتزمته في اغلب العوائل نشأ جيل مو بس البنات حته الذكر بي محروم مخنوگ مقيد لذلك بعالم النت طلعت نماذج ماأنزل الله بها من سلطان .. تحسه ما شايف .. جوعان عاطفه ..
محروم من اي نوع من انواع المشاعر .. اكو مصطلحات مرات نگولهه بضحك مثل معوز حنان بس لو تتأملهه شويه صدوگ محتاج عاطفه وحنان وبسبب قلة الوعي يتصور العاطفه فقط تتلخص ببنيه تحبه وتدزله صورته ويسوون شغلات مو حلوة بحجه الحب .. لاااا أبد مو هذا المعنى .. البنيه لو تلگى ام حنينه ومتفهمه او أب او أخ يحبهه ويستوعبهه وحتى من تغلط ينصحهه وميحاول يسكتهه ويدفنهه بالحياه متلجأ لشاب الله فشلوا يربوه صح يضحك عليهه بحجة الحب وبعدين يعوفهه ويكسر گلبهه ..
أحنه هنا كولش محتاجين بنى تحتيه بالاخلاق ، بالتعامل الانساني ، بالرحمه ، بالعاطفه النقيه الصافيه .. لأن المشاعر قوة هائله تسوي كوارث خاصة اذا انجمعت بشخص قلة الوعي وقله العقل والاهمال من قبل الاهل وهذا الي صار وياي ..
توفى ابويه و عمري 6‪
سنوات .. أمي حارت بالعيشه .. أقرب أخت اليه بيني وبينهه فرق 1‪1‪
سنه يعني جيل كامل ..
ولا اخويه الي تحمل مسؤوليتنه أحتواني وحاول يسد حنان ابويه الي فقدته وحضنه الماشبعت منه ..
لذلك شبيت متمرده ع كولشي .. هو اي تعبت أمي خاصة بمراهقتي ..
بالبيت عناد ويه أمي وأختي وبالمدرسه عركات ويه الطالبات وحته اتلاسن جنت ويه مدرساتي ..
جانت تصرفاتي تصرفات ولد .. مسترجله .. بس بالطب النفسي ردات فعلي العنيفه هاي كانت طلب استغاثه لا أرادي مني للاهتمام ..
داخلي يصرخ عن سؤال ينسأل أليه من شخص
صدوگ يهتم لحالي لو سألني شلونج وگتله مو زينه ..
اتمنى الي يقرا معاناتي يفهمني ويعذرني .. هي فعلاً أزمة أحساس عندي .. هالتسميه يمكن تلخص معاناتي وتختصرهه ..
آني علمت نفسي ع كولشي .. حتلو خطأ بس اني تعلمت وحدي محد
لزمني وعلمني ..
موعذر هذا او شماعه اعلگ بيهه اخطائي بس هذا الي صار
وياي .. دا احجيلكم دواخلي وبنفس الوقت دا أحاول افتهم نفسي شلون جنت افكر بعد سنين من ارتكاب اخطائي ..
الدوامه الي صرت بيهه من دخلت عالم النت خاصة بعد ما دخلت الگروب المختلط خلتني الگه طريقه اعوض
بيهه أحساس النقص الي بداخلي ..
صرت بحجه الصداقه أحجي ويه أي ولد يعجبني .. نسيت وعودي لنفسي . . نسيت عذابي من جنس آدم .. نسيت معاناتي ويه زياد .. الامر صار أشبه بالمرض ،الادمان ، شي يفوق قدرتي ع السيطرة عليه ..
هالطريقه الي گلت أعوض بيهه احساس النقص الي احسه داخلي وهاي طبعا مخلفات علاقتي بزياد وخياناته اي واني لسه عروس .. كسرني .. فرغني من الداخل .. هالطريقه أكتشفت انها راحة مؤقته دمااار لنفسي مثل وواحد ياخذ مخدر من نوع معين ويتعود جسمه عليه ويصير يطلب المزيد لان صار يريد أكثر نشوة بس هالنشوة مؤقته متستمر اكثر من دقايق ويرجع يطلب وهكذا لحد مايدمن ..
تجيني طلبات صداقه هواي من ولد بالگروب المختلط وصرت افوت للبروفايل واتفرج تعليقات صور منشورات ومرات اقبل ومرات لاء ..
طلب واحد جذب اهتمامي .. دائما يتفاعل ع منشوراتي بلايك او فد تعليق مستفز وارد عليه بالتعليقات بنفس اسلوبه ..
بين قوسين يضوجني ينرفزني وتعجبت من دزلي طلب .. شعور داخلي بالفضول والانفه .. خليته معلق وصرت اراقبه حته من يتفاعل بغير. منشورات ويه الاعضاء ..
مخلي صورة شخصيه رمزيه مال ضابط بس جسم اكتاف ورتبه .. طبعا ازعجني هالموضوع .. اضوج من يصير الشخص الگدامي مجهول واغلب الولد يحطون صورهم كصور شخصيه .. فأخذت فكرة عن انو هالمستخدم اجكم لذلك ممخلي صورته ..
استمرينه مثل توم وجيري مد وجزر فترة .. مرات يغيب فترات ومرات يتفاعل بشكل يومي ..
شخص ما عندي ذرة أهتمام بي .. مو آني الي أختاريته ، بروفايله مو واضح .. صح كاتب ضابط والصورة صورة ضابط بس الصورة رمزيه ومبينه مو صورته الحقيقية ..
داگلب بصفحته وأجتني رساله منه ..
شعندج تفترين بصفحتي وانتي صارلج اسبوع متجاهله طلب الصداقه مالتي ومعلقته ..؟
فزيت من شفت المسج ..
شلون عرف اني دا گلب بصفحته ..
دخلت للمحادثه .. طلعت يمه تمت الرؤيه ..
رجع دز علامتين استفهام ..
صفنت ثار فضولي .. ردت اعرف شلون عرف داافتر بصفحته ..
كتبت ..
شمدريك دا افتر بصفحتك ؟
أجاوبج اذا جاوبتي ع سؤالي ..
الي هو ؟
ليش ماقبلتي طلب صداقتي ..
جاوبت بكل بساطه. .
مشفته ..
اممم اسبوع مشفتي الطلب ؟
عادي يعني ..
حسابج فارغ ..
أعرف ..
وموجديد .. بس شكم بنيه ..
هم اعرف .. سؤال ..
تفضلي ..
شيخصك وتسأل ..
فضول .. عادي نكمل ؟
شنكمل ؟
كلامنه ..
قصدك الاستجواب مالتك ..
هههههه لاماهيج .. الكلام اخذ وعطى يعني انتي تسألين اني اجاوب والعكس صحيح ماكو فرق ..
ببرود رديت كتابه ..
بعدني مقتنعه بي استجواب ..
هههههه براحتج ..
من رخصتك ..
وييين .. ما عرفت اسمچ ولاتشرفنه بمكانج ..
ما جيت اتعرف ..
مضوجج بشي آني ؟
جج ..
لعد ليش معصبه مني ؟
مامعصبه ..
شبيج ضايجه لعد ؟
ماضايجه .. انت ليش دزيتلي طلب ..؟
ممنوع ؟؟
لا بس ردت اعرف ..
دتحسسيني آني داز طلب لرئيس الوزراء .
جاوب ..
متابعج من فترة ..
شمتابع .. صفحتي فارغه ومنشوراتي مقفوله اذا مو صديق كولشي ميطلع عندك ..
كروبات متعلقين ؟
بلي اعلق بكروبات. .
اي هنا .. اني متابع تعليقاتج ..
سكتت افكر ..
رجع سألني ..
شنو اسمك ؟
جنى .. وانت ؟
طبعا اني ابد ماانطي اسمي الحقيقي ..
يامن ..
عاشت الاسامي ..
شكرا وانتي هم اسمج حلو ..
شكرا
العفو ..
من وين ؟
من كل مكان ..
جاوبته وماريد انطي عن نفسي اي معلومه شخصيه ..
وانت ؟
هم من كل مكان ..
مكتوب من بغداد ..
وانتي هم مكتوب من بغداد ..
سكتت .. رجع دز ..
شگد عمرج ؟
2‪4‪..
وانت ؟
3‪6‪ ..



للحكايه بقيه ....
شنو توقعاتكم ؟؟