البارت الواحد والعشرون
رواية..جولييت_واسرها...غياهب الإنتقام
بقلمي...نور سمو العراق...
💔💔💔💔💔💔💔💔💔💔💔
كل امرأة ذات كيد هي حية في عقل شيطان !!
..............................
ريهام
بكل البشر ماكو انسان كامل لكل شخص اخطاء وذنوب واكبر خطأ بالانسان سوء التعامل
واكبر ذنوب الناس هي من تسوي ذنب بس ما اتوب عنه...
شفتها دخلت هي وامها جانت لابسه عبايه سوده وحجاب اسود وجهه ناصع وامها وياها شايله صندوق بيبسي...
من شفتها من بعيد دخلت بسرعه جوووه ورحت كبل الغرفتي مو عوايدها تجينه بس شنو سبب جيته هاي تسوي الذنب وما اتوب عنه ...
بس لا عرفت بصلاح حاول يعتدي عليه والله اذا هددتني ما تلوم اله نفسها
اني ما احجي بس اخلي الزلم تتصرف همزين اخويه جابر يعرف بهل سالفه و واكف بصفي،وابد ما يشك بيه وبابا يعرف اني شنوو...
كلت خلي ابدل وارتب نفسي احسن لبست ثوب اسود وشال اسود...
اني لحد الان لابسه اسود كال بابا بس تدور السنه انزعه هو الحزن مو بالاسود بس احتراما لابويه وبيت عمي...
خليت وطلعت صبيت جاي اخذته الهم...
سلمت عليهن وضيفتهن...جانت ماما وخاله صبرية كاعدات يمهن...
نوال جانت تباوعلي بنظرات ناريه وصافنه بوجهي واني كل شويه ودرت وجهي منها حتئ توترت بكد ما صافنه بوجهي.
ام نوال كالت بعتب.. والله يا شيخ ابو جابر احنه انحبك وانت انسان حقاي وما ترضئ بالباطل يعني هم بيت اخوك من مات فلاح لحد الان وهم محاربين نوال...
محاربينها بعيشة الله هي مسكينه وين تروح اذا عندها كومه مال بنات وبناتها وكحات الكاع ما تجرعهن يعني تقبلها يطردوها باليلة ضلمه وبهججوها
ابويه عقد حواجبه باستغراب...ليش هججوها منو وياها اني الي اعرفه هم محترمينها ومحد متجاوز عليها شنو الي صار هسه
هزت ايدها بقهر...مو تعرف الناس طغت مخلين اخت كتال اخوهم وابوهم معززه مكرمه ومحاربين هل مكروده ...
عود شنو هاي تجيب بنات وذيج جابت ولد توم
شيخ عگاب باستنكار...لااا لاا خويه هذا كلامج ما مقبول احنه ال علي بحياتنه ما ميزنه البنيه عن الولد من يوم يومنه نحب البنات ونحترمهن...
هسه اني عندي ريهام ما ابدلها بحزام زلم...
وحتئ اخووي مهيوب الله يرحمه جان يفضل وقار واشواق علئ ولده...
والمرحوم بإذن ربه فلاح...جان عنده بناته مثل الهواء .وجاسر غزل جانت لا تصعد ولا تنزل
فاحنه ما نفضل البنات علئ الولد
ام نوال بحقد...بس اذا نرجع للحقيقه يا خويه من حقها نوال تضوج وتزعل شنو هم لحد الان مخلين اخت كتال اخوهم تاكل وتشرب وياهم ترئ الماتوا زلم تشهدلهم الگاع مو بزون ماتت والله وياها... لاااا لازم يبينون هم من صدك متاثرين
يعني جاسر مخلي مرته بحضنه وصار عنده ثنين ولد بعد ما يفكر ياخذ ثاره ...
وصلاح راح يتزوج ...وجعفر مخلصه سكران...
ترئ محد اتاذه غير بنتي وبنياتها...
هسه اطردوا جولييت واخذوا الجهال وخلوا الله بين عيونكم ليش هل ظلم النوال...
وكفت صبريه وتخصرت...اكلج انتي صارلج ساعه تسربتين وانه ساكته اكولن ما ذكرت اسم جكليته اخاف مو عليها ...
ولج انتي شني وتذكرين جكليته وتردين يطردونها هي شني كاتلتهم يممممه منجن يالنسوان ولا تكعدن راحه...
ام نوال بصوت عالي...لا والله هل بنية عندها حظ اخوها كتل الوادم ومحد فتح حلكه وياها انوب راحت انهزمت ومدري ويامن خلصتها ومحد حتئ حاسبها انوب جابت توم زيادة خيير ...
صبرية...خايبه شوووف هاااي انتي شلج غرض وتحجين وبعدين شمدريج بيها وين راحت ترئ البنيه بيت ابو جابر جابوها يمي...
إم نوال باستهزاء...لا والله صدك
صبرية...اي والله صدك ...جااا انتي شمعرفج وين جانت .اكو مثل يكول شمعرف المطي باكل النعناع ..اذا ما تدرين وين جانت لا تحجين...
ابو جاوبها...كااافي كاااافي وام نوال انتي كلامج مو منطقي البنيه ما الها شغل باخوانها وحتئ حرام عليج تحجين بطلاقها ابغض الحلال عند الله الطلاق
ام نوال بتمسكن...غير كوون تكف شرها من نوال يا خويه امرمره البنيه وتعير بيها ام البنات ام المعوقات...
صبرية بغضب...الدهر الصابجن ان شاء الله ولجن هي منيلها فاهيه المايعه هاي انوب عيرتهن..
حركت اصابعها بمكر...ههههووو ههووو فقيرات انتن مسيچينات ياكل المطي عشاجن وانتن ما تحجن..
نوال لزمت بنتها ...ماما سجاوي حبيبتي احجي شلون تعير بيه جولييت ودكولي اني اجيب ولد وانتي بنات معوقات...
سجئ جاوبت بخوف ...اي هي تحجي عن ماما ودكول ام البنات...
ابو جابر بعدم رضا...لا جدووو لا تتعلمين تنقلين حجي
صبرية...انهجم بيتجن...خلف المنعول چلب...طلع اچلب منه...ولج ليش تعلمين بناتج علئ النفاق...
نوال بعصبية...شببيج انتي محامي مخلينج علئ جولييت ما نحجي حجايه اذا ما دخلتي نفسج انتي شنو صلتج اصلا انتي مره غريبه خليج بعيده...
صبرية بقمة غضبها...خايبة گومي غريبه والله محد غريب غيرج يالشيطانه...
امي خافت تصير مشاكل اخذت صبريه وطلعت ونوال ضلت تبجي وامها تشكي،عند ابويه ابويه كلها صبريه خطار عندي وانتم هم خطار وان شاء الله ميصير خاطركم اله طيب واني ما احب اي شخص يطلع من بيتي زعلان...
شويه هدئت الأمور اجت نوال كعدت بصفي،وهي تبتسم بمكر كالت...شلونج رهومه حبيبتي
ابتسمت بهدوء...الحمد لله بخير وانتي
جرت نفس...اني مو زينه والله مو زينه شسوو بيه بيت عمج بهذلوني وطردوني
اني وين اروح وين انطي وجهي رحت الاهلي ونسوان اخواني شادات وياي ويكتلن ببناتي وما يردني...
وبيت عمج طلعوا الدنيا من عيني من مات فلاح لحد الان وهم مسمميني انوب هسه يردون يزوجوني الجعفر...
الله عليج تقبلين هل سكير يصير ابو لهل بنات اليتيمات والله يضيعن اني ردت صلاح يكون الهن اب لان خووش ولد
اردفت بحزن وصوت خافت . اني عرفت بي راح يخطبج لان سمعت عود هو مقشمرج وبايسج ومدري نايم وياج ولازمج جابر انتي وياه مكطعكم تكطع
فتحت عيوني بصدمه ورعب...انتي شدكولين ماكو هيج كلام ابببد لا تطعنين االمحصنات الله يحاسبج وحرام عليج
جاوبت بمكر وخبث...والله يا رهومه هذا الي سمعته من اللسان جولييت هي سمعتها تحجي ويه رضيه هاي الحيه مال التبن العجيز ما تموت ونخلص منها...
جريت نفس...لا تحجين علئ رضيه ترئ والله ماكو مثل كلبها
لزمت ايدي باسف...اني اعتذر رهومه يعمري مو قصدي اضوجج بس فدوه حسي بيه واكسبي اجر بهل بنات لا توافقين علئ صلاح والله اذا وافقتي راح يتدمرن هل يتيمات منو الهن بعد
واني وروح فلاح وروح فلاح ...لا كاتلني صلاح ولا ميته عليه بس اريده وطن البناتي حتئ لو يريد يتزوج بالمستقبل خلي يتزوج بس المهم هسه يعقد عليه حتئ لو بس ورقه ويكون سند لهل يتيمات...
جريت نفس...زين شنو المطلوب مني
رجعت لزمت ايدي بتوسل وابتسامه...اريد تحجين ويه صلاح ودكليله اني ما موافقه اتزوجك واجمع بنات اخوك احسن بس مو دكليله اتزوج نوال
والله الج اجر عند ربج عظيم لان الرسول يكول انا وكافل اليتيم بالجنه...وربي يكول...فأما اليتيم فلا تقهر...
جاوبتها بتردد...ميخالف ان شاء الله اكوله
هجمت عليه باستني بخدي وخدي الثاني..ان شاء الله ربي يوفقج ويبعثلج ابن الحلال الي يسر خاطرج...وضلت تدعي اليه ..
انطتني رقمها كالت من تخابري اخابرج اشوف شنو رده...
اخذته بتردد وهنه خلن وراحن جنت حيل متوتره اخابر صلاح واكوله علئ الي صار وهاا هي هماتين كالت عود هو مرايدني بس لان صارت سالفة الاعتداء فكر بيه...
خليت ورحت الغرفتي اخذت موبايلي جانت وقار دائما تخابرني من رقمه واني حافظته...
استحي اخابره ضليت تقريبا ربع ساعه بين تناقض من التفكير وبعدها ظغطت زر اتصال...
ثواني وجاوب كال...الووو هااا ريهام
ضليت تقريبا دقيقه بس محجيت اي شئ وهو هماتين بعدها كال...الو ريهام احجي لا تستحين
رديت بلعثمه...الوو صلاح شلونك
جاوب بلهفة...بخييير عال العال انتي شلونج والله اني شكد حاولت اتصل عليج بس خفت تفهميني غلط ترئ الي صار غصبا عني
صح انتي كارهه هل شئ بس صدكيني هل شئ لمصلحتنا وعسئ ان تكرهوا شيئا وهو خير لكم...
همست...صدق الله العظيم ...بس صلاح اني اريد احجي وياك بموضوع نوال
رد باستغراب...شبيها؟
مسحت وجهي بتوتر...اخاف يعني انت تريدها واني خربت عليكم واني اكول يعني اخاف البنات يتيمات ونتحاسب من وراهن...
صلاح...لااا لااا باعي ريهام اصلا جان موضوع نوال مثل الكابوووس بحياتي ما حبيتها ولا ردتها وبعدين البنات ما عليهن قصور احنه محد مقصر وياهن وراتب ابوهن موجود بس هي مو مثل الأمهات متعرف تلم بناتها وتسكت وبعدين راح يتزوجها جعفر لا تفكرين بيها...
بعدها همس،بذوبان...بعدين يحلوة اني اعشگج تعرفين شنو اعشگج ما مصدك صرتي من نصيبي لج هسه. حلت الدنيا بعيني وصار عندي نشاط
لج تدرين كل شويه وبست جعفر وكل يوم وعازمه بمطعم صح تاذيتي من الي صار بس رب ضاره نافعة نفعنه جعيفر وطلع بي خيير...
ابتسمت بخجل همست...كااافي ترا استحي
رد بلهفه...باعي اذا قفلتي الخط متلومين اله نفسج لج خليني اتغزل والله من اشوفج اتمنئ اكابلج واكعد احببج اموووت عليج احب رزانتج وعيونج الدوم خجلانه مني...
قفلت الخط واني ارجف ومبتسمه اني هم احببه بس صارت عندي ردة فعل من الي صار من اشوفه اخجل حيل واستحي وحتئ اخاف بس رغم كوولشي احببه
كتبلي رسالة...رهومتي ابوج كال موافقة اذا غيرتي رايج اذبح جعفر فده علئ روحج
ضحكت بمرح ومن قلب كتبت...لا لتذبحه والله موافقه ههههه
كتب رساله غزليه بس حذفتها بسرعه خلي يصير كوولشي رسمي وخلي يتغزل براحته حاليا ممنوع..
..................
جولييت...
ما اهتميت لوجود هاله ببيتنا لان كثرة الطعنات علمتني اللامبالاة
شفته طلع من البيت وهذا الي ريحني اكثر ما احب يكون موجود من هاله هنا...
رجعت الاطفالي شفتهم نايمين بسلام وهادئين مثل هدوئي بأكثر الاحيان...
ابتسمت وخليت وطلعت اساعد ماما رضيه بالغده شفت وقار دتنضف بالخضره وماما تطبخ...
من شافتني كالت...اي همزين اجيتي باعي هاج هذن كلايد مال ثوم كل وحده خليت بيها سبع ثومات حتئ تسحب ابو صفار..
استغربت وحسيت بقرف شنو مخليتلهم ثوم طابخه فاصوليا
ضربتني بضحكه...ثول هههه ولج يسحب الصفار من يبسن ذبيهن بشمس...
اخذتهم ورحت بس،لعبانه نفسي اني كله احط الهم بودرة اطفال وكلنكس مبلل مداريتهم انوب احطلهم ثوم ييع
شكلتهن الهم وطلعت اساعدهن بالغدا جان السنك عليه مواعين مال ريوك اكيد الجعفر لان هو يكعد متأخر...
دا اغسل بيهم دخلت هاله كالت بدلع...اساعدكم
جاوبتها وقار ببتسامه...لا شكرا ما عدنه شئ
اني درت عليها باوعتلها وبعدها رجعت اكمل غسل مواعين
طلعت من المطبخ هي لزمتني كالت بحقد...جولييت تعرفين اهلج ويين
باوعتلها بنظرات غاضبه. مالج شغل بيهم وين مايروحون خليج بعيده عنهم...
ضحكت بخبث. ...هههه طلعوا من العماره للاهواز وبعدها راح يسافرون نسوج امج نستج وضليتي، وحيده هنا شفتي حوبتي بهذلتج...
كملت بدلع...هسه ابو غزوله ويين رايدته بموضوع..
دفعتها بغضب...انتي شوكت تبطلين رخص متستحين زحتي اخلاقج كووولش انشال عقلج حطو مكانه نعال...
ردت ببرود...اهووو شكد تافهه انتي عبالج العالم كلها مثلج تخمط زلم ..
هزيت ايدي بضحكه...هههه لج يا زلمه ليكون معتبره احمد زلمه..
هاله بدلع...لا منين زلمه ذكر ...الزلمه زلمتج ومثل ما سويتي بيه اسوي بيج
جولييت. اعلئ،ما بخيلج اركبي وشتسوين سوي بس للمعلومه ترئ،جاسر يكرهج ويكول ارخص منها ما شفت وهو ما يحب،اللحم الرخيص...
هاله ...ليش انتي مو رخيصة واخذج
همست من بين اسناني...تاكليييين تببن بكد لشتج ما رخيص اله امثالج ولا تنسين خطيبج العار هو الي صار مثلج رخيص وضل يركض وراي ..
عدلت شالي بغرور...وهسه اروح للنونو مالاتي لا يكعدون
ضحكت بقهر...هييين اذا ما خليتج تحلمين تشوفين النونو مالتج علئ كولتج
عفتها ورحت دخلت الغرفتي لسه نايمين حبيباتي فديتهم
كعدت علئ السرير...
رجعت بذاكرتني من اخوويه لسع السجين برجلي رفعت ثوبي شفت الاثر لحد الان مثل لتشوهه بس صغير مو كبير...بس لحد الان وجعه بگلبي
هي بيومها جان جاسر جاي لبيت خالتي ام هاله علمود محل يريد يشتري...
فامي من شافتهم جرموا بيه راح تركض البيت خالتي ام هاله
ثواني وهو دخل بكل هيبه وجبروت...
احتقن وجهي وانتفض جسمي اول ما شفته دخل صعبه حنيتي علئ نفسي وكرامتي ما تسمحلي اكون بهل حاله...
حاولت اوكف واسند نفسي بس الوجع هاد حيلي وروحي مفرفحه
عاصم من شاف امي دخلت ويه جاسر عاط بوجهه...انتي ام الفضايج ما صدكتي رحتي صحتي الخطار واجيتي بيج خيير ربي بنتج
لزمه جاسر بغضب...اكل تبن لك لا ترفع صوتك علئ خالتي وبعدين شبيك خابص الامه وصوتك واصل لاخر جار...
هو سكت مجاوب بس عيونه جانت تريد تطلع من مكانها...
امي لزمت جاسر بتوسل وبكاء ...فدوه خاله جاسر جولييت برگبتك راح يموتونها والله واني ما اكدر بنيتي مسكينه اتهموها باطل الي ما يخافون من الله
صاح بوجهه عاصم ...اسكتيييي اسكتييي تردين تفضحينه اكثر تردين تبهذلينه تردين ولد اخواتج يعيرونه باختنه...
جاسر لزمه بغضب من قميصه...لك شنووو نعيرك دوگف لك خلينه نفهم شنو السالفه
امي ضلت تسولف اله عن مشكلتنه اني وهاله وهو يستمع بهدوء وعاصم وحازم جانوا يتمنون لو ياكلون امي
رد جاسر بعيون مليانه غضب من الفوضئ العارمه الي صارت ...هييثم يجي يكلك اختك احمد يكول عنها جانت وياي بشقه ويسكت
لك انت ارعن لو صدك مثل ميكول احمد جان هيثم موته لان مهما يكون هي عرضه اختك
وحتئ لو فعلا كلام هيثم انت بدل ما تجي لاختك تفرض عضلاتك عليها روح حاسب الي يطعن بعرض اختك لو جبان كدرتك بس عليها...
عاصم بصياح...هاي طينت راسنه مو جذب هيج اخت لازم تنذبح لان ما نتشرف بيها ...
امي لزمت ايد جاسر بنحيب ...يمه جاسر فدوه بنيتي امانتك والله راح يذبحوها استر عليها فدوه بعد خالتك لا تعوفها محد الها والله
هو باوعلي بجبروت جان ابويه حاضني واني ابجي بحضنه واباوعلهم برعب من هول المنظر...كسرت نظراتي بخجل من حالتي الماساوية...
جاسر دك صدره بحزم...اختك عايبه وكاسره عينك وتدخل شقق؟ اني مستعد استرها واتزوجها وانتم تطلعون من ذمتها
هم سكتوا وبعدها رد حازم...اخذها وخلصنه من عارها...ما نريد هيج اخت عار علينه...
رجعت الذاكرتي وكلمة حازم مثل مسمار اعوج يدوگ بصدري........ما نريد هيج اخت عار علينه
ما نريد هيج اخت عار علينه
ما نريد هيج اخت عار علينه
الألم ينهش بصدري نهش وكل سوالفهم ....واحن الهم كلبي ما يعرف يكرهم ما يعرف والله مو بيدي ياريت لو اكدر اكرهم يا ريت والله ما اكدر...
خطبني جاسر وهاله تخبلت هوايه هي وخالتي طلعن عليه سوالف وقذفن بيه كدام خالتي ام فلاح رغم ام فلاح ما رادتني بس جاسر اصر عليه...
انخطبنه شهر واحد علاقه اكثر من الجافه جانت ولا كان مخطوبين ..
قبل العرس باسبوع جاسر ثبت برائتي ....
خطف احمد وحاسبه ...احمد حلف اله ان اني بريئه من كل الكلام الي انحجه بحقي مثل برائة الذئب من دم يوسف...
وجاسر حظر عاصم وحازم وهيثم وبيومها حازم كال...احمد اعترف كال اني اصلا مشايف هيثم وبعدين هاله هي الي زيدت علئ كلام جولييت واني مسجل مكالمتها...
مستمعين المكالمتها كايلتله...بسيطه اذا ما ورطتك انت وجوليت ما اطلع هاله ...
وفعلا ورطتني وياه وتالي من اخوها عرف كتلها وامها سدسدت الها وكالت جذب هاي جاسر خلاه يحجي غصبا عنه لان خاف منه....
هي بعدها اخواني صاروا زينين وعاصم قبل زواجي اجه اعتذر مني....
ومشت الحياة طبيعيه بس صار الي صار وعاصم صار قاتل وحازم شاركه بجريمته...
من هل مصايب كلها اني اكثر المتضررين ...
الحمد لله علئ كل حال ودائما ادعي بهذا الدعاء....يا الله تب علينا..تب علينا..وكن معنا في بلوانا..فان كنت معنا فمن علينا وان كنت علينا فمن معنا...
ارتاح من اكول هل كلمات...
سمعت صوتها الخشن يصدئ بنص البيت ابتسمت بفرح ...خاله صبرية
طلعت بسرعه شفت رضيه تسلم عليها .هي شايله جنطه فوك راسها
من شافتني ضحكت كالت...يمه هلا بجكليت يمه هلا بجويليته الحلوه...
ركضت عليها حضنتها وبستها تقبلت الها الزياره
انطتني جنطه كالت.. هاي اخذيها الج
اخذتها وديتها للغرفه هي كعدت يمهم شويه وبعدها خلت واجت يمي
فتحت الجنطه طلعت ملابس مال اطفال بس هي صدك من شافت اطفالي تخبلت عليهم بوستهم وحضنتهم
خطيه هوايه جايبه اليه أغراض حتئ ملابس نوم دكولي البسيهن لجويسر خلي يتخبل مثل ثوري المرحوم من جان يتخبل علئ الهوايش
ضحكت كلتلها...خلف الله عليج صرنه هوايش وهو ثور
خطيه ضلت تغدت عدنه وبعدها راحت البيتها
كالت ...ان شاء الله من تنخطب ريهام اجيكم...
........................................
حازم...
طلعنه من ميسان للاهواز تهريب ...نريد نطلع للخارج بس فلوس ماكوو
احنه عدنه قطعة ارض بالدورة كال...عاصم خلي عمي يبيعها ونأخذ فلوسها
خابرته كال ..ان شاء الله ابيعها وانطيكم فلوسها...
امي حييل تعبانه هي،وابوي تتوسل بعاصم تريد ترجع بس،ما قبل كال...والله كلكم اكتلكم واخليكم برگبتي بس ترجعون جاسر الكلب يعرف مكاني...
بعد هم لا حول ولا قوة مخلصتها امي بس تبجي وتنوح...
رحت للسوك اشتريت اكل واجيت خليته كدامهم عاصم جان كاعد علئ صفحه ما قبل ياكل...
كعدنه ناكل ابووي خله الخبزه علئ صفحه كال بحزن شديد...اليوم تحلمت بجولييت حلم
امي لزمت ايده بخوف...ان شاء الله خير اذا مو زين لا تحجي
جر نفس وكمل كال...بالحلم چنها طفله عمرها خمس سنين وشايله ثنين كتب بيدها واحد من الكتب الغلاف مالته تعبان و الثاني لا جدييد ...
چنها من شافتني فرحت بشوفتني وركضت عليه بخطوات ما متزنه حضنتني حييييل واني حضنتها وضليت ابجي بصوت...
بعدتها من حضني واني ارتب بشعرها جانت تجنن شعرها اشكر مرفوع باهمال وخدودها حمر وعيونها مثل عيون البزون تجدح عبالك كزاز ازرگ...
فجأة وعيونها وكعت وضلت بدون عيون بس جووف الجمجمه...
صرخت بصوت عالي واني اللطم علئ وجهي...عيونج بويه جولييت عيونج يبنيتي ويين...
فزيت من الحلم واني ابجي شفتها كاعد يأذن الصبح بجيت بكلب محروگ عليها ودعيت الله يحفظها...
امي بجت بصوت مبحوح...خاف بيها شئ خاف مريضه حتئ ما ادري بيها جابت لو لا ليش مدكلولي ليش مو تخابرون عمكم ليش متحجون
عاصم بجبروت...مو كلنالج ما نعرف ما نعرف عمي ما يعرف عنها شئ...
خله وطلع طلعت وراه لزمته بعصبية...انت ليش ما دكول لامي جولييت جابت توم ولد
عاصم بعصبية...شلون تريد أكلها انت مو تعرفها تتخبل علئ جولييت بس تعرف تروح الها وتورطني لك والله مستعد اكتل نص العالم .لا اوكع بيد جاسر
نفخ بغضب...بس خلي ارتب اموري اكتله بدون علم احد
حازم بصدمه. ... وترمل اختك وتيتم جهالها
عاصم...انت شكد تافهه اكيد هسه جولييت تتمنئ يموت وترجع النه عمي مو يكول معذبينها اصلا اني اذا كتلته راح احرر جوليت من عدنه ...
حازم...انت طغيت
عاصم بنفي...ما طغيت بس جاسر كتله حلال لو اني لو هو لان مراح ارتاح مدام يشم الهوا
حازم...شراح تسوي
عاصم...بس تدور السنه الي تصرف ثاني احتمال اخطف جولييت وجهالهه واذا اظطر الامر اقتله...
هزيت ايدي بملل..تخبل عاصم رسمي وايده تلطخت بالدم وضميره مات...
اكله سلم نفسك يكلي اروح بيها اعدام وبعدين منو يتحمل سجون العراق خليني حر طليق...
..............................
شهد...
كعدتني زوجه ابوي الصبح كالت تعالي انقل راتب امج مال المخابيل باسمج رعاية احتماعيه...بلكي نستفاد منه
غطيت وجهي بالبطانبة...اهوووو اريد انام
رفستني برجلها...ولج كومي والله ابوج كال اذا متروح خابريني اموتها
شمرت البطانيه...گمت گمت شوكت الله ياخذكم وخلص منكم
عاطت مرة ابويه ...خوو ياخذج احسن
شهد...لا بعدني صغيره علئ الموت انتي عجوز
صاحت ...دولي ولي
رحت غسلت واجيت لبست ملابسي وطلعنه هي جانت لابسه صايه مزركشه وملمعه ومحمره...
خلينه ورحنه صعدنه تكسي وصلنه للتقاعد العامه جانت حيل ازدحام
جان اكو شرطي واكف بالباب هي تباوعله وتتبسم وهو يباوعلها بنظرات جريئه...
لعبت نفسي منها خليت وكعدت علئ المصطبه هي راحت استنسخت وضلت تحجي ويه الشرطي
اجت هي وياه كالت..يالله كومي راح يساعدنه هذا الشرطي حتئ يدخلنه بسرعه...
رفعت حاجب بغرور...ليش يمه يساعدنه شنو السالفه هاي العجايز ضالات بالضيم لازمات سره شنو مكسرة وانكسر خاطره عليج ؟
رد بلهفه...لا يحلو بس انقهرت عليج طكتج الشمس
هزيت ايدي باستهزاء....عشتوووو
خليت ورحت وهو مشه ويانه شويه اشو هذا لزم ايدي وعصرها حيل وهمس.....شنو هل جسم مال حضن
عود هو عباله اني اسكت لو استحي
عطت بوجهه بعصبية...وسم ومرض ليش تلزم ايدي
كال بخوف وهو يباوع للعالم...اني شوكت
تخصرت بعصبية....شوكت يا ما تستحي يا عار ولك عيب عليك اني بكد بنتك بس السبب مو منك من الي ينطيك مجال يا عار
التمت العالم هو ضل يصيح و يغلط واني اغلط نزعت حذائي اضربه بس مرة ابووي ما خلتني...
اخذتني وهي تغلط عليه...طاح حضج يالفضيحه يالادبسز فضحتينه هسه واذا لزم ايدج
جاوبتها بانهيار...والله اذا انتي شرفج رخيص عليج اني شرفي غالي ما اقبل واحد يتجاوز ويايه وما اخاف من اكبر واحد...
ضلت تغلط عليه طوول الطريق وبعدها اني سويت حركتي المعتاده...طوط طوط طوط رقم الهاتف المطلوب مغلق حاليا يرجئ اعادة المحاولة فيما بعد...
وصلنه للبيت وهي مستمره رزايل عاد اني قفلت باب الغرفه وحضنت بزونتي وخابرت جعفر ...
ضليت احجي وياه
كال ...شنو هل هوسه اليمج ذكرتني بعركات وجهه الطاوه
جريت نفس...هاي مرة ابووي اليوم الجني راكبها ومتخبله عليه...
رد بضحكه...تولي لا تردين عليه ...اذا تريدين تنهين الكلام وية شخص ما تفهمينه كليله علئ راحتك يعني بمثابة طبك مرض بس لابس قاط
ضحكت...ههههههه خوش فكره احلئ من رقم الهاتف المطلوب مغلق حاليا ...
همست...جعفر احبببك
تنهد كال.. والله اموووت عليج ان شاء الله اتزوجج لو يضل يوم بعمري وانعل ابو وجهه الطاوه
حضنت بزونتي حيل عصرتها عصر عبالي جعفر وهي عاطت حييل...ميوووووو
رد بانزعاج...ما شمرتيها هاي ام خيسه
جاوبته ببراءة...لا احبها وغيرت اسمها يعني حتئ تعجبك اكقر سميتها مشمشه ..ودلعها مشمشتي
جعفر..لو تسميها برتقاله هي فرعونيه فرعونيه
ضحكت...شبيك شاد وياها ترئ اذا تزوجنه اجيبها تنام يمك
جعفر باستهزاء. اي حتئ اشمرج انتي وياها
ضليت اضحك ونسولف بس حسيته يتهرب مني بس لا وجهه الطاوه راح تتزوجه اموتها وعلي اله جعفورتي....
.....................................
جولييت...
مر تقريبا اكثر من شهرين صار دورة السنة وراحوا زاروا اهلهم بس اني مرحت رضيه ضلت عندي ...
اطفالي تحسنوا بس مجتبئ شويه حالته تسيئ وترجع تتحسن ...
اليوم خطبتة ريهام وصلاح
اجت نوال من الصبح اخذت اغراضها وحتئ غرفة النوم مالتها حملتها واخذتها...
جعفر كيف وفرح كال خلصت منها ...شويه وخابرت كالت اني موافقه بجعفر...
انوب هو تخبل خله وطلع من الصبح لحد الان حتئ غدا ما اتغده...
هم سوو الخطبه باليل عمهم طلب منهم و وقار كالت اروح اساعد ريهام لان ريهام ماجره بدله وام الصالون حتجي للبيت تمكيجها...
اني ما اروح لان شفت نفسي غير مرحب بيه وخالتي مطنكره عليه...
هم ما عزموا لان لسه حزنانين بس اجت خالتي وهاله واشواق ...
كالو بالتسعه العالم تجتمع يرحون...
صادف الساعه بالسبعة خليت ودخلت اسبح لان تنظيف وكذا...
ضليت اسبح بس جنت خايفه علئ الاطفال طلعت من الحمام ما بدلت بس لفيت المنشفه علئ جسمي وطلعت
ما انتبهت الوجوده دا افتح باب الكنتور سمعت همساته وهو يكول ..بابا مجتبئ حبيبي
درت وجهي بخوووف ورعب وخجل هو بسرعه باوعلي وعض شفته بقهر...
اخذت ملابسي بسرعه دا اروح للحمام ابدل هو بسرعه ركض عليه ولزمني...
حسيت رجليه ماتت والدم نشف بجسمي بلعت ريكي...جاسر دا اريد ابدل عوفني
شتت نضره وحط ايده علئ كتفي العاري ...ايي بس اني مستعجل اريد اروح قبل لا تحجين عندي موضوع وياج
همست بصعوبه...شش شنوو
سحب ايدي ومشه بيه وهو يباوعلي بنظرات سخيفه وذايبه كال...افتحي كماط مجتبئ
حضنت نفسي بخجل همست...ليش شكووو
اشرلي افتح الكماط فتحته ضل بس بالحفاظه خطيه الحفاظه اكبر منه
كال ...الزمي رجليه اعلمج شلون تسويله مساج حتئ تنشطين اعصابه ..
همست بكلبي ...هذا صدك يحجي والله خجلت من نفسي
انحنيت لزمت رجل مجتبئ وجاسر وراي انحنه ويايه وهو يعلمني شلون اسوي حركات لمجتبئ ...
استحيت كووولش رجع دارني عليه حط اصبعه علئ بداية صدري ضحك بسخرية...مجتبئ طالع عليج نفس الوحمه بنفس المكان ..
بلعت ريكي بخجل ...اي صح ومرتضئ عليك عصبي،وبس،يلطم
ضحك تقرب مني اكثر واني رجعت خطوات داهمتني الجربايه كعدت كعده مدري شبيه ميته خجل...
اندك الباب هو تدارك نفسه وخله وطلع سمعت امه تحجي وياه ودكله خلي تطلع تسوي جاي...
هم ما رجع كلي بس اني رحت بدلت بسرعه وطلعت
رضيه لكيتها رايحه للسوبر ماركت تجيب جكليت
شفت موبايلها علئ الكاونتر يتصل مكتوب المتصل...ابني 2
فتحت خط ما اسمع بس الصريخ واللعثمه بالكلام وهو يصيح...امي رضيه ماتت امي رضيه كتلوها...
نهاية البارت...يتبع
كونوا انتم كونوا بخير...احبكم 💔
نور سمو العراق 😘
هذا الغلاف من تصميم المبدعة ...somaa_2
شكرا حبي كووولش عجبني 😍😍😍😍
وهذا الغلاف هديه للمتابعه... -linass-
من ابداع طلحه 😂😂😂
لا تنسوا التصويت عبن مدري شلونه 😂🤑👌
|