[لامارا]

#البارت_العشرون
أزمة_أحساس
بقلم روسكان الجبوري


سالتني شبيج؟
كتلهة مابيه شي بس منايمه زين تغيير المكان عليه وكذا
هي ضحكت عبالهة عود عرسان واخوهة مخلاني انام زين
يله رحمه صيت الغنئ ولا صيت الفقر
جنت اتصنع الابتسامة
نزلت هي واني رحت كعدت يامن
جاوبني بانزعاج وبصوت ناعس
_ ها شكو؟
_ ماما جوة وديصيحونه علمود ننزل
_ اي كايم
بس ماكام ضل بفراشه ظليت كاعدة اباوعله
يامن !!
نتر
_ كمت، ،كمت
كام بانزعاج غسل وجهه ولبس دشداشه لونهة شكري اني حضرتهة اله من جان ديغسل لبسهة ومشط
_يلا شو كاعدة مو خبصتيني
_ هااا، ، اي
كمت وراه ونزل ونزلت وراه
جان بالي يم كرم اتمنيت جايبته امي وياها نزلت لكيت امي واخويه حيدر جايين
بوستهم وحضنتهم، باركولي امي جايبه الريوك، كيمر عرب وعسل وكاهي
سالته ع كرم شلونه البارحه سال عليه بجه عليه تعشئ نام، ، كالت بخير بخير ليظل بالج يمه
سالتني امي شبيج؟
كتلهة مابيه
كالت اضحكي يمه خلي الدنيا تضحكلج
بكلبي رديت، منين يايمه منين يجي الضحك والكلب مشيب وميعرف شينتظرة
ام يامن اول مانزلت بوستها وباركتلي بس هم احسهة عبالك ضايجة مني لو هي المرة هيج طبعهة ووجهة، ، لسه ماعرفهة حته احكم
من امي تهمسلي عيون يامن تصير عليه يصير عندة فضول يعرف هي شدتسولف وياي
كل شويه وتكولي شبيج واضحكي
معقوله هالكد واضحة ملامحي ومبين عليه اكو شي
نص ساعه وراحت هي وحيدر
تريكنه كولنا سوة كعدت يم يامن خواته ثلاثتهن موجودات وازواجهن واخوان يامن وزوجاتهم
ذابه الشال ع راسي ولبسي مستور اباوع كل الوجوه تضحك وتسولف واني بينهم غريبه
يامن ميسولف وياي
كلما ارفع عيني اشوف ام يامن تباوعلي، وترتني حته اكل كمت بعد مااعرف اكل
خلصنه ديلمون بالسفرة ردت اكوم اساعد هن شويه ام يامن ماقبلت، ، كعدت وسكتت
ظليت اتصفن ساعه البنات مشغولات يسون غدة ويكفن تنظيف البيت
استأذنت من خالتي ام يامن اصعد لشقتي كالتلي روحي ارتاحي
صعدت وحدي يامن ابد ماصعد اني بصراحه جنت نعسانه فنمت بملابسي كلت خاف ع ساعه يجي خطار ويصيحوني ظليت بيهن
بين خطار جاي وخطار رايح وناس تبارك وكرايب غدة وعشه ومجاملات صار الليل صعدت لغرفتي ويامن ملفئ لشقتة ابد
عبالك متقصد يخليهم ينتبهون علينه، يعني ثاني يوم زواجي جنه وتارك عروسته وحدها
مااعرف شنو اسوي ولا شلون اتصرف ماكدرت احجي وي امي شي ولااعرف المن احجي وينصحني ويساعدني عبالك عقلي فصل او وكف عن التفكير
بالليل صعد متاخر جنت نايمه بفراشي
النومه والنعسه بعيوني بس حسيت عليه
طب سبح وطلع بالشورت يفتر بالغرفه بهدوء وينشف بشعرة حركاته وخطواته هادئة شويه وحسيته نصه راسه يمي وتقرب عليه، الغرفه جانت ظلمه مثل الي اخذ نفس عبالك شمني
همس ،، كاعدة؟
_ هممممم
ابتعد بسرعه
راح من جهته ودخل بفراشه بدون ميحجي ولا حرف
اني طا رت النومه من عيوني ظليت كاعدة افكر ليش هيج اتصرف، نطاني ظهرة ونام
ظهرة عاري ووكدامي تقاسيم الضلعين من ورة بارزة وتصعد وتنزل وي صعود ونزول النفس
الظاهر بسرعه نام ،، يمكن بعد شبرين او اقل عني شكد اتمنيت اتلمس بشرة جسمه بس ماتجرأت اسويهة خفت يحس عليه
ويكعد ميته ع حضنه وحنانه ودفو جسمه بس حرفيا مااعرف شلون اتصرف وياه خاف اتقرب ويفشلني ويصدني
مديت ايدي برجفه، لمست كتفه باصبعي بعدين لزمت كتفه باصابيعي ضغطت ع كتفه ع ااخفيف راسا اندارلي اتفاجأت من حركته عبالي نايم
_ شدتسوين
عيونه بعيوني، تجرات وتقربت بست شفته بهدوء مبادلني ابتعدت مغمضه
فتحت عيوني اريد اشوف تاثير بوستي عليه لكيته مغمض بتعب يعني ديتاثر ببوستي رجعت بسته غلف شفايفي بشفايفه بتملك، هستوني دااندمج قطع بوسته وابتعد
همست ليش؟
بلع ريكة يباوعلي، ، لتتقربين بعد
انصدمت من ردة من الصدمه انفرجت شفايفي شويه بسرعه نزلت عيونه ع شفايفي المبتعدة وحدة عن الثانيه
اندار عني يحاول يرجع ينام
_مجاوبتني ليش؟
مارد ولا عبرني
وبس تركني واندار يكمل نومته
ماكدرت انام ولاغمضتلي عين
من صار الاذان كمت صليت مع اني مملتزمه بصلاتي خاصه صلاة الفجر مااكعدلهة ابد بس هالمرة حسيت محتاجة صلاه ذبيت ع سجادتي شعندي دموع مااعرف شدعي اتمنئ اللي بيه خير وصالح يكتبلياه رب العالمين
وراهامن التعب نمت
الصبح حسيت ع صوت توشوش برة الغرفه
يامن : يمه البنيه نايمة متاخر وعروس شكو بيهة واذا تاخرت
ام يامن : لعد انت مو هم تعبان شو من الصبح كاعد
يامن: اني متعود يووم
ام يامن : دفوت كعدهة خطارنه من الصبح جايين يباركولهة والخاتون لسه منزلت تسلم عليهم
غمضت عيوني بانزعاج ، بعد ماكمت من فراشي باوعت ساعه عشرة ونص
طلعت الهم
ام يامن: اها كعدتي صح النوم
ابتسمت مجامله صباح الخير خاله
ام يامن: اهلا يله روحي بدلي وجهزي نفسج عدنه خطار من الصبح جايين يباركولكم
اسفه خاله، اي هسه دقايق واجهز نفسي
باوعت ليامن باوعلي نظرة ووخر عيونه رحت للحمام غسلت وجهي
طلعت لكيتهة نازله وهو لازم مبايلة وكاعد ع القنفه بالهول
يعني اجزم جزم هالمرة امه متحبني
دخلت للغرفه ابدل
طلعت رفع عينه باوعلي كال اكو زلم ..
جاوبته ، راح احط شال ع راسي
_ لفيه عدل
_ مو الزلم وحد والنسوان وحد؟
_ لا ولد عمي وميانه حته وي اخواتي المتزوجات وازواجهن
_ هاا
الاختلاط عدهم شي اساسي، حلو هيج ،
تحس عدهم حنيه بس يقيدون باللبس
_ هسه الفه
لفيت شالي عدل ونزلنه سوة ولد عمهم وزوجاتهم وكالعادة خوات يامن موجودات وازواجهن رغم بس همة وبيت عمهم بس هواي ناس وهوسه اطفال وونسه تنسيك الوقت لان يمر بسرعه ويخلص بالسوالف والضحك ..
اني جنت بدور المستمعه ومرات من يوجهولي سؤال اجاوب رغم هذا تونست ع سوالفهم تحشيش ونصب وتقشيب بحيث الوقت فات حتئ الغدا صار ساعه 2تقريبا
واني جنت اتكطع من الجووع لان نزلت ممتريكه وقبلهة بيوم ممتعشايه زين
رغم هذا استحيت اخذ راحتي بالاكل لان لسه ممتعودة عليهم
ورة الغدة شربنه جاي واللي نام واللي لزم مبايله يلتهي بي واني متصنمه بمكاني وكاعدة اريد اكوم لغرفتي رجليه تكسرت من الكعدة واخاف اكوم خاف احصل لي خزرة من خالتي ام يامن تمنيت يامن يكوم يصعد لغرفته حته تصيرلي حجه واصعد وراه بس اباوعله ملتهي ويه اخو وابن عمه يلعبون كلاش اوف كلان ويسولفون ع القريه وتهجم ومدري شنو اصلا ولاشال عينه ولا باوعلي ..
اجتي فرح كعدت يمي من بعد ساعتين اأشرلهة باديه وعيوني وساعتين ياله افتهمت واجت يمي
شاورتهة كتلهة كومي وصيحيلي ع اساس رايدتني بشغلة فوك
جاوبتني ليش شكو؟ ؟
كتلهة محصورة ورجليه تكسرت من الكعده واستحي اكوم اصعد لغرفتي ويامن مغلس
ضحكت وكامت، سوت اللي كتلهة عليه
من صاحتني ع اساس عدهة شغله وياي محد انتبه بس خالتي عيونهة صارت تتنقل بيني وبين فرح ويامن همين جان يسولف من كلت من رخصتكم سكت وكطع سالفته باوعلي بعدين كمل
صعدت ورة فرح لشقتي كبل بوجهي للتواليت وهي تضحك عليه ظلت شويه يمي بعدين نزلت
بدلت ملابسي لدشداشه مريحه
لزمت تلفوني امي وشهد متصلات عليه رجعت خابرتهن
ردت اسولف لشهد، ردت نصيحتهة ماكدرت لان يامن صعد فنهيت المكالمه راسا
سالته، راحو الخطار؟
هز راسه اي
ويامن جنتي تحجين؟
ويه شهد ..
هو يعرفهة صديقتي
_شبيهة فرح وياج؟ شرادت منج؟
_مرادت شي
_ لعد ليش صاحتلج وصعدتو فوك
_ هيج
ظل صافن ع وجهي يقرا عيوني
_ والله هيج شبيگ
عافني وطب للغرفه بدل وانطرح عالجربايه اني رحت للهول فتحت التلفزيون ومددت اخجل انام يمه ويتكرر موقف البارحه بالليل ..
لليل مانزلنه نتعشئ، فرح صعدتلنه العشة يامن جان نايم من المغرب نام
اني طحت للاكل ميته جوع جنت، طلع من الغرفه مبدل اخر شياكه
من طلع صفنت ع كشخته لااراديا طلع مني سؤال
_ وين رايح؟
_ يم جماعتي
_ تتاخر؟
_حسب
_حسب شنو؟
سكت بعدين رد
تكمله بارت 2‪0‪
_مااعرف
_ متتعشئ؟
_ليش انتي شمبقيه؟
كالهة بضحكة مكتومه، ، واني خجلت حيل بس والله جنت جوعانه
_ انزل اسويلك اي شي يعجبك
_ لا عود اذا جعت اتعشة برة
_اوك
_ مو تتاخر
باوعلي، ، بنظرة بيهة تساؤل بعدين كال
_لاتنتظريني
يعني معناتهة يتأخر ..
بلعت ريكي وهو طلع واني شلت الصينيه لمطبخي وغسلت المواعين ورتبتهن
سبحت ولبست ملابس نوم حلوة ، نشفت شعري وشسورته ورفعته ذيل حصان عالي ..
اتصلت مرة ثانيه ع امي وشكد حاولت احجي ويه كرم
ماقبلت كالتلي بس يسمع صوتج يبجي ويهيج علينه واحنه كوة مسكتينه كلبي وجعني ع وليدي شوكت يخلص الاسبوع ويرجع لحضني ..
مرت ساعتين هيج ورجع يامن جنت بالهول فاتحه التلفزيون واتفرج برنامج صح لابسه ملابس نوم بس فوكاهن روب
شافني
_ لسه كاعدة؟
_ اي تعشيت؟
_ لا ماشتهي
طب للغرفه يبدل طفيت التلفزيون ورحت وراه للغرفه اني مو من البنات الي يعرفن شلون يغرن الرجال اخجل اسوي هيج حركات ..
من جان ديبدل نزعت روبي وتمشيت كدامه هذا اقصئ شي اكدر اسوي
هو باوعلي رافع حاجبه
دخلت بفراشي وهو اخذ موبايله وطلع للهول فشلني
ظليت بفراشي اتكلب تاللي نمت وهو مجاي للفراش
ثاني يوم الصبح هم خطار ولليل يلا راح ..
اريد مجال يصيرلي حته اخابر شهد واحجيلهة ع راحتي وتنصحني شنو اسوي مديصير _ _ _ _ _


للحكايه بقيه ..
راح تخلص القصه وانتو لسه تصيحون البارت قصير .. لان ما عندي طاقه اكتب اكثر من الف و500 كلمه مرات اقل ودتشوفون النشر يومي ومرات بارتين باليوم يعني استحملوني