[فيتامين سي]

#برائتي_وجبروتك
بقلمي #نور الشمري
#البارت الثامن والعشرون
Noor336
#ما أجمل الفراق... ستبقى وسيماً وشاباً إلى الأبد في خاطري، ستظلّ تحبني وتكتب لي أعذب قصائد الحب، وسأظلّ حين أسمع اسمك أو أرى صورتك أرى النجوم تركض قرب وجهي نهراً متدفقاً من الضوء إلى اللانهايات... سأظل أحبك سعيدة بالتواطؤ مع خدعتك لي .. أحبك دون أن أسألك من أنت وما أنت، حباً بلا شروط حباً له بهاء خراب الفصول حباً أعلن استقلاله عنك سيصير حبك لقاء في المسافة بين الكبرياء والكتمان والمستحيل كوكباً مضيئاً راكضاً في مداراته النائية المعتمة، قمرأ جديداً غامضاً يُضاف إلى مجرتنا يرصده الفلكيون بدهشة متسائلين: من أين جاء؟
اسيل : باوعلي وغمض عيونه وسد التلفون ضرب ايده بالعامود مال الكهرباء فتحت عيوني مصدومه نزل عمو علي يحجي وياه واني كاعده اخاف انزل ماعرف كلبي نخزني ماردت انزل واسمع كلام ماريد اسمعه لالا عمر مابي شي هسه يجي هو الصبح دزلي شعر يراضيني لان البارحه زعلني باوعت ع امي وهمست
- عمر مابي شي مو يوم مابي شي بس ازدحام وهسه يجي مووو
باوعتلي بنضرات اطمني باوعت ع اشهب واكف بشارع يصيح وياشر وعمو علي يهدي بي ردت انزل ماتحملت اضل اكثر بس قبل لا افتح الباب صارت سياره كدام سيارتنا ونزل منها اخو عمر مشه صوب اشهب وسلم عليه ماتحملت فتحت الباب وردت انزل كمشتني امي
- لج تعاااي تريد اطلعين خبالات اخوج بنص الشارع بنت الاوادم تعاااي هناا
عفتها تحجي وحدها ونزلت اشهب مطيني ضهره وعمو عليي بصفه يسمع واخو عمر منزل راسه ويحجي بعدني وصلت قريب منه وماحس غير اشهب ضارب اخو عمر بوكس وراد يضربه الثانيه بس كمشه عمو عليي
وكفت مفجوعه فاتحه عيوني بخووف احس رجليه يرجفن شكووو اكيد عمر مابي شي لان لو بي مايضلون هنا يحجون بس شكو نزلت دموعي واني أتقدم بس فجئه وكفت واني اسمع كلام اخوه وهو يكول
- اشهب كتلك ماكو نصيب هذهو مادام بعدنا ع البر كلمن يروح بطريقه يا خوي ليش نزوجهم ويروح مستقبلهم
اشهب : لككك انت شتحجييي عمي هدني خل اكسر راسه حته يعرف شنو يحجي ولكمم اختي لعببببه لعببببه بكيفكم كلشي تردووو وينه العار اخوك وينننه خل يجييي بي خيررر يواجهنيييي مو من رادها وكف بوجهي وكال وهسه شنووو وين راح هاي الثقه الي اطيتهياا هاي تاليتهاا يغدر بيه ويعوف اختي قبل عرسها بيوووم والله والله اذا ماخليت اخوك عمر يبوس القنادر حته يخلص مني مااتسمه اشهبببب
وخر عني عمييي مالطخ اديه بدم عار مثله ومثل اخوو واختي تستاهل احسن منه
- اشهب مو هيج الحجي كتلك بدون فضايح يفصخ كلشي لا انتم من ثوبنا ولا احنه مو ثوبكم انتم بطريق واحنه بطريق
- ايييييي خل يجي يكول هذا الكلام عمر وعود لكل حادث حديث بس هسه عدي كلام وياه بنات العالم مو لعبه يا استاااذ
- اشهبببب كافي زودتها ترا اختك مو اول ولا اخر وحده تنفصخ خطوبتها
- اييي صحح مو اول ولا اخر وحده بس مو قبل عرسها بيوم مو كدام المحكمه وهي جااايه تعقد ولكمم انتم شنووو تصورتها من الكل بس مو من عمرر وينه هلعار وينننه
- الفجر راح البغداد اشهب عمر الي بي
- اششششش ولا كلمه مااسمع منك كلمه وحده حسابي ويه اخوك الي اعتبرته اخو وحزام ضهري واعطيته اختي وكتله كبع واخذ بدون حته ما اتردد لحظه وتالييي هذه الي يقدمه إلي يدزك الي والله ماكو قسممه هييينه هييينه عمر أفندي
دار وجهه اشهب وانصدم من شافني وراه دموعي تنزل واباوع عليهم هزيت راسي بـ لا همست واني اتقدم ع اخو
- عمر ميسويها لكككك الصبح دزلي رساااله البارحه جنه نحجيي ماكااال ماكااال جذاب كاعد اجذب مو ايي هذه لعبه منه يريد يختبر حبه مو وينه يلا خل يطلع كافي تمثيل مو أطفال احنه ويننننننننه
صرخت ونزلت ادموعي وهي صرخه وهي وكعه حسيت بدين اشهب وهو يتلكاني ويلفني بحضنه باوعت عليه وهمست عمر ما يتركني موو هو
بعدني ممكمله كلامي وحسيت الدنيا لفت بيه وكمت اشوف العامود يفتر فوكي غمضت عيوني ومادري بعد شصار
ضي : درت وجههي رأسا شفتها واكفه وراي ورافعه حاجبها ومتخوصره وتهز بنفسها والعلج بحلكها ابتسمت وكالت ايي يا ضرتي شسوين بغرفتي
- ماسوي شي سمعت صوت تلفون واجيت اشوفه المن
- وانتي شدخلججج غرفتي ما مسموح الج تخطين خطوه برجله بيها فاهمه هاي مره المرة إلخ اكسرها الج
- احجي عدل ماكاتله روحي ع غرفتج عشتوو يكول عبالك غرفة سندريلا ترا بس ريحه الوصخ كافيه شلون عايشه بيها واني اكول اشهب مايدخل الها
عفتها ومشيت بس خلصت كلامي ماحس غير جرتني من ايدي وباوعت لي بابتسامه تقربت يمي وهمست
- قررريب كلش قريب هذا اليوم اطردج منا واخلي أشهب مثل قبل يشوف دم اسنونه ومايشوفج اكطعج واذبج ببطنه ومايشفى غليله وغليلي هينه اصبري وشوفي
- ههههه ما ع بخيلج اركبي ماخايفه وشيطلع من ايدج سوي ماخايفه لا منج ولا من الاشهب مالتج دفعتها ومشيت واني احس بنار بصدري من تصرفها وراها سالفه هاي حنانو بس شنوو لحظه معقووووله هي ايي ليش لااا محد غيرها والله تهديد
اتها وكلامها
هي والله هي الي توصل الكلام الأكرم وغيره بسيطه خل يجي اشهب والله اليوم محد يخلصج مني اني الج حنانووو اذا ماخليتج تتوسلين بيه يا خاينه ما شك اطلعين الج ايد بقتل أسد لان وحده حقيره
عفتها ومشيت دخلت البدله البيضه لغرفة اسيل حطيتها ع الجربايه ومشيت اخذت باقي البدلات لغرفتي وقفلته اثنينهن ونزلت
اخذت الجهال ع صفحه وباوعت لهم وهمست
كلمن الغرفته يلا كافي لعبتو هوواي شوفو البيت شصار بي يلا لزمو ايباداتكم وكعدو لعبو بي صدك كيفوو من كتلهم هيج ركضو للغرف واني كمت نضفت البيت ودخلت للمطبخ جانت خالة اشهب مدري مرت خاله ماعرفها بضبط كاعده ع الكرسي وتاكل باوعتلي وحجت
- اييي ماعرفتو المجرم منو
حجتها بستهزاء وتحجي عببالك تعرف منو. بس تثول بروحها همست الها واني ابتسم
- لا والله اذا تعرفي كولي
باوعتلي صفح وكملت أكلها وهي تحجي
- اي وشكالولج عليه محققه واعرفه لو تردين كوه اذبين التهمه عليه
- يااااا باوعتلها بصدمه هاي شبيها كوه تريد تحجيني
اسكت احسلي لان مبين وراها سالفه واكيد حنانو دازتها لان جانت واكفه يمها
كعدت اسوي بالغدا جان تندفر الباب مال الشارع ويطب اشهب شايل اسيل وعيونه حمر وعمو عليي وأم اشهب وراه فتحت عيوني مخروعه فتحت باب المطبخ وباوعت بصدمه هو رأسها ما طب ع الصاله من الممر وطلع بيها فوك
واني لحكته بيدي المفاتيح مال غرفتها وكف يم باب غرفتها ودفرها برجله للباب مانفتحت لان قافلتها باوعتله وهمست مقفوله خل افتحها
- وشمنتضررره ما تفتحين بت الكلببببب فتحييي فضيهااا
باوعتلها بغضب بس ماحجيت مبين عصبي حيل سكتت حطها ع الجربايه بصف البدله مالتها وطلع وسد الباب
عينكم عليها كلساع وشوفيها ومحد يدخل الها فااااهمه واياااج اعرف احد من الجوه عارف شي فااااهمه
باوعتله مستغربه شبي هذا هزيت راسي اي مشه ورجع صاح فااااهمه مو وياج اكل تبن انييي
باوعتله بغضب وهمست ايييي ايي فهمت والله شبيك اصيحح
خزرني ومشه ماحجه كلمه عافني وراح لغرفتي صاح وين المفتاااح متكليلي شعدج مقفله الغرف شنووو بيهن كنز الخلفوووج
استغفر الله ربي الصبر الصبر ضي تحملي تحملي ميخالف تتنفسي تتنفسي هذهو هذهو يصيح يصيح ويسكت من وحده مشيت واني اهدي بنفسي ماريد اصير فرجه الهن جوه
باوعتله وهمست واني مبتسمه هذه المفتاح مقفلتهن لان بيهن غراض اسيل والبنات صاعدات نازلات خاف يسون شي
باوعلي بغضب وهمس وهو صاك ع سنونه
- تستهزئين بيه حضرتج شوو مدري شلون تحجين شوفي ولج هاي اخر واول مره تحجين وياي هيج وجيبي المفتاح
فتحها وطب وطبكها حيل رجعت لوره نزيت من ضربت الباب شبي هذا تخبل اكيد مو صاحي عفته ونزلت جوه لكيت عمو علي وأم اشهب بالغرفه يحجون دكيت الباب ودخلت باوعتلهم مستغربه جان عمو علي يصيحلي
- تعاي بنيتي منو اجه بعد ورانا
-محد عمو بس اجو اهل التوصيل جابو البدلات
- ها خوش لعد شوفي بنيتي ما نريد جنس بشر يعرف شي ماشي
- ليش عمو شكو حجيتها واني مستغربه خايفه مسح وجهه وهمس
- عمر فصخ الخطوبه
- شهكت واني احط ايدي ع صدري عزاا العزااه هذا شبي يحجي صدك مو باجر العرس شنو هسه اذكر
- اششش عوفيها لكل حادث حديث هسه مثل ما وصيتج خاصه حنانوو ع ما نلكي حجه شو شنو نعرف عمر ليش هيج سوه ديري بالج عليها ماشي بنيتي
- اي عمو بعيوني لا توصي عليها
بعدني هستوني طلعت من الغرفه جان يجيني صوت اسيل من فوك وهي اتصيح وتبجي باوعت ع عمو علي ام اشهب رأسا صعدت و مصطفى جان يم الدرج يمسح يعدل بشعره ع المرايه ماحس غير سوو الدرج خطوتين ركضت وراهم ودخلت واشوف اسيل حالها حال مشككه البدله وتبجييي واشهب يسكت بيها اريد استوعب المنضر الكدامي ماكدر
مو هين هذا الموقف مو سهل قبل يوم من عرسك يفصخون كلشي احس كلبي تكطع عليها واني اسمع شهكاتها وحجيها نزلت دموعي لا اراديا عليها ماتحملت رحت يمها واني اهدي بيها كلها كعدت بصفها وهي بحضن اشهب تشهك بحضنه
اسيل : واكفه كدام المرايه صافنه ع نفسي وين جنت ووين صرت ليش ليش هلكسره هاي يالهي شنو سويت وانكسر هيج كسره خليت اليسوه والمايسوه يشمت بيه ليشششش ليششش يارب امتحانك صعببب باوعت ع الصوره وهمست ودموعي بعيني
مو باجر عرسنا مو اتفقنا نكون احلا عائله ليش هيج سويت باوعت ع بدلة العرس جانت ع الجربايه ماتحملت اشوفها ركضت عليها وجريت المكص وصرت اشكك بيها مثل المخبله وابجي واصيحح شكو مخليها اذا ماكو عرسسس شكوووو ضاله بغرفتييي ماريد اشوفهااا ماريدددهااااا
حسيت بالباب انفتح دخل اشهب يركض عليه وامي وضي بس هذول شفتها وبعدها غمضت عيوني ماريد اعيش بعد ماريددد اريد اموت صرت اشهك بحضن اشهب وأهمس اريد اموت موتوني باوعت ع غرفتي
اني شجابني هنا مو جنت كدام المحكمه مو جنت راح اصير مرت عمر قانونا شجابني هنا ووين هو اكيد هذا حلم ايي اي جلبت بياخة اشهب وكمت اهمس هذا حلم موو كول حلم بداعت روزه كول حلم وهسه اكعد منه ايي ايي حلم اني جنت انتضره كدام المحك
مه شجابني لهناااا
صرت ابجي واشهك حيل حسيت ع ضي بصفي تهدي بيه واني بحظن اشهب امي بصفي تمسح وتقره آيات ع راسي وعمو علي واكف بلباب ويهز براسه يستغفر ومصطفى من شافني هيج طلع
باوعت ع البدله وهمست اخذوها ماريدهاا رجعوها المن جيبيها اذا العريس ماكووو
اشهب : اششش هذهو حبيبي اهدئي هذهو اني هنا واخذلج حقج من بين عيونه صدكي
ضليت بحضنه ابجي واباوع ع الغرفه وكلساع اهمس اني بحلم مو طلعت امي وضلت ضي واشهب يمي كل مايريد يكوم اجلب بي
- لا تروح حباب لا تروح
- مااروح والله اعدل كعدتي هذهو بنيتي عدت وانتي قويه اعرفج ما يهزج لا عمر ولا غيره
احس جفوني ثكلت ماعرف نعست او من البجي هيج صار وياي ونعست غمضتهن ونمت بحظن اشهب والبدله كدامي لازمه المكص وكلساع اكص شويه منها ضي متخليني بس اشهب اسمعه يكولها عوفيها خل اطلع حركتها
غفيت واني مادري بروحي فزيت لكيت نفسي ع الجربايه نفس ما كعدت اول مره وكمت للمرايه بس هلمره ماكمت ضليت بمكاني صافنه اريد استوعب يعني خلص بعد ماكو عرس وكل الي جوه عرف ان العرس تخرب والكل اشمت بيه وباشهب ليش عمر ليشش كسرتني هلكسره هاي
باوعت ع الميز جان تلفوني بصفي باوعت ع رقمه اكثر من ٨ مكالمات اني متصله بي بسياره من اتأخر ع المحكمه دكيت عليه مغلق مغلق نزلت دموعي ويه كل كلمه تكولها البنيه
- الجهاز المطلوب مغلق او خارج نطاق التغطيه
سديته واجرئت اروح ع الواتساب فتحتها وكتبت اله
💬 كسرتني ... ليش هيج
دزيتها وسديته مسحت دموعي ماريد انزل ولا أريد اشوف احد ماريد اشوف نضرات الشفقه بعيون الكل باوعت ع المكص ع الميز اجت براسي فكره شيطانيه كمت وكفت جريته وضليت اباوع عليه جان حاد جديد اشتريته ويه جهازي
بقيت اباوعله وابتسم واباوع المعصم ايدي بس جبااانه مكدرت خفت فجئه صار كدامي أسد ايي أسد إلى اعتبره اخ كأنما حذرني مااسويها صار اشهب وكسرته مكدرت مكدرت اسوي هيج واغضب رب العالمين علمود منو علمود بشر حاله من حالي علمود انسان مايستاهل لا اسيل لا انتي اقوه من كل هذا َراح تتجاوزين هلمحنه مثل ماجاوزتي القبلها ايي صح مو سهله بس تتجاوز
وكفت ورجعت الجربايتي وصرت العب بضافري وابتسم واني اذكر كلامه قبل غزله مزحه سوالفه إلى اضحك وكلشي ياخده بشقه والضحك غيرته من يغار كل شي مر كدامي مثل الشريط ينعاد عليه
واخر شي أخر شي صار كلام اخو كدامي ماكو قسمه بينا انتم بطريق واحنه بطريق ليششش كل هذه الاشهر راح يصير سنه سنه يا ظااالم سنه راح يصير انت خاطبني وهسه تذكرت احنه مانتراهم وماكو قسمه بينااااا الله عليج با دنيا
حسست الباب انفتح باوعت رأسا منو جان اشهب باوعتلي وهو شايل صينيه بيها اكل باوعت ع الساعه ب٩ بليل حيييل كل هذا الوقت اني نايمه
كعد بصفي ورجع شعري لوره اذاني ومشه اصابعه ع خدي الي بي أثر همس
- بنيتي أخيتي شلونها
نزلت دموعي وهو اخذ وجهي بين اديه ومسح ادموعي وهمس
- اششش شنو هاي من يمتي اخت الاشهب ضعيفه هيج هااا ماصورتج ضعيفه لهدرجه
هزيت راسي بـ لا مو ضعيفه بس الكسره قويه يا اشهب
- ميخالف انصلحها اني هنا واصلحها الج وطز بعمر والي مثله
- ليش سوه هيج هم عرفت
- لاا بس راح اعرف عوفج منه هسه وتعالي اكلي يلا
- مااشتهي
- مو بكيفج فتحي حلكج يلا
- لا اشهب ماريد
صار يوكل بيه غصب واني ماكدر اكول لا كدامه خلص المواعين كلها ياله عافني جنت اكل واحس بالأكل طعم دموعي إلى تنزل ع خدودي حط الصينيه ع صفحه وهمس
- شوفي خل نتفق اوكي حقج أخذه من عمر ومربع هم بس ماريد دموعج تنزل عليه لان مايستاهل انتي اسيل إلي تحملتي إلى ما يتحمله الرجال هاي تكسرج
- الشماته هواي اشهب اكيد حنان فرحانه ومرت خالي وأكرم وبيت عمي وهوواي اكيد فرحانين بنكساري
- لا تبينين انكسارج الهم لعد بيني الهم انتي قويه ومحد ينكدر الج ومحد يكدر يكسرج
- ماكدر صعبه صعبه هواي
ضل كاعد بصفي يحجي وياي بعدها عافني وطلع واني كاعده صافنه ماعرف ليش كل هذا صار حسيت الباب انفتح وطبت ضي
- عادي ادخل لو لا
- تعاي
كعدت بصفي وأخذت ايدي بيدها وصارت تسولف وتريدني اضحك ساعه تهدي بيه وساعه السوالف حته اضحك وانسه وساعه تسكت واضل تبجي وياي ع الواهس
باوعتلها وهمست عرفو
- منو
حجتها بستغراب واستفهام همست لجوه إلي ع اساس جايين علمود عرسي هه
دنكت وكالت لا اشهب كاللهم اتئجل العرس لان العريس سوه حادث
- ههه وليش ما كاللهم الحقيقه اول وتالي يعرفون
- ايي بس مو هيج يا اسيل مالج دخل اشهب سوه زين انسى انتي وفكري بنفسج بس محد يستاهل
- اي محد يستاهل الحب ولا التضحيه ولا اي شي
- لا مو الكل بس مرات نخطئ بختيارنا اكوو يحبون من صدك بعدين شعرفنا بضروف عمر يجوز مجبور صح هو غلط واكو الف طريقه اذا كان مجبور يتركج بس الي اعرفه عمر يحبج هووواي وجان يستاهل تطي هذا الحب
- لعد وينه كسرني وراح
- وهذه الكسره راح اجبرج تقوين وتوكفين ع رجليج وتكونين انسانه مختلفه قويه اسيل جديده محد يكدر
يكسرها فتره وتعدي وراح اشوفين شلون راح تبنين شخصيه جديده
هزيت راسي اي وميلته حطيته ع جتفها وغفيت حسيت ع صوت اشهب وهو يتعارك ويه ضي ماعرف شبيهم بس يتهامسون بعصبيه مكدرت افتح عيوني وكملت نومتي
ثاني يوم إلى جان لازم احلا يوم بحياتي صار اتعس يوم هادئ مابي اي شي يهدف للروح او الجمال يوم عميق بالحزن مظلم وقاسي مليان دموع وحزن وقهر ماطلعت من غرفتي ابد وكلساع واحد يجي يمي ساعه امي ساعه اشهب ساعه ضي ساعه عمو علي ساعه مصطفى ساعه الجهال كلهم عبالك كاعد يتناوبون كل ساعه واحد يخافون يتركوني وحدي
خلص هذه اليوم واني بس دموع كل ماريد أقوى نفسي ماكدر لازمه جربايتي وصافنه ع المرايه ودموعي تنزل مرت الايام ماعرف ليلي من نهاري ماطلع من الغرفه ابد من ذاك اليوم واني ماشايفه البيت ماعدي القوه حته اوكف واحارب
ماعدي القوه ادافع عن كرامتي واوكف مدفع بوجهه الكل وخاصه حنان إلى تريد الزله عليه صارت دورة سنة أسد الثانيه مانزلت ولا حته طلعت من غرفتي حدي للحمام وبس ومن تجي ضي واتأكد حنان بغرفتها لو جوه ياله اطلع ماريد اسمع كلمه منها
ماعرف شصار واشهب شسوه ولا اعرف شقرر بس الاعرفه مايسكت كل يوم ادخل ع حسابه والواتساب مالته اخر ضهور عده من دز الرساله الصبح والفيس مالته ماكو ماينشر شي ولا يعلق صارت حياتي نوم واكل ومراقبة حساباته اريد ولو خبر واحد منه حته اعاتبه
فد يوم طلعت للحمام وسمعت اشهب يحجي ويه عمو عليي ويكله بس الكاه اخلي يطلكها حته ماسمع منه أي شي لان الي خان ماينوثق بي ابد نزلت دموعي ورجعت لغرفتي
صرت خاين يا عمر صرت خاين ههه مرت الايام تعيسه لحد ما فد يوم طب اشهب باوعلي بعصبيه وصاح
- إلى متى اضلين هيج شوكت ترجعين قويه مثل مااعرفج ترجعين اسيل الميليانه حيويه هااا وين أخيتي اسوله
هزيت راسي بـ ماعرف شوكت كعد كدامي وهمس
- كومي بدلي يلا
باوعتله وهمست وين
- كومي نطلع نغير جو أربيل صايره اجنن اخذج اونسج وارجعج يلااا
- ماريد اشهب مالي نفس والله اطلع واشوف الناس
- مو راح تتخبلين راح يصير بيج توحد من وره عنادج صالج شهر مكابله الغرفه وكاعده كووومي لا استخدم القوه وياج كومي عفيه نسوان ما تمشي اله بالعين الحمره
حجاها وطلع وهو يصيح اسيل وحق الي خلقج ربع ساعه اذا ماشوفج كدامي العب بيج فلك وكولي اشهب ماكالها
ابتسمت واني اشوفه هيج عصبي يحاول يرجعني مثل قبل بشتى الطرق
كمت اجمع بنفسي كوه واسيطر ع نفسي لازم اتحمل اذا مو لخاطري لخاطر اشهب وامي وأهلي كلهم كمت بدلت ولفيت حجابي شلون ماجان ع راسي ونزلت لكيته كاعد والجهال كدامه مبدلين باوعت ع ضي وهمست شو ممبدله
- ماروح حبيبتي روحو بس انتم
- لا ماكو ماروح اذا مو انتي وياي كومي بدلي يلا
- ولج مالي خلك والله
- ما لعد روحي ماروح لا تحجي اشهب اذا تريدني اروح كول المرتك تروح وياي ماروح وحدي
حجيتها وكعدت هو باوع عليها واشر براسه روحي يمعوده بدلي
- كلت ماريد كوه هيي
- ضيييي كلت روحييي بدليييي
- ما روح ماريد مو كلتي ماكو طلعه من باب البيت ماروح لعد
- استغفر الله ضيي لا تختبرين صبريييييي
- هاي شبيكممم انتم مطلعيني من الغرفه حته اغير جو لو حته تعكرون مزاجي اكثر من ما هو متعكر يعني وتكئبوني اكثر
باوعتلي ضي وهمست
- ماروح ويه اخوج ماروح قبل يومين كال ما اطلعين بعد واضلين سجينه هنا وهسه يكلي امشي بدلي مااشتغل عده مو لعابه عده يحرك بيها مثل ميريد مو حنان اني
باوعت ع اشهب وانتضر رده هم هو مسح ايده ع لحيته وصاح
- اييي منو كلج لعابه انتي اذا لعابه فاهذه اللعابه تشاكي لان ماشاءالله نفس الشر
باوعت ضي عليه ورادت تحجي وكفت بنصهم وهمست كملو عرك واني راجعه العشى ع كولت يوسف
مشيت جان يصيح اشهب لا تعاي يمعوده ماصدكت نزلتي ضي وين مايعجبج طلعي محد يمنعج بس ولي بدلي خل نولي نطلع مو طلعه سمم
حجتها وكعدت وهو عصبي وضي ابتسمت بنصر لان كسرت كلامه وخلته يغيره مشت وهي تاشرلي خمس دقايق واجي
كعدت بصف الجهال جان ابراهيم يباوعلي ويهمس
- عمه منو تشاكي
ابتسمت واني اباوع له هذه لعبه بفلم رعب تريد اشوفها
يوسف : لالالا عليج الله عمه ذاكليوم جان عمو مصطفى يتفرج عليها وشفت لقطه وحده واليل كله ما نمته
- هههههه جباان من يومك
- مو جبااان بس هي تخرف حته عمو مصطفى خاف هههه
هههه ضليت السوالف وياهم واحجي لهم ع الفلم شويه نسيت وطلعت من القوقعه او العش ع كولتهم نزلت ضي ووكفنا ردنا نطلع جان اشهب يصيح
- ترحن هيج يمعودات تردن تموت برد عليه وابتلي امشن اخذن ملابس وياجن بنات الاوادم
بقينا صافنات اني وياها صعدت اخذت الكوت مالتي و كم قطعه حطيتها بالجنطه نزلت لكيت حنان مبدله وكاعده هم باوعتلي وهمست
- واخيرا شفنا وجهج ماناكل بشر ترا شبيج خايفه لهدرجه
اشهب : حناااان لو نتلصمين لو تضلين هنا مالي خلك عركاجن اني
سكتت واني درت وجهي طلعنا وهي ركضي فتحي باب الصدر وكعدي باوعلها اشهب وكال نزلي حنان
باوعت هي
مطنكره وكالت ما ماانزل
- حناااان شلون بيج اني يعني ناويه اليوووم ارتكب جريمه بيج نزلييي
حجاها وهو صاك ع سنونه نزلت وصاح فراس ليث تعالو هنا كعدو وقمر تعاي وياهم كدام وانتن كل وحده تكعد وتحط واحد بحضنها فاهمات كعدن شلون ماجان ع مانوصل
كعدت وصار يوسف بحضني وكلساع وضاربته ع ضهره واحجي عليه
- خرب فيل مو طفل
وهو يضحك ويذب ثكله عليه غيرت جو وياهم وضليت السوالف واضحك أخذنا منتجع جبل كورك جان فدشي يجننن خاصه بشتاء الثلج مغطي المكان يعني شي يجنننن خرافيي
ضلينا يومين هناك غيرت جوووو كليا نسيت كلشي ورجعت اسيل القديمه بس اتعارك ويه يوسف اني وياه ع الثلج ونشاقه ونلعب خلصن اليومين ورجعنا للبيت جانت امي ومصطفى وعمو علي بالبيت
اول ما دخلنا باوعولي عمو علي باوعلي وباوع ع اشهب وهمس
- وليدي اشهب تعال عدي كلام وياك
- اي عمي اجيتك
راحو للمكتب مال اشهب ساعه وطلعو بس ضايجين كعد اشهب يهز برجله باوعولي وكال اسيل تعاي هنا حبيبتي
كعدت بصفه مستغربه شكو باوعلي وهمس
- عمر هنا باربيل ويريد يطلكج سيد
جانت الجنطه مالتي بيدي وكعت مني واني صافنه بوجه اشهب هزيت راسي وابتسمت ايي هلا بي واني عدي حجي وياه مال سنه كامله خطوبه
حجيتها وكمت اخذت جنطتي وصعدت فوك ماعرف منين اجه البرود هذا مانزلت دمعه مني ماعرف شلون واني قبل يومين جنت بمجرد ماا تمر ذكراه تنزل دموعي صدك من طلعت وغيرت جو
تغيرت نضرتي وعرفت كلشي وصدك كلام ضي الكسره هاي خلتني اقوه كعدت ع الجربايه ما مصدمه لحد الان مانزلت دمعه مني شنو السبب ماعرف برغم احس اكو دموع بس ما ينزلن غصه ببلعومي اريد اصيححح واطلعها بس ماكدر
نار احس بكلبي اريد مي بارد اذبها واطفيها وهم ميفيد ماعرف شصار بيه بهذاك الوكت للضهر ودخل اشهب عليه باوعلي واشر براسه
وكعد
- اسيل عمر جوه هو والسيد جا
-وكفت واني اهز براسي
- اذا ما مستعده انئجلها اهم شي انتي مالج دخل بكل شي
باوعتله وهزيت راسي لااا اريد ارجع اسيل القديمه خل يرجعها ويروح حجيتها ونزلت لفيت حجابي ودخلت جان عمو عليي ومصطفى واكو سيد كاعد نفسه الي عقدلنا باوعت عليه وجهه اصفر تعباااان وجوه وعيونه سود والبياض مال عيونه صاير احمر
ضعفااان وعبالك مو شهر لااا سنه صالي ماشايفته رفع راسه وصارت عيوني بعيونه هنا كل شي جان محبوس فوك رادن يطلعن الدموع والصرخه وكلشي بس تحملت وكعدت بصف مصطفى احس كلبي راح يطلع من مكانه من دكاته يمكن كلها سمعتها شلون كام يدك سريع من شافه اجه اشهب كعد بصفي من الجهه الثانيه
باوعلي السيد وكال ابغضب الحلال عد الله الطلاق شنو السبب ليش هيج الزواج مو لعبه زوجوني طلكوني يا وليداتي حرام
ضل كاعد يسولف وينصح حجه هواي واني مدنكه ماتحملت باوعتلها وهمست
- ترضاها ياعمي قبل العرس بيوم يختفي وهسه ياله اشوفه لا ويدز اخوه يكول ماكو قسمه ترضاها وهسه جاي يريد يطلك بدون حته ما يكول شنو السبب
باوعلها السيد وهز راسه وصار يحجي عليه وهو مدنك كل هذا ومارفع راسه من خلص السيد رفعه وهمس
- اعرف كلش زين اني غلطت جان لازم من زمان اسويها بس حبي عماني مكدرت اكمل مكدرت اخدعهم اكثر سيدنا هذهو خل احررها حته تعيش بسعاده بعيده عني لان وياي مايجيها غير الضيم والقهر واعرف غلطان من راسي لساسي
باوعله السيد وهز راسه وكف هو وصار يكول كلام السيد وتم الطلاق هنااااا نزلت الدمعه الجنت حابستها طول الكعده هنا مكدرت اضل اكثر اخر امل واخر شي يربطني بي راح وكفت وطلعت اركض من الاستقبال اتلكتني ضي واخذتني بحضنها واني ابجي ضليت هيج دقايق لحد ما هديت رفعت راسي صارت حنان كدامي تبتسم ماتحملت
وخرت عن ضي ورحت الها جريتها من شعرها وصحت شمتتتتانه بيه موووو والله امسح البيت بيج اليوم يا قندره يا سا*** شمتانه بيه الله لا يطيج العافيه الله يحركج بنار جهنم يا حقيره احجي واضربه واجر بشعرها وهي بس تريد تفك مني واني انكلبت بذيج الساعه طلعت الحركه كلها بيها ضي اجر بيها وامي طلعت ع الصياح تمسح دموعها بشيلتها طب اشهب ومصطفى يركضون وخروني عنها
واني اصيح واغلط عليها ماتحملت اضل ساكته باوعت عليه خشمها يجر دم شعرها نصه بيدي وحالها حال ابتسمت واني اباوع لها نفس ابتسامتها من شافتني هي
سفتيي طعم الشماااته هسه اني شمتااانه بيج بهذا شكلج
اشهب : كاااافي شجاج شبيج اهدئي
حنان : مخبلله والله مخبله مو صاحيه اخذوها للمستشفى رادت اتموتني ما شفتوها جنت ابجي ع حالها وهي تكولي اضحكين تهلوسس
فتحت عيوني مصدومه صحت عليها واني اصيح لا يا جذااااابه ولج لا تجذبين شفتج تضحكين واني ابجي بحضن ضييي
- ع شنو اضحك شبيج ترا اني هم مره مثلج شلون اشمت بيج بع
بعدها ممكمله كلامها جان يضربها اشهب راشدي ويصيح لغرفتجججح ماريد المح خيالج هنااا وحسابج بعدين
دار وجهه وهي صعدت فوك واكف اباوع بصدمه ع مكرها وجذبها جان يطب فراس
- باباا
شلت راسي اباوعله باوعلناله كلنه وهو واكف وجهه مخطوف همس عمو عمر
من كال هيج
وكفت اني راسا واشهب ومصطفى طلعو الحديقه يركضون اريد اوكف ع رجليه ماكدر كوه طلعت وصلت لباب المطبخ ووكفت ردت اوكع وكمشت بضي وهمست عمررر
جان مدد بالطرمه شاله اشهب ومصطفى طبوو للاستقبال واني مجلبه بأيد ضي حيييل اخذتني للاستقبال واكفه بالباب اباوع عليه بصدمه دقايق ضل هيج ربع ساعه وكعد واني ع وكفتي اباوعله خايفه مالي حق اتقرب واشوفه شلونه لان صرت غريبه عليه
كعد رأسا باوعلنا صارت عينه بعيني دار وجهه ووكف جان يوكف اشهب ويصيح
- عمررر ماتطلع منا اذا مأتكول شبيك وليش هيج سووويت
دار وجهه وهو مبتسم همس
- مابيه دخت لان جاي من الطياره وماماكل شي واختك ماريدها الله يسعدها ويه غيري
راد يروح همست هيج بسهوووله يا عمر كسرتني وعلقتني سنه كامله وشنو سويت اخر شيييي كسرتني ليششش
- ماكو سبب بس مانتراهم سوه انتي من بيئه واني من بيئه وماكدر اعوف اهلي اكعد هنا علمودج اعتذر منكم
عافنا ومشه كعدت ع الكرسي مصدومه من كلامه مجلبه بيد ضي حيييل هاي تاليتي ليش هيج ليش ياربييي
ضليت كاعده دموعي ما كفت ابد ماصعدت لغرفتي لان بس اصعد بعد مانزل خليني هنا أفضل للمغرب واندكت الباب جنت صافنه وكلام عمر يرن باذني طب يوسف
- عمه اسيل هذه مره بره تريدج
وكفت مصدومه جانت ضي بالمطبخ اجت تركض باوعتلي اشهب طالع ردت اطلع ماخلتني
- شبيج ضي خل نعرف منو وشتريد وخرت عنها وطلعت وهي لحكتني طلعت امي وراي هم من سمعت باوعتلها بنيه شابه حلووه كلشش
تشبهه عمر مدري اني كد ما اتخيل عمر صرت اشبهه بالكل باوعتلي وكالت
- انتي اسيل
هزيت راسي اي باوعتلي بابتسامه
- حقه من كتل روحه عليج اكدر ادخل عدي كلمتين وياج
هزيت راسي ودخلتها للاستقبال وامي وضي وماقابلات ع تصرفي كعدت كدامها وهي باوعتلي وهمست
- اني اخت عمر الصغيره ماجيت بالخطبه لهذا ماتعرفيني ولا اعرفج بس عمر دوم يسولف بيج
هزيت راسي ساكته انتضر ها تكمل باوعتلي وكملت
- اجيت حته اكلج كلشي وتبرين الذمه لعمر صح ماقبل وحذرنا انكوللكم بس لازم تعرفون كلشي حته ما تحجون عليه لان مو ذنبه هذا الشي
شوفي اسيل عمر ٩٠ ٪ مايصيرون عده جهال بسبب العلاج الي ياخذه يعني عمر بي مرض خبيث سرطان ومكان كلش حساس سبب اله عقم قبل شهر بيوم إلى ع اساس ترحون تعقدون صبح عمر مريض واحنه اكتشفنا مرضه جان ضامه علينا محد يعرف هذا الشي
حالته ادهورت حييل اخذو البغداد ومن بغداد طلعو لإيران ياخذ كيمياوي تعرفين شنو يعني هذا الشي بسبب هذا المرض اخوي عمره ماراح يصير اب
بعد اسبوعين يسافر التركيا راح يسووله عمليه وهناك يقلعون المرض بس مراح يصير اب وهو عرف هذا الشي وفسخ كلشي كال اكيد من يعرفون اشهب واسيل مايتركوني اعرف ميقصرون بس ماريد اشددهم وياي كم سنه واموت ليش اهدم حياة بنيه شابه احرمها من حياتها ومن الامومه
فضل ان تكرهو ع أن تعرفون السبب الحقيقي اخوي راح يعيش عمره كله بين الحياة والموت مامعروف شوكت نصبح ونلكاه ميت لهذا تركج حته ما تتعلقين بي اكثر
اتمنه تبروله الذمنه اله لان اخوي حيل تعبان يا اسيل ماردت اكلج بس اعرف راح تحقدون وتحجون عليه وخفت ع اخوي من دعاء يتيمه
وكفت ووضي وكفت وصلتها للباب واني ع كعدتي مصدووومه يعني شنوو عمر مريض ومرض من هذا الخبيث لاااااا وفوكاها ما يصيرون عده جهال هيج مستهان بيه ليش ماخلاني اوكف وياه ليش تركني بنص الطريق ليش، ماخلاني اوكف وياه بعز أحزانه ومشاكله ليشش هيج يا عمر
عفتهم وركضت الغرفتي ابجي قفلت الباب عليه وصرت اشهك وابجي واصيح اريد اطلع حركه الشهر الي جنت احجي عليه وهو مريض إلي حجيت عليه أشكال الحجي وحبيبي بين الحياة والموت جان كل هذااااا واني ماعرف سوده عليه يارب من عمري ع عمره بقيت ابجي بغرفتي واليوم بنفسب ماقبلت افتح لأي أحد وضليت هذا حالي بس دموع وعتاب
ضي: بعد ما التغى عرس اسيل كرايبهم ضلوو يحجون أشكال الحجي عليها كل هذا وماهتمينه الهن انتضرناهن يرحن وحده تكول عافها ووحده تكول خانها ووحده تكول جذب وووو لا يكول كرايبها ضلن يالفن حجي وكل ماريد احجي ام اشهب متخليني
عفتهم وصعدت فوك ضليت يم اسيل إلى حالها يكسر الكلب ويبجي الحجر ضليت اسولف وياها واحاول اطلعها من هذه العش إلى هي بي بس ما فاد حرنا شنو نسويها وما تقبل تطلع
الوضع بالبيت متكهرب واني واشهب ع اتفه الأشياء نتعارك وكانما بنزين ونار ماننجمع سوه ابد واذا اتجمعنا اتكب النار وتحرق الأخضر واليابس هيج جانت علاقتي باشهب مرت الايام وطلعت دورة سنه أسد الثانيه
جان يوم حيل قاسي عليه تقوقعت نفسي بغرفتي ويوسف ضل يروح ويرجع واسمع يحجي جوه
- جنه بوحده صرنا ثنين هسه باجر خاله حنان هم تخنس بغرفتها ونضل احنا دايحين لا اكل ولا شي
ابتسمت ع كلامهم الطفولي ومسحت دموعي شنو اسوي هذا الحبسه يا ضي قابل يرجعه لاا قوي نفسج حته تاخذين ثاره
نزلت وسويتلهم اكل وضليت يمهم بيومها ماصعدت نمت ضليت جوه مالي واهس اسوي شي ابد سمعت صوت سياره اشهب مديت راسي كاعد بطارم
ه ويدخن مشيت للمطبخ فتحت الشباك وتقربت اسمعه شيحجي
جان يدندن بينه وبين نفسه بشعر اذكرت الشعر الي دزه ردت اطلع واستجوبه بس وكفني كلماته وهو يدندن بشعر
يا سيِّدتي كم أتمنى لو سافرنا نحو بلادٍ يحكمها الغيتارْ حيث الحبُّ بلا أسوارْ والكلمات بلا أسوارْ والأحلامُ بلا أسوارْ
باوعت بصدمه وصاير نزار قباني هم والله ماعرفتك ردت اطب جان يجيني صوته
- عجبج
باوعت عليه مصدومه وهمست بسم الله انت شنو يعني هم تسمع صوت ناصي وهم تشوف من وره
ضحك وكمل ادخن وباوعلي بطرف عينه اي شعبالج لعد مو هين اني
- اي مبين لو صدك جان طلعت قاتل أسد مو هاي السنه الثانيه مرت وانت كلشي ماكو
باوعلي بغضب وهمس
- شوكت تبطلين اجفصين بالبطن الواحد وياريت تعتذرين هم
باوعتله رافعه حاجبي يمه عشتو وليش اعتذر ماسويت شي حته اعتذر
- ممممم وذاك ليوم بعيد ميلادج يعني ولا كأنما اني موجود تتشبكين ويه مصطفى حلال بس اشهب من يتقرب شبر منج لا تكب النار والحرام عدج مو
باوعتله مستغربه شنو لا بس غرت
باوعلي بغضب وصاح لا ع شنو اغار ماعدي نسوان واغار عليج
- اي عبالي تريد شي لو اروح
- الله ومحمد وعلي وياج بس جفيني شرج
- هاا صرت شر باجر اروح ويه عمو بكر وراح اخذ قمر وياي
- ماكو روحه
- مو بكيفككك
- ضيييي لا تختبرين صبري كلت ماكو روحه يعني ماكو روحه انتي هنا تحت أمري تحت عصمتيي انيي المسؤل عنج ماريد اسمع كلمه منج فإهمه
-شنو لا بس سجينه عدك ومادري بروحي
- شتعتبريها اعتبريها ايي يلا سجينه عدج مانع
- باوعتله بغضب ودرت وجهي وهمست اروح اروح
- طلعي من باب البيت وشوفي اذا ما كسرتها الرجلج وعلكتها الج
- انت شنوووو يعني الى متي اضل تتحكم بيه
- مااتحكم بيججج بس انتي مرتتتتتي واني إلى مسؤل عنج تردين شي كولييي الي مو ترحين تكولي العمجج عبالج مادري بسوالفج
- سكتت هذا شعرفه اريد اروح اشتري شغلات إلي او ضي ترا زودتيها انتي هو غصبا ما عليه يصرف عليج كوليله وياخذج هو
باوعتله وهمست ماشي لعد باجر اخذني اني وقمر لان اريد اشتري ملابس القمر
حجيتها وباوعت له بتحدي ابتسم وحط الجكاره بطراف شفايفه وتقدم رجعت لوره انضرب ضهري بالحايط بلعت ريكي وهمست
- اشهب كافي اسوي هيج
حجيتها وحطيت اديه ع وجهي خايفه يتقرب اكثر سمعت ضحكته ابتعد عني وهمس
- ماسوي شي شيلي اديج خل احاجيج
- هزيت راسي بـ لا
- ضييي شيلي اديج كلت ماسوي شي وداعت اسدد بعد
وخرت اديه وباوعت له بخوف ابتسم واشر براسه تعاي هنا خل نحجي
هزيت راسي ومشيت وراه ماعرف منين اجاني هذا الهدوء كعدنا بالحديقة صار المكان الي تعاركنا بي وانضرب سجينه كدامي باوعلي واشر ع المكان وهمس
- تذكري مو
هزيت راسي ابتسم وكال
- ضي هواي اسختنا وستخفينا بقضية أسد انتي من جهه واني من جهه بس لو نحط ايدنا سوه صدكي راح نكمش القاتل بأسرع وقت ويأخذ جزاءه حته أكرم وكل شخص ساعدهم ترضين اصير شريكتي لو لا ؟؟
باوعتله بصدمه منين نزل هذا الأدب والهدوء والتفاهم عليك استاذ اشهب باوعتله وهزيت راسي بس بشرط
باوعلي رافع حاجبه شنو
بعد ما ينكمش القاتل وكلشي يضهر وكلمن ياخذ حسابه اريد حريتي اريد اعيش بعيده واضل مخلصه الأسد لان اذا اضل هنا ماراح اكدر اكون مخلصه اله وانت اكثر من مره
- اششششش ضي لا تحجي بهذا الموضوع
- بس
- ضيي
سكت شويه واني سكتت ورجع وره دقايق كمل كلامه
- تردين تعيشين بعيده عني والجهال
- ما امنعك منهم
- زين عدي فكره بعد ما الكل الكل ياخذ حسابه اعوفج تعيشين وحدج ووين متردين بس بشرط ما اطيج حريتج واضلين مرتي
باوعتله مصدومه والى متى
- إلى أن الله ياخذ امانتة ضي انتي أمانة أسد ماكدر احميكم وانتي مو بعصمتي راح اتركج لحد ما تجيني انتي برضاتج لان صدكي محد راح يحميج مثلي وراح تحتاجيني بتربية الجهال وراح اكون منتضرج
ويلا كومي نامي
حجاها وكام دخل جوه وتركني مصدومه من قراره وشلون واثق منه نفسه اني راح ارجعله شهل الثقه هاي
وره يومين طلعنا للمنتجع وضلينا هناك تونست كلش واني العب ويه الجهال وكلساه واحس بثلج ع وجهي من اباوع واكول منو كلها تسكت شكيت بي اشهب بس ماحجيت
رجعنا للبيت وجانت الصدمه تنتضرنا طلاك اسيل وحقيقة عمر الي صدمتني وصدمت اسيل إلى حبست نفسها وصارت تبجي داخل قوقعتها إلى ماطلعت منها اشهب من عرف تخبل وراد يروح لبغداد بس عمو عليي ماخلاه كله عوفه خل يسوي العمليه ونروحله كلنا
مرت الايام وبيوم طب اشهب يضحك باوعلي وكال ضيي باوعتله جان الكل كاعد يتغدا حنان رفعت رأسها تخزر بيه هو باوعلي وكال تعاي وراي مشه للمكتب مالته واني ضليت صافنه شبي هيج فرحان شصاير........... يتبع

اسيل 💔 عمر
،،،،،،، وللحكاية بقيه،،،،،،،،،
وهاي ختمتها بختمه زين حته متحجون عليه ههههههههه ها صح طبعا من هسه اعتذر لان مراح اكدر انزل باجر لان عدي امتحان تدرون بعد الامتحانات بلشت وانشاءالله ماقصر وياكم
تصويتاتكم وتعليقاتكم وتوقعاتكم
ار
يد الخميس من انزل اشوف البارت عابر آلاف تصويت ماشي حته انزللكم بارت مليان مفاجئات 😉😅
#نور الشمري
#نوشه