[فيتامين سي]

#هذيان_بين_الجمر_والجليد
السلام عليكم أحبتي .
اليكم الفصل الثالث
من رواية "هذيان بين جمرٍ وجليد "
نورا ناصر
☆☆☆
هناك حَنينٌ لكَ غريبٌ في داخلي
هناك طيوفٌ هادئةً كل ليلةٌ بكَ تُذكرني
أصبحت همساتك مواسيةٌ لي
تداعب وتطرب أسماعي
في ليالي موحشةٌ
وكأنك حملت كل شيء ورحلتُ
ونسيت ان تُلملم ذكرياتك
وندباتً تركتها بين ثنايا قلبي
كانت اساليبكَ كمحتلٌ متعمداً حتی وإن رحل
يخلف بصمةٌ في الأرضُ التي اغتصبها
ويتركها ويرحلُ
يبثُ الشكِ فيها والخوفِ
بقلم .. noora-1995
☆☆☆
جنت منطيته ظهري ودا اروح ، التفتت عليه اريده يكمل كلامه وجبرت نفسي اباوعله بفضول..
هو كمل وكال بصوت مصرور : راح اخليج تتعالجين يم طبيب نفسي لان انت مو صاحية الظاهر ولج انت شنو واريد اكلج "ولج"انه بعمري ماشفت وحدة هيج مثلج لاتخافين لاتردين لاتحترمين.
شحيت نظراتي منه احاول اخفي توتري واضطرابي
وحجيت بفتور : اي ماشايف مثلي متعود على نسوان ضعيفة ماتطالب بحقها وصايرة مصكعة .
كملت بعد ماجريت نفس : اني والله صح محتاجة اتعالج نفسياً لان فترة وجودي هنا تعبت نفسيتي حيل وعادي مراح استحي او اخجل لمن اتعالج نفسيا .
كال بجبروت : هذا هو لعد حضري نفسج الاسبوع الجاي .
ابتسمت بسخرية : بس مو اني الوحيدة الي محتاجة علاج نفسي بهذا البيت هواي غيري محتاجين طبيب نفساني يعالجهم ويخلصهم من عقدهم الي يأذون بيها غيرهم .
راح كعد على المكتب بأريحية ورجع ظهره على الكرسي وببرود : وهسه اخر مرة اسألج احجي شنو جنتي رايدة ؟
بابتسامة متلاشية ، هزيت راسي بنفي وحجيت اتحداه بصوت مهتز : سلامتك.
طلعت من يمه بهدوء .
وسط صمت منه وهدوء قاتل .
صعدت فوك ، داافوت لغرفتي واسمع صوت ريلام تسكت بدانيال ، فتحت باب الغرفة ، شفتها حاضنته وتتمشى بي وتهزه بين اديها ، ابتسمت على شكلهم .
كالت : ابتليت بيج وبابنج اني ! انت ماتكليلي وين تروحين مو داابدل وسمعته يبجي كلت لهيام تجي تاخذه مقبلت .
_ شكد حقيرة هاي اختج هسه هي تكرهني مشيناهه الطفل شعليه مو ابن خالها وحمدان يحبها ولا يرضى عليها من احجي .
_ شسوي حاقدة عليج هه نفس خالو حسان ..
_ بالله حسان نكدر نكول معذور بس هايه شبيها هي غلطت ويايه اول شي مو اني .
_ اي مو انت هم ردة فعلج قوية صلختيها براشدي اقوى من راشدي الحمزة .
ضحكت ، دهاج اخذي ابنج خلي الحك ابدل لا مهيب يغير رأيه ومايوديني ..
_ ليش مايوديج هو يكدر يرفضلج طلب ؟
_ بس مدري ليش يضوج لمن اروح لبيت رهف يمكن عباله اسوي علاقة ويه اخوهه الصاك مرتضى ههههه غيرة اخوو..
جاوبتها ببلاهة : اخو ؟
_ اي ولج اني ماعندي اخوان مهيب و لهيب نفس اخواني .
_ وهذا الي اسمه مرتضى " وغمزت الها "
_ هههه صاك من يشوفني احسه يذوب ..
_ زين خاف هو محاجي مهيب عنج وطالبج منه ولذلك مهيب يضوج يوديج لهناك .
_ ما اعتقد جان كال مهيب ليش يضم عليه هيج سالفة .
انتبهنا على هيام واكفة بالباب وبيدهه فون ريلام
وحجت بنتر : كاعدة تدكين فج ومهيب جوة ينتظرج صايرلج شووفير موديج وجايبج والله عمي زين نيالج لو اني كايلتله يغلس ويضربني بوري .
وهاي صديقتج صرعتني اتصلت بيج ماجاوبتي ظلت تخابر بيه تكول وينها خل تجي تأخرت راح نبدي.
اخذت دانيال منها والتفتت وريلام كالتلها تعالي اخذيلج راشدي وطلعن من الغرفة وحدة تدردم على الثانية .
ضحكت عليهن وكلت دانيال وغيرت ملابسه وخليته يلعب بألعابه ، سمعت صوت تليفوني يرررن ، ميلت روحي واخذته من الدولاب الي بصف السرير
شفتها موج تتصل .
اول مافتحت خط وياهه صيحت عليها
_ تفوووو عليج صار شكد اتصل بيج حقيييرة نذلة زمالة متجاوبيني من يوم الي اشتغلتي بالجم وانت رافعة خشمج تافهة .
_ على كيفج ست فرح اختج الجبيرة اني احترميني لا اجي اهد عليج بالنعال مو عبالج تزوجتي قبلي معناهه تقللين احترامج وتشوفين نفسج علينا .
_ ديله ولي ولي خبصتيني الجبيرة والجبيرة كلها تلث سنوات بيناتنا .
_ ولج انت شمدريج نايمة ورجليج بالشمس محتارة بحمودي وكاضيتها امح واميح وابنج هذا ابو راس المربع .
_ ليش شبيكم شصارلكم الصبح خابرتني 'انو' تسألني عن مسئلة بالرياضيات وحليتها الها مكالت بيكم شي.
_ الصبح هذا يا صبح ولج ؟ كولي البارحة الصبح خابرتج مو اليوم انت متيهة الاول والتالي ، البارحة بالليل بابا وكع علينا خطية .
شهكت : عمريييي بابا حبيبي شبي ولج احجي .
_ قلبه تعبان وهسه فد شوية اودي اني واحمد دكتور اخصائي الصبح طلعناه من المستشفى .
_ لا عفية موج لاتكوليها بآي مستشفى ؟ ومنو يمه هسه ؟ اخابر حمدان يجيبني .
_ ولج طلعنا شبيج شبيج وحنودي طبيب اخصائي فد شويه ماتسمعين ؟
_ يعني هسه هو شونه بابا انطيني احجي ويا .
_ فوته احمد للحمام ديسبح من يطلع احجي ويا انت شلونج شخبارج شصاير وياج ؟
_ ولج بلاوي وكعت على راسي يومية مصيبة شكل غير هذا حسان الحقير هددني يقتلني يكولي اله اخلي الناس تترحم عليج .
_ هددج شنو و ليش ؟ تايهة اله حتى يهدد بيج رجلج وين ؟ اميركم وينه ؟ ولج شنو ماكو زلم هديني عليهم اني اله اطيح حظه خاصة هالايام دا اخذ كورسات بالكونغفو اكسر خشمه والله.
ضحكت : دكعدي كعدي ام كونغفو كعدي هههه لج علي طرده من البيت ومخلا يجي بعد اله بوجوده هو ويستأذن ويخابر يله .
_ ها اي زين والله ماقصر هه ، وكلية شوكت تداومين ؟
_ ميقبل حمدان اداوم حيموتني .
_ كولي للشيخ عليه يحجي ويا مايصير هم اخذ فلوس القسط من بابا وهم ميخليج شون حكم هذا ، انوب هو الله منعم عليه خير من الله وراتبه اضعاف راتب بابا مال التقاعد شنو يقشمرنا ؟ مو كعد وعد بابا بعد شنو
_ على كيفج اعصابج هو اني هم رحت للشيخ دااكوله بس ترددت ..
_ ترددتي شنو لعد هو المن اخذ الفلوس شبيج جبانة وثول هديني عليهم اشو فد نوب سايگين عليج .
_ اي اخذ الفلوس وحتى المؤخر مالتي هم اخذه .
_ المؤخر مالتج شنو بعد؟ ليش صلوات راح تطلكين؟
_ نجبي ولج اطلك شنو اسم الله ، بس هم هنانه عدهم وره الزواج ينطون للمرة المؤخر مالتها
الشيخ يكول خاف يصير مايصير حتى لايبقى بذمة الرجال شي .
_ والله عمي الامير مالكم خوش ينطي قرارات وخوش يشتغل مايحكم العراق فد نص سنة يعدله والله يعدله .
_ حبيبتي شريف وماكو شريف يحكم العراق للاسف كلهم ساقطين وحرامية علينا دعوة نبي احنا .
_ اي صح مكتيلي الارمل الوسيم شوكت يتزوج حبيبته ختام مدري شسمها ؟
_ عزا بعينج سكتي سكتي لا احد يسمعج حمارة زمالة لا انوب مثل سالفة حسان حرام اذا اكولج على شي بعد .
_ شبيج شون راح يسمعوني واني هنا وهم يمج ؟
_ ولج اني هيج دا اشاقة وكلت حبيبته قابل شمدريني شنو بينهم بس هي تشتغل بشركة الشيخ مالة المحاماة ودائما تجي للبيت تستشيره ومدري شنو بعد فهالكلام لاتكررينه مرة ثانية لا اروح بمصيبة من ورى لساني الفالت هذا والي يرادله كص .
_ اطمأني زين هو مكتيلي حمدان رافض تكملين كلية للابد لو بس هالسنة عمود ابنج صغير وكذا .
_ لا لان جفصت العام بالكلية بسالفة نرجس وحسان وخربت خطبتهم .
_ اوو مانسوا هالسالفة هاي هو صح انت حمارة حشى الحمار منج ولسانج فالت ويرمي صلي بس المفروض ينسون عاد المسامح كريم .
_ مدام حسان يقرا براس حمدان مراح استقر اني ولج حاقد حاقد .
_ اوو هذا شكو يسمع كلامه ؟ وانت هم لاتصيرين ثولة روحيله للشيخ واحجيله على سوالف رجلج بدل مينطيج فلوس ياخذ منج والله يا الله ، يطلب من الحافي نعال.
شعندج وياخذ فلوسج ؟ ولاتسكتين عن حقج وتصيرين حمارة مستقبلج هذا وتعبج سنين تعبتي بالدراسة ويجي حمدان افندي يحرمج منه ويخلف وعده.
باقتضاب حاجيتها خوش خوش لاتكركين هواي موزين عليج وانطيني بابا اذا خلص سبح ..
بعدهه حجيت ويه بابا حبيبي تعبان كولش وكوة يحجي ، ماطولت ويا مردت اتعبه ، ختمت المكالمة كعدت مقهورة حيل بابا تعبان خطية .
ظليت افكر بكلام موج ، اتخلى عن كبريائي وافكر بمستقبلي احسن واحاجي الشيخ حتى لو رافع خشمه عليه ، بس انتظر كم يوم يفوت واحاجي .
حمدان صاير جشع وحتى ذهبي خايفة وديته لاهلي وفلوس دانيال همينه وهو دوم يسال عنهم يكول عندي مشروع مادري شله بيهم بس هاي كلها سوالف حسان هو يقرا براسه .
دانيال ضاج وظل يبجي ويريد يطلع من الغرفة يروح يوكف يم الباب ويبجي ويبرطم ويباوعلي عود يتوسل .
لبست شالي واخذته كطعته بوس واحجي ويا
حبيبي تريد تطلع بره يعمري يدلل الحلو ، شعندي غير دندون اني .
اخذته ونزلت جوه ، الساعة بالخمسة
والشمس دتروح شويه شويه ، طلعت عربانته من المخزن واخذته للحديقة ، دنتمشى بين الاشجار والزرع
الحديقة كولش كبيرة ، حبيبي دانيال تطخ بعينه الشمس ، يغمض ويخلي اديه على عيونه واني اضحك عليه .
فرينه الحديقة فر ورجعنه وكفنه يم نافورة صايرة بنص الحديقة مقابيل باب البيت ، المي بيها بارد ، اخذت منها بيدي وغسلت اديه وادين دانيال ، ظل يضحك ويمص باصابعه طلعت اصابعه من حلكه وانطيته مي بالكوب المقطر مالته واضح انو عطشان.
باوعت ع الباب الرئيسية مالة البيت انفتحت طلع منها الشيخ ، بزي الشيوخ مالته بشت من القماش الفاخر ودشداشة بيضه ناصعة جواه ، الساعة بيده اليسار والسبحة مالته ونظارات سودة تخفي عيونه ونظراته الصارمة منطي مظهر الشموخ والهيبة والرجولة الصارخة .
بصفه يمشي شرار ، لابس دشداشة بيضة ولاف الغترة على راسه لفة عمانية .
اشر لشرار على السيارة لحتى يشغلها واجه باتجاهي ونزع النظارات ، ظلينه نباوع لبعض مثل عدوين لدودين !!
الى ان نزلت راسي ابتعد عن نظراته واخفيها عن سلطته الغير القابلة للمناقشة واني افكر افتح ويا الموضوع مال الكلية.
اقترب منا خله ايده الضخمة على راس دانيال ، وابتسم اله ولزم خده كرصه بخفة .
جنت لازمة يدات العربانة لمن صار قريب ويلاعب دانيال وخرت اديه وابتعدت خطوة للخلف .
تنهد ولبس نظاراته ، وباوعلي ورفع اصبعه السبابة
باحتجاج : باعي ام دانيال انه مغلس عن تصرفاتج وتمردج بمزاجي الي غاية بيها الصبر وياج يمكن يطول ويمكن لا وبالنهاية لكل صبر حدود.
وبكل الاحوال مارايد اتخلى عن شهامتي بالتعامل وياج بس تصرفاتج تجلط وتجاوزاتج فاقت الحدود وهاي انه احذرج مسبقا فبطلي تتصرفين بطريقة مناقضة لطبيعتج .
بقلبي شيقصد ؟ مناقضة لطبيعتي معقولة يقصد اني بلا انوثة ؟
قاطعته بدون وعي : ءءاني
بصرامة رد : خليني اكمل كلامي واتعلمي لاتقاطعيني من احجي .
هزيت راسي بتفهم ..
كمل : شوفي .. كال هيج وباوع لساعته ، ورجع باوع للسيارة شرار شغلها ودينتظر الشيخ .
كدامج دقيقة وحدة تحجين شنو جنتي رايدة كبل شوية ، دقيقة وحدة فرح " اشرلي باصبع السبابة بمعنى واحد" .. وكمل : بعدها مهما كان الموضوع وحاجتج اله ماراح اتدخل ولا راح اساعدج ابد .
هو يعرف شدة حاجتي لهذا الموضوع الي جايه عموده ..
باوعت على انعكاس صورتي بنظاراته وتنهدت .
وحجيت برجاء: حمدان ميقبل اكمل دراستي ، شيخ انت جنت حاضر لمن جان شرط بابا اكمل دراسة وهسه حتى بابا دفع فلوس اقساط الكلية كاملة ومال سنتين لحمدان بس هو
حسيته انتفض وهيئته تصلبت : ابوج دفع فلوس اقساط الكلية ؟
بحماس وصدق جاوبته : اي والله دف
كال بصوت مصرور : لاتحلفين يجي حمدان واتصرف ويا .
عدل البشت مالته واندار ديروح ، مشيت صرت كدامه بسرعة وحاجيته بتوسل ممزوج باصرار : يعني حتخليني اكمل كليتي حتكوله ؟
جاوب : يصير خير .
_يعني شنو تخلي لو لا بس طمأني هذا الموضوع مأرقني وخطيه بابا و
_ يصير خير كتلج تعرفين شنو معنى الخير لو لا ؟
هزيت راسي ببلاهة .. يقاطعني وميريد اقاطعه لايازمن مجتمع ذكوري هه
_ روحي لابنج لا تتحرك العربانة ويوكع .
كال هيج بنص التفاتة وبدون مينتظر مني اجابة راح وصعد بالسيارة .
اخذت دانيال رجعت عربانته للمخزن وصعدت فوك
والظاهر ريلام رايحة لمن جنت بالبستان افتر لان ما الها صوت .
نزعت البشت ونزلت جوه اغسل ممة دانيال..
سمعت صوت حجي ومرة تبجي بالاستقبال
استغربت!!!!
قوست شفايفي وحركت اكتافي بجهل عن الي يصير
هالبيت هذا ممرات ممرات ودووخة طلعت من المطبخ
طبيت بالممر ليودي للدرج صار بوجهي حسان عطت ميتة خوف .
حط ايده على حلكي صفطني ع الحايط وكعت ممة من ايدي . بس هدأت وفكرت اصوره لان مو بايلي بيدي .
كال بحقد هاي انت بعدج هنا ولج ماتكسحتي هذا اخوي المطي شون ماياخذ حجي .
وخر ايده مني انطيته ظهري ظليت احووس بالموبايل همزين صامت جان ورجعت كلت استفزه .
كتله انت شسوي هنا هاا ؟؟ مو انطردت من البيت انت شون تفوت ماتكلي شلون .
تقرب بخطواته عليه رفعت موبايلي على وجهي حتى يطلع وجهه سويت نفسي احك وجهي بطرف الموبايل
ظل يباوعلي بنظرات تتفحصني شويه وصارت نظراته جريئة وابتسم بوقاحة عرفت معنى نظراته واشمئزيت منه دااروح سحبني عليه .
كتله وووخررر وووخر ..
كال فرح انت حييل حلوة عليمن ادزلج واحد يكسحج منا اني مااقصر .
جسمي ظل يرجف انتفضت ووخرت منه وهو يضحك
لمن صرت بعيدة عنه كتله تتتتف عليك عديم الغيرة والشرف لك اني عرض اخوووك .
وبسرعة طلعت اركض على الدرج رحت لغرفتي
فتتت وجسمي كله يرجف كعدت على الكاع وارتجيت على الباب .
وكع الموبايل من ايدي بس احاول اسيطر على نفسي
للحظات كرهت نفسي حيل هذا شون يحط عينه عليه هو يكرهني اصلا بس يسوي هيج يريدني انفصل عن حمدان ويريد يكرهني بنفسي اكيد ديستخدم كل الوسائل الي تخليني اطلع منانه .
جريت نفس تذكرت التصوير يربي ظليت ادعي بلكي نحفظ كون يحالفني الحظ يا اللهي ، وصدك واباوع واشوفه انحفظ بس خلي اجمعهن اله هسه مراح اشوفه لاحد .
حسيت الباب تندفر عزااا بس لا لحكني حسان لهنا والله اصرخ واكلب الدنيه عليه ...
انوب محد موجود هنانه لا حمدان لا شرار لا مهيب لا الشيخ صخام خاف حس بيه صورته واجه ياخذ الموبايل .
بعدهه الدفرات على الباب وخرت من الباب بس بعدني على كعدتي واباوع منو فتح الباب واشوفهه نسخة حسان بالخباثة هيام .
كتله بلا وعي وبسبب خووفي ووجع وسم .
كالت شعندج هنا كاعدة ؟
كمت على حيلي وتنهدة تنهيدة فرج
_ انت ماتتأدبين مااعرف تدكين الباب من تدخلين ؟
تخصرت هيه : من تجين لغرفتنا وتدكين الباب اني اسوي نفسج .
حسيت بدانيال يم رجليه ميلت روحي و اخذته : شتردين ؟
ماما تكول اتصلي بخالو حمدان خلي يجي هنانه ام هذا الولد سامر الي مختفي مدري وين .
كالت هيج بتكبر وتتفحصني بنظراتها المتعجرفة .
طلعت مديت لساني الها وغميتها خرعتني
سمعت ضحكة دانيال يضحك على حركاتي
بوسته بخده حيل وضحكت وياه وحسيت براحة .
، اتصلت بحمدان
وكتله تعال للبيت ضروري ..
كال شكو شصاير هو اني اصلا جاي للبيت بس خو ماصاير شي ؟
_ لا ماكو شي اطمأن من تجي راح تعرف ..
ختمت المكالمة ويه حمدان وانطيت لداني ممته رضعها غيرت ملابسه ونزلت جوه
جان حمدان توه طاب للبيت وديحجي
ويه بلقيس وبعدهه اخذته وطبوا للاستقبال .
رحت وراهم وكفت بالباب ، شفت المرة واكفة
مقابيل حمدان وتبجي وتسأله عن ابنها .
_ ابني الله يخليك انت تعرف سامر صويحبك وانتوا وياه اخوة من زمان وهو يحبكم الله شاهد بس كلي وينه ابني والله قلبي نار عليه نار .
حمدان مدنك راسه ووجه محتقن ، مرة يكتف اديه
مرة يخليهم بجيوبه ، ووكفته مو ثابتة ابد ، وعينه ميخليها بعين المرية الي واكفة كوة ووحدة وياهه
لازمتها من اديها .
هو حجى بنبرة مهتزة : خالة والله ماادري اني كل الي اعرفه كلته بالتحقيق بمركز الشرطة احنه صح طلعنه سوة بس هو رجع لبيتكم وهذا اني كل الي عندي وماافيدج خالة والله .
باوعت لوجهه بحزن : زين واخوك مايعرف شي عنه دخيلك بس كلي وينه اخوك هو هم صاحبه وطلع وياكم سوى انتوا الثلاثة .
_ والله اخوي ماموجود بيته مو هنا ماعايش ويانه حتى لو حاجيتي هم راح يكلج نفس الحجي الي كلته الج ، خالة خو مانجذب عليج احنه ، سامر صديقنه قابل شراح نسويله وان شاءالله يرجعلج سالم .
طلعت المرة من باب الاستقبال الخارجي ، وبعدهه تبجي والحجية تصبر عليها خطية ، وحمدان طب للصالة يمشي معصب حيل وبس ينفخ وهو ديمشي
طلع تليفونه وظل يخابر ، واني امشي وراه
ورى شويه حجه: حسان تعال للبيت اريدك ضروري وهسه اترك كل شي بيدك وتعال .
سكت شويه ، مسح العرك الي على كصته بطرف سبابته : خابر علي الدر هسه وكوله اريد اجي للبيت حمدان يريدني وفضهه لو اني هسه هم اخابره .
ابتسمت باستهزاء مايدرون بي يطب ويطلع حسان بدون اذن اصلا ومادري شون ماتلكفه الكاميرات .
سد المكالمة وايده ترجف ومتوتر ، انتبه عليه اباوعله بتركيز خزرني : شبيج شكو صافنة على شنو تباوعين ؟ روووحي من كدامي يله .
انصدمت عكدت حواجبي وجاوبته : شجاك ماتكولي من لمن طلعت المرة لهسه وان
بريق عيونه ينذر بالخطر ، مخلاني حتى اكمل ، رفع الطبلة الكزاز من الصالة وركعها بالكاع ، وتناثرت صارت طحين ، خليت اديه
على حلكي مصدومة منه وهو يصيح : سككككككككككككككتي صوتج ما اسمعه .
اجوا الحجية وبلقيس ونزلت هيام ...
الحجية كالت شجاك يمه على كيفك ويه نفسك وصاحبك الله يفرج عنه ...
وهو يباوعلي بعصبية ..
الحجية عضت شفتها تقصدني : انت النسرة شحجيتي هاا ولج شصخمتي ماتكدرين تسدين حلكج وتسكتين اخخخخ منج .
_ اني شعليه ماتكوليلي كل شي براسي ترا حرام عليكم ..
هو صيح : سككتي سككتي لا ابتلي بيج سكتي .
وطلع من البيت ..
الحجية : احسلج هيج احسلج يله لمي الكزاز لاظلين واكفة مو بس بيج عصبتي وخليتي يكسرهه .
اخذت نفس وفعلا لمينا الكزاز واجت بلقيس
تساعدنا اني وياهه ونظفنه الصالة ، صعدت وطليت من البالكون ، شفت حمدان بالحديقة ، مفرفح ويلوب
ويدخن .
لشويه حسان اجه ، نزل من سيارته ، شون حيال حتى لحمدان مكاله توة جنت بالبيت ، بقيت ارقبهم
ظلوا يحجون شويه وكبت بينهم بالصياح والعركة .
وحمدان لزم حسان من قميصه وشككه ، حسان لكمه على وجهه انخطف گلبي من بين ظلوعي ونزلت اركض واصيح .
توجهت للحديقة واصيح واشوفهم واحد يضرب اللخ وحسان هو المسيطر ، حمدان منهار وقوى ماعنده .
وجان حسان يصرخ بوجهه تريد تودينه بتهلكة انته تريد تقضي علينا وعلى سمعتنا ..
ركضت اصرخ حساااان كلب حقييير اتركه مخبل اتركه
توي واصلة الهم داافك بحمدان منه ، خله حسان ايده على كتفي ودفعني وكعت على الكاع .
حمدان يباوعلي منهار ويحجي بصووت مرتج والدم ينزل من يم حاجبه ومن حلكه وخشمه : فرح رجعي للبيت فرح لا تتدخلين روحي يم ابنج .
طلعوا الحجية وبلقيس ضلت الحجية تتوسل عوف اخوك يمه شجاكم ماتكلي عووفه ، ظل يصيح هو
لحد يتدخل لحد يتدخل .
وسحله من ملابسه واني وراهم ويدفع بيه حسان وبلقيس تسحبه من ايده يوخرهه بعنف والحجية كعدت بالكاع ومحد بالبيت كلهم طالعين .
اخذه بقووة وحمدان منهار عبالك طفل ويجر بي ماادري شبي حمدان وليش هيج مستسلم حيخبلني .
صعدوا بالسيارة اثنينهم وانطلقت بيهم
كعدت بالكاع ابجي ، الحجية تكولي دخلي
هم اخوان بيناتهم يتصافون ، هسه ياخذه لبيته ويتفاهم ويا .
دخلت جوى وصعدت فوك ، كعدت افكر معقولة الهم ايد باختفاء سامر ؟ شبيهم وعلى شنو هيج گبوا!!
رجعت بذاكرتي لقبل اقل من سنة تقريبا ، جنت حامل وتعبانة واستوه مخلصة محاضرات ودنتمشى اني وصديقتي نرجس كالت امشي نروح يم بابا شويه .
رحنا يم ابوها الدكتور ابراهيم ، هو يعرف حمدان لان هم بنفس الكلية ولمن جان حسان يجي للجامعة ونكعد سوى اني وحمدان لمن جنه مخطوبين وحسان ويانه ونرجس .
تقوت علاقتهم وحسان تقرب للدكتور ابراهيم واخذ الحجية وطلبها منه قبل فترة قصيرة وبذيج الفترة جان بعدهم ممرجعيله الجواب.
لان نرجس الوحيدة لابوها وابوها بعده ممقرر
سواء ينطيها ااو لا لان يريدها تكمل دراستها.
وكعدنا نسولف وظل الدكتور يسألني على الشيخ كال هو صغير بالعمر واولاده كبار عبالك بكده .
جاوبته اي هو متزوج عمره ١٨ سنة ، تزوج بنت عمه
عمه جان على فراش الموت وماعنده غير هالبنية
يتيمة ام ، جان الشيخ علي الدر اكبر واحد بين اولاد اخوه ، فزوجها اله .
وهي هم اكبر منه بأربع سنوات خلفتله مهيب ولهيب وكضت عمرها كله مريضة خطية ابوها وامها مثل ماورثولها الفلوس والاملاك ورثولها المرض وتوفت
قبل تسع سنوات .
الدكتور ابراهيم : وهو ممتزوج بس بنت عمه ؟
_ اي نعم دكتور ممتزوج غير بنت عمه وحاليا هو ارمل
الدكتور بنبرة اعجاب : ماشاءالله الشيخ شكد وفي رغم هي اكبر منه ومريضة مافكر يتزوج عليها حتى بعد وفاتها .
_ اي صحيح دكتور الظاهر هو لخاطر اولاده حتى لينقهرون لان كلش يحبون امهم .
_ اي لو واحد غيره بالفاتحة يكولهم دورولي مرة و ورى الاربعين يتزوج لو ليش هيج اصلا اثناء مرضها يتزوج عليها خاصة هو شيخ .
_ لو خليت قلبت دكتور ..
_ صحيح فرووحة حسان شلووونه ؟
حجه هيج وباوع على نرجس خجلت ودنكت ...
كتله زين حسان الحمدلله خوش ولد هو .. وابتسمت وفعلا وقتها جان زين مو خبل نفس هسه .
كال اي هو يدرس ماستر حاليا خوش ولد وطموح يعجبني ..
_ لالا دكتور هو مرحلة رابعة كلية صيدلة مو ماستر انت متوهم دكتور .
نرجس فتحت عيونها على اوسعها وظلت تعضلي شفتها ونظراتها تتوسل ، باوعلها ابوها هي بطلت حركاتها .
رجع باوعلي
كال بتعجب : أهاااا مرحلة رابعة ؟
_ بلي دكتور مرحلة رابعة ..
_ لعد هو شون يكولي دااحضر للماستر ؟ وحتى اني مسجلة بالتليفون حسان ماستر .
وباوع لنرجس دنكت
كمل كلامه : يلله انوب اغير اسمه اسمي حسان كاستر .
ضحكت اني ونرجس ملامحها ذبلت .. بس مفتهمت عبالي متوهمين مااقصدت اخرب عليهم .
الدكتور : لعد شعجب هو كبير بالعمر ٣٣ سنة لهسه مرحلة رابعة ؟
_ اي دكتور هو من تزوج ترك الدراسة كم سنة بسبب مشاكل صارتله وي طليقته أثرت عليه .
_ شلووون؟؟؟؟؟ جان متزوج ؟
_ عبالي تعرفون بما انو هو خطب نرجس وجاب الحجية لبيتكم وعلى تواصل ويه حضرتك .
مد ايده ياشر : لا والله هسه عرفت منج فرح .
_ اني مو قصدي دكتور والله وما اعرف حسان شكايل الكم بس اني يعني هيج دااخذ وانطي بالكلام ويه حضرتك ويمكن هو لمن تصير الخطوبة اكيد ميضم عليكم ويكوللكم كولشي .
_ اي بس سالفة الماستر هاي كولش واكفة متفاجأ شلون كذب عليه وشنو غايته ؟
_ احتمال ميريد يخسركم وعباله متقبلون لمن تعرفون بي بعده ممكمل دراسة .
_ والله ما ادري فرح صدمتيني هسه .. يحجي ويباوع لبنته .
طلعنا من غرفة الدكتور ونرجس انهدت بيه
انت شكد كراكة فرررح شكد ثرثارة لخاطر ربج لج هسه بابا ميقبل تدرين بي شكد يحب المثالية .
اي غير يريد مصلحتج شكو بيها
وحسان يحبني وكال لبابا هيج عمود لا يرفضه وياخر الخطبة ..
حبل الكذب قصير "بيبي" الله راد يكشفه كدامج وهذا كله بي صالح الج .
مجنت اعرف بي عذاب الي ...
هسه حسان يطيح حظي واالله خو انت ولا تعترفين بغلطج ابد .
اووو شجاج نرجس الي خلق حسان ماخلق غيره وبعدين شكو هو ويطيح حظج ترى ابوج يريد مصلحتج يابه على كيفج .
بعد فترة خابرتني نرجس تبجي : بابا راح وسأل عن حسان يم اهل طليقته وكايليله عصبي ويضرب يدميها تدمي بسبب او بدون سبب ويشرب ويدور نسوان ومن هالحجي شنو من باب فتحتي علينا يافررح يامخبلة.
اووي اني شعليه عبالي ابوج يدري بي جان متزوج وعبالي متوهم مادري هو خدعه ومجذب عليه على كيفج ست نرجس وسالفة الشرب والنسوان هاي مادري بيها والله .
بعد ايام دزوله رفض ..
جن جنونه ونرجس كتت الاول والتالي كدامه واجه يعاركني وحرض حمدان عليه وحمدان اجه يضربني لو ما حامل بس الشيخ وكف ويايه ورزلهم هم الاثنين .
لان حسان فشل الشيخ كدام الناس لان هو بنفسه راح وطلبها من الدكتور وميدري بحسان من جذب عليهم وحسان اوهم الشيخ انو كايل الهم مطلق جان ، مما خله نار غضبه تزيد عليه .
ومن يومها حسان يكرهني كره العمى ويريد بس ينتقم مني بآي طريقة .
*****
مهيب ..
بالممر كبال الدرج جريت كرسي وكعدت عليه
وظليت انتظرها لحد مانزلت من فوك كلبي تخربطت نبضاته وصار يدگ بخبال هو هيج دومه معذبني عليها .
وهي ولا تفتهم ولا تحس نزلت وابتسامتها ماليه وجهه عود ترضيني بابتسامتها لا والله مارضى اله امتلك قلبها بس هم هالضحكة هاي تسّكن ألم كلبي النابض بحبها
لدقايق مو اكثر .
مديت ايدي لورا راسي وجريتها من جوا ليفوك ومبعد عيوني عنها احاول اخفي توتري ، هي اجت كالت
ها نروح ؟
باوعتلها بتفحص اجيك لبسها ، لابسة جبة مرتبة وحجاب نفس الجبة هو احنه هذا لبس نسوانه كلهم .
رفعت حاجبي وبنبرة تساؤل هي حفلة عيد ميلاد واكيد هناك راح تنزعين الجبة مو ؟
ابتسمت ها اي اي هم بس بنات
وشلابسة جوه الجبة بالله ؟
والله محتشم والله
اشوفه؟
نزعت جبتها بدون اعتراض ، لابسه قميص ابيض انيق ووياه ليلك قصير جوزي وتنورة نفس لون اليلك
تنهدت بقوة....
هي كالت ها شبيك تأفف ترة محتشم والله لو هذا كله ممحتشم عندك .
اي افتهمت لبسي يله وهناك مو تظلين تفترين ببيتهم كعدي بمكانج وسكتي علما تخلص الحفلة اني باقي انتظرج يم بيتهم
لا شعندي مفترة اصلا استحي والله بس انت روح خاف اتأخر وهي هم عازمتنا على العشه
عشه شنو ريلام صدك تحجين شنو ماعندج بيت تتعشين بي حفلة بيها مجال عشه انوب شنو؟ وبعدين هي مجرد صديقتج لا بنت عمج ولا بنت خالج
والله ماما كالتلي موافقة ميخالف ابقي يمهم على العشى مابيها شي .
لاء ماعندي اليوم بطوله اني انتظرج تخلص الحفلة حدج ساعتين او ساعتين ونص وتطلعين
اووو مهيب شبيك انت لي
بترت كلامها وخليت اصبعي السبابة بنص شفافي بالطول بمعني اسكتي ومااسمعلج كلام .
هي برطمت كالت ماروح دتريد تصعد الدرج سحبتها من فوك ونزلتها يله امشي بلا دللللع .
بقيت لازمها من ايدها لحد السيارة صعدتها وسديت الباب ..
طلعنه بالطريق واني متعصب كلش ممرتاح لروحتها هاي لبيت صديقتها ، شكوك تخليني اتعصب واتنرفز
اني رجال ومرتضى رجال واعرف شون يباوع للمرة
ماريد احد يباوعلها
لو بيدي اضمها يم كلبي واقفل عليها ضلوعي وياريت تحس بيه
شون تحس بيه اذا كل الي بالبيت يكلولهه هذا اخوج
واخوج ..هففف استغفر الله ...
سايق ورايه ظل يدك هورنات يريد يسبقني وكدامي سيارة مديتله ايدي من الجامة وظليت اسب واغلط
انتبهت على ريلام تحاجيني بنبرة خوف .
شبيك مهيب على كيفك راح تدعم راح نسوي حادث
صرخت مهييييب انتتتتتبه
جانت سيارة طالعة من الفرع وجان الاصطدام وشيك
لزمت بريك وكفت السيارة وريلام انهارت بالبجي ...
بسرعة وبسبب الخوف خلت راسها على كتفي وايدها لازمة بزندي حيل وترجف
خليت ايدي ورا ضهرها وسحبتها اليه
لايذة عندي منهزمة من غضبي ومحتمية بيه ..
ظليت استغفر واهدي بيها ..
معصبة مني لحظات ووخرت عني وتحجي وتبجي
رجعني للبيت يلا كولشي ماريد منك ...
اهدي ريلام اهدي هسه اوديج لصديقتج بس اهدي
ماريد اروح واني بهاي الحالة اصلا انت مجنت قابل تجيبني من وره خشمك طلعتني اصلا بعد ما اصعد وياك ..
وخرت مني فتحت الباب ونزلت ، ....
باوعتلي من الجامة ووجهه متروس دموع على خدهه
_ اجر تكسي ووديني للبيت اخاف ارجع وياك بعد ناوي تموتني
راحت كعدت ع الرصيف واني هم نزلت من السيارة ورحت كرفصت كدامها ..
_يله عيني لتزعلين عليه تدرين شكد احبج اني وجاي تعبان بس بدلت وجبتج .
_جان كتلي تعبان وماوديج ليش هيج تتصرف وتأذيني .
مو كتلج ياعيني بس انت ظليتي تلحين عليه وسويتيلج زعلة واني ماعرف ارفضج طلب مو هيج انت متعودة عليه
_ اي مو كتلك ماروح ماروح عرفت مزاجك ازرك اليوم بس انت جريتني ووديتني للسيارة .
_ يله هسه كومي عيب كاعدة هنانه يمعودة ميصير الناس د تباوع علينا .
_ماا اصعد وياك خايفة خابر على خالو شرار يجي عليه
_ ليش تخليني اسبج واسب خالج شرار هسه
باوعتلي مبرطمة ...
_يله كومي حتى اخليج تتعشين يم هاي صديقتج
_صدك تقبل يعني ؟؟
_اي امري لله يله كومي ..
كامت وصلتها دكيت الباب اني واجر بيها اخليها وراية خاف يطلع مرتضى وعيونه تشوفها
هي هم مستغربة بس متكدر تعترض ..
كلبي بيدي مخلي لا يطلع هذا الحيوان
وانفتحت الباب وطلعت امه هي تعرفني ظلت تسلم عليه اكلتني اكل بالسلام
كالت فوت يمنه مرتضى جوه نايم هسه اصيحه الك
اطمأن قلبي .. مدام نايم دخلت جوه وكفت بالحديقة انتظر مرتضى وريلام دتروح ورا ام صديقتها.
سحبتها من ايدها رجعتها عليه : مثل مكتلج تكعدين مكانج وتسكتين خوش
_ اي اي بس اتركني وجعتلي ايدي شبيك ..
انتبهت على نفسي لازم ايدها قوي رخيت قبضتي ..
وام مرتضى صاحت يلله يوم تفضلي ..
هي راحت وراها بعد ماباوعتلي نظرات مستغربة وخوف
فركت وجهي حاجيت نفسي لك مهيب شبيك اتصرف طبيعي شجاك!!!!! هيج راح تكرهني
بقيت دقايق افتر بالحديقة واشوف بنات يطبن للبيت
شفت وحدة منهن باوعتلي وظلت مركزة بيه
لحد ما وصلت لباب الاستقبال وهي تتلفتلي ....
وراها طلع مرتضى يلبس بقميصه ووجهه وشعره مبلل اجه سلم عليه ...
كال ها شعجب ذاكرنه اليوم
ابتسمت هو باوع ع البيت سمع صوت ضحك مال بنات
كال هااا تذكرت عيد ميلاد اختي والله اني من انام واكعد بعد مادري بالدنيا
ربتت على كتفه كتله اي حقك ...
رجع التفت على باب الاستقبال كال جايب ريلام مو ؟
لفظة اسمها بلسانه خلتني افقد كل اعصابي
تجعد الجلد الي بين حواجبي بلا وعي مني
هو انتبه وكال اقصد بنت عمك
صححتله واني اكزز على اسناني ؛ بنت خالي .
كملت : ها اي اكولك شون عازمك على طلعة روح اسبح وبدل وامشي وياي يله
لا يمعود خاف يحتاجوني بعيد الميلاد اجيبلهم شي اوصل وحدة منهن خليها غير مرة ...
هذا ظل يحوم بس لا يريد يشوفهه مو بعيدة يسويلهه كمين بالبيت ويحاجيهه.
خررب اإإإنه لازم ابعده عن البيت واطلعه علما تخلص الحفلة وبعد لو تبجي دم مااجيبها واخليها كدام عيونه حتى ياخذها مني .
قنعته باسلوبي كوة اقتنع واخذته ورحنا للكوفي وراها رحنه للمول وتعشينه بالمطعم
احسه ديعاقبني لان بعدته عنها مظل شي مطلبه وشلني الطلي ابن الحمار شون رهمتها مادري
كتله بقلبي تاكل سم ووجع بكلبك .
المطي كال ماشايل فلوس .
اشتريتله عطر على حسابي غالي كلش وماركة .
كال غير مرة انطيك وادري بي راح يغلس عليهم الجلف ابن الجلف .
خلصنه واخذته لبيتهم ونص فلوسي الي بالمحفظة مخلصات عليه
هم مخلي عينه على "محبوبتي" وهم اصرف عليه هذا هم حظي الاغبر الجايف
خابرت ريلام رنتين يلا جاوبت والمطي مرتضى فات جوة ..
بس ردت اجاني صوتها بنبرته الرقيقة الهادئة ..
الو مهيب اجيت
حاولت اهدي اعصابي خاف افرغها بيها
جيت اكوللها تزغنبتي ؟ بس كلبي الكلب ابن الكلب مارضى على لساني
كتلها تعشيتي يله طلعي ... وسديته بوجهه ..
عقلي يكلي على كيفك وياهه هيج راح تخليها تكرهك
وكلبي يكلي حقك محمل نفسك اكثر من طاقتك ....
طلعت ويه طلعة مرتضى جايبلي مي وشفته ماكدر يلزم نفسه باوعلها ودار وجهه وهي تمشي على كيف
تمنيت اطير واضمها عن نظرات عيونه
تمنيت واني مكاني وبسحر ساحر وقدرة قادر اخفيها ومتنشاف بس عيوني تشوفها .. بس وين ما اكدر هنا حسيت نفسي عاجز .
اجت وكفت يمي بحياء وخجل مدنكة
همستلها من بين اسناني كدامي للسيارة يله
راحت هي خايفة وتتلفت..
سلمت على مرتضى وطلعت ديطلع وراية دفعته بس بعنف هو استغرب بس اني احس نفسي ماسيطرت على روحي .
بعدها رحت شفتها واكفة يم السيارة ومدنكة
عصبت خاصة مرتضى ويايه ...
وكفت قريب منها رفعت راسها باوعتلي مبينه فرحانة ومتونسة ويه صديقاتها وهالشي عكس على عيونها .
خزرتها مو كتلج فووووتي جوه ؟
ارتبكت تنقل نظراتها وراية وخجلانة ..
همست بتوتر .. مق م ...مقفولة سيارتك
التفتت شفته مرتضى ورايه رفعت ايدي اله
كتله فيمان الله
فتحت السيارة بالبصمة وفتحتلها الباب بسرعة لزمتها من عكسها وفوتتها جوه السيارة .
ورحت صعدت تنهدت بارتياح احس توه طالع من جوه المي ومخنووك .. وهسه اتنفست ...
حركت السيارة
باوعتلها كاعدة ومبينه معصبة عليه ..
كتلها ها تونستي ان شاءالله ؟
التفتت عليه معصبة : طلعتها لروحة من خشمي سم وزقنبوت ..
لالا صدك ماتونستي يعني ؟
نترت لاااء
احجي عدل ولج
ماااا
ريلاااام ...
اسكت عني
ماشي ...
لحظات مرت ورجعت حاجيتها : مو جنتي موصيتني على كفر لموبايلج شوفي يمج هذا ع دشبول عجبج ؟
محلوو وميعجبني
شفتي هسه انت ومعجبج؟
هففف
ديلله عاد اسف تدرين بيه اضوج ترحين لبيت مرتضى
ليش بلله ؟
مرتضى مو راحة واخاف عليج فوكاهه ؟
سكتتت
اشو سكتنا شنو معاجبج الحجي؟
ظلت ساكتة ..
انفعلت شبيج ساكتة لو تعرفين بي مو راحة ولج خاف متحرش بيج وساكتة دست بريك ووكفت السيارة بنص الشارع ...
يتبع ..