[فيتامين سي]

السلام عليكم احبابي
اليكم الفصل الرابع من رواية هذيان بين جمر وجليد ..
نورا ناصر ..
****
اشعر اني في غربة قاسية تلوك بي بأنيابٍ ضخمة ، كعنودٍ افترسها اسد مع لبوته وشبليه ..بقلمي..
****
هي خافت ورفعت اديهه بفزع ...
لالالالا والله مو هيجي شبيك مهيب ليش دتخوفني انت والله محد متحرش بيه كلامك مايقبله العقل ابد
لو متحرش بيه مستحيل اسكت ومااكللكم ومستحيل اروح لبيتهم بعد شبيك انت ما إلك ثقة بيه ؟
تنهدت ورجعت حركت السيارة واني ساكت بس اغلي سكوتها ضوجني حييل واستفزني ، سقت السيارة بهدوء هالمرة .
وصلنه للبيت هي راحت بدلت واني كعدت بالحديقة ضايج وبس ادخن ..
سمعت صوتها يمي ...
كالت عاشت ايدك على الكفر كلش حلو
اشرتلها تكعد يمي وطفيت الجكارة بيدي ...
كتلها اكولج اكو وحدة اليوم اجتي لبيتهم لابسة فستان قصير اسود وشعرها طويل بس مكفش وبيضة حيل وعيونها عسلي منو هايه ؟
هي رفعت تك حاجب ومبتسمة خوش مركز بيها ها عجبتك مو انسقلك وياها ؟
فتحت عيوني مصدوم ونظراتي تحاجيهه
شسويلج بعد وتحسين شسووويلج ؟
كتلها ولج انسقلك شنو انت منين تعرفين هاي السوالف
شبيك مهيب ترة مو صغيرة اني
منو منسقلج من كبل ولج ؟
محد محد بس لاتعصب بس اسمع البنات يحجون
سكتت ... وتنهدت ..
هي كملت هسه مكتلي تريد اخطبها الك ملازم ننسقلك ندخل من الباب احسن
باوعتلها بعدم رضى وهزيت راسي
درت وجهي : لا بس مو راحة ونظراتها زايغة ابتعدي عنها ..
_ اصلا مااعرفها هي بنت خالة رهف تصير ..
_ كل هالجمال والمطي مرتضى ل.. جيت اكول لاحكني عليج بس كلت بكلبي والها كلت ميباوعلها ..
شمدريك ميباوعلها ؟
ادري غير صديقي ..
رفعت ردانها طلع زندها ابيض يلمع وبي طكعة بنفسجية
كالت شوف شسويت بيه من لمن لزمتني مساع
عدلت كعدتي باهتمام وظليت اباوعلها
هاي شنو متاكدة هاي اني ؟
لعد منو متكولي طبعا انت .. منو لزمني هيج غيرك.
يله اسف حقج عليه .. اخذت راسها وبستها على راسها
تريد تكوم كتلها منا وهيجي لازم تلبسين حجاب كدامي وشي ثاني لازم متطلعين اديج هيجي ميصير
ليش انت مو اخويه امك الله يرحمها رضعتني ويه اختك الي توفت الله يرحمها واكيد مراح تباوعلي بغير نظرة
صيحت لج بابا ماكو شي اسمه مثل اخوية ماكو دتفتهمين ؟؟؟ اني ابن خالج واحل عليج واكو شروط للرضاعة مو لان رضعتج امي كم مرة صرتي اختي
شنو يعني احل عليج ؟
غمضت زفرت واستغفرت ..
سمعت صوت شرار وهيام وراية واجوي كعدوا يمنه ..
شرار ... شبيك تجوعر شبيك ؟؟ مطي انته ؟
ماكو شي بس هاي المطية مادتفتهم ...
بنبرة غضب مصطنعة : شبيج مدتفتهمين على اخوج ولج
ضربت اديه على جوانب الكرسي وكلت بصوت عالي
_ استغفر الله ياربي
شرار : فهموني السالفة شكو ؟
ريلام : هاي انت كلتها خالو شرار ، مهيب يكولي البسي حجاب كدامي ميصير ، زين اني متعودة عليه اخويه
صيحت : لج انت منيلج اخو اني ابن خالج مطية
لج داكلج كبرتي صرتي كد المطي البسي حجاب واحتشمي منا وهيج .
شرار: اي صدك سمعي كلامه مو غلط ..
باوعتله مبتسم واخيرا بطل نذالة ..
كمل كلامه : انت كبرتي وبهاي المناسبة تعاي يمي اختاريلج رجل .. عندي خوش رجولة
وطلع موبايله وراح ع الاستوديو وطلع صور اصدقائه .. القائمة مالته الخاصة بابعرسان يحتار شون يزعجني .
صيحت شرار انت شتسوي ؟؟؟
معليك تعاي ريلي كعدي يمي ، ....
هي كامت بسرعة وراحت كعدت يمه وخربانة ضحك
خزرتها ريلام اثگلي ...
هو خالو صاحلي شعليه ..
جرها اله وشوفهها بالموبايل
باعي هذا صاحبي اسمي ابو الهول لان خشمه اكبر من راسج
كالت ايييع محلو خشمه عبالك غرفتين نوم وحدة بصف الثانية وحلكه الصالة
انجبي اهم شي رجال ولج هذا الموعاجبج جان يدرس ويايه طب بروسيا الله وفقه وصار ثور اقصد دكتور
مهيب : وانت بقيت مطي والله يا الله ...
شرار : وشبي المطي ترى المطي الموعاجبك خوش حيوان وخدوم بس الوادم خربت سمعته .
ريلام ضحكتها صارت تهلهل وهيام كالت عمو عمو اني شوفلي رجل وتباوعلي مفهمت نظراتها .. عود تغورني والله يا الله .
كاللها انجبي اتبتز "ادبسز" انت بعدج صغيرة مو مال زواج بس ريلي .
ضحكت ريلام عمو ترة مابيناتنه اني وياهه بس عشرة دقايق .
اني كلت انجبي والرجال بس الج خل اشوفج بعد ...
هيام كالت هاي شنو عيني مهيب جايب لريلام كفر واني مجبتلي مع العلم اني وصيتك قبلها ومن زمان .
ببلاهة رديت عليها : صدك انت وصيتيني شوكت ؟
اي والله وصيتك
ها حقج عليه والله نسيت هسه خالج شرار يشتريلج ..
شرار وكف على حيله وقفل موبايله وخلى الموبايل
على الميز ومد اديه بجيوبه
وصاح بعلو صوته اني مفلس لحد يوصيني على شي اصلا اني بقمة الافلاس حاليا . دااحاجيكم من اعلى القمة
وطلع جيوبه عود ديشوفنه فارغات
وجان يوكع منها عشرات اثنين وخمسة وعشرينات تلاثة ..
ضحكن البنات واني دنكت اخذتهن بساع وكتله اي اي شفناك مفلس اصلا ماعندك فلوس
واخذت الفلوس وركضت بيهن جوه البيت ودحستهن بجيوبي وورايه شرار يصيح والبنات يضحكن .
*****
موج ..
اخذنا بابا لدكتور اخصائي ، بعد التحاليل والفحوصات
كال محتاج قسطرة للقلب ، رجعنه للبيت واني بس افكر ببابا ، خابرت فرح كالت الجو متوتر ببيتهم
ورجلها متعارك وي اخو لمن يرجع عود تجي النا
تشوف بابا ، انهيت الاتصال وياهه وفكرت اطلع
بابا للهند او ايران او تركيا حتى يتعالج ، ورغم
الدنيا مغرب قررت هسه اروح لبيت عمو
واكوله على مرض بابا واخذ منه مبلغ عمود علاجه .
طلعت من غرفة بابا بعد ماتأكدت هو نام وارتاح
ورحت لاحمد شفته صافن على التلفزيون
صحت احمد احمد مجاوبني ، هو كاعد على الكاع .
خليت اديه على اكتافه وعصرتهم حيل .
عاط اخخخ ووجع وسم ومررض شبيج ..شتردين ؟
حاجيته ببرود : حمودي حبيبي اخويه الحبيبب امشي وياي لبيت عمو خلي ناخذ منه مبلغ نسفر بابا للخارج .
اشرلي بيده بعدم اكتراث : روحي وحدج ماروح وياج اني متعارك ويه سالم ومااشتهي اشوفه بعيشة الله .
_ لك بس وصلني اني اطب
_ نجبي كتلج مااولي ..
_ لعد انطيني سويج سيارتك اروح بيها ..
_ اكلي تبن وروحي بالارنب .نسيتي شون شخطيتيها البارحة
ظليت اعصر باكتافه حيييل وهو يوخر اديه منه
خالة كاعدة على القنفة ودتلكط تمن بهالليل شسوي بي ماادري عاطت وكالت لج فرررح على كيفج كسرتي ظهر ابوج بهالضرب شجااااج .
باوعتلها : خالة اني مو فرح اني موج وهذا مو ابويه هذا احمد وبعدين شتسوين بالتمن بهالليل .
دنجت على الصينية وابتسمت وكالت بحالمية
: دااسووي دولمة رياض يحب الدولمة . فجأة تغيرت ملامحها بعصبية وظلت تهدد : والله اذا واحد منكم اكل منها اكسر ايده .
راح كعد يمها احمد : خالة الله يخليج خطيبج السابق رياض عافج و تزوج وخلف ومات بحرب ايران انسي فدوة الكلبج ابويه تعب كلبه من وراج ودولمة بهلليل خالة صدك جذب تردين تزوهرينه .
صيحت : احمد عوف خالتي وانطيني السويج هسه يله بسرعة .
كبر شكد تلحين لخاطر الله
وشمر السويج عليه لكفته بخفة
كمل : تروحين بيها وترجعين خدش ماريد اشوف بيها شخط ماتشخطيها هاي العزيزة الغالية .
موتصيرين رعنة وبالعناد تسكطيها االي اذبحج .
واشر على نحره بسبابته بمعنى انحرج .
_ بالله صارلي حادث بيها ومتت تذبحني واني ميتة ؟
_ اجيج للكبر اشبعج بوكسات
_ ذيج الساعة ميتة اني مااحس ..
_ مادري المهم اشفي غليلي منج واخذ حك العزيزة الغالية .
فريت ايدي : غير اخو انته هاي خوتك نص ردن لا والله صلوخ .
وهو دار وجهه على الفلم
وظل يباوع ، صحت انوووو انوووو وسم وينج .
مجاوبتني صحت انييييين ووجع تعاي .
طلعتلي : شكو شبيج تصيحين وبعدين هذا ااالاسم اكرهه لاتكوليلي انين لاتكووولين ياالله شكد كئيب هالاسم .
صحتج نعال مجاوبتي من تجاوبيني بنفس اللحظة انوب مااصيحج انين وديري بالج على بابا بما انج انت الوحيدة هنانه صاحية .
احمد كام و كعد يم خالتي همس يم اذنها : خالة موج تكول عليج مخبلة .
كامت خالة على حيلها وشمرت عليه صينية التمن
طشتها عليه من فوك ليجوة جمدت بمكاني وهي
ظلت تدردم : فوكاهه اريد اسويلكم دولمة انوب تتعنفون والله ولا اسويلكم ظلوا موتوا جوع .
_ الله ياخذك احمد وانت خالة هستوج تردين تسوينها لرياض الدولمة انوب صارت النه شوكت .
عاطت بعصبية: ولي ولي ام البناطير المشككة خيطي بناطيرج وتعاي انوب احجي .
_ نعم الله عليج خالة ...اني اروح .
نكتت نفسي وشعري .
دااطلع تبعني احمد ويصيح ورايه كلت اووو هم حيوصيني على سيارته التفتت شفته يلبس شحاطته شمرت السويج عليه كتله هاك شهالمذلة اروح بسيارة بابا .
كال مطية جاي وياج قابل اخليج تروحين لوحدج .
بتنهيدة فرج كلت الحمدلله من حسيت .
طلعنا من البيت بسيارة احمد ورحنا لبيت عمي
هم قريبين منانه بعد كم فرع نفس المنطقة .
وصلنا لبيتهم احمد كال نزلي انتي واني راح انتظرج هنانه ماريد افوت واشوف سويلم السكط .
نزلت حاجيته من الجامة شعليك منه انزل سلم على عمو .
حرك راسه وكال تؤ تؤ روحي وحدج .
عفته مالحيت عليه ورحت دكيت الباب وطلعلي عمو
سلمت عليه ظل يباوع ورايه وهو يرد عليه
هاا جايه وحدج اخوج وينه ليش مااجه وياج ؟
_ ها مو بابا تعبان بقى يم بابا .
_ اي خابرته قبل شوية ابوج بس مارد عليه .
_ تعبان والله عمو كلش تعبان ..
فوتني جوة ودخلني بالصالون مالتهم ، اجتي مرته
سلمت عليها وراحت .
رأسا فتحت الموضوع ويه عمو : عمو ترة بابا تعبان اريد اطلعه للخارج نسويله العملية مال القسطرة ومحتاجة منك مبلغ .
_ بنتي ترة العملية هاي سهلة وهنانه دكاترة يسوونها ليش مطلعته للخارج ومكلفة نفسج ؟ مستشفى خاص وسويهه اله وهذا هو .
_ ماادري عمو خلي اسأل عن دكتور قلب زين والله كريم .
_ اي اذا على المبلغ اني انطيج فلوس للعملية شكد تحتاجين بس اكطعه الكم من فلوس البيت انت تدرين البيت الي كاعدين بي انتوا مال ورثة .
فتحت عيني مصدومة : هم كلهم الله منعم عليهم عمي وعماتي بس يحومون على هالبيت صح حقهم مانكول لا وبهالوكت محد يتنازل للاسف حتى لو يشوفونه بالشارع بس مو وكتها هيج يكولي اني جايته عمود بابا وهو مريض .
هزيت راسي وهو راح جاب فلوس وانطاهم الي
كال اروح وياج لبيتكم اشوف ابوج ومرته هم اجتي
تبعتنا بس احتاريت شسوي خاف يشوفون سيارة احمد واني جذبت قبل شويه .
طلعنه من بيتهم وشفت احمد وسالم كاعدين يضحكون ويسولفون خزرت احمد وعمو كال مو هذا هو اخوج لعد شون تكولين بالبيت وبقى يم ابوج .
احمد جاوبه ها مو اني اجيت وراها عمو كلت خاف احد يتعرضلها .
سالم لزم احمد من كتفه وبنبرة تهكمية : انته ليش تجذب ولك واني جاي من السوك شفتها نزلت من يمك من السيارة .
خزره احمد واني غصت بنص هدومي من الفشلة وعمتي تكول طلعت جذبتهم الجماعة . ها ولك حميد ليش مادخلت لبيتنه تخجل من البنات .
ضحك احمد لا والله عمه مو هيج السالفة .
عمو كال هاي نقطة عليك احمد .
سالم دخل للبيت واحنه اخذناهم ورحنا لبيتنا
شافوا بابا واحمد وصلهم .
دخلت لغرفتي ضايجة من عمي ، المفروض اخو مريض يوكفله ويسعيله هو ولا مهتم ، اني اصلا رايدة الفلوس دين بس هو عبللك يريد يذكرنا بالبيت الهم ويريدنا نطلع منه .
فتت على كروب المسنجر الي بي البنات الي ادربهم بالجم حتى يرشقون
لاعبات لعب ومستهينات بأم الوضعية ومخربطات وتعب شهر ضارباته جلاق بساعات قليلة ..
عود كتلهن يوم الجمعة فري بس ديروا بالكم اكلوا بس كميات معقولة ، جاياتني وحدة ماكلة كرصتين خبز وصحنين فنكر بتيته مقلية واللخ ماكلة دبة مالة طرشي كاملة واني محذرتهن من الطرشي لان مليان ملح ويسوي احتباس سوائل ويزيد الوزن اكثر واكثر .
المشكلة يضحكن الفطيرات ولا عبالك ابد ابد ، اني هم غلست عليهن وماحاجيتهن لان ادري بنفسي عصبية بهاللحظة كولش لذلك طلعت من المحادثة بدون ما احجي وسديت الاشعارات وقررت ارتاح يله انطيهن نصائح شون يرجعن الرجيم لمساره الصحيح بعد هالخربطة .
فتت ع الفيس اجه بوجهي منشور مصخم مثل حظي مال واحد هم جنه مصخم .منشور مال واحد احلامه مثل احلام عباس ابن فرناس بعده ما طارله متر وكع وتفلش.
ناشر اريد مرة تكعد من الساعة أربعة الفجر تخبز خبز حار وتحضر الريوك وترتب نفسها وتحضرلي الحمام وملابسي وتجي تكعدني ببوسة وترجع تتريك وياي ومن اريد اطلع تلبسلي جواريبي واريد الحذاء ممسوح ونظيف وينتظرني بعتبة الباب الكى هيج مرة لو ماكو؟
ماكملت المنشور لعبت نفسي بي هواي خررط نزلت ع التعليقات شفت البنات مستلماته اكس ومربع بس هم مابردت ناري شنو رايدها خدامة!!! لو زوجة!!!
استلمت لوحة المفاتيح وعلقت " اي هو اكو مو ماكو بس السؤال هنا يطرح نفسه ويتمرغل بالكاع
انت شراح تقدم الها بالمقابل ؟ اكيد انجازك راح يكون محصور على السرير وبس تستعرض عضلاتك هنا وبس "
طلعت من المنشور وظليت اتصفح طلعتلي وحدة مسوية بث مباشر تفاجئت هاي عراقية؟ اي والله عراقية !! مطلعة ذرعانها وصدرها مليان وشومات ، لازمه القمجي مال النركيلة ومشغلة ساجدة عبيد ودك ركص وكل حجاية والثانية وفشرت فشاير اكبر من صماخها ، يابه كلنا حرية شخصية بس مو هيج وين القيم وين الاخلاق لعبت نفسي هماتين .
اني صح متحررة بس بحدود وصح البس بناطير مشككة يعجبني هالشي بس البس جواتها ستريج
ماطلع للشارع بيهم هيج والشك هم مو كلش جبير
لا مجرد شويه مملوخ .
طلعت من الفيس وخليت الفون على الشحن وكمت لبست ملابس رياضة وحذاء رياضي وشغلت اغنية
وظليت العب رياضة حتى اطلع من هالمزاج السيء الرياضة الها دور بتحسين المزاج والقضاء ع الكآبة .
لعبت اربعين دقيقة كارديو حسيت بشعور حلووو حسيت اني فرحانة بلا سبب واريد بس اركص واتحرك واغني ، حسيت بنشوة تتملك كل جسدي .
اخذت الخاولي ورحت سبحت وجيت بدلت ملابسي باوعت للساعة 11 ونص اخذت كتاب من مكتبتي
اسمه الذكاء العاطفي ، قريت لمدة نص ساعة وصارت ب 12 ، رحت اخذت فوني من الشحن ، باوعت للشاشة جايتني اشعارات من الفيس ردود على تعليقي .
اني بالعادة قليلة التفاعل بالكروبات والبيجات لان كله مشاكل مختصرة تفاعلي على حسابي الي بي انزل فديوات وتعليمات عن الرجيم والاكل الصحي والرياضة
فديوات اني اصورها الي او لغير خبراء افيد بي متابعيني .
دخلت على الفيس وع الاشعارات شفتها صايرة حرب البسوس بتعليقي البنات يصفكن الي ويشجعني واكو ساباتني وشاتمات حتى ابويه الماله ذنب
والولد خو نص مستلميني سب وشتم ونص مأيديني .
انتبهت على اخر تعليقين شفت شرار مسوي تاك لصاحبه اسمه أوس كاتبله بربي تفتهم هاي
راد عليه أوس اي وربي تفتهم مدام تفكيرها على السرير تفتهم وتفيد هماتين .
اني خربطت دا اريد اسوي تاك لاوس سويت لشرار وكتبتله سخيييييف .
بعد ما انتبهت دا اريد احذفه ، رأسا اجاني لايك من شرار على التعليق الي بي سويت اشارة له وكتله سخيف حتى ملحكت احذفه .
غلست بعد هو شافه خلي اصر على موقفي ، سوالي تاك بتعليق كاتبلي حرمة ما اكدر ارد عليج .
تحمست كتبت ؛ حرمه وبمية رجال واساوي عشره من امثالك وعشرين من صديقك ..ولوو ما اريد اقارن نفسي بعاهات نفسكم تفكيركم محصور بال...ههههه تعرف كووولش زين قصدي، ووياهه خليت ملصق مستفز .
دخلت على صفحة شرار شفته صديق وياي تفاجئت هاي شوكت ضايفته ؟ طكيته صورة للبروفايل مالته
ودزيتها لفرح وكتبتلها مسج : اكولج هذا مو حماج شرار ؟
كتبتلي : اي شرار هذا اشو صديق وياج دائما اشوفه وانسى اسألج موج شعندج وي شرار ترة هو اخر همه الزواج والمسؤؤلية دايح صايع نهار كله ابتعدي عنه احسن ترى هو حتى دراسته بروسيا ماكملها ورجع وها لاتنسين هو متزوج ..
كتبتلها هوب هوب شبيج الزمي بريك ، لج شعندي ويه هالطنطل قابل شسامعه شعليه بي قابل دااطلب ايده للزواج ؟ سالتج عنه لان عبالك شايفته وهم رد على تعليقي توة وكبت عركة ومستغربة شوكت ضايفته ناسية.
مردت العوبة مدري وين تروح .. بقيت متنرفزة..
عفت الفون اجاني اشعار ع مسنجر اخذته باوعت بي شفته شرار دازلي مسج : انت اخت فرح مو ؟
مجاوبته ظل يلح جاوبي انت اخت فرح لو لا ؟
كتبتله : بالحالتين شتريد ؟
_ اي هسه عرفتج اخت فرح لمن دخلت على بروفايلج عرفتج من صورتج بس قبلها ولمن رديت على تعليقج ماعرفتج مجرد طلع كدامي تعليقج وهسه احذفي التعليق حالا ....
عصبت منه عصرت الفون حييل وكززت على اسناني ..
لزمت الكيبورد وانطلقت كتبتله ايبااه متعرفني شلون هايه بالله صار شكد ضايفني لو هاي حجه لان ترزلت رزالة معدلة وتريد تغطي ع الفشلة .وشي ثاني مااخذ اوامر منك واحذف التعليق .
بالضبط اختج نفس العرامة فوول عرامة .. وبعدين مغيرة صورتج وماعرفتج
اي مغيرة صورتي مخلية صورة بيبيتك واحترم نفسك مو عيب عليك تكول عن مرة اخوك عرمة وين الرجولة ؟
تروحين فدوة لبيبيتي .. تزيدج شرف ترحين فدوه العصابتها كحيله وجابت اسباع قابل مثل بيبتج جابت صخول
اهووو و ذكرت الرجوووله شتردين مثلا عود انتن ليش من تستفزنه تطعنن الرجوله البينه
لا بالله وتفتخر بهالشي مو عيب عليك
دنجبي ....
لتغلط افتهمت لتغللط احذرك ..
ولي كدامي احذفي التعليق لا اكسر راسج وراس الخلفج لو اطير الصفحة والله ..
ننننن صدووك روح تغطى ونام ماماتي ..
...اوك خاله نتغطه علئ ما نلكه حضن يلمنه.. تكعدين تشوفين صفحتج طايرة
شبيك انت خبل شبييك ؟ والصفحة تحلم تطيرها .قابل هي حمامة حتى تطير .
سده صار نشط منذ دقيقة ، اهووو لك تعال كمل العركة تعاااااال . كلت هيج بقلبي ...
ثواني واجاني طلب صداقة من أوس ..
وطلب مراسلة على المسنجر .. فتحت الطلب
كاتبلي : شنو هالجمال هذا كل هالجمال يمي واني ماادري ، طبعا الجم الي انت بي قريب على المطعم مالتي . جاوبي على المسنجر خل نسهر هههه ..
مجاوبته وخليت طلبه معلك ، بس طكيتله صوره ودزيتها لشرار كتبت هاك استلم شوف هذا صاحبك
الي جبته عليه ديتحرش .
هو بسرعة صار نشط والمسجات صارت مرئية وظل يكتب ، طلعت من المحادثة خاف تصير رسائله مرئية عندي وتروح الهيبة ويكول هاي تنتظرني على نار .
شفت مسجاته تطلع بصورة الدردشة على الشاشة
كاتب : لج باباتي احجي عدل عيب عليج جبته عليه شنو ؟ شكالولج اني گ***د .
فتحت المحادثة لكيته حاظرني المتعجرف رحت حظرت صديقه أووس وشمرت الفون ونمت متعصبة ومتنرفزة مايسوى تعبت اربعين دقيقة واني العب رياضة تالي هذول يعصبوني شلة تعبانة .
............. ............
فرح ...
بقيت كاعدة على نار انتظر حمدان يجي بس هو تأخر حيل ، ظليت انزل واصعد ، شكد خابرته مايرد عليه
الشيخ وشرار اجوي وهو بعده .
مادري افكر بي مادري افكر ببابا المريض .. مادري افكر بتهديدات حسان
نزلت جوة حتى ماتعشيت وياهم ، ظليت الوب واباوع للشيخ وبعيوني حجي . خاف هو عباله عمود كليتي .
بقيت لازمة دانيال وافتر بالممر وعيني على باب الاستقبال انتظر حمدان . اجه الشيخ ديغسل وكف يمي
باوع لدانيال وحاجه وبعدها باوعلي كال وينه حمدان ؟
حجيتله كل شي صار العصرية ، وكبالي الحجية
تعضلي باصبعها ، مهتميت الها ، الشيخ تفاجأ واشر لشرار وكاله خابرهم شوف شبيهم وين راحوا وعلى شنو متعاركين .
راح شرار خابرهم والشيخ راح كعد بالصالة وظل يحجي ويه امه ، شرار كال اثنينهم مايجاوبون
الحجية كالت : هاي الخبلة ماتضم شي وانت جاي تعبان من مشاكل الوادم ودوختهم هم حمدان وحسان رويسية ومن يومهم هاي عركتهم كابه يوم على فلوس لو على شوف شنو .
ماتحملت كلامها صعدت لغرفتي .. جبرت نفسي اسكت
ورى نص ساعة اجه تعبان وهلكان ووجه محتقن ، والكدمات مبينة على وجهه
بسبب ضرب حسان الكلب الساقط اله .
كمت استقبله بلهفة
بس هو خزرني وكال فرح احنه لازم ننفصل
وطبك الباب حيييل .
خليت اديه على حلكي من شدة االصدمة !!
_ عزززززة انت شتحجي حمدان صدك تكول لالا حباب والله مدا استوعب .
_ اششش سكتي اطلكج احسن الج وائمن الج تعيشين يم اهلج حسان ماراح يتركج بحالج واني ما اكدر احميج واعترف اني ضعيف ونفسيتي تعبانة والله الي يوم اخلي طلقة براسي واخلص من هاي الدنيا اخذي ابنج وروحي لاهلج .
طلع باكيت جكايره وظل يدخن واني مصدومة منه
رحت كعدت يمه : حمدان حباب على كيفك ويه نفسك الله يخليك .
صاح بصوت عالي : فرررح طلعي من الغرفة خليني وحدي وباجر شوفيلج احد يوديج لاهلج .
_ تهذي حمدان انتتته تهذي ، اخذت ابني ونزلت ،
تنفست من عمق صدري المنجرح ونزلت جوة
الصالة فارغة ماكو احد .
صارت مقابيلي غرفة المكتب مالة علي الدر
مشيت بتجاهه فتحت الباب ورى مافتحته وفتت خطوة وحدة دكيته .
وبصوت لاسع رد على اقتحامي : انت بعد فتحتي الباب ودخلتي المن تدكينه ؟
دخلت بدون اهتمام لكلامه الساخر مني ، تنفست
بعمق وجروح قلبي تسللت ويه انفاسي ، ومبين على ملامحي الحزن .
شفته واكف يم احد زوايا رفوف المكتبة وبيده كتاب
كبير وغلافه جوزي . سد الكتاب وظل يباوعلي بتساؤل
حجيت بنبرة يأس وحزن: اني ماريدك بعد تحجي ويه حمدان بخصوص الفلوس الاخذهه من ابويه اني ظلمته طلع مرجعهن اله بس اني خبصت نفسي .
ظل يباوعلي بشك وللحظة حسيت انو كشف كذبي
تملكني الندم لان كتله العصر ، حمدان مو تمام ونفسيته تعبانة مو ومال يرزله الشيخ بسببي تسرعت هوايه شكول عليج موج ، هو صح مستقبلي بس لاحكه اكمله بعدين بس يرتاح زوجي .
الشيخ رفع حواجبه اثنينهم وكال بنبرة استهزاء
_ انوب؟
_ اي مثل مااكولك شيخ لتكوله
قاطعني وهو يهتف بانفعال طاغي
: انت شنو جاي تنطيني اوامر ؟ وشنو انه اخذ اوامر من حضرتج ؟ بطلي تتصرفين مثل الاطفال وانه كاشفج وادري بيج تجذبين كل هاي التمثيلية ماتعبر عليه .
_ اي اني قررت مااداوم هالسنة دانيال صغير وين ابقي وباجر رايحة لبيت اهلي حمدان نفسيته تعبانة ولتفتح ويا الموضوع شيخ الله عليك وخلي حد لحسان ترة هو طغى هوايه طغى وهسه من رخصتك اخذت من وقتك هوايه اخذ راحتك .
لسعني غروره الرجولي ..
وظليت اراقب الدهشة بعيونه ..ماجادلت ولا طولت ويا بالحديث تعبانة ومهزوزة من اعماقي .
خليت ابني على جهة اليسار بعد ماتعبت ايدي اليمين ودا اطلع من يمه .
صاحني بنبرة استبدادية : من ترحين لغرفتج صيحيلي زوجج خلي يجيني اريده .
هزيت راسي بتعب مليييت واحدهم عبالك رئيس دولة بس ينطون اوامر . حتى مايلحكونهم رؤساء العراق الفاهين الي اجو بعد ٢٠٠٣ .
صعدت فوك فتحت باب الغرفة وفتت مشفت حمدان
نزلت دورت عليه مالكيته ، هزيت راسي واني ضايجة من تصرفاته الماتنحزر .
نمت والصبح كعدت خابرت موج تجي عليه ..
ظليت احضر بملابسي وملابس دانيال وافكر بكلام حمدان البارحة معقولة يطلكني ؟ بس هو يحبني وبالموت يله صرنا لبعض . مادري شسوي محتارة
احس حياتي واكفة .
انفتحت الباب وفاتت هيام وكفت متخصرة : اختج ام البناطير المشككة جوة مدري شتريد نزلي شوفيها .
خزرتها : ام البناطير شنو ؟ احترمي نفسج ولج هم عدهه اسم هيه ترضين انطيج لقب واكلج ام البهارات والملح .
عاطت : بهارات وملح شنووو ؟
_ اي من كد ماتضيفين بهارات على الكلام الي تنقلينه .
وتعاي يله لو تشيلين دانيال لوو تشيلين الجنطة .
ايباااه والله خوش ترزل بيه وتريدني اشيل عنها ، مدري منو كلج خدامة بيت الخلفوج اني .
شعندج كاعدة من الصبح ازعاج !! يله وخري ... وخري .
نزلت شفت موج خطية واكفة بالصالة حتى محد كايللها كعدي استريحي عبالك مو بيت شيوخ .
بوستها اخذت مني دانيال حجيت بصوت عالي
_ ليش ماكعدتي ماكو قنفات ماكو كراسي ليش بقيتي واكفة ترة هذا بيت شيوخ ومن شيمته اكرام الضيف .
اجاني صوت خالتي يرعد وراي : كنالها كعدي ماقبلت تكعد عاجبها توكف . وانت وين رايحة شو مبدلة ؟
_ ها حجية اني رايحة لبيت اهلي بابا مر..
قاطعتني : اشو ماكلتي راح ترحين ؟
_ كلت للشيخ ولحمدان
_ وانه شنو هنانه يابه طرطورررر
_ لا حشاج خالة بس بابا مريض واريد اروح اشوفه .
هزت راسها : شو جيبيلي جسوم خل ابوسه كبل لاتروحون ، راحت موج انطته الها واني صعدت اخذت الجنط وسديت الباب .
رحت فتحت باب غرفة ريلام
شفتها نايمة رحت بوستها وهي نايمة ، فزت باوعتلي
ثواني يله استوعبت تالي كالت : ها فرح شكو
_ اني رايحة عمري ديري بالج على نفسج
كعدت تمططت واني مشيت باتجاه الباب .
كالت جيبي دانيال ابوسه لتروحين بدون ماابوسه .فرح عليج الله
_ ولج جوة انت رجعي نامي ان شاءالله مااطول وارجع بسرعة .
_ اي حبابة فرح لا تتأخرين والله اشتاق لداني .
باوعتلها صفح : بس دانيال تشتاقيله .
_ والج همين يالخبلة ، وانطتني بوسه بالهوى.
ضحكت وهي كمزت من الفراش : بس اغسل واجي ابوس داني حبابة انتظري .
طلعت اني وهي راحت للحمام تغسل ، موج اخذت الجنط وراحت ودتهم للسيارة وريلام ساعة تبوس بداني اريد اشلعها منه ماكو .
قبل لا اطلع كالت : عليج الله فرح لا تتأخرين اشتاقلكم والله .
غمزتلها وانطيتها بوسة بالهوا وطلعت ..
موج ..
طلعت الجنط مالة فرح خليتهم بصندوك السيارة
داارجع للبيت اصيحلها تأخرت جوة وجان يصير كبالي اخترعت اجيت انضرب بصدره جنه دنگه يماااي خفت ونوب البارحة متعاركة ويا رجعت للسيارة وصعدت بيها .
باوعتله من المراية هو لابس قميص اسود وبنطلون جينز ، صعد بالسيارة مالته وكعد ينتظرني احرك حتى يطلع وهاي فرح مدري شسوي جوة .
انوب اني جايه بسيارة بابا ارنب موديل ٩٣ وهو صاعد سيارة جيب فخمة هسه لو جاية بسيارة احمد ع الاقل كشخة شويه بس الخبيث نايم على السويج مالته مخلي على كلبه ميقبل ينطي لان قبل فترة شخطتها وكلب الدنيا وقطاني ١٠٠الف يكول يريد يصلح الشخط هلكدوته شكد حقير .
واخيرا شرفت الحلوة هي وابنها چنه عمه راسه شكده .
واذانات عبالك دش ، والخشم فلفل بارد .
اجت وكعدت طلت بالوره كالت يا هاي خالتي وياج وثول ليش مانزلتيها مخليتها هنانه بالحر .
ياحر شبيج ترى فاتحة تبريد ..
طلت فرح على خالتي وسلمت عليها شلونج خالة
جاوبتها وهي تحسب بالفلوس : هلا بيج زكية ..
التفتت عليه فرح ياا زكية منو ولج موج ؟
ولج هاي يمكن صديقتها من تسعينات القرن المنصرم ومن شافتج هسه تذكرتها .
باوعت بالمراية : عزاااا اني شكول زكية اني ؟
_ اي العيشة ابيت الشيوخ خلتج تصيرين تشبهين زكية
_ هيه منيه هايه غير اعرفهه .
دااجاوبها واسمع صووت هوورن جاي من سيارة شرار
حركت السيارة بسرعة وطلعتها .
وظليت ادردم عليه ، خالتي جانت دتحجي
كالت : حتى ننزل للسوك ونجيب ورق عنب للدولمة ونجيب شجر وفلفل ودبس رمان .
دااحجي وي فرح كتلها شبي حماج هذا مخبل خابص نفسه على شنو ماادري اشوو صماخه مربع وجهه بي طشت لحم .
خالتي كالت : ونشتري طشت لحم .
باوعنالها اني وفرح وطكينه ضحك هي عاطت
شبيجن تضحكن عليه مخبلات مطلكات تردن تاخذن رجلي مو عبالجن مادري بيجن . وتضحكن عليه
اني من الارتباك جيت ادعم ووكفت السيارة ....
بقينه ميتين خوف وادينا على قلبنا وخالتي تدردم
شرار جان ورانه بسيارته ، نزل واجه يضرب على الجامة بسويج سيارته يريد انزلها ، نزلتها وقلبي مخروع وداني يبجي .
لابس نظارات شمسية مقلصة وجهه شوية
كال : هستوج جنتي ماخذة وضعية النملة وتمشين على كيف شجاج ودعمتي ؟ لوو هي السيارة انغمى عليها فجأة ؟
انصدمت من كلامه فتحت عيوني اباوعله بعصبية
شكد مستفز هو شعليه ، هو ظل يحاجي فرح
_ خو ماتأذى ابن اخوي ترى اخذ منكم فصل والله اهججكم من بغداد واكتب على بيتكم مطلوب دم .
التفتت لفرح همست ولج هذا منين يطفونه ماكو دكمة ؟
جاوبته فرح : لا عيني شرار مابي شي لايظل بالك روح انته هسه مدري شعجب كاعد من الصبح .
كتلها حظنا غير .. باوعتله : يله من رخصتك دنريد نطلع رفعت الجامة شويه شوية وهو راح لسيارته .
****
فرح ... بقيت يم اهلي ، مر اسبوع وحمدان ماسأل عني ، بلقيس وريلام خابرني كالن الشيخ يكول ارجعي
زوجج محتاجج بهي الفترة نفسيته تعبانة ، بقيت يم اهلي وقررت ماارجع اله هو يرجعني ، اصلا هو مابادر ولا حتى اتصل اني كرامتي ماتسمحلي ارجع بدون ماهو يرجعني .
****
كاعد باستقبال بيت اهلها ايده على فكه المليان بالشعر الرجولي الاسود لحيته المشذبة الي منطيته شكل جذاب اكثر واكثر صرامة وخشونه.
ينتظرها تدخل عليه بأي لحظة ، وفعلا بعد دقايق دخلت عليه رفع راسه باوع عليها وتأمل شكلها ،شايله ابنها على يسارها ، لابسة بجامه صيفية ورديه وبدي ابيض وبي وردي ملتصق على جسدها وبارز منحنياته ومخليه شالها على راسها باهمال وشعرها الاسود الفاحم الطويل متناثر على اكتافها ووجوانب ووجهه باوعتله بنظرات كسولة من عيونها النعسانة بعد نظراته منها باستنفار وكام على حيله اقترب باتجاهه
وكال بنبرة حادة ومسيطرة ومشدد على احرف كلماته
روحي لبسي وتعاي حتى نحجي .
باوعت لملابسي لعد اني مو لابسة ؟ هاي شيسموهه مو ملابس ؟
تنفس عصبية وباوعلي بنظرة بس نظرة كانت تشبه نظرات الذئب قبيل الانقضاض على فريسته والي تخلي دائما مذعن خاضع ومستسلم ، وميض النظرات المفترسة خلتني اتراجع للخلف بخطوات طائعة وطلعت برة الاستقبال مستجيبة .
بين غضب وخجل وخوف حسيت بالحرارة تصعد لوجهي تلون خدودي .
فشلني كدام روحي شكد فشلة يربي فشلة مني هفففف.... نعسانة اني وطلعت هيج هو شعندة جاي من الصبح اني مو كتلهم ماارجع اذا مو حمدان يجي عليه .
طلعت من الاستقبال اصيح ممهتمة اذا يوصل صوتي اله او لا ، جزعانه من روووحي .. نعلالا حظي
اصيح على انين اختي انين وووينج تعالي اخذي داني اريد اغسل وجهي والبسلي شي ماتشبعين من الفون انتي .
جتي انين والفون على إذنها وكأنها تختم مكالمتها
اخذت داني وهيه تتذمر مني وطلعت وراها موج
ظلت تدردم عليه : شجاج شبيج محد يوكف بعينج احترمي ع الاقل ليسمعج حماج الشيخ كاعد بالاستقبال .
جاوبت بحدية وطابكة اسناني ؛ لج فشلني
موج فتحت حلكها بصدمة يااااا!!!!!! غير سايكين عليج ههه
وانين ظلت تضحك ..
اضحكن اضحكن : تفشلت ، صح متعودة على الرزالة بس هنا عود ابيت اهلي راحت الهيبة .
موج : تستاهلين والله كالت دارت ظهرها رجعت دارت كالت مخبلة ومدت لسانها .
رحت غسلت وجهي ، لملمت شعري سويته ذيل حصان مايمي قراصة لفيت بخصلة منه وبي ، ورحت لبست صاية فوك ملابسي ولفيت الشال عدل .
تأفأفت وطلعت من الغرفة وطبيت للاستقبال لكيته بعده كاعد كعدة مهيبة ، يخوف صراحة دائما اوكف عاجزة كدامه اني الي ميوكف بوجهي احد وبابا ربانه اني واخواتي على قوة الشخصية عكس اخويه تماما مو مثلنه ابد .
بس هالانسان يرعبني وانرعب من اواجهه .
طوله الفارع وملامحه الصارمة .. مرات اتظاهر بالقوة كدامه بس احس داخلي يرجف وعلى اي لحظة استسلم .
بعدني مفتشلة وكاعدة كدامه احس مضروبة على راسي ..
هو رفع راسه بهيبة وشموخ وكال : ترة زوجج تعبانة نفسيته حضري نفسج وارجعي ويانه .
شيخ اني والله ماعندي مانع ارجع بس ترة هو مايريدني وكال خل نتطلك . هاي وحدة ، ثاني شي انته لازم تشوفلهم حل والله هم ضامين شي عنه بخصوص اختفاء سامر .
فرررح ماعدهم شي شتحجين انتي كل الي عدهم كالوا بالتحقيق كوة تردين تسوينه فلم اكشن ؟
لا مو فلم اكشن بس حسان مايترك حمدان بحاله اله يشمره بتهلكة يله يرتاح وكوة دا يجبره يطلكني والله هو حمدان حجاهه بعظمة لسانه حسان مستعد يسوي كل شي حتى ننفصل اني و حمدان حتى لو يقتل واحد من عدنا هم مايهمه شي والله واني كلتها الك خو هسه وانت اكيد مراح تصدكني اله يصير كدامك هالشي .
_ انت شنو تحجين شنو يقتل اتركي حسان على صفحة تره لايمج ولا بكرباج حتى البيت طردته منه ليش تلحين انت ماتكوليلي وبعدين حسان مايجي لللبيت اله بإذني شفتي اجه للبيت من عركتكم لهسه ؟ اتركي حسان بحاله وارجعي لزوجج .
_ اي والله يجي واني اشوفه بهاي عيوني ومحد يكلج بجيته وياريت يجي وبس هم ديضغط هواي على حمدان ديخبله والله ديسحب عقله منه ديأثر عليه هوايه .
دنحجي ونسمع صوت شرار عالي وعبالك ديتعارك بس ويه منو؟؟؟
يتبع .
باجر انزللكم بارت حتى نوصل لاحداث مابعد وفاة حمدان ..
😘ان شاءالله هالاحداث مو مملة وان شاءالله تستمتعون بقراءتها ❤بس اني لا دااوضح هاي الاحداث حتى بعدين لتتخربطون بيها .