[فيتامين سي]

السلام عليكم
رواية هذيان بين جمر وجليد
الفصل السادس
نورا ناصر .
****
يگلبي شمال? تـــهومش"
على المال? بـخت بيـــــهم،💔
لـ نور رعد
****
اللتفتت على الصوت الخشن والابح بفعل الحزن واالبكاء الرجولي .
باوعت اشوفه شرار لابس دشداشة سودة ولاف الغترة على راسه ، اجت عيني بعينه ، عيونه حمرة وذبلانه .
درت وجهي منه و بسرعة . هو ظل يدردم معصب ..
_ شبيجن شبيجن عفية نسوان ماتفكن شكد تحبن اللغوة ماتعرفن فاتحة مصيبة .
اني بقيت دايرة وجهي واخته ظلت تحجي ويا .
تقربت منه وظلت تهمس باذنه ، باوعتلهم بنظرات جانبية ، شفته يباوع عليه ، نطيته ظهري .
اباوع لمرة عمي تباوعلي ومن بعيد تأشرلي عود" شكو"
صكيت اسناني واحجي بقلبي عليها عبالك غريبة ماتعرفني ماتجي تحاجيهم يطلعون اختي جنهم مايحترموني ومايسمعون مني .
شفت شرار دار وجهه وراح وبلقيس دتروح سحبتها من ايدها حاجيتها : شنو ماحتطلعين اختي ؟ تبقى محبوسة بذمتكم اذا صار بيها شي .
_ انتِ شنو ماتفتهمين ؟ الغرفة مقفولة والمفتاح عند الشيخ راح شرار يحاجي ترى البية كافي وزايد الله يخليج لاتلحين وانتظري هسه يجي شرار ونسمع منه شكال الشيخ وبعدين نطلعها لو لا .
دارت وجهه وراحت واني سكتت وبقيت واكفة يم باب الغرفة ، لشوية سمعت صوت شرار قريب مني ، ويسوي "احم احم" .
التفتت كال سويلي مجال وخرت من يم الباب وهو حط القفل بالباب وفتحه ودفع الباب وكال شرفي ست .
باوعتله ثواني بعدم رضى وفتت بدون مااجاوبه .
دخلت!! سودة عليه اشوف فرح متممدة على الكاع وحالتها حالة ، ركضت وكعت يمها ، اباوع وجهه مخرمش وفاقدة ، حلكها كله دم يمكن اجتهه نوبة صرع وعضت لسانها مدري شفتها .
سودة عليه وحدهه ومحد يمها لعد شكد جانت تعاني وهي وحيدة ، خليت راسها بحضني ظليت اصرخ بلا وعي .
طبت مرة عمي مدري شعجب وبعدهه جتي
بلقيس ، ظلن يباوعنلها .
مرة عمي كالت يا بس لا ضربها الشيخ باعي حلكهه كله دم .
جاوبتها بلقيس : لا عيني مايضرب الشيخ ولا يمد ايده على مرة شتحجين انت ِ
_ لعد شبيهه ماتشوفين حلكهه كله دم .
صيحت اني : صيحووولهم شوووفولنه احد خلي نوديها للمستشفى كلش فاقدة .اختي راح تموت بسرعة
طلعت بلقيس من الغرفة ومرة عمي اجت تدردم يمي
_ ولج موجه شفت الشيخ طببها بهاي الغرفة وظل يصيح عليها وهي تكول حسان كتله حسان تحرش بيه .
لطمت خدي عزااا ترى هي فاقدة متدري شتحجي مو كل كلامها صحيح ، هي من تتخربط تظل تهذي واكيد علاجها مماخذته .
عمة الله يخليج لاتكولين هالكلام اني لو يمها اعرفلها
بس بابا تخربط ووالله عفت يمه احمد بالمستشفى وخالتي تدرين بيها نص عقل وهم خاف تطلع وتييه خليت يمها انين وجيت وحدي .
_ اي عيني احنه خابرناهم وكنالهم راح نجي
بس سمعنه بالخبر اني وعمج وبعدين نمر على ابوج بالمستشفى هيج قررنه .
_ عمة هو عزا عليمن تخابروهم تعالوا كبل .
دتحجي دخل شرار واني غطيت فرح بغترة جانت واكعة يمها ، غطيت راسها وشعرها .
اجه هو كرفص يمنه ، رفع رسغها وجس النبض
وباوع عليها ترك ايدها وكال : هاي جايتها نوبة سكر ، سكرها هابط
شنو هي عدهه سكر ؟
عمتي تريد تكول هي بيها صرع سكتتها لان هم عيالها ميدرون بيها صرع مكايليلهم .
كتله عيني ماتودينه للمستشفى بسرعة شون تبقى هيجي ؟
كام شالهه ووداهه للسيارة واني صعدت وره يمها
ومرة عمي كعدت يمه كدام .
خليت راسها بحضني واطبطب على خدهه وهي فاقدة الوعي ، دموعي توكع على وجهه ، شون بحالج
فرح شون راح تتحملين عزااا بعدها عمرها ٢١ سنة وصارت ارملة .
باوعت لشرار ديسوق كتله منو قتل حمدان .
باوعلي بالمراية وسكت ما جاوبني واني هم ما كررت السؤال ابد .
عمتي التفتت عليه باوعتلي ودارت وجهه نظراتها تكولي مو وكته هالسؤال .
وصلنا للمستشفى نزلناهه اخذوها ، خلولها مغذي والطبيب كال جيبولها عصير نفرغ بحلكهه ، راح شرار جابلهه .
سكرها هابط مثل مكال شرار ، هي من تجيها نوبة الصرع يهبط سكرها .
بقينه يمها اني ومرة عمي ، هي رجعلها وعيها شويه فتحت عيونها بس عبالك متتذكر شي
عيونها حمرة دم وصافنة على السكف .
خليت ايدي على خدها وحاجيتها بنبرة كلها بجي
_ فرح تسمعيني حبيبتي شدي حيلج ابنج ينتظرج ترجعيله قوية ماعنده غيرج فرح لخاطر ابنج حبابة لتسوين بنفسج هيج!
رجعت غمضت عيونها جفلت اني ، باوعت لشرار
صيح للدكتور بسرعة .
كال ماعليها شي نعسانة وتريد تنام عوفيها تنام احسن الها .
سكتت بس اباوعله .
كال انت مو تعرفيلها ؟ شبيج مستغربة ؟
بس هي متجيهه هالحالات هيج دقايق وتكعد مابيها شي .
اي لان هالمرة الصدمة قوية مو مثل كل مرة ..
يله اني بصالة الانتظار اذا ردتوا شي تعاي هناك .
كال هيج وطلع .. خلصت المغذي مالتها
كلساع تكعد وتنام مثل فاقدة الذاكرة ماتتذكر شي .
خابرت احمد وسألته عن بابا كال زين طلعنا للبيت مايقبل يبقى بالمستشفى بلكي يصيرر زين ونروح لبيت الشيخ زحمة ، سألني عن فرح شرحت اله وضعها .
اجت الممرضة كالت روحوا للدكتور خلي يسجللكم خروج ، مرة عمي اشرتلي اني اروح وهي تبقى يمها .
رحت شفت شرار واكف وصلت يمه رن تليفونه
جاوب : الو ها ؟ لهيب ؟ وصلت شبسرعة ؟ لك والله انت جيتك فكر ديلله جبت الفكر وجيت ؟
لا لا ماكدر اجي عليك خابر مهيب يجيك ياخذك ، ميكدر ؟ اوكي هسه ادزلك اوس يجيك ديالله هسه اخابرله رووح .
غلق المكالمة وباوعلي رفع حاجبه : هاشكو ؟
كتله : الممرضة تكول خلي الدكتور يسويلها خروج .
_ ليش هي صارت زينة هسه ؟
_ اي خلصت المغذي وعدهه علاج بالبيت من نروح ننطي الها .
_ شوفي غرفة الدكتور مليانه خلي يخفون بين ما اخابر انت كعدي هناك بالمكان الفارغ " وظل يأشرلي "
رحت كعدت وهو طلع تليفونه وظل يتصل ، اكو اثنين شباب جانوا يدورون على مكان يردون يكعدون ، واني يمي مكان فارغ يتسع لشخصين . وهم ضلوا يباوعون عليه .
هو اجه وكعد يمي والفون على اذنه ويحجي ..
احساس بداخلي خلاني انزعج من كعدته يمي
خصوصا هو كعد بصفي وماخله مجال بينه .
سد الاتصال وباوع عليه " جنت لابسة قميص اسود طويل وبنطرون جينز" ..
كال : لو كايلتلي قبل منطلع انطيج بنطرون صاحي من يناطيري هذا شبي بنطرونج وانت شون تلبسين هيج لو ماعندج وهذا كارضته الفارة؟
فتحت عيوني مصدومة وكمت من يمه وكفت على رجليه باوعلي مستغرب .
كتله الله منطيك خشم هالكدة حتى تتنفس بي تحشره
بشغلات متخصك ليش .
كال بصدمة ها!! ورفع تك حاجبة .
اردفت بانزعاج : اني رايحة يم فرح انت سوي خروج ومن تخلص تعال النه .
مجاوبني شي واني رجعت للردهة ، فرح جانت هادئة وصافنة ، الحزن غمر كل ملامحها ، اجفانها وردية وعيونها حمرة ، اليأاس والوجع مسيطر على نظراتها
، تأثير الدوة بس الي مخليها هادئة لحد هالحظة بس .
اخذناهه للبيت بالسيارة ظلت تون ونين يگطع الگلب
وتلوب مثل حمامة مذبوحة على النص ، خليت راسها على صدري وابجي وياهه وراسها ملفوف بالغترة مدري مالة منو .
وصلنه لبيتهم صعدناهه فوك كبل وبقيت يمها ساعة تنام وساعة تكعد تنوح وتبجي وتنحب .
بدلتلها ملابسها وذنيج غسلتهن ، داني كله عند ريلام خطية ومفرفح عليها يريدها بس هي مو بحاله .
يوم ثاني الفاتحة هي متمددة على الجرباية مالتها
كعدت كالت وينه علي اريد احجي ويا .
لزمتها وكعدتها بلقيس كلتلها شتحجين ويا مايصير انت هسه المفروض تلزمين عدة حبابة اكعدي وسكتي كافي الفضيحة السويتيها اول يوم .
لزمتها حضنتها وهي تحوم تريد تطلع من الغرفة وتبجي وتنحب وتلطم على رجليها وتصيييح .
كلولي منو كتله انطوني سلاح اروح اكتله كلووولي ليش ساكتيين ليييش .
بلقيس كالتلها : ماندري منو كتله لكوا مكتول بسيارته ..
جاوبت بنبرة مجروحة : حسان حسان ماكو غيره .
_ انت شتحجين شتكولين عيب عليج تحجين عالكلام ترى حسان اخوووه من امه وابوووه شون يكتله شلوون ؟
_ اذا مو هو كتله هو تسبب بكتله نهار كله يحوم علينا اني ويا والله هو ماكو غيره بس والله اذا اطلع هو اله افتح بطنه بسجين .
كامت على حيلها بلقيس باوعتلي : عفية هاي اختج شبيها مو طبيعية كلنا كلبنا محروك على حمدان بس مو هيجي يعني مكفاهه الفضيحة مالة البارحة ترى مو هيج ميصير خلي نوديها لشيخ سيد علوية اشو بس تهذي .
صيحت فرح عليها اطلعي برى اطلعييي ..
فتحت عيونها بصدمة : اي بعد شيطلع منج .
وتفر بيدها .
ريلام بيدها داني سحبت امها من ايدها : عفية ماما عوفيها والله هي مريضة وتعبانة مو بوعيها تصحى وتتندم على كلامها .
ظلت تهز بيدها طلعتها ريلام واخذوا داني وياهم .
رجعت حضنتها خليت راسها على رجليه والعب بشعرها ، كامت وكعدت : ولج موووج وينه بابا ماشفته بس لا مات وتركني نفس حمدان كوليلي شبي بابا كوليلي ؟
سديت حلكها : لالا عمري اسم الله عليه عمره طويل بابا تعب شويه بس حالته مستقرة تمام فدوة لتكولين هالحجي هسه اخابره اخليج تحجين ويا .
هزت راسها بتعب ، وغمضت عيونها ، لا ادري نامت لاادري فقدت وعيها ، لان عيونها جانت عبالك تريد تطلع من مكانها .
اتصلت على احمد جاوبني بسرعة
هلاا موجا شكو فرح شونها طمنيني عنها ولج والله ماكدر اترك ابويه وحده .
ليش احمد ؟ يعني بابا تعبان ..
_ اي موج تعبان وبس يفكر بفرح ما اكدر اجيبه الطريق طويل وحر عليه ميصير السيارة عاطل التبريد مالتها .
_ واني هم ماكدر اعوف فرح تعبانة حيل تدري شكد تحبه وين جانت مضمومه النا هايه ؟
_ الحمدلله على كل حال شنسوي بعد ، انت معليج ابقي يمها اني هنا بس يصير ابويه زين اجيبه واجي .
_ ان شاءالله ودير بالك كلساع وصي انين على خالة لاتطلع تضيع يصيرلها شي مناقصين احنه .
_ اي اطمئني واني هم كله بالبيت ماطلعت اله لمن وديت ابويه للدكتور البارحة .
_ عفية حمودي فدوة حبيبي انته ماتقصر يله عمري اني اجتني مكالمة يمكن هذا سلام يسال صار كم يوم ممداومة ولا كتله التهيت .
ختمت المكالمة ويا ، وصدك شفت سلام متصل بيه
خابرته شلونك استاذ سلام ..
جاوب هلا موج شونج شسالفة اتصل بيج وماكو وهمينه متجين للجم صار كم يوم بلا شغل احنه .
_ اعتذر والله من شغلة لشغلة بابا وصل للموت وانفجعنا بزوج اختي انقتل واختي متدمرة فد نوب عليه .
_ البقية بحياتج اخر الاحزان وسلامته والدج ان شاءالله ميشوف شر هو واختج .
_ تسلم استاذ .. اني اطول شوية ماكدر ارجع للتمرين اذا اكو عندك وحدة خليها بدل مني واذا ماكو اشوف صديقتي هي هم خريجة تربية بدنية وهم اني ع الفون اعلمها تمشي ع التمرينات مضبوط .
_ اي شوفيلي صديقتج باسرع وقت خليها تجي للجم
راح نخسر والبنات راح يبطلن .
_ تمام هسه اخابرها واني اعتذر بس ظروفي اقوى مني ..
_ ولا يهمج يله االله وياج عيني ..
_ مع السلامة .. خابرت ايمان صديقتي وهي متخرجة وكاعدة ماعدهه شي وافقت انطيتها العنوان ورقم استاذ سلام تتواصل ويا وتفهم منه اكثر .
واني خليت فرح على المخدة وغطيتها ..
طلعت دخلت ملابسها مال البارحة ووياهن جانت غترة يمكن مالة حمدان هايه بعد عمري تشم ريحته بيها
بس حمدان ميلبس غترة ولا مرة شفته بيها ! خليتها بالكنتور وسديت عليها ، وطلعت اشوف داني وينه .
شفته بيد ريلام وبيدهه ممته هو شمر نفسه عليه
وكال ماما ماما ، حبيبي يدري بيه خالته الي احبه
بوسته من خده انوب رجع شمر نفسه على ريلام .
اخذت منها الممة ونزلت جوه للمطبخ اغسلها ..
واني على السنك دااغسلها واجاني صوته الي خلاني اتصلب على وكفتي بغضب ..
_ مووت مووت خليلي لكمة اكلها .
كلبت عيوني بضجر والتفتت عليه واني لازمة بيدي الممة وحجيت واني اشدد على احرف كلامي الي اكوله .
اسمي مووو موت خوش ؟ بشنو مفاول عليه ؟
جاوب بكسل : هو حرف واحد واني ترى صراحة بيني وبينج ما اللفظ حرف الجيم تحمليني رجاءً .
باوعتله خازرته ..شبي حرف الجيم مستشهد عندك بحرب بوش وبعدين مو هسه دتلفظه .
مدد رجليه ع ميز الطعام وسند راسه باديه
_ بس بأسمج ما اللفظه ، ديلله يابه سويلنه اكل
_ اسويلك اكل !! ماتخاف على نفسك لا اخليلك بالاكل سم زهر زقنبوت .
لا لا مااخاف مااخاف اخليج تاكلين قبلي يله اكل .. ديله هسه سويلي اكل ولا تلغين ..
كاعد باريحية واخذ مووبايله ويطكطك بموبايله
سفطت الممه على الى السنك : ليكون الخدامه مالتكم واني ما ادري بروحي
رفع راسه من الموبايل باوعلي بلهفه...والله العظيم واني اكول وين شايفج وين شايفج اثاري طلعتي الخدامه مالتنه .
كمل باستفزاز...اي صدك ليش بطلتي منه ترى جنه محترمينج ومشيلج راتب زين .
ظليت اباوعله بعدم رضى ، وهو يرفع عينه عليه وينزلها على موبايله ، اخذت الممه وشطفتها عن الزاهي
واني احجي : والله اني اخاف ارتكب جريمة وادخل السجن عليمن ممستعدة اخسر حريتي اعتمد على نفسك وسويلك اكل .
هو ظل ساكت يباوعلي بنظرات كسولة وابتسامة سخرية على شفايفه .وطلع جكاير وظل يدخن .
بين مكلت هيج خلصت شطف الممة ، اخذتها ودااطلع
صار بوجهي واحد طويل يمكن هذا مهيب .
كال العفو ودنك وصار على صفحة واني طلعت من المطبخ بسرعة وصعدت فوك.
مهيب ..
طلعت من الديوان وطبيت للبيت اريد اروح لغرفتي اسبح وارتاح شوية من الفجر كاعدين على تك رجل امة الثقلين انكلبت عدنا والفاتحة بدل اليومين والتلث ايام راح تصير اسبوع ويمكن عشرة ايام .
شفت ريلام على الدرج تفتر بالصغير ابن عمي حمدان الله يرحمه ، خطية يلوب ويبجي يمكن يريد امه .
باوعتلها لابسة اسود مخلي بشرته البيضة تشع
وعيونها ذبلانة من البجي ، مخليه شال على راسها باهمال ، هاربة منه بعض من خصلات شعرها
لازمة الطفل بحنية فدوة شكد حنينة ولايكتلها الامومة .
صعدت كم بايه وصرت يمها سألتها ها تعبتي منه اخذه منج ؟
دتنطينيا مايريدني تمسك بيها قوي وبملابسها
باصابعه الصغيرة والناعمة ، حقه ممتعود عليه اني مو دائما متواجد بالبيت .
بصوت مبحوح سالته وهي تباوعله
ليش ماتريده هذا عمو مهيب ..
كتلها ولج ياعمو اني ابن عمه ...
اي بس اكبر منه بهواي من باب الاحترام كون يكولك عمو ..
لا ماريده يكولي عمو
يعني ماتريده يحترمك ؟
خزرتها وللج .. هي ضحكت وعيونها حمرة وحزينة
ورموشهه مبللة .
سألتها شلونها فرح ؟
دنكت بحزن : مو زينة مهيب والله اختها كلساع تنطيها علاج يله تهدأ وتنام تعبانة حيل .
_ الله يساعدها شنسوي مابيدنا شي كلنا خسرنا عمي وهذا قضاء وقدر .
_ منو قتل خالو حمدان .. ؟
درت وجهي منها وجريتها حسرة ..
_ مهيب انتوا تعرفون منو كتله ؟
باوعت بعمق لعيونها بنبرة جادة : ماكو شي ينحجي ريلام
_ ليش ؟؟
صاحت عليها عمتي سويتلها مجال ونزلت بسرعة
نزلت من الدرج جاي اطب للمطبخ ، ..كملت طريقي بخطوات هادئه وذهن شارد حسيت اكو ضجه بالمطبخ ساقني رجليه للمطبخ مديت راسي شفت موج وشرار والحديث مشتد بينهم
جانت معصبه وتحجي بهمه و شرار ابرد من قالب الثلج وكاعد على الكرسي وماد رجليه على ميز الطعام ويباوعلها بنظرات مستفزة وينفخ دخان الجكاره من حلكه...
باوعتلي بحده وخلت وطلعت فشلانه من موقفها ويه عمي شرار بليد المشاعر...
باوعتلها بابتسامه لحد ما طلعت من المطبخ ودرت وجهي على صوت شرار وهو يكول...خيير ياطيير اكلها بعد اكلها عيونك تكص كص...
ضحكت بسخريه وسحبت الكرسي كعدت مقابيله واني اباوعله بتساؤل...ابتسم ودار وجهه...
رفعت حاجب بغرور...شبيك جنك مراهق ماخذين حبيبته منه...
باوعلي وعقد حواجبه باستهزاء...تريد تاكل التبن بخاشوكه لو بجطل...؟
ابتسمت...مراح اجاوبك عود معتبرك عمي ومحترمك ولو انت مو مال احترام ...بس دا احسك اجتك فرصة حياتك على غفله ولا تنسى الحياة فرص...
رفع ايده بتذمر وملل...بلا فلسفه رجاءا الحياة فرص؟ هي كلها مووج بنطرونها دكول متعاركه عليه الجريذيه
ضحكت جنك تحبها؟
رد بستهزاء...اموووت عليها..من كثر ما احبها انطوني نوط الشجاعه واعتبروني شهيد من حرب ايران
رديت ببرود واني اخذ الجكاره من ايده وسحبت نفس...ليش تستهزء ترى واضح عليك الحب والمشاعر .إذا تنكر حبها ليش تعاكسها .
رجع سحب الجكاره من ايدي وسحب نفس رد بملل...احب اتشاقه وياها والاشيها
ضحكت بصوت : مو كتلك تحبها ترى اكو مثل
يكول من حبك لاشك اني احساسي يكول تحبها
رخا ضهره على الكرسي كال...شبيك حضرة الضابط اشو انگلبت ابو علي الشيباني شويه ودكول معلمي يقول شرار راح يتزوج فتاة ببنطلون ممزق من كثر الزحف على شرار
ابتسمت على كلامه...لا والله جديات...زين اوكي انت ليش حاصر البنيه بالمطبخ ومخليها ترجف وذايبه بيك شوكت تبطل الدراما وسوالف العشق الممنوع...
شرار بقهر...جذب بعد جذب...بعد شويه ودكول حامل منك وابنك يطالبك بورث وطالع الاول على المدرسه ويسالونه ابوك وين يكلهم استشهد بحب امي .
ضحكت وكمت من يمه ،توجهت لغرفة حبوبتي ، دكتيت الباب وكحيت لان يمها نسوان هواي واني اريد اتطمن عليها .
لان صحتها تعبانة ، هو صح عمي حمدان مو ابنها بس هي ربته ورضعته وتعبت عليه هواي وهسه كلش متاثرة وتمرضت ووكعت .
رحت سلمت عليها بوستني وحضنتني بحرارة وتشم بيه هي كلش تحبني ، بست راسها واديها وكعدت يمها على السرير .
سألت عن حالها وتطمنت عليها كالت يمه واالله لوتعوف الشرطة وتشتغل ويه ابوك بالشركة احسن .
ابتسمت : حجية اني ضابط مو محامي ابوي عنده شركة محاماة شلون اشتغل ويا ؟
اي يمه والله خايفة عليك يمه اسم الله عليك ورى الي صار ويه عمك الله يرحمه .
لتخافين عليه حجية لتخافين كله قضاء وقدر مابيدنه شي احنه . محد. يموت ناقص عمر
وحدة من النسوان كالت هذا ابن الشيخ موو؟
هزيت لها راسي اي نعم اني .
ياا ماشاءالله كبران صار سنين ماشايفتك من جنت صغيرر انه اخت حبوبتك .. اصير خالة ابوك
كمت سلمت عليها وبست راسها هي باوعت لحبوبتي
ليش ماتزوجينه ماشاءالله رجال وبنات بلقيس هم كبار صلوات نسوان اخذيله وحدة منهن احسن من الغريبة.
ردت عليها حبوبتي : لا شون يصيررررر مو امه الله يرحمه جانت جايبة بنية تتذكرين عليها هاي الماتت
ردت عليها اي اي اتذكر خطية عمرها حليو وماتت ويه عليه الله يرحمها.
اي بكد بنات بلقيس وام مهيب الله يرحمها رضعت ريلومة وصارن خواتها .
حجت وحدة من الكاعدات : مو كل رضعة تحرم عليه وتصير اخته اكو رضعات مشبعة واكو لا ولازم على عدد الرضعات .
ردت عليها الحجية برفض قاطع : لا عيوني لا هاي عوايدنه وهاي تقاليدنه اذا گطرة حليب راحت بحلكها هاهي حرمت عليه .
گمت على حيلي شگد اكره هذا الموضوع .
كتلها يله حجية مامحتاجة شي ؟ صحتج زينة تمام ماتحتاجين اوديج للدكتور .
يابعد عمري اريدك سالم دير بالك على روحك والله مابيه حيل فراك بعد .
اريد اطلع طبت ريلام بس مو وياهه داني
الحجية اخت حبوبتي كالت اوكف يمه ولك انه حبيتك كلش وعندي كود حفيدات بنات اولاودي وبنات بناتي تعال يمنه وتنكى منهن مرة كبع واخذ
باوعت لريلام تضحك كالت اي والله بيبي تدرين ناقصنه فرحة وعرس والله واني اشهدله مهيب خوش مهيب .
دااطلع ضربتها بقبضة ايدي على زندها وطلعت معصب ...
هي تبعتني شبيك مهيب ليش ضربتني .
تقربت منها هواي خزرتها : بطلي سخافة لاتصيرين فد نوب تافهة .
بس شسويت ؟
دتشوفين عدنه عزززة شنو ناقصنه فرحة انت ماتحسين ؟
تره دااشاقة ..
وشقاج البايخ هذا مو ووو وكته خوش اثكلي..
انت مدري شبيك ترى اني ثكيلة انت ليش دتشوفني بالعكس .
بشدة : لأ كلش خفيفة صايرة وتافهة .
_ شگد دااا اكرهك اموووت منكتصرفاتك مدري شلونها .
خزرته وحاجيتها بصوت مصرور ريلاااام .
طب لهيب : هاي شبيك عليها معصب عبالك تريد تاكلها يمعود على كيفك .
وبعدني خازرهه جاوبته : ختولي..
هي راحت ختلت وراه اي والله شوفه اعذرني لهيب اني جنت اكول انت عنيد وخبيث وعصبي طلعت العكس .
ضحك : هه والله انتوا ظالميني وبعدين شبيك وياهه على كيفك اذا غلطانة حاجيهه بهدوء .
ريلام : اصلا مغلطانة والله هو مدري شبي اني دااضحك ويا هو ميقبل شقة ..
لهيب : لك شبيك وياهه مهيب اختنه الصغيرة هاي بس لا عبالك هي شرطي جوة ايدك .
عصبت عليه دووولي انت الثاني شفهمك ..
ودااروح لغرفتي هو كال على كيفك وياي اني همين يمعود ترى هي يومين ومسافر .
مجاوبته وطلعت لغرفتي ..
مو بيدي وانفجر بوجهه احبها احبها وتغثني من ماتحس بيه .. صح ماتفتهم ومو ذنبها بس احسها تحرك اعصابي حرك .
وحبوبتي شيقنعها احنه مو اخوان
مو بس الحجية كل الي بالبيت معتبرينه اخوان
لان امي الله يرحمها عود مرضعتها .
بقيت بغرفتي هدأت شويه طب عليه لهيب اخوي
واني متمدد على السرير كعد يمي
كال ها شبيك عصبي ويه ريلام عبالك راح تاكلهه ؟
جريتها حسرة مديت ايدي لورى راسي ونزلتها
_ ماكو شي بس هي مرات تصير حيوانة .
يريد يحجي عرفته يريد يكول اختنا ومن هالحجي سككته بسؤالي : شكد باقي هنا وشوكت ترجع ؟
_ يوم عشرين بالشهر .
_ شرار يرجع وياك لو ماكتله ؟
_ مادري اشو مجلب عايف مرته وابنه هناك وباقي هنا شعنده مادري .
دخل شرار : ها شكو جني سمعت اسمي .
مهيب : احرك فلمك هسه ؟
غمزتله وكملت واخلي لهيب يكول لمرتك لافرا ديخونج وي وحدة عراقية سمرة برونزية .
شرار وهو ديشعل جكارته : اي بشرفك كللهاا سمرة برونزية لو تبقين سنة على البحر تتشمسين هم متلحكين بلون بشرتها .
لهيب وكف على حيله : ولكم فهموني شكو عليمن تقصد ولك مهيب .
جاوبته : عمك يعرف عليمن اقصد ..
شرار : اكللللل تبببن لا تخليني ازوعك العافية هسه تدري بيه من احجي شحجي
لهيب : عرفت تقصد على هاي البنية السمرة ام شعر الي تفتر بالبيت .
مهيب : اي وما شفت شرار شون لا زكلها وين متروح يروح وراهه .وقبل شوي حصرها بالمطبخ
لهيب : اي حقه عمي طكت روحه من الروسية الشكره ظل يدور عراقية سمرة يحب التنوع عمي .
شرار : اكلووو تبن اثنينكم وهاي ختووولي الزركة بنطرونهه ملتمة عليه الجريذية ومكرضته .
كال هيج وطلع ولهيب تبعه ..
اريد انام مااكدر تذكرت ريلام وشون عصبت عليها وجيت اكلها ، هسه بردت وتندمت ، شفهمها هيه على الحجي مالة الحجية معتبرتني اخوهه حقها ماتحس بيه .
استغفرت ربي وكمت وشلون انام والبيت هوسة هوسة متروس ناس .
بس طلعت من الغرفة صارت كبالي وعيونها تثبت هي زعلانة مني .
ضربتها بطرف اصابعي على زندها ابتسمت : ها ولج خو مزعلانة مني ؟
لزمت زندها وخنزرت : اخخخ مهيب ترة يوجع وبعد لتعيدها .
شبيييج لج ؟
وكفت عدل وخرت ايدها الثانية من زندهه وبنبرة زعل : دااعاملك مثل متعاملني حتى تحس بيه انوب .
انت لتصيرين تافهة وحيوانة واني ما اعصب عليج ومشي الامور عدل ترى مزاجي مال مشاكل وخصوصا وياج .
اي حلفت بعد ما اتساقه وياك لو مدري شيصير لان انت واحد نفسية صراحة ودتصير مزعج ومتتحمل شقة .
خزرتها اني نفسية يا حمارة ؟ لو انت تجفصين بالبطن .
رفعت حاجبها باصرار ايييي نفسية .
خزرتها خزرة اقوى : نزلي حاجبج لللج .
راحت صعدت على الدرج ومدت لسانها
تبعتها بكم خطوة واني رافع اصبعي واهدد
اذا ما كصيت لسانج بسيطة .
كالت يييمه خوفتني واختفت فوووك بسرعة ..
موج ..
نرفزني هذا الطنطل يغث عباله هو يضحك مدري شعنده لازكلي مو متزوج شعنده عايف مرته
وجاي هنا والله يا الله لو منها اعوفه واتزوج روسي اشكر .
هو صح شرار ابيض حيل جنه قوطية كيمر مدري قشطة بس مكروهه سوالفه ولزكة .
فتت للغرفة شفت داني بسريره كاعد ويبجي
وفرح متربعة وكاعدة تبجي وبيدهه ملابس حمدان .
ركضت اخذته جان حيوكع ، فاتت ريلام ورايه
اخذته مني واني رحت لفرح اهدأ بيها
كالت ريلام : توة خليته بفراشه جان نايم ..
يمكن كعد على صوت امه ..
اخذته وطلعت ..
حضنت فرح واهدأ بيها متهدأ صوتها يبجي الحجر
متتت قهر ظليت ابجي وياهه ، هاي شراح يسكتها
شراح ينسيها يربي شنو من مصيبة اجت ووكعت على راسنا ربي دخيلك .
صعدت هيام فتحت الباب وفاتت كالت بيبي تكول خلي تنصي صوتها لايطلع ميصير هي لازمة عده هسه خالو يتعذب بقبره .
كالت هيج وهي متخصرة ، فرح دفعتني ونزلت من السرير ، وتريد تهجم على هيام .
وصاحت لاتخليني ابتلي بيج وبيبيتج اطلعي بررررة يلله .
حضنتها قوي وذيج طلعت تفر بيدها ، تريد تطلع من الغرفة ، قفلتها واخذت المفتاح وركضت وكفت يم الشباك .
ظلت تضرب بالباب وتصرخ ولج فتحي فتحي خلي اروح احجي ويه علي خلي يكتل حسان هوو كتل حمدان والله هو والله .
ركضت حضنتها وسديت حلكها بيدي
واهمس باذنها حبابة فرح لتسوين بنفسج هيج عمري هسه حيلكون منو الي قتله وميسكتون عن حقه والله
ظلت تلطم عمري حمدان عمرررري حتى ام ماعندك تبجي عليك وتنقهر بس اني بس انيييي محد مقهور عليك محدددد كلهم ممهتمين ومخلينه الي كتلك يمشي على طوله ويشم الهوا
ادبسزية جبناء خوووونه كلهم خانوا دمك ودفنوك وخلصوووا منك وبس القهر والعذاب الي ..
ظلت تبجي لحد ماتعبت واني كاعدة يمها وبس ابجي على حالها .
خليت راسها بحضني : حبيبتي فروحة ولج ابنج محتاجلج كووومي لخاطره فدوة .
فتحت عيونها الحلوة الواسعة وظلت تباوعلي
تحجي بتعب : خاف اني تسببت بقتله هو راد يطلكني قبل ليموت بس اني مقبلت كالي ائمن الج اطلكج حسان محيتركج بس اني اخخخ اني .
ظليت تلطم على وجهه بحركة لزمت اديها .
كامت وكعدت على حيلها كالت وين داني ولللج روحي جيبي لايكتله حسااان روووحي .
ظليت اأشرلها بيدي : اهدي بس اهدي هسه حخابر ريلام تجيبه حبابه اسكتي .
اخذت تليفوني وخابرت ريلام جابت الطفل ..
خمشته منها فرح وحضنته حيل وتبجي وتذكر ابوه وتندب حظها وحظ ابنها والطفل فرفر من البجي .
كوة اخذناه منها وهي تعبت وهلكت من البجي ونامت ، رحت شفت ملابس حمدان واكعة باالكاع والغترة الي خليتها ويه ملابسه هم واكعة ، شلتها وخليتها ويه ملابس فرح لان ممتأكدة اذا الغترة لحمدان او لا .
وباقي ملابس حمدان الله يرحمه خليتهم بجنط ونزلتهم مدام فرح نايمة خاف تشوفني اطلعهم وتتخبل
هم كالوا يردون يتصدقون بيهم .
استمر حال فرح هيجي واني محتارة بينها وبين بابا المريض وبين شغلي .
بابا شوي صار زين يكدر يجي وقبل عمليته اصر يجي يشوفهه ، كعدت احجي وياها .
هي جانت صافنة وعبالك عميه ومتشوف عيونها حمرة دم من ايام ماتغير لونها .
_ فرح بابا حيسوي عملية بعد شكم يوم وحيجي يشوفج فدوة فدوة فرح لا تقهرينه عليج ميتحمل .
باوعتلي وعبالك توهه تشوفني من ايام ..
كالت بنبرة بكاء ملتهبة : مووج مووج شيطفي النار
الشابه بگلبي شيطفيها .
جانت بين كلمة وكلمة تحجي وتشهك واخر شي استسلمت لنوبة بچي واني هم ما اكدر اباوعلها واشوفها هيج واسيطر على دموعي واحاسيسي لازم ابجي وياهه .
رفعت راسها مسحت دموعها كالت وين علاجي اني ماريد اخسر بابا هماتين مثل مخسرت حمدان ما اتحمل خسارة ثانية .
شهكت اني : لا فدوة لتكوليها عمره طويل ان شاءالله
وهسه انطيج علاجج تاخذي وبين ميجي بابا انت شويه زينة وهادئة خلي بابا يشوفج قوية .
هزت راسها بتفهم انطيتها علاجها وكعدنه ننتظر بابا واحمد يجون ..
صعدت ريلام كالت اجوي وبيبي تكول خلي تلبس الملابس الي دزتهم الها العباية والبوشي مو زين يتعذب بقبره .
هي جانت كلش هادئة بس ملامحها غايصة بحزن جبار وعميق وماله حدود ، لبستها العبايه والنقاب ونزلتها جوه ، فتنا للاستقبال جان شرار والشيخ كاعدين
هي شمرت نفسها على بابا ونامت بحضنه وظلت تشهك وتبجي....
وبابا يبجي وياهه ومخلي ايده على راسها ، عود وصيتها بس هي ماتكدر ..
بابا بصوت مبحوح من البجي والقهر والمرض ..
_ بنيتي فرح الله يجمعكم بالجنة لا تبجين وتاذين گلبي المريض عليج ، وبيت ابوج مفتوح الج واذا تردين هسه امشي اخذج وياي .
وبصوت حازم وقاطع من الشيخ علي الدر
سكت بابا وهو گال : لا اسمحلي ابو احمد هي اذا تريد تطلع احنه ما نجبرها بس ابن اخوي المرحوم نريده كبال عينه ويربى بيناتنه .
هي كامت من حضن بابا ، اندارت على الشيخ وشمرت النقاب وظل تباوعله بعصبية وعيونها راح تطلع من مكانهم .
كالت : ما ابقى ابيت كتالة زوجي !!!
~~~~~~~~~~~~~~~~~~~~~~~~~~~~~~~~~
لهيب .. ملل وضوجة اريد ارجع لروسيا هناك تعودت هنا حتى اصدقاء ماعندي .
اجاني شرار : كوم ولك لهيب روح ويه موت للصيدلية
باوعتله بكسل وملل وضوجه : شنو موت منو هو هذا هم اسم ؟
ركع كصته بايده وكال موج موج اسمها كوم يله .
وليش ماتروح انته ؟ شعندك شوراك .
راح يجيني اوس هسه ماكدر اطلع واعوفه عيب .
تأفأفت وكمت .. طلعت بالكراج واسمع صوت ريلام تبجي ومهيب يضحك ويكللها خاب كافي شدعوة عليج هو راشدي وانت تستاهلين .
وهاي بعدهه تبجي وتمسح بدموعها وبيدها الطفل ابن عمي حمدان الله يرحمه ومهيب لازمها من ذراعها ويجرجر بيها .
تالي كاللها خاب كافي فدوة مسحي دموعج ولا تبجين شدعواج ماتتحملين شقة . ولج انطيني الطفل راح يوكع من ايدج .
هي تكله وخر عني وخر شقاك صاير يخزي مو شقة هذا مهيب مو شقة .
وهو يضحك بصوت عالي عليها وضحكاته تستفزها .
ظليت افر بيدي واباوعلهم من بعيد هذول مدري شبيهم وكلش متغيرين معبالك مفاركهم سنتين عبالك
عشر سنين .
هذا مهيب اخويه مجاي افهم عليه ، علاقته متطورة ويه ريلام ونظراته مختلفة معقولة يحبها شنو ناسي امي الله يرحمها مرضعتها وهم بحكم اخته شون يفكر هذا ؟
هزيت راسي وتمشيت بالكراج وادور على موج ماكو مموجودة بس شفت اوس سلمت عليه وكتله تفضل انت مو غريب ..
هو هم يصير ابن خال عمي حسان .
طببته جوة واني طلعت ادور على الي اسمها موج
بس مالكيتها ، جنه ملعوب من شرار يريدني اكوم وهو مادري شعنده .
سمعت صوت جاهل يبجي ، رحت فتحت باب البيت واشوفه ولد خطية قهرني وضعه ومبين مكتول وجهه احمر ويناشغ .
كرفصت لمستواه ولزمته من ذرعانه واباوع لعيونه
وهو ينشغ ويتلفت وراه كتله شبيك حبيبي منو وياك ليش تبجي ؟ وين اهلك ؟
هو بسرعة حضني وخله راسه على كتفي حسيته فقد الوعي شلته وركضت بي جوه .
ولو ادري بلي راح يصير فلا اشيله ولا اخذه .
يتبع .