[Rewayt_dalia]

.
.
.
الـــبــــــــــارت الـــــعــــــــــشــــــ ـرون
.
.
.
بعـد مرور 3 سآعآت ..
عند دلآل وميهاف كانو جالسين
دلال : ماكان مفروض تسوين كذا وتتركينه يدخل ويكلمني
ميهاف بهدوء : وضعكم مو عاجبني ولازم تلقون حل
دلال : الحل انه يطلقني ماعاد ابيه افهمو خلـ
"وماحسو الا باللي يضرب الباب وكأنه بيكسره"
وقفو ثنتينهم مستغربين وخايفين وميهاف تسأل : معاذ هذا ؟
دلال : لا .. م مدري بس اذا هو صرفييه مابغى اشوفه ولاابغى اكلمه .. وركضت للغرفه وقفلت الباب على نفسها
ميهاف حطت الغطا على راسها وطلعت والشر براسها وقبل لاتفتح الباب : وكسسسررر وكـ... فتحت الباب وماكملت كلامها وماحست الا الي هجم عليها بالضرب الجنوني وهي تصارخ بين يدينه وهو شاد بشعرها ولعب فيها يمين بشمـال ويده ماتوقف
الين طاحت بالارض وتثبتت بأكواعها بترجع لوراها الا وجلس على ركبته ويده تخنقها وعروقه ناطه من عصبيته وراص على اسنانه : قابلتيه اجل هاا ؟
ميهاف وهي مو قادره تنطق من روعتها وخوفها كأنها بحلم وبتفيق منه وماوعت الا بكـف ميّل راسها وضربه بالارض
وقام وقومها من شعرها ومشى معها لداخل البيت ودفّها بصراخ : عباااايتك
مشت ورجولها تتخبط يمين وشمال وعيونها مغبّشه ماتشوف قدامها تبغى تتكلم تبغى تقول شي بس تحس لسانها انبلع حطت يدها على الجدار تثبت توازنهااا ومدنقه راسهاا
وهو من غير وعي مشى لعنـدها وضربها براسها ضرب جبينها بالجدار : استتععججلييي بلااا افلااام بسسرععهه
مشت بشويش لغرفتهم وفتحت البآب وكانت دلال واقفه عنده واول ماشافت شكل ميهاف شهققت وصرررخخخت بقوووه مفزوووعه ويدها تضرب خدههاا : ييممممممهه
ميهاف وهي شوي وبتطيح : ع عبـ.. آآخ آآه
فهمت عليها دلال وجابت العبايه بسرعه ولبستها والخوف ماكلهآ
طلعت ميهاف لثـآمر وسحبها من معصمها وطلع من البيت وركبها سيارته ومشى للجـبيل على طول
اما دلآل ف صارت تروح وتجي بالبيت ماتدري وش تسوي ومين تكلم
ماحست بنفسها الا اتصلت برند واول ماردت : رنند خففي نفسك وتعالي لي الحين بسسررعه
رند قمطت : وش فيه دلال بسم الله
دلال وهي تصيح : رننند تعالي ميهاف اختك بتموت استعججلليي
سكرت رند وقامت بسرعه لطلال وقالت له وفعلا راحو لدلال بسرعه ودخلت رند وهي منهبله : دلال وشش فيه
دلال وهي مو عارفه تتكلم من خوفها : زو .... زوجههـ... ماقدرت تكمل وغطت فمها بيدها وبكت
رند وقلبها بيوقف : دلال تكفين قولي لي وربي نشفتي دمي ... وقامت جابت لها مويه وساعدتها تشرب
وبهدوء : قولي لي وش صار
دلال ويدها على صدرها : كننا جالسين وفيه احد جا ضرب الباب فكرناه معاذ قلت لها صرفيه ودخلت الغرفه وقفلت الباب ... شوي والا اسمع صراخ ميهاف جاي من الحوش انا انشلّيت بمكاني ماعرفت اتحرك وشوي شوي تقرب اصواتهم وماحسيت بها الا جات الغرفه " بدت تأشر على وجهها " : رند كان خشمها ينزف وخدّها معلم وجبينها مزرق ووارم ماكانت قادره حتى تتكلم بس كانت تبي عبايتها لبستها اياها وخذاها ولما طلّيت الله لايوريك كان معصصب عيونه تخوووف اول مره اشوف احد بهالعصبيه وجهه يخوف محقون مسكهها من راسها وخذها معه يمه ميهاف اختي بيذبححها والله بيذبحها
رند على اعصابها: وش قالت لك هي طيب وش بينهم يعني هم " وزفرت " ااافف ماني قادره استوعب ..: دلاااال تكفين قولي هي وش قالت لك عنه
دلال : ماتكلمت عنه ابد ولاجابت سيرته بس كننا نتـ.. " وتذكرت " : هي اليوم طلعت مع منار بنت ام خالد
رند وهي تضرب يدين دلال بإستعجال : قومي قومي بسرعه والبسي عبايتك خلينا نروح لها
وقامت دلال ولبست وطلعو مع طلال وراحو لبيت بو خـالد وقبل لاتنزل رند مسكها : وش صاير وش فيكم رند
رند وهي مذعوره : ثامر زوج ميهاف جاي من الجبيل لهنا وضربها الين ماقال امين واخذها معه وحنا ماندري ليه وخايفين لايسوي فيها شي وجينا لهنا لانها كانت مع منار اليوم خلني انزل ولما ارجع اقولك وش بنسوي
ونزلت تلحق اختها لداخل البيت وكانت واقفه مع منار برا وخبرتها بكل شي
ومنار بغت تنهبل : ههذي مو اول مره اول كانت تضربها امه والحين هووو بعععدد
دلال بكت : طيبب ليييه وش سوت هي اليوم عشان يجيها كذا
منار تهز راسها بالنفي: مدري والله ماجابت طاري ان في بينهم شي حتى
جلست دلال على الدرج وهي تشد على بطنها بتعب وحطت راسها على ركبتينها : آآخخ
رند جلست : ووش فيك دلال فيه شي يعورك
دلال رفعت راسها : لاا بس دخت شوي يمكن من الروعه والربشه الي حنا فيها
منار : لازم تروحون الجبيل والحين بعد
رند : مدري اذا بيوافق طلال ولا
منار : لازم يوافق اختكم هذي وانا بحاول بكلم عبد العزيز او بدر يجيبوني ولو انهم المره الي راحت مادخلوني لها بس بحاول ولا اقول خلكم واقفين شوي يمكن اجي معكم
رند مسكت دلال وساعدتها بالوقوف وطلعو وطلبت من طلال مارفض طلبها وصارو منتظرين خبر من منار
عنـد منـار
صعدت لغرفة عبد العزيز واول مادخلتها ارتعشت من شدة البروده اخذت الريموت وطفت التكييف وشغلت الانوار وراحت له وهو نايم على حطته : عبد العزيزز .. عبد العزيز قوووم وش ذي النومه الغلط وش منومك هالوقت
عبد العزيز نايم
منار وهي تهزه : عزيّزز قوم عاد بسرعه ضروري ابيك بشغله
صحى ولف لها بضيق عيونه : هههمم
منار : قوم صحصح معي شغله ضروريه يلااا عاد
عبد العزيز بتعب وصوته منبّح : مافيني حيل منور تعباااان خليني نايم
منار : موضوع يخص ميهااااف عااد قووووم
فتّح عيونه اكثر مستقطب
منار ميلت فمها وجلست مقابلته : خواتها مصروعين تحت ويقولون انه جا وذبحها ضربها الين ماقال امين وخذها معه ولايدرون وش السبب عزوز قوم قارصني قلبي
عبد العزيز ببرود رجع غمض عيونه .. ومنار انصصدمت : عزز سامعني ؟
عبد العزيز بهدوء : سامع وش اسوي يعني
منار محزنه : مدري والله مافي اي شي بعقلي بس ابغى اروح هناك ابغى اشوفها تكفى
لف معطيها ظهره : مانتي من باقي اهلها كل ماصار شي رحتي لها اهجدي مكانك
منار بتنهبل : يووووووهه وش صاير لك
عبد العزيز بتعب : منار قومي اطلعي وخليني نايم ماني فايق لك
منار وهي شوي وتذبحه قامت بتحط يدها على جبينه : انت فييك شي ؟ مصخخـ.. ححح لا جد انت مصخن اقول انا مانت بصاحي اااففف وقامت من عنده وراحت لأمها : ييمهه ترى ولدك مرتفعه حرارته مرررهه ونايم بدون غطا والمكيف ثلج باقي شوي ويتحنط
ام خالد هزت راسها : عبد العزيز ؟؟
منار وهي ماشيه : اييه وماني فاضيه اجيب له شي
" تذكرت ورجعت " : يممه اطلبك طلب
ام خالد : وش
منار : دلال ورند بيروحون الجبيل بيزورون ميهاف تكفين ابغى اروح معهم
ام خالد وسعت عيونها : توها اليوم هنا ماامداك اشتقتي
منار تلعثمت : ي يمه الصراحه هي طلعت اليوم زعلانه مني ومو مطاوعني قلبي تكفييين
ام خالد : طيب ومع من بتروحون
منار : طلال ولد عمي
ام خالد : خلاص روحي وانتبهي لنفسك
منار وهي تركض على الدرج : ان شااءالله .. وكلها دقايق وطلعت لهم وركبت السياره : السلام عليكم
كلهم : عليكم السلام
طلال : شخبارك منار
منار بهدوء : حمدلله بخير انت شخبارك
طلال : تمام ..
وحركـو ماسكين خط الجبيل
.
.
وبعـد ساعآت
وصلو لعند البيت بالضبط ونزلو ثلاثتهم وقبل لايرنون الجرس منار استوقفتهم : اسمعو اذا ماطلعت العجّيز ام ثامر مراح تقولون اني بنت بو خالد لو عرفت مراح تخليني ادخل البيت حمدلله والشكر
رند مستغربه : افاا ليه
منار وهي تضغط زر الجرس : مجنونه وش يدريني عنها
دلال : طيب تتوقعون انهم هنا اصلا ياخوفي ان صار لها شي وخذاها للمستشفى
منار بسخريه : ثامر جبان مثل ابوه هذي مو اول مره قلت لك واخر شي يسوونه ياخذونها المستشفى عشان لاينفضحون
وشوي وفتحت لهم الشغاله البـاب : مين انتو ؟
دلال وقفت اول وحده : انا اخت مدام ميهاف تعرفيني صح
هزت راسها بالايجاب : اي مدام ... وفتحت الباب اكثر وسمحت لهم يدخلون
رند : وين ميهاف
الشغاله تأشر بيدها على باب الملحق : هِناك
دلال : ثامر موجود هنا
الشغاله : لالا مافي احد كلو برا
منار وكأنها اخذت حريتها : يكون احسسن .. ومشت متقدمتهم وفتحت الباب بشويش
وميهاف اول ماسمعت الباب ينفتح شهقت وغطت نفسها اكثر بالغطا بخوف انه ثامر وجاي يكمل عليها
دخلو وسكرو الباب
ودلال راحت لعندها بسرعه : ميهاااف
شالت الغطا بسرعه ولفت وشهقاتها وحده ورا وحده وفزت على حيلها وضمت اختهاا بقوووهه
ومنار ورند واقفين مصدومييييييين من شكل ميهاف " ورمة جبينها مايله للازرق ونازل الانتفاخ لعيونها من ضربة الجدار ووخدها معلّم
قربت منار وجلست جنبها ومسكت ذراعها وهي تشوف اثار اصابعه وتغريزة اضافره وهمست : ياجعلك ماتشوف العافيه بحياتك كلها " ورفعت راسها لميهاف " : ليييهه هذا كله لييييهه
ميهاف وصوتها مخنوق وعيونها مورمه من كثر مابكت : م..مـدري لاتسألين
رنـد كآنت واقفه وفكّها يرجف خانقتها العبره على حال اختها وماتبي تقدم خطوه وتردّها كالعاده
رفعت راسهآ ميهاف والتقت نظراتهم ببعض تقوسّت شفايفها بإنكسـار وهي تشوف الحذر بعيون رند واحساسها بحاجتها الحين لإختهآ ، ميلت راسهآ وطاحت دمعه من عينهآ بقل حيله ماتحملت رنـد وهرولت وضمت ميهـآف بقوه وتعالت اصواتهم بالبكي
وبـعـد ماهدت ميهاف ابتدو يسألونها عن السبب الي دفع ثامر يتصرف بهالعنف اما ميهآف كانت مكتفيه ب " مدري "
________________
عنـد أم ثامر ونهى الي كانو توهم داخلين البيت بعد ماراحو لزيارة وحده من قرايبهم
ام ثامر : وينه زوجك من وصل من الخبر ماشفت وجهه
نهى ببرود : شدراني يولي
ام ثامر وقفت : افااا لا مو انتي الي تقولين كذا ! وش فيك ماعاد يهمك ؟
نهى : على اساس انا اهمّه الحين ماعاد صار يهمه غير ميهاف
ام ثامر : ومن يقول
نهى : انا اقول وهو بتصرفاته يثبت شوفيه مااستحمل ليله وهي مو هنا الا وراح جابها يبيها قدام عيونه تروح وتجي
ام ثامر بصوت واطي : تهقينها هنا ؟
نهى التفتت لناحية الملحق ولفت انتباهها الصنادل الي عند الباب : وفيه احد عندها بعد !
ام ثامر ضيقت عيونها بشر وراحت مهروله وفتحت باب الملحق بقوه
انصرعو اربعتهم وانظارهم على ام ثامر
ام ثامر وهي تضرب كفينها على بعض : لاهلااا ولامسهلا انتم وش مجيبكم لبيتي
دلال بحـده : جايين نشوف اختي مثل ماتشوفين قدامك
ام ثامر وهي متنحه وعيونها على ميهآف : وانتي بلاه وجهك مفقع كذا منو ضاربك
ميهاف حقرتها وصدت بنظراتها عنها
ام ثامر عصبت : اكلمك انا جعلك السكني ورا ماتردين
ميهاف وهي منسدحه و تناظر السقف : مانتي كفو ارد عليك
ام ثامر شهقت : ايا بنت اللذين .. وتركت عروة الباب بتروح لميهاف الا مسكتها نهى بسخريه : خليها عنك مرت عمي " وبضحة استفزاز " : اصلا الي فيها مكفيها يا دوبها تتكلم ... " وغمزت لميهاف ": لك معافااايه تؤبرينيي
ميهاف وهي تحترررق حرق من داخلها وتتوعد نهى وام ثامر انها لتحرق دمهم
وبعد ماطلعو
رند عصبت : وش فيهم ذووول ليه يعاملونك كذا
ميهاف ببحّه : مقهورين اني اخذت ثامر ويبغونه يطلقني بأي طريقه بس وربي لأربيهم ان ماخليتهم يبكون دم ماكون ميهاف بنت محمد
رند : حيلك فيهم قسم بالله لو ماني ماسكه اعصابي كان توطيت ببطنها هالخايسه زوجته مسويه فيها سوريه مع وجهها
ميهاف سحبت منار قريب منها وانسدحت على فخذها وكأنها توصل لها انها نست الزعل
دلال وهي تتحسس الجروح : ميهاف انتي لازمك مراهم واغراض عشان يخف الي بوجهك
ميهاف : عنـدي شوية مراهم يأدون الغرض
دلال : طيب حنا الحين لازم نقوم قبل زوجك يجي وساعتها من جد مدري وش راح يسوي
رند : اساسا طلال قريب من هنا يعني دقايق ويكون عند الباب " واتصلت عليه "
ميهاف رجعت ضاق خاطرها
ومنار خربشت شعرها : مراح نتركك بين هالوحوش ذولا
ميهاف ناظرتها : افاعي وثعابين والله
ضحكـو عليها وقامو طلعو بعد مآسلمو عليهآ
اما هي قامت ودخلت لدورة الميـآه شغلت الشاور وتركت البانيو يمتلي بماي دافي وهي متكيه بيدينها وتفكر كيف تقدر تتصرف مع ثامر مثل ماكانت وتطلع من المشكله الي طاحت فيها وغير انها بتموت وتعرف كيف عرف انها التقت بعبد العزيز وبين ماهي تفكر انتبهت بالبانيو امتلى قامت وجلست بداخله وهي مسنده راسها على اطرفه ومتكيه راسها على يدها وكل تفكيرها بثامر
وطـولت وهي على وضعها وصارت تحس بأن جسمها دفى وعظامها ارتخت بس ماكانت تبي تطلع ، وقطع راحتها فتحة باب دورة المياه الي نست تقفله فززت ومسكت طرف البانيو
امـا هو اختبص وتراجع بسرعه وارتخت ملامح وجهه بعد ماكان خايف انها راحت لمكان لما ماشافها في الغرفه .. رجع التفت لدورة المياه على صوتها : ثـامرر
رد من غير نفس : نععمم
قامت بسرعه ولبست الروب وربطته وطلعت له ووقفت قدامه ووجهت سؤالها : لي الحق اعرف سبب الي سويته او لا ؟
ثامر رص على اسنانه : تستهبلين ؟
ميهاف ببراءه : ابـد بس عقلي شوي وينهبل من كثر مافكرت بالسبب انت تهجمت علي وضربتني وشوهت معالم وجهي وانا مانطقت ولابرمت بحرف اي بس من حقي اعرف لان هالمره مراح اسكت عن حقي ابد
ثامر : وش بتسوين ؟
ميهاف : بكبّرها بشكل ماتتصوره اذا ماعلمتني وش السبب
طالعها بصمت وطلع جواله وفتحه على محادثة الرقم الغريب ورمى الجوال بحضنها ومسكته بسرعه فتحت الصوره وانصصصـددمتت عقدت حاجبينها شوي وتنجن وقرت الكلام المكتوب وصارت تعيد وتزيد فيه ومشت للسرير وجلست عليه وقلبها يضررررب بسرعه جنونيه وهي تحاول تحفظ هالرقم وتحاول ماتبين خوفها ورعبها ، رفعت عيونها وهي رافعه حاجب ورمت الجوال على الارض بعصبيه مصطنعه : جيت وضربت وبهذلت وسحبتني من شعري وجبتني لهنا واستحقرت عشان مجرد صوره وصلتك ومافكرت تسأل وتتحقق من الموضوع ايش اعتبر هالتصرف ياخي حتى الهمج والجهله مايسوونها
ثامر بصوت عالي : والله ؟؟ تبيني اتصل واسألك وش عندك واقفه مع الزفت انا زين مني ماذبحتك ودفنتك بأرضك
ميهاف بصراخ اعلى : ومالك الحق ترفع يدك علي وان كنت زوجتك ف هذا مو من حقك اصصصحى ! وبعدين تعال انا قلت لك بنام عند اختي ولا سألتني ليه وشفت هالصوره وبعد ماسألت وترى بكل بساطه تقدر تسأل واجاوبك بكل وضوح وبدون كذب بدون هالهمجيه الي تصرفت فيها
ثامر ظل يناظرها بتوتر وكأنه ينتظر تفسير منها
ميهاف بحـده : ولو اني مابي افتح لك قلبي ولاابيك تعرف عن حياتي ولو بمقدار ذره بس خليني اقولك .. يافاهم اختي عندها مشكله مع زوجها ونامت بالبيت وزوجها يصير صديق الي شفته بالصوره كلمتني اخته وقالت ان زوجها يبغى يجي البيت ويتفاهم معه وبما انها زعلانه اكيد راح ترفض ف صارت الخطه اني اطلع من البيت بوقت نومها واروح لبيت بوخالد واعطيت اخته المفتاح ووصلته لزوج اختي معاذ وبعد ساعه يمكن او ساعه ونص اتصلت اختي وهي معصبه وماحسيت بنفسي الا لبست عبايتي وقمت بمشي ناسيه ان المفتاح مو معي ووقت طلعتي الا بدخلته وطلبت منه المفتاح واخذته ومشيت ... انا وقفت قدامه لثواني بس ماطولت وكان لسبب مقنع بس الي حاول يخرب لعب براسك صح اهنيك على ثقتك
ثامر : وش دراني باللي قلتيه كله من صوره ؟
ميهاف صرخت : بإمكانك تسأل وتستفسر وانا مستعده اجاوب على كل شي بس تضرررب لا والف لااا انا عندي كرامه وكرامتي انداست بهالبييت وكثيير بععد مو بشوي القاها من ابوك ولا امك ولا منك الي طايحين فيني ضرب كل ماشتهيتو ؟؟
ثامر دنق راسه وهو يتأفف : سكري هالموضوع خلاص
ميهاف : الله !! بكل هالبساطه سكريه والضرب الي اكلته من غير حق ؟
ثامر وهو ماودّه : اعتذر خلاص ميهاف
ميهاف سكتت وهي تخزه وبتفكير راحت عند تسريحتها واخذت روج ورسمت شفايفها واخذت لوشن بيدينها وانحنت وهي تحاول تفتح الدرج بمكر وتصنع انه مو جاي يفتح وسحبته بالقوه وكششرت ويدها على كتفها : آآآآههه
قام لعندها ويدري اوجعها مكان الضرب : وش فيك سحبتيه بقوه دامك ماتقدرين كان قلتي لي
ماردت عليه وهي تحاول تعصر الدمعه من عينها غصب ابعدت عن التسريحه والمرايه وبيدها تضغط على كتفها
تنهد بضيق : وش كنتي تدورين
ميهاف وهي مكشره : كنت ابي مرهمي عشان جبيني وكتفي
طلعه من الدرج وفتحه وحط بأطرف اصابعه شوي وقرب منها وحط على جبينها وابتعدت بسرعه لانه اوجعها صدق
ثامر سحبها من جديد : تحملي
ميهاف وهي تقرب اكثر : طيب تكفى لاتضغط بالراحه
ثامر وهو ياخذ مرهم بعد : وين احط بعد
ميهاف نزلت الروب عن كتفها شوي ودنقت براسها : هنا
قرب لدرجة صارت لاصقه فيه تماما الين ماضغط على مكان الوجع الا رفعت راسها شووي وبحركه سريعه : بششويشش
ثامر بهدوء : طيب طيب
ميهاف وهي تبلع ريقها وبحركه خفيفه حطت شفايفها على ثوبه فوق الجيب الي عند صدره وابتعدت عنه بسرعه وهي منزله راسها : خلاص ابغى البس اذا ممكن تطلع
اخذ مناديل ومسح يدينه وهو طالع من الغرفه الا وقف ولف لها وبنبرة تأنيب ضمير : اذا اوجعك شي او اذا احتجتي شي كلميني وبجيك على طول
ميهاف بهدوء : تكفر عن ذنبك
ثامر تنهد : اعتبريه مثل ماتبين .. وسكر الباب
لفت وهي تشد قبضة يدها بنصررر : ييسسسس انااا اوريك يانهى ميهاف من تكون اجل انا تتمصخرين فيني .. وراحت تلبس ملابسها عشان تنام
.
.
اما ثـآمر دخل للصاله وانتبه لأبوه يصعد الدرج لغرفته وامه ونهى جالسين بالصاله ويسولفون بشويش راح لهم وعينه على القهوه .. اخذ الدلّه وفنجان وصب له ومن غير مايناظرهم : سمّعونا سوالفكم وش فيكم تتساسرون
ام ثامر : اقول زوجتك وش مهببه عشان مسوي فيها كذا
رفع راسه وهو يتنهد : بليس الله يلعنه ، والتفت لنهى وشافها تناظر جهة صدره ووجهها انقلب 180
ناظرها مستغرب : وش فيك
ام ثامر وتوها تنتبه : وش ذا الي على صدرك
ثامر دنق وانتبه للروج الي على ثوبه تووسعت عيونه منصصدم وحط الفنجان بسرعه على الطاوله وسحب منديل وبلله بالمويه وهو مرتبك : وش ذا الي جاني بعد
نهى كانت تخزه وهي تفور من قهرها ماتحملت اكثر وقامت رككض على غرفتها
تأفف بصووت مسموع ورمى بالمنديل على الارض ولحقها بسرعه ودخل للغرفه قبل لاتقفل الباب
نهى وهي شوي وتنهار : تططور والله اهنييك تجي لعندي واثر روجها بثوبك " وبصراخ اكثر " : بكره وين بشوفه علمنني " وقربت وهي تضربه على رقبته " : وين ويييين بشوف هناا برقبتك ولا هنااا " قالتها وهي تضرب فمه "
ثامر رفع راسه وسحب انفاس : لاحول الله
نهى وصراخها اتعب بلاعيمها : اذا كنت لهالدرجه تبيها ومتعلق فيهااا طلقني ياخخي ططلللقق عوووع عفتك وربي عففتك خلاااص ماعاد اقدر اتحمل اكثر من كذذا ليه الا تبي تحرررق قلبيي
.
.
عند ابو ثامر الي انزعج من الصراخ طلع من غرفته : ووشش صاير
صعدت ام ثامر بسرعه وراحت لغرفة ثامر وضربت الباب : ثااامررر
راحت نهى وفتحت الباب بقوه وضربته بالجدار ولقت بو ثامر وام ثامر مقابلينها صرخت بوجههم : علمن يوصلكم ويتعدااكم لو ولدكم ماطلقننني لأسويهاا واذبح رووحي وذنبي برقبتكم والله برررقبتكم
ماقدر يستحمل ثامر اكثر وطلع من الغرفه وهو يحس انه مخنووق اما نهى ف صفقت الباب وبوجه الواقفين
وام ثامر وهي راصه على اسنانها : شفت نتيجة اوامرك الي مالها سنع هذا قدام عينك بيت ولدك ينخرب يلا ارتاح انبسط
بو ثامر : مرت ولدك جاهله وناقصة عقل
ام ثامر : بكره اذا صار فيها شي ساعتها ماني بمسامحتك ولا ثامر واعرف انك بتخسر ثامر بعدها وعلمني كيف بتقدر تنام مرتاح وبنشوف بنت اخوك وشلون بتنفعك .. وتركته ومشت عنه
اما هو ظل واقف وعيونه على باب الغرفه ويسمع نحيب نهى هز راسه ورجع لغرفته
.
.
اما ثامر طلع وجلس على عتبة الدرج وهو فاك ازارير ثـوبه ومدنق راسه بالارض بعجـز ورفع راسه وهو يناجي ربه ويدعي انه يفتك من هالهم
عند ميهـآف الي سمعت حسه برا فتحت الباب بشويش ولقته جالس لوحده ماتنكر كيف ضاق خاطرها من شافت شكله ورفعت راسها وهي تتخيل حال نهى الحين اكيد بتنهبل من غيرتها وقفت بمكانها وضميرها يأنبها سحبت نفس وزفرته بضيييق وهمست : مجبوره ، وراحت عند ثامر ونزلت لمستواه وبصوت واطي : وش فيك
ثامر بصوت بالحيل ينسمع : تعبااان
ميهاف وقلبها يقرقع : اي شمنّه وبعدين وش مجلسك هنا بهالوقت مو مفروض تكون بغرفتك
ابتسم بسخريه ورفع لها راسه ويده على مكان الاثر ومانطق بحرف
اما هـي تبددت ملامحها للخوف من جد ان يحط حرته فيها ورفعت يدينها وتحسسا شفايفها وبلعثمه : انـ.. قاطعها
ثامر بتعب : شش مـابي اسمع شي خلاص صار الي صار
فتحت الباب ام ثامر وانصصدمت من وجود ميهاف توقعته لحاله جالس : انتي وش مجيبك هنا قومي انقلعي لغرفتك كانك ساس البلا
ميهاف ناظرت ثامر الي ابتسم بسخريه وهو يهز راسه بيأس وعجز وتحبيط
ام ثامر وهي تهدد بصبعها : اتركي ولدي وخلك بعيده عنه انتي كل ماصرتي قريبه جتنا المشاكل من وراك مرته فوق بتموت بسببك انتي وبلاويك حسبي الله عليك
ميهاف : مااجبرتكم تاخذوني لولدكم
ام ثامر مكشره : سامح الله من كان السبب ولا انتي مو كفو ابد .. قوم ثامر يايمه وروح لزوجتك وطيّب خاطرهاا قوم
ميهاف وقفت بوجهها بسرعه : معليش زوجي تعبان وماعنده استعداد يواجه نهى وصراخها الحين
واعطتها ظهرها ومدت يدها لثامر : قـوم
ام ثامر وعيونها بتطلع من مكانها وهي تشوف ثامر مسك يدها وقام معها للغرفه ...: عزة الله راحت ايامك يانهى
.
.
عنـد ميهاف غطت ثامر باللحاف وزمت شفايفها وتكلمت بهدوء : مصيرها راح تتقبل الوضع
ثامر : اي وضع
ميهاف ستغربت : وضع اني زوجتك !
ثامر وبيختبرها حط يده على يدها وشد عليه : يعني انتي تقبلتي الوضع
ميهاف قمطت وسحبت يدها : وانا بعد مصيري بتقبل .. وقامت من عنده بسرعه وجلست على الكنبه من غير ماتناظره
اما هو ظل ساكت وهو مايدري يضيق ولايبتسم وكأنه عرف للي تبي توصل له تحاول بقد ماتقدر تثور غيرة نهى وتجبره يطلقها ، ماحس انه رافض فكرتها نهائيا بالعكس استقبل الفكره بصدر رحب منها هي تتحرر من جبروت امه وابوه وهو يرجع لنهى وولده ويرجع يعيش مرتاح مثل ماكان ، لف معطيها ظهرها ونـام مرتاح باله وهو متطمن منها ومن تصرفاتها
______________________
ببيت بو فهـد ..
كـان بوخالد جالس مع فهد وطلال وسبب جيته يبي يقابل ميّاده
قام فهد لغرفة مياده وضرب الباب : افتحي عمك تحت ويبي يشوفك
فززت بسرعه وفتحت الباب وبلهفه : خالد معه
فهد من غير نفس : غيري ملابسك وانزلي بسرعه
مياده : طيب طيب .. وراحت غيرت ملابسها وضبطت شعرها .. وبعد مانزلت وسلمت وجلست
بو خالد : يابنتي انا بس ابي ارتاح ومابي اظلم خالد باللي صار
مياده بهدوء : آمر ياعم
بو خالد : هو صحيح مثل ماقالت هدى ان انتي الي طلبتي الطلاق من خالد ؟
مـياده تنحت على الاخر وفتحت فمها : هااا
بو خالد هز راسه بالايجاب : ايه وصلني الخبر وصلني هدى قالت لام خالد وام خالد قالت لي انك تعانين من مشاكل صحيه ومراح تقدرين تجيبين عيال وبنفس الوقت ماتبين تحرمين خالد وطلبتي منه يتزوج ثانيه وحنّا خطبنا له ماقلنا لا بس صدق انك طلبتي تتطلقين منه ؟
مياده وهي مو قادره تستوعب الي يقوله عمها وبلعثمه : خطبتو له ؟
بو خالد تنهد : ايـه
سكتت منزله راسها واطرافعها ترتعش ماهي قادره تصدق او حتى تستوعب
بو خالد : ماجاوبتيني
مياده وهي باقي منزله راسها وصوتها انخنق : اي صح
ضاق خاطره وكان وده تقول لا وساعتها ياويل خالد منه
جلس شوي وبعدها استأذن وقام وقبل لايطلع وقفت مياده وبهدوء : عمي
لف لها : سمي يابوك
مياده وهي تتقطع من داخلها : من خطبتو له
بو خالد بتفكير : ماهي من معارفنا لكن اسألي هدى هي صاحبتها على مااظن هي قايله لام خالد عنها.. يلا عن اذنك يابنتي .. وطلع
اما هي جلست على الكنب وهي ترمش بسررعه وفكّها يرجف وماغير تهمس بأسم هدى هدى
دخل فهد : وش يبي منك
رفعت راسها له ووقفت برجا : فهـد طالبتك طالبه خذني لهدى
فهد كشر : تبطين مالك طلعه من هالبيت سامعه ولالا
مياده مسكت يدينه ببعض ودموعها تطيح : ابوس رجلينك فهد لازم تاخذني لهاا والله لازم مقدر اصبر مقدر اسسكت تكفى تكفى اسوي لك الي تبيه حتى لو تكون معي وتدخل معي بس خذني لها
فهـد صرخ ودفها بعيد عنه : قلت لك انقلعي فوق لغرفتك ومابي اشوف وجهك قدامي انققلللعييي
مياده بصوت عالي : ماااابيييي ماااااابيييي قلت لك خخذنننييييي بموووت والله بموووووت تتككفى لاتردددني اخررر طلب والله اخرر طلب
فهد مسكها من ذراعها وشدّها معه وهو يشتمها وصعد لغرفتها ودخلها وسكر الباب
اما هي صارت تشد شعرها وتروح وتجي بالغرفه وشوي تجلس وتهتز وشوي تقوم وترجع تناديه وتترجاه وشوي تدور جوالها وتذكر انهم خذوه جلست على ركبها وصارت تسطّر وجهها وتهتز : مستحيل مسستحيل هدى ماتسويهاا ماتسويهاا لااا لااا هدى لااا هدى ماتسويها ماتسويها لاا ماصدق عمي يتخّيل اكيد اكيد
ورجعت قامت تضرب الباب مره ثانيه
ام فهد سمعت الصوت : وش تبي اختك ؟
فهد : ماعليك منها يمه بس مو متعوده تنحبس تبي تطلع تروح لهدى بيت عمي بو خالد يعني
ام فهد : شين وقوي عين والله
فهد ربت على كتفها : طنشيها
ام فهد : الا اقول يمه شلونك مع منار
فهد سكت
ام فهد خافت : فهد لايكون صاير معكم شي
فهد : لا يمه بس من ذاك اليوم وانا مالي وجه اكلمها او اشوفها
ام فهد شدّت على يده : غلط يايمه هذي زوجتك مالكم غير بعض اذا ماستندتو على بعض بوقت المشاكل وش الفايده
فهد : يايمه اقولك مالي وجه والله مالي وجه بعد الي سوته بنتك
ام فهد : الي سوته مياده شي وانت ومنار شي ثاني عمرك لاتربط حياتك بالناس الي حولك
فهد : ان شاءالله ولايهمك
___________________
ببيت بو ثـامر ..
كانت جالسه بغرفتها وترتب اغراضها والا فزت مرتاعه من سمعت صوت نهى وهي تحاول تفتح الباب بكل قوه وتصااارخ تبي تذبحها
جلست مكانها بدون اي حركه وحمدت ربها انها مقفله الباب وكأنها عارفه ان لا نهى ولا ام ثامر راح يسكتون اكيد راح يحاولون ينتقمون
وماطولت نهى كثير الا ورجعت الصاله وهي بكامل غضبها
استبقلتها ام ثامر : ها وش سويتي
نهى : مقفله الباب الكلبه الجبانه اكيد خايفه بس وربي انا لها لأوريها نجوم الظهر
.
.
.
وبـعد كم ساعه وصل بو ثامر وثامر
بو ثامر دخل للصاله واما ثامر وقف متردد وين يدخل وبالاخير قرر يدخل عند ميهاف حاول يفتح الباب لقاه مقفول ستغرب : ميهاف ؟؟
قامت وفتحت الباب دخل وسكره : وش عندك مقفله الباب
ميهاف بهدوء : عشان نهى
ثامر : مافهمت
ميهاف : كنت متوقعه انها راح تدخل علي بأي وقت وماكذب توقعي جات اول الظهر وتصارخ وتهدد ولو ان الباب مفتوح كان دخلت ويمكن قتلتني " ورفعت حاجبينها ": كانت واصله حدها
ثامر فصخ ثوبه وعلقه وميهاف تراقبه : دامك تخافين ليه تسوين كل ذا
ميهاف قلبت شفتها السفليه : مو مسألة خوف اقدر ارد عليها واوقفها عند حدها بس مالي خلق وثانيا قلت لك لازم تتقبل الامر هي
ثامر بهدوء : يعني ماكنتي متعمده
ميهاف بكذب : ابدا
ثامر ضحك بداخله : زين
...
بالصاله
ام ثامر : اجل ثامر وينه ماجا معك ؟
بو ثامر : جا تلقينه عند ميهاف
ام ثامر : وليه مايدخل ويشوف ولده ان شاءالله ؟
بو ثامر : اذا جا اسأليه
نهى الي كانت بغرفة الطعام وترضع ولدها طلعت بعد ماسمعت كل شي : على اساس همه ولده ويبي يشوفه بس خلني اتطلق وساعتها بعيد عن شواربه ياخذ ولده مني او حتى يشوفه
بو ثامر خزها : وش هالاحترااام ياانهى
حقرته وصعدت الدرج وهو لف لأم ثامر بعصبيه : هذي مرت ولدك
ام ثامر : وش تبيها تسوي ؟ تجي وتطبطب علينا زوجها بدا ينساها ويتخلى عنها وماهمه لانهى ولا ولده وشوف نهى وش تقول بتحرمنا شوفة هالولد وانت ياللي طول عمرك تبي حفيدك يجي قريب تنحرم منه
بو ثامر : وش قصصدك
ام ثامر تصب لها شاي : كلامي واضح وانت براحتك
___________________
ببـيت بو خـالد ..
نزل الكماده وهو يضحك بشويش : يممه والله مافيني الا العافيه ماله داعي هذي المدري وش اسمها ماطيقها
ام خالد وهي تهز راسها وتزفر : انا منيب مصدقه انه عمرك 25 وهذي سواة تسويها لا والمشكله انك دكتور والمفروض تعرف صالحك ماتروح تسبح وتطلع بالشمس وثم تدخل بعز البراد هنا
عبد العزيز ابتسم واخذ يد امه وتوسدها : عدّيها لي هالمره
ام خالد : ماقول غير الله يصلحك
عبد العزيز بتردد وهو يحاول يدوس على كل شي بداخله : اقول يمه
ام خالد : قول
عبد العزيز تنهد : ماودك تخطبين لي
ام خالد تفاجأت : لاوالله انه يوم السعد يوم الي اخطب لي انت بس قل وابشر بعزك
عبد العزيز : خلاص نويت
ام خالد وهي بتتشقق من الفرحه : يعنني اخخطب ؟؟
عبد العزيز هز راسه بالايجاب : اخطبي .. بس هاا راح تكون خطبه وبس اما الملكه لين تخلص هالسنه واخلص تطبيقي واتخرج واتوظف ساعتها نملك
ام خالد : اصلا ماهي بسناعه يوم انك تملك وانت ماعندك وظيفه ... الله يشرح صدرك ياولدي كانك مسحت على قلبي بهالقرار
عبد العزيز : الله يخليك لنا ان شاءالله
.
.
وبعـد ماوصل بو خالد خبرته ام خالد بطلب عبد العزيز
بو خالد : اجل دام انه قرر خلاص وخالد خاطب خلي زواجهم الاثنين بيوم واحد
ام خالد : بس عبد العزيز مطول
بو خالد : وليه
ام خالد : خبرك عبد العزيز للحين ماتخرج هو بس يبي ادور له واخطب اما الملكه يبيها اول مايتوظف
بو خالد رفع حاجبينه : راحت عن بالي خلاص سوي مثل مايبي وشوفي خالد متى يبي يملك لايطول بعد هو ماله عذر
ام خالد : ولايهمك
.
.
_______________
عنـد منار كانت طالعه مع بدر بحجة انها حابه تطلع معه ومن زمان عنه
بدر متردد : اقول منار
منار : قول
بدر : شخبارك مع فهد ؟
منار ابتسمت تجامل : الحمدلله كل شي تمام
بدر : يعني خلاص تقبلتيه بحياتك عادي
منار : اي اي عادي لاتشيل هم بس من صار الي صار وهو حاسته يتحاشاني شوي مدري ليه
بدر : لاتلومينه الي صار مهو شوي لاتنسين هذي اخته والي سوته يوطّي الراس
منار وهي منزله راسها : وزواجنا ماباقي عليه شي مدري شنو بيصير لذاك اليوم
بدر : مراح يصير الا كل خير تطمني
وشـوي ووصل طلبهم وجلست منار تصور لصديقاتها ولفت انتباهها بدر وهو مركز ع الجوال ويسجل مقاطع صوت وهو يضحك وكأنه يكلم احد
منار ابتسمت لاشعوري على ضحكه : خير ضحكني معك
بدر رفع راسه بضحك : صدق الي قال والله الي ماعمره تبخر تبخر واحترق عبيد ماغيره من راح وهو ماغير يصور وهو يلعب بالثلج تقل بزر وعلى طول يصور لي وحتى بوقت الظهر وانا وظيفتي اسبسب فيه
منار بعفويه قامت عنده وميلت الجوال لها وصارت تشوف الصور معه وتبتسم على ضحكاته وتركت الجوال وقامت لمكانها : طيب الاكل بيبرد وانت ماسك الجوال
بدر رفع الجوال وصور طاولة الاكل ويسجل : شف يامال الفجاعه شف الاكل الزين مهب عندكم ياااااع ماينطاق اكلهم يااااوو
وابتدو ياكلون ثنينهم وجوال بدر ماهجد من رسايل عبدالله
منار : بينفجر جوالك
بدر : ماعليك شاف الاكل وانفجع وده لو يدخل بالجوال وياكل
منار : ليه عادي شدعوه
بدر : خبرك هناك مو كل شي يقدر ياكله اكله محصور خضروات مكرونات نواشف
منار بهدوء : الله يسـاعده
.
.
وبعـد ماخلصو ورجعو البيت دخلت غرفتها وقفلت الباب وبسرعه غيرت ملابسها وانسدحت على بطنها والجوال مقابلها ومتردده تسوي الي ببالها او لا
وبعدها قررت انها تصبر شوي وتفكر اكثر .. سكرت جوالها وقامت تنام
_________________
عـلى الفـجر
فــزز من نومته مصروووع من حـلمه ويتلافت حوله ماشافها !! وقام وهو يرفع البطانيه من على الكنب ومالقاها .. راح لدورة المياه وفتح الباب وبعد مالقاها
لوهله خاف ان الي شافه مو حلم حقيقه وانها هربت من جد عند الي اسمه عبد العزيز ، جن جنونه وطلع من الغرفه حافي و رجع بسرعه بياخذ مفاتيحه وكأنه متيقن انها راحت وقبل لايدخل لمحها جالسه راح لعند الانوار وشغلهم عشان يتأكد لقاها التفتت وشافته ، راح لها هايج ومسكها من ذراعها : وش تسوين هنا لحالك
ميهاف ستغربت وتحاول تسحب يدها منه : حرام بعد اجلس لحالي ؟
ثامر وهو يرص على اسنانه وتأثير الحلم واضح عليه : اي عليك انتي اي حرام تجلسين لحالك لانه ماعاد في ثقه
سحبت يدها بالقوه وهي واصله معها : لااا بصراحه اثبتو لي انكم عايله مراضى من اولكم لآخركم
ومشت بسرعه ودخلت الغرفه وهو لحقها وقفل الباب وشال المفتاح وراح انسدح وحطه تحت المخده
وهي كانت تطالعه وشوي وبتنهبل : مريضض ؟ وش ذي الحركات ؟؟؟ جالسه لحالي برا وش صار عااد عشان كل هذا
رجع جلس : قلبي مو مرتاح لك ولاواثق فيك حتى
ميهاف كشرت : عسى عمره قلبك مارتاح ولا وثق فيني عاد الي يسمعك الحين هذا منى عيني ومبتغاي اني افوز بثقتك
جننته بكلامها وقام لعندها ومسكها من فكّها : اسمعيني زين ميهاف ترى لصبري حدود وبديت اطق من تصرفاتك
ميهاف بكل قوه : واذا ؟ شسوي لك يعني
ثامر صرخ : اسسسكتي اسسكتتتتيييي
غمضت عيونها سحبت نفس ورجت فتحتهم وتناظره بكل تحدي وهمست : وش تبي
ثامر سكت وكأنه يفكر وتركها وراح شال اللحاف من على الكنب وفتح الدولاب وحطه فيه والتفت لها : مافي نومه على الكنب الليله
توسسعت عيونها وقلبها شوي بيطلع من مكانه من شدة خوفها وبصوت واطي وبخوف : بيننا اتفاق
قرب لعندها وهمس : وانا بطلت الاتفاق الي بيننا اعتبريه بورقه وشقيتها ماني موافق على اتفاقيتك الباطله الي مالي منها فايده وبعدين انتي زوجتي حسب الظاهر صح
سكتت وهي تدعي بداخلها انه تطلع من الي هي فيه وماحست الا مسكها من ذراعها ومشى بها للسرير بالقوه وسدحها وراح طفى الانوار وانسدح بالجهه الثانيه
شدت بيدها على طرف المخده وباليد الثانيه شادّه على طرف اللحاف بالقوه ومتكوره على نفسها وخايفه وتتعوذ بداخلها
امّا هو ضرب بيده على السرير وهو يتأفف وصد عنها معطيها ظهره وهو بيذبحه التفكير " وش علي منها وليه شاغله تفكيري تحب الي تحب بقريح و دخلني فيها مو على اساس انها عاله على قلبي وابتلشت فيها وش صار الحين وش تغير ؟ المفروض استغل اي غلطه تغلطها لصالحي واطلقها بحجة غلطتها وارجع لنهى وارتااح من وجودها ، عض لسانه وهو بخاطره يذبح نفسه وقام فتح الدولاب واخذ اللحاف وانسدح على الكنب وغطى نفسه وهو يحـاول انه يبقى على ماهو عليه ومايشغل تفكيره فيها
_________________
يـوم جديد ،
ببيت بو خالد .. على الغدا
ام خالد تطالع منار : منار ماتعرفين لك بنت اخلاق وجمال ونسب عشان نخطبها ؟
منار حطت ملعقتها مستغربه : حق مين
ام خالد: حق عبد العزيز
لفت له بسرعه مصدومه : بتتزوج ؟
عبد العزيز من غير لايرفع راسه : اي
منار من غير لاتحس تنرفزت : وكذا فجأه يلا اخطبو لي
عبد العزيز لف لها : وفيها مقدمات هذي بعد ققرت اتزوج وخلصنا
هدى بمكر : وش فيك منار الله يهديك هذا بدل ماتفرحين له خصوصا بعد الي عشناه بآخر فتره وبعدين انتي متعلقه بميهاف خلصنا منها عاد راحت بنصيبها
منار التفتت لها : وانتي شدخلك انا واخوي ننجاز
بو خالد بحـدّه : منار وقص بهاللسان احترمي اختك
منار بجفاف : بنت عمي يبببهه بنت عمي ماهي بأختي
بو خالد ضرب الطاوله براحة يده : قومي عن وجهي سدّيتي نفسي مدري متى تروحين لبيت زوجك وارتاح من دلعك
ام خالد : يابو خالد خلها تكمل لقمتها الله يهديك
بو خالد : لين تتعلم تحترم وجودي وتحب اختهاا هذيك الساعه تكمل لقمتها معي قـومي يلااا
قامت منار ورجعت كرسيها مكانه وهي منزله راسها وبتمشي للدرج الا استوقفها : منـار
لفت له وبهدوء : سم يبه
بو خالد : اعتذري من اختك
منار : يبه ماغلطت ماقلت شي
بو خالد : قلت اعتذري
رصت بقبضة يدها ووجهت كلامها لهدى : آسفه
هدى تنهدت بمكر : ماصار شي
ام خالد التفتت لهدى : طيب ياهدى ماتعرفين بنت زينه لعبد العزيز وتناسبه ؟
هدى بتفكير : اااممم يبي له بحث شوي
هذا كان اخر ماسمعته منار قبل لاتسكر باب غرفتها
: الله ياخذك ياعمها كانك خربت كل شي حلو ممكن يصير ، وطلعت جوالها من جيبها واتصلت بميهاف لكنها ماردت
______________________

عنـد ميهاف
اخذت العطر ورشت على نفسها وحطته على التسريحه وبعد ماشافت الساعه وكان قريب وصول ثامر .. طلعت من الملحق وراحت لداخل ووقفت وسلمت عليهم
ماردو السلام عليها وكل وحده ابتسامتها مرسومه على وجهها
ام ثامر : اي كملي لي نهى بعد مامصعها معه ودخلها للغرفه وش صار
تغيرررت ملامح وجهها 180 درجه
نهى حطت رجل على رجل : اقولك سحبها سحب مثل الكلبه وسكر عليها الباب عاد انا من شفتهم من النافذه نزلت ركض وحطيت اذني على الباب
وسمعتهم يتناقرون وهو يابعدي لعب بحسبتها لعب
ميهاف قربت لعندهم وصبت لها قهوه وجلست مقابله نهى : ايواا كملي
نهى : وسمعت يقول انه مايوثق فيها وقلبه مو مرتاح لها ابد
ميهاف ضحكت وهي تشرب قهوتها
ام ثامر : ضحكتي من سرك
ميهاف وهي كاتمه ضحكتها قامت وحطت الفنجان : عن اذنكم ... وقامت دخلت للمطبخ
وابتدت تصلح اسهل شي خطر على بالها وطلعت الاغراض وبدت تطبخ الشوربه
وبعد فتره دخل بو ثامر ووراه ثامر الي طل على الملحق قبل وماشافها ولحق ابوه وسلمو وجلسو
وكانت نهى متغيرره ومبسوطه وفرحانه بكل الي سمعته البارح
استغرب ثامر تصرفها وسأل : اجل وين ميهاف
ام ثامر : بالمطبخ
استأذن من عندهم وقام دخل للمطبخ وشافها واقفه عند الفرن ورافعه المغرفه وتحاول تختبر الشوربه ، تنحنح : السلام عليكم
لفت بسرعه : عليكم السلام
ثامر متكي بكتفه على الباب : وش تسوين
ميهاف وهي تسترجع الي قرته وتعلمته : ااامم خطر ببالي اسوي شوربه من زمان عنها .." وانتبهت لنهى وهي مقبله وتوقف عند الدرج تراقبهم "
ميهاف : ادخل تعال وش عندك واقف عند الباب
دخل شوي وراحت له ومسكت يده و بيدها الثانيه حاوطت خصره وبصوت هامس : وش صار لك امس وش خلاك تتصرف بهالغرابه هذي
ثامر زفر : حلمت بحلم مزعج ولما قمت وماشفتك خفت وجن جنوني
ميهاف بإبتسامه جانبيه : وين بروح منك يعني
ثامر عقد حاجبينه : مافهمت
ميهاف مميله راسها : اقصد ان مالي غنى عنك وين بروح وانا مالي احد اصلا
ثامر قرب وجهه منها وهمس : وش يدور براسك صراحه صرت احسك ماتسوين شي بدون تخطيط
ميهاف واستغلت فرصة قربه غمضت عيونها بقوه وكأنها تدوس على نفسها .. مسكت رقبته بيمينها وباست شفته وهي ترررججف
توسعت عيونه بصصددممه انشلّت اطرافه وماحس بها الا سحبت نفسها منه وطلعت ركض من باب المطبخ الثاني ودخلت الملحق وقفلت الباب مرتين وهي تنتفس بسرعه جنونيه وعيونها متحجره مليانه دموع ودخلت لدورة المياه وشغلت المويه بسرعه وصارت تغسل فمها مره ومرتين وكأنها تغسل اثره ورفعت راسها وهي تحاول تنظم نفسها وتهدي من حالها
وطلعت بسرعه واخذت من جوالها وهي تسب الساعه الي فكرت انها كيف تجذب ثامر لها وصارت تدخل مواقع وتعرف وش هي الطرق والاساليب وقفلت الصفحات وحطت يدها بجهة قلبها الي تحس به بيطلع من مكانه
وشوي والشغاله جت لعندها ونادتها على الغدا وقامت ضبطت روجها من جديد ولحقتها
عنـد ثـامر الي سحب له منديل ومسح فمه وهو متأكد بأن غايتها نهى تشوف اثر روجها عليه وتعصب من جديد لكن ماكان له خلق بهالوقت
راح وجلس على الكرسي وشاف الشغاله وهي ترجع بعد مانادتها علّق عيونه على الباب وهو ينتظرها تدخل بكل شغف وماهي الا ثواني ودخلت واول ماشافته يطالعها اختبصت وارتعشت كل خليه بجسمهـآ صدت عنه وراحت تساعدهم
وبعد ماصارو كلهم جالسين وكل منهم بدا ياكل
ماعـدا ثامر الي ماسك ملعقته وعقله شارد بعيد ومن غير لايحس رفع راسه لميهاف الي كانت مدنقه وتاكل ، ابتسم بإعجاب على شكلها وعلى حلاوة الشعور الي حسّه معها
عن نهى الي كانت عيونها عليه وبتاكله من غيرتها انتبهت لإبتسامته لميهاف الي كان وجهها محمرّ وهي تاكل
ماحست الا بدموعها تطيح مسحتهم بسرعه وعشان تقطع تفكير ثامر : ثامر اعطني الملاحه
التفت لها وشاف الغضب بعيونها عطاها الملاحه بصمت والتفت لأمه وهي تقول : الله يعز النعمه وش ذي الشوربه الي ماتتاكل
نهى : وانا بعد ذقتها ولاعت كبدي ماقدرت اكملها الله يصلحها الشغاله الي ماعرفت تسويها
ثامر وهو ياكل اخر مابقى من شوربته : اما عن نفسي اعجبتنني كثير تسلم يد الي مسويتها
بو ثامر عقد حاجبينه وجرب ذاقها ورفع حاجبينه بإعجاب : والله اشوف انها طيبه " وعقد حاجبينه لأم ثامر " : شغالتك تعرف تسوي مثل هالزين ؟
ام ثامر كشرت : لا كان اقص يدها لو تسوي مثل هالشوربه الي تسد النفس
التفت لنهى : مو توك تقولين الله يصلح الشغاله
نهى التفتت لميهاف : اقصد ميهاف ياعمي مو هي كانت شغّاله ؟
وقفت اللقمه بحلق ميهاف وانحررجت وعيونها على نهى الي تبتسم بإنتصار وقامت : عن اذنكم
ثـامر ماعجبه كلام نهى وعناد لها سحب ميهاف لعنده : مااكمل اكلي اذا قمتي
الكـل انصصصدم من كلمة ثامر واولهم ميهآف
وماطال انتظاره الا وقام جاب كرسيها جنبه وجلسها بالغصب ورفع يدها وباسها : تسلم هاليد الي سوت الذ شوربه ذقتها بحياتي
ميهـاف وعيونها تصصلبت وكل مافيها متجمد وهي مو مصدقه الي تسمعه وتشوفه احمرّ وجهها خجلت وحيل قدام الكل
اما نهُى ماستحملت المنظر وقامت عن الاكل ودموعها اربع اربع بتموت من غيرتها
وام ثامر الي بتحترق مكانها من عصبيتها وهي تشوف ولدها ميّال لميهاف وبشكل قوي
كملت ميهاف اكلها وهي تفكر بخوف ان تأثير الي سوته راح يكون سلبي عليها وراح يخلي ثامر من جد يتعلق فيها وممكن مايطلقها ، تضايقت من داخلها وهي محتاره وش تسوي وشلون تتصرف وكأنها توهقت وصارت بين نارين
.
.
.
نــــــــــهـــــــــــــ ـــايـــة الــــبــــــــــارت