[اسيرهـ الخيال]

.
.
.


ما تتخيل شلون مر الكورس الثاني سريع ، والحين صارلهم اسبوع مداومين من بعد عطله الأعياد الوطنية .. قاعدين بحديقة الكلية ، اوراقهم متناثرة ع كل الطاولة ، وازعجها صوت التوأم واهم يتهاوشون .. وكل وحده تقول انا صح وانتي خطأ ويدخلوني بينهم واقولهم انا الصح وانتوا الخطأ .. كنا قاعدين نشرب قهوتنا ونكمل حل ريبورت اللاب اللي بعد ساعه .. اشغلها الموقف اللي صار لها اليوم الصبح قبل تدخل المحاضرة كانت تمشي بالممر متوجهه للقاعه وبايدها قهوتها .. انتبهت ع الصوت اللي يناديها .. استغربت الصووت ، التفتت مجيبه للصوت

..: غـــلا
كان واحـد من الشباب اللي معاها بالمحاضره ، انتبهت ان الممر خالي الا منها ومنه : تناديني انا ؟!
..: اي انتي مو غــلا اللي معاي بكلاس دكتورة هدى ؟؟
غلا : ااي انا ، بس خير
.. : خير ان شاءالله .. انا طلبت من الدكتورة اعادة الدروس اللي طافتني ، ورشحتج لي
غلا : مافهمت بشنو رشحتني ؟
...: تشرحين لي اللي طافني واصور النوت مالج
غلا : اسفه مااقدر ، واذا ع النوت مومشكله
.. : يابنت الناس والله اني محتاج ، الدكتورة لو بتشرحلي مراح تشرحلي الكمية بالتفصيل مالومها عندها كلاسات .. فانا طالبج
غلا استغرب صوته المليان حزن ، وتذكرت اسمه اللي مر عليها بكذا محاضرة وقت ماتاخذ الدكتورة الغياب .. تذكرت كلام الشباب واهم يقولون (الله يكون بعونه .. الله يصبره )
غلا : بس صعبه اقعد معاك واشرحلك اتوقع عارف سلومنا
.. : عارف لو ماني مضطر ماجيتج .. وطلبت الشباب قبلج .. بس انا ابي انجح واجيب قريد ، لو بعتمد ع شرح الشباب بروحه مع النوت مراح اشوف القريد الحلو
غـلا حست بيأسه مع انها ماتعرف سالفته : تقدر تخليني اشوف الوضع وافكر واقولك ..
.. : مو مشكله بس يمديج لي وقت اللاب الساعه 2
غلا : يمدي
..: ناطر ردج

قرب منها واهو يمشي متوجهه للقاعه .. حست بحزن من بعد ماشافت عيونه الحزينه لما قرب ، عمري مارفضت لأحد طلب لا صديق ولاغريب .. بس أول مره يطلب مني (شاب) هالطلب .. دخلت المحاضرة واهي تشوفه قاعده باخر طاولة وعيونه ع النوت وبايده القلم .. انطرت لين خلصت المحاضرة وطلبت من البنات يسبقونها للكافتيريا وقالت لهم بكلم ابوي

..: هلا وغلا بغلاووي
غلا : هلا فيك يبه حبيبي ، عسى مومشغول وعطلتك ؟
ابو نوره : لا يا حبيبتي آمريني
غلا اخفت ان اهو اللي كلمها : يبه عندي مادة طلبت مني الدكتورة طلب وقلت لها لازم اشاور ابوي ، تقدر تقول عمل انساني
ابونورة : افا وتردين العمل الانساني وانا ابوج
غلا : لان غريب شوي
ابونورة : وشنو اهوو ؟
غلا : في واحد من الشباب اللي معاي بالمحاضرة .. متغيب عن الكلاس من بداية الكوورس وتوه يداوم هالاسبوع ، الله العالم بظروفه اللي ماسالت عنها ، بس اللي اعرفه ان ظرفه قوي لدرجه تشوف الرجال حززين طوول الوقت
ابونورة : الله يكون بعونه بمصيبته ، وشنو طلب الدكتورة ؟
غلا اخذت نفس عميق وقالت : اشرح للططالب المنهج اللي طافه كله
ابونورة بتفكير : دام انه عمل انساني وانا ابوج ، ان شاءالله انج تساعدين هالولد والله يجزاج خير ، وتدرين اني واثق فيج
غلا براحه : وانا قد الثقــه


...: غلاووي شفيجج .. ؟؟؟
غلا : ها مافيني شي شفيكم
نوران : يلا حبيبتي ورانا لاب ولا عاجبتج القعده ؟
غلا وقفت واهي تلم اوراقها : يلا كاني ماشيه ..

دخلوا اللاب والطلبة متوزعين واصواتهم متفرقه بين ضحك وسوالف وتحلطم عن المادة وصعوبتها والدكتورة ومعيدة اللاب ..
نوران : تعالي نقعد اول طاولة احسن ..
طاولات المختبر كبيير ومرتفعه .. قعدوا بالطاوله الاولى المواجهه للسبورة ، غلا ع طرف وع يمينها نوران وبعدها نور .. انتبهت لـ (مـحـمـد) اللي دخل من الباب ، رفع نظراته لها ونزلت عيونها بسرعه .. بقوله اني موافقه بعد مايخلص اللاب موالحين جدام الكل
دخل مـحـمـد ، وقعد بالطاوله اللي ورى غلا بالضبط وع طرف ..

دخلت المعيدة (أروى) .. وبدت بشرح المادة بعد ماصكرت الاضاءه وشغلت الداتاشوو .. البنات اندمجوا مع الشرح وتسجيل الملاحظات .. مـحمد مثل وضعهم وبتركيز أكثر .. بيعوض اللي طافه مهما كككان .. هالكورس آخر كورس له ولااازم يتخرججج .. آآه يمه ويبه كسرتوووني .. هيا وشوق ونايف وعمر ووينكمم تشوفون اخوكم اللي خليتووه بروحه بهالدنيا .. اللهم لا اعـتـراض ع حـكـمـتـك ولـكـنـي اسـألكَ اللـطف فــيــه ..

نوران بهمس لغلا : غلاوي شفيج اليوم كله سرحانه ؟
غلا : مافيني شي
نوران : اككيد ؟؟؟
غلا : اكيد واذا فيني شي بقولج انتي واختج لاتخافين
نوران التفتت للسبوره : اي ع بالي بععد

انتهت المعيدة من شرح البارت النظري من الدرس ، وطلبت منهم يشوفون العينات وماينسون يسلمون الريبورت الأسبـوع الجاي .. وقفت مع البنات ومعاها ورقه وقلم واهي تمشي ورى نوران اللي جدامها نور
نور : ووويع ردينا للعينات والاسماء اللي اطول من اسمي واسم ابوي وجدي وجد جدي ووو
نوران تدز اختها لجدام : بس بس صكيتي راسي .. شوفي وانتي ساكته فشلتينا
نور : وجع آآي .. خليني اشوووووف
غلا ضحكت عليهم واهي توقف ع اول عينه .. قربت للمجهر واهي تصكر عينها اليسار وثبتت عينها اليمين ع العدسه .. انتبهت بصوت يناديها .. فزت واقفه واهي تشوفه واقف جدامها وقريب منها
مـحمد : آسف خرعتج .. بس مارديتي علي
غلا واهي تشوف اللاب الشبه فاضي بعد ماطلعوا اغلب الطلبه : موافقه بس بشرط
مـحمد : شنو ؟
غلا : ماابي احد يدري .. وغير جذي المكتبه مكان مناسب لان صعب اطلع بره الكليه
مـحمد : مومشكله ، متى تكونين فاضيه ؟
غلا : باجر .. عندي بريك ساعتين خلك بالمكتبه ع الساعه 10 الصبح ، عندك شي ؟
مـحمد : لا ماعندي بكون موجود ان شاءالله ، اخليج الحين

شافت نور ونوران اللي شبه كانوا يركضون .. قربوا منها وعيونهم مركزه عليها
نور : من ورانا تكلمييين ها شعندج اعترفي شفناج بعيوونا
نوران : اااي موتلفين وتدووورين يلا قوووولي
غلا اللي كانت تدري ماتقدر تهرب منهم ، وغير جذي تبيهم يكونون معاها باجر بالمكتبــه ! قالت لهم السالفه كلها من كلامه معاها اليوم الصبح بالممر لي اللي صار الحين
نوران : انتي ماتدرين شنو صاير فيه ؟
غلا بصراحه : لا والله مادري ولا سمعت
نور : لانج ما تنتبهين للكلام اللي حواليج
غلا : انتوا تدرون ؟
نور : الكلاس كله يدري
غلا : وشنو فيه ؟؟؟؟؟
نوران : بعطله الربيع اهله كانوا مسافرين بالسياره رايحين العممره
غلا بشهقه : لاتقووولين !!
نور : اي توفوا كلهم بحححادث الله يرحمهم واهو كان بالكويت ماسافر معاهم ، وهذا سبب غيبته عن الدراسه قريب الشهر .. ومو بس دكتورة هدى اللي مراعيته ، اهو مسجل ماده ثانية عند دكتور فؤاد وهم مراعيه
غلا بحححزن : الله يرحممهم يااااربي ومنو بقى له ؟؟
نوران : عاد هالشي ماندري عنه ، ولا تبجين انتي يا البجايه
غلا مسحت دموعها اللي نزلت من غير ماتحس : وانتوا عادي عندكم تسمعون مثل هالقصص وماينكسر قلبكم
نور : لان احنا سامعينها من زمان ، انتي اللي مادري وين اذونج وقتها
غلا : والله مااذكر اصلا متى تكلمتوا بهالموضوع
نور : كنا نتكلم فيه مع بنات بالكلاس قبل تدخل الدكتورة
غلا : وانا شدراني عنكم انتي واختج قرقتكم وواجد وتسولفون مع الكل
نوران : مالت بس احنا الخبلات اللي جايبين لج العلوووم
غلا مسكت نوران : لااا خلاص أأأسسفه ، بس ابي وحده منكم باجر الساعه 10
نوران : شتبين فينا
غلا : شفيج نسيتي باجر أول حصه له
نوران تضرب جبينها بكفها : اااااي صح .. انا اوك ماعندي شي
نور : لاوالله انا عندي محاضرة يا حبيباتي الساعه 11 ..
غلا : عادي اقعدي عندنا ساعه وروحي
نور : هم فكره ..


.
.
.



بعد تعب تدريس العيال وملاحقهم طول اليوووم ، كافأت نفسها بأحلى شاور وبعدها تعطرت بأغلى أنواع العوود .. رفعت العطر الفرنسي وعطرت شعرها وبجامتها .. اخذت الروب الستان واهي تبخره وتعطره .. نزلت المبخر ع التواليت ولبست الروب .. انتبهت لxxxxب الساعه المشيرة للساعه 11 ونص ، غريبه مومن عادته يتاخر من غير مايقول وباجر عنده دوام ويودي العيال للمدرسة .. قعدت ع طرف السرير ورفعت تلفونها من الكومدينه ، ودقت عليه .. رن رنتين ورد عليها
..: الووو
...: الووو وينك غريبه ماقلت بتتاخر ؟
بارتباك : مسافه الطريج وانا عندج ان شاءالله
ليال : عزيز فيك شي ؟
عزيز : لااا بس اجي واقولج لا تنامين انطريني
ليال بخووف : الله يستر ناطرتك

لفت الروب اكثر ع جسمها وربطته عددل ، فجاه حست ببروده بجسمها .. مشت لي نهايه الغرفة وقعدت بالقنفه اللي جدام التلفزيون واهي تنطره ..


عــنــد عبدالعـزيــز

...: بس تحملي هالأسبوع وانا اخلص امورج وآخذج معاي للبيت
...بصوت متقطع من البجي : بس اخاااااف اقعد برووحي بالبيت
عزيز وتوهق بالأحداث اللي صارت أسرع من البرق : لازم تساعديني انتي بعد ، والله هذا اللي اقدر عليه
مسحت دموعها وحاولت تبين نفسها أقوى : مومشكله انت روح الحين لبيتك وزوجتك ، ولا تحاتيني
عزيز واهو يطبطب ع كتفها اليسار : بارك الله فيج ، تعالي صكري الباب من بعدي


بعد 10 دقايق ، دخل غرفته اللي وصلت له ريحه العوود الفاخر ، دور بعيونه ع ليال ولمحها جدامه ع القنفه اللي ظهرها ع الباب
قرب منها واهو يبوس راسها : السسلام عليكم
تفرك ايدينها الثنتين ببعض من التوتر والخوف : وعليكم السسلام
قعد ع يمينها واهو يمسك ايدينها : شفيييج ليش كل هالهز والتوتر !!
رفعت عيونها لعيونه : منك ، انت شفيييك اليوم والله ان فيك بـــلا
مازال ماسك ايدها : مافيني شي ، انتي اهدي وبقولج كككل شي
ليال بسرعه : اهلي فيهم شي ؟؟؟؟؟؟
عبدالعزيز : لا يابنت والله مافيهم شي
ليال : اجــل اهلكك ؟؟!
عبدالعزيز : ولا اهلي ، الموضوع يخصني .. قلت لج عنه قبل فتره تذكرين
حست بالغباء : متى اي موضوع ؟؟
رفع قدمه اليسار ع القنفه ولف جسمه عليها واهو يقعد ع قدمه : ليالي يا حبيبتي ، قلت لج اني مفكر اتزوج ثانيه صح ؟
ليال فهمت شنو بيقول : ااي بس فتحت الموضوع وسكت .. وع بالك اني راضيه ؟؟
.. : ياقلبي والله ربج حطها بددربي ، وانتي تدرين مافي مره عندي توصل لغلاج ..
ليال بطوله بال : عزيز انا مشيت الموضوع مع اهلي واهلك وقلت لهم ان انا ماعندي مانع لاني ناطرتك انت تهوون من نفسك .. ووينها هذي اللي بتتزوجها ؟
تنفس بقوه واهو يقول لها : انزين ممكن تسمعين قصتي وانتي احكمي بعدها ؟
ليال وايدينها بين ايدينه لي الحين : قول اسمعك ..
عبدالعزيز : تذكرين الشايب اللي دايما اشوفه بالمسجد ويكون موجود قبل لا اقيم الصلاه ؟ (عبدالعزيز امام المسجد اللي عند بيتهم)
ليال : اي اذكره اللي قلت لي ولخالتي سالفته
عبدالعزيز : عليج نووور زين تذكرين .. الله يسلمج قبل نطلع للبر طلبني طلب وكسر قلبي واهو يمسك ايدي ويبوسها ويقول ياوليدي لاتردني .. مالنا انا وهاليتيمه الا الله ثم انت !!
ليال : وشنو كان طلبه ؟
عبدالعزيز ويدري الخبر بيعصبها : اني اتزوج حفيدته اليتيمه ..
ليال : ووتزوجتها ؟؟
عبدالعزيز وحذف القنبله : اااي ملجت عليها قبل نطلع للبر
وقفت بعصبيه : هذي نهايه العششرة يا عزيز ، 18 سنه ووقتي وحياتي كلها لك ولعيالك وتسوي فيني جذي
وقف واهو يقرب منها : والله يا ليال ماقدرت الرجال صكر علي كل باب ، حاولت فيه يمين يسار ماقدرت ، انتي تخيلي ابوي الله يطول بعمره تشوفينه جدامج ودموعه اربع اربع وعيونه حمممممره .. الرجال كسسرني مستحيل اشوف شايب بعمره منهار مثل الطفل ولا اسوي شي يا ليال
ليال غيرتها سيطرت عليها بلحظه ، بس دايما عقلها يغلب قلبها : كيفك سوو اللي تبيه بس ماابي اشوفها عندي
قرب ومسك كتوفها بايدينه : ليال الشايب توفى اليوووم
رفعت عيونها بصدمه : هااااا ؟
تنهد بألم : كل اللي سواه وزوجني بحفيدته لان يدري انه مريض وموته قريبه ، كان يبي يتطمن ع حفيدته اللي بقت له من عايلته
تغورقت عيونها بالدموع : والمطلوب من ليال ترضى فيها وتفتح لها بيتها !!!
عبدالعزيز : مااقدر اخليها ببيت بروحها ماعندها احد ياليال ، لا اهل ولا اخوان ولاعمان ولاخووال .. انتي شوري علي شنو اسسوي ؟؟؟ هذذي أمانه الشايب قبل لا يمووت
بدمعه نزلت من عينها اليسار : عزيز لي متى وانا اتنازل علشان ارضيك ؟
ضمها لصدره : والله وربي شاهــد علي ان نيتي استـر عليها بهالدنيا
مسحت دمعتها وبعدت عن حضنه : وين بتحطها ؟
بعد ايدينه عنها بعد مابعدت : بحطها بشقة محمـد فوق صارلها فاضيه فوق السنتين بعد ماطلع لبيته الجديد
ليال تنفست بقووه : انا بمشي معاك بهالموضوع ، واذا قصدك الأجر الله يرزقني وياك .. بس تتاكد انها مالها شغل فيني ولا في عيالي
عزيز بفرحه بعد ماحسها هدت من العصبيه : ابششري من عيوني الثنتين
قعدت ع القنفه ، بعد هدووء لثواني تكلمت : جم عمرها ؟
عزيز اللي قعد يمها التفت لها بعد ماتكلمت : هاا ؟
ليال التفتت له بجسمها : اسالك حفيدة الشايب جم عمرها ؟
عيونه بعيونها : 25 سنه
بصدمه وفتحت عيونها : 17 سنه بينك وبينها ، حرررام عليك
عزيز : هذا اللي صار ، والله لو اقدر اخليها تشوف نصيبها مع واحد قريب من عمرها صدقيني بخليها ، بس هذي أمانه يا ليالي أمانه

ليال رجعت لهدوئها وعيونها ع التلفزيون المصكر جدامها ، ادري ياعزيز وفاهمتك وادري ان قصدك شريف وكل اللي ببالك انك تستر عليها بهالدنيا ... بس مشكلتك ماتفهم ان في شي اسمه (غيره الانثى من انثى أخرى) ، وستكون انثى اصغر مني بالعمر .. لا اهتم لكلام الناس ، فانا واثقه بنفسي وواثقه بقلب عزيز .. يا غريبه كوني أديبه ، والأهم انها بتسكن بالدور اللي فوقي وبتاكد بنفسي ان دربي مايلتقي بدربها ولا اشوفها ولا تشوف عيالي ..


.
.
.


انتهى
لقائنا القادم يوم الاربعاء أو الخميس ^^