باذن الله بعد هذا الفصل
موعد تنزيل الفصول كل اثنين
البارت الثاني
في محل القهوة الصغير تعمل بدون تفكير , تلبس الزي بني اللون . شعرها معقود خلفها بجديلة ليست طويلة ولاقصيرة . تحاول أن تشغل نفسها قدر المستطاع , لم تتحدث طوال اليوم , استغربت رفيقتها من صمتها الغير معتاد , حاولت بسمة القفز في أفكارها لم تستطع , حاولت اضحاكها , لم تستطع .
كانت الساعه العاشرة والنهار في أوله , غطت كوب القهوة باحترافيه وخطت عليه بعض العبارات التي تتبجح دائما بأنها حمقاء ولاتعني شيئا , لكنها تحاول إخراج سما من صمتها الغريب , لفت قبعة رأسها بشكل مضحك إلى الخلف وبدأت تدندن أغنية بصوت مضحك
شو حلو حبيبي شو حلو
شو حلو حبيبي ما أطعمه
لتضحك تلك بخفة وترمي القلم الذي كانت تحمله باتجاهها وهي تقول / مو كذا ياخبلة الأغنية خطأ
أردفت بسعادة فهي استطاعت أخيرا اخراجها من مودها / ييييه قدرت اضحكك أهم شي
وتقدمت بخطوات واسعه وهي تمد كوب القهوه الساخن نحوها / هاك , اشبك اليوم مو طبيعيه ؟
وضعت يدها على رأسها وهي تتنهد / والله ما أعرف شي غريب صراحة , المشاكل هي هي والأحداث نفسها بس أحس بشي غريب مو مريحني يابسمة .
بسمة / قولي اش سوت العقربة
سما / مالي نفس أتكلم سوري زي كل يوم يعني
بسمة / ولا ضغط اختبارات ؟؟؟
سما / يييه على الاختبارات , في ملازم لسا مافتحتها ولا شفت ايش فيها تعرفي ؟
بسمة / ماعليه انتي دافورة وتقدري تعدي
لتضربها على كتفها بانزعاج / قولي ماشاء الله ايش هذا الحسد
لتقهقه تلك بشقاوة / اشفيك يابنت وتلف كوبها جهتها وهي تقول : خذي خذي اثري لاتقولي حسدتني
----------
ترك طاولة الإفطار بصمت وهو يسمع حديث والده ووالدته عن فتاة القهوة التي بدأ بها صباحه اليوم , تبا لما شغل باله بالموضوع هذا , لكن ماجد يعلم بأنهم جيران وطلب منه معلومات تخصهم , عموما فليكن هو أخبر والدته وستأتي له بالخبر اليقين ويخبر ماجد ثم تنتهي سيرة هذه الفتاة .
دخل غرفته على صوت اتصال ليجده ماجد تناول الهاتف وهو يقول / يالله صباح خير ياماجد
ماجد على الطرف الآخر / انت للحين مابطلت طبعك الخايس هذا أول ماتقوم من النوم نفسك شينة.
فيصل / اخلص , لاتقول نفس سالفة البنية اللي أمس تراك اشغلتني ياخوك
ماجد/ انت وش عليك ؟ كلم الخاله وتكسب اجر من ورا السالفة ياخي الأجر يجيك لرجليك
فيصل بطفش/ خلاص كلمناها ويشوفون امي وابوي اليوم , لو امي تشوف لها وظيفة ثانيه عند خالتي
ماجد / طيب كثر الله خيركم الله ييسر الأمور, ياخي أم عزام ضايقة معها الأوضاع والا ماتسرح وحده من موظفاتها والثانيه صار لها عندها سنين ماتقدر تقول لها روحي بدون سبب
وأغلق هاتفه ليخرج على عجل
على طاولة الغداء
يجلس الجميع بصمت إلا من صوت الملاعق وهي تخبط الصحن الماثل أمامهم , وكأن توتر الجو المحيط بهم انتقل إلى مائدتهم فأصدرت أصواتا مزعجة تقطع صمتهم الكئيب
فجأة هتفت سعاد بحنق / أبوي
رفع عينه إليها بدون أن يحرك رأسه من فوق الصحنالذي يلتهمه وأردف / اش عندك
سعاد بخبث/ أبوي , فيه ناس مو عاجبتها عيشتها معنا وهي تنظر لسما بطرف عينها
طنشها والدها لتردف والدتها / قصدك سما ؟ تحمد ربها شايلها ابوك الله يكثر خيره
سما ابتلعت ريقها ولم ترد
ليصرخ عمها / وش قايله ياسما ؟ ماتفكيني من شرك انتي ؟
تأففت سعاد وليس كأنها من صنع المشكلة / كل يوم كذا مشاكل ياخي نبغا يوم هادي
أبو طلال / وش موع اجبك في حياتنا ياسما ؟
سما بتردد/ ماقلت شي عمي
سعاد التي اتتها الفرصة على طبق من ذهب / والله كذابه والله امس قلتي كلام طويل مابقوله عشان مااقهر ابوي بس
سما وقد فقدت رغبتها في اكمال غداءها / الحمدلله , وكثر خيرك ياعمي شايلني وشايل همي الله يجزاك خير , وقفت وهي تحاول المغادرة
فسمعت زوجة عمها من خلفها / وييين ان شالله ؟ مين بيشيل الأكل من بعدنا ؟ روحي المطبخ بسرعه تلقين صحن فيه شوي من غدانا سويته لأم فيصل جارتنا , وديه لها وتعالي بسرعة
قاطعها أبو طلال/ وين يا فوزية؟ ترسلين البنية الظهر؟
فوزية / وشفيك ؟ ام فيصل هذي اللي كل عصرية اسير عليها , امس أرسلت لي صحن وماودي تطول اغراضها عندي اعرفها لسانها طويل
تركتهم سما بطفش وذهبت لحمل الصحن ثم ارتدت عباءتها على عجل وخرجت من المنزل مسرعة متفادية أي نقاش آخر حول موضوع البارحة الذي يؤرقها
هي تشعر بخوف لاسبب له
مابالها ليست أول مشكله تحدث اليوم ولا بالأمس
تعوذت من الشيطان وهي تمشي تحاول أن تتأخر ولاتريد العوده للمنزل مبكرا , ورغم أنها تهادت في مشيتها فقد وصلت بعد أقل من دقيقه فبيت أم فيصل لم يكن بعيدا عنهم , مشت ببطء وهي تشعر وكأن ضربة شمس قد أصابتها فقد فقدت توازنها فجأه, تباطأت مشيتها ثم وبلا سابق انذار , اصطدمت بجسم ضخم فسقط من يدها صحن الغداء وتناثر الى شظايا مختلطا بحبات الأرز
تأملت الصحن المكسور أمامها ووضعت يدها على قلبها بفزع وهي تشهق / بسسسسسسسسم الله الرحمن الرحيم
فزعت من صوت امامها صارخا بغضب / ووووووووش بسم الله , عميا انتي ماتشوفين ؟ لاو تقول بسم الله
بسم الله منك ومن وجهك
سما برعب / وخخر عني انت جاي في وجهي وخخخخر
الضخم الصارخ أمامها / انقلعي انتي عن وجهي
سما ابتعدت عن طريق الغاضب متفادية أي جدال آخر فيبدو أن هذا الأخرق ذو اللسان السليط لن يسكت
وأسرعت الخطى متجهة نحو باب أم فيصل الجارة الطيبة , وامتدت يدها نحو الجرس تطرق الباب , شعرت بحركة خلفها فالتفتت لتجد الضخم يقف وراءها لتشهق مرة أخرى وتبتعد عن طريقه
ليبتسم بسخرية ثم يفتح الباب ويدخل تاركا لها الباب مفتوحا وهو ينادي / يمممممه جاتك وحدة خبلة عند الباب كسرت صحن كله رز ونثرته عالدرج
ام فيصل تخرج الى الصاله لتجد ولدها متوسطا الصاله صارخا/ وشفيك يمه تصيح ؟ وش صحنه
فيصل / شوفي من عند الباب وحده مبين عليها مو صاحية شفتها من يوم خرجت من بيتهم تقدم رجل وتأخر وحده تتمشى بعز الظهر بالشارع
خرجت ام فيصل وأطل وجهها الحنون من طرف الباب وهي تهلي وترحب / هلا سما هلا يمه تفضلي ياخالتي
سما باحراج تفرك يدها / خالة سمية اسفة والله خبطت فهذا اللي دخل قبل شوي وانكسر الصحن اللي ارسلتيه أمس لخالتي فوزية , وأكملت وهي تشير للدرج المتناثر فيه الرز, حتى شوفي الرز بس طلع بوجهي فجأة وانكسر صحنك والله اسفة
ابتسمت ام فيصل / مو مشكله يمه فدى راسك ياحبيبتي تعالي تفضلي
التفتت سما للخلف وهي ترى ظل عمها الذي اقلقه تأخرها وهوينظر بغضب / لا , شوفي حتى عمي ينتظر خالتي شكرا والله تسلمين
ام فيصل / طيب سما دقيقه ياامي , كنت ابيك بسالفة حبيبتي
سما بقلق / مرة ثانيه خالتي أحاول أمرك مرة ثانيه الله معك
وقفزت الدرجات مسرعه لتصل الى باب العمارة التي ينتظرها هناك عمها الحانق
وخرجت وهي تسمعه يردد شتائم تعودت على سماعها وانها غير مسؤولة ولم تستطع ان تحمل صحنا وتاخرت وسببت له القلق في هذه الظهيرة .
دخلت ام فيصل شقتها وهي تنظر لولدها بعتب / فيصل يمه وش ذا الكلام قدام البنيه
فيصل بلا مبالاه / يمه انا وش دراني وحده نطت بوجهي فجاه مدري كيف كانت ماشية ترا اشك انها صاحيه
ام فيصل تضحك / تدري من بنته هذي
فيصل / بنت اللي بنته يمه خلينا منها , كاسرة صحننا ومضيعه غدانا
ام فيصل / افا وين راح غداي اللي مسويته انا يعني ؟
فيصل يقبل يديها / الله يسلم يدينك يمه
ام فيصل / فيصل ياولدي هذي سما االلي كنتو تحكون عنها الصبح انت وابوك , اللي تشتغل بمحل اخت ماجد
فيصل / ياذي البنيه اللي صارت تطلع لي بكل مكان, طيب عسى لقيتي لها شغل او شفتي موضوعها ؟
لترد ام فيصل / لا كان عمها وراها , مالحقت اكلمها
|