.
.
.
السلام عليكم ورحمة الله وبركاته
صباح / مساء الإنجازات ..
اليوم الحمدلله قدمت الشغل اللي كنت اشتغل عليه لاكثر من اسبوعين
بعد ماسمعت كلمات المـدح .. تحمست انزل لكم البارت الحين بدال اليوم بليل ^.^
قراء ممتعة
وأكيد ككلي شووق لتعليقاتكم ^^
.
.
.
الجزء الرابع
يــوم جــديــد
وصبـاحـاً مشرقـاً ع أرض الكـويــت
طلعت من الحصة واهي تعبانه مامداها تتريق اليوم وكان عندها حصه اولى .. انتبهت لبنت عمها تحط ريوقها ع مكتبي ومكتبها ، ابتسمت بفرحه وانا اشوف اختي وصديقتي وبنت عمي حبيبتي ، منو يصدق ان انا وياها الحين بحسبت عرايس ، وبدينا نجهز لان عرسنا بيكون بعد عيد الفطر ، ومن طبع عايلتنا الملجة تكون محفوفة وما نسوي حفلات ولا شي ، وبيوم الملجة صدمنا بدر بطلبه ان يبي عرسنا مع عرس رهف اخته ، وصار والكل وافقه الراي وانا اكثر وحده سعيده بهالخبر .. كافي بنكون انا ورهوفتي عروستين بنفس الليله مع فرسانا (بــدر – زيــد)
رفعت عيونها لبنت عمها اللي واقفه ع الباب : بسم الله انتي متى جيتي شفيج واقفه بمكانج صكرتي الدرب !!!
ابتسمت اهي تقرب وتقعد بمكتبها : ماشر بس صدعوا راسي ثالث وانا داخله عليهم مو ماكله ولا شاربه قهوه
رهف : جان قلتي لي اجيبلج قهوه للصف
جود : تبين تطيح علي الناظرة ولا ابله منى ويلعنون خيري
رهف قعدت بمكتبها بعد ماصبت لبنت عمها ولها شاي : مافيها شي كله فنجان واحد
جود سحبت كرسيها لمكتب رهف اللي ع يسارها وبينهم مساحه صغيره علشان يطلعون ويدخلون منها : رهفوووه خلينا من هالموضوع الحين ، ماقلتي لي كلمتي بدر عن السؤال اللي قلت لج عنه
رفعت صمونتها واهي تاكل منها شوي : قلت له وقالي اقوولج .. ردت تاكل من صمونتها
جود بعصبيه : يا السخيفه قوولي يلاااا
رهف ضحكت : والله جوود قلت له وقالي شفيها مستعجله ع الرد تنطر بعد العرس واجاوبها
جود : ووواي سخخخيف ..
رفعت كوب الجاي وشربت : اخوي صاج انطري العرس باقي له 3 شهور ووقتها اساليه ..
جود : مالت بس مالت لو انتي بمكاني والله ماتخلين سندس وحتى ليال الا واهم جايبين لج الرد
شرقت باكلها : شكوووو الحين تحطيني مكانج !!!
ردت لمكتبها وبدت تاكل : لاني اعرف الفضول عندج مليووووون
رهف : الحمدلله ماعندي شي اسال عنه ، ويمكن ها يمكن تطلع عندي اساله بعد العرس
جود : المهم ماعلينا .. كلمت اليوم كذا مصممه وقلت لها نبي نشوف البدل والدراريع ع الطبيعه وحطيتلنا موعد حق اليوم وباجر
رهف : زززين حلووو .. الساعه جم اليوم ؟
جود : نصلي العصر ونطلع موتنامممين والله اذبحج
رهف : يوووه جان اخرتي الموعد ع الاقل انام شوي
جود : نونونو هذا الموعد الوحيد عندها ، زين منها استقبلت والناس الحين ضغط رمضان والعيد ومايستقبلون عرايس
رهف : يلا ماعليه انام بعد مانرد .. صج تعالي مع سايقنا ولا سايقكم ؟
جود : سايقنا ، اسماء بتروح معانا ..
رهف : احسن تساعدنا نختار
.
.
.
يَا مَنْ يَعِزّ عَلَيْنَا أنْ نُفَارِقَهُمْ
وِجدانُنا كُلَّ شيءٍ بَعدَكمْ عَدَمُ!
-المتنبي
فراقك يؤلمني جداً ياصديقتي .. طوال الشهر المنصرف وانا اعاني من فراقك .. فـ الجميع يحاول النسيان وتصديق الكذبه التي كذبوها ع الجميع .. ولكني رفضت تصديقها بيني وبين نفسي .. تعبت نفسيتي كثيرا ومع الحمل كان التعب مضاعف .. فـ كيف بجسدنا يتألم بهذا العمق مع آلامنا النفسية .. تخبرني الدكتورة أن انسى ماافكر به ويسبب لي بهذه الآلآم .. فـ انا أحاول ولكن جسدي لايستجيب لمحاولتي ..
ام عبدالله : ها ياامي بدت إجازتج ؟
فوز بهدوء : أي خالتي من باجر يبدا مجلسي الطبي
ام عبدالله : الله يهون عليج .. ويقر عينا بالغاليين
فوز بعمق : آآآميين ..
فرحت بدخول زوجها وابنها .. ولكن بهتان ملامحهم منعها من التحدث والسؤال
أبو عبدالله وحسن : السلام عليكم
فوز : وعليكم السلام .. بشروا شصار عرفتوا شي ؟
أبو عبدالله يجلس بالقرب من زوجته : لا الدكتور ولا السسترات اللي كانوا معاها آخر مره راضين يكلمونا
حسن يأخذ فنجان القهوه من والدته الهادئه : حاولت اخذ أسمائهم ع الأقل وبنفسي ادورهم ولا قددرت ..
فوز : والله انهم متعمدددين يخشونهم عننا .. مايبونهم يقولون لنا شنو صار آخر مره بالطوارئ ..
أبو عبدالله : ياابوج يافوز .. احنا ماندري اذا صج اهي اختفت من غرفة الطوارئ .. احنا عرفنا بالصدفة من واحد من موظفين الاستعلامات ان اخر حالة مسكتها كانت بالطوارئ
فوز : مثل ما هالموظف زل لسانه بيزل لسان غغيره .. خلني انا اروح انا بقدر اسحب الكلام من الحريم
حسن بعصبيه : انتي ماتخافين ربج باللي ببطنج .. توج قبل يومين نايمه بالمستشفى من التعب
فوز بنفس عصبيته : تبيني اقعد واحط اييدي ع خددي مااقدر لاتجبرني ..
حسن : فووز اللي فيج رووح كامله ماعادها بنطفه .. خافي ربج ع اهمممالج
فوز ببكي : شلون تبيني ارتااح .. كل مامريت من غرفتها اذكرها واخاف ادخل لاني ادري ان سندس موداخل .. أخاف اصدق الحقيقة ان سندس مختفية .. أخاف من افكاري اللي تصورها لي جثه .. أخاف كل ما تأخرها عليها تروح منا ..
شهقات ام عبدالله التي لم تتوقف وفوز تصف احساسها المؤلم وافكارها السوداويه .. فـ كيف بقلبي يا فوز .. قلبي الذي لايزال لا يصدق اختفائها ولا اريد تصدقين أن مكروهاُ حدث لها ..
ابوعبدالله اكتأب من كلام فوز : لاحول ولا قوه الا بالله .. انا واقف ع حيلي وموناسي بنتي ياام يوسف .. وادعي لها ولاتفكرين بهالافكار اللي بتزيدج مررض .. ومثل ماقال حسن انتبهي لنفسج وكل شي بنعرفه بالنهايه
...: شنو بتعرفون بالنهايه ؟؟ اووو فوز تبجي شفيكمم ؟؟؟ يممه شفيييج ؟؟
ام عبدالله تمسح دموعها وبتغيير للجو : هلا والله بام سالم .. غريبه ماقلتي انج بتمرينا ؟
ليال تسلم ع أمها وابوها ومازالت مستغربه من دموع فوز ووالدتها : قلت امركم دام اني فاضيه .. شفيها فووز حسن ؟؟ يمه شفيج تمسحين دمووعج ؟؟ وشنو اللي بتعرفونه ؟؟
أبوعبدالله محاولاً إخفاء الموضوع : ماعليج منهم متزاعلين .. وامج تعرفينها قلبها رهيف ماتتحمل تشوف احد يبجي قدامها .. انتي بس تعالي اقعدي عندي بشريني عنج وعن عيالج وأبو سالم ؟
ليال بفطنه : يبه انتو خاشين عني شي ؟؟ في شي موقايلين لي عنه ؟
حسن بثقه : شنو نخش عنج .. مافينا شي بس فوز مادري شفيها مع هالحمل صايره حساسه كل ماقلت لها لا نزلت دموعها .. صح يافوز ؟؟
فوز ببحه وضحكه حاولت ترسمها ع شفاتها : صح .. والله ياا ليول اني تعبانه وأول مره اقدم ع مجلس طبي
ليال صدقتهم : الله يهوون عليج .. ااي كل حمل غير عن الثاني ، انتي اهم شي ارتاحي والدوام لاحقه عليه
ام عبدالله بعد ان عاد صوتها لطبيعته : تريقتي يابنتي ؟
ليال : أي يمه اكلت مع عيالي قبل لايروحون المدرسه
حسن واقفا : انا بمشي برد للدوام ..
ليال : لحظه ياابو يوسف انا جايتكم اليوم عندي شي بقوله
ابوعبدالله : عسى ماشر عيالج فيهم شي ؟؟
حسن عاد للجلوس مستمعا لاخته : لا يبه .. بس بقول لكم قبل لاتدرون من الناس
الجميع صامت ومركز معها منتظراً ما أتت لتقوله ، فـ التي امامهم ليست ليال التي اعتادوا عليها ، شي ما مختلف فيها .. فـ ليال لاتنسى وضع لمساتها الانثوية ع ملامحها حتى في حالات التعب .. ليال لا تنسى آداب الزياره حتى ولو كانت الزياره لبيت أهلها فهي تبلغ بقدومها قبل ان تأتي ..
ليال التي بدأت باخبارهم بقصه الشايب والطلب الذي طلبه من عزيز ، واخرها وفاته بالأمس .. صمتت بانتظار احد ما يرد عليها الصوت
أبوعبدالله : والله مادري شقولج اذا انتي راضيه ابشري باللي يطوف الموضوع .. بس اذا تبينا نتدخل بينكم
قاطعت والدها : لا الله يطول لنا بعمرك .. البنت الحين زوجته ومالها غيره بعد جدها الله يرحمه .. وانا شروطي عند عزيز
حسن وقف مغادراً : الله يكتبلكم كل خير .. واي شي تبينه امرينا ياام سلوم
ليال بابتسامتها الواثقه وشخصيتها القويه : ماتقصر يااخوي حبيبي ..
ام عبدالله : الله يكملج بعقلج يابنتي ويبعد عنكم كل شر
سندس لقد فوت ع نفسك حدث تاريخي .. اتذكرين امنتيك بزوج يشبه عزيز زوج ليال ، يحبها ورجل بمعنى الكلمة وعقله يزن بلد .. اين انتي لترين ما فعله عزيزا بـ ليلاه .. بالتأكيد كنتي ستحرضين ليال ع الوقوف بوجه هذا الزواج والمطالبه بحقوقها ورفضها لمشاركه الغير بزوجها .. ولكن هذه ليال وليست سندس .. ليال العاقل كما عرفتها منذ أيام صداقتي بسندس بالمرحلة الثانوية .. رزينه واسلوبها بالكلام يجذب كل الذين امامها ، وأخيرا جمالها الغير عاادي .. جمميله بمعنى الكلمة وحتى أجمل من سندس نفسها .. لـ يكن الله بعونك حماتي فـ اعرف ماتحاولين اخفاءه وتمثيلك للرضى التام عما فعله عزيز ..
.
.
.
جــامــعــة الـكـويـت
10 صـبـاحــا
مـكـتـبة الـجـامـعـة
اول مره يتأخر الدكتور جذي ويمسكهم بالكلاس وياله طلع منهم الا الساعه 9:55 .. سحبت التوأم وطيران للمكتبه .. قربنا ولمحنا محمـد ناطرنا عند مدخل المكتبه ويطقطق بتلفوونه
..: السلام عليكم
رفع عيونه للبنات الثلاث بلبسهم للعباية بلونها الأسود والحجاب ، غـلا ومعاها ثنتين نسخه بعض
محمـد : وعليكم السلام
غلا بتبرير : اعذرنا تاخرنا عليك بس الدكتور تاخر اليوم علينا ..
محمـد : مومشكله انا اللي جيت مبجر
غـلا تاشر ع التوأم : صديقاتي نور ونوران بيكونون معانا
محمـد بابتسامه : يشرفونا
نور برسميه : لنا الشرف
دخلوا المكتبه ومحمـد يتبعهم .. دخلوا المصعد للدور الثاني ، طلعوا من المصعد اشرت غلا ع الطاوله اللي عند الدريشه
..: هالمكان اللي احب ادرس فيه وحيل صااد عن باقي المكتبه
قعد محمـد ع الطاولة واهو يطل من الدريشه : حلو المكان
نوران : انا واختي بنقعد بالطاوله اللي وراكم مالنا خلق نسمع الشرح مره ثانيه
نور مشت للطاوله اللي تقصدها اختها : حــده انا الكلام اذا تكرر علي اتنرفز
غلا باحراج من موقف التوأم : تعالوا استفيدوا من جم كلمه وراكم ميدتيرم
نور : ماعليج ندبر نفسنا .. بنقعد نكمل ريبورتات اللاب
محمـد حس باحراج غـلا واستنتج انها ساحبه التوأم معاها من احراجها انها تقعد معاه بروحهم
محمـد وعيونه ع الكتاب : تبين نقعد معاهم ؟
غـلا تدري التوأم مستحيل يسكتون عن السوالف ومراح يقدرون يدرسون اذا قعدوا معاهم ، سحبت الكرسي اللي جدامه وقعدت ..
غـلا : لا مومشكله ، لو نقعد معاهم مستحيل تركز بالشرح من قرقتهم
ابتسم لها واهو يشوف حركة ايدها ، فتحت الكتاب وفرشت الأوراق المطبوع عليها سلايدات الدكتورة ..
.. : انا بشرح لك الأوراق هذي والكتاب بيساعدنا بالصور والمصطلحات بس .. هذي طريقة دكتورة هدى بالامتحانات تعتمد اعتماد كلي ع سلايداتها وشرحها بالمحاضرة
محمـد : تمــام .. بعدها اطبع السلايدات منج
غلا بابتسامه خفيفه : هالسلايدات لك انا طبعتهم
انحرج من حركتها : ماله داعلي تكلفين ع نفسج جان قلتي لي وانا امر التصوير اخذلي نسخه
غلا : لاا عاادي .. واذا رحت التصوير وع ماترد بيطير الوقت .. فامس قبل لا ارد البيت اخذت نسخه من التصوير
محمـد : يعطيج العافيهه ، بس مره ثانيه قوليلي انا ارووح
غلا بسرعه تكلمت : امس تذكرت بعد اللاب وانت رحت فماعرفت شلون اقولك
محمـد بعد ثواني سكووت : عادي اكلمج بالواتس اب
رفعت عيونها بصدمه
محمـد : انتي معانا بقروب المادة بالواتس اب صح ؟
هزت راسها بمعنى اي
محمـد : خلاص سجلي رقمي وكلميني ع الخاص اذا صار مثل هالموقف ، ولا عطيني رقمج ادوره بالقروب واكلمج خاص
فتح تلفونه بعد مادخل ع قروب الواتس اب : شنو بدايه رقمج ؟
رفعت عيونها واهي تشوف التوأم اللي بالطاوله ورى محمـد ، تنرفزت منهم جايبتهم معاها يشاركونها بالقعده والحين الخوات سوووالف ونزلت عليهم الشطاره واهم فارشين الأوراق ويكتبون
محمـد بعد مالاحظ سكوتها اللي طال ، صكر تلفونه وقال : اذا هالشي يضايقج انا اعتذر
غــلا : لاا موقصدي .. اذا كان تواصل بسيط مومشكله ، بس لان ابوي يدري ان انا اقعد معاك للدراسه بس وماودي يدري عن التلفون
استغرب صراحتها : ابوج يدري انج قاعده معاي الحين ؟؟؟
غـلا هزت راسها بمعنى اي : مستحييل اوافق الا بموافقه ابووي ، وبعد ماكلمتني امس الصبح دقيت عليه وشرحت له الوضع ووافق بعد مااكدلي انه يثق فيني
ابتسم ع علاقتها الجميله مع ابوها : الله يحفظه لكمم .. فعلا ونعم التربية
غلا تحسست من موضوع ذكر ابوها ونست انه فاقد الاب والام والاخوان والخوات : اعذرني المفروض مااتكلم بهالموضوع الحساس
محمـد رفع عيونه : لا ابـد ماصار شي .. عندج اخوان ؟
غـلا : لا .. خوات بس
محمـد : ماشاءالله وانتي شنو ترتيبج بينهم ؟
غلا اللي نست نفسها وارتاحت للسوالف معاه : الصغيره واكبر مني 4
محمـد : الله يخليكم لبعض
غـلا : آمين ، يلا نبلش
رفع القلم وقال : بسم الله