[لامارا]

في شريعة العشق
بارت 21
نورا ناصر

زهراء .. كلمات عبير اثرت بيه كلش وانبني ضميري شون اطلع وامي متخربطة وياريت طلعة بيها خير شبعت رزالة من صفاء لو ادري هيج فلا اطلع ما ادري ليش هيج حظي ...

التفتت اله ابجي واشهك : .. صفاء امي نقلوهه للمستشفى وديني الها يلله ..

وكف السيارة والتفتتلي ؛- خير شبيهه عمتي خو ماكو شي ؟
_ مادري متدري وديني الهه هسه
ابجي واجاوبه منهارة وبالي كله يم امي ..

دار السيارة ورجع وتوجه بيه للمستشفى
طول الطريق اني ما سكتت بس ابجي وهو ولا كلمة بس ساكتة ويتحسر ، باوعتله قابض بيده ع الستيرن قوي بس تمنيت منه كلمة تطمني ع الاقل ...

وصلنا للمستشفى نزلت ركض وهو يمشي سريع قبلي احس رجليه بادت اريد الحكه مجاي اكدر
التفتت يباوعلي وكف ينتظرني ويأشرلي بيده يله يله ..

لحكته واني ادردم عليه بقلبي ميعرف يلزم ايدي ويمشي بيه ماشاف حالتي شلونها ولا عنده احساس ولايحس بيه ..

وصلنا للردهة الي بيها ماما ، شفت عبير كاعده بباب
الانعاش ولازمتها زوجة خالو بس شافتني ركضت
باوعت عبير مفرفحه من البجي رفعت راسها
عليه حضنتني وظلت تشهك تبجي وتحجي بصوت عالي

_لج زهراء ماما تعبانه حيل الدكتور يكول الفتحه
متوسعه ودتفرز مي ع كلياتها

لطمت ايدي على حلكي من اثر الصدمة
بقيت ثواني ابجي
وهيه تكولي امي حتموت امي
خليت ايدي على كتفها واباوع بعيونها وموعي تجري
_ لا عبوره عفية لتكولين هيج ، ماما قوية اني متأكدة تتحسن مستحيل تتركنا..
جنت احجي هيج بس دااصبر بعبير لان جانت منهارة التفتت ادور مريم ماكو مشفتها سألتها عن مريم

من بين دموعها جاوبتني ؛- يم بيت عمو بقت

تركتني عبير وراحت كعدت بباب الانعاش
اجتي الممرضة سحبتها من عكسها و كومتها ..
صاحت بيها ممنوع احد يكعد هنا بنتي كومي يله هنا مرضى يردون يرتاحون ..

ظلت عبير تبجي وتتوسل بيها حبابة خليني اشوف امي
_ ولج بنتي الدكتور ميقبل موزين عليها امج تعبانه تريد راحة اذا تريديها تصير زينة عوفيها ترتاح ..

عبير ما هدأت ولا استسلمت لمن اجه الطبيب
وخلاها تفوت جوة لان انكسر قلبه عليها بعد ماتوسلت بي هوايه ..

...

عبير : دخلت على ماما باوعت عليها نايمه ووجهه اصفر عبالك كركم كسرت قلبي ، رحت كعدت يمها باوعت جهاز مال قياس نبضات القلب فوك راسها وايديها بيها كانولا ومخلين بأصبعها توصيلة مال جهاز
حبيبتي جنت بس ادخل يمها للغرفه تحس عليه هالمرة أبد ماحست عبالك بغير عالم

مديت ايدي الترجف ولزمت ايدها وخليتها على قلبي وصرت اتوسل بيها حتى تكعد ..
_ماما هي صح ساعتين بس وحقج عندي اشتاقيتلج حبيبتي لاول مرة اخاف من شي بالعباس من تصوبت مخفت بكد هسه أمي اني خايفه من انو يجي يوم مااصبح بهالوجه الحلو بعد روحي كومي أن شاءالله يومي قبل يومج

يوم انتي مترضين تشوفينا نخاف ولا نبجي شلون
مدتحسين بدموعي من دتوكع ع ايدج حبيبة
فدوة اروح لهذا الطول بس سمعيني صوتج او
انطيني اشارة توحي انو انتي دتسمعيني جنت
احجي بهمس حتى ليسمعني الدكتور ويطردني

بقيت كاعده يمها ، ظليت اقرأ قرأن
والدنيا المغرب سمعته ديمجد طلعت وكفت
بالبلكونه

ناجيت ربي (ربي انت اعلم بالحال واني اعرف الموت حق بس مو وقتها اختي ع ابواب زواج دخيلك بحق نبيك المصطفى كوم أمي بالسلامه
بعدني ببداية طريقي واحتاجها اللهي بحق مصيبة
العقيله زينب لتحرمني من الجنه واجعل مرضها
يندار بيه وانطيها الصحه والعافيه يارب لتخيب
ايد انمدت تطلب رحمتك )

اجه الدكتور كال يلله بنتي اطلعي ميصير تبقين اكثر .. باوعت عليها وطلعت برا ..
من طلعت اجت عليه زهراء باوعتلها وجهه صاير
دم من العصبية مخنزرة ووجهه معفوس ، اول مرة تعصب هيج سألتها شبيج؟

_عبير هاي عمه وزوجة خالو وخالتي هم اجت يريدوني ارجع للبيت والله شنو بعدج عروس وميصير
واني مااريد ارجع اريد ابقى وي امي ..

_لعد صفاء وين؟
_ماادري هسه اني وين احجي وانتي وين شبييييج عبيررررر اول تالي هيج تنهارين لج اني
اكبر منج دائما اخذ قوتي من ماما ومنج

_عفيه كلتي من ماما ومني وهسه ماما دتصارع
الموت واشرتلها ع الانعاش واني كل حيلي مهدود
قلبي ديوجعني وانتي صح كلامهم ارجعي للبيت
شعندج هنا قابل شحتسوين لامي وشي ثاني
انتي صح بعدج عروس وهنا كل شويه واحد ميت
متخافين ع نفسج وهو عاد انتي شلون حظج
ملزك تلزك

زهراء: باوعت ع عبير بالكوة تحجي تركتها ومنا
بابا ضغطه مرتفع مااكدر احجي وياه ..
بقيت رايحة جايه بالردهة اعصر بيديه واكل باصابعي من القهر على ماما ..

اجه صفاء يمي يلله امشي زهراء اوديج للبيت
باوعتله عاكدة حواجبي ؛- يا بيت هذا صفاء متشوف امي شلونه وضعها خليني هنا ماروح .
لنبرة حدية جاوبني ؛- زهراء سواء بقيتي او رحتي مراح يتغير شي الدكاترة هنا ديشوفون شغلهم ميصير تبقين يله امشي كدامي ..
_ صفاء ماروح كتلك
صك اسنانه ولزمني من عكسي سحبني قويه انجريت وراه كال امشي ويايه للبيت كتلج وبلا حجي زايد ...

بعد ماكدرت احجي ورحت وياه مرغمة ، قريب نوصل للسيارة وهو بعده لازم ايدي ، متحملت كتله صفاء اترك ايدي وهو ولا جنه يسمعني لمن ما عطت صفاء اترك ايدي ..

ماتركني وصلنه للسيارة فتح الباب ودخلني بيها
عنوة ، فتت بالسيارة ابجي بصوت مسموع ، هو شغل السيارة بس ماحركهه بقى يباوع عليه ...

ورة دقايق كال كافي زهراء كافي بجي ترة اني هم مقهور على عمتي ويمكن اكثر منج ..

عطت واني منكة وابجي ؛- انت ليش هيج تعاملني لييش شنو هالقسوة العندك ليش تعاملني هيج ؟ متشووف امي حالتها شلونها وانت بكل وحشية هيج تشمرني ؟

جر نفس بقوة وحسيت ايده على راسي نفضت نفسي وبعدت ايده مني ورفعت ايدي اللوح اله بالهوا بتهديد
لاتلزمني والله انزل هسه واشرد وماخليك تلحكني ابد ..

زفر بعصبية وحرك السيارة بسرعة وسمعت صوت قفل الباب الي يمي ينغلق ، بقينا ساكتين طول الطريق واني من بين لحظة للثانية تطلع من حنجرتي شهكة غصب عني ..

احسه كل شوي يباوعلي بأسف بس ميكدر يسوي شي ، احساس ثاني يعتريني بانو كوة متحملني ، كرهت حالي احس راح يدمرني بقايا هالحب...

وكف السيارة وخرت ايديه من على وجهي شفته وكفها يم مطعم ..
كال ممشتهية شي اجيبلج تاكلين ؟

باوعتله باستغراب ؛- هو منو اله نفس ياكل انت صدك تحجي ؟؟؟ اذا انت الك نفس تاكل انزل اشتري لنفسك اني ما اشتهي ....

صار شرار الغضب يتطاير من عيونه
_ اسلوبج هذا راح يعم عليج زهراء اذا ماعدلتي تصرفاتج تندمين ..

كال هيج وحرك السيارة وساقها بسرعة وقابض ايديه ع الستيرن بقوة تعكس غضبه وعصبيته ..
تندمت بداخلي شون راح نستمر اذا هيج واحد ميتحمل كلمة من الثاني ، سألني بود واحترام لو مغيرة جوابي ع الاقل بس ميفيد الندم اعترف تصرفت بتسرع وبلا وعي ..

ودانه لبيتهم نزلنه جانت عمتي راجعه قبلنا ويه حيدر وعمو دخلت للاستقبال ، اجتي مريم حضنتني تبجي وتسأل عن ماما ، حضنتها وزدت بالبجي ..

اجت عمة كالت تردون عشى ، هزيت راسي ؛- لا عمه نروح لبيتنا ...
صفاء ؛- وين تروحون وحدكم هناك ابقو هنانه

_ لا نروح هناك احسن اني مكايلة لبابا راح نبقى يمكم
_ اكو اختراع اسمه تليفون هسه كايم اخابرله اني

هو كام واني هم كمت كتله بس اني اريد اغير ملابسي وارتاح ..
_ مرادلها روحة للقاضي نروح لبيتكم جيبي الي تحتاجي ونرجع
مجاوبته يحجي وينتر عفته ووكفت مكتفة ايديه باحتجاج واباوع عليه بقبح ومكتفة ايديه ..

راح خابر على بابا ورجع كال يله امشي لبيتكم
مشى قبلي واني تبعته بصمت
فتح الباب ودخل ودخلت وراه ، جان البيت موحش وكئيب ، غصيت بالعبرة واختنكت ..

توجهت لغرفتي بدلت ملابسي وكعدت ابجي بصمت وايدي على حلكي ما اعرف عليمن ابجي على امي على معاملة صفاء اليه على تسرعي وتصرفاتي بس احس نفسي اتصرف بدون وعي مرات احس نفسي عالة عليه واكره روحي ويصير عليه ضغط كبير مجاي اكدر اتحمل ، شكد فرحت من صرت اله هسه احس فرحتي ناقصة ...

اندكت باب غرفتي بقوة واجاني وراها صوته يزئر
_ زهراء راح تبقين الليل كله هنا ؟

مسحت دموعي وبلعت لعابي وجريت نفس يله جاوبته
لا ء اجيت دقيقة
اخذت الشغلات الي احتاجهم وطلعت بسرعة بدون ما اباوع عليه وسبقته بالمشي لباب البيت وطلعت قبله
هو قفل الباب واجه وراي ..

لثاني اليوم الصبح بالعشرة خابرتنا عبير كالت يلا صحت ماما
... بسرعة بدلت ورحت ادور على صفاء ماشفته كالت عمه طلع لدوامه بالمستشفى ومناك يفوت يشوف امج ..

_ لعد عمه منو يوديني امي صحت اريد اروح اشوفهه
_ هسه اللبس ونأجر تكسي ونروح وحتى مريم ناخذهه ويانه ..
_ خوش لعد انتظرج عمه عفية لتتأخرين
_ بين ما ابدل اكليلج لكمة عندج كيمر ومربى بالثلاجة والجاي حار
_ لا عمه والله ما اشتهي
_ براحتج عيوني ..

راحت تبدل واني رحت لمريم كعدتها وخليتها تبدل
واخذتنا عمه للمستشفى ..

عبير .. صحت ماما الصبح ، معرفنا شنسوي من الفرحة اهم شي رجعت بيها الروح ، بابا دخل يركض للانعاش حتى ماانتظر تطلع لغرفتها الخاصه وكدام الاطباء ظل يبوس بيها حتى هم ظلوا صافنين بالكوة طلعوه ..

الصبح على وكت اجت زهراء..
ركضت حضنت امي وتبجي ..
ماما مدت ايدها الها بتعب وظلت تصبر بيها
لاتعبين عيونج بنتي وراج عرس وضحكت

زهراء ؛- ماما تروحلج فدوة عيوني ماريد اتزوج ماما
امي باستغراب ؛- شلوون ؟
_ اقصد اريد يتأجل العرس مو هسه نتزوج حبابة كوليلهم

جاوبتني: لا ماما اني مضامنه عمري اريد الحك
افرح بيج بس اطلع بسلامه نبدي نجهز لعرسج
قبل الدوام ان شاءالله انتي بيت زوجج...

هزيت راسي وسكتت تمنيت من صدك يتأجل دا احس نفسي ممستعدة قررت افاتح صفاء بالموضوع ..

الظهر رجعنا للبيت واني متطمنة على صحة ماما ...
قبل العصر بشوية اجه صفاء اني كاعدة بالمطبخ
كال السلام عليكم ودخل ...
رديت بصوت اشبه بالهمس ..
كالتله امه جبتلي وياك علاج
_ علاج شنو انت ناسية مدري اني
_ ولك علاج افلونزا نشلة كتلتني هالنشلة هاي ...
_ اي صوجج شكد تسبحين طبعا تتمرضين

اني جنت قريبه عليها كامت خلت ايدها على كتفي ودغتني وكالت ؛- اي انت بعد جم يوم هم تسبح هواي وهم تتمرض ..

هيه كالت هيج هو باوع بعيوني ثواني ودار وجهه معبس ، واني نظراتي جانت كلها برود ..

طلع من المطبخ واني كمت اريد اتبعه
جرتني عمه من ملابسي كالت ولج مو هسه تسبحون من تتزوجون ..

جاوبتها بفهاوة ؛- ها عمه عندي موضوع ويا اريد احجيله ..
وعفتها وطلعت من الغرفة شفته ديصعد الدرج
صحت عليه صفاء انتظر شوية ..

نزل كم باية واجه يباوع بوجهي ؛- خير زهراء اكو شي ؟
_ اني اكول لو نأجل الزواج للسنة الجاية احسن ..
_ ليش ؟
_ لان ماما تعبانه واحنه هم اني وياك يعني شسمه ..
_ لا شسمه ولا شيسمونه العرس بعد شهر من هسه اوكي شيلي فكرة التأجيل من بالج احنا حددنا وخلص .

_ شنو حددناه يعني ميصير نلغي ؟
_ نلغي شنو شبيج زهراء ؟
_ اقصد نأجله احسن لبين منتعود على بعض وماما تتحسن صحتها
_ اصلا امج رافضة فكرة التأجيل وهسه اني تعبان واريد اريح شويه وهم اطلع العصر لامج للمستشفى خاف يحتاجون شي وهذا الموضوع محسوم مسبقا ..

تركني وصعد ، واني رحت يم عمه ....
ووره ايام ماما طلعت من المستشفى واني هم
رجعت للبيت ووراها بديت اجهز للعرس مثل ماطلبو مني ..

كرار: كنت انتظر على نار لحتى اعرف قرار اهل مها وبعد ٣ انتظار رجعولنا رفض ، ابوها معارض
بحجة الطائفه المختلفة ..

هنا انسدت ابواب الدنيا بوجهي
لان اعرف هيج رفض مستحيل الواحد يتراجع
عنه...

هسه شنو الفرق اشو اثنينا نعبد الله ونبينا محمد
وكتابنا القرآن ..

بس اني ابد مااستسلمت بس جنت خايف لا ابويه مايوكف بجانبي ، نزلت دا احجي ويا شفت امي
كايلتله ع الرفض وعنده علم بالموضوع ..

كعدت يمه مكتف ايديه .. باوعتله برجاء بس ماحجيت احس روحي طافرة.
كال اني اتخبل من هيج ناس شنو هالمبدأ العقيم الي يمشون عليه...

باوعتله وحجيت بغصة ؛- وهسه شنسوي يابه البنية هاي اني اريدها ..

_ واني مصر اخطبها الك مدام رفضو والسبب تافه ..
راح اخذ عمامك ونروح نخطبها الك ..

فرحت كلش من شفت ابويه مساندني وبقوة
وانطاني دافع مستحيل استسلم وابقى اخطبها واحاول مرة ومرتين الا ان اهلها يوافقون ..

اخذنا عمامي ورحنا لبيتهم استقبلنا ابوها
ظل يصيح بدون احترام ؛- احنا مو كنالكم ماعدنه بنات للزواج شكوو جايين بعد ماتكولي امشو طلعو برا
ظل يصيح ويتجاوز ..

ابويه شافه هيجي جن جنونه والشغلة صارت عناد عاط بيه : شوف اكولك لاتظل تتجاوز اني رجل بالدوله واخويه بالقانون والثاني بالسياسه شنو مو بعينك احنا لاتخلينه ناخذها لبنتك غصب
عنك هم وبيدك تزفها لابني ......

صاح ابوها ؛- انت شنو تهددني وببيتي ؟ شنو االبلد تايهة ؟

وكف ابويه وكل عمامي كاموا وياه
_ والله ولانتشرف نبقى ابيتك حتى اصول ماعندك جاييك حسب الاصول بس الظاهر انت مو مال اصول ، يلله اخوتي ..

رجعنا
للبيت الوالد جان معصب تلكتنا امي ؛' ها بشرو وجوهكم ماتبشر بخير شصار هم رفضو ؟ شيردون ذول ؟

_ اي هذا ابوها فد واحد همجي وحتى بالاصول مايعرف ...

_ والله ماادري شكول بس هو كرار بعده طالب
وهي طالبه شلون حيعيشون

جاوبتها اني ؛- يمه اشتغل حمال انتي بس ادعيلي اخذها شبيج انتي؟ قابل راح نموت من الجوع ؟ شو حالها حالنا

_والله يمه اني ادعي الله يسعدك وياها او وياه
غيرها المهم تنسعد
_ ماريد غيرها دخيلج ادعيلي تكون من نصيبي هيه وبس ..

ابويه:انتظر يومين وبعدها اشوف ..
_ الله كريم ..

ورة يومين مريت من يم بيت مها متوجه لبيت ولد
صديقي هناك واخوه مسوي عملية واني رحت اله زيارة ..

وصلت يم باب بيت اهل مها انتبهت الباب مقفول مو من عوايدهم يقفلو استغربت كلش ومرتاحيت للسالفة رحت لصديقي وبعدين سألته

_اكلك شو بيت ابو جهاد مقفول ليش؟
_ولك البارحه بالليل طلعوا بس هم حتى غراضهم
تركوها هنا ..

_زين متعرف السبب؟
_اي اعرف ابوهم يكول واحد من عمامك ع الاساس
مهددة وكال بعد منبقى هنا...

بس سمعت هيج انصدمت منو يهدده عمامي ماعدهم هيج سوالف ولا حتى ابويه رجعت للبيت جان ابويه
توه واصل والسايق ديفتحله الباب رحت عليه
سألته عن الموضوع ..

جاوبني: ماعندي علم بس بويه ذوله يتعبوك اذا
ابوهم يتبلى ع الناس شتتوقع منهم ذوله اتركهم

_هزيت راسي ودخلت للبيت جانت الساعه ب١٠
بالليل دك موبايلي رقم غريب جاوبت عليه

اجاني صوتها فت روحي فت يا الله شكد مشتاقلها
كالت : كرار ماعندي وقت احجي وياك..

كتلها مها

كرار اسمعني احنه بالغزالية و بابا طش خبر ان عمك
مهددنا بس ترى جذب محد هددنا هو شرد حتى
ميزوجني الك

_لا يااا كككك ... أأأ تمام انطيني العنوان ..
ردتلي العنوان سدته بسرعة بدون ما اودعها ..

طلعت من بيتنا ورحت ع بيت عمي تحسين
وصلت لبيتهم .. شفت ناس هواي يم ببابهم ومن ضمنهن سيارة شرطة رحت ركض عرفت سواهه الحقير وتبلى على عمي ..

صار بوجهي صفاء ....
_كرار الحك عمي تحسين اعتقلوا

.....

يتبع ..