[لامارا]

#شريعة_العشق

بارت ٢٤
نورا ناصر

قد گتبوا في شريعة أهل الهوى
إن مَنْ يفضح سر المعشوق دمه يُهدر
فأسرار المحبين گنوز مخفية
أقسم العشاق بالدم عليها أن لا تُنشر
گلما أغلقتُ فمي عن ذگر أسراره
لساني بنار عشقه وغرامه يتگلم ويهذر
أقولها للناس إني جُننتُ بعشقهِ
أذبحوني على محرابه فقد أعذر من أنذر ...

احس الدم تجمع براسي من الغضب خزرتهه خزرة تموت والشرر يتطاير من عيوني قربت وجهي وطليت بوجهه حجيت بحدة : - اشششششش صوتج لتعلي عليه الي بالج ابعديهم لتظل نظرتج محدودة للبشر زين واذا ع ارقامج كتبتهم الج بورقه عود من اجيبلج خط حفظيهم ع اساس أرقامج مال مجلس الكونغرس الامريكي .

ظل صدرها يعلو ويهبط وتنفسها سريع ملامحها كلها صدمة وخوف وهيه تباوعلي ، رادت تحجي اشرتلها بعلامة السكوت وخزرتها خزرة اقوة من القبلها ..

استسلمت وسكتت وتباوعلي بنظرات حقد و لو بيدها تشرب من دمي صايرة شرسه أبد ولا عبالك ذيج زهراء نفسها اذا احاجيها كلمه ترجعها عشرة عليه .. احسها تريد تنتقم مني بكل كلمة وكل تصرف .

درت وجهي اريد اعوفها واروح اجاني صوتها ترجف
ما اسمح الك تعاملني هيج ..

التفتت عليها شفتها بعدها واكفة ومدنكة راسها ، تعصر بأصابعها حييل ..

جريت نفس وخليت ايديه على راسي ، تقربت منها رجعت بخطواتها للورة رفعت راسها عبالك الدموع متفجرة بعيونها بس ممسموح الها تنزل ، نظراتها كلها كبرياء وتعالي ..

رفعت اصبع الشهادة باتجاهه بتهديد وحجيت بحديه: انتبهي على تصرفاتج حتى لتشوفين شي ميعجبج .

حجت والعبرة خانكة صوتها : منو منا ينتبه على تصرفاته ليش تخليني ما اكولك شي بعد ؟

قربت منها اكثر ابتعدت هيه اكثر لحد ما طخت ايدها بالقنفة لزمت بيها وكعدت مجبورة ، تقربت عليها نصيت وحجزتها بين ايديه اباوع عليها مخنزر عيوني
وحجيت : شحدج متحجين كولشي تكوليلي مفهووم ياويلج اذا ضميتي عني شي زهراء .

هزت راسها برفض وعيونها صارت ندية اكثر بسبب تجمع العبرات كالت وهيه تحاول تتظاهر بالقوة : وشنو تريد تسوي يعني ؟ بدل متعرف منو الي ديدز الرسايل كسرت السيم كارت هو هذا الي الله قدرك عليه ؟

_ زهراااء .. صحت بعصبية وبعدها ملامحي كلها غضب
باوعتلي بنظرة جانبية ومن خوفها دارت وجهه وتتظاهر بقوة مصطنعة .
كملت كلامي : كافي سدي الموضوع واذا تكرر هالشي اني راح اتصرف ماشي ؟

سكتت وماحجت خليت ايدي على حنجها ودرت وجهه عليه تباوعلي مبرطمة بس نظراتها قويه وكلها تحدي
رجعت شددت ع الكلمة : ماشي ؟

حركت راسها وبعدت لمستي من على وجهه واكتفت بس هزت راسها ، خلت ايديها على صدري ودفعتني لحتى اوخر عنها لان حجزتها بين ايديه ..

رفعت جسمي وهيه بسرعة كامت وتلاشت من كدامي عبالك عصفور فتحوله القفص وطار بسرعة ..
رحت كعدت ع التخم وظليت افرك بوجهي واني افكر بهذا الي دز الرسايل منو ..

زهراء: صعدت فوك واني افور من العصبية الدم الي يمشي بعروكي احسه يغلي ، فوكاهه هو ابو الراهي ويهدد انتبهي لتصرفاتج لتشوفين شي ميعجبج هه نسى الاهانه الي قدمها الي بليلة الغرس وعلى طبق من ذهب شيتوقع مني يعني شون يريد اعامله ؟

ظليت رايحه جايه بالغرفة اعيد خطواتي واتنفس بصعوبة داحس بمرارة وعذاب مدا اطيقه ابد مااعرف شنو اسوي حتى ازعجه واعصبه بس من يخزرني اشوف موتي بخزراته من صدك اخاف واتمنى اتبخر واختفي من كدامه .

بقيت فوك وهو بقى جوه بعد ابد ماصعد يمي
لحد العصر اجوي خطار رتبت نفسي ونزلت يمهم
اندكت الباب وطلع هو ودخلوا اصدقائه فوتهم بالاستقبال واني رحت للمطبخ داحضر ضيافة للخطار

فات للمطبخ بدون ميحجي ويايه ، طلع صينيه
وظل يحضر ضيافه لاصدقائه ، باوعتله وكتمت حسرتي .. تجاهلته ، كملت تحضير الضيافة
وطلعت من المطبخ عفته هم يكمل وحده واني رحت للخطار عماتي وزوجات عمامي ووياهم عمه ام صفاء..

رحت كعدت بصف عمه همست بأذنها : شوكت ترجعون للبيت عمه ؟
كالت قبل السبعة بيوم نجي احنه هيج متفقين...
_ لا عمه ارجعي والله ضوجه البيت بدونج ..
_ لج هياتني اني ابيت حسين نفس الفرع ومبقى شي ليوم السبعة اخذو راحتكم يوم وبعدين ليش تضوجين وصفاء يمج ؟

درت وجهي وتحسرت هو السبب الضوجة الي اني بيها غير هو .. حجيت بقلبي ..
كالت ها يوم شكو اشو تتحسرين ..
خليت ايدي على كتفهه لا عمه بس والله البيت محلو بدونج وبدون عمو ..
ابتسمت يبعد عمري انتِ ولزمت ايدي ..

للمغرب راحوا ، وحتى اصدقاء صفات همات راحوا
طبيت للاستقبال شفت صفاء يدخن ، دنكت اخذت مواعين الضيافة رفعت نفسي شفته ديباوعلي ، تجاهلت نظراته ورحت للمطبخ غسلتهن ورجعتهن لمكانهم توضيت و صعدت فوك صليت ..

خلصت صلاة وراها انفتحت باب الغرفة وفات صفاء باوعلي كال بنبرة هادئة وببرود : جبت العشه جوه خليته بالمطبخ .

كمت من مكاني دا اطلع من الغرفة ، هو سحبني من ايدي ورجعني خلاني مقابيله رمشت عدة رمشات وفتحت عيوني متفاجأة ..

صك على اسنانه وبعده لازمني من عكسي
بنبرة حديه كال : من احجي وياج احجي لتبقين ساكتة تمام ؟

باوعت على ايده الي لازمني بيها ورجعت باوعت عليه
هو رخى قبضته على ايدي .. جريت نفس وجاوبته ..
_ شنو تريد احجي يعني صفاء كلت ع العشه هياتني رايحه احضره ضروري احجي يعني . ؟

_ اي احجي اي شي لتبقين هيج ساكتة خرسة انتِ شنو ؟

بلعت ريك وجاوبته بنبرة تنذر ببكاء قريب
_ صار صفاء صار ...
تنفست بنفاذ صبر وبصوت مسموع حسيت ببطني تمغصني .. والتفتت ع الباب اريد اطلع ركض ودموعي ترست عيوني بعد ما اتحمل راح ابجي . وفعلا بجيت ..

هو سمع شهكاتي الي احاول اكتمها بعبث
لزمني ومخلاني اطلع ، ظليت احاول اتملص منه
بس هو ثبتني بقوة من ايديه طل بوجهي .

وظل يحجي بتوسل : زهراء شبيج تبجين شكتلج هسه اني راح تظلين هيج ؟ كلما احجي وياج كلمة تبجين لاتصيرين ام دميعة عاد ..

ظليت اشهك مثل الطفل اخذني وخلاني على صدره
وثبتني عليه بقوة ، وباءت كل محاولات التملص منه بالفشل ..

سكتت وهدأت وهو يمسح على شعري وانفاسه تضرب على خصلاته .. وهمس بأذني
اعتذر اذا تعاملت وياج بحديه شويه بس انت هم فكيها ميصير هيج تغلسين واني دا احجي وياج

بقيت مسبلة ايديه مارفعتهن ابد ، ودموعي بللت قميصه .. تخللت لانفاسي ريحته الي كانت مزيج من عطره الي يستخدمه والي اسمه ماونتن ووتر ، وريحته الخاصه وقليل من دخان الجكاير ..

هالحضن جان جرعة من كل شي حلو اتمناه ، اجتاحتني رغبه بأن ارفع ايديه واطوق رقبته بيد والايد الثانيه اتحسس بيها خده لحيته وامررها باتجاه شعره واتلمس اكتافه العريضة وصدره الي محتويني ..

لكن كبريائي كان اقوه بهواي من حبي ..

رفعت ايدي بالفعل مو لحتى احقق رغبتي بحضنه
لا وانما لحتى ابعده عني واتلاشى من كدامه خايفة من نفسي لا اضعف واني ماريد .

خليت ايدي على صدره ، دفعته مني مرغمة
هو استجاب لرغبتي ، ظليت امسح دموعي بظاهر كفي ..

وهو يحجي ويايه : زهراء اذا تعبانه ارتاحي اني اروح احضر العشه خليج انتِ ..

جاوبته بنبرة سريعة : لا لا اني متعبانه ولا شي خليك هنانه انت اني حنزل هسه احضره واصيح عليك .

همس باستسلام : تمام .. واني طلعت من الغرفة وطكيتها ركضة ليجوة ، سويت الدرج كم بايه بس
توجهت للمغسلة وفتحت المي غسلت وجهي اكثر من مره احس حرارة تطلع من خدودي من كد الخجل والمشاعر الي زاحمتني ، باوعت لانعكاس وجهي بالمراية ، ابتمست لان كدرت اكبح جماح رغبة اعترتني وامرتني استسلم لعناقه الحمدلله الي ماضعفت .

خليت مي على وجهي ووره رقبتي وتنفست بعمق وتوجهت للمطبخ وبديت احضر العشه ، وره دقايق دخل عليه صفاء وبيده التليفون ..

كال هاج عمي يريد يحجي وياج ..
كتله بابا ؟
اومئلي براسه بمعنى نعم ..
نشفت ايديه واخذت الفون منه جاوبت على المكالمة ..
هلو بابا حبيبي شلونك ؟
_ هلا زهورة بنتي شلونج ؟
_ الحمدلله بالنا يمج ليش تليفونج مغلق حبيبتي ؟
باوعت لصفاء،وجاوبته : السيم مالتي حيبدله صفاء الي ..
_ ليش خو ما اكو شي ؟
_ لا هيج بابا لا تهتم هو عجبه يغيره ..
_ تمام بنتي ديري بالج على نفسج وعلى زوجج ..
_ ان شاءالله بابا ميحتاج توصي ..

سديته منه ووديت التليفون لصفاء الي طلع قبل
لا انهي المكالمة .. جان كاعد بالهول رفع راسه
كال ها شنو راد عمي ؟
_ ديسأل عني وسأل على تليفوني ليش مغلق ..
_ اي شنو جاوبتي ؟
_ ماحجيت اله شي بس كتله صفاء يريد يغيره الي ..
_ اي تمام ، صدك جبتلج سيم كارد جديدة وخليتها بتليفونج فوك بالغرفة ..
_ اوكي شكرا ..
رجعت للمطبخ حضرت العشه ع الميز وصحت لصفاء
اجه وكعد ، مرت اول دقايق بدون منحجي واحس كلساع يباوعلي بس اني مدنكة ماباوعت عليه ابد ..

كال اجت عمتي اليوم يقصد امي ..
جاوبته بدون ما اباوع اله وملتهيه اكل ..
لا ما اجتي ..
_ ليش شعجب ؟
هزيت اكتافي يعني مادري باوعتله يخوزر وكانه يكولي شنو كتلج قبل شويه ؟
بلعت ريك كتله ماعرف يمكن مشغولة مااجتي ..
هو ظل يضحك واني زميت شفايفي ورجعت دنكت..

خلصنا عشى راح هو واني كمت لميت السفرة ..
غسلت مواعين ورتبت المطبخ طلعت شفته بالهول كاعد ديتفرج على التلفزيون باوعلي احتاريت بين اصعد للغرفة وبين اكعد يمه هو عبالك قرا افكاري
كال تعالي كعدي هنا حلو هذا الفلم دنشوفه .

هزيت راسي ورحت كعدت اباوع ، انطاني التليفون
مالتي كال هاج جبته من فوك خابري على اهلج خلي يسجلوه يمهم ..

خابرتهم وكعدت احجي ويا ماما وبابا واخواتي ..
بعدها نعست صعدت فوك للغرفة فرشتلي ع الكاع وحاولت انام سمعت صوته اجه وتمدد ع السرير بدون ماحتى يكولي تعالي يمي غطيت وجهي وحبست دموعي ..

وهيج مر الوقت علاقتنا متذبذبة بين مد وجزر ..
واحس نفسي تعبت .. وملل مو طبيعي .. ساعة نتعارك ساعة متصافين وساعة كلمن بمكان ..

وصار موعد السبعه وعاد شلون عرس هو
حتى يسوولي سبعه رفضت مااريد لا صالون ولا
بدله بس عمتي مقبلت وكعدت ساعة تقنع بيه .. اقتنعت مرغمة ، وأخذوني سحل اجرت بدلات وفساتين أشتريتهم...

اباوع الكل جان فرحان ماعدا أني متندمه بكد شعر رأسي صدوك لو كالوا الحب مو كولشي بالحياة شحصلت عروس وعروس وهو بس الصيت
خلصناها مشاحنات أني وصفاء ومن
صدوك توصل بيه مرات اصير مطايقه اباوع بوجهه
واحس انو سلب أجمل أيام حياتي
حرمني الفرحه الي تتمناها كل بنية ..

وبنهاية الليل من أنام اكتم شهكاتي حتى ليسمعني
لان أني الجبتها لنفسي شكد حجوا أمي واختي
مسمعتلهم بس هاي قسمتي بعد ، صح حبيته بس
بالنهاية كولشي قسمة ونصيب

سوينا حفلة السبعة بالبيت ، الولد بالحديقة
حديقتنا جانت كولش جبيرة بالسبعة طلعت احلى
من العرس لان التسريحه سويتها ضخمه ومكياج
عكس العرس خفيف شي معقول الكل جان يكول
لعمه منين جبتيها وشنو هالجمال الله يسعدها
وعمه تمشي وتقرأ المعوذات ..

واني كاعدة اجت نزعت
كلادتها بعين خرزة زرگه ولبستها أليه ..

جنت مخنوكه من كل هالاجواء بس أريدها تخلص
راسي صدع من صوت الاغاني ..

حسيت اختنكت كمت وصعدت لغرفتي داابدل
دخلت تفاجئت بصفاء موجود بالغرفة
تفشلت لان لابسه فستان فوك الركبة
وظهري نصه طالع وصدري كذلك ، احتاريت
بشنو اغطي جسمي وهو نظراته عليه من فوك ليجوا ..

فتحت عيوني على وسعها واحس حرارة بجسمي
درت داافتح الباب سبقني وحط أيده ع يدة الباب
وعصر ايدي الي ع اليده سحبتها بسرعة ..
وظليت اباوعله بخوف ..

هو كال : وين وين وين ولج هاي شلابسه يعني هاي الجوا كلهن شافن جسمج وانت هيج ؟

عززززا بعيني اباوعله شرايين كصته نطت من
العصبية وعيونه صارن حمر بلعت ريك وجاوبته ..
_لا لا محد شاف ..

عله نبرة صوته وبعده معصب : شلووووووون محد شاف انتي مو جنتي جوا وكاعده بنصهن هاي شلابسه ولج لو ملابسه هم أحسن اصلا ملابسج والماكو سوا أمي شلون اقتنعت تطلعج هيج اليوم احرك الجو ع رأسكم ..

ظليت اباوعله بتوسل ، فتح الباب بعصبية ..
اجه يطلع لزمته من أيده : هاي شبيك والنبي محد
شافني بس باوعلي حباب لزمته من خده بس اريده يهدأ عيب من الناس شيكولون علينا وادري اذا عصب ينسى نفسه ..

_شلون محد شافج ليش وين جنتي؟
_ها ؟ هنا جنت بالغرفة
_شنو هنا اني جنت بالغرفه مشفتج تضحكين عليه انتي شايفتني زعطوط كدامج ؟ الجذب اكرهه لاتجذبين زهراء

_لا والله جنت بالمكتب مالتك أني استحيت أنزل
بي وختلت هنا وهسه اجيت داابدل ولكيتك هنا

بنبرة امر وعصبيه كال : أمشي بدلي بسرعه وكدامي يلله

همست ببلاهة : كدامك ؟

جر نفس بنفاذ صبر وكال بأصرار وحديه
بدلي ملابسج زهراء ..

هزيت راسي بأي ..

هو راح كعد ع الجربايه ظل يهز برجله من العصبيه
لو يلزم رأسه وبس يستغفر ..

جريت من الكنتور اول فستان اجه بيدي
ودخلت للحمام بسرعة
لبست بدلة ماروني طوخ طويله وبلا شيالات ، مااعون اطلع من الغرفة تعاجزت ابدلها انوب خفت لا يحاسبني على هاي همين خليت شعري منا ومنا حتى ليبين وفلتت..

طلعت من الحمام باوعتله جان مدنك وحتى من حس عليه طلعت ابد مرفع رأسه ولا باوعلي..

ظل سحاب البدلة ممسدود طلعت من الغرفة احاول الوحه ماكدرت اوصله ، داانزل ع الدرج شفت بنية طلبت منها تسدها اليه ..

خلصت السبعة بقيت جوه يمهم حتى اخاف اصعد فوك غير خزراته تموت الواحد بالمكان ، بقيت لمن ما عمه كالتلي صعدي بدلي اكيد تعبتي هسه ..

بالفعل تعبت وتكسرت من الكعدة ، كمت وصعدت فوك واني اغطي صدري بشعري .. جان هو موجود رفع راسه باوعلي ثواني ونزل راسه .. طلعتلي ملابس وفتت للحمام بدلت ..

__________________

كرار: اجه موعد المشية حسيت أني أسعد أنسان
بهاي اللحظه شي ثمين ومقدس بالنسبة اليه وراح امتلكه ، بنية روحي راح تصير مريتي شيريد من الله بعد

رحنا أني وعمامي للمشية لكينا هناك عمامها وخوالها بس اخوها الدثو جان ماكو ، تنفست بارتياح لان مموجود ..

بدأ عمي أبو حسين يحجي بكونه جبير عمامي حجه أيات قرأنية عن الزواج وبعدين ابوها
انطه الموافقه ، قرينا الفاتحه ..

صدقاً بالله من
قريت الفاتحه ع كد حبي الها دمعت عيوني
حظي الاغبر كاعد يمي صفاء ديحجي ويايه وانتبه على عيوني ..

ضحك وكال : ولج شبيج تبجين يحظي خوما اتأذيتي ضمي دموعج ليوم الدخله هسه نظري ضميهم للعملي

وهو يحجي خربان ضحك .. خزرته : دولي طرن
شكو متعب نفسي وياك هو انت وين عشت هالفرحه ابو ابوك سمطوا حتى ارهابي سووك
انجب وسد حلكك

جاوبني يضحك: لا ولك عشتها مو جنا خاطبين
شبيك يالاثول نسيت ؟

انتبهت ع ابويه يندسني يريدني اكوم اتشكر من ابوها وعمامها والله تلعب نفسي ابوس ابوها
بس شسوي مجبور وجهه جنه كرشه مال طلي

كمت مجبور دااسلم عليهم واحد واحد ، بهاللحظة واسمع صوت طلق بنص الطرمه مالتهم ، فزعنه كلنه وصارت خبصة وراها اجانه صوت اخوها يصيح لك بأعلى صوت عنده ..

_ لك كراااااار اذا خليتك تطلع منا عايش أمي تصير مرتي ....

يتبع ..