[لامارا]

شريعة العشق
بارت ٢٥
نورا ناصر ..

في شريعةِ العشق
أغفو بين خطوطك المؤصدة
بأزرار الصبر
اقطعُ أميالَ صمتي ...
عروةً
عروة
كأنّها قطرةُ عشقٍ بآخرِ الشتاء
تغوصُ في لمعانِ عينيك
كقطعةِ قلبٍ مثقوبةٍ
تمطرُ غضباً
تعتقلُ أغلالَ خطيئي
ترتشف أطلال المسافات
ترهقني..
ودمعي لشريعة عينيك

صارت هوسه وضجه ، طلعوا الولد للطرمه
كمت من مكاني توجهت للباب اجيت دا أطلع
حسيت احد لزمني باوعت شفتها أبن عمها ..

كال : انت وين طالع خويه أستر علينا وخلي هاليوم يعدي ع خير ..

جاوبته : هو شكو خلگ واحد العفو منك دايح جاي يفرض مراجله عليه شو وخر شويه من رخصتك
خلي اطلعله صاير رجال برأسي ..

تركته وطلعت ، جان الكل بالطرمة توجهت اله مو خايف منه ابد بس وصلت يمه رفع سلاحه عليه

ولزموا ابوه وعمامه ظل يصيح اختي متتزوج
هذا ماانطيها لشيعي لو امووووت امي تصير مرتي
اذا انطيتوا مها لهذا الكلب ...

جاوبته: أول شي عيب عليك شيعه او سنه أحنه
نفس الدين واثنينا نعبد الله تمسلت لاتمسلت واحترم هالوجوه الخيره عيب لتفشل أبوك وانت
أبنه الجبير ..

وثاني شي هاي مال أمي تصير مرتي
حتى أبن الشارع ميحجيها انت شلون نطقتها لك
متخجل من نفسك ؟؟

بعدني أحجي جان تطلع مرة هيبة لافه
نفسها بعبايه عرفتها هاي امها لمها ..

صاحت ابوهم ترك ابنه وراحلها شويه ورجع الاب
جر أبنه من وصل يمي عيونه تبث شرار وحقد ..

بس وصل يمها دنكت و نزعت شاحطتها وجرته
من ملابسه وظلت تسب بي ..

_ولك هاي تالي عمري تفشلني كدام نسابتنا انعل
تربيتك السكط انت مصادق منو حتى هيج صرت
ساقط متستحي شنو أمي تصير مرتي عار ما استحيت من حجيتها الله لايبارك بيك كون مثل
ما فشلتنا ..

دخل يصيح بالبيت مو بكيفكم تنطونها اله بدون ما اوافق اني ، على حجيه امه تبعته تصيح عليه ..
بلحظتها هواي خفت على مها خاف هذا الناقص يأذيها تمنيت اقتحم بيتهم بهاي اللحظة واروح الها واحميها منه ..

ابويه صاحني كال يلله بويه امشي نروح .. ابوها وعمامها اعتذروا من عدنا واحنه دنطلع ..

طلعنا واني ضجت حيل ، ماحبيت الصار ويا صفاء يتكرر هسه ..

شنو احنه كل منخطب يتعرضون عمامنا
للاهانه بسببنا شطلعت هاي ، ظليت استغفر واتأفأف ..

توجهت لعمامي واعتذرت منهم .. واحد واحد ..
بس اكو شي بداخلي يلوب هذا الكلب كسر فرحتي الله يطيح حظه ..

دخلت للبيت ضايج روحي بخشمي تلكتني امي
ها يوم بشر ؟ شبيك خلقتك مكلوبه صار شي لك ابوك اخوتك وين متحجي شبيك كرار ؟

غمضت عيوني تنهدت بقهر وفتحتهن ، لزمت اديها وجاوبتها : ليظل بالج ماصار شي والكل بخير ، ابويه واخواني هياتهم ورايه جايين بس اني تعبان شويه خلي ابويه هو يحجيلج شنو صار اني صاعد لغرفتي وحتى ع العشه لحد يصيح عليه ..

عفتها داا اروح ظلت تصيح ورايه كرار كرار ليش تخوفني ولك شبيك ؟

نزعت السترة خليتها على عكسي وباوعت عليها يووم دخيلج موو هسه فدوة لعينج اريد ابقى وحدي
ظلت تصفك بديها بأسف واني صعدت لغرفتي
شمرت السترة ع الكاع بكل قوتي ..

طلعت تليفوني بعد ما بيها مجال لازم اتصل بيها
خاف هذا عديم الشرف والرجولة ضربهه او اذاهه ..
اتصلت بيها ثواني جاوبتني ، اجاني صوتها تحجي بقلق وخايفة : الو كرار شونك ؟

هلا حبيبتي خابرت دا اسألج عنج خو ما اذاج اخوج الحيوان لا والله يروح فدوة للحيوان ..

_ لا حبيبي اطمأن ماسوا شي ..

_ كوليلي لتخافين هسه انت باعتبار ملكي لان قرينا الفاتحة والله اذا داسلج على طرف او لمس شعره منج اجي ارغل ابطنه وادوس على راسه .

_ يمه كرار خوفتني منك ، لا حبيبي اهدأ ماسوالي شي والنبي لاتبقى معصب هيج اوعدني راح تهدأ ...

جريت نفس وخليت ايدي على كصتي : تمام بس والله مايخوف جلبي لاعباله بهاي سوايته مال اليوم يكدر يخوفني او يخليني ابتعد عنج .

_ اعرفك حبيبي والله اعرف واحنه لبعض ان شاءالله ..

_ يلله هسه راح اسده خاف يأذيج او يضربج بس كوليلي او اذا متكدرين كلفي اختج او اي احد حتى اعرف اتصرف .

كالت ان شاءالله ، وختمت المكالمة ، حسيت براحة من سمعت صوت الحب وتنفست براحة .. كعدت ع السرير
وظليت بس افكر اباوع على ارجاء الغرفة واتخيل مها موجودة يمي شوكت اجيبها اخلص واخلصها من اخوها .

بقيت بالغرفة وبعدها نزلت جوا بالحديقه ، اريد اشم هوا وفكري مشغول ، جان هدوء ، واني على هذا الحال طلع ابويه للحديقة ..

باوعتله وكمت على حيلي ..
كال : اكولك وليدي هذا ابو البنية اتصل يكول بعد يومين تعالوا عقدوا لتطولوها ، اني كتله الله كريم شتكول انت؟

جاوبته : بكيفك يابه الي تشوفه ..

_شنو بكيفك قابل اني الي راح اتزوج لو انتَ؟
وبعدين شبيك ضايج عادي هاي الامور تصير لعد خلي
احجيلك الي صار بينا أني وامك جنه يم القاضي دنعقد وجدك اجه يخرب الاول والتالي..

يا ابني انت وصفاء طالعين علينا تتعذبون
يلا تحصلون التردوه ابويه الحياة مو كولشي نريده
ناخذه منها بسهوله

ضحكت: اي حجي كمل
_شكمل ولك تعبان اروح انام وانت اقفل البوب
وادخل لتظل برا حارة هنا .. جاوبته صار .

تركني وراح رن موبايلي طلعته شفته صفاء يتصل ..
جاوبته وظلينه يحجي عرف بيه ضايج وروحي بخشمي ..
كال شنو رأيك تجي ويانه لدبي ؟

صيحت عليه لك يا دبي أني بعد يومين العقد شدتحجي انتَ؟

_اها خوش حجي زين سويت من استعجلت حتى اكدر احضر لان الاسبوع الجاي مسافرين لدبي اني وزهراء ، تمام كرور شايف كل الخير خويه الله يسعدك...

_ تسلم دكتور ضايج جان غلطت عليك يلله غير مرة ايام الله هواي ..
ضحك سلم وسده ..

زهراء: مرت ايام جان ملل بكل شي و انعدام الرغبة تجاه كل شي .

بالاضافة الى هذا نظرات صفاء محاوطتني بكل خطوة
اخطيها بكل حركة وتصرف وكلمة اكولها ، هالشي ضوجني احس مقيدني .

اما بالليل احس نفسي وحيدة كلش ، ومااحس نفسي متزوجة ابد ، جنت يم اهلي خواتي نكضيها سوالف عركات نتفرج افلام سوى جان للحياة طعم هسه
كوة اتجاوز الوقت ..

خلصنا غداء كمت صبيت جاي ووديته لعمو وصفاء وعمه بالصالة ، انتبهت لعمو ديحجي بالتليفون
والي فهمت من خلال الحديث ديحجي وي بابا
من خلص كال معزومين يوم الجمعة ع الغداء ابيت تحسين ..

حقيقة فرحت صح اني واهلي حايط ع حايط
بس مرحت لبيتنا من يوم الزواج ..

اجه يوم الجمعة و رحنا فتحلنا الباب بابا بس شافني اخذني بأحضانه وباسني براسي همسلي: شلونها بنيتي ان شاءالله مرتاحه ؟

جاوبته بحنيه : الحمدلله بخير بابا مشتاقتلكم
_يابعد ابوج احنه هنا امج هم ناصبتها مناحه

_صدوك وينها؟
_روحيلها بابا بالمطبخ

رحت اركض على ماما وبابا دخل بيت عمو للاستقبال شفتها حضنتها ظلت تبجي خطيه كوة
سكتتها انتبهت ماما وحدها بالمطبخ اخواتي ماكو ..
باوعت الها و سألتها: لعد وين عبير ومريم شعجب بس أنتي بالمطبخ؟

_هسه جانوا هنا يمي بس عبير راحت اتغير ملابسها هسه تنزل اصعديلها يوم اذا تريدين

_لا خليني يمج بشنو اساعدج ؟

_ماعندي شي مكمله كولشي خلي اروح اسلم على
بيت عمج ..
طلعت وياها دخلنا للاستقبال سلمت ماما عليهم
حسيت على صفاء ياشرلي يريد اروح اكعد يمه

تنهدت و رحت كعدت ، ظلوا يحجون عن خطوبة كرار والي صار بيها .. دقايق واجت عبير دخلت دتسلم
باوعتلها متغيرة كلش استغربت حالتها ، ظليت اركز بيها ، جوا عينها اسود ووجها شاحب ..

كلش قلقت عليها ..
باوعت لامي اشرتلها براسي بمعنى شبيها عبير؟

تحسرت أمي وبين على ملامحها الالم ، دارت وجهه على عبير شافتها تريد تكعد يمنه كامت ماما خزرتها
و عبير بس انتبهت على ماما ، بسرعه طلعت من الاستقبال ، كمت اني لحكتها ..

شفتها دتمشي بتعب بالممر دتريد تصعد فوك
صحت عليها عبير عبير ..
سمعتني التفتت عليه ظلت تباوعلي
ابتسمت ولمع التعب بعيونها كالت
: - ها لج شلونج ويا الزواج ان شاءالله مرتاحه؟
جاوبتها بسرعة : اتركج مني انتي شبيج هاي شبي وجهج ..

تحسرت ودمعت عيونها ومحجت ظلت ساكته
حاولت وياها اريد اعرف شبيها ..

كالت تعبانه شويه ، زهراء لتلحين عليه دخيلج
واحنه دنحجي صاحتها أمي حتى
تجهز ألاكل بقيت محتارة شكو انوب انتبهت على
ماما ابد موصلت للمطبخ ..

ولا حتى حجت ويا عبير ، حضرت عبير الميز الجبير بمساعدة مريم وصاحتهم ع الاكل دااكل وربطت الامور معقولة عبير ع كرار هيج صاير بيها؟

هي قبل اسبوع مبيها شي شمعنى من خطب هيج
تبهذلت أحوالها ؟ ليش لا وهي جانت دأئما تتشاقى
وياه وبيناتهم ميانه كلش قويه ، عضيت شفتي
الله يستر يارب ميكون الي ابالي صح مااريد اختي تعيش العشته أني ..

ظليت صافنة وبيدي الخاشوكة اعصر بيها ، حيل انقهرت على عبير ، وكلساع اباوعلها بقهر وانصي .

حسيت بصفاء يندسني باوعت بوجهه كتله ها ؟
اشرلي ع الاكل كال اشو مجاي تاكلين ؟
هزيت راسي ، وجاوبته : لا ليش هسه حأكل
ظل يباوعلي مضيق عيونه حجيت بقلبي دروح مو وقتك أبد ..

رجع همس شعندج بشنو تفكرين ؟
جاوبته : ماكو والله .. وظليت اكل ولسه الافكار تقتحمني من كل جانب ، وارجع اباوع على ماما وتروح نظراتي لعبير بس اريد اعرف شبيهم ..

كرار : كعدت يم امي وفهمتها شنو اريد .
كتلها يوم ترحين تودين الهم فلوس الذهب وانت روحي وياهم اني مراح اروح واتفقي وياهم عمود يكون هو عقد هو تلبيس ذهب تمام ؟

هزت راسها : انت عليش مستعجل قابل راح تتزوج يوميه ..

_ لا اسم الله يوم بيش مفاولتني هيه مرة وحدة القلب حب وقفلته هاي هيه ، بس ممرتاح لاخوها ابد لايلعب لعبه ويفرقنا ..

_ الله يسعدك يوم وان شاءالله خير ..

_ اي يوم اي والله كثري من دعائج هذا كلش محتاجه .
خلت ايدها على كتفي تطبطب عليه : اذا ما ادعيلك ادعي لمنو ياعيني .

سمعنه صوت هورن سيارة ابويه ، كتلها يله يوم ابويه ينتظرج .. طلعت امي وصعدت بسيارة ابويه وصلها لبيت اهل مها ..

من رجعت كالت مقبلوا حفلة العقد نسويها بالقاعة ..
_ ميخالف بسيطة وبعد ؟
_ هذا هو بس هاي مقبلوا عليها ..
_ تمام ..

بيوم العقد الكل اجه لبيتنا جنت فرحان كلش والكل يباركلي انتبهت ع الكل ، دورت عبير من بينهم هي الوحيدة ماكو ظليت محتار واتساءل هاي شنو قصتها ؟ البنية شو فدمرة اختفت..؟

شلت الموبايل واتصلت بيها بقى هواي يدك وماكو رد اخير شي غلقت الخط ، زادت حيرتي وتفاجئت اكثر وصار مجال كبير للشك ..

****

زهراء: بيوم حفلة حقد كرار لبست فستان نيلي قماشه شامواه ، كصه من الخصر وعلى الصدر خرز فضي ناعم ..

رحت ع المرايه اخلي اللمسات الاخيرة على وجهي
دخل صفاء ..

صفاء : باوعت عليها شفتها طالعة حلوة كلش احتاريت المن اباوع ، باوعت لوجهه ، كتلها هيج حتروحين شدعوة هلكد ؟

هيه صفنت بوجهي مابي شي لبسي ولا مكياجي ..

غيري هذا الفستان معجبني ..

باوعت لوجهه عيونها دمعت و تأمر الدمع والكحل الي بعيونها عليه .. ظليت اباوع عليها وجمالها سحرني .

رحت فتحت الكنتور وظليت اقلب بالفساتين
طلعت واحد كتلها اللبسي هذا ..
كالت لا هذا لابسته من قبل ..

طلعت واحد لاخ اشرتلها عليه بدون ما احجي ..

اجت باتجاهي ودخلته للكنتور كالت لا هذا لبسته بحفلة ابن عمتي ..

حاجيتها باحتجاج : ادري قابل هو حفاضة حتى كل حفلة تغيرينه شكو بيها اذا لبستي مرة ثانيه ..

اشرتلي ع الباب سمعت صوت عمه دتكول يلله تأخرنا ..

وراحت تركض بسرعة مااسمع بس صوت كعبها ..

نزلت وراهه شفت امي تكوللها خلي شوي ملح بجنطتج لج ليسدوج طالعه تخبلين وظلت تصلي على النبي ..

وكفت وكتفت اديه حجيت مو كتلها غيري لبسج متقبل ..

كالت يمه لبسها مابي شي ومستور بس هيه طالعه وردة ومفتحه بحديقه ..

زهراء : هيه ملابسي مابيها شي ولا مكياجي اصلا خفيف بس ادري بي ميريدني اطلع هيج ولا احد يشوفني هيج ظليت اباوعله بتحدي واحجي بقلبي هاي بس البدايه يادكتور صفاء اصبرلي وشووف ..

طلعنه رحنه لبيت عمو وبعدها ودونه لبيت
العروسه شفت ماما واصلين قبلنه
رحت عليها سلمت .. انتبهت عبير ماكو استغربت ..

سألتها: اكولج يوم وين عبير هاي شنو قصتها هي مو تكول كرار اخويه شلون متجي بخطوبته؟

همستلي ماما: بعدين نحجي بنتي لتشغلين بالج بيها

بعدني كاعده رن موبايلي طلعت الفون من الجنطة شفته صفاء جاوبته طلب اطلعله يم الباب..

سديته ورجعت الموبايل للجنطة .. و رحت شفته
هو وكرار وهذا كرار عيونه دم من العصبيه بس شافني كرار اجه عليه بس لزمه
صفاء: اهدأ شبيك لتزهكني خررررب شرفه اليسمع كلامك

كرار: زهراء هو سؤال واحد عبير ليش مااجت للخطوبة

زهراء: ظليت صافنه بوجهه هو أني مااعرف شبيها
اذا هي حتى بعزيمتي مكعدت يمي هواي ولا سولفت

حجه كرار: شبيج صافنه بس كوليلي ليش مااجت
وشبيها كل مااروح لاهلج متطلع مسويلها شي أني؟

_ كرار اني ماادري والله حتى اسأل صفاء
وباوعت لصفاء بالعزيمه مكعدت يمنا هواي اصلاً
هي مبتعده عن الكل وقبل شويه سألت ماما عنها
كالت بعدين نحجي

هز راسه متحلف وراح صفاء ظل يباوع وراه

تقربت لصفاء: شبيه؟
_مابي وانتي أدخلي جوا وبعد لتطلعين

باوعلي من فوك ليجوا ..
جاوبته هو شوكت طلعت اني ؟ انت خابرتني كتلي اطلعي انت ليش معصب همين ..

تنهد ومركز بيه فوتي زهراء الله يخليج ..
عافني وراح حجيت بداخلي اوووي ذوله شبيهم اولاد عمي واحدهم اضرب من الثاني ..

دخلت جوا رجعت لمكاني كعدت يم ماما لكيت مها لابسه فستان ابيض دتريد تعقد ، انتبهت ع ملامحها كولش حلوة ونازكه حقه كرار اذا خبص اهله عليها
فدوة شكد حلوة ومبينه حبابه كلش ..

قربت من ماما وهمست الها : والله كرار يعرف يختار باعيلها تجنن مها الله يسعدهم

التفتت عليه أمي: اي حلوة الله يهنيهم يستاهل كرار

بعدها عقدوا وكالوا حيدخل الولد يلبسها الذهب
بعد دقايق اجه كرار جانت الابتسامه ماليه وجهه وصل يمها باسها براسها وظل يهمس بأذنها
وهي تضحك من اعماق قلبها والسعادة تتطافر من عيونها ، وتباوعله بحب وشغف وهيام وهو همين ..

تذكرت خطوبتي ، تنهدت بيومها صفاء جان عبالك مدعوم تريله على اعصابه كاعد وشبعني رزايل
حتى معشت طعم الفرحه شنو ، شكد جنت غبية
والله لو يرجع الزمن بيه ولا اقبل وانعل ابوه قلبي الذلني هالذله ، للاسف عرفت خطئي متأخرة .

كرار: عبير الرعنه كولش عصبتني بقيت متنرفز
مو معقولة هالبنيه وبعدين مها صديقتها وقريبة منها هواي ليش مااجتي ؟؟

صاحوني ع العقد بدأ السيد يعقد ويا كل كلمه يرددها جانت حياة جديدة بالنسبة اليه عبالك توني اجيت للدنيا ..

ومن طلب مني الموافقه بسرعه وافقت وكلت بحماس نعم اقبل ..

بصفي اخويه كال اثكل ولك شجاك وظل يضحك ..

جاوبته: يمعود ليجي اخوها يخرب الاول والتالي
حظي واعرفه

بعدها سألها السيد ومن انطته الموافقه حسيت
احساس مستحيل ينوصف بكلمات حسيت نفسي
ملكت الدنيا كلها ..

مها مو بس حبيبتي بنت روحي هاي من عمرها ١٤ سنه اني أحبها وهسه عمرها ١٩ ، ٥ سنوات احبها لا بل اعشقها...

من دخلت حتى البسها الذهب شفتها حبيبتي لابسه بدله ماروني وهي بيضه اوووويلي يابه جيب الي يصبرني ..

جنت ويا كل قطعة ذهب البسها اتعمد المس بشرتها وهي تكش وتباوعلي واظل اضحك عليها ، على ضحكتي تبتسم .. لبستها الكلاده وخليت ابهامي على ظهرها وظغطته حيل ومشيته داتحسس نعموتها وتقربت حيل منها واشتم عطرها وريحتها .

التفتت عليه لزمت ايدي و خزرتني واني اضحك
عليها

همستلها: لج بنيتي شبيج هي لمسه لعد بعدين
شتسوين تضربيني وباوعتلها بمكر

_هاي شبيك كرار كافي عيب انت شو ولا تخجل مو منا الناس ..

_ اصلا ولا دا احس اكو ناس حوالينا عبالك بس اني وياج بهاي الدنيا كلها .

ضحكت واني اشوف السعادة بعيونها همست الها احبج بس حركت شفايفي ، عضت شفتها و دنكت ..

بعدها خلصت الحفله وكلهم راحوا
بقيت أني حجيت ويا ابوها واتفقنا على موعد الزواج جنت عبالي اهلها مثلنا ابقى اشوف مها واكعد يمها ..

بس بقيت وحدي ضجت وطلعت للبيت ..وصلت لبيتنا لكيت عمامي بالبيت متجمعين وهم سووا حفله من جديد ..

هناك والمح عبير واكفه بعتبة الباب مبتسمه
وتباوعلنا انتبهت عليها منتهيه ، تعبانه حيل ملامحها ذبلانه توجهت عليها من وصلت يمها مااعرف ليش حسيت ماكدر اسيطر على اعصابي .. وهيه جانت تباوعلي وتنصي .

سألتها بنترة: أنتي ليش مااجيتي للحفله وشبيج
كل مااجيكم متطلعين شمسويلج أني هااااا؟شنو الغط الي سويته اني بلله ؟

باوعت بعيوني ومدتلي ايدها بيها كانولا..
ظليت اباوعلها بقهر وصدمة.

يتبع .