[لامارا]

شريعة العشق
بارت ٢٦
نورا ناصر ..

يگولها يـ حليوة يلطولچ متر
• ليش انه مترين وكسر ؛
• واضعف گبال عيونچ ...

كرار : باوعت الها انتظرها تحجي ..
همست بتعب : أني مريضه كرار ومكدرت اجي لان الحفله اكيد بيها اطفال وانت تعرفني من اشوف
طفل لازم العبه وخفت لا اعديهم والا اني جنت
اتمنى احضر والله

عرفت انتوا رجعتوا اجيت هنا وملكيتك وهسه شفتك بس حبيت اباركلك وارجع
مبروك كرور شايف كل الخير ..

انقهرت عليها وضجت من نفسي لان ظلمتها بأفكاري ونسيت فضلها عليه لمن قربتني من مها وهسه مها صارت خطيبتي لا والاضرب جاي انتر بيها نتر .

دارت تريد تروح ، جريتها من طرف اردانها
_ وين رايحة عبير هاي شبيج انتي ؟غير افهم ؟

_مابيه والله كرار بس كتلك مريضة ..
_ اي اعرف بس شبيج مريضة شنو مرضج بالضبط ؟
_ تيفوئيد عندي ، موتني وكوة واكفه حباب خلي اروح للبيت قبل لا اتخربط هنا داحس بالصداع يضرب براسي عبالك راح ينشطر نصين ع كد الالم والله .

_لحظه لحظة أني اوصلج وين طالعه وحدج دنيا الليل
وهم تعبانه لتوكعين بالطريق انوب.

_ لا ماريد اتعبك خليك يمهم خطية اليوم خطوبتك هم فرحانين بيك خلي غير واحد يوصلني .

_ لا لا هياته بيتكم اوصلج بسرعة واجي لاحكين ..

هزت راسها بموافقة طلعت وياها ، حسيت صدك تعبانه وصلنا لبيتهم دكيت الباب فتحته امها
سلمت ع عمتي تشكرت مني ورجعت ..

رجعت دايخ ، دوختني عبير اصلاً مو بالعادة تتعامل هيج بهالبرود متعود عليها مرحة وتضحك بس اليوم حسيتها باهته هواي وماطايقة الدنيا اكيد بسبب المرض متعبها كلش خطية .

عبير: بعد زواج زهراء وقرب موعد المدارس ، وهالسنة اني حروح صف خامس ، جنه بالمطبخ دا اساعد امي فتحت موضوع ويا ماما ... اكولج ماما ان شاءالله اني حسجل بالادبي هالسنه ..

اندارت عليه وتركت الماعون الي بأيدها ع الكاونتر
باوعتلي بنظرة عدم رضى ..
كالت : لا يوم ادبي شنو ؟ انت شاطرة تروحين ادبي ؟ لا ماكو هيج حجي انسي الادبي عبير انسي .

صار نقاش حاد بيناتنا زعلت مني وطلعت من المطبخ ..
تبعتها للغرفه دكيت الباب وفتت جوه ..
باوعت عليها حجيت برجاء : ماما بس تسمحيلي ؟

جانت دتلبس المخدة وجه جديد ، تنهدت وميلت راسها
اشرتلي بمعنى فوتي ..

فتت وقربت منها خليت ايدي على كتفها
وظليت احجي بتوسل ؛ ماما والله مااكدر ع العلمي يرادله تعب ولازم ادنك من اقرأ و كله مسائل واني من تصوبت مااكدر ادنك هواي ادوخ واتعب انتي أمي لازم تحسين بيه منو الاهم الدراسه لو أني؟

جاوبتني بإصرار : الادبي مابي مستقبل يا بنتي ادرسي
ع الميز انتي ليش تعاندييييين .. وحجت بصياح ..

جريت نفس وجاوبتها : لتصيحين يوم مو زين عليج ثم هو مو بس الادبي مابي مستقبل العراق كولشي بي مابي مستقبل مو ذاك رافد ابن خالي شو مهندس وممتعين ..

_ مو كل المجالات مابيها مستقبل بالعراق هم اكو نلس دتتعيين وتعيينهم مركزي ..

_ هم منو تعيينهم مركزي بس الطبيه واني مااعتقد راح اكدر اطلع طبيه مو لان مو شاطرة خاف الحظ ماينصفني هو الوزاري اكثر شي يعتمد ع الحظ .

_ منين دتجيبين هذا الحجي عبير صدك جذب منج ماكو هيج شي بنتي وبعدين مو بس الطبيه تكدرين تطلعين غير شي اكو صيدلة اكو علوم تحليلات هواي بي مجالات العلمي بينما الادبي شتطلعين بلله قانون ؟ اشو الشعب بطل يلجأ للمحاكم واعتمد ع العشاير بحل اغلب مشاكله .

_ ماما منو كلج اريد اطلع قانون اني؟ دخيلج الله يخليج افهميني علمي ماريد مو رغبتي .

_ عبير ليش تلحين ؟ كافي كتلج انسي ...

بعدها ممكملة كلامها ماما فات بابا للغرفة
كال السلام عليكم
اني وماما : عليكم السلام ..
ردينه باقتضاب ..

هو كعد على السرير دنك ينزع جواريبه ..
كال شكو شبيجن صوتجن وين واصل شنو الموضوع ؟

ماما جاوبته : عبير تريد تدمر مستقبلها وتفوت ادبي ..

تحسرت اني وباوعت لبابا ..

تفاجأ بابا بكلامها : شسالفة سوسن تدمر مستقبلها شنو هالكلام كدام البنيه ليش تضغطين عليها عوفيها على راحتها .

_ يعني تحسين انت مقتنع ؟ هيه شاطرة نار تريد تفوت ادبي ؟

_ اي واذا هاي رغبتها هيه احسن مما تفوت علمي ومتنجح او متطلع معدل زين يأهلها تدخل كليه .

_ لا اني متأكدة وواثقة منها لان عبير شاطرة وكدها اريد ارفع راسي بيها .

باوعلي بابا وكال : ها عبير ؟

ظليت افرك بأصابعي عين على امي وعين على بابا ..
تشجعت وقويت نفسي واني مصرة على رأي ..
_ بابا والله ماريد علمي اني ماريد ازعل ماما بس خايفة لا ما ادبرها لان اتعب وتعرف صداع مجاي يفاركني من يوم الي سويت عمليه لهسه .

_ احنه شنريد غير راحتج ، تبدي المدرسة وسجلي ادبي .

امي كالت تحسين ؟

رفع بابا ايده ووجه كلامه لامي : هذا هو سوسن لا تضغطين ع البنيه وخليها على راحتها تدرين بحالتها انت .

حسيت بماما زعلت عليه رحت دااراضيها حسيتها بعد ممقتنعة عفتهم وطلعت ..

مرت ايام ماما صارت تقسى عليه البيت كله على راسي
كعدت الصبح وبديت تنظيف ومنا بيتنا كبير كلش ..
تعبت ورحت غسلت وتمددت بالصالة ، سمعت صوت جاي من المطبخ : ولج عبير مانظفتي الطرمة بعدج ؟

جنت تعبانه حتى مابيه اشيل حيلي جاوبتها
ماما والله تعبت من الصبح ليهسه خلي اجر نفس ع الاقل ..
وجريت نفس بانزعاج ...

حسيت بصوتها قريب مني وهيه تكول بعصبية
-: هسه لا دراسة فالحه بيها لا شغل بشنو تفلحين انتي؟

باوعت لكيتفها فووك راسي ، كمت خليت رجليه ع الكاع ووكفت باوعت عليها بأسى وهزيت راسي ..
صار ماما كايمه هسه حكمل شغل ولا يهمج ولا تزعلين ..

كمت نظفت الطرمة وكملتها ، دخلت شفتها بالمطبخ
سألتها تردين شي بعد ؟ رايحه افوت للحمام اذا تردين شي كوليلي قبل لا اطب اسبح ؟

باوعتلي وهيه تدير مي ع الجدر الي فوك الطباخ
هزت راسها وبعدت نظراتها مني ..

ركضت لغرفتي ضايجه ومقهورة مو من معاملتها اليه لا وانما ماكدر ارضيها والبي رغبتها .. مقهورة من نفسي اكثر من ما مقهورة منها .

طبيت سبحت وطلعت توا طالعه وماما صاحتني
وينج عبيير يله جهزي السفرة اجه ابوج .

جاوبتها صار ماما بس اشر الخاولي .

صاحت من يمها لج شوكت ما اكولج على شي تسوينه بسرعة الي اكوله الج لا تأجلينه تعاأالي يله .

شمرت الخاولي ع الدرج وركضت للمطبخ
شفت بابا يهمس لامي بالكلام الظاهر جان يأنبها
لان هيج تعاملت ويايه من شافني سكت مايريدني انقهر ، كمت فرشت السفرة وتغدينا ..

العصر هم ظلت تطلعلي شغل من جوه الكاع
طلعي البوفيه نزلي غراض من فوك جيب هذا ودي ذاك ..

لحد الليل صعدت نمت چفي من كد التعب واني نايمة
سمعت صوت الباب انفتحت واجتني ريحة امي
تقربت مني باستني على راسي غطتني وطلعت .. عرفت شكد متقسى عليه بس اكيد ضميرها انبها واجتني ادري بيها حنينه وتريد مصلحتي بس اني مصرة افوت ادبي ومستعدة للعقاب .

الايام الي بعدها صرت امتثل للاوامر بدون متكول صرت اعرف شغلي انظف البيت كله ومن يصير الظهر اوصل للحديقة انظفها بالشمس وشهر ٨ شمس قويه ..

ورا ايام حسيت بصداع قوي تطورت حالتي صخونه وتيقيء وخاصة اني قبل مضروبة براسي يعني الالم صار مضاعف .

شافني بابا هيج ركض بيه للمستشفى سوولي تحاليل طلع عندي تيفوئيد ودرجته واصلة ٤٥٠
خلولي مغذي وبعدها كتبولي علاج وطلعت للبيت
بابا جان كلش معصب بس رجعنه للبيت علكها عركة
ويا ماما عركة جبيرة كولش حتى غلط هم غلط عليها

_انتي شنو تريدين تموتيها دتكولج ياامة الاسلام
شغله مااكدر ادبررررررها افششششششل بيها
كووووة هي خووو ما كوووة ليش تزهكيني وتخليييين صوتي يطلع من تالي عمررررري هاج
استلمي هيج احسسسسن العام بالكوة طلعت من
الثالث بسبب حالتها الصحية هسه شلون هااااا
هم نعيد السالفه

ماما جانت ساكته مجاوبته أبد مدنكة وتعصر بأصابعها عصب شال البلازما وركعها بالكاع وطلع من البيت ...

باوعتلي ماما حجيت بسرعه: ترى اني معليه مو هم تكوليلي انتي السبب .

محجت شي تركتني وكامت ، اجت مريم دتنظف
وتشيل البلازما لان صارت طحين واني تمددت ع التخم
والمرض بيه ، ضجت وبس افكر ، انوب تسببت بمشكلة بين ماما وبابا واول مره اشوف بابا يتصرف هيج ويه امي ، خليت ايدي على وجهي وغفيت .

وراها بأيام صارت خطوبة كرار مكدرت اروح جنت تعبانه حيل وابر وادويه حتى دوختني .

بيومها يتصل بيه بس اني جنت تعبانه حيل حتى تليفوني ما ادري بي سمعت يرن وماكدرت اكوم اخذه بعدها انطفى ، كمت شفته طافي شحنه .

اخذت العلاج وصرت شويه احسن ، من رجعت ماما ترخصت منها اروح ابارك اله ..

كالت خاف تعبانه ومابيج اجليها هسه شون ترحين وحدج ..

جاوبتها لا ماما اخذت علاج هسه احس تحسنت ابارك اله وارجع . رحت لبيتهم شفتهم ديحتفلون بي شفته من بعيد ابتسمت اجه يمي ينتر نتر حسيت من
كلامه اكو شي او هو شاك بشي وعرفت شيقصد
تركته حتى مبررتله لان مابيه حيل المرض كافي عليه هد حيلي .

كرار .. بليلة الي خطبت بيها خابرت على مها
وسألتني على عبير . كالت كرار عبير وينها اشو ماكو اتصل وهم ماكو توقعتها اول وحدة تحضر بخطبتنا وما اجت صاير شي اكو شي ؟ احجيلي ؟

_ لج عبير مريضة راحت بالقاضيه تعبانه كلش عدها تيفو وامها منعتها متجي للحفلة .. تحبين نروح اني وياج نشوفهه ؟

_ ها اي اترخص من اهلي ونروح ..

_ خو ما اخوج الحيوان يحط روحه ويمنعج ؟

_ لا حبيبي عوفك منه اصلا ماما وبابا وحتى عمامي خلوله حد بعد ابد ميتعرضلك .

_ ايبااه عاد شلون اني خايف منه اني خايف عليج انت حبيبتي .

_ لتخاف حياتي ..
_ غير جنت رايد اشوفج اكعد يمج اشبع منج اليوم حتى مشفتج هواي للبدلة غير طالعة كيك بس اخخخ .

_ شسوي اني هم ردت تبقى يمي بس كالوا ميصير وانت هم رحت لو كايل لبابا مجان كال شي .

_ اي صدكت .
_ والله شبيك ممصدك ؟
_ عوفينه من ابوج واخوج دخيلج وكوليلي شوكت اجي عليج اخذج لبيت عمي تحسين نشوف عبير ؟

_ بكيفك ؟
_ مو بكيفي غير تترخصين من اهلج تشوفيهم يقبلون تطلعين ويايه لو لا ؟
_ تمام اكوللهم وارجعلك خبر ..
_ انتظرج .

زهراء:كعدت الصبح على حوسة صفاء بالغرفة كمت شفته ديبدل ، تمططت وكتله صباح الخير واني منعسة
ابتسم على شكلي كال صباح النور رجعي نامي مبينه مشبعانه نوم .

كمت واني دا اكوم حجيت وياه لا كعدت بعد شنو حترجع للدوام اليوم ؟

لا راح اروح افيز جوازاتنه حتى نسافر شهر العسل .

ضحكت باستهزاء شهر عسل ؟

هو جان مدنك يدكم قميصه ماانتبه رفع راسه رأسا درت وجهي وشلت فراشي من ع الكاع .. رحت غسلت وجهي وطلعت .

نزلت جوه شفت عمو وعمه كاعدين صبحت عليهم
كتلها عمه اسوي ريوك ؟

كالت اني وعمج تريكنا سويلكم انت وصفاء اذا كاعد ..
هزيت راسي همست تمام ورحت للمطبخ سويت الريوك
وكعدنا تريكنا .

خلصنه ريوك وهو راح واني كمت ع الشغل غسلت مواعين ونظفت البيت ، خلصت شغلي وعمه طبخت ..

اشتاقيت لاهلي رحت لعمه ترخصت منها اروح لاهلي كالت روحي ..

لبست شال ورحت ، اطمنت على عبير وكعدنا نسولف
حاجيت ماما عمود عبير لان تريد تدخل ادبي وماما تريدها علمي ..
كتلها ماما عوفيها براحتها مثل مديكولج بابا خطية مدتشوفيها شلون تعبانه .

كالت ماما هو سكتت مابيدي شي بعد هيه وابوها مصممين .

بقيت يمهم شويه وطلعت رجعت للبيت بس فتحت الباب طلع صفاء ظل يخوزر بيه صعدي للغرفة بسرعة ..

صعدت بسرعة فوك وايدي على قلبي شبي هذا خفت منه كلش خفت لاصاير شي ..

طب وسد الباب قوي وين جنتي ؟

جريت نفس ونزعت شالي ورحت دااعلكه واني متجاهلته ..

لزمني من ايدي ووكفني : دا اسألج جاوبي ؟

فلتت ايدي منه بالقوة : شبيك صفاء ماكلتلك عمه ترا ترخصت منها ورحت لاهلي .

كال معليه بأمي قبل متخطين خطوة برا هذا البيت تترخصين مني .

بصوت مرتجف مدعية القوة : ترا بيت اهلي احنه حايط على حايط انت لازم من وحدك ترخصني اروح بوقت فراغي وبعد مااخلص شغلي مابيها شي وهمه مو غربه اهلي وبنفس الوقت بيت عمك يعني مرايحة بيت غريب اني .!!

كال بحديه ميخالف واعرف هالشي مو جديد عليه بس هم تترخصين مني مفهووم ؟

جريت نفس اختنكت داطلع من الغرفه ، رجع لزمني
يباوع لعيوني عاكد حواجبه وعيونه حمرة من العصبيه ادري بي يضوج من احكره كال احجي وياج جاوبي ليش تغلسين لو معاجبج الكلام ست زهراء ؟

سرعان ماتحطم درع القوة الي ادعيه خليت ايدي على ايده وخرتها عني ، حاولت الهروب من نظراته و همست بحسرة
تمام بس وخر عني ممكن اختنكت منا اريد انزل دخيلك ..

سوالي طريق ونزلت ابجي ..

صفاء .. طلعت وسدت الباب اجاني صوت شهكتها
عرفت بجت ام دميعه ، خليت ايدي على راسي وتحسرت جان لازم افهمها اني خايف عليها مو فد شي ثاني ..

نزلت جوا امي وابويه ماكو ، فتت للمطبخ شفتها واكفة ع السنك شعرها مفتوح مثل الشلال ومحتل كل ظهرها
ايديها تتحرك بعصبيه تجلف ماعون بيدها طلعت روحه تريد تفرغ كل غضبها بي .

تقربت منها لزمتها من ايديها ودرتها عليه ، ظلت تحاول تفلت اديها مني مكدرت ، ثبتتها قوي وظلت الرغوة تتطاير من اديها لان ظلت ترجف .

همست باوعيلي زهراء ، ظلت مدنكة وتهز راسها برفض ودموعها على خدها ، كتلها لا كل ما احجي وياج تمطر عيونج عبالك غيوم كبري شويه كافي دلع .

باوعتلي ومنو كلك اتدلع عليك مسويت شي غلط رحت اشوف اهلي اتركني ..

ظلت تحاول تملص اديها مني متكدر ، واني لازمها مشيتها وكعدتها ع الكرسي وكرفصت كبالها ولازم اديها ومخليهم على رجليها .

اسمعيني زهراء اني من حاسبتج لان اخاف عليج انت مسؤؤليتي اذا طلعتي من هذا البيت ولا سمح الله صار عليج اي شي منو اول واحد يتحمل مسؤؤليه غير اني ؟ اني زوجج طلعة من البيت بدون علمي ماريد تمام ؟

هزت راسها حاولت تبعد نظراتها من نظراتي...

وبعدين شمعنى من اني طلعت رحتي ؟ اشو يوميه موجود هنا ماكلتي اروح ..

واذا رحت يعني شيصير

كولشي يصير احد يخطفج احد ياذيج ..

بس اني انخطف من باب بيت اهلي شبيك صفاء ؟

كمت على حيلي انت مشايفه الدنيا شلون صايرة عبالك غابه كولشي توقعي .

كامت تريد تطلع عصبتني لزمتها بقووة ووكفتها
فتحت عيوني وحجيت بحده ووووين .

داروح فوك اريد اسبح ..

غير اكمل كلامي يله ترحين ؟

شبيك عبالي خلصت .

جريت نفس بعصبيه وحجيت بغضب يلاااا روحي ..

زهراء : طلعت من يمه امسح دموعي واضحك كدرت اخليه يعصب مشيت بالممر داروح اغسل بالمغسلة
شفته صعد فوك طاير مبين بعده معصب مني ضحكت عليه اعرف شون احرك دمه ..

كملت تغسيل وصعدت اريد اغير ملابسي دخلت للغرفه مشفته موجود ، طلعت ملابس حطيتهم ع الجربايه ودخلت سبحت كملت وطلعت بالبرنص ..
اجيت داافتح الباب سمعت صوت صفاء عالي و يعيط وينهااااا هااااي؟

يتبع ..