[لامارا]

شريعة العشق
بارت ٢٧
نورا ناصر

الفارق بينناَ أنني أحببتُك كمعجزة وأنت أحببتني كشيء يحدث في اليّوم مائة مرة.

فتحت عيوني بصدمة ، متسائلة بداخلي ، شبي صفاء هيج معصب ويعيط معقولة اكو شي يخصني ؟

قابل شعندي وشمسويه ، مااخليت للموضوع اي اهتمام اخذت ملابسي بدلت بالحمام وطلعت .

طلعت دخل صفاء للغرفه باوعتله صاير بركان
ظل يروح ويجي ويدردم !

توجه للشباك اكو ميز فرفوري وحاطين يمه كراسي اثنين ، مد ادي شال الميز ركعه بالكاع وطشره انصدمت بقيت ارمش بعيوني وقلبي زادت نبضاته الصدمه الميز ثكيل مدري شلون شاله وشنو من قووة عنده .

متت خوف منه ، والاضرب خفت لايلوحني طشار من هالعصبية وبركان الغضب الي ثار بلحظة وبدون سابق انذار واسباب مجهولة بالنسبة الي ، رحت واني ارجف بخطوتين وكفت يم زاوية الكنتور صرت بين الكنتور وباب البالكونه ختلت بحيث ميشوفني ..

راح للميز فتح الجرارة بقووة بحيث وصلت للاخير واجت توكع ، طلع باكيت جكاير ، ناطيني ظهره ، سمعت صوت جدحة الجداحة والدخان الازرك الي انتشر بسرعة وريحة الدخان ، عرفت ظل يدخن..

اندار يجر نفس بعصبيه و من كد مامعصب لزم الجكارة وهي مشعوله وجعصها بيده..

بلا وعي وبدون اي خوف من هاي العصبيه رحت اركض عليه لزمت أيده مايهون عليه يأذي نفسه ..
حسيت الالم بيه قبل لا يصير بي .

_صفاء هاي شسويت أيدك شلون هيج تسوووووي انتَ؟

باوعلي وسع عيونه متفاجأ الظاهر مجان يعرف اني موجودة بالغرفة .. عيونه حمررة من العصبية وحواجبه مخنزرهم بس شافني اختفت ملامح العصبيه من عيونه وصار متفاجئ .. تأكدت انو الموضوع الي معصب عليه مو اني سببه ..

_ أنتي أنتي من شوكت هنا ؟
يحاجيني و صوته مبحوح من كد الصياح

جاوبته بهدوء : اني جنت موجودة من البدايه بس انت ممنتبه عليه ..

تجاهلني و بسرعه باوع ع الميز الي كسره غمض عيونه وحك كصته وظل يستغفر بهدوء ..

بعد ثواني جر نفس و خله ايده على ظهري وضغط عليه يدفعني بخفه وظل يحجي برجاء : زهراء اطلعي برا الغرفه اتركيني اريد ابقى وحدي شويه اجر نفس ورتاح وبعدين اني اصيحلج .
يحجي ويايه بهدوء رغم عصبيته وايده الترجف ..

همست: اي هسه اطلع اذا يريحك هالشي اطلع ليش لا ، بس فدوة ايدك خلي اداويها واطلع والله ماابقى بالغرفه .

_ زهراء روحي رجاءً ، اني اعقمها هسه مابيها شي انتي بس فدوة اطلعي لا أاذيج اني من اعصب افقد ماريد اذيج عفيه

لزمني من ايدي وكومني من يمه وظل يوجهني باتجاه الباب ، مشيت وتركته مجبورة ، فتحت الباب وطلعت بس افكر بي ، على شنو عصب بعد ؟ معقولة مني لان رحت لاهلي بلا ما اكوله؟ لو خاف تعارك ويه عمه لان سمحتلي اطلع بدون علمه معقولة هيج ؟ هاي شون فاتتني ونسيت الموضوع اصلا !!

نزلت كم بايه ، سمعت صوته اجاني من الغرفة
صاح زهراء درت ورحت اله اركض ..

رجعت للغرفه وفتت واني انفاسي متسارعة حجيت بتعب : ها صفاء صحتني..
_باوعلي شبيج ؟ ليش هيج تتنفسين بسرعة صار شي جوه؟

_ مابيه شي بس لان صحتلي جيت اركض ..شنو الي يصير جوه هو اصلا شكو
_انسي الموضوع و تعالي شويه أكعدي يمي محتاجج ...

رحت يمه جان واكف يم الميز و ظل يعالج بأديه اني جنت مركزه كل انتباهي عليه شلون ديعالج بأيده بقيت بس واكفه وساكته ، كمل ضماده رفع رأسه ابتسملي ..

ابتسمت ودرت وجهي مااباوعله ، ودنكت ، اجاني صوته
يهمس : شو رفعي رأسج باعيلي زهراء !

رفعت رأسي ، باوعت بعيونه ، ظل صافن بوجهي
خجلت من نظراته ، توترت وظلت ارمش وانهزم من نظراته ، فرك وجهه وكال .. : احمممم زهوره اذا نزلتي معليج بهاي الجلبه شنو تحجي أني هنا موجود تعالي احجيلي أبد مااريدج تتلاسنين وياها تمام؟

تفاجئت : ليش منو موجود يمنا هنا ؟

ابتسم وكال العلة مالتنا
_علة؟منو هاي ؟

_هسه من تنزلين تعرفين منو اقصد ومثل موصيتج ماريد مشاكل بس تضوجج بشي صعدي هنا .

بقيت صافنه اشو جنه يحجي الغاز .. راح وتمدد ع الجربايه وحط أيده فوك عيونه ..

اريد اطلع سمعته كال
_احمممم وياج عود طفي الضوء قبل لتطلعين .

باوعتله لحظة تركته ودرت ، طفيت الضوة وطلعت نزلت صارت بوجهي رشا!!!

انصدمت بيها وظليت اربط الكلام الي كاله صفاء قبل شويه ، فكرت لحظات هيه واخوها متعاركين اني مدخلني خلي اسلم عليها .

رحت دااسلم عليها خلت ايدها على كتفي ودفعتني بقووة رجعتني خطوتين للخلف ..

صاحت بيه بعصبيه : ولي ادبسز بنت أم السحورة شوون عين صلفة ..ولي من يمي يله لا اريدج ولا اريد سلامج.

انصدمت بكلامها وتصرفها ، باوعت لعمتي جانت كاعده يمها محجت شي ، باوعتلها بقهر وجسمي ظل يرجف اشرتلي بيدها بمعنى روحي ونظراتها تتوسل
وهزت راسها برجاء.

برطمت شفايفي وانفجرت الدموع بعيوني ، وداخلي يصرخ وين اولي ذاك طلعني من الغرفه
وهاي تكولي روحي ، باوعت للباب تمنيت افتح الباب واهج من البيت واروح لاهلي ..

بس ليش اخلي رشا تتشمت بيه وبصفاء واكبر المشكلة اروح اصعد للغرفه وبس يحجي صفاء اعيط بي والله واطلع ضيم قهري وعذابي كله بي .

ركضت ع الدرج صعدت فتحت الباب بعصبيه وهالشي سوا صوت قوي ، واني اتنفس بصعوبه وتعب .

فز صفاء من نومه وخر ايده من على وجهه رفع راسه يباوعلي بصمت متفاجئ ، كورة قبضة ايدي واني اباوع عليه بعصبيه ، رحت يم السرير .

حجيت من ورا خشمي وبنتر واشرله بيدي: كوم نام بالكاع اني دااريد انام ع الجربايه يلا ضجت ..

محجه شي كام طلع فراش اله وتمدد عليه
واني نمت بمكانه وغطيت حتى رأسي ظل كلام رشا ببالي ، كمت ابجي هي شنو هاي وتغلط ع ماما؟
تروح فدوة لنعال أمي...

لليوم مسمعنا صوتها مريه صايمه مصلية وبارة بزوجها وربتنا أحسن تربيه ..

ماتحملت اكتم شهكاتي ، كمت اشهك وابجي بصوت عالي واني على هذا الحال ، مااحس الا الغطاء انشال مني وصفاء يباوعلي مصدوم ..

وظل يحجي وياي مستغرب : شبيج زهراء منو وياج احجي ؟من نزلتي جوه حاجتج هاي النذلة ؟

كمت عيطت بوجهه : معليك انت اذا تسأل منو ويايه فأنت اول واحد اذيتني لتدخل بيه أبببببد افتهمت لو اعيد؟

_زين تمام بس اهدئي وكوليلي ليش هيج تبجين
من نزلتي ماكو شي شبيج هسه رشا حاجتج مو اكيد هيه ؟

سكتت بس ظلت شهكاتي عالية ودموعي على خدي ..

جر نفس وكعد يمي ، اخذ كف ايدي وخلاه بين كفوف ايده ، سحبتها منه بعصبيه وعيطت : لتلزمني ..

كام وكف على حيله معصب رفع ايده بتهديد
تحجين لاااا شلووون ؟

رفعت راسي وباوعت بوجهه : اختك الحقيرة تكول ع ماما ام السحورة .. حجيتها وزدت بالبجي..

كور قبضة ايده وضربها براحة ايده اللخ ..وعض شفته بغضب ..

راح صوب الباب فتحها بكل قوة ونزل جوه ..

خليت ايديه على وجهي واسمع صوتهم عالي....

صفاء : بعد ماسمعت من زهراء نزلت جوه اعصابي نار
اذا كدامي رشا يمكن اشرب من دمها ، وكفت بنص الدرج لزمت الحديد قوي ، جريت نفس خفت لا ماللزم اعصابي واجرم بيها ..

واعرفها اخلاقها زبالة ومعبالك اختنا وتحب العركات والمشاكل والقيل والقال ..

وقبل فترة حاولت تشوه صورة زهراء بطريقة بشعه وبمساعدة اسراء للاسف ..

قبل ايام خابرني صاحبي وكلي اكو وحدة خابرتني وتكول هيه زوجتك وتسأل عنك ، تفاجئت شون زوجتك وتسال عنك وانت يمها ماخذ اجازة ، تحجي حجي محلو ، عرفت اكو مكيدة مدبرينها الك نسوان متكعد راحة دير بالك يخوي .

تشكرت منه واخذت الرقم ، بحثت وتحريت وعرفته لرشا ، خابرته رزلتها طيحت حظها نكرت حذرتها متجي للبيت ، وهسه بكل صلافة جايه كبت وياها ظليت اصيح عليها ارزلها واغلط بس مايفيد وياهه احجي كلمة تردهن عشرة ..

مايفيد وياهه ابد وكفت بيناتنا امي لزمتني من ملابسي وحلفتني اعوفها .. باوعتلها اتمنى اجرم بيها .

كالت امي : يمه تعوذ من الشيطان هيه جايه تشوفني وتشوف ابوك وتروح لخاطري عوفها .

لزمت ايد امي وباوعت لرشا الي بدورها تباوعلي بكل صلافة وحقد ورفعت اصبعي بتهديد والله يارشا اذا مرة ثانيه سويتيلج هيج سالفة وحاولتي تأذين زهراء بأي طريقة مراح يحصلج خير وربج .

تخصرت ووكفت : شتريد تسوي مثلا ؟ تايهتلك ترا ورايه زلم لا عبالك .

_ انت شنو ولج ماتنكسر عينج اله اعميها الج يله ؟

تريد تجاوب صرخت امي عليها وراحت سدت حلكها
وظلت تعيط عليه تريد اصعد واتركها .. صعدت وتركتها ..

طلعت كل حركتي بالغرفة وكسرت الميز وماجنت اعرف بزهراء موجودة .....
حاولت انام اجتني زهراء تشهك وتبجي
عرفت رشا مأذيتها بالكلام ، نزلت شفتها كاعدة يم امي بالهول وامي تحجي عليها .

فتت ضربت كف ايدي بأطار الباب ولج رشا ليش هيج تحجين على عمتي ؟ ولج اشفتي منها هاي السنين كلها حتى تكوليلها ام السحورة ؟ طايييحة الحظ اكتلج هسه احد يلومني ؟؟

كالت : لعد شوون فرت عقلك وخلتك تاخذ بنتها مو بالسحورة .

تقربت منها رفعت رجلي ضربت القنفة برجلي
كامت هيه وامي على حيلها ، امي تدفع بيه وتسكت برشا ، تدخل ابويه واخذني على صفحة يجرجر بيه .
ووجه كلامه لرشا بنفس اللحظة الي لازمني بيها ..
_ رشا مشاكل وضيكة خلك ماريد خابري رجلج خلي يجي ياخذج يله بويه .

اخذني ابويه وطلعنا بالحديقة
لك ابني عيب كافي شكد تصيح توك تعرفها رشا انت ؟
تدري بيها تحب تخلق مشاكل من جوة الكاع تجاهلهه تولي صوتك طالع ومنا شارع منا ناس يسمعوك شيكولون .

جريت نفس احاول اسيطر على اعصابي مجاي اكدر
رشا دمرتلي اعصابي المشكلة ماكدر امد ايدي واضربها وهم اعرف مايفيد .

زهراء : بقيت على كعدتي على السرير وابجي ، منين اتلكاهه ياربي ، بشنو ورطت روحي اني ؟ هسه هاي رشا شنو مشكلتها وياي شسويت وياهه اني ؟ حتى هيج تسوي بيه وتعاملني هالمعاملة ؟

واني على هالحالة اندفرت الباب باوعت مخروعة مراح يمر بسلام هاليوم الاكشر هذا !

باوعت واشوف رشا فاتت على الغرفة ، بخطوتين صارت يمي ع السرير وهجمت عليه..

وتصيح: لج بنت ام السحورة شبساع خليتيها بحلك رجلج فتااااانه ... اله اخليج تشوفين الجحيم بعينج وكولي مكالت رشا!!!!

زحفت صرت بحافة السرير ولزمت الفراش بيديه والخوف تملك كلي ، وهي تريد تصعد ع سرير حتى تضربني ، طبت عمه تركض وراها مدت ايدها تريد تلزمها ، لزمتها من ملابسها تريد تبعدها عني .

رشا فلتت نفسها من عمتي وتصيح شوو عوفيني يووم وخري عني خليني اربيها الممتربايه مربوهه اهلها ...

مدت ايدها كمشت شعري حسيته حينشلع من راسي ، ..بهالاثناء دخلت عبير بسرعة دفعت رشا وكعتها بالكاع ...

عبير: ماما سوت فطائر ورادت تدز لبيت عمو ومريم جانت نايمه ..
صاحت عليه عبير هاي اختج مترد على تليفونها تجي تاخذهم ودي فطائر وديهن لبيت عمج ورجعي بساع ..

_ صار ماما .. اخذت الفطائر وطلعت لبيت عمو
شفت صفاء سلمت عليه ولا انتبه ولا يمه صعد بالسيارة وهو يدعي ع نفسه..

دخلت للبيت شفت عمو بالحديقة ، سلمت عليه انطيته ماعون الفطائر ، تشكر مني كال وديهن جوا خلي اروح ورا صفاء بعده معصب .

هزيت راسي ورحت فتت جوه ، صيحت عمه عمه ماكو رد ، خليت ماعون الفطائر بالمطبخ وطلعت ع الهول وأسمع صوت رشا دتصيح ع زهراء وتفشر ع ماما....
وصوتها طالع عالي بحيث اني جوه اسمعه ..

صعدت لغرفة أختي أركض أني اعرف زهراء فاهية
ومتكدر لرشا ولا لغيرها ، دخلت للغرفه لكيت عمه تجر برشا وذيج لازمه شعر زهراء وتسحل بيها وزهراء تبجي

من شفت زهراء بهالوضع حتى نسيت اني بأيدي
كانولا ولا اهتميت لوجع رأسي منو هاي الحقيرة
حتى تضرب أختي وشنو سلطتها عليها!!

رحت عليها جريتها من أيدها حيل ، دفعتها من صدرها حيل بيديه الاثنين ، وكعت بالكاع وصرخت ..

انتبهت اكو كزاز بالكاع وكعت عليه رشا والدم ملئ اديها

ماضجت ولا تندمت ولا خفت ابد ..
طبها مرض شسويلها هي مو اهم من أختي...
شكو تمد ايدها وتضربها هيه منو اصلا!!!

زهراء بس شافتني عبالك طفل ضايع وشاف أمه
اجت نزلت من السرير بسرعه واجت عليه
حضنتني تبجي وترجف وتحجي: عبير اخذيني منا
مااريدها حتى صفاء مااريده فدووة طلعيني منا...

حضنتها لج شبيج اهدي

باوعتلي ترجف وتحجي : انتي بيوم عرسي كلتيلي لتكولين ماعندي أخ اني اخوج فدوووة طلعيني باعيها حتكووم تموتني ..

بهالاثناء رشا محتارة بيدها وعمه يمه تعاين عليها ..

حاجيتها لزهراء : هاي شبيج اهدئي ترى انتي أم البيت من بعد عمه وباوعت لعمه بنظرة عتب وكملت كلامي ويا زهراء ..

اذا اكو احد لازم يطلع واشرت ع رشا فهي
لازم تطلع مو انتي...

رشا من مكانها ظلت تغلط عليه اسكتي انت الثانيه ولج مو اكوووم اجعصج بيدي اصبري اني تدفعيني اصبريلي اليوم اني الج

_ طبج مرض حيل وتستاهلين شكو تضربين زهراء انت منو حتى تضربيها ؟

بعدني دااحجي دخل
صفاء من شاف الوضع ظل مستغرب اجه ع امه

_هاي شكو حجيه شو الغرفه صايرة حلبة صراع
وهاي عبير شجابها هنا ...

عمه ولا جاوبت ساكته....

حجيت أني: أسمع صفاء احنه انطيناك بتنا حتى
تصونها وتخليها بقارورة وتخاف عليها حتى من
الخدش مو مخليها ملطشه لاختك تعال جاي أختك بأي حق تضرب زهراء ؟

هو التفتت ع رشا شاف ايدها كلها دم : هاي منو مسوي بيها هيج؟

جاوبته بثقة : أني عندك اعتراض؟

بعصبيه : طبعاً عندي اعتراض انتي شلون تمدين ايدج ع الاكبر منج ؟

_والله الاكبر مني لكيتها لازمة زوجتك من شعرها
وتضرب بيها ..

من تكون هي بدون اخلاق اني أنزل
لمستواها مااكعد ارتفع زين !!! وهاي المسرحية كلها
هسه اوصلها لبابا واكوله بنت اخوك الحقيرة ضربت بنتك وانت عود اعترض ...
تركتهم وطلعت

زهراء: طلعت عبير وعافتني ، بقيت واكفه بمكاني ابجي وامسح بدموعي ، اجه عليه يباوع بوجهي
درت وجهي عنه مقهورة ..

راح هجم ع اخته رفعها من الكاع ووكفها وظل يهز بيها ويصيح بوجهه بصووت عالي ..

لجججج رشاااااا صخااام سودتي وجهي كدام بيت عمي الله لايوفقج أنتي شلون هيج تسوين ولج استنكف اكول أنتي اختي من امداني رزلت البنية علمودج وانتي راس البله ؟

انتبهت هو ديحجي وخشمه طك دم ، وخرت من مكاني ورحت لزمته من ايده وصرخت بوجهه واني اباوعله : صفاااء خشششمك!!! دمممم !!

باوعلي ثانيه وحدة ودار وجهه يحجي ويرزل برسا ومسح خشمه بطرف ايده ..

رشا ايدها تنقط دم ، وهو يهز بيها لازم من ايدها بعصبيه ويصيح وللج شسويلج هسه انت ماتملين ماتشبعين من المشامل بس كولي شسويلج اشمرج من فوك السطح هسه واخلص منج ...

وهيه تحاول تنتزع ايدها منه وتصيح صفاء ايدي عوفني ماتشوفها كله دم اتركني عبير ضربتني اني اعلمها ..

عمه ظلت تتوسل بي يتركها ، ظليت اني همات اتوسل بي حسيت حيكسر ايدها هلكد ماضاغط عليها ..

صفاء الله يخليك اتركها اخذت جزاءها ..

باوعلي مركز بيه وتركها وهو يدفعها دفعه خفيفه بس عيونه حمرة دم ..

باوعتلي نطقت من بين اسنانها اني اعلمج ..

رجع خزرها لللج لاتهددين لللج ..

وكفت بينه وبينها عطت صفاء كاااافي تعبت خلي تروح تنزل لا اني الي اروح هسسسسه والله عوفها تووولي ..

هو استجاب الي وتركها وهيه ظلت تدردم اني اولي انت الي تولين ياحقيرة اله اطلع هاليوم هذا وكل قطرة دم وكعت مني من عيونج ..

صيح صفاء من مكانه : ماريد اشووفج بعد هنااا
كوة مسيطر على روحه يريد يتبعها واني ادفع بي وامنعه ..

اخذتها عمه من ايدها ونزلت جوه وهيه تدردم عليه

اثنينه اتنفسنا بضيق اني وصفاء وبقينا واكفين قريبين على بعض ، جان شعري مخربط بسبب رشا واحس راسي يوجعني ..

خله ايده على خدي واحتضنه كال خو ما اذتج ؟
ولزم خصله من شعري يتلمسها وظل يعدل بشعري ..

وخرته مني وظليت اباوعله بأسف ، رحت جبت الكلينكس وانطيته يمسح خشمه ..

كتلها شبيها مجلوبه ؟

هاي انت كلتيها مجلوبه بعد ...

شسويتلها اني بس اريد افهم ..

راح كعد ع السرير .. ويباوعلي مقهور ...

ضربت ايديه باسف وكلت منين اتلكااااهه ياربي !! ونظراته جانت الي كلها قهر هزيت راسي اريد اتحرك من مكاني كاال زهراء ..

كتله لتحجي وويايه اسكت ماريد اسمع شي ..

كام من مكانه ورجع عصب كال لتكولين اسكت لج !!

عفته ورحت اركض للحمام دخلت وسديته عليه
اجه يدك بي كتله اتركني بحالي وفتحت المي
وخليت ايديه على اذني ماريد اسمع صوته ..

كرار: رجعت من الدوام وصلت للبيت خلتلي امي غداء اكلت .. متواعد اني ومها حتى نروح لعبير نزورها ونطمأن على صحتها ..

خابرت على مها اجاني صوتها تبجي ..

كتلها لج شكو ليش دتبجين ؟ مو متواعدين نرووح لعبير نشوفها مريضة خطيه ..

عاطت كراااار كول لعبير بعد لتخابر عليه وخلي تنسى عدها صديقة اسمها مها...!!!!

يتبع ..