[فيتامين سي]

البارت الثالث


مزرعة العم سعود .. باختصار اقرب للمنتجع عن كونها مزرعه .. الزراعه فيها مرتبه بشكل .. زينه.. واشجار جميله ..

سيف الصغير .. يركض من بعيد متوجه لسعود وهو يضحك وينادي :
جدي .. جدي ..
وهو يلتقفه .. ويحمله ويضحك معه ..

موضي مبسوطه : سعود .. جاك سيف ونساك الهم ..
باسه : اي والله عين جده .. ورب البيت قلبي تعلق فيه ..
موضي : ليت مهره تظل معنا .. مير .. احنا اهلها بعد ..
سعود : والله خذتيها من لساني ياموضي .. انا ناوي افاتحها الليله بالموضوع ..

مهره كانت في جهه من المزرعه تتمشى .. وتكلم جوال .. وبعصبيه : زينه يا ** .. والله لو كلمتيها لا احذفك من سناب ..
زينه ضحكت : يعني والله مالك امان .. رحتي بيت حمولتس .. وصرتي تحوسين ..
مهره : ياحيوانه .. مزرعتهم .. وين رايحه انا .. بار ولا ديسكو ..
زينه تجننها: بس هذا الي باقي..بعد انتي ينقال عشتي في امريكا .. تعودتي ع الفسقه ..
مهره: الله يلعنتس ويلعن امريكا ويلعن طاريها ..
زينه: ريلاكس بيبي .. ماقلنا شي ..واحشني طويل اللسان ..
مهره وهي جالسه عند شرب زرع .. وتقطع عشب زايد ضار .. : يطريك امس انتي وسندس .. وتخيلي يقول امسع ديون (امشع زيون)
ضحكت: هالبعير .. ماينسى .. اني امشعه ..
مهره تقطع.. وتحط ع جنب .. : اخبار جديده ..؟!.
زينه : يااختي .. عينها بعيد .. اكيد داقه الحزن ..(مهره المميزه حييل عند جدتها وتموت فيها وماتسميها الا عين صبحا) ..
مهره : ياقليبي ياصبحا ..لو الله يهداها شوي .. كان زانت الامور ..
زينه: بس مادري مهره .. شكلها بتجي تاخذتس ..
توسعت عيونها: كيف ..؟!
زينه : هي جالسه .. تفت بذر الريحان وتتحلطم انها كيف رضت تروحين مع حماك .. وان ابليس لاعبن فيها .. وتقول بتجي تاخذتس مع ايووب ..
مهره : ياووويلي .. طيب الجماعه ماشبعو من ورعهم ..
زينه: حلى اهو .. كلها الجني سيف ..
مهره بتهديد: زيوون .. ! ..
زينه: وانا صادقه .. سوي وداعيه الليله .. وارجعي .. ترى كل ماضليتي بيتعلقون في هالزر زياده .. اعرف اساليبه الملتويه ..
مهره: اسكتي جده .. ميت عليه .. وهو ماغير يروح ويجي ويبوس .. وجدي وجدي .. هم حاسينه عساف وانبعث من جديد ..
زينه : ياعمري .. محروق قلبهم على ولدهم ..
مهره : يعين الله وانا اختك .. المهم لهي صبحا .. لاتجي بكره ..
زينه : والله انتي عارفه صبحا .. دامها قالت بتجيك .. ماراح يردها شي ..
مهره : خلاص بشوف الوضع انا .. يلا سلام ..

قفلت من اختها .. واستمرت تنظف الشرب من العشب الضار ..
وكانت متوتره ..
فاراحت تفرغ طاقتها بالشغل ..
جا فارس .. وتوسعت عيونه: مهره شتسوين ..؟!
رفعت راسها .. وامسحت جبينها:
اشيل العشب ذا يأذي الزرع..
فارس جلس نص ركبه يمها : ماشاء الله كيف تميزينه ..
ضحكت ..: خبرة سنوات .. بس شوفه واضح بين البقدونس والكرفس .. اللي بالحوض ..
فارس : وش لك بالشقى عاد .. قومي خلينا نسوي فعاليات ..
مهره مستمره في شغلها: مثلا ً..؟!
فارس : الاسطبلات .. ولا نلعب تنس .. ولانسبح .. اي شي ..
مهره : بلقيس ماصحت ..؟!
فارس : لاا .. شكلها ماراح تصحى الا لاجينا نمشي ..
مهره: ماتصالحت مع ابوك ..؟!
فارس بانفعال: مو من جده .. زعلان علي عشان الساحره ..
مهره: عيب فارس .. يحق له يزعل .. خرشت زوجته .. وقبلها كنت مخربها .. ومزعله .. يعني واضح ان مصايبك ورى بعض .
فارس: لا والله .. بس ابوي .. جدي .. ومايحب المزح .. ولو ماخذ الامور .. بضحك .. كان باللعكس يكلمها ويقوول اعجبك المقلب .. بس يععععع .. حياتهم تجيب المرض.. ابوي صنم .. واهي تتباكى وتقول احبك ..
توسعت عيونها وهي ترمي اللي بيدها : فارس ..!!!!
جلس ع الارض وتربع .. ومنفعل :والله من جدي .. وعاد هيا .. يع يع يع ..نظام هذول اللي تناديه بوفارس .. وبوفارس .. رسميات .. ولاوحده تعرف له .. هذيك ..عاد مسويه نفسها متصالحه مع نفسها .. ولو يتزوج فوقها عشر عادي .. اهم شي .. (مرني يابوفارس .. خل اشوفك )..
مهره بعصبيه: فااارس عيييييب .. مو من حقك تتكلم عن خصوصيات ابوك .. ولا من حقي اسمع ..
فارس منقهر : مهره .. انتي يوم يومين وبتمشين .. بفضفض لك وتروحين .. باللي قلته لك .. ماقدر اقول هالكلام لاحد .. حرام ابوي روعه .. يستحق افضل ..اصلا لو يخلي امي موضي تختار له .. ممكن تجيب له شي زين .. بس هو يتزوج مادري شلون .. لانه اصلا مايبيها تعجبه ولايبي يحبها ..

مهره : حياته فارس .. ولاهو صغير ولاسفيه احد يفرض عليه اسلوب حياته..
فارس: المشكله قلبه يزيد شقا .. ونفسيته تدحدر .. مع كل زواجه .. مهره ماني صغير .. تعرفين ابوي شيصير فيه .. كل ماتزوج .. يتذكر امي زياده .. ويروح يقارن .. ويطلع بنتيجة مافي مثل نجود ..
مهره مصدومه من كلام فارس ومخه الكبير .. وكيف خايف على ابوه وموجوع قلبه عليه .. !!
مهره : طيب احكي معه .. قول وجهة نظرك .. واضح انك اهم واحد بين الكل عنده .. بيسمعك ..
فارس شرد .. وباين فيه غصه : الامور هذي مايناقش احد فيها ابد .. ترى ابوي مايناقش في امور حياته .. ولا امور حياة احد .. حواراته بسيطه ومايتعمق .. ممكن يناقشني عن اموري انا .. ابوي عملي حيل .. ومندثر بشغله اللي بلندن ..

مهره .. هي اللي شردت .. في الزرع .. المكالمات اللي حصلت مع سيف .. وتعمقه معها .. هل نفس سبب فارس اللحين .. اني بمشي .. وبشيل فضفضتهم بعيد ..

دخلت شوكة بيدها : اوووش ..
فارس نقز: وش فيك ..
فتحت كفها .. تحاول تطلعها: شوكة..
فارس باللهفه بعيونه يجي يشوف كفها: خبله انتي .. في عمال يشيلونها ..
مهره تحاول تعصر الشوكه عشان تطلع وهي تتوجع .. وفارس يحاول يسحبها ..
مهره :اصبر فارس .. خلهاا انا اشيلها ..
فارس : لاخلاص صدتها .. يلااا يلا طلعت ..
جا سيف .. : وش فيكم ..
مهره نزلت شالها بيدها الثانيه ..
فارس شال الشوكه .. وطق يد مهره ..: دخلت شوكه بيدها .. جالسه تنظف الحوض ..
سيف بدهشة: وليه تنظفينه ..
مهره تنفض يدها : يوووه وش فيكم مستغربين .. عادي كل يوم انظف بمزرعتنا ..
سيف : لاتنظفين قومي انبسطي وتقهوي .. اللحين ترجعين وتقوول جدتك كارفين بنت ولدي ..
مهره بصوت عالي : لااااا أوفر .. والله ..
فارس .. كان بيمشي .. ان ابوه من جاو مايكلمه ..
بس وقفته مهره .. ووقفت وهي تقول : سيف طلبتك ..
سيف : آمري ..
مهره : ارضى عن فارس .. والله يمزح ..انا في وجهك .. لاتردني ..
فارس .. وغير معتاد على واسطات بينه وبين ابوه .. لان سيف اي احد يحشر نفسه بينهم .. يتحمل اللي بيجيه حتى امه وابوه ..
فارس يأشر لها .. يعني قفلي الموضوع ..
لان خايف من رد قاصف من ابوه ..

لكن والغريب .. ان سيف سكت .. بعدين رفع حاجب .. :
هو كلب ومايستاهل .. بس ماردك يا أم سيف ..
ضحكت مهره وبحماااس :لاهنت ياخيي ..

فارس .. ويستبشر وجهه ..
نقز وضم رقبة ابوه وزين ماكسرها ..: ويبوس خشمه وراسه .. وخده .. :
ياعميري يايبه .. عساني مابكيك ..
نبط جبهته:
لاتتليقف على نوف .. فكني ..
فارس : على هالخشم ..
مهره تطالعهم ببتسامه حلوه ..
.....
بعد فعالياات جميله في النهار ..استمتعت كثير وضحكت .. في جو العائله ..
بلقيس برضو صحت .. وفليناها سوى ..
بعد ماتعشينا .. سويت انا الشاي .. ومثل ماأحبه .. قطفت شوي حبك .. وحطيته معه .. سكبت للجميع ..
ابوي سعود .. باستمتاع وبمد بعد ماارتشف الشاي: آاااااا يباااا .. كاااايف ..
ضحكت مهره : بالعافيه عمي ..
سيف وما ان عانقت شفتيه كاسة الشاي حتى .. طرئ عليه صوتها وهي تدندن لسيف ليغفوو ..
قبل ايام في بيت جدتها .. !
ارتشف الشاي بهدوء ..
به نكهة لاتعبر الا عن مهره .. الشاي المخمر .. والحلا الموزون .. ورائحة الحبك العريقه ..!

فارس يشرب شاي ويضيف سكر: مهره خليك معنا والله نبيك .. تعودنا عليك ..
مهره جلست وتضحك: بالله .. ايش هالتعود السريع ..
فارس يطلع صوت وهو يرتشف الشاي بتلذذ : ترى جد مامزح .. بيتنا مافيه الا كم نفر .. خليك مع سيف وادعمي العدد .
مهره: وجديده من يدعمها ..

الكبار مسوين يشربون الشاي بهدوء وتركيزهم على الحوار ..
ليستشفون وجهة نظر مهرة .. من البقاء..
فارس : جدتك ..! انتي كنتي متزوجه عساف اصلا ً .. يعني ماهي مشكله .. باين متعوده ع الوحده .. وماراح يهزها بعدك ..
مهره : ياشيخ ..!
بلقيس : وبعدين ..هنا في ابوي .. وفيه سيف .. راح يعوضون سيف الصغير الأبوه .. الي موموجوده هناك ..
مهره بدت ترتبك ..النقطه الأخيره .. صح . مئه بالمئه صح .. رفعت عينها لولدها كيف لاصق في جده ويلعب بالايباد .. جنبه ..
تكلمت : بين فتره وفتره نجي ..وانتوا تجون .. ماراح يحس سيف بانقص ..
موضي .. بحنية الأم :
ياقلبي يامهره .. طيب ليه مايصير صدق.. بيت عساف بيتك .. ظلي معنا ..مليتي البيت انتي وولدك.. والله انبسطنا فيكم ..
تلعثمت مهره .. وانكمشت نبضاتها .. مايقولونه لايمكن .. ابدا ً.. !!!
تمتمت : والله وانا كذلك .. بس الديار طلبت اهلها ياخاله .. كلمت اختي الليوم .. وتقول ان جديده بتجي بكره تاخذني ..
عقد سيف حواجبه ..: انا قايل لها ثلاث ايام .. وباخذك لها ..
مهره بعصبيه : سيف انت ماتعرف جديده .. صدقوني مو ناويه احرمكم من ورعكم .. وبأي وقت حياكم .. تعالوا ..له ..
تكلم سعود ..بصوت هادي .. بس لهجه حازمه: مهره .. انا ابي ولد ولدي معي في البيت .. انا اربيه ..وترى قبله فارس .. ربى عندي ..في بيتي .. ماخليت أبوه ياخذه ويبعد فيه ..

مهره خلاص .. بتبكي : عمي .. جديده .. ماراح ترضى .. أظل .. معنى كلامك .. اني اترك سيف .. عندكم .. وانحرم منه ..
سعود : لا يايبه .. ماهو أنا اللي بحرمك من ولدك .. البيت كبير.. وبيت زوجك الله يرحمه .. مكانك فيه فوق راسنا ياعقالي ..
مهره : لاخلا ولاعدم .. وعساك ذخر والله .. والله يشهد ماقصرتو .. بس جديده.. بتعارض .. بتعارض عمي ..جدتي صارمه وماتاخذ الأمور بالسهلات ..

سعود: انا بكره اقابلها .. واتفاهم معها ..
(وهنا وقع قلبي في بطني .. والغد بات كالكابوس المرتقب .. اخاف ان انام .. فيأتي غد.. نواقيس الخطر تدق .. في جوف قلبي وعقلي .. بجنون صاااخب ..عمي سعود .. لهجته صارمه .. حتى لو حاول كسوها باللين .. جدتي .. ماراح تقبل اعيش بيتهم .. وانا زوجي توفى .. وسيف ..رفعت راسي ابيه يطمني .. لكن واضح ماعنده كلام ) ..

طلعت مهره .. باختناق .. تمشت بين الزرع .. والظلام ..
وصوت امها .. وبكاها .. وهم صغار .. يهجم على اذانها .. مثل النحل الهايج ..

في ذاك الليوم .. برد وشتى .. في بيت جدهم سالم .. ابو امها ..
صبحا .. تقفل ازرار جكت مهره الصغيره :
يلا امي اطلعي لأبوك ..
امها نوير بصراخ: الله بيعاقبك ياخالتي .. بنااااتي حرام عليك ..الله يشووف .. والله شديد الأنتقام ..
صبحا وقفت ..وراها البنات الصغيرات .. سندس وزينه ومهره ..:
اختيارك يابنت سالم ..
امها ببكى مر وصراخ : بنااااتي ..!
صبحا بثبات : بنات غازي .. يانوير ..
نوير بدموع وبكى :حرام عليك ياخالتي .. تاخذيهم من عز ابوي .. وتعيشينهم بمزرعه .. انا بناتي مايعيشون حياتكم القرويه ..
صبحا عقدت حواجبها :
اللحين .. صارت حياتنا قرويه .. وصلك ولدي السما .. واللحين هذا حكيك ..
نوير ببكى وصراخ: ونزلني الأرض .. انا بشر .. انا انسانه متعوده ع العز والدلال .. ماعيش في مزارع..
صبحا : اجل عظم الله اجرتس في بناتس يانوير .. الله يعوض عليتس ..
انهيار امهم .. وهي تجي لهم .. وتضمهم :
خافي الله .. لاتجيك عقوبه .. سندس قولي لها انكم تبون تظلون معي .. يمه زينه .. تمسكي فيني .. مهره ياعسل امك لاتخليني ..
سندس بقوة شخصيتها من يوم كانت صغيره ..مسكت عباة الجده:
نبيك هناك يمه .. مع ابوي ومعنا .. وجدتي صبحا .. مانبي نقعد هنا ..
صاحت : بتكبرون .. وبتعرفون اني ابي لكم الزين .. والله تندمون ..
زينه لصقت في جدتها : نبي جديده يمه .. نبي ابوي .. مانبي هنا ..

(اذكر عيني أمي .. وهي تنظر لي برجاء وتوسل .. لكن .. لم أكن ادرك بكاءها .. كنت صغيره جدا ً على استيعاب اللحظه والحدث .. فكنت اجيب نظراتها .. برموش عيني اللتي تتحرك .. ولم اكن لأبقى بدون سندس وزينه .. انا متعلقه بهم اكثر من امي .. في،ذاك اللحين والآن وفي المستقبل ..*جسدي تحرك لا أرادياً.. واللتصقت في جدتي صبحا .. كنا صغار .. لكن .. جدتي رغم صرامتها .. كنا نعلم انها الأمان .. كانت جدتي تلااحقنا لنأكل .. لنشرب .. لنلبس الجوارب في البرد .. امي .. كانت غاضبه .. غير راضيه .. همها الملابس الجديده .. والكعب العالي .. والألحاح المطول على السفر .. هي وابي فقط .. كنا صغار .. وكانت لاتريد مسؤوليتنا ..كانت تذكرنا دائما ً ان نبقى بعيدا ًعن الضيوف .. بعيدا ًعن غرفة نومها .. بعيدا ً عن ازعاجها في خلوتها ..تبعدنا عند جدتي حين سفرها وأبي لتجديد شهر العسل كما تدعي ..
لِما تتمسك الآن .. لِماتبكي وتصيح .. او هو استعراض ضروري للحظة الفراق .. ولحظة انفصال الأبناء .. عن احد الأبوين في حالة الطلاق .. )
مسحت نوير دموعها .. وبغضب : خليكم معها .. بس والله بتندمون في يوم غير الليوم .. ظلوا بالديره بوسط المزارع .. في شروب الحشايش .. وحيشان الماشيه .. خليكم تقرصكم الحشرات .. والبعوض .. اصلا ً ليش اتعب نفسي وابكي .. هذا انتوا نفس ابوكم .. فلاحين .. مهما الدنيا عطتكم .. ترجعون فلاحين .. بتكبرون لامدارس زي الناس ولا علام .. قابلوني .. لو خلصتوا الثانوي ..

جدتي صبحا .. وبحلف .. ما أنساه :
والله .. لاياصلون لعلام .. يرفع راس الديره قبل راستس يانوير .. !!!

تنهدت مهره عند هذه الذكرى ..
*حلفت الجده وفعلا ً.. سندس طبيبه .. زينه ماجستير في الأدب الأنجليزي .. وانا احياء .. ونجحت على مرتبة الشرف ..
لم تعيقنا جدتي .. عن العلم .. بل دعمت .. وكافحت .. اصلا ًلم تهمل ولا مجلس من مجالس الأمهات .. كانت خير أم .. كما لم تفعل أمي .. حضرت حفلات تخرجنا .. لا أنسى نزولي من المنصه نحوها وهي تبكي .. وانا ابتسم بدموع السعاده احتضنتني .. قبلت رأسي وحتى كفي .. البستني طوق ورد وحشت معصمي بأساور ذهب ثقيله ..
سندس وزينه .. نثروا البتلات فوق رأسي .. ولولا الحضور لأخرجتني جدتي من القاعه بزفه وطبول .. !
امي لم تحضر .. باركت بعد اسبوع باتصال .. كانت مع زوجها في بالي للاستجمام ..
تنهدت .. لتلك الخيالات ..*

ورجعت اتخيل دموع أمي ..
كنت ضدها ذاك الليوم .. هل بتجيني حوبتها في ولدي .. اللحين ..! ..
..............
رجعوا من المزرعه .. ركبت مهره وولدها مع سعود وموضي ..
وبلقيس ..سيف كان نايم بحضن جدته ..
وصلوا البيت .. وقفوا بالسيارتين ..
فارس : بتروح بيتك اجل ..؟!
سيف يفك الحزام له : ماشفت هيا من جيت.. ومهاوشها انا الصباح.. اروح اراضيها..
فارس : ماشاء الله .. ليتني هيا ..
سيف : انزل ورح شل سيف عن مهره .. شكله نايم ..
فارس باس خشمه : تعال بكره بدري .. ويكند لاتخرب علي الليوم ..
سيف : ضروري بجي ..واذا جات جدة مهره وانا ماجيت عطني خبر ..
نزل : تمام ..
توجه فارس واخذ سيف من جدته .. مهره بتاخذه .. قال : روحي افتحي الباب .. خلاص شلته انا ..
سيف ظل يناظر مهره وهي تمشي قبل فارس ..
ظل يناظرها ..لمن دخلت وماسكه الباب ..
وبس اختفت ..
تنهد ومشى ..!
........

توجه سيف لبيت هيا .. كلمها .. ردت بزعل : هلا ..؟؛
سيف : اجهزي بمرك ..
هيا: مابي .. اصلا ًانسدحت بنام ..
سيف يحاول يسيطر على اعصابه : هيا .. واحشتني .. ابي اشوفك ..كيف ..توحشيني انتي واروح لنوف يعني ..؟!

سكتت .. وظلت ساكته ..
سيف اللتزم الصمت اشوي .. وهو يدخن .. بعدين ابتسم : خمس دقايق وبكون عند الباب .. تمام ..؟!
همست : تمام ..

قفل وضغط على جبينه بقووه .. كم هو مرهق .. ان تدعي المشاعر .. وان تمارس رجولتك على امرأه لايجذبك فيها الا رغبه وجسد ..
كيف مات قلبي بعد نجود .. !
اصابني القحط والجفاف .. انهكني الجمود ورب الكعبه ..!
وقف عند بيتهم وعطاها رنه .. وظل ينتظرها ..
وصوت مهره يرن في اذنه:
الحاجز اللي ينهدم بين المره والرجال .. انا اشوفه اختلاط مشاعر .. الله اكرمنا عن الحيوان .. ياسيف ..
تردد صدى كلامها في اذنه بشكل مزعج .. (الله اكرمنا عن الحيوان ياسيف)..
مانتبه لهيا .. اللي طلعت من البيت .. وقربت .. ماحس فيها الا وتفتح باب السياره .. وتركب .. وتقول : الحمدلله على سلامتك ..
ابتسم .. وهو يتكي كوعه على النافذه .. ويتأملها ..
كانت تطالع قدام .. ومو ملتفته عليه .. هيا ضعيفه .. وطولها كيوت .. كانت متحجبه مو متغطيه ..
قال : زعلانه ..الى الآن..
هيا دون تلتفت .. بعتب : عادي ..يابوفارس .. حصل خير ..
توسعت ابتسامته :
والله عرفت قدري ..
اللتفتت بحده : وش تقصد ..؟!
رفع حاجب:البوز شبرين .. وكذا استقبالك بعد ثلاث شهور غياب .. هيا انتي حتى ماتناظريني ..
هيا وتضعف اصلاً.. قدام عيونه .. وكيانه المهيب .. قالت وهي بتبكي: والله اشتقت لك .. بس وبعدين ..؟!
تحرك بالسياره .. : وش لك في بعدين .. احنا الليوم ..
هيا: سيف لنا سنه ونص من تزوجنا .. لو بعد المرات اللي احنا فيها مع بعض والله ينعدون .. خذ يدها .. وباسها:
كنتي موافقه .. وقت جيت وخطبت .. لاتنكرين ..
هيا باحباط ..وهي تاركه كفها في يده: كنت متأمله اغيرك .. كنت اضن بقدر .. بس انت تعلم الواحد اليأس ياسيف ..
سيف وانوجع قلبه .. كم قلب جرح وحطم .. ياما وياما .. داس على مشاعرهم ومشى .. دون يلتفت ..
كملت: ماكنت متوقعه بتجي هالفتره .. كنا نخطط ونخطط ع المالديف .. لولوه حجزت حتى الفيلا .. وانت مُصر ما أروح .. ادري ماهو حب فيني .. بس عشان تعبي الفراغات ..

حس بصوتها تغير .. وباين تبكي .. اللتفتت لشباك وهي تمسح دموعها .. :
والله خاطري اروح .. والله..
سيف بهدوء: حتى وانا توني جاي ..
هيا ببكى: سيف انت عودتني على غيابك .. لاتجي تشره .. انت عودتني وتعودت ..

مانتبهت ان خذ فره ورجعها لعند بيتهم .. وقف .. واستغربت ..:ليه رجعنا..!!

فتح درج السياره .. طلع ظرف..: جوازك ومبلغ حلوو .. استمتعي حبي ..
شهقت وهي تحط كفها على فمها: تمزح ..؟!
داعب انفها بسبابته:
المهم حطي واقي شمس .. لاتجيني سودا من هناك ..
ضحكت وعيونها تدمع وتطلع الجواز .. : من جدك سيف .. ماني مصدقه ..
سيف بملكعه:
شوفي ان طولتيها بهون .. فرحتك بالجواز .. اكثر من فرحتك بجيتي .. وصل جرحك..
هيا بفرح واضح:ابي اضمك .. كيف ..؟!
مد ذراعه لانهم يم بيتهم اصلا وظلام ..
ضمته بقوه وعقدت حواجبها: مو رايحين بيتك ..؟!
باس خدها: انا جاي عشان اعطيك جوازك .. انتي كلمتيني عشانه الليوم..
هيا بضيق: مو معناها ماروح معك ..اجل زعلت ..
قرص خدها:مازعلت .. بس بكره ويكند عند فارس .. وبروح عنده .. خلاص انزلي ورتبو حجوزاتكم ..واذا احتجتي شي بلغيني ..
هيا: اكيد مازعلت سيف؟!
ابتسم: والله مازعلت ..انزلي لاطولينها وهي قصيره..
ابتسمت: احبك ..
يفترض والطبيعي يقول وانا احبك .. لكن ماتطلع منه .. حتى لو بخبث حاوولو يسحبونها منه .. همس : انتبهي لحالك ..
ابتسمت بغصه : وانت بعد .. (واضغطت على اصابعه مودعه) ونزلت ..
وركضت داخل بسرعه ..

فتح النافذه ويدخن بشرود .. شغل مقطوعة باخ .. طول الصوت حتى كاد ان يفجر طبلة أذنه .. كان يتوجه لبيته ..
مقارنه الصوت الصاخب من المسجله .. بداخله .. كان همس..
فكر يكلم نوف ..
لكن لا .. مايبي ..
وقف عند بيته ..ودخل .. شغل الانوار في الصاله .. البيت مئهول بالخدم فقط ..
رغم اتساعه وفخامته ..
مافي عايله ..
هناك نسخه في لندن .. منزل بلا عائله .. مايفلح حتى مع فارس ..
في ذا البيت مايحب يقابل حريمه .. فانادر يجي .. وفي لندن .. مايبي يدرس هناك .. ياخذه بالاجازات معه ..

فجأه في متاهات حياته وشتاته وصل للنقطه ..
كيف لو اصرت جدة مهره .. تاخذها .. وكيف لو اصر ابوه تبقى ..!
قام وهو يزفر بقووه.. صعد لغرفته الخاصه له .. بعيد عن غرفة نوف وهيا..!

وتوقف مخه .. وش الحل لو صار عناد بكره .. والضحيه مهره ..
فقط مهره ..!!!
****
مضت الليله بتوتر وعصبيه .. مهره ماعرفت تنام ..وهي تفكر ببكره ..
حست معدتها توجعها .. وقولونها يحرقها .. وجعها ذا .. ذكرها بعساف .. وايامه ..
راحت استفرغت ..
لمن حست .. احشاءها بتطلع .. من فمها ..
اما سيف .. يتقلب .. ويزفر .. حاول يغمض ماقدر ..
ابوه عنيد .. ولو حط شي في راسه بيسويه .. مثل ماطرد عساف ومالتفت لاحد ..
بيخلي ولده.. عنده وماراح يلتفت لأحد ..
قام من مكانه ..
فتح الشرفه وطلع ..
شغل زقاره .. دخنها بشرود .. مهره .. وعدها .. وماراح يخذلها ..
قلب جواله بيده ..
الأعتياد ..
*هو لم يعتد الأعتياد .. لكن ..!
لما بعد يومين من مكالماته مع مهره .. في هذا الوقت .. يشعر انه اعتاد .. *
تردد .. وقاوم .. يدري انها صاحيه .. ومتأكد .. بس .. !
:لا .. ماراح اتصل ..
تعرق جبينه للمقاومه .. يبي يقول لها .. تطمني ..وانا معك ..
بس هالكلمتين ..
لكن عليه قمع عادة مهره وصوتها .. جلس على كرسي قدامه طاوله .. والجوال عليها ..رفع راسه وزفر بقوه ..
*****
جات الجده .. والجميع استقبلوها بحفاوه وترحاب ..
موضي وبناتها ماقصروا .. ومهره .. ضلت متشنجه طول مدة تواجدها ..مع ان ماطرح موضوع ..المغادة والبقاء .. الى الآن ..
بعد عشى حافل .. ووليمه .. الجده وهي تشرب فنجال :
يلا يامهره .. لايتأخر علينا الوقت اكثر .. قومي جهزي اغراضتس واغراض ورعتس ..
وقفت ..مهره..
وموضي بسرعه : اصبري مهره .. ام غازي ..اقعدو الليله وعيني خير ..
صبحا :بيض الله وجهك يا ام سيف .. بس ماقدر ابيت الا في مكاني .. اخلصي يا مهره ..
بلقيس جات للصاله اللي قاعدين فيها:
ابوي يبي يكلمك ياخاله ..
عقدت حواجبها .. وتطالع مهره .. اللي تحاشت عيونها.. وبعد صمت ..قالت وهي تنزل الغطى على وجهها :
ماعليه يابنتي .. بيجي .. ؟!
قامت موضي : تعالي يا ام غازي مكتبه اهدى ..
قامت .. وراحت مع موضي..لغرفة المكتب وقفلوا الباب ..

بعد دخولهم سعود.. رحب وهلا ..في صبحا ..
شكر فيها على حسن تربية مهره .. ومدح في اخلاقها ..

شوي بدا الجد .. وبدا الشد .. بعد مااقترح سعود ان مهره تبقى ..
مهره وجمان وبلقيس .. كانوا وااقفين عند الباب يسمعون ..
واعصاب مهره في المحك .. اصرار الجده واسبابها .. وسعود واصراره .. وانه سيف ولد ولده وهو احق فيه ..
مهره بيدها جوالها وتتصل بسيف .. اللي طلع من شوي ومارجع .. وكل يجيها مغلق ..
جمان بدهشه:
مهره لاتبكين .. كل شي له حل ..
انتبهت لدموعها .. : بمووت جمان .. اثنينهم عنيدين .. اثنينهم بيجيبون العيد فيني ..

راحت طلعت من باب الفيلا علها الابراج .. تبي سيف يرد ..
وقت طلعت .. وترن ..وتبكي وتكرر: رد .. رد سيف .. تكفى رد .. وعدتني .. لاتخليني..
انفتح باب الكراج .. ودخلت سيارة سيف .. اللتفتت باللهفه .. ونزلت العتبات بسرعه .. ركضت ناحية السياره ..

سيف انتبه لها وفتح الباب ..
*وقعت عيني على مهره .. كانت فاره من الخوف إلي ..تركض باتجاهي أنا .. عاصفه الدنيا بها .. لم تنتبه لشالها االذي لم ترفعه على رأسها ..لم تنتبه وهي اللتي تشبثت فيه وحرصت عليه طوال مدة مكوثها هنا ..!!
آمنت ان للأشخاص ..نصيب من اسماءهم ..
مهره .. وكانت مهره .. !!
مشدوه ..
اهي حقيقه .. او عقلي يبالغ .. !
كيف يأتي جمال مهره .. على هيئة موجة كارثيه .. باتجاهي ..
فلم افلح على قض البصر .. ولم يكن هناك وقت حتى لاستوعب .. المصيبه ..
ثواني وكانت تتشبث بذراعي بتوسل وانهيار :
سيف .. ووينك .. سمعت عمي يقول بياخذ ولدي .. جدتي .. جدتي .. مارضت .. سيف بياخذونه .. بمووت ..

*لحظه .. اريد ان اركز ..في شكواها ..لاعيني مهره ولا انفها ولا تقاسيم ملامحها .. تجعلني اركز ..شعرها الملتف ككومة حرير فوق رأسها .. وخصلاتها المتمرده .. عثت في كياني والله .. ارقب عرقها النافر في منتصف جبينها .. ودموعها اللتي تحرق عينيها الناعسه .. ذعرها وهي تنبهني : سيييف سوو شي ..
سيف :وشهولا تبكين اللحين .. واجهي الموقف ..
مهره بصياح رافعه عيونها له:
مالي حق اواجه .. ابوك يبي حقه بسيف وجدتي تبي حقها فيني .. ابوك واصل .. ولاعزم بياخذ ولدي من بين عيوني .. واصلاً جدتي قاعده تقول اخذه . سيف بموووت ..قلبي بيوقف .. وغلاة فارس ماتخليني .. مافيني حيل على فراق سيفي .. وربي اموت .. والله اذبح نفسي ..
ابتسم يطمنها : لاعاد .. اذا بتذبحين نفسك عطيني اياها .. انا اولى فيها من المووت ..
صاحت بانفعال من بين دموعها :
سيف تتريق في عز ازمتي ..
ولما حسها بتجيب العيد بصوتها العالي .. سكر فمها بيده .. وطالع عيونها .. وبحل سريع .. فكر فيه طوول وقت طلعته بالسياره .. ودعمه عيون مهره وبكاها .. بحزم:
مهره .. تتزوجيني .. !
توسعت عيونها بقووووه حتى كادت تخرج من محاجرها ..
بتصرخ بقوووه .. بس شد على فمها .. : لو تزوجتيني .. بتبقين مع ولدك هنا .. رسميا ًمايفرقك عن ولدك الا الموت ..
توسعت عيونها زياده .. وهو يقول : ايه .. ولا لا .. اخلصي ..!

******
بعد قليل .. دخل سيف وتوجه لمكتب ابوه .. وراه مهره اللي متغشيه بالشال الكبير .. عقد حجاجه:
وش عندكن واقفات ع الباب ..
جمان بعصبيه : ترى جدة مهره شكلها بتخلي سيف وبتاخذ ..
وقبل تكمل فتح سيف الباب .. وكان مسلم على صبحا اول ماجات ..
فقال : اللحين انتوا مجتمعين على شي يخص مهره وولدها ولا ..؟!
ابوه بعصبيه : ام غازي .. ماتبي ترسيها على بر ..
سيف بحزم : سئلت سؤال يبه .. ماجاوبتن ..
ابوه بانفعال: ايه عن مهره وولدها ..واحنا وش موضعنا الليوم عاد ..؟!
سيف افسح الطريق لمهره وراه:
اذا ًلو تكرمتوا .. اول الموجودين في الجلسه مهره .. هي تقرر وهي تقول وجهة نظرها ..
ام غازي بانفعال: مااعاد باقي الا هي .. مهير من متى تعرف مصلحتها .. القرار .. يقولونه الكبار .. وهي تنفذه .. وروحي جهزي قشتس .. والورع اهله احق فيه ..
مهره بانهيار: حرام عليك جديده .. تبين امووت ..
وقفت جدتها: ماحدن يمووت الا بيومه .. ماماتت امتس قبلتس .. وانا خذتكم ثلاثه من عيونها..
سعود بعصبيه ورجا: ذكري الله ياام غازي .. البيت بيت مهره .. وماحدن غريب عنها في بيت زوجها ..
ام غازي : احنا نااس تعرف الاصول يابوسيف .. البيت به رجاجيل .. ومهره زوجها الله يرحمه .. بيت ابوها أولى بها .. والورع ورعكم .. وانتوا لكم حق فيه .. انا قبلك خذت بنات ولدي ..وربو في يدي .. مامنعك عنه .. ومهير ..يوم يومين تبتسي .. ومصيرها تتعود ..

موضي اوجعها قلبها على مهره .. اللي تبكي وتتشبث في جدتها :
جديده .. لاتسوين فيني كذا مو انا عينتس .. ترضين توجعيني ..
سعود موجوع .. ومصر على رايه عل الجده تغير رايها .. وتخلي مهره ..
الا انها اسحبت ذراعها من بين يدين مهره .. :
مهره .. ابلعي لسانتس ولاطولينها .. ورانا طريق..
سيف بهدوء :
ام غازي .. طيب وش قولك .. لو طلبت يد مهره .. وتزوجتها .. وحفظت مرت اخوي وولدها .. وسواها قبلنا الأولين ..

صدمه من القنبله .. اللتي رماها سيف ..فتفجرت واقتلعتهم ..
سعود عقد حواجبه .. ويده تشد على عصاته ..
جمان وبلقيس شهقوو بوقت واحد ..
ام غاازي : وشهووووووو ...!!!!!!
موضي متهوله: لحظه سيف .. ترى .. مهره ماهي .. مثل ..
قاطعها وهو ماد كفه يوقفها عن تكمل :
ادري مهره .. لاهي مسيار .. ولاهي بنت تتطلق .. مهره باخذها في ذمتي ..لمن امووت يمه ..
شهقت موضي بفرح ....
سعود طالع ولده : سيف ..!!.انت عارف وش تقوول ..
سيف باللهجه موزونه: يبه .. ماقلت هالشي الا بعد تفكير .. واكون ممنون لو وافقت اام غازي ومهره على طلبي..

ام غازي ومنلبخه من الطلب الغير متوقع : مهير قايله ماتبي تعرس بعد عساف .. ماغصبها على شي ..
اللتفت لمهره اللي كان متفق معها بره على كل شي : ها مهره .. وش رايك ؟!..
مهره .. واللي كانت متغطيه بشالها .. الكل مايدري عن انفعالاتها ..
مهره وقلبها يكاد يقفز من مكانه .. يدينها مثل الثلج .. رجولها يمكن تخونها وتطيح ..
الزواج بعد عساف .. ؟!
كانت حالفه ماتجربه ..
لكن .. !
بعد الاتفاقيه اللي تمت مع سيف .. ممكن تكفر عن حلفها ..
لأنها ممكن تكون الوسيله الوحيده واليتيمه .. لضمها مع ولدها .. في بيت واحد .. بدون تعسف الجده .. ولاجبروت سعود ..
بخفوت قالت :
موافقه ..!
توسعت عيون الجده .. وبخوف عليها :
لاتسوين شي ماتبينه ..مهره..حياتك يمه .. لاتضيعينها زود ..
مهره بغصه : انتي ماتبين اظل .. وعمي سعود يبي ولد ولدوه .. انا بدون سيف امووت جديده .. انا مو مثل امي .. انا عايشه عشان ولدي وبس .. ماقدر اعيش بدونه ..
سعود .. كان ممكن ان ينثني ..
لكن ..!
اغرته الحبكه والديباجه ..
مو عشان مهره وولدها بس .. عشان ولده سيف .. جزمه في السالفه وحله في الزواج بـ مهره .. ممكن يغير شي فيه اهو ..بعد نجود ..

وقف سعود وضرب بعصاته الأرض : اجل على بركة الله .. راح نجيكم ياام غازي .. ونطلبها من عندك رسمي.. واللي خاطركم فيه تم قبل تقولونه ..وخير البر عاجله ..
********
في لندن .. ومن احد المطاعم الفاخره ..
رجل وسيم بملامح حاده سمراء .. وملابس رسميه كلاسيكيه .. بدون ربطة عنق .. يبدو عمره اربعين او اقل بقليل..
تجلس معه ثلاثينيه جميله جدا ً بشعر اسود وعيون زرقاء مثل البلور ..
ماريا .. تشرب شوي من الكاسه وبانجليزيه:
وليد .. الأمور تجري على مايرام .. وقد اتفقت على السعر مع مستر خوسيه .. ماهذا الشرود .. ؟!
وليد بتنهيده : ليس هذا ما أفكر فيه .. هناك موضوع يشغل ذهني .. بالامس مررت في الورشه الخاصه لسيف ..
ماريا بتسائل :نعم ..!
وليد: كان قد طلب مني تنبيه آرثر في تلميع احد اللوحات اللتي سينزلها في بونهامز القادم .. وخمني ماذا وجدت .. ؟!
ماريا : تكلم وليد .. لقد افقدتني صبري ..
وليد يضغط على جبينه :
تذكرين القطعه الأثريه المصريه اللتي بيعت العام الماضي .. وقد اشتراها الروسي دانييل..
ماريا توصفها بيدينها:
هل تقصد تلك المنحوته .. اللتي تبدو كامنتصف وجه كليوبترا ..
وليد : نعم .. هي
ماريا: مابها ..؟!
وليد : وجدتها في ورشة سيف اللعين ..
ماريا بصدمه بصوت عالي : مااااذااا .. ؟!
وليد : اخفضي صوتك ..
ماريا بعصبيه : كيف وصلت اليه .. لقد كاد راجح ان يموت .. عندما لم يحصل عليها ..
وليد : لا ادري ماللذي ينويه .. هذا الحيوان .. انه يجلب المشاكل الى رأسه .. الواضح انه استطاع بطريقة ما .. شرائها .. والواضح ايضا ً انه لاينوي بيعها لراجح والا كشف عنها .. لو كنت افهمه حقا ً سيدرجها في احد المزادات القادمه .. وسيخفي حقوقه فيها .. ليجتز من راجح سعر مضاعف ..
ماريا بتوتر :سيجتز عنقه لو علم بذلك..عليه أن يأمن شر راجح .. فارغم محبته للجميع .. الا انه غضبه لايأتمن . .. سيف آااه من سيف .. لايعيش الا بالتحديات .. والمصائب ..

رن جوال وليد .. رفعه وببتسامه رد : حيالله الغاليه ..
موضي بعتب : اسكت بسك عياره ونفاق .. والله لو فيه شوية غلا كان جيت يوم سيف بيجي ..
ضحك : وربي مشغول .. ماقدرت اجي ..
(للتوضيح .. وليد اخو موضي ام سيف .. يعني خال سيف .. بس لقرب اعمارهم من بعض .. وعلاقاتهم القوويه من الطفوله مايقوله خالي)..
موضي : طول عمرك مشغول .. ماجبت شي جديد .. بس الواحد يحن .. يشتاق .. عنبوك اختك لي خمس شهور ماشفتك ..لااا وبعد لوني ماجيتك هناك ان كان ماجبت طاري ..
ضحك : موضي وش فيك .. ماكله فلفل ..الله يهداك..
موضي : الخلا بس ..ساحرتك هالانجليزيه ..
وليد يطالع عيون ماريا : اوووووف ..!
موضي : اللهم ثبت علينا العقل والدين .. لا أنت ولاولد اختك .. مافيكم سنع ..
وليد : افاا.. ماتجمعيني مع سيف الا في المصايب .. وش فيه ..
قالت له السالفه .. اللي حصلت .. ووليد يسمع باهتمام وعاقد حواجبه ويوم خلصت :
موضي ترى سيف رجال .. ودامه وعد مايخلف .. وانتي بنفسك قلتي كيف اعجبتك السالفه انتي وسعود .. ليش خفتي اللحين ..؟!
موضي بعصبيه:
غير سيف حالف يجلطن .. بعد مامشوا .. وتونا نخطط اذا بيسكنون معنا ولا في بيته .. تعرف بيته صاير ملفى لمسايره ..قال ان اكيد مهره بتظل معنا بالبيت .. ومير صدم عيشتي انا وابوه .. ان هوو بيتزوجها عشان يحلها للبيت .. وان اصلا ً مكلم البنت وهي مو رغبانه بالعرس .. وبتظل كذ بغرفه وهو بغرفه .. والفرق بتاخذ راحتها وتشيل حجابها ..
وليد توسعت عيونه: يستهبل .. !
موضي : وانا وشقول .. البنت ياوليد ذهبه .. وصغيره ماعاشت دنيا .. انا والله اعجبتن السالفه .. قلت بس .. هذا اللي بتنسيه نجود .. وكلنا راضين عنها وبيتزوجها برضا الكل .. وتستقر في البيت .. ومير يصدم عيشتي .. بحكيه بعدين ..
وليد : تبين رايي .. كملي معه الموضوع .. وكل شي يجي مع الوقت ..
موضي : اخاف اظلم بنت الناس .. عارفه عساف .. مهما تسترت البنت على حياتها معه .. عارفه انه مايحشم .. واكيد عزر فيها .. بمشاريبه .. وممشاه للحريم ..تروح تاخذ سيف .. وهذا حدود علاقته فيها .. اجل نخليها يجيها نصيب عدل .. تعيش حياتها صح معه ..
وليد : ياااااموضي .. لاتعاكسين التيار مع سيف .. خلاص .. كملي ..شفتي وعده انها تبقى على ذمته .. ذا بروحه تشبكي فيه بيديك ورجولك .. الرجل لاعب السبله كل شوي حرمه ..ولو البنت شاطره .. ماراح تخلي حدود علاقتهم كذا .. اصلا ً ولدك مايخليها .. كلب ..
موضي : واذا البنت هي تبي كذا ..
وليد : خليهم بكيفهم .. موضي خلي الامور تبدا .. بدون ضغط على الجهتين .. ولاتلزمونهم بشي .. وصدقيني .. فجأه بطيح الحواجز لحالها .. وبذكرك ..
موضي : الله يسمع منك ..قل لي ..امورها ماريا .. وش اخبارها ..
ابتسم : تمام ماعليها ..
موضي : سلم لي عليها ..
وليد : يوصل ..
وقبل ماتسكر نادها : مووضي ..
: ابووي ..؟!
وليد : اجل بتسوون في العرس سامري ..
موضي عصبت : مع السلامه..
ضحك وقفلت في وجهه ..
ماريا : ماذا هناك .. ؟! .. موضي اليس كذلك ..
وليد : انها ترسل لك السلام ..
ابتسمت:لما لم تجعلني احادثها ..
وليد تنهد وشرب من كاسه : كانت تخبرني بعض الأمور .. المتعلقه بسيف ..
ماريا : لم يمضي على ذهابه الا ايام قليله .. مالذي فعله ..
وليد : سيتزوج ..!
ماريا توسعت عيونها : بربك .. ؟!!!
الا يمل .. سأتصل به ..لن يفعلها هذه المره ..من يضن نفسه..هل مضى على زواجه الاخير سنه ..
وليد : لاتتصلي .. الأمر ليس كما سابقه .. هناك ظروف أخرى لهذا الزواج ..
ماريا باستياء : لاتقنعني .. سيف .. معضله يصعب حلها ..
وليد يمسك جبينه: لنتفائل خيراً يامارياا .. !
******



سيف في الصاله .. وفارس منسدح وحاط راسه على فخذه .. ويلعب في جواله : وقسم بالله احسن شي سويته يبه .. مهره احسن من حريمك كلهم والله ..
سيف شارد ويداعب شاربه باصبعه ..
ويتخيل الموقف اللي حصل بره مع مهره .. بعد مااقترح عليها الزواج ..
هو : ايه ولا .. لا ..اخلصي ..
مهره ارتعدت .... :اكيد لاا ..انا حالفه ماتزوج ابد ..مجنون انت ..مستحيييل ..ماهو حل ياسيف ..
سيف بهدوء : الحل الوحيد ذا .. وابوي يقدر ياخذ سيف لو بغى .. الرجل واصل .. ولو يبي خذه ودق خشوم الجميع ..
مهره ودموعها تتساقط :
انت مو فاهمني .. انا حالفه ماتزوج .. يعني لا انت ولاغيرك ..ماتزوج بعد عساف والله ..
وتوسلته ببكى :وعدتني سيف .. انا اترجاك ماتخليني ..
سيف .. ووجعه قلبه .. كيف في قمة انهيارها مو ملاحظه نفسها واقفه كذا..
مسك شالها ورفعه على راسها وبخفوت .. وعيونه في عيونها :
الزواج ذا لك وعشانك .. ومايصير فيه شي ماتبينه .. ماتظلمك الدنيا .. لاصرتي تحت جناحي .. وعد ..مابي منك شي .. ابيك انتي تاخذين اي شي تبينه .. من سيف ولدك .. لا اصغر شي في خاطرك ..
مهره وتغطي وجهها بالشال : مابي الا سيف .. والله ..
سيف : وافقي ..مهره ..لاصرتي زوجتي جدتك مالها حق تاخذك .. بتصيرين في هالبيت بدون ماحد يدقق ولايلوم .. سيف بيربى بأبوتي وابوة جده .. واذا حالفه ماتتزوجين .. صومي ثلاث ايام .. واصومهم معك .. والحياه بتمشي على كيفك .. مالك خاطر على العرس ابد .. انتي اختي وانا اخوك .. وانا قاضي وعندي حريمي .. ماطلبك شي ..
رفعت راسها : توعدني .. اظل اختك ..
ابتسم .. : وعد .. ! ..
بعدين قالت وكنها تنبهت : طيب زوجاتك .. لو دروا .... يمكن ..
قاطعها : مالهم شغل .. في شي .. ذا قراري .. انا ..

.. قطعه من حبل افكاره .. صوت ابوه وهو يكلم جدتهم مزنه وحاطها سبيكر :
والله ودنا تكوني موجوده .. وتروحين تخطبين معنا ..
الجده باسلوبها اللي يستفز سيف :
وماشااء الله .. ولدك عنده محل لحرمة .. لايكون على ذمته اربع وبياخذها الخامسه ..
سيف يطالع جهة الجوال بنص عيون .. وبخفوت :
العجيز ذي .. موتها على يدي ..
امه قريبه منه واسمعته ..بعصبيه وخفوت :
سيف شجاااك .. لايسمعك ابوك ..
ابوه ضحك :
لايمه .. ايش هالكلام .. على ذمته ثنتين .. بس ماعلينا .. ام سيف بيتزوجها رسمي .. وبتكون فيذا .. ببيتي .. يمه .. وبيكون فيه اشهار .. والله يبارك لهم
الجده : والله ياخوفي ياخذها .. ويطلقها ..اذا ناوي تاخذها لواحدن من عيالك .. شف نواف .. اضمن .. لايفشلنا مع الخلق..
سيف خلاص بيقوم يسحب الجوال .. بس فارس مسكه :
ماعليك منها يبه .. كنك ماتسمع .. انت غشيم بجدتي .. تلقاها اللحين فرحانه عشانك ..
سعود: الله يهداك يمه .. اقولك سيف كلم جدتها وطلبها .. تقولين لي نواف ..
الجده: الله يبارك له .. ويتمم له ..
سعود: عاد بنروح نخطب بكره .. واذا كل الأمور تمام.. بنملك ثاني يوم .. وان شاء الله بسوي حفله له بالمزرعه .. نعزم اقاربهم واقاربنا ..

الجده: والله ودي اجي .. بس اختك شهرها .. بتولد .. ماقدر اهملها .. لاصار ولدت ان شاء الله جيتكم ..
سعود :افاا يمه .. وحليمه وينها تظل مع مريم ..
الجده : حليمه .. ماتصلح .. ومريم تعبانه والله ماقدر اهملها .. الا كانكم تاأجلون ..
اشر سيف براسه (يعني لا .. مافي تأجيل)..

سعود: وين يمه .. اتفقنا مع العرب .. خلاص .. لاجيتوا بتجون انتي وخواتي سوينا لكم حفل جديد ..
الجده: على خير ان شاء الله .. وينه المعرس اكلمه ..
خذ سيف الجوال: يالله حيها ..
الجده : عاد مير انا ناذره .. لو اعرست عرس عربان نرضى عليه .. نسري مكه ناخذ عمره .. مع حرمتك.. بالسيارات ..
سيف توسعت عيونه:
ماودك بجمال بعد..؟!
الجده: تطنز ياولد مويضي ..عارف اني ماركب طياره ..
سيف : وانا وشذنبي عاد .. تبين طياره .. نحقق نذرك .. ماتبين .. ماحد قالك تنذرين ..
كلهم بالصاله ماتوو ضحك ..
والجده عصبت : انا قايله انت وسيع وجه وماتستحي .. والله يستر من تواليها .. يالهيس .. !
تنهد سيف : ياجده باركي .. عل لي أتوفق ..
الجده واللي تمووت في سيف من بد اخوانه كلهم بس عطبه وجني معه :
الله يبارك لك .. ويسعدك .. ويمسح على قلبك .. وياعساها زيجة الهنا والسعد والدهر يمه ..
سيف ابتسم :
بعدي والله .. ايه هاا .. شوفي وش زينك كذا ..
الجده: وعسى البنت مزيونه .. ؟!
سيف : عاد انا وش دراني .. ماشفتها .. البنت ماتمشي بالبيت الا بخدار واصلن الأرض ..
الجده بحماس :
اجل بنت عرب ومستوره .. الله يجعلها من نصيبك ..ويتمم لك ..
سيف : اللهم آمين ..
****
دخلت مهره غرفتها في مزرعة جدتها .. واسدحت سيف النايم ..
كانت ساكته طول الطريق .. غاصه .. الكلمه ماتطلع ..
وقفت تطالع سيف .. مستعده ان تبيع العمر لأجله .. ان تضام وان تذل لأجله ..
كانت .. بتعيش له لحاله..
لولا علم اهل ابوه فيه ..!
كل شي اختلف ..
وكل شي تغير ..
شالت عباتها وراحت تروشت ..ظلت جالسه في البانيو والماي الساخن ينزل على راسها .. ضمت نفسها ..
ولاتجد في الماء معزي .. ولا بين ذراعيها..اختنقت الليوم كما لم تختنق قبلا ً.. كيف آلت الأمور لذلك ..
*ياربي اسئلك الرحمه .. اسئلك الصبر .. واسئلك المعيه .. كن معي ..
فأنا وحدي .. اضام .. واظلم .. انت وحدك ترى .. وتعلم غصاتي .. وألمي .. تعلم ماأخفي وما اجهر .. ان كنت ظلمت سامحني .. ولاتبتليني اكثر مما ابتليت ..!
ياربي احفظني بما سأقدم عليه .. واحفظ لي ابني ..ياربي اضع بين يديك اختياري .. فالهمني .. لما فيه خير لي ..
فقد اخذت من الدنيا وجع اثقل اكتافي .. وهد قلبي .. واحنى ظهري ..
اخفت وجهها في ركبها : يااااارب*

طلعت وهي تنشف شعرها .. دخلت غرفتها الهاديه .. باثاثها الخشبي العتيق ..وانارتها الخافته .. ارفف الكتب ... المملؤه بالرويات ذات الطبعات القديمه .. واللتي احتلتها .. من اشياء والدها القديمه ..
براويز تحمل لوحات مطرزه .. من ابداعات زينه .. ومحاولاتها هي ..
رفعت عينها للثريا الخافته..
ترتاح جدا ً في غرفتها الصغيره .. بأصالة كل شي فيها .. وبطابع الأنتيكا في كل لمسة ..
وقفت عند جدار فيه صور ..

صورة لها ويمكن عمرها خمس سنوات .. بفستان مخمل عنابي قصير .. وأبة بيضاء دانتيل .. جوارب قصيره .. وحذاء اسواد لامع .. شعرها مموج .. وضحكتها .. مثل الشمس تلوح ..

(لِما لم أعد طفله .. واشد مصائبي .. الشوكلاة اللتي لوثت فستاني الأسباني اللذي احضره ابي من سفرته... وصوت جدتي .. زين اللي صورناك فيه .. قبل تعدمينه..)

تحسست الصوره .. بحنين .. كانت في يوم عيد أضحى .. وكان في تلك الأيام العيد بارد .. تخيلت ابوها وهو يذبح الأضاحي مع ربعه ..:
مهره ابوي .. لايصيدك الدم .. ابعدي ..

ابي .. قالها وهو يمسح جبينه بظهر يده قابض على السكين .. والشمس تسقط على عينيه .. اللتان ورثتهما منه ..فاتبدو شفافه اكثر من الازم ..
ابتسمت .. وانا اموت عشقا ًلأبي ..تصدقون لكن في عمري ذاك .. كنت انظر اليه كابطل اسطوري وهو يذبح الخراف .. والدماء تلوث ثوبه وكفوفه .. وجبينه .. !!

ابتسم .. : مهره .. ابعدي ..
هززت رأسي نفيا ً.. وقلت : ابي اشوفك ..
كنت من الأطفال قليلين الكلام في ذاك الوقت .. كنت اللطيفه جدا ًبين اخواتي .. والهادئه .. والأكثر دلالاً..
ابي كان يخاف ان تتأذى مشاعري من رؤية تلك الشعيره ..
ماذا لو وجدني الآن ومشاعري تدهس وتنتهك .. تحت ذنوب عساف ..وكأن زواجي به كان وصمه .. علي تحمل نتائجها حتى بعد وفاته ..!
ذهبت عيني لصورتي في حضن ابي .. وهو يخفيني بفروة شتويه .. ولايبان الا رأسي ..

*هلاّ تعود ابي .. وتخفيني في بشتك الشتوي هذا .. ووعد مني .. حتى رأسي لايخرج من تحته *..

صورة اخرى ابي الوسيم .. بنظارة شمسيه .. وقميص فتح اغلب ازراره الفوقيه ..
سندس وزينه تقفان .. بجانبه ويحملني انا ..
كنا في البتراء الأردن ..
اذكر تذمري من المشي .. وكيف حملني اغلب الوقت ..
وسندس وهي تهاوش ابوي : والله لو ندري كذا ماجينا .. يعني وش نشوف .. من جدك يبه .. نبي نرجع للسعوديه ..
ضحك : يابابا .. هذي آثار ..
سندس : عاد وش لي فيها .. اشوف جديده .. ظلت في الفندق .. لو ادري قعدت معها ..
زينه: خلينا نركب على الجمل مره ثانيه ..
سندس بعناد: انا ابي ارجع للفندق ..
غازي يطالع مهره: ومهرة ابوها وش تبي ..
ضمت رقبته : ابي أظل معك .. انت قلت بنشوف شي حلو بالليل ..
ابوها بتدليل : بعد راسي ..
سندس باستياء : ايه وش عليها .. هي مشيوله .. اصلا ً انزلي .. ذبحتي ابوي ..
مهره : اصلا ً انا قلت لابوي .. اذا تعب ينزلن ..

في ذاك الليوم .. لم يلتفت ابي لاستياءنا من الأثار الممله .. حتى حل الليل ..
اذكر كيف شهقنا .. وعيونا تتلئلئ وتتراقص .. وقد اشعلت الاف الشمعات .. في اثار البتراء.. كان شيء غريب وغير اعتيادي ..
جعلتنا تلك الليله ..
نؤمن اننا اذا صبرنا .. سنجد في النهايه شيء جميل ..!
لكن .. هل بعد صبري .. هذا .. سيشعل في عمري شمعه .. وتضاء حياتي مثل ليالي البتراء ..!!

نغمة اعادتني من الصور .. رسالة واتس .. فتحتها طمنيني .. وصلتوا ..؟!)
مهره باختصار ردت على سيف : ايه ..
الجوال بيدها ..
وداهمها اتصال من سندس .. وماردت .. اصرت سندس .. بمكالمات ورى بعض ..
قامت قفلت الجوال .. وطفته ورمته في الدرج ..
اكيد الجده كلمت سندس .. واكيد سندس .. بتلعنها على هالقرار ..
سكرت اذانها .. بقوه ..
ماتبي حتى تسمع تكة الساعه ولا انفاس سيف .. حتى صوت قطرات الماي من الحمام ..
*كل شيء يهجم على عقلي .. ويقتلع ثباتي .. كيف اعيد سنواتي وارفض عساف ..
ليتني رفضته ..
ليتك ياسندس رفضتي .. وأثرتي على قراري .. مثلما ستفعلين الآن ..
ليتك لم تدعمي قراري .. ليت زينه لم تتغزل في وسامته ..
كلامها يرن في اذني وهي اللتي تخجل من ظلها : وش هالملح .. اسمر وجذاب .. يابنت يجننننن .. يعني ذا آخذه عمياااااني .. راضيه لو يصبحني بكف ويمسيني ببوسه ..
ضحكة مهره: يعني البوسه بتغفر الزلات ..
زينه : يابنت .. الولد مودل .. مووودل .. انيق وجخ ..
سدت مهره اذانها بقووه .. : مااابيه .. مابيه .. مااابيه ..
طق الباب .. صبحا: افتحي يامهره بحاكيك ..
مهره بانفعال : لاتحاكيني ولااحاكيك ..
صبحا : يابنت .. تعوذي من الشيطان .. لايجيك شي ..
مهره بحده: وش بيجيني عاد .. بيلبسني جني .. ياهلا ويامرحبا .. فيه ..
صبحا وخايفه عليها: يابنت سمي بالرحمن .. ماهو زين هالكلام ... حتى لورعتس .. مايصلح ..
سكتت مهره ..
صبحا: سندس تبي تكلمك ردي عليها ..
مهره : بنام .. مابي احاكيها ..
صبحا: كلميها .. اختك بتقول لك كلام العقل .. اسمعي منها .. ماانتي رخيصه عندي يامهير..

مهره وتحس راسها بينفجر .. الضغط عندها يمكن مليون .. فجأه حست عروق راسها نفرت من جمجمتها ..
وحست بشي ينزل من خشمها .. مسحته .. كان دم ..
خذت مناديل .. حطتها تحت خشمها ..قام ينزل بكثافه ..
والجده تحن تبيها تفتح ..
اللتزمت الصمت .. تتجاهل الواقع والصوت .. في محاوله منها .. كبح اعصابها ..
شالت المناديل .. وطاحت نقط الرعاف على الارض ..
راحت الحمام وقفت عند المغسله وتغسل .. وجهها وانفها ..
وظلت واقفه لمن وقف الدم ..
طلعت .. لغرفتها .. وكانت الجده تقوول: ورى ماتكلميني .. مهره يمه .. لاتقهريني ..
مهره بخفوت وهي تجلس على سريرها:
خلاص جديده .. روحي .. بكره نتفاهم .. بنام ..
الجده: انتي زينه؟!
مهره وتطالع كومة مناديل الدم :الحمدلله ..مافيني الا العافيه.. بس تعبانه من الطريق ..
الجده: طيب يمه اقري المعوذات قبل تنامين ..
مهره بهدوء: ان شاء الله ..
الجده : حافظك ربي ..
ابتعدت الجده .. واختفت خطواتها ..
مهره : اللهم اني اعيذ نفسي .. من تسلطكم .. ومزاجكم .. وانانيتكم ..اللهم اني اعيذ نفسي .. من سوء الغد والمستقبل وكفى .. !

انسدحت .. تطالع في سيف .. مسكت يده الصغيره ..
علا السكينه تحتويها ..!
*****
سندس بعصبيه وحده:
الحيواااانه ماتبي ترد علي .. بتجلطني ..
زوجها : اتركيها اللحين .. لاتضغطين عليها ..
سندس بصياح: انت متخيل .. انها طلعت من حفرة .. وبطيح في دحديره .. انت تذكر كيف شفناها يوم رحنا نجيبها من امريكا .. بدل ماتقطع اي شي يربطها بعساف .. تروح تتزوج اخوه ..
خذها من ذراعها .. وقعدها على طرف السرير : شنوحك ياحيي ..مهره عقلها براسه .. لاهي مجنون ولاسفيه .. اذا جدتك غصبته .. هي ماراح تخلي ورعه ..
بحلقت في عيونه .. وبعصبيه :مشعل .. انت بالذات .. حضرت حالتها باامريكا .. شفتها معي يوم دخلنا شقتها .. ماهوو كيفها ... ترمي نفسها من جديد ..
مشعل بحده :
ورعها ياسندس .. حطي نفسك مكانها ..
سندس بقهر ومن بين اسنانها :
باقريح ..ماراح يمووت .. اختي مشعل .. اختي بتضيع نفسها ..موجوعه عليها وقلبي ذايب .. ماأنسى وجهها والله كانت ميته ..
بكت بانهيار :
مشعل .. مهره ظلت شهور .. بعد مارجعت ..لاصحيا ًولانفسيا ًمضبوطه .. توها ترد ..وتروح تاخذ هالقرار ..
مشعل بحده :
لاتلومينه .. لومي جدتك ..تعقد الامور وتجيب العيد .. وش فيها لاظلت مهره .. بيت اهل زوجه .. البنت ستيره وماعليها خوف .. والبيت بوه امه وابوه وخواتوه.. بس جدتك حطت العقده بالمنشار ..
سندس عضت شفتها بقوه وهي تطالع عيون مشعل ..
ودموعها تفيض .. وصورة مهره .. بشقتها بامريكا وقت راحو ياخذونها بعد وفاة عساف بثلاث اسابيع ..
لازمتها ..
همس مشعل وهو يضمها : خلاص لاتبكين ..
انهارت بكي بصوت على صدره ..
مشعل ضمها اكثر .. وداعبها : وقسم بالله ياسندس الاشرار مب حلوو يبكون .. ماهو لايق عليك والله ..
صاحت.. وهي تبي تبعده : حيووووان .. !
ضحك وهو يتشبث فيها : على قلبي .. ..
*****

بعد وفاة عساف ..
تواصلت مهره معهم .. كانت منهاره وخايفه ومو عارفه ايش تسوي ..
بغربه ووحده .. وزواج بالسر .. معها اوراق رسميه .. لكن اوراق سيف ماكانت كامله .. كان عنده الهويه الأمريكيه .. اللي حصل عليها .. من الولاده ..
لكن عساف واهماله .. ماكمل اجراءات هويته السعوديه ..
وهالشي ماتعرف له مهره ولا عارفه وين تروح ..ولاوش تسوي ..!
ماتعرف احد ابد هناااك ..!!!!

كانت خايفه من السفاره .. ومن الوضع .. اصلا حتى خايفه تتهم انها قتلت عساف ..
لما خذوه من الشقه وهو متوفي ..
دخلت في تحقيق .. ومسائلات .. وحتى الدكتور .. اتهمها بالتقصير .. والإهمال..
لأن كان على عساف الاقلاع عن الشرب نهائي .. لوضعه المتدهور اللي كان عليه ..!

في السعوديه .. مشعل وسندس .. بدو باجراءات السفر عشان يروحون لها ..
لكن اجراءات الفيزا ماكانت سهله .. وهذا اللي خلاهم مايوصلون لمهره الا بعد ثلاث اسابيع ..

(سندس) ..
بعد خروجنا من المطار .. توجهنا رأساً الى عنوان اختي ..
كنت في حالة انهيار نفسي .. وانا افكر فيها .. ومالذي عانت .. طوال تلك الاسابيع ..
كنا على اتصال معها احيانا ً.. لكنها لم تكن واضحه ..
تبكي احيان .. وتشتم احيان اخرى .. وتلعن .. تهدد بالانتحار .. وتضحك احيان لدرجة الهستره ..
وصلنا اخيراً..
صعدنا للشقه المطلوبه .. ولا واحد بالمئه كنت اتوقع .. ان ارى مارأيت ..
الباب كان شبه مفتوح .. لاني اتصلت بها من دقائق ..
دفعت الباب بكفي ..
مشعل : اصبري يمكن الشقه اللي مقابله ..
سندس : لاا ذي .. هي قالت يمين ..واسمع صوت طفل يبكي .. اكيد سيف ..
ناديت : مهره .. !!
توسعت عيوني .. وانا اشوف ارضية الصاله .. وعلب البيرة وزجاجات الكحول مرمية في كل مكان ..
مشعل بصدمه: ايش هذاااا .. ؟!!
قلبي بدء يقرع كالطبول .. وانا انظر للفوضى العارمه ..وروائح غريبه .. وصوت بكاءالطفل (ولا ادري وينه)؟!! ..

صحت : مهرررره ..!!!
سمعت صوتها تتقيئ من دورة الميااه .. تتقيئ بعنف .. حتى اني شعرت اني انا .. من سيتمزق حلقها ..
مشعل توجه جنب الكنب تحت الطاوله بالزاويه .. ومتهووول:
يااااوجه الله ...
كان سيف حبى هناك وتوهق ..
طلعه ..
وكانت المره الأولى اللتي ارى فيها سيف من غير الصور ..
رأيت سيف .. ولم استطع اخذه وانا اسمع صوت مهره تحتضر بالتقيئ .. رميت شنطتي .. وتوجهت لدورة المياه ..
وطلعت مهره .. !!!!!
لم أرها مذ تزوجت وذهبت ..
لم تكن مهره ابدا ً.. ولاحتى تشبهها ..
شهقت .. وانا أرى بقايا اختي الجميله ..

سددت فمي بيدي ..
وانا احدق فيها بصدمه قد تجرحها ..
كانت طالعه ببنطلون جينز .. وصدريه .. غير عابئه بوجود مشعل اصلا ً..
نظرت لجسدها اللذي برزت عظامه ..
ولبطنها اللذي تجوف .. حتى بانت ضلوعها بشكل مزري ومقزز ..
هالاتها السوداء غطت منتصف وجنتها .. وعيناها غائرتان ...
شاحبه .. صفراء .. بدون لون ولاحياة ..
تكلمت مهره .. لتسدد لقلبي الرصاصه اللتي اقتلعتني ..
بخواء وسخريه:
توو الناااس ياشيخه .. كان ضليتو لآخر السنه .. بدري..!!

مشعل كان اللتفت ع الجدار ..وشايل سيف ...
سندس قربت منها وهي تبكي ..: ايش سوويتي في حالك .. يامجنووونه .. ايشششش هذااااا ..
مهره والألم بادي على وجهها وباين ممغوصه من معدتها :
انكتمي .. لاتجيني بعد هالمده .. وتعاتبين ..

فجأه تغيرت تعابير مهره .. وهي تستوعب وجود سندس ..
طالعتها كذا بتدقيق .. بعدين اشهقت .. وتوسعت عيونها ..
بعدها دمعت وبكت وهي تصرخ:
سندس.. !!
سندس وقلبها ذايب : ياعينها ..
مهره .. بانفعالات غريبه .. راحت ضمتها .. وتصيح : يابعد روحي ياخيتي .. .. آاااه ياريحة ابوي .. واحشتني .. بموووت والله .. مو مصدقه ..
سندس تضمها .. وتبوسها .. وتبكي معها .. : سامحيني .. والله مو بيدي ..
دقايق وهم يضمون بعض ويعاتبون .. سندس وهي تلمس شعرها .. وكتفها الناحل :
وش اللي سويتيه بنفسك ..وش اللي هببتيه .. !!
مهره وخرت عنها .. وبتناقض في النفسيه ..وبعصبيه وانفعال :
وش تقصدين .. وش سويت ..
سندس تسحب تيشرت مرمي على الكنب .. وتلبسها اياه ..
مهره ..* كنت انظر لعينا اختي فأرى العتب .. والضيق .. وقد شمت رائحة الكحول في المكان .. وربما في ملابسي .. بل كانت تحاول تحاشي مصارحتي .. والحديث بوضوح .. لأني في نظرها ثملة .. وتريد ان تتقي شري .. رأيتها تعبر متجه لمشعل وسيف الصغير .. وتبعد زجاجه فارغه بقدمها باشمئزاز ..*
عقدت حاجبي .. لهذا الكفر اللذي يكفرونه بي ..
احسست ان ابتعادها عني .. يعني انها مشمئزه مني ..
بل اني شعرت اني انا الزجاجه .. اللتي أُخذ مافيها .. والآن تزاح بالأقدام ..
كنت في وضع نفسي حساااس .. بل كنت غاب قوسين من الجنون وأدنى ..
انحنيت عند قدمها ورفعتها ..وتوجهت للكاونتر تبع المطبخ .. وسمعت كلمتها : الله يتوب عليك ..
اللتفت بحده ..ورفعت الزجاجه بغضب ورميتها على الأرض .. لينتشر هشيمها في كل مكان ..
وصحت : الله لايرحم اللي مايرحم .. الله لايرحمكم .. كلكم .. واشوف وجعي فيكم ..
توسعت عيون سندس ومشعل وسيف رجع يبكي من جديد ..
صاحت سندس : مهره .. وش جاااك ..
صاحت بانفعال وانهيار :
قرفااانه مني .. تفكريني شاربه..شميتي ريحته بثيابي ..صح ..ورب الكعبه من نظرتك ظالمتني ..
اشرت بيدها حولها وهي ترفع في الزجاجات وترميها .وتكسرها.وتصيح: كلها له .. مات وتركها .. تذكرني بالخيبه ..
مشعل بحده: مهره خلاااص .. اهدي ..
سندس قربت منها ومفجوعه عليها : مهره ..!
دفعتها بقوه ..
وصاحت بهستيريا:
خليتوني مع عساف وحيده .. اشقاني .. ولعب في اعصابي .. علمني شنهو المر .. وشنهو الويل .. سندس مات يمي .. مات على هالكنبه .. لاعارفه أبلغ ولاعارفه شسوي ..
ضربت صدرها بيدها :
لحاااالي سندس .. لحالي .. سيف يبكي وهو ميت .. وانا ماعندي حتى رقم شرطه ..ضليت ساعات لمن الله الهمني ونزلت تحت ..وجاو الشرطه ..حققو معي .. حسسوني اني ذابحته .. اكلمكم وتقولون الفيزا .. الفيزا .. خرااااا ..
مهره بصيااح مررر :
هم خذووه اهله .. ودفنووه .. واناااا لحالي .. جثه من يدفني .. بس ابي احد يجي يدفني ..

سندس متروعه عليها جات ضمتها بقوووه .. :
خلاص امي .. تكفين .. اهدي ..
مهره وهي تجثي على الارض ومعها سندس ..وبحديثها الانهياري :
جيت ماحولي الا بلا عساف والشيطان .. كان لاضاق يشرب .. لاحس بالوحده يشرب .. لابغى ينسى يشرب .. .. والله ..لعب فيني الشيطان .. والله كنت باخذه .. بس كبيتها .. والله ماذقتها ..كنت ابي اخلص .. واموووت .. ابي ألحقه ياسندس .. مابقى فيني روح..

سندس في محاوله تهديها :وولدك .. من تخلين ولدك له ..
مهره بهستيريا تتلفت .وكأنها تذكرت ولدها. : وينه .. وين ولدي .. هو كان يحبي هنا .. وووووينه ..
سندس بهلع .. وتحس ان مهره جنت ..مسكتها وتطالع عيونها : بسم الله عليك .. مهره .. سيف عند مشعل .. شوفيه شايله ..
طالعته بخوف ورعب .. وقامت بسرعه .. وسحبته من يدين مشعل ..
وضمته بقووه :
تعال يمه تعال .. ماحد ياخذك مني .. فدوا.. قليبي انت ..
مشعل وسندس ..
يطالعون .. بعيون ممتلية دموووع ..
كيف وصلت مهره ..
لهذه الأزمه النفسيه .. الحاااده ..
وكيف ستخرج منها ..!!!

ضلوا معها اسبوعين تقريبا ًفي امريكا .. دخلوها للمستشفى .. وخضعت لكورسات من العلاج .. لمعدتها .. غير المغذيات والاملاح .. اللي فقدها جسمها ..
احتاجت لادويه للأكتئاب .. والكثير من المهدئات .. !

(تبين لي ان مهره .. لاتعاني فقط اكتئاب .. بل جزع وقنوط من رحمة الله .. كانت بعد فاجعة عساف .. قد تركت الصلاة ..والذكر .. فقدت الشهية .. انطوت .. تأخذ مهدئات .. وادويه منومه بدون وصفات ..سيف كان تحت رعاية الله .. كانت رغم حالتها .. الا انه الشيء الوحيد اللذي لاتنسى ان تنظفه وتطعمه .. كانت اختي ضالة .. ضائعة .. عانينا جميعا ً حتى استعدناها .. واستطعنا السيطرة على بقاياها .. كل هذا .. وانا لاعلم عندي عن عساف الا انه مدمن كحول ومات بخطيئتة .. واعرف .. انها تخفي الكثير عنه .. لكنها لاتفضي .. أبعد كل هذا .. يأخذها اخ عساف .. )

اذكر وجهها الملائكي في المستشفى خلال فترة تنويمها.. دخلت وانا احمل سيف ..ومعي مشعل ..
كانت نائمه .. بياض وجهها .. قريب من بياض الوساده من شدة الشحوب ..
كفها موصوله بالمغذي .. والكف الاخرى بها كنيولا ولاصق ..
اعطيت سيف لمشعل وانحنيت اقبل جبينها وانفها واحمد الله ان اختي على قيد الحياه ..
فتحت عيونها ..
وابتسمت وبهمس : يعني ذي بوسة ولاطيب خاطر ..
ابتسمت سندس : بعد حيي .. روحي .. شلونتس اللحين ..
مهره بعيونها الذابله رفعت يدها لخد اختها: ورب الكعبه .. ردت اللروح فيني .. من شفتك ياقليبي .. محلوووه زووود ..
تنحنح مشعل : لاتعطينها على جوها هي خلقه ماتشوف أحد ..
ضحكت مهره بتعب :
يحق لها ..
ورفعت عينها لمشعل اخوهم الروحي مذ تزوج سندس .. :
مشعل امانه .. انسى اللي صار .. والله مفتشله كيف شفتني بهالصوره

مشعل بعتب:
افا عليتس ..اهم شي انتي بخير .. شدي حيلك .. عشان نرجع ..
شردت بعيونها .. لكنها لم تدمع ..كانت مهره .. وبعد تلك الواقعه جفت دموعها .. تبلدت .. ظلت شهور نستجديها البكاء .. نعم وصلنا لمرحلة اللتي نطلب منها البكاء ..
كانت تغص به ..
تصمت لساعات طويله .. لأيام ..
لاتبكي .. ولاتهمس بأي كلمه ..!

نبهتها سندس : نحن هنااا .. مانبي سرحان وفهاوه ..
مهره بغصتها : امانه مشعل .. وامانه سندس .. لااحد يدري عن الوضع الاسود اللي شفتوني فيه .. عشاني .. خلوه بينا ..
سندس .. داعبت شعرها :
لاتشيلين هم اللي صار .. نسيناااه .. وانسيه ..

*لم ننساه .. ولم تنسه .. لكن ظل سر بيننا .. كل ماقلنا انها كانت حزينه ومتأثره ..
وادخلناها للمستشفى بسبب تقرح معدتها .. احترمنا حقها في التكتم ..
كيف .. كيف اسكت وارضخ .. واجعلها تأخذ اخ عساف
..............


انتظر رايكم في البارت ..
سواء هنا او بتويتر ..i_em1234@

اتمنى البارت وافي ويحوز على رضاااكم