البارت 48
#ضحيه_لمن_لايرحم_ج٢
بقلم زهراء الحسناوي
،،،،،،،،،،،،،،،،،
بالبدايه حابه انوه على نقطه مهمه
اكو بنات بكروبي من كد مامتحمسات للروايه
صارن ينزلن بارتات يتوقعن بيهن الاحداث
قبل يومين وحده من المتابعات نشرت بارت متوقعه بي ابن حنان بي نفط ومحترگ وذابات التهمه براس زينب هلشي ماله اي صحه ومجرد توقعات لااكثر
واليريد يتابع تسلسل البارتات يتابعهن على حسابي بالواتباد 🌹
،،،،،،،،،،،،،،،،،،،،،،،،، ،،،،،،،،،،
بعد ذهابها
قامت بمراسلتي لتسأل عن احوالي
كيف حالك؟
هل لازلت شرها بالتدخين؟؟
وهل تعانق الليل وكانه صديق قديم وتظل سهرانآ؟؟
هل لازلت ذلك الرجل العصبي القاسي الثائر دومآ؟
وكيف يمر يومك؟
الا تشتاق لي؟
اجبتها
قللت التدخين ولم اعد ذلك الشره
اما عن السهر صرت انام مبكرآ خوفآ على اسفل عيني لكي لايحتله السواد
وعن برودي الأن انا عباره عن كتله من الثلج
برود اقرب لبرود الجثث
أما عن يومي يزداد جمالاً لأنه يخلو منك
أعلم جيداً أن في رأسك تساؤلات كثيرة
ابرزها كيفية نسياني
لكن ياحلوتي لن تفارقك لعنتي فلم يغادرني احد من قبل ألا وهو يحمل همآ لمفارقتي
أنا ذلك المرض الذي لاعلاج له
ومحاولاتك للنسيان ستفشلين حتماً
فلن تجدي مأوى لك مثلي
تحملت انانيتك
برودك
جنونك
واجزم انك لن تجدي رجلاً يحتويك ويحاول اسعادك مثلي
لن ادعو لك بشي سوئ أن يعينك الله
لإيجاد طريقة لنسياني
ذياب
غصون،، شباج المضيف مفتوح شويه اكدر اشوفهم اباوع ذياب صفن بوجه ابوي مصدوم
ابو مثنئ،، ابني السالفه موهينه مثل ماانت ماتقبل على عرضك اني هم هاي بنتي ومرتك واختك طعننها بشرفها
هسه اني صرت ابو الحگ واريد اجيب بني اجوادك وبني اجوادي وعشايرنه اريدهم يحگوني
واريد اختك تثبت على سالفتها انو بنتي عدها علاقه ويه واحد
ذياب،، بس المره ماينثبت على كلمتها بالديوان
وهاي اختي اشلون تطلب مني هيج صعبه
ابو مثنئ،، هاذا شرطي اريد ارد اعتبار بنتي جدام الوادم
واني خيرتك لو اطلگ لو تقبل بالشرط
غصون،، ذياب ساكت مايحجي تالي عاف ابوي وطلع تحسه نار كبره يريد ينفجر
وره يومين اتصلت بيه عمتي تريد تقنعني كتلها عمه بكيف ابوي وابنج وين جان قبل من اتهمني وقبل لايفهم مني راح اتزوج؟؟
ضلت اهواي تحاول تقنعني بس ماكدرت
بليل اتصلت ساره وهم رادت بس اكعد وياه ونتفاهم كتلها مااريد اكعد وياه ولانتفاهم عندي السالفه مخصومه بس اخوج جاي يماطل
جنت كلش متخذه قراري لان محد عاش شعور الغيره وحرگ الاعصاب والاهانه العشتها
تنزل نور تسولف بمغامراتهم بليل لو تضل تسولف هيج سوالي وهيج سوالي تخليني اكرها فوگ كرهي اله قاطات
كملت كلامي ويه ساره اجاني اشعار ع الفيس
شفته ناشر منشور
منزل فيديو اغنيه لحاتم العراقي
عليكم جذب الگال اني مرتاح
ياراحه البلياكم تجيني
العطش ذبل شفافي وعافني وراح
متت لكن روتني دموع عيني
اشلون ارتاح واصبر يالبعيدين
وابد بفراگكم مانامت العين
اتمنئ اني طير وعندي جناح
ياخذني وعليكم يوديني
اجتني رساله منه كاتب
ذياب،، گبل يمكم واعيش بنار الاشواگ
يحالي اشلون لمن صار الفراگ؟؟
غصون،، قريتها ماجاوبت
ذياب،، ادري الصار صعب وتسرعي دمرني
بس حطي نفسج بمكاني تتحملين تشوفيني احجي ويه غيرج؟؟
غصون،، وانت تتحمل تشوفني ادخل الغرفه رجال ثاني كدام عيونك؟؟
ذياب،، غصووون
غصون،، الشي الماترضا على نفسك لترضا لغيرك
دخلت بيتكم مسلوبه من كل حقوقي
كسرني الوكت وكسرتني اختك ورجعت انت كملت كسرتي
دمرتوني وكتلتو الانسانه النقيه بداخلي
بسببك وبسبب اختك اليوم اني انسانه ثانيه
اتمنئ تستعجل بالطلاق لان لو يصبوك ذهب مااقبل ارجعلك
قبل مااسمع جوابه طلعت من المحادثه وسديت حتى الشبكه
ثاني يوم ابوي صاحلي للمضيف
امي سوت جاي اخذت كوبين ورحت يمه
خليت كدامه كوب واني اخذت الكوب مالتي اشرب جاي
ابو مثنئ،، بنيتي راح احجي واسمعيني كلش زين
لتتصورين اني معارض على رجعتج لذياب
لا اني بس جاي اسويله كرصه اذن حتى يتوب وقبل لايتسرع يفكر بعگل قبل لايخطي اي خطوه غلط
الرجال اتندم والف مره اجه ندمان ورايد يرجعج لان عرف الغلط وين
مستعد يجي من جديد يطلبج مني ويسويلج عرس
وعقد محكمه وحاضر وغايب ويحاول يصلح الانكسر بينكم
غصون،، دنگت كتله يابه وكرامتي؟؟
ابو غصون،، بنيتي الله سبحانه وتعالى گال بمحكم كتابه
(وان حكمتو بين الناس فاحكمو بالعدل )
وهذا طلاق وابغض الحلال عند الله الطلاق
رجال اتندم واعتذر
لو مااشوف عندج غلط مااجي واگلج حاولي تسامحي وترجعين
بنيتي الزلمه سند المرته بعد الله سبحانه وتعالى
شخص. يسمعج كلمه لو يسببلج مشكله
اروح احجي الزلمتي واخلي يكون عنده علم
يعرف منج افضل مايعرف من غيرج وساعتها تسببين النفسج مشكله بسبب سكوتج
رجلج لو ماعنده غيره ماجان تصرف هيج تصرف صح تصرفه غلط بس ناتج عن غيره
بنيتي اكو زلم من تشوف شي غلط على نسوانهم مايتفاهمون وخاصتا موضوع الخيانه
يتصرف بدون تفكير مسبق يكون تصرفه غير مدروس
يعني اني متاكد لو واحد غير ذياب شايف مرته
يدزوله صورها ومحادثات جان حط طلقه براسج بدون نقاش
راح احجيلج سالفه صارت ويه شخص اعرفه جان وياي بالدوام
مرته انسانه خلوقه جدا محترمه ل ابعد الحدود
الدرجه اني صاحبه ومثل اخو من يعزمني ابيته
مااشوف خيال لزوجته ولااسمعلها اي صوت
بيوم داومت هو ماجاي سمعت اشاعه بالدوام انو افلان قاتل زوجته
اتخبلت عقلي مامستوعب الفكره دوم يحمد الله ويشكره عنده هيج مره معدله وبنت اصول
شنو البدر منها حتى توصل وياه يقتلها بسهوله
؟؟
بعدين اخوانه حجولي السالفه ضليت مصدوم
اكو وحده من جوارينهم عدها علاقه حب ويه واحد
ويوميه يدزلها رساله ورقيه
البنت ماتعرف تقره فجانت تجيب الرساله لزوجة صاحبي حتى تقراها الها
بهذا اليوم الابنيه جايبه الرساله انطتها لمرة صاحبي
وراحت لهلها كالتلها بس اشوف امي شنو تريد وارجعلج حتى تقريلي الرساله شنو مكتوب بيها
ف خطيه هي فتحت الرساله تقره بيها
والبنت راحت وبنفس الوقت صاحبي رجع للبيت
شاف مرته بيدها رساله تقره بيها
اخذها من ايدها وصار يقره كلام غزل وكل ضنه هذا الغزل الزوجته
بدون تفاهم جر سلاحه وقتلها بدون ماتحجي وياه حتى حرف
اتصل بااهلها كالهم بنتكم هيج وهيج وكتلتها اريد ادفن عارها
اجو اهلها والشرطه والمصيبه لمن قرو المكتوب ع الضرف شافو الاسم لغير وحده يعني موالها وهو ماقاري شنو المكتوب ع الضرف
قاري بس الرساله
من الاسم المكتوب عرفو بنت جارتهم جرجرتها الشرطه واعترفت يوميه تجيب الرساله للمسكينه الراحت ضحيه الغيره والتسرع وبساعه غضب دمر بيته ويتم اطفاله
وبدل ماتكون القضيه قضيه شرف وهو صاحب الحق
انسجن لان قتلها بدون ذنب وتمت برائتها بعد موتها
شوفي يابنتي غيرة الرجل بساعه عصبيه وين تقوده؟؟
ولج بابا اكو مصايب ومصايب نرتكبها بساعه شيطان وعدم تفكير
الله سبحانه وتعالى ليش خلق المرأة ناقصة عقل؟؟
حتى تنسى الاسائه وتسامح
الله خلقها ناقصه عقل حتى تنسئ وتعيش وتتحمل وماتموت من القهر والطعنات
بكلمه وحده حلوه تسامح
الله سبحانه وتعالى ابدلها بمكان العقل كمال الحنان
ولان الرحمه فوق العدل ولان العدل من العقل
بينما الرحمه من الحنان
اني ماجاي اجبرج لاهلمره انتي بقناعتج
بس جاي انطيج الاختيارات حتى لاتگولين ابوي ضلمني مرتين ومهما كان قرارج اني وياج
غصون،، دنگت وبجيت ابوي ماجاي يحس بالكلام البداخلي استحي اوصله الفكره
استحي اگله جان يروح ينام يمها وتاركني افكر شجاي يصير بينهم؟
كثير شغلات صارت كدام عيني مرات انساها وره فتره اذكرها
رفعت راسي كتله يابه كرامتي فوق كلشي
لان المراة مانخلقت حتى تنهان
ومانخلقت حتى يكملها رجل
نفرض رجعتله ورجع اتعصب وتسرع وراح جاب مره ثانيه عليه ويمكن بساعتها عندي اطفال مااكدر اتركه الخاطر اطفالي
يابه الله يخليك انهي كلشي
ابو مثنئ،، هذا قرارج النهائي مابيها مجال تفكرين؟
والرجال شاريج ومستعد يتغير
غصون،، هزيت راسي بمعنى لا
منضره بيوم العرس ماجاي يطلع من راسي
مابيه اتحمل صدمه مره ثانيه
الرجل العراقي اذا اتعلم من البدايه مايحترم زوجته ويضربها
راح يستسهل الموضوع وشوكت ماصار اكو غلط راح يلتجأ للتعنيف والضرب بدون مايتفاهم وذياب من هذا النوع
بوقتها شفت الانفصال افضل حل للطرفين
بليل بعد ماالكل راح ينام دخلت الغرفتي القديمه اريد انام جريت الموبايل شفته دازلي رسائل
ذياب،، لو يعلم من هرب
لو يعلم كم تأذئ الطرف الاخر وكم صبر وكم تعب
لتراجع عن الهروب
من يهرب معناه لم يستمع جيداً للآخر حتى يصبر معه
غصون،، دزيتله
انت سمعتني؟؟
ذياب،، اتمنيت سمعتج ولا هلتعب هذا
تدرين شنو جاي اسمع واتخيلج ويه كل كلمه
غصون،، ماجاوبت دزلي
ذياب،، شعر ال عادل محسن
كون يمك
غصون،، طلگني
ذياب،، اذا طلگتج ترتاحين؟؟
غصون،، بدون تردد كتبت كلش
مادز شي بعد يمكن تشوفون هلشي انانيه
بس مااكدر ارجعله لان دائما راح تكون بيناتنه فجوه بسبب الصار ودائما يمكن على اقل غلطه لو شي راح اذكره بزواجه وبكسرتي وراح تستمر المشاحنات بيناتنه
وره كم يوم راسلتني ساره ومن البدايه من اول مازعلت كالتلي اني معليه بذياب لان اعتبرج اختي وماشفت منج غلط وعلاقتنه اني وانتي اتمنى ماتنتهي مهما كانت نتيجة قرارج
فرحت بكلامها لان هي الوحيده الوگفت وياي وساندتني صح عمتي ماانطت بيه بس عمتي مومثل ساره ساره جانت على قناعه تامه ابراتي
عكس اخوها الصار يتفنن اشلون يكسرني ويذلني
صرنه نسولف وكل شويه تحاول تقنعني اقبل ارجع وبشروطي كتلها سالفه منتهيه لتحاولين
بعدين من باب الفضول سالتها على نور
طلگها ذياب؟؟
ساره،، لا بعده ومتخبل منها من اول يوم عرف بسالفتها ودزها لهلها راد يطلگها
بس ابوها اجه يريد يبجي
كال لذياب مروتك بس خليها ع الاقل سنه على ذمتك اذا طلگتها وهي بعدها ماصارلها كم شهر الوادم راح تاكل وجهيي وتحط بالسالفه الف انه
عاد بس خل تمر سنه ونگول ماتفاهمو واطلگو
غصون،، اسمع واتمسك بقراري اكثر
ويجوز مايطلگها ومنا السنه يكون ناسي السالفه
السوتها نور بيه؟؟
ساره،، غصون تدرين بي يحبج والصار بلحضه غضب
ليش تردين تهدمين كلشي
غصون،، هو اصلا من البدايه زواجنه كان مبني على حطام واساس هش على لحضه ينهار
ساره،، صدگيني من يوم الرحتي وذياب تعبان كلش
والله حتئ عذراء لسه يم اهلي وحارمها من ابنها
تبجي تريد ترجع وهو قافل
غصون،، سكتت ماحجيت ماكو احد يكدر يغير قراري وخاصتا هسه اني صاحبة الحق وهمه غلطانين بحقي
صارلي اكثر من خمس شهور عند اهلي شگد ذياب حاول يرجعني ماكدر
الصبح ابوي راح يم عمامي يوميه يسير يم مرت عمي يشوف احتياجاتهم
شويه ورجع مرتضئ يركض گال زينب اهنا ومدري شبيها
احس رجليه ماتن اريد انهض مااگدر
اريد بس اكوم اروح يمها واحضنها
كوه كمت جريت عباتي وطلعت احس المسافه بيناتنه صارت شطولها
منا لمن وصلت البيتهم دخلت وشفتها
مدري شصار بيها اول ماابتسمتلي وحدي ابتسمت كان هاي ابتسامه نستهزء بيها بوضعنه الوصلنه اله
اذكر قبل جنت اكللها ولج زينب على هاي وكاحتج خاف يجي يوم تاخذيلج واحد يگومج بكتله ويكعدج بكتله
جانت تضحك تكول الاخذه اني ابسطه
اباوعلها ماباقي بيها شي من زينب القديمه
شبه انسانه عباره عن هيكل عضمي
ركضت حضنتها صرنه نتباجه اثنيناتنه
اباوعلها تفرفح على بتها اتمنيت اشيل شويه من حزنها مثل ماجنت دائما وياها بكلشي
يمكن او مويمكن اني متاكده وضعي احسن من وضعها بالف مره ع الاقل اني لوما عذراء ونور ومكايدهن جان حياتي ويه ذياب جانت حلوه
بس زينب كانه وگعت بيد وحوش مايعرفون شنو الرحمه اباوعلها تبجي ثوبها مشگگ ومبين مخيط لان لابسه لون اسود ومخيطته بخيط ابيض مبين
متت قهر اختنگت
مستحيل تكون هاي زينب الجانت ماتطلع الباب الحوش اذا ماتلبس كفوف ونگبه تخاف من الشمس على بشرتها
اباوع لديها الأصابع مشگگه من كثر الشغل
اتمنيت ميته ولاشايفتها بهذا وضعها
يوميه اروح يمها مانحجي شي لان مابينه حيل اتحس شبعنه قهر حد الاكتفاء مو حمل نسمع كلمه
اشبع قهر من اشوفها تفرفح على بتها بست ايدي وجه وكفه ماعندي طفل واتعذب مثلها
من اشوفها هيج تفرفح اكره عائله الشيخ كلهم حتى ذياب
من رجعت للبيت كتله يابه اتصل بي گله كافي
خل يجي يطلگ لو بعد عشر سنوات راح ابقه متمسكه بكلمتي ماارجع وخلص
بليل شفته نشر منشور بصفحته
كانه يحاول يوصلي مشاعره من خلال كلامه بالمنشورات واتاكد يقصدني من يدزلي رساله ع الخاص يگلي ياريت تحسين بكل كلمه كتبتها الج
ذياب
هي مُختلفة جدًا، لم تكن نسخة مُكررة مثل باقي الفتيات، كانت فريدة أو نادرة بالمعنى الأدق، تلقائية للحد المُبهج الذي يُشبه الأطفال، ستجدها تضحك في دقيقة و في الدقيقة التالية مكتئبة و لا تسأل عن السبب فلا يوجد
تحمل سلامًا نفسي يكفي أن يُنهي حروب العالم و يعيش الجميع في سلام، يمكنها أن تُخرجك من أي حالة نفسية سيئة و لا يمكن لأحد أن يتعامل معاها و هي في مزاج سيء، ستجدها و هي هادئة تُشبة البحر و هو بلا موّج، و حين تغضب تصبح بُركانًا ثائرًا، تملك أحلامًا بسيطة تحارب يوميًا لأجل تحقيقها، هي تُحب الجميع بلا مقابل، لم أرَ شخصًا يتمنى للغيّر أكثر مما يتمنى لنفسه بقدر ما رأيته فيها، هي لا تخشى شيئًا، فهي خسرت الكثير منذ زمن، فهي تحب الحياة بشكل مختلف، و لا أعتقد أن الحياة تحبها بنفس المقدار، و تحب الطعام أيضًا أكثر من أي شيء أخر، لديها قلب يسع الكون بكل مجراته، و شخصية يأخذها البعض قدوة، و البعض الأخر يخشى التعامل معها، أكاد أجزم أنها بذلك القلب خُلقت من نور، فهي جميلة للحد الذي لا حد له
غصون،، ماعدت اصدك بكلامه
قفلت الجهاز ونمت
ثاني يوم رحت يم زينب انصدمت بكلامها من گالت احمد يجي يوميه بليل للفجر ويروح حجتلي كلامه عن ابن الشيخ الكتله احس عقلي طار ردت احجي ماقبلت كالت امي حلفتني مااجيب طاري بس لان انتي نصي الثاني مااكدر اضم عليج شي
ضليت بين نارين لان السالفه موهينه لان لومااحمد كاتله جان هسه احنه معززات مكرمات ببيوتنه ومااخذونه فصليات بس قدر الله وما شاء فعل
يمكن قسمتنه ونصيبنه نعيش القهر والظلم
ذياب معاند مايقبل يطلگ وابوي من شافه هيج كال راح الوي ذراعه ب اخته لويطلگ لو افضح سوالفها جدام الوادم
اسبوع كامل يماطل مايريد يجي يطلك تالي ابوي كاله ماخليتلي غير هذا الحل راح اجمع عمامي واسولف سوالف اختك
جنت حاسه ماراح يطلگ وراح يتمسك بيه اكثر
بس انصدمت من اتصل باابوي وگاله باجر اجيب السيد واجي اطلگ
دخلت الغرفتي مختنگه مااعرف شنو اريد
يمكن جان عاجبني اشوفه يتعذب كدامي ومااديرله بال اريد يضوك القهر مثل ماضگته
اجتني رساله منه
ذياب،، هذا حدنه غصون؟؟
غصون،، بدون تردد دزيتله
سوف اطوي تلك الصفحات من عمري على عجال . لن اترك فيها اي كلمات او حتى اي بقع حبرية .
فهي استثقلت الامال التي تحملها كلماتي . هي اوراق متساقطه من كتاب عمري لا اكترث لها ولكن يؤسفني تواجدها
دزيتها وانطيته حضر
للصبح مانمت اتگلب نار تسعر بروحي مااعرف شنو الاريده بالظبط
كل الاريده اشوفه يتعذب وبس
ثاني يوم اتصل انطه خبر ل ابوي كاله العصر اجيب سيد واجي اطلگ
كل ماتمر دقيقه اختنگ اكثر مدري شبيه تايها
ماردت يشوفني مقهوره
العصر لبست حجابي رتبته ولبست عباتي
دقايق واجت امي گالت اجو كاعدين يم ابوج بالمضيف
صح خفت بس مابينت
امي طلعت واني وراها رحنه دخلنه عليهم
جان مدنگ من دخلت رفع راسه باوعلي دنگت
ورحت كعدت اني وامي بجهة ابوي وهو وبعد اثنين وياه مااعرفهم بالجها المقابيلنه
حجه السيد بس ابوي فهمه كاله سالفه منتهيه ماكو مجال للتراجع
كل كلمه يحجوها هو صافن بوجهي تحسه يريد يبجي
عكسي تماما احس روحي جاي اتحداه بقوه
اريده يندم على كل لحضه ذلني بيها
مرتين حجه السيد وياه تحسه فاصل مامنتبه
اخر شي الرجال الوياه حاجاه
غمض عيونه بتعب ودنگ
مرت دقيقه هو ساكت مدنگ
رفع راسه وعيونه بعيوني همس
ذياب،، انتي طالگ
يتتتبع
|