[فيتامين سي]

اسعد الله اوقاتكم بكل خير احبتي ❤
//// البارت اثنا وأربعـــون /////
#بيوت_بلا_جدران
#شمس_السعدي
----------------------------------
المسافـات لاتقرب احدا .. ولا تبعد احدا ..
القلوب هي التـي تفعل ذلك ..
فأذا تقاربت القلوب لايضر تباعد الابدان ..
والطيبون كـ النجوم لاتراهم دائمـا ..
ولكنك تعلم انهم موجودون في سمـاء القلوب ..
____________________________________
فتحت الباب شفت فيصل گبالي ..
عيونه مغرغرات بالدموع ويبتسم ..
" من طولج وجسمج عرفتج انتي امي .. عبن اعرفج من ريحتج.. من صغري وانه اشم ريحتج من ترضعيني شلون مااعرفها .. بس شلون انطاج گلبج ماتگليلي هيج خايفه مني لا افتن عليج ؟؟"
دمعت عيوني ..
" يبعد امك انت من هيج ماگلتلك ادري بيك تلحگني وخفت يشوفوك لو يلحگوك .. مو خوف منك .. انت ترباتي واعرفك شلون اشك بيك "
شمر روحه عليه هو يبجي وانه ابجي ..
دخلته لجوة خاف يشوفنا احد وسديت الباب ..
مسح دموعه ويناشغ ..
دور رجع مرة ثانية حظني هم ويبجي ..
" يمه لاتعوفينا بعد .. احنه بلياج يتامه "
رديت ..
" يبعد امك انت .. جا هو بيدي .. طردوني بليلة ظلمة وهددوني وگالولي لو رجعتي موتج وموت بيتج بسببج .. صعدوني بسيارة بس الله راد ارجعلكم ورجعت "
مسح دموعه ..
" منهو السوة هيج "
اجت زينب شافته ..
" ياااع هذا الخفيف شيسوي هنا .. شنهي لحكتنا من فلك طرك "
رديت ..
" لاتخافين زنوبة .. فيصل وليدي اعرفه مايحجي "
ردت ..
" اي عبن مادام تكولين هيج هاهي .. بس انه ماارتاحيتله "
تعصب منها ..
" السانج ولج "
ردت عليه بعصبية..
" ولاجة التولجك شني هاز كاروكي وتكلي ولج "
عاين عليه ..
" يمه شني هاي احجي وياها "
رديت ..
" زينب يمه ادخلي البيبيتج كلها اجينا .. وانه وفيصل بالمطبخ خاف تردن شي "
هزت راسها وراحت وهي تهز بيديها ..
وهو صافن ومعصب يريد ياكلها بعيونه ..
همست ..
" يمه مو هيج فشله البنية طفله وماتعرفك "
رد ..
" شمالها طفلة السانها شطولة .. توديني للشط وتجيبني عطشان .. ماشفتها شلون تتمسكن الحبوبتي سمرة وتقشمرها "
رديت ..
" الدنيا وضيمها خلتهن هيج .. تعلمت من بيبيتها .. دلالة جانت وهي ربت عدها . ابوها اسير خطية وامها حايرة باخوها معوق "
سأل ..
" يعني الحجي الگالته حبوبتي سمرة عليها صدگ ..
وانه حسبالي تجذب "
رديت ..
" لا صدگ .. امها شفتها كم مرة بس مو هواي تجيهم تجيبلهم خبز جانت وتشوفهن وتروح لان عيالها هواي وهي شايلتهم مخلين ضيم الدنيا عليها لان رجلها اسير وهي علمود ابنها كاعدة ومتحملة "
اتنهد ..
" واني حسبالي بس امي مرمر هيج متعذبة "
سكتنا ودور سأل ..
" احجيلي يمه منهو الطردج وشلون اجيتي لهنا "
حجيتله كلشي صار .. وهو ياكل بروحه اكل .. ولا عبالك عمرة 17 سنه وجن كبر بهالشهرين سنين ..
ابتسمت وانه اشوفه يفرفح ..
" شوكت كبرت يمه وهيج صرت تحجي "
رد ..
" كبرت من يوم الفارگتيني وفارگت حضنج .. جنت طفل بوجودج .. طفل محتاج حضن امه وحنانه .. ومن مشت عنه حس بعازتها وكبرته الدنيا .. مو بس انه حتى رحمه .. احنه بدونج مانسوة يمه "
اتنهدت ..
" يبعد امك وليدي .. ماضاعت تربيتي بيك "
لزم اديه باسهن ..
" انه وعيت اعله الدنيا ماعندي ام ..انتي امي .. ربيتيني وي رحمة .. وماجنت اعرف رضوان ابنج .. بس من عرفت حسيت شلون جنتي تعاملينا نفس الشي ومافرقتينا .. من اختفيتي حسيت بعازتج .. وعرفت صرت يتيم بعدج "
رديت ..
" اسمعني يمه .. انت راح تصير 18 سنه واخيتك امانه عندك .. انه اجي اشوفكم بس مااگدر اضل يمكم لو احميكم اخيتك امانه بيدك هي وماسه لاتخلي واحد يأذيهن ودير بالك عليهن مالهن احد غيرك هسا "
رد ..
" يمه انه خايف اكو مو گد الامانه .. گبلج رضوان امنجن عندي وگالي بالحوش انت بمكاني تحميهن وشيصير تگلي .. ماجنت اضن يمشي ويعوفنا .. وتالي راح وخلاني بوحدي مااعرفن شسوي "
من سمعت اسم رضوان تغيرت ملامحي وگلبي يدگ حيل ..
" شوكت گالك ؟"
" من عرف بيجن وطلع .. من رجع سألني خاف الشيخة سوتلجن شي وراه .. وگلتله ..
لا بس حبستهن .. وما اعرف جنت السالفه شني ..
خله ايديه اعله جتفي ووصاني .
" رحمة وامها امانه عدك فيصل لو انه موش بالبيت ..
انت ادريك سبع وتحبهن .. شنهي يصير تگلي من ارجع وماتخلي واحد يوصلهن .. "
اتنهد ورجع كمل وانه ابجي ..
" هسا يو رجع شلون اخلي عيني بعينه وشنهي اكله .. عني منهل طردها وانه ماادري لو عيد اليطگ رحمة ومااگدر احميها "
سألته ..
" بعده يضربها ؟"
هز راسه ..
" اي يطگها ومن احاميلها يطگني وياها "
اتنهدت ..
" الله كريم يمه .. حشا الله يضيع عبده "
بقى يعاين على الحوش والمطبخ ..
" مرتاحة هنا ؟"
رديت ..
" الحمد لله .. ماناقصني الا شوفتكم ووجودكم يمي .. خاجية مرة خوش مرة .. انت ماتعرف قصتي كلها خل رحمة تحجيلك .. وراح تعرف شلون خاجية ضحت بييتها وحياتها وعيشتهم من وراي علمود تخلي اهلي يشوفوني "
رد..
" يمه انتي طيبة الهيج الله يخلي بطريقج الناس الطيبة .. بعد مااخليج تشتغلين وتطلعين .. انه اجيبلج فلوس ومسواگ وكلشي ترديه .. انه اشتغل واجيبلج فلوس "
رديت ..
" لا يمه لا . اول شي عندك دراسه اريد تخلص دراستك وثاني شي مااريد احد يشك بيك ويراقبك ويعرف مكاني "
اتنهد ..
" مااحب الدراسه شوكت تخلص هالاعدادية وارتاح صعبة "
رديت ..
" ماكو شي صعب بهاي الدنيا .. شوف علي اعتمد على روحه ودرس وهسا راح يتخرج ويصير محامي انه اريدك مثله . انت مالك احد يسندك غير شهادتك .. هسا منو اليطيك مصرف ؟"
رد ..
" حبوبتي وبس من امشي للمدرسه ومرات امشي وياهم للحقل واشتغل بمكان عمي عيد ويطيني فلوس"
رديت ..
" شفت ؟؟ لو شهادتك بيديك وتتوظف ماتعتاز احد "
هز راسه ..
" الله كريم يمه .."
ضل يدور بجيوبه وطلع فلوس مسفطات ومخليهن شي فوگ شي ..
" هاج يمه ذني خاف تحتاجيهن "
رديت ..
" ردهن الجيبك وليدي .. ضم مصروفك اني الحمد لله عدي مامحتاجة "
رد ..
" يمه ادري گليلات بس لاترديني "
رديت ..
" مااردك وليدي حجايتك تغنيني عن فلوس الدنيا كلها بس انت واخيتك بحاجة الفلس خليهن عندك وهاي هم بعد فوكهن مني علمود تشتري الماسه حلويات وتاخذها الها "
ماقبل ياخذ ..
بالگوة يله رضا .. لمن گلتله..
" رحمة تفرح لو گلتلها امي وصتني اشتريلجن اكعد انت واخيتك واسهروا مثل گبل وكرزوا حب وسولفوا ولاتعوفها ابد "
ابتسم وعيونه تدمع وحضني ..
" شوكت يمه شوكت نلتم مثل گبل "
اتنهدت ..
" ربك اعلم وليدي كلشي بيد الله .. يله هسا روح لا يدورن عليك ويشكون .. ولا تجي هواي خاف يراقبونك وخاصه جعمقة ماتفوته فايته .. "
رد ..
" لاتوصيني يمه عبن انه زيبگ ياهو اليلحگني "
ضحكت على سوالفه ..
ضحك وياي ..
" يمه انتي حلوة من تضحكين "
كلمته زاحت شوية من همومي .. فيصل جان عوضي من الله بولدي .. كلما يگلي يمه ترد روحي من اسمعها
گام يريد يطلع حضني بالباب ..
سلم عليه وراح ..
ماگدرت اطلع وراه لايشوفنا احد ..
سديت الباب واتنهد ..
خليت تركيبة التمن على النار .. ورحت يم خاجية ..
ضحكت من شافتني ..
" منهو من وليداتج هذا ؟"
رديت ..
" هو مو انه الجبته بس انه الربيته ورضعته .. ابني وبعز ولدي احسبنه .. فيصل ابن فرج "
سألت ..
" منين من منيرة لو من بت فهيمة الجانت تشتغل عدهم "
رديت ..
" اي من بت فهيمة رملة "
ردت ..
" خطية لسا اتذكر من سمعت بيها احتركت وماتت مدري شصار بيه . اگلج صدگ هي شلون احترگت ؟؟"
اتنهدت ..
" ماادري كلشي صار مثل الحلم لسا مامصدگة احتركت بساع وماتت .. وعافت هاليتيم "
تذكرت حجي جوري الله يرحمها لسا ببالي بس ماردت اطيح بخطية احد واحمل ذنب ..
الحجي وي خاجية يرجعني الذيج الايام ويذكرني بكل الجروح وفتحتها ..
اتنهدت وگالت ..
" الله يطيج عبن يتيم وماله احد .. انه عشت بسلفهم من صغري .. من جنت العب وي دنانير بفرد حوش .. وكلشي اعرف عنهم .. واعرف كل حوش واسراره .. وتريدين الصدگ مااضن موتتها قضاء وقدر .. "
رديت ..
" الله اليدري بس "
ردت ..
" مثل ماگلتي .. بس الله اليدري وجلبها جعمقة .. عبن هذا جعمقة عبد جابته من حوش اهلها ربته اعله ايديها لمن كبرته .. لا اهل عده ولا واحد يخاف عليه .. "
رديت ..
" بس عده ولد درر "
ردت ..
" هو هذا المسودني .. عبن حورية .. حورية الاسمها مثل رسمها .. بياض وجمال .. شلون خذته الهذا العبد ورضت بي "
گمت من مكاني ..
" اروحن اشوف الگدر .. تدرين بيه جنت محبوسة بالمخزن لا ادري ولا اعلم "
هزت راسها ..
" الله يعينج .. الشفتيه ماتتحمله وحدة .. بس گليلي اهلج مامش خبر منهم ؟"
رديت ..
" مو گلتلج من سفروهم ماعرفت بعد شي عنهم "
سكتت ماحجت ..
مشيت للمطبخ طبخت التمن ..
وتذكرت اهلي المانسيتهم ابد ولا راحوا من بالي .. بس هموم الدنيا وضيمي خلاني الهي عنهم ..
امي هسا شلون حالها هي وعمتي ؟؟
اخواتي كبرن .. تزوجن .. ؟؟
لو عدنان وين صفا بي الدهر ؟"
مشيت بيهم واحد واحد لين وصلت المهران ..
الجان عقلي رافض يفكر بي ..
بس من تذكره دگ گلبي وياه ..
بقيت مستغربة روحي ..
معقولة يمرمر بعد كل هالسنين وولدج كبروا وصاروا بطولج وگلبج يدگ اله ..
هدرت التمن واخذتني رجلي للغرفة ..
فتحت الصرة وطلعت غراض جلولاء وذكرياتي ..
الي اخذتني بدرابين الطفولة وعشگ ناي السنين ..
‏ياحب الطفولة والذكريات القديمة ..
ياحبي الي ملكني وانا صغيرة ..
طلعت المحبس الفضة الجابه الي ..
اتذكرت شلون انطاه الي وگالي هذا رمز عشقنا ..
سألته ببلاهة ..
" عو شنو العشق ليش ماگلت حبنا "
رد ..
" العشق هو الافراط بالحب .. يعني اكبر من الحب .. الحب والهوى والشغف كلها تدل على الحب .. بس العشق اكبرهن واسماهن .. فهو سيد اسماء الحب جميعها "
جنت ماافهم حجيه لان متعلم وحجيه حلو.
رديت عليه ..
" يعني من تگلي احبج هواي يعني تقصد العشق "
ضحك ..
" اي هيج شي "
رديت ..
" لا تضحك عليه لان انه ماعرفت شنو الحب الا لمن انت كلتلي احبج .. حسبالي تحبني مثل ابوي وامي دور تريدني اعرف العشق شنو "
رد عليه مثل عادته .. مثل اب يعلم بنته .. او معلم يعلم تلميذته ..
" العمر گدامنا طويل .. وراح اعلمج كلشي .. ونصعد الدرج سلمة سلمة .. لمن نوصل الاعلى سمات العشگ انه وياج .. وساعتها عدنا جهال هواي داير مدايرنا وانه ابقى اگلج اعشگج لحد ما الشيب يترس راسنا ونعجز سوة "
ضحكت ..
" حيييل يعني تضل وياي العمر كله.. ماتمل مني ابد "
رد ..
" اوووف مرمر اووووف انتي مرمرتي گلب مهران بعشگج وعيونج البريئة هاي .. وتالي تگليلي امل منج .. اكو واحد يمل من ضناه .. انتي ضنى گلبي .. شلون امل منج "
غمضت عيني ونزلت دمعتي على خدي ..
سنين العذاب العشتها بسجن الشيخة .. ماخلتني افكر بي لو اتذكره ..
شلت المحبس خليته بيدي .. ردت البسه وتذكرت انه بعدني على ذمة منهل .. رغم هو هاجرني سنين طويلة بس خاف الله يحاسبني لان فكرت بمهران ولبست محبسه ..
رجعت المحبس بداخل السترة الصوف ورجعته للصرة ..
ورجعت ذكرياتي الداخل گلبي وقفلت عليهن مثل قبل ..
--------------------------------------------
رحمة ..
جنت گاعدة اوكل بماسة ..
انفتحت الباب ودخل فيصل ..
سألته ..
" وين جنت .. عمتي سمرة رادتك وطرشت عليك وانت ماكو "
رد بخوف ..
" شني دوروا عليه ؟؟"
رديت ..
" لا بس طرشت موسى يدور عليك .. راح دور واجاها كالها مو هنا وهي ضاجت صارت تحجي ومتحلفه بيك"
رد ..
" شماله حظي مصخم مو كل يوم مگابلها ماتتذكرني هسا من غبت شوية تذكرتني "
سألته ..
" صدگ وين جنت .. وشني هاي العلاكة البيدك "
رد بهمس ..
بعد ماتربع وگعد گبالي ..
" لحگت امي وعرفت وين عايشة ؟"
صفنت ..
" امك منو ؟"
رد ..
" امي مرمر شبيج .. عود انتي ضامتها عني وعساس ماعرفنها .. انه من البداية شكيت هي بس ضجت لان ضميتن عليه حسبالجن افتن . بس انه لحكتها وعاتبتها وحضنتها وشميتها بعد "
نزلن دموعي ..
" تحجي صدگ فيصل .. شفتها ؟؟ شلونها زينة انه بس حسها اسمعه مااشوفنها "
رد ..
" لا زينة بس ضعفانه .. وهاي الحلويات والغراض منها هي اطتني فلوس وگالت اشتري الماسه والرحمة وخل ياكلن ويذكرني "
رديت ..
" سودة عليه وهي شعدها قابل ؟؟"
رد..
" اطيتها مصروفي ومارضت "
رديت ..
" تدري بيك ماعدك يادوب يكفنك "
سكتنا لوهلة ..
اشرتله ..
" تعال بحضني "
ضحك ..
" شني اشتاقيتيلي ؟؟"
رديت ..
" لا ياغبي اريد اشم ريحة امي بيك .. مو تگول حضنتني معناتها ريحته بيك ضالة "
ضحك واجه حضني ..
صرت اشم بي وادور على ريحتها بملابسه وهو يضحك عليه ويكلي ..
" شمالج جنج جلب تشمشمين "
ضربته ..
" اشم ريحة امي قابل ميته على ريحتك "
رد ..
" وشبيها ريحتي كل يوم اسبح وابوگ من المسك مالتج واخلي "
رديت ..
" هاي انت التخلصه وانه اگول وين راح معناتها البيك ريحة المسك مالت امي مو ريحتها "
رد ..
" اي جا انتي هم تعلمتي تخلين مسك مثل امي يمتى جنتي تخلين .. "
ضحكنا اثنينا ..
فتح العلاگة وماسه لمت الحلويات كلها بحضنها ..
عاين عليه وابتسم ..
" تدرين رحمة حضنج حنين مثل حضن امي "
ابتسمت ونزلت دموعي ..
فتحت ايدي اله..
" تحاضنا وبقينا نبجي سوة .. كل واحد شمر بحضن الثاني همومه وحسراته .. وماسه تضرب بي وتكله ..
" ميل عن لحمة ميل لا ابجي "
عود لاتخليها تبجي ..
صار يحجيلي عن امي وحياتها ووين گاعده وشلون لحكهن ..
سألته ..
" شلون تروح وراها .. بله شافك احد ولحگكم وراحلها"
رد ..
" لا شمالي.. هي من طلعت من يمنا .. راحت تبيع للبيوت .. وانه سويت روحي العب واراقبهن من بعيد
لمن كمل جعمقة من الحقل وراح .. واطمنيت .. مشيت وراهن اراقبهن .. دور صعدن بعربانه وراحن بعيد عن السلف .. شيجيبهن ويردهن كل يوم "
رديت ..
" خطية امي مكتوب عليها التعب دوم "
رد ..
" اي والله تتعب .. بس هاي الشيطانه من شافتني انگلب وجهها ولاعبالك كل يوم بخوشنا وتتمسكن الحبوبتي "
سألته ..
" ياهي قصدك ؟"
رد ..
" الشيطانه الصغيرة زينب ياهي غيرها "
ضحكت ..
" لا مااقبل تخبل زنوبة ودمها حلو يلعب "
رد ..
" اي بعد فضليها عليه .. وينها حلوة خدودها حسبالك خلفية جاهل "
ضحكت ..
" خرررب يومك شني هالوصف .. "
ضحك وياي ..
" والله السانها شطوله وانه اتخبل من مرة السانها طويل "
رديت ..
" اولا هي طفله .. وثانيا شوكت كبرت وصرت تتخبل "
رد ..
" اولا وين طفولتها شو مااشوفنها .. ؟؟
وثانيا .. ترى انتي اكبر مني بسنه لاتسوين روحج جبيرة براسي ..
هااا صدگ .. امي تكول انتن دور بحمايتي وامانتي ومسؤولات مني .. معناتها جبير لو مو جبير انه ..
ضحكت ..
" فديت اخوي الجبير "
گام ..
" يووووه امشي احسن عبنج تتمضحكين عليه .. اروح الحبوبتي سمرة اتحمل الرزاله واسكت جا شسوي "
عافني وطلع ..
واني ادعي الله يحفظه الي .. مابقالي احد بعد رضوان غيره .. اول يوم من بعد فراگ امي اضحك ..
وجود فيصل خفف عني غياب اعزازي ..
سمعت صوت عمتي سمرة وهي ترزل بي ..
عفت ماسه تاكل وگمت ..
شافني اشرلي مااتدخل ..
وهي تگله ..
" خل يجي جدك يحاسبك اني مالي دخل بيك "
رد ..
" حبوبه شني انه زعطوط .. جنت بالحقل ودور رحت وي جماعتي العب "
صاحت بي ..
" بمكان ماتدرس مخلصها لعب وغياب حسبالك ماادري لو ما العسكرية جان بطلتك وكعدتك حالك حال عمك الاغم كل ثلاث سنين بصف خلصها "
رد عليها ..
" وداعتج حبوبة مااصير مثل عمي الاغم .. والا اكمل وشوفي "
صفنت عليه ..
" تيدب عيب تحجي اعله عمك هيج .. ومن يمتى هيج حبيت الدراسه "
رد " ليش ماترديني اكمل واصير مثل عمي علي خريج وعندي وظيفة "
ردت ..
" الله يهديك شريد اكولن .. شوف اركان ابوه يريد وصله شلون ماجان.. اريدك تصير احسن منه وتغلبه مو هو راح يوصلك بنفس الصف "
رد..
" صار الا اغلبه بالبايسكل ومااخليه يوصلي "
شمرته بالطاسه جانت بيدها ..
دنگ وشرد للغرفه ويضحك .. ضحكني وياه ..
ا
گامت تحجي عليه ..
" هالولد كلش صاير فوگاها يتمهزء عليه حسباله صغيرة ويقنعني .. "
شافتني گامت تحجي ..
" كله منج الله اليعلم شتدرسيه ليل ونهار خاتل يمج "
رديت ..
" من صغره واحنه سوة مو شي جديد "
ردت ..
" شوكت نخلص منج مثل ماخلصنا من امج "
رديت ..
" مو الحد البارحة تگولن الفصلية جانت شايله البيت اعله راسها .. ومن راحت كتلنا الضيم خل نحجي وي بثينة تجيبلنا وحدة للبيت كبرنا بعد مو مال شغل "
ردت ..
" وانتي تتصنتين علينا مووو هي هاي ترباتج خل يجي عويد اليوم وانه اعلمنج "
رديت ..
" لا مااتصنت سمعتجن بالصدفه .. بس انتن ليش دوم ماتذكرن فضلها .. من يوم الاجت لهنا هي خادمتجن وخادمة الشيخة والحد هسا محد بين وصلتلها من تمرضت غير امي وانه من بعدها "
ردت ..
" وشني انتي منهي الخلاج محامي الها .. عودن من تطيب خلها تسجلج كم حاجه بسمج وهيج تطيج جزات تعبج انتي وامج "
عفتها ومشيت لان الحجي وياهن ضايع ..
بس هي ماسكتتلي ..
انتظرت عيد اجه وتلگته هي وهدوة بالباب ..
هدوة الجانت ماواگفة اصلا بغرفتها يم ولدها ..
گامت تحجيله صدگ جذب ..
بقيت بالغرفه گاعده اسمع ومستغربة..
خفت لايجي للغرفة ويخوف ماسه .. نومتها بالفراش وگمت طلعت ..
خله يحجي عليه ويضربني برة مو يمها مااريدها تشوف الشفته بأمي ..
طلعت عاين عليه ..
" اجيتي برجلج .. تعاي "
اتقدمت ..
" خير شني الحجي السطرنه عليه بعد "
اتقرب مني ضربني راجدي ..
مادنگت ولا انهزيت ..
بقيت عيني بعينه ..
ضربني مرة ثانية اتحملت ..
" اذا الضرب يريحك ويزيد رجولتك اضرب .. الرجولة انه تسمع من الطرفين مو من طرف واحد "
انه حجيت هيج تسودن ..
ضربني مرة ثالثة ..
طلع فيصل على صوته ..
شافه يضرب بيه تسودن ..
اجه يركض ..
" عوفها لا تضربها .. كافي ياهو اليجي يذب غضبه عليها شمسويتلكم "
رد عليه عيد ..
" هاي ويامن ولك .. تالي عمرك توگف بوجهي وتمنعني وتدافعلها "
ضربه لزم ايده فيصل ..
كمت بساع ..
" فيصل لا لاتتدخل امشي "
رد ..
" لا ماامشي .. كافي كل يوم يطكوج شيردون منج "
عيد مااتحمل ..
ضل يضرب بي ..
وعمتي سمرة تصيح ..
" الله لايطيج خليتي العم وابن اخوه يتكاتلون الله ياخذج عمرج ان شاء الله "
رديت عليها ..
" ان شاء الله ياخذني وارتاح من ظلمكم "
كمت اسحب فيصل من جوة عيد لان ضخم .. وعيد تسودن .. ساعه يضربه وساعه يضربني ..
البيت انخبص ..
فيصل اتهستر .. ردت الزمه ماگدرت ..
ركض للمطبخ يريد يجيب سجينة..
انه تسودنت من شفته ..
ركضت وراه لزمته ..
" فيصل لا .. بعد اختك لا .. عيد مسودن ويكتلك فكر بيه اني وماسه منو النا .. مو امي وصتك علينا مو احنه امانة عندك .. "
بالگوة اخذتها منه وشمرتها ..
اجه عيد ورانا ..
" ها شعدك اجيت لهنا .. شتريد تجيب تطگني بي يله تعال تعال طگني "
صحت بي ..
" عيد كافي امشي مو ضربتني وضربته .. واخذت حقك من عدنا امشي ولاتزود النار "
هز راسه ..
" بسيطة انه الكم اثنينكم .. خليتكم براسي .. الا اادبكم مسوين حزب عليه ولكم "
بالگوة سحبته عمتي سمرة من يمنا ..
كعدته بالمطبخ وغسلت وجهة وجبتله ماي ..
" هاك اشرب يبعد اختك "
شرب شوية وعافه..
" رحمة خلينا نهج منا وناخذ امي ويانا "
رديت ..
" وحسبالك يعوفونا .. قبلك جنت اگل الامي هيج بس الشفته منهم عرفت مايعوفونا "
رد ..
" شني تايهة نروح نشتكي اعليهم "
ضحكت ..
" وعمي منهل نسيته .. انت تشوف شيسوي بالسلف يو لا .. تعرف كم بيت وجع اصحابه يو لا مو انت نفسك تگلي صاحبك زاعلك لان عمي بلغ على ابوه وابوه تأسر بسببه ومايعرفون شي عنه "
اتنهد وهز راسه ..
" تدرين شمتأمل .. يرجع ابوي ويخلصنا .. امي تكول ابوك ادمي ومو مثلهم .. بلكي ارتاح اذا رجع .. "
رديت ..
" ان شاء الله يرجع "
رد ..
" تدرين رحمة من خلصت الحرب وانه گمت امشي لبيوت الاسرى واسأل بلكي رجع ابنهم لو بلكي يرجع ابوي وياه "
اتنهدت ." شوكت تروح شو ماتگلي "
رد .. " اي امشي من غير محد يدري "
ضجت على حاله .. اليشوف ضحكه وسوالفه يگول ماعنده هم .. بعمر الورد وهو هموم الدنيا على راسه ..
اجه عمي حطاب وسولفتله عمتي على فيصل وشمرت الصوج كله بي ..
وعمي ضل يحجي عليه ورزله ..
طاحت كلها براسه خطية وبسببي لو مامدافعلي ماصار الصار ..
حتى اكل مااكل وضاج ..
لليل سويت صينية عشا وصحته للغرفة ..
" گوم اتعشا "
رد " مااريد رحمة عوفيني "
رديت ..
" اليوم كله مااكلت والله ازعل يو ماكمت "
رد ..
" يله كايم بس مااكل مااشتهي "
رديت ..
" اي عود ميخالف يله گوم "
بالگوة كام وياي ..
سويت جاي وبتيتة يحبهن ..
گاعدين ناكل انفتحت الباب ..
دخل عيد يطوطح ..
استغربت من دخل ..
" عيد شتريد "
باوعلنا ..
" شني ماترديني اجيج لو هذا مكفيج "
صحت بي ..
" عيد اصحى انت شبيك شارب "
گام فيصل ..
" اروح اصيح جدي يشوفه لان اذا ضل يمخرط مااتحمل "
راد يطلع لزمه عيد ..
" هسا عرفت ليش هيج تدافعلها .. مغزرة بيك .. شتطيك بتوالي الليل ؟؟ "
من سمعت هيج تخبلت ..
فيصل بساع شال الدولكه رگعها براسه ..
لزمت فيصل بعدته عنه ..
عيد من الضربة بعد مايعرف شيسوي ..
لزمني من راسي وضربني بالباب فتح راسي فتح ..
ماحسيت الا الدم يجري على وجهي .. ووگعت احس عيوني غوشت ..
سمعت هوسة وصياح ..
بس احس روحي دايخة مدري شبيه ..
صاح عمي حطاب ..
" حظر السيارة رحيم بساع خل ناخذها للمستشفى وانت عيد حسابك بعدين "
شالوني للمستشفى.. الطريق شطوله وبالي يم ماسه منو الها هسا ..
التفتت ادور على فيصل ..
مامخليه يجي ..
صحت " رجعوني البتي اريد بتي "
صاح عمي " انلصمي واسكتي ام البلاوي اليسألج گولي طحت وتعورت افتهمتي"
رديت ..
" اي بس طلعوني البتي "
ماصدگت خيطوا راسي .. بس مارضوا يطلعوني گالوا لمن نشوف راسها الصبح خاف يصير شي لان مفتوح حيل ولا يصير بيها شي "
توسلت بيهم ماطلعوني للصبح ..
اتجه الدكتور وسولي اشعه وفحوصات ..
لمن كملوا روحي طالعه ..
طلعنا للبيت ..
وبالي يمها ..
شفت من بعيد ..
فيصل شايل ماسه وواگف بالباب وهي تفرفح من البجي ..
نزلت بالگوة وگصتي كلها ملفوفه ..
شلتها بساع وحضنتها ..
سحب فيصل راسي وباسه ..
" سلامتج خوية بيه ولا بيج "
سمعت صوت ورانا ..
" شلونك خالي خيركم صاير شي ؟؟"
من سمعت صوته احس گلبي وگف .. وماادري شصاير بيه. .
التفتت تريد اتأكد هو صوته ..
عاينت بوجه ..
صفن عليه وعيونه على گصتي ..
سألني بعيونه مستغرب ..
دمعت عيني مااتحملت ..
انتظرتك لحظة لحظة ومااجيت
وتعبن النظرات بعيوني
وغفن..
ورجعت لروحي الكآبه
وحلمي بطل من ضحكته
ورد صفن..
وفزن بكلبي الظنون
وشوكي نيرانه علن
وانه ما ادري شسوي
ساعه ارضع بالصبر
وساعه وي شوكي اهوس
مثل واحد جنه
جن..
وانت ماكوا......
والزمن لحضاته من غيرك
سنين
وكفن اكبالي
ولا خطوه مشن...
#يتبع……… .
( شمس السعدي )
حبايب ياليت تتفاعلون لان البيج ضعيف حيل ومايفتح عندي بالنشر ..