[فيتامين سي]

مساء الورد احبتي ❤
//// البارت الخامس والأربعـــون /////
#بيوت_بلا_جدران
#شمس_السعدي
----------------------------------
‏تبلَّد إحساسي فما عدتُ أرتجي ..
حبيباً ولا أخشى الذي كان ضرني ..
وأغلقتُ بابي .. واعتزلتُ أحبتي ..
فلا الهجر أضناني .. ولا الوصل سرني ..
_______________________________
كـ النجوم محاطة بفراغ عظيم ..
هيج شعوري جان لمن شفت عيد جاي علينا ..
المضمد يسوي الماسة الكانونة ويضربها الابرة واني ابجي وياها من خوفي ..
اشوف علي يتطالب وي عيد ..
اشرل للزلم الوياه لزموا علي ..
صاح علي ..
" عيد اذا وصلتلها اذبحك بعلي "
ضحك عيد ..
" دخلص روحك عودن احجي "
التمت العالم كلها عليهم ..
وفيصل يتهدد ورحيم مجتف اديه اثنينهن ..
اجه بأتجاهي ..
خفت..
فتح الباب ..
شال ماسه لزمتها ..
" عيد عوف بتي "
عاين عليه ..
" شوفي ولج .. شايفه هاي الناس كلها الواگفه تعاين .. افضحج گدامها .. الرسالة بجيببي وعلي وياج بس افضحكم واخذ بتي واطلكج گدامهم بعد لو تموتين ماتشوفيها .. "
سألته ..
" مو عساس مو بتك ؟"
رد ..
" اعلمنج شلون تشتكين عليه "
رديت ..
" عيد انت الجبرتني .. من طردتني ليش ماطلگتني "
رد..
" ليش حتى تاخذين علي مووو .. شبساع طرشتيله البغداد وجبتيه معناتها تتحاجون من وراي "
رديت ..
" عيد عوف بتي .. مااشتكي بعد بس عوفها "
سحبها حيل مني وطلع ..
رحت وراه اركض ..
" عيد بتي مريضه عوفها "
اعاين عليها تفرفح ومادة اديها الي ..
علي يتماطل وياهم وسحب روحه ..
اجه لزم عيد ..
هدده ..
" اذا تخاف عليها تصير حباب وتسكت .. عبن بس احجي واتهمها وياك .. تصيرون علج بحلگ العالم ورسالتك العدي خير دليل "
التفت علي بساع الي ..
هزيت راسي وابجي ..
اخذ بتي وانه ابجي وفيصل وراي يمشي
اشر الرحيم ..
'" اذا گرب واحد منهم الزمه والله اشتكي عليكم وافضحكم لو لحگتوني "
لزمني علي ..
" عوفيه خل يطلع من المستشفى الناس تعاين وهذا كلب كلشي يسوي "
صحت بي ..
" شنو اعوفه .. اخذ بتي تعرف شنو بتي .. كله منك انت القشمرتني خليتني اشتكي تدري بيهم مايخاوفن الله دور يخافون من القانون شمدريه احنه اشتكينا لان جلابهم بكل مكان "
صم حلگي بساع ..
واشر الفيصل يشيلني من الگاع ..
كومني وخرت عنهم ..
" اخذوني وراهم .. اروح البتي اريد "
رد علي ..
" وين تردين شبيج "
رديت ..
" مالك دخل علي بعد لاتدخل روحك هو من يشوفك يتسودن خليني اني امشي بمصيري المهم بتي بحضني"
رد مستغرب..
" هيج صارت رحمة ؟؟ يعني طلعت انه السبب .. لان ردت احميج واحمي بتج ؟؟"
رديت بعصبية..
" لا مو انت اني السبب .. لو ماطاوعتك ومشيت وياك ماصار الصار .. انت واني والدنيا كلها تعرفهم شنو وشلون مايهابون احد .. بس عاندت وفتت للنار برجلي وهاي النتيجة اخذ بتي حتى يحرگ روحي "
اتنهد ..
" هسا عاذرج انه لان محروگ گلبج على بتج .. بس انه لليوم ماردت اذيج .. وكلشي اسوي علمود ماتضلين بالظلم "
همست .." انت تسويه علمود ترد حب مستحيل يرجع ويتحقق .. خلص البينا مات علي .. بعد لاتساعدني .. خليني اعيش مصير امي بس كون بتي يمي "
عفته ومشيت وفيصل وراي ..
اشرتله ..
" اجرلنا سيارة بساع علي خلي نمشيلهم "
اجه هو ورانا ..
اجرلنا سيارة ..
وصعد بالصدر ..
استغفرت ربي .. بعده يعاند ..
صعدت اني وفيصل لورة ..
الطريق كله ابجي واتخيلها شلون مادة اديها الي وتبجي
لو مخليتها يم امي ماجان اخذها ..
بقيت الوم بروحي ..
اعاين العلي وابجي ..
رغم قسيت عليه بس ماعافني وحدي ..
لازم اسوي هيج وابعده عني ..
لان مااريد احترگ بنارهم واحرگه وياي ..
وصلنا نزلوا قبلي ..
نزلت ..
" علي انت ضل هنا اني امشي الهم "
رد ..
" شني تردين تتوسلين ؟"
رديت ..
" الاخذها بتي ولو اعرف يموتوني مااعوفها "
رد..
" اوگفي اني احجي وي خالي "
التفتت ..
" عوفني علي بعد لا تتدخل الخاطري "
بقى واگف وعيونه تعاتبني .. بس مارديت ولا خليت عيني بعينه ..
مشيت للباب ادگ بيها ..
" عيد افتح عيد اريد بتي "
سمعت علي يحجي وي فيصل ..
" لاتعوفها خلك وياها "
فيصل وخرني وصار يدگ الباب حيل ..
" افتحوا شمالكم انطرشتوا .."
طلع عيد ..
" شعدج جايه مو طردتج .. ومو تردين تتطلگين "
رديت ..
" عيد انت ماتحب بتي ولاتريدها اطينياها "
ضحك ..
" بتي وبأسمي شلون مااريدها ..امشي انتي الحبيب الگلب خله يفيدج روحوا اشتكوا عليه وشتسوون سوو عدي شهود وشافوكم سوية ماخذه بتي وشاردة بيها وخل نشوف القاضي يصدگ منو "
طلع اركان وراه شافني ..
" رحمة شبيج ؟"
رد عيد ..
" انت لا تتدخل "
تعصب عليه ..
" شني مااتدخل رحمة اختي"
رد عيد ..
" ايباااااه وتوك دريت "
ضاج اركان ..
" عيد خلها تدخل لو ماخليتها اخابر ابوي وهو يتصرف وياك "
ضاج عيد ..
" شني دور زعطوط يهددني "
هز ايده ..
" اعلمك الزعطوط ياهو ؟"
رد فيصل ..
" عمي خلها تدخل انت الطردتها هي وبتها مالك حگ عليها بعد "
عاين عليه ..
" اطردي هذا الكلب الوراج وانه ادخلج "
درت وجهي ..
علي تسودن ..
" منو كلب ولك اني "
راد يضربه لزمته ..
" علي روح روح عفيه خليني ادخل البتي ماتسمع صوتها راح تموت حرام عليك "
تعصب ..
" ولج انه حرام عليه.. وهمة شنو ؟؟.. بس كله من وراج انتي الرضيتي بالذلة .. "
رديت ..
" وهسا انت تحاسبني .. شتريدني اسوي .. وانه مالي احد ولا سند .. كافي علي الخاطر الله روحي وعوفني وانساني اصلا بعد لاتجي "
احجي هيج وگلبي يتگطع بس مو بيدي .. علي عنيد ومايتنازل واذا ماطردته ماراح يمشي .. وعيد يعاند اكثر ..
اعاين الملامح عيد جانت بيهن علامة النصر وهو يعاين العلي ..
رد عليه ..
" شني مو طردتك ماعدك كرامة "
رد عليه علي ..
" مخلي الكرامة الك ياسكير .. راح امشي مو علمودك ولا علمودها .. بس علمود هالطفله الراح تموت من البجي "
عافنا ودار وجهه ..
وجن الدنيا كلها دارت وجهها عني وغربت ..
زدت بالبجي واشهگ ..
" يله مو مشى بعد شتريد افتحلي الباب خل اشوف بتي "
فتحها وهي يضحك ومتونس على عذابي ..
فتت ركض للحوش جانت شايلتها عمتي سمرة وتهز بيها وبتي تدفع بيها ماتريدها ..
شافتني شمرت روحها عليه ..
حضنتها واشم بيها من كل مكان ..
وجهها احمر وعيونها مورمات من البجي وبس تكح وهي اصلا مريضة ..
ردت عمتي سمرة ..
" اعقلي دور وحافظي اعله بتج وبيتج "
رديت ..
" ليش انه من الي بيت ؟؟"
اجت هدوة ..
" هاا حستي حستي لمن رجعتي "
رديت ..
" احس رجعت الگبري بس مجبورة علمود بتي كلكم ماتردوني هنا .. وجن انه مو من دمكم .. بعد ليش رجعتوني مو كلجن وگفتن تتفرجن عليه من طردني عيد بالليل وبذاك البرد .. ما گلتن وين راحت هي وبتها بهالبرد .. ماكسرت خاطرجن ؟؟ لو طلعت الغربة ارحم منكم عليه "
حجت عمتي رضية..
" وج مو انه دافعتلج لو ماتذكرين بس الشينات "
رديت ..
" لان ماشفت منكم الزينات حتى اذكرهن "
ردت عمتي بثينة ..
" عمج من سمع گال دوروها وجيبوها ؟"
ضحكت ..
" وانتي شحجيتي بذيج الليله .. مو صفيتي وياهم عليه .. "
دخل اركان ..
" صدگ يمه انتي واگفه من طردوها ؟"
اتلعثمت بالحجي مااعرف شني گايلتله ..
ضحكت ..
" مااعتب عليج.. هو اخوج من دمج ومريض وضال بالشوارع يخدمون عليه يجي بالليل ينام گبل من التعب وانتي ماتحنين عليه .. دور تحنين عليه ؟؟"
عفتهن ودخلت للغرفة ..
اجه وراي فيصل وبيده علاگة الدوة ..
" هاج هاي دواها .. وانه رايح اشوف علي خطية "
اتنهدت ..
" راح لو بعده "
رد ..
" لا گالي طمني عليها خاف يسوولها شي "
اتنهدت ..
" اوووووف مو بيده ولابيدي بس خله يبعد احسن اله والي "
رد فيصل ..
" قسيتي عليه بالحجي "
اتنهدت ..
" مايروح اذا مو هيج وعيد يعاند .. يأذيه وبتي تتأذه هم "
گام ..
امشي اشوفه.. واروح الامي تلگين گلبها عليج هسا ..
رديت ..
" دير بالك لايراقبوك .. وجيب غراضي وياك "
هز راسه وراح ..
ماسه نايمة بحضني..
سمعت صوت بالباب ..
خليته على الفراش وگمت ..
فتحتها ..
سحبها حيل وسدها ..
" شتسوي " سألته
رد ..
" احبسج هنا لمن تموتين مالج طلعه بعد "
رديت ..
" انت مو صاحي هو منو الطلعني وطردني غيرك ليش تقفل عليه هسا افتحها .. مافكرت ببتي وبيه شلون نطلع "
مااهتم الي ولا رد عليه..
فزت ماسة تبجي خافن حسبالها اعوفها ..
رجعت خليتها بحضني واسكت بيها ..
مرمر ..
طلعوا الصبح وانه گلبي ماكلني عليهم دور ماسه مريضه خفت لا شو شبيها وهيج اتأخروا..
روحي صارت يم الباب كل شوية امشي للباب وارجع
صار الظهر وهمة ماكو ..
ساعتها گلبي انقبض ..
طلعت خاجية تغسل شافتني ..
" خير شبيج ترحين وتردين هيج "
رديت ..
" خايفه بس لا صارلهم شي لو ماسه تخربطت صوجي مارحت وياهم "
ردت..
" وين ترحين بايعه روحج انتي "
رديت ..
" جا احسن ضالة هيج مااعرفهم وين ماوين "
ردت ..
" گومي اذكري ربج الاذان اذن "
استغفرت ربي وكمت توضيت .. كملت اندگت الباب
فتحتها زينب ..
دخل فيصل بساع وسد الباب وراه ..
ردت عليه زينب ..
" شني ماتستحي مااگول البيت بي نسوان شلون تخش هيج "
رد ..
" مو وكتج انتي "
من شفته وحدة وهيج حالته گلت بناتي بيهن شي ..
سألته ..
" البنات وين ؟"
اتنهد ..
" يمه مابيهن شي بخير .. بس عمامي لگونا واخذوا ماسه من عندنا .. ورحمة رجعت وياهم علمود ماسه "
شهگت ..
" يمه بتي وعلي وين شلون يعوفكم "
رد ..
" عمي علي ويانا جان بس مايگدر يسوي شي .. لان بوسط العالم گالهم افضحكم واكول شردت وي صاحبها واخليج فرجة للعالم "
مااتحملت الحجي بسرعة گعدت على حيلي احس رجلي ارتخت ودخت ..
اجه فيصل سندني ..
" يمه شبيج لاتخوفيني اعليج "
بجيت ..
" حسبالي بتي خلصت وردت الحضني جنها مقسوم عليها مثل امها تضل سنين مدولبة "
رد ..
" يمه لاتسوين بروحج هيج .. هذا حظها بعد "
رديت..
" ماجان لازم اخليها تمشي هيج مشينا ورى حجي علي"
رد " اول وتالي يلگوها لان جدي منهل مهدد عمي الا يرجعها للحوش "
بقيت مااعرف شسوي وين اروح مقسوملي اضل هيج اولادي كل واحد بجهة وبعيدين عليه ..
جابتلي زينب ماي شربت ..
ارتاحيت شوية ..
سألني فيصل ..
" اريد غراض رحمة وماسه اخذهن ماعدهن شي يلبسنه "
گمت وعاوني هو .. لمينا غراضها .. ضليت اشم بهدومهن وابجي .. خليت يمي كم ثوب الهن بلكي يردن الحضني ..
لزمت فيصل ووصيته عليهن ..
" لاتعوفهن يمه بناتي امانه عدك "
رد..
" والله مااعوفهن يمه .. وعمي علي هم وصاني شبيكم من غير ماتوصني غير اختي وبت اختي "
سألته ..
" وعلي وين هسا ؟"
رد ..
" منتظرني براس الشارع ضايج ومستحي يخلي عينه بعينج يگول مااگدر اردلها فارغ وانه الاخذتهن بيدي "
اتنهدت ..
" وهو شبيده قابل .. گله خل يرجع الامه واخته ولا يورط روحه وياهم "
اخذ غراضهن وراح وبقيت انه بحسرتي ولوعتي عليهن
رحمة ..
بقيت بالغرفة محبوسة لا اكل ولاشرب ..
وبتي مريضه وجوعانه ..
دور ذبت من راسها على هدومها وماعدي هدوم الها ابدللها .. وفيصل اتأخر عليه. .
بقت حسبة تاخذني وحسبة تجيبني ..
خفت لا راقبوه ولزموه يم امي وشو شني سوولها ..
بعدني افكر اندكت الباب ..
سمعت صوته يصيح ..
" منو مزقفل الباب افتحوها "
ردت عمتي سمرة عليه ..
" عمك زقفلها وراح لاتتدخل انت "
رد عليها ..
" وليش يحبسهن مافكرتوا شيكالن شيشربن .. والله لو ماانتو اهلي جان گلت شياطين مو بشر ."
ردت عليه ..
" اتيدب حسابك بعدين انت .. طلعت تعرف مكانها وتمشيلها وماتگللنا "
رد عليها ..
" وليش اكلكم موش انتو الطردتوها ؟؟"
سألته هدوة ..
" صدك هي وين راحت وعند منو گعدت ؟"
رد..
" عد ناس ارحم منكم "
صاحت بي ..
" خوش يفيصل خل يجي عيد واعلمنك "
راح فيصل مدري وين ودور اجه ..
ضرب الباب حيل فزيت ..
ركضت الماسه سديت اذنها لاتخترع ..
صاحت عليه ..
" ليش فتحته عمك زقفله اذا اجه يكتلك "
رد عليها ..
" اني وعمي شلج غرض "
سمعت عيد يحجي ..
" شتسوي ولك ؟"
رد ..
" افتح الباب الهن .. شني ذنبهن بلا اكل لسا وهاي هدومهن وغراضهن "
صاح بي ..
" شني ولك تكسر حجايتي انت "
رد عليه ..
" عمي حجايتك لو حگ اخليها على راسي "
صاح بي ..
" انت تمردت فد مرة وطاح حظك من رافگت علي .. حسبالك مااحاسبك شلون تمشي وياهم علمود تشتكي عليه .. اعله عمك تشتكي ولك… منا وجاي خليتك براسي يفيصل والله الا اذلك واخليك تتوسل "
رد فيصل ..
" شني تهددني عمي "
رد عيد ..
" واطيح حظك بعد "
.. تعاركوا اثنينهم لمن دخل عمي منهل صاح بيهم ..
صاح بيهم ..
" شمالكم تتعاركون فضحتوني بالسلف كله ونزلتوا مهابتي "
رد عيد ..
" انه النزلتها لو هذا ورحمة يفترون بالمراكز يشتكون عليه "
صاح بي عمي ..
" صوتك ولك لا تعليه .. وكت هيج صرتوا .. طلعت بس
الشيخة تعرفكم وتعرف شلون تعاملكم .. جنتوا حجاية ماتحجون بوجودها وهسا انه واگف وتتعاركون كل خشا ماعدكم "
رزلهم وصاح بعيد ..
" افتح الباب عليها خلها تطلع .. ودور اذا قللت من شأن اركان حسابك وياي "
فتح الباب طلعت ..
جان عمي منهل واگف ..
عاين عليه ..
" انتي گدام السلف كله بتي ومسجلة بأسمي ..
سوايتج هاي ماناسيها بس لان هو السبب.. طردج من غير مايشورنا ويسألنا ويخليلنا اعتبار ..
بس لو تكررت هالشغله انه الاحاسبج .. اسمي ماتوسخيه افتهمتي ..
رديت ..
" ماگلتلكم سموني .. انه اصلا بس بالاسم بتك .. هسا ماكتلك عاملني مثل ابوي بس انه بنت اخوك ولازم ماترضى اعله اليصير بيه "
رد ..
" ومنهو كالج رضيت لو راضي مااخليه يدورج ويجيبج وبعدين شغله ابن حوريه حسابها غير وكت .. راح تعمين على الولد بسوالفج "
ردت اروح سمعته يحجي وي فيصل ..
" وانت ياابن فرج .. ان مانعدلت اعدلنك انه .. وماضل شي واوديك للعسكرية علمود تصير ادمي "
من سمعت هيج تسودنت ..
رجعت ..اشرلي فيصل اسكت ..
اجه وراي ..
" سمعته شيگول يوديك للجيش ؟"
ضحك ..
" خله يوديني جا شني اخاف .. وهي الحرب خلصت بعد ليش خايفه "
اتنهدت ..
" فيصل انت هم من وراي تتأذى بعد لاتدافعلي اسكت الله ياخذلي حگي .. "
رد..
" تحجين صدگ انتي ؟"
رديت. ..
" اي صدگ .. وانه اصلا بعد مالي شغل اكمل شغلي واگعد انه وبتي هنا "
رد ..
" راح اروح اسوي غدا تاكلين ؟"
رديت ..
" اگعد يم ماسه انه امشي اسوي ولاتعبس بعد .."
ضحك ..
سويت غدا وگعدنا ناكل ..
ماسه مالها خلگ اكلت شوية ..
سألته على امي ..
اتنهد وحجالي حالها كلش ضجت عليها ..
وصيته مايمشيلها بعد .. او بالاسبوع مرة .. خاف يراقبوه وخاصه عيد گاله اخليك ببالي دور ..
جنت خايفه على فيصل منهم… او من عيد خاصة
وخايفه لا بيوم يكشفون مكان امي ..
الهيج گلتله بعد لاتجي هواي لهنا ولا يمشيلها هواي ..
دخل اركان شاف فيصل عدي ..
" ماتگوم اريد اشوف اختي "
رد فيصل ..
" ماتشوفها من لازمك توك ذكرت عدك اخت "
تعصب اوكان ..
" ماجاي اخذ رايك .. انت الدخلت بينا "
رد فيصل :
"شسويت دخلت بينكم هو انت ماتحبلك واحد "
حجيت عليهم اثنينهم ..
" كافي شبيكم تتكاونون "
رد اركان ..
" الصوج بيج گربتيه عليج وبعدتيني "
رديت ..
" انه بعدتك لو انت البعدت روحك عنه واكو من يقرأ براسك "
رد ..
" عرفتج راح تجيبين طاري امي .. ومحد يقرأ براسي اني مو جاهل .. بس اكو ناس مو من مستواي "
ضحك فيصل ..
" وشنو انت مستواك .. شهادة عندك ؟؟ لو الگرعة تتباهى بكفشة اختها .. عبنك تتباهى بأبوك مو بروحك"
رد اركان ..
" انه رايح مااريد ابقى يم هذا .. اذا احتاجيتي شي گليلي ولو ادري بيج ماتگليلي مگربة الغربة وباعدتني عنج "
گمتله ..
" اني اختك لاتگول هيج "
هز راسه وراح ..
بقى فيصل يحجيلي عن علي شلون ضل يراقب الطريق خاف واحد يعرف مكان امي ..
وشلون ضل عد صديقه للعصر كلش يله رجع ..
اتمنيت مايرجع بس گلبي ينزف علموده .. نهيت كلشي بينا وعاندت گلبي وعقلي ..
لان اعرف مادام عيد بوسطنا مانرتاح ..
هاي المرحلة الاخيرة عنده… ولازم يركز بدراسته حتى ينهيها ويرجع ..
وخايفة اذا رجع شلون ..
خليت راسي على المخدة وماسه بحضني ونمت لليل يله گعدت ..
كانت امي متخلينا ننام لليل قبل المغرب تگعدنا تخاف علينا ..
امي ماتجي الا مرات متفاوته مايخلوني اطلع للباب ..
بس من تعيرلهم گيمر اسوي روحي رايحة للمطبخ واخليها تشوفني .. جنت اضحك وابين مابيه شي علمود ماتضوج وتنقهر ..
عزلت روحي عنهم نهائي .. لو بغرفتي اضل لو يم الشيخة ..
جانت تعاين عليها وبعيونها الف سؤال ماادري شني بداخلها ..
ماسه جانت شتاكل تطيها ..
لو تطيها الرمان تفلسلها وتاكل وياها ..
حسيتها اتعلقت بماسه .. من تشوفني تأشرلي عليها..
عود وينها ؟؟
اكلها نايمة تسكت ..
واذا گاعدة تأشرلي اجيبها..
اروح اجيبها واجي ..
ماسه گدرت تلين گلب الشيخة وجبروتها مثل ماسوة رضوان .. يمكن هم اكثر اثنين هيج عاملتهم بحنية ..
مرت الاشهر ودخلنا بسنة ..1990 ..
وبهاي السنة صار تبديل اسرى .. ورجعوا الاسرة ..
وجنت متأملة يرجع رضوان ..
جنا من يجي اسير نسمع الهلاهل والدگ ..
واني يم الشيخة اسمعهن ابتسم ويدگ گلبي ..
تأشرلي ..
" شنو هاي ؟؟"
ارد ..
" ذوله اسرى رجعوا بلكي فرج ورضوان يرجعون "
من اذكر رضوان تضل تبجي وتون مااعرف شتريد تگول
يمكن مثلي تنتظر جيته وتفرح من تسمع الهلاهل والرگص ..
مو بس اني منتظرة ..
جان فيصل مثل حالتي واكثر ..
بحيث اول مايسمع جابوا اسير ..
يلبس ويركض يطلع يروحلهم ..
ومن يرجع يرجع خايب امله .. نتلگاه ونسأله
واولنا عمتي سمرة ..
يهز براسه ماكو ..
يگلي رحمة..
من اسمع اجه اسير اركض الحوشهم واسأله على ابوي .. بس المشكلة من يسألني يگلي شني شكله اسكت مااعرف اجاوبه .. ماعندي بس صوره وهو صغير"
اتنهدت ..
" ماشفت منيرة عدها صور اله وبعرسهم طاگين هم "
يرد ..
" ما ترضى تطيني تكلي ماعندي اله صور "
اضوج وانقهر عليه بس شبيدي عليه ..
ابوه عافة وهو صغير ببداية الثمانينات ..
وهسا عمرة صار 18 سنة ومتلهف الشوفته ..
صح ماشفت حنان ابوي ولا عرفته .. بس امي عوضتني عنه .. بس فيصل خطية جان يستجدي الحنان من الكل .. ولمن لگاه عد امي .. اتعلق بيها وبية
بقى هاجس رجوع ابوه محاوطه ..
يگعد من الصبح يفتر على البيوت .. ويدور الاسرى
وبكل مرة يرجع خايب لكن مايمل ولا يكل ..
حتى اهل البيت صاروا يعرفوه يطلع الصبح يجي بالليل وكم مرة جده تعارك وياه ومنعوه يطلع ..
جان يطفر الحايط ويشرد ..
ومن يرد من نفس المكان الشرد منه ..
حتى دراسته هملها ورسب بصف الخامس اعدادي وانه جنت متأملة يكملها ويمشي للسادس ..
اما علي ..
جانت هاي اخر سنه اله .. ماشفته من اخر مرة اجه وصار الي صار ..
جنت كل يوم اوگف يم الشباك انطر رجعته هو ودمعة وعمتي ..
بس مااجو ..
والسمعته من عماتي ع اساس مايردون بعد ..
وقرر هناك يتعين ويشتغل ببغداد ومايرجع ..
حسيت بغصة بداخلي.. وعتب .. جن مامصدگ گلتله روح ولاتجي بعد ..
جان كل شهر يجي ويلتقي بفيصل بالگهوة ويروح الامي يشوفها بس مايجيني ..
اسمع اخباره من فيصل جنت ..
جنت من اسمعهن يگولن هسا حورية تزوجه بغدادية يتگطع گلبي ..
واحس خلص خسرته للابد .. بعدين اتراجع وافكر ..
" اني ليش انانية هيج.. يعني قابل يضل بلا عرس علمودي وانه عيد حالف مايطلگني .. وحتى لو طلگني قابل عمتي ترضى تزوجه وحدة مثلي وعدها بت "
استسلمت للامر الواقع وقررت اطوي حياتي واحلامي وياه للابد افكر ببتي وتربيتها وبس ..
وخاصه بعد ماعيد ابتعد عني نهائي وهجرني وهالشي ريحني وخلاني ارتاح بحياتي شوية ..
هدوة حبلت للمرة الثالثة وجانت فرحانه .. وكل ضنها انه اضوج ..
عيد بالفترة الاخيرة تغير بعد ماصار ايد عمي منهل بالسلف ..
حتى الشرب بطله ..
وصار يداوم بمقر الحزب ويروح وياه ويرد باجتماعات المحافظة ..
وتحول لبسه من دشداشة الى بنطرون وقميص .. متأمل عني يخليه بمنصب جبير ويصير ببغداد ..
هالشي زاد غرور هدوة .. وجان فيصل من يشوفها يكول ..
" اليشوفها يگول رجلها صار عضو فرقة وهو كله مخبر مخليه جدي ينقله سوالف السلف كلها "
شغلت عيد خوفتني ..
بحيث يفترون ليل ونهار بالسلف ويشمشمون اخبار ..
خفت بيوم يلمح علي لو يراقبه ويوصل الامي ..
خليت فيصل يخابره ويحذره .. لان عيد طغى حيل والناس صارت تشوفه تتشارد ..
تخاف يشمر بلاه عليهم ..
لو واحد يعاين عليه يكله ليش تعاين عليه ويتعارك وياه ..
بس بشهر اب من سنة تسعين صار الغزو على الكويت ..
ودخل العراق بحرب ثاني ..
وهالشي زاد تذمر الناس وخوفها ..
ماصدگوا تنتهي الحرب ويستقر حالهم وترجع اسراهم
راح يرجعون للحرب وخوفهم من الاسر اكثر من الموت..
توقف تبديل الاسرى من صار الغزو .. وفيصل ضاج وصار يدعي ويصيح ..
بالگوة سكته لا يسمعه احد ..
وخاصه عيد يريدله حجة على فيصل ..
عيد من سمع خاف ياخذوه للجيش .. صار يختل ببيته ومايطلع .. ويتوسل بعمي منهل مايخليهم يطلبوه ..
ولان عمي منهل مستفاد منه .. وعده انه محد يطلبه ولاواحد يفكر بي ..
هالحرب استمرت (6 أشهر و3 أسابيع و 5 أيام)
كانت نتيجتها..
النتيجة انتصار تحالفي حاسم
انسحاب عراقي من الكويت ..
وفرض عقوبات على العراق ..
بالاضافة للخسائر فادحة وتدمير البنية التحتية العراقية والكويتية ..
بعد هذه الخسائر الفادحة وسقوط حوالي 100 الف قتيل عراقي ..
تذمر احد الجنود في جنوب العراق واشعل فتيل الانتفاضة الشعبانية ..
التي حدثت سنة 1991 بشهر اذار وبالهجري بشهر شعبان ..
هذي الانتفاضة كانت بمثابة انقاذ الي ولبنتي .. من عدو استحل جسدي وحريتي .. دمرني وحطم عمري وشبابي ..
فرقني عمدا عن احبتي ..
ماجنت اريد ان اذكره بهيج شكل احتراما لبنتي ..
لكن الالم الي تركه بداخلي والسنين الي اخذها من عمري خلتني مااحزن ولا انقهر عليه ..
لاتوزّع الأقدار وتترجم النوايا ..
حسبك نفسك ومن تعول ..
أنت اليوم صالحاً وغداً ربما يختم لك بخاتمة سيئة .. وقلوب العباد بين أصابع الرحمن تتقلب كتقلب الماء المغلي !!
#يتبع…
( شمس السعدي )