[فيتامين سي]

مساء الفل والياسمين احبتي ❤️
//// البارت السابع والأربعـــون /////
#بيوت_بلا_جدران
#شمس_السعدي
----------------------------------------------
شيعوضني الدمع وانة الخسرتة هواي ..
وعلى رملة امل كل عمري وشلتة ..
وانة الباكو نهاري ورحت ادورة بليل ..
والمسودن طبع ميعوف سالفتة ..
على نفس الدرب ذبولي بس الصوف ..
حتى ارجع وكول ذياب ماكلتة…
-----------------------------------------------
من بعد ماصار عمي حطاب جانت عمتي سمرة تحاول تاخذ مكان الشيخة بأي شكل ..
واول قرار اخذته .. هو تزوج هدوة الرحيم من غير ماتاخذ رأيهم وتشوفهم موافقين يو لا ..
من سمعتهن درت وجهي ومشيت وجن ماسامعه كلشي ..
بس جنت حاسه هالهدوء الي بالبيت مايدوم ..
وراح تشتغل الحرب بين عمتي سمرة وعمتي رضية بعد ماصارن حبايب بالفترة الاخيرة ..
اما حمدية وهدوة الله العالم شني راح يصير بيهن ..
اجت منيرة ..
" لاتطلعين من المطبخ اجه الرجال يسوي التلفون "
استغربت :
" ياتلفون ؟"
ردت ..
" موش عمتي سمرة گالت العمي حطاب تريد تلفون بالحوش .. وشكلوا خطوط بالسلف وراح يجرولنا "
سألته ..
" مو الشيخة مانعه التلفون بالحوش ؟"
ضحكت ..
" هي حتى الهوى لو بيدها تمنعه اعلينا لا تلفون لاتلفزيون ماخلت شي مامنعته عنا .. عبن منهي بحالها وياخذ رايها بعد "
سكتت وضليت بالمطبخ طبخت ..
اجت ماسة جوعانه گعدت اوكلها بين مايكملون ..
اتذكرت عيد ميلادها ..
صار عمرها اربع سنين .. حضنتها وابوس بيها ..
" اليوم عيد ميلاج " گلتلها
ضحكت :
" تسويلي حبيبة زيتويو "
اتنهدت وحضنتها ..
" عيدج مبارك يروح امج .. عسا ايامج كلها سعادة "
دخلت عمتي سمرة ..
" گطع الله السعادة عنج ولاشفتيها يوم .. عبن شني فرحانة جيف خلصتي من عيد وجاية تفرحين بعد بتج"
رديت ..
" ياعمة شني شفتيني مشغلة شموع ومحتفلة "
ردت ..
" هم عوزج تحتفلين وتفرحين وابني جوة التراب .. سودة عليه يمه ريت هالتراب الطمك طم شكو واحد فرحان الموتك "
ضلت تبجي وتحجي..
سمعت الشيخة تصيح ..
اخذت ماسه وركضت بس ردت اخلص من حجيها..
دخلت للشيخة اشرتلي جوعانة ..
خليت ماسه يمها ورجعت صبيت غدا الها ..
شافني عمي خطاب ضل يحجي..
" شمالج ثولة موش گلنا لحد يطلع ؟"
رديت ..
" حسبالي كملتوا "
صيح عليه..
اخذت الصينية ودخلت الغرفة الشيخة ..
شفت ماسه تحجي وياها..
" اني اليوم عيد ميلادي .. لحمة تسويلي حبيبة زيتويو بس ياااا امي ململ ماهي .. انتي تحبين امي ململ هي تحبني وراح تجي تسويلي حبيبة زيتويو "
ابتسمت وبنفس الوكت تنهدت ..
شگد مر على غياب امي بس مانستها دوم تذكرها ومن شافتها اخر مرة بساع عرفتها وضلت تبجي تريد تروح وياها ..
والخلاني استغرب اكثر وهي تحجي للشيخة كلشي والشيخة ساكته وتسمعلها .. وماادري ان جانت تحس بالذنب يو لا ..
ومن تذكر امي شتگول ..
لليوم ماسألتني عنها وگالت وينها لان تعرف وكلشي تسمع وماتگدر تحجي .. وهذا الخلاه تطحن بداخلها من الحرگة وتسكت ..
حتى بدأت تذبل يوم عن يوم وتتغير ..
غديتها وكملت..
بين ماكملوا طلعت ..
جانن يتطالبن على التلفون وجنهن مامصدگات ..
عمتي بثينة تگلها اريد خط الي بالحجرة اخابر بي منهل البغداد ..
وعمتي سمرة تگلها ماكو بالحجر هو بالهول والتخابر تخابر هنا ..
رغم جبروت الشيخة وتعصبها بس جان محد يگدر يتصرف بالبيت غيرها .. هسا كل وحدة بيهن نصبت روحها شيخة على الثانية ..
اما اني خان البيت عليه مثل ماجان على امي .. مرات منيرة تساعدني وحمدية بحجة مريضه ماتشتغل وهدوة من يوم الراح عيد ساكنه غرفتها ماطلعت بس للحمام وترجع لو تصب اكل ملتهية بجهالها وابنها كل فترة يتمرض وبتها صغيرة ومدولبتها ..
جنت مااهتم اهم شي عدي يفكن عني .. الهي روحي بالبيت وبماسة ومرات اسبح الشيخة وانظف غرفتها بحيث ما ارتاح لليل ..
عمتي حورية من بعد الصار بالانتفاضة وبعد موت عيد خافت على علي ..
وبأصرار من علي رجعوا للسلف بس جانت شارطة تطلگ ..
علي ماجان راضي تطلگ وراد يصالحهم بأي شكل وهي ماترضى ..
جان يفكر بحجي السلف وهو واخته بهيج عمر وتتطلگ امه ..
من بعد موت عيد مااجت لأن هي ماتدخل الحوش ..
وگاطعة علاقتها ببيت الشيخة .. وفيصل يگلي رجلها يبات بالمضيف مايبات يمهم ..
مرت الاشهر وكملنا العدة ..
جنت احس روحي بسجن اكثر من قبل .. لو بيدهن حتى فيصل يمنعنه يجيني ..
من غير صوتنا كون مايطلع ونهمس من نحجي .. حتى المسك منعتني اخليه خاف يشمه غريب وتخرب العدة ..
جانت عندها عقائد مدري منين وعادات ..
طول هالفترة واحنة مستغربين عمتي مهجة مااجت رغم راح يصير خمس اشهر على موتت عيد ..
واستغربنا اكثر من اجو بعد هالمدة .. وجان عمي حطاب وعمتي سمرة ماخذين على خاطرهم منهم ..
وماعرفنا ابد شني الماخلاهم يجون ويعزون ذيج الفترة ..
دخلت عمتي وبيبي دنانير وجان جاي الشيخ وعمو رماح ودرع ..
من دخل درع حسيت بشعور غريب .. وجانت فرحتي وجن شايفه واحد من اهلي ..
سلم وبنات منيرة مثل عادتهن من يشوفنه يتسودنن
صاير زين ويمشي على رجله من الحادث ماشفناه بعد
جنت عازلة نفسي ..
دخلت عمتي وبيبي دنانير .. سلمن وعزن عمتي سمرة وحجتهن بسبب الاوضاع بالبلد مايطلعون ..
وعمتي سمرة تشمرهلن حجي من فوگ الفوگ ..
وهن يسمعن ويغلسن مايعرفن شيردن عليها ..
لان مطياتها الحق ..
دور راحن يم الشيخة علمود يخلصن من حجيها..
ردت اروح للغرفة اودي ماسه وامشي اكمل طبخ ..
طلع درع من غرفة الشيخة ..
صرنا وجه بوجه ..
گال :
" يول شبينا وماتسلمين علينا .. عجل مانعجب لو نسيتونا "
رديت ..
" هلو خوية شلونك .. لا شلون انساك الله شاهد من اشوفنك جن شايفه رضوان "
اتنهد ..
" الله يذكرو بالخير ويرجعو بالسلامة .. وحش البيت دونو "
رديت ..
" اي والله وحش لسا مامصدگة غيابه عنا وامي مايوم نسته كل يوم تگول باجر يرجع "
هز راسه ..
" هي وينها اريد اسلم عليها "
بقيت صافنة بوجهة ماعرفت شني ارد ..
سأل ..
" شبيج تدحكين هيج بيها شي امج "
رديت ..
" لا امي ماهي "
سأل :
" عجل وين ؟"
رديت ..
" لاتسأل مااعرف شني اگلك "
سكت ماحرجني ..
اخذ ماسه مني بوسها ..
رجع عاين عليه ..
" مااعرف شلون اعزيج وشنو اگلج بس البقاء لله "
بقى شايلها ويبوسها ويشم بيها ..
" تشبه امج كلش "
هزيت راسي ..
" اي كلش "
سألني ..
" هي شسمها گلتيلي نسيت "
رديت ..
" ماسة "
ابتسم ..
" وصدگ ماسه "
طلعت عمتي سمرة شافتنا ضلت تخوزر ..
حس عليها گالي ..
" انه رايح اشوف علي ماشايفه من زمان وراح اخذ ماسة وياي "
عافنا وطلع لزمتني ..
" ولج انتي ماعندج خشا .. شني ماصدگتي خلصتي عدتج وگاعدة تسولفين وتضحكين وي ولد غريب شني ابني طامة التراب وانتي تسولفين وي الزلم بس لاترديلج رجل ولج ؟؟"
رديت ..
" شني هالحجي عمه .. درع مثل اخوي مو تدرين امي مرضعته "
ردت ..
" هجم بيتج انتي وامج هي يومين مهجة مريضه ورضعته امج شبساع صار اخوج لو ترديلج حجة تحجين بيها وياه "
رديت ..
" لا مو يومين اكثر امي گالتلي "
ردت ..
" هاي امج تسودنت لين اخذوا فروخها گامت شتشوف واحد وگالت هذا ابني انه رضعته مثل ماضحكت اعله فيصل وخلته يصيحلها يمه .. تالي عافتكم كلكم وهجت والله العالم هسا معرسة يو وين بس الله اليدري"
ضجت من حجيها :
" امي ماهجت تطردوها مثل ماطردوتني والله العالم شون هددتوها يو شو شسويتولها؟"
ردت :
" وج مالت الوجع موش احنة وياج رحنا البيت مهجة بعد شمدرينا بيها "
جانن كلهن واگفات يتفرجن عفتهن ومشيت ..
كملت الغدا وشغلي ورحت للغرفة ..
جبت الهدوم من الحبل اسفطهن ..
ندگت الباب ..
گمت افتحها ..
شفت درع شايل ماسه ..
وهي مكيفه ..
" توفي لحمة خالو جاب حلويات وهدية "
جان مشتريلها علاگة حلويات ولعابة ..
" ليش زحمت روحك هيج "
رد ..
" يول شنو زحمة مو تگولين اني مثل رضوان يعني اني خالها الماسه واشتريلها هدية "
ابتسمت ..
" شوفي خالو جابلج لعابه العيد ميلادج "
سأل :
" " ليش هو شوكت ؟"
رديت ..
" فات وراح بس هي تريد حاجه للعيد ميلاد"
اتنهد ..
" خطية اختبارج صعب صرتي ام واب الها هسا "
رديت ..
" من اول يوم اجت بي للدنيا اني ام وابو الها "
استغرب ..
" ليش مايشيلها "
رديت..
" الله يرحمه اصلا مامعترف بيها "
اتنهد ..
" حجالي علي كلشي بس ماگالي على امج من قبل انقهرت من سمعت هسا ليش مگلتيلي ؟"
ردت احجي قاطعني ..
" مو وكت هالحجي بعد الغدا اريد احجي وياج "
رديت ..
" مااگدر خاف عمتي ماتقبل هسا اذا شافتنا تضل تحجي "
رد ..
" ليش وين عايشين احنه .. وبعدين انتي بنت خالي وبمقام اختي ونحجي يمهم مامختلين سوة "
رديت ..
" بعد هيج عندنا مايقبلون
رد..
" معليج انه ارتبها "
دخلت ماسه للغرفة جانت فرحانه باللعابة خليتها تلعب وطلعت للمطبخ نصب الغدا..
شافتني منيرة گامت تعوج بحلگها ..
" من يمتى وجاي تحجين وي درع هيج وواگفه تثردين حجي "
رديت ..
" غير ابن عمتي واخوي شبيها ؟"
ردت زهرة ..
" شلون مااشوفن تردين تلوفين اعليه .. وتاخذيلج رجل بعد اخوي .. ماتشبعن رجولة .. بس خل اگلج تراه مايگلبج سمعت عمتي مهجة وهي تگول راح يخطبوله بت عمه ومن يكمل جامعه يتزوج "
هزيت ايدي ..
" ابقن بهذا عگلجن .. درع اخوي افهمن . حاله من حال فيصل وانتي زهرة لاتخافين مااعرس مرة ثانية "
ردت ..
" هم عوزج ناس مامعرسة وانتي تعرسين دورتين "
سكتت عنها ..
كملنا صب واخذوا الصواني للمضيف للزلم ودور فرشنا بالهول للنسوان ..
كملنا صب طلعت عمتي مهجة وبيبي دنانير والشيخة بعربانتها تدفعها عمتي مهجة..
جبت غداها خليته على رجلها وتوكلها عمتي مهجة ..
گعدن ياكلن كلهن سوة ..
صاحتني بيبي دنانير ..
" ماتجين تاكلين "
رديت :
" اريد اوكل بتي مااشتهي هسا "
ردت ..
" جيبيها وتعاي لاتستحين . امج وين ؟"
سكتت ..
ردت عمتي بثينة .. " امها هجت "
ردت بيبي دنانير.. " بيها خير عبن شوفتنها الضيم بس المگرودة وين راحت "
سكتن كلهن ..
وهي تعاتب الشيخة على ظلمها النا ..
" شفتي يربحة شگد ظلمتيها هي وبتها وبالتالي محد گاملج غيرها . شفتها شلون شتردين هي تجيج ماشفت وحدة اجتج غيرها ؟"
هن جانن ياكلن وساكتات ..
عمتي مهجة رادت تغير الحجي سألت ..
" حورية شني ردت للسلف ؟"
ردت عمتي بثينة ..
" اي هي جانت ببغداد ومارادت ترجع بس ابنها مايگدر يضل هناك متعود اعله السلف "
همست هدوة ..
" لا گولن رجعلنا الامل بعد ماعيد مات "
صفنن عليها ..
خزرتها عمتي سمرة .. سكتت
ماعرف شني صار بيه من سمعت هالحجي..
وماجنت مخليته ببالي ابد ..
معقولة علي رجع بعد وفاة عيد الهذا السبب ؟؟
ماعرفت اكل يمهن بس وكلت ماسه وگمت بساع سويت الجاي وصبيته ..
اخذت الجاي گامت عمتي مهجة..
" انه اشرب جايي عد حورية .. امشي اشوفنها "
رديت بيبي دنانير ..
" گليلها خل تجي اريدن اشوفنها ولو انه زعلانة عليها لين مااجتي تشوفني "
راحت عمتي مهجة العمتي حورية ..
والشيخة تعبت من الگعدة اشرتلي اخذها للغرفة ..
اخذتها نومتها بالغرفة ..
دور فرشت البيبي دنانير ترتاح ..
وصحتها ..
" تعاي بيبي ارتاحي فرشتلج بالغرفة "
ابتسمت..
" بيبي لو حبوبة ؟"
رديت ..
" ماكو فرق بس انه متعودة من امي اگول بيبي "
ردت ..
" بكلشي انتي معدلة طالعه عليها حبابه ووجهها كله نور يفتح الوجه "
اتنهدت ومااعرفت شحجي ..
اشتاقيتلها .. واشتاقيت الگعداتها ونصايحها وسوالفها ..
نزلت دمعتي شافتني..
" الله يجمعجن ان شاء الله .. تردين اخليهم يدوروها الج ؟؟"
رديت ..
" لا خليها مرتاحة وهي بعيدة عنا "
سألتني..
" هي امج كم جاهل جابت ؟"
اتلعثمت ماعرفت شحجي ..
رديت ..
" هاا هي اني ورضوان وواحد توم وياي بس مات "
استغربت ..
" شون مات "
رديت ..
" من جابوه مات "
وعيت على حالي انه شجاي احجي .. فلتت هالسالفه وامي گالتلي لاتحجين لأحد .. عود ماردت اگلها على اركان اخوي گمت افلت بالحجي "
استرخصت منها وردت اطلع بساع عنها خاف تسأل بعد ..
صار بوجهي درع ..
" وين امي وجدتي "
رديت ..
" امك راحت العمتي حورية .. وبيبيتك بالغرفة "
عفته ومشيت..
مااريد يشوفني ذني ويضلن يحجن لو يبسمرن ..
كملت شغلي ونظفت الهول ..
واخذت ماسة ننام ..
هيج وكت كلهن يكملن غدا والعدها شغله تگضيها ويرحن الغرفهن ..
توني غفيت اندگت الباب..
عاينت الماسة نايمة.. گمت على كيفي ..
فتحتها جان درع ..
استغربت ..
" ها خوية محتاج شي اجيبلك فراش تنام ؟"
رد ..
" لا شكرا مادام كلها نامت وماكو احد اريد احجي وياج .."
رديت بتوتر ..
" هاااا شتريد تحجي ؟"
احجي وياه وعيني على غرفة عمتي سمرة…
الولد اخوي واشوفه مثل رضوان وخلني اتشرد منه من ورى سوالفهن ..
مالي خلگ يذبن عليه حجاية ..
رد ..
" بخصوص علي "
اتوترت ..
" علي شبي "
رد ..
" شنو نحجي احنة وواگفين يول اني اخوج مو انت تگلين هيج تعاي حدري هين بالهول نحجي "
راح گدامي للهول گعد .. واجيت وراه .. دور گبال عينهن شيخلصني ..
جنت مرتبكة ..
حجة ..
" شبيج يول دحكي ترى گوة كاضب روحي من وراج "
رديت بأستغراب ..
" انه شمسوية ؟؟"
رد ..
" علي النار تسعر بروحو من لهفتو عليج وعلى حبج وانتي ولا هامج .. شنو يول مخليه حجر بگلبج انه لو برو هيج تضعف وتستسلم ازكح بيها واموتها بعد "
ضحكت ..
" شوية شوية تراني مو فاهمة شني تحجي .. ومنو گالك گلبي حجر .. بس انه امري مو بيدي وقدري مو قدره .. اخذت نصيبي من الحياة وهاهي .. خل هو ياخذ نصيبه ويشوف حياته .. اني حياتي البنتي وبس بعد "
صفن عليه وتعصب ..
" لاتخليني ازكح بيج .. شنو نصيبو يشوفو .. هو مايدحك الا بيج وانت تگولين يشوف نصيبو "
رديت ..
" درع اني ماعرفت ليش تفتح هيج موضوع هسا وعلي ليش حجالك .. انت ناسي ابو بنتي ماصارله الا خمس اشهر من مات شيگولون عليه لو سمعوك "
رد..
" دحكي عليه واسمعي .. اولا.. علي ماحجة انه السألتو وخليتو يحجي..
وثانيا .. ابو بنتج يعرف علي يريدج وانتي ترديه وهو الدخل بينكم من غير فواينو الجثيرة الحجالي عنها علي وياج .. انه وعلي مو هسا اصدقاء .. من ايام بغداد بعد مادرست هناك هو مرحلة اخيره واني داومت .. وشفتو والتقينا واكلنا وشربنا حتى نوم انام عندو يعني مو اليوم اول لقاء النا "
استغربت من سمعت كلامه ..
رفعت حجابي عدلته جان طالع شعري انتبه عليه ..
ضحك ..
توترت ..
" شبيك تضحك " سألته
" اني عند شامة مثل العندج برگبتج بس دحكي عليها "
زاح قمصيه راواها الي ..
استغربت ..
" سبحان الله .. بس انت شلون انتبهت "
ضحك ..
" اوووو عندي سرعة انتباه كبيرة .. تدرين من ادحك عليج احسجز تشبهيني .. وكأنه انت اختي مو مريم وميسم اخواتي .. ماكو شبه بينا لا بالاطباع ولا بالشكل"
احس براحة وانه احجي وياه .. وكأنه رضوان گبالي واحجي وياه .
بس خوفي منهن ماخلاني مرتاحة ..
گمت ..
عاين عليه ..
" وين گمتي يول شبيج تتهربين يابة مااكل بشر اني وشحيصير لو گعدتي يمي "
رديت ..
" درع الحجي التحجي بي مو وكته .. بعدين البيني اني وعلي مااضن يرجع .. ماضي وراح "
اتعصب ..
" يول لاتخليني اعصب واكضبج من خوانيگج تايرتاح گلبي من فهواتج .. وريتيني ور گوة كاضب روحي ومااتعصب .. اگلها الولد شاريج ويريدج لسا تگلي ماضي وراح "
رديت ...
" مادام انت حاسبني اختك من صدگ وخايف عليه .. روح اسأله .. عمتي ترضى ياخذني بعد .. وليش هدني وراح البغداد كم سنه من غير مايطالع وراه ..
يخوي انت ماعايش هنا وشايف .. حياتنا غير وعاداتنا غير عنكم انت حبيت بنت عمك من الصغر ومحد عارضك الهيج تحس كلشي سهل .. احنة مو هيج ..
لو فكرت اعرس مرة ثانية ياخذون بنتي مني واني اموت بلياها مااگدر "
جان صافن عليه ويسمع .. كملت رد :
" وين عايشة انتي وليش هالظلم ؟"
رديت ..
" روح اسأل عليه وهو يعرفك اني وين عايشة والصار الامي خير دليل "
ترخصت منه ورجعت يم بنتي ..
اول مرة احجي وي درع هيج .. بس حسيته مثل رضوان وفرغت البداخلي اله…
بقيت اكل بروحي دور شلون حجيت وياه خاف يحجي الامه وتصيرلي مشكلة ..
بين حسبة وحسبة غفيت وي ماسه ماگعدت للعصر ..
بدلتلها وطلعت ..
جانن گاعدات كلهن بالهول يشربن جاي ..
ودرع يمهن ..
شال راسه عاين عليه ..
دنگت ..
مااعرف شنو سبب اهتمامه بيه وليش هيج مهتم السالفتنا اني وعلي .. او يمكن لان صديق علي هيج يتصرف ..
ابتسمت للحظة من تذكرت اول مااجانا درع شلون
علي جان يضوج منه ويغار ..
وهسا شلون صار ..
وي ابتسامتي انتبهت العمتي مهجة تعاين عليه وضايحة..
اخذت ماسه ورحنا للمطبخ ..
عاينت عليه ..
" لحمة جوعانة "
صبيتلها وگعدت اوكلها ..
دخلت عمتي مهجة وبيدها استكان الجاي ..
اخذت الشكر خلت .. ودور اخذت القوري من الجولة صبت ..
تخوط بي وتعاين عليه وجن عدها سالفه ..
وجان شكي بمحله ..
اتنهدت ..
" انتي شعدج وي درع ؟"
رديت ..
" شعدي وياه ؟"
ردت ..
" شفتج شلون تتبسمين بوجهة .. انه مامرتاحتلج ابد واحس وراج فاينه "
رديت ..
" عمة هو اني من شفتج وشفتيني مامرتاحتلي مو شي جديد "
اتعصبت..
" شوف السان مال هسا اگصه .. تربات الفصلية "
رديت ..
" شرف الي انه ربتني فصلية وزرعت بگلبي الحب والطيبة والرحمة بوسط وكر الحقد والنفاق "
ردت ..
" شني قصدج حوش اهلي وكر حقد ونفاق .. الظاهر انتي محد مربيج بس لو شفتج تحجين وي درع دور اكضبج اموتج بيدي "
دارت وجهة وراحت..
خبصتني اكضبج واكضبج جنها درع .. اكضبوني وريحوني من هاي الدنيا ..
عاينت على رحمة ..
حضنتها .. لا يربي استغفر الله خليني عايشة علمود ماسه تتيه بلياي ..
رفعت راسها عليه ..
" هاي شبيها تسيح ابطها والله "
ضحكت ..
" عيب ميوسة شنو ابسطها منو علمج هيج "
هزت بديها ..
" موسى يگلي ابطج من اطلع اشوف فيصل "
كملت غسلتلها وخليتها تلعب ..
التهينا بالعشا ..
ولليل اخذت بتي ودخلت ماردت تصيرلي سالفه ودور عمتي مهجة عينها عليه وين ماامشي ..
وحسرة درع يطلب شي مني لو يلاعب ماسه وياخذها مني اذا ماخزرتني وماترضى يشيل ماسه ..
ليش هيج تكرهنا ماادري وشنو مسويتلها ماسه وهي طفلة ماتفتهم ..
المشكلة ماسه حبته وكلما يصيحلها تروحله وتلعب وياه مااگدر امنعها لو اگله ماانطيكياها ..
ثاني يوم جان جمعة عمتي رادت تروح من الصبح بس درع مارضا گالها خليها الباجر واعدت الولد نطلع للصيد
اول ماكملوا ريوگ طلعوا ..
طلعت اريد فيصل ماهو من اجه درع التهى وياه او بالاحرى من يوم الرجع علي وهو مايفارگه ..
اريد اسألنه راح الامي يو لا گلبي يطفطف عليها اريد اعرف اخبارها ..
صار الظهر وتغدينا وهمة ماكو ..
گامت تحجي عمتي مهجة ..
" اني ليش مااجيبه لهنا لان اعرف يلتهي وي ابن حورية ومدري وين ياخذه ماياخذه "
ردت بيبي دنانير ..
" شبيج بس تزحكين قابل هو جاهل ولد شكبره شني تحبسيه يمج تردين .. وشبي علي انه احبه عبن معدل وخوش ولد وماتطلع منه العيبة "
ردت عمتي مهجة ..
" وشعرفتي منه زين هاي عودن من رحنا البغداد شالنا بالصلوات .. غصب عنه يشيلنا عبن من خير اهلي ياكل ويشرب ومأجرله شقة .. "
ردت بيبي دنانير..
" خير اهلج خير اهلها هم نسيتي هي اخيتج يو ربحة علمتج اعله الگطع .. وانه كم مرة گلتلج بطلي الگطع ولاتفرقين مثل ما تفرقين بين ولدج بس ذيل الجلب عمره ماينعدل "
ردت عمتي مهجة ..
" مشكورة عمة هي هاي المرجية "
ضلن يتكاونن بيناتهن ..
ورحيم گام يدور عليهم ..
مالگاهم ..
للعصر كلش يله اجو درع وفيصل ..
صاحت بيهم عمتي..
" وين وليتو ليش من تجي تتسودن هنا "
استحى من حجيها وهو يعاين بالوجوه ..
رد عليها ..
" شبيج يمه ليش تزكحين هيج شصاير مو گلتلج رايحين للصيد "
ردت بيبي دنانير ..
" مال شغل يمه تعالي يمي هين اگعد امك ماتبطل عصبيتها "
ضاج وگعد يم بيبته بس ماحجة ولا كلمة بعد ..
واستحى من الگاعدين كلهم…
فيصل رزلته عمتي سمرة عافها واجة وراي للمطبخ ..
" رحمة جعت شو شعدكم اكل وزودتها اعليه حبوبتي تغلط "
سألته ..
" عود صدگ وين جنتو كلها تدور عليكم "
رد وهو مخلي راسه بالگدر وياكل ..
" يم امي "
شهَگِت :
" ياامك ؟"
رد :
" امي مرمر ياهي غيرها "
همست ..
" انتو شلون تاخذون درع لهناك وعلي شلون يجازف بيها مابطل من الصارلي لو لمن يعرفون مكانها ويكتلوها يله ترتاحون "
رد ..
" بس درع مايحجي .. وعلي يگول انه ضامنه "
رديت ..
" ماقصدي على درع بس واحد شافكم وانتو ماشين لهناك وعرفوا مكانكم شتريد تگول .. وامي شيصيرلها ؟ زين انتو رحتوا للصيد شوادكم الها "
رد ..
" وشمالي اخذه الحوش خاجيه "
سألته :
" جا وين اخذته ؟"
رد :
" ذيج المرة امي گالت تريد تروح الجمعة الامام بالحي يزورنه من الصبح للعصر يضلن .. ومن طلعت وي درع يم علي وجبناها سوالف گال اذا تعرفون مكانها خلوني اشوفها مشتاقلها ..
علي مارضا گاله خاف واحد يشوفنا واحنه رايحين بس ذكرت امي گالتلي ماموجودة بالحوش لو ردت تجي گلتلهم على مكانها ورحنا وامي محد يعرفها مبوشة "
سألته ..
" ووين هذا الامام ومنو "
رد ..
" ماتندليه بس بلكي يوم تصير فرصه وتشوفيه .. اني مارايحله هاي اول مرة امشيله بس يگولون كراماته جبيرة "
اتنهدت ..
" ربي يطيها مرادها ويريحها ويجمعها بالغالي "
مرمر ..
من زمان خاجية تگلي امشينا الامام بالحي هو صح بعيد علينا كلش بس رادت تطلع وتغير جو وهم گالتلي كراماته بالمكان شجعتني اروح وازور مازايرة من گبل ..
طلعنا الجمعة من الصبح وي حملة بالسلف ..
اخذنا متاعنا وخبزنا ..
طول الطريق ساكته لان الكل يعرفني خرسة مااحجي..
بس عيني على الشباك ..
اعاين على الطريق ودمعتي بطرف عيني ..
ماجنت مصدگة طالعه ومتحررة .. بس طلعتي بلاية جهالي ماتسوة ..
جنت اتمنى اخذهم كلهم واطلع واتباهة بيهم ..
ويانا مرة بالسيارة ولدها اثنين وياها .. شلون مداريها ومهتمين بيها ..
تخيلتهم رضوان واركان ..
هيج وانه اكبر ويشيلوني بكبرتي هم اصدگ بيوم انجمع بيهم واشبع منهم ..
وصلنا قريب الظهر زرنا وصلينا وفرشنا وگعدنا ..
حضرت الغدا نتغدا ..
جنت مسوية تمن تاجينة وجنت الله رازقني طرشت زينب جابتلنا دجاجة مذبوحة نظفتها وطبختها واخذتها وياي وخضرة وخبز ونعمة من الله ..
وخرت البوشية وجاي اصب ..
شلت راسي شفت ثلاث ولد رف گلبي عليهم ..
فيصل وعلي وياهم رضوان..
انه مااشوف من بعيد زين عيوني تعبن من البجي ..
شهگت وگمت ابجي ..
ربي رحمتك توني طلبت تجمعني بي وجمعتني…
سألتني خاجية ..
" ياع شمالج گمتي تبجين ؟"
رديت ..
" شوفي جابو وليدي واجو "
اشرت الزينب ..
" اركضي صيحيهم جنهم يدورون عليه .."
جانت عيونهم تدور بوجوه النسوان ..
لابسين هدوم الصيد ..
وشحلاتهم .. واحد مايتخير عن الاخر..
من راحتلهم اشرتلهم علينا ..
اجو لينا ..
" جانت عيوني ماتشوف غيره وهو عينه عليه ويبتسم .."
من اروح فدوة الهذا الطول يبعد امك .. تعال الحضن امك ..
اتگرب خاب املي .. بس گلبي بعده يدگ بلهفة ..
وصلوا يمي سلموا ..
اجة دنگ على راسي وباسها ..
" شلونج ام رضوان ماهان عليه اجي ومااشوفج "
جنت اعاين عليه وعيوني يبجن ليش ماادري ..
لا اراديا ..
ايدي انشالت وبقيت اتلمس بوجهة..
وهو يحاجيني فجأة سكت وغمض عيونه ..
همست ..
" اعذرني وليدي شفت بيك وجهة وريحته وردت تلمسك حتى اصدگ موش هو "
رد ..
" خليج ايديج تنگط محنة .. دفوها سرى بدمي ماحسيت هيج احساس من قبل "
رديت ..
" وانه من اشوفك جن شايفه واحد من ولدي "
رد فيصل ..
" يمة تدريني اغار وخريه عنج لا ابتلي بي بالعباس "
ضحكنا عليه ..
رد علي ..
" هي من شافته نستني حتى اني مو بس انت "
رديت ..
" انتو اثنينكم ولدي الله يشهد عليه ومعزتكم بكلبي بس انتو تجوني كل فترة واشوفنكم .. هو صارلي هواي ماشايفته "
استحيت اگله من اشوفك اشوف رضوان بيك ..
عرفته على خاجيه ..
مبين علي كلشي حاجيله ..
راحوا زاروا واجو جلبت بيهم يتغدون وياي ..
گعدوا گبالي ياكلون..
ناقصهم رحمة ورضوان واركان وتكتمل لمتي ..
جانوا ياكلون وبتداهرون بينهم واني صافنة عليه ..
سبحان الخلقك وخلاك تشبهه حتى يواسيني بغياب وليدي ..
كملوا غدا وسألني ..
" اذا تردين احاجي جدي واخذج يمي هناك وهيج محد يوصلج .. الله شاهد انه اعتبرج مثل امي وبعدين انتي المرضعتني يعني امي انتي واني مثل رضوان مو هيج تگلين عليه "
من گال انتي امي تخربطت احوالي ..
فيصل اعترض ..
" اگلك هي شرضعتك هن يومين شني تريد تاخذ مكاني بالگوة "
رديت ..
" لا يمة لاتحجي الأحد .. اني مااعوف مكاني وامشي اولادي هنا شلون تريدني اعوفهم ورضيوي اذا رجع ومالگاني شلون ؟؟ ..
والشغله الثانية سالفه مرضعتك لاتحجيها الاحد لان محد يدري بيها من اهلك وخاف تسوي مشكله الامك…
انه احسبك مثل ولدي ومعزتك مثل فيصل ورضوان وعلي هم حتى مايزعل "
ضحكوا كلهم ..
گام باس راسي مرة ثانية ..
دور فتح موضوع ..
" وبعد موضوع اريد احاجيج بي .. علي لسا شاري رحمة ورحمة……… "
قاطعه علي ..
" مو وكت هالحجي درع .. وانه مااجبر احد عليه "
فهمت وعرفت علي مانساها ولا راح ينساها ..
رديت ..
" صدگ مو وكته هالحجي .. بس يمة ياعلي رحمة موش بيدها شي .. تعرف كلشي انت "
اتنهد علي ..
" لكل حادث حديث .. يصير خير ان شاء الله "
سدوا السالفه ..
اشرلهم علي ..
" يله امشونا خاف اهلك يضل بالهم "
رد درع ..
" ماحسينا بالوكت هسا امي تلگيها مگابله الباب "
گاموا گمت وياهم ..
اخذني على صفحة وطلع فلوس "
همس .. " لا ترديني اخذيهن مني "
رديت .. " عساك سالم يمه الحمد لله عدي ومستورة وعلي مامقصر عني "
رد .. " انتي مو تگولين من ادحك بيك اشوف رضوان يابة اعتبريني علي واخذيهن مو تاخذين منو "
ماردت اكسر بخاطره واخذتهن ..
ضليت ادعيله باسني براسي وراح ..
اجو يمنا علي وفيصل ..
سألت فيصل على اخبار رحمة وماسه ..
گال زينات وهي گلبها يمج ..
سلموا وراحوا ..
حسيت روحي وياهم راحت ..
جان يوم حلو بالنسبة الي واني وياهم ..
من زمان مافرحت هيج ولا حسيت بهيج احساس من قبل ..
راحوا وعيني وراهم مشبوحة ..
حجت خاجية ..
" ريت يضل وجهج هيج دوم "
ابتسمت ..
" يعني مبين عليه ؟"
رديت ..
" من اجو الحد ماراحوا وانه عيني عليج وجن مجمعه ولدي داير مدايري .. "
ردت ..
" ان شاء الله تنجمعين وياهم وتجيبهم لهنا "
رديت ..
" ان شاء الله نذر عليه اسوي غدا الوجه الله وافرش سفرة شكبرها واوزع للناس كلها "
رجعنا للبيت واني احلم بهاليوم الانجمع بيهم سوية ..
رحمة ..
حجالي فيصل كلشي ودموعي تجري تمنيت بذيج اللحظة اني وياهم ..
حضنته بلا وعي وشكرته ..
" الله يطيك فيصل عبن فرحتوا امي "
ضربني بجتفي ..
" ولج غير امي هي جا غريبة وتشكريني "
دخلت عمتي سمرة ..
" ياهي امك .. شني تشوفها انت وين لگيتها ؟؟"
#يتبع…
( شمس السعدي )