[فيتامين سي]

اسعد الله اوقاتكم بكل خير احبتي ❤
/// البارت السابع وخمسـون /////
#بيوت_بلا_جدران
#شمس_السعدي
----------------------------------------------
تبقى النفوس الخبيثة خبيثة .. ولو أعطيتهم من الود أطناناً ..
ويبقى الطيب طيب .. ولو واجه من الخبث أصنافاً وأشكالاً .. !!
---------------------------------------------
رجعنا للدكتورة
ابتسمت .. " مثل مااتوقعت انت حامل "
صفنت بوجهها .. حامل شنو شوكت ؟؟
ضحكت .. " اي حال لاتستغربون كلشي بأرادة الله "
نزلن دموعي مااتحملت ..
فرك وجهة علي ويبجي.. " ربي رحمتك .. معقولة تنزل الفرحة علينا بعد كل هاي الفترة "
جان درع يعاين علينا ويضحك .
" يول شبيكم يول دحكو عليه ولاتكلبوها نكد .. افرحو هساع صارت عدنا فرحة ثانية نفرح بيها.. احسبو احسابكم اذا طلعت بنت احجزوها الوطن ماتصير الغيرو"
ضحك علي .. " ولد بنية كلشي الجان المهم تمام الخلقة.. ولك درع مامصدگ راح اصير ابو ابو "
حضني گدام الناس كلها ونسى احنه وين ..
رجعنا وطول الطريق مانشفت دمعتي ..
وصلنا بشرهم علي بالبشارة الحلوة .. كلها فرحتلنا وباركت بس عمتي مهجة ماشفتها ..
جانت بيبي دنانير مخليه وطن وتسويله هوسات وهو يضحك الها ..
تذكرت من حبلت بماسه شلون ضجت وانقهرت وبعدين صارتلي الدنيا كلها..
جان البيت كله طاير من الفرح بوجود وطن بيناتهم .. سووله حفلة حنة كبيرة .. وعزموا الكل ..
مااعرف شكد تمنيت يكونون عندي اهل يحتفلون بأبني مثل براء هسا ..
دخول اخوتها الاربعه للبيت يدبكون وي درع .. ودرع شايل وطن ويهوس بي ..
وصار يتنقل من ايد الايد وخواله فرحانين بي ..
شعور حلو وماينوصف .. تمنيت اولادي عدهم خوال هيج هو واحد حنين وراح ..
من بين هالحفلة والهوسة .. التفتت واشوف عيونه عليه يعاين عليه بحب وفرح ..
للحظة اتلمست بطني ..
" حبيبي انت صرت فرحتنا بوقت احنه محتاجيك بي اجيت بالوقت الصحيح .. "
جنت اتخيل وجه امي وعمتي من يسمعن الخبر ..
كملت حفلة الحنة وتعشينا ..
هم ماعازمين غرب .. فكلها گعدت سوه ..
اشرلي اجي يمه استحيت بين الناس كلها وگرايبهم
اجه درع " تعاي لاتخجلين يول كلنا اهل حدري هين فرحتي بيكم وحق الله مثل فرحتي بولدي وطن "
اجيت گعدت يم علي ..
صاح درع ..
" شيخ علي راح يصيرلو ولد "
باركلنا الشيخ بعدها صفن عليه ..
" انت هساع شتشتغل "
رد علي ..
" والله الموجود اشتغله وماشيه الحمد لله "
رد عليه ..
" والله اني افكر من زمان اسوي فرع بالجنوب بس مااگدر اثق بأحد مااعرفو .. وانت صرت مثل درع عندنا وواحد منا .. اذا تقبل نفتحلك فرع وتديرو انت هناك .. كتولو الدرع من مدة وهو اقترح عليه اسمك والصراحة انت ولد ازلمه معدل وتعجبني ورغم الصارلك جثير بس بقيت واگف على رجولك وتكافح .. اتمنيت تجي انت وحرمتك واهلك وتعيش يمنا بس اعرف لا ولد الجنوب يعوفون ارضهم ولا ولد الغربية يگدرون احنه مثل السمجة ان طلعت من مكانها ماتت "
جان جده يحجي واني مامصدگة .. لزمت بطني ونزلن دموعي .. " يبعد امك يوجه الخير بعدني توني عرفت بي واجاني هالخبر "
رد علي ..
" شيخ طلبك وثقتك على راسي بس انت تعرف هالشي مسؤولية واني مااريد اخيب ضنك بيه وتعرف انت الوضع وحصار وخاف مايمشي الشغل واتفاشل وياك "
رد درع ..
" يول شنو تتفاشل عجل نحنا مانعرف الوضع وبعدين اني مااعوفك راح اروح وارجع الك ونمشي الشغل سوة بين ماتتعود "
علي راد يسحب نفسه من الشغل بأي طريقه بس اصرار درع خلاه يسكت ويوافق ..
اتفقوا على الشغل ..
ووقعوا شراكة علمود كل واحد يضمن حقوقه .. عمتي جانت تروح وترجع علينا تريد تعرف شنحجي ..
شفت البنات دخلن لجوة كلهن .. رحت وياهن ..
كاعدة براء وبحضنها وطن اخذته منها الاعبة ..
ابتسمت ..
" تدرين براء احس وطن يشبه ماسه بصغرها بس الفرق ماسه شعرها احمر على امي مو مثل درع "
ردت ..
" طبعا كل واحد يطلع على اهلو .. بس وطن احسو بي شبه منكم يعني وراثتو ورثها منكم مو منا "
ضاجت عمتي مهجة ..
" شني هالحجي منين وارث منا .. اصلا وطن يشبه عمات درع .. مو عمه ؟"
ردت بيبي دنانير..
" اي يشبه عماتو بس هو بعده طفل اربعين شكل الو لاتتكاونن على الشبه "
سكتت بعد ماحجيت ..
اخذت براء ابنها وصعدت تنيمه .. وبيبي دنانير راحت الغرفتها.. بقيت بس اني بالهول والبنات گاموا ردت اكوم للغرفه حسيت بدوخة مااعرف شبيه يمكن من الحمل .. صارت بوجهي عمتي ..
" سوالفج هاي اعرفها شني تردين تخربين بيتي "
استغربت ..
" شسويت ؟"
ردت ..
" خطية ماتعرف شمسوية .. حسبالج مااعرف شلون قشمرتو ابني واخذتوه الصفكم علمود تطمعون بي ودور اجيتي تلمحين على ابنه وتكولين يشبه بتي شني قصدج هاا ؟"
رديت ..
" شني قصدي ماعندي قصد .. بس صدگ هو يشبه بتي
عمه ليش دوم هيج تحجين وجن اكو اني مو بنت اخوج "
ردت بنتر ..
" انت بنت الفصلية مو بنت اخوي .. الساعه السودة الجبت بيها درع ليكم وخليته يتگرب ويعرفجن .. فريتن عقل ابني وان صار بيوم واخذتنه مني لأخلي حياتجن جحيم عبن اليهدد حياتي ماارحمه "
استغربت ..
" عمه شبيج ليش هيج تحجين ان جان على درع مالنا شغل بي وهو مو جاهل وناخذه ووين ناخذه "
عافتني وراحت ..
حسيت روحي مخنوكة .. هي حتى بناتها ماتخليهن يتقربن مني ويعاينن عليه بعين الصغيرة .. اثنينهن مخطوبات الولد عمهن بس يكملن دراستهن ياخذوهن بس مو مثل براء شايفات حالهن .. مريم مالها دخل وهي طبعها هادي بس ميسم مثل عمتي مهجة واطباعها ..
من سمعت امها تحجي وياي هزت ايديها وراحت ورى امها ..
دخل عمو رماح ..
" ها يابة شبيج محتاجه شي ؟"
رديت ..
" ها ردت علي هو هنا ؟"
رد ..
" اي بالحديقة هو ودرع وحدهم "
رحت للحديقة شفتهم يسولفون ويضحكون ..
شافني درع ضحك ..
" دحك عليها اشتاقتلك عجل ماتنام الا تشوفك "
ابتسمت وتقربت منهم ..
گام درع ..
" اروح انام باجر نگعد من الصبح نطهرو الوطن مو تاخذكم النومة "
راح درع سحب علي ايدي باسها ..
" حبيبتي ماشفتج ولا باركتلج زين "
ابتسمت ..
" فرحان ؟"
رد ..
" شني فرحان اسعد انسان بالدنيا هسا .. هالجاهل متاكد راح يجيبلنا الخير وياه .. تدرين هسا اني ودرع جاي نحجي .. يومين ويجي لهناك نفتر نشوف مكان زين نسوي بي الفرع مالتهم .. وراح الزمه اني تعرفين شني معناها .. معناها راح نرتاح حبيبتي واولادنا يرتاحون "
اتنهد ..
" حشا الله يگطع يعمري .. ضحكتك هاي تسوة عندي الدنيا كلها .. من زمان ماشفت وجهك هيج يضحك "
لزم ايدي عصرهن بين راحة ايديه ..
" ااااخ لو مااني هسا عد العالم جان كضيتج هيج وعصرتج بحضني ياسعادتي كلها "
دمعت عيوني ..
" علي مامصدكة لسا تدري .. يعني راح يصير عدنا طفل وانت راح ترتاح بشغلك ونرتاح .. جنت اضن انه من اجيت ماجبت الخير الك وجنت دوم اكل بروحي "
خله اصبعه على شفافي ..
" اششششش لاتگولين هيج انت انطيتيني السعاده كلها والصار اختبار النا اثنينا والحمد لله عديناه .. جان منهل النذل يريد يذلنا بس حشا الله يگطع "
رديت ..
" الحمد لله .. بس خلينا نروح باجر من وكت بس يطهروه نمشي "
رد ..
" فشله حبيبتي تدرين مايخلونا نطلع "
رديت ..
" اعرف بس طلع الحجه بيه كلهم تعبانه .. اريد اروح افرح امي وعمتي اريد افرح اني هنا اختنگت "
ابتسم ..
" شني الحمل اثر عليج شو احسج ضايجة "
رديت ..
" لا والله مو الحمل بس عمتي مهجة مدري شبيها من تشوفني تتسودن "
رد ..
" خالتي هذا طبعها من زمان هي يايوم ضحكت بوجهنا حتى هسا تضحك جنها مستعره من عدنا "
رديت ..
" وبناتها هم عليها همزين درع طلع على بيبيته دنانير مو عليهن "
رد ..
" درع عمله نادرة وين اكو منه "
گمت نمت ..
احس ظهري اذاني .. بديت احسب شوكت اجيب معناتها بالشتا يصير يجيابي على السنة الجديدة ..
ثاني يوم من الصبح كلها گعدت .. سمعت الدمام وابو الطبل يدگون ..
فزيت ..
ماحسيت على روحي من التعب ..
گعدت غسلت ..
شفت براء تبجي وحاضنه امها ..
وتصيح ..
" درع جيبو مااريد لاتطهرو ابني راح يموت جيبو كافي"
وبيبي دنانير تحجي عليها ..
" كافي تتماوعين لا تدحجين عليه تعاي هين "
وامها ترد ..
" غير ابنها ياعمة عجل تشوفو يبجي وتسكت "
ردت ..
" ذكرتيني بطهر درع الدنيا مخبوصة وامه ولاعبالك امه گاعدة تسولف "
ردت عمتي ..
" ياعمة وين اسولف غير الهي نفسي مااريد اسمع حسه بس شمدريج يكَلبي شني "
ردت عليها ..
" والله مااضن عندج گلب ربيتي بناتج اكثر ماربتيه لو ماعماتو هنا قبل لايتزوجن جان حالو حال "
جنت صافنة على كلام بيبي دنانير .. صدك عمتي مااحسها تهتم الدرع عندها برود مثل برود الشيخة ولاعبالك ولدهن ماحسيت بالشيخة عندها حنية الا على رضوان وبس ..
كملو الطهر ماخلونا نطلع الا نتغدا يله ..
براء مگابله ابنها تبجي وتعاركت وي درع لان طهروه وهو يضحك عليها ..
" عجل غير يصير زلمه شلون ترديه يبقى عمرو كلو بلا طهر "
ردت ..
" وهو مايصير زلمة الا اذا گصيتو عجل ترضون يأذوه مثل ماتأذيتو "
صاح بيها ..
" يول فضحتينا كافي .. ذكرتيني بعصبيتج بليلة عرسنا"
من گالها هيج ضحكت وتغيرت ملامحها ..
" درررع اشنو هاي .. بطل حجواتك لاتفضحنا "
رد عليها ..
" غير وريتي گلبي ور وشعلتي النار بيه وخليتيني اتعصب وازكح بيج .. وحلفتي ماتحجين وياي ولاتدحكين بيه لو اتقربتلج وهسا صار عندنا وطن ونسيتي .. هاي مثل ذيج هم تنسين يلبوتي الشرسة"
خزرته وتأشر على الكاعدين ..
ضحك ..
" عجل شراستج بس يمي يول وين ذاك الهجوم "
صاحت بي بيبي دنانير ..
" دكافي حجيكم الماسخ توكم ذكرتوا ليلة عرسكم عود اذكروها بحجرتكم يله امشي للازلام فشله "
سألنها البنات ..
" برو ماحاجيتلنا عن ليلة عرسكم "
ضحكت وهي تعاين الابنها النايم بحضنها ..
" عبالي العرس بدلة وزفه ودبكة .. دخلنا الغرفة اجه درع دخل .. باس راسي ..
" واخيرا لبوتي صارت الي وبحضني .. اتقرب مني وراد يفتح السحاب .. وانه زحكت بي ..
" اشنو تسوي ماعيب "
ضحك ..
" برو اكيد تتشاقين ؟"
رديت بتوتر واني اعدل بروحي ..
" لا احجي الصدك عجل احنه مااتفقنا هيج هساع اصيح امي وابوي ياخذوني لو تقربت "
صفن عليه مامصدگ ..
" برو العني الشيطان ولا تضيعي فرحتي ولهفتي طول هالسنين "
رديت بعصبية ..
" عجل انت رايدني كل هالسنين علمود هالسالفه هاي "
اتقرب وهي يبتسم ويحاول يهديني ..
" طبعا لا حبيبتي ولبوتي الحلوة .. انه احبج يول بس ليلة الزواج لازم نتممها عجل شلون تصيرن حرمتي "
كتولو " انسى هساع انت تطلع وانه اسبح وابدل واصيحك تجي تنام وهاهي "
صفن عليه ..
" وانه ماخذج اناطر طولج وانتي نايمة .."
هزيت راسي..
عاد هو انجن عليه وسحبني بقوة وشمرني على الجرباية ..
" يول ردت اجيج بالحسنى وانت عاندتي .. راح اراويج الاسد شلون يروض لبوتو لو تمردت عليه "
واخذني بالقوة وانه ماخليت مكان ماعضيتو وخرمشتو بي .. خليتو يصب دم .. وهو ماحاس بالدنيا ..
ومن كمل گتولو .. مااريدك بعد طلعت اسد متوحش ..
ضحك وكالي .. وانتي لبوة شرسة ..
ضحكنا على سوالفهم ..
واتذكرت ليلة زواجنا شلون جانت هادية وحلوة وهم مخلصيها مصارعات بليلتهم ..
للظهر تغدينا وكملنا ..
اجه درع ..
" يله خيتي ابو حسين يريدج .. كتولو يبقى اليوم وماقبل عجل راسو يابس اذا قرر انتهى الامر .."
رديت ..
" تتهنى بي وان شاء الله تشوف عرسه .. بس تعرف محد يدري بحملي ونريد نروح نبشرهم واني هم تعبت"
هز راسه ..
" اعرف وانه اجرت سيارة توصلكم الحد البيت حتى ماتعبين "
رديت ..
" ليش زحمت نفسك احنه نروح للگراج "
رد ..
" اختي حامل واخليها تروح للكراج ؟ يوم النفرح بابنكم وطهرو "
ابتسمت ..
" وشمدريك ولد جايز بنيه "
رد ..
" عجل افرح لو بنية احجزها الوطن وماتصير الغيرو "
سلمت على براء وبيبي دنانير ووجبت وطن وطلعت..
لگيت علي منتظرني ..
سلم على الزلم وطلعنا ..
طول الطريق وهو يسالني ..
" بيج شي تحسين بشي ؟"
واني اضحك .. جانت بيبي دنانير مطيتني فواكه وحلويات وماي للطريق ..
بس مااشتهي اكل .. احس الطريق صار شطوله مشوقه اشوف ردة فعل امي وعمتي ..
وصلنا للبيت تعبانه حيل ..
نزلت وعلي نزل الغراض وراي ..
صاحني ..
" اوكفي لاتفوتين نفوت سوة اني اريد ابشرهن "
ابتسمت علئ سوالفه ..
دخلنا لكيناهن فارشات الحصير مثل عادتهن بالطارمة ويشربن جاي ..
شافنا حجت عمتي .. " هايمه شو جيتو مو گلتوا يومين نضل لو مهجة العوبه نكدت عليكم واجيتو "
ضحك علي ..
" محد ينكد علينا فرحتنا .. يمه راح تصيرين بيبية "
صفنت مستغربة ..
امي بسرعه نزلن دموعها ..
" حلمت بيج البارحة بس ماصدكت ودعيت الله يترس حضنج معناتها البشارة اجتني بالحلم وانه ماادري "
ضحكت عمتي ..
" بس لا حامل ولج "
هزيت راسي ..
" اي حامل البارحة من رحنا تخربطت بالطريق وماادري بروحي وتالي طلعت حامل "
فتحت عمتي ايديها العلي راح حضنها وصاروا يبجون سوة ..
" اوووف يبعد امك جنت خايفه تضل عمرك كله وحيد بس راح يجيك السند وينترس حوشك فروخ "
حضنت امي وابجي وهي تبجي ..
ودمعه تكمز من الفرح ..
" راح اصير عمه راح اصير عمه "
رحت حضنت عمتي وهاي اول مرة احس بحنانها ..
عاينت عليه ..
" مو تزعلين مني لو ضغطت عليج بس انتي والدة وتعرفين الام شلون "
رديت ..
" الام ماتزعل من بنتها "
بجت .. " الله حابني ورزقني بيج طلع ابني احسن مني وعرف يختار "
باس علي راس امي وكال ..
" كافي عتب وبجي ولوم منا وجاي خلونا نعيش حياتنا انتو عائلتي الوحيدة .. ماعلينا شيصير بعد برة بيتنا نارهم تاكل حطبهم .. منا وجاي كله فرح ان شاء الله "
ابتسمت عمتي ..
" الله يفرح دوم ومايغيب هالفرحة عن وجهك يوم الترجع الوضيفتك وترتاح "
باوعلي وضحك ..
" الله ماياخذ شي اذا ماينطي .. الخبر الحلو الثاني .. دخلت شريك وي جد درع وراح يفتحون فرع ثاني الشركتهم هنا واني اديرها "
ضحكت عمتي ..
" يعني شني ؟"
ردت ..
" يعني صار عدي شغل وحياتنا راح تتغير "
ضحكن امي وعمتي وضلن يدعن ويحمدن الله ويشكرنه ..
بيومها علي جابلنا اكل من المطعم جان ناذر لو صار عنده طفل .. وجاب دجاجتين ذبحهن واطاهن الفقير
لو عنده جان سوة اكثر .. بس نذر لو جبت بسلامه يجيب خروف ويذبحه ..
هالسنة جانت حلوة علينا ..
بعد كم يوم اجه درع هو وعمه ودوروا على مكان مناسب اجروه وتعاقدوا . بقوا كم يوم يمنا .
راح عمه وبقى درع منتظر توصل البضاعه ويصفوها هو وعلي ..
امي جانت فرحانه بوجود درع يمنا .. وعتبت عليه ليش ماجاب براء ووطن تشوفهم .. وعدها بالجية الثانية يجيبهم ..
فيصل جان يغار من درع ويتكاونون لان امي تهتم بي ..
عرفنا من فيصل .. زهرة جاييها خطابة واهلها موافقين
ناس من غير سلف وعمتي سمرة ماجايبتلهم طاري رضوان ولا حاجية بي ..
امي بقت تبجي من سمعت ..
ردتها عمتي حورية ..
" عليمن تبجين .. هسا من حور زهرة وتضوجين لان عافت ابنج "
ردت امي ..
" مامقهورة على زهرة لان ماتستاهل ابني .. بس مقهورة على ابني وشبابه الراح ومااعرفنه وين ماوين "
ردت عمتي ..
" خاف احجي وتضوجين .. هو لو عايش شمانعه مايرجع .. اني اگول رضوان ميت ومحد يگللنا عبن تتذكرين الشيخة ووكعتها يمكنها عرفت خبر عنه هالطاحت .. صح مااحبنها بس الحگ ينگال مايهدها الا مهجة ورضوان "
ردت امي ..
" اني گلبي يگلي عايش .. والشيخة يمكنها عرفت مكانها هالطاحت وراحت وراح سر ابني وياها "
اتنهدت عمتي ..
" ماماتت اسرارها عبن سوالفها الشينة يجي يوم تطلع وان فلتت من الحساب بالدنيا هسا تلكيها تتحاسب بگبرها وبالاخرة "
راح فيصل بالعطلة لهناك ..
لان عرس زهرة وعمي حطاب مامخلي احد ماعازمه حتى عمتي مهجة وبناتها جايات ..
جانت دمعه فرحانه ومشغله الراديو وتركص بليلتها ..
كملت شغل وشفتها ..
" شني فرحانه بعرس بنت خالج "
ردت ..
" اي والله لو امي مخليتني رايحة وي فيصل جان دبجت تدبج عبن هاليوم ناطرته من زمان تعرس واخلص منها .. وهي خطية تلكيها ميته من الفرح "
ضحكت ..
" طبعا تفرحين صفالج الجو "
اتنهدت ..
" اووووف هو غير يجي حتى الانتظار تعب مني "
استغربت ..
" هيج تحبيه ؟"
ابتسمت ..
" تدرين اني من صغري تعلقت بي جنت اشوف كلشي حلو من اشوفه .. الوحيد هو جان يطيب خاطري من الجهال تضحك عليه لو بنات منيرة يقلدن على سماري جان يصيح عليهن ويكلهن .. جمالها هندي وحلوة صيرن مثلها ومثل اخلاقها يله تحجن .. جان مايطي بيه .. بيوم وليلة وكبرت واني ماببالي بس هو . ومرة منهن حلمت لن اجه رجال اطاني ورقة مكتوب بيها اسمه .. وتوقعت يصير من نصيبي بس خطبت الشيخة اله زهرة وخابت امالي .. وهسا تجدد الامل بيه من جديد معناتها رضوان من نصيبي راح يصير "
اتنهدت ..
" الهيج جنتي ترفضين كل اليجيج "
هزت راسها ..
" يمكن الهيج ويمكن لان مو من قسمتي .. لان امي تگول القسمة تسد الحلوگ .. وانه كل اليخطبني ومااقبل امي تصف وياي وتعرفين انتي امي لو رادت شي ماتاخذ راي وتزوجني غصب عني "
ابتسمت ..
" هنيال رضوان عليج لو يرجع ويحس بيج ويحبج "
ردت ..
" يرجع يرجع ان شاء الله لو اصير عجوز هم اضل انتظره "
استغربت تحجي وكأنه بينهم قصة حب جبيرة .. مستعدة تنتظره وهم مابينهم اي رابط وعهد .. جا شني من حب هذا .. فرحانه وادعي الها وبنفس الوكت خايفه تنخذل بيوم وتبقى هيج لاهي شايفه حياتها ولاهي محصله الامل التتمناه ..
مرت ايام حملي وبطني بدت تكبر .. وعلي فرحان بيه وبالطفل وعمتي وامي يتسابقن ياهي التجهزله اول ..
من غير مايعرفن ولد لو بنية ..
علي جان مايريد يعرف جنسه .. وماسه ساعه فرحانه وتنتظره وساعه تغار وتكل العلي .. خاف بعد ماتحبني اذا اجه الطفل ..
وهو يقنعها ويراضيها ..
" لو يجون عشر اطفال .. انتي راح تبقين بنيتي الجبيرة وحبيبتي ومدللتي .. "
وهي تضحك وفرحانة.. لان تعلقت بي كلش وماتصيحله الا بابا .. ماتقبل احد يدرسها غيره وهو يوصلها ويجيبها للمدرسة يخاف عليها ..
شغله زين وحالتنا تحسنت ..
واجرنا بيت قريب على مكان شغله .. وبيت جبير ..
جان حلمه يشتري عرصه ويبنيها ..
ويحلم يسوي طابقين وغرف هواي علمود يكفي اولادنا ورضوان اذا رجع وفيصل من يجينا .. كلها جان يفكر بيها .
حتى اركان جان عندي حلم انه بيوم يوعى ويعرف الحقيقة ويرجعلنا ..
اركان عاش حياته ببغداد وحسب ماسمعت من فيصل مايجي الا يوم بالاسبوع يشوف امه ويروح ..
جانت عمتي بثينة تريد تروح وياهم البغداد بس عمي منهل مايقبل ..
وحسب اعتقاد علي .. انه مايروح ويستقر ببغداد ويعوف كلشي من ورث وگيعان والشيخة الحطاب وابنه
اركان ..
هي هاي الحياة الجنت اتمناها .. بعمري ماحبيت السلف ولا عيشته ..
من ابوي جان ياخذني البغداد جنت افرح .. حياة ثانية بالنسبة الي ..
درست وتعبت علمود اوصل الحلمي وهي الدراسة ببغداد والعيشة بيها ..
من جنت صغير واشوف ابوي شلون عايش حياته .. نسوان وخدم وحشم وانه اريد اكبر واصير مثله .. وبعد مادخلت الكلية العسكرية حلمي بدا يتحقق ..
اجرلي شقه بأرقى مكان ببغداد ..
جماعتي بالكلية كلهم ولد وزراء وامن ووجهاء بالدولة ..
اول يوم الي ببغداد ..
بعد ماجاب ابوي مرة نظفت الشقه ورتبتها ..
عدلت ملابسي ..
اجاني ..
" ها بوية مستعد للمرحلة الجديدة بحياتك ؟"
ابتسمت ..
" وسفه انه ابن منهل "
ضحك ..
" تتذكر من نجحت ووعدتك اخذك وياي بمكان ما تحلم بي "
رديت ..
" اي صح "
رد ..
" هالمكان النروحلة ماتروحله الا بعد ماتتخرج وتصير ضابط وتفرحني بيك .. بس هااا بيني وبينك امك ماتدري ابد "
ضحكت ..
" سرك ببير يابة "
اخذني للحلاق رتبت شعري ووجهي .. رجعت للبيت سبحت ولبست ملابسي الجديدة.. وجن يوم عرسي ..
ابوي اذا وعدني يوفي ولليوم ماگالي شي ماسواه الهيج جنت افتخر بي واريد اصير مثله ومثل قوته وهيبته بين الناس ..
صعدنا بالسيارة والسايق اخذنا المكان..
جانت السيارات مصفوفة كلها سيارات غريبه ..
والشخصيات التنزل منها هيبة وتطگ بالكاع .. عالم غير عالمي الجنت عايش بي ..
احس روحي جنت بجحر لو كهف وطلعت منه للدنيا
اول مامشيت عثرت واني اعاين الهم ..
صاح بيه ابوي..
" مااريدك تعثر گدام احد .. هالمرة عثرت المرة الثانية انتبه .. هنا لازم تكون حذر بخطواتك لان الضعيف ينوكل .. "
ماانكر جنت خايف من حجي ابوي وتحذيراته المستمرة بس جنت راغب اجرب واجازف واوصل ..
دخلنا بقيت صافن .. مجاميع صايرة ..
وكل مجموعه بوسطهن نسوان كاعدات وياهم .. نسوان مو مثل نسوانه النشوفهن والعدنا بالسلف.. نسوان وجنهن حورية وتمشي .. الشعر للركب والجسم خيزران
اتقربت وحدة جبيرة بالعمر بس حلوة حيل ..
" شلونك سيدي مشتاقين طولت غيبتك "
جانت تحجي وتعاين عليه وتبتسم ..
ضحك ابوي ..
" هلا جمارة عندي شغل هالفترة مااكدر اجي "
ابتسمت وعينها عليه ..
" منو هالحليو الوياك "
رد ..
" هذا ابني ان شاء الله راح يصير ضابط قريبا "
ردت ..
" اااممم معناها الشبل والاسد منورينا الليلة .. تحب نشوفله على ذوقي لو…. "
قاطعها ..
" لا حاليا .. هو بس يتفرج بعد وكت يدخل بوسطنا لما يكمل ويتخرج يله "
ضجت من ابوي استصغرني ..
رحنا گعدنا .. اني بنية جسمي ضخم وطويل اليشوفني يكول اكبر من عمري .. جنت امن اشوف وحدة تعاين عليه افرح واحس بثقه بنفسي .
المكان جان لاهو مطعم ولا هو فندق ماينعرف ..
بس مايدخله الا الي بالدولة والكبارية ..
جابو مطرب جان يغني وامهات الشعر الطويل يتماوعن
التفتت شفت وحدة گاعدة بصف ابوي وتضحك وجنها متعودة عليها ..
اخذها وكام .. اشرلي ..
" هسا اجي لاتگوم من مكانك "
مشى وعافني..
بقيت صافن واعاين عليهم ناس بعالم ثاني .. هيبتهم المعروفه امام النساء ضايعه وحدتهم تجيبهم منا وتوديهم منا وكلهم يطوطحون وجنهم بغير عالم ..
اجت جمارة ..
" يحلو ليش صافن تحب اجيبلك اليسعدك "
رديت ..
" لا شكرا مااريد "
ضحكت ..
" انت ماتشبه ابوك .. ابوك اسد ماتوگف بنيه بوجهة بس تدري انت حلو وعيونك دمار معقوله امك هيج حلوة .. العنده هيج مرة حلوة يفكر يجي لهنا يتونس "
ضجت من حجيها وگمت ..
بقيت افتر احس روحي اختنگت .. مامتعود على هيج مكان..
عفتهم وطلعت ..
بقيت افتر برة واشوف الناس الطابة والطاعه ..
بقيت اضرب برجلي شكو حجار بالكاع مااعرف شسوي ..
سمعت صوت وراي فزيت ..
التفتت شفت وحدة واكفه ..
" انت مبين اول مرة تجي شجابك الهيج مكان "
رديت ..
" وانتي منو وشعليج "
اتنهدت..
" ساعه صارلي اراقبك لاشكلك ولاتصرفاتك تنتمي الهيج ناس وهيج مكان مبين ابن ناس "
ضحكت ..
" يعني الموجودين هنا مو ولد ناس ؟"
ردت ..
" الموجودين هنا حيوانات غايتهم يجون ينهوشون بلحمنا بفلوسهم وسلطتهم .. واحدهم تحسه ذيب بالنهار وبالليل يجي لهنا يصير تحت رجلينا جرو .. "
ضحكت بأستهزاء ..
" وشجابرج تخلين الحيوانات تنهش بيج اذا ماانتي راغبه وعلمود الفلوس .. هم يدفعون فلوس وانتن تقومن بواجبجن واحد فايد الثاني "
ابتسمت ..
" مو كل الموجودة هنا معناتها راضية وقانعة .. مرات الظروف هي التجيبها "
سألتها ..
" وشني هالظروف التحجين عليها بله "
ردت ..
" مثلا الجوع والفقر .. لو الجمال "
صفنت بوجهة ..
ردت ..
" ليش مستغرب الجمال لعنه لهواي بنات .. لان واحدهم لو شافها وعجبته مايمنعه شي منها ياخذها غصب ويحطم حياتها ومستقبلها واهلها ويضيعها لمجرد حلوة وعجبته .. "
ضحكت ..
" هاي حجج تقنعن نفسجن بيها "
ردت ..
" مااعرف ليش احجيلك اصلا .. بعد يومين انت تصير حالك من حالهم "
عافتني ومشت ..
التفتت اعاين عليها .. مشيت وراها..
حيرتني بأمرها ..
بقيت گاعد اراقبها لين اجه ابوي .. جان يطوطح حاله حال الموجودين ..
كمت سندته واخذته وياي ..
صحت السايق والحماية ساندوه وياي .. حاسبوا وطلعنا
وجنهم متمرسين ويعرفون السالفة شني ..
وكتها عرفت ليش ابوي مايقبل يجيب امي هنا ويستقرون ..
رحنا للشقة نيمته بالغرفة ونمت اني بالصاله وافكر بالحياة الدخلتلها جنت احسها سهلة بس اليوم دخت والدوخني اكثر البنية الشفتها ..
مااعرف ليش شغلت تفكيري .. او يمكن لان ماحاجي ولاشايف بنية گبل ..
رحمة ..
قربت ولادتي .. وجنت منتظرة يوم يوم اجيب وارتاح ..
علي ماقبل حبوبه تجيبني يخاف عليه .. يكلي الزمن تغير لاهو زمن امج ولازمن امي ..
بيوم اني نايمة جنت توني طابة بشهري..
حسيت شي جواي ..
فزيت لگيت ماي ..
تخبلت .. گمت گعدت علي من الشغل والتعب مايدري بروحه ..
رحت الامي وعمتي خايفه گعدتهن فزن ..
من شافني ضل يصلن على النبي ..
راحت دمعه گعدت علي اجه يركض ..
" ها رحمتي شبيج مو كلتي بعد وكت شبسرعه "
ردت عمتي ..
" اكو نسوان اول شهرها تجيب شبيك خايف "
ردت امي ..
" شو ماتحس بوجع خاف ماعدها ولادة "
رديت ..
" اي مااحس بشي "
بدل علي واجه ..
" بدللها بين مااشوف سيارة واجي ناخذها .."
بدلت وحضرن الجنط امي وعمتي .. واثنينهن يردن يرحن ..
گعدنا فيصل وصيناه على دمعة وماسة ..
وطلعنا للمستشفى..
من فحصتني الطبيبة گالت ماعندج طلوگ ولا ولادة حولوني سونار جان نبض الطفل ضعيف ..
الدكتورة صاحت عليه ..
كمت ابجي من الخوف وعمتي وامي يدعن ..
خفت لااخسره واني منتظرته يوم يوم ..
اعاين على علي وجهة انگلب وشحاله صار وقع على عمليتي وصار يهدي بيه وهو اصلا يرجف كله ..
دخلت العمليات واني اوصي علي وامي بماسة ..
خفت يصيرلي شي وتبقى بلا ام ..
ماخليت ايه ماقريتها ..
فتحت عيوني اسمع علي يحجي وياي ويبوس براسي
" ام حسون حبيبتي حمد لله على سلامتج "
رديت ..
" اني عايشة لو ميته "
ضحك ..
" اسم عليج يعمري انتي هنا يمي وهذا حسون كلشي مابي "
حجت امي ..
" ولج يمه شوفي حسون شحلاته "
سألتها ..
" يشبه منو "
ردت عمتي ..
" يشبه علي مامخلي شي منه "
ابتسمت ..
" جا حلو معناتها "
ضحك علي ..
" اليسمعج يگول مو حلوة انتي بس عيونه اضن عليج بيهن لون "
صاحت امي ..
" يمه گولوا يله حلو مو حلو اهم شي تمام الخلقة "
بقيت انام واكعد للصبح وعيت ..
شفت امي وعمتي يمي ..
وعلي راح جاب ريوگ الهن وجايبلي شربت وبسكت ..
گومني وكلني ..
دور گالي گومي تمشي الدكتورة تكول ..
سندني ويمشيني بالممر .. والممرضات يعاينن علينا واني اغار عليه وهو يضحك ..
" خرب يومج حتى وانتي مريضه تغارين "
بقينا الثاني يوم بالمستشفى اخذت حسوني الحضني شميته ورضعته يخبل بس ناعم صغيروني طلع ..
افكر بماسه لو شافته شتسوي ..
طلعنا للبيت ..
جانت ماسه بالباب منتظرتنا ..
شافتنا صاحت ..
" دمعه اجو اجو "
جانت مارايحة للمدرسة لان علي ماهو ياخذها .
وتكول دمعه ماقبلت تروح الا نجي وتشوف الطفل ..
دخلنا وهي مكابلته وكاعده وتضحك ..
ماعافته ولا دقيقه .
مشتري علي العاب الها واطاهيا گالها من حسوني ذني فرحت بيهن ..
وصار كلما يطلع يجيبلها شغلة ويگلها هاي من حسوني لدرجة تعلقت بي كلش وحبته وماتنام الا يمه ..
اني جنت بس ارضعه وعمتي وامي متكفلات بي لدرجة صارن يتسابقن ياهي التگعدله اول ..
واني وعلي نضحك عليهن شلون نسن الدنيا وهمومها كلها والتهن بحسوني ..
جان شتا علي ماقبل يطهره گال خليها للصيف ونطهره علمود يكبر شوية ونعزم درع واهله يجون فشله لان عزمونا بطهر وطن ..
بعد شهرين من ولادتي ..
اجانا خبر وفاة ضرة بيبي دنانير يعني مرت الشيخ الجبيرة . خطية من زمان جانت مريضه وحايرين بيها الى ان توفت ..
علي گال نروحلهم نعزيهم لان هم اصحاب فضل علينا وتعتبر بيبية درع ..
گال الامـي وعمتي يرحن بس ماقبلن .. امي خافت تتواجه وي بثينة وعمتي مهجة هناك لو عمي منهل ..
وعمتي هم ماتريد تشوفهن ..
بس علي اصر على امه تروح ويانا .. جان حسوني عمرة شهرين وشوية .. جان نهاية الرابع من سنة 1996 ..
رحنا اني وعمتي وعلي ..
مقررين بنفس اليوم نرجع لان شغله وحسوني عفناه يم امي ..
دخلنا للبيت عزيناهم جانت بيبي دنانير بس تبجي عليها وتنوح لان تحبها وتكول مااذتني بيوم رغم انفرضت عليها وهدوني للشيخ وخذاني غصب .. بس ماحسسوني اني هدية وجن وحدة منهن حتى ابني وبناتي مافرقتهم عن ولدها وبناتها..
طول ماگاعدين وعمتي تعاين الوطن ابن درع .. صافنه عليه وهو بحضن براء ..
بس گامت عمتي مهجة گامت عمتي حورية وراها ..
ما اعرف شنو الخلاني اگوم .. وراهن بحياتي ماجنت فضولية بس هالمرة ماادري يمكن خفت تصير مشكلة لان عمتي جانت جايه مجبورة لهنا مارادت تجي ..
عمتي بثينة وعمتي سمرة وكلهن گاعدات ..
جانت عمتي حورية تحجي وياها وتكلها .. شگد حفرتوا الي والابني بس ماراح تتهنون والله راح يوكعج انتي واخوج .. ذاك يشبه مرمر وشما رادوا يضمون السالفه الولد كبر وافتهم ويمكن يعرف ومغلس ..
وانتي ابن درع شوفيه كلما يكبر يصير يشبه مرمر وبت رحمة اعاين عليه صار ساعه وجن هن گاعدات كبالي
بس اتعجب على عمتي شلون مافطنت عليه وشلون ماسالوا هالولد يشبهمن ..
ردت عمتي مهجة بعصبية ..
جنت موجودة يمهن ومامنتبهات الي ملتهيات يتكاونن
" حورية سدي حلگج .. لاتنسين سري مقابل سرج "
ردت عمتي حورية ..
" اني مابگت طفل من امه مثلج .. اني وابني انظلمنا لاتهددوني بهالسالفه ابني كبر ويفهم بس انتي شتگلين لعيالج والدرع لو عرف هو مو ابنج وابن مرمر الفصلية الاتفقتن انتي وامج واخذتي الولد من امه "
احس روحي طلعت من سمعت وعيوني غوشت ..
اتكيت على الباب صار بي صوت ..
دارت وجهة عمتي صوفر وجهة من شافتني ..
عمتي حورية اجتني تركض..
" رحمة شبيج "
لطمت عمتي مهجة..
" سودة بوجهج حورية ولج بس لاسمعتنا "
احس طنين بأذني مااسمع شي .. وعيوني مااشوف بيهن صرت كلي ارجف ..
اجت عمتي مهجة رادت تحجي وياي دفعتها وطلعت
اريد احجي اريد اعيط صوتي اختفى ..
افترت الگاع بيه ووكعت بوسط الحوش ..
#يتبع ..
( شمس السعدي )