البارت الخامس والثلاثون
طلع ابو تركي ولحقه طلال وبقى تركي مكانه يفكر بكلام ابوه ولقى انه لازم يقول لابوه واهله كل شي لان ميار اكيد بتخبر اهلها خصوصا انهم خذوها ومستحيل يقبلو ترجع له او حتى اهو يرجعها فطلع وتوجه للمحكمه لانه بينهي كل شي وطلق ميار وبعدها توجه لبيت ابوه وخبر ابوه وامه وطلال بكل شي من تهديد اروى لهذا اليوم وكانت صدمتهم فيه اهو كبيره اما تهديد اروى ما استبعدوه ولا تعجبو منه لكن الي صدمهم رضوخه لها واخرها طلاقه من ميار وتصديقه خيانتها ....
اما ميار فاول ما طلع فيها ماهر امره عمه يتوجه فيها لقصرهم لان مستحيل يدخلوها المستشفى وينفضحو وخصوصا لو سالو التحقيقات تركي بيقول انها خانته ولهالشي ضربها واهم ما يبون احد يتكلم عنهم بشي حتى واهم متاكدين من برائة ميار لكن سمعتهم مهمه ما تتلوث بشي لكن ميار تعالجة بقصرهم على يد دكتورة خاصه فيها تتابع حالتها قبل وطبعا وصل الخبر لمهران ووقف كل شغله ورجع اما الياس فمحد يعرف له مكان واختفى وكانه فص ملح وذاب .....
مهران واهو يمشي مع ماهر بالمطار وكاتم عصبيته : الكلب الياس ما لقيتوه للحين ....
ماهر واهو يفتح باب السياره : لا .... الشباب كلهم يدوروه .... حتى الشقه الي يسهر فيها ما لقيناه فيها ..... مهران اترك الياس عمي اصلا متحلف فيه ... الحيوان تركي طلق ميار .... شراح تسوي معاه ....
مهران واهو يطالع برى السياره : سوات الله ابرك .... اولا اشوف ميار وبعدها اتصرف معاه ....
ماهر واهو يسوق : والله لولا الوالده مسكتني ولا كنت ذبحته ولا هذا كفو يمد يده على ميار .... والله لو انك شفت شكلها شلون ما تركته حي.
مهران : صبرك عليه .... لا تضن حق ميار بيضيع بيدي باخذه لكن اصبر ....
ماهر : شنو بتسحب منه كل الي اخذه .....
مهران : ليش انا اكل حرام .... لا الي ربحه من ورانا حلال عليه ثم هذي فلوسه وبتعبه ما لنا فضل عليه فيها لكن انا اعرف شنو الي يهده ... ومدة يده على ميار ما بعديها له ابد ....
سكت ماهر لانه عارف ان مهران اذا قال شي يكون قدها وبيتصرف صح لانه اكتشف انه خلص بنت عمهم من زوجها المدمن وهم اخذ حقه من طليقته وصاحبه الي خانه وكل هذا بدون لا يتكلم ولمى عرف ندم انه وقف مع الياس ضده وكان بيجبر ميار تتزوج الياس لكن ارتاح انه ما جبرها ....
وصلو القصر و استقبلتهم امهم وكانت صلبه وبعدها ياتهم سناء واجتمعو كلهم عدى ميار لانها بغرفتها وما تقدر تنزل من الكدمات الي فيها واثار الجروح .....
سناء واهي تمد لمهران كاس العصير : شنو ناوي على قليل الاصل ....
مهران واهو ياخذ العصير : من فيهم تعني .... ولد عمج او طليق اختج
سناء بقهر : والله الثنين ... تعرف عمي متحلف في الياس والكل يدوره
مهران : الكلب الياس خليت ناس تدور عليه اما تركي بروح له بعد ما اشوف ميار ..... يمه اهي نايمه او قاعده ....
ام مهران : لا قاعده وتنتظرك ....
وقف مهران وتوجه للسلم لكن وقفه كلام امه ولف يسمعها ....
ام مهران : اسمعها عدل يمه .... وليد معاها لا تطلع اول ما تروح تراه ملازمها و ما يبي يصدق ان الي سوى فيها جذيه يكون تركي ....
مهران بعتب : ليش يمه قلتوله كل شي .... يمه وليد متعلق بتركي وصدمته فيه كبيره وهدور حالة ميار هم كبيره يمه وايد كبيره عليه ...
ماهر : ليش ولدك ترك مجال لاحد يخبي عليه شي ملازم لميار وكلما يينا نكلم ميار ونبيه يطلع يرفض حتى ميار عجزت معاه واخرها قالت اتركوه واهي بتوضح له كل شي .....
ام مهران : انت عارف علاقتهم ببعض شلون ... لا تلومه ميار امه الي ما يابته .....
مهران واهو يصعد السلم : وهذا البلا يمه انها امه بالنسبه له عشان جذيه قلتها لكم كبيره عليه ....
وصل مهران جناح ميار ودخل بعد ما طق الباب وياه صوت وليد فدخل وانصدم بشكل ميار واهي على سريرها ووليد جنبها و حولهم كتب وباين ان ميار تدرسه فابتسمت اول ما يات عينها بعينه وتغصب الابتسامه لها لان شكلها وجعه فاشر لها تبقى مكانها ونزل له وليد وركض له وضمه وكان وليد شاد عليه بقوة .....
مهران واهو يبعد وليد ويشوف دموعه تنزل : شلونك بابا .... ليش الدموع .....
وليد : دموع ظلم بابا .... خذ حق ماما ميار .....
مهران واهو يطبطب على جتفه : وانا ليش ييت بسرعه غير عشان حق مامتك .... روح بابا وانزل مع يدتك وعمك وعمتك تحت ابي اكون مع ميار بروحنا .....
وليد واهو يطالع ميار : وتاخذ حقها منهم ....
مهران واهو يبوس جبين وليد : واخذ حقها لا تخاف ... يله ......
هز وليد راسه لابوه ورجع لميار باس خدها وطلع من الغرفه اما مهران فتوجه لميار وقعد جنبها على السرير وسحبها بحضنه ورفعها وقعدها بحضنه وشد عليها واهو يبوس راسها وجبينها .....
مهران واهو ضام ميار واهي بحضنه : قولي لي كل شي خبيتيه عني ....اب اعرف كل شي .....
ميار واهي على وضعها : اولا ابيك تعرف اني خبيت عليك لاني كنت انتظر رجعتك وما تحملت الا لاني انتظرك .....
مهران بعتب : وليش ما قلتيني وانا هناك كنت بترك كل شي واييج ....
ميار : عشان جذيه ما قلت لك .... ما كنت ابيك تترك شغلك وانا عارفه شكثر الصفقه مهمه لك وللشركه ....
مهران : يلعن الشغل والشركه انتي اهم .....
ميار : تسلملي .... لو علينا الي بتربحه ماتفرق لكن اللي بيستفيدو من وراها الفقاره والايتام مهم .....
مهران : لا الله الا الله ..... زين شي حصل وعدى والحين ابي اسمع كل شي مفهوم ....
خبرته ميار بكل شي من وصلت الى يوم العزومه وشلون كان تعامل تركي معاها .....
مهران : اوكي ولمى طلع من البيت مع زوجته انتي شنو سويتي .....
ميار : ولا شي نزلت وخذيت عصير من المطبخ ورجعت الغرفه وشربته وبعدها بلحظات حسيت بدوخه وتعب فتمددت ونمت وفجاة سمعت اصوات خناق وضنيت بالبدايه اني احلم لكن لمى فتحت لقيت تركي يتخانق مع الياس اولها قلت لا احلم لكن لمى لفيت للباب لقيت اروى واقفه جنب الباب ومتنحه وتطالع تركي والياس وكان تركي يسب ويلعن و انتبهت لاني بقميص نوم وبدون حجاب فلفيت نفسي بالغطى وتوجهة لغرفة الملابس وغيرت وطلعت لهم كان تركي يتهمني باني اخونهمع الياس فقلت له يخسي وبعدها قط الياس وتهجم علي يضربني وانابهت الى الياس رفع فازا وضرب فيها تركي على راسه وتركي تركني ولا كان بيخنقني وبعدها الياس طلع وبقيت مرميه على الارض و شفت اروى تساعد تركي وتطلعه من الغرفه وانا بقيت مكاني وبعد كم ساعه صحيت ولقيت نفسي بالارض فقمت وسحبت نفسي للحمام وخذيت شور وطلعت لقيت تركي بويهي وبعد كم كلمه قذره منه وردي عليه جبرني عليه لاني كنت امنعه عن حقوقه لمى اكتشفت سواته فيني برده لبنت خالته .... ولمى دخل الحمام ما تحملت فلبست وطلعت من البيت حتى مفاتيح سياره غفلت عنهم ولا لبست شي بريلي ولحقني ورجعني البيت بالغرفه ورجع يضرب فيني وغبت عن الوعي ولا صحيت الا وانا بالمستشفى وماما يمي .....
مهران واهو كاتم عصبيته : يعني مد يده عليج قبل هالسالفه ...
ميار واهي تمسح دموعها الي تنزل : اي مدها علي ....
مهران : وسكتي ..... ميار ليش سكتي .... انا بعيد وما تبين تشغليني وتقطعي شغلي ماهر ماكان موجود موب عزوتج .... انتي غلطي بهالشي واهنتي اخوج ....
ميار واهي تدفن نفسها بصدره وتبجي بحرقه : انصدمت فيه ... لو خبرت ماهر كنت بخسر اخوي .... عارفه لو انه عرف بيزعل علي لكني كنت خايفه يتهور انت عارف ماهر مايقبل احد يغلط علينا حتى اهو لمى كان بيمد يده علي تضايق حده واعتذر مني وايد .... تذكر تذكر ولا اذكرك كم مره اعتذر مني وشلون ضرب يدينه بالجدار ندم على نيته .... شلون لو خبرته ان تركي مد يده اهو لولا ماما وقفت بويهه وحلفته ما مسك يده عنه ....
مهران واهو يبعدها عن صدره ويمسح دموعها : خلاص فاهمج .... قوليلي الحين شنو يرضيج ... شنو تبيني اسوي معاه .....
ميار : ولا شي مهران اتركه انا مابي منه شي وخل الزمن ياخذ حقي منه برائتي بيد الياس اهو الوحيد الي بيقول الي حصل ....
مهران : لكن لازم اكلم هالمغفل تركي اولا بينا حساب مو بس عشانج لا هم الشغل الي بينا لازم اصفيه ..... شوفي انا فكرة ابعدج من هني بعد ما القى الياس .... عمي لمى عرف قال ييبها عندي وريان وركان عصبو وكانو بيون لولا اني وعدتهم باخذج لهم اوكي .....
ميار : اعيش هناك .... تبيني اعيش بكندا .....
مهران : اعتبريها فترة نقاها ومتى ما حبيتي ترجعي ارجعي .... ميار بعدج افضل لج لاني اعرفج مابتتحملي تشوفي تركي ومعاه زوجته فكري وقرري و اذا ما تبين ابقي هني واقنعي عمي وريان وركان برفضج اوكي . ...
ميار واهي تشوف مهران ينزل من السرير : بفكر لكن لو بروح وليد معاي .....
مهران : بدون لا تطلبي ولو انا مابخليه يروح اهو مستحيل يبقى بدونج ثم لو قبلتي بروح معاج ونشوف ماما تروح لو تبقى هني ... اخليج لازم اروح واخلص شغله مهمه ....
ميار قبل يفتح مهران الباب : مهران .....
مهران واهو يلف يطالعها : امري حبيبتي ....
ميار : انا عارفه بتروح لتركي .... لا تمد يدك ولا تتعب نفسك معاه ...مهران اقطع اي امل عنده حتى لو تاكد من برائتي مابي وصله ابد ...
هز مهران راسه وطلع من عندها ونزل تحت واشر لماهر يلحقه وطلع معاه بسيارته .....
مهران واهو يسوق : وين القاه ببيته او ببيت اهله .....
ماهر : ببيت اهله طلع من بيته .... رايح له ....
مهران : اي ....
ماهر : شوف لا تمسكني اذا مديت يدي عليه .....
مهران واهو يبتسم : اذا ابوه مو موجود خذ راحتك ومو ريال الي يمسكك لكن اذا ابوه هناك تمسك نفسك واستفرد فيه بمكان ثاني .....
ماهر بضيق : والله حاله حتى انت بتمسكني مو كافي امي مسكتني عنه..
مهران : اشوف من عشرتك مع عيال عمي صرت مثلهم ما تمشي الي بمد اليد .....
ماهر : تعرف عيال عمومي بردو قلبي فيه شوي لمى نزلت بميار من فوق وشافو حالتها هجمو عليه ونزلو فيه ضرب لكن عمي ابو صقر بعدهم خساره كان ودي يكسرو عظامه .....
مهران : ماهر اذا تبي تحرق قلبه مو بالضرب حرقة القلب بشي ثاني وانا اراهنك انه عازل نفسه بعد طلاقه من ميار .... انت لو تعرف شنو ميار بالنسبه له ما فكرة بمد يدك عليه .... ما انكر ودي اكسر عظامه لكن ابيها بطريقه ثانيه ....
ماهر : دامه يحبها جذيه ليش رد زوجته وليش طلق ميار ... قول لي شنو معناه ....
مهران : لك الظاهر يا خوي .... اولا كلمت ميار عرفة منها ليش وصلو لجذيه وليش تركي رد زوجته عليها....
ماهر : لا اصلا كانت تنتظرك انت وتقول لك حتى سناء ماقالت لها وهناء عجزة معاها تبيها تفضفض لكن عبث ....
مهران : ميار ما تتكلم الا لي ولامي ثم انت ولا مره حسستها انك قد ثقة اسرارها ... ماهر تعرف ليش ميار تحملة ولا لجاة لك .....
ماهر وراسه منزله : وعبالك هالشي ما جرحني ولا ضايقني ....
مهران : ومضايقها هم لكنها كانت خايفه عليك ....
ماهر : خايفه علي .... ليش عباله ماباخذ حقها منه .....
مهران : لانها عارفه انك بتاخذ حقها بيدك وخافة تتهور وتاذيه وانت الي تخسرك ..... ماهر حكم عقلك وتصرف بتروي وعقل ولا تستخدم يدك لانها بتكون ضعفك .... فهمت ليش الحين ميار ما لجاة لك .....
ماهر : فهمتك .... خلاص بعد خلي حصل بحكم عقلي والم يدي .... قربنا هذاك بيتهم ....
وقف مهران جنب بيت ابو تركي ونزلو ورنو الجرس وبعد مده انفتح الباب وكان طلال وبعد السلام والترحيب دخلو المجلس ودخل عليهم ابو تركي ورحب فيهم وكان منزل راسه وخجلان منهم .....
طلال واهو يمد فنجان القهوه لمهران : سم يا بو وليد .....
مهران واهو يبعد الفنجان بهدوء : تسلم يا بو بدر مايينا نتضايف .... نبي تركي نكلمه .....
ابو تركي : اشرب يبه قهوتك مو اصول تدخل بيتي ولا تقهوه اشرب وتركي بييك ......
مهران : قهوتك يا عمي شربناها قبل .... اسمح لي يا عمي لكن بنتي دخلت ببيتك ونهانت فيه ولا انصانت ... تبيني اشرب قهوتك .....
طلال : يا ابو وليد احنا مو مقتنعين بالي انقال وبنتكم محشومه من الي انقال ووالله لو اشوف بعيني الي قاله تركي ماصدقته .... لكن اسمح لي ولد عمك شلون دخل بيت تركي ولا غرفة نومه وعلى فراشه ... انا ما اتهمها حاشاها لكن لازم نفهم شنو الي حصل ......
مهران : ولد عمي للحين مالقينا حتى عمي متحلف فيه وبرائة ميار بيده وانا مستحيل اترك حقها يضيع ... والحين ابي تركي ممكن .....
ابو تركي : تركي .... تركي يا يبه حابس نفسه بغرفته ورافض حتى الاكل .... يبه ترى فراق ميار صعب عليه انا اعرف انه طلقها لكن غصبا عليه لانه يضنها سوت جذيه عشان يطلقها واهو ندم لانه طلقها وقال بيردها .....
ماهر : يحلم يردها ولو سواها بتطلق منه غصب ....
مهران واهو ياشر لماهر يسكت : مثل ما قال ماهر .... والمين نادوه اكلمه .....
ابو تركي لطلال : روح له وحاول فيه وقول لامك تكلمه يمكن يقتنع ويطلع ......
هز طلال راسه وتوجه لغرفة تركي وطق الباب وايد وعجز معاه يفتح فقرر يقول له من الي ياه ....
طلال واهو يطق الباب : تركي افتح .... تركي مهران الي يايك يبي يتكلم معاك افتح ..... على الاقل تشوف احد من طرفها ...شم ريحتها منه ناسي من مهران انت تقول انه.....
قطع طلال كلامه لان تركي فتح الباب وكانت حالته ما تسر و جسمه هزل بيومين ....
تركي بلهفه : احلف ان مهران هني .... اذا طلعت تجذب اذبحك ...
طلال : وليش اجذب عليك انزل وتلقاه مع ماهر وابوي بالمجلس ... تركي بدل وتضبط حالته حاله ....
ما اهتم تركي لكلام طلال ونزل بسرعه للمجلس ومر بامه واروى وسمر بالصاله وتعجبو لانه نزل فوقفة ام تركي طلال ....
ام تركي : شلون نزلت اخوك وليش طاير ولا حتى سلم .....
طلال واهو يخز اروى : ريحة الحبيبه بالمجلس لازم ينزل ويطير لهم ...
سمر بفرح : تعني ميار .... احلف انشاء الله تصلح الامور وترد له ....
طلال : لا مو لهالدرجه ثم اخوج ترك فيها عظم صاحي عشان تييه ثم عبالج سهله عليها ترد له بعد اتهامه لها وتطليقه لها بسهوله ....
اروى : ليش من تكون يعني تغلا اصلا اهي خانته على فراشه وانا وتركي شفنا ولد عمها معاها ليش منتو مصدقين انا مو عارفه .....
طلال : اصلا اذا ما طلعتي ورى السالفه اقص يدي ... اخليكم تركي نزل لمهران وماهر يبون يكلموه واتوقع مهران يبي يسمع من تركي مثل ما سمع من ميار .....
نروح لتركي اول ما وصل قبال الباب جمد مكانه لمى شاف مهران وحس انه واقف قبال ملك الموت لان مهران كان يطالع بنضرات ناريه ولو النضرات تقتل كان تركي انحرق وتحول لرماد من نضرات مهران فحس انه يختنق ومحتاج لهوى فرجع لورى وكان بيطلع من المجلس لولا ان طلال كان وراه فدخل واهو ياخذ نفس عميق ووصل لمهران ومد يده عشان يصافحه ومهران وقف وكان يطالع يد تركي وبعدها طالع تركي ولا صافح تركي ....
مهران : تمد يدك تبي تصافحني .... مو هذي اليد الي صافحتها وسلمتها بنتي ..... مو هذي اليد الي صافحتها وسلمتها شركتي وحلالي .....مو هذي اليد الي شاركتني صفقاتي .... مو هذي اليد الي انمدت على بنتي مو هذي اليد الي قفلت عليها الباب مو هذي اليد الي حرمتها من وسيلت الاتصال ... رد هذي اليد لو لا ....
تركي واهو يلم قبضت يده وينزل راسه مع كلام مهران : اهي ....واهي نفسها الي ضمتها وطبطبت عليها واكلتها ومسحت دموعها و احتوتها .... ذكرت كل الي ما يعجبك ونسيت الباقي .... اختك خانتني تفهم يعني شنو ... .
وقف كلام تركي البكس الي ياه على ويهه وتراجع على ورى من قوته ولف يشوف من لقاه مهران وكان مكور يده ويتنفس بسرعه دليل عصبيته وتركي يعرف ان مهران اخر شي يتعامل فيه مد اليد ومعنى هالبوكس انه وصل حده معاه وهذا رده عليه ......
تركي بسخريه واهو يطالع مهران : قول الحق يحرق هااااه .... انا نغشيت فيها ولا تصدقها انت هم مغشوش فيها مثلي .....
طلال بصدمه وقهر من تركي : انت عن من تتكلم ... انت واعي لكلامك شكل عيشتك مع بنت خالتك لحست مخك عن ميار .... تركي اصح على نفسك .....
تركي بصراخ : انا اصحى منكم كلكم ... فسر لي سبب وجود ولد عمهم ببيتي وبغرفة نومي ةبفراشي معاها .... انا شفته بعيني معاها .....
مهران بصراخ : تقول شفتها بعينك ... اوكي قول لي شنو كانت تسوي شنو قالت ل اليس لمى دخلت لهم ... ميار شلون كان وضعها اوصف لنا حالتها حتى لو انها تخدش الحياء اوصف وانا قابل بكل الي بتقوله واذا اثبت صحة كلامك لك علي اييبها قبالك و اكفخها لحد ما تعترف وهم اتبرى منها شقلت .....
سكت تركي لانه تذكر انه ما سمع صوت لميار الا لمى كانت تنزل من السرير وتوجه لغرفة الملابس تبدل لكن هالشي ما ابعد التهمه عنها لانه توقعها ساكته تسمع الكلام او فيها النوم بعد خيانتها له مع الياس فهز راسه يبعد الصورة عن ويهه وطالع مهران ....
تركي : مافي شي يبعد التهمه عنها الا اعتراف ولد عمك بعد حلفه على القران .... غيره ما يشفع لها .....
طلال : الخادمه .... تركي الخادمه اختفت هم ....
ماهر : وهذي هم مشكوك فيها لانها اختفت بنفس اليوم الي رحنا بيته..
مهران : يا عمي انا ببري ذمتي وذمت اختي من كل هلي الفه ولدك وانت احكم بالي بقوله على لسان ميار وابيك تفسرها لي ....
ابو تركي : منغير ما تقول يبه انا عارف ان ميار بريئه واساسا كل الي سواه تركي انا وامه وحتى خواته رافضينه مافي شي من الي سواه قبلنا فيه ... تفضل يبه قول الي عندك ....
تكلم مهران وقال كل الي حصل لميار من تركي من وصلت الى اليوم الي خذوها فيه ....
ابو تركي واهو منزل راسه : والله انيىخجلان من الي اسمعه .... هذي تربيتي لك يا تركي تمد يدك على زوجتك وانت الي غلط عليها .... تذكر لمى ييتني انا وامك وطلبت نقبل بردك لاروى وقتها رفضت تقول لنا الاسباب واخرها تبتزك وليش عشان تحافظ على حياتك مع ميار ... كا انت خسرة ميار هم هذي اهي السبب فيها .... لا يبه انت السبب وانت الي هدمت حياتك بغبائك وعدم لجوئك للي حولك واولهم ميار اهي الي لها الحق وانت غلط لاخر لحظه ... لكن تعرف افضل شي سويته لها انك طلقتها لانك ما تستاهلها ابد ..... السموحه منكم يبه مهران انت واخوك لكن انا ما بيدي حيله عليه ....
مهران : لا تعذر يا عمي انا ييت اكلمه قبالك وتكون شاهد والوجه من الوجه ابيض بنتي وعندي وولدكم وعندكم ومابيه يقرب لها ابد ...
تركي : لا يا مهران ميار بترجع لي ....
ماهر : اذا شفت حلمة اذنك ترجع لك ....
تركي بتحدي : لا تنسى انها بالعده واقدر اردها ....
مهران : سوها يا تركي ان كنت ريال ووقتها اهلك ياخذون فيك العزا .... يله ماهر .... اي لحظه ... شوف في شي بانبهك له .... تعيينك بيكون كمبتداء وانسى الي كانو بيعينوك فيه تعرف ليش .... لاني توسط لك قبل عشان يحطون بمكان مسؤل لكن الحين ارفع اسمي عنك و ارتفع السلم خطوه خطوه .... باذنك يا عمي واعتذر عن ااي بدر مني .....
طلع مهران وماهر و تركي واقف مكانه ومصدوم بكلام مهران لانه ما كان يعرف ان مهران وصى عليه ولا ميار خبرته بهالشي يعني كان يتعامل معاه كاخ واهو كان يضنه ممكن ما يهتم له ويطلق ميار منه لو عرف بموضوع الساحر فنزل على الكرسي الي وراه واهو مو متحمل يوقف ويحس ان ريله ما تشيله .....
ابو تركي : يا ترى انهيارك هذا عشان شنو ... عشان خسرت المركز بوظيفتك او خسرت اخ .....
طلال بسخريه واهو يقعد : ليش تساله يبه ... اصلا تركي اخذ الي يبيه منهم وهالمركز عادي يتوسط له نسيبه الاولي الي رجع له ولحضنه ومو مهم لا ميار ولا اهلها ... صح يا خوي .... تعرف انا الي مصدوم فيك .... خل تهنيك اروى واشبع فيها ...
تنهد ابو تركي على حالة ولده ووقف وتوجه لتركي وحط يده على جتفه وطالع تركي فطبطب عليه وتركه ودخل لداخل بيته مع طلال وتركو تركي يصارع افكاره ......
مر اسبوع ووصلو لخبر عن الياس انه بنفس اليوم الي راح فيه ماهر مع عمامه وعيالهم لميار ببيت تركي اهو حاول يهرب بالسياره وكان مسرع وتصادم مع شاحنه و قدرو الناس يطلعوه من السياره بسرعه قبل تنفجر وتحترق بكل ثبوتياته ولانهم ما لقو بجيوبه اي شي يدل على هويته تاخرو لوصول الى هويته ولمى عرفو اهو من بلغو اهله ولمى راحو له انصدمو بكلام الطبيب بان الياس دخل غيبوبه ومدتها غير معلومه وتعتمد على قابليته للحياة و بجذيه يكون برائة ميار موقفه لحد ما يقوم الياس او يلقو الخادمه الي اختفة بنفس اليوم وتركي عايش بدوامه مع نفسه ما يبي يصدق انه خسر ميار وبنفس الوقت يتناقض مع نفسه بانها خانته ويرجع يبي يردها ويندم انه طلقها .....
ام مهران : يعني الحين الياس عايش على الاجهزه .....
سناء : اي يمه وعمي قال بينقلوه ببيتهم ويحطوه بغرفه مخصصه له ومجهزه بكل الاجهزه الي يحتاجها ....
ام مهران : لكن وجوده بالمستشفى ارحم له على الاقل حوله الاطبه والممرضات على طول .....
مهران : عمي مابيعجز عن كل هذي الامور ... يمه انتي تعرفي عمي ما يبي الناس تتكلم بالعايله و هم انا مع عمي لان وجود الياس حوله اهله افضل له لان بيكلموه ويزوروه باي وقت وهذا يساعد لعلاجه ....
ماهر : للحين مصر تاخذ ميار لعمي بكندا ....
مهران : اي عمي يبيها وهم ريان وركان مصرين وميار قالت تغير جو واذا قررت تعيش هناك بتعيش وانا بعد شهرين بلحقها والشركه بديرها من كندا وارجع ايطاليا كل فتره او انقل الشركه هناك بكندا ...
سناء : وانت هذي حالتك ... يا اخي رجع الشركه هني وخلاص ....
مهران : ومن قال لج مالها فرع هني انا شركتي الاساس هني والفرع بايطاليا ولمى اضبط اموري بانقل لكندا والاساس هني لا تخافي مردي استقر هني لكن اقلب بسوق برى كم سنه وبعدها ارجع هني ....
ام مهران : الله يوفقك يمه لكن حط بباله بعد شهرين انا هم بلحقها وبسافر لها .....
ماهر : يمه يعني ميار ومهران بس عيالج واحنا واحفادج مالهم مكان عندج .... جذيه تشتغل الغيره عندي .....
ام مهران : يمه لا تنسى ميار انحرمت من ابوكم وانا احاول اعوضها عنه وعارفه هالشي ما يتعوض ومهران مثلي ما يبي تحس بفقدتها لابوكم .....
ماهر : جذيه عيل بضبط امور عيالي للمدارس والحقكم حتى لو سنتين يدرسوها برى ما تضر .... شرايج سناء تلحقينا هم .....
سناء : ليش احنا بنهاجر اقول يمه اذا رحتي مع ميار خليها تريح سنه سنتين وترجع وانا اكيد بييكم والصيفيه عندكم وجهزو لي مكان انا وعيالي .....
احمد واهو يدخل وسمع كلام سناء : ليش تبين تتركيني بروحي هني انا معاكم .... شلونج خالتي ....
سناء واهي تبتسم : ليش من بيسفرنا غيرك .....
ام مهران واهي تبتسم لاحمد بعد ما باس راسها وقعد جنبها : هلا يمه شلونك ....
احمد : انا تمام .... شلون بنت عمي عساها احسن الحين .....
ام مهران بضيق : الحمدلله على كل حال ... تحسنت صحتها لكن النفس يمه تعبانه ... ما اضن سهل عليها تنساه ... تركي مكانته كبيره ولهالشي اهي قاومت وايد واهي معاه وزوجته معاه ... ليته بس حس بالي تحس فيه له وقدره ......
ماهر : قليل الاصل يبقى قليل اصل وانا اضنه مخطط لكل هذا ... لكن لو يصحى الياس كل شي يتوضح ...
ميار واهي تنزل من السلم : وانت يا خوي محتاج لاحد يثبت برائتي عندك ...ما تثق فيني وبتربيتي .....
ماهر واهو يمشي بسرعه لها ويضمها ويبوس جبينها : يخسي كل من يشكك بتربيتج ...كل الي ابيه برائتج اسكت فيها لسان الكلب وبس ولا كلنا واثقين فيج وبتربيتج ... وعفوا احمد الياس اكيد اهو الي مخطط وما استبعد عنه شي ابد لكن خوفه وهروبه يدل على انه ورى كل هذا ....
احمد : لا تعذر مثلي مثلك بالراي ... شلونج ميار ان شاء الله الحين احسن ...
ميار واهي تقعد مع ماهر جنبه : الحمدلله ...عايشه يا ولد عمي .... مهران ....
مهران واهو يبتسم لها : عيونه امري ....
ميار واهي ترد له الابتسامه : عينك سالمه حبيبي .... ابي استاذن بزور مروه قبل اسافر .....
سناء : ميار ويهج للحين فيه اثر .... انتظري فترة وبعدها زوريها ....
اممهران : لا يمه مروه ما قصرت معاها تمت منتظره بره مع ريلها لمى رحنا لميار بس تبي تطمن على ميار ... ثم مروه والده ولازم ميار تزورها للسببين ......
مهران : اوكي متى تبين تزوريها انا حاضر ....
ميار : انا طلبت طلبيه لها وللبيبي لمى توصل اليوم الثاني اروح شقلت
ماهر : خلاصانااخذج لهالكن عطيها خبر افضل ...
ميار : تسلم حبيبي وبدون قول لازم اخبرها ليش شايفني ادرعم بيوت الناس جذيه ..
ضحك ماهر وضم ميار وباسها بخدها وظلويسولفو بسوالف متفرقه والكل مرتاح لان ميار تحاول تتاقلم بكل شي بعد فراقها مع تركي .....
اما تركي فحالته ما تسر لا عدو ولا حبيب فبعد ما زاره مهران مع ماهر والكلام الي قاله له حس بضياع اكثر خصوصا لمى تبين له ان تعيينه بالمركز الي كانو بيعينوه فيه بس عشان مهران وجذيه يكون غدر فيهم اكثر وتراجع مهران بالتوصيه عليه بينت له مكانته الي خسرها عند مهران ولازم يرجعها لكن شلون بيرجعها واهو قطع كل وصل بينه وبينهم وميار بنضره خانته وطلاقه منها ينهي كل الخيوط بينهم عدى الشغل لانه للحين يملك اسهم بشركة مهرا صح صغيره لكنه يعتبر شريك ... واهو يفكر سمع طق باب غرفته وتوقعها اروى فصرخ عليها تبعد لانه ماله مزاجها وطلبها يعاملها زوجه وخصوصا مر على طلاقه من ميار شهر .....
طلال واهو يطل براسه من الباب : انا طلال موب اروى .... ادخل او اذلف مثل ما قلت .....
تركي واهو على سريره : لا تعال ...واسف ضنيتك اروى ....
طلال واهو يقرب له كرسي ويقعد قبال تركي : دامك مو متحملها وهجرها او نقول راكنها على الرف ليش ما تحررها بدل بهدلتها جذيه ..
تركي واهو يطالع طلال : ليش اهي غلطة بشي ... ماسك عليها شي قول خل اطلقها وارتاح ....
طلال : تركي سبب زواجك منها انتهى خلاص فليش متمسك فيها ... انت هدمت حياتك مع ميار بسببها ولا كنت متمسك باك ما تقول اسباب ردك لاروى واخرها الكل عرف وخسرت ميار ... قول لي شنو فايدة زواجك من اروى الحين وليش تاركها .....
تركي : مافي سبب يخليني اطلقها وميار طلقتها لخيانتها ولا تقول ما خانت انا شفت بعيني فاهم .....
طلال : اوكي خلنا واقعيين ... انت تقول خانتك صح .....
تركي : اي صح ....
طلال : اوكي دامك متاكد فمافي اسف عليها انت ليش حابس نفسك و متاثر جذيه ... الي يخون ما نهتم له ... انت لمى خانتك اروى قطيتها ورى ظهرك وعشت حياتك مع ميار عادي برغم محاولات ميار بانك ترد اروى ..... تعرف تركي حالك يضحك ويخلي الواحد يحتار انت وين مشاعرك ولمن واذا حقيقيه او مزيفه ... ساعه تحب اروى وذابح نفسك عليها وتبيها قبل تسافر وساعه تتركها ورى ظهرك تعاقبها لانها تخلت عنك وترجع تقول كنت تبي تاخذها معاك عشان تبعدها من ضياع ابوها .... الا صج ميار اهي الي قالت لك هالشي بس او في من اكتشف هالشي ببالك .....
تركي واهو مستغرب سؤاله : لا محد غير ميار فهم قصدي وقتها ... بس ليش تسال ....
طلال : ابي اعرف لاي درجه هالبنت لماحه .... تعرف تركي انت فعلا محد يفهمك كثرها ....زين متى تطلع من قوقعتك ....
تركي : لا تمسخر انا بس مالي مزاج لطلعه وبس مو اكثر لا تضن متاثر من بعدها .....
طلال : زين منت متاثر لبعدها ... اي سمعت لك خبر عنها ...
تركي بلهفه : هبر شنو ... شنو فيها قول .....
طلال : ههههههوليش متلهف تعرف مو توك منت متاثر لبعدها شنو حصل ......
تركي : قول طلال وبلا سخافها ابي اعرف بس تاثرة لو لا ....
طلال : ههههههههه زين زين بقول رحمتك لانك مو متحمل انت حتى وزنك نزل ... اوكي سمعت انها بتسافر لخوانهاالي بالرضاع .....
تركي : لكندا .... استجمام او شنو .. ....
طلال : لا تغير جو لكن اذا ارتاحت بتعيش هناك ...
تركي واهو ينزل من السرير ويدور بالغرفه : متى .... ومن قال لك .....
طلال : متى مو عارف لكن من قال ندى زوجتي ... ناسي انهم اصحاب ... راحت لها ندى ولمى رجعت كانت منهاره بجي ... حتى سبتك ....
تركي واهو مستغرب : وليش تسبني ....
طلال : يا اخي حالة ميار ما تسر لا عدو ولا حبيب انا وانا اخوك تحسبت على بليسك للي سويته فيها انت خليت فيها شي صاحي ... تركي ميار كانت شبه مشوها ... لكن الحمد لله حالها الحين افضل اليوم ندى زارتها والحمدلله اهلها يستقبلوها ......
تركي واهو متندم ومتاثر لكن يكبت : طلال قول الصج ... ميار تحسنت ... قول لي صج انا شوهتها من الضرب ....
طلال : تركي من جدك ما تذكر شلون صار شكلها من ضربك لها .... لو تحل لك كنت قلت لندى تصورها وتوريك ... تركي على وصف ندى وسمر ميار ويها كان كله الوان وهم منفخ من كل جهه هذا واهم ما شافوها الا بعد اسبوعين من الي سويته فيها ... تعرف البوكس الي عطاه لك مهران لو معطيك غيره الف ما يكفي للي سويته باخته ....
تركي : ماكنت بوعيي وقتها ثم واحد وزوجته خانته شنو تنتضر منه ياخذها بالاحضان يعني .....
طلال : وليش ماسويت باروى ربع الي سويته بميار .... تعرف يقولو الي تحبه ما تاذيه ... صحيح هالكلام او العكس .....
تركي : بس بس لا تروح وتيي بكلامك على اروى .... اسمع ابي اعرف متى بتسافر بالضبط ...
طلال : ليش تبي تعرف انت طلقتها وخلاص مالك حق عليها بشي ....
تركي : لا اقدر اردها ولي حق عليها ....
ابو تركي واهو يدخل الغرفه لان الباب مفتوح : لا مالك حق عليها فاهم .
تركي : يبه اهي بالعده واقدر اردها .....
ابو تركي : شوف يا تركي ميار تعذبت من كل جهه معاك من تزوجتها واهي بعذاب صح كنتو بعيدين لكني اعرف ان اروى كانت تتصل لك وتزعجك وتبيك تردها ....تعرف من خبرني ميار ... ميار لمى يات هني اخر مره قبل تسافرو لتكملة علاجها لمى ملاك سوت سواتها انا ناديتها للمكتب وكلمتها وخبرتني بكل شي تسويه اروى واتصالاتها لك وشلون انت تاثرت لمى طلال خبرك بان اروى تزوجة عاصم .. ميار كانت تتحمل وتكتم وحده مثل هذي تصدق انعة تخونك .... لو انها ممكن تخون كنت شفت عليها شي غلط لكن انت عشت معاها ولا قلت لنا انها غلطة بشي .... قول لقيت عليها شي تمسكه يدل على انها ممكن تخون ... البنت كانت خلوقه وقايمه بكل واجباتك الي عليها والي مو عليها شكنت تبي اكثر .....
تركي بنهيار ودموعه تنزل : ماكنت ابي شي والله والله كنت مرتاح وحامد ربي الف مره لانها من نصيبي لكن يبه شنو كان لازم اسوي وانقذ حياتي معاها ... من كثر خوفي اني اخسرها خسرتها بغبائي .... بسكم لوم لي حتى اهي غلطة اهي الي خانت ليش ما تحملة وسامحت ليش اختارت تخون لو ذبحتني اهون علي من خيانتها ..... انا انا ... انا قلت لها اذا تبي الخلاص مني اما بخيانتها لي او موتي واهي خانت عشان تخلص مني ...وتبوني اصدق انها ما خانت ... لا لا خانت وخانت
ابو تركي : الله اعلم اذا فعلا خانتك لو لا لكن من جهتي انا مو مصدق هالشي ....شوف يا تركي انت طلقتها واهي من حقها تعيش حياتها بعد طلاقك منها فلا تقرب لها وانت هم عيش حياتك مع الي اخترتها معاك ... انت رديتها ورافض تطلقها حتى لمى كنت بتخسر ميار وكا انت طلقة ميار وبقيت على اروى فكمل الي بديته على الثاني كمل مع الي اخترتها
تركي : بكمل يبه لكن اروى تاركها على ذمتي لحد ما تسوي شي غلط يستحق اني اطلقها وهذا للسبب الي تاركها عشانه ولا الناس تاكل ويهي وويهكم لاني لو طلقتها بدون سبب قوي بكون العب ببنت خالتي مره اتزوجها ومره اطلقها ...وقتها من بيعبرها او يطلبها محد فاهمني ييه محد ....
ابو تركي : انا عارف ان هالكلام من يدتك لكن لاول مره ما اكون معاها بالراي .... عموما انت حر بحياتك وسو الي تشوفه لكن ما ابي اشوفك حابس نفسك ومعتكف لي جذيه ... اي اما تخصص لك جناح وتسكن فيه او تاخذ زوجتك وتعيش ببيت بروحك لكن تبقى جذيه انت بغرفه واهي بغرفه وتحلطم بالروحه والرده وتزن على راس امك بانك هاملها مابسكت لك خذ زوجتك وبعدها عن راس امك فاهمني تركي ابي ارتاح من مشاكلكم ......
طلع ابو تركي وترك تركي مع طلال ولحظات وترك طلال تركي يفكر بحياته وقرر يكمل حياته ويترك ميار بحالها وخصوصا انه بتسافر وكلام ابوه اثر فيه واروى قرر يسكنها بجناح ببيت ابوه ويحاول يعيش معاها لكن بالتدريج ولانه متوقع انها ممكن تخونه فقرر يعيش معاها مثل الاخوان وينتظر لحد ما تغلط ووقتها محد يلومه لو طلقها ....
اما ميار فسافرة بعد ما زارة البيت الي سكنت فيه مع تركي وكانت تطالعه من بعيد وعرفةانه تركه وعاش ببيت ابوه وطلبت من مهران يشتريه اذا انعرض للبيع لكن عن طريق شخص تركي ما يعرفه عشان لا يعرف انها شرته ......