الفصل العاشر: "مريضة نفسياً"
(1)
جدتي: وش السالفة يا خالد؟
خالد: السالفة يمه أن راشد هذا عاطل و عمره فوق الثلاثين و ما معه شهادة...
قاطعه أبوي: أصلاً أبوه كان ناوي يخطب له بنت أخوه ناصر..
خالد: أيه بنت أخوه المطلقة إلي في حدود الثلاثين.. و كن أبوها كان شيخ و لا تاجر؟! إلا حفيان و منتف و ماحد داري عنه.. و أنت صدقت بأنهم بتركون بنت في أول العشرينات وجامعية و بنت عايلة كبيرة و قبل كل هذا (ما وراها أهل) علشان مطلقة؟! و الله لو كنت في مكانه كان فضلت البنت.
و أنا زي الأطرش في الزفة! و القـــهــر زفـــتــــي أنــــــــــا!
قلت في نفسي "راشد مات.. و على الكلام إلي قاله عنه خالد مستحيل أقبل به.. بس ليش؟ ليش الفضايح قدام الناس؟"
ما تبوني خلاص..كل واحد يبي يتزوج يفكرون في بنات كثير و ثم تبدأ مرحلة الأقصاء: "هذي أطول من ولدنا..هذي أمها شايفة عمرها..هذولي مصاريفهم عالية..هذي طباعها ما تمشي معنا...الخ"، لو كل عايلة حطت عينها على بنت و لا ناسبت ..قالوه.. كان ماخلصنا
ثمن الجيران شاعوا خبر خطبتي لراكان إستاذ الجامعة و لا أحد كان مستغرب...و هم مانين عليّ بولدهم العاطل.. و يتباهون بمنتهم قدام الناس!!"
أبوي: لا تتهزي يا خالد ترى حرام..المطلقة وش فيها؟
خالد: أنا ما تهزيت..بس هذي الحقيقة لو خير واحد -ما قد تزوج- بين مطلقة و بنت أكيد بيختار البنت..بس لا يقعدون يتكلمون عنا و هم عارفين أن ولدهم ما ينبغى.. بعدين هالحين من جده أبوه يقول "ليش ما قلتي بنت الوليد و لا بنات فيصل و لا سعود؟!" و هو عارف بأنهم مهوب قابلين بولده ..شف من هم رجال ماجدة بنت عمي الوليد و ماريا و ناديا بنات عمي فيصل ثمن يتكلم.. و بنات عمي سعود في المتوسط !!يعني حتى لو خطب وحدة منهم لراكان إستاذ الجامعة الصغّير ما رح يوافق عمي..فوشلون يتشرط حضرته على ولده العاطل!
قلت: هالحين وش سالفة راكان؟
خالد: عمتي كانت تفضلك على بنت حماها.. و تقول بأنك إلي بتعوضين راشد عن إلي شافه في حياته..و الحق يقال أن رجلها ما كان يبي نسبه أبوي..بس الظاهر أن راشد كان بعد مع عمتي.. لأن أبوي من طلع للدنيا و هو خاله و ما يفرق معه..
لكن راكان قال "حـــــرام عـــلـــيــكــم.. البـــنـــت ألــــف من يــتـــمــنــاها.. خــلــوني أشــوف كانها راضــــــــيــــة تقدمنا رسمي"
لأنه عارف أن أبوي بيغصبك...فهو سبق و أن خطب منهم و من عايلتنا و لا أحد رضى فيه..عارفينه ما يتحمل مسؤولية...و أنت يا يبه قايل بعظمة لسانك "أنك ما رح تأخذ حقك منهم إلا أنك تزوج بناتك لأولادهم و تصير جد عيالهم"...
قاطعه أبوي: أيه ليش يردوني و يخلوني أروح للغرب؟! هذا فيصل و سعود ماخذين من عيال أعمامنا...
خالد: زوجوك بنت الشيخ عبدالعزيز الغدر وش سويت؟ ذليتها و رجعتها لبيت أبوها مطلقة و معها عيالك..و خذت وحدة لا هي من مستونا و لا تشرف العايلة .. ثمن أنت تظن بأنهم بيناسبونك حب؟! ما رح يجيك منهم إلا المتردية و النطيحة... يعني عيالهم الدكاترة و المهندسين و أساتذة الجامعات... مارح نتشرط.. خلنا على المدرسين و الموظفين.. يزوجوهم لبنات الناس..و حنا ما يرمون علينا إلا العاطل! و لا بعد يقولون قدام الناس أنهم إلي ما يبونا! و لأنهم ما قدروا يقولون ربع كلمة في بنتنا.. خلو العيب فيك.. يأخي الله لا يبيهم ..بس وشوله يخلون سيرتنا على كل لسان؟ أنا حتى ريم ما قلت لها...عارف أنها مستحيل توافق و سكرت السالفة..لكن أبوهم خاف أنّا نقول شيء و سبقنا..
أبوي: آيه بس..
خالد: وشو بسه؟ الولد مات و ما نفعه كلام أهله و لا خذ لا المطلقة و لا البنت.. و أنت قاعد تلفف في المجالس تشيع ببنتك؟!
أبوي: أنا ما قلت شيء..بس لأخواني..
خالد: و يوم تقوله في دورية العايلة؟ كلن درا عن كذبة رجل أختك على سمعتنا..
أبوي: ما رح يضركم..أنهم رافضين نسبتي ما رفضوا ريم..
خالد: لا و الله! يأخي الناس وش بيقولون؟ "إذا كان أهله ما رضوا يأخذون بنته لولدهم العاطل..ليش نرضاها على أنفسنا؟!" تخرب سمعة بنتك بلسانك!
أبوي: أنا ما قلت أنها تطلع مع رجال و لا تحشش؟!
خالد: ويـــــــــن يا الأخو؟ تراهم يقلون أننا في الخليج و في السعودية..يعني أي كلمة تأثر على سمعة البنت و نصيبها.. تذكر قبل كم سنة إلي تلبس عباية كتف ما تزوج!..مو بس سالفة جرايم و فسق إلي تأثر..
أبوي: هذني ما حد يقدرني و كلن يقول عني فاشل و ضعيف شخصية و تزوجت مرتين..
و هنا تكلمت من قهري و أنا إلي كنت ساكتة حياء: ومن قال أني أبي مثلك؟!
خالد: والله و أكبر من خذت؟! وحدة ما خذوك إلا يبون نسبه أبوك و فلوسه..و الثانية مطلقة و جايبها من البر و ما رضت فيك إلا علشان تصرف على أهلها بفلوسك... و كم وحدة بغيتها و قضبوك الباب؟!
قلت: خلاص وقفوا..هالحين خلونا في الموضوع الأساسي..من الصادق و لا الكاذب في سالفة خطبة راشد؟
خالد : راكان كلمني و أنا رفضت و قلت له بأنك رافضة..
أبوي: أيه بس أبوهم ما يبنيّ..و ما قال شيء عن كلام راكان لك..
قمت و خليتهم و أنا قرفانة من هالعايلة و نسيت البحث و المكتبة و التحويل.. المهم أني أطلع من جو الإهانات هذا..
قعدت أفكر يا ترى وين الصدق و لا الكذب؟ يا ترى راكان تقدم يخطبني لأخوه؟ يا ترى كان ممكن يكون خالد يكذب و ليش؟
من اهتمامه بي؟! هه لو كان يهتم فيني كان ما خلاني أتبهذل مع اللموزينات لو أحتجت شيء من مواعيد تقويم الإسنان حتى كتب الجامعة!
قلت: خلني أفكر في كل لحظة و أحللها..لبيان عناصرها الأولية_الله يذكر أيام الكيماء بالخير_
• نوف لما خذتني لعماتها: كان واضح أن العين كانت عليّ.. و كانت تبغى تطلع مميزاتي.. علشان إذا صار شيء يطلع أخوها ماخذ وحدة تشرفه.. و ترفع راسه قدام الناس.. وحدة بنت العليا و أخوالها الغدر..من ناحية النسب ما حد يقدر يقول كلمة..أما تصرفات أخوالي فسوق العوايل و القبايل ما يعترف فيها! و ما عليّ.. جامعية.. و في العرس كلن يشهد لي بالجمال و الأناقة و الذوق..
لكن ما أقدر أوكد بأنه قبل كلمة أبوها و لا بعد.
• كلمة عمتي: "عسى ما تكون عقوبة": تحتمل التفسيرين.. ممكن قصدها تكون عقوبة لأنهم طلعوا خبر رفضهم و احتقارهم لنسبتنا...و يمكن لما كانت تبنييّ لولدها و هي عارفة بأني بأنغصب عليه.. و أني مستحيل أرضى بواحد عاطل و ما معه شهادة..
• كونهم قالوا أنهم ما بغونا...شيء غريب..لأنه ما عمرهم قالوا شيء عن إلي تقدموا لنوف...و لا عيالهم الباقين كلهم.. ما قالوا أبد عن البنات إلي كانوا يبون يخطبونهم و لا حصل نصيب..فليش يقولون القصة؟! حتى ريان إلي عل قلوبهم و شاف ثلاث بنات و لا عجبوه إلين ما شاف الرابعة و تزوجها..أما هالثلاث بنات ما نعرف عنهم غير أنهم
( بنات عوايل و ما عليهم كلام)...
و هالكلام ما قيل إلا بعد زواجه.. و ما قاله إلا عمتي حصة إلي كانت مقهورة منه.. لأنه رفض وحدة من طرفها و فشلها مع الناس..
و لا أحد درى من هيّ؟ مع أنها بنت الناس و أنا بنتهم!!
• لكن لما قالت "سامحيني يا ريم.. و الله أنك بغلات نوف عندي.. و ما كان ودي أغصبك على شيء"
كل هذا دليل أن كلام خالد صـــــــــــحــــــــيـــ ـــــــح..و خصوصاً أن الناس عارفين بأن ولدهم عاطل و عليه علامات استفهام..
فالمنطق يقول أنهم ما يفشلون أنفسهم و يقولون ما بغينا بنت فلان و بنت علان..
لأن الناس بيقولون الأ الناس إلي ما بغوكم.
فسبوقونا و قالوا هم إلي ما بغونا! و ما لقوا علي عيب غير أبوي علشان يسترد أبوهم كرامته..
بس ليش؟ ليش يا أهلي و عزوتي تخربون سمعتي؟ ليش تخلون سيرتي على كل لسان؟
علشان ما نقول كلمة في ولدكم؟!
من قال أنّا بنقوله؟
و لا أبو رائد منقهر كيف يرفض عيال الفاشل إلي ما يدخله مجلسه إلا مضطر.. ولده؟! وحب يحافظ على مكانته الاجتماعية..و ما نفعه كلامه و تشهيره بي.. فالولد مات و لا تزوج ولا حتى خطب.. أنا ما أستغرب بأن قال كلمته في لحظة.. لأنه كارة هالنسب..لكنه كان عارف بأن ما حد يبي ولده..علشان كذا بغى يخطب بنت أخوه لولده..
قلت في نفسي: " إذا كان الكلام إلي قاله خالد صحيح الله لا يحلل و لا يبيح من تكلم عليّ و من نشر هالإشاعة"..
بعدين جلست أفكر في المستقبل: ما فيه أمل أتزوج زي كل البنات،، أكشخ و أركد و أطلع، و أنا مطمئنة بأن اسم عايلتي و أصلي و فصلي..و شهادتي وجمالي كافي بأن أي شاب محترم يتقدم لي.. مو لازم بموصفات راكان بس لا يكون بموصفات راشد!
عرفت..لازم أدبر لي وسائل تخلي إلي يخطبني يفكر في ريم مو في بنت محمد العليا..
أول شيء لازم أطورنفسي في كل شيء بحيث أني أكون مميزة و أخلي أي وحدة تتمنى أكون من نصيب ولدها و لا أخوها..
الشيء الثاني هالعايلة إلي حقرتني و خلتني نكتتها (كيف أن المليونير ما رضي بولده العاطل لبنت الفاشل الجامعية و أحلى بنات العايلة -إلي ما بعد تزوجوا - ) تعرف من أنا و يجي البوم إلي يتباهون فيني عند الناس بأني د. ريم، مثل ما يتباهون ببنات أنسباهم! و أنا ما كأني من العايلة.. حتى جلسة الاستقبال أحس بأنهم ما يبوني فيها..كأني ما أشرفهم!
بس كيف؟
لقيت الجواب من بكرة..
.............................
(2)
خلصت محاظرة عرب103 و رحت بسرعة لمبنى 15 أشوف أسماء المقبولات في التربية الخاصة..كانت معلقة قدام مكتب المعيدات..و اسمي أول اسم! لزقت خشمي بالقزاز أبغى أتأكد هو اسمي نزل و لا بدت تجينّي نوبات هلوسة و ضلالات..
طلع فعلاً اسمي موجود و أول واحد يا عالم..
سألوني البنات إلي كانوا معي في المقابلة: لقيتِ اسمك؟
قلت: أيه..أول اسم.
قالت بنت: تدرين ما قبلوا أحد من إلي دخل بعدك..
قلت: لا مو معقولة..على أقل وحدة و لا ثنتين..
قالت: أيه وحدة ولا ثنتين ! كل البنات ما قبلوهم..أنتِ معك واسطة؟
قلت: لا..
تذكرت كلام البنت يوم المقابلة إلي قالت لي: "إذا كنتِ مميزة رح يقبلونك.."
قلت في نفسي: "الله يخليكم يا إيمان و يا إنعام و الله اسمايكم تشرح الصدر"..
حلفت" و الله لخيكم تتباهون بأنكم من اختارني.. علشان أدخل القسم يوم من الأيام"
كان الحلف مو لهم بقدر ما هو لي.. كنت أصمم على هدف بأني أكون مميزة لدرجة إلي يتباهى الاساتذة فيني..
مشيت بكل عقل في الممر.. إلين وصلت ممر المحاسبة.. فرقصت من الفرحة.. و أنا أقول بصوت عالي:yes ..Yes...yow do it sweaty...Yow do it.) )
طلعت استاذة من مكتب و شافتني! أنحرجت و رحت بسرعة للاسنسير..
تحت لقيت إعلان طالبين بنات مشاركات في اليوم المفتوح سجلت اسمي ..و بسرعة رحت لمحاظرة مدخل لعلم النفس لأنها عند د.نعمت و ما عندي استعداد أتأخر عن محاظرتها..
و في المحاظرة مثل العادة قامت تعطي أمثلة و تقول: "لو جتك وحدة و قالت لك؛: بأنها لقت بنت تاركة شنطتها تحجز طاولة..فتحتها و خذت منها جوال و لا نظارة شمسية.. وش بتقولين لها؟"
قاموا البنات يقولون: "حرام عليك.."
"ترى ما يجوز"
"محتاجة؟ أعطيك.. بس لا تسرقين"
و نعمت ما عندها غير: "لا.. لا "
فقلت: ليش؟ بأسئلها ليش؟
قالت: صح عليك..بنات.. كل الناس فاهمين الحلال و الحرام..لكن المشاكل و الاضطرابات و الأمراض النفسية تخلي الناس يتصرفون بشكل ما يرضي مبادءهم و أخلاقياتهم.. و يصير صراع بين الأنا العليا و الهو( الأنا الدنيا).. و هذا إلي يؤدي للشعور بالذنب و القلق.. و الكثير الكثير من المشاكل..فأنتم -يا أخصائيات المستقبل- أنتبهوا لا تحاكمون الناس و لا تخلون قيمكم الشخصية تأثر على عملكم..لأنهم ما قالوا لكم إلي يسونه..إلا علشانهم أصلاً مو راضين عن سلوكياتهم و مشاعرهم و أفكارهم..و يبونكم تساعدهم حتى يتخلصون منها.
و كانت كل المحاظرة على هالشكل..أنا العليا و الأنا و الهو.. و فرويد مثقل دمه كالعادة.. و أمثلة ما تخلص..
و ما أدري وش قلت إلا
علقت د. نعمت: الظاهر يا ريم بتصيرين زميلتي بعد كم سنة.
فقلت: اللهم آمين..
أبتسمت..و كملت المحاضرة..
و أنا قلت في نفسي: "الحمد لله..بأطلع من هالقسم بسمعة تشرف.. هذي د. نعمت إلي كانت وكيلة القسم.. و إلي ضيعوا علينا محاظراتنا بعد سالفة حادثة العملية الإرهابية في القصيم عند مدرسة الابتدائي طلبوها للجنة لكشف عليهم..و إلي عاله قلوبنا بالمصطلحات..يعني الكلمة منها ما تطلع إلا وازنتها.."
ما أنكر أن حلمي الزواج و الكوشة و الجهاز..بدء يصير حـــلـــم مخـــيـف.. ما أدري بيتحقق و لا لا ..ما أدري أي واحد بتزوجه كيف بتكون شخصيته و كيف بيعاملني و كيف و كيف...لكني قررت أنسى كل شيء و أركز على دراستي و مستقبلي..
و أنا أظن بأني لما بأتزوج.. بأتزوج واحد ما أعرفه و لا يعرفني..بس سبحان الله يكون القدر هو إلي جمعنا..
و إلي قال عني هالأيام بنت الفاشل بأخليه يقول عني دكتورة ريم...
و كملت دراسة هذاك المستوى في علم النفس.. لأن فيه مواد مشتركة كثير بين علم النفس و التربية الخاصة.. فقلت أخلصها علشان أتخرج مع بنات دفعتي.. و علشان ما أخسر المكافأة الجامعية هذا المستوى و الإجازة..
و في ليلة اختبار صحة نفسية كنت جالسة على الأرض.. و حوليني ملازمي و أوراقي.. و صوتي واصل آخر البيت:
لابد من توافر السمات التالية ليكون الشخص متصفاً بالصحة النفسية:
1) التوافق التام بين وظائفه النفسية المختلفة.
2) قدرة الشخص على مواجهة الأزمات و الصعوبات العادية المختلفة التي يمر بها.
3) الإحساس بالرضا و السعادة و الحيوية..
التوافق التام يكون.......
فجأة فتح الباب عليّ و شفت في وجهي هاجر بنت خالتي..
"ريـــــم... ريـــــم... أمي طاحت مغمى عليها.."
قمت من مكاني و رحت معها ركض أشوف وش السالفة..كانت خالتي هتون تتشنج و حالتها فظيعة..و ما كان في البيت رجال..زوجها إلي رجعها علشان بناته عنده استلام.. و خالد ما أدري في أي مصيبة ذلف..دقيت على الأسعاف و لما جوا.. قالوا لي أروح معهم..
و في المستشفى ذبحوني.. سين و جيم وش خذت؟ وش هي ماكله؟..الخ.. و أنا ما أعرف شيء ..دقيت على بنتها هاجر و قلت لها ترسل لي اسماء الأدوية الي تتعاطاها خالـتي.
طلعت تأخذ أدوية نفســية قوية من حوالي ثلاث شهور ولا علمتنا..!!
و خذت لي تهزية محترمة من الدكتور..
خلوها عندهم تحت الملاحظة..أنا بغيت أحد يجي يأخذني علشان بكرة اختباري...و لا حياة لمن تنادي!!
دقيت على خالد قام مثل العادة يهاوش و يزاعق "و أنا وش دخلني فيك؟! وش إلي خلاك تروحين؟ و و.."
عرفت بأن الأمل معدوم في أخو الغفلة.. خصوصاً و أني قايلة له بأن عندي بكرة اختبار.. و ما يقهر خالد شيء مثل شطارتي في الدراسة.. لأنه راسب دائماً.. و دخل الجامعة قبلي بسنة.. و إلى الآن يأخذ مواد المستوى الثاني إلي حملها...و الأيام أكدت لي بأنه صار حلمه.. بأني أرسب بأي طريقة علشان ما أتخرج بمرتبة الشرف.. و أحرجه قدام الناس..فجت سالفة جلوسي في المستشفى له على طبق من ذهب..
طبعاً أبوي كان مستحيل أدق عليه لأنه بيحقق معي.. و يعرف كل السالفة.. و يفضحنا..ثمن يقول:
"ما أقدر..أبي أنوم..و أنا قايل من الأول وشو له الدراسة و التعب و المشاوير؟! حسبي الله عليك يا سعود..عز الله أنك ما سويت خير.. وش دخلك و خلاك تتوسط للبنت تدخل الجامعة؟!"
_عنده فكرة بأني ما دخلت الجامعة إلا بواسطة عمي ما أدري هل لأنه عايش على واسطات أعمامي أم لأنه عنده ظن بأني ما استاهل_
كان الحل الوحيد بأني أطلع و أوقف ليموزين الساعة أثنعش الليل..علشان أرجع البيت
و أضطريت أسويها.. و أنا جالسة فيه ميتة خوف أدعي على خالد
" حسبي الله عليك يا خالد.. و الله لو صار لي شيء لتكون أنت السبب..وش هالبيت إلي ما ينعرف رجاله من حرمته؟! صدق من القال الرجال أفعال مو أقوال"
و لما وصلت أنفتح معي التحقيق من جديد.. و لا كأن بكرة عندي اختبار و لا يحزنون..!
قلت لهم: تراها في العناية المركزة..و مانعين الزيارة..روحوا شوفوا بكرة..أنا سويت إلي علي و ما عندي شيء ثاني.
و رحت جمعت أغراضي و دخلتها الشنطة.. جاء خالد و عطاني (إلي قسم الله) من الخناق و الصراخ.. "وشو له أدق عليه و لأزم أقدر!! و أنا ما يهمني إلا نفسي..الخ"
طنشته و نمت..لأني كنت هلكانة تعب..و الصبح في الجامعة ذاكرت شوي.. فاختبار الساعة عشر و نصف و أنا أجي بالباص من الساعة ست و نص.. و الحمد لله الاختبار كان كله على مشاركاتنا داخل القاعة.. و لأن حضوري top ..ما عانيت من الإجابات.. و طلعت واثقة من إجاباتي كلها –يمكن بس فقرة وحدة شاكة فيها-
خلصت الإختبارات
و نزلت الصبح في أول يوم في الاجازة و رحت للمطبخ و لقيت خالتي هتون قايمة -لها يومين طالعة من المستفى-شافتني تغير وجهها..طشتها و فتحت باب الثلاجة و فجأة طاح طبق البيض على الرخام وتكسر كله..
قامت تصارخ: عمى ما تشوفين ..وين عيونك فيه؟! و هالنظارات وش فايدتها؟! صدق من قال الطول طول نخلة و العقل عقل صخلة..الحمد لله رب العالمين.. جعل إلي صابكم ما يصبينا..
و أنا واقفة زي Snow man-رجل الثلج- ما عرفت وش أرد..أنا ما سويت شيء غير أني فتحت باب الثلاجة..فأنفتحت علي أبواب جهنم..
قلت في نفسي "من إلي حط البيض قريب عند الباب.. و في مكان غير مستقر؟! فأكيد أنه بيطيح..و يقولون أني أنا إلي كسرته!! وبعدين هي و جهها ذي وشو إلي صابنا ما يبتليها! كله طبق بيض!.... و لا خالها إلي هاوشني لما رجعت لاختباري.. كأنها مسئولتي و لا مغطيتني بجمايلها..!"
مسحت البيض و رحت للغرفتي و ما خذت و لا موية..و المسلسل ما زال مستمر!!..
عرفت بأني ما رح أقدر أقعد في الاجازة مع هالخالة.. خناقات على بيض تكسر.. و أبريق موية على النار! دقيت على عهود صديقتي في الجامعة.. و خذت منها وصف لمعهد كومبيوتر كانت قالت لي: "تعالي أدرسي معي الرخصة الدولية لقيادة الحاسب الآلي في الإجازة " ما كان في رصيدي غير ألفين ريال.. لأني عطيت ندى خمس الالاف من مكافأتي علشان تشتري لي شال فرو ثعلب من تركيا إلي بيسافرون لها في الصيف..كنت أحلم به من زمان.. و وفرت من مكافأتي و إلين ما جبت سعره.. لأن ماريا بنت عمي فيصل قايلة لنا أن الفرو أرخص في تركيا..
كان ودي أدرس في معهد راقي.. لكن كل المعاهد الراقية ما عندها باصات.. هذا غير رسومها المرتفعة..فكرت فيها لقيت أحسن شيء.. أدرس في الصيف منها أفتك من شوفه خالتي و التمشكل معها.. و أوسع صدري مع عهود..و في نفس الوقت أتعلم و أخذ شهادة مطلوبة من كل التربويين..
مرت الإجازة حلوة و استفدت منها..دفعت رسوم الدراسة أقساط من مكافأتي و بعض من مصروفي.. كملت دراستها في بداية الدراسة مسائي و في رمضان و كانت مريحة مرة.. الموصلات من المعهد خلصتني من هم خالد و أبوي..و ما كان عندي في الجامعة غير 15ساعة..لأن مادة المقدمة في التربية الخاصة متطلب أساسي، و ما تنزل مواد التخصص إلا لما أنجح فيها.. فنزلوا لي المواد العامة.. و مواد علم النفس المطلوبة في التربية الخاصة..
طبعاً كان غيابي الصبح و المساء عن البيت مريح نفسياً لي!!لأني كنت أرجع أسمع خناقات خالتي هتون على عيالها و زوجها و أم زوجها في التليفون!.. و أنا أسلم من كل هذا!!
كان زوجها جاب لها بيت قريب في حارتنا و أثثه و قدم على فيزة خدامة و سواق علشان لما يكون عنده استلام أو تحتاج شيء..لكن خالتي كانت معترضة
تقول: يبي يحبسني في بيت..و يجيب سواق -رجال غريب- يحطه عندي..اللي ما يخاف الله! تبون تحبسوني! تبون تذبحوني!
زوجها يوم شاف تصرفاتها.. و عرف بمرضها.. و أنسرق البيت إلي استاجره..تركها على حالها..و سكن في فلة صغيرة لجارنا أبو عبدالكريم كان بانيها لولده إلي يدرس في امريكا..
دراستي سنة كاملة علم نفس و مع مواد النفس المطلوبة في التربية الخاصة زي أسس التوجية و الإرشاد النفسي..هذا غير قراءاتي المتنوعة.. و الدورات إلي أروح لها مع عهود ..هذا غير عيشتي مع خالتي هتون أربع و عشرين سنة..خلاني أعرف طبيعتها..
ما طبيعة شخصية خالتي التي تجعلها تتصرف بمثل هذه التصرفات
ما أثار مرض خالتي النفسي؟ و كيف سيؤثر على حياتها و حياتنا؟
بعد خروج راكان و كلام الناس عني بعد رفض أبوه خطبتي لراشد هل سأجد فارس أحلامي؟ أم..؟
ندى و عهود و حصة و غيرهم ما تأثيرهم على حياتي؟ و ماذا سيحدث معهن في الأيام؟
أنتظر إجابتكم على هذه الأسئلة أو
تابعوني في الفصول القادمة لأجيب على كل هذه الأسئلة و للأحداث المثيرة القادمة..
الفصل الحادي عشر: " ملك جمال السعودية"
|