[Electron]

الفصل السابع عشر:"ليلة لا تنسى"

نزلت من السيارة مرتبكة..فكرت: "كيف بأتصرف في العرس؟"
بعدين تذكرت عرس راكان، فقلت: "بأتصرف مثل عرس راكان..أساساً ما صار بينا شيء حتى أهله ما جو يشوفوني..أكيد بأن ندى كانت عارفة بأنه تكلم عليّ قبلها..و منحرجة مني..لكنها أغلي إنسانة على قلبي.. و لا حسن و لا كل رجال العالم..يخربون إلي بيننا.."
دخلت القاعة.. و و قفت قدام المرايا أرتب نفسي ..شفت شكلي في المراية و أرتفعت ثقتي بنفسي..طالعة ملكة جمال..و ما فيه أحد يتوقع بأن عمري فوق العشرين..
حطيت عباتي في الأمانات..
و دخلت زي الملكة للقاعة.. واثقة من نفسي.. و بابتسامة واسعة.. تقدمت للاستقبال أسلم و أبارك..
شفت ماجدة و زوجة عمي الوليد تغيرت وجيهم لما شافوني.. تقدموا لي يسلمون..
و لحقهم عماتي نورة و حصة و بناتهم إلي ابتسموا ثمن عبسوا.. ثمن ابتسموا.. ثمن عبسوا...ما كانوا عارفين أيش يسون ..
أما أم العريس حسن و أخواته و عماته ..فابتسموا ابتسامات واسعة..واضح بأني دخلت مزاجهم.. و صنفوني على طول من الضيوف المهمين.. وقدموا لي يسلمون.
 قلت لزوجة عمي و أنا أبوس رأسها: مبروك..
 ارتبكت و قالت: الله يبارك فيك..إلا ما شاء الله عليك..قدرتي تجين!!
 سلمت على عمتي حصة و بست رأسها و قلت: مبروك..
 قالت: كل شيء قسمة ونصيب..و لو أنك يا بنتي تسمنين شوي..!!
 سلمت على عمتي نورة بست رأسها و قلت: مبروك..
 قالت: الله يبارك فيك و يخفضك..إذا كان صدرك ضايق لا تجين!!
 سلمت على ماجدة و قلت: مبروك..
 قالت: الله يبارك فيك..ما كان له داعي تتعبين نفسك و تجين يا ريم!!
 قالت أم العريس: ريـــــــــــــــــــــــ ـم! أنتِ ريـــــــــــــــــــــم؟ !
 قلت: أيـــــــــــــه..كيف حالك يا خالة؟ مبروك..الله يوفقهم أن شاء الله..
و بست رأسها..و هي ساكتة ما هي عارفة وش تقول..و نفس الحال لبناتها إلي سلمت عليهم..أما بنات عماتي و حريم العيال فكانت أول وحدة هي ماريا بنت عمي فيصل لما
 قلت لها: مبروك.
 ردت علي وهي مرتبكة: الله يبارك فيك.
فصار كل الباقيات يقولون زيها..و الحمد لله خلصت من السلام..
و إذا كانوا ما يعرفون الذوق و الأصول فتراني أعرفه..
و مو من الأصول أني مــا أحضر عرس بنت عمي..و أخلي الناس بيتكلمون عليّ..
رحت في القاعة أسلم على كل الي أعرفهم..الحمد لله بأن العدد إلي كان عارف بالسالفة قليل..فصاروا كل الحريم يقولون لي الكلمة إلي ما قلها لي أهلي:
"وش ذا الزين يا ريم؟!"
"وين سويتي ماكياجك؟"
"عقبالك"
أما أهلي فحكموا عليّ بالعنوسة..و من الجور في الدعاء يقولون لي " عقبالك" و لو مجاملة!!
خلصت من السلام..و قعدت أدور وين أجلس فيه؟
شفت بأن كل العايلة حتى حريم العيال جالسين في الاستقبال..
و عيب أني ما أستقبل معهم في عرس بنت عمي..فرحت و جلست معهم..
و كأني ملك الموت جاثم على صدورهم!!الكل كان متضايق..و عيون أهل العريس تقطعني..
 و قالت لي ماجدة: ريم روحي ارتاحي..
طرده مودبة..طردة بنت وزير!!
أول ما شفت أن الناس كثير.. و ما أحد رح ينتبه لي قــمـــت.. ما عرفت وين أروح الحفلة في أولها و مو حلوة أقوم في لحظة عن الاستقبال و أروح أجلس.
فقلت في نفسي "خلني أروح لندى.. و أوضح لها بأني مو متضايقة.. و فرحانة لها"
رحت لغرفتها ..كنت عارفة الطريق لأن عرس ناديا كان فيه..
 و دخلت الغرفة..و أنا أنادي: "ندو.. وين عروستنا الحلوة؟"
شفت ذيل فستانها..فرحت لها
 و أنا أقول: ألــــــــــــــــــــف ألــــــــــــف مــبــروك..الله يــســـعــدك يا حــبــيــتــي..

كنت متحمسة لأني عارفة بأن ندى تــحــبــنــي و أنا أحـــبـــهـــا..و مهما صار مــــا نــقــدر نــســتــغــنــي عن بعض..
 ألتفت علي و هي مفجوعة: ريــــــــــــــــــم وش جــابــك؟!و ش تــبــيــن؟!
 جرحني أسلوبها لكن قلت: أبغى أســلــم و أبــارك على أحــلى عروس في الكــون..مبروك حياتي..الله يوفقك و...
 قاطعتني و قالت: قــولــي مــا شــاء الله.
 جرحتني مرة ثانية لكن قلت: ما شاء الله.. و لا الله إلا الله..الله يحرسك و يحميك...
 قاطعتني للمرة الثانية و جرحتني من جديد: لو سمحتي يا ريم يا ليت تطلعين أبغى أكمل ألبس..أصلاً من سمح لك تدخلين..روز..روز
ما عرفت أحافظ على ذوقي مع هالأهانات و التجريح المستمر..و أنا مو من طبعي المجاملة..
 قفلت: على العموم.. مبروك..أشوفك على خير..
طلعت
و ما أعرف كيف قدرت أسيطر على نفسي إلين ما وصلت دورات المياه- الله يكرمكم-
..دخلت الحمام و سكرت الباب و جلست على المرحاض- الله يكرمكم- و أنا أرجف زي المحموم..
كنت محمومة من احتقار الأهل..
و من إهانة بنت العم إلي كانت زي أختي..
و من تخلي الخطيب..و خطبته مباشرة لبنت عمي..
لكني ما أقدر أصيح..
ودي أصيح و أغسل بدموعي ألــمــي و قـــهـــري و آهــــــــــاتي..
لكن ما أقدر لازم أكمل المسرحية..لازم أكمل الليلة و ما أوضح لأحد بأني متضايقة أو مجروحة..
فسحبت ورق التواليت و قعدت أقطعه قهر..و أنا أشاهق أبغى أمنع دموعي من أنها تخرب ماكياجي...!!
"ياليتني ما جيت!..يا حظك يا عهود..جالسة في بيتكم تتفرجين على التلفزيون و ما شفتي إلي شفته!!
يا ليتني ما شريت الفستان و أنا محتاجة لكل قرش للتدريب..
ياليتني ما كلفت على خالد و دفعته فلوس الكوافير..
لــيــش يا أهلي ؟ لــيــش؟ لــيــش يا ندى تــعــامــلـيـني بها الشكل؟
خطيبي لما تقدم لك... ما خذتي وقت في الخطبة..و في شهرين و نصف تملكتي!! متى تكلمتوا في المهر و الشبكة و البيت؟!
يا ترى للحــظــة وحــــدة فــكـــرتــي فيني؟! يا ترى قالوا لك أنه ما جاني إلا و عمي إلي خاطبه لي؟!!و كان أخر فرصة لي..بعده العنوسة!!
و حتى لو كنتِ وصلتي الثلاثين و كنتِ أقل مني جمال.. لا ليش نجامل؟! خلينا صريحين مع بعض، ندى ما عندها أي لمحة للجمال..لا جسم و لا وجه.. و كل إلي تصرفه ما يغير من الحقيقة شيء..
جاية تقول أني بأحسدها.. من جدها ذي؟!
فجورج حبيقة سوى لها فستان فخم و حلو..لكن من الواضح بأنه كان مركز على التخفيف من سمنتها المفرطة..فسوى لها فستان على طراز الأمبير علشان يخفي بطنها..و لبسها طرحتها أكمام علشان يخفي يدينها..لكنه ما قدر يخلي جسمها حلو..
و بسام فتوح بنفسه ما قدر رغم مكياجه الدخاني..و كل فنونه..يغير من الحقيقة شيء..
لــــيـــش يا ندى لـــيـــش تسوين معي كذا؟"
..تذكرت المشهد..
"كنت خايفة لما تشوفني ندى تتضايق في شكلي في الفستان..مثل عادتها لما ألبس شيء يبرز جسمي في عزيمة كبيرة..
و هذا عرسها..كان إلي يهمني أنها تــنــبــســط..
أما هي فما فكرت فيني ثانية واحدة!!
إلا كانت ما تبيني أجي..يا ترى من قال لهم أرسلوا بطاقة لريم؟
كان يبغون بس ما أقول ليش ما عزموني؟ و لا ألحق أتجهز؟!
و لا خافوا ينحرجون قدام الناس ليش ما جت بنت محمد..؟!
لــيــش يا ندى لــيـــش؟
معقولة تخليتي عن كل اللحظات الحلوة إلي بينا؟
تبين تتزوجين؟ هــــــــــو لــــــــك.. خــــــــــــذيــــــــــ ــه.
لكن أرجوك لا تهنيني و تذلني علشانه..
و لــيــش يا أهلي لــيــش الذل و الطرد؟
تكفون يا أهــلــي أنا بــنــتــكــم..خافوا عليّ و راعوا مشاعري مثلها.. ماني مجرد البنت الفقيرة إلي تتصدقون عليها..عندي كرامة.. و عزة نفس..و لي احترامي"
طلعت من المرحاض -الله يكرمكم-
و قلت:"يا حي يا قيوم برحمتك أستغيث ربي أصلح لي شأني كله و لا تكلني لنفسي طرفة عين..
يا حي يا قيوم برحمتك أستغيث ربي أصلح لي شأني كله و لا تكلني لنفسي طرفة عين..
يا حي يا قيوم برحمتك أستغيث ربي أصلح لي شأني كله و لا تكلني لنفسي طرفة عين.."
وقفت قدام المغاسل أرتب ماكياجي..فجت ورأي العنود..
 قالت: ريــــم..وينك فيه؟ ندورك؟
ناظرها بقهر"هذي وش تبي؟ مو كفاية الأهانات إلي نازلة عليّ من يوم ما جيت"
 فلت: في الحمام- الله يكرمك-
 قالت: طيب تعالي خلينا نجلس.
قلت في نفسي: " ليش تخافون مني أدخل عليها من جديد؟! ..جايبن لي قوات حفظ السلام! "
مشيت معها
سألتها: كيف أخبار عيالك؟
 أيــــــــــــــــــــش؟!
 أخـــــبار بنتك؟ عساها بخير.
 الحمد لله.
سكتت..
أفضل شيء أني أسكت..و إذا حابين يحققون معي ما عندي أي مــشــكــلــة..بس ما رح أفتح موضوع مع هالنظرات المرتابة..
صرت أتفرج على القاعة و الديكورات..كانت الكوشة زي السواتر و كلها كرستالات و ورد جوري أحمر..
و كل السقف معلق عليه ستاير حمراء طويلة.. و عليها حروف أسماء ندى و حسن..
و باقات ورد و الكريستال على كل طاولة..جلست أشرب قهوة و أكل الحلويات إلي كانت..أشكال و ألوان.. و كل شوي جاي صنف جديد..و أتفرج على الرقص..فكرت أروح مع دينا و فرح و مرح بنات عمي سعود.. نجلس على المنصة لكن
• الهنوف قالت: لا.. ما له داعي..أجلسي يا ريم تقهوي..
فقلت في نفسي: "واضح أنه واصلها تعليمات مشددة..يا لله مو فارقة معي..خلني هنا أحسن "
غنت نديبة "عزة"
و كنت أحبها.. فجلست أنددنها مع الطقاقة.. و أتفرج على رقص البنات:
(عزه يا قلب من الهم عزه..
و من يواسي دمعتي قال: خيرة..!
وشلون خيرة بعد فرقاه!
لا تقولوا خيرة ..خيبة كبيرة..
عزه يا قلب من الهم عزه..
و من يواسي دمعتي قال: خيرة..
وشلون خيرة بعد فرقا؟!
لا تقولوا خيرة خيبة كبيرة..
يالي تواسني كلامك حفضناه..
أنا أبغى منك خدمة صغيرة..)
ألتفت على البنات.. لقيت
ماجدة.. بنت عمي الوليد
نوف..بنت عمتي نورة
و الهنوف..ونجود..و العنود.. بنات عمتي حصة
و ماريا..و دينا..و ناديا.. بنات عمي فيصل
و مرح..و فرح.. بنات عمي سعود
و ريما.. زوجة راكان
و لطيفة.. زوجة ريان
و يارا.. زوجة عبد الرحمن
كلهم يطالعوني كأي مجنونة!!
سكتت و خذت لي شكولاتة باتشي..
يمكن يكون صعب على البنت أنها تحضر حفل زواج خطيبها..
لكن كيف لما يكون مأخذ أعز إنسانة على قلبها..
و تهينها في العرس..
و كل أهلها يذلونها ..
و يحطون عليها مراقبين و حرس..
لدرجة أنها ما تقدر تدندن بأغنية من دون ما يشكون فيها..!
كيف رح يكون شعورها؟!
و هي في ليلة وحدة فقدت الخطيب.. و الأهل... و أعز إنسانة على قلبها..
و تمثل قدام الناس السعادة و الفرح علشانهم...
علشان ناس تخلوا عنها.. جرحوها..و أهانوها..
شعور فــــضـــيــع.. عارفة لو فكرت فيه ما رح أقدر أكمل المسرحية علشان كذا تجاهلته..
 و قلت لدنيا: كيف أخبار الجامعة؟
 دينا: هه...ok ...زينة.
 قلت: عندك هالأيام اختبارات؟
 دينا: هه..لا.
واضح بأن البنت خايفة مني..و ما أدري وش تظنني؟ الله يعيني على هالليلة..
جت وحدة عند طاولتنا و قالت : ريم.
 ألتفت عليها و قلت: ســـــوزان..
 قمت و سلمت عليها و عرفتها على لجنة المراقبة: هذي صديقتي أيام الثانوي سوزان ال.......... هاه وش أخبارك؟ عاش من شافك..و لا تدقين و لا تقولين لي صديقة..
 أنت بعد ما عاد دقتي..أنا على الأقل طب ولي عذري..أنتِ إلي ما عاد دقيتي..
 و ربي مشتاقة لك موت..تعالي علميني أخبارك...كيف أخبار الجامعة؟ و بنات الثانوي؟ تكلمينهم؟
و سحبتها من يدها و رحنا لكراسي بعيدة شوي..كنت أبغى أطلع من جو العانس المجروحة إلي جالسين أهلي يحسسوني به..لجو بنت عادية رايحة لعرس في الفورسيزن و شافت صديقتها..
 جلست مع سوزان و قالت لي: هالحين تقربين للعروس؟
 أيه بنت عمي..
 عمك أخو أبوك؟ و لا من بعيد؟
 لا عمي أخو أبوي..تذكرين يوم البنات يسألوني في الثانوي عنه.. يوم صار وزير؟
 أيه أذكر..عسى العروس تشبهك؟
 ليش؟
 لان العريس كان معذب أهله..يبغى وحدة في مواصفاتك..نحيفة وأنيقة و حلوة و ناعمة..
جلست أفكر في ندى" لا هي نحيفة و لا حلوة أما النعومة و الأناقة فيها نظر..لكن سبحان الله لما يجي الجد تتغير الشروط.."
 سألت: وش دراك عنه؟.. يقرب لك؟
 لا بس زوجة أخوي صديقة أخته من زمان.. و كانت تكلمها بأنهم يدورون له عروس..
 لا و الله.. حلو أجل أني شفتك..
 أيه ..أول ما وصلت بطاقة لزوجة أخوي نشبت فيها أبغى أجي أشوف عرس الفورسيزن ..و يعني ممكن أشوفك..و جابت لي بطاقة ..
 وش أخبار الدراسة؟
 آآآآه..يا ريم وش أقولك؟! متعبة بالحيل..أحس أن الطب صار كل حياتي..ودي أصير مثل باقي البنات و أقدر أستانس و أنبسط..لكن يا لله الحمد لله على كل حال..
تركت سوزان تتكلم عن سواليف الطب و الدراسة..و أنا أضغط على أعصابي..ما كانت نفسيتي تسمح لي بالكلام كثير.. لأني حاسة في أي لحظة بأصيح و أفجر كل البراكين إلي تــحـــرق قــلــبــي و تــشـــويــه شـــوي..
حمدت ربي بأن غزيل و أخواتي تهاني و أفراح ما جو.. كان شمتت فيني..لأنه مستحيل على أسلوب المعاملة هذا ما تنتبه..الحمد لله أنهم راحوا لعرس عند أخوالهم..
أصلاً غزيل ما تهتم بمناسباتنا و لا عمرها وقفت في استقبال أحد من عيالنا..
جت عمتي نورة تشوف وش قاعدة أسوي مع سوزان..
كانت سوزان تتكلم عن قصة صارت لها في المستشفى و مندمجة في السواليف:
 "...كنا جالسين في الطوارئ.. و كان الدكتور يحاول يسوي إنعاش قلبي لمريض كبير في السن..لكن ما نفع.. و عرف بأنه مات فرفع الأجهزة عنه..و سكر عيونه..فشهقت و قلت: "مـــــــــــــــات.."ما كنت أدري بأن ولده كان جالس على الكرسي جنبي و سمعني..فقام يصارخ عليّ" لا تقولين مــات،،أبوي ما مــات،،أنتِ ما تفهمين.." و بعدين...
 قاطعت كلامها عمتي نورة: إلا يا ريم..ما عرفتينا على إلي معك..
 قمت واقفة احتراماً و قلت: هلا عمتي..هذي سوزان ال .......... صديقتي أيام الثانوي..
 قالت: حياك الله يا بنتي..إلا يا ريم وراء ما ترقصين؟ فشلتونا قدام الناس..
وراء ما أرقص؟!
من لها نفس ترقص في عرس خطيبها على بنت عمتها إلي أهانتها و طردتها..!!
أرقص زي الطيور المجروحة..؟!أرقص ألم و قهر و خيبة..؟!
هي الميتة تقدر ترقص؟! أنا مــات قلبي و فرحتي و أحلامي..و كل المشاعر فينيّ..مــــاتت...
أرقص علشان ما أحد يتكلم عليّ..و لا علشان ما أفشل أهلي قدام الناس؟
طلب صعب.. لكني قــدها و قدود ..
ما عاش من يتكلم عني ربع كلمة..و بأرقص في عرسك يا ندى و أنت يا حسن..
و ما رح أسمح لأحد يقول بأني زعلانة مجرد زعل على أي شيء سويتوه فيني..
و لا تخافون يا أهلي..بنت الموظف البسيط المرمية في قصر الغدر ما رح تخرب عرس بنت الوزير..
أنا عارفة حجمي كويس..و ما يحتاج أحد يقولي..
بدو يغنون
كل العليا كلهم لا فرق الله شملهم..
و يا زين الوليد بينهم..
و فيصل لا تخلونه..
و كل العليا خيالة عليهم رزة الراية..
و سعود لا تخلونه..
رقصت و تدللت و أنا حاسة بأقسى مشاعر النبذ و أني ما أسوى..من عظم الإهانة ما غنوا في أبوي..!!مع أنه طول عمرهم يغنون فيه على الأقل قدام الناس..
يمكن نست الطقاقة و لا ماجدة نسيت تقول لها ..<<الله يبارك في العقل الباطن..الشيء ما نحبه ينسينا أياه..
حسيت بأني دخيلة في العايلة فلا أنا بنت العليا و لا أسوي عندهم شيء..إنا بنت العلة إلي وارطين به و بمشاكله..
أنا العانس إلا ما بغاها أحد غير واحد على نسبه علامات استفهام بعد ما خطبه عمي لي.. و لا ما بغاني و راح لبنت عمي الوزير إلي تشرفه و ترفع اسمه..
بدءوا يطفون أنوار القاعة..استعداد للزفة..و قبل ما تنزف ندى طلعت إليسا..و كل القاعة تزاعق
"وااااااااااااووووووووو� � إليـــــــــسا إليـــــــــــــسا"
فرجعت لكرسيي
و طلعت ندى على شريط زفة مغنيته إليسا بفرقة كاملة..لكني ما قدرت أسمع و لا كلمة منه..
أول ما شفت ندى تذكرت موقفها معي الليلة.. و تذكرت بأنها بتروح لجـــنـــاح العـــرســــان مع حسن..
حسن إلي جلست ترم كامل أحلم به..
حسن إلي شغلي عقلي و قلبي.. ثمن تركني بدون تبرير.. و راح في ساعتها لبنت عمي..
حسن إلي رغم عيوبه لكن ما جاني إلا لما نزلني عمي له..
حسن إلي جرح أنوثتي ..و رماني بعد ما تنازلت عن شروطي و أحلامي علشان أتزوجه..
و رضيت فيه و بنسبه إلي عليه كلام..و رضيت أعرض عيالي لمعاناة تقليل من أصلهم..
حـــســن إلي راح لـــنـــدى
ندى أعز مخلوقة على قلبي.. أهانتي و طردتني و حرمتني من الفرحة في ليلة عرسها..
ندى خذت خطيبي و لا فكرت لحظة في مشاعري..
ندى إلي كنت أعرف بأنها تغار مني لكني كنت أتجاهل غيرتها..لأنها كانت تسيطر عليها..
يا ترى هالحين خلاص تــخــلــصــت من غيرتها بعد ما خـــــــــلــصــت على أحلامي؟!
و خلتني عانس..و خلت جمالي يسرقه الهم و الألم..بدل ما ينبسط به أي زوج..أي رجل..يأخذ تصريح باستمتاع بجمالي و نعومتي بعقد زواج شرعي و قدام الناس..
لأني لا يمكن أن أسمح لأي رجل بأنه ينبسط بشوفه وجهي لو ما عقد علي..حتى لو مت أو صرت عانس عجوز و كلي تجاعيد..ما رح أتنازل عن أخلاقياتي..
ويروح كل رجال الدنيا في ستين داهية..
ناظرت حوليني لقيت كل البنات يطالعون فيني..بغيت أسوي نفسي الموضوع مو هامني ..خذت شكولاتة باتشي ..
ثمن يوم حسيت بأن الأنظار صارت مسروقة لي.. خذت شكولاتة و حطيتها في شنطتي!
مو رغبة فيها... لكن قدامهم أني أسرق حلاو.. و لا أني متهتمة من زواج ندى لحسن..

بعد ما خلصت الزفة و جلست ندى على الكوشة غنت إليسا الأغنية الأولى..
و لا رقص أحد حسب العادات و التقاليد فكنت مخططة بأني أرقص على الأغنية الثانية..مع بنات أعمامي
كانت:
((بستناك))
قامت نوف و دينا و مرح و فرح و نجود..
و زي ما أكون ممثلة محترفة..
مثلت الفرح و قلبي عامر بالحزن..
مثلت الانسجام و أنا فقدت كل شيء ممتع في حياتي ..
مثلت السعادة إلي ما عاد صرت أعرف أسمها..
رقصت بكل مواهبي.. و تدلعت قدام مرح و فرح..و تظاهرت بالاستمتاع باللحن و الكلمات و دندنت الأغنية..و أنا كنت حاسة الأغنية تقص قصتي
((ليه، أسمع كلام و أحلم معاه و أتشد ليه..؟
فجأة الغرام يطلع كلام عشمني بيه..
و مين عارف أكيد قابل غرام ثاني..و أيه تاني الهوى مخبيه..؟
ليه برضى بعذاب قلبي أللي داب من عشقي ليه..؟
أيام جميلة فعمرنا و هانت عليه..
حرام ينسى إللي كان بينا و ينساني و أنا و بس أللي فكر فيه...
بستناك و بتمنى أعيش العمر كلو حبيبي معاك..
و مش عارفة لأمتى الشوق يخلي هواك يتمناك..
مش نسياك و في بعادك ليالي حلمت أني بعيش وياك..
نسيت كل إللي بينا إزاي و بعت هوايا و بعت هواك..))
وقفت الأغنية فألتفت على ندى في كوشة و شفت وجهها متغير..حسيت بأنها كانت تظن بأني أرسل لها كلمات الأغنية إهداء..و أذكرها بأني كنت في مقام خطيبة لعريسها..
في لحظة قررت أنــتــقــم..
لليلة إلي عيشتني فيها.. و الأيام الجاية إلي بأعيشها..
فطالعتها بكل ثقة.. و دندنت بكلمات الأغنية إلي بدت.. و رقصت رقصة الانتقام..وحيدة..من دون أحد.. قدام كل الناس..
((طلوب تمني تصير جنوني بتصيربلمح البصر..
لو بدك تسهر بعيوني منسهر تيغفى السهر..
لو بدك تغفى بكير بسهر عينني نواطير..
بكلف غيمة حتى تصير تتوصلك ضوء القمر..
طلوب تمني تصير البسمة البيني و بينك بسمة حــــــب..
تطلع فيي و قول الكلمة اللي فيها عــشـــق و دقة قلب..
لو بدك تغفى بكير بسهر عينني نواطير..
بكلف غيمة حتى تصير تتوصلك ضوء القمر..
طلوب تمنى العمر الباقي يصير بقربك أحلى عمر..
من لهفة قلبي و شوقي طلوب تمنى بتـأمر أمر..
لو بدك تغفى بكير بسهر عينني نواطير..
بكلف غيمة حتى تصير تتوصلك ضوء القمر..))
و لما وقفت الموسيقى كان قلبي واقف معها..من الضغط النفسي إلي عايشته..ناظرت ندى و قلت لها في نفسي:" هذي لك يا ندى..هذي هديتي لك" و رحت أسلم عليها ..
 و قلت: مبروك..
 قالت بتوتر: الله يبارك فيك..
قلت في نفسي "متأكدة؟!"
و نزلت ...كانت أعصابي تلفانة و ماني قادرة أستحمل.. تركتهم كلهم و رحت لدورة المياه_الله يكرمكم_
سكرت علي باب المرحاض و جلست أرجف أحاول أتماسك نفسي..ما عاد فيه دموع و آهات..لكن الألم صار شريك حياتي..
• دق علي خالد يقول: ما خلصتِ..تراني خالص و أبغى أروح أنام..
• قالت: يا لله أنا طالعة هالحين..
طلعت و رحت أخذ عبايتي على طول..و ما سلمت على أحد..ما عاد عندي قدرة على تحمل سلامهم الجارح..
مريت من دفتر ذكريات ندى..و شفت صورتين وحدة لها و وحدة لحسن..
كان وسيم بس شكله نحيف و علشان كذا ما طلعته في الصورة معها حتى ما يقولون الناس عنهم "لوريل و هاري"مثل ما كانوا يقولون عنا..
حسيت بأن ندى استبدلتني بلوريل ثاني..
كملت المشهد الأخير في مسرحية الليلة و كتبت في دفتر الذكريات:
" ألف مبروك يا أحلى عرسان..أتمنى لكم أيـــــــــــــام حــــــــــلـــــــــــوة زيــــــــــكم..
و أفــــرح فــيــكــم الــيـــوم و دوم..
بنت عمك ريم بنت محمد العليا"
و طلعت...
سمعتهم ينادون للعشاء..لكني مــيـــتـــة ما أقدر أحب..
و ما أقدر أصيح..
ما أقدر أجوع..
أنــــا شــبــح إنــســـان.. خذوا مني كل شيء..خذته من كانت روحي:
"نـــــدى"
 ماذا بعد؟ ما أخر الألم و الحرمان و القهر؟
 ندى و حسن هل سيكونون سعداء؟ أم...
 و أنا ماذا سيحدث لي؟
أنتظر إجابتكم على هذه الأسئلة أو
تابعوني في الفصول القادمة لأجيب على كل هذه الأسئلة و للأحداث المثيرة القادمة