["جوري"]

عُمر يراقب رائد بصصمت واستغراب مافكر يجادله او يطلب النقاش !
انا اللي بعالج غروركم ونفاقكم انت واخوك
ماطافته سياره رائد المعروفه اقل سعر لها " مليون وخمس مئه
ألف رريال "
عُمر وتفكيره يقبت له الحقيقه المُره
" لو طلبتهم اي مبلغ بيجيبونه مو صعب عليه
الصعب لنا بس احنا اصحاب التواضع والهدوء
اصحاب النفوس الطيبه
اصحاب التقوى والخوف من الله اصحاب الرحمه والشفقه اصحاب الجيل الراحل
احنا بس اللي يصعب
علينا شيء بالدنيا
لاننا ماننافق ولانفضل حياة الدنيا على الاخره
ماشربنا الكحول
ولا سلكنا طريق الحرام
ولا اكلنا مال الربا
ولا قبلنا بالواسطه حل لامورنا لانها حرام وماتجوز ماقتلنا احد
ولا تعدينا على حقوق الناس بالباطل حتى الخواطر نجبر
مانكسر .
عرفنا الدنيا انها زائله فانيه حالها كعلبه عطر نغتر بريحتها
الحلوه جاهلين انها ممكن تسبب حساسيه لنا او تنكسر وتأذينا
او مخلوط فيها شر وحسد
الله لنا ي اهل القلوب النظيفه لا مالكم ولا جاهكم بيقلل من قدر ابوي عندي وان سامحتكم فهو لشيء في نفسي انا اعرفه ما اجهله "
رجع للرجال بخطوات بطيئه
والارق والتعب تتلون
وترتسم بملامحه .


بعد ماخرج رائد من العزاء
رجع للفندق يكمل نومتـه
اللي بسببها فوت الدفن
لكن مع هذا بينام للمغرب ثم يطلع يزور رامز ويشوف الحل المناسب لـه .


عند رامز وريتـان ..
'
انكتمت انفاسها وهي تشوف
امامها شخص مغاير ومختلف عن
اللي تخيلته
شاب طويل بجسم ضخم
يتضح عليه الذهاب للنوادي الرياضيه
شعره ناعم طويل لاخر رقبته
لابس جنز اسود وتيشيرت عنابي
مفتوحه اول ثلاث ازرار
رمشت بلا وعي معقوله ذا يشرب ! ذا يأذي
نفسه ويمشي بالحرام ؟؟
هذا ذاته قاتل ابوي ؟!!
عجز عقلها عن التصديق ملامحه طفوليه وبريئه
ملامحها مفزوعه منها او مندهشه عجزت تعرف
تكلم للشرطي بثقه وكأنه يطلب كوب كوفي : لو سمحت ابي اجلس معها
بإنفراد
الشرطي هز راسه بالرفض : لا
ريتان التفتت له : دقائق بس لاجل افهم اللي صار ؟
الشرطي وقف : بطلع اجيب سجل من الغرفه اللي جنبي وراجع دقيقه بس..
طلع ورامز جلس بسرعه مقابل
ريتان لتصرخ بحده : خير ؟ وش تبي ! ليش قتلت ابوي ! ابي افهم ليش ؟؟
رامز بهدوء : ابوك ترك لي وصيه
ريتان بصدمه ؛ وصيـه !
رامز بهدوء : وصاني اقول لولده عُمر ينتبه لاخواته وامه و وصاني اتزوج بنته الكبيره
واستر عليها
ريتان شهقت بقوه
لتردف بلا تصديق : كككذااااب
كذذذذاااااب
رامز بضحكة : وكيف عرفت اسم عُمر ! اخوك صح ؟؟
ريتان دمعت عيونها بقهر ..

رامز بملامح خاليه من اي تعبير : هذي الوصيه وقلتها لك وانتي بكيفك
ريتان وقفت بسرعه وهي تتنفس بضيق : كذاب انت كذاب ولا بنسامح ولا نتنازل مايهمنا غير راسك
رامز ببحه وابتسامه : فداك رامز وراسه وقلبـه
ريتان طلعت بسرعه من المكتب وقابلها الشرطي عند الباب وهو مستغرب شفيها ؟؟


___



الشرطي دخل عند رامز وبتساؤل : شصار !!
رامز : مدري الظاهر ماتحملت تشوفني
الشرطي بنص عين : لا ي شيخ ؟
رامز وقف وابتسم : بالاذن
طلع من عنده واخذه الضابط للزنزانه .


عند ريتان ..
'
ركبت مع السائق وهي ترجف : البيت
تحرك راجع لبيتهم وهو مستغرب
" وش مودي بنت بهالعمر
للسجون ! ومراكز الشرطه !؟ "
مو اول وحده تمر عليه ويستغرب حالها
هو انسان يلاحظ ويفهم
ويتسأل وقد يعجب ايضاً
بعد ربع ساعه وقف عند البيت
لتسأله وصوتها تتشكل فيه نبره مختلفه : كم الحساب !
رد بهدوء ؛ ٧٠ ريال للروحه
والرجعه
دفعتها ونزلت بسرعه
دخلت للحوش ثم للعماره وهي تركض طلعت لشقتهم
ودخلت كانت رُبى وروز يرتبون المكان
ووجيههم متورمه من البكاء
عقدت حواجبها : ليش ترتبون !
رُبى ببحه : الناس يجون ويروحون والبيت تخرب ضروري نرتب
روز بتنهيده : ي ليت لو يجون بدون اطفال ارحم بكثير
ريتان همست : الله يعين
تجاوزتهم متجهه للغرفه
لكن وقفها صوت رُبى : وين كنتي !
ريتان التفتت لها وبحده :مالك دخل لاتسألين هالسؤال مره ثانيه
رُبى صدت عنها بلامبالاه وريتان دخلت للغرفه ورمت عبايتها ع الارض وركضت للسرير وتغطت بسرعه ياليت الشرطي
ماسمح لي اشوفه ورحم حالي
ياليته ماسمح ورفض بحكم الشروط اللي جايه انا بدونها
بكت وصوتها ينكتم
بالوساده للحظات ويرتفع لتارة اخرى ببكاء حاد وموجع .


عند الرجال ..

خرج المعزين وفضى المكان
عُمر بهمس: بدر كم الساعه لاهنت !
بدر : ٢ ونص
عُمر بتعب : بطلع انام شوي
اذا اذن العصر رجعت إن شاء الله احس بتعب
بدر : زين تطمن ي اخوك روح ارتاح ....


٦:٤٠ مسـاء ..

صحى عُمر وهو مستغرب ليش الغرفه ظلام ! نام ونور الشمس يوضح من وراء الستاره
فتح جواله وشاف الساعه
شهق بقـوه : ابوك ي الولد كيف مر هالوقت وماصحوني ؟!
انتبه لوجود رساله من خالد فتحها وابتسم من بين حزنه وكربتـه " مساء الطماطم تحبني والا نتلاطم ! "
رد عليه : وينك ؟
تأخر خالد بالرد
وقف عُمر واتجه للمغسله يغسل ويتوضأ ويصلي اللي طافه ..


في القصيم ..


عند خـالد ،
وقف في سوبر ماركت ونزل ياخذ اكل يسليه بالطريق اللي طال عليـه
ركب سيارته واخذ جواله
اتصل على عُمر ولارد
عقد حواجبه : معقوله عرف اني طلعت من الرياض ؟
نزل جواله جنبه وشغل سيارته وحرك باقي خمسه كيلو وادخل
لـ حائل بعدها انام هناك وبكره اكمل الطريق
بدأ يحسب المسافه تكلفه ١٣ ساعه او اكثر بنص ساعه او ساعه إلا
القصيم ثم حائل بعدها
الشملي ثم الجهراء وبينها ٣٠٠ كم
ومن الجهراء لتبوك ٤٣٠ كم
تقريباً يعني لو امشي الفجر
اوصل المغرب تقريباً ومع ساهر والكلام الفاضي على صلاه العشاء
اكون في تبوك
الله يعين ويسر الدرب .


____


في الرياض ..


دخلت المول بخطوات هادئه
اخذت لها عصير بس وهي بخاطرها تغير الطلب عن دائم
عشان مايسوي نفسه فاهم
عقدت حواجبها وهي تشوف مكانه شخص ثاني
قربت له وحطت العصير قدامه
بدأ يطلع الفاتوره
في وقت تكلمت بحيره :
انت جديد هنا ؟
عقد حواجبه : لا
تكلمت بفضول : وين اللي
دائم هنا ؟؟ هذا مكانه
رد عليها بلا مبالاه
وهو يعرف انها اللي تشتري دائم من عند خالد لانها كاشفه :
خويي اللي هنا عنده ظرف ومارح يداوم هاليومين
تجمدت ملامحها من
كلمتـهه وبهمس : ليه !
رفع راسه بشك : وش تبين فيه ؟
ختام بصدق : ابي اعرف وينه !
رد عليها بـ تنهيده وغضب مكتوم : اسمعي ي خيه خالد ظروفه صعبه واهله ماعندهم غيره
كفو وابيض وجهه وعون وسند للقريب والبعيد
لا تجين حوله ولا تقربين منه الولد مو ناقص مشاكل لا تكونين سبب في قطع رزقه
هو مو مثل ماتتصورين وفارس احلامك ترى حتى سياره ماعنده ماخذ سيارتي عشان يروح
يقضي شغله
ماعنده اي امكانيه يوقف
مقابل شيء من اللي تملكينه ..
ختام ببحه وعيونها دمعت :
ووش اللي املك ! ممكن ماعندي شيء كيف تحكم علي وانت ماتعرفني ؟
ابتسم بسخريه : الشنطه لوحدها ممكن تكلف ٢٠٠٠ ريال بس
زيدي عليها شنطه ثانيه تصير اربعه الاف هذا هو راتب خالد ابعدي عنه تكفين لا تنكبينه
صدت عنه وطلعت بسرعه
تاركة العصير والحساب
لهدرجه انا مكشوفه !
ركبت السياره واشرت للسائق : البيت

تحرك للبيت وقلب ختام
ينبض بقوه وبشكل مُريب
اسمه خالد !!
سبحان الله حتى يوم قلبي فز ودق ماحب الا واحد اسمه خالد
اسم اخوي وحبيبي
الحمدلله الحمدلله
ممكن يكون العوض
فقدت خالد اخوي قبل شهرين و إن شاء الله هذا يبقى لي
عُمر
ابتسمت بقوه
يقول اني بسبب له مشاكل مستحيل اسوي شيء انا اعرف انه يأذيه هذا العوض لي في
دنيتي
سكنت افكارها لثواني طويله وهي تتذكر كلمه صديق خالد
" راتبه مثل قيمه شنطتين لك "
خذت نفس عميق وهي
تهمس لنفسها : انا ومالي وحلالي فداه هذا هو اللي ابي واحد طايح مفلس مامعه شيء انا بصرف عليه واراعيه
ابتسمت بأتساع بحالميه
وهي تتخيل لو يحبها !
عقدت حواجبها برفض :انا ما احبه بس معجبه فيه لكن لان اسمه زي اخوي الله يرحمه شكلي بحبه
ضحكت على تضارب افكارها
تخاف فعلاً انه مايعطيها وجهه ويطنشها مثل المره اللي قبل صدق " الهوى غلاب "
انا ختام العاقله اللي ماتسمع
الا لعقلها رضخت لقلبي
فيك ي خالد
لله دُرك ما ارق عيونك
وهمسك !
استندت براسها على الشباك
وهي تبتسم للحظات ثُم
تكشر وتعبس تاره اخرى ..


___



في تبوك ..
تحديداً مركز الشرطه
كان رائد ينتظر رامز بغرفه الشرطي والافكار تلعب براسه من بعد كلام الشرطي له ان بنت المقتول جات وتكلمت
مع رامز وخرجت بدون اي
كلمه او رد .
معقوله اقنعها بمبلغ مالي !
او ماتحملت تشوفه !
او تم العفو و عفت عنه بس رامز عقله مو معه ولا يدري عن الدنيا ؟
زفر بضيق ودخل رامز اخيراً
ووجهه متورم واضح عليه النوم
كشر رائد بقهر : اهلين صح النوم !
رامز جلس ورفع رجل على رجل : صح بدنك ، رحت للناس ؟
رائد عقد حواجبه : ايه
بس اليوم من جاء هنا ؟
رامز بضحكة : بنته
رائد وهو يتذكر البنت اللي طلعت وشافها عند الحوش !
همس لرامز : ايه وش تبي ؟
رامز بثقه : جات تسألني ليش قتلته وكمان خبرتها بوصيته
رائد بدهشه : وصيه !
وش ؟ وليش ماتقول !!
رامز بضحكة : هههههههههههه
الوصيه اني اتزوج بنته الكبيره واقول لـ عُمر ينتبه لاخواته
رائد بلع ريقه الجاف بصعوبه : كيف وصاك ؟
رامز بخبث : ما وصاني ولا قال شيء اصلاً تشهد بصعوبه وانا ماكنت
في عقلي يعني
لو وصاني ع الارض ومن عليها ما ادري عنه
رائد بصدمه : وعُمر والزواج وش تبي
من وراء كل ذا ؟
رامز بتفكير : انت لما جيت صباح قلت لي ماعند المقتول
الا ولد واحد واسمه
عُمر مانسيت اسمه وبقى في بالي واستخدمته في الوصيه الكذبيه ههههههه والزواج البنت اعجبتني دخلت
هنا
واشر بسبابته على راسه
رائد غمض بقوه من تفكير اخوه : انت مريض موب صاحي ..
وقف وطلع من عنده
الوقت اللي يضيعه بتبوك
مو لصالحه ضروري يرجع للرياض وبيتفاهم مع عُمر من هناك
لو تأخر اكثر متأكد ان كل اللي مخطط له من
سنوات بيضيع بسبب
شخص واحد مجنن العالم كله
رامــز ..


اخر الليل ..
'
المكان فضى من المعزين
ماعندهم الا خالتهم ونامت مع امهم
رُسل ورُودينا ورتيل ناموا
روز ترتب ملابس عُمر
وتجهز له بجامته عشان ينام
رُبى تسوي شاي
ريتان وعُمر بالصاله
يوم متعب وشاق
نفسياً وجسدياً عماتهم عند حضورهم حصل
كارثه من الدموع والصراخ
__
ابو ريتان ترتيبه في عائلته
هو الولد الثاني ويسبقه
اولاً ابو بدر " ماعنده الا بدر زوج رتيل "
واللي اصغر من ابو ريتان
بنتين متزوجات وحده
في ابها والثانيه في جده
'
_____ '

عُمر تنهدد واستلقى ع الكنب بتعب جواله تقفل شحنه ومافضى يشحنه
ويبي يشوف خالد وين !
مايدري رد على رسالته او لا
دخلت رُبى بالشاي وجلست
سكبت لـ عُمر : تفضل ي باشا
التفتت له بحاجبين معقوده : هاه !
ريتان ابتسمت ببطء
لو كانت بمزاج افضل كان ردت عليه وقالت هويت في بير ماله قاع
لكن المزاج سيء بعد روحتها للسجن فضلت تلتزم الصمت
وقف عُمر : تصبحون ع خير
التفت ع رُبى ؛
اشربي الشاي ي حجيه لحالك .
طلع ورُبى تتحلطم طلب تسويه بعدين سحب عليها وراح ينام
دخلت روز وضربت بكفوفها
الكنب : ابي شاي راسي صدع
ريتان وقفت : بروح انام
اذا جيتوا للغرفه عشان تنامون لاتشغلون النور
روز بتنهيده : طيب ...

____


دخلت للغرفه وشغلت الابجوره وطلعت بجامتها
ودخلت دوره المياه " اكرم القارئ "
بدلت وغسلت وجهها وخرجت وهي تمسح وجهها اخذت لوشن ووزعته براحه كفيها
ومن ثُم على وجهها
وكفوفها
وكل هذا على نور ابجوره منخفض
" غرفتهم جميله وواسعه
باللون الابيض فيها ٦ اسره بيضاء بمفارش مقلمه اسود وابيض
وخداديات ورديه جميله
الحائط المقابل للاسره
فيهه درج ملابس ضخم
يحتوي على ٦ خزائن
لكل وحده درج خاص لكن
مجمعه مع بعض . "
قفلت الابجوره اللي عند الباب واتجهت لسريرها
كان على يمينها سرير رتيل ويسارها روز
غمضت عيونها بقوه
ورجعت تفتح
ودموعها الحاره تحرق
وجهها وجفونها
تحس بزجاج مبشور تحت جفن عينها كتمت صوتها بالوساده وهي ترجف بقوه وتبكي حست بالباب ينفتح تجمدت
حركتها وهي تسمع صوت عُمر : رتيل ، ريتـان فيه احد صاحي منكم ؟
سكتت وهي تحس فيه يطلع ويقفل الباب
تنهدت بقوه وداهمها النعاس
غمضت عيونها بتعب
وارهاق ونامت ..

عُمر طلع ورجع لغرفته وهو طفشان فكر يكلمهم ويستشيرهم في موضوع رائد ويوضح لهم
انهم مايستحون ولافي وجيههم خير جاي اول يوم عزاء يعرض
فلوسه، يبي يفضفض ويخفف من اللي ع قلبـه
لكن ماحصل له احد صاحي
رُبى وروز صغار ويحس
انهم مو قد الكلام اللي بينقال
اصغر بكثير من تحمله .



بعد مرور ثلاث ايام .
'
'
امس اخر ايام العزاء وانتهى
خالد وصل ثاني يوم وماقصر ابد مع عُمر
بالدعم المعنوي او مساعدته بأي شيء يطلبه


في مجلس الرجال '
خالد مستلقي ع الكنب والـ Tv على قناه القران
عُمر مستلقي ع الارض وبجانبه كوب شاي
والافكار تعصف براسه
تكلم بهمس : خويلد
خالد جلس بسرعه
وهو مستغرب طريقته بالكلام : شفيك !
عُمر اشر له : قفل الباب وتعال اجلس هنا
وقف خالد وقفل الباب
ورجع جلس بجنبه ع الارض
وهمس له عُمر : رحت السجن واخذت رقم اخوه اسمه رائد
خالد ابتسم : ايوه !
وبعدها ؟
عُمر بضحكة : جاء ايام العزاء و واضح مايبي اخوه بريال واحد
قال بتعفو قلت لا مابي الا راس اخوك
قال زين جعلك تصمل وتثبت برأيك
خالد بدهشه : تمزح !!؟
عُمر : مايبيـه
خالد بصمت اشر للباب
وواضح عنده احد
عُمر نزل راسه للارض
وشاف رجول صغيره
تكلم بحده : رُسل انقلعي لـ ماما
ارتفعت ضحككة خالد
وماسمعوا الا صوت ركض
وشوي رجعت وهي تتكلم بخوف
من بعيد : العصير عند الباب
خالد بضحكة : ياعمري
وقف عُمر وجابه وقفل الباب
ورجع يجلس : هاه !
خالد بذمتك لو انت بدالي وش بتسوي ؟
خالد بصدق : اولاً ببيع المزرعه لاني مابقدر اشتغل فيها وابوي
انقتل فيها
عُمر : صادق هذي فكرت فيها بس الحين بتبدأ الدوامات الترم الثاني وما احد بيفضى لي
خالد : طيب من وين لك مصروف لاهلك وللشقه ؟
عُمر بتنهيده : حالياً مافيه كل شيء كان يسويه ابوي من المزرعه
لكن العمال هربوا بعد اللي صار وانا مابيدي حيله ما ابغى ادخل للمزرعه
خالد بتفكير : اسمع اعفو عن رامز واطلب مبلغ كبير يعيشكم في خير
عُمر بحده : ما ابغى فلوس لو اموت من الجوع ابي راسه
خالد غمز له : خذ الفلوس واقتله قبل يطلع من تبوك واخوه
قلت مايبيه ولا يحبه يعني مابيطلب شيء وبيعفو !
شرايك ؟؟؟
عُمر ابتسم : صح لكن لو طلب مبلغ اكبر من اللي طلبت
خالد بلا مبالاه : راعين الخير واجد ماعليك
عُمر اشر براسه : صدقت ..



____



في القسم الاخر ..
'
عند البنات ..
رتيل رتبت ملابسها : ما اقدر بدر بيزعل قال تعالي امس ورفضت لازم اروح اليوم
روز بكت : ليه ليه
ريتان دخلت وهي مصدومه : شفيكم ؟ مو اول مره تروح لزوجها
ترى بيتها وغصباً عنها تروح
رُبى ببحه : مانبي احد يروح مكان .
رُودينا : تجلس معنا تونسنا
ريتان بسخريه : روحي ي رتيل وكلميني اذا
وصلتي ابيك بشيء مهم الاطفال اللي هنا ماخلوني اقدر اكلمك فيه
روز مسحت وجهها بسرعه
وبفضول : وشو !
رُسل واقفه عند الباب : وش !
رُبى وروُدينا : قولي لنا كلنا
ريتان بضحكة : طيب اذا راحت رتيل
رتيل غمزت لها ولبست عبايتها : يلا وين عمتي
بسلم عليها قبل امشي
ريتان ابتسمت : راحت لجدتي
رتيل بلا مبالاه : زين اذا جات سلموا لي عليها عُمر خويه باقي هنا !
ريتان : ايه
رتيل : خلاص مابي ازعجه خلوه معه
ريتان فهمت انها تتهرب من عُمر
ماتبي تشوفه وهو تعبان وحالته ضعيفه ومغلوب على امره
ابتسمت لها بحنيه :
آوك ماعليك منه اصلاً من جاء صاحبه واحنا مانشوفه
رتيل ضحكت : صادقه
اخذت شنطتها الصغيره
وشالت شنطه ملابسها اللي تكفي لثلاث او اربع تغييرات فقط وطلعت بعد ماودعت البنات
__

عند بدر ..
جالس بالسياره ينتظر رتيل
ويراسل عُمر اللي يطلبه
رقم رائد
تنهد وقفل جواله وابتسم
وهو يشوفها تركب : سلام
رد بحب : وعليكم السلام ورحمة الله حيا الله رتيل ..
رتيل انكتم صوتها
وهي تحس من شافته كأنها اول مره تستقبل الخبر
شغل السياره وحرك
عقدت حواجبها : مو طريق البيت
بدر بحنيه : بنروح لعمتي طلبتني اجيبك لها انحرجت تجي
للعزاء
رتيل سكتت بلا رد " والدتها بعد طلاقها من والدها
تزوجت شخص ثاني وعندها ٤ اولاد حالياً
علاقة امها مع ام ريتان سيئه
جداً تحت مبدأ الـ " غيره "
وماتنكر رتيل انها بعد زياراتها
لوالدتها وعودتها للبيت
تعاملها ام ريتان بجفاء
واحياناً تحرض والدها عليها
" بنتك طيحت ريتان
بنتك ماتحترمني
بنتك تطول لسانها علي "
وكثير من الامور اللي ماتفهم
فيها رتيل، عمرها خمسه سنوات
عاشت عند امها سنتين
ورجعت لابوها
وابوها يضربها ويخاصمها
بلا سبب فقط لان ام ريتان تشوش راسه عليها
رتيل كبرت وبدت تفهم
وماصارت تحتك في ام ريتان
ابداً اعتمدت على نفسها
حتى في حل واجباتها واذا صعب عليها شيء او احتاجت شيء
تلجأ لولد عمها " بدر "
ابتسمت ودموعها مغرقه وجهها من ذكرياتها
التفتت لبدر وهمست ببحه : بدر
التفت لها بسرعه : عيونه
رتيل بهمس : انا دائم احبك ترى رغم كل شيء يصير
بدر مد يده لها ومسك كفها اليسار
ورفعها لشفايفه وباسها بهدوء
: احبك واحب ‏عيونك اللي كل يوم
تعطيني تفائل بالحياة يومي قبل يومك ياعيون بدر .
همست لهه بضيق : ابي نروح البيت مابي اشوف امي اليوم
بدر بأستغراب : ليش
رتيل بغصه : كذا مابي احس تعبانه
بدر تنهد وخفف السرعه ورجع لطريق بيتهم : ابشري ي تويتي
رتيل ضحكت وقربت له
باست كتفه بعمق ؛
الله لايحرمني منك ..


___



في الرياض .
٥:٢٥ مساء ..

عند رائد جالس ورافع رجوله على طاوله المكتب ويدخن ببطء وهو يتفنن فيها
انفتح الباب بسرعه
ودخل ٤ اشخاص بلا استأذان
وصوت ضحكهم عالي
عقد حواجبه وتكلم بسخريه : خير ! تبون شاي او عصير احسن ؟
رد واحد منهم وهو يجلس مقابله
: رخص لنا نطلع واطلع
معنا ي المدير غير النفسيه
رائد بلا نفس : لا مامعكم طلعه اليوم كل واحد ع شغله
قرب له الثاني وهو يغمز
ويبوس خده بقوه لدرجه كان الكرسي بيطيح :
افا ، افا ماهيب منك ي خويي رويد ي الحمار مابتسمح لنا ؟
تكلم الثالث والرابع بالوقت نفسه :
ولا تخصم من الراتب !
ضحكوا كلهم بنفس الوقت
ورائد ابتسم بخفه وماعلق
رجع الاول يتكلم : هاه نطلع ؟
رائد بنرفزه : والملفات ؟
انا اخلصها واوزع راتب مجاناً هاه ؟
الثالث ببحه : ياحبيبي انا اخلصها لك في الاستراحه اليوم ،
بناخذها ونكملها
هناك بس خلنا نلحق ندور غداء مابعد تغدينا
بيقفلون لصلاة المغرب
رائد بقله حيله : زين بس بكره تجي كامله والا مابتحصلون قطةّ الاستراحه
طلعوا بدون نقاش
وهم يمشون بخطوات سريعه لايغير رائيه
رائد تنهد بيأس منهم
وعدل جلسته
وهو يطقطق فالاب توب " مشكلة اذا اللي يشتغلون عندك هم نفسهم الشله الفاسده اللي كنت معها ايام الثانوي والجامعه ،
من الاخير مافي جديه ولا تطبيق نظام عندهم "
رن جهازه برساله من حارس البيت
(( فارس وثلاثه معه هنا )) عقد حواجبه : معقوله جايين عشان رامز ! بس هو في السجن
وقف وهو يطفي السيجاره ويكلم الحراس : المكتب لايدخله
فارس انتبهوا .
طلع من المكتب متجه
للبيت وهو محتار وش يبي فيـه .

'
'
في مكان اخر بالرياض ،

عند ختام جالسه ع سريرها ومقابلها لاب توب يعرض فيه اخر الدقائق من مسلسلها المفضل
تاكل البوب كورن وبالها
مو معها
من ثلاث ايام ماداوم !
ليش ؟ وهو يقول صاحبه
انه محتاج فلوس ليش يغيب طيب !!!! ابتسمت وفي بالها فكره سريعه افضل حل لنهايه
خوفها عليه
انتبهت للمسلسل انتهى ؛ مو مهم ارجع اتابعك وقت
ثاني اخذت جوالها واتصلت ع سواقها
؛ فوزي وينك ؟
فوزي : في مول " .. "
ختام بفرحه : طيب خلك مكانك واسمع زين
اسال عن الموظف خالد يشتغل في قسم الحلويات والشوكلت
كاشير طبعاً هو ماداوم اطلبهم رقمه وارسله لي بسرعه
فوزي باستغراب : حاضر طال عمرك
قفلت منه وهي تحس بنشوه نصر وسعاده
ضغطت الجرس تبع الخدم
وطلعت لها الشغاله : نعم !
ختام : رتبي المكان من الحوسه ذي والاب توب حطيه في المكتب
غمضت عيونها بقوه
وهي تصبر نفسها
تبيه يرسل : بسرعه بسرعه
وقفت واتجهت للتسريحه
رفعت شعرها ذيل حصان
وتركت خصل ع وجهها
ابتسمت وهي تهمس
ببطء : مممززززاا ههههههههه
ضحكت بصوت عالي
والشغاله ترتب ومستغربه
شفيها ذي ! مو عادتها ؟
طلعت من الغرفه
وختام قفلت الباب
ورجعت لسريرها جلست
ومسكت جوالها ورن برساله
شهقت بقوه غمضت لثواني وفتحت
ضغطت بأناملها النحيله
على فتح
انفتحت وظهر لها ١٠ ارقام
ابتسمت بقوه وضغطت عليها واتصلت ...

___


في تبوك ،.

طلع عُمر عند اخواته وخالد وقف وخرج من الشقه ومن العماره
كامله ركب السياره اللي استعارها من خويه في المول
ومشى يلف في تبوك
يحس انه متضايق من ضيقه عُمر
رن جواله وقطع عليه
افكاره " رقم غريب "
من ذا ؟؟ رد : هلا !
'
.......... '
عقد حواجبه : هللووو
'
........
'
قفل الخط وهو مستغرب
: من ذا اللي يبي يخلص رصيد
بس ، والله حاله
رمى جواله ع المقعد جنبه ورجع يرن
تنهد بقهر : ااووه
اخذه ورد : نعم ؟!!!
وصله صوت عُمر : وينك
خالد : اتمشى شوي ليش !
عُمر : دقيت ع رائد مارد
وش السواه !
خالد : ماعليك اتركه ممكن مشغول اذا رد تفاهمنا
عُمر : زين ارجع عشان بطلع
انا واياك
اختنقت من الضيقه ابي اطلع
خالد : ابشر خمس دقائق وانا عندك
قفل منه
وعقد حواجبه وهو يشوف رساله من الرقم اللي دق عليه قبل شوي
فتحها وبداء يقراء بتركيز : (( مرحبا استاذ خالد قبل فتره جيت وطلبت البحث
عن عمل واليوم انا اكلمك واقولك
مبروك فيه فرصه للعمل
براتب شهري ١٠ الاف ريال
فكر ورد علي .. )))
خالد عقد حواجبه :
انا ماقدمت لعمل غير الكاشير شهادتي فاشله زي وجهي الحين
يجي ذا الفرصه لعندي
بس ممكن مايقصدوني !
اسمي اسمي انذكر بالرساله
ابتسم بقوه وهو يتذكر
الراتب كم ١٠ الاف
مو قليله انا راتبي اربعه الاف
ومايبقى لي منها مصروف
الا ٢٠٠ بس وما استخدمها خوف
يمسكني ساهر ومايكون عندي حساب
الحين بيكون المصروف سته الاف
واربعه اخلص فيها امور البيت
وبجمع مبلغ واشتري سياره وتقاعد ابوي يكون لديونه وللقرض
اللي في البنك
ابتسم بقوه وهو يحس
براحه فتح جواله ورد ع الرساله
؛ بعد يومين ارد لك
وصله الرد سريع ؛ " خذ راحتك رضاك يهمنا "
صفر وهو يضحك :
رضاي يهمهم !!! وش القصه حسيت اني مهم ههههههههههه
حرك السياره واتجه لبيت
عُمر وهو مبسوط
اول مايرجع للرياض
بيعتذر من صاحب المول
ويقدم استقالته ويروح
يشتغل عند هذا صاحب
العرض " المغري "
جاهل الاحداث اللي تنتظره

'
'
عند ختام
تضحك بفرحه
وهي مصدومه كيف
رد بسرعه
صوته ! ااهـ ي صوته
كان هدير من انهار الرضا
كل الاصوات بسمعي
الا صوتـه بقلبي
ردوده ع رسائلي وموافقته
الشبه مؤكده
اثلجت صدري واسعدتني .
تنفست بعمق وهي تتمنى
لو ترجع تتصل هزت راسها بـ لاا
بيشك فيني ويتوقع
ان المقصود فيه شر او اذى مايدري ان نيتي تجاهه سليمه
وصافيـه .

:

في مكان اخر بالرياض ..

بخطوات متقاربه رتيبه
يتخطى الدرج ليدخل لداخل المنزل
قابله الحارس وهو يهمس :
حياك طال عمرك
دخل رائد بثقه وهو يحاول تحليل سبب
وجود فارس ؟
: السلام عليكم
وقف فارس : وعليكم السلام ورحمة الله
رائد بنظرات استصغار :
وش تبي جاي ! مو عادتك
فارس شاب الثامنه عشر
جلس بدون مايتقدم لمصافحه رائد : جيت ابي اعقد معك صفقه ؟
رائد عقد حواجبه : اللي هي ؟
فارس ابتسم : راس اخوك
مقابل اترك القضيه القديمه بدون ما انبش/ ابحث فيها
رائد صد عنه بدون
مايرد
فارس بتمتمه : هاه !
لا تطلب العفو ابد
اخوك سبب للكل المشاكل عش حياتك وبلاش تضيعها لاجل شخص زيـه
رائد بتفكير : وش الفائده اللي بتصير لك لو تم اعدامه !
فارس : القسم الخاص فيه يصير لي والمجموعه بتدعمني اكثر ومارح يعلى على قوتي قوه
هذا اولاً ، ثانياً لسبب شخصي تجهله ومالك صلاح تعرفه
رائد بنظرات طويله :
تدمر نفسك وتهلكها
رامز كان من افضل الاشخاص عقلياً وجسدياً وش تتوقع سبب دماره ! الطمع والرغبه في الاكثر
فارس وقف ورجع شعره ع وراء : مو مهم المهم اصرفه عني او صدقني عائلتك مهدده في
اي وقت
طلع من عنده ورائد متجمد مكانه " وش الحل ! "

___


في تبوكك ..

في غرفه البنات .. الساعه الان ١٠ ونص
روز مغمضه عيونها تحاول تنام
رُبى جالسه مع رُودينا يلعبون
التعاريف .. رُبى : التعاسه !
رُودينا : الابتعاد عن الام
رُبى : الوفاء
رُودينا : قلبين يجمعهم حلال
رُبى : الخطر !
رُودينا ؛ لاصار ماعندك مجال
رُبى : الغنى
رُودينا : بالنفس ماهو بالمال
رُبى بضحكة : مو سهله ي بنت
رُودينا ضحكت
دخلت ريتان وبحضنها رُسل نايمه : رتبوا سريرها بسرعه
روُدينا وقفت بسرعه وجهزته
قربت ريتان ونزلتها على سريرها وباست خدها :نوم العوافي ي نبض
رتون انتِ
روز بهمس : شغلي المكيف
رُبى بتأفف : شوي مو عادتكم نايمين بدري
ريتان : اللي ماتبي تنام تروح للصاله .
طلعت رُبى ورُودينا بعد ما
شغلوا المكيف
روز تغطت بمفرشها ونامت
ريتان اخذت جوالها وهي تقرأ الرسائل فيه من بعد العزاء مافتحته
جلست ع سريرها وعقدت حواجبها ارقام ماتعرفها
وكثيره بالعدد كلها تعزيها !
صدق الناس اللي يجي وقت الشده ويتذكرونك ولو برساله نعمه عظيمه ابسط شيء تحس بوقفتهم معك .
رن جوالها بأسم عُمر
المسجل بـ " my hero "
ردت : هلا عُمر
عمر : طلعت مع خالد وبتأخر مابرجع هاليومين قولي لأمي اذا صحت
ريتان بأستغراب : طيب
قفل بوجهها وهي مستغربه شفيه !!!
تذكرت لثواني الوصيه المشؤومه
انا ماعلمت احد
ماقلت لأمي ولا لـ عُمر
بكره بقول لأمي والله يعيني اكيد بتزعل لاني رحت
رمت جوالها ع الارض
جنب سريرها وافكارها توديها لحبيبها النائم " طاب منامك الطويل ورحم الله جسدك الذي امتلىء طهراً وغاب "

**

مرت يومين سريعـه
بدون مايرجع عُمر للبيت
او يروح خالد للرياض
او حتى ريتان تتجرأ وتعترف لامها بروحتها للسجن
ابطالنا على حالهم
لافرق الا بـ زياره رتيل
لوالدتها .


رنين الجرس العالي
المسبب صدى في الشقه
الصغيره كان سبب هلع
وخوف من قِبل البنات ووالدتهم
الساعه ٦ مساء
لبست ام ريتان عبايتها وقربت للباب
بربكة : من !!!
وصلها صوت معروف لها :افتحي انا ابو بدر
فتحت الباب وهي تهمس : هلا ابو بدر تفضل حياك .
دخل وهو ملامحـه تتلون بالحمره والغضب : السلام عليكم ورحمه الله
ام ريتان : وعليكم السلام ورحمة الله
ابو بدر : وين عُمر ! ولدك المحفوظ
المصون ؟
ام ريتان برهبه : مو موجود ليش عسى خير !
ابو بدر : من متى يتصرفون الصغار ويمشي كلامهم ي ام عُمر ابو رتيل ماقصر ولا عمره قلل قدركم دوم معيشكم في نعمه وخير وشو له ترخصونه بذا الطريقه
ماهمكم الا الفلوس ذبحكم الطمع وعمى عيونكم طيب علموني وبلغوني فهموا رتيل الضعيفه حالها مايسر لا مسلم ولا كافر بس تبكي ابوها وانتم تطاردون
ملذات الدنيا نعنبوا لحظه تزوجك فيها
ي الوجه الاقشر اكرميه وانتظري شهر بعد وفاتهه ثم طالبي بالمحاكم
بالفلوس والترف بس وش ارجي من وحده رابع ايام
عدتها رايحه تدوج بين البيوت مالزمت بيتها ولا قعدت فيه
المهم بلغي ورعك/ولدك
ان ماله عمّ اللي يشوف نفسه يقدر يدبر امور اكبر منه ويعفو ويصفح عن قاتل اخوي اللي مكانه وسط قلبي ولدك من الحين مايهمني ولا ابي احد مثله .
خرج وقفل الباب بعده بقوه
ام ريتان من نطق ابو بدر
زوجها بـ ابو رتيل عرفت انه معصب لانه ماسماه بواحد من عيالها
سماه ببنته الاولى مو بنتها
والشيء الثاني والاهم
عُمر وعفو وفلوس
وش يقصد !! معقوله سامحهم ؟ لا لا
مايسويها عُمر
قطع تفكيرها صوت ريتان الغاضب : وش مسوي عُمر ليش عمي
غضبان عليه ومعصب !
اللي فهمته انه سامح عن قاتل ابوي والله يمه لو طلع صدق انا اللي بنتقم
لابوي ومن عُمر
ام ريتان بحده وهي تكاد
ان تجن : بس
اخوك اكبر منك ترى مو طفل عمره بيصك الاربعه وعشرين لا تجين تحاضرين وتناظرين
انتظري ونشوف رد اخوك
ونعرف الصدق من الكذب
ابتعدت لغرفتها
والبنات مصدومات من اللي صار ليش يٰ عُمر !؟
في الرياض ..

___


في الرياض .،
قفل رائد جواله بعد ماحول من الهاتف المصرفي٥٠ الف مُقدم لانه مايقدر يحول في اليوم الواحد اكثر من كذا
سجل باقي المبلغ في شيك وارسله مع المحامي
اللي مشى لتبوك بعد
ما خبره انه تم العفو والصفح
بمقابل " الديه "
مبلغ خمسه مليون تنهد وهو يحس بشيء يثقل على صدره كيف بيخرج من البلاد
وفارس مازال يحتجز
عائلته الصغيره !
شرط فارس واضح
موت رامز
ورامز طلع يعني يروح يقتله مثلاً ؟
تنهد بعمق وهو يهمس :
يارب عونك
انفتح الباب ودخل واحد من اصحابه " والموظف عنده "
: سلام ي الشيخ
رائد ابتسم : وعليكم السلام ورحمة الله هلا فيصل
فيصل جلس مقابله ورفع رجوله ع الطاوله الصغيره : اااهه ي ظهري تعبتني الملفات والشركة
رائد بأنفعال : لا ي شيخ !!!
توك راجع من اجازه تبي وحده ثانيه ! احلمم
فيصل بخيبه : خلاص خلاص
اخذ كوب القهوه الخاص بـ رائد وشرب رشفه منه : ليش ماجيت للاستراحه امس ! فاتك فله وضحك والمصيبه نادر دقت عليه
زوجته واعطته تهزيئه واللي رد
معاذ الكلب وحطه سبيكر وكل الشباب موجودين تعال شوف بس الضحك
والطقطقه
ابتسم رائد : وانا اقول شفيه ماداوم
فيصل عقد حواجبه : وراك علم وجهك مو عاجبني قلت اسولف شوي عسى تتكلم لكن
ماينفع معك الا الطريق المستوي
رائد ببحه : ي اخوك رامز الله يهديه تعرف مشاكله
فيصل كشر وهو اكثر واحد يكره رامز خصوصاً بعد تعديه على اهله بغير وجه حق : خلاص خلاص اقطع العلم
اخوك ذا مامعه عقل بلاء وابتليت فيه الله يعينك ويعافينا مما ابتلاه
وقف وملامحه البشوشه اصبحت معبسه : استأذنك بطلع و إن شاء الله تروق وتلحقنا في الاستراحه
ترى فيه عشاء اليوم مسويه رعد بمناسبه انه رزق بمولوده وقال لي اوصل لك العزيمه حاول تحضر
رائد : بحاول
خرج فيصل ورائد فتح
الاب توب يفتح بملفات قديمه يحاول يكتشف طريقه عشان يهكرها لكن كلها تثبت ضده
بالرغم انه بريء منها .

**

عند ابو بدر ..

رجع للبيت بعد ماصلى
العشاء بالمسجد هو وبدر طلع بدر يبدل ملابسه فوق
وابو بدر جلس بالصاله
يحس بخيبه تطعن فيه
من عُمر
معقوله ! عُمر اللي كان يسوى نظر ابوه وقلبه
يرخصه وياليت لاجل اجر الاخره وبدون مقابل بس هذا سامحه للدنيا وملذاتها لاجل يظفر بفلوس زائله عدل الخداديات واستلقى ع الكنب
بتعب وضعف وغمض عيونه
وهو يردد على لسانه
ابيات كتبها في اخوه حزن وكدر
يرثيه ويبكيه :
الموت حق وبأمر رب الجلالي
ي عيني اليمنى ي ورد دنياي
ياعين كظي الدمع من فوق الاوجاني
من يوم قالوا لي توفى عضيدي
غفى وهو يبكيـه ويتمتم .


في اول ليله من فقدان اخوه
عجز يأكل وعجز ينام يغفو لثواني ويرجع يصحى وهو اشبه بحاله
الصدمه
في الليله الثانيه في كل لقمه ياكلها يحس بغصه ووجع حاول ينام لينسى
وماخدمه النوم وزاره
في الليله الثالثه اخر ايام العزاء
ماكان له الا يتذكر كل شيء سواه معه يتفقد صورهم وتمر عليه
مواقفهم وماعنده غير سؤال واحد
خليتني ي صويحبي !
في الليله الرابعه بكى حنين له وقرر يزور بناته وفاء له ويشوف نواقصهم لكن في نفس اليوم
جات رتيل مع زوجها ولده بدر ومن شافها سألها وين عمتك زوجه ابوك !
ردت : عند امها او اختها
بس مدري ماقدرت اودعها .
عرف صدق ان الحياة لعبه زوجها مات ورايحه تتمشى بين البيوت وهي في العده
كان المفروض تنتظر في بيتها واللي يبيها يجيها
في الليله الخامسه : انعزل على نفسه
وقرر يبقى لوحده بعيد عن الكل
في الليله السادسه ؛ عرف انه هذا الواقع ولازم كل الناس يموتون هذا قدر
صح مؤلم لكن قدر الله وماشاء فعل
في الليله السابعه " اليوم " : بكى اخوه
وكتب فيه مرثيه بعد ضياع حقه وعدم الاخذ بثأره ونام وقلبه
تشوه من حزنه وضيمه .


نزل بدر وانتبه لـه رجع فوق واخذ غطى ورجع يغطيه مايبي يصحى
ثم يصعب عليه النوم مره ثانيه
وهو من سته ايام ما اخذ كفايته بالنوم ...