[لامارا]

مساء الياسمين

نجمة والخلخال

ج 28

اني شكلت لو اخليكم بلبيت القديم انتي وامي
وخلي اختج وياج عادي اصرف عليكم وما اقصر
لو اخذلكم بيت بس لازم انتي تبيعبن حصتج بكيفج
بعد
وطفي الضوة اريد انام تعبان
.......
تقربت من السرير وكعدت..

كتله جاوبني. للمرة الاولى والاخيرة ليش؟
بعد المخدة عن وجهه وباوع الي
شنو ليش نجمة /

جاوب بكل صراحه ليش كل هذا سويته..

اخذ نفس وكام تربع طكطك رقبته الظاهر ناويه اطيرين من راسي هل كم كأس طيب ست نجمة اسألي واجاوبج

وقدم ايدة بحركه يلا اسمعج

نجمة/ليش ازوجتني
غزوان/بكل بساطه طمع

.....
نجمة /وليش جنت تأذيني
غزوان / والله حتى لا تعلين دائما اكسرج
جنت متمالكه اعصابي كوة...
نحمة/ محبيتني بيوم...

غزوان /لا هاي يراد الها كعدة وتصحصح كام اتقرب
ع الهدومه الموجود ع الكرسي وطلع من جيب السترة باكيت جكاير واخذ جكارة ورثها وكعد مقابيلب ع كرسي..

غزوان /مو حب بس تعلمت عليج مو اكثر يعني نكدر نكول جزء من حياتي وسالفه ارغب الج هاي واضحة اني رجل وعندي غرائز وعادي اذا اتقرب الج مو شرط احبج

نجمه /واخوك وزوجته شنو ذنبهم

سكتت
وكال شوفي هسة اني اعترف مو خوش ادمي بس اخويه عايش دور البطل وهالدور مستفز بصراحه يعني لاهو الي وياية ولاهو الي عليه
وفوكاها ازوج وجاب وحدة تسوة راسه
نجمه ترة اعرف كلش زين يحبج واعرف انتي مستحيل توكعين بخطأ فكافي تمثيل هذا الصح..

نجمة /والسلاح

غزوان /كام كال لا لهتا وكافي كمتي تخربطين لا الي شغل بسلاح ولاغيرها مستحيل اسويها اذا مو لخاطرة فالخاطر امي...

هسة كملتي يلا اريد انام..

نجمة /ضيعت عمري وياك شحصلت منك زاد عمري بقهر وهم تدري غزوان كرهت فلوس ابويه تدري كرهت هذا الورث الملعون لي من يوم ماتت امي ممرتاحين احنا

غزوان /صدك ذكرتيني هدية الها حق بورث امج بس اذا رضوة متوكل احد متحصل شي تدرين لا قسام يطلع ولا غيرها بس اني كاتعويض مني راح انطيها الايجارات مال كم سنه....

باوعت عليه ضوة الغرفه خفيف..
ضحكت انت منو وجاي تتكرم علينا

كمت وفتحت الضوة وصارت الغرفه ضاويه

ممنطي شي من يمك هذا حقنا غزوان مهما دار الدولاب وصعدت تنزل لان الي بي انت مو حقك
انت اخذته بحيلة..

خله رجل ع رجل وبدات ملامحه تتغير ويعصب

كال اني غزوان انسان تعبان حيل ع نفسي صبدلاني وعندي محلات للملابس الرجاليه ماعدا شغل المذبح

وانتي منو بله هسة احاوبج اني

انتي نجمة الي شهادة ابتدائي ماعندج وعقلج هو هو
لا فلوس طورتج ولاشي

كتله اي والله صح وكلتها انت اني هي هي اذن اني متغيرت لا بفلوس ولا غيرها لان بنت عز ووعيت ع الدنيا والخير عدنا اما انت وعيت ع الدنبا والفكر ياكل بجسمك فحقك من شفت اخترعت

بقى صافن كال مراح اضربج ولا اعصب

بس صح الفكر اكل احلامي بس وعيت وصححت وصرت وانتي ولج بيج خير صيري ام
وزوجة صدك مو من ورق

كمت وتوجهت للباب وخليت ايدي ع المقبض
وانداريت عليه
اني مهرة اصلية وكل مهرة تحتاج خيال
وانت مو خيال..

عفته ونزلت واعلنت النهايه ويا...

نزلت جوة شفت البيت كله مطفي وغرفه الاخيرة جانن لعمتي... نايمه بيها فتحت الباب صوت شخيرها عالي..

دخلت وشغلت الضوة وتقترب ع السرير
عمة عمة.. جانت تشخر وتون
يمعودة عمة

رفعت راسها يمه شكو
وتفتح وتسد بعيونها
كتلها ماكو شي بس اكعدي..
كعدت نص كعدة وتعدل بشعرها شنو الولد بيهم شي شكو نجمة

كتلها غزوان يريد يزوج
صفنت عليه والنوم بعدة بعينها شنهاي

شيزوج وانتي

كتلها تعب مني ويريد وحدة مثقفه مثله
ربتت ع جتفي كالت تعالي نامي لا تفكرين ميسوي شي

ابتسمت الها لا عمة مديشاقه اي يزوج وكلش واعي بكلامه وبالاضافه ميردح انتي هم..

عدلت روحها وكامت من الفراش صدك تحجين يمعودة شنو ميريدني..

ليش هو بكيفه مستحيل هالحجي..

رحت للجهه الثاني كتلها بكيفج مصدكين اسألي؟

طلعت عمتي من الغرفه وتلم بشعرها
جتفت اديها وصعدت فوك..
رحت وراها ع كيف امشي..
وصلت للغرفه وفتحت الباب
عمتي
ولك غزووان ولك كوم جان توة نايم.. ولك مو احاجيك...

غزوان /بصوت نايم شكوو

عمتي /شنو تريد تزوج

كوة يفتح عيونه.
جاوب ايييي اريد ازوج شنو حرام...يلا اطلعو اريد انام شنو هاي عود نجمة جايبه امي وجاية عليه..
يلا اطلعو منا فضوني..

امه تقربت منه.. شنو تزوج وطلعنه منا

شمر المخدة اوووف شنو تريدين فهميني
اني اريد ازوج واستقر وحدي بيت..

اتوقع كلامي واضح..

كالت اله عمتي ولك اني امك

غزوان /اي افتهم شنو راح اشمرج بالشارع.. راح تكعدين بيت معززة مكرمه وكل شي يوصل يمج
بعد هم كولي مو خوش ادمي
يمه تعبان مالي خلك هل سوالف ما منها نفع
اريد انام وباجر الله كريم افهمكم

عمتي عصبت كلش وبدا صوتها يعلى لاااااا مو باجر هسة اريد اعرف.. ولك رباي وين راح وياااك وين..

شنو اطلعنا شحصلت اني واحد بسجن وانت تشمرني هاي جزاة رباتي بيك وسهر الليل

غزوان /اهووووووو هم رجعنا يا اني ربيت واني سهرت

وكام من الفراش.. مثل المخبل

يلا امشو شووو طلعو برة
وبدا يدفع بامه
اني بسرعه طلعت.. من الغرفه..
ودفع امه.. امه شالت نعالها وشمرته عليه
دفعها دفعه قويه وكعها بالكاع..
وقفل الباب..
وسكت..
عمتي بالكاع وعين عليه وعين بالكاع وتبجي
طلعت هدية من الغرفه شكو شبيكم..

عمتي بقت تحجي..
ولك غزوان.. ولك الله لايرضى عليك لا دنيا ولا اخرة

هديل شكو..
ردت اكومها.. من الكاع بس مقبلت..
وبقت كاعدة بااكاع يم باب غرفته وتبجي..

بس تبجي..
اخذت هديه وفهمتها بلي صار...

طلع الفجر واني اروح وارجع والكاها نفس مكانها ولا نامت.. وتبجي بنفس مكانها..

كتلها عمه كومي..
بنظرة حزن كامت تمشي.. بس جسمها كله يرجف نزلتها جوة..
بغرفتها..
كالت ظنيت راح يطلع ويبوس راسي...
يكولي يمه اني اسف

كتلها هي مبينه ميفيد الحجي ولا الكلام الافضل نطلع منا

اني من بعد هذا اليوم قررت اطلع..
اكو احاسيس صعب اوصفه

كل شي اتغير وكل شي اختلف
هديه مو نفسها ذيج اختي الي عشت وياها وعرفتها
كل كلمه ميخالف اسكتي خلي نعيش.. اي هذا هو شعليج بي لا تحجين عفيه لا يطردنا..
ونكعد بشارع..

كل تجربه مرينا بيها زادتنا ضعف مو قوة..

القوة وينها القوة مرات احس نفسي اني كلش قويه كدرت اقاوم كل هاي التجارب الي مريت بيها
ومرات لا اشوف نفسي ضعيفه والكل استغلني وللعب عليه للعبه كلش قذرة..

بعد ما طلع الصبح بيومها غزوان بقى كاعد بلبيت
بس ابد امه ما حجت وياه
وهو بالمقابل.. محجة شي ولا برر لكلامه..
ولا علق.. ولا طلب غدة ولا ريوك..
فقط
صاحني نجمة.. تعالي احجي وياج
رحت يمه
كال بيت القديم بيت امج ميفيد تكعدون بي..
اقترح ترجعون بيت ابوج.. وتقريبا بي غراض
غير بس الغرف.. والهول هاي سهله..

عود اني ارتبها..
براحتكم شيلو.. بغراضكم..
واني راح اوصي واحد من العمال يبقى وياكم..
اخلي يوديكم ويجيبكم..
واشر الي ع مجر الميز اخذي المفتاح وروحي انتي وهديه نظفوا...

ماكو بعد كلام ينحجي ولا ينعاد..
كل شي وضح بعد

عمتي بعد ما سمعت هذا كلامه اصرت نطلع من البيت بنفس اليوم
شكد حاولنا وياها ما قبلت كالت ما ابقى واذا تريدون انتو ابقوا اني ابقى وحدي..

وطلعنا من البيت بنفس اليوم..

العجيب مو عليه اني العجيب ردة فعل غزوان جانت كلش باردة ولا مهتم شي اصلا ولا حاول ويا امه..
بأن تبقى او يصلحها..

قبل لا نطلع من البيت عمتي وكفت بنص الطرمه وكالت
اني ام وربي انت شاهد ما قصرت بيوم وياهم

بس بعد هاليوم.. هذا مو ابني.. لا محالل ولا موهوب ولا مبري الذمم.. يا غزوان ابن جواهر

وسكتت واستغفرت الله وطلعنا..

وصلنا للبيت فتحت الباب وهديه والجهال ينزلون بالغرض الكراج كله وصخ وتراب.. واباوع ع الزرع كل مصفر..
والورق واكع فتحت باب المطبخ..
جان باقي الميز والكاونتر
وطبو ورايه الكل..
الهول فارغ..
والغرف هم..
بدينه انزل غراضنا..

وبدات رحله جديدة بحياتنه..
هالمرة وحدنا رغم كل شي يوصل يمنا من اكل وشرب..
بس وحدنا..

هديه ملتهيه باطفالها وعمتي ملتهيه بروحها
واني ويا اخواني..
مرمر جانت بصفنا كاعدة
وبيتها منور بالاضويه الخارجيه

فديوم من بعد اسبوع ع كعدتنا وبدينا انرتب بوضعنا وغراضنا
اندكت بابنة الظهر..

طلعت هديه..
مديت راسي اباوع شفت مرمر

بالكراج....

ودخلت رجع الشعر اسفر بيرمن والدهب من فوك ليجوة وستريج الحصر وتيشرت لونه بنفسجي وحمرة الطوخ الازبري والكحل مجرور

سوت شنو هاي شرجعكم

جاوبتها رجعنا شنو عندج مانع لو ممنوع
ضحكت لا يابه شعليه اني بس استغربت رجعتكم الي اعرفه كاعدين بيت ومستقرين

واندارت ع جواهر عمتي..
هااا طردج.. ابني وابني وولدي طردوج..

عمتي مجاوبتها بس دارت وجهها عنها
زعمتي بعد سجن وليد وسالفه غزوان تعبت بحيث جانت كوة تمشي وحتى هذا الهوة اجره كوة ولا الها خلك
تحجي وتسولف مثل قبل ولا الها نفس باكل..
انكسرت.. كلش...

نجمة / شتريدين مرمر

مرمر /اوي عيني شريد مثلا.. جيت اشوف منو بلبيت ذلت يجوز جني طلع النا اسمع اطكطك عاد انوسي حبيبي كال ميرو اكو احد بلبيت القديم..
واجيت اشوف
ما شاء الله خوش لمه ارامل ومطلقات وجرتها بضحكة
وكفت بوجهها هدية
كالت الها مرمر الي بينه كافينا وزايد
عندج حجايه بيها حظ احجيها ماعندج ارجعي مين ما اجيتي احنا سادين بابنا وكاعدين كافين خيرنا شرنا.. الي حصلناه منج مو قليل

شهكت وضلت تفر بحلكها
مرمر /عشتو شيصير ومذبوب براسي
اصلا اني ولا الي واهسكم.. انوسي فدوة لطوله سجلني بمعهد رشاقه.. علمود رجلي اسويلها تمارين
لان يخاف عليه ويحبني يموت عليه
وملتهيه بي وبليل نطلع اني وياه نفتر ونتوس ماريد اكابل هالخلق الي كلها للطم..

نجمة /وجعفر مرمر نسيتي مين جابج ووين صعدج

مرمر هذا ابو العز الي سكن قبر من وراج

جرت الكرسي وكعدت
كالت ومنو كلج اني قليله اصل ونسيته بله لليوم اثوب الة واقرا اله لفاتحه...

بس اكو مثل مصري شيكول يكول الحي ابقى من الميت
يعني اولى من الميت وسبق وكلتها واعيدها للمرة المليون اني معشت اريد اعيش

هديه يلا عيني عيشي بعيدة عنا منريد منج شي ولا النا دخل بيج..
يلا ولي منا وطلعي برة لا والله يا مرمر لا ابتلي بيج
واطلع قهر القضى والمضى بيج يلا اطلعي

اتخوصرت مرمر ورجعت ذيج نفسها
كالت اني اطلع لان ما احب التقي بناس مثلكم بس هم وغم.. بس والله الي ادوسلي ع طرف
لا اخلي انس يسويها عبرة

كامت عنتي مثل المخبلة.. ولج مرمر ولي منا لا انتف شعرج ام الوولد..

من شافتها هيج ركضت بسرعه..
وطلعت من البيت رجعت تضحك انهزمت شفتو ولكم هاي مالها دوة..
واتعض باديها اوووف لو من ايام ابوكم حاجيه
اووف لو بوجود الولد كايله هاي شنو اصلها بس بعد ما اسكت الها..

التهينا بتعزيل البيت وترتيبه والتنظيف
واشتاقيت للزرع العصر طلعت

كلبت كل الكاع وكلت اجيب سماد وارجع ازرعها من جديد.. هذا الهوى النقي والعالي والخضار
يخلي هدوء بالروح
يمكن اني الوحيدة الي اكرهه ذكر الماضي
واتامل المستقبل اجمل
بهذا البيت اتهموني بالجنون وبنفسه خسرت ابويه وبنفسه خسرت نفسي وتعرضت لكل شي يوجع
ياترى يا نجمة وين راح تستقر حياتج وشوكت راح ارتاح

.....

بنفس اليوم بليل.
اندك علينا الباب

احنا من يندك الباب كلها الجهال تركض..
فطلعو قبلنا اسمع بس كلمه

وينهم..
مديت راسي هذا رجل مرمر

انس ابيض وطويل وضعيف ومسوي شعرة طويل وساحبه ليورة
وملامحة عاديه بس لا لحيه ولا شوارب شايلها كلها

كتله خير شكو طاب النا

كال اسمعو عيني كولكم مالكم دخل بميرووو

زين عيني هاي شغله

رجاءا اني اكرهه المشاكل وهاي سوالف النسوان
وكال وكلت.. اني انسان احب الهدوء وماحب الضوجة.. وتعكير المزاج..
وهي مقهورة كلش منكم

مرتي مالكم شغل بيهاواذا اشتكت منكم
ترة اشتكي بلشرطه عليكم زين.. لا عبالكم اسكت
اني ىكتلكم بعد
ما اسمح لاي شخص يضوجها..
ودار وجهه وطلع..
طكيت ضحك مدري رزاله هاي مدري جاي يشاقه
ويانة
وعفيه مرمر بعدها اذا ضاجت تدفع علينا احد

..........

لا شفنه مرمر ولا شافتنا بعد
وجنت اعرف من الجهال مرمر تطلع وطب هي وياه
او وحدها..
بس مالها دخل بينا ابد

بهاي الفترة نفسها هديه بدات تطلع هوايه
وتطلب مني فلوس
يعني جانت ويانه بس ما اشوفها
اكثر شي كاعدة بالغرفه وسادة الباب تنزل تسوي كم شغله وتطلع تصعد واذا تريد شي تجي تطلب فلوس

عمتي بدات تتمرص يوم راسها ويوم جسمعا الا ان شكل عدها ضغط من القهر

وبقت هادئة ومالها اي صوت و كل اربعاء بحر برد تطلع من الفجر تشوف وليد
الجهال كبرو وطلباتهم زادت ومدارس ومرات يتمالخون ويا جهال هديه

جهال هدية كلش فقرة مثل اختي الي راحت ورجعت وهي غير انسانه مو مثلها حتى كلامها قليل
مرات نمتنع من السؤال في سبيل لا الجواب يجرحنا هيج جنت وياها ما اسالها ع الي الي راح

حتى لا اتوجع وبداخل نفسي مكدرت اسامحها واسامح كل شي بقيت بداخلي حقد كرهه ماعرف
بس احس هي سبب هذا الخراب كله..
....
غزوان منعرف كل شي عنه ابد لا سؤال ولا شي
مجرد ولد اسمه عبد كل يومين والثالث يجي محمل غراض تارس الصندوك..
مسواك.. حتى الغاز النفط كل شي..
ويرح يخلي يم عمتي كم فلس..
ومتقبل تاخذة منة
والي ينطيني اسبوعيه..
مبلغ يكفينا..
ماعدا مدري شلون صار شريف وخلاني اتواصل ويا محامي يفهمني اساس القضيه..
الا تحضر رضوة او توكل احد حتى يتم التقسيم
بس ايجارات ملك امي كل ٣ اشهر يوصلني وجنت ما اعتمد عليه بالصرف اروح اخلي بالبنك
والباقي ابقي مصرف بيت وغيرها..

هديه بهاي الفترة
اذا نحتاح شيشه معجون تصيخ اني اجيبها
وتطلع..
اي شي نحتاج تطلع هي..
كل خميس ع جمعه تكول راح اخذ الجهال افرهم وتجمعهم كلهم وتطلع...
اني مجويه من هديه حتى لو جهالها يصيرون بطولها بعد ماكدر امن بيها..

مرة مرتين اكثر فوتت الها تالي
انهديت بيها
نجمة /هجية هاي الطلعه والتفرفر ماريدها بعد تريدين تبقين خالج من حالنا كاعدين وساكتين ببيوتنا ماىيعجبج اطلعي

هدية /شبيج اني شسويت هسة وتحجين هيج

نجمة /سويتي او لا اني ما تحمل بعد اي خطأ منج الي ىصار والي راح مو قليل اذا يمج عادي فايني مو عادي اجيتي ع التوالي ىلا حسيب ولا رقيب

هدية /اطرديني نجمه..
لا ما اطردج هي لكمه والف الحمدلله عليها
بس حال المايل ماريدة حالي من حالج وهن يعجبني اطلع واطب بس شوفيني كاعدة وساكته...
اطلع ع كد الحاجه وبس..

هديه /شفتي عليه شي

كتلها اي شفت وسمعت..

بقت صافنه عليه كالت امشي لا كدام الجهال نحجي
اخذتني وطبتني بالمخزن..

اذا تقصدين ع هذا جاسم فا والله ماعندي شي نجمه وياه

اني كوة لزمت نفسي

كالت والله ماعندي شي شببج لا يروح بالج بعيد
بس هو من اطلع واطب يذبلي حجي
ومن نشتري منه ينطي مصاص وغراض للجهال
مو اكثر واذا ع المكالمات فإني هيج اسولف وياه اشكيله حالي واريد اخلص من عدي نجمة لا عبالج هم اشرد لا بعد كبرت اني وهالسولف التعبانه عفتها

اني بديت اجمع
هذا جاسم ابو الاسواق اعرفة
اصلا هو ابن منطقه وقديم هنا.. يعني عدها علاقه بي واتصالات يالله لشوكت ابقى غشيمه اني..

كتلها هديه وبعدين.. نصت صوتها كالت..

بس تمر كم سنه بعد اطلك من عدي وهو سالي وكال ازوجح نجمه
لعد بعدني صغيرة اني هم ومشفت شي من حياتي

واني ماريد اكضي هالعمر كله بس أكبر ذولي
وتالي مثل ام غزوان يشمروني

جتي عمتي كالت هاي شبيكم اهنا تححون

هديه راسا غيرت الموضوع وطلعت.

زين اني بوجود ابويه سوت النا مصيبه شكبرها هسة شتسوي وهي عقلها هو هو

ماعدها مانع تنهزم من جديد
طلعت ونويت اطردها من البيت
بس من طلعت شفتها لازمه ابنها وحاصرته يم الكاوتتر وتضرب بي
من شفتها هيج
جريته من اديها وكمت احجي عليها هالطفل شنو ذنبه يتحمل احطائج انتي وابوة

جنن احجي واذكر امي وابويه
واذكر امي شلون جانت تلزمنا وتضربنا
مرات اذكر من تنغث من ابونا وهو موجود ادخلنا للحمام
وتسبحنا بقساوة بحيث نطلع وجسمنة مطكع احمر من التكفخ وهذا شعرنا مينلزم من الفرك القوي.
حتى ميتمشط ومن تمشط راسنه ينزل للكاع.
.....
كتلها انتي ام فاشله وانسانه طايحه حظ ذولي مالهم ذنب بحياتج وهذا رجلج مو رجال لو صح بي خير يكعد ع جهاله..
جانت تريد اتجرة مني بس ادفعها بقوة وكانما اداقذفع ع نفسي من جتت صغيرة
عرفت الانسان
طفولته تحدد مستقبله كله شكد جنت اتهرب من ماضي ارجع واشوف نفسي بنفس المكان موجودة

واكثر شي اكرةة هو الام الي اطلع قهرها باطفال مالهم ذنب فقط انخلقو عند ام واب بلا مشاعر واحساس..

لخاطر اطفالها سكتت وبقيتها بس هي مو طفله واتحكم بيها وهي من قبل متسمع الي
ولا اكدر الها ولا لكذبها

بقيتها جوة عيني وجنت اتابعها ماعرف احير باخواني لو بيها وبجهالها
صارت عندي عشر عيون واركض وراها حتى بالطلعه والطبه وياها واذا دك التليفون
اروح قبلها
حاوطتها بكل الطرق
وشكد جنت احجي تكولي لا نجمه..
اني كبرت وتغيرت ماغلط بعد
تعبت من كلهم ماعرف احير بمنو
لو بمرمر الي جانت بالطلعه والطبه تتعمد تغثني وتضوجني
ماعدا اطلع للكراج اشوف وبل مشمورة علينا
جنت المها واذبها بالزبل

وتزيد بهاي تصرفتها
مرات واني بالطرمه اسمع صوتها تعيط وتصيح
هي ويا انس
ومرات اسمع صوت ضحكها الي يوصل ليمنا
عمتي ضعفت وتمرضت اكثر وهاي المسؤوليه تعبتني وكبرتني فوك عمري سنين...

فديوم
اندك جرسنا.. وطلعت والجهال ورايه..
فتحت الباب بوحهي صار مازن
كال شلونكم نجمه شخباركم

كتله الحمدلله وهاي الجهال مصدكت أنفتحت الباب وكلها طلعت برة تلعب..
عين عليهم وعين ع الحهال

كال قبل كم يوم عرفت انتو هنا وحدكم محتاجين شي كولي

كتله لا والله سلامتك..

كال نجمه الموضوع صار اسهل تكدرين
تطلبين الطلاك باجر ارفع الج قضيه وتنطين الاساب

وطلاكج كلش سهل لان غزوان قبل أسبوعين اتزوج

وجنت معزوم بزواجه...
حتى مكدرت اعرف شنو السبب. الي خلاه يزوج او انتو ماكو
المهم وليد وصاني بيكم

شتكولين..

كتله مازن باجر من للصبح تعالي..

وشيريد يصير يصير.

اني هم بعد ما اريدة ولا اريد استمر بهل للعبه

راح مازن
وقررت ابلش اول خطوة..

ثاني يوم بدلت من الصبح وطلعت وجان مازن منتظرني..
ياخذني صعدت وياه وتوجهنا للمحكمه...
والي دخلنه عليه جان القاضي خاله

كال انطيني اسبابج..
انداريت ع مازن كال اححي كل شي

بدايت اححي اله من زواجي وياه الغصب
وانتهت هو هاجرني بالفراش عاي السنين
كلها ماعدا الضرب والاهانه..

وحتى طردنا من البيت اني وامه..

واخذ الاوراق مازن
وكال نجمه راح ارجعج بتكسي والباقي عليه اريد ارتبها اليوم حتى ادز اله استدعاء

ونزل اخذلي تكسي ورجعت جنت احس بانجاز
اول مرة بحياتي اسوي شي ومخايفه منه ابد.
اول مرة بحياتي. احس بنفسي
اني حرة بتصرفي

رجعت وفرحانه

ومحجيت شي ولا كلت ومشيت الامور جدا طبيعية
ومن جنت اسال مازن يكولي كل شي تم صحيح بس اصبري
كم يوم وتوصل اله وع كلامج هذا واكو شهود واقربهم امه واخو وحتى صديقتج فا طلاكج كلش سهل
بعد ما اذكر بالضبط اسبوع اكثر
فديوم المغرب
اندفرت بابنا
ودخل علينا غزوان.

ودخل بنص المطبخ..

ولج نجمه.. رافعه قضيه طلاق ومنو يمشي بيها مازن ابو راس المطار
ولج نجمة..
من. عصبيته طلعت عليه امه واني بقيت كاعدة ولا كمت ولا تحركتت
وجانت هديه تروح وترجع

دخل عليه ولج.. والله ما اطلكج لو تأذنين..

بكل برود كتله بيني وبينك المحاكم
ماعندي اي كلمه وياك..
عندك كلام رووح للمحكمه. شسوي سوي

غزوان /قويانه نجمة وتححين معلك تمام يا نجمه
راح اشوفج منو الي يفوز بالنهايه

وعافنا وطلع الكل جان مصدوم من قراري
وسكتت الكل بكلمه لاحد يدخل بيه
خلوني اكمل الي بديته وهاي اول بدايه صح الية..

اول استدعاء لغزوان ومراح..
وقدم مازن الثاني استدعاء
ومثل الاول..
غزوان..
اجه علينا.. ونفس الكلام.. ان عاد..
.يكولون من الانسان يبدي يخسر شي جان يملكه يتوحش وهذا الي صار بغزوان
مو حب لكن جنت ملكه واتعلم يتحكم بيه طول هاي السنين......
ونفس التناقض رجع..غزوان!/اريدج ولا تفكرين بطلاك
واني صح ازوجت بس احن الكم
وحاول يتقرب.. الها لكن متجاوبه
وتقرب منها اكثر راح يحظنهت بعدته عنها
وكالت اله ابني مات من زمان وعندي واحد الله يفك سجنه...
وطلع من يمنا مكسور اكثر
بس هالمرة ابد ماعندي الي يجبرني ابقى يمة عرفت الي كاسرني مو اخواني لا الي كاسرني هو ابويه الي جان لازمني بي...

مرت هاي السنه سريعه وكلما يتقدم موضوع طلاكي يبعد اكثر بسبب غزوان..
فديوم سمعنا العيطة من يم مرمر
وجنت فوك فبسرعه طلعت بالسطح..
اباوع شفت.. انس.. واكف يم سيارته وهاي الكلمات الي سمعتها بصغري تكررت..
جانت لازمته من هدومه وتجر بي ولك خايس جبتك من مسطر العماله.. وسويتك ادمي تخوني
انس يحاولي يجر ايدها ويبعدها..
مرمر اعقلي..
بس بقت أجر بي سوته مثل الشجرة.. واحد يريد ينزل ثمرها جنت اباوع واضحك
واشوف هاي الحكمه الالهيه العجيبه نفس الكأس الي شربته لامي دتشرب هي منه ونفس المرارة مبينه من دموعها وحركاتها..
وعافها أنس وطلع نفس الشي شلون جان والدي يعامل امي..

اتجرعي مرمر الي شفناه منج..
واتكررت هاي الحاله مرة بعد مرة
الا ان فديوم دكت بابنا ودخلت والدمعه بعينها
وطلبت رقم غزوان شنو ليش منعرف اخذته وراحت

.........
بهاي الفترة مازن بدا يتقرب الي بكلام وسؤال واحاسيس

لكن الي صعب اكوله اني صفيت بلا مشاعر
وجنت اتخيل كل شخص يتقرب الي هو
طمعان بلي عندي حتى لو جان العكس بس صعب اعيش الي عشته من جديد...

وارجع كلامنه باطار القضيه وبس..

ويرجع مازن يحاول بكلامه او شي. لكن ما انطي مجال ابد..
حتى وليد بديت انسى مشاعري وياه شنو جانت
هاي الهوسه بحياتي نستني حياتب نفسها
الى ان مازن بيوم..

مازن /نجمه اعرف تجربتج وحياتج كلها غلط بس ثقي بالله قصدي وياج شريف ومستعد اكون وياج
واعرفج ع اهلي..
نجمة اني عرفتج من خلال وليد مرات نسولف ويجيب طاريج بالخير..
لهذا عرفتج طيبه وبنت اصول واريد اتزوجج..
بعد طلاقج واتمام العدة

نجمة/ مازن هذا الكلام مو وكته ابد
قاطعني فكري منا لحد ما تحسين نفسج مستعدة

بعد مرور مدة.. تم طلاقي من غزوان..

وبنفس اليوم الي اطلقت.. وجان هو اسعد يوم الي
رجعت فرحانه واريد اصرخ واكول تحررت واوفي كل نذر نذرته دخلت وشفت الجهال تتباجه..بالطرمه كتلهم شكو
جهال هديه يصيحون ماما

جهال هديه واخواني
سالت عمتي شكو
كالت.. هدية من الصبح ماكو يانجمه
وحتى هدومها ماكو وتاركة الج هاي الورقه

ذبيت ورقه طلاقي

واخذت الوقه جانت عيوني تاكل الاحرف
اريد اقرا

هدية اني ما اتحمل كل الي صار بحياتي
عفت كل شي.. وطلعت..
وذولي جهالي تريدين بقيهم يمج او كتبتلج عنوان اهلهم شمريهم عليهم..

وللحكايه بقيه
شهرزاد

بارت طويل واعوضكم بعد مبقى شي واختم