[Heba aly g]

[/size]

المشاركة الأصلية كتبت بواسطة سوهي(زهور الربيع)

غريب الروح عبارة عن عمل قيم يستحق التقدير ،
ملئ بالقيم والدروس الحياتية يتقدمها لينا هبه من خلال حكايات ابطالنا ...
وبتقدمها بشكل منطقى ، واقعى ، سلسل وعميق من خلال قالب جذاب محبب للنفس ومؤثر جدا ...

بشوف أن سر الرواية هو طريقة العرض عشان تلمس روح الانسان جوانا♥️
والفصل المرة دي موجه برسالة خاصة لكل حد فينا
"زقة بـ زقة وان زدت لزاد السقا"
مشاهد يوسف من أهم مشاهد الفصل ،،،

يوسف ،،،
يوسف حاليا حاسس أنه محاصر ، مكبل والسبب عمايل ايديه ...
حاسس أنه عاجز عن أنه يتصرف التصرف الصحيح
واحساس العجز لشخصية زي شخصية يوسف احساس
قا سي ،،،
شخصية يوسف شخصية قوية معتزة بنفسها
وأنه يحس بأنه مش عارف يعمل ايه ولا قادر يحافظ على مريم ، حياته بتتسرب من بين أيديه بلا حول ليه ولا قوة
فدي حاجه صعبة عليه ...

المواجهة كانت خط فاصل في حياة يوسف
من بعد المواجهة مع النفس كان في فرق في تصرفات يوسف وتقديره للأمور ...
لأن مواجهة المرة دي غير أي مواجهة قبل كده ، غير مواجهته مع أبوه ومواجهته مع مريم ،،،
مواجهة المرة دي كانت مواجهة أمينه وصادقة مع النفس

يوسف_قبل_المواجهة ،،،
يوسف قبل المواجهة دي كان بيكابر ويعاند ويصرخ أنه مش بيعمل حاجه غلط ...
كان بيبرر أفعاله وتصرفاته بأنه بيعيش حياته
كان كبرياءه يمنعه من أنه يعترف بغلطه ويعتذر ...
كان شايف أن مشاعره ناحية مريم قلت وحياته مع مريم بقيت باهته وان شخصية مريم مش هى المفضلة ليه

ولكن ...

يوسف_بعد_المواجهة ،،،
بقي بيمر شريط حياته قدامه ، شريط حياته مع مريم ، استرجع ذكرياته معاها ...
يوسف النهاردة غير ،،،
يوسف النهاردة شايف نفسه من خلال اللي حواليه
شايف نفسه بعيون اللي حواليه ، شاف أنه مقصر وغلطان
فهم بأن حياته مع مريم على المحك والسبب هو
فهم واستوعب أنه ظا لم لنفسه وللي حواليه
عرف قيمة مريم وأنه هو كيوسف مفيش واحده هتقدر تعوضه عن مريم ...

التفاصيل مشبعة يا هوباااااا
حابة أستعين بجزء من الأفكار والأسئلة اللي كانت بتدور في راس يوسف ،،،

__هل ممكن أن تٌرد إليه هفواته في أعز ما يملك؟؟؟
__هل ممكن أن يكون هناك أحدا يضايق زوجته أو يتودد إليها؟؟؟
__هل ممكن أن تكون قد تعرضت من قبل لأي محاولة لتقرب أحد منها؟؟؟
__وكيف سيعرف هذا وهو بعيدا ومعظم المشاوير الخاصة بها وبالاولاد هي من تقوم بها ؟؟؟

أخذت الأفكار تصفعه صفعا وهو لا يعرف كيف يوقف سيل التخيلات التي تعصف بذهنه
يقود بلا تركيز وكلمة واحدة تتردد في ذهنه مرارا وتكرارا حتى كادت أن تصرعه ولا يستطيع أن يوقفها
زقة ب-زقة ولو زدت لزاد السقا
________________________

يوسف حاليا اكيد ندم ...
ندم على كل موقف نصر فيه عناده وإصراره على موقفه في يوم تحت شعار بعيش حياتي اللي مقدرتش اعيشها

ندم على كل نصيحة ما عملش بيها قبل كده
كل موقف نصر فيه عناده وكل نصيحة ما عملش بيها تجلده النهارده ...

موقف ورا موقف ، تقصير ورا تقصير من ناحيته ومريم صابرة عليه ومحافظة على حبها ليه
عمل ايه هو في المقابل عشان يحافظ عليها ؟؟
حرم نفسها منها بإيده !!

••حساب يوسف لنفسه المرة دي مختلف لأنه حساب صادق ،،،
هبه الفصل ده اجادت في تعرية يوسف من حيث أفكاره ومحاسبته لنفسه ...

عنان ،،،
بطبيعة البيئة اللي هى منها فهى من صغرها مكنتش بتختلط بناس كتير مطلعتش وقابلت انواع كتير من البشر بتتعامل بعفوية وعلى طبيعتها ، قرب منها رماح وبكلامه المعسول قدر يكسبها هى ما شفتش منه حاجه تقلق وطبيعي تميل له وتحبه وهو بيعاملها حلو بالشكل ده
اتفقوا واتجوزوا ...

في الوقت ده مشاعرها هى كانت صادقة ، هى حبته مكنتش بتمثل عليه لا مشاعرها في الوقت ده كانت صح
لكن ...
المشاعر مش ثابتة ،،،
احنا بنحب اللي بيحترمنا ويقدرنا
احنا بنحب اللي بيعاملنا معاملة حسنه
احنا بنحب اللي بنحس معاهم بالأمان
الامان اللي بيتحقق باهتمام صادق .. باحتواء وبمعاملة طيبة

والسؤال هنا هل رماح حافظ على المشاعر دي بعلاقته مع عنان ؟؟

احنا حياتنا كلها اختبارات ، والعلاقه لما تكون هشة وتتهز من أول اختبار معناها بترها افضل
والحب اللي مايفضلش زي ما هو من اول اختبار يبقى مكنش حب حقيقي لانه لو كان حقيقي كان هيصمد وبالعكس يقوى مع كل صعوبة يمروا بيها زي يحيى_يسر ،،،

وقولت يحيى ويسر لأن مشكلتهم مقاربة لمشكلة عنان في تأخير الانجاب ،،،
شوفوهم من كاااااااام سنة وهما بيعانوا ونعمه تدخل ما بينهم وعاوزه يحيى يتجوز ، ورغم ده كله هما متماسكين حبهم متأثرش رغم أنهم بيتأثروا ويحصل ما بينهم خناقات ولكن حبهم زي ما هو بالعكس ده بيقوى مع مرورهم بالصعوبات ،
المعاملة ما بينهم واحترامهم لبعض زي ماهو وتقديرهم لبعض ثابت مفيش حد منهم قلل من التاني

ولكن ..
عنان ورماح من أول اختبار لعلاقتهم فشلوا ما قدروش يحافظوا على مشاعرهم لبعض
رماح معاملته اتغيرت من أول اختبار ليهم بقي عصبي
وبسهولة اختار نفسه وغد ر بعنان ..
بكل جبن اتجوز من غير ما يقولها ، وبكل خبث خطط أنه هياخد الولد يعيش معاهم وعنان هترضى بالأمر الواقع !

وعشان يضلل عنان عن أعماله مفيش طريقة اضمن من الشك ،،،
ما هو الشك لما يتزرع في قلب حد معناها النهاية
ورماح قدر يزرع الشك في قلب عنان
قدر يخليها تحس ان هى المقصرة واللي خربت بيتها بايدها ، ده شكك في مشاعرها ليه واللي كانت صادقة وقتها وهو عارف كده !

رماح كان بيتغذى على عنان ، هو امتص منها طاقتها وكل حاجه لدرجة أنها خدت فترة عشان تعرف ترجع لنفسها بعد موته ...

هل بعد كل ده المفوض مشاعر عنان ليه تفضل ثابته وزي ما هى؟؟

عنان كانت عايشة حياة كاملة ومش شايفة مشاكل فيها غير تأخر الإنجاب وتأثر زوجها بده
لكن لما طلعت برا الدائره دي ونظرت لحياتها السابقة بعين تانية ونظرة مختلفة وربطت الأمور ببعض شافت الأمور بشكل أدق شافت أنها كانت عايشة في وهم من تخطيط رماح اللي حبته في يوم

••أكيد الحب في سن المراهقة يختلف عن الحب وقت النضوج ...
وبعيدا عن الحب ، احنا لو فكرنا هنلاقي أن في أمور عادية كنا بنعملها في سن المراهقة اكيد دلوقتي هنستغرب ونسأل نفسنا ازاي كنا نعمل كده !

••طبيعي المشاعر لو مكنتش حقيقية أنها تتغير والافكار كمان مع النضج طبيعي تتغير
مشاعر عنان برماح كانت حقيقية في وقتها
ولكن مع مرور الوقت وأنها لقيت عدم تقدير من رماح وأن معاملته ليها اختلفت ، بقيت عايشة معاه في شك ، هى بقيت مش مرتاحة ، والشك هيكون معاه احساس بعدم الأمان
فطبيعي مشاعرها ليه تتغير

خصوصا انها عاشت مشاعر مختلفة وإحساس مختلف مع معتصم فهى قادرة دلوقتي أنها تحكم على حياتها مع رماح بشكل ناضج وموضوعي كمان

مفيش قانون أن الحب الاول هو الصح أو التاني أو....
ولكن القانون أن الحب لوحده مش كفاية ،،
الاحترام والمودة والرحمة هما الاهم وعنان مشاعر الحب كانت موجوده ولكن المعاملة والاحترام ما بقيوش موجودين
رماح يقولها بحبك ومش عاوز غيرك بس أفعاله كانت العكس

بهاء ،،،
مبدأيا بحب مشاهده هو ورهف ومشاهد القرية نفسها اللي فيها الشيخ شعيب فيها أجواء روحانية محببة للنفس ...

قصة بهاء وتجربته القا سية واللي عانى منه بسبب الحر ب والموت وأنه فجأة حياته تتقلب رأسا على عقب
اتأثرت جدا بقصته ، واتمنى أنه هو ورهف يكونوا لبعض

عمرو ،،،
ونقوله حمدالله على السلامه يا جاي من السفر وربنا يعينك يا شمعة انت😂♥️

وأخيرا تسلم ايدك يا هوبا فصل جميل ومهما قولت مش هوفيكي حقك وحق قلمك بجد الابداع يتكلم عن اسلوبك وافكارك موفقة دايما يارب😍😍😍😍

حبيبتي ياسهام ده مش ريفيو ده قطعة فنية تسلم ايدك وافكارك 👏💖💖💖