[سوهي(زهور الربيع)]

وابتدى المشوار ،،،
وبدأت الرحلة
رحلة شموسية واضح من بدايتها أنها لا تقل جمال عن اللي سبقوها ...

رحلة واضح انها تم التجهيز لها من جميع النواحي
سواء بالوقت .. الجهد .. الإحساس ورقي الفكر
والتفااااصيل اللي تغذي العقل وتفرح القلب والروح

رحلة عشنا فيها كمية مشاعر رهيبة ومتعة كبيرة من خلال فصل واحد بس وده يدينا نبذة عن الجمال والإبداع اللي في انتظارنا خلال الفصول القادمة ..

الفرحة والجو العام للجروب بالرحلة دي يدل على اختلاف وتميز شموسة ..
يدل على ثقة القارئات الكبيرة في شموستنا ..

وده لان شموسة دايما بتمس حاجه جوانا بكتاباتها ،
دايما بتكتب عن بشر حقيقين يصيبوا ويخطئوا وبتعبر عن مشاعرنا بكل حرفية ..
قلم شموسة ليه مميزات كتير ومن ضمن المميزات دي بالنسبة لي أنه مش خيالي لا ده حقيقي وواقعي ويمس القلب كمان ..

شموسة من اكتر الكاتبات اللي بحس بصدقها وصدق مشاعرها وعفويتها من خلال قلمها ، مش بحس بتكلف في الوصف ، أو فزلكة في اللغة .. أسلوبها سلس جداااا
وعشان كده بتوصلنا كل المشاعر دي وتدخل قلوبنا بشكل مستقيم ...
ياااا شموستي عشنا معاكي تفاصيل رحلة قلبك وطني .. زخات الحب والحصى .. وأشرقت في القلب بسمة .. خالتي رزة وموسم القرنفل
ودلوقتي بدأنا رحلة سكنت خمائل قلبك

بالمناسبة انا حابة جدااا العنوان ،،،
سكنت خمائل قلبك
وكأنه دلالة على الهدوء والسكون اللي هتحصل عليهم كل شخصية في النهاية برغم العواصف والتقلبات اللي هتمر بيها ...
او دلالة على أن كل شخصية هتلاقي ملاذها في النهاية ووطنها الخاص اللي تسكن فيه ...

ولو ركزنا على أسماء روايات شموسة هنلاقي أن الأساس دايما بيكون القلب ..
لأن القلب هو الأساس ولو صلح القلب صلح الجسد كله

كمان بشوف لأن اعمال شموسة دايما انسانية في الدرجة الأولى ..
بتركز على النفس البشرية بصراعاتها وتقلباتها ، بتاخدنا لرحلة لداخل كل شخصية ،
نفهم الشخصية ودوافعها وبيئتها والعوامل المحيطة بيها واللي كانت نتيجتها الشخصية اللي قدامنا دي ..

الشخصية اللي اكبر غلط ممكن نعمله أننا نحكم عليها من تجاربنا احنا الخاصة ..
بنمر برحلة مع كل شخصية ونعيش تفاصيلها لغاية ما نوصل معاها لبر الامان ..
كمان دايما اعمال شموسة بيكون فيها عامل نفسي واحنا متعودين منها على حرفيتها واتقانها للجانب ده من قلبك وطني ...

وبالكلام على قلبك وطني خليني اقول ان ابطال قلبك وطني مكانتهم في قلوبنا غير مهما حبينا من ابطال .. عشان كده فرحتنا برجوعنا ليهم مختلفة ، فرحة كبيرة وكأننا رجعنا لوطن بعد غياااااب ...

#سيد_آيه
احساس حلو جدا وانا شايفه استقراهم وحبهم اللي لسه بنفس قوته بعد مرور كل السنين دي
حبيت جدا قوة حبهم واستمراريته ...

واللي اكيد قوة علاقتهم دي مكنتش بس بسبب الحب اللي ما بينهم ..
لا كانت بسبب التفاهم ، وتقبلهم لبعض واحتياجهم لبعض.. سيد كنت بشوفه خسران من أول ما اتولد ، مرورا بتفاصيل حياته اللي جزء منها لسه غامض وفي انتظار كشف الستار عنه ..

فـ سيد تحديدا كان محتاج حب زي حب السكاكر
كان محتاج يحس باحتياجها ليه ومشاعرها الصادقة ناحيته ...
حقيقي احساسي ميتوصفش وانا بشوف استقرار سيد مع مالكة قلبه ونتاج حبهم اتلخص في باسل ونغم ...

#وائل_ماجدة
مروا بأزمات ، ضغوطات وصعوبات ولكن في النهاية كل واحد منهم اتمسك بشريكه عشان تكون دي النتيجة

"وقفت مكانها تتأمله وهو يقترب وكل خطوة يخطوها نحوها يسرق بها نبضة ودمعة عين. لا يزال هذا الرجل قادرا على السيطرة عليها بكل حركة وإيماءة منه، ولا تزال هي هبلاء أمامه بكل ما للكلمة من معنى"

شموسه انتي عندك القدرة بكلمات بسيطة توصلي لنا احساس صاااادق وتخلينا نعيش الاحساس ده كمان
دايما كلماتك فيها روح وصدق بيمس قلبي
وعشان كده احنا بنكون سعداء بالقراءة ليكي
خصوصا وصفك في مشاهد ابطال قلبك وطني لأنها واااضحة لينا ...

وعندنا ابطال جدد ،،،
اكيد كلنا في شوق أننا نتعرف عليهم اكتر ونفهم دواخلهم ونعيش معاهم تفاصيل حياتهم ...

المقدمة مشوقة ، ملفتة وبنكهة وتعبيرات شموسية خالصة...

#رامز
بيهرب من نفسه ومن الجميع
جواه حر ب نفسية قوية
هو مشوش ، ضايع وغرقان في دوامة الماضي
رامز لسه مش قادر يخرج من دائرة الماضي
وكأن السنين اللي مرت دي كلها مجرد عدد وبس ولكن هو لسه محلك سر ...

كان رجل قانون وأستاذ جامعي ولكن فجأة اتحول لشخص تاني شخص هو نفسه مش عارفه
شخص بيمثل مش بس في دور كريم تايجر
لا ده بيمثل أنه تمام ، بيمثل أنه على قيد الحياة اصلا

بقي زاهد في الحياة ومش مهتم بأي حاجه
حياته ، شغله ، خططه ، مستقبله طموحه كله وقف ، وقف عند نقطة واحده .. نقطة متلخصه في ماضيه ..
اكيد اللي يوصل رجل قانون لانه فجأة يتغيير بشكل كلي كده ، تتغير قناعاته ويبعد عن مجال شغله شئ جلل ...
اكيد رامز شاف كتير واللي احنا نعرفه عنه لحد دلوقتي مجرد قشور ...

واعتقد مفيش حاجه هتخليه يطلع من اللي هو فيه ده غير إيمانه بنفسه ، أنه يواجه نفسه ، يقف ، يشتغل ويواجه ، ويحدد هو عاوز ايه
يسأل نفسه لحد امتى هيكون تايه ، مشتت ونسخة لصورة مشوشة ..
طبعا مش سهل أنه يتخطى اللي حصل ومش في يوم وليلة هيعمل كده ..

واكيد احنا في شوق لأننا نعرف تفاصيل اكتر عنه وازاي هيطلع من حالة التشتت والضياع اللي هو فيها حاليا .. ازاي هينتصر على ماضيه ويعيش حاضره بنظرة أمل للمستقبل ...

#ليزا
حبيت جدا حضورها وروحها ومحاولتها للتأقلم
مقدرة جدا صعوبة الوضع عليها
اختلاف الثقافات ابدا مش سهل ...
هى واحده كانت في مجتمع بمعتقدات معينة .. تقريبا كان كل شئ مسموح ومباح فجأة لقيت نفسها اخت لأخ شرقي في مجتمع شرقي وحي شعبي ..
في حدود لازم تلتزم بيها ، وخطوط مينفعش تتخطاها ..
وأغلب تصرفاتها ممنوعه في المجتمع ده

تايهه هى في مجتمع غريب عنها ، ضايعة وسط عادات وتقاليد بتحاول تتأقلم معاها
وهو ده بس برأيي اللي اشتركت مع رامز فيه
هى لقيت التفهم عند رامز ، لقيت أنه فاهم الخلفية اللي هى جات منها ولقيت فيه صديق بتتكلم معاه وهى مطمنة

موقف سيد من ليزا ،،،
وكلام رحمه لسيد أن هو كان يتحمل آيه وتصرفاتها ومع ليزا بيتعصب بسرعه ...

مبدأيا انا حابه جدا #رحمه ،،،
حابه شخصيتها ، قوتها الداخلية ، حضورها ، صراحتها ، حبها لسيد وللجميع ، قدرتها على العطاء رغم و جع قلبها ورغم كل اللي مرت بيه زمان من حياة صعبه ،
ويتمها وأبوها على قيد الحياة
ومع ذلك هى قادرة أنها تدي ، قادرة على العطاء بدرجة كبيرة ، رحمه سبب لتوازن اللي حواليها ..

نرجع بالكلام على موقف سيد مع ليزا وكلام رحمه معاه ،،
عاوزه اقول ان آيه أتربت على ايد سيد بمعنى الكلمة ،
هو فاهم وعارف مين هى آيه ...

عارف حدودها عارف ايه اللي ممكن تقدر تعمله وايه اللي مستحيل تعمله ،
باختصار هو عارف أن آيه ليها حدود مستحيل تتخطاها مهما وصلت درجة تمردها ...
ودليل ده آيه لما جاتها الفرصه أنها تتمرد وتخالف الكل في قلبك وطني وقت الحفلة وقفت عند حد معين ومقدرتش تكمل معاهم وسابت الحفله كلها ومشيت ...

العكس بقى شعوره مع ليزا ،،،
ليزا من مجمتع وبيئة مختلفة عن سيد
هو ميعرفش ليزا بالشكل اللي يعرف بيه آيه ،
ولا يعرف حدودها وطريقة تفكيرها ،
طبيعي يخاف ويكون قلقان من ناحيتها
لانه ميعرفهاش وده مش معناه أنه بيحب ايه اكتر او أنه متحامل على ليزا مثلا او مش مش بيحبها ..
لا ده ليه علاقه بأنه يعرف مين اكتر ، حافظ مين اكتر

#سيلا
شعور النبذ من اقرب الناس ليها شئ صعب جدا ،
أم مش مهتمه ابدا ببنتها ومشاعرها
واب كل همه المظاهر وعلاقاته ، وعادي عنده أنه يدخل بنته في حساباته ووصل الموضوع انه يساومها ، في سبيل الحفاظ على علاقاته دي ويحافظ على مظهره الخارجي ..

ولكن من رحمة ربنا بيها إن في حياتها يوجد العم ضاحي
اللي بسببه هى نوعا ما متماسكة وبتحاول تستمر ..

سيلا شخصية من الخارج تبان قوية وهى العكس ،
ومن الداخل شخصية هشة ..

#لجين
اكيد انا متحمسه لقصتها ويا ترى نوح ابنها ولا اخوها ولا قريب لها ولا ايه ..
الشخصيات كلها مرسومة بريشة شموسية محترفة
وانا متحمسة جداااا لكل اللي جاي منك يا شموستي

بجد كل مشهد احلى من التاني ..
رسم المشهد لوحده حكاية يا شموستي
مثلا لو هتكلم على مشهد ظهور #مروان ،،
بحر
غروب الشمس
وقفته الشاردة
بقعة منعزلة
الغريب
غموضه ...
حسيت أن المشهد معبر جدااا عن شخصية مروان واللي يخفيه بداخله ..
واخيرا اكيد اكيد السرد والحوار مش محتاجة اتكلم عنهم انتي بتخطفي قلبي بتعبيراتك يا كبيرة
التفاصيل عندك منتهى الابداع وده مش غريب وانتي ملكة التفاصيل ..
تسلم ايدك ويسلم ابداعك ♥️✨