[لامارا]

((الجزء الرابع))

يا سلام اليوم يوم الاربعاء... ومبارة الهلال والاتحاد عل الكاس يوم الخميس يعني بكره... لفت لولو على صديقتها سماح...
لولوه** اممممم.. بكره الهلال فايز فايز... لاتعبين روحك وتشوفين المباراه....
سماح** عيدي..عيدي.. ماسمعت.. بكره اتحادي.. من فوق خشوم الهلالييين...
لولوه** اتحدى... اصلا الهلال عالمي وله بطولات وصولات وجولات... ولاعبينهم ياخذونهم الفرق الاجنبية.. اما انتم..اممممم.. ولا لاعب صح....
سماح** لاعبينا واثقين من نفسهم ومايحتاج فرق برى تعلمهم.....
لولوه** مساكين تصبرون نفسكم باي شئ... عموما الميدان يا حميدان وبنشوف بكره من اللي بيفوز....
سماح** قلت لك ريحي بالك بكره اتحادي....
جت شيماء تبي النقاش يروح... ومايتهاوشون... ايش رايكم اللي فريقها يفوز تعزمنا يوم السبت....
سماح** هذي اللي همك بطنك... بس لعيون الإتي اعزمك....
لولوه** انا لي مفاجأه أخرى اذا فاز مع اني متأكده انه بيفوز.. بس باخلي المفاجأه بوقتها...
شيماء** الله يقلع ابليسك حمستيني... وشي....
لولوه** لالالالالالا قلت مفاجأه...
حورية** الحمدلله ان ربي ما بلاني مثل ما بلاكم... والا اللحين اطامر مثلكم....
لولوه** بالعكس وناسة...صح شدة اعصاب.. لكن روح الحماس فيها...
حورية** احم احم.. لاتحاولين ما ابي اتابع......
جت حوريه وتبي تلفت الانتباه بطريقه يحبونها شلتها..وقالت:تعا الوا... بنا ات......
البنات بصوت واحد** وش فيه.....
حورية** ماسمعتوا شريط للشيخ سليمان الجبيلان.. اسمه(وهم الحب)
لولوه** بصراحه دايم اشوف الاشرطة بس عمري ماسمعت...
سماح** حتى انا....
شيماء:وانا بعد..
حورية** خلاص ابجيب لكم ان شاء الله الشريط وتسمعونه....
لولوه&سماح&شيماء.. ما كانت تهمهم الاشرطة الدينية ولا كانوا يحرصوا عليها مع ان عوائلهم محافظة الا ان حب المباريات طغى على تفكيرهم بأي شئ ثاني... وحوريه شافت فيهم الاخلاق الزينة.. وتقبلهم للأشرطة الدينية فحبت تدخل بشلتهم وخطوة خطوة حتى تخليهم يحبون الاشرطة الدينية ويتركون المباريات والهواش اللي ماله داعي....
شيماء** لولوه شوفي أريج تناديكِ...
لولوه** انا
شيماء** ايه انتي....
لولوه راحت عند أريج اللي كانت بالصف الاول وكانت خارجه من برى وتوها دخلت الفصل... كانت استاذه ايمان.. واقفه عليهم انتظار.. استاذه ايمان استاذة الدين... محبوبة من الكل... ماتحب تهاوش وتصرخ وتستغل سيطرتها بتنفير البنات منّها وتعتبر مرحلة الثانوية ماهي مرحلة هواش..بالعكس الواحد لازم يفهمهم ويتكلم معاهم على انهم كبار.. ومتبعه اسلوبها مع الكل.. حتى انهم يحبوها اللي درستهم والي ماتدرسهم... وعشانها تلقي محاضرات احيانا وقت الجمعيات... فالمدرسة كلها تعرفها ويحبونها.......
لولو**وصلت عند اريج وقالت: نعم اريج...
اريج** استاذه ايمان تبيك...
لولو** (ببلاهه) تبيني انا...
وبدل ماتخرج برى.. بسرعه راحت للشله وقالت لهم استاذه ايمان تبيني.... وش سويت انا؟ ياربي.....
شيماء** روحي استاذه ايمان طيبة ما راح تسوي لك شئ...
امجاد**اللي من اول ساكته وتابع حديثهم بصمت بس تكلمت اللحين وردت على لولو وقالت: روحي.. روحي من قدك استاذه ايمان نادتكِ...
لولو** اخاف اكون مسوية شئ... والله اني خبله... استحي منها....
شيماء** يابنت روحي.. اللحين وش تقول عنك.. تخاف من أي شئ...
لولو** أي والله وبسرعه تروح....
خرجت من الفصل وسكرت الباب وراها تدري ان البنات بيراقبونها... تنهدت وقالت... اممممم.. استاذه ايمان....
استاذه ايمان.. كانت لافه الجهه الثانيه وما انتبهت على لولو وهي خارجه.... ويوم اتكلمت لولو... انتبهت لها....
استاذه ايمان** هلا لولو... وقربت الكرسي اللي جمبها وقالت اقعدي....خلنا نسولف...
لولو** ( انهبلت ) ها..لالالا..كذا مرتاحه...
استاذه ايمان ابتسمت وقالت:ى .. على راحتك.....
لولو** هلا استاذه تبين شئ.... طلبتيني....
استاذه ايمان** ما توقعت رد لولو كذا بس حست بالارتباك اللي فيها.. وانها ممكن تقول أي شئ....وقالت: ابي اسولف شوي معاك...
لولو** ليه مسويه شئ انا(تحس ان بين الاستاذه والطالبه مجرد درس وواجب وانتهينا)....
قامت تضحك استاذه ايمان*** تقريبا انتي مسويه شئ...
لولو** وشو؟؟؟؟
استاذه ايمان** يعني بصراحه انا مايهمني مستوى الطالبه الدراسي بمقدار المستوى الاخلاقي... الواحد تروح الايام وتجي ومايتذكر الا الناس الطيبه اخلاقهم... سلوكياتهم.....الاشياء الرائعة هي اللي تبقى... اما الشاطرات كل سنه فيها شطّار...
لولو نقز ببالها المباريات لايكون سمعتني وانا مسويه فيها قمة الاخلاق والا دب ... فشيلة.. لا وبعد قاعده اقول فريق الهلال قوه ووسامه واصرخ... انواع الفشايل.....
استاذه ايمان** لولو لي ماتجاوبين....
لولو** ليش وشو السؤال؟
استاذه ايمان** اقول الشقاوة والرجة اللي سويتها متى بتنتهي؟
لولو** المشكلة انها بدون تاريخ انتاج يعني من دون تاريخ انتهاء...
استاذه ايمان**هههههههههه.. ضحكت بصوت عالي من اول عاجبتها هالولو وتحس انها يبيلها شوية سمكرة وتطلع طالبة ماحصلتش....
قالت لها** يعني ما في امل العقل يرجع...
لولو** ماتدري ليش حست انها اهانةاو تعدي شوي عليها... سكتت شوي بس قالت مايصير تزعلين على أي شئ.... قالت لها... لا ان شاء الله يرجع العقل... وتجرأت وحطت عينها بعين الاستاذه وقالت... بابتسامه عريضة...
يعني الرجة اللي فيني هي سبب القلق اللي فيك....
قامت تضحك الاستاذه وقالت.. برافو جبتيها....
قالت: لولو... مايصير خاطرك الا طيب ان شاء الله...
الاستاذه: ان شاء الله....
لولو**تامرين شئ استاذه...
الاستاذه(بذهول)لا بس شدي حيلك....
لولو** ان شاء الله... ودخلت الفصل... وسكرت الباب وراها بشويش... واسندت راسهاعلى الباب من ورى... ..وتنهدت تنهيدة طويلة... وتذكرت ان الاستاذه قالت لها باسولف معاك شوي... الله يقلع التناحه... انواع الفشايل... بس يوم جن صديقاتها... نست كل شئ... وقعدن يسولفن ويخربطن... وجت الحصه اللي بعدها معلمة اللغة العربية... ترفع الضغط... وكلهم يكرهونها..وكم محاولة من لولو وشلتها يغثوها ويسولفون معاها عشان تروح الحصه وماياخذون درس.. وبدات الحصص وانتهى اليوم الدراسي... والكل فرحان.... اربعاء..... يا سلام....
*******************************************

قاعده عهود تفكر بالكلام اللي قالته يوم كانوا قاعدين مع بعض... لايكون احد زعل..طيب انا ماسويت شئ غلط..وما كنت اقصد شئ.. وانا ماقلت شئ يزعل... مسكت المخده الصغيره وضمتها بقوه... وراسها يفكر ودايخه من كثر التفكير..وكانت منسدحه على السرير..وانقلبت على جهة اليسار وهي تفكر.. لاتكونين موسوسه انتي ماقلتي كلمه مي زينه او جرحتي احد.. وقاعده تتذكر كلام خلود يوم تقولها انتي عديمة الاحساس.. من جد انا كذا.. ليته.. انا كل كلمة افكر فيها...لايكون احد ما فهم وش قصدي..لايكون هو حساس وانا ارمي الكلام على كيفي... ياربي معليش عديمة الاحساس بس على نفسي اما على احد غيري لا.. انا اتطنز على البنات العربجيات اللي يرمون الكلام على البنات ولاينتبهون ان هالكلمات تجرح.. صح اني ما قلت لاحد واتطنزت عليهم بنفسي..بس لايكون ربي بلاني.. لا ان شاء الله... وقطعت تفكيرها ...وهي تقول لروحها انا قلت باقطع التفكير بالعواطف لانها ما تجيب الا الهم..وبس افكر باي شئ واشغل نفسي بهالخرابيط..لازم اصير مثل العيال..ما يهمهم أي شئ مو حنا البنات على أي شئ الدمعه تنزل... واحاسيس ومشاعر..وتفكير ..واحبسي روحك بغرفه.. وعواطف..وجروح.. (كلام تقول لروحه وتحاول تصدقه وتنفذه عشان تبعد عن المشاعر والحساسيه المفرطه اللي عندها)
وقامت من سريرها وراحت تدق على صديقتها تعزها مره بس بداخلها كبرياء يمنعها من انها تقول اني مره احبك...وهي واياها مره اكثر من صديقات ويقولون لبعض كل شئ بس هي تخاف تعترف لها عن مقدار معزتها تقوم تجحدها وتتركها او تتكبر عليها صديقتها..وتقول لنفسها الشيطان ما مات..وما ابي الشيطان يكون بيننا.. طلعت من غرفتها ونزلت للصاله... وجت عند التلفون ويوم جت بتدق قالت لها امها....
ام خالد: تبين تكلمين بالتلفون
التفتت عهود لوراها وشافت امها وقالت لها:أيه
وراحت بتاخذ التلفون...جت امها واقتربت منها وترددت بالكلام اللي بتقوله بعدين اتكلمت وقالت لها:بصوت حزين ..بصوت امومي خايف من التوقع السئ..بنبره عاطفيه شديده..بنبره اشبه للتوسل اكثر من انه أمر: لا تدقين
عهود:انتبهت لامها بس حاولت انها ماتبين أي شئ وبداخلها انهار من الاشفاق على امها بس تحاول انها تكسر نظرة الخوف الي بامها ...ووتبعد القلق اللي بامها....
تشجعت وقالت: ليش يمه؟تسوي روحها مي داريه وش فيها امها...
ام خالد:نفس النظرات..ونفس النبره.. مازال الخوف يدب بداخلها..مازال القلق معاها.. بس هالمره اقوى..قالت بصوت كله امل ان الكلام اللي تقوله يتحقق: يمكن يدق خالد
عهود بابتسامه خفيفه وتحاول تقوي امها... وبنفسها راحمه مررررررره امها: ما راح يدق
ام خالد بحزن وكانها بهالوقت تبي احد يوقف معاها ويشيل عنها همها ويصبرها باي شئ..يسقي لها بذور الامل بداخلها.. قالت: ليش مايدق؟
عهود: يمه خالد وتعرفينه زين هذا طبعه..تحاول تقوي امها..
ام خالد: ايه بس له اسبوع طالع من البيت ومادق الا مره وحده
عهود: الحمدلله انه دق بعد...يمه لاتحترين خالد هو كذا مايحب احد يخاف عليه او يحتريه... لاتشيلين همه..وبعدين يمه تراه كبير هو مو صغير.. وولد يعني العيال مايحبون احد يسأل عنهم او ينشغل باله عليهم.. وان شاء الله مو صاير له شئ..
ام خالد: كانها تواست من كلام بنتها بس ودها احد يهدي عليها ويطمنها لان بالها مشغول مره عليه وحاسه انه صاير له شئ..ومن يوم ما قالت عهود لامها ان خالد مو جاي البيت وهي تحن فوق روس بناتها عشان يعلموها وش اللي صار.. بس هم انكروا ان فيه أي شئ وقالوا لها تعوذي من ابليس.... وحاولت ابو خالد انه يشوفه يسال عنه بس مو راضي يقول هو رجال..مايصير نسال عنه... بس ماهي مطمئنه ودها لو تشوفه ..لو نظره تحس انه بخير... أي شئ عنه يبشرها انه بخير...
عهود: ها يمه وش قلتي؟
ام خالد: بايش؟
عهود: اقولك ما يخالف اكلم بالتلفون
ام خالد: ايه بس لاتطولين...
عهود: ابشري يمه...واتصلت على صديقتها نوف...
ام خالد ما هي متمطئنه مشت بخطوات ثقيله ببطء وجت بتخرج من الصاله بس ما طاوعها قلبها لان املها كبير بانه يدق.. وعشان جواله طول الوقت مغلق..والا كان باليوم اكثر من مره تدق عليه.. رجعت عند عهود وقالت لها..
عهود يمّه لاتطولين يمكن يدق
عهود ما قدرت ترجع وتعيد نفس الكلام ..مع ان بداخلها حاسه بامها وحاسه بالخوف والقلق الي عايشته امها..واتبي تاكد لامها هالشعور وما تبي تحسس امها بانها منشغل بالها عليه لانها قالت اللي عندها بالاول وماتبي ينعاد هالكلام وبنفس الوقت شفقانه على امها حيل..ودها تساعدها باي شئ..
ردت على امها بابتسامه عاديه خاليه من أي تفسير لام خالد: ابشري يمه...
وردت تكلم صديقتها نوف....لانها اتصلت وما مداها تتكلم الا وامها قاطعتها..
عهود: ايه نوف وين وصلنا...
نوف: عهود لايكون امك تبي التلفون
عهود: لا امي ماتبيه..اصلا امي ما تكلم بالتلفون كثير.. واذا دقت تدق على خوالي يوم الجمعه...
نوف:ههههههههه... اشوى.. ايه وصلنا عند سلمان...ما كملتي لي السالفه يوم تحكينها بالجامعه وتجي سيارتي واخرج..
عهود: ايه صح ما كنتي موجوده..وتحمست عهود وهي تحكي لنوف السالفه...اسكتي بس.. لو تدرين ذاك اليوم.. الصراحه قلبي وقف.. قسم بالله احس ان شعري وقف من الخوف
نوف تستهبل: أي شعر
عهود:ههههه..ملزمه تعرفين
نوف: اكيد
عهود: منب قايله..كل شعري وقف...خايفه احد يكشفني اويدخل علي سلمان..انواع الفشايل؟؟ المهم افتح درج تحت سريره.. وشكله درج خاص.. استغليت الفرصه كلهم مسوين سناعه ورايحين المطبخ..وخلود وليلى جايبين فلم هندي مدري من وين ويشوفونه... تخيلي يعني واحد ماتدرين عنه ولاشئ غامض هالسلمان..حتى خواته مايحكوني شئ عنه...ولايسولفون عنه كثير مثل احمد..المهم فتحت الدرج بشويش وطبعا كنت مسكره باب الغرفه ومحد فقدن..على بالهم اني بالملحق افتش ورى العيال..متعودين علي..حتى عيال خالتي لاجيت ضفوا كل اغراضهم اللي بالملحق..يدرون اني اتفقد اماكن العيال..ودايم يتطنزون عليّ بس ما علي منهم..اهم شئ اعرف وش ورى العيال...عاد اول مافتحت الدرج..الاقي اشرطة اغاني بس الغلاف من دون الشريط.. وتجراف لونه احمر.بس قماشه شئئئئئئئئ..مدري وش اسمه بس غالبا بالهدايا اشوفه
>>نوف داخله جو بالسالفه ومتحمسه عل الاخر.. ايه كملي وش شفتي بعد
عهود: وش تقولين انتي...نظري سته على سته ... الحمدلله والشكر...
نوف:عهود والله مني رايقه لمزحك الثقيل تكفين كملي
عهود: اصلا ولا انا رايقه لاني صدق متحمسه بالسالفه
وتكمل.. المهم حاولت افتح التجراف مو راضي ينفتح مثل الحبال عليه مدري شلون صايره..وعشان كذا مايفتح..وما ابي افتحها بعدين يعرف..حاولت افتحه شوي بس اشوف مكتوب فيه شئ..من هنا من يمين ومن شمال..لو كلمه..بس مرررره ما طلع معاي شئ.. لقيت سديهات واحد مكتوب عليه منوعات وواحد برامج الويندوز وخرابيط الحاسب والباقيات مو مكتوب عليها ولا شئ..بس واحد لقيته باخر الدرج مكتوب عليه(خاص جدا) ياربي مره اللقافه ذابحتني ودي اعرف وش فيه ولاجبت اللاب توب اشوف..واخاف يفقده لو اخذته..وتدرين العيال بهالاغراض مافي احرص منهم..المهم تركته مكانه وقلبي يتقطع حسرة والما ولقافه عشان اعرف وش محتواه... وبعد ين وش تتوقعين لقيت
نوف: وش لقيتي
عهود: توقعي
نوف: مما بالي شئ...ومن الحماس قالت: اليوم عقلي عاطل عن التفكير
عهود: اجل ماينفع اكمل لك السالفه اليوم..اذا عقلك مو موجود...
نوف: تكفين ما اقدر والله من اللقافه ما اقدر انام
عهود: مره مايمديني..جربي ليله بدون نوم..عشان تتفكرين في نعمة النوم..
نوف: بلا بياخه عهود كملي..
عهود: رحمتك والله..بس بكره او بالجامعه ازين اعلمك..لاني كنت ناويه ما اعلمك موليا..بس هونت..
نوف: والله انك بايخه.. من جد يبي من يكفخك.. بس هيّن خليها تجي سوالف مثل كذا انواع النذالة بتشوفينها...
وبعدين كملت بحسرة وطنازة على نفسها: المشكله اني خبله اعلمك بكل السالفه بعدين اتذكر
عهود:هههههههههههههههه... يالله عنوني امي فوق راسي اكلمك بعدين او بالجامعه المحاظره الثانيه ماعندنا شئ اقولك وش لقيت..بس ذكريني..مع السلامه
نوف: مع السلامه..
عهود ما كلمتها امها ولاشئ بس تشوف نظرات امها اللي تقطع القلب ... وامها تعرفها زين ماترجع وتعيد الكلام وبنفسها وودها تتكلم..بس نظراتها تكفي.. من يوم ماشافتها تروح وتجي على الصاله وتناظر عليها انتهت من المكالمه والا لا..عشان كذا انهت المكالمه بسرعه لانها خافت مره على امها..وحالتها ماتسر لاصديق ولا عدو..هذا قلب الام مابيدها شئ..الله يهديك يا خالد تعال وريح امي...
*****************

عائلة ابو سلمان...
خوال عائلة ابو خالد..
حنان: اكبر وحده بعائلة ابو سلمان.. عمرها 26 سنة ممرضه..بعد الثانوي دخلت كلية التمريض سنتين وكانت متفوقه ولقت تعيين بسرعه..تحب عملها مرّه.. وتشتغل في مستشفى حكومي...ملتزمه مره اكثر وحده من عائلتهم ملتزمه..

سلمان: اكبر ولد عمره 25سنة ..اخر سنه بالجامعه..المفروض انه منتهي من الدراسه بس اهماله رسب سنتين..

احمد: المفروض يكون بثاني جامعه بس اللحين بثالث ثانوي.. السنة الثانيه اللي يعيدها.. عمره 20سنة.. بايع الدنيا ومايهمه شئ اهم شئ وناسته حتى انه اهمل بعض حقوق اهله ..ومتأذين اهله من طناشته الزايده عن اللزوم...

ليلى:بثاني ثانوي..عمرها17 سنة صديقة خلود الروح بالروح..كل اسرارهم عند بعض.. وصديقات كل وحده متعرفه على الثانيه.. وداخلين كلهم قسم ادبي يقولون اسهل ولازم مثل بعض.. بس كل وحد بمدرسه لان كل وحده داخله المدرسه القريبه من بيتها.. يحبون يقعدون الحالهم كثير وبس يسولفون مع بعض ومايخلون بخاطرهم بشئ الا قالوه لبعض..واغراضهم حت المدرسه مثل بعض يشترونها وكل وحده اذا لقت شئ زين اشترت للثانيه..

رانيه:بثاني متوسط هاديه مره وماتسولف كثير..غالبا تكون مستمعه الا اذا احد سألها تجاوب.. واللي بعمرها مبسوطين لانهم لقوا احد يسمع لهم.. عمرها14سنة..

خرج احمد من غرفته وراح لغرفة سلمان دق الباب ويسمع صوت سلمان من الغرفه يقول:مين؟
احمد: انا احمد
سلمان:بشر امك..وش تبي؟
احمد:اقول افتح الباب
سلمان:الباب مفتوح
احمد: يمال المنيب قايل وفتح الباب..ولقى سلمان يحوس باحد ادراجه قرب عنده وقال:تبي مساعده حاضرين احنا
سلمان:ابعد راسك هناك..لو تترك اللقافه هذي افضل مساعده... وسكر درجه وراح قعد جمبه على السرير...
احمد:اخوي الكبير وتمون...
سلمان:خير وش ورى هالادب
احمد..بلا مقدمات ولا لف ودوران قال: ابغ فلوس
سلمان:والله اني شاك يا رجال خاف ربك امس معطيك300 ريال
احمد:والله امس العشا علي .. وعبيت بنزين.. وشريت لي طاقيه وتيشرت
سلمان: ماشاء الله مسلسل هندي قلبتها..الكشخه الزايده بطلها .التيشيرتات مليانه بدولابك.. والعشا ماله لزمه انت بطل فزعات وتمسك فلوسك
احمد:يعني..
سلمان:وش قصدك
احمد:بتعطيني والا لا
سلمان:لا
احمد:طيب هالرجه والزحمه اللي سويتها اللحين ليش من الاول قول وخلصنا
سلمان: ابيك تمسك قروشك يا الخبل
احمد ولا كلف نفسه يلتفت له خرج من الغرفه وترك الباب مفتوح عشان ينقهر سلمان ...احمد ولا اهتم بكلام سلمان ولا اثر فيه وعشانه اخذ المصروف الشهري من ابوه يعني لو يموت مايعطيه ابوه الا اذا كان محتاج مره..بس دايم ياخذ من اخوه سلمان واخواته دين وغالبا مايرجع الدين...راح لغرفة اخته حنان.. دق الباب بشويش..
حنان:ادخل..
احمد: السلام عليكم..بابتسامه عريضه...
حنان:وعليكم السلام.. ردت الابتسامه بهدوء... سكرت الكتاب اللي كانت تقراه ونزلت نظراتها اللي كانت عليها...
وناظرت احمد..اللي قال بسرعه..ما في ادخل تفضل
حنان: تفضل..
جلس احمد بالكرسي اللي مقابل حنان وقال ببرود وبلا اهمية او خجل
احمد: بدون مقدمات محتاج فلوس
حنان ابتسمت لاحمد وردت:كم تبي؟
احمد:تعجبيني انتي مو هالبخيل سلمانوه...
حنان:ردت بهدوء:والله انت اللي مسرف..اذا لاقدر الله مابقى لك سلمان والا انا شلون تتعود على المصروف..
احمد:تفائلوا بالخير تجدوه
حنان: لا والله صدق اتكلم ماشاء الله المصروف بالنسبه لك زايد شوي تقدر تدير مصروفك... اما اذا اتعودت على الصرف..ماتقدر تدير فلوسك لو دخلت الجا معه او بعدين اذا توظفت..
احمد: طيب ان شاء الله بس اللحين ابغ فلوس ومستعجل...
حنان:الله يهديك
احمد:امين
حنان: كم تبغى
احمد:انتي كريمه وانا استاهل
حنان:تكفيك خمسين
احمد:وش تسوي ذي ولا بنزين
حنان:ميه
احمد:ولاميه
حنان: كم؟
احمد:يعني خمسميه..ثلاثميه..حق ثلاث ايام
حنان:ول عليك هذا والوجبات الاساسيه بالبيت ومصاريف الدراسه من ابوي.. عموما انا باعطيك ثلاثميه غيره مافي وخليها لاخر الشهر ترى مافي احد بيعطيك...
احمد:خلاص ان شاء الله بس بسرعه بالله...
حنان:طيب واعطته الفلوس وخرج بسرعه من عندها... بس خرج احمد غير عرف ان اخته صادقه وشديده معاه وامه ماتعطيه لان ابوه قال لامه لاتعطينه ولا شئ الا باذني..وسلمان تهاوش معاه..يعني لازم يهتم ومايصرف يمين وشمال...
احمد ما يهتم بالمصاريف ومن وين وكثير يتسلف من سلمان وحنان واحيان يضطر ويكلم ابوه.. مايهتم بالحياة وبحقوق الاهل..اهم شئ وناسته مع العيال وبس ومرات يسهر لاخر الليل واحيانا اليوم كله ماينشاف..وابوه يكلمه بس مو شديد عليه يكلمه بشويش وبهدوء الين كبر وتعود على هذا الوضع وتعودو اهله عليه..اللي مطايح مقهوره منه صدق وحاسه بالمشكله العميقه اللي طايح فيها احمد هي ليلى بس مي عارفه شلون تكلم امها وابوها ..وحاسه ان حالته زادت الا متى وهو على هالحال متى يعقل..متى يحس بالمسؤلية.. احيانا ترمي عليه كلام ويتهاوشون هي واياه... ويقولها صوتك ما ابي اسمعه..اللقافه بطليها.. وعرفت ان مافيه امل من الكلام معاه.. وهو ولاعبرها ولا اهتم بكلامها ومازال على طيشه وعدم اهتمامه....
************************
اليوم خميس في شقة خالد... قام من النوم وهو وده يرجع ينام مره ثانيه... الاسبوع الي مضى كله يقضي وقته بالنوم ومل من النوم بس هو اللي يبعده عن الحاله اللي هو فيها... صار يتقلب بالسرير يمد لحافه ويغطي اطراف اصابعه اللي كانت باينه وما زال يتقلب بسريره وتذكر انه ما صلى الفجر قام من السرير وهو متعب مره من كثرة النوم ومن كثر انسداحه على السرير... قام هو يتسنّد باطراف السرير وبشويش يقوم .. اول ما قام ظهره اوجعه مره مسك اخر الظهر وعلى اخر الفقرات ضغط بقوه عليها وبدا ياخذ هوا ويكتم نفسه شوي ويرفع جسمه ويوقف باطراف الاصابع بعدين يخرج الهوا ويغمض عيونه بقوه يحس بالالم يخف شوي وهو يتالم مره من اخر ظهره..وتجيه الام بظهره بقوه ويحس مثل النغزات الحاده كأنه سكاكين تجي على اخر فقره وورى بعض وبقوه وهو نادر يجيه مثل هالحاله ...فقد توازنه وقعد بطرف السرير وهو متألم حيل من هالنغزات واهاته مكتومه ويتألم بصمت اللي باين انه يتألم هو انه يغمض عيونه بقوه... وانسدح على السرير وصار يشد على نفسه ويحاول ان ظهره يشده معاه بس زاد الالم مرّه وما تحمل هالشد... قام من السرير وهو يالله يالله يرفع نفسه يحس روحه ثقيل مره.. وقف وحاول يخلي ظهره مستقيم..وشوي شوي تحامل على نفسه وعدل ظهره وخلاه مستقيم وبعدين يميل على جنب اليسار شوي شوي وكل مايزيد بالميلة يزيد الالم الف مره عن قبله ويرجع يميل على جهة اليمين ونفس الالم بس اخف مو مثل جهة اليسار.. بدا يحس بالراحه شوي او خف الألم تحامل على نفسه وراح توضى وصلى الفجر... ورجع قعد على المقاعد الارضية اللي بالصالة اسند راسه على ورى وهو مليان هموم وغموم... اما عينه حمره ووضحت التجاعيد اللي فوق وتحت العين وجسمه ضعف عن اول بكثير ما ياكل باليوم الا قليل بس عشان يقدر يروح الدوام... ويحس بصداع نصفي فضيع ووجهه صاير اسمر من قل الاكل...وصاير يشرب ترمسين قهوه عشان يخف الصداع.. تنهد تنهيده كبيره وقويه يبي يخرج منها همه المتجدد يبي يخرج من باله الشئ اللي صار له مع خواته.. المه الجسمي مايهمه كثر المه الروحي ..خواته..السياره..التمشية اللي كان راسم لها انها احلى تمشية..تغير نمط كلامه..ابتسم وضحك معاهم ..وخلاهم يسون شاهي وهم متحمسين وبالنهاية..اه من النهاية..ليت الزمن يرجع والغي التمشية مره وحده.. اه ليت الاه تنفع.. طعون بصدري عيّت تموت ..كل ما مر عليها زمن اقول انتهت ماتت..راحت..ترجع اقوى واقوى من كل مره.. رجع بالذاكره لورى..تذكر همه وغمه اللي عيّا يموت.. اخر مره اللي قبل خواته كان مع صديقه اسامه..ما كان يمون عليه وطلب منه انه يوصله لبيته ..واتفجأ من اللي شافه وانصدم وتفهم الوضع بعدين..كانت قويه وما اتوقعت ان بيجي اللي اقوى منها.. اه ياربي..يارب طلبتك موّتها او موّتني.. يارب ارحمني يارب.. وقويني على المواجهه الصعبه مع خواتي... كانت تبي تخونه دموعه وتنزل بس ماقدرت الا خالد مايقدر ينزل دموعه ..بكل مره يقول انا ضعيف... هالمره قويه وتحاول الدمعه تنزل بس مايقدر الا الدمعه .. دموع الرجال قمة الضعف اذا نزلت.. قمة الهوان..قمة التحطيم العالي اذا نزلت.. اه... رحمتك ياربي.. وكان بيتصل على امه بس صوته ولا حالته تأهل انه يتصل.. راح شغل قناة المجد وقلب على قناة القران ورفع الصوت شوي ..عشان يرتاح نفسيا لانه من كثر التفكير زاد الصداع وزادت نبضات قلبه.. الشيخ:مشاري العفاسي يقرا بتلاوه خاشعه قطعت تفكيره وريحته شوي.. صار يتابع الايات ويتأمل بالايات.. وبدا يحاول يقرا معاه لانه كل شوي ينقطع تفكيره ويجي التفكير المؤلم.. وتبدا الافكار الشينة براسه وتفكيره يتشوش وترجع له الامه.. و بدا يقرا معاه وبدا يحس بالتحسن.. بدا يحس ان نبضات قلبه هدت..وحس ان الصداع بدا يخف ..زود على صوت التلفزيون...واسند راسه على ورى بس هالمره مرتاح باله.. يحس بالقوه بدت ترجع لعروقه..رجع الدم يمشي بمكانه..حس ان بداخل جسمه كل شئ يتحرك..عاد كل شئ لطبيعته.. صار يقول لروحه لازم انا اتحرك..ارجع مثلهم..انا تعبت وتعب كل عضو معاي وبعدين بفضل الله ارتحت وكل شئ رجع للشئ السابقة الا انا... اللي قدر يسويه بهاللحظه هو اتصاله على امه اللي ماصدقت ان خالد قاعد يكلمها..تسأل عنه وعن صحته ..اتعشيت..اتغديت..ووينك..وشلو نك..وعساك مرتاح.. وترجته انه يرد للبيت...خالد انطعن بكل سؤال توجهه له امه..وكل مايحس بنبرة الحزن اللي بامه يزيد المه الاف المرات.. ويوم ترجته..حس بالام وطعون تجمعت عليه..وصار يقوي نفسه ووعدها انه يرجع بس عنده شغلات مهمه ومضغوط بعمله يخلص منها ويرجع.. اتصاله على امه ريحها كثير وفرحت بهالاتصال ويوم وعدها انه يرجع زاد فرحها مره واطمئنت مبدئيا عليه لانها ما راح ترتاح الا اذا شافته... اما خالد كان بالنسبه له استرجاع للالام واسترجاع لهمه.. وغمه اللي معذبه...بعد يا يمه انا معذبك..حتى انتي الغاليه ماسلمتي مني.. لو تدرين فيني كان ماطلبتيني ولاترجيتيني..امي الحنون تعذبت بسببي..ماخليت احد يرتاح..اه..يارب رحمتك وعفوك يا كريم...خالد وعد امه ولازم يوفي بوعده..يمكن هو مايقدر يرتاح ...بس قام يذكر نفسه انه هو مو مرتاح لا هنا ولا عند امه.. اللي شاغل باله مواجهته مع خواته.. وشلون يرجع عندهم ويسكن معاهم..يارب قويني وخليني امسك اعصابي...وقويني اكثر يارب...

--------------------------------------------------------------------------------