3
-
لاحول ولاقوة إلا بالله
.
((بيت ابو عمر1))
كحالها المعتاد تستسلم بدون اي مقاومة تفاديا (للمشاكل)على حسب ظنها رغم انها وبكل أسف تعيش فيها جالسة عند باب المطبخ على امل تفتح لها رغد ولهيب الشمس اظهر تأثيره على جبينها اللي تبلل بقطرات العرق الظاهر عليه التفتت وهي تسمع صوت ضحكاته ابتسمت بفرحة وهم الشي الوحيد المتبقي المبهج بحياتها وقفت وهي تمشي وتبعد عن هالممر اللي يفصل بين بيوتهم
غياث صاحب السبع سنوات وبالصف الاول الابتدائي راجع من مدرسته وهو يضحك بصوته العالي واتسعت ابتسامته وهو يناظرها بطرف الممر وبصراخ وناسة/فتتتنننننةةةة!!
فتنة فتحت يديها له
غياث جرى لها وارتمى بحضنها بحماسه
فتنة بابتسامتها/وش فيكم تاخرتوا اليوم؟
غياث تركها وبزعل/يعني ماتعرفين تركي دايم يأخرنا ننتظره الى مايخلص
أصيل وقف جنب غياث وهو يشوف نفسه كبير رغم انه صاحب التسع سنوات رفع يده/السلام عليكم
فتنة بابتسامة/وعليكم السلام والرحمة هلا هلا بتاج راسي اصيل هلا
اصيل خجل من كلمتها ومد يده يسلم عليها
فتنة صافحته وهم تكتم ضحكتها
راجح داخل وهو رافع شنطته فوق راسه يستظل فيها مر من عندهم
فتنة رفعت صوتها/السلام اجر ياعباد الله
راجح لف واتجه لهم ووقف جنب اخوانه ومد يده/السلام عليكم
فتنة صافحته/وعليكم السلام والرحمة
راجح/تعرفين شمس وانا ماااطيق الحر اموت
فتنة ضحكت بخفة وهي تناظر خدوده اللي بتنفجر من لونها الاحمر/مايحتاج تقوله اعرفك
راجح/هيا لاتزعلين اذا ماسلمت
فتنة/الا والله بازعل!!
راجح اتسعت عيونه/ليش!!
فتنة/حبيب قلبي مر وماسلم علي!!
راجح ماعرف يرد
غياث بغيرة/مو انا حبيبك!!
فتنة/والله كلكم حبايبي واموت عليكم
تركي(13سنة)وقف على مسافة منهم وبتكشيرة/وبعدين معكم انتم هاه!!امي تنتظرنا وانتم واقفين هينا يالله قدامي
فتنة تضايقت وحاولت تكون عادي/هلا ياتركي وحشتني والله وشلونك عساك طيب
تركي/الحمدلله طيب
فتنة/اليوم مسوية حلا يحبه قلبك تعال العصر يكون بارد تمام
تركي/ماابي مشكورة/وبحدة لاخوانه/خلصوني امشوا يالله قدامي بسرعة
فتنة ميلت فمها بزعل من تصرفاته بهالفترة والتمست العذر بمراهقته اكيد
غياث همس/بقي لي قطعة انا ابي
فتنة ضحكت/تعال العصر قطعتك جاهزة
طلال دخل للبيت بلبسه العسكري واحتدت نظرته وهو يناظرهم وبصراخ/يالله عند امكم ناقصين شموس بعد يكفي شموس يالله
//العيال اسرعوا بخطواتهم للبيت//
فتنة تضايقت من تعامل طلال معهم
طلال اسرع لها بخطواته ووقف قبالها وهو يمسكها من يسارها وضغط عليها بكل قوته
فتنة تالمت بصوت وهي تحس بها انكسرت بين اصابع يديه/طلال طلال
طلال بعيون بتخرج من مكانها/وش عندك بالحوش بهالظهر هاه!!ولا ناوية على شي يـافـتـنـة/ضغط عليها اكثر وبصرخة/انطقي
فتنة بكت غصب من قوة الالم وهي فوق ألمها طلع صوت طقت يدها/والله ماسويت شي انقفل الباب والله ماسويت شي
طلال ترك يدها وهو يدفها بنفس الوقت
فتنة ضربت بالجدار وراها/وانتي كل بعد كم يوم ينقفل الباب!!/قرب منها وهو يضرب راسها بطرف اصبعه/وش هالباب اللي ينقفل على هواك هاه/ضربها على راسها/هاااه!!
ام عمر فتحت باب المطبخ وخرجت وهي عالباب للحين ابتسمت وهي تشوف طلال/هلا يمّه هلا رجعت ادخل عن الشمس يمّه ادخل
طلال مسك فتنة من يسارها وسحبها له
فتنة كتمت المها لكن فضحتها دموعها
طلال بعصبيته/وش تسوي ذي برا يمّه هاه تاركتها بلا حسيب ولا رقيب
ام عمر تنهدت/مو انا نزلت لان عمر قالي انه قفل عليها برا لانها تلفظت عليه ومايبي يذبحها عاللي قالته
فتنة ناظرت امها بعيون متسعة من الصدمة همست/أنا!!
طلال دفها من يده/كان كسرها عظم عظم ولايتركها برا على هواها!!
ام عمر/تعال يمّه الدنيا نار وانت راجع من دوام تعال الله يصلحك تعال
طلال ناظرها وبحدة/امشي قدامي يالله
فتنة مشت وهي تخنقها العبرة كيف تبدل حالهم لهالدرجة
طلال يمشي وراها دفها لقدامه
فتنة تقدمت بخطوات سريعة ووقفت قبال امها اللي معترضة طريقها
ام عمر زفرت وهي تدخل للمطبخ
فتنة دخلت
طلال دخل وقفل الباب وراه بالمفتاح
ام عمر فتحت يديها له
طلال انفكت تكشيرته وارتسمت ابتسامة جانبية وهو يناظر امه واسرع لها بخطواته وارتمى بحضنها
ام عمر/يومين يالظالم يومين ماتتصل حتى!!
طلال بابتسامة/يمّه تدرين بي مستلم مـاهـو على هواي/تركها وهو يبوس راسها ويدها وحط يده على كتف امه يحضنها ويمشون وهم يسولفون بين بعض بحب ونسوا ذيك العيون اللي تناظر لهم بشوق وتمني كم تمنت وتمنت كم بكت وهي ترتجي لمسة ماطلبت حتى هالحضن كيف بعثرت مشاعرها بهاللحظة وهي تشوف حضن يخالطه مشاعر شوق ووله وحب وفوقها ابتسامة من اتسعها بينشق الخدين
فتنة بكت من قلبها بحسرة/وش بيصير يمّه لو كنت بمكانه دقيقة وش بيصير؟
ـــــــــــــــــــــــــ ـــــــــــــــــــــــــ ــ
المغرب
ـــــــــــــــــــــــــ ـــــــــــــــــــــــــ ــ
((بيت ابو عمر))
//كعادته ابو عمر فاتح باب بيته على وسعه وعلى يمينه بيت الشعر اللي يعتبر اكبر من بيتينه الاثنين مرة وحدة وريحة البخور وشبة النار والقهوة اللي تغلي فوقها مختلطة بهالمجلس//
ابو عمر ناظر لعمر اللي عن يمينه يسولف مع احد جيرانهم والتفت يساره وهو يناظر طلال اللي واضح على وجهه التعب ماارتاح من دوامه للحين ثم ناظر لعياله الصغار تركي وراجح اللي يبخر واللي يجهز يوزع التمر ثم ناظر لريان اللي جالس يقهوي كم جار اجتمعوا عندهم/ولد ياريان
ريان التفت لابوه/سم يبه
ابو عمر/رح لابو فواز قلّه ابوي يحتريك بالقهوة
ريان/يبه بس هو دايم
ابو عمر قاطعه بحدة/رح ياريان ولايكثر
ريان تنهد/ابشر يبه ابشر/التفت يناظر تركي اللي بيده البخور/تركي
تركي نزل المبخرة عند طلال واتجه له/سم
ريان مد له الدلة وهمس/كمّل وانتبه لاتجيب العيد
تركي هز راسه/ابشر
ريان مشى لبيت ابو فواز وهو يتحلطم/دايم مايجي غير بعزيمة وهو الباب عالباب يعني مايشم ريحة النار ويفكنا من التعب يعني!!حسبي الله عليه الله يشغله مثل مااشغلنا به ابوي
.
((شقة ساجي))
ساجي جالس عالارض عالسجادة اللي تتوسط هالغرفة قباله صحن الحلا وصينية القهوة مقطب جبينه وهو يتقهوى يناظرها بشكه ويشيل نظره وقت تنتبه له
سدول متربعة عالكنبة المفردة بلونها البيج وهي تقلب بجوالها
ساجي/ماسالتيني يالحب اليوم
سدول رفعت نظرها له عن الجوال وباستغراب/عن ايش!!
ساجي/عن الدوام!!
سدول تنهدت وهي ترجع عينها على جوالها/يقولون فيه واحد ملقوف تلقف بفتحة وانحشر فيها ومات
ساجي ارتفعت حواجبه وارتسمت ابتسامة سخرية جانبية/والله!!
سدول ناظرته من جديد وهي تعتدل بجلستها وترمي جوالها عالكنبة المفردة اللي جنبها وضرب بيد هالكنبة وطاح عالارض
ساجي بلع ريقه وهو يناظرها
سدول بابتسامة تخفي وراها تعصيبتها وهي تعرف حركاته/حبيبي وش عندك قول؟
ساجي/لا ولا شي بس اشوف خاطرك مو طيب
سدول ابتسمت وهي تنزل من الكنبة وتجلس عالارض قباله وبينهم الصينية واخذت ثلاجة القهوة ومدت يدها له وحط فنجاله وصبت القهوة وعينها عالفنجال وهي تتكلم/الخاطر بفضل الله بخير وطيب دامك قدامي ومبسوطين/مدته له/تفضل
ساجي مد يمينه ومسك معصم يمينها اللي مادة بها الفنجال له واخذ الفنجال بيساره ونزل فنجاله من يده وهو يرفع كفها له ويبوس باطن هالكف/ياعساني ماانحرم منك بيوم ياعيون ساجي
سدول زفرت بابتسامة وهي تناظره/ولايحرمني منك ياحبي كله والحين قولي وش اللي تبي تقوله؟
ساجي تنهد وهو يضم يدها بين يديه وعينه عليها/هو فيه شي بس ان شاء الله انه بسيط
سدول تخفي توترها ورا ابتسامتها/قول ياحبي متى عارضتك بشي
ساجي/تركت الدوام
سدول انصعقت وهاذي الوظيفة الخامسة اللي يتركها خلال هالسنة احتفظت بابتسامتها وهي متزلزلة داخليا من اللي سمعته/وش المانع ياحبي؟
ساجي للحين مارفع عينه بعينها متوتر من ردة فعلها/ماارتحت للحين مالقيت المكان اللي احس نفسي فيه
سدول بشعور مرير خلف ابتسامتها/طيب ياحبي كان بقيت بهالوظيفة واذا انتهى الدوام تشوف المكان اللي يناسبك هو كله على بعضه هالدوام خمس ساعات ونادرا تتاخر اكثر من كذا هي كم مرة بس تنعد عاليد
ساجي حل عليه احباط الدنيا كلها من كلامها ضغط على يدها ورفع عينه لها مستجمع شجاعته/هالوظيفة احسها حبل ملتف حول رقبتي يخنقني كل يوم يمر علي وانا بها ماقدرت اتحمل والله ماقدرت اتحمل اكثر
سدول زفرت/طيب وش ناوي عليه الحين؟
ساجي بحماس/انا خاطري والله خاطري افتح لي محل باسمي محد يتامر على راسي ومتاكد مليون بالمية بتزين اموري ووقتها والله ماتخطين بهالرجل الا على جوري مفروش بدربك ياعين ساجي وتامرين امر ياسدول/اشر على عيونه/من هالعين قبل هالعين
سدول بابتسامتها/تسلمي هالعيون وراعيها وانا متى عارضتك بشي سوي اللي تبيه وانا سندك ياحبي
ساجي فز على ركبه جالس وهو يدف الصينية عنهم ومد يده ليدها وسحبها لحضنه
سدول تحركت مع سحبته وارتمت بحضنه
ساجي ضمها بكل قوته لصدره/والله والله انا بدونك اضيع ياسدول والله انتي دعوة الخير وربي استجابها لي
سدول بحضنه تمسح على ظهره بهدوء مرتسمة ابتسامة ظاهرة على وجهها وداخلها عواصف كره للدوامة اللي تنعاد كل فترة
.
((عند العمارة اللي بها شقة نايف))
نايف وقف بسيارته بموقفه الخاص غارق بافكاره وبملامح تملاها الضيقة والنكد ماحصل له اي أثر فقد الامل تماما بأنه يحصله له قرابة الخمس ساعات وهو يدور عليه بيموت من كثر تفكيره وين ممكن يروح وهو مايعرف احد بهالديرة نزل من السيارة وعينه بالارض وقف على مسافة من باب العمارة الرئيسي واختلطت مشاعره وسط صدمة وفرح ومو اي فرح بشوفته من جديد جرى له ووقف قباله
سلطان ناسف شماغه اللي بدون عقال اي كلام وهو جالس على طرف درج باب العمارة الخارجي عينه عالارض وهو ينتظره يخرج من بيته رفع عينه يناظر صاحب الخطوات اللي كان متجه له ووقف ابتسم وهو كله احراج/انت برا!!ظنيتك داخل
نايف ارتسم الغضب على ملامح وجهه وأسرع بخطواته له وهو يرفع يمينه يدف بها كتف سلطان اليمين بتعبير عن غضبه اللي وصل اقصاه
.
سلطان زفر بابتسامته/تروعت!!افا يالقلب الرهيف!!
نايف عض طرف شفته السفلية وهو يجمع قبضته ويرفعها بيكلمه من كثر قهره والخوف اللي عاش به
سلطان مسك يده وبنفس ابتسامته/افا!!ترفعها بوجهي!!ماهقيتها منك
نايف تبدد غضبه كله وارتخت ملامحه بندم على تصرفه
سلطان/يحق لك يحق لك تزعل ومالي لوم عليك لكن يانايف
نايف قطب جبينه
سلطان ضحك بقهر على نفسه/نويت الهجر والصدة وابتلشت ماعرف شي الدنيا غير الدنيا اللي اعرفها يااخوك
نايف وقفت غصته بحلقه ورسم ابتسامة غصب حتى يخفيها
سلطان وهو يحك طرف دقنه بابتسامة/قلت أسنع نفسي بنفسي/ضحك بخفة/وهذاني رجعت لك خيبان ولا شي اعرفه
.
((بيت الجدة سدول))
الجدة سدول بغرفتها اللي باللون الابيض بفرشة(موكيت)باللون البني يغطي كامل الغرفة جالسة على سريرها الحديد البني بتصميمه القديم لابسة عبايتها وطرحتها قبالها مرايتها الدائرية الصغيرة وكحلها بيدها كحلت العين اليمين وتكحل اليسار بهالوقت
سجايا دخلت وبيدها المبخرة وبابتسامة وهي تناظر جدتها/الله الله وش هالزين وش هالزين
الجدة سدول/اذكري الله عوذا من عيونك
ذهب ضحكت بخفة وهي تدخل ورا سجايا وبيدها ثلاجة قهوة جاهزة
سجايا/ماشاء الله ماشاء الله بس ياجدة عيني باردة والله ماتذبح بس ماقلتي اي هالزين كله لمين/غمزت لها/حاطة العين على احد؟
الجدة سدول سحبت عكازها وهي بتضربها
سجايا وهي تبعد عن جدتها بفزع/جدة ياجدة البخور يطيح وينحرق شقا عميرك تعوذي من ابليس
الجدة سدول/هب من لسانك ماقبلنا قولك كله اعوذ بالله منك يابنت جابر اعوذ بالله
سجايا جلست قبالها بالضبط مايفصل بينهم شي غير هالمراية الصغيرة ومدت لها البخور/تبخري يالزين كله
ذهب وقفت جنب السرير جنب جدتها
الجدة سدول ناظرتها وهي للحين ماخذتها وبنظرات حادة/كله من حلالي؟
سجايا/اي والله ماجبت شي من بيتنا
الجدة سدول ناظرت ذهب
ذهب/كله من بيتك ياجدة والله ماحطيت شي من بيتنا
الجدة سدول زفرت براحة/ايه اشوا/اخذت المبخرة وهي تتبخر/
سجايا/جدة وش مزعلك من ابوي يالحب انتي هاه
الجدة سدول وهي تتبخر/علوم الكبار مالهم بها الصغار
سجايا/من هو عينك اللي زعل منها ابوي؟
ذهب قطبت جبينها
الجدة سدول رفعت عيونها لها بتكشيرة
سجايا/من هو اللي يغار منه ابوي
الجدة سدول/ووش عرفك انه رجل!!
سجايا/ايه لو هي حرمة مازعل ياجدة
الجدة سدول نزلت المبخرة ومسكتها من اذنها وشدتها
سجايا/ااه ياجدة اااه
ذهب تناظر جدتها بشك
الجدة سدول/وانتي يالملقوفة وش عليك هاه؟/شدت اكثر/ووشو له تتسمعين لنا هاه؟
سجايا/والله مو بقصد ياجدة مو قاصدة
الجدة سدول تركت اذنها وضربتها على فخذها بقوة/والله والله ياالسجية ان اقص اذانيك واعلقها برقبتي ان عدتيها سمعتي؟
سجايا/طيب طيب توبة توبة
الجدة سدول وهي تمد المبخرة لسجايا وبنرفزة/ذهب جيبي الشنطة الصغيرة
سجايا اخذت المبخرة وهي مبوزة
ذهب/ان شاء الله/مشت لدولاب جدتها اللي باللون البني وعبارة عن قسمين فقط جهة تعليق والجهة الثانية منه ارفف واسفل هالارق درجين ينسحبون سحبت الدرج الاول وخرجت الشنطة الصغيرة السودا واتجهت لها ومدتها/سمي ياجدة
الجدة سدول/سم ربي عدوينك ياذهبة القلب قولي امين
ذهب بابتسامة/امين
الجدة سدول خرجت مبلغ مالي منها مزموم على بعضه
سجايا طارت عيونها/جدة
الجدة سدول ناظرتها بتكشيرة/اذكري الله
سجايا/ذاك اليوم اطلبك عشرة حقت التوصيل تقولين مامعي واكلتي معنا!!
الجدة سدول بتهديد وهي تحسب المبلغ/والله لاقول لفواز هين
سجايا بتكشيرة/خلاص لاتقولين عليك بالعافية بس والله ماتوقعتك بخيلة المرة الجاية ماادفع عنك سمعتي ياجدة
الجدة سدول اخذت منه خمس مية ريال وربطتها بطرف طرحتها والباقي مدته لذهب/اعطيه لثابت هو يعرف راعيه
ذهب/ابشري ان شاء الله
الجدة سدول وقفت وهي تلبس نقابها
سجايا/وين رايحة؟!!
الجدة سدول وهي تسرع بخطواتها رافعة عكازها بيد وبيد ثلاجة القهوة/ووش عليك مني!!الله من ذَا البزر اللي مناشبني!!
سجايا ضمت جدتها/وازين عجيزنا وازينها
الجدة سدول دفتها عنها/انقلعي عني هناك خليني اروح لمسياري/اسرعت بخطواتها لباب البيت ووقفت وهي تسمع دق الباب والتفتت لسجايا/تنتظرون احد؟!
ذهب/مدري
سجايا قطبت جبينها/من متى ابوي ينتظر احد!!اكيد جارنا راسل عياله كالعادة
ريان ورا الباب بحلطمة/وبعد مايفتحون/رن الجرس من جديد بيد ودق الباب بيده الثانية/
الجدة سدول/ادخلوا انتم وشو له لاحقاتني للباب انا بتفاهم معه يالله
//ذهب وسجايا اتجهوا للبيت وسط حلطمة سجايا//
الجدة سدول فتحت الباب
ريان على جنب الباب/مسيتي بالخير ياخالة
الجدة سدول ورا الباب/مسا النور وش بغيت؟
ريان/بغيت تقولين لعمي ابو فواز حياه عالقهوة
الجدة سدول وهي تفتح الباب/ماله داعي انا عنه
ريان انصدم/هاه!!
الجدة سدول خرجت من البيت ومدت له الثلاجة/امسك ياولد
ريان بصدمته ماعرف يتصرف اخذها
الجدة سدول/ودها للحريم لاتوديها للرجال سمعت؟
ريان/ان شاء الله
الجدة سدول مشت وراه بمسافة/عسى مابه ضيوف واجد؟
ريان/حياهم الله جميع
الجدة سدول/ايه ايه ماشاء الله الله يكثر خيركم ياولدي
.
((شقة سراج))
//شقة سراج تفتح على مدخل خاص بها وحوش به مراجيح لعياله//
علا تدف علي بكل قوتها وسط صوت ضحكته العالي اللي يملى المكان
عاصم بزعل/وانا؟!!
علا/انت اخدم نفسك
عفاف وعزام بمرجيحة الكرسيين المتقابلين يلعبون بهدوء لوحدهم كعادتهم
سحايب بقميصها الروز الوردي الهادي وتورينا يغطي شعرها فارشة فرشتها قبالهم وقهوتها وحلاها قبالها تناظرهم بسعادة وهم يكفونها بهالعالم/علا حرام عليك ذبحتي اخوك بكثر الضحك اتركيه خليه يلعب لحالها ذبحتيه شوي يبكي من بطنه اتركيه
علا تركت علي وهي تلهث ومشت لامها وهي متخصرة/يمّه هو ينبسط كذا ليش تخاصميني عليه
علي نزل من المرجيحة وجرى وراها وهو يحاوط يديه على رقبتها ويضمها من ورا يبيها ترجع تلعب معه
علا ضحكت وهو اطول منها بشويااات ومسكت يدينه بيديها تثبتها على رقبتها وانحنت وهي تضغط على نفسها رغم ثقله عليها ودرات به وهي تصرخ/طيااااااررررةةة
سحايب بصراخ/يامهبولة بتذبحين نفسك هو اثقل منك بيجيك انزلاق يالخبلة
علي ارتفع عن الارض وهو يطير من دورانها فيه واعتلى ضحكه بوناسة
سحايب سكتت بوسط ابتسامة وهي تطالع وناسة علي المسكين/استودعتكم الله
عاصم جلس على يمينها وهو يتكي بيده على رجلها وبزعله الطفولي/يمّه علا كله تلعب مع علي وانا ماتطالع فيني
سحايب وهي تفتح يديها وتضمه لحضنها/يمّه يمّه من عاصم يمّه انا العب معك جعل عيني فدا لك ياعين سحايب
عاصم ابتسم برضا وهو بحضنها
سراج دخل هالمرة من المدخل الخاص عكس عادته وهو يسمع اصواتهم واتسعت عيونه وهو يناظر علا وعلي صرخ بصوته العالي/وووججعع ياعيال سحايب وووجعع
.
((شقة بجاد))
بجاد رجع من استلامه ببذلته العسكرية بتكشيرة على وجهه من تعب دوامه دخل للبيت واستقبلته ريحة البخور والقهوة اللي متعود عليها بهالوقت انشرح صدره وارتسمت ابتسامة زاد عرضها وهو يسمع ضحكاتها مع عياله دخل للمقلط اللي مكان جلستهم المعتادة وبابتسامته/السلام عليكم
منايا اختفت ابتسامتها ونزلت نظرها للاغراض اللي قبالها
وعد فزت من مكانها وهي ترمي كتابها عالكنبة جنبها وجرت لابوها بكل حب/يبه
عهد نزلت من الكنبة وجرت وراها بضحك/بابا
بجاد فتح يديه لها/ياعين ابوك ياهلا
وعد ارتمت بحضنه تضمه لها
بجاد انحنى لمستواها وضمها له بيد وضم عهد اللي حاوطت رجله اليمين بيديها الصغيرة بيده الثانية بوسط ابتسامته
وعد تركته وهي ترفع نفسها وتبوس على راسه وسحبت يده تبوس كفها
بجاد برضا/الله يرضى عليك ياوعدي
عهد تشده/انا انا
وعد انحنت لها وشالتها ورفعتها
بجاد بضحكة خفيفة انحنى وهو يقرب لها راسه
عهد باست راسه
بجاد اعتدل بوقفته/الله يرضى عليك ياعهدي
وعد نزلتها عالارض
عهد مدت يديها الصغيرة ليده وباست ظهر كفه
بجاد مات من رقة البوسة الصغيرة وسحبها لحضنه وبحب وهو يضمها وبذات الوقت يطبع بوسات على وجهها وسط ضحكاتها/يمّه يمّه ياعهدي عساني مااشوف فيك حزن عساها كلها افراح
منايا ناظرت سلطان وهي مميلة فمها تعاتبه بصمت
سلطان زفر وهو ينزل جواله ووقف وهو يتجه لابوه ووقف قباله وسلم على راسه/عالقوة يبه
بجاد/الله يقويك
سلطان رجع طريقه لمكانه ووقف وهو يناظر امه اللي تناظره بنظرات حادة/وش فيه!!
منايا بتقطيبة جبينها زفرت وهي تهز راسها بياس منه واختفت تقطيبتها وهي تناظر بجاد
بجاد وقف عندها/مافيه ياهلا ولا امشي
منايا وقفت وهي تمد يدها له/عساك عالقوة ياابو سلطان
بجاد صافح يدها وسحبها له وهو يسلم خد بخد
منايا تنرفزت وكتمت هالنرفزة عشان وجود عيالهم تركته وهي ناوية تبتعد عنه
بجاد مسك يدها وسحبها تجلس جنبه غصب
منايا استسلمت بهدوء وهي تاخذ الفنجال وتقهويه
//بعد سوالف العيال عن يومهم وخروجهم للحظات//
بجاد وعينه بفنجاله/يقولون اليوم طلع
منايا التفتت له بتقطيبة جبينها/مين هاللي طلع؟!!
بجاد وهو يتحاشى يناظرها/سلطان
منايا اتسعت عيونها للحظة ثم اردفت بهدوء/الله ييسر امره وش علي منه!!
بجاد رفع عينه لها بشك من صدق كلامها
منايا وقفت وهي ترفع صينية القهوة/وش فيك تطالعني كذا!!
بجاد بابتسامة راحة يخفيها/لا ابد ولا شي
منايا قطبت جبينها/اذا عشان الزعل يابجاد فزعلي عشان شي انت تعرفه زين وليش تفتح مواضيع ماابتدت من الاساس!!/مشت من عنده للمطبخ/
بجاد زفر براحة وهو يسند ظهره عالكنبة بوسط ابتسامة ارتسمت على وجهه زاد عرضها من رجعت له عهد عنده
عهد مشت له بوجهها العابس
بجاد/افا من مزعل عهدي وانا ولد ابوي!!
عهد وقفت بين رجوله/بابا
بجاد حاوطها بيديه وهي بمكانها عند رجوله/عـيـونـي
عهد بكلامها المكسر/وعد وسلطان عصبوا علي وطردوني
بجاد ضحك وهو يضيق عيونه/وش مسوية هاه
عهد/بس اخذت دفتر وقلم
بجاد ضحك/بس!!!مايستحون قليلين الادب/باسها على خدها وهو يضمها له ويناظرها/ابشري بالعوض يابنت بجاد لك احلى دفتر واحلى قلم
عهد ابتسمت بوناسة
بجاد/بس لاعاد تجين اغراض اخوانك خلاص؟
عهد هزت راسها بايه وجرت من يديه لبرا/ووووعددد سلطااان
بجاد ضحك عليها وهو داري رايحة يقال تقهرهم
منايا نزلت الصينية عالطاولة الصغيرة اللي بزاوية المطبخ وهي تحس بجسمها يرجف رفعت يديها تتاكد اخذت نفس وهي تغمض عيونها تهدي نفسها ثم قطبت جبينها وهي تبلع ريقها/وش اللي صابك يامنايا وش هو!!!
.
((بيت ابو عمر1))
فتنة على اب المطبخ تخرج صحون الحلا لراجح اللي واقف قبالها وهي تعطيه/انتبه
راجح ميل فمه بزعل/مابكسرها ارتاحي
فتنة ابتسمت وهي تناظره/مين قال خايفة عالصحون!!خايفة عليك خلها تنكسر قلعتها اهم شي انت لايصير لك شي
راجح مشى وهو يتحاشى يناظرها
موج من وراها داخل المطبخ بابتسامة وهي تاخذ موية للضيوف/بغى يموت يـافـتـنـة ارحميه!!
فتنة ضحكت بخفة وهي تلتفت لها/ماتتركين حركاتك/قطبت جبينها بشك/وش فيك احسك مو على بعضك؟
موج زفرت بصوت/مافيني شي/رفعت عينها على فتنة باستغراب/الا تعالي وش فيها رغد هادية على غير العادة؟!!
فتنة/اتركيها عنك مو ناقصك مشاكل معها اتركي الصداع لها
رغد دخلت للمطبخ
فتنة اتسعت عيونها وهي تناظرها وبنفسها/اكيد سمعتني الله يستر الله يستر
رغد فتحت الثلاجة واخذت موية لها وخرجت بدون اي كلمة
موج انصدمت ووضح على وجهها/شفتي شفتي!!والله الدنيا صاير فيها شي!!
فتنة قطبت جبينها باستغراب من رغد وهي ماردت عليها كالعادة تنهدت/وش لك فيها اتركيها ياموج تكفين
موج زفرت/والله لو انا منك لااقول وش تسوي بالنهاية هذول اهلك
فتنة ميلت فمها بابتسامة جانبية كلها سخرية
موج/اكيد بيسمعون لك ويصدقونك
فتنة/لاتدخلين في مواضيع اكبر منك ياموج تكفين خليك بعيدة احسن لك واحسن لي ولنا كلنا تكفين
موج سكتت تتركها على راحتها/تبين اساعدك بشي
فتنة هزت راسها بلا/مشكورة
موج شالت الصينية وخرجت
فتنة التفتت للباب وراها وهي تسمع صوت الضرب عليه وابتسمت وهي تمشي له بسرعة/حياك ياجدة حياااك الله!!/سلمت عليها بحرارة/تفضلي من باب الضيوف ياجدة
الجدة سدول مسكت يدها وسحبتها برا وهي تمشي/امك المبلوسة ماتخليني اشوفك تعالي معي ابيك
فتنةمشت معها/سمي ياجدة
الجدة سدول وقفت ورا البيت وهي تسحب طرحتها
فتنة ميلت فمها/بترفعين ضمانك معي ياجدة
الجدة سدول ابتسمت وهي تفتح الطرحة/مثل ماتعرفين وانا جدتك اخاف يشوفها جابر
فتنة بضيقة/الله يسامحه ويهديه وش له ولدك بضمانك وهو مو محتاجه
الجدة سدول حطت بيدها الفلوس/حسيبه الله
فتنة بفزع من دعوتها/استغفر الله حرام ياجدة انتي امه قولي الله يهديه
الجدة سدول تنهدت وهي تناظرها ومشت راجعة للبيت/استغفرت من اول مادعيت مايهنى قليبي ادعي على هالاغبر بس قولي امين يـافـتـنـة
فتنة مشت معها وكشرت/ماني بقايلة اسمع دعوتك اول
الجدة سدول ضحكت/يمّه منك مابدعي عليك ابي لك الخير يابنية
فتنة/ادعي الله يفتحها بوجهي وبس ياجدة
الجدة سدول/كم صارن الحين؟
فتنة/تشترين لك بها رطب تغطي بيتك مرتين شكلي بأسرقها وش تبين بكل هالرطب
الجدة سدول ضحكت وخزتها/ويقولون انك ضعيفة ماانتي بهينة والله
فتنة/صدق ياجدة وش تبين بكل هالرطب!!
الجدة سدول ابتسمت وهي توقف عند باب المطبخ/هيه خليها مستورة وانا جدتك خليها مستورة
ام عمر من داخل المطبخ ومن بين اسنانها بنرفزة/فتنة ووجع
فتنة اخذت نفس/يالله ياجدة عن اذنك/فتحت باب المطبخ/
ام عمر بحدة/فتنة ووجع يوجعك ماله علاج وجع!!
الجدة سدول قشعر جسمها من الدعوة
فتنة دخلت للمطبخ/امري يمّه
الجدة سدول دخلت وبحدة/الله اكبر عليك من مرة!!
فتنة اتسعت عيونها وهي تلتفت لها
ام عمر كشرت بوجهها/حياك الله ياخالة
الجدة سدول بحدة/الله لايحييك اي والله
ام عمر احتدت نظرتها
فتنة بلعت ريقها
الجدة سدول/خافي ربك مامعك الا هي بكرة تكبرين وتحتاجين من يعاونك وتندمين على فعول يديك لاشفتيها ماعرفت حتى لبابك طريق
ام عمر وهي تكتم غيظها/تفضلي ياخالة
الجدة سدول/ماابي ادخل الله لايشكر فضلك اعوذ بالله منك من ادمية/خرجت/
ام عمر ناظرت فتنة بحدة/جيبي المعجنات واليوم انسي الراحة فهمتي/مشت/
فتنة ميلت فمها بابتسامة/ذابحتني الراحة الحين!!
.
((شقة حاتم))
عجايب بابتسامة وهي تمد من المعجنات لفيصل ورزان اللي كل واحد بجهة منها وناظرته قبالها وهو ياكل/عساه بالعافية ياعيني
حاتم قطب جبينه وهو يطنشها مايناظرها
حازم جالس جنب ابوه بابتسامة/يمّه وش عندك؟
عجايب كشرت/وش عليك يالسوسة كل وانت ساكت اكلم ابوك
عجايب زفر بضحكة/انا من شفت هالسفرة مفروشة قبل العشا وقلبي قارصني/نزلت قطعة المعجنات اللي بيدها وهو يتنهد/قولي ياعجايب وش وراك
عجايب بزعل/الظلم شين ياحاتم من متى انا مصلحجية
حاتم ضحك بخفة/ابدا ظالمينك المصلحجيين والسجون نقطة ببحرك
عجايب/حاتم!!
حازم ضحك/يمّه والله ابوي صادق
عجايب/انت اسكت عني ماتفهم!!
حازم كشر/يمّه ليش تعصبين علي!!ابوي اللي تكلم
حاتم/اتركي هالمسكين عنك وقولي لي وش وراك
عجايب/سلامتك ياعيني ماوراي شي الله يسامحك بس تظلمني دايم حتى لو نيتي زينة
حاتم ضحك/اعرفك محد يعلمني فيك ياعجايب قولي بس وش وراك
عجايب قطبت جبينها وهي تسمع الصراخ شهقت وهي توقف/يمّه قلبي اكيد رجع/مشت وهي تغلي/حسبي الله عليه والله مااسكت له
حاتم بحدة صوته اللي وقفتها/عجايب!!
عجايب وقفت وهي تلتفت له/حاتم
حاتم بحدته/انثبري مكانك
عجايب بقهر/يرضيك ياحاتم يرضيك!!
حاتم/مايرضيني لكن شفتي بعينك وش صار اجلسي
عجايب بغبنة/مااقدر مااقدر ياحاتم اذا انت قلبك مطاوعك انا مااقدر
حاتم/والله ياعجايب ان عتبتي الباب ذبحتك
عجايب تلون وجهها باللون الاحمر بعد ماغرقت عيونها دموع وبقهر/اجل تتركه يذبح علي ياحاتم!!
حاتم بقهر/عليا بتتصرف معه هي اللي بتقدر عليه
عجايب وهي تكبح دموعها بالقوة/حسبي الله عليه وعلى هالعليا حسبي الله/مشت لغرفة النوم بخطوات سريعة/
حاتم زفر بعد ماوصله صوت قفلتها القوي للباب
.
((شقة سراج))
سحايب واقفة بينه وبين باب الغرفة وهي ترجف بخوف منه/وش تبي منه؟هالمرة ماسوا شي حرام عليك خاف الله فيه ياسراج خاف!!
سراج جن جنونه وهو يدفها عن الباب وبصراخه/هالمجنون هو اللي مايخاف الله ماشفتيه وشلون ماسك اخته
سحايب قشعر جسمه وصرخت/يلعبون!!!وش فيك انت يعلبون!!
سراج/لعبت بك الدنيا يالمخفة وتاركته ماتأدبينه لكن أنا اللي بأدبه محد غيري يأدبه هين
علي جالس داخل الغرفة بالزواية وهو ضام ركبه لصدره مغمض عيونه يرجف بوضوح
علا قافلة الباب عليهم وهي واقفة عند الباب وتغلي بغبنة من اللي يصير التفتت وراها وهي تناظرها بلعت عبرتها واتجهت له وهي تجلس قباله/علي
علي رفع عينه لها وهو واضح عليه الرعب
علا بابتسامة/انت رجال وقوي لاتخاف خلاص؟
علي نزلت منه دمعة
علا عضت شفتها بقهر وفزت من قدامه وهي تتجه للباب
سحايب/ذَا ولدك ولدك وشلون تسوي فيه كذا حرام عليك
سراج مسك سحايب من يديها ودفها بكل قوته/اذلفي عني
علا فتحت الباب وبصراخ/وش فيك مستقعد لنا على كل شي هاه!!نلعب نلعب حتى اللعب ممنوع!!
سراج ضربها كف/ترادديني ياقليلة الحيا
علا ناظرته بغبنة وبترد
سحايب وقفت بينهم ودفتها وراها وبرجى/انا انا عنهم اترك عيالي تكفى ياسراج تكفى
عفاف وعزام اللي واقفين على مدخل البيت من جهة الحوش انفجروا يبكون بصوت بعد الصمت
عاصم وقف عندهم ويده بيد عليا وسط انفاسه السريعة
عليا بحدة/سراج!!
سراج التفت وهو يناظرها بتكشيرة عض شفته وهو يهدي نفسه
عليا بتهديد/شوي وابوك يجي والله والله ان اقوله ياسراج وتعرف ابوك!!
سراج بحدة/محد له بعيالي
عليا تنهدت وهي تترك يد عاصم واتجهت له/اذا ماترضى عليهم ليش تسوي فيهم كذا!!
سراج صد بوجهه مارد عليها
عليا/وبعدين وش سوى هالمسكين تجي وتحط حرتك فيه خاف ربك
سراج بقهر/يسترجل هالمخفة اللي ماوراه طب
عليا زفرت/وش تبيه يسوي وانت عارف وضعه!!ارحمه هذا بركة البيت ارحمه
سراج مشى وخرج من عندهم
سحايب جلست عالارض ماعاد تشيلها رجولها من الخوف منه
عاصم وقف عند امه وهو يحبس دموعه
عليا جلست عندها وهي تمسح عليها/بِسْم الله عليك بِسْم الله الله يهديه ادعي الله يهديه لكم
علا اللي ورا امها مشت بغبنة لعاصم وضربته كف بكل قوته
عليا اتسعت عيونها
سحايب انصدمت وبعصبية/علا!!!
عاصم يناظر علا بصدمة ونزلت دموعه غصب عنه
علا بدون اهتمام لامها وعينها على عاصم وبحدة/لو تنطبق السما عالارض الغريب مايتدخل باسرار البيت/صرخت/فاااهم؟!!
عليا وكانه كلام علا خنجر طعن قلبها
عاصم هز راسه بايه/فاهم
عليا وقفت وبربكة/عن اذنكم/خرجت من عندهم بخطوات سريعة/
سحايب وقفت وبعصبية وعينها على علا وهي تضم عاصم لحضنها/ليش تمدين يدك عليه ترضين اسويها فيك!!
علا بصراخ/سويها فيني يمّه وريحيني اهم شي نطلع من هالجحيم اللي عايشين فيه/دخلت للغرفة وقفلت الباب بوجه امها/
سحايب عضت شفتها بحسرة وهي تبلع غصتها لازوج ولا بنت ولا خصوصية مالها اي احترام ابدا
.
//بعد كم ساعة//
((شقة نايف))
نايف رجع للبيت بعد ماحجز لسلطان واتعشى معه واتفق يقابله الصباح رجع وبيده باقة ورد باللون الاصفر دخل وابتسم وهو يشم ريحة البخور تغطي البيت مشى بخطواته ووقف وهو يناظرها
ياقوت بفستان احمر ميدي رافعة شعرها وبكعب ابيض صغير جالسة وهي على طاولة الاكل المرتبة بعد مانومت الصغار وهي تنتظره عينها بجوالها تسولف مع جوهرة كالعادة
نايف زادت ابتسامته وهو يناظرها
ياقوت رفعت عينها وانتبهت له نزلت جوالها وهي توقف وتتجه له بخطوات سريعة
نايف فتح يدينه لها وهو شايل الباقة بيساره
ياقوت ارتمت بحضنه
نايف زفر براحة
ياقوت ضمته وهمست/اسفة
نايف تركها وطبع بوسة على جبينها
ياقوت فهمته من عيونه/حبيبي والله اسفة بس مااقدر اتحمل وجوده اسفة
نايف اشر بطرف اصبعه اليمين على فمها حتى تسكت ورفع يساره اللي فيها الباقة بوجهها
ياقوت اخذتها وهي تبتسم/مشكور حبيبي مشكور/مسكته من يمينه وهي تسحبه للعشا/
نايف مشى معها وهو يطرد زعله ويكتفي بهاللحظة
.
((الفندق))
سلطان واقف بالبلكونة متكي بيديه عالحديد وهو يناظر المكان بتدقيق وتفكير مباني طريق وسيارات رايحة وجاية يعتلي صوت ابواقها بنفسه/ايه كلن على همه سرى وكلن بطريقه يمشي محد بيذكر هاللحظة!!/ابتسم للحظة وهو يتوقع ردة فعل اهله زفر وهو يرجع للكرسي والطاولة اللي عليها قهوته جلس وهو ياخذ فنجاله ويرفع رجوله فوق الطاولة ورجل على رجل وبابتسامة وهو يمر بباله كلامها وهي معصبة(اذا بقيت سلطان الطيب يرخي أذنه ويغمض عيونه تستاهل مايحصل لك تستاهل)ضحك/هذاك اول/هز رجله بحماس للبداية بداية حياته الجديدة وابتسم برضا اخيرا عن وضعه/اييهههه ومقيولة أول تحول!!
.
#سلطان_الهوى_يافتنة_الألفية
إنتهى
موعدنا الاسبوع القادم باذن الله
|