4
-
لااله إلا الله
ـــــــــــــــــــــــــ ـــــــــــــــــــــــــ ــــــــــــــــــــــــ
{يوم جديد}
((شقة سراج))
سحايب نايمة بغرفة عاصم و علي عالارض صحت من نومتها وهي تناظر علي النايم قبالها بفراشه اللي عالارض تنهدت بضيقة وعينها عليه التفتت وراها وهي تناظر عاصم اللي على سريره تنهدت براحة وهي تشوفه نايم بهدوء بعد اللي صار امس سحبت جوالها اللي عند مخدتها واتسعت عيونها وهي تناظر الوقت الصلاة والدوام راح عليهم كشرت بوجهها وبنفسها/خل ينامون بس/وقفت وهي تمشي بخطوات هادية حتى مايصحون وفتحت الباب بشويش وخرجت وقفلت الباب وراها واتجهت لغرفة علا وعفاف وعزام فتحت الباب وكشرت بانزعاج من نور الشمس اللي ضرب بوجهها ثم التفتت يسارها تناظر الصغار وارتاحت وهي تشوفهم نايمين وعلا نايمة بجلالها عالسجادة ابتسمت رغم انها بخاطرها شي عليها للحين مشت لها وجلست عالارض عندها تصحيها وهمست/علا علا
علا قومي نامي على سريرك
علا نايمة ماصحت
سحايب زفرت واتجهت لسريرها وسحبت بطانيتها وغطتها ونزلت الستارة واظلمت الغرفة تماما وخرجت منها ثم اتجهت لغرفة النوم وسط قلبها اللي يدق بجنون متوترة من مقابلته فتحت باب غرفة النوم بشويش وزفرت براحة وهي ماتشوفه مشت لدورة المياه وهي تستغفر عالفرض اللي فاتها توضت وصلت وجلست بمصلاها تكمل اذكارها قطبت جبينها وهي تشوف جوالها يضوي زفرت بضيق وردت غصب وهي تقطع اذكارها/هلا عجايب
عجايب/صباح الخير
سحايب بهدوء/صباح النور
عجايب/افتحي الباب
سحايب تضايقت ماتبي تقابل احد تبي ترتاح بعد اللي صار امس ولاردت وهي ماتحب تمنع احد عنها وهي اللي ماتقابل احد من الاساس
عجايب/الوووو بنت
سحايب بضيقة/تكفين عجايب خليها المرة الجاية ماابي اقابل احد اليوم
عجايب باصرار/اقولك افتحي الباب بس حلوة ذي
سحايب/عجايب!!
عجايب/يالله بس يالله افتحي ولاتطولينها/قفلت الجوال/
سحايب كتمت عبرتها وهي تعرف عجايب ولسانها اكيد بتسأل وش صار امس وتخاصمها ليش سكتت له وكلامها الكثير اللي يضيق الصدر وقفت بقلة حيلة وهي تسمع رنة الجرس المتواصلة قامت من السجادة واتجهت لباب الشقة وقطبت جبينها من وصلتها ريحة البخور وقفت على جنب ورا الباب وفتحته بشويش بوسط استغرابها اتسعت عيونها وهي تفتح الباب كله وانظارها اتجهت للارض وهي تشوف الدخان المتصاعد من المبخرة اللي عالارض وفطور جاهز مرتب يفتح النفس بوسط هالصحون باللون الليموني والرمادي وثلاجتين باللون الزيتي اهتز جوالها بيدها ورا بعضها رفعته لها وهي تقرأ الرسايل من شاشة الجوال مافتحته/عليك بألف عافية افطري واذا العيال صاحين خليهم يفطرون معك وهالجني لايذوقه عساه بمغص مايفك عنه/ابتسمت على الفاظ عجايب اللي ماتتغير/وارجعي كملي نومتك والغدا علي ارتاحي ياعين اختك/زفرت براحة وسط ابتسامة جانبية وهي تنحني للفطور وغرقت عيونها دموع وهي تحاول تكبح عبرتها ناظرت جوالها اللي اهتز بيدها وكانت الرسالة اللي فجرت هالعبرة/استهلي ياسحابة وامطرينا بضحكاتك استهلي ياعين اختك/انفجرت تبكي بقهر وهي تكتم شهقاتها وبنفسها/بعد تطاول تطاول وبالحيل ياسلطان بالحيل قهرني وقهر عيالي حسبي عليه حسبي عليه
.
((شقة أبو ماهر))
عليا تناظرها بتكشيرة
سراج نزل الفنجال اللي بيمينه عالطاولة واعتدل بجلسته وهو يمرر سبحته من يساره ليمينه/عساها دايمة يامرة ابوي
عليا ميلت فمها ولاردت عليه
ابو ماهر نزل فنجالها وهو يناظره بحدة/سراج
سراج تنحنح/سم يبه
ابو ماهر/وش اللي صار البارح؟!!
سراج اتسعت عيونه/خير ان شاء الله عسى ماشر
عليا رمشت من انكاره
ابو ماهر بتهديد/والله والله ان ماتعدلت ياسراج مـاهـو بأنا أحمد ان ماخذتها ووديتها لاهلها وطلقتها منك وعيالها معها ووطيت رقبتك تطلق غصبن عليك
سراج بنرفزة/يبه!!بيتي محد له خص بأموري!!
ابو ماهر بغبنة/والله والله لو يدري ابوها ان يسحبها ماتركها دقيقة
سراج ببرود وهو يقلب بسبحته/ابوها يدري
ابو ماهر اتسعت عيونه/وشو
عليا قطبت جبينها وهي تناظره
سراج بثقة/من بيقبل بوحدة معها عيالها وواحد منهم مضيع عقله/ضحك بخفة/ولا اخوها انت عارف وضعه محدن بيقبل بها لو تنطبق السما عالارض!!
ابو ماهر بعصبية/مهبول انت مهبول!!هذول عيالك وبايعهم!!صاحي انت!!
سراج بهدوء/ماني ببايعهم انا اقول الحقيقة لك يبه اذا نويت تاخذهم مثل ماتقول
ابو ماهر اتسعت عيونه/تهددني!!
سراج وهو يلعب بالسبحة/محشوم يبه محشوم
ابو ماهر بغبنة/قم اطلع برا قم والله والله لو اسمع لهم صوت علي الحرام ان ادفنك قدام عيونهم قم
سراج وقف ببروده/اترك ترتاح يبه لكن هذا الصدق وهاذي اموري محد له كلمة بيني وبين اهلي/مشى/
ابو ماهر بغبنة/وقطع من ولد وش هالادمي اللي مارحم حتى لاهله وش هالقساة اللي به ول!!
عليا وقفت/اهدى ياعيني اهدى وادع له الله يهديه
ابو ماهر/مفارقته الهداية وهو عديم رحمة من وش مخلوق اعوذ بالله منه!!
عليا تنهدت/بروح اجيب موية انت اهدى وتعوذ من الشيطان/خرجت ووقفت وهي تناظره متكي بظهره ع باب الشقة ووجهه عليها كشرت/خير ياولد زوجي؟
سراج/ابد يامرة ابوي انتظر نصايحك المعتادة
عليا/هذا انت قلتها معتادة ولافادت فيك!!
سراج زفر بابتسامة/غريب هالمرة زعلانة بالحيل!!
عليا/تبي شي مني؟
سراج/سلامتك ياعليا سلامتك/فتح الباب وخرج/
عليا زفرت وهي تكمل طريقها للمطبخ
سراج وقف وهو يناظرها قباله
سحايب واقفة وبيدها الفطور بتدخل
سراج بتكشيرة/ليش واقفة برا ادخلي لاتشوفك حاتم ادخلي
سحايب اخذت نفس وزفرته وهي تدخل
سراج كمّل طريقه لبرا وهو يلبس نظارته الشمسية رفع جواله لنظره وهو يفتحه وابتسم وهو يقرأ الرسالة(صباح الخير)زفر براحة/يازينه من صباح!!
.
((شقة ابو راضي))
//صالة البيت مكان جلستهم//
ام راضي وهي تناظرها عن طرف ثم ناظرت ساجي/ياامك يوم ماصلحت الفطور كان قلت لي اصلحه انا او وحدة من خواتك
سدول بلعت الكلام وسكتت
ساجي ضحك وهو يسحب يدها ويبوس كفها/يسلم هاليدين/ناظر سدول بابتسامة/ويسلمها لي خيرها سابق
سدول ابتسمت/عساك سالم
ام راضي ميلت فمها بانزعاج
ساجي ناظر امه من جديد وهو يشد على يدها اللي للحين محتضنها بين كفوفه/لكن يمّه الصدق الصدق اني انا حلفت ماتسوي شي ودام البنات موجودين هم يسوون الحليب والشاهي وينهم مالهم صوت؟!!
ام راضي/اكيد نايمين/ناظرت لسدول/قومي سوي الحليب
سدول بتقوم
ساجي مسكها/والله ماتقوم وبعدين انا اليوم مبسوط والغالين علي لازم ينبسطون معي
ام راضي ابتسمت بفرحة/بشر عسى به شي بالطريق؟؟
سدول انزعجت ووضح على وجهها
ساجي/لا ولاهو بوقته يمّه
ام راضي احتدت ملامحها/اجل؟
ساجي اخذ نفس وبابتسامة/ناوين ابدأ مشروعي
ام راضي قطبت جبينها/ووظيفتك؟
ساجي/تركتها والمشروع يبي كل وقتي عليه
ام راضي تناظره ساكتة
ساجي بابتسامته/افا يمّه مافيه موفق عساك فالك الخير والرزق؟
ام راضي تنهدت/عساك عالقوة والله يفتحها بوجهك ياساجي
ساجي وقف وانحنى قبالها وسلم على راسها/امين امين/اعتدل بوقفته/سماح بنت ياسماح/مشى لغرفة اخواته/سمحوووه
ام راضي ناظرت سدول بحدة/وانتي عاجبتك حالتكم يومه يترك الوظيفة ويقعد مقابل وجهك الودر!!
سدول/ياعمة هو اللي تركها انا مالي شغل
ام راضي بعصبية/ايه لان مابك خير لو بك خير وسنع كان رديته مو يترك وظيفته ذَا كلام
سدول تنرفزت/والله ذَا ولدك وانتي تعرفينه اذا حط شي براسه سواه ماانتظر راي احد
ام راضي اتسعت عيونها/وشو!!
سدول وقفت/فطور العافية عليك ياعمة/مشت/
ام راضي بحدة/ارجعي
ساجي وقف على مدخل الصالة وهو مقطب جبينه من صوت امه العالي واستغرب اكثر وهو يناظر سدول
سدول بوجهها المتغير وقفت قباله وهي تناظره/ساجي انا تعبانة بروح ارتاح
ساجي/افطري معنا
سدول/مالي نفس عليكم بالعافية
ام راضي بحدة/خلها ترجع ياساجي تسمع!!
سدول بلعت ريقها وهي تسمعها
ساجي انحنى ليدها ومسكها وهو يناظرها/نفطر ونطلع مع بعض
سدول تناظرها بعيون كلها رجى/تعبانة ساجي
ساجي همس لها/تكفين لاترديني
سدول عضت طرف شفتها وهي تنزل نظرها
ساجي مشى لامه ويدها بيده يسحبه معه
ام راضي زفرت برضا وهي تناظرها ترجع غصب عنها وصدت بوجهها
ساجي وقف قبال امه وترك يد سدول وانحنى يسلم على راسها وجلس/ليش معصبة يمّه!!
ام راضي ماردت
سدول انحنت وهي تسلم على راس عمتها بكسرة خاطر/السموحة عمتي بس تعبانة شوي
ام راضي بحدة/مافيك الا العافية ولسانك هالطول علي!!
سدول سكتت
ساجي مسك سدول من يدها وجلسها جنبه وترك يدها/يمّه سدول ماتقصد وبعدين انا جاي مبسوط وشو له هالحركات اتركيني افطر وانا مرتاح!!
ام راضي/ايه الشكوى لله بس تبي تسكتني وهي مالك كلمة عليها
سدول شدت قبضتها بقهر
ساجي/يعني اقوم يمّه!!
ام راضي/لاتقوم لاتقوم ماانت فالح تهدد الا انا بس
ساجي مسك يد سدول وبيقوم
ام راضي مسكته/والله ماتقوم!!ان قمت ماارضى عليك
ساجي جلس وهو يناظرها بزعل
ام راضي/هذا اللي ناقص تفرّح العذّال بزعلنا
سدول اخذت نفس وهي تحبس دموعها
ساجي مسك يدها وهو يشد عليها بمحاولة منه يهديها شوي وبنرفزة/سماااااح وين الحليب اخلصي علينا!!
.
((السيارة))
نايف يسوق يوصل ياقوت لمدرستها والصغار للروضة وبعدها لشغله
ياقوت جالسة جنبه مكان الراكب صادة بوجهها عنه
نايف تنهد ومد يده ليدها يضغط عليها
ياقوت التفتت تطالعه/لاتجبرني مااقدر نايف مااقدر!!
نايف بلغة الاشارة/تراه سلطان ماتغير هو سلطان
ياقوت/واللي سواه شي كبير اسفة حبيبي مااقدر
نايف زفر/يرضيك اتركه يبات برا وبيتي موجود
ياقوت/خلاص على راحتك بس قبلها وصلني بيت اهلي
نايف اتسعت عيونه/من جدك!!
ياقوت/بأخذ اجازة ونطلع لهم الحين عادي ونوصل عالظهر اصلا انا من زمان عنهم
نايف احتدت ملامحه بقهر وغيّر طريقه
ياقوت اتسعت عيونها بصدمة وهي تشوفه غيّر الطريق/على وين!!
نايف مارد
ياقوت بنرفزة/اذا بتوديني صدق لاهلي خل نمر البيت ناخذ اغراضنا مو حلوة ندخل كذا باشكالنا
سمو تغير وجهها وهي تناظرهم
نايف عينه عالطريق مارد
ياقوت ضربته على كتفه وبصراخ/اكلمك انا!!لايكون ماتسمع بعد!!
نايف التفت لها بحدة ملامحه
ياقوت خافت وهي لاول مرة تشوف هالنظرة على وجهه
نايف ناظر لقدام وهو يضغط عالبنزين بسرعة جنونية اعتلى معها صوت جرس السرعة
ياقوت صرخت/بتموتنا عشانه بعد!!
نايف مارد وطلع عالخط السريع باتجاه بيت اهلها
.
((بيت ابو عمر1))
{غرفة فتنة}
فتنة بفستانها الابيض ماسك عالرقبة ومزين هالمسكة فصوص صغيرة من الكريستال كاشف عن ايدينها مخصر على جسمها رافعة شعرها ذيل حصان بمكياج ناعم يناسب بشرتها الحنطية بكعب طويل ابيض جالسة بصدر مجلس الضيوف ورجل على رجل وابتسامة عريضة مرتسمة على وجهها وهي تتقهوى رفعت فنجالها بعد ماخلصته للي واقفة قبالها
اخذت الفنجال منها ذيك الجميلة المتميزة بجمالها بفستانها الاحمر جميلة للحد اللي يأسر القلوب قبل العيون صبت لها بالفنجال من الدلة اللي بيساره وانحنت وهي تمد لها الفنجال/حياك
فتنة اخذته بابتسامة وبراحة عجيبة تملى صدرها ارتشفت منه وانخطف وجهها ابعدت الفنجال اللي بيمينها ومازال يلامس شفاتها وغطت فمها بيسارها رجعت القهوة من فمها بيسارها واتسعت عيونها وهي تناظر كمية الدبابيس اللي بيدها توجعت من فمها وهي تحبس دموعها وسال الدم من فمها ولون فستانها الابيض باللون الاحمر رفعت عيونها للي قبالها وبرجفة صوتها/ليش تسوين فيني كذا ليش؟!!وش سويت لك وانا حتى مااعرفك!!
الجدة سدول جالسة عن يمينها ضربت يد فتنة اليسار بيدها اليمين حتى تطيح الدبابيس
فتنة طاحت الدبابيس من يدها عالارض
الجدة سدول وقفت قبالها بملامح محتدة وهي تمد طرحتها لفم فتنة وتمسح الدم اللي على اطرافه ثم ناظرت البنت الجميلة اللي وراها ودفتها بعكازها وهي تتكلم
فتنة ماتسمع وش تقول الجدة سدول لكن واضح انها معصبة وتخاصم
الجدة سدول التفتت لها وهي ترفع يسار فتنة بيمينها وتحط بوسطها دبوس وتقفل يد فتنة عليه وتضغط عليه
فتنة توجعت من نغزها الدبوس بيدها لكن تحملته بوسط ابتسامة
الجدة سدول بتشديد على كلامها/انتبهي له يـافـتـنـة انتبهي له وعليه
فتنة فزت جالسة من نومتها بفجعة وهي تلتفت ليسارها وتنفث ثلاث وتتعوذ من الشيطان مسكت فكها بيديها وهي تحس بوجع فظيع بفمها مررت لسانها داخل فمها تتاكد مافيها شي ناظرت يمينها وهي للحين ماسكة فكها بيسارها وعقدت حواجبها ماتحس بألم عكس فمها زفرت بصوت/اعوذ بالله من الشيطان الرجيم
ام عمر دفت الباب بقوة
فتنة انتفضت برعب غصب بعد هالكابوس وناظرت امها
ام عمر قطبت جبينها وهي تناظر وجهها الشاحب/وش فيك؟هيا مابعد سويتي شي قولي تعبانة!!
فتنة وقفت/سلامتك يمّه مافيني شي
ام عمر/قومي صلي بس مو قلب اسود وعمل اسود بعد!!
فتنة/صليت
ام عمر زفرت وسط تقطيبة جبينها/الضحى مو الفجر!!ولا حلالك النوم!!
فتنة وقفت/جزاك الله خير يمّه
ام عمر اتسعت عيونها/تتمسخرين علي!!
فتنة/استغفر الله العظيم
ام عمر بعصبية/اي والله استغفر الله العظيم منك قومي جعلك لاصليتي رحمتك وتركتك تنامين كم ساعة تقومين تتمسخرين!!استاهل هذا جزا احساني معك!!
فتنة/محشومة يمّه
ام عمر/انزلي بس يالله انزلي
فتنة خرجت وهي تلوم نفسها لو مانامت هالساعتين كان ماحصلت هالتهزيء
.
{طلال و موج}
موج بفستان ناعم ابيض كت مشجر ميدي سادلة شعرها اللي لنص ظهرها وبفلات باللون البني وروج وردي وكحلة سودا واقفة قبال الدولاب اللي باللون البني المحروق فاتحته وهي تخرج له لبس
طلال خرج من دورة المياه بعد مااتحمم لاف منشفته على وسطه وللحين يقطر شعره بقطرات من الموية ابتسم وهو يناظر قفاها واسرع بخطواته وحاوطها من خصرها
موج شهقت وهي تحس بالبلل وتحركت/طلاااال!!
طلال ضم ظهرها لصدره اكثر/عين طلال
موج بزعل وهي تتحرك بين يديه/حرام عليك بللتني
طلال ابتسم وهو يتكي بطرف دقنه على كتفها ويلصق شعره بوجهها
موج غمضت عيونها بانزعاج وببكية/طلال!!
طلال/ياعين طلال
موج/خلاص والله باغير الفستان فهمت اتركني
طلال لفها لوجهه وهو يحاوط خصرها وعينه بعينها/والحين قولي لي وش مزعلك؟
موج باستغراب/أنا!!
طلال/لاتكذبين علي محد يعرفك اكثر مني
موج بابتسامة/يتهيأ لك/دفته عنها وهي ترجع للدولاب/وبعدين لو فيه شي بأقول وش المانع/خرجت له لبس والتفتت وهي تقفل الدولاب ورسمت وهي تناظره/
طلال متكتف وهو يناظرها بتقطيبة جبينه/امي اكيد
موج بنفسها/وفيه غيرها!!
طلال تنهد/وش صار قولي لي؟
موج بابتسامة/ماصار شي اهم شي هي ارتاحت
طلال بنرفزة/يعني صاير من وراي!!كم مرة اقولك قولي ولاتسكتين!!
موج/خلاص طلال قفل عالموضوع انتهينا
طلال مد يديه يلامس اكتافها وهو يحني راسه لمستوى نظرها/تدرين ان امي حريصة علينا
موج/يعني دريت بالموضوع
طلال/اكيد الحمل هو فيه غيره!!
موج كشرت بوجهها بغضب واضح
طلال باسها بين عيونها/خليها تتطمن بنفسها اذا تبي ترتاح وش يضرك واحنا مافينا شي ياقلب طلال
موج بغصة/الى متى!!تعبت تعبت ياطلال
طلال ضمها/اصبري شوي هي فترة وبتفك عنا اصبري ياعيني اصبري
.
((بيت ابو فواز))
ام فواز بحضنها جوهرة تلعبها/يازين جويهر زينها تسوى الجماعة كلها
نورة(3سنوات)جالسة جنبها تلعب بألعابها وقفت وبزعل/جدة وانا!!
ام فواز ضحكت
جواهر جلست قبالها وهي تنزل صينية الفطور بابتسامة/يمّه يالغيرة يمّه!!
ام فواز مسكتها من يدها وسحبتها لحضنها جنب جوهرة
نورة ابتسمت بوناسة
ام فواز باستها على خدها وهي تضم الثنتين بابتسامة/يازين النوري زينها تسوى القبيلة كلها
جواهر/يوه يوه ياكبرها لايسمعونك القبيلة ياعمة تقوم قيامة
جابر(6سنوات)داخل يجري وهو يلهث وجلس ورا امه يتخبى
جواهر قطبت جبينها/وش مسوي!!
ام فواز/جبّور مأذي جدة؟!!
جواهر تغير وجهها وقرصت كتفه
ام فواز/جواهر!!
جابر/اااه ماما ماسويت شي والله
جواهر/لاتحلف يالكذاب/وقفت/عمة باروح اشوفها وراجعة افطري بالعافية/انحنت وهي تاخذ جوهرة/
ام فواز مسكت جوهرة لحضنها وعينها على جواهر/اجلسي ذهب عندها
جواهر اعتدلت بوقفتها/مااقدر اكيد هالجابر مسوي شي بروح لها
ام فواز/بكيفك
جواهر خرجت من الباب الرئيسي ووقفت وهي تناظر ذهب والجدة سدول جالسين بظل البيت يتقهوون برا مشت لهم بخطوات سريعة ووقفت عندهم/السلام عليكم
ذهب بابتسامة/وعليكم السلام والرحمة
الجدة سدول/وعليكم السلام وينه هالاذية ماجاء معك
جواهر جلست بعد ماسلمت/والله ياجدة انه اذية ادري بس ابشري اجيبه عندك وسوي به ماتبين
الجدة سدول/لا اعوذ بالله من ذنبه تبيني اضربه وانتي تشوفيني الله يكفيني شر دعاك!!
ذهب/مو توك تتحلفين تذبحينه ياجدة
الجدة سدول/ايه مو على عين امه!!
ذهب ضحكت
جواهر/يفداك ياجدة سوي ماتبين اشوف ولا مااشوف
الجدة سدول/خليك من هالكلام
جواهر/امري ياجدة
الجدة سدول مسكت يدها وقربتها منها وهي تهمس لها/انتي فيك شي؟
جواهر تغير وجهها باحراج
ذهب رفعت الفنجال تتقهوى وهي تتحاشى تناظرهم وانها ماسمعت
الجدة سدول/اخلصي علي
جواهر ماردت
الجدة سدول/عاد فيك ولا مافيك ابيك تقولين لفواز العلم
جواهر قطبت جبينها/وشو ياجدة؟
الجدة سدول/ولااحد يدري به بينكم لاانقفل الباب سمعتي؟
جواهر/امري ياجدة؟
.
((الفندق))
سلطان جالس على الكراسي يمين الريسبشن باللبس الرسمي السعودي ثوب أبيض وشماغه الاحمر بساعته الحديد الذهبية اللي ماعنده غيرها ناظر ساعته بتقطيبة جبينه وكله شك وهو مكذب الوقت وقف واتجه للريسبشن وبابتسامته اللطيفة للموظف/كم الساعة لاهنت؟
الموظف/تسع الا ثلث
سلطان بابتسامة/شكرا/رجع ناظر ساعته وتنهد وهو يشوف ساعته مضبوطة خرج جوال نايف اللي اعطاه البارح واتصل فيه/
نايف رد برسالة انتظار
سلطان زفر وهو يناظر الموظف وباحراج/معليش ازعجتك بس كيف ارسل رسالة بهالجوال؟
.
((شقة حاتم))
{غرفة النوم}
عجايب على جوالها داخلة عالواتس بقروب اخوانهم ماعدا فواز وبضيقة خلق/هيييه مين موجود
ثابت رد/بالمحااااضرة بتقرقرون بأخرج
سدول دخلت/اخرج نرجعك بعدين
ثابت/رجعوني لاتتمنذلون بعدين
عجايب/اطلع بس اطلع فكنا
ثابت خرج
ذهب/هلا عجايب صباح الخير
سجايا/انا جيت
عجايب/وش عندكم هالاسبوع؟
سدول/انا نازلة لاهلي اليوم
سجايا/وش فيك اعجيب وغريبة سحيب مادخلت!!
عجايب اللي مابرد قلبها للحين/مالك شغل انشغلي بنفسك الله يعافيك
سجايا انصدمت من الرد وسجلت صوت/وش فيك اعوذ بالله منك جتك الحالة!!
عجايب/اسفين دخلت وازعجتكم انا وحالتي!!/خرجت ورمت الجوال عالسرير جنبها ووقفت وخرجت من غرفة النوم ودخلت للمطبخ وهي تخرج الصحون اللي بالدولايب كلها وبدت تغسل وهي تدعي بكل لحظة عليه/
حاتم دخل للمطبخ وبيده كيستين وانصدم وهو يشوف المطبخ المقلوب حالته اخذ نفس وهو يدري انها معصبة/السلام عليكم
عجايب فزت مو بوقت رجعته التفتت وبتكشيرة/خير الواحد يتنحنح ولا تبي تذبحني!!
حاتم بابتسامة/صباح الخير ياعجايبتي
عجايب رجعت وجهها للمغسلة وهي تغسل ماردت
حاتم تنهد وهو يمشي ويوقف جنبها ولف الصنبور من جهتها لجهته من حوض المغسلة وهو يغسل من الصحون اللي فيها صابون بعدها
عجايب رجعت الصنبور لجهتها بعناد وهي تقفله
حاتم رجع الصنبور وهو ساكت لجهته وفتحته
عجايب قفلته وبعصبية وهي تلتفت له تناظره/ماابي مساعدة مشكور روح اجلس
حاتم/جبت الفطور خلينا نفطر سوا
عجايب/عليك بالعافية انا افطرت
حاتم قطب جبينه بتكذيب/وش افطرتي؟
عجايب/قهر وغبنة ارتحت!!/لفت عنه وهي تغسل/
حاتم زفر وهو يبلع كلامه/وش اللي قاهرك!!مسوي لك شي انا عشان تزعلين مني كل ذَا الزعل؟!!
عجايب ماردت
حاتم بقهر ارتفعت معه نبرة صوته/ردي علي اكلمك!!
عجايب التفت له وهي ترمي الاسفنجة بوسط الصابون بقوة وتطشر معها الموية عليهم
حاتم بعصبية/ردي علي اكلمك!!
عجايب بغصتها ومحاجر عيونها امتلت دموع تحبسها/الى متى واخوك المتخلف ذَا يعامل علي كذا الى متى!!
حاتم بحدة/احشمي الفاظك!!مهما يكون ذَا اخوي الكبير
عجايب/عساه مايكبر علينا قل امين
حاتم صرخ وهو يشد قبضة يده يكبحها بكل مافيه لاتمتد عليها/عجااااايب!!
عجايب/لاتصرخ علي وانت عارف ان اخوك يستاهل كل كلمة قلتها/نزلت دموعها/قولي انت وش مسوي له هالمسكين؟ذبحه؟تلفظ عليه؟وش ممكن يسوي له علي عشان يلقى منه كل ذَا هاه ليته قعد عند جدتي ولا رجع لسحايب ليته/هلا دموعها بغزارة من قهرها وهي تكبحها بدون فايدة/
حاتم بصراخ/وش تبيني اسوي شفتيه بعينك اتصل بالشرطة عشان تدخلت بينهم وافترى علي وش تبين اسوي اكثر انحبس يعني
عجايب بصراخ/اجل علي يموت وحنا ننتظر قلبه يحن!!
حاتم/حتى ابوي ماقدر عليه وش تبيني اسوي وشو!!
عجايب عضت شفتها بقهر وهي تناظره وبصراخ/اصدمه
حاتم اتسعت عيونه
عجايب/كسره وفتت عظامه خله يحس وشلون يحس علي بعد كل مرة يبهذله فيها
حاتم/لاااااا انهبلتي انتي انهبلتي!!تبيني اذبحه!!
عجايب بدموع/ايه مو انت اللي تسمع نحيبه كل صبح ولاهو انت اللي تسمع نحيب سحايب معه مت مكاني مت اذا ماسويتوا له شي انا انا بيوم بجيب نهايته واجيب نهايتي معه
حاتم/واهلك وينهم هاه؟!!
عجايب انخطف وجهها من كلامه
حاتم بغبنة/ابوك فواز وحتى ثابت وينهم ماشفنا احد من سنين جا عندنا ووقفه عند حده هاه وينهم ماتشوفينه مستهين بالكل
عجايب عضت شفتها بقهر وهي ماعندها رد تقوله
حاتم/ولا حيلتك يرتفع صوتك علي بس!!
عجايب/الحين ليش جيت!!جاي عشان تتهاوش معي رح دوامك انا ارتاح وانت ترتاح بعد
حاتم ضحك بقهر/احمدي ربك اني صابر عليك لو هو غيري دفنك بعد كلامك ذَا معه/مشى واخذ الفطور وخرج من المطبخ/
عجايب وهي تناظره تمتمت/ووجع فيك وبغيرك وغبنة قلبي من الاهل اللي مافيهم حيلة!!/لفت تغسل الصحون وهي تكافح دموعها/وجع عساك بالمغص جايب الفطور اللي احبه واخذه وجع
حاتم خرج من البيت بملامح محتدة من العصبية قطب جبينه وهو يسمع صوت الكعب قفل الباب وراه ووقف وهو يناظرها تطلع الدرج
بريحة عطرها الفواح اللي غطى المكان وسبقها لفوق عباية مخصرة بالملي ع جسمها وضح معها تفاصيل ذَاك الجسد الواجب عليها ستره متلثمة وهاللثمة كشفت عن جمال عيونها اللي زادت من جمالها برسمها ومكياجها الخفيف وقفت بنص الدرج وهي تفتح اللثمة وبابتسامة/صباح الخير حاتم
حاتم بتكشيرة/صباح النور
جوهرة رفعت يدها/مثل ماأنا ماسألتك ليش اصواتكم واصلة لتحت ماتسألني ليش عبايتي كذا وذا من حقي
حاتم/مااقول الا مالت على رجلك
جوهرة بزعل/حرام عليك!!يالله عارفة ومقدرة وضعك
حاتم بيتكلم سكت وهو يناظر عيالها
//(وسام11سنة،يزن10سنوات،أديب8س نوات)كل واحد عينه بجهازه مروا من امهم مكملين لفوق ومروا من عنده//
حاتم بحدة/ولد انت وياه!!
العيال وقفوا
جوهرة ببرود/يووه بشويش عليهم يالله ياماما سلموا على خالو
العيال سلموا وكملوا طريقهم
حاتم هز راسه بيأس وناظرها/وش جايبك؟
جوهرة تكتفت وبنرفزة/اولا بيت ابوي واعتقد به شقة لنا يالبنات!!
حاتم/وثانيا!!
جوهرة/ياقوت جاية قلت اسبقها
حاتم/وعيالك ومدراسهم؟ودوامك اللي ازعجتينا فيه تركتيه؟!!
جوهرة/معي اجازة ارتاح وعيالي انا ادرى بمصلحتهم/طلعت بسرعة ومرت من جنبه/
حاتم نزل
جوهرة التفتت تناظره/واااه
حاتم وقف والتفت يناظرها
جوهرة/عقدك النفسية من مشاكلك ابعدها عني لو سمحت انا ابي راحتي ماابي امراض فضلا يعني/طلعت الدرج لشقتهم فوق/
حاتم هز راسه/اللهم طولك ياروح كملت والله كملت/خرج من المكان/
.
((بيت ابو عمر))
{مجلس الشعر}
//ابوعمر وام عمر وام تركي وموج وطلال يفطرون//
ابو عمر جالس بين ام عمر وام تركي
موج وطلال قبالهم
ام عمر جالسة عالسفرة بس عشان تغيظ ام تركي
ام تركي تاخذ من الصحون البعيدة وتحط قبال ابو عمر على جنب بينهم بدون ماتتكلم
ابو عمر ياخذ من اللي تحطه بهدوء مايبي احد يلاحظ
ام عمر صبت الشاهي وحطت الكاسة جنبه
ابو عمر اخذها وبابتسامة/سلمتي ياعزة
ام تركي قطبت جبينها بزعل وهو مانطق بشي لها ابد
موج كتمت ضحكتها وهي تاخذ نفس
طلال عطاها نظرة يبيها تسكت لاتسبب مشكلة
ابو عمر تنحنح وهو يناظر موج/سلمت يمناك ياموج
موج/الله يسلمك ياعمي
ابو عمر/صدق الفول هالمرة مضبوط على كيف كيفي
موج/بالعافية ياعم لكن اللي صلحت الفطور فتنة كالعادة ماحطيت يدي الا بالقهوة
طلال دق ركبته بركبتها
موج كشرت بوجهها
ام تركي طالعتها بحدة من فوق لتحت
ابو عمر تغير وجهه ورفع يده عن الاكل/الحمدلله
طلال/كمّل فطورك يبه مااكلت!!
ابو عمر التفت لام عمر وهو يكتم غيظه/وش قايل عن الفطور انا؟
ام عمر ماردت
ابو عمر/اهم شي عندي الفطور والباقي يهون اذا بتبقى ياعزة هي تصلح لي الفطور بافطر مع بثينة كل يوم/وقف/
ام تركي وقفت
طلال وقف/يبه ارتاح الحين اجيب فطور غيره
ابو عمر/عساه بالعافية عليكم مالي به خلاص يكفيني مااكلت والله يستر من باقي اليوم/مشى وخرج/
ام تركي مشت وراه
ام عمر وقفت وبقهر وعينها على موج
موج ماناظرتها
طلال/يمّه موج ماتقصد
ام عمر بقهرها/ايه ابد ماتقصد بس تحب تزيد ابوك قرب من خالتها وانت خلك مصدق طيبتها ذي/مشت/
طلال ناظرها وهو يكتم غيظه ولحقها
موج زفرت وهي تطنش اللي صار ومدت يدها للخبز وهي تكمل فطورها
فتنة دخلت وبيدها صينية بها علب موية وباستغراب/وش صاير؟
موج/جابك الله تعالي افطري معي
.
((سوبر ماركت ابو فواز))
ابو فواز جالس واقف عند باب مستودع الخاص بالسوبر ماركت وهو يراقب العمال وهم ينزلون البضاعة ويرتبونها داخله
ثابت وقف ورا ابوه وبابتسامة وهو يسلم على راسه/صبحت بالخير ياوجه الخير
ابو فواز قطب جبينه/صباح النور والسرور وش جايبك؟!!
ثابت/امشي يعني!!
ابو فواز/ودوامك اليوم!!
ثابت/اخذ الحضور وطلع وماوراي غيرها اصلا وجيتك افطر معك/مسك يد ابوه وضمها لصدره/والله ياابو فواز اشتقت افطر معك لحالنا بس شكلك انت ماتبيني
ابو فواز ابتسم/جهز الفطور واجيك الحين
ثابت/رح افطر يبه وانا بوقف عالعمال يبه
ابو فواز/رح رح قبل يجي فواز وانت وياه ماترتاحون اذا ماتهاوشتوا
ثابت/ماني رايح الا وانت معي
فواز وقف عندهم وهو يرفع يده/السلام عليكم
.
((الفندق))
سلطان بغرفته بيده الجوال رايح جاي ازعج نايف اللي يتفاداه بكثرة اتصالاته رمى الجوال عالسرير وتمدد عالسرير بابتسامة وهو يرسله/ايييههه يانايف داري بقلبك لكن بك وبدونك رايح رايح/فز جالس عالسرير وثم قام من فوقه ونزل وهو ياخذ الجوال ومفاتيحه وشنطة الظهر الصغيرة وخرج من الغرفة واتجه لريسبشن الفندق ووقف قبال الموظف وبابتسامة/داري اني ازعجتك والعذر منك لكن وين اقرب حلاق لاهنت؟؟
.
((عالفطور))
//ابو فواز وفواز وثابت بداخل غرفة استراحة الموظفين يفطرون//
ابو فواز وعينه على فواز اللي قباله/وش فيك تارك المعرض؟
فواز/راضي به
ثابت جنب فواز بنرفزة/ياهالراضي اللي متقطع والخدمات المجانية اللي يسويها
فواز قطب جبينه والتفت له/ووش حارق دمك عليه!!
ثابت/من الله البغض يااخي!!
فواز/ليتك تجي نص راضي هاللي مو عاجبك
ثابت/عساني لاجيت مثله اعوذ بالله
ابو فواز/راضي عون ياثابت عون
ثابت/الله لايحوجنا لاحد من خلقه لا راضي ولا غيره/اكل لقمته/
فواز بنرفزة/الحين انت ياللي شايف نفسك وش صار على تخصصك هاه
ثابت وقفت لقمته بحلقه وهو يناظره
ابو فواز تنهد/بعدين يافواز بعدين خلنا نفطر
فواز/لا مو بعدين يبه الحين هذا اخر ترم يحول به بعدين ماعاد يمديه
ثابت/تخصصي ماني مغيره ابد ودخلته لاني ابيه
فواز/انت وش تفهم هاه!!ماانت بمفلح به والاهم ماله مستقبل ماتفهم ماله مستقبل
ثابت/اذا تخرجت ومالقيت شي العسكرية موجودة
فواز/عناد هو عناد!!
ثابت/اذا تشوفه عناد ايه عناد وماني مغير لو ارسب بالمادة مية مرة
فواز بحدة/وشو!!
ثابت وقف/دايمة يبه والمرة الجاية لاجيت افطر اتصل عليك قبل اجي عشان ماانغث/مشى/
فواز/ولد ابوي البزران ترفع صوتها/وقف بيلحقه/
ابو فواز مسكه من ثوبه وبحدة/اجلس يافواز
فواز/بس يبه
ابو فواز رفع صوته/اجلس
فواز جلس بغيظ وهو يبلع كلامه ويصد بوجهه
ابو فواز/تخصص ثابت اقطع سيرته مالك فيه
فواز اتسعت عيونه وهو يلتفت لابوه
ابو فواز/سمعته اذا تخرج ومالقى شي العسكرية تنتظره
فواز/ايه يبه ايه خله على كيفه وثم تندّم بعدين!!
ابو فواز/ماني بمتندم ابد دام ذي هوايته يافواز
فواز انغرست بقلبه الكلمة مثل الخنجر/هوايته يبه!!هوايته!!
ابو فواز/ايه هو يبي هالتخصص لاتستقعد له
فواز بحسرة بقلبه للحين/وانا يبه وأنا؟
ابو فواز سكت مارد
فواز/ويوم اني اترجاك مابقى لي من تخصصي شي وسحبتني وراك غصب عني يبه نسيت نسيت!!
،
،
<<قبل13سنة>>
،،سكن الطلاب،،
ابو فواز واقف قباله وبحدة/من بكرة تسحب ملفك مالك قعدة بهالديرة تلحقنا
فواز بترجي/تكفى يبه تكفى الا دراستي خلاص مابقى شي بس هالسنة تكفى يبه تكفى
ابو فواز/المعرض يحتريك هناك ماله داعي هالدراسة اللي مالها طب بك
فواز بصراخ/لا يبه لا ماابي المعرض ولا اطيقه مكاني قدام الكاميرا هذا مكاني الصح وش لي بالمعارض وكرفها
ابو فواز ضحك وبسخرية/لااحد يسمعك ويصدق!!/بحدة/نسيت انت من!!اخو من!!تبطي عظم ان توقف قبالها!!ضف عفشك والحق اهلك واترك هالامور اللي مالك بها ابد يافواز
فواز/ايه اخو سلطان مانسيت ولاتنسى اني الاول عالدفعة يبه
ابو فواز/بلها واشرب مويتها هالشهادة اذا ناظرك احد وهم يدرون من تكون
فواز سلم على راسه وهو يسحب يده يبوسها وبغصة/تكفى يبه تكفى لاتذبحني وانا حي تكفى
ابو فواز سحب يده وبغضب/ياانا وامك وخواتك يادراستك يافواز وانت بكيفك/مشى وخرج/
فواز جلس عالارض وانسابت دموعه بقهر على حلمه اللي ضاع وطموحه العالي اللي اصتطدم بأعتى عقبة قدامه(ابوه)مسح دموعه بحسرة وهو يأن من قلبه بحرقة/ليش يبه ليش تذبحني ليش
،
،
فواز بابتسامة/عشان مصلحتي نسيت يبه!!
ابو فواز زفر/للحين بقلبك!!
فواز/مابقلبي شي يبه راح وانتهى راح وخلص
ابو فواز بقلة حيلة/داري اني اخطيت ياابوك لكن تبرى مع السنين وانا ابوك تبرى
فواز/بريت وطبت يبه ماتشوفني قدامك يمينك اللي ماتعصاك!!
ابو فواز/واللي حسرة بقلبك تبيه حسرة بقلب اخوك!!
فواز/عشان مصلحته يبه يكبر ويفهم ويعرف اني ابي مصلحته
ابو فواز/ثابت لاتجيه يافواز
فواز/يعني على كيفه!!يضيع عمره وبتتركه على كيفه!!
ابو فواز/مـاهـو بضايع وانت وراه يافواز مـاهـو بضايع
فواز وقف/يوم مالي حشيمة وشو له توليني عليهم!!
ابو فواز/فواز!!!
فواز/استودعتك الله رايح للمعرض يبه رايح له/مشى/
ابو فواز/الله يهديك يافواز الله يهديك
.
//بعد اربع ساعات سواقة//
نايف وقف بالسيارة عند بيت عمه(ابو ماهر)ونزل من السيارة وهو يقفل الباب بقوة ويعطيها ظهره يخرج جواله
ياقوت تغلي بالسيارة وبغبنة/حتى ماكلف نفسه يفتح لي الباب!!هاذي بداية رجعة سلطان ياسلام!!/التفتت لسمو اللي جالسة ورا مكان ابوها وبحدة/نزلي اخوك من كرسيّه ويالله انزلي
سمو/وبابا بيجي معنا
ياقوت بحدة/وش عليك منه!!ليته فايدك الحين انزلي يالله ولاتقولين الكلام معي
سمو حبست دموعها وهي تفتح مشد الكرسي عن مجد
مجد/ماما وبابا؟
ياقوت بعصبية/اااووووهه انا نازلة وانتم خلوا ابوكم ينفعكم/نزلت وقفلت الباب وراها بقوة/
سمو غمضت عيونها بفزع من قفلة الباب القوية
نايف التفت وهو يناظرها بحدة
ياقوت وشنطتها اللي باللون البنفسجي على كتفها وقفت قبال باب العمارة وهي تخرج مفتاحها وتفتح الباب الكبير وتدخل وتتركه مفتوح وراها ودخلت للداخل
نايف اخذ نفس وهو يهدي نفسه ثم قفل جواله بدون لاينتبه اذا رد عليه او لا ارتسمت الضيقة على ملامحه وهو يناظر سمو اللي تحاول تفتح احد الاحزمة من مجد ومو قادرة عليه لف من ورا السيارة وهو يفتح الباب اللي ورا الراكب ورسم ابتسامة على وجهه وهو واقف على باب السيارة وينحني لمجد ويمسك يد سمو اللي تحاول تفتح الحزام ورفعها له وباسها
سمو ارتاحت وهي تناظر ابتسامته
نايف يتصنع صعوبة فتح الحزام وطيح نفسه عالارض
مجد ضحك
سمو ابتسمت
نايف وقف وهو ينحني للحزام ويتصنع صعوبته وفتحه وهو يزفر بصوت ويمسح جبينه
مجد صفق بحماس /بابا قوي فتحه قوي
سمو ضحكت
نايف شال مجد من الكرسي وباسه وهو ينزله عالارض
سمو قربت منه بتنزل
نايف عطاها خده بابتسامة
سمو كشرت بوجهها
مجد ينط مكانه وبضحكه/يالله يالله
نايف بلغة الاشارة/قيمة المرور
سمو باسته ع خده وابتعدت
نايف هز راسه بلا وسط تكشيرته وهو يناظرها
سمو حاوطته بيديها وهي تضم راسه لها وتبوس خده بقوة
نايف ضحك وهو يحاوطها بيديه ويشيلها وقفل باب السيارة
مجد/بابا وانا
سمو بابتسامة وهي بين يدين ابوها/انت رجال
مجد كشر بزعل
نايف بلغة الاشارة/المرة الجاية دورك
مجد بتاكيد/الى فوق؟
نايف هز راسه بايه بوسط ابتسامة
مجد مد يده له
نايف حط يده بيد مجد وهو يدخل معهم لداخل ويتحاشى يناظر ذاك الباب
ياقوت نزلت عبايتها ورمت نفسها عالكنبة وهي واضح عليها النرفزة
جوهرة جالسة عالكنبة قبالها ناظرت عيالها/يالله غرفتكم بسرعة/بعد ماراحوا/خير
ياقوت بنرفزة/متغير هالفترة متغير كثير ياجوهرة
جوهرة/يمكن فترة وبس عشان اللي انتي عارفة
ياقوت/لا من قبل ملاحظة عليه ماعاد يتحمل شي مني والحين بزيادة
جوهرة/والله هذا اختيارك وانتي اللي رميتي نفسك
ياقوت بحدة ملامحها/جوهرة!!
جوهرة/لاتزعلين مني لازم تسمعيني للاخير وتسمعين اللي ماكنتي تبين تسمعينه من احد وانا اللي باقوله لك شفتي الحين شفتي نتيجة اختيارك وعنادك للكل كيف!!شاف نفسه عليك وهو كله عيوب انتي اللي تمسكتي فيه وهو بأول مشكلة تصير بيتخلى عنك وتشوفين
ياقوت بمكابرة بينها وبين نفسها/لا اختياري صح ياجوهرة
جوهرة زفرت/مليت من الحياة معه كل شي هادي بأموت
ياقوت كشرت بوجهها
جوهرة/مو هذا كلامك!!
ياقوت/وبعدين ياجوهرة جاية افضفض مو اتحاسب!!
جوهرة ارتفعت حواجبها/والله انتي اللي قلتي مو بأنا!!
ياقوت بقهر/خلاص جوهرة خلاص!!
جوهرة ابتسمت وهي تناظر سمو ومجد داخلين/يسلم قلوبهم يسلمها حبايب خالة/فتحت يديها لهم/
سمو ومجد اتجهوا لها يسلمون عليها
ياقوت/وين بابا؟
مجد/باسنا وراح
سمو مدت يدها لامها وفيها فلوس/بابا يقول مصروف
جوهرة بنص عين وهي تناظر ياقوت/يمّه منك يمّه حتى مصروفك مانساه وزعلانة!!
ياقوت صدت بوجهها وهي متنرفزة ماتبي ترد اكثر بالكلام
نايف وقف عند سيارته وهو عاقد حواجبه واتسعت عيونه وهو يقرأ رسالته فتح السيارة وركب وحرك بسرعة جنونية
ـــــــــــــــــــــــــ ـــــــــــــــــــــــــ ـــــــــــــــــ
((الـمـغـرب))
.
((بيت ابو عمر2))
موج تتقهوى
ام تركي ضربتها ع كتفها
موج/اااه ياخالة وش فيك علي!!
ام تركي بنرفزة منها/والله مابطلتي هالحركات لاقول لامك
موج/بِسْم الله وش سويت!!
ام تركي/سلامتك والله بس نكدتي علي يومي بحركتك مع عمك الصباح
موج وهي تتقهوى ببرود/والله هذا الصدق اللي صلحت الاكل فتنة توه كان يتلذذ ويوم قلت له الله اكبر انمغص!!اقنعيني بالله!!
ام تركي/مالك شغل بينهم ابعدي عنهم وش فيك انتي ماتفهمين الى ماتاكلين لك علقة على راسك!!
موج/والله عمتي اكبر علقة ويوم اشوفها مع فتنة اقول الحمدلله اني مو بنتها
ام تركي رفعت الفنجال/موجيّة وربي بهالفنجال بجبهتك
موج/عاد تدرين خالة على كثر ماتلاسن عمتي فتنة بس ارحم من عمي
ام تركي/لاااا ماانتي بصاحية انتي اليوم!!
موج/ليش!!
ام تركي/قفلي فمك لاتجيبين لنا مشاكل
موج/المشاكل جاية جاية!!مو بنت اختك لاحقتنا المشاكل لاحقتنا هذا السبب يكفي
ام تركي/بس شفتيه اليوم يتشكر عزة وانا سيفون علي!!
موج ضحكت/وماالحب الا للحبيب الاولي
ام تركي بزعل/وجع ياموج وجع بتغثيني روحي بيتك
موج غمزت لها/يحبك والله يحبك والدليل يومه ياكل من يدك ماياكل من يدها بس ارتاحي
ام تركي ميلت فمها وهي تناظر تصريفة موج/كيفها فتنة
موج/الحمدلله صابرة عليهم
ام تركي/وهالسوسة رغد؟
موج بشك/هادية على غير العادة
ام تركي/الله يستر منها
موج/امين امين ها وضح الجنين وش؟
ام تركي/لسى بالثالث بدري
موج/يارب بنت
ام تركي كشرت/لا ولد ان شاء الله تبين الثالثة فوق راسي!!
موج/استغفر الله بس/وقفت/ولد ولا بنت مايفرق الله يعينك ياخالة اذا بتصيرين مثله كثر خيرك سلام/مشت/
ام تركي/تعالي وين رايحة
موج/وراي زوج مثلك سلام/مشت/
ام تركي/استغفر الله العظيم الله يصلحك من بنت/نادت/تركي تركي يمّه
.
((شقة ساجي))
سدول بالمطبخ تطبخ
ساجي من الصالة/سدول بنت ياسدول
سدول رفعت صوتها/لحظة شوي
ساجي/بسرعة بسرعة الحقي علي اللي معي بيطيح
سدول قفلت النار واسرعت بخطواتها للمقلط وشهقت بفجعة وهي تحس بيدين تحاوطها
ساجي ورا الباب متخبي عنها واول مامرت من عنده حاوطها بيديه يضمها ظهرها لصدره وبحبه/ياروح ساجي اشتقت لك
سدول بانفاسها المخطوفة وهي تسمي/بِسْم الله علي بِسْم الله
ساجي دفن وجهه بشعرها وهو يستنشق عبيرها اللي يأسره كان ولازال يعشقها ويعشق وجود تفاصيلها بحياته
سدول ضربته بطرف اصابعها اللي يدوب تلحق يديه اللي محاوطتها من اعلى/خوفتني!!
ساجي/احبك
سدول ابتسمت
ساجي تركها وهو يلفها له ويضمها لصدره/والله اني احبك ياسدول
سدول/وبعده؟
ساجي ضمها اكثر بصمت وكأنه يعتذر عن تصرفات امه لها
سدول مسحت على ظهره/وبعده ياساجي؟
ساجي تركها وهو يناظرها بحب ثم مد يده للباب اللي كان متخبي وراه وهو يسحب الكيس اللي معلقة بيد الباب ويمده له/واحبك واحبك وفوق حبي لك احبك
سدول بابتسامتها/يكثر خيرك ياحبي ماله داعي خيرك سابق الله يخليك لي
ساجي باسها على جبينها/ويخليك لي من عندي اغلى منك ياروح ساجي يالله يالله افتحيها
سدول ناظرت الكيس وتوترت وهي تشيل الفكرة من بالها
ساجي بحماسه/يالله
سدول خرجت بوكس طقم الذهب من الكيس وفتحته وبابتسامة/يكثر خيرك يارب
ساجي/من طاحت عيني عليه عرفت مايليق الا بحب ساجي وروحه
سدول/يسلم عمرك ياحبي عارفة غلاتي عندك وانت عارف غلاتك بقلبي ماله داعي وانت بتبدأ مشروعك وخيرك مغطيني عساه دايم
ساجي زفر وهو يضمها/والله والله اذا نجح المشروع لاأفرش لك الارض ورد رجلك الناعمة ماتلامس الا الورد اللي انعم منها
سدول ضمته/الله يخليك لي ياحبي/تنهدت بين يديه وهي تفكر وشلون بيبدا مشروعه وهو يضيع فلوسه بهالسرعة/
.
((شقة سراج))
سراج جالس قبال التلفزيون يتابع مسرحية ويضحك بصوته العالي
سحايب دخلت كعادتها بتوربان يغطي شعرها هالمرة بلونه الابيض وبجامة باللون الوردي زادت جمالها الناعم نعومة انحنت وهي تنزل الصينية قباله واعتدلت بوقفتها
سراج يناظرها من فوق لتحت/وين!!اقعدي قهويني
سحايب بدون نفس/العيال فاتتهم درس اليوم وللحين ماخلصنا
سراج بسخرية/الله من الدفارة والمستقبل الباهر!!تراهم عيالك مردهم بالبيت واصرف عليهم مثلك!!
سحايب بلعت ريقها بقهر
سراج/الحمدلله اللي مصبرني عليكم ولا الله العالم وش صار لكم
سحايب/تبي شي الحين؟
سراج وهو يصب له شاهي بيمينه وياشر بيده اليسار بمعنى روحي/الحمدلله بصحتي ماني بحاجتك انتي وعيالك
سحايب مشت وهي تدعي ربها يفكها منه على خير عاجل غير اجل
.
((شقة حاتم))
عجايب جالسة بعيد عنهم وعينها بجوالها ولانطقت حرف
حاتم يتقهوى وهو صاد عنها بوجهه مايناظرها ابد
حازم كل شوي يسرق لامه وابوه نظرات بضيق ابتسم/يمّه البرتقال لذيذ لايفوتك
عجايب/اكيد حامض كالعادة لاتاكله بس وتعدم لسانك مو هذا الشي الزين اللي ورثته وانا امك
حاتم ميل فمه بعدم رضا وهو يكبح غيضه
حازم/يمّه!!الزين مايختار الا زين وبعدين نسيتي انك الزينة مختارة الزين!!
عجايب زفرت بضحكة وماردت
حاتم/روحي جيبي برتقال للصغار خلص
حازم/انا رايح
حاتم بحدة/اجلس هي تروح
عجايب/ماني برايحة معك يدينك ورجولك وهم مثلك!!
حاتم التفت لها وبصراخ/عجايب لاتراددين وروحي
عجايب/ماني برايحة!!
رزان انفجرت تبكي
حازم تغير وجهه
فيصل يحبس دموعه وهو يناظرهم
حاتم وقف/قومي قومي انتي لسانك طويل ماتحشمين احد يبي لك تأديب من جديد
عجايب وقفت وبصراخ/الحمدلله متأدبة من قبل اعرفك
حاتم وقف قبالها ودفها/يالله شنطتك يالله ماتقعدين ببيتي دقيقة يالله خلي اهلك يربونك من جديد يالله
عجايب بعصبيتها/الحمدلله فرقاكم ياعيال احمد عيد الحمدلله/زغرطت وهي متجهة لغرفتها تجمع اغراضها/
حازم ناظر ابوه/يبه
حاتم بصراخ/عينك على اخوانك فاهم
حازم هز راسه بايه
حاتم مشى خارج من الشقة وقفل الباب وراه بقوة
.
((بيت فواز))
فواز واقف قبال التسريحة يمشط شعره بملامحه الثقيلة كالعادة
جواهر وهي ترفع وتنزل شماغه من والى السرير بتوتر من اللي بتسويه اخذت نفس وهي تتظاهر بانها تعدل الشماغ وهي تتجه له/اقول حبيبي
فواز وهو يرفع العطر له ويتعطر/أسمعك
جواهر وقفت جنبه ومدت له شماغه/بما اني حامل فكرت بالاسماء؟
فواز وهو يعدل شماغه/توك بالاول خليه يثبت بعدين فكري
جواهر وهي تلعب بالعقال بين يديها/ان شاء الله بيثبت ان شاء الله يارب بس يعني خاطري نسمي سلطان وش رايك؟
فواز اللي من وصل لمسامعه الاسم تجمدت يديه عن اللي يسويه والتفت يساره يناظرها بحدة مو مصدق اللي تقوله/عيدي ماسمعت!!
جواهر قشعر جسمها وهي لاول مرة تناظر هالشر لها بعيونه وبلعت ريقها وهي تكمل عادي/سلطان ياحبي
فواز تقدم خطوة منها وهو يغلي/لو يصير مايصير هالاسم مايتسمون به عيالي يحرم عليهم
جواهر/طيب و
فواز صرخ لاول مرة بجواهر/جوااااهررر
جواهر فزت وهي تغمض عيونها برعب
فواز/لاعاد تفتحين هالموضوع معي مرة ثانية ولا والله والله يصير شي مايسرني قبل مايسرك/سحب العقال من يديها ومشى/
جواهر انتفضت وهي تحط يدها على صدرها/يمّه يمّه استاهل انا وش لي بكلام العجايز يمّه بِسْم الله علي/جلست وهي تحس رجولها ثقيلة من الخوف/
.
((السيارة))
نايف وقف بالسيارة وعلى وجهه ملامح زعل
سلطان بابتسامة/خلاص عاد لاتطولها وهي قصيرة
نايف التفت له وسط حواجبه المرتفعة بسخرية من كلامه
سلطان ضرب صدره وبثقة/محسوبك ذيب هالمرة ذيب محد يقواه ذيب تخافه الذيابة
نايف ميل فمه بسخرية وهو يتكلم بالاشارة/ايه واضح الذيب وهو قافل ازارير غلط!!
سلطان ناظر ازارير بصدمة كشر وهو يلتفت يناظره/تكذب بعد!!
نايف رفع اكتافه لفوق/ماادري مو انت ذيب!!
سلطان كشر بوجهه وهو يرفع يده بيضرب/يالله عاد احترم نفسك عطيتك وجه ولانسيت من الكبير!!
نايف ابتسم
سلطان/لاتوقف ماابيهم يشوفونك ولايدرون انك انت اللي جايبني
نايف اتسعت عيونه/نعم!!!
سلطان بتشديد على كلامه/عالاقل هالليلة يانايف الليلة بس اسمعني
نايف يناظره وبعناد/لا رجلي على رجلك
سلطان/تكفى
نايف/اقولك رجلي على رجلك!!
سلطان بتهديد/لاتحدني على شي ماابيه
نايف زعل ووضح عليه
سلطان تنهد/لاتروح بعيد اكيد شوي وطالع لك/نزل من السيارة وأشر له يمشي/
نايف واقف بالسيارة وهو يضغط عالدريكسون بتردد
سلطان انحنى وهو يدق على قزاز السيارة ويناظره/امش
نايف ضغط البنزين وارتفع صوت احتكاك الكفر بالاسفلت وحرك بسرعة
سلطان زفر وهو يناظره يبتعد اخذ نفس وهو يلتفت وراه ويناظر الباب الحديد اللي غطاه الشجر الكبير وكأنه حاجز يمنعه ويحذره من الرجوع لهالبيت مد يده بعناد لجرس هالبيت وهو يضغطه لمرة وتسارعت نبضاته مع هالجرس اللي استمر صوته حتى بعد مارفع يده عنه عدل شماغه وياقة ثوبه وحتى ساعته بشكل سريع من زود توتره ولحظات معدودة وانفتح الباب قدامه/
.
اللهم صل وسلم على نبينا محمد
.
إنتهى موعدنا الاسبوع القادم بحول الله وقوته
|