[لامارا]

الجزء الرابع عشر...


انا أحبك واقولها لك كلمه خليها في بالك...
انا ماني اي عاشق انا لما اعشق أغيــر والله لما أعشق اغير..




اليوم غير بالنسبه لي...
نورة جالسه قدامي...بينا مسافه قصيرة...اشوفها بعيني..
بكت لما شافت ريما..جلست جنبها ويدها على كتفها مانزلتها...
انا وامي بالكنبه المقابله لهم...وخالي يكلم بجواله...
ماني قادر انزل عيني منها...وكأنها بتختفي بأي لحظه...
اليوم بس قررت اني اصير شخص ثاني مع نورة...
ليش اكتم حبي لها؟
عشان رانيا؟
انا لو احب رانيا كان ماحبيت نورة....
يمكن اكون عند بعضكم شخصية الرجال الي اي وحده يشوفها يحبها...
والا الرجال الي مايعرف يحدد مشاعره...
لا لا لا...أنا أبداً مو كذا...نورة غير قلبت كياني...
كلنا نحب..لكن مين الي بيقلبك وبيلخبط حياتك!!
اليوم اعترفت وقلت لها..وحشتيني...ولا شي من الي كنت ابي اقوله... مجهز كلام كثير...بس لما شفتها طار الحكي...
وحشتيني هي الي طلعت وبس....
فجأة نورة شهقت:يوووه نسيت اتصل على منصور...
طلعت منها لا شعورياً...
غصباً عني ناظرتها وكأني اقولها انا هنا..احترميني...
توجه كلامها لامي:عمتي عطيني جوالك برسله مسج...
امي:تلقينه فوق الطاوله...
قامت نورة وراحت لطاوله الي اشرت عليها امي واخذت جوالها...
أرسلت لمنصور مسج .. ورجعت مكاني..كنت أحس بتعب...وثقل براسي..
هدؤ...كلنا ساكتين..مافي شي نقوله والا مااحد يبي يحكي...
عمتي وهي تناظر جوالها وكان يرن:نورة هذا منصور يتصل..
:ردي عليه..
عمتي:لا تعالي انتي ردي اكيد انه يبيك..
ناظرت سلطان وكأني استأذنه اني ارد او لا...صد عني وماحط عينه بعيني..
اخذت الجوال من عمتي ورديت:هلا والله..
منصور:الحمدالله على السلامه..
:الله يسلمك..
منصور:كيف الرحله؟
:الحمدالله كويسه..
منصور:اهم شي ماخفتي..
ضحكت:يعني لازم..
منصور:يلا الحمدالله..سلمي عليهم وانتبهي لنفسك..طمنينا عنك..
:ان شاء الله..مع السلامه..
بعد ما قفلت منه..
رجعت جلست...قامت عمتي تشوف وين ابوي...
سلطان:انتي ماارسلتي له مسج!!
سكت شوي..استغربت منه..مو بالعاده يعلق..
:الا ارسلت..
سلطان:طيب ليش يتصل؟
ابتسمت:ماادري عنه..يطمن..
سلطان يناظرني وموعاجبه كلامي:اهاا..
ثواني افكر فيها اسأله ليش...لا لا أحسن خليه يانورة..
ابتسمت..وعدلت جلستي...والله وبديت اشغلك ياسلطان...
ابتسامتها وراها شي...شلت عيني منها ووجهتها على التلفزيون...
تناظرني كل ما سمح لها الوضع...
تلعب بشعرها...وباين انها تعبانه وفيها النوم...كل ماتطيح عيني عليها اشوفها تتثاوب...
:نورا..
ناظرتني:نعم..
:روحي نامي..شكلك تعبانه..
ضحكت:بروح..
امي:ايه والله نورة روحي نامي وارتاحي..
:انام عند ريما؟
امي:لا ريما عندي تنام..,تعالي معاي اوديك للغرفه..
قامت امي وقامت نورة معاها..وهي تحب راس ريما: تصبحين على خير حبيبتي...
لفت علي وابتسمت:تصبح على خير سلطان...
بادلتها الابتسامه:تلاقين مثله خير...
مشت بخطوات هادئه وطلعت من الصاله...
دخلنا انا وعمتي الغرفه الي بنام فيها..وكانت كبيرة ومكمله من كل شي....
:عمتي منار بترجع الاربعاء على الرياض انا خايفه عليها..
عمتي:مالهم الا اسبوعين..
:رمضان..
عمتي:ناسيه والله ان بالي مو معي,ابوك قال لمساعد وهو بيقولها..
بضيق:الله يعين بس...
عمتي:نامي يابنيتي وربك يحلها...
طلعت عمتي وخلتني بعالمي...
ماقدرت انام على طول..راسي بينفجر من التفكير...
><><><><><
يدخل فهد جناحه..يروح لصالتهم سارة جالسه وتكلم...
فهد:هلا هلا بالزين كله..
سارة تبتسم:هلا فهد...
فهد وهو يجلس جنبها:كيفك ياقمر؟
سارة:الحمدالله..,ايه مشاعل خلاص اجيك اليوم...يلا باي..
فهد وهو يحط يده على بطن سارة:يازينك وانتي حامل..
سارة:باين؟
فهد وهو يبوس بطنها:هاذي بوسه لعزوزي..والا لبنتي وش بتسمينها؟
سارة وهي تضحك:ناديه على امي..
فهد:وش ادلعها..دودو؟
سارة:اذا جت يطلع الدلع..
فهد:طيب نتغدى؟
سارة:طيب..
فهد:سارة الله يخليك لا تضيقين صدرك..والله اني اتعب معاك..
سارة:فهد غصباً عني..
فهد:ان شاء الله بتطيب..كثير ناس يتعالجون منه...
سارة:ان شاء الله..
فهد:وش رايك نسافر؟
سارة:لا مالي نفس..
فهد:اربع ايام تغيرين جو فيها..لبنان والا مصر..
سارة:معليش فهد مالي نفس..بعدين رمضان مابقى عليه الا كم يوم..
فهد:فكري...انا عشانك بسافر ابيك تغيرين جو...
سارة:يصير خير يافهد..تجي منار وبعدها الي ربك كاتبه بيصير..
><><><><><><
خالتي وهاله جالسين بالصاله وبينهم نقاش حار يخص هاله طبعاً...
خالتي:هاله المكالمات الكثيرة ضرها اكثر من نفعها..
هاله:يمه هذا خطيبي وبيصير زوجي لازم اعرفه قبل لا اتزوجه..
خالتي:انا مااقولك لا تكلمينه..
هاله تقاطعها:تبين اقوله بدر تكلمني مرتين بالاسبوع بس!!لا يمه ما يصير..
خالتي:ياهاله انا امك واعرف مصلحتك زين..بايام الخطبه العلاقه تصير رسميه احسن...
هاله:لا لا لا انا اعرف وش اسوي..يمه لو سمحتي قفلي على الموضوع..
خالتي بعصبيه:بتندمين وبتقولين ياليت سمعت كلام امي...
هاله:شوفي مشاعل ماكانت تكلمه كثير وشوفي شلون زوجها الحين!اما سارة تكلمه كثير ومبسوطين...يعني لو مشاعل عرفت خالد زين كان فكت منه...
خالتي ناظرتها وماردت..
رن بوقتها جوال هاله وكان بدر طبعاً..
ابتسمت هاله وقامت من الصاله بسرعه وردت:هلا..
بدر:هلا وغلا..
هاله:وينك اليوم مااتصلت؟
بدر:توني طالع من مكتبي..
ماكانت مكالمه طويله قفل بدر من هاله لما وصل البيت...طبعاً هذا مو اخر اتصال بينهم اليوم...
><><
مرت ثلاثه ايام..ماطلعت فيها من البيت..
اليوم ريما وعمتي وابوي رايحين من الصباح للمسشتفى..
وسلطان رايح لشغله..
جالسه بالصاله اتفرج على التلفزيون احاول اشغل نفسي...
بعد فترة طويله..
سمعت صوت سلطان من تحت...أخيراً جا..
قمت من مكاني ورحت عند الدرج..طليت على تحت..
حس فيني سلطان رفع راسه:هلا نورا...
ابتسمت:هلا..
سلطان:انزلي انزلي..
بخطوات سريعه نزلت..
سلطان وعلى وجهه ابتسامه:نتغدى؟
:ايه..
سلطان:والا شرايك نطلع نتغدى برا؟
ابتسمت:ايه نطلع..
سلطان:ابدل ملابسي ثواني..
طلعنا انا وياه لفوق..راح غرفته وانا رحت غرفتي..بدلت ملابسي وطلعت وكان ينتظرني بالصاله..
:انا جاهزة..
ابتسم:يلا..
ركبنا السيارة..طبعاً ركبت قدام...
مد يده بهدؤ اتجاهي..لصقت بالمرتبه لا شعورياً...سحب الحزام وسكره..:انتي بامريكا مو بالسعوديه..
:ايش تحبين تسمعين؟
ابتسمت:اي شي..
:ترا عندي عربي..
ضحكت:اممممم وش عندك؟
:هاذي الاغنيه الي احبها..
شغلت المسجل وكانت اغنية فضل شاكر(ضحكت الدنيا)..اغنيتي المفضله لما صرت اسمع عربي...
ناظرت نورة وابتسمت...بادلتني الابتسامه...هاذي الاغنيه لك يانورة...
نظرته وابتسامته كان يقصد فيها شي...ماقد ركزت بكلمات الاغنيه بس الحين لازم اركز واسمعها زين...
على الصوت اكثر..وكان يطبل بيده على دركسون السيارة..
حمرت خدودي وذبت..انا مااقدر على كذا..
ضحكت الدنيا وأخيرا لاقينك...
حبيبي حياتي كل عمري فداك...
والله ماننسا ان في يوم حبينك...
حبك بقلبي على طول ماانساه...
يااغلى الحبايب..الي دوم عندي غايب انا ملك ايديك....
يكفيني قربك وطيبة قلبك.. عمري انا اهديك...
ياحياة الروح تفداك الروح...حبي وعمري وكلي فداك...
وينك نصيبي ياعمري وحبيبي والله اشتقنا...
دايما في بالي حبيبي الغالي وين اروح القاك...
مين يقول العشق في الدنيا حرام..مااحنا عشقنا..
حبينا وتحبينا ونسينا وتناسينا وذبنا..
قلبي يدق بسرعه...ماحطيت عيني بعينه...انا قاعده اعيش قصة حب..بعمري مافكرت فيها...
انا بعد ماكنت اناظرها...كنت منحرج وماابي احرجها بعد...
نورة يانورة..وش سويتي فيني انتي...
كنت اعيد الاغنيه كل ماخلصت..
احس بشعور اول مرة احس فيه...
ساكتين طول الطريق والاغنيه هي الي تتكلم عنا...
اجمل احساس لما يكون الي تحبه معاك...تحرك يدك وتجي على يده...تلف وتلقاه قدامك...تبتسم ويبادلك الابتسامه عيونكم هي الي تتكلم...
وصلنا المطعم..نزلنا من السيارة..وقفت بمكاني ..انتظرتها تجي.. ومشينا بخطوات بطئيه ودخلنا المطعم...
جلسنا بالطاوله متقابلين..
حطيت المنيو عالطاوله..عارف طلبي...كثير مااجي هذا المطعم...كنت اناظرها ومانزلت عيني منها..المنيو بيدها ومارفعت عينها..
تقلب المنيو..يمكن قرته ولا عشر مرات...
بالي ابداً مو معاي..مرتكبه وخايفه وفرحانه..مشاعري متلخبطه...اقرا وماادري وش انا قاعده اقرا...
سلطان:تبين اساعدك؟
رفعت عيني وابتسمت:وش احلى شي عندهم؟
سلطان:كل شي حلو..,تبين اطلب لك مثلي؟
:اوكي..
بعد ماطلب سلطان...سكتنا لثواني..
سلطان:شخبار منار؟
:الحمدالله..
سلطان:وكيف زوجها؟
:مساعد مرة طيب وان شاء الله بيسعدها...
سلطان:ان شاء الله..
وقف سلطان وكان يضحك...التفت وكان في رجالين...رجعت عدلت جلستي..
قربوا مننا سلم سلطان عليهم...وعرفهم فيني..اكتفيت بابتسامه..مدوا يدهم..ماعرفت وش اسوي بس اظطريت اني اصافحهم...
رجعت جلست..وسلطان يحكي معهم...
حكيت معهم شوي ورجعت جلست:نورا يقولون انك حلوة..
حمرت خدودها وابتسمت وبدون اي تعليق..
:قلت لهم كل البنات السعوديات حلوات..
انفجرت هنا ضحك...
:ليش تضحكين؟
نورة:اضحك عليك..
لو تدرين بعد وش قلت لهم...قلت بس هي احلى وحده منهم....
نورة حلوة في عيني..بس مو شرط انها تكون عند كل الناس حلوة..ويمكن بعد مااحد يشوفها حلوة غيري...
><><><><><><

سارة ومشاعل في بيتنا بانتظار منار...هي للحين ماتعرف ولا شي...
سارة:والله يامشاعل اني خايفه عليها...
مشاعل:الله يستر بس...
وقفت السيارة عند باب البيت..فتحت منار باب السيارة بسرعه..
مساعد نزل معها..
منار:بتدخل؟
مساعد:ايه..
مساعد ماكان يبي يخلي منار بموقف مثل كذا...
منار تمشي بخطوات سريعه...دخلت البيت..توجهت لصاله على طول..ومشاعل وسارة جالسين..
بعد ما سلمت عليهم..عيونها تنتقل بين مكان لثاني...
منار باستغراب:وينهم؟
مشاعل وسارة ناظروا بعض ومااحد منهم تكلم..
منار:وش فيه؟
مشاعل:مسافرين..
منار وهي تضحك:بلا نصب...
وبصوت عالي:عمتي..نورة...نويير بلا استهبال..
سارة:منار والله مسافرين..
منار حست ان الوضع مو طبيعي ابداً..:بنات وش فيه؟
مشاعل مسكتها بهدؤ وجلستها على الكنبه:منار...ريما تعبانه..والعلاج برا بيكون أحسن...ابوي وعمتي خبوا علينا لبعد زواجك..وبعده بيومين سافروا...
منار بدت ترتجف..عيونها امتلت بالدموع قلبها يدق بسرعه:لا تقولين ان ريما فيها......
مشاعل تقاطعها:بس يقولون كثير ناس يشفون منه الحمدالله...
منار وهي تصيح:وكثير ناس ما يشفون منه...ياليته فيني ياليته فيني ولا بريما...
مساعد من الطرف الثاني..واقف عند الباب...محتار يدخل والا يطلع...
قرر انه يطلع ويروح عند اهله...ركب سيارته...كان يفكر بحياته مع منار كيف بتصير...
اسبوعين مرت كانت جافه معاي...ماادري اذا هذا طبعها والا هي مو مرتاحه معاي...
اقدر يامنار اخليك تحبيني..ونصير زوجين يحبون بعض..والا نعيش مثلنا مثل كثير من الناس احترام وتقدير بينهم لكن حب مافيه...
حياتي مااستمرت مع فاتن مو لعيب لاحد فينا..ماكانت فيه الراحه النفسيه..لاهي مرتاحه ولا انا مرتاح..بعد حملها حاولت اني اخلي حياتنا تستمر لكن ربي ماكتب..انفصلنا وكنت مرتاح لقراري..كثير مااندم واقول ياليتني ماطلقتها...
><><><><><><
الساعه 12:00..وخواتي للحين مجتمعين في بيتنا...
يرن جوال منار وكان مساعد..يعطيها خبر انه بالطريق...
منار وهي توقف:يلا بنات انا بروح الحين..
سارة:متى بتروحين لشرقيه؟
منار بضيق:بكرة..
مشاعل:لييش؟؟
منار:دوامه السبت ولازم نترتب..
سارة:تمرينا بكرة؟
منار:أكيد..
مشاعل:متى بتمشون؟
منار:العصر..
سارة:خلاص نتغدى هنا..
منار:بتغدى عن اهل مساعد...
سارة:يووه نسيت انك متزوجه...
منار:بعد الغدا..
سلمت عليهم منار وطلعت...ومساعد ينتظرها بالسيارة..
وهي تركب:السلام عليكم..
مساعد:وعليكم السلام..كيف خواتك؟
منار:بخير...,انت كيف اهلك؟
مساعد:يسلمون عليك..
فترة قصيرة ووصلوا للفندق...
دخل مساعد الحمام..اما منار جلست على السرير..والافكار ماليه راسها...
مساعد بعد ماطلع من الحمام...وهو يبدل ملابسه:منار..
رفعت عينها باتجاهه..
مساعد:بدلي ملابسك...
هزت راسها بالموافقه...
رمى مساعد نفسه بالسرير:تعبااااان..
رفع نفسه قرب شوي لمنار وحط يده على كتفها:منار بدلي ملابسك وبعدها بنحكي..
قامت منار وبدلت ملابسها وغسلت...وهي تجلس على طرف السرير:يعني كنت تعرف يامساعد؟
مساعد:ابوك قالي..
منار:وليش ما قلت لي؟
مساعد:وش الفرق لو عرفتي هناك والا لما ترجعين؟
منار:تفرق..
مساعد:منار ماتفرق وموهذا موضوعنا...ريما باذن الله انها بتشفى...
منار:ان شاء الله..
مساعد:ارتاحي الحين..
منار وهي تنسدح:تصبح على خير..
مساعد:بدون تفكير يامنار...
><><><><><


يوم الخميس...
راحوا مساعد ومنار عند اهل مساعد...
وبعدها مروا على بيتنا عشان تسلم على سارة ومشاعل...
الطريق من الرياض للشرقيه اربع ساعات تقريباً...
مر الوقت بسرعه...
وصلوا للخبر..
مساعد وهو يفتح باب الشقه الي بيسكنون فيها:تو ماتباركت..
منار ابتسمت:شكلها كبيرة..
مساعد:حلوة لاثنين توهم متزوجين..
مساعد يمشي ومنار وراه:هاذي الصاله طبعاً..
منار:والله يامساعد حلو ذوقك...
مساعد:عيونك الحلوين..,هذا المطبخ..
منار:الي بنطبخ فيه انا وياك..
مساعد وهو يضحك:الشكوى لله انا وياك..
ضحكت منار معاه...
دارو الشقه كلها...كانت حلوة ومرتبه ومكمله من كل شي...
بعد ما ريحوا شوي وبدلوا ملابسهم...
جالسين بالصاله..
منار:لازم نطلع نتقضى..
مساعد:يلا نروح السيفوي ونجيب لنا عشا..
منار:بتغير ملابسك؟
مساعد:لا..
منار:اروح البس عبايتي...
><><><><><

خلص الشهر ودخل رمضان...
مرت خمسه ايام من رمضان بسرعه..
اجواء جديده ورمضان غير عن اي رمضان قبل...
جالسين كلنا بالصاله..الا سلطان...
نتكلم انا وعمتي بصوت واطي عشان ما تسمعنا ريما...كنت اسألها عن علاجها ومن هالحكي...
دخل سلطان وكان باين انه مستعجل وبيطلع الحين..
سلطان:السلام عليكم..
كلنا:وعليكم السلام..
سلطان:انا بروح عند خالي محمد...مجتمعين فطور عنده..ترا ميسون كلمتني تقول خلي نورة تجي..
عمتي:سلم لي عليهم..
:لا تعذر لي منها..
سلطان وعلى وجهه ابتسامه:ليش..تعالي بتتعرفين على بنات كثير...
عمتي:روحي معاه يانورة..
عمتي تبيني اطلع واروح عشان اوسع صدري...
:يبه عادي اروح؟
ابوي:براحتك..
:بفكر..
طلعت من الصاله ورحت لغرفتي بشوف لي لبس مناسب...
اخيراً طلعت لي شي البسه..تظبطت شوي...
دخلت انا غرفتي ولبست بسرعه وطلعت جلست شوي بالصاله...ناظرت الساعه..لازم اطلع الحين..
وقفت ومشيت باتجاه غرفة نورة طقيت الباب وبصوت عالي:يلا نورا انا بالسيارة..
كملت مشيي...وسمعت صوتها من وراي التفت:كل هذا لبس!
ابتسمت:ماقلت لي الا متأخر بعد..
:طيب اسف خذي راحتك...
وحنا بالسيارة...
نورة:سلطان مستحيه...اجلس مع ناس مااعرفهم..
:تعرفي عليهم حبوبين بعدين تعرفين ميسون..
نورة:بس حتى...شفتها مرة..
ابتسمت بخبث:ايه عرفتيها مرة ونصبتي عليها..
حسيتها انحرجت ولا ردت علي..
:ترا للحين ما صار شي بينا...اخاف احد يسألك..
ناظرتني وهي مستغربه:ايش؟
ابتسمت:على خطبتنا ماصار شي..
وجهها حمر وماعرفت وش ترد..
:سوري مو قصدي اضايقك..بس لو احد سألك..
نورة:سلطان رجعني ماابي اروح معاك...
:قربنا نوصل شلون ارجعك..
نورة:ماابي اروح...
:بتروحين..
نورة:غصب يعني؟
:لا موغصب بس خلاص طلعنا ومابقى شي..انسي ارجعك...
نورة:ماراح انزل..
:انا بقفل السيارة..
نورة:سلطان الله يخليك..
:الله يخليك انتي يانورة بلا حركات اطفال...
ماادري شلون قررت اني اروح...ابي ارجع للبيت ماابي انزل واشوف ميسون...واكيد في غير ميسون...وانا شكلي بيصير غلط بينهم...
:سلطان احس شكلي بيصير بايخ..
ناظرني باستغراب:مافهمت!!
:مو لازم تفهم ابي ارجع..
بعصبيه:قلت ارجعك انسي..
:وديني اي مكان..
سلطان:تحسبين نفسك بالرياض انتي...
وقف السيارة وبعصبيه:هذا مكان يلا انزلي فيه..
:سلطان..
ناظرني:نورا..
:خلاص بروح...
سلطان:صدقيني بتنبسطين حبوبين كلهم..
فترة قصيرة ووصلنا للبيت الي معزومين فيه...
دخلنا وسلطان على وجهه ابتسامه عريضه..اما انا اتصنع الابتسامه...
ميسون باستقبالنا:اهلين سلطان..
مدت يدها تصافحه..الوضع كان طبيعي وهذا شي متعودين عليه..
سلطان:هاذي نورة..
ميسون وعلى وجهها ابتسامه:هلا نورة كيفك؟
سلمت عليها..
سلطان:وين جالسين؟
ميسون تمشي قدامنا وحنا وراها...
بصوت واطي:سلطان نجلس مع بعض؟
سلطان:ايه..
:من جدك؟؟؟
سلطان:ايه..ليش؟
:ليش ما قلت لي قبل..
سلطان:وش تفرق عندك!!
ناظرته وانا مقهورة منه..جد عصبت..
دخلنا المكان وكان مليان..جالسين على سفرة الطعام..رجال حريم بنات شباب...
كنت منحرجه لابعد درجه...واحس كان باين على وجهي اني منحرجه ومتضايقه...
سلطان يعرفني بالموجودين:خالي محمد...خالتي نور...دكتور صلاح...زوجته منال...عادل وزوجته عروب...
دلال..سوسو..مي..مازن..جاسم..وا ئل..مشعل..
ابتسم لما اسلم على كل واحد منهم...لو تعرف الاحراج الي انا فيه ياسلطان...
جلس سلطان بكرسي بعيد عني..وانا جلست جنب البنات...
دلال كان باين انها حبوبه..عمرها 25 او 26..اكبر البنات..جايه امريكا مع اخوها مشعل..هو يدرس جامعه وهي ماجستير..
سوسو اسمها سوسن بس هي تفضل ان الناس ينادونها سوسو...جايه مع اهلها...ماادري اذا دراسه والا شغل...
مي عمرها 22 من الكويت..شكلها من الي من زمان بامريكا وعلاقتها قويه مع ميسون...
والعيال الباقين جاين دراسه كلهم...
فترة قصيرة جلسنا وبعدها افطرنا...
كلهم مبسوطين وعارفين لبعض..
هذا يقول سالفه..وهذا يقول نكته...
حوارهم مع بعض كله بالانجليزي...يعني تطلع بالغلط كلمه عربيه...
انا ساكته وابتسم اذا قالوا شي ضحكني..
كانوا يحكون معاي البنات والعيال..يسألون عن كل شي...مافي تكلف ولا حواجز...هم كلهم عائله وحده...
سلطان كل شوي يناظرني وكأنه يطمن على الوضع..
بعد فترة قصيرة..
وقف سلطان وبصوت عالي:يلا نشوفكم قريب..
الاصوات ارتفعت وكلها تطلبه بانه يجلس..
سلطان:عندي شغل ولازم اطلع..الجايات اكثر...
خضعوا للامر الواقع..
سلطان يوجه الكلام لي:يلا نورا..
ابتسمت ابتسامه عريضه:يلا..
وقفت وسلمت على البنات...
يمشي سلطان قدامي وانا وراه...
ركبنا السيارة وبدون ما ينطق باي كلمه...
:سلطان...
مارد علي ولا حتى ناظرني..
:سلطان ليش طلعت بدري؟
سلطان:عشانك..
:اذا انت تبي تجلس كان جلست يعني..
يقاطعني:والحفله الي سويتها قبل ماندخل!!
:ماادري بس كنت منحرجه..
سكت ومارد علي...
:سلطان..
سلطان:نــعــم..
:البنات قالوا لي طلعي لك شريحه جوال اوفر لك من الشريحه السعوديه...من وين اقدر اطلع؟
سلطان:انا اجيب لك..
ابتسمت:شكراً..
سكت وماسألني اذا انبسطت والا لا..
:سلطان..
سلطان:وش تبين يانورا؟
:ماسألتني اذا انبسطت والا لا؟
سلطان:اكيد بتقولين انهم ثقال دم وماعجبوني وماادري ايش..
ناظرته وانا مستغربه:ليش يعني اقول كذا؟
سلطان:مو انتي مو اي احد يعجبك؟
:ياسلام..البنات كلهم حبوبات وخاصه دلال بس ميسون مااحبها وماراح احبها وقول الي تبي تقوله...
سلطان:الحمدالله انهم عجبوك..وميسون ماهي محتاجه لحبك..
عصبت من كلمته نرفزتني بشكل..ناظرته ومارديت..
بادلني السكوت وماتكلم...
وصلنا البيت ونزلت على طول..كلامه خلاني اعصب...
><><><><><
مساعد بصوت عالي ينادي على منار:يلا منيار بقى خمس دقايق ويأذن العشاء..
منار وهي تلبس عبايتها:جيت جيت..
مساعد:تأخرنا..
منار:ان شاء الله القى لي مكان..
مساعد:صغيرة انتي خليهم يدخلونك بينهم...
منار وهي تضحك:مانفعني الصغر..لو اني طويله اخذ حقي عالاقل..
طلعوا مساعد ومنار من شقتهم رايحين للمسجد يصلون التراويح...
هاذي عادتهم من بدا رمضان...
دخل مساعد مسجد الرجال ومنار مسجد الحريم...
بعد ما خصلت الصلاة..وركبوا السيارة..
رن جوال مساعد..
مساعد:هلا..بخير..ايه توني طالع من الصلاة بكلمك بس سبقتني...لا اسمحلي..الجايات اكثر ان شاء الله...بحاول..خلاص على خير مع السلامه..
منار:معزوم؟
مساعد:ايه..
منار:ليش ما راح تروح؟
مساعد:انا الحين شغلي عساني اروح ماابي اتركك اجي اروح عزايم!
منار:لا مساعد روح...
مساعد:منيار خلاص ماراح اروح..
منار:انا اشغل نفسي باي شي..يعني يمكن هاذي خامس عزيمه ولا تروح..
مساعد:وبعدين معاك؟؟
منار:خلاص براحتك...
وصلوا الشقه..نزلت منار ومساعد راح لشغله...
يمر الوقت ببطئ..منار تحاول تشغل نفسها بالمكالمات والتلفزيون...
الساعه 12:00 ومساعد للحين ماجا...
ترددت بانها تتصل او لا...
رفعت السماعه واتصلت عليه..
منار:هلا مساعد وينك؟
مساعد:بالطريق..
منار:تأخرت..
مساعد:تبيني اجي..ثواني وانا عندك..وقبل شوي تقولين روح العزيمه اقعد بلحالي..
منار وهي تضحك:اذا بتروح استحمل الشكوى لله..,لا تسرع..
><><><><

كلمتني اليوم دلال الي شفتها في بيت ميسون...بيطلعون وتبيني اطلع معهم..ماعطيتها الموافقه قلت اسأل عمتي اول...
رحت الصاله...وسلطان توه داخل..
اكتفينا اننا نبتسم لبعض...يعني قدام ابوي وعمتي...
:عمتي..كلمتني دلال الي حكيتك عنها...
عمتي:ايه عرفتها وش تبي؟
:بيطلعون وتبيني اطلع معهم..
عمتي:لا والله يانورة اخاف عليك..
:ليش تخافين..يبه انت وش رايك؟
ابوي:والله الي تشوفه عمتك..
عمتي:خليهم يجونك البيت..
:لاعمتي..مرة ثانيه اقولهم انتم تعالوا..
عمتي:سلطان البنات ثقه؟؟
سلطان:ايه يمه محترمات..
عمتي:روحي مع اني ماارتحت..
:مشكورة...
ريما:انا ابغى اروح معاك..
:عمتي اخذها معاي؟
عمتي:لا ريما تجلس عندي..وبعد شوي بنروح الملاهي مع سلطان..
وقفت عشان اروح الغرفه..
عمتي:نوير مين بيوديك؟
:هم بيمروني..
رحت غرفتي...وبعد ساعه وكنت جاهزة فيها اتصلت دلال تقولي انها تحت ومعها البنات ينتظروني...
سلمت على عمتي وابوي عطاني توصيات لو اكتبها ماخلصت...
فتحت الباب...والبنات نازلين من السيارة ويحكون مع سلطان...
انا هنا فار دمي..بديت اغلي من داخلي..وش نزل سلطان وطلعه برا وخلاه يحكي معهم...
حتى لو كان يعتبرهم مثل خواته وهذا شي متعودين عليه..انا اغار...
وقفت بمكاني وكنت اناظرهم..
سلطان معطيني ظهره والبنات قدامه...يضحكون ويسولفون معاه...وميسون واقفه جنبه بعد..
سوسو وهي تأشر لي بيدها:هاي نورة..
:هلا...
نزلت من الدرج بخطوات بطئيه...
بعد عنهم سلطان وقرب مني وصار وجهي بوجهه:انتبهي لنفسك..
ناظرته ولفيت..
سلطان:نورا!!
بصوت واطي:يعني مرة خايف علي!!
سلطان طير عيونه واستغرب من كلمتي:اوش نورا مو قدام البنات..
:مايسمعون..
مشيت وتركته..هو بعد كمل طريقه وتركني ودخل البيت..
سلمت عليهم وركبنا السيارة..
دلال هي الي كانت تسوق وجنبها مي..وانا وسوسو وميسون ورا...
وصلنا المطعم...كان باين عليه انه حلو...وكان مليان عرب...في اماكن معينه يكثر فيها العرب...
توزعنا على الطاوله..الوضع للحين حلو..
بعد ماطلبنا..
طلعت ميسون باكيت دخان من شنطتها واخذت لها سيجارة...
ناظرتها دلال وكأنها تقول مو قدامها...
طنشت ميسون وعطت سوسن اما دلال ومي مااخذوا...
ارتبكت وحسيت اني بنخنق..ماقدرت احكي..ماني مستغربه من الي قاعد يصير بس ماتوقعت...وكنت ميته خوف..
وقفت من مكاني:انا بروح الحمام..
وانا امشي...شفت وجه بين الجالسين مو غريب علي...وين شفتيه يانورة..ايـــه تذكرت هذا الي كان معاي بالطيارة..
جت عيني بعينه ابتسم ورديت له الابتسامه...وقف وجا باتجاهي:هلا اختي..
ابتسمت:هلا..
...:كيفك وكيف الاهل؟
:بخير..
...:وكيف اختك؟
:الحمدالله...
...:كويس اني شفتك مرة ثانيه..
:سوري على هذاك اليوم كنت ابي اتشكر لك بس..
قاطعني:لا وش دعوة ماسويت شي...
:عن اذنك..
...:نشوفك على خير..
هذا الي كان ناقصني..انه يشوفني وانا مع هالبنات...
استغربت انه ماقال اسمه..المفروض انه يقول...يمكن اشوفه مرة ثانيه ويمكن لا..
رحت الحمام واحس اني ابي اطلع...انا اجلس مع بنات كذا...اكره اشوف نفسي بمواقف مثل كذا...
رجعت لمكاني واول ماشافوني سكتوا...
جلست ومانطقت باي كلمه...
سوسن باسلوب منرفز:نورة شكلك متضايقه..
:من ايش متضايقه؟
سوسن:انا ماالومك لو تضايقتي..يعني انتي ماتعودتي على الحياة هنا..ولا على الناس الي هنا...فطبيعي انك بتنزعجين..
ناظرتها ومارديت...
دلال:ماعليك منها يانورة..
ميسون:تتعودين بعد ما تتزوجين...
تقصد لما اتزوج سلطان...انا اوريك ياميسون انتي والي معاك..
:من قالك بنسكن هنا!!عالعموم هاذا مواضيع خاصه ومااحب احكي فيها...
مي:بنات خلاص..
سوسن:مين هذا الي تو سلمتي عليه؟
ناظرتها بطرف عين ومارديت...
انا مااقدر اتعامل مع ناس اسلوبهم استفزازي بهالشكل...وغير كذا كلامهم يقولون كلام ..مااحب اذكره واستغني عنه...
الحين هم الكول والناس الي فاهمين وانا القرويه والي مااعرف شي...
معليش يانورة استحملي...كنت قاعده اصبر نفسي طول ماانا جالسه معهم...
وأخيراً خلصنا والا خلصوا احسن..انا ماقدرت آكل شي..ابي اطلع وبس..
مي:وين نروح الحين؟؟
ميسون:وين تبغون؟
:لا معليش بنات بس لازم ارجع البيت..
دلال:نوصلك مو مشكله..
سوسن:بعيد البيت..
:خلاص انا اخلي سلطان يجيني..
مي:لانوصلك ماعليك من سوسو..
طلعت جوالي من الشنطه واتصلت على سلطان..
اول مارد:سلطان ممكن تجي تمرني..
سلطان وباين انه مستغرب:نورا وش فيك صار شي؟
:لا ماصار شي,بس انا ابي ارجع البيت وهم بيروحون اماكن ثانيه..
سلطان:روحي معهم..
:خلاص ارسلي السواق..
سلطان عصبيه:طيب طيب..وينك انتي؟
قلت له المكان الي انا فيه..ومسافة الطريق وبيكون عندي...
:خلاص سلطان الحين بيجي..تقدرون تروحون..
دلال:ماراح نخليك لوحدك..اذا جا نروح..
:لا دلال روحوا معليش..
مي:مايصير نورة نخليج..
:لا حبيبتي روحوا...انا انتظر هنا..
سوسن:براحتها..امشوا نروح..
ميسون:نجبرها يعني كيفها..
يمكن بعضكم بيقول اني انا وقحه وغلطانه بالي اسويه..بس جد تنرفزت منهم بشكل..
راحوا البنات وتركوني بالمطعم...مااكذب عليكم كنت ميته خوف...اتحمل هالخوف ولا اجلس تحت رحمتهم..
نصف ساعه مرت وانا جالسه لوحدي...
أخيراً رن موبايلي وكان سلطان..اول ماشفت الاسم على طول طلعت برا...
فتحت باب السيارة وكنت مرة معصبه وسلطان معصب اكثر مني..
ركبت بدون ماانطق باي كلمه..
سلطان:ممكن افهم وش الي صار؟؟
:قال محترمات قال...
سلطان:نورة لا تغلطين..
:اسفه استاذ سلطان..
سلطان:نورا ممكن تفهميني الي صار؟
:سوسن وقحه..وميسون اوقح...وانا مااقعد مع ناس كذا..يسون الي يسونه كيفهم بس مو قدام الناس..
نخلي هذا على جنب..كلامهم..سلطان كلامهم ماينقال..
سلطان:مافهمت شي!!نورا بدون الغاز..ممكن؟؟
:لا وبعد..قدام مين..الي كان معاي بالطيارة..فشلوني قدامه حسبي الله عليهم..
سلطان:نورا استغفري..كأني اشوف وحده عمرها 70 سنه وقاعده تحكي..
سكت ومارديت عليه...
سلطان:الحين هم وينهم؟
:ماادري..
سلطان:راحوا وتركوك!!
:ايه..
سلطان بعصبيه:مجنونه انتي..تجلسين بلحالك؟؟
:ايه,هم الي راحوا وتركوني..اقولهم اقعدوا..
سلطان:اوش اوش نورا حسابك معاي بالبيت...
:مو انت الي تسكتني..
سلطان بعصبيه وبصوت عالي:خلاااص..مو كفايه اخرتيني عن موعدي..
تنرفز والا ماتنرفز...اسلوب نورة هذا ما يعجبني...مندفعه وانا مااحب الي كذا..
لو صار لها شي..بكون انا السبب....انا الي خليت امي توافق انها تطلع معهم...
وياليت كل هالحكي فهمت منه شي...ماادري وش الي ماعجبها وخلاها تسوي كذا...
تصرفاتها في بعض الاحيان تقهرني..
ساكته وماحكت ولا كلمه...
وصلنا البيت..وفتحت باب السيارة على طول..
:نورا..
لفت علي بدون ماترد..
:ياليت الوضع يصير طبيعي عند امي وخالي...
ماردت علي وكملت طريقها..
اما انا رحت موعدي الي نورة اخرتني عليه...
><><><><><


يمكن المفروض اني مااسوي الي سويته...وبالغت بردة فعلي..لكن هذا الي صار...
وسلطان بعد زاد الي فيني...هو معاه حق انه يستفسر بس مو بهالطريقه المستفز...
يعني انا قلت له يرسل سواق اذا باخره عن موعده بس هو الي جا يتحمل...
دخلت البيت وماكان فيه احد..عمتي وابوي وريما راحوا الملاهي يلعبونها...
جلست فترة طويله لوحدي...كلمت هاله ومنار...
بعدها جو ابوي وعمتي...جلسنا مع بعض شوي..ابوي دخل ينام وعمتي راحت تنوم ريما وبعدها جت...
يدخل سلطان الصاله وبيده كاس ماي:هلا يمه..
عمتي:هلا وينك تأخرت؟
سلطان وهو يجلس:عندي موعد..
ماناظرني ولا انا ناظرته..
عمتي:ورا وجهك كذا؟
سلطان:تعبان من الشغل وتعبان من كل شي..
عمتي:بسم الله عليك ياولدي...
سلطان وعلى وجهه ابتسامه:لاتخافين يمه..امزح معاك..بس الشغل اليوم تعبني...
عمتي وسلطان هم الي يحكون..وانا طرف صامت...
وقفت من مكاني بروح لغرفتي...
:يلا تصبحين على خير عمتي..
عمتي:وانتي من اهله..
سلطان:نورا انزلي تحت وخذي شريحتك...نسيت اطلعها معاي..
:مشكور..
امانه ما ينرفز..هو مانساها انا متأكده حطه تحت قاصد عشان انزل واجيبها...
نزلت تحت واخذت الشريحه وطلعت مرة ثانيه فوق...
سلطان:تعالي..تعالي..نسيت الفصل البايخ الي سويتيه..
عمتي وهي مستغربه:نوير وش مسويه؟
:ماسويت شي عمتي..
سلطان:ماسوت شي..انا الي سويت...
عمتي:سلطان وش السالفه؟
سلطان:كلمتني وقالت تعال مرني من المطعم والا ارسل لي سواق..انا ابي ارجع البيت الحين..
عمتي:نورة ماقلتي لي شي..
:وش صار يعني لو كنت ابي ارجع البيت؟؟
سلطان:عالعموم انتي ماتطلعين مرة ثانيه الا مع امي والا معاي...
:اجلس بالبيت احسن..
عمتي:نورة وش السالفه؟
:عمتي تخيلي بس ان البنات يدخنون..وحركاتهم مرة تقهر..ولو تسمعين كلامهم بعد..
عمتي:هو هو هو اللهم صلي على محمد...
سلطان بعصبيه:واذا دخنوا يانورا..يعني موقاعدين يشربون هم والا مسوين شي يستحق ردة الفعل هاذي!!
عمتي:لا والله تنتظرهم يشربون..هذا الي ناقص بعد ياسلطان..انا قلبي ماكان مطمن..
:لاوبعد ياعمتي الي معاي بالطيارة كان في بالمطعم...وش بيقول عني؟؟
سلطان:الا تعالي وش سالفة الي بالطيارة لك ساعه وانتي تحكين فيه..
:واحد كان جنبي ومرة محترم...
سلطان:واذا شافك..نورا الي صار شي عادي..
عمتي:لا والله مو عادي...,عادي عندك اما حنا لا..
هو الي بدا وحكى قدام عمتي..يتحمل كلامها والي بتقوله..
سلطان وهو يوقف:يلا تصبحين على خير يمه..
انقهرت من حركته..على كيفه انا...
طلعت من الصاله قبله ورحت غرفتي..
صعب صعب الي قاعد يصير...انا لو تزوجت نورة شلون بتتحمل تعيش هنا!!
يمكن مع الوقت بتتعود...اكيد...
ماخلتني امي اروح وقعدت تحكي عن الي صار....
انا مقدر ان هالشي مايعجبهم ولا يرضون فيه..بس نورة مبالغه بردة فعلها...
دخلت غرفتي وماقدرت انام...
استرجع كل الي صار اليوم....
انا بعد بالغت بردة فعلي وعصبت عليها..
قمت من سريري ورحت لغرفة نورة..طقيت الباب مرة ومرتين وثلاثه..
نورة:ادخلي عمتي..
:نورا تعالي ابغى احكي معاك...بالصاله ها...
ماانتظرت ردها لاني عارف ومتأكد انها بتجي...
رحت الصاله وبعد فترة قصيرة جت..
:كويس انك جيتي..توقعت انك بتطنشيني..
ناظرتني وماردت..
:الله الله كل هذا معصبه...
نورة:لا يعني سلطان كمان الي سويته يقهر..
:اوكي يقهر..بس الي سيوته يقهر اكثر..
نورة:لا مايقهر..سلطان انا ماتعودت على كذا عشان كذا عصبت...يمكن انت تشوفه شي عادي...اوكي في مثلهم كثير بالرياض..بس مو قدام الناس..بتقولي هاذي البيئه الي متربين فيها...انا ماقلت شي..وانا اختلط مع بنات مثلهم في الرياض واردى بس محترمين انفسهم...
:نورا يانورا...انا مقدرك والله مقدرك..بس انتي انفعلتي بزياده..وسويتي على قولتهم من الحبه قبه..
:سلطان انا امشي واسلك نفسي بس اذا كانوا محترميني...
:طيب انتي الحين هدي بالك..وروقي وما صار شي..ولوتبين اطقهم لك اطقهم..
ناظرتني وهي معصبه:سلطان تستهبل!!
:ههههههههههه...لا والله ابيك ما تزعلين..
نورة:خلاص الي صار صار...
:اوكي انا بروح انام بكرة وراي شغل..يلا تصبحين على خير..
نورة:وانت من اهله...
><><><><><><
مر شهر رمضان بسرعه بدون احداث ومواقف تذكر...
اقلب صفحات دفتري...خلونا نوقف عند يوم العيد...
استعدينا كلنا...
بنروح السفارة السعوديه....
تقريباً كل السعودين جاين..
الوضع كان حلو والواحد يحس انه في ديرته...وبين اهله...
شفت الي كان معاي بالطيارة وأخيراً عرفت اسمه...
جا سلم على ابوي وسلطان...وتعرفوا على بعض...
الاجواء كانت رائعه..ومن الايام الي ماراح انساها في حياتي....
العيد بالرياض كان كئيب بالنسبه لخواتي..
منار ومساعد جو الرياض...
اجتمعوا البنات في بيت عمي...وبعدين راحوا بيت خالتي...
جالسين بالصاله..سالفه ورا سالفه...
بيجلسون شوي وبعدها كل وحده تروح لاهل زوجها...
رن جوال هاله وكان بدر...
ردت على طول:بدري..
بدر:والله آسف...بس انشغلت..كل عام واحلى هاله بخير..عيدك مبارك ومن العايدين...ولا تزعلين علينا..
هاله:وانت بخير وصحه وسلامه...ورضيت عليك..
بدر:كيفك؟وكيف العيد؟
هاله:الحمدالله..والعيد كئيب شوي.,انت كيف عيدكم؟
بدر:عيدي انا هالسنه غير...دايماً عزوبي..
جلسوا يحكون وسالفه ورا سالفه...
><><><><><

العيال مجتمعين في بيت فيصل...كل شي مجهز... هاذي عادتهم كل سنه يطلعون للبر يوم العيد..يجلسون كم يوم...
فيصل:شباب محمد يقول يلا اطلعوا...
بدر:ننتظر فهد..
ثامر:فهد لازم كل سنه يأخرنا..
فيصل:كل واحد يركب سيارته على مايجي فهد..
مصعب:صادق فيصل...
فيصل:شوي وراجع..اركبوا انتم..
طلع فيصل من المكان الي جالسين فيه وكلم على اهله يسلم عليهم..الي مسافرين من خمسه ايام تقريباً...
توصيات من امه وخواته..
بعدما قفل منهم طلع فوق يسلم على اخوه..
فيصل بصوت عالي:فراس..فراس..وينك..
انفتح باب غرفة فراس الي كان يكلم:لحظه شوي..
فيصل:يلا يارجال انا بمشي الحين..
فراس:انتبه على نفسك..
فيصل:ان شاء الله ...ها ماراح تجي اخر كلام؟
فراس:لو بجي بعد يومين ان شاء الله بس مااظن..
فيصل:حاول..يلا نشوفك على خير..
فراس:انتبه لنفسك يافيصل..
فيصل:فراس وش قصتك؟
فراس:مافيها شي لما احرصك..
فيصل وهو يضحك:طيب..يلا فمان الله..
نزل فيصل بخطوات سريعه...
يحس في شي ناقص ماسواه هالمرة...
بالعاده يتصل على منار..وماترضى تقفل منه الا بالقوة...
وبدر بمكان ثاني من البيت يكلم هاله..
هاله:مااوصيك يابدر انتبه على نفسك..
بدر:ان شاء الله..
هاله:ماودك تهون؟
بدر يضحك عيها..
هاله:يعني بتجلس اربع ايام كثير..
بدر:عشان تشتاقين لي.,يلا ياقمر بركب السيارة..انتبهي لنفسك انتي بعد..
ركبوا السيارة..
بدر يسوق وجنبه مصعب وفيصل ورا...
وبالسيارة الثانيه فهد وثامر وصالح...
راحوا للمكان الي تواعدوا فيه مع باقي ربعهم..يمكن يجون حوالي عشر سيارات...
الطريق طويل ويبيلهم كم ساعه الى مايوصلون للمكان الي يبونه...
فيصل:هالايام ماجد مايروح من بالي...
مصعب بضيق:الله يرحمه..
بدر:له سنتين؟
فيصل:يكمل بعد شهر تقريباً..
مصعب:ياسرع الدنيا..
ماجد ولد خالة فيصل وكان مثل اخوه واكثر...علاقتهم كانت قويه...وقبل سنتين صار له حادث وتوفى...
مصعب:بدر شكلك تعبت خلني اسوق..
بدر:اييه والله..
وقف بدر السيارة وتبادل هو ومصعب...
فيصل:مصعب الله الله بالركاده..
مصعب:ماعليك...
السيارات تمشي ورا بعض..بهدؤ...مرة هذا يسرع ويسبق ومرة هذا يعني الوضع تمام...
تقرب سيارة من سيارة فيصل والي معه...ينفتح الشباك وبصوت عالي:ها مصعب قدها؟
مصعب يفتح الشباك:قدها..
تقدموا السيارتين عن الباقي...وهذا يسرع والثاني يزيد...
بدر:ادعس مصعب..
فيصل:لا شباب تكفون انا الهبال مااحبه..
مصعب:ماعليك..مصعب يسوق فيك..
مصعب كل ماله يزيد سرعه...
يرن جوال بدر وكان فهد...
فهد:هدو هدو شوي..
بدر:مصعب الي يسوق..
فهد:حتى لو مصعب..
بدر:ان شاء الله..
مصعب سرعته صارت جنونيه..
فيصل تقدم شوي وبخوف:مصعب هدي...ترا عندك زوجه وبالطريق ولدك..
مصعب:فيصل يعني ما تثق بسواقتي؟
بدر:هدي شوي يارجال..
كفرات السيارة مااستحملت هالسرعه..انفقع الكفر..ماقدر مصعب يتحكم بالسيارة..انقلبت..وانقلبت..و انقلبت ثلاث مرات السيارة تتقلب...قدام كل السيارات الي كانت وراهم...
فهد بسيارته وبصوت عالي:وقف وقف...
وقفت السيارات..
انفتحت الابواب ونزلوا منها العيال بدون اي تفكير...
السيارة انقلبت قدام عيونهم..اشبه بفلم وهذا مقطع منه قاعد يصير قدامهم..بينهم مسافه قصيرة...
طلعوهم من السيارة وكانوا كلهم فاقدين الوعي وبحاله ربي اعلم فيها...مايدرون من الحي من الميت فيهم...
بطريق مقطوع ومافيه مستشفيات..ويبيلهم ساعيتن على ماياصلون الرياض...
فهد جالس بالمرتبه الي ورا وعلى رجله بدر مستلقي...
فهد:اسرع ياثامر..بيموتون وحنا ماوصلنا..
ثامر:شف دقات قلبه..
فهد بخوف:ضعيفه...,لازم نسوي شي ياثامر..بيروحون من يدينا..ما يصير...
ثامر:اتصل على العيال شف شلون فيصل ومصعب..
دخل فهد يده الي كانت مليانه دم وطلع جواله واتصل على واحد من ربعه بسيارة ثانيه ومعاه فيصل...
فهد:ها وشلون فيصل؟
عمار من الطرف الثاني:ان شاء الله..ان شاء الله انه طيب..
الطريق اخذ منهم ساعه وربع تقريباً كانوا يمشون بسرعه قد ما يقدرون...
وصلوا المستشفى...الي كانت مجهزة كل شي ومستعده لاستقبالهم...
اتصل فهد على اخوه الي هو ابو بدر وقاله يجي المستشفى...واتصل على فراس اخو فيصل...
فهد:هلا فراس..
فراس وصوته نوم:نعم..مين؟
فهد:انا فهد..
فراس وكان احد صفعه على وجهه وفز من مكانه:فيصل فيه شي؟
فهد:حنا بالمستشفى صار حادث..
فراس يقاطعه وبصوت عالي:فيصل معهم؟
فهد:فراس اذكر ربك..تعال انت..
فراس:باي مسشتفى؟
فهد:التخصصي...
قفل فراس السماعه...وطلع بالي عليه..الافكار ماليه راسه...قلبه كان حاس انه بيصير شي...
ركب سيارته وعلى طول عالمستشفى...
العيال كلهم مجتمعين عند قسم الطؤارى...
وصل فراس وعلى وصوله العيال كانوا يصيحون ويدعون لواحد منهم مات...
فراس بصوت عالي:مين..مين الي مات؟؟
واحد من العيال:مصعب...
فراس تسند على الجدار وكأنه ارتاح شوي:وين فيصل؟
صالح قرب لفراس:اخوك بهاذي الغرفه...
طلع بوقتها الدكتور وكان يناظر حوله ماهو عارف يكلم مين...
فراس:..دكتور طمني عليه...فيصل اخوي..
الدكتور وهو يحط يده على كتف فراس:الله يرحمه...تأخروا بوصلوهم للمسشتفى وفارق الحياة جاه نزيف حاد..
الله يرحمه..الله يرحمه...الله يرحمه..هاذي الكلمه الي سمعها فراس..
حط يده على راسه يبي يستوعب الي قاله الدكتور...
انشل عن الحركه وماقدر ينطق باي كلمه...جلس على الارض...نفسه كان سريع امتلت عيونه بالدموع:فيصل..فيصل..راح اخوي راح...اخوي راح...
رجعت الصجه بالمكان..صدمتين بوقت واحد..فيصل ومصعب راحوا بغمضه عين...
طلع فهد من الغرفه الي بدر فيها وبصوت عالي:فيصل مات..لاحول ولا قوة الا بالله..لا حول ولا قوة الا بالله...
بخطوات بطئيه راح فهد عند عمار ومسكه بقوة:شفت وش سويت ياعمار..فيصل ومصعب راحوا والسبب انت..
عمار كان منهار وهذا اقل شي..الكل بيحط اللوم عليه وعلى الي كانوا معاه....
بعد فهد يده ودفه بقوة على الجدار...
ابو بدر يمشي بخطوات سريعه تو واصل المستشفى...اول ماشافه فهد راح له..
ابو بدر:ها يااخوي طمني..
فهد:الحمدالله..حالته مستقرة فيه كسور بسيطه...
ابو بدر:الله يطمن قلبك..وينه الحين..
فهد وهو يأشر على الغرفه:هنا..
ابوبدر:معاه احد؟
فهد:الي معاه توفوا..
ابو بدر:لا اله الا الله...
فهد:فيصل ومصعب..
ابو بدر انصدم لما سمع اسماء اقرب اصدقاء لولده:لاحول ولا قوة الا بالله...
فهد:الله يرحمهم ويصبر اهلهم..
دخل ابو بدر عند ولده...
مرت فترة ماهي قصيرة...ناس تجي وناس تروح..
><><><><><
وصل الخبر لاهل فيصل بلندن..الخبر صعقهم..الصدمه كانت قويه...فيصل راح..
الوضع سيئ لابعد درجه...انهاروا اهل فيصل...قبل فترة ماهي طويله كلمهم..والحين يوصلهم خبر وفاته...
لهم فترة ما شافوه...
وبالفترة الاخيرة فيصل ماكان معهم ابداً الي صار له مع منار بعده عن اهله كثير...
انتهت قصة فيصل بموته....
الحياة قصه وماتنتهي الا بالموت...
الله يرحمك يافيصل ويدخلك فسيح جناته...
نفقد الي نحبه بلحظه..بغمضة عين..يوصلنا خبر وفاته..
نصيح.. نتألم..ويمكن نحزن طول عمرنا على فراقه...
ليش مانستغل كل لحظه مع الي نحبهم...
يااحنا الي بنروح ياهم...
هاذي حال الدنيا....
راحوا بسبب طيش...
مصعب نسى زوجته الي حامل..الله يصبرها ويصبر كل من فقد احد عزيز عليه...
><><><><
سارة ومضاوي وشيخه وام فهد مجتمعين بالصاله وحالتهم كانت سيئه...
سارة وهي تكلم مشاعل:هاله مابعد درت عن بدر..والله اني خايفه عليها...
مشاعل:كلمي خالتي وقولي لها..احسن ماتنفجع وتسمع الخبر من احد...
سارة بضيق:طيب مشاعل اكلمك بعدين..
مشاعل:طيب..مع السلامه..
ام فهد:الحين الساعه 9:00 وفهد مابعد جا...
مضاوي:مايبي يترك بدر..
شيخه:الله يعين بدر اذا عرف عن فيصل...
بعد فترة قصيرة...صوت الباب ينفتح...
نقزت سارة من مكانها وبخطوات سريعه راحت عند الباب..
فهد واقف وشكله تعبان...ثوبه فيه بقع دم...وجهه كان اسود..عيونه ذابله..وحيله مهدود..
فهد وصوته مبحوح:سارة..امسكيني..
قربت سارة منه بسرعه ومسكته من يده...
ام فهد:بسم الله عليك ياولدي...عظم الله اجرك بالي ماتوا..
فهد ناظر امه بحزن:اجرنا واجرك..
مشى فهد بخطوات بطئيه كان ماسك يد سارة فيها...
طلعوا لغرفتهم..
فتحت سارة الباب واول مافتحته جلس فهد على ركبه...
نزلت سارة وجلست جنبه حطت يدها على راسه ومسحت عليه..قربته لصدرها وضمته..
فهد كان يصيح..يصيح بحرقه..وكانت تصيح معاه:اذكر ربك يافهد..هاذي حال الدنيا..
فهد بصوت مبحوح:قدام عيوني ياسارة..قدام عيوني صار الحادث...ماتوا..ماتوا ولا قدرنا نسوي شي..
والله ياسارة حاولنا..بس مو بيدنا المسافه كانت بعيده...نزفوا الى مافارقوا الحياة...
سارة:يابعد قلبي يافهد..هاذي حال الدنيا..
فهد وهو يصيح:مصعب متزوج وزوجته حامل...لو تشوفين اخو فيصل..منهار..خفنا على الولد لا يصير فيه شي..اهله مسافرين وماشافوه..ابوه يسكن بلندن وله فترة طويله ما شافه...
سارة كانت تصيح على زوجها..تصيح وهي تشوفه بهالحاله....
يوم صعب على الكل...مااحد نام بهالليله...
انقلب يوم العيد ليوم تعيس وحزين على الكل....
><><><><><

نهاية الجزء ...

..
..
..