23
سبحان الله وبحمده سبحان الله العظيم
-
{بجاد و منايا}
بجاد دخل للبيت وبيده كيس وبوكيه ورد وكم وردة مفردة ابتسم وهو يناظر عهد اللي تنتظره عالمدخل انحنى شبه جالس ويفتح لها يديه/هلا هلا
عهد ابتسمت وهي تجري له/بابا/ارتمت بحضنه/
بجاد براحة صدره/ياعيون بابا ياعيونه/باسها وهو يناظرها/كيف الحلو كيفه اليوم
عهد بتكسير نطقها الطفولي/الحمدلله
بجاد سحب وردة وهو يمدها لها/ياوردة عمري انتي
عهد اتسعت عيونها بفرح وجرت للبيت وهي تصرخ/وووععععدددد
بجاد ابتسم وهو يوقف دخل وتنهد وعيونه على سلطان اللي مشغول بلعب الاون لاين/وبعدين ياسلطان وبعدين ماتمل!!
سلطان ترك البلايستيشن وهو يوقف ويسلم على راسه/نورت البيت يبه
بجاد ميل فمه وهو فاهم تصريفته مد له وردة
سلطان ناظرها/وش اسوي بها!!
بجاد/داري انك ماانت براعي ورد خسارة فيك وين امك بس
سلطان وهو يرجع البلايستيشن/امي داخل
بجاد دخل واستقبلته وعد وسلمت عليه واعطاها وردة همس لها/وين امك؟
وعد وبيدها علاقات الملابس/امي بغرفتنا
بجاد اخذها منها/انتظروني عند سلطان شوي وجايين
وعد وعهد اتجهوا للصالة عند سلطان
منايا نادت من غرفة البنات ووصل صوتها لعندهم/وعد وينك جيبيها بسرعة!!
بجاد دخل لغرفة البنات
منايا واقفة قبال دولابهم وهي ترتب من ملابسهم التفتت لورا وهي تناظر الباب/وش/سكتت وهي تصد عنه/
بجاد/السلام عليكم
منايا ماردت
بجاد/الرد واجب ياام سلطان
منايا مكملة شغلها بدون لاتلتفت له زفرت/وعليكم السلام والرحمة
بجاد نزل الكيس ع سرير عهد وبيساره الباقة ورا ظهره وهو يحاوطه بيمينه من خصرها
منايا كشرت بوجهها
بجاد/مالنا حق بالعذر؟
منايا كتمت غيظها وهي ماردت
بجاد/مالنا حق بالعفو؟
منايا بلعت ريقها وهي تبلع كلام يلعب بقلبها
بجاد مد يساره اللي فيها البوكيه لقدامها
منايا احتدت نظرتها
بجاد تنهد/ياام سلطان هانت العشرة عليك!!
منايا دفت يده وهي تلتفت له بملامح محتدة/من اللي هانت العشرة عليه يابجاد من هو!!ياليت تصحح الامور يابجاد ياليت!!
بجاد/وش قصدك يامنايا هاه!!وش قصدك!!
منايا ناظرته بصمت
بجاد اللي تاخذه وتجيبه افكاره/يعني مابترتاحين الى مارجعه لنفس مكانه!!
منايا/الله لايشغلنا الا بطاعته/مشت/
بجاد مسكها من يدها وبصراخه/اوقفي وش قصدك انطقي!!
منايا سحبت يدها منه بقوة/قصدي واضح بدل ماانت شاغل عمرك بسلطان اللي تزوج وانتهى موضوعه وللحين شاك بنفسك انتبه لبيتك وحاول ترمم اموره
بجاد ضربها كف
منايا ناظرته بصدمة
بجاد شدها من شعرها/لاتغرك غلاتك كل شي اسمح لك فيه الا تهينيني ببيتي لاجل غريب عنك
منايا ماسكة يديه وهي تتوجع
بجاد دفها بقوة
منايا طاحت وضرب راسها بطرف السرير وهي معطيته ظهرها
بجاد/الظاهر الحب ماعاد ينفع معك وهاذي اخرته/خرج/
منايا مسكت راسها بيديها ثم ناظرت يديها اللي اعلنت عن نزفها بوضوح بكت وهي تلوم نفسها /هاذي حصيلة يديك يامنايا هاذي هي تستاهلينه تستاهلين!!
وعد دخلت عند امها
منايا مسحت دموعها بسرعة رغم ملامحها المفضوحة
وعد اتسعت عيونها بصدمة من منظر امها
عهد انرعبت وهي تناظر وجه امها وبهمس/ماما
منايا ابتسمت وهي توقف وتحاول تحافظ على ملامحها الطبيعية/ياروح ماما مافيه شي
عهد وقفت عند امها بوجهها المخطوف وهي تتفحصها
منايا انحنت وشالتها
عهد مدت يدها الصغيرة تلامس جبين امها النازف وبكت من حست الدم بلل يدها بكمية طبعت هاللون على يدها
منايا ضمتها وهي تبوسها وتكبح عبرتها اللي اهتز صوتها بسببها/والله مافيني شي ياروح ماما مافيه شي
وعد بدموع ملت محاجر عيونها/ابوي؟
منايا بصدمة من سوالها/وش هالكلام!!لا طبعا زلقت وصار اللي صار
وعد تناظرها بتكذيب
منايا عطتها ظهرها وهي بكت من بكا عهد وبتصريفة لوعد/روحي جهزي لك غيار انتي واخوانك بنبات الليلة عند جدتي روحي
.
((المستشفى))
طلال واقف قبال انتظار النساء متكتف ينتظرها
ام عمر خرجت من الانتظار
طلال اعتدل بوقفته وهو يتجه لامه وقف قبالها/ها يمّه وش صار؟
ام عمر/وش صار يعني طردتني من داخل وهذا انا انتظرها تعطيني خبر وواضح ان الخبر مايسر
طلال زفر/لاحول ولاقوة الا بالله طيب تبين تروحين البيت؟
ام عمر/لا بانتظر شوي وبعدها يصير خير ان شاء الله انت روح لاتنتظر
طلال/باروح تاركين عمر لحاله لازم ارجع له
ام عمر/الله يكتب اجرك
طلال/واجرك ماسويت شي يمّه توصين على شي
ام عمر تنهدت/سلامتك بس كلم اهلك
طلال قطب جبينه باستغراب/خير يمّه وش فيه
ام عمر/رجع اهلك ياطلال
طلال/مو وقته ولا مكانه يمّه
ام عمر/كلم موج وتعرف استودعتك الله/دخلت الانتظار/
طلال مشى وهو يفكر بكلام امه الغريب بنظره
.
ـــــــــــــــــــــــــ ـــــــــــــــــــــــــ ــــــــــــــــــــــــ
الـلـيـل
.
{الـمـزرعـة}
مريم فتحت باب غرفته وهي تفتح النور
سعد نايم على فراشه
مريم تنهدت/سعد سعد
سعد صحى على صوتها بفجعة وفز/وش فيه؟
مريم/بِسْم الله عليك مافيه شي مافيه
سعد وقف/ابوي وينه؟
مريم/ابوك راح يجيب خبز
سعد اتسعت عيونه/ليش كم الساعة وش كثر نمت انا!!!
مريم/نوم العافية ياسعد عساه نوم العافية مالك الا ساعتين وش فيك مفزوع!!
سعد زفر وهو يفرك وجهه بيديه/استغفر الله العظيم
مريم/اغسل وجهك وصل واطلع لنا برا الجو يرد الروح نسولف شوي على مايجي ابوك
سعد تنهد وهو يحس بصداع فظيع من هالنومة الغلط اللي نامها بدون مايحس على نفسه/ان شاء الله
مريم خرجت بالمزرعة وجلست بجلستهم المعتادة
سعد اتجه لها بعد ماصلى وهو يجلس قبالها ويحرك النار اللي بينهم بقطعة من الحطب اللي مشتعل
مريم ناظرته بتمعن/ولد ياسعد
سعد وهو يرفع الدلة ويصب فنجاله/سمي ياعمة
مريم/وشلونك الحين
سعد ابتسم وهو يرفع فنجاله يتقهوى ونظره لها بنفس الوقت/الحمدلله بخير جعلك بخير
مريم تنهدت/لايكون اللي صايبك الحين من
سعد قاطعها/لا ياعمة واتركي هالهواجس عنك
مريم ناظرته بتكذيب
سعد ابتسم/ياعمة مقدر ومكتوب والحمدلله على كل حال لعلها خيرة!!
مريم/امين يجعلها خيرة لكن ماودي أندم ياسعد
سعد شهق/الله لايجيب الندم ولايعرف لنا دار!!
مريم/سعد
الـعـم يُسر دخل/السلام عليكم
سعد وقف وهو يتجه لابوه وياخذ اللي بيديه/وعليكم السلام والرحمة
الـعـم يُسر ناظره بتفحص/الحمدلله كأنك ازين؟
سعد/الحمدلله مافيني شي من الاول يبه بس انت اطرد الشك عنك الله لايخليني منك
.
((المستشفى))
ام عمر جالسة عالكرسي وساندة راسها عالجدار وهي بغفوتها صحت من اهتزاز جوالها ردت بنوم وهي تلتفت لرغد تتفحصها/هلا
رغد نايمة
بدر/ياهلا بصاحبة الصوت ياهلا
ام عمر ابتسمت وهي تهمس/هلا ببديري
بدر كشر/يمّه طول بعرض وبديري!!
ام عمر ضحكت بخفة/ايه تظل بدير بعيني
بدر/وشو له اجل سميتيني بدر كان صغرتي اسمي وارتحنا كلنا
ام عمر تنهدت/وشلون ريان كيف رجله؟
بدر/حصان مايرده شي حصان لااله الا الله
ام عمر/بِسْم الله عليه اذكر ربك
بدر/ماشاء الله ماشاء الله والله يمّه ذبحني بديت افلس من وراه ياكل عن عشر
ام عمر/ااه منك اااه
بدر/اي والله يمّه يكفي للحين ماردوا علي بعد المقابلة
ام عمر/ماعليك تفرج وانا موجودة وش لك بالعمل
بدر بحدة/شي منهم مانبي
ام عمر/بدر!!قلت لك انا!!
بدر/لا يمّه حتى انتي لا الحين دوري مب دورك
ام عمر ابتسمت/بدير وتظل بدير اعطيك الى ماتشيب
بدر/الله لايخليني منك يمّه
ام عمر/وش رايك تروح لاخوك
بدر قطب جبينه/اي اخو!!
ام عمر/عمر
بدر ميل فمه
ام عمر/طلال بتخلص اجازته ولازم يداوم وعمر بيقعد لحاله
بدر/ماعندي مشكلة يمّه لكن هو يرضى؟
عمر/يرضى غصب ليه وضعه تارك له مجال يقول لا!!
بدر تنهد/على خير يمّه باروح واجيبه عندنا
ام عمر/لا لاتحركه لنا 3اسابيع ماحركناه بتجي تنكبنا!!
بدر/بيت ابوي ماأجلس فيه
ام عمر/لاتجلس بس الليلة بعدها انا موجودة
بدر زفر/يصير خير بس متى يروح دوامه هالطلال الصدق ماابي اقابله يمّه
ام عمر بضيقة/بدر!!
بدر/سامحيني يمّه بس لو تقابلنا تذابحنا شوفي لي متى يروح وردي لي وانتي بعد متى تخرجين وردي لي اجيك
ام عمر/انا ماراح اجي البيت وزوجة اخوك بهالحالة يبي لي كم يوم معها
بدر تنهد/على راحتك بس اشتقنا لك يمّه اشتقنا
ام عمر/قريب ارجع قريب يمّه
بدر/الله يعجل بهالقريب الله يعجل
ام عمر/يالله سلام/قفلت ورن جوالها تنهدت وهي ترد/
طلال/ها يمه اجيكم؟
ام عمر همست/اكيد بكرة لكن للحين ماكتبوا لها خروج انت وشلون اخوك؟
طلال تنهد/الحمدلله وضعه كل شوي احسن
ام عمر بغيظ/وش فيه مااتصل فيها!!
طلال/مدري عنه اساليه!!
ام عمر زفرت/استغفر الله العظيم وانا وش سويت؟
طلال باستغراب/بوشو!!
ام عمر بوسع عيونها/طلاااال!!
طلال تنهد/مثل ماطلعت ترجع الى متى وانا اراضي!!مايصير هالكلام!!
ام عمر بحدة/هالمرة بتراضي ورجلك فوق رقبتك
طلال/يمّه!!
ام عمر/الا اذا تبي ولدكم رايح راجع بينكم
طلال قطب جبينه/اي ولد؟!!/اتسعت عيونه وهو يفهم/موج
ام عمر قاطعته/ايه تعوذ من الشيطان واعقل وحاول بزوجتك عسى تعقل هي بعد تبي شي؟
طلال بهدوء/اذا خرجتوا اتصلي بس
ام عمر قفلت وهي تزفر وتدعي بينها وبين الله يصلح امور بيتها اللي محتاسة التفتت تناظر رغد النايمة وحزنت عليها وهي تدعي لها بالعوض
.
{باحد المنتزهات}
نايف مع عياله اللي بالالعاب يلعبون يمازحهم مابين فترة وفترة
ياقوت جالسة عالفرشة بملل وهي تناظر جوالها ودها تعرف وش صار
نايف جلس جنبها بعد ماتعب
ياقوت سحبت ترمس القهوة وهي تصب له القهوة/تفضل
نايف بابتسامة وعينه على عياله/يزيد فضلك
ياقوت/خلاص مشينا؟
نايف التفت لها باستغراب/ليش؟اهلك مع سراج يعني بيتاخرون هناك واكيد عشاهم ببيت عمي جابر
ياقوت/طفشت
نايف تنهد/زعلانة للحين لانك مارحتي؟
ياقوت سكتت
نايف/مالك بهالامور ياياقوت اذا سراج ماطلب منك مالك بها
ياقوت/نايف هذا اخوي بدون طلب اروح لاتصير مستبد عاد
نايف ميل فمه وسكت وهو يصد بوجهه
ياقوت/انت كله تزعل مني وماتبي تسمع اي كلمة طيب يانايف هالمرة معي حق
نايف التفت لها/هو طلب من جوهرة ولا قال لك شي صح او لا؟
ياقوت/مايحتاج يطلب اخته!!
نايف تنهد/جوهرة موجودة ومرت ابوك بعد وبعدين لو زلت اختك بالكلام اعرفك بتفزعين معها وبدل ماتساعدينه تهدمين كل شي
ياقوت اتسعت عيونها/لهالدرجة تتوقع اننا نرضى الاذية لاخوي يانايف!!
نايف/وانت ماقلت انتي!!
ياقوت صدت/اصلا دايم بعينك انا راعية مشاكل ماعمره بانت بعينك الزينة ابدا
نايف اخذ نفس وزفره وهو ينزل فنجاله ووقف واتجه لعياله
.
((بيت ابو فواز))
،،الـمـجـلـس،،
ثابت يناظره بغيظ وهو يقهوي الموجودين
فواز يتقهوى بهدوء وهو يسمع الكلام
ابو فواز/والله ياابو ماهر انت تدري اللي صار مـاهـو بهين ابد
ابو ماهر/وانا اليوم ماني باأبو لسراج بهالمجلس
سراج ناظر ابوه
ابو ماهر/سحايب بنيتي وانا ماارضى عليها واليوم انا جالس معكم حالي حالكم ابي اشوف وش وراه
سراج اخذ نفس وهو يناظرهم
فواز اعتدل بجلسته/اولها اختي ماترجع بدون مهر
سراج ناظره
ابو فواز التفت له باستغراب
فواز/مهر جديد واثاث جديد
ثابت ميل فمه بقهر من فواز وده ابوه يتكلم
ابو فواز اخذ نفس وهو يشد على قبضة يديه
سراج/تم
ابو فواز/صاحبة الامر ماوافقت على الرجعة
سراج/ابي اشوفها ياعم تكفى لو مرة خلها تقابلني
ابو فواز/يصير خير يصير خير ان شاء الله/التفت لثابت/
ثابت فهم ابوه وقف وخرج من المجلس
.
،،غرفة الضيوف،،
جوهرة جالسة تتقهوى بروقان وسط النظرات الحادة المتسلطة عليها
عليا وهي تاخذ قطعة حلا من ذهب اللي واقفة قبالها بالصينية
عجايب تناظر عليا بكره وهي تهمس لسجايا/وش لها شغل حتى تجي!!
سجايا/اكيد بتجي مع زوجها
عجايب وهي تناظرها من فوق لتحت/تكفي الجنية ذي مايحتاج لجيتها
الجدة سدول ضحكت/صدقتي ياعجايب/ناظرت جوهرة/الجنية ماتعدل ابد
ام فواز التفتت عن يسارها للجدة سدول وبهمس/عمة!!
جوهرة نزلت فنجالها وهي تناظر الجدة سدول/والحمدلله هالجنية ماينخاف عليها ولا ياام جابر؟
الجدة سدول بكره/اما عاد ماينخاف صدق ماينخاف لكن كل واحد عقله معه يحسب حساب لاخرته قبل دنياه
جوهرة ابتسمت/وحنا جايين حتى نصلح هالدنيا وان شاء الله الاخرة زينة لاتشيلين همها
الجدة سدول/استغفر الله يشهد الله ماازكي نفسي الله يرحمني برحمته و
جوهرة قاطعتها وهي تناظر ام فواز بدون اهتمام للجدة /والله ياخالة واضح للكل ليش حاضرين وسراج ولدك مثله مثل ماسحايب بنتك
الجدة سدول/تعقبين سراج الغضيب مايجي ظفر سحايب الرضية
عجايب ضحكت
سجايا كتمت ضحكتها
ام فواز التفتت لهم وهي تناظرهم بحدة واشرت لهم يخرجون
عجايب تغافلت نظرات امها وهي تصد عن امها بتجاهل تام لنظراتها
سجايا وقفت وهي تمسك يد عجايب وقفتها معها غصب وخرجوا وتبعتهم ذهب
جوهرة بغيظ/ليش الغلط ياام جابر!!بدل ماتكونين محضر خير تولعينها زيادة!!
الجدة سدول/هذا الصدق مانطقت شي غلط ابد
جوهرة/الحين تقولين الغضيب وكلهم شهود!!
عليا وهي تقاطع هواش جوهرة/حنا جايين لسحايب ياام فواز ووالله ماجينا الا لخير ونبي كل خير
جوهرة تكتفت بغيظ
عليا/ياليت تنادينها نسلم عليها وناخذ اخبارها اشتقنا لها والله
الجدة سدول همست/ايه الشوق معروف تاليته
ام فواز تنهدت/ياعمة!!
الجدة سدول دخلت يدها بجيبها وهي تسمع رنة جوالها
ام فواز/اكيد تجي
جوهرة بغيظها/اهم شي تتفاهم مع سراج اللي كل يوم ناقع عشانها قبال بيتكم ولا بين بعينها
سحايب دخلت وبحدة/اقل حقوقي ولو انتي مابترضين بغير الطلاق ياجوهرة والدليل وضعك الحين!!
جوهرة/ايه اذا ماتبين اطلبي الطلاق وريحيه مو تعطلين حياته عشان زعل سخيف!!
ام فواز وسط ملامحها المحتدة/جوهرررة!!
عليا ناظرتها بحدة
جوهرة ناظرت خالتها/نعم
ام فواز/انتي اللي خليك محضر خير لاتحسبين مادريت بسالفتك مع سحايب وعلا
جوهرة/والله ياخالة اللي يصير لسراج لو يصير لواحد من عيالك ماترضينه
ام فواز/الا ارضاه واوقف معها عليه بعد
جوهرة احتدت نظرتها وهي تناظرها
الجدة سدول دخلت جوالها بجيبها وهي تناظر ام فواز وتوقف/وتسكتيني عشان ام لسان ماحشمتك وانتي خالتها اخر ريحة من اميمتها
جوهرة بحدة/مالك بيني وبين خالتي ياام جابر
الجدة سدول زفرت وهي تناظرها/مااقول الا الله يعينك على نفسك ويستر عليك من فعايلك يابنت نوار ماخذتي من اميمتك شي/مشت/
سحايب/اسمعي عاد انتي بالذات مالك بيني وبين سراج لو نهايتها طلاقي مالك شغل سمعتي
جوهرة وقفت وبقهر/والله الحق علي اللي جاية أصلح بينكم لكن معروف مايبين بعينك شي ابد ياسحايب
سحايب/محد طلب منك تصلحين ابد وذا اسلوبك!!
جوهرة/والله ماجيت الا عشانه ولا انتي طول عمرك ماتستاهلين شي وقليل ماجاك
ام فواز وقفت وصرخت/جوهرة!!
جوهرة ناظرتها/ايه ياخالة ماترضين على بناتك ابد لكن غيرهم بالطقاق لو هم اللي غلطانين والى هنا ستوب خط احمر انا اخذ حقي بنفسي ماانتظر احد ياخذه لي ومشكورة وصلت ضيافتك ومرة على قلبي لكن هالمرار ماراح انساه ابد/مشت/
عليا وقفت وهي تهديهم/اعذريها ياام فواز وسامحيها لكن اللي تمر الحين فيه مو سهل لاعرفتي وضعها بترحمينها ياام فواز اعذريها
ام فواز تنهدت وهي تستغفر
عليا ناظرت سحايب/حياك ياسحايب حياك و
سحايب قاطعتها/لاتحاولين تتوسطين لجوهرة اعذرها ياعليا لانها من البداية وهي تعاملها معي بذا الاسلوب ومستحيل اعذرها مستحيل
عليا بضيقة/على راحتك لكن اليوم انا موجودة عشانك انتي وسراج ياسحايب
سحايب/قولي له سحايب ماتبيك هو يسمع لك كثير يمكن يسمعها هالمرة زين
عليا/تكفين بس شوفيه واسمعيه وبعدها شوي اللي تبين تكفين اسمعيه ياسحايب
.
الجدة سدول واقفة عند باب بيت ابو فواز الرئيسي/رح لها
ثابت/وضيوف ابوي ياجدة!!
الجدة سدول/به الثور اخوك هو يسنع الامور رح بس
ثابت بتكشيرة/وزوجها تعرفينه ياجدة مايرضى احد ياخذها اخاف يسوي مشكلة وبعدين يلوموني انا!!
الجدة سدول ضربت عكازها بالارض/معصي من يلومك وانا معك
ثابت/الثور اللي تقولينه يدور الزلة
الجدة سدول/يعقب يقول لك كلمة رح بس وجيبها
ثابت تنهد/ان شاء الله بس قولي للبنات يجهزون العشا
الجدة سدول/رح وانا باقول لهم رح
ثابت مشى
.
جوهرة خارجة من بيت ابو فواز بعد ماطلبت لها سيارة بتترك هالبيت اللي يجيب لها النكد وهي تتجه للحوش الخلفي تبي تشوف عيالها وتاخذهم قبل ابوها ياخذهم وقفت وهي تقطب جبينها تناظرها
جواهر منحنية شبه جالسة على مدخل الحوش الخلفي بعبايتها المغبرة من الارض وهي تمسح دموع جوهرة اللي تبكي قبالها باطراف اصابع يديها/لا ياماما لا عساه بعدوك ياقلبي خلاص ياماما خلاص ياجوجو خلاص يمّه انا هالدموع/باستها على خدها وهي تضمها/ياروح جواهر ياجوهرتي انتي
جوهرة قطبت جبينها بشك وكملت طريقها وبابتسامة/اهلين زوجة فواز؟
جواهر وقفت باببتسامة وهي تشيل جوهرة بحضنها/وصلتي حياك الله
جوهرة مدت يدها وسلمت عليها/يالله من زمان زمان عنك كيفك اخبارك وكيف اولادك؟
جواهر/الحمدلله بخير جوهرة صح؟
جوهرة ابتسمت/ايه صحيح جوهرة بنت خالة فواز
جواهر/تفضلي حياك عالقهوة
جوهرة/لا شكرا مستعجلة والله خسارة ماشفتك داخل
جواهر باحراج/موضوع خاص صعبة اكون موجودة
جوهرة وهي تناظر جوهرة الصغيرة/ياعمري انتي/باستها/ايش اسمك ياحلوة
جواهر/سميتك
جوهرة/صدق!!/فتحت شنطتها وهي تخرج المبلغ الموجود كله/ياروحي السمية سامحينا ماجيناك وتعرفنا عليك من زمان
جواهر وهي ترد يد جوهرة لاتحط المبلغ/لا والله
جوهرة قاطعتها وبالقوة تحط المبلغ بلبس جوهرة/والله لولا البعد حقها اكثر من كذا هاذي السمية لكن اعذريني ياجواهر اعذريني
جواهر قبلتها وسط احراج/يكثر خيرك ماتقصرين
جوهرة وقفت وهي تنادي عيالها/وسام جيب اخوانك ويالله
جواهر/اتعشي قبل تمشين
جوهرة/لا والله مستعجلة يكثر خيرك
جواهر مسكتها من يدها وباصرار/والله ماتمشين اقلها تقهوي معي
جوهرة تورطت وهي تخاف ابوها ياخذ عيالها/تسلمين حبيبتي مشكورة لكن مضطرة امشي
جواهر/بس قهوة لاترديني حياك
جوهرة تنهدت بضيق وهي تكنسل طلبها/يكثر خيرك ياقلبي يكثر خيرك
.
{منايا و بجاد}
منايا بعبايتها واقفة عند الباب ردت/ايه نازلة الحين دقايق بس/قفلت وهي تناظر سلطان/انزل انت وخواتك لثابت ينتظركم تحت
سلطان بيده شنطة صغيرة/ان شاء الله يمّه/خرج ومعه اخواته/
بجاد وقف على مدخل الصالة وهو يناظر منايا/اعقلي يامرة واجلسي ببيتك
منايا ماردت وهي تربط نقابها
بجاد تنرفز منهت ومسكها من يدها/منايا
منايا سحبت يدها منه/تبيني اجلس وانت مسوي فيني كذا!!لو جلست الليلة بالبيت بكرة نهايتي تذكر على كل لسان
بجاد بحدة/وشو!!
منايا/انا تعبت منك ومن شكوكك راجع نفسك بالايام اللي بعيدين عنك فيها يمكن يرجع بجاد اللي اعرفه يرجع لي بجاد زوجي حتى مع اللي سويته راجعة لك لكن ابي بجاد يرجع بالاول يرجع/مشت/
بجاد يناظرها بغيظ/هين نشوف وين بتروحين وانتي محد بيقبل بك غيري ان مارجعتي من نفسك مااكون بجاد هين/قفل الباب بكل قوته/
منايا بلعت غصتها وهي تسمع صدى صوته يتردد بالعمارة الكل عرف بهوشتهم
.
((بيت فواز))
جوهرة واقفة عالباب وباستعجال واضح/يكثر خيرك يارب واسفة والله اسفة عالزيارة اللي بدون موعد احرجتك معي
جواهر بابتسامة/وش اسفة مو اسفة الا شرفتيني والله وان شاء الله تعيدينها وتعوضين هالنص ساعة بسهرة معتبرة
جوهرة/ان شاء الله حبيبتي ان شاء الله يالله عن اذنك اشوفك على خير/خرجت/
جواهر/فمان الله حبيبتي فمان الله
جوهرة تنزل الدرج بخطوات سريعة وهي كل تفكيرها كيف تتهرب من ابوها شهقت وهي مابينه وبينها الا شعرة
فواز صد عنها
جوهرة بفجعة/يمّه قلبي/ناظرته بتقطيبة جبينها كيفك ياولد الخالة؟
فواز قطب جبينه وهو صاد للحين/الحمدلله بخير
جوهرة/ماعرفتني يافواز!!ام وسام
فواز/الله يستر عليك ياام وسام تيسري
جوهرة كشرت بغبنة وهي تشد قبضتها لكن شكها يغلبها/تدري اني تطلقت
فواز/معوضة خير الله يرزقك باللي احسن منه وتدرين اني متزوج يابنت الخالة واللي فات مات
جوهرة/المهم عندي انك دريت اني تطلقت فمان الله ياابو جابر فمان الله/نزلت الدرج بابتسامة/
فواز قطب جبينه باستغراب من تصرفها وكمل طريقه لبيته
جوهرة نزلت وهي تحس بسعادة نستها اللي صار ويصير معها فزت/بِسْم الله
ابو فواز واقف عالدرج يناظرها بحدة وهو سمع اللي دار بينهم
جوهرة بربكة/حياك خالي جابر وشلونك
ابو فواز بغيظ/لوني اقشر عالردي يابنت احمد
جوهرة بلعت ريقها/الله يسامحك ياعم وش هالكلام!!
ابو فواز بحدة/كلمة وحطيها باذانك حلق يابنت الناس من باعنا مانشريه ولو هو بارخص الاثمان
جوهرة احتدت نظرتها بقهر
ابو فواز ترك لها طريق/وسمعتيه تيسري يابنت الناس تيسري
جوهرة نزلت الدرج بخطوات سريعة كلها غيظ
ابو فواز رجع طريقه وهو اللي نسى اللي كان جاي عشانه
.
((بيت ابو فواز))
،،المجلس،،
سحايب جالسة قباله وهي صادة بوجهها عنه
سراج/وشلونك ياسحايب؟
سحايب/الحمدلله
سراج/والعيال كلهم بخير؟علا كيفها؟
سحايب/الحمدلله بخير دامهم معي بيكونون بخير
سراج بابتسامة/اكيد اللي مع امه بخير
سحايب ناظرته باستغراب من اسلوبه
سراج/الحمدلله ناظرتيني اسمعي ياسحايب انا جيتك وكلي
سحايب قاطعته/سراج امساك بمعروف او تسريح باحسان
سراج/ابشري بالمـ
سحايب قاطعته/معروفك كان صعب وبالحيل وعرفت الراحة وانا بعيدة عنك رجعت الحياة لروحي وزانت بعيني بعد ماكنت اتمنى الموت ياخذ واحد منا ياانا او انت وارتاح
سراج تغير وجهه
سحايب/المعروف معك مايناسبني ابد ياسراج طالبتك ياسراج طالبتك تسريح باحسان تكفى كان بقى بقلبك شي يجمل العشرة تكفى طلبتك تسريح باحسان
سراج اخذ نفس وهو امتلى خيبة ورا خيبة رغم توقعه لطلبها وناظرها/مااقدر
سحايب ابتسمت بحزن/ادري انك ماتسويها
سراج/لكن المعروف ابشري به
سحايب/مااارجع معك ياسراج
سراج مد يده وهو يمسك يدها
سحايب سحبت يدها
سراج شد على يدها/سحايب
سحايب ناظرته بتكشيرة
سراج بوعد/يشهد الله ياسحايب هالمرة معروف معروف يشهد الله
سحايب بدموع وهي وصلها صدق مشاعره/مابي قدرة للخيبة ياسراج يكفي ماحصل
سراج/شاريك ياسحايب جيتك لعندك شاريك ولا لي نية ارخصك تكفين لاترديني
سحايب تناظره بدموعها
سراج/وكل ماتبين ويبون تم ومن عـيـونـي جيتك لعندك اعفي واعطي هالسراج فرصة لايترك عياله وزوجته وهم قلوبهم سودا عليه تكفين
.
ـــــــــــــــــــــــــ ـــــــــــــــــــــــــ ــــــــــــــــــــــــ
يوم جديد
.
{الـفـنـدق}
فتنة جالسة عالكرسي قبال مراية التسريحة تقلب الجوال بين يديها وهي تتفحصه بابتسامة رغم خوفها ورفضها من امتلاك اي جوال لكن فرحتها فيه طاغية على ملامح وجهها نزلته بسرعة اول ماسمعت فتحت باب الحمام وهي تقوم من عند التسريحة وتتجه للكنب
سلطان خرج من الحمام ومنشفته على راسه ناظرها بنص عين
فتنة جلست عالكنب وهي تنحني للريموت اللي عالطاولة قبالها وتفتح التلفزيون
سلطان كمّل طريقه للتسريحة وقف عندها يناظر الجوال/والله انا احس بالذنب الصراحة
فتنة التفتت له تناظره باستغراب
سلطان رفع الجوال وعينه عليه/يعني غصبتك امس تختارينه وانت ماتبين جوال من الاساس
فتنة تضايقت ووضح على وجهها للحظة ورجعت عينها عالتلفزيون/عادي مو مشكلة
سلطان وهو يناظرها بالمراية بابتسامة/والله ذبحني الذنب ماقدرت انام البارح
فتنة/صح وشخيرك واصل اخر الممر مانمت منه!!
سلطان كتم ضحكته وهو يتجه لها وجلس جنبها
فتنة ماناظرته
سلطان نزل المنشفة على اكتافه/يعني اقول اقتراح مجرد اقتراح وش رايك نرجعه للمحل وفلوسه سوي فيها اللي تبين حلالك
فتنة/خلاص شريناه وشو له نرجعه
سلطان وهو يرميه عالطاولة
فتنة اتسعت عيونها وهي تشوفه ينضرب بالطاولة بقوة
سلطان/لا بس اشوفك ماتبينه ابد مالمستيه من اخذناه وماودي اضيق خاطرك كل ماناظرتيه اكتئبتي منه
فتنة التفتت له بغيظ/السالفة استقعاد صح؟
سلطان شهق/استغفر الله!!
فتنة/اي والله انها استقعاد
سلطان بابتسامة/كيف عرفتي!!
فتنة مدت يدها للجوال وهي تسحبه من عالطاولة وتتفحصه/دامك دفعت ليش ترميه كذا حرام عليك!!
سلطان باستعباط عليها/على اساس ماتبينه!!
فتنة رجعته عالطاولة وناظرت التلفزيون بغيظ/خلاص ماابيه
سلطان اخذه وهو يحطه بيده ويقفل عليه/والله تاخذينه
فتنة وهي تسحب يدها/ماابيه
سلطان وهو يسحبها لحضنه بيساره ويقفل يمينه على يدها والجوال بيديهم/والله والله تاخذينه لك خلصنا
فتنة جمدت بحضنه وتسارعت بانفاسها
سلطان ميل راسه وهو يناظر وجهها بابتسامة/حلفت ترا
فتنة همست وهي تحاول تهدي نفسها لاتفضحها انفاسها/طيب بس اتركني
سلطان تركها وهو يناظر وجهها المتغير وناظر التلفزيون بتضييع لشكوكه/ترا حفظت رقم بدر هو اللي معي بس
فتنة ابتعدت عنه شوي وجلست بطرف الكنبة
سلطان التفت لها/وش رايك تتصلين به ترا مايعرف رقمك؟
فتنة ناظرته باستغراب
سلطان/سوقيها عليه وشوفي
فتنة ابتسمت وهي تفتح الجوال واتصلت
سلطان قرب منها وبحماس/حطي سبيكر
بدر بنوم/ها يمّه امركم؟
فتنة وهي تحاول تغير صوتها/عيون امك انت ايه تعال مرني
سلطان متكي بطرف دقنه على يده يناظر حماسها بابتسامة
بدر قطب جبينه باستغراب من الصوت وهو يصحصح وجلس/هلا حي ذَا الصوت
فتنة اتسعت عيونها بصدمة منه
بدر/يسعد اللي متصل علي بالغلط اموت انا اموت
فتنة تسمعه مصدومة
بدر/وش ذَا الصوت اللي يذوب من اول حرف تعبنا من الجفاف والله تعبنا اخيرا اخيرا فيه انثى تتصل علي راضي لو بالغلط امري وينك امرك ونشرب كوفي وكلي قلوب
فتنة بعصبية/عسى القلوب ماتكتمل وجع
سلطان ضحك وهو يناظرها
بدر/افا افا وانا اللي اقول يازين الصدفة اللي جابتك لي متى نلتقي وينتهي الشوق
فتنة/بدير مسرع حبيت!!وجع وش ذَا!!صدق ماتستحي!!
بدر ضحك/افا افا على طول اتهمتيني
فتنة مكشرة بوجهها/مااتهمتك انت اللي طيحت الميانة وبعدين وش يدريني عنك
بدر/اذا بتلعبين اصملي قوي قلبك وش فيك ضيعتي
فتنة بغيظ وهي تناظر سلطان/عطاك رقمي صح؟
سلطان هز راسه بنفي/استغفر الله لاتتهميني
بدر/ايه بس لك الله يابدر!!ماتسمعين لي وهو اول ماقال اختاري اخترتي وانا ماترضين/تنهد/معوض خير يابدر معوض خير
فتنة/اقول لاتصير شايب يتشكى كل شوي قلت لك بيتي مفتوح
سلطان يناظرها بابتسامة
فتنة/ترا بنمر نسلم عليكم
بدر/وين تمرون!!بيت ابوي؟!!
فتنة بابتسامة/طبعا يعني وين
بدر/بس
فتنة قاطعته/اشوفك هناك يالله سلام/قفلت/
سلطان/ها جاهزة؟
فتنة بتوتر تخفيه/انت تقول المغرب
سلطان بابتسامة/والله اشتقت لجدتي
.
((الـمـسـتـشـفـى))
رغد بعيونها المنفوخة من طول بكاها من عرفت بفقدها لطفلها
ام عمر تساعد رغد بملابسها/كل شي خيرة مااخذ الا وله حكمة وانا عمتك
رغد بكت
ام عمر/ابكي محد له حق يلومك هذا قطعة منك اذا مابكيتيه من يبكيه لكن لاتعترضين على حكم ربك والله بيعوضك خير يابنتي
رغد/عمة سامحيني ياعمة
ام عمر قطبت جبينها
رغد بدموعها/انا اللي اخذت عبايتك وعباية فتنة
ام عمر انصدمت/ليش!!
رغد/لان فتنة ضيقت صدر عمر قالت له مااستفدت منك وانت بصحتك وش ابي منك وانت مريض
ام عمر فز قلبها بفجعة من قوة الكلام
رغد/بالله ذا كلام اخت لاخوها ماتحملت واخذت العبايات ورميتها بدورة المياه وشكله ذنبك ياعمة سامحيني بس من القهر ماانتبهت للي سويته سامحيني
ام عمر ضمتها/خلاص يابنتي خلاص لاتبكين حصل خير حصل خير
.
((بيت اهل موج))
موج بوجهها الشاحب متكتفة وهي منزلة عيونها بالارض
طلال/يرضيك اللي تسوينه يرضيك
موج ناظرته بغيظ/ايه يرضيني ياطلال تمام الرضا!!
طلال/يعني امور خاصة وادري بها من امي!!المفروض اعرفه منك!!
موج ضحكت بسخرية/ليش هو كان فيه امور خاصة من قبل مو كل شي تعرفه عمتي جت شرهة علي الحين!!
طلال/موووج!!
موج/وخلينا صريحين مع بعض شوي ناوي تجي مثلا قبل ماتدري بهالخبر!!
طلال سكت وهو يناظرها بغيظ
موج/هاذي الحقيقة ياطلال
طلال/انا مافيني حيل للتغلي تعبت وهاذي الصراحة عجبتك او لا
موج زفرت بضحكة تخفيها
طلال/هو سؤال واحد باقوله وامشي وانتي بيدك القرار وانا راضي
موج ناظرته بتكشيرة
طلال/هاللي بيجي باذن الله على خير ولد او بنت تبينه يعيش مابيننا اسبوع عندي واسبوع عندك
موج احتدت نظرتها/وليش من قال بتاخذه اصلا!!
طلال وقف/انا قلت اللي عندي وانتي بكيفك/خرج/
.
((بيت ابو فواز))
،،المجلس،،
فواز قبال ابوه/سم يبه
ابو فواز/وش سويت بالمعرض
فواز زفر بضيق/خير ان شاء الله يبه خير
ابو فواز/ان شاء الله خير بس وش سويت
فواز/اللي بعته عالتشليح واللي ركنته ماله فايدة والحمدلله
ابو فواز/وش اللي سبب الحريق؟
فواز/كهربا
ابو فواز قطب جبينه/بس الشركة اللي متعاملين معها زينة!!
فواز بلع كلامه/الحمدلله على كل حال
ابو فواز فتح محفظته وهو يخرج بطاقته ويمدها له/خذ
فواز اتسعت عيونه وبرفض/لا يبه لا مااقدر انت بعد خسرت مثلي
ابو فواز/بس انت شاطر بهالامور خذ والله بيفتحها علينا من جديد باذن الله
فواز/لا يبه والفرع الثاني اللي ماصدقنا يوافقون يأجرونا موقعه
ابو فواز/خيرة يومهم رفضوا وطولوا خيرة الحمدلله
فواز/لا يبه المعرض يبي له ميزانية كبيرة وبعدين حرام يروح مطارد سنتين على ذَا الموقع حرام
ابو فواز حطها بيده بالغصب/لاتنسى اني شريك فيه معك والفرع الثاني بيفتحها ربي ويساعدنا ان شاء الله
فواز تنهد وهو يناظر البطاقة
ابو فواز/وترا اللي بالبطاقة مـاهـو بذا الزود والمعرض يبي له ميزانية على قولتك لكن الجود من الموجود وانا ابوك
فواز تنهد/والله يايبه
ابو فواز/خذه وانت ساكت ودبر عمرك وانا ابوك
.
((بيت الجدة سدول))
الجدة سدول تلعب عهد بحضنها/وعهيدة الدلعة يبي لها قرصة
عهد شهقت وهي تلتفت لامها/ماما جدة بتقرصني!!
الجدة سدول/هذا اللي ضربني وبكى سبقني وشكى!!
منايا ابتسمت/جدة ياعهد ماتضربك ابدا تحبك هي تمزح معك بس
الجدة سدول/اي والله مالي بالضرب الضرب معروفة وين دياره
منايا/جدة!!
الجدة سدول/وش فيك زعلتي مالك حق تزعلين ابد!!
منايا كشرت بوجهها/انتي تبيني امشي ياجدة هذا اللي تبينه بكل مرة
الجدة سدول بحدة/استغفري ربك واطلبي السماح على هالظليمة يابنت جبر!!
منايا بعبرتها/ليش ياجدة ليش بكل مرة تتقصديني وتتعمدين تذكريني باللي سويته ليش!!
الجدة سدول بحدة/بنت يامنايا اسمعي زين وافهمي اللي باقوله
منايا تناظرها بدموعها
الجدة سدول/محد يلومك بهالبيت والموضوع قفلناه وانتهينا انتي اللي بكل مرة تجين وتفتحينه وتلومين نفسك وتتهمينا بهاللوم!!
منايا عضت شفتها بقهر وسط دموعها اللي غلبتها وانسابت على خدها
الجدة سدول/وهذا يابنت جبر ان دل دل على الندم والحسرة اللي اكلت قلبك من فعلتك الشينة
منايا بكت بحسرة
عهد قامت من حضن الجدة سدول وهي تجري لامها وتحاوطها بيديها الصغيرة لحضنها وبدموعها/انا مااحبك ياجدة ياعجوزة ان شاء الله تبكين اكثر من ماما مااحبك
الجدة سدول ابتسمت وهي تناظر عهد/الحمدلله اللي طلعتي من هالدنيا بشين زين يامنايا
منايا تمسح دموعها وهي تبلع عبراتها الباقية
عهد بغيظ وعينها على جدتها/جدة شريرة جدة عجوزة
الجدة سدول/اي والله اني عجوز يالبزر ويبي لك تمصع اذاني ياام لسان طويل
منايا ضمت عهد لها وهي تبكي
عهد مدت لسانها لجدتها وهي تمسح على راس امها
.
((بيت ابو فواز))
،،غرفة الضيوف،،
فواز وقف وهو يناظر امه اللي تمشي باتجاهه
ام فواز داخله وبيدها كيس باللون الفضي
فواز سلم على راس امه/وشلونك يمّه
ام فواز بزعلها/الحين وشلونك!!لك ثلاث ايام مامريت ولا سألت يافواز!!
فواز/العذر منك يمّه
ام فواز/ماااقول الا الله يهديك يافواز الله يهديك
فواز بنرفزة/يمّه اذا تبين تفتحين طاري يضيق الصدر تكفين لاتقولين شي وانا افهم وامشي تكفين
ام فواز/شوي شوي لايطق بك عرق خايف اجيب طاري سلطان!
فواز بوسع عيونه/يمّه!!
ام فواز/لاترفع صوتك واجلس بس
فواز واقف ماتحرك
ام فواز مسكته من يده وهي تجلسه عالكنب بالغصب وجلست جنبه/هو صحيح تزعلني وتغيظني بكلامك على اخوك لكن عسى الله يصلح بينكم
فواز وقف وبنرفزة/يمّه اذا عندك غير ذَا الكلام ابشري اما هالكلام ماخذ خيره وشره سلام
ام فواز مسكته من يده وهي تجلسه وبعصبية/اجلس بس اجلس لاتشوف شي مايعجبك/مدت له الكيس اللي بيدها/خذ
فواز قطب جبينه باستغراب وهو ياخذ الكيس منها/وشو يمّه؟/فتحه واتسعت عيونه ومده لها/لا يمّه لا!!وش ذَا الكلام انتي وابوي متفقين اليوم!!
ام فواز ردت الكيس/هذا مني انا وخواتك هو مـاهـو بذلك الشي لكن عسى الله ينفع به
فواز بغيظ/لا يمّه لا ماقبلته من جواهر حتى اقبله منكم لا
ام فواز/ومين اللي قالك انه ببلاش
فواز يناظرها بغيظه
ام فواز/كل شي بحقه وانا امك لا ربي انعم عليك رجعهن
فواز حطها عالكنبة ووقف/لا يمّه والله مااقدر يشهد الله مااقدر
ام فواز وقفت وباصرار/يحرمن علي وعلى خواتك يافواز
فواز بحدة/استغفر الله العظيم!!
ام فواز/اذا ماخذيتهم يشهد الله رميتهم بالزبالة وورطتك مع خواتك يافواز
فواز شهق/يمّه
ام فواز اخذت الكيس ومدته له/خذ
فواز يناظرها
ام فواز/اذا ماساعدوك اهلك مين بيساعدك خذ بس
فواز تنهد وهو يناظرها
.
{الـمـزرعــة}
الـعـم يُسر جالس عند راسه وهو يكمد له مرتسم على وجهه الهم والضيق
مريم دخلت وبيدها موية جديدة جلست جنب الـعـم يُسر/رح نام انا معه
الـعـم يُسر ناظر سعد بضيقته
سعد متمدد على فراشه وتحت بطانيته بوجهه الشاحب ينتفض من زود حرارته المرتفعة
الـعـم يُسر/مااقدر مااقدر يامريم اروح عنه يعلم الله مااقدر
مريم/لاتروح تمدد بزاوية الغرفة تريّح شوي وانا عنده يايسر تريّح الله يهديك
الـعـم يُسر وهو يناظره بضيقة اخر عياله التسع هالسعد على كثر مايهاوشه الا انه يخاف عليه اكثر من روحه وبصوت اهتز/خليني عنك يابنت الحلال خليني عنك
مريم تنهدت وهي تجلس جنبه/والله مااخليك يايسر سعد وليدي اللي ماانكتب لي يايسر/حطت يدها على كتفه/حرارة تمر ولاتضر ياابو حمد تمر ولاتضر بعونه
.
سراج يطلع الدرج ويده بيد جوهرة يسحبها بالقوة
جوهرة وهي تسحب يدها منه بعناد
سراج ترك يدها وهو يلتفت لها ومن بين اسنانه/وبعدين وبعدين مع راسك اليابس وبعدين!!
جوهرة بغيظها/لاتصير علي معهم ياسراج لاتصير تكفى
سراج/اسمعيني ياجوهرة اسمعي الحين ادخلي وراضي ابوي وبعدها سوي اللي تبينه ليش ماتفهميني ليش!!
جوهرة/مااعرف الحيلة انا اعطي بالوجه
سراج/اعطيني بالوجه لكن ابوي ماينفع معه اسمعيني وتشوفين اسمعي كلامي
جوهرة ناظرته بغيظها
سراج/اسبوعين وهو يطقطق على راسك ويغيظيك وبعدها محد حولك سوي اللي تبينه امشي
جوهرة/واذا ماصار هالكلام
سراج/لك علي اوقف بوجه الكل عشانك ياجوهرة بوجه الكل
جوهرة ناظرته للحظات ثم اسرعت بخطاها عالدرج وهي ترن جرس بيت نايف
سراج وقف جنبها
وسام فتح الباب بدون لايسال
جوهرة سلمت عليه وضمته لها/وين جدك؟
وسام/داخل يتقهوى
جوهرة/العلة زوج خالتك موجود
وسام هز راسه بلا/ماشفته اليوم
جوهرة دخلت وهي تبكي/يبه اسفة يبه والله اسفة
سراج ضحك بصدمة وهو يناظر بكاها
.
((بيت الجدة سدول))
فتنة جالسة جنب الجدة سدول وطرحتها على اكتافها بمشاعر مختلطة مابين خجل من وجوده وكثر الحب اللي غامرها من الجدة سدول
الجدة سدول محتضنة يد فتنة بين يديها/ياهلا بعيوني ياهلا تو مانور البيت توه
سلطان قبالهم/منور براعيته منور بوجودها الله يبقيها ويسلمها/وقف/
الجدة سدول شهقت/وش فيك وقفت!!
سلطان/والله ياجدة مشوار ضروري وراجع
الجدة سدول/الله ومشواريك اللي ماتخلص ياسلطان!!
سلطان بابتسامة/والله ياجدة ضروري ضروري لكن ابشري راجع وباجلس معك وبتطردني من كثر غثاي
الجدة سدول زفرت وهي تناظره بشك
سلطان وقف وهو يتجه لها/والله راجع ياجدة راجع وامي والبنات للحين ماشفتهم راجع ياجدة/انحنى وهو يسلم على راسها/راجع يامضنون عيني راجع/اعتدل بوقفته وعينه على فتنة/يالله
الجدة سدول شدت على يدها/انت تيسر وش لك ببنيتي!!
فتنة ابتسمت بحب بهالمشاعر الصادقة
سلطان/اوصلها لاهلها ياجدة
الجدة سدول/رح انت انا اوصلها عنك
سلطان باحراج/صعبة ياام جابر تروح بدون زوجها صعبة لاتنسين توها عروس
الجدة سدول تنهدت وهي مو عاجبها الوضع لكن كلامه اقنعها/هالمرة مسموح
سلطان باس يدها بابتسامة/الله لايخليني منك
الجدة سدول مسكت يده/ترا ماجلست معك زين
سلطان ابتسم/ولا انا ماشبعت منك للحين يامضنون عين سلطان
الجدة سدول/لاتبطي
سلطان/ابشري ياام جابر ابشري
الجدة سدول/الله ييسر لك ياعيني الله ييسر لك
سلطان وقف وهو يناظر فتنة
فتنة وقفت وهي تعدل عبايتها وتلبس طرحتها
سلطان مشى للباب
الجدة سدول/بيتي بيتك يـافـتـنـة لايردك عنه شي
فتنة انحنت وهي تبوس راسها/الله يخليك لي ياجدة
الجدة سدول بابتسامة/ويصلحكم لي ياعيوني ويصلحكم
فتنة لبست نقابها وانحنت وهي ترفع شنطتها لكتفها ومشت وناظرته وهو ينتظرها عند الباب
سلطان ابتسم اول ماطاحت عينه عليها ومد يده لها
فتنة لبست بكعبها وبخجل وهي تناظر يده همست/واذا شافنا احد؟!!
سلطان مد يده اكثر ليدها وهو يمسكها ويشد عليها/حلالي!!
فتنة وهي تحس بوجهها انحرق من كثر احراجها همست/بشويش كل العالم سمعوك
سلطان مشى وهو ماسك يدها/خليهم يسمعون انتي لي ماسويت شي حرام انتي حلالي وانا حلالك يـافـتـنـة سلطان
فتنة شدت على يده وهي التزمت الصمت وعينها عالارض
سلطان ابتسم من حس بشدة يدها على يده تنهد وهو يلتفت لها وهمس/وتلوميني!!صدق انك فتنة فتنة والله يـافـتـنـة
فتنة شدت على يده بيديها الثنتين وبهمس وهي عرقت من كثر احراجها/خلاص والله خلاص الله يخليك!!
سلطان ضحك/طيب طيب خلاص/وقف على باب بيت ابو عمر وناظرها/محتاجة شي؟
فتنة/سلامتك
سلطان تنهد/انا رايح للمركز
فتنة قطبت جبهتها/اي مركز؟!!
سلطان/الشرطة اقصد
فتنة انقلب وجهها تحت نقابها
سلطان/لاتشيلين هم اكيد شوية فواتير
فتنة تنهدت براحة
سلطان/لولا هالمشوار الضروري ماكانت الزيارة بهالشكل يـافـتـنـة
فتنة/عادي نأجلها بكرة
سلطان/خذي راحتك معهم ماني مطول بالكثير ساعتين ان شاء الله وراجع
فتنة/بحفظ الله
سلطان/انتبهي على نفسك
فتنة/وانت بعد
سلطان دق الجرس واتجه لسيارته اللي واقفة عند باب بيت ابوه ركب السيارة وهو يأشر لها بيده بمعنى سلام
فتنة رفعت يدها وهي تاشر له بنفس الشي
غياث فتح الباب واتسعت ابتسامته/فتنة!!!
فتنة ابتسمت وهي تنحني له وتضمه/ياعيون فتنة/سلمت عليه ودخلت وهو يقفل الباب وراها/
سلطان اخذ نفس وهو يكبح توتره وحرك سيارته لاكثر مكان مكروه لقلبه
.
((بيت نايف))
،،غرفة الضيوف،،
ياقوت فتحت الباب وهي مقطبة جبينها تناظرها بشك دخلت وقفلت الباب وراها وهي تناظرها
جوهرة تجمع اغراض عيالها وترتبها بالشنطة التفتت ناظرتها وابتسمت/هلا حياك
ياقوت جلست على اقرب كنبة لها وهي تناظرها بهدوء
جوهرة ناظرتها باستغراب/وش فيك؟!!
ياقوت/جوهرة تمشي عالكل الا علي
جوهرة ابتسمت وهي تكمل شغلها/وهذا العشم بأختي من يعرفني كثرها!!
ياقوت/وش ناوية عليه؟!
جوهرة/كل خير كل خير
ياقوت/الله يستر من خيرك ياجوهرة
جوهرة/خيري اوله باين عليك ياياقوت
ياقوت قطبت جبينها
جوهرة التفتت تناظرها/وش فيك تناظريني كذا!!هذا الصدق!!لولا اني غضيت النظر عن زوجك الله اعلم وش صار ببيتك
ياقوت احتدت نظرتها
جوهرة تنهدت وهي تقفل الشنطة/بس عشان تعرفين ان اختك ماترضى عليك شي
ياقوت وقفت وهي تشد قبضتها/كثر خيرك ياجوهرة بس تراك في بيته حاسبي على الفاظك شوي/خرجت وهي تقفل الباب بقوة/
جوهرة/الله والبيت عاد!!كلها شقة اللي يسمعك يقول فلة/وقفت وهي تسحب شنطتها معها/
.
{ساجي و سدول}
ساجي ويساره بيد سدول ويمينه الكوفي يتمشى معها
سدول ناظرته وهي تستجمع شجاعتها/ساجي
ساجي التفت لها باستغراب منها من رجعت تناديه باسمه مو مثل قبل ابتسم وهو يطرد شكه/سمي ياعيون ساجي امري
سدول/وش ناوي عليه؟
ساجي قطب جبينه باستغراب/في ايش؟!!
سدول/بوضعنا
ساجي يناظرها مو فاهم عليها
سدول/اقصد البيت متى ناوي ننقل؟
ساجي تغير وجهه وهو يزفر
سدول بتبرير/انت تدري الحمل ودرج صعب الوضع علي باطلع وانـ
ساجي قاطعها/سدول هذا حقك لاتتعذرين
سدول ناظرته بصمتها
ساجي/ادري ان قلبك للحين ماصفى من ناحية امي وخواتي
سدول تنهدت/ساجي
سدول قاطعها وهو يشد على يدها/وانا ماالومك ابدا ومن طيب اصلك اللي صابرة عليهم لو هو غيرك مارضت ترجع اصلا
سدول بلعت غصتها وهي تظن نست اللي صار لكن للحين باقي اثره بقلبها
ساجي/وابشري بالنقل ابشري به لكن ودي تصبرين علي شوي الى ماتزين اموري تدرين الشغل وقرض البيت يبي لي شوية وقت بس
سدول ناظرته بحيرة
ساجي/واهلي ماانتي بلمزومة حتى السلام منهم الزم ماعليك راحتك انتي وولدي والباقي معذورة به وحقك ياسدول
سدول/يعلم الله ياساجي انا ماابي لك هالحالة ولا ابي القطيعة لكن
ساجي شد على يدها بيده وقاطعها/ادري ادري لكن الاحسن بهالوضع لازم تخففين من اهلي لو تقفلين باب البيت عليك
سدول/اخفف!!تقصد مااقابلهم ابد خاصة بعد اللي صار
ساجي تضايق من كلامها تنهد/لعل وعسى تزين الامور شوي
سدول اخذت نفس/الله يكتب اللي فيه الخير ياساجي
ساجي ابتسم/اتركي هالموضوع احنا طالعين نبي ننبسط اتركي الضيقة عنا ياسدول اتركيها
.
{الـمـركـز}
سلطان جالس قبال الضابط يناظره بصدمته/وش هالكلام؟!!
الضابط وهو يوجه له الدليل اللي يثبت وجوده بالمعرض بنفس يوم الحريق(باقي تسجيل كاميرا المعرض اللي لحقوه قبل الحريق)/هذا الدليل اللي على اساسه تقدم البلاغ وبيحال للمحكمة
سلطان بغبنة وهو يناظر نفسه وراضي اللي قباله بالفيديو اشر بطرف اصبعه عالكمبيوتر/اللي مقدم البلاغ علي ذَا؟
الضابط/لا
سلطان قطب جبينه باستغراب
الضابط/صاحب المعرض
سلطان انخطف وجهه
الضابط/فواز جابر الـ قدم البلاغ بالاضافة لكونها مع سبق الاصرار والترصد
سلطان اللي مااستوعب للحين نطق بلعثمة يتداركها من فرط صدمته/فواز فواز انت متأكد؟مو براضي؟فواز جابر الـ
الضابط بجدية/الامور ماهي بلعبة لوصلت بهالمكان هذا بلاغ رسمي مع شهود ضدك وانت على ذمة التحقيق حاليًا
سلطان ضحك بخفة من صدمته/مع سبق الاصرار والترصد!!ترا فواز اخوي اخوي!!
الضابط بحدة/مـاهـو بشغلي انا علي باللي قدامي يافرد
العسكري دخل وهو يستعد له/سم
الضابط/عالحجز
سلطان انخطف وجهه/وش حجزه!!
الضابط/بعد اقوالك اللي أُخذت منك واطلاعك على مجريات البلاغ بحقك تحجز 24ساعة وثم تخرج بكفالة بما انه مافي وفيات او اصابات تفضل ماودنا نتعامل بقوة جبرية
سلطان شحب وجهه وتعرق بغزارة وضحت على اطراف جبينه وبهدوء ظاهر عكس العواصف اللي تعصف داخله وهو يكبحها/طيب اكلم احد يكفلني؟
الضابط/حتى لو كلمت الاجراء 24 ساعة
.
بدر وقف بالسيارة عند بيت ابوه ومعه امه ورغد موصلهم من المستشفى للبيت قطب جبينه باستغراب وهو يناظر الرقم/هلا ياهلا حياك الله ياابو جابر
ام عمر نزلت وهي تفتح الباب تشيل الاغراض
ثابت بابتسامة/الله يحييك ويسلمك
بدر/علومك وعلوم الاهل عساكم بخير؟
ثابت/ماعلينا الصراحة يابدر ماجا ببالي غيرك قلت اتصل بك
بدر/امرني
ثابت تنهد بضيقة/بغيتك تكفل سلطان
بدر شهق/اكفل سلطان!!
رغد قطبت جبينها وهي تسمع كلامه
بدر/ليش عسى ماشر
ثابت/السالفة فيها حريق والله يستر لايكون راحوا فيها بشر
بدر بفجعة/وش حريقه!!ووش راحوا بشر!!ماتنفع معها كفالة ياولد!!
ثابت زاد همه وهو اللي ماعرف يتصرف بهالموقف/والله مدري بس اذا انت فاضي الحقني لمركز***ومنها نشوف وش السالفة
بدر/ابشر ابشر ولا يهمك جايك الحين جايك
ام عمر اللي على كتفها الايسر شنطة وبيدها اليسرى اكياس فتحت الباب بيمينها وهي تمد يمنيها لرغد/يالله يابنتي يالله
رغد حطت يدها بيد ام عمر وهي تستند عليها ونزلت
بدر/يمّه انا رايح مشوار ضروري وراجع شوي
ام عمر/الله معك
بدر حرك بسرعة يسحب محفظته يتفقد اثباتاته باستغراب من الموضوع
.
((بيت ابو فواز))
عجايب دخلت لغرفتهم وهي تقفل الباب وراها
سحايب تكمل استشوار شعرها ناظرتها باستغراب/وصل سلطان وعروسته؟
عجايب/اتصل واعتذر
سحايب تضايقت وهي تترك شعرها الطويل/ليش ماقال من بدري!!
عجايب/اتركيك من سلطان
سحايب ناظرتها باستغراب
عجايب/اخيرا لقيت وقت محد فيه معنا
سحايب زفرت وهي عارفة قصدها وكملت استشوار وعينها عالمراية اللي قبالها/ماصار شي
عجايب كشرت بوجهها/قولي لي وش ناوية لايكون بعد كل اللي صار بترجعين له!!
سحايب بضيقة/مدري مدري
عجايب اتسعت عيونها وبعصبية/وش اللي ماتدرين!!سحايب لاتجننيني واللي يرحم والديك!!
سحايب تنهدت وهي تقفل الاستشوار وتنزله وتناظرها/عجايب اللي قابلته امس مو بسراج
عجايب قطبت جبينها باستغراب/كيف يعني؟!!
سحايب/اللي امس غير غير عن سراج اللي عرفته وعشت معه
عجايب بعصبيتها/ايه حبيبتي كسرتي خشمه قام يوعد والله لاسوي لك ولاأفعل لك اكيد قال كذا يبيك ترجعين وهالكلام حده اسبوعين بالكثير وبعدين رجعت حليمة لعادتها القديمة ياسحايب وعضي اصابعك ندم وقتها
سحايب/عجايب لاتضحكين ولاتعصبين بعد اسمعي وبس
عجايب تكتفت/نعم!!
سحايب/كلامه مسكة يده نظرته وحتى مشاعره كلها كانت غير غير مرة شي جديد مااعرفه
عجايب مسكت يد سحايب بين يديها
سحايب رمشت باستغراب
عجايب وعيونها بعيون سحايب/شاريك ياسحايب شاريك
سحايب اتسعت عيونها بصدمة
عجايب/كل ماتبين ويبون من عـيـونـي
سحايب بصدمتها/كيف عرفتي!!
عجايب دفت يدها بقوة وبعصبية/شف شف شف يعني كلامي صح!!والله هالسراج مو هين
سحايب/عجايب
عجايب/انتي اللي اسمعيني قلبي مو مرتاح لهالسراج
سحايب/من زمان وانتي ماترتاحين له
عجايب/لا هالمرة غير غير على قولتك
سحايب ناظرتها بتوتر/بس ياعجايب هالمرة وعدني عمره ماوعدني بشي وهو اذا وعد سواها
عجايب/الله يستر منه عاد انا قلت لك/مشت للباب وهي تفتحه/وانتي بكيفك
سحايب ضاق خاطرها وزادت حيرتها اكثر بعد كلامها
ذهب واقفة قبال عجايب وبتكشيرة/تخبيب تخبيب حرام عليك!!
عجايب بحدة/ماتدخلت انا نصحت وهي معها عقل
ذهب/مع امي ماادري وش قلتي لكن تتوقعين بعد كلامك لها وش بتسوي
عجايب بنرفزة/فكيني من محاضراتك ذهب واللي يعافيك فكيني/مشت/
سحايب ناظرت ذهب/وش رايك؟
ذهب/انا اللي بأعيش حياتك!!
سحايب ناظرتها بغيظ
ذهب/هاذي حياتك لاتتركين احد يأثر عليك حتى سراج نفسه ياسحايب سمعتي حتى سراج
سحايب سكتت
ذهب/انزلي تقهوي معنا ساح الحلا واحنا ننتظر
.
((بيت ابو عمر))
،،المجلس الخارجي،،
فتنة جالسة تناظرهم بابتسامة وهم يسولفون لها بحماس
غياث واقف قبالها وهو يرقص/كذا كنت وش رايك بس بالله ماني برجال
فتنة ضحكت/وسيد الرجال ياغياث
اصيل/اوص اوص فضحتنا ماعرفت تسلم على ذاك الشايب
راجح ضحك/اي والله صادق
غياث كشر بوجهه
اصيل وراجح فزوا واقفين بدون كلام ويعيدون الموقف لفتنة
فتنة اتسعت عيونها وهي عرفت ان اصيل يقلد غياث وضحكت وهي تتخيل تردد غياث مع الشايب
غياث بغيظ/حتى انتي تضحكين علي!!
راجح جلس/شفت انك فضيحة
فتنة بضحكتها وهي تناظره/اسفة والله غياث مو قصدي
اصيل/اي والله ماتقصد الضحك ضحكنا غصب
غياث فز واقف وهو يتعلق برقبة اصيل يتضارب معه وبغيظه/خلاص خلاص من امس تذلني دريت اني غلطان
اصيل يدافع عن نفسه/يالنفسية وش فيك زعلت!!
فتنة وقفت وهي تفكهم بابتسامة/خلاص وش ذَا بزارين مو برجال!!
راجح وهو جالس من مكانه رفع صوته/تررررككككييييي
اصيل وغياث تركوا بعض
فتنة بوسع عيونها/يمّه منكم يمّه تعرفون لبعض!!
غياث بتكشيرة/تركي غثيث مااحبه مثل طلال
اصيل جلس/هالمرة صح وانا معك
فتنة جلست/عيب عليكم اخوانكم وش هالكلام
راجح بهدوء/يعني وجهة نظر مقبولة
فتنة ناظرت راجح وبنرفزة/راجح لاتصير معهم بعد
اصيل/وانتي بعد يـافـتـنـة ماتحبينهم لاتكذبين علينا وانتي كله تقولين الكذب حرام
فتنة/حتى ولو انا مااحبهم مالكم حق تكرهونهم من كرهي!!وبعدين تركي غير عن طلال غير تركي توه يكبر وتتغير نفسيته شوي
غياث/وطلال
فتنة تغير وجهها
غياث/طلال كبير خلاص ليش يسوي فيك كذا؟
فتنة تناظره ساكتة
رغد وقفت على باب المجلس وبابتسامة شاحبة وسط ملامح وجهها اللي تنطق تعب/جاوبيه يـافـتـنـة؟
فتنة احتدت نظرتها وهي تلتفت لها
رغد بابتسامتها/وش فيك تناظريني كذا لايكون انقص لسانك من حساسية السؤال!!
غياث وقف ويناظرها بغيظ/ماابي اعرف شي
رغد ارتفعت حواجبها وهي تناظره من فوق لتحت
غياث/واصلا انتي يالملقوفة مالك شغل بيني وبين اخواني محد طلب رايك ولااحد يبي يسمعك لقافة لقافة الله يعنيك على نفسك
رغد زفرت بضحكة سخرية/الله والبزران!!يعنني كبرنا!!
غياث مشى وهو يمر من جنبها ووراه اصيل وراجح بملامح وجيههم اللي تنطق عدم راحة لها
فتنة بابتسامة/الحمدلله حتى البزران على قولتك مشاعرهم صادقة مايكرهون بدون سبب وحتى لو كرهوا معناه اللي قدامهم مريض خلقة
رغد ضحكت/والله قوت شوكتك من ليلة زواجك
فتنة تنهدت/الحمدلله من فضل ربي وبتقوى الى ماتكسر عينك
رغد بضحكة/صدق صدق الزواج يغير والدليل انتي!!
فتنة وهي تنفث على نفسها/قل اعوذ برب الفلق!!مو حاصلة لك الراحة والسعادة اللي تتمنينها!!
رغد احتدت نظرتها وهي تبلع غصتها
فتنة/غصب ياعيني غصب ولا بتحصل لك من قلبك الاسود اللي لو تغسلينه بكلوركس مانظف
رغد ابتسمت/مشكورة ياقلبي مشكورة مخليتها لك اذا السعادة والراحة مع اشكال زوجك اللي طايرة فيه مانبيها موفرينها لك مع كامل التنازلات
فتنة بسخرية/ايه ياقلبي قانعة وخلاص ماتنلامين الله يعينك بس على باقي حياتك
رغد ضحكت ضحكتها العالية
فتنة توترت للحظة وهي تعرف ضحكتها لاصارت واثقة
رغد/لاتلومين ياحلوة لان مافيه مجال لك اصلا تلوميني!!قولي لي الحين زوجك اللي ماخذ عقلك من يومين وينه الحين
فتنة ابتسمت/المركز
رغد انقلب وجهها بصدمة/تدرين!!
فتنة ضحكت/وش فيك ماضبطت معك!!واضح واضح ماضبطت/ضحكت/
رغد بابتسامة/الله يرزقني برودك وطمأنينة قلبك ياشيخة!!
فتنة قطبت جبينها
رغد/ارهابي وانسجن والحين حرايق وراحـوا فيها عااااالم!!
فتنة انخطف وجهها
رغد/الله وقوة قلبك عالذنوب ودعوة المظلومين/ضحكت/اصلا عادي ظلمتيني قبل صدق وافق شنٌ طبقة!!
فتنة بحدة/الكذب دربك ومنتهاك وكلك وتبيني انخدع بك!!عجيب امرك للحين عندك امل اصدقك!!
رغد/وش مصلحتي اكذب!!اسالي اخوك وهو بياكد لك كلامي/خرجت جوالها من شنطتها بتتصل/
فتنة وهي تسحب شنطتها وتخرج جوالها واتصلت ببدر وهي تفتح سبيكر/والله انك اكبر كذابة ياام وجهين
رغد بابتسامة ثقة/اتصلي اتصلي
بدر/هلا فتنة
فتنة/بدر وش سالفة سلطان والمركز
بدر بصدمة منها/وش دراك؟!!
فتنة/لاتكذب علي بدر وش صاير
بدر تنهد/رايح اشوف وش السالفة
فتنة بنبضات قلبها اللي تسارعت/اللي هي؟
بدر/اللي فهمته حريق
فتنة رجف قلبها من الرعب وهي بدت تصدق كلام رغد/وش حريقه؟!!
بدر/مدري مدري اشوف الموضوع وان شاء الله خير اكلمك بعدين اول مااعرف الموضوع/قفل/
فتنة وهي تحس ضاق نفسها من كثر صدمتها
رغد بابتسامة فرح/ليه وش قايل لك!!
فتنة تناظرها ساكتة
رغد ضحكت/لايكون كاذب عليك ايقاف خدمات!!/ضحكت/
فتنة صرخت/قولي اللي عندك وخلصيني!!
رغد/ياشاطرة ياللي طايرة بالفرح ومحد سمى عليك وفتح عيونك الارهابي اللي انتي على ذمته تسبب بحريق والواضح راحوا فيها عالم مالهم ذنب غير تفكير زوجك العقيم الله يعينك على ماابتلاك الله يعينك/ضحكت/
فتنة تناظرها بشحوب وجهها من صدمتها وهي تحس بكل فرحة استوطنت قلبها الصغير تبخرت وكأنه انصب عليها موية باردة غسلت وبددت مشاعرها الدافية اللي احتوتها وبدت تتامل فيها خير وترسم عليها ملامح حياة سعيدة
ام عمر اللي تركت رغد على طلبها وطلعت الاغراض لفوق رجعت لها وهي نيتها تساعدها وقفت باستغراب وهي تناظرها تضحك والتفتت تناظر الموجودة وباستغراب من وجهها/فتنة!!
رغد تنهدت وهي تلتفت لعمتها تناظرها وتعرج/ماعليه ياعمة/مدت يدها لها/تساعديني؟!!
ام عمر ناظرت فتنة بقلق/وش فيك يمّه؟
فتنة ماردت وهي تشد على شنطتها وسط رجفة يديها مرعوبة
رغد وقفت عند عمتها وهي تمد يدها/عمة؟
ام عمر تركتها وهي تتجه لفتنة
رغد اتسعت عيونها بصدمة
ام عمر جلست جنب فتنة ومسكت يدها/يمّه وش فيك؟
رغد عضت شفتها بقهر وهي تكمل طريقها بشويش لبرا المجلس
فتنة بعيون غرقت دموع/يمّه وش اسوي وش اسوي الحين تكفين تكفين
.
{الـمـركـز}
سلطان يجر خطواته بثقل وسط وجهه اللي اكتسى سواد وهو تعصف به ذكرياته لنفس الموقف مع اختلاف المكان رغم قصر المسافة الا انها اطول طريق بالعالم بعينه تسارعت انفاسه ودارت فيه الدنيا وهو ينعاد على مسامعه صوت فتح باب الزنزانة اختنق بانفاسه وهو يناظر صغرها ماتهنى للحين ماحس بطعم حريته كيف بلحظة وبغمضة عين رجع لنفس المكان وكأن العالم ينفيه ويرفضه من جديد يذكره بماضيه اللي ماله ذنب فيه كيف ينظلم من جديد وهو اللي اخذ عهد على نفسه مايرجع هالمكان ولايعرف له طريق
العسكري اشر بيده للزنزانة
سلطان انتفضت عظامه ونخرها رعبه نخر من خطى اول خطوة بداخلها وتجددت اول مشاعر رافقته برحلة ظلمه الطويلة العاتية اخذ نفس من حس بانفاسه تقل ويزيد صدره ضيقة التفت بفجعة وهو يمسك يد العسكري
العسكري سحب الباب يقفله قطب جبينه وهو يناظره ودف يده بقوة/خير!!!
سلطان تراجع لداخل الزنزانة بخطواته وبصوت واضح اهتزازه/تكفى يااخوك لاتقفل الباب تكفى
العسكري/نعم!!صاحي انت!!
سلطان بوجهه المخطوف/والله مااتحرك شبر لكن لاتقفله تكفى طلبتك
العسكري قفل الباب بدون اي اهتمام لكلامه
سلطان مسك البوابة وهو ينفضها بصراخه وقهره/قلت لك ماسويت شي ماسويت شي ليش محد يصدقني ليش!!ارجع ارجع اكلمك ماسويت شي ظلم ظلم ظلللم/جلس عالارض وبحسرة وهو منزل راسه/ليش الظليمة ليش!!ليش تظلموني وانا بري حسيبكم الله حسيبكم الله/وبدموع انهمرت من مرارة ظلمه/يااااارب حقي ياعادل ياحكم سألتك خذ بحقي منهم خذه يارب خذه بحيلك وقوتك يارب
.
ـــــــــــــــــــــــــ ـــــــــــــــــــــــــ ــــــــــــــــــــــــ
يـوم جـديـد
.
{الـعـصـر}
.
((بيت ابو فواز))
،،الكل مجتمع بالحوش يتقهوون بسعة صدر ومشاعر عائلية تلف هالعايلة ماعدا منايا اللي داخل بيت الجدة سدول اعتذرت لوجود فواز وهي تتركهم براحتهم،،
ثابت خرج من البيت بوجهه المتجهم بخطوات سريعة
//الكل يناظره//
عجايب/من البارح مو عاجبني هالثابت
ابو فواز قطب جبينه وهو ينزل فنجاله ويناظره وهو يمر/ثابت
ثابت وقف وهو يلتفت لابوه/سم يبه
الجدة سدول بغيظ/اعقب يالثبتي وين السلام!!
ثابت بنرفزة واضحة/السلام عليكم
الجدة سدول/وعليكم السلام لكن السلام اللي بدون نفس مانبيه
ابو فواز/على وين؟
ثابت/مشوار يبه مشوار
فواز/وش مشواره!!
ثابت بحدة/انت بالذات لاتتكلم معي
فواز بحدة/نعم!!
ابو فواز/ثابت!!
ثابت ناظرهم وباشمئزاز وقهر/كيف كيف لكم نفس تقعدون مع واحد يضحك بوجيهكم ويطعن بظهركم كيف!!
فواز وقف وبصراخ/احترم نفسك
ثابت بابتسامة/ماشاء الله ماشاء الله حسيت على وجهك!!لاني والله مااظن الظاهر خوف لاتنكسر صورة الاخ اللي تلملها بعيونهم اكثر!!
فواز مسكه من ياقته وضربه
//اعتلى صراخ الموجودين اللي وقف البعض يمنعهم عن بعض لايتضاربون//
ابو فواز بصراخ/اعقبوا كل واحد بطولي وتتهاوشون!!/ناظر ثابت/هذا اللي ربيتك عليه ماتحشم اللي اكبر منك
ثابت ضحك/احشم من!!
فواز صرخ/ثاااابت!!
ثابت صرخ/لاتتكلم معي ماتسمع!!
ام فواز/استح ياثابت عيب عليك!!
ثابت بقهر وهو يناظرها/استحي من مين يمّه!!/ناظر ابوه/احشم مين يبه!!
فواز/خير خير وش فيك علينا!!هذا احنا تاركينك على مزاجك لاحسيب ولا رقيب!!
ثابت/مين اللي يحاسبني ويراقبني!!محد له سلطة علي غير ربي اللي خلقني ولا انت مالك حتى حرف علي!!
ابو فواز ضربه
ثابت ناظره/سلمت يمينك يبه سلمت!!
ابو فواز/وتعيش سالمة ياثابت دام هاذي الفاظك مع اخوك الكبير
ثابت ضحك بقهر/وهو يبه وهو
فواز احتدت ملامحه
ثابت/ليش ماتسلم يمينك على وجهه بعد!!
ابو فواز بصراخ/الظاهر انك ناوي على غير الكف الليلة
ثابت بصراخ/وهو ليش ماتعلمه يرحم الصغير والاهم يحشم اخوه الكبير ويحترمه
فواز/قل وش وراك ياثابت قل واترك الالغاز
ثابت مرر نظره عليهم وبغبنة/الحين يضحك معكم وبكرة خناجر تنغرز بظهوركم/ناظر فواز/ينتفض قلبي من الخوف ولايأمن لحظة معك ابد ولا لحظة
ام فواز/ثابت وش فيك تكلم!!
ثابت ناظر امه/سلطان يمّه سلطان
ام فواز قطبت جبينها/وش فيه؟!!
الجدة سدول وقفت وبحدة/انا قايلة هالوجه مايتضحك لله وش مسوي يالمخزي!!الله لايبارك بك من ولد قل امين!!
فواز بصراخ/كله سلطان سلطان سلطان ذَا اللي مشغلكم بس وانا عساني بقلعة محد مهتم لي!!
ثابت باشمئزاز يناظره/كم ضحك معك وكم لعب معك وكم انضربتوا مع بعض كم فزعتوا لبعض كيف كيف طاوعك قلبك ترده لنفس المكان كيف
الجدة سدول تغير وجهها/وش مكانه ياثابت وش؟!!
ثابت/وش يعني ياجدة وش السجن رجعه للسجن بوساعة وجهه/مشى بخطوات سريعة/
الجدة سدول شهقت/يمّه ياويل قلبي قلبه يارب لاتفجع قليبه لاتفجعه
ام فواز ناظرت فواز بوسع عيونها وبدون لاتسأله عن شي وبقهرها/قل امين
الجدة سدول بغيظ/بيستجيب ربك بدون قولته امين وانتي امه
ام فواز برجفة صوتها/عساك تذوق ضيمه يافواز عساك تذوقه
فواز/يمّه!!!
ام فواز مشت للبيت
البنات مشوا وراها وسط نظراتهم المعاتبة لفواز
فواز قطب جبينه وهو يناظر البغض له بعيونهم
الجدة سدول اتجهت لبيتها/حسبي الله ونعم الوكيل حسبي الله ونعم الوكيل
فواز بصراخ/شفتوا كلكم كلكم ماتسمعون فيه رغم انه الغلطان طيب وانا اسمعوني اسمعوا ليش اقلها وتقولون اهلي!!
ابو فواز/تركتك تهين وتسرح وتمرح على رايك لكن هالمواصيل يافواز!!حسافة ياحسافة يافواز اي والله حسافة/مشى/
فواز/حتى انت يبه حتى انت!!بالطقاق اللي يطقكم قلعتكم كلكم لاتسمعون لي!!/جلس عالفرشة وهو يتقهوى ويجلس وقلبه يشتعل نار منهم/
.
.
،
،
ام ياسر بحضنها عيالها صاحب السنة(سعد) وصاحب الثلاث سنوات(حمد)ناظرته وهو يتثاوب/يُسر اقف على جنب ريّح وثم نكمل الدرب مامن عجلة
ابو ياسر(يُسر)يسوق وهو ميت من النوم/لا لا حتى ناصل بدري والراحة ملحوقة مامن تعب يابنت الحلال مامن تعب
ياسر(22سنة)/يبه اسوق عنك وانت تريّح
ميّسر(20سنة)وانا اناوب معه يبه تريّح
ابو ياسر/هذا الناقص احط ارقابنا بيديكم!!
ام ياسر/عيالك رجال اترك العناد عنك خل يسوقون وتريح واذا ماانت مستوثق بهم قل لحميد يسوق هماك تاثق به
ابو ياسر بعصبية/انا اسوق وقضينا وش فيكم مستلميني اليوم!!اعوذ بالله منكم اعوذ به!!
،،بعد ساعة،،
ابو ياسر صحى من غفوته بفجعة وسط السيارة اللي تلتف فيهم لف على جنب الطريق وسط صياح عياله وصراخ زوجته غمض عيونه من حس بجسمه يطير خارج السيارة وارتمى عالارض وهو يتدحرج وسط وجعه وقف بفجعته وهو يناظر السيارة اللي استقرت صرخ بفجعة وهو يجري للسيارة/ياويل ويلك يايسر ذبحت عيالك ذبحتهم/طلع فوق السيارة اللي على جنبها وفتح الباب وهو يحاول يخرج اللي موجود منهم وسط انهمار دموعه اللي اختلطت بدمه اللي ينزف من راسه وفجعته من الموقف الكبير عليه لحاله سحب سعد بدمه بدون صوت وحركة وسحب حمد الوحيد اللي بكاه مغطي السيارة نزله وهو يحط سعد بحضنه وسط رجفة يديه وصوته/امسك اخوك ياحمد امسكه/رجع للسيارة وانتبه للي ماانتبه له من شوي وهوى عالارض بفجعة وهو يناظر الباقين تحت السيارة صرخ بفجعة من مصيبته/سلمت ارقابهم للموت يايسر سلمتها سلمت حسيبك الله حسيييبك!!
،
،
الـعـم يُسر فز من نومه بفجعة اللي غلبه من تعبه غصب وهو يناظر فراش سعد وقف وهو يحس برجفة تحتويه وهو يسرع بخطواته/يالله لاتفجعني به ياربي ياحبيبي/لف البيت وهو ماحصل احد منهم خرج للمزرعة وهو عيونه تدور بكل مكان بفجعة والف فكرة وفكرة تدور بباله وهو يستغفر ويطردها عنه وقف يلهث وهو يناظرهم/
مريم جالسة قباله بمكان جلستهم المعتادة تناظره بعدم ارتياح وهو يتقهوى بهدوء
سعد بوجهه التعبان اللي للحين ماشفى تماما/تراني منتبه ياعمة
مريم/كل شي بالاول ولا هالبلا اللي يحرق معدتك!!للحين ماطبت
سعد/يطيب الجسم ياعمة يطيب لاتشيلين همه
مريم زفرت بضيق/والقلب ياسعد القلب
سعد بحزن/القلب له ربه وثم الوقت يداويه
مريم/والله ان قلبي تقطع ياسعد يوم نطقت انها متزوجة
سعد بلع عبرته وهو مايناظرها
مريم/ويشهد الله مانويت اقولك العلم لكن مابغيتك ترسم احلام ويضيع عمرك ياسعد وانت تحتريها
سعد دخل يده بجيبه وهو يمد لها الجوال
مريم انصدمت وهي تناظر يده
سعد/من اول ماشفتها وهي حلم اتنفسه وانام واصحى وانا عايش عليه لكن ياعمة دامها حليلة رجل مايحل لي هالنظر وبيحاسبني ربي عليه والله يعفو عن الذي كان
مريم تنهدت وهي تمد يدها وتاخذ الجوال/لك علي ياسعد اخطب لك اللي تسوى اهل اهلها
سعد ابتسم بحزن/بغيناها ياعمة مابغينا اهلها لكن قدر الله وماشاء فعل
مريم/الله يجبر كسرك ياولدي ومعوض خير
الـعـم يُسر بفجعته من مكانه/سعد!!
سعد ابتسم وهو يناظر ابوه ويوقف/قليبي لهالشايب اللي للحين ينوح على اهله قليبي له عسى ربي يقدرني وابره/مشى له بخطوات سريعة/سم ياعيون سعد سم
الـعـم يُسر وهو يتفحصه بنظره بخوفه/وشلونك الحين ياعيني وشلونك
سعد سلم على راسه/على ماتحب يبه على ماتحب
الـعـم يُسر ضمه لحضنه يهدي قلبه المفجوع/عساه بعداك ياعين ابوك عساه بعداك
.
ـــــــــــــــــــــــــ ـــــــــــــــــــــــــ ــــــــــــــــــــــــ
{الـلـيــل}
.
((سيارة بدر))
بدر يسوق بصمت وهو متجه لبيت ابو فواز
فتنة بحالة توتر فضيعة من كمية الافكار وهي طول ليلها تقرا وتبحث عن الارهاب ولاغمضت عينها براحة كله كوابيس تتخلل غفواتها اللي تغلبها بين فترة وفترة وهي تتخيله بكل عملية قرأت عنها شدت على يديها وهي تحبس عبرتها/رضيت الظلم على نفسي لكن ظالم غيره!!كيف اعيش معه يارب رحمتك يارب ارحمني يارب
.
((بيت ابو فواز))
ثابت دخل للبيت وهو يفتح الباب له/حياك حياك
سلطان دخل بوجهه المتجهم المكتسي سواد وشماغه على كتفه الايمن وعقاله بيده وقف وهو يناظره بحدة
فواز جالس على نفس الفرشة وهو ينتظره من فترة زفر وهو يصب له فنجال من هالقهوة اللي من عصريته يشرب منها
سلطان وقف قباله وبحدة يناظره/ليش؟
فواز رفع له عينه/تكلمني
سلطان رماه بالعقال وصرخ/ليش!!
فواز وقف وبحدة صرخ/حقي!!
سلطان بغبنته/وش هو حقك وش هو؟!!
فواز/خذ فوقهن دبل المبلغ واكتب سعرك اللي تبيه وفارق
سلطان قطب جبينه
فواز/اجحد بعد اجحد انك ماقلته!!
سلطان صرخ/هذا جزاي ابي لك المنفعة!!
فواز/منفعة من وراك ماابيها وراضي يسواك ويسوى سنيني اللي عرفتك بها!!
ابو فواز وام فواز خرجوا من البيت وسط تهديدهم للباقين محد يخرج ويناظرون اللي يصير من الصالة والبعض من ورا الباب
الجدة سدول خرجت من بيتها وهي تستند على عكازها/وبحدة من سمعت كلام فواز/اعقب!!!
سلطان رغم صدمته الا انه مااستنكرها ابد زفر بابتسامة/الظاهر اني كنت ازرع بوادي مابه حياة!!
فواز بحدة/من الاول والمكان مـاهـو بلك ولااحدن راضي بك فيه ترمي نفسك بدون كرامة ليش احشم عمرك قلتها لك احشم عمرك لكن ماتسمع!!
سلطان يناظره بابتسامة
ابو فواز صرخ وهو يدفه من كتفه/فوااااز!!
فواز بصراخ/حقي باخذه منه لو على قص رقبتي ومحد له كلمة علي اجل يتحدى بالمعرض قدام الكل وبنفس الليلة يصير الحريق وش رايكم هاه وش رايكم!!
سلطان يناظره بابتسامته/وهاذي سواياي بعينك؟اسويها يافواز يسويها سلطان؟!!
فواز/سويت اللي حرمه الله ورسوله ماانت بعاجز عن ذي ابد!!
سلطان/ليش تنزل قدري وانا ارفعك ليش اقرب منك وانت تبعد يافواز ليش!!
فواز/وش اللي تنتظره مني بعد سواياك وش!!
سلطان/محد نطق حرف غيرك يافواز محد
فواز/ماقالوها قدامك لانها سنين وهي ترن باذني واذن ابوي!!
سلطان/هاذي نهايتنا ياليمين؟!!
ام فواز ناظرته وسط عيونها اللي امتلت دموع/سلطان
فواز/ماني بيمينك ماني بيمينك ماتفهم انت
سلطان هز راسه/صدقت صدقت لان اليمين لاصارت مثلك حقها البتر
فواز احتدت نظرته
ابو فواز انقطع قلبه وهو يفهم كلامه/استهدي بالله ياسلطان
سلطان ناظر ابوه/مهتدي به ومتوكل عليه لكن انت وينك عنه تركت هالسنين تلعب به!!
فواز/هيييه ماعاد تحشم احد انت!!
سلطان ناظره/اما انت لاشفتني يمين امسك يسار لاشفتني جالس لاتدخل المكان اللي انا به
فواز بحدة/الله لايكتب لنا لقى!!
ام فواز ذاب قلبها وانصهر وهي تناظر عيالها يتفرقون مسكته من يده وهي تسحبه معها/لا يافواز لا حب راس اخوك حبه وطيب خاطره
فواز سحب يده وبحدته/ماعاد الا هي!!
سلطان رفع يده بمعنى بس/لاتحب ولااحب بكرة يجور عليك الزمن وتلتفت حولك ولاتلقى احد
فواز/تخسي!!
سلطان/ويومك ماتلقى احد لاتفكر حتى تمشي بالطريق اللي نهايته بيتي
فواز بمكابرة/الله لايقوله!!
سلطان/لاشفتك غصب باحشمك مـاهـو بعشانك لا يشهد الله لشيابك اللي وراك وعهد ذَا البيت مااطبه وانت به عهد علي
ام فواز بكت/وانا وخواتك ياسلطان وش ذنبنا وشو
سلطان ناظر ابوه الصامت/الكلام عند راعي البيت ياام فواز
ام فواز بدموعها/ام سلطان قبل فواز امه ام سلطان
سلطان ابتسم بحسرة/راحت ياام سلطان راحت من اليوم صرتي ام فواز وانتي بحماه ام فواز
ام فواز بكت بحسرة
سلطان التفت لجدته وبرجفة صوته يناظرها/وعجيزي اه ياعجيزي
الجدة سدول وهي تشد بيديها على عكازها تمنع عبرتها/ماوراك عجوز رح الله يسهل دربك عجوزك هي تجيك ياسلطان تجي لك يامضنون العين تجيك
سلطان رفع صوته لخواته اللي منهارين ورا الباب/بوداعة الله ياقطعيات مني بوداعته/لف عنهم وهو يعلن قطيعته لهالبيت ولهالشخص اللي تجبر عليه ويفرض رايه عالكل ماله كلمة بهالمكان ماله كلمة نهائي وذاك متربع بالبيت يكسره بكل لحظة/
.
مصيبة لا تردت قيمتك في عين من قيمت..
يشوفك بالسهل وانته تشوفه بالسما السامي..
مادام ان جانبي شام لجنابك وانت عني شمت..
كثر خيرك، وانا لانيب لا جايع ولا ضامي..
اشوف انه علي واجب، اليا مريتكم سلمت..
مرور كرام تربطها الكرامة عند الاكرامي..
على شان الخفوق اللي على عرشه قعدت وقمت..
وحجب عنك الدجا لين اشرقت لك بيض الأيامي..
مصير الوقت يشرح لك ظروفه لا غفلت ونمت..
يصحيك الزمان اللي يصحي كل من نامي..
وتعرفني لمنها ضاعت اوهامك بمن وهمت..
وعرفت الفرق في حب الخشوم وحب الأقدامي..
ختام السالفة يا طيب العشرة كرمت ودمت..
هذا حقك علي وحق شرهاتي على أوهامي..
(سعد بن جدلان)
.
بارت يستحق حقه من التفاعل🤍🤍
اعتذر عن بارتات الاسبوع الجاي موعدنا الاسبوع اللي بعده واحنا وانتم طيبين❤❤
.
#سلطان_الهوى_يافتنة_الألفية
|