[لامارا]

الإبحار 30 والأخير

بسيارة رعد *

نور :اجل روح لبيت ابوي باخذ جوالي وملابس لي
توجه رعد لبيت ابو نور ونزلت تحط ملابس لسفرتهم
مع اعمام رعد .. بعد دقايق اخذت جوالها وركبت بجنبه حرك رعد وتوجه لبيته واخذ كم لبس وفروته
وطلع واتجهوا لبيت اعمامه .. كانوا طالعين ويتقسمون في السيارات
امل بفرحة : رعد جاء خلونا نروح معه بس احنا البنات
امجاد :منجد فكونا من ماجد المُعقد
نادوا البنات واتجهوا لرعد الي كان يسلم على اعمامه
امل :رعد بنروح معك احنا والبنات
رعد بابتسامه :حياكم
انصدموا كلهم وهم يناظرونه
تسنيم بهمس : هذا الي خلوه يبتسم كلشوي
امجاد : متى اخر مره شفناه يبتسم كذا ؟
امل وهي واقفه قدامه وتتامل ضحكته :ولا مره
حسوا على انفسهم من صرخ عمهم وسحبوا امل من قدام رعد وركبوا سيارته
تسنيم :السلام عليكم
نور بابتسامة :وعليكم السلام كيفكم ؟
ناظروها بصمت وهزوا رؤوسهم بصدمه
امل وهي تكتب بقروب البنات: ذول شفيهم من ساحرهم ؟
امجاد :مدريي!!!
تسنيم :شكل الحب عامل عمايلوه
امل وهي تناظر رعد الي ركب بجنب نور وبتنهيده :اذا ذا حبيبها كيف ما تبينه يعمل عمايله
ضربوها البنات وحست على نفسها

بغرفة اسيل *

توترت ريلام ونطقت بصوت خافت :اطلع بغير فستاني
ثنيان وهو خاق :الله ياخذ الي يطلع وانتي قدامه
ريلام باحراج :بلا استهبال بغير اطلع
ثنيان :ليه تغيرين ؟
ريلام وهي تمسك الفستان من عند صدرها :ضيق ومفتوح ما ارتحت فيه
ثنيان : اسبابك حلوة بعيوني بس غيري لا يشوفونك فيه
وسحب فنجانه وطلع ..
حطت ايدها على قلبها : شفيني متوتره
غيرت لبسها وهي تلبس فستان وسيع شوي وباللون
الكحلي وضبطت شعرها وحطت مكياج خفيف

بعد المغرب *

تجمع الكل ببيت اهل ثنيان وارتفعت الاصوات بمجلس الحريم
ام ثنيان : قصروا صوتكم يا بنات لا يسمعكم ثنيان بيحط فينا سالفه
روان : ما اتوقع الرجال كثير ؟
اسيل : الا كثير زوجي يكفي عنهم
روان وهي تخزها : من زينه
اسيل وهي تضحك: الحمدلله انه شين بعيونك
بعد العشاء راحوا اغلب الضيوف من حريم ورجال
اسيل :بنات تغطوا ثنيان بيدخل يسلم على خالاتي
تغطوا البنات باستثناء اسيل وريلام كانت بالمطبخ
دخل ثنيان وهو يلقي سلامه على خالاته وبناتهم
روان وهي تناظره وتضرب اسيل :اقولك اخوك ما يبي الثانية ؟
اسيل بضحكة : لا تسمعك ريلام
روان : صاير حلو الكلب
اسيل :صدق والله ؟ لا تسبين
روان : اص بس ما خليتي ولا لحم باخواني الا وكليتيه
دخلت ريلام وبايدها كوب عصير انتبهت على الي جالس بصدر المجلس ويسولف مع خالاته
انتبه على الي دخلت وناظرها والابتسامة شاقه وجهه
ريلام بقلبها وهي تناظره: يارب ارحم عبدتك المسلمة

نور ~رعد

رعد وهو يناظر جواله : طريقنا طويل للجنوب بوقف عند سوبر ماركت وخذوا كل احتياجاتكم لان مراح اوقف
امل : واذا ابي الحمام ؟
رعد : نشوفلك حل
وقف عند السوبر ماركت
ونزلوا البنات ونزل وراهم رعد
امجاد : خذوا فصفص
امل : بجيب العصيرات وش تبون ؟
امجاد : حافظه وش نحب
امل ؛ لا باقي نور
نور : مثلكم عادي
التفتوا على الي جاء من وراها :جبت لها معي ميحتاج
تنهدت امل : مالت علي وعلى امجاد
وراحت تجيب لهم
بعد دقايق اشتروا وحاسب رعد وطلعوا
امل وهي تفتح الاكياس : يمه يالجوع حتى الفطور ما افطرنا
تسنيم : عطينا معك بنموت من الجوع
وزعت امل على البنات ورعد
وعم الصمت بالسيارة
امل :وشذا سامجين خلونا نلعب لعبة
نور وهي تشيل طرحتها
ونقابها وتفك شعرها : وش لعبتك ؟
رعد وهو يناظر نور : ليه فكيتي النقاب؟
نور : حر والطريق مافيه احد عادي
رعد : غطي شعرك
امجاد بهمس وهي تناظرهم: خلي لعبتك
امل وهي تسحب فطيرتها : الله ياخذ فارس احلامي
سمعها رعد وضحك: وليش يا انسة امل
امل تنهدت : ما جاء ولا طرا له يجي

" استغفر لربما يزال حزنك "

ببيت اهل ثنيان *

انتهت العزيمة والكل راح لبيته
اسيل :يالله بدر برا انتبهو لانفسكم
سلمت على اهلها وريلام
ريلام :لا تطولين
اسيل :معليك بكره عندك
طلعت ورجعت ريلام وهي تقعد مع عمتها وثنيان
ام ثنيان :وانا بعد استأذنكم
طلعت وبقوا اثنينهم
ثنيان: وانتي ما ودك تنامين؟
ريلام : اكيد صاحية من الصباح بسببك
ضحك ثنيان وقاموا وهم يطلعون لغرفتهم

بعد خمسة اشهر *

كانوا قاعدين كلهم بالصاله
اسيل:يخي متى تولدين اخلصي
ريلام :هذا شهري
ثنيان :الله يسهل عليك واصير ابو متعب
ريلام :مين قال بسمية متعب ؟
ثنيان :انا ابوه
ريلام :وانا امه
ثنيان : ترا اسمي بيصير بعد اسمه مو ريلام
ضحكت اسيل :حلو متعب
قام ثنيان وهو يتركهم وارسل لريلام :صحيني الصباح عندي تدريب ومباراة

وصلوا للجنوب وصاروا يدورون فندق لهم
حصلوا فندق ودخل الكل لغرفته
كان شايل شنطته وشنطة نور ودخل الغرفة
وشافها ترجف :شفيك ؟
نور :بردد ما توقعت كذا ولا جبت ملابس ثقيله
رعد :خذي فروتي
نور :وانت ؟
رعد :انا بنام وبتلحف معليك خذيها
قربت منه وهي تاخذ الفروة من كتفه دخلت فيها وهي تسحب عليه
رعد : يالله امشي نامي ورانا مشاوير
قامت وهي تدخل وراه وتنام بجنبه
رعد وهو حاضنها : واخيرا صرتي بحضني
انحرجت نور وهي تشد على الفروة
رعد عرف انه احرجها وبضحكة: نامي
بالليل *
صحى الكل وهم يركبون السيارات ويقررون مكان الوجهه
امل :رعد امانه لا تروح مع اعمامي بيحطونا في حديقه وبيقفلون علينا
نور :صدق خلينا نتمشى وبعدين نرجع لهم
رعد : ما بعد كلامك كلام
ابتسمت نور وهي ترسل له : ترا استحي من البنات
رعد بصوت عالي :استحي جعل ما يستحي غيرك
وسعت عيونها بصدمه وهي ترسل :رعد مو كذاا
ضحك ووقف عند الكوفي وهو ياخذ لهم قهوة ومشروبات حارة
رعد :يا شيخه نور ما كانك فليتيها بفروتي ؟
نور :تبيها ؟
رعد : مو لحالها

ببيت اهل ثنيان *

صحت ثنيان وهو يتروش ولبس
ملابسه وسلم عليها :يمكن اتاخر عندي مباراة بالليل
هزت راسها:الله يوفقك
طلع وهو يركب سيارته ويتوجه للملعب

بالمغرب *

كانت بغرفتها وترتبها وفجأة صرخت من الوجع
حطت يدها على بطنها وهي تصرخ بصوت عالي
وتنادي على اسيل :اسيييل
ركضت اسيل وام ثنيان وهو يدخلون عليها
ريلام وهي تبكي :بولد بولد
خافت اسيل وهي توقف مكانها وقربت ام ثنيان وصرخت على اسيل وهم يلبسون ريلام عبايتها وطلعوا مع السواق

بالسيارة *

ريلام وهي تبكي وتصرخ : اتصليي بثنيان
اسيل بخوف :اتصلتت عنده مباراة مراح يرد
بكت وهي تشد على يد ام ثنيان
وصلوا للمستشفى وهم ينقلونها لقسم الولادة بسرعه
اسيل وهي تروح وتجي بالممرات :ما يرد ما يرد
ام ثنيان :يمكن دخل الملعب مراح يرد
اسيل :زوجته بالمستشفى بالطقاق في المباراة

عند ثنيان *

كانت مباراته ضد الاتحاد انتهت المباراة بفوز الاتحاد
لاعب اتحادي وهو يمر من عند ثنيان ويضحك :تقولي لاعب اساسي ؟
ناظره ثنيان وقرب منه وهو يسحبه ويلكمه بوجهه
وقربوا لاعبين الاتحاد والاهلي وهم يفكونهم من بعض

" استغفر لربما يزال حزنك "

رعد نور *

وصلوا للحديقة بعد ما تمشوا بالجنوب
جلسوا البنات مع الحريم ..
من بين السوالف انتبهت على اشعار جوالها
رعد :شايفك ترجفين قومي معي
نور :بالعكس النار تكفي
رعد :افهميها ابي اقعد معك
ضحكت نور وقامت وهم يمشون مع بعض
رعد وهو يفتح فروته ويدخلها فيها : لو اخطفك محد درا عنك
نور :شقصدك ؟
رعد ضحك :ولاشي
اشتروا شاهي جمر وتبادلوا السوالف
رعد :حجزت على دول اروربا بنسافر بعد ثلاث ساعات
نور بصدمه :كل اوروبا ؟؟!
رعد بضحكة :لا ايطاليا وسويسرا
ابتمست نور ومشت معه

بعد ساعتين *

اعتذر رعد من اعمامه وقالهم بيسافرون
وسلموا عليهم وركبوا السيارة وتوجهوا للمطار
وصلوا للمطار *
مسكت تذكرتها وهي تقرا اسم المدينة
نور بصرخه :بيرووت ؟؟؟
رعد :لا تصرخين
حضنته وهي تبكي : كليوم احبك اكثرر
رعد :تبكين بلغي السفرة
بعدت عنه وسرعان ما رجعت من سحبها من خصرها :قلنا لا تبكين بس ما قلنا ابعدي
ناظرت في عيونه بكل
حب ضحك رعد وهو يلف :اشوف نية خبيثة بعيونك ؟
نور : لاء
ابعد جزء من نقابها وهو يطبع بوساته وابعد عنها وهو يهمس: والله ما افوت النيات الخبيثة
انحرجت نور وهي تتلفت يمين يسار
مسك رعد ايدها وركبوا طيارتهم

عند ثنيان *

دخل دورات المياة وهو معصب غسل وجهه
وطلع وهو ياخذ جواله من خويه انتبه على الكم الهائل من المكالمات اتصل على اسيل
ابعد الجوال عن اذنه من صرخت اسيل :صرتتت ابووو
صنم مكانه وهو يحاول يتسوعب الي سمعه سكت لثواني ونطق وبهدوء :عيدي شقلتي ؟
اسيل بضحكة:صرتت ابو متعب
ركض وهو يتجاهل نداءات اخوياه والرئيس وصار يدف كل الي قدامه وركب سيارته وهو يتوجه للمستشفى
بعد دقايق *
نزل وهو يترك السيارة شغاله وصل وهو يسالهم عن غرفتها وصار يركض اكثر وقف عند الباب من سمع
بكاء ولده بحضن ريلام ناظرها ورجلينه من شايلته من الفرحة انتبهت اسيل عليه وضحكت وهي تقوم لعنده :مبروكك ما جاك
ناظر اسيل وحضنها بصدمه ،،اسيل بصدمه :من متى تحضني ؟
ابعد ثنيان عنها وهو يسلم على امه ولف على ريلام وقرب منها وهو يجلس بطرف الكرسي ناظرته ريلام وانتبهت على الدمعة بعيونه ابتسمت وهي تمد ايدها وتمسحها له وسرعان ما وسعت عيونها من باسها ومتجاهل وجود امه واخته .،ابعد عنها
ثنيان وهو يحاول يرتب حروفه :مبروك لنا
ريلام باحراج :ومبروك لك
نزل عيونها وهو يناظر ولده بحضنها قرب وهو يشيله ويبوسه بكل قواه ويسمي عليه ..
ام ثنيان :دامك موجود بجنب زوجتك انا واختك بروح نغير لبسنا ونجيب شي تاكله ونجيكم
ما انتبه لامه وهو مركز بملامح ولده
جلس بجنب ريلام :انا اسف لاني ما كنت بجنبك بس اوعدك اول واخر مرة اخليك فيها انتي وولدك
ريلام بكل حب : احبك يبو متعب
ضحك ثنيان :واخيرا سمعت احب كلمتين على قليي منك
ناظرها : وانا اكثر منك
وقرب وهو يطبع بوساته .

مابين قلب وعقل مابين حب وكره مابين مشاعر متناقضه ساقت الاقدار حبك نحو ارضي فتعجبت لطالما اوهمتك بأنني لا اهتم وانا احفظ ادق تفاصيلك مرت عيونك فوق ارضي كالغمام وتسربت بدمي وامتزجت ورأيت القلب طفلًا كلما يلقاك تجري ويهلل كنت احتاج لام تحمل الطفل الصغير ثم تحنو وتدلل اه يا حبي الذي قد زار قلبي منذ كنا في رحاب الغيب طيناً يتشكل لست غارقا الا بك
احبك اتمنى ان يكون تمعني لك ابدي و أن نتمادى بتكثف المحبه ونتنعم ان تقع بعاطفتي كل مرة وكأنها المرة الأولى بعيش هذا الحب كله ان ارعاك لانه لولاك لم إنهال علي الحنان تجاه كل ما المسه واقوله ان لا تترجل كونك النبته الناعمه في حياتي في خضم كل هذه القسوه ف اختلافك عن البقيه هو اكثر ما يجذبني نحوك يسحبني اتجاهك باستمرارية ولم اتخيل ان يتواجد شخص يحمل كل هذه الكمية من الكمال
شخص يشبهني
-
إنني معك لستُ بحاجة لإظهار ‏جانبي اللطيف ‏بينما أنا معقدة أكثر من اللازم
‏وأنت تُحبني ‏بهذه العُقد الداخلية ‏بطريقتي التي تجعل الأشياء باهِته
‏وبعطفك البالغ ‏الذي يُحول سوداويتي الداكِنة ‏إلى حياةٍ وردية

___ ___ ___ ___

النهاية

والى هنا انتهت روايتنا وانتهى ابحارنا الثاني
اتمنى انها اعجبتكم بكل احداثها ومواقفها وشخصياتها ..سعيدة لاني انهيت ابحاري الثاني معاكم وشكرا لدعمكم من اول بارت .❤️
ابيحوا بارائكم بهذا البوست ..❤️

بعد 30 بارت من الحب احببتك
بلا تردد بلا خوف بكل مشاعر الحُب
21/1/2022
18/6/1443
اُبحرت بحب 🤍
والحمدلله